ಇಂಫೆರ್ನಾಚಿಂ ದಾರಾಂ – 5: ಸೊಧ್ನೆಚ್ಯಾ ವಾಟೆರ್ ಪಯ್ಲೊ ಫಾರ್

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 5
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 5: ಸೊಧ್ನೆಚ್ಯಾ ವಾಟೆರ್ ಪಯ್ಲೊ ಫಾರ್

ಸರ್ದಾರ್ ಸಿಮಾಂವ್ಚೊ ಧೆಂಕ್ಣೊ ಆಯ್ಕೊನ್, ವೀರಪ್ಪ ನಾಯ್ಕ್ ಏಕ್ ಪಾವ್ಟಿಂ ಉಡೊನ್ ಪಡ್ಲೊ.

“ಮಾಫ್ ಕರ್ ಸರ್ದಾರಾ” ಮ್ಹಣಾಲೊ ತೊ ಭಿಯಾನ್. “ಹಾಂವೆಂ ಸಾಂಗ್‍ಲ್ಲೆ ವಿಷಯ್ ಸತ್. ತೆ ತುಮ್ಕಾಂ ತಕ್ಷಣ್ ಕಳಯ್ಜಾಯ್ ಮ್ಹಳ್ಳ್ಯಾ ವ್ಹಡ್ ಆತುರಾಯೆನ್…”

“ಬೆಜಾರ್ ಕರಿನಾಕಾ” ಮ್ಹಣಾಲೊ ಸರ್ದಾರ್ ಸಿಮಾಂವ್, ಆಪ್ಲ್ಯಾ ರೂಂದ್ ಕಪಾಲಾಚೆರ್, ಆಪ್ಲಿಚ್ ತಳ್ವ್ಯಾಪಾಟ್ ದಾಂಬುನ್. “ಆಮ್ಕಾಂ ಪಯ್ಣಾಚಿ ಪುರಾಸಣ್ ಆಸ್ತಾನಾ, ಪಾಟಾಪಾಟ್ ಅಸಲಿ ಖಬರ್ ಆಯ್ಕೊನ್, ಘಡಿಭರ್ ಮ್ಹಜೆಂ ಸಂಯಮ್ ಚುಕ್ಲೆಂ. ತುವೆಂ ಸಾಂಗೊಂಕ್ ಆಸ್ಚೆಂ ಸರ್ವ್ ವೆಗಿಂ ಸಾಂಗೊನ್ ಮುಗ್ದಿ.”

ಖಿಲ್ಲೆದಾರ್ ವೀರಪ್ಪ ನಾಯ್ಕ್ ಬಾವ್ಡ್ಯಾನ್, ತಾಕಾ ಕಳಿತ್ ಆಸ್‍ಲ್ಲ್ಯೊ ಗಜಾಲಿ, ಆಸಾ ತಶ್ಯೊ ಸಾಂಗ್ಲ್ಯೊ:

ಸರ್ದಾರ್ ಸಿಮಾಂವ್, ದುಸ್ರೆ ಪಾವ್ಟಿಂ ಬೋಳೂರ್ ಠಾಣ್ಯಾಕ್, ಸರ್ದಾರ್ ಯೂಸುಫ್ ಆಲಿ ಸಾಂಗಾತಾ ಯೇವ್ನ್, ಟಿಪ್ಪುಚ್ಯಾ ಆದೇಶಾ ಪ್ರಕಾರ್ – ಝಡ್ತಿ ಕರ್ನ್, ಫರ್ಮಾಣ್ ದೀವ್ನ್ ಗೆಲ್ಯಾ ಉಪ್ರಾಂತ್, ಠಾಣ್ಯಾಚೊ ಖಿಲ್ಲೆದಾರ್ ಭಿಯಾನ್ ಅರ್ಧೊ ಪಿಸೊ ಜಾಲ್ಲೊ – ಸರ್ದಾರ್ ಸಿಮಾಂವ್ನ್ ಗುಪಿತ್ ಅಪೇಕ್ಷಿಲ್ಲೆಂ ತೆಂಚ್… ಅತಾಂ ತಾಕಾ ಉಲ್ಟೆಂ ರಾವ್ಲೆಂಯೀ ತೆಂಚ್.

ಬೋಳೂರ್‌ಚ್ಯಾ ಜಯ್ಲಾಕ್, ಸರ್ದಾರ್ ಸಿಮಾಂವ್ನ್ಂಚ್, ಪಾತ್ಯೆಣಿ ಆಸ್‍ಲ್ಲ್ಯಾ ಇಸ್ಮಾಯಿಲ್ ಬಾಬಾ ನಾಂವಾಚ್ಯಾ ಜಮೆದಾರಾಕ್ ಅಧಿಕಾರಿ ಕೆಲ್ಲೊ. ಬೋಳೂರ್ ಠಾಣ್ಯಾಚ್ಯಾ ಶಿಪಾಯಾಂ ಮಧೆಂ ಅಸಮಾಧಾನ್ ಆನಿ ಅಶಿಸ್ತ್ ಚಡ್ ಜಾಂವ್ಚೊ ಸಂಭವ್ ಆಸ್‍ಲ್ಲ್ಯಾನ್, ಥಂಯ್ಚ್ಯಾ ಅರ್ಧಿ ಕಂಪ್ನಿ ಶಿಪಾಯಾಂಕ್ ಬೋಳಾರ್ ಠಾಣ್ಯಾಕ್ ಧಾಡ್ನ್, ಥಂಯ್ಚ್ಯಾ ಅರ್ಧಿ ಕಂಪ್ನಿ ಶಿಪಾಯಾಂಕ್ ಬೋಳೂರ್ ಠಾಣ್ಯಾಕ್ ವರ್ಗಾಂತರ್ ಕೆಲ್ಲೆ. ಬೋಳೂರ್ ಠಾಣ್ಯಾಂತ್ ಘಡ್ಚ್ಯಾ ಫುಡ್ಲ್ಯಾ ವಿಷಯಾಂಚೆರ್ ದೊಳೊ ದವರುಂಕ್, ಫಾವೊತ್ಯಾ ಪರ್ಮಾಣೆಂ ವ್ಯವಸ್ಥಾ ಕರಿಜಾಯ್ ಮ್ಹಣ್, ಗುಪಿತ್, ವೀರಪ್ಪ ನಾಯ್ಕಾಕ್ ತಾಣೆಂ ಹುಕುಮ್ ದಿಲ್ಲಿ.

ಪುಣ್, ವೀರಪ್ಪ ನಾಯ್ಕಾನ್ ಜಾಂವ್, ಹೆರಾಂನಿ ಜಾಂವ್ ಅಪೇಕ್ಷಿಲ್ಲ್ಯಾ ಪ್ರಾಸ್ ಚಡ್ ತುರ್ತಾನ್, ಬೋಳೂರ್ ಠಾಣ್ಯಾಂತ್ಲೊ ಗೊಂದೊಳ್ ಚಡ್ ಜಾಲ್ಲೊ. ತೀನ್-ಚಾರ್ ದಿಸಾಂ ಭಿತರ್, ಬೋಳೂರ್ಚ್ಯಾ ಠಾಣ್ಯಾಂತ್ – ಹೆರ್ ಕೊಣಾಯ್ಕೀ ತಿ ಖಬರ್ ನಾಸ್ತಾಂ – ಖಿಲ್ಲೆದಾರಾಕ್ ‘ಸಹಾಯಕ್’ ಜಾವ್ನ್, ಎಕ್ಲೊ ನವೊ ಮನಿಸ್ ದರ್ಬಾರಾನ್ ಅಧಿಕಾರ್ ಚಲಂವ್ಕ್ ಲಾಗ್ಲೊ.

ಘೊಟಾಳೊ ಕಸಲೊ ಮ್ಹಣ್ ಮತಿಕ್ ವಚನಾಸ್ತಾಂ, ಇಸ್ಮಾಯಿಲ್ ಬಾಬಾನ್ ವೀರಪ್ಪ ನಾಯ್ಕಾಕ್ ಖಬರ್ ಧಾಡ್‍ಲ್ಲಿ.

“ತೆಂ ಆಯ್ಕೊನ್, ಖಿಲ್ಲೆದಾರಾ ಲಾಗಿಂ ಖಬರ್ ಸಮ್ಜೊನ್ ಘೆತಾಂ ಮ್ಹಣೊನ್ ಹಾಂವ್, ಗೆಲೆತ್ಯಾ ಹಫ್ತ್ಯಾಂತ್ ಬೋಳೂರ್ ಠಾಣ್ಯಾಕ್ ಗೆಲೊಂ” ಮ್ಹಣೊನ್, ಸರ್ದಾರ್ ಸಿಮಾಂವ್ಕ್ ವಿವರ್ ದೀಂವ್ಕ್ ಲಾಗ್ಲೊ.

“ಉಪ್ರಾಂತ್ ಕಿತೆಂ ಜಾಲೆಂ?” ವಿಚಾರ್ಲೆಂ ಸರ್ದಾರ್ ಸಿಮಾಂವ್ನ್.

“ಜಾಂವ್ಚೆಂ ಕಿತೆಂ – ಹಾಂವ್ ಥಂಯ್ ಥಾವ್ನ್, ಮರ್ಯಾದ್ ಸಾಂಬಾಳ್ನ್ ಪಾಟಿಂ ಹಾಂಗಾ ಆಯಿಲ್ಲೆಂ ವ್ಹಡ್ ಅಜ್ಯಾಪ್.”

“ಕಿತ್ಯಾಕ್?”

“ಹಾಂವ್ ಥಂಯ್ ವೆತಾನಾ, ಖಿಲ್ಲೆದಾರ್ ನಾತ್‍ಲ್ಲೊ – ತೊ ಖಂಯ್ ಗೆಲಾ ವಾ ಕೆದಾಳಾ ಪಾಟಿಂ ಯೆತಲೊ ಮ್ಹಳ್ಳೆಂ ಕಳಿತ್ ನಾ ಮ್ಹಣ್ ಸಾಂಗೊನ್, ತಾಚೊ, ತಾಣೆಂಚ್ ನಮಿಯಾರ್‌ಲ್ಲೊ ‘ಸಹಾಯಕ್’ ಅಧಿಕಾರ್ ಚಲಯ್ತಾಲೊ! ಮ್ಹಾಕಾ ಚಡ್ ಉಲಂವ್ಕ್ ಆಸ್ಪದ್ ದೀಂವ್ಕ್ ನಾ ತಾಣೆಂ!” ಪುಸ್ಪುಸ್ಲೊ ನಾಯ್ಕ್.

“ಆಹಾಂ!” ಮ್ಹಳೆಂ ಸರ್ದಾರಾನ್. “ತಾಕಾ ಏಕ್ ಲಾಥ್ ದೀವ್ನ್ ತುವೆಂ ಕಿತ್ಯಾಕ್ ಉಸ್ಳಾಂವ್ಕ್ ನಾಂಯ್? ಕಿತೆಂ ಜಾವ್ಯೆತ್ ನಾಂವ್ ತಾಚೆಂ?”

“ತಾಚೆಂ ನಾಂವ್… ಷೇರ್‍ಖಾನ್” ಮ್ಹಣಾಲೊ ತೊ “ನಟನ್ ಸುಮಾರ್ ವಾಗಾಪರಿಂ ಕರ್ತಾ ಜಾಲ್ಯಾರೀ, ಪಳೆಂವ್ಕ್ ಸುಮಾರ್ ಸುಣ್ಯಾಕ್ ಜಾಲ್ಲ್ಯಾ ಮಾಜ್ರಾಪರಿಂ ದಿಸ್ತಾ… ಮಾಫ್ ಕರ್ ಸರ್ದಾರಾ… ತಾಚೊ ಉಡಾಸ್ ಕಾಡ್ತಾನಾ ಮ್ಹಾಕಾ ಆಂಗ್ ಜಳ್ತಾ!”

“ಆಸೊಂ. ತಾಚಿ ಖಬರ್ ಉಪ್ರಾಂತ್ ಘೆವ್ಯಾಂ. ಖಿಲ್ಲೆದಾರಾಚಿ ಖಬರ್ ಫುಡೆಂ ಕಿತೆಂ ಜಾಲಿ?”

“ಫುಡೆಂ ತಾಚಿ ಖಬರ್‌ಚ್ ನಾ.”

“ಮ್ಹಣ್ಜೆ..?”

“ಮ್ಹಣ್ಜೆ, ಹಾಂವ್ ಹಟಾನ್ ಆನಿ ಪಂಥಾನ್ ಮ್ಹಳ್ಳೆಪರಿಂ, ದುಸ್ರ್ಯಾ ದಿಸಾ ಪರ್ತ್ಯಾನ್ ಬೋಳೂರ್ ಠಾಣ್ಯಾಕ್ ಗೆಲೊಂ.”

“ಕಿತೆಂ ಜಾಲೆಂ?”

“ಆಮ್ಚ್ಯಾ ಆದ್ಲ್ಯಾ ಖಿಲ್ಲೆದಾರಾಚೊ ಪತ್ತೊ ನಾ.”

“ತುಕಾ ದುಬಾವ್ ಮಾರ್‌ಲ್ಲೊ ಖರೊ. ತಾಚೊ ತೊ – ಷೇರ್‌ಖಾನ್ ಕಿತೆಂ ಮ್ಹಣಾಲೊ?”

“ತೆಂಚ್ ಸಾಂಗ್ತಾಂ. ತಿಸ್ರ್ಯಾ ದಿಸಾ ಹಾಂವ್ ಪರ್ತ್ಯಾನ್ ಗೆಲೊಂ. ಊಹುಂ… ಖಿಲ್ಲೆದಾರ್ ನಾ. ಷೇರ್‌ಖಾನ್, ಆಪುಣ್‍ಂಚ್ ನವೊ ಖಿಲ್ಲೆದಾರ್ ಮ್ಹಣೊನ್ ರಾಜ್ ಚಲಯ್ತಾ. ತ್ಯಾ ತೆಕಿದ್…”

“ತ್ಯಾ ತೆಕಿದ್?”

“ತ್ಯಾ ತೆಕಿದ್, ಬೋಳೂರ್ ಠಾಣ್ಯಾಂತ್ ಉರ್‌ಲ್ಲೆ, ಆನಿ ತುಜ್ಯಾ ತೀರ್ಪಾ ಪರ್ಮಾಣೆಂ ಮಾರ್ ಖಾವ್ನ್ ಶಿಕ್ಷಾ ಭೊಗ್‍ಲ್ಲೆ, ಆದ್ಲೆ ಶಿಪಾಯ್, ತಾಕಾ ಫುಗಾರ್ತಾತ್ ಆನಿ ತಾಣೆಂ ಸಾಂಗ್‍ಲ್ಲೆಪರಿಂ ನಾಚ್ತಾತ್! ತೆಂ ಸರ್ವ್ ಪಳೆವ್ನ್, ಹಾಂವೆಂ ಜಟ್‍ಪಟ್ ವರ್ದಿ ಧಾಡ್ಲಿ.”

“ತುವೆಂ ಬರೆಂ ಕೆಲೆಂಯ್. ಆನಿ ಕಸಲ್ಯಾಯೀ ಕಾರಣಾನ್ ಜಾಂವ್… ಹಾಂವ್‍ಂಚ್ ಇತ್ಲ್ಯಾ ವೆಗಿಂ ಪಾಟಿಂ ಯೇವ್ನ್ ಪಾವ್‍ಲ್ಲೆಂಯೀ ಬರೆಂಚ್ ಜಾಲೆಂ ಮ್ಹಣ್ ದಿಸ್ತಾ. ಪುಣ್ ತುವೆಂ ತೊಂಡ್ಪಾಶಿಂ ಧಾಡ್‍ಲ್ಲಿ ವರ್ದಿ?”

“ವ್ಹಯ್. ಖಿಲ್ಲೆದಾರ್ ಪರಾರಿ ಜಾಲ್ಲಿ ವರ್ದಿ ಧಾಡ್ಚ್ಯಾ ಆದಿಂ, ಮ್ಹಾಕಾ, ತುಮಿ ಸಾಂಗ್‍ಲ್ಲೆಪರಿಂ, ಬೊಕ್ಕಪಟ್ಟಣಾಚೊ ಉಡಾಸ್ ಆಯ್ಲೊ. ಕಾಂಯ್ ಗುಪಿತ್ ವರ್ದಿ ಪುಣೀ ಆಸ್ಲ್ಯಾರ್ ವಿಚಾರ್ಯಾಂ ಮ್ಹಣ್ ಖುದ್ದ್ ಹಾಂವ್‍ಂಚ್ ಹಸ್ಸನ್ ಮಹಮ್ಮದಾಗೆರ್ ಗೆಲೊಂ…”

“ಮುಂದರ್ಸಿ.”

“ಹಸ್ಸನ್ ಮಹಮ್ಮದ್, ಥೊಡ್ಯಾ ಕಲಾಸ್ಯಾಂಕ್ ಘೆವ್ನ್, ಸರಕ್ ವ್ಹಾವವ್ನ್, ತಾಚ್ಯಾ ‘ಫಾತಿಮಾ’ ಮಂಜೆಚೆರ್ ಭಾಯ್ರ್ ಸರೊನ್ ಭಟ್ಕಳಾಕ್ ಗೆಲಾ ಖಂಯ್… ಘರಾಂತ್ ತಾಚ್ಯೊ ಸ್ತ್ರೀಯೊ, ಚಾಂದ್‍ಬೀಬಿ ಆನಿ ಫರೀದಾ ಬೇಗಮ್, ರಡೊನ್ ಆಸ್‍ಲ್ಲಿಂ.”

“ಕಸಲಿ ಖಬರ್ ಮೆಳ್ಳಿ?” ಸರ್ದಾರ್ ಸಿಮಾಂವ್ನ್ ವಿಚಾರ್ಲೆಂ. ಭಿತರ್ಲ್ಯಾ ಭಿತರ್ ಖಂತಿಚೆಂ ಆನಿ ಆತುರಾಯೆಚೆಂ ಫುಗಾಸಾಂವ್ ತಾಕಾ ಭೊಗ್ಲೆಂ.

“ಆದ್ಲ್ಯಾಚ್ ದಿಸಾ, ಮ್ಹಳ್ಯಾರ್, ಹಾಂವ್ ತಾಂಗೆರ್ ಗೆಲ್ಲ್ಯಾ ಆದ್ಲ್ಯಾ ದಿಸಾ…” ಸಾಂಗಲಾಗ್ಲೊ ವೀರಪ್ಪ ನಾಯ್ಕ್. “ಹಸ್ಸನ್ ಮಹಮ್ಮದಾಗೆರ್, ಕುಞಿಕುಟ್ಟಿಚ್ಯಾ ಬದ್ಲೆಕ್ ಕಾಮ್ ಕರ್ಚ್ಯಾ ತ್ಯಾ ಹಮೀದಾ ಕಡೆನ್ ಕೊಣೆಂಗೀ ಸಾಂಗೊನ್ ಧಾಡ್ಲೆಂ ಖಂಯ್… ಕಾವೂರ್, ದುಮ್ಗಾ ಪಿಂತಾಚ್ಯಾ ಘರಾಂತ್, ಇಜಾಬೆಲ್ ತೆರೆಜ್ ಅಸ್ವಸ್ಥ್ ಆಸಾ, ದೆಕುನ್ ವೆರೊನಿಕಾಬಾಯೆನ್ ಚಿಕ್ಕೆ ಯೇವ್ನ್ ವಚಜಾಯ್ ಮ್ಹಣ್…”

“ಕುಂವರ್ನ್ ಇಜಾಬೆಲ್ ತೆರೆಜ್… ಮುಂದರ್ಸಿ.” ಮ್ಹಣಾಲೊ ಸರ್ದಾರ್ ಸಿಮಾಂವ್, ಪರ್ತ್ಯಾನ್ ಕಪಾಲಾರ್ ತಳ್ವ್ಯಾಪಾಟ್ ತಾಣೆಂ ಸಾರಯ್ಲಿ. ಸರ್ವ್ ವಾಟೆಂನಿ ಇಂಫೆರ್ನಾಚಿಂ ದಾರಾಂ ಉಗ್ತಿಂ ಜಾಂವ್ಚೊ ಅನುಭವ್ ತಾಚ್ಯಾ ಕಾಳ್ಜಾಕ್ ಅರ್ನೊಂಕ್ ಲಾಗ್ಲೊ. ವೀರಪ್ಪ ನಾಯ್ಕ್ ಮುಖಾರ್ ಸಾಂಗಲಾಗ್ಲೊ:

“ಇಜಾಬೆಲ್ ತೆರೆಜ್ ಅಸ್ವಸ್ಥ್ ಆಸಾ ಮ್ಹಣ್ ಆಯ್ಕತಚ್, ವೆರೊನಿಕಾಬಾಯ್ ಸಾಂಜೆಚ್ಯಾ ಚಡುಣೆಂ ಸಾಡೆ ತೀನ್ ವೊರಾರ್, ಮುಸ್ಲಿಮ್ ಸ್ತ್ರೀಯಾಂಚ್ಯಾ ವೆಸಾರ್, ಕಾವೂರಾಕ್ ವಚೊನ್ ಯೆತಾಂ ಮ್ಹಣ್ ಭಾಯ್ರ್ ಸರೊನ್ ಗೆಲ್ಲಿ. ಪಾಟಿಂ ತಿ ಯೇಂವ್ಕ್ ನಾ… ಪುಣ್ ಕಾವೂರಾಕ್‍ಯೀ ತಿ ಪಾವೊಂಕ್ ನಾ.”

“ವಿವರ್?” ಸರ್ದಾರ್ ಸಿಮಾಂವ್ ಘಾಮೆಲೊ.

“ಮ್ಹಳ್ಯಾರ್, ದುಸ್ರ್ಯಾಚ್ ದಿಸಾ ಸಕಾಳಿಂ, ಖುದ್ದ್ ಇಜಾಬೆಲ್ ತೆರೆಜ್‍ಚ್ ತಾಂಕಾಂ ಪಳೆವ್ನ್ ವೆತಾಂ ಮ್ಹಣ್ ಬೊಕ್ಕಪಟ್ಟಣಾಕ್ ಆಯ್ಲಿ… ತಿ ಅಸ್ವಸ್ಥ್ ನಾತ್‍ಲ್ಲಿ ವಾ ತಿಣೆಂ ಕಸಲಿಯೀ ಖಬರ್ ಸಾಂಗೊನ್ ಧಾಡುಂಕ್‍ಯೀ ನಾತ್‍ಲ್ಲಿ ಮ್ಹಣ್ತಚ್, ಕಸಲೊ ಪುಣೀ ಘಾತ್ ಜಾಲಾ ಮ್ಹಳ್ಳೆಂ ಸ್ಪಷ್ಟ್ ಜಾಲೆಂ. ಆಕಾಂತೊನ್ ಆನಿ ದುಖಾನ್, ಇಜಾಬೆಲ್ ತೆರೆಜ್ ಪಾಟಿಂ ಗೆಲ್ಲಿ… ಹಾಂವ್ ವೆತಾನಾ ತಿ ಗೆಲ್ಯಾ.”

“ಆನಿ… ತೊ ಹಮೀದ್?”

“ಹಮೀದ್ ಆಸ್‍ಲ್ಲೊ. ಖಬರ್ ಆಯ್ಕೊನ್ ತೊಯೀ ಕಾಲುಬುಲೊ ಜಾಲ್ಲೊ, ಆನಿ ರಡ್ತಾಲೊ. ತಾಂಚ್ಯಾ ಘರಾ ಥಾವ್ನ್ ಚಿಕ್ಕೆ ಪಯ್ಶಿಲ್ಯಾನ್, ಆದ್ಲ್ಯಾ ದಿಸಾ ತೊ ವೆತಾನಾ, ಎಕಾ ಭುರ್ಗ್ಯಾನ್ ತಾಳಿಯೊ ಪೆಟುನ್ ಆಪವ್ನ್, ಆಪುಣ್ ಕಾವೂರ್ ಕಾಮಾಕ್ ರಾವ್‍ಲ್ಲೊ ನವೊಚ್ ಗ್ರಾಯ್ಕ್, ಇಜಾಬೆಲ್ ತೆರೆಜ್ ಅಸ್ವಸ್ಥ್ ಆಸಾ, ವೆರೊನಿಕಾಬಾಯೆಕ್ ಆಪಯ್ಲಾಂ ಮ್ಹಣ್ ಸಾಂಗ್‍ಲ್ಲೆಂ ಖಂಯ್. ಚಡಿತ್ ಕಾಂಯ್ ವಿಚಾರ್ಚ್ಯಾ ಆದಿಂಚ್ ತೊ, ಆಯಿಲ್ಲ್ಯಾ ವಾಟೆನ್ ಪಾಶಾರ್ ಜಾಲ್ಲೊ ಖಂಯ್. ಹೆಂ ಆಯ್ಕೊನ್ ಹಾಂವೆಂ ತುಮ್ಕಾಂ, ತೊಂಡ್ಪಾಶಿಂ, ತಿ ವರ್ದಿ ಧಾಡ್‍ಲ್ಲಿ.”

“ತಶೆಂ ಕೆಲ್ಲೆಂ ಬರೆಂ ಜಾಲೆಂ. ಉಪ್ರಾಂತ್ ಕಾಂಯ್ ತರೀ ಖಬರ್ ವಾ ವಿವರ್…”

“ನಾ ಸರ್ದಾರಾ. ಹಾಂವೆಂ ಕೆಲ್ಲ್ಯಾ ಪ್ರಯತ್ನಾಕ್ ಫಳ್ ಮೆಳೊಂಕ್ ನಾ. ಮ್ಹಾಕಾ ನಿಜಾಯ್ಕೀ ಚುರ್ಚುರೆ ದಿಸ್ತಾತ್. ಫಕತ್ ‘ಗೆ’ ಖಬರ್ ಆಯ್ಕೊನ್ ವೆರೊನಿಕಾಬಾಯೆನ್ ತಿತ್ಲ್ಯಾ ಅಮ್ಸೊರಾನ್ ವಚನಾಯೆ ಆಸ್‍ಲ್ಲೆಂ.”

“ತಶೆಂ ಮ್ಹಣ್ಚೆಂ ಭೆಶ್ಟೆಂ” ಮ್ಹಣಾಲೊ ಸರ್ದಾರ್ ಸಿಮಾಂವ್, ದೀರ್ಘ್ ಶ್ವಾಸ್ ಸೊಡುನ್. “ತಸಲ್ಯಾ ವೀರ್ ಸ್ತ್ರೀಯಾಂಕ್ ತುಂ ವಳ್ಕನಾಂಯ್. ಹೆರಾಂಕ್ ಆಪ್ಣಾಚಿ ಗರ್ಜ್ ಆಸಾ ಮ್ಹಣ್ ಆಯ್ಕಲ್ಯಾರ್, ಅಪಾಯ್ ವಾ ಸ್ವಾರ್ಥ್ ಚಿಂತುನ್ ಭಿತರ್ ರಾಂವ್ಚಿಂ ಮನ್ಶ್ಯಾಂ ತಿಂ ನಹಿಂ!” ಉಪ್ರಾಂತ್ ಆಪ್ಣಾಯಿತ್ಲ್ಯಾಕ್‍ಚ್ ಮ್ಹಣಾಲೊ ತೊ: “ಭಾವಾರ್ಥಾ ಖಾತಿರ್ ಆನಿ ಭಾಂವ್ಡಾಂ ಖಾತಿರ್ ಆಡವ್ ದವರ್‌ಲ್ಲೆ ಜೀವ್ ತೆ!”

“ಆತಾಂ ಕಿತೆಂ ಕರ್ಚೆಂ ಸರ್ದಾರ್?” ವಿಚಾರ್ಲೆಂ ವೀರಪ್ಪ ನಾಯ್ಕಾನ್.

“ಸಾಂಗ್ತಾಂ. ಪುಣ್ ಕಾಲ್ ಫಾಂತ್ಯಾರ್ ವಾ ರಾತಿಂ, ತಿಚಿ ಭಯ್ಣ್ ಮೊನಿಕಾಬಾಯ್ ನಪಂಯ್ಚ್ ಜಾಲ್ಯಾ ಮ್ಹಳೆಂಯ್ ತುವೆಂ.”

“ಹಾಂ, ವ್ಹಯ್. ತಿ ಗಜಾಲ್ ಆನಿಕೀ ವಿಚಿತ್ರ್ ದಿಸ್ತಾ” ಮ್ಹಣಾಲೊ ವೀರಪ್ಪ ನಾಯ್ಕ್. “ತುಮ್ಕಾಂ ಹಾಂವೆಂ, ‘ಮೊನಿಕಾಬಾಯ್ ನಾ ಜಾಲ್ಯಾ’ ಮ್ಹಣ್ ಖಬರ್ ದಿತಾನಾ, ಆನ್ಯೇಕ್ ಗಜಾಲ್ ಸಾಂಗೊಂಕ್ ನಾ.”

“ಕಸಲಿ ಜಾವ್ಯೆತ್ ತಿ?”

“ಮೊನಿಕಾಬಾಯ್ ನಪಂಯ್ಚ್ ಜಾಲ್ಲ್ಯಾ ವೆಳಾರ್ ಥಾವ್ನ್, ಹಸ್ಸನ್ ಮಹಮ್ಮದಾಗೆರ್ ಕಾಮಾಕ್ ಆಸ್‍ಲ್ಲೊ ತೊ ಯುವಕ್ ಹಮೀದ್‍ಯೀ ದಿಸನಾ!”

“ಹ-ಹ್ಹ-ಹ್ಹಾ!” ಹಾಸೊನ್, ಸರ್ದಾರ್ ಸಿಮಾಂವ್ ಉಟ್ಲೊ. ನಿಜಾಯ್ಕೀ ವಿನೋದ್ ಚಿಂತುನ್ ವಾ ಸಂತೊಸಾನ್ ಆಯಿಲ್ಲೊ ಹಾಸೊ ನಹಿಂ, ಬಗಾರ್ ತಾಚೊಚ್ ಫುಡಾರ್ ಆನಿ ಜೀವ್ ಲೆಗುನ್ ವರ್ತ್ಯಾ ಅಪಾಯಾಂತ್ ಆಸ್‍ಲ್ಲ್ಯಾ ಹ್ಯಾ ವೆಳಾರ್ – ಪಾಟಾಪಾಟ್ ಆಯ್ಕೊಂಕ್ ಮೆಳ್‍ಲ್ಲಿ ಖಬರ್ ಆನಿ ಸನ್ನಿವೇಶಾಂಚೆ ಆಟೆವಿಟೆ ಚಿಂತುನ್ – ಜಿವಾಂತ್ ಭೊಗ್ಚೆ ಉಬ್ದೆಸ್ ಭಾಯ್ರ್ ಘಾಲ್ಚ್ಯಾ ಖಾತಿರ್, ಸ್ವಯಂಪ್ರೇರಿತ್ ಜಾವ್ನ್ ತಾಣೆಂ ಕೆಲ್ಲೊ ಆವಾಜ್ ತೊ. ತಶೆಂ ಆಸ್ತಾಂ, ಆಪ್ಣೆಂಚ್ ಕಾಂಯ್, ಶಿಂತಿದಾಚಿ ಸುಟಿ ಘೆಂವ್ಚಿ ಪರಿಸ್ಥಿತಿ ಪಯ್ಸ್ ಆಸ್ಚಿ ನಾ ಮ್ಹಣ್ ತಾಕಾ ಭೊಗ್‍ಲ್ಲ್ಯಾಂತ್ ಅಜ್ಯಾಪ್ ನಾ.

ಖಿಲ್ಲೆದಾರ್ ವೀರಪ್ಪ ನಾಯ್ಕಾನ್, ಮೊನಿಕಾ ಕುವೆಲ್ ತೆಲ್ಲಿಸ್ ಮಾಯಾಗ್ ಜಾಲ್ಲ್ಯಾ ಸಂಬಂಧಿಂ ದಿಲ್ಲ್ಯಾ ವಿವರಾಂತ್, ಇತ್ಲೆಂ ತಾಕಾ ಸಮ್ಜಲೆಂ:

ಮಾನಿನ್ ವೆರೊನಿಕಾ ಕುವೆಲ್ ನಾ ಜಾಲ್ಲ್ಯಾ ಖಾತಿರ್, ಕಿತ್ಲಿ ಖಂತ್ ಆನಿ ದುಖ್ ಭೊಗ್ಲ್ಯಾರೀ, ಮೊನಿಕಾನ್, ಇಜಾಬೆಲ್ ತೆರೆಜಾನ್ ಆನಿ ಉರ್ಲೆಲ್ಯಾ ಹೆರ್ ಥೊಡ್ಯಾಂನಿ, ತಾಣಿಂ ಧರ್‌ಲ್ಲಿ ಸಮಾಜ್ ಸೆವಾ ಜಾಂವ್, ಮಾಗ್ಣ್ಯಾ ಜಮಾತಿ ತಸಲ್ಯೊ ಧಾರ್ಮಿಕ್ ರಾಟಾವಳಿ ಜಾಂವ್ ಬಾಕಿ ಕರುಂಕ್ ನಾಂತ್. ತಶೆಂ, ಸರ್‌ಲ್ಲ್ಯಾ ಆಯ್ತಾರಾ ರಾತಿಂ, ಕೊಡಿಯಾಲ್‍ಬೈಲ್, ಕುವೆಲಿಂಗೆಲ್ಯಾ ಘರಾಂತ್, ಗುಪಿತ್ ಜಾಂವ್ಕ್ ಆಸ್‍ಲ್ಲ್ಯಾ ಜಮಾತೆಂತ್ ಪಾತ್ರ್ ಘೆಂವ್ಕ್ – ಆನಿ ಪ್ರತ್ಯೇಕ್ ಜಾವ್ನ್ ಭಯ್ಣಿ ಪಾಸತ್ ಮಾಗಂವ್ಕ್ – ಮೊನಿಕಾ ಗೆಲ್ಲಿ. ಪಾಟಿಂ ಯೆತಾನಾ ರಾತ್ ಜಾತೆಲಿ ದೆಕುನ್, ತಿಕಾ ಸಾಂಗಾತಾ ಯೆಂವ್ಚ್ಯಾ ಖಾತಿರ್ ಚಾಂದ್‍ಬೀಬಿನ್ ಹಮೀದಾಕ್ ಧಾಡ್‍ಲ್ಲೊ.

ದೊಗಾಂಯೀ ಪಾಟಿಂ ಯೇಂವ್ಕ್ ನಾಂತ್.

“ಹಿ ಖಬರ್, ತುಕಾ ಕಳಿತ್ ಕೆಲಿ ಕೊಣೆಂ?” ವಿಚಾರ್ಲೆಂ ಸರ್ದಾರಾನ್.

“ಕಾಲ್ ಸಾಂಜೆರ್, ಮ್ಹಾಕಾ ಹಿ ಖಬರ್ ಪಾವಯ್ಜಯ್ ಮ್ಹಣ್, ಚಾಂದ್‍ಬೀಬಿ ಆನಿ ಫರೀದಾ ಬೇಗಮಾಚ್ಯಾ ಒತ್ತಾಯೆನ್, ಎಕ್ಲೊ ಮನಿಸ್ ಆಯಿಲ್ಲೊ. ಖುದ್ದ್ ಮ್ಹಜೆ ಕಡೆನ್ ಉಲಂವ್ಕ್ ಆಸಾ ಮ್ಹಣ್ ತಾಣೆಂ ಪಹರ‍್ಯಾಗಾರಾಕ್ ಸಾಂಗ್ಲೆಂ. ತಾಕಾ ಹಾಂವೆಂ ಭೆಟ್ ದಿಲಿ, ಆನಿ ವರ್ದಿ ಘೆತ್ಲಿ.”

“ಸತ್ ವಾ ಫಟ್ ಮ್ಹಣ್ ಕಶೆಂ ಪಾರ್ಕಿಲೆಂಯ್?”

“ತಾಚ್ಯಾಚ್ ಉಲವ್ಣ್ಯಾ ವರ್ವಿಂ. ತಾಣೆಂ, ಹಾಂವೆಂ ಪಾತ್ಯೆಜಾಯ್ ಮ್ಹಳ್ಳ್ಯಾ ಖಾತಿರ್‌ಚ್ ಜಾವ್ಯೆತ್, ‘ಪಯ್ಲೆಂಚಿ ವರ್ದಿ ಧಾಡ್‍ಲ್ಲ್ಯಾ ಗ್ರಾಯ್ಕಾಕ್, ಸಾಧ್ಯ್ ಜಾಲ್ಯಾರ್ ಹಿಯೀ ವರ್ದಿ ಪಾವಯ್ಜಾಯ್ ಖಂಯ್’ ಮ್ಹಣ್ತಚ್ ಮ್ಹಾಕಾ ಸಮ್ಜಲೆಂ. ತ್ಯಾ ಶಿವಾಯ್, ತೊ ಆಪ್ಲ್ಯಾ ಧುವ್ಡೆಚೆರ್ ದೀಷ್ಟ್ ಘಾಲ್ಚ್ಯಾ ಖಾತಿರ್ ಬೊಕ್ಕಪಟ್ಟಣಾಕ್ ಆಯಿಲ್ಲೊ – ಹಿ ಖಬರ್ ದಿಂವ್ಚ್ಯಾ ಖಾತಿರ್ – ಬರ‍್ಯಾಕ್‌ಚ್ ಪಡ್ಲೆಂ ಮ್ಹಣ್ತಾನಾ, ಮ್ಹಾಕಾ ತಾಚಿ ಖರಿ ವಳಕ್ ಮೆಳ್ಳಿ. ವೆಗಿಂ ತಾಕಾ ಹಾಂವೆಂ ಧಾಡ್ಲೊ.”

“ಜೋಕಿಮ್ ಸಿಲ್ವಾ ಪೈ!” ಮತಿ ಭಿತರ್ ಸಂತೊಸ್ ಪಾವ್ಲೊ ಸರ್ದಾರ್ ಸಿಮಾಂವ್. ಸಿನೊಲೆಚೆ ಸರ್ದಾರ್ ಅಪಾಲಿಪಾ ಆಸಾತ್, ಗಾಂವ್ ಸೊಡ್ನ್ ಧಾಂವೊಂಕ್ ನಾಂತ್ ಮ್ಹಳ್ಳೆಂಯೀ ಸಮ್ಜೊನ್, ಅಪಾಯಾಂತ್ ಜಾಲ್ಯಾರೀ, ತಾಕಾ ಸಮಾಧಾನ್ ಭೊಗ್ಲೆಂ.

ಘಳಾಯ್ ಕರಿನಾಸ್ತಾಂ ಕಾರ್ಯಾಕ್ ದೆಂವೊಂಕ್ ತಾಣೆಂ ನಿಚೆವ್ ಕೆಲೊ. ನೀಟ್ ತೊ ಜಾಲೊ, ಹರ್ದೆಂ ತಾಣೆಂ ಫುಲಯ್ಲೆಂ.

“ಆತಾಂಚ್, ಇಲ್ಲೆಂ ಪೊಟಾಕ್ ಘಾಲ್ನ್, ಬೋಳೂರ್ ಠಾಣ್ಯಾಕ್ ಹಾಂವ್ ಭಾಯ್ರ್ ಸರ್ತಾಂ” ಮ್ಹಣಾಲೊ ತೊ.

“ಪು-ಪುಣ್…” ಘುಸ್ಪಡ್ಲೊ ನಾಯ್ಕ್.

“ಪುಣ್-ಗಿಣ್ ಕಾಂಯ್ ನಾ! ಜಮೆದಾರ್ ಪಡ್ವಳ್, ಹೋಶಿಯಾರ್..!”

ಲಡಾಯೆಕ್ ಭಾಯ್ರ್ ಸರ್ತಾನಾ, ತಾಣೆಂ ಉಪಯೋಗ್ಸುಂಚೊ ಸ್ವರ್ ತೊ – ಆಯ್ಕೊನ್ ತಾಚೆ ಸವಾರ್ ಫುಲ್ಲೆ, ಪುಳಕಿತ್ ಜಾಲೆ ಆನಿ ಆಯ್ತೆ ಜಾಲೆ. ಎಕ್ಲ್ಯಾನ್ ಹರ್ಯೆಕ್ಲೊ, ಉಜೊ ಜಾಂವ್ ತಲ್ವಾರಿ, ಸರ್ದಾರಾ ಪಾಟ್ಲ್ಯಾನ್ ಪೆಲ್ಯಾ ಪ್ರಾಸ್ ಆಪುಣ್ ಉಣೊ ನಹಿಂ ಮ್ಹಣ್ಚ್ಯಾ ಜಿನ್ಸಾರ್ ಚುರುಕ್ ಜಾಲೆ.

ಹಿ ಬದ್ಲಾವಣ್ ಪಳೆವ್ನ್ ವೀರಪ್ಪ ನಾಯ್ಕ್ ಘಾಬರ್ಲೊ. ತರೀ, ಝುಜಾರ‍್ಯಾಂ ಸಹಜ್ ಲಕ್ಷಣಾನ್ ಸಂತೊಸ್ ಪಾವ್ಲೊ.

ಫುಡ್ಲ್ಯಾ, ದೊನ್ಪಾರಾಂಚ್ಯಾ ವೊರಾ ಭಿತರ್, ಬಾದಶಹಾ ಟಿಪ್ಪು ಸುಲ್ತಾನ್ ಬಹಾದುರಾಚೊ ಪ್ರತಿನಿಧಿ ಸರ್ದಾರ್ ಸಿಮಾಂವ್ ಪೆದ್ರು ಪ್ರಭು ಆನಿ ತಾಚೆ ಖಾಸ್ಗಿ ಸವಾರ್, ಜೆ ಆತಾಂ, ಬೋಳಾರ್ಚ್ಯಾ ದೊಗಾಂಕ್ ಭರ್ತಿ ಕರ್ನ್, ಬಾರಾ ಜಣ್ ಆಸ್‍ಲ್ಲೆ, ತಾಂಚೆ ಘೊಡೆ ಧಾಂವ್ಡಾವ್ನ್, ಸರ್ವ್ ರಾಜ್ ದರ್ಬಾರಾನ್, ಬೋಳೂರ್ ಠಾಣ್ಯಾಚ್ಯಾ ಹೆದ್ದಾರ್ವಟ್ಯಾರ್ ದೆಂವ್ಲೆ.

ಆಯಿಲ್ಲೆ ಗ್ರಾಯ್ಕ್ ಕೋಣ್ ಮ್ಹಣ್ ಸಮ್ಜಲ್ಲೆಂಚ್ ಸಮ್ಜಲ್ಲೆಂ, ಸಗ್ಳೆಂ ಠಾಣೆಂ, ಫಾತೊರ್ ಮಾರ್‌ಲ್ಲ್ಯಾ ಮ್ಹೊಂವಾ ಮುಸಾಂಚ್ಯಾ ಪೊಳಿಯೆಪರಿಂ ಜಾಗೃತ್ ಜಾಲೆಂ. ಹೆಣೆಂ ತೆಣೆಂ ಜ್ಹೆಮೆವ್ನ್ ವಾ ಸುಸ್ತಿ ಜಾವ್ನ್ ಆಸ್‍ಲ್ಲೆ ಪಹರೆಗಾರ್, ಚುರುಕ್ ಜಾವ್ನ್ ಧಾಂವೊನ್ ಯೇವ್ನ್, ದಾರ್ವಟ್ಯಾರ್, ಮಾನಾನ್ ಖಡಾ ಜಾಲೆ. ಭಾಲೆ ಆನಿ ಪೆಂಕ್ಡಾಂ ಬಾಗಾವ್ನ್, ಸರ್ದಾರಾಕ್ ತಾಣಿಂ ಪ್ರಣಾಮ್ ಕೆಲೊ.

ಖಿಲ್ಲೆದಾರಾಚಿ, ಜಾಂವ್ ತಾಚ್ಯಾ ಸಹಾಯಕಾಚಿ ಝಳಕ್ ನಾ.

ದೆಖ್ತಾನಾ, ವೊಡ್ಲ್ಯಾರ್ ಕೊಣಾಯ್ಕೀ ಜೀಬ್ ನಾ. ಥೊಡ್ಯಾ ವೆಳಾನ್…

“ಖಂಯ್ ಆಸಾ, ಬಾದಶಹಾಚ್ಯಾ ಬೋಳೂರ್ ಠಾಣ್ಯಾಚೊ ಖಿಲ್ಲೆದಾರ್?” ವಿಚಾರ್ಲೆಂ ಸರ್ದಾರಾನ್, ಗಂಭೀರಾಯೆನ್.

“ತೊ… ನಾ ಹುಜೂರ್” ಎಕ್ಲೊ ನರ್ಗಲೊ.

“ತಾಚೊ ಕೊಣೀ ಸಹಾಯಕ್?” ಸರ್ದಾರಾನ್ ನಾಕಾ-ಬುಡಾಂ ಫುಲಯ್ಲಿಂ.

“ತೊ – ಚಿಕ್ಕೆ ಆದಿಂ, ಭಾಯ್ರ್ ಗೆಲಾ ಹುಜೂರ್” ಆನ್ಯೇಕ್ಲೊ ಪಿಂರ್ಗಲೊ.

“ಬಾದಶಹಾಚ್ಯಾ ಹುದ್ದೆದಾರಾಂಚಿ ಕರ್ತವ್ಯ್ ನಿಷ್ಠಾ!” ಥುಕ್‍ಲ್ಲೆಪರಿಂ ಮ್ಹಣಾಲೊ ಸರ್ದಾರ್ ಸಿಮಾಂವ್. ಉಪ್ರಾಂತ್…

“ಕಾಂಯ್, ಜಯ್ಲಾಚೊ ಅಧಿಕಾರಿ, ಭಕ್ಷಿ ಇಸ್ಮಾಯಿಲ್ ಬಾಬಾ ಪುಣೀ ಆಸಾ? ಆಸಾ ಜಾಲ್ಯಾರ್ ಆಮಿ ಆಪಯ್ತಾಂವ್ ಮ್ಹಣ್…”

“ಬಾದಶಹಾ ಟಿಪ್ಪು ಸುಲ್ತಾನ್ ಬಹಾದುರಾಚ್ಯಾ ಸರ್ದಾರಾಂಕ್ ಸೆವಕಾಚೆಂ ಖಾಲ್ತೆಂ ವಂದನ್!” ಮ್ಹಣೊನ್, ಇಸ್ಮಾಯಿಲ್ ಬಾಬಾ ಹುಶಾರಾಯೆನ್ ಫುಡೆಂ ಆಯ್ಲೊ ಆನಿ ಬಾಗ್ವಾಲೊ. “ಸರ್ದಾರಾಕ್ ಅಲ್ಲಾಚೆಂ ಸಮಾಧಾನ್!” ಮ್ಹಳೆಂ ತಾಣೆಂ – ಮರ್ಯಾದಿನ್, ತಲ್ವಾರಿಚೆಂ ಥೊರುಂ ಫುಡೆಂ ಧರುನ್.

“ತುಮ್ಕಾಂಯೀ ಸಮಾಧಾನ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ತುರ್ತಾಚಿಂ ಥೊಡಿಂ ಕಾಮಾಂ ಆಸಾತ್, ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ನಾಂವಾನ್ ಥೊಡಿ ದೀಕ್ಷಾ ದೀಂವ್ಕ್ ಆಸಾ. ಅರ್ಧ್ಯಾ ವೊರಾ ಭಿತರ್, ಹಾಂಗಾಸರ್, ಖಲೀಫ್ ದೌಲತಾಚ್ಯಾ ನ್ಯಾಯಾ ಸಾಲಾಂತ್, ಹ್ಯಾ ಠಾಣ್ಯಾಂತ್ಲೆ ಹುದ್ದೆದಾರ್ – ಭಕ್ಷಿ, ಸುಫೆದಾರ್, ಜಮೆದಾರ್ ಆನಿ ಹವಿಲ್ದಾರ್, ಆನಿ ಕೊತ್ವಾಲ್ ಹಾಜರ್ ಜಾಂವ್ದಿತ್. ಆಮ್ಚಿ ದೀಕ್ಷಾ ಕಾಯಾಮ್ ಜಾತಾ ಪರ್ಯಾಂತ್…” ಸ್ವರ್ ಚಿಕ್ಕೆ ಉಕ್ಲುನ್ ದಿಲೊ ತಾಣೆಂ. “ಹ್ಯಾ ಠಾಣ್ಯಾಂತ್ಲ್ಯಾ ಅಧಿಕಾರಾಚೆಂ ನಿರ್ದೇಶನ್, ಭಕ್ಷಿ ಇಸ್ಮಾಯಿಲ್ ಬಾಬಾಚ್ಯಾ ಹಾತಾಂತ್ ಆಸಾ ಮ್ಹಣ್ ಸರ್ವ್ ಜಾಣಾಂ ಜಾಂವ್ದಿತ್.”

ಇತ್ಲೆಂ ಮ್ಹಣೊನ್, ಸರ್ದಾರ್ ಸಿಮಾಂವ್, ಆಪ್ಲ್ಯಾ ಸವಾರಾಂ ಸಾಂಗಾತಾ ಖಲೀಫ್ ದೌಲತಾ ಭಿತರ್, ಥೊಡೊ ವಿಶೆವ್ ಘೆಂವ್ಕ್ ಆನಿ ಶಾಂತ್‍ಪಣಿಂ ಫುಡ್ಲಿ ಮಾಂಡಾವಳ್ ಚಿಂತುಂಕ್ ಪ್ರವೇಶ್ ಜಾಲೊ.

ತೆವ್ಶಿಲ್ಯಾನ್, ನ್ಯಾಯ್‍ಸಾಲಾಂತ್, ಧಾ-ವೀಸ್ ಜಣ್ ಹುದ್ದೆದಾರ್ ಆಪಾಪ್ಲ್ಯಾ ಅಧಿಕಾರಾಚ್ಯಾ ದವ್ಲತೆನ್ ನ್ಹೆಸೊನ್, ಎಕೆಕ್ಲೊಚ್ ಯೇವ್ನ್ ಜಮ್ತಾಲೆ. ಬಾದಶಹಾನ್ ಕಸಲಿ ದೀಕ್ಷಾ ವಾ ಶಿಕ್ಷಾ ಫರ್ಮಾವ್ನ್ ಧಾಡ್ಲ್ಯಾ ಮ್ಹಳ್ಳ್ಯಾ ಆತುರಾಯೆನ್, ತಾಂಚೆಯಿತ್ಲ್ಯಾಕ್ ವ್ಹಳೂ ತಾಳ್ಯಾನ್ ದುಬಾವ್ ಆನಿ ಆಶಾವಾದ್, ಭಿರಾಂತ್ ಆನಿ ಭರ್ವಸೊ ಉಚಾರ್ನ್ ತರ್ಕಾಂ ವಿತರ್ಕಾಂ ಚಲ್ತಾಲಿಂ.

ಸರ್ದಾರ್ ಸಿಮಾಂವ್, ಪಾಟ್ಲ್ಯಾ ಆವರಾಂತ್ ಶರ್ಬತ್ ಚಾಕತ್ತ್, ಚಿಂತಾಲೊ. ನಿಜಾಯ್ಕೀ ಅಸಲಿ ಸಭಾ ಆಪಂವ್ಕ್ ವಾ ಕಸಲಿಯೀ ನಿಶ್ಚಿತ್ ದೀಕ್ಷಾ ದೀಂವ್ಕ್, ಟಿಪ್ಪು ಸುಲ್ತಾನಾನ್ ತಾಕಾ ಫರ್ಮಾಂವ್ಕ್ ನಾತ್‍ಲ್ಲೆಂ. ಜಾಲ್ಯಾರೀ, ತಕ್ಷಣಿಕ್ ನಿರ್ಣಯಾಂಚ್ಯಾ ಕಾರ್ಬಾರಾಂಕ್ ಸರ್ದಾರ್ ಸಿಮಾಂವ್ ನಾಂವಾಡ್‍ಲ್ಲೊ. ಬೋಳೂರ್ ಠಾಣ್ಯಾಕ್ ಪಾವಾಸರ್, ಫುಡೆಂ ಕಿತೆಂ ಕರ್ಚೆಂ ಮ್ಹಣ್ ತಾಣೆಂ ಚಿಂತುಂಕ್ ನಾತ್‍ಲ್ಲೆಂ. ಪುಣ್ ಠಾಣ್ಯಾಕ್ ಪಾವ್ತಾನಾ, ಥಂಯ್ಚಿ – ಖಿಲ್ಲೆದಾರ್ ಜಾಂವ್, ತಾಚೊ ಸಹಾಯಕ್ ನಾತ್‍ಲ್ಲಿ – ಪರಿಸ್ಥಿತಿ ಸಮ್ಜೊನ್ ಕ್ಷಣಾನ್ ತಾಕಾ ಝಳ್ಕಲ್ಲೊ ಉಪಾಯ್ ಜಾರಿ ಕರುಂಕ್ ತಾಣೆಂ ಚಿಂತ್‍ಲ್ಲೆಂ.

ಲಗ್‍ಬಗ್ ಎಕಾಚ್ ಮಹಿನ್ಯಾ ಆದಿಂ, ತ್ಯಾಚ್ ಬೋಳೂರ್ ಠಾಣ್ಯಾಂತ್, ಆಟ್ ದಿಸಾಂಕ್ ಪಾಟಿಂ ಫುಡೆಂ, ದೋನ್ ಪಾವ್ಟಿಂ ಝಡ್ತೆಕ್ ಬಸ್‍ಲ್ಲೊ ಉಡಾಸ್ ತಾಕಾ ಆಯ್ಲೊ. ತವಳ್ಚೆ ತಾಚೆ ಭೊಗ್ಣಾರ್, ಆಟೆವಿಟೆ – ಘಡ್ಯೆನ್ ಘಡಿ, ದೃಶ್ಯಾನ್ ದೃಶ್ಯ್ ತಾಚ್ಯಾ ಮತಿಂತ್ ಪಾಟಿಂ ಝಳ್ಕಲಿಂ. ‘ಸಿನೊಲೆಚಿ ಸೆವಾ, ಕರಯ್ ದೆವಾ!’ – ತೆದಾಳಾ ತಾಣೆಂ ಪ್ರಾರ್ಥಿಲ್ಲೆಂ.

ಆಜ್‍ಯೀ ಪರ್ತ್ಯಾನ್ ತೆಂಚ್ ತಾಣೆಂ ಮಾಗ್ಲೆಂ, ಆನಿ ಮೆಳಯ್ಲೆಂ: ‘ದೆವಾ, ಭಾವಾರ್ಥಾ ಖಾತಿರ್ ಆನಿ ಭಾಂವ್ಡಾಂ ಖಾತಿರ್ ಆಶಾ ಉರವ್ನ್ ಆನಿ ನಿಶಾನಿ ಉಬವ್ನ್ ಆಸ್‍ಲ್ಲ್ಯಾಂ ಪಯ್ಕಿ, ವಿಂಚ್ಣಾರ್ ದೊಗಿ ವೀರ್ ಸ್ತ್ರೀಯಾಂಕ್ ಸೊಧುನ್ ಕಾಡ್ನ್, ಸುಟ್ಕಾ ಲಾಭಯ್ತಾ ಪರ್ಯಾಂತ್ ಪುಣೀ ಮ್ಹಜ್ಯಾ ಮತಿಕ್ ಉಜ್ವಾಡ್ ದೀ… ಮ್ಹಜ್ಯಾ ಬಾವ್ಳ್ಯಾಂಕ್ ಬಳ್ ದೀ.’

ತಾಚೆ ಕಡೆನ್ ಆಸ್‍ಲ್ಲೆಂ ಅರ್ಲುಕೆಚೆಂ ಅರ್ಧ್ ಭಾಯ್ರ್ ಕಾಡ್ನ್ ತಾಣೆಂ ಉಮೊ ಘೆತ್ಲೊ… ‘ಜೆಜುಸ್ ಮರಿ ಜುಜೆ..!’

ಅರ್ಧ್ಯಾ ವೊರಾನ್, ಸರ್ದಾರ್ ಸಿಮಾಂವ್, ಖಲೀಫ್ ದೌಲತಾಂತ್ಲ್ಯಾ ನ್ಯಾಯಾ ಸಾಲಾಕ್ ಪ್ರವೇಶ್ ಜಾಲೊ. ಝಡ್ತೆ ಖಾತಿರ್ ಆಸೀನ್ ಜಾಂವ್ಚ್ಯಾ ಖಾತಿರ್ ತೊ ನಹಿಂ ಆಯಿಲ್ಲೊ ಜಾಲ್ಲ್ಯಾನ್, ಹ್ಯಾ ವೆಳಾರ್ ತುರ್ಬೆಂತ್ ವ್ಹಾಜಂವ್ಕ್ ನಾ. ಆನಿ ಸಾಲಾಚ್ಯಾ ಕಾರಖೂನಾನ್ ‘ಅಲ್ಲಾ ಹೋ ಅಕ್ಬರ್’ ಮ್ಹಳ್ಳೊ ಆವಾಜ್ ದೀಂವ್ಕ್ ನಾ. ಆದ್ಲೆಪರಿಂ, ಸಾಲಾಂತ್ ವಾ ಭಾಯ್ರ್, ಖೆಟ್ ನಾತ್‍ಲ್ಲಿ.

ಸಾಲಾಂತ್ ನಿಶ್ಶಬ್ದ್. ಹಾಜರ್ ಆಸ್‍ಲ್ಲೆ ಆಟ್ರಾ ಜಣ್ ಹುದ್ದೆದಾರ್ – ಭಕ್ಷಿ, ಸುಫೆದಾರ್, ಹವಿಲ್ದಾರ್ ಆನಿ ಕೊತ್ವಾಲ್ – ಎಕಾ ಮನ್ಶ್ಯಾಪರಿಂ ಉಬೆ ಜಾಲೆ. ಸರ್ದಾರ್ ಸಿಮಾಂವ್ನ್‌ಯೀ, ಉಬೊ ಆಸ್ತಾನಾಂಚ್ ದೊಳೆ ಘುಂವ್ಡಾವ್ನ್, ಸರ್ವಾಂಚೆರ್ ದೀಷ್ಟ್ ಘಾಲಿ. ತಾಂಚೆ ಪಯ್ಕಿ, ದುಸ್ಮಾನ್ಕಾಯೆಚಿಂ, ಜಾಳ್ಕಾಯೆಚಿಂ, ವಾ ಬೇಫಿಕಿರ್ಗಾಯೆಚಿಂ ಚಿಂತ್ನಾಂ ಕೊಣ್‍ಯೀ ಆಟವ್ನ್ ಆಸ್‍ಲ್ಲೆ ಮ್ಹಣ್ ತಾಕಾ ದಿಸೊಂಕ್ ನಾ, ಭೊಗುಂಕ್ ನಾ. ಬರೆಂಚ್.

ಸರ್ದಾರ್ ಬಸ್ಲೊ. ಪಾಟ್ಲ್ಯಾನ್ ಜಮೆದಾರ್ ಅಂತುಲೊ ಪಡ್ವಳ್, ಭಾಲೊ ತೆಂಕುನ್ ರಾವ್ಲೊ.

ಹುದ್ದೆದಾರ್‌ಯೀ, ಪಾಯ್ ದೊಡುನ್, ದಿವಾನ್‍ಖಾನಾಂಚೆರ್ ಆನಿ ಉಶ್ಯಾಂ ತಖಿಯಾಂಚೆರ್ ಬಸ್ಲೆ.

“ಆಮ್ಕಾಂ ಪುರ್ಸತ್ ಭೋವ್ ಉಣಿ ಆಸಾ” ಮ್ಹಣಾಲೊ ಸರ್ದಾರ್ ಸಿಮಾಂವ್, ವೇಳ್ ಕಾಡಿನಾಸ್ತಾನಾ. “ಜೆಂ ಕಿತೆಂ ಬಾದಶಹಾ ಟಿಪ್ಪು ಸುಲ್ತಾನ್ ಬಹಾದುರಾಚ್ಯಾ ತರ್ಫೆನ್ ಸಾಂಗ್ಚೆಂ ಆಸಾ, ತೆಂ, ವೆಗಿಂ ಆಮಿ ಸಾಂಗೊನ್ ಮುಗ್ದಿತಾಂವ್.”

ಹುದ್ದೆದಾರಾಂಚೆ ದೊಳೆ ರುಂದಾಲೆ. ಕಾನ್ ಫುಲ್ಲೆ.

“ಥೊಡ್ಯಾ ದಿಸಾಂ ಆದಿಂ…” ಮ್ಹಣಾಲೊ ಸರ್ದಾರ್. “ಬಾದಶಹಾಚ್ಯೆ ನಾಂವಿಂ ಆಮಿ ಝಡ್ತಿ ಕೆಲ್ಲಿ, ಆನಿ ಫರ್ಮಾಣ್ ದಿಲ್ಲೆಂ…

“ಕೈದ್ ಜಾವ್ನ್, ಝಡ್ತೆಕ್ ಬಾಧ್ಯ್ ಜಾಲ್ಲ್ಯಾ ಥೊಡ್ಯಾ ಕಿರಿಸ್ತಾನ್ ರಾಜ್‍ದ್ರೋಹಿಂಕ್ ಶಿಕ್ಷಾ ಆಮಿ ಫರ್ಮಾಯಿಲ್ಲಿ. ಶಿಕ್ಷೆಚೊ ವಾಯ್ದೊ ರಾಕೊನ್, ಹಾಂಗಾಸರ್ ಬಂಧೆಂತ್ ತೆ ಫಿಚಾರ್ ಆಸ್‍ಲ್ಲೆ – ಚವೀಸ್ ವೊರಾಂ ಭಿತರ್ ಅದೃಶ್ಯ್-ನಪಂಯ್ಚ್ ತೆ ಜಾಲೆ…

“ಬಾರ್ಸೆಲೊರ್-ಬಾಕೂರ್ ಥಾವ್ನ್ ಖುದ್ ಬಾದಶಹಾಚಿ ಹುಕುಮ್ ಘೆವ್ನ್ ಪಾಟಿಂ ಆಮಿ ಆಯ್ಲ್ಯಾಂವ್. ಪರತ್ ಝಡ್ತೆಕ್ ಆಮಿ ಬಸ್ಲ್ಯಾಂವ್. ಪರತ್ ತೀರ್ಪ್ ಆನಿ ಫರ್ಮಾಣ್ ಆಮಿ ದಿಲೆಂ…

“ಸರ್ಕಾರಾಕ್ ಸೊವ್ ದಿಂವ್ಚೆ ಗ್ರಾಯ್ಕ್ – ತೊಪಾಸಿ ಜುವಾಂವ್ ಒಬೆರ್‌ವಿಲ್ ಕಾರ್ಡೊಜ್ ಆನಿ ಕುಞಿಕುಟ್ಟಿ, ವಿಚಿತ್ರ್ ಥರಾನ್ ಕಾಬಾರ್ ಜಾಲೆ…

“ಹಾಂಗಾಚೊ ಜೈಲಾಧಿಕಾರಿ ಮಹಮ್ಮದಾಲಿ… ಲಜ್… ಶಿಕ್ಷಾ ಭೊಗ್ಚ್ಯಾ ಆದಿಂಚ್ ಜೀವ್ಘಾತ್ ಕರ್ನ್ ಗೆಲ್ಲಿ ಗಜಾಲ್ ತುಮ್ಕಾಂ ಕಳಿತ್ ಆಸಾ…

“ಕ್ರಿಸ್ತಾಂವ್ ಕೈದಿ ಪರಾರಿ ಜಾಂವ್ಕ್ ಕೋಣ್ ಕಾರಣ್ ಮ್ಹಳ್ಳಿ ಸ್ಪಷ್ಟ್ ರುಜ್ವಾತ್ ಪುಂಜಾಂವ್ಕ್, ಆನಿ ಪರಾರಿ ಜಾಲ್ಲ್ಯಾ ತ್ಯಾ ಕೈದ್ಯಾಂಕ್ ಪರತ್ ಬಂಧಿ ಕರುಂಕ್ ಹಾಂಗಾಚ್ಯಾ ಮಾಜಿ ಖಿಲ್ಲೆದಾರಾಕ್, ಬಾದಶಹಾಚಿ ಹುಕುಮ್ ಆಮಿ ದಿಲ್ಲಿ…

“ಆತಾಂ ಖಿಲ್ಲೆದಾರ್ ಪರಾರಿ ಜಾಲಾ!

“ತರೀ, ಸರ್ಕಾರಾಚಿ ಪದ್ವಿ ಆನಿ ಮರ್ಯಾದ್ ತುಮಿ ಸಾಂಬಾಳ್ಳ್ಯಾ…

“ಹಾಂಗಾ ಹಾಜರ್ ಆಸ್‍ಲ್ಲ್ಯಾ ಸರ್ವ್ ಹುದ್ದೆದಾರಾಂಕ್ – ತುಮ್ಕಾಂ – ಬಾದಶಹಾಚ್ಯಾ ನಾಂವಾನ್, ಯೆಂವ್ಚ್ಯಾ ಮಹಿನ್ಯಾ ಥಾವ್ನ್ ಎಏಕ್ ಹೂನ್ (ವರಹಾ – 3 ರುಪಯ್) ಪಗಾರ್ ಚಡ್ ದೀಂವ್ಕ್ ಆಮಿ ಖುಶಿ ಪಾವ್ತಾಂವ್…”

ಸರ್ದಾರ್ ಸಿಮಾಂವ್ನ್, ಸೊಧ್ನೆಚ್ಯಾ ವಾಟೆರ್ ಜೊಕ್‍ಲ್ಲ್ಯಾ ಪಯ್ಲ್ಯಾ ಫಾರಾಚಿ ಧಾರ್ ತಿ ಜಾವ್ನಾಸ್‍ಲ್ಲಿ.

ಹುದ್ದೆದಾರ್ ಜೀವ್ ಜಾಲೆ, ಖುಶಿ ಜಾಲೆ. ತಾಣಿಂ ತಾಳಿಯೊ ಪೆಟ್ಲ್ಯೊ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

ಆಮಿ ಫಾಯ್ಸ್ ಕೆಲ್ಲ್ಯೊ ಆದ್ಲ್ಯೊ ಕಾದಂಬರಿ