‘ಪಯಣ್’ ಕೊಂಕ್ಣಿ ಸಿನೆಮಾಚೆಂ ಪೋಸ್ಟರ್ ರಿಲೀಸ್
ಮಂಗ್ಳುರ್: ‘ಸಂಗೀತ್ ಘರ್’ ಬ್ಯಾನರಾ ಖಾಲ್ ತಯಾರ್ ಜಾಂವ್ಚೆಂ, ಯೊಡ್ಲಿಂಗ್ ಕಿಂಗ್ ಮೆಲ್ವಿನ್ ಪೆರಿಸ್ ಆನಿ ನಿರ್ದೇಶಕ್ ಜೋಯಲ್ ಪಿರೇರಾ ಹಾಂಚೆಂ ಪಯ್ಲೆಂ ಫಿಲ್ಮ್ ‘ಪಯಣ್’ ಹಾಚೆಂ ದುಸ್ರೆಂ ಪೋಸ್ಟರ್ ಜುಲಾಯ್ 28 ತಾರಿಕೆರ್ ರಿಲೀಸ್ ಜಾಲೆಂ. ಪುತ್ತೂರಾಂತ್ಲ್ಯಾ ರೊಟರಿ ಮನೀಷಾ ಹೊಲಾಂತ್ ಮಾಯ್ ದೆ ದೇವುಸ್ ಫಿರ್ಗಜೆಚ್ಯಾ ಗೊವ್ಳಿಕ್ ಪರಿಷದೆಚೊ ಉಪಾಧ್ಯಕ್ಷ್ ಜೆರಾಲ್ಡ್ ಡಿಕೊಸ್ತಾ, ಡೊನ್ ಬೊಸ್ಕೊ ಕ್ಲಬಾಚೊ ಅಧ್ಯಕ್ಷ್ ಆ್ಯಂಟನಿ ಒಲಿವೆರಾ ಆನಿ ಕಾರ್ಯದರ್ಶಿ ಜ್ಯೋ ಡಿಸೋಜಾ ಹಾಣಿಂ ಹೆಂ ಪೋಸ್ಟರ್ ಮೊಕ್ಳಿಕ್ ಕೆಲೆಂ.
ಹ್ಯಾ ವೆಳಾರ್ ಉಲಯಿಲ್ಲ್ಯಾ ಆ್ಯಂಟನಿ ಒಲಿವೆರಾನ್, “ಆಮ್ಚೊಚ್ ಬ್ರಾಯನ್ ಸಿಕ್ವೇರಾನ್ ಮುಖೆಲ್ ಪಾತ್ರ್ ಖೆಳ್‍ಲ್ಲೆಂ ಸಿನೆಮಾ ಸರ್ವಾಂನಿ ಪಳೆಂವ್ಚೆ ಮಾರಿಫಾತ್ ಆಮ್ಚ್ಯಾ ತರ್ನ್ಯಾ ಪ್ರತಿಭೆಂಕ್ ಪ್ರೋತ್ಸಾಹ್ ದೀಜೆ. ತ್ಯಾ ವರ್ವಿಂ ಕೊಂಕ್ಣಿ ಭಾಶೆಚೆಂ ಅಸ್ತಿತ್ವ್ ಫುಡ್ಲ್ಯಾ ಪಿಳ್ಗೆ ಮೆರೆನ್ ಪಾವಂವ್ಕ್ ಜಾಯ್” ಮ್ಹಣ್ ಉಲೊ ದಿಲೊ. ನಟ್, ಉದ್ಯಮಿ ಆನಿ ಸಂಘಟಕ್ ಲೆಸ್ಲಿ ರೇಗೊ ಫಿಲ್ಮ್ ಪಂಗ್ಡಾ ತರ್ಫೆನ್ ಉಲವ್ನ್, “ಆಪ್ಲ್ಯಾ ಸಮಾಜ್ ಸೆವೆ ಪಾಸತ್ ಪುತ್ತೂರ್ಚ್ಯಾ ಡೊನ್ ಬೊಸ್ಕೊ ಕ್ಲಬ್ಬಾಚೆಂ ನಾಂವ್ ಫಾಮಾದ್ ಜಾಲಾಂ. ಅಲೆಕ್ಸ್ ಮಾಡ್ತಾ ತಸಲ್ಯಾ ಕೊಂಕ್ಣೆಂತ್ಲ್ಯಾ ಮ್ಹಾಲ್ಘಡ್ಯಾ ಸಂಗೀತ್ಗಾರಾಚೆಂ ಕುಳ್ವಾರ್ ಜಾವ್ನಾಸ್ಚೆಂ ಪುತ್ತೂರ್ ದೆಣ್ಯಾವಂತ್ ಕಲಾಕಾರಾಂಚಿ ಭುಂಯ್. ‘ಅಸ್ಮಿತಾಯ್’ ಕೊಂಕ್ಣಿ ಸಿನೆಮಾಂತ್ ಪುತ್ತೂರ್ಚೊ ಕಿಶೋರ್ ಫೆರ್ನಾಂಡಿಸ್ ಆನಿ ಪ್ರವೀಣ್ ಪಿಂಟೊನ್ ನಟನ್ ಕೆಲ್ಲೆಂ ಆಸಾ. ಆತಾಂ ಬ್ರಾಯನ್ ಸಿಕ್ವೇರಾ ‘ಪಯಣ್’ ಫಿಲ್ಮಾಂತ್ ಮುಖೆಲ್ ಪಾತ್ರ್ ಖೆಳ್ಳಾ. ಸರ್ವಾಂನಿ ‘ಪಯಣ್’ ಸಿನೆಮಾಚೊ ಪ್ರೀಮಿಯರ್ ಶೋ ಪಳೆವ್ನ್ ಹ್ಯಾ ಯುವ ತಾಲೆಂತಾಕ್ ಪ್ರೋತ್ಸಾಹ್ ದೀಜೆ” ಮ್ಹಣ್ ವಿನತಿ ಕೆಲಿ.
‘ಪಯಣ್’ ಫಿಲ್ಮಾಚೊ ನಿರ್ದೇಶಕ್, ಸಂಗೀತ್ ಗುರು ಜೊಯೆಲ್ ಪಿರೇರಾ ವೆದಿರ್ ಆಸೊನ್ ಫಿಲ್ಮಾಚ್ಯೊ ನಾಯಕಿ ಶಾಯ್ನಾ ಡಿಸೋಜಾ, ಕೇಟ್ ಪಿರೇರಾ ಆನಿ ಹೆರಾಂಚಿ ವಳಕ್ ಕರ್ನ್ ದಿಲಿ.
‘ಪಯಣ್’ ಸಿನೆಮಾ ಸೆನ್ಸಾರ್ ಪಾಂವ್ಡ್ಯಾರ್ ಪಾವ್ಲಾಂ. ಸಪ್ಟೆಂಬರ್ ಮ್ಹಯ್ನ್ಯಾಂತ್ ಮಂಗ್ಳುರ್ ಆನಿ ಭೊಂವ್ತಣಿಂಚ್ಯಾ ಪ್ರದೇಶಾಂನಿ ಎಕಾಚ್ ವೆಳಾರ್ ಪ್ರದರ್ಶಿತ್ ಜಾತೆಲೆಂ.
‘ಪಯಣ್’ ಫಿಲ್ಮಾಂತ್ ಬ್ರಾಯಾನ್ ಸಿಕ್ವೇರಾ, ಜಾಸ್ಮಿನ್ ಡಿಸೋಜಾ ಆನಿ ಕೇಟ್ ಪಿರೇರಾ ಮುಖೆಲ್ ಪಾತ್ರಾಂತ್ ಆಸಾತ್ ತರ್, ಶೈನಾ ಡಿಸೋಜಾ, ರೈನೆಲ್ ಸಿಕ್ವೇರಾ, ಲೆಸ್ಲಿ ರೇಗೊ, ಜೆರಿ ರಸ್ಕಿನ್ಹಾ, ವಾಲ್ಟರ್ ನಂದಳಿಕೆ, ಆಲ್ಬರ್ಟ್ ಪೆರಿಸ್, ಜೀವನ್ ವಾಸ್, ಮೆಲಿಶಾ ಪಿಂಟೊ ಆನಿ ಜೋಸ್ಸಿ ರೇಗೊ ಹೆರ್ ಪಾತ್ರ್ ಖೆಳ್ಳ್ಯಾತ್.
ತಾಂತ್ರಿಕ್ ಸಿಬ್ಬಂದಿ ವರ್ಗಾಂತ್ ಛಾಯಾಗ್ರಹಣ್ ವಿ. ರಾಮಾಂಜನೇಯಾನ್, ಸಂಕಲನ್ ಆನಿ ಸಹ ನಿರ್ದೇಶನ್ ಮೆವಿಲ್ ಜೋಯಲ್ ಪಿಂಟೊನ್ ನಿರ್ವಹಣ್ ಕೆಲಾಂ. ಸಂಗೀತ್ ನಿರ್ದೇಶಕ್ ರೋಶನ್ ಡಿಸೋಜ, ಆಂಜೆಲೊರ್. ನೀಟಾ ಜೋನ್ ಪೆರಿಸ್ ಫಿಲ್ಮಾಚಿ ನಿರ್ಮಾಪಕಿ.
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್
Send your Feedback to: budkuloepaper@gmail.com
