ಪ್ರಕರಣ್ 26: ಗುರ್ಪೊಳೆಂ ಆನಿ ಘುಲೆ

ಟಿಪ್ಪು ಸುಲ್ತಾನಾನ್ ಆಸ್ಮಾಬಿಕ್ ಆನಿ ‘ಜಮೀಲಾ’ಕ್ ಬಾಂಧ್‍ಲ್ಲ್ಯಾ ಶರ್ತಾಂ ವರ್ವಿಂ ಸಮಸ್ಯಾಂ ನಿಜಾಯ್ಕೀ ಭಿಗಡ್ಲಿಂ. ತ್ಯಾ ವರ್ವಿಂ, ಸಂಬಂಧ್ ಆಸ್‍ಲ್ಲ್ಯಾ ಸರ್ವಾಂನಿಯೀ ಅಪಾಯಾಚ್ಯಾ ಜಾಳಾಂತ್ ಸಾಂಪ್ಡೊನ್ ಎಕಾಮೆಕಾಚ್ಯಾ ಬಚಾವೆ ಖಾತಿರ್ ಚಡ್ಪಡ್ಚಿ ಗರ್ಜ್ ಪಡ್ಲಿ. ಹ್ಯಾ ಘಡಿತಾಂಚ್ಯಾ ಖೆಳಾ ವರ್ವಿಂ, ಬಿರ್ಮತ್, ಕಾತ್ರಿಂತ್ ಸರ್ದಾರ್ ಯೂಸುಫ್ ಆಲಿಚ್ ಚಡ್ ಸಾಂಪಡ್ಲೊ. ಸರ್ದಾರ್ ಸಿಮಾಂವ್ಚೊ ಸಾಂಗಾತಿ ಆನಿ ‘ರಾಕ್ವಲಿ’ ಜಾವ್ನ್, ಟಿಪ್ಪು ಸುಲ್ತಾನಾಚ್ಯಾ ದುಬಾವಾಕ್ ಆನಿ ಫುಡ್ಲ್ಯಾ ಕ್ರೋಧಾಕ್ ಆಪುಣ್ ನೀಜ್ ಜಾವ್ನ್ ಉಂಡಿ ಜಾಂವ್ಕ್ ಆಸ್ತಲೊಂ ಮ್ಹಣ್ ತಾಕಾ ಸ್ಪಷ್ಟ್ ಜಾಲ್ಲೆಂ.

ಸರ್ದಾರ್ ಯೂಸುಫ್ ಆಲಿ, ನಿಜಾಯ್ಕೀ ಜಮೀಲಾ ನೂರ್ ಜಹಾನಾಚೊ ಮೋಗ್ ಕರ್ತಾಲೊ, ಆನಿ ತಿಚೆ ಕಡೆನ್ ಕಾಜಾರ್ ಜಾಂವ್ಕ್ ಆಶೆತಾಲೊ. ಜಮೀಲಾಯೀ ತಾಚೊ ಮೋಗ್ ಕರ್ತಾಲಿ ಆನಿ ತಾಚೆ ಕಡೆನ್ ಕಾಜಾರ್ ಜಾಂವ್ಕ್ ಕಬೂಲ್ ಆಸ್‍ಲ್ಲಿ. ಪುಣ್, ಟಿಪ್ಪು ಸುಲ್ತಾನಾ ಖಾಲ್ ನಾನಾಂತ್ಯಾ ರಾಟಾವಳಿಂ ವರ್ವಿಂ ಸರ್ದಾರ್ ಯೂಸುಫ್ ಚಡಾವತ್ ಜಾವ್ನ್ ಪಟ್ಟಣಾ ಥಾವ್ನ್ ಭಾಯ್ರ್ ಆನಿ ಪಯ್ಸ್ ಉರ್‌ಲ್ಲ್ಯಾ ವರ್ವಿಂ ತೆಂ ಸುಲಭ್ ಸಾಧ್ಯ್ ಜಾಂವ್ಕ್ ನಾತ್‍ಲ್ಲೆಂ.

ತ್ಯಾ ಶಿವಾಯ್, ಆಪುಣ್ ಕಾಜಾರ್ ಜಾಲ್ಲಿಂ ಜಾಲ್ಯಾರ್, ರಾವ್ಳೆರಾ ಥಾವ್ನ್ ಆವಯ್ಕ್ ಮೆಳ್ಚೆಂ ಭಾತೆಂ ಕಳ್ವಾತೆಲೆಂ ಮ್ಹಣ್ ಜಮೀಲಾಕ್ ಕಳಿತ್ ಆಸ್‍ಲ್ಲ್ಯಾನ್, ಕಾಜಾರಾಚೊ ಪ್ರಸ್ತಾಪ್, ಎಕಾಮೆಕಾ ಜಾಣಾಂಸೊನ್‍ಂಚ್ ತಾಣಿಂ ಪಾಟಿಂ ಘಾಲ್ಲೊ.

ತ್ಯಾ ಇಡ್ಯಾಂತ್ ವೆಗ್ಳಿಚ್ ಏಕ್ ಗಜಾಲ್ ಘಡೊನ್ ಗೆಲ್ಲಿ: ಬೊಳ್ನಿಗ್ ಆನಿ ಹೆರ್ ವೊಸ್ಯಾಂಚ್ಯಾ ಪಿಡೆಂಕ್ ಆಸ್ಮಾಬಿ ವಕತ್ ದೀವ್ನ್ ಗೂಣ್ ಕರ್ತಾಲಿ ಜಾಲ್ಯಾರೀ, ಖುದ್ ಜಮೀಲಾಕ್‍ಚ್ ತಸಲ್ಯಾ ವೊಸ್ಯಾಂತ್ಲಿ – ಬಚಾವ್ ಕರುಂಕ್ ತಿ ಸಕೊಂಕ್ ನಾ. ಕಾಳಿ ಬೊಳ್ನಿಗ್ ಜಾವ್ನ್ ಜಮೀಲಾ ಅಂತರ್‌ಲ್ಲಿ, ಆನಿ ಆದಿಂ ಸಾಂಗ್‍ಲ್ಲ್ಯಾ ಕಾರಣಾಂ ಖಾತಿರ್ ಆಸ್ಮಾಬಿನ್ ಜೀವನ್ಮರಣಾಚೊ ತೊ ಘುಟ್ ಸಾಂಬಾಳ್‍ಲ್ಲೊ. ಯೂಸುಫ್ ಆಲಿಕ್ ಮಾತ್ರ್ ತೊ ವಿಷಯ್ ಕ್ರಮೇಣ್ ಕಳಯ್ಲ್ಯಾ ಶಿವಾಯ್ ನಿರ್ವೊಗ್ ನಾ ಮ್ಹಣ್ ತಿ ಜಾಣಾಂಸ್‍ಲ್ಲಿ. ಪುಣ್ ತಶೆಂ ಕರುಂಕ್‍ಯೀ ತಿಕಾ ಅವ್ಕಾಸ್ ಮೆಳೊಂಕ್ ನಾತ್‍ಲ್ಲೊ. ಪಾಟ್ಲ್ಯಾ ದೋನ್-ತೀನ್ ಹಫ್ತ್ಯಾಂನಿ ತೊ ಥಂಯ್ಸರ್ ಪಾವೊಂಕ್ ನಾತ್‍ಲ್ಲೊ.

ಟಿಪ್ಪು ಸುಲ್ತಾನ್, ಸರ್ದಾರ್ ಸಿಮಾಂವ್ಕ್ ಸಾಂಗಾತಾ ಘೆವ್ನ್ ಕೊಡಗಾಚ್ಯಾ ಲಡಾಯೆಕ್ ಗೆಲ್ಲ್ಯಾ ಥೊಡ್ಯಾಚ್ ದಿಸಾಂನಿ – ತಿ ಕಾಳಿ ಪಿಡಾ ಸಾತ್ ದಿಸಾಂಚಿ – ಜಮೀಲಾ ಅಂತರ್‌ಲ್ಲಿ.

ತಿ ಖಬರ್ ಸರ್ದಾರ್ ಯೂಸುಫ್ ಆಲಿಕ್ ಕಳಿತ್ ನಾತ್‍ಲ್ಲಿ.

ಟಿಪ್ಪು ಸುಲ್ತಾನ್ ಆಸ್ಮಾಬಿಗೆರ್ ಭೆಟ್ ದೀವ್ನ್ ಆಯಿಲ್ಲ್ಯಾ ದುಸ್ರ್ಯಾ ದಿಸಾ ತಾಣೆಂ ಯೂಸುಫ್ ಆಲಿಕ್ ಆಪಂವ್ಕ್ ಲಾಯ್ಲೊ. “ಸದ್ದ್ಯಾಕ್ ರಾವ್ಳೆರಾಂತ್ ಆನಿ ಪಟ್ಟಣಾಂತ್ ಪರಿಸ್ಥಿತಿ ಚಿಕ್ಕೆ ಶಾಂತ್ ಆಸಾ” ಮ್ಹಣಾಲೊ ತೊ, ಅಪಧಯ್ರಾನ್ ಆಯ್ಕೊಂಕ್ ರಾವ್‍ಲ್ಲ್ಯಾ ಸರ್ದಾರಾ ಕಡೆನ್. “ಹ್ಯಾ ವೆಳಾರ್ ಆಮಿ ತುಕಾಯೀ – ತುಜೆಂ ಥೊಡೆಂ ಖಾಸ್ಗಿ ಕಾಮ್ ಕರ್ಚ್ಯಾ ಖಾತಿರ್ – ಸುಟ್ಕಾ ದಿತಾಂವ್.”

“ಜೀ, ಹುಜೂರ್!” ಸರ್ದಾರ್ ಯೂಸುಫ್ ಆಲಿ, ಸಬಾರ್ ದಿಸಾಂ ಉಪ್ರಾಂತ್ ತ್ಯಾ ಘಡ್ಯೆ, ಆಪ್ಲೆಚ್ ಕಾನ್ ಪಾತ್ಯೆನಾ ಜಾಲೊ.

ಟಿಪ್ಪು ಸುಲ್ತಾನಾನ್ ಯೂಸುಫ್ ಆಲಿಕ್, ಬಸೊಂಕ್ ಸಾಂಗ್ಲೆಂ. ತಾಚ್ಯಾ ಸ್ವರಾಂತ್ ಆದ್ಲ್ಯಾ ಸಳಾವಳಿಚೊ ಚಾರೊ ಚರ್ಲೊ.

“ವ್ಹಯ್, ಆತಾಂ ಆಮ್ಕಾಂ ಸಕ್ಡಾಂಕ್ ಥೊಡಿ ಪುರ್ಸತ್ ಆಸಾ” ಮ್ಹಣಾಲೊ ತೊ. “ಆಮ್ಚೊ ಸರ್ದಾರ್ ಸಿಮಾಂವ್ ಪುರ್ತೊ ಸ್ವಸ್ಥ್ ಜಾತಾ ಮ್ಹಣಸರ್ ಲಷ್ಕರಿ ರಾಟಾವಳಿ ಚಿಕ್ಕೆ ಪಾಟಿಂ ಘಾಲುಂಕ್ ಆಮಿ ಚಿಂತ್ಲಾಂ.”

“ಬಾದಶಹಾಚಿ ಖುಶಿ, ಕೆದಾಳಾಯೀ ಆಮ್ಚಿ ಹುಕುಮ್!”

“ತೆವ್ಶಿಲ್ಯಾನ್, ಹೆಗ್ಗಡದೇವನ ಕೋಟೆಕ್ ದಾಡ್ ಘಾಲುಂಕ್ ಗೆಲ್ಲೊ ಆಮ್ಚೊ ರಾಯಾಳ್ ಭಾವ್ ಕರೀಮ್‍ಖಾನ್‍ಯೀ ಪಾಟಿಂ ಆಯ್ಲಾ. ಆಮ್ಚಿಂ ಸೈನಾಂ ಪುನರ್ಸಜ್ಜಿತ್ ಕರುಂಕ್ ಥೊಡೆ ಮಹಿನ್ ಪುಣೀ ಜಾಯ್. ತ್ಯಾ ವೆಳಾಂತ್ ಆಮಿ ತುಕಾ ಏಕ್ – ಮನಾಕ್ ಒಪ್ಚೆಂ – ಕಾಮ್ ದೀಂವ್ಕ್ ಚಿಂತ್ಲಾಂ.”

“ಹುಜೂರ್, ಬಾದಶಹಾನ್ ಖುಶಿ ವ್ಹೆಲ್ಲೆಂ ಕಸಲೆಂ ಕಾಮ್ ಜಾಲ್ಯಾರೀ ತೆಂ ಜಾರಿ ಕರ್ಚೆಂ ಆಮ್ಚೊ ಕಾಯ್ದೊ” ಮ್ಹಣಾಲೊ ಸರ್ದಾರ್ ಯೂಸುಫ್, ಇಲ್ಲೆಂ ಧಯ್ರ್ ಘೆವ್ನ್. “ತಾಂತುಂ, ಸೆವಕ್ ಜಾವ್ನಾಸ್ಚ್ಯಾ ಆಮ್ಕಾಂ ‘ಮನಾಕ್ ಒಪ್ವನಾತ್‍ಲ್ಲೆಂ’ ಮ್ಹಣೊಂಕ್ ಕಾಂಯ್ ನಾ.”

“ತೆಂ ಆಮಿ ಜಾಣಾಂವ್” ಮ್ಹಣಾಲೊ ಟಿಪ್ಪು. “ಜಾಲ್ಯಾರೀ ಥೊಡೆ ಪಾವ್ಟಿಂ ಕಾಯ್ದ್ಯಾಚ್ಯಾ ನಿಬಾನ್ ಕೆಲ್ಲ್ಯಾ ಕಾಮಾ ವರ್ವಿಂ ಎಕ್ಲ್ಯಾಕ್ ಸ್ವತಃ ಸಂತೊಸ್ ಆನಿ ಚಡ್ ಬರೆಂಪಣ್ ಲಾಭೊಂಕ್‍ಯೀ ಸಾಧ್ಯ್ ಆಸಾ ನಹಿಂವೇ?”

“ಬಾದಶಹಾಚ್ಯಾ ಅಭಿಪ್ರಾಯೆಕ್ ಹಾಂವ್ ನಕಾರ್ ಬಿಲ್ಕುಲ್ ಉಚಾರಿನಾ ಆನಿ ತರ್ಕ್ ಕರುಂಕ್ ಜಾಲ್ಯಾರೀ ಹಾಂವ್ ಫಾವೊ ನಹಿಂ!”

“ಬಹುಶಃ, ತಾಚ್ಯಾ ಸಾಂಗಾತಾ ಆಸೊನ್, ತುಂಯೀ ಸರ್ದಾರ್ ಸಿಮಾಂವ್‍ಪರಿಂಚ್ ಉಲಂವ್ಕ್ ಶಿಕ್ಲಾಯ್!” ಹಾಸ್ಲೊ ಟಿಪ್ಪು ಸುಲ್ತಾನ್. “ಆಸೊಂ, ಆತಾಂ ಆಮಿ ಸಾಂಗ್ಚೆಂ ಬರೆಂ ಕರ್ನ್ ಆಯ್ಕ್.”

“ಜೀ ಹುಜೂರ್!”

“ಕೊಡಗಾಚ್ಯಾ ಗಡಿರ್ ಥಾವ್ನ್, ಹೆಗ್ಗಡದೇವನ ಕೋಟೆಚಿ ದಾಡ್ ಪಾಟಿಂ ಕಾಡುನ್ ಕರೀಮ್ ಖಾನಾನ್ ಆಯಿಲ್ಲೆಂ, ಹರ್ಯೆಕಾ ಥರಾನ್ ಆಮ್ಕಾಂ ಸ್ವಾಭಾವಿಕ್ ದಿಸ್ತಾ. ತುಂ ಆಮ್ಚ್ಯಾ ಸಾಂಗಾತಾ ನಾತ್‍ಲ್ಲೊಯ್. ಥಂಯ್ಸರ್ ಕಿತೆಂ ಘಡ್ಲೆಂ ಮ್ಹಳ್ಳೆಂ ಆಯ್ಕ್” ಮ್ಹಣೊನ್, ಕೊಡಗಾಚ್ಯಾ ಜಟಾಪಟೆಂತ್ ಕಶೆಂ ಸರ್ವ್ ‘ಚಿಂತ್‍ಲ್ಲೆಂ ಏಕ್ ಆನಿ ಜಾಲ್ಲೆಂ ಆನ್ಯೇಕ್’ ಮ್ಹಳ್ಳೊ ವಿವರ್ ತಾಣೆಂ ದಿಲೊ. ತ್ಯಾ ವೆಳಾರ್, ಸರ್ದಾರ್ ಸಿಮಾಂವ್ನ್ ಖರ್ಚಿಲ್ಲಿ ದೂರ್‌ದೃಷ್ಟೆಚಿ ಬುದ್ವಂತ್ಕಾಯ್, ಆನಿ ಬಾದಶಹಾಚ್ಯಾ ಸುರಕ್ಷಿತಾಯೆ ಖಾತಿರ್ ತಾಣೆಂ ಆಪ್ಲೊ ಜೀವ್ ರಿಸ್ಕೆರ್ ಘಾಲ್ಲಿ ರೀತ್ ಸಹಿತ್ ತಾಣೆಂ ಲಿಪಂವ್ಕ್ ನಾ.

“ತ್ಯಾ ಖಾತಿರ್ ಸರ್ದಾರ್ ಸಿಮಾಂವ್ಕ್ ಹಾಂವ್ ಪ್ರತ್ಯೇಕ್ ಥರಾನ್ ಋಣಿ ಜಾವ್ನಾಸಾಂ.” ಮುಖಾರ್ ಉಲಯ್ಲೊ ತೊ: “ಆನಿ ಆತಾಂ ಕರೀಮ್ ಖಾನ್‍ಯೀ ಪಾಟಿಂ ಯೇವ್ನ್ ಪಾವ್ಲಾ. ಪೊನ್ನಂಪೇಟೆ ಥಾವ್ನ್ ಕೊಡ್ಗ್ಯಾಂಚಿ ಏಕ್ ಫೌಜ್ ಹೆಗ್ಗಡದೇವನ ಕೋಟೆಕ್ ಯೆತಾ ಮ್ಹಣ್ ತಾಕಾ ಖಬರ್ ಮೆಳ್ಳಿ. ಪಿರಿಯಾಪಟ್ಟಣ ಥಾವ್ನ್ ಪಾಯ್ ಕಾಡ್ನ್ ಆಮಿ ಪಾಟಿಂ ಆಯ್ಲ್ಯಾಂವ್ ಮ್ಹಳ್ಳಿ ಖಬರ್‌ಯೀ ತಾಕಾ ಪಾವ್ಲಿ. ದೆಕುನ್ ತಾಣೆಂಯೀ ಪಾಟಿಂ ಆಯಿಲ್ಲೆಂ ವಾಜ್ಭಿಚ್. ತರೀ, ಏಕ್ ದುಬಾವ್ ಆಮ್ಕಾಂ ಕಾಂತಯ್ತಾ.”

“ಹುಜೂರ್?”

“ಹೆಂ ಆಮಿ ತುಜ್ಯಾ ಗರ್ಜೆ ಖಾತಿರ್ ಸಾಂಗ್ಚೆಂ” ಮ್ಹಣಾಲೊ ಟಿಪ್ಪು ಸುಲ್ತಾನ್, ಜಾಚಿ ಮತ್ ಆನಿ ವಿಚಾರಾ ಸರಣಿ ಪಯ್ಸ್ ಪಾವ್‍ಲ್ಲಿ. “ಬೆಟ್ಟದಪುರ ಆನಿ ಪಿರಿಯಾಪಟ್ಟಣ ಥಾವ್ನ್ ಚಿಕ್ಕೆ ಫುಡೆಂ ಸರ್‌ಲ್ಲ್ಯಾ ಆಮ್ಚ್ಯಾ ರಿಸಾಲಾಂನಿ ಥೊಡೊ ಮಾರ್ ಖೆಲೊ ಆನಿ ವಸ್ತುಂಚೊ, ಪ್ರಾಣಿಂಚೊ ಆನಿ ಮನ್ಶ್ಯಾಂಚೊ ಥೊಡೊ ನಷ್ಟ್‌ಯೀ ಆಮ್ಕಾಂ ಜಾಲೊ – ಫುಡೆಂ ಚಡ್ ವಾಂಟ್ಯಾಂನಿ ತೊ ಆಮಿ ಭರ್ತಿ ಕರ್ನ್ ಘೆತೆಲ್ಯಾಂವ್!”

“ನಿಜಾಯ್ಕೀ ಭರ್ತಿ ಕರ್ನ್ ಘೆಂವ್ಕ್ ಜಾಯ್ ಹುಜೂರ್!”

“ಆಮಿ ಆತಾಂ ಉಲಂವ್ಚೆಂ ಸವಾಲ್ ತೆಂ ನಹಿಂ. ಆಮಿ ಉಲಂವ್ಚೆಂ ಸವಾಲ್ ಆನಿ ಸಮಸ್ಯೆಂ ಕರೀಮ್ ಖಾನಾಕ್ ಸಂಬಂಧ್ ಜಾಲ್ಲೆಂ. ಪಿರಿಯಾಪಟ್ಟಣ ಆನಿ ಬೆಟ್ಟದಪುರಾಚ್ಯಾ ಗಡಿರ್ ಕೊಡ್ಗೆ ಆಮ್ಕಾಂ ರಾಕೊನ್ ಆಸ್‍ಲ್ಲೆಪರಿಂ, ಚಡ್ ಸ್ಪಷ್ಟ್ ಥರಾನ್, ಹೆಗ್ಗಡೆದೇವನ ಕೋಟೆ ಲಾಗಿಂಯೀ ತೆ ರಾಕೊನ್ ಆಸ್‍ಲ್ಲೆ ಮ್ಹಳ್ಳೆಂ ಖಂಡಿತ್ – ತಾಂಕಾಂ ಆಮ್ಚ್ಯಾ ಯೆಣ್ಯಾಚಿ ಪಯ್ಲಿಚ್ ಖಬರ್ ಆಸ್‍ಲ್ಲಿ. ಥಂಯ್ಸರ್ ಇತ್ಲೆ ದೀಸ್ ರಾವೊನ್ ಕರೀಮ್ ಖಾನ್ ಪಾಟಿಂ ಯೆತಾನಾ, ತಾಚ್ಯಾ ರಿಸಾಲಾಂಕ್ ಜಾಲ್ಲೊ ನಷ್ಟ್ ಭೋವ್ ಉಣೊ – ನಷ್ಟ್ ಜಾಂವ್ಕ್‌ಚ್ ನಾ ಮ್ಹಣ್ಯೆತ್. ತೆಂ ಏಕ್ ಪವಾಡ್ ನಹಿಂ ಜಾಲ್ಯಾರ್, ಆಮ್ಕಾಂ ನವ್ಯಾ ಚಿಂತ್ನಾಂಕ್ ಇಡೆಂ ದಿತಾ…” ಮ್ಹಣೊನ್ ಟಿಪ್ಪು ಸುಲ್ತಾನ್ ಆಪ್ಲ್ಯಾ ಮಿಶ್ಯಾಂಚಿಂ ಪೊಂತಾಂ ಚಿಂವೊಂಕ್ ಲಾಗ್ಲೊ.

ತಾಚ್ಯಾ ಚಿಂತ್ನಾಂಚಿ ಧಾರ್, ಸರ್ದಾರ್ ಯೂಸುಫ್ ಆಲಿಕ್ ಸಮ್ಜಲಿ. ಜಾಲ್ಯಾರೀ ಜವಾಬ್ ಕಾಡಿನಾಸ್ತಾನಾ ತಾಣೆಂ ಶ್ವಾಸ್ ಧರ್ಲೊ.

“ಮ್ಹಣ್ತಚ್” ಸಟ್ಟ್ ಕರ್ನ್ ಟಿಪ್ಪು ಉಲಯ್ಲೊ. “ತುಕಾ ಆಮಿ ಆತಾಂ ದೋನ್ ಕಾಮಾಂ ಫರ್ಮಾವ್ನ್, ತಿಂ ಜಾರಿ ಕರ್ಚ್ಯಾ ಖಾತಿರ್ ಸಂಪೂರ್ಣ್ ಸುಟ್ಕಾ ಆಮಿ ದಿತಾಂವ್.”

ಮ್ಹಣೊನ್ ತಾಣೆಂ ಆಪ್ಲಿ ತಾಕಿದ್ ದಿಲಿ. ಸರ್ದಾರ್ ಯೂಸುಫ್ ಆಲಿನ್, ತ್ಯಾ ದೀಸ್ ಥಾವ್ನ್ ರಾಯ್-ಕುಂವರ್ ಕರೀಮ್‍ಖಾನಾಚೆರ್ ದೊಳೊ ದವರಿಜಾಯ್, ತಾಚಿ ಇಷ್ಟಾಗಾತ್ ಕರಿಜಾಯ್ ಆನಿ ರಾವ್ಳೆರಾಂತ್ಲ್ಯಾ ಆನಿ ಸೈನಾಂತ್ಲ್ಯಾ ಮುಖೆಲ್ಯಾಂ ಮಧೆಂ ಕೊಣಾ ಕಡೆನ್ ಕಸಲೆ ಸಂಬಂಧ್ ತೊ ದವರ್ನ್ ಆಸಾ ಮ್ಹಳ್ಳೆಂ, ಆನಿ ಭಾಯ್ಲ್ಯಾ ರಾಯಾಂ ಕಡೆನ್ – ಪ್ರತ್ಯೇಕ್ ಜಾವ್ನ್ ಟಿಪ್ಪುಚೆ ದುಸ್ಮಾನ್ ಜಾವ್ನಾಸ್ಚ್ಯಾ ದೇಶೀ ರಾಯಾಂ ಕಡೆನ್, ಸುಲ್ತಾನಾಂ ಕಡೆನ್, ನೈಜಾಮಾ ಕಡೆನ್ ಆನಿ ನಸ್ರಾನಿ ಇಂಗ್ಲೆಜಾಂ ಕಡೆನ್ – ತಾಚೊ ಸಂಬಂಧ್ ಕಸಲೊ ಆನಿ ಕಿತ್ಲೊ ಮ್ಹಳ್ಳೆಂ ಸಮ್ಜೊನ್ ಆಪ್ಣಾಕ್ ತಿಳ್ಸಿಜಾಯ್ ಮ್ಹಣ್ ತಾಣೆಂ ಫರ್ಮಾಯ್ಲೆಂ.

ಸರ್ದಾರ್ ಯೂಸುಫ್ ಆಲಿ ಕಬೂಲ್ ಜಾಲೊ, ಪುಣ್ ಭಿತರ್ಲ್ಯಾನ್ ಚಿಕ್ಕೆ ಕಾವ್ಜೆಲೊ. ಬಾದಶಹಾನ್ ಫರ್ಮಾಯಿಲ್ಲೆಂ ಕಾಮ್ ನಿಜಾಯ್ಕೀ ವರ್ತ್ಯಾ ಜವಾಬ್ದಾರೆಚೆಂ, ಕಷ್ಟಾಂಚೆಂ ಆನಿ ಅಪಾಯಾಚೆಂ ಜಾವ್ನಾಸ್‍ಲ್ಲೆಂ. ಜಾಯ್ತಿತ್ಲಿ ಚತ್ರಾಯ್, ಬುದ್ವಂತ್ಕಾಯ್ ಆನಿ ಧಯ್ರ್ ವಾಪಾರ್ನ್ ತೆಂ ಕಾಮ್ ಹಾತಿಂ ಘೆವ್ಯೆತ್ ಮ್ಹಣ್ ತೊ ಸಮ್ಜಲೊ.

“ಆನಿ ತ್ಯಾ ಖಾತಿರ್” ಸಾಂಗ್ಲೆಂ ಟಿಪ್ಪುನ್. “ತುಜ್ಯಾ ಸಂದ್ರಾಪಾ ಪರ್ಮಾಣೆಂ, ತುಜೊ ದೋಸ್ತ್ ಆನಿ ಆಮ್ಚ್ಯಾ ಸರ್ದಾರ್ ಸಿಮಾಂವ್ಕ್ ಭೆಟ್ ದೀವ್ನ್ ಫಾವೊ ತೆ ಹಿಶಾರೆ ಆನಿ ಮಾಹೆತ್ ತುವೆಂ ವಿಚಾರ್ನ್ ಘೆವ್ಯೆತ್.”

“ಜೀ, ಹಜೂರ್!” ಸರ್ದಾರ್ ಯೂಸುಫ್ ಆಲಿಕ್ ಸಮಾಧಾನ್ ಭೊಗ್ಲೆಂ, ಆನಿ ಆಪ್ಲೆಂ ವೊಜೆಂ ಚಿಕ್ಕೆ ಹಾಳು ಜಾಂವ್ಚೆಪರಿಂ ದಿಸ್ಲೆಂ.

“ಆನಿ ದುಸ್ರೆಂ ಕಾಮ್ ಆನಿ ಇನಾಮ್” ಸಟ್ಟ್ ಕರ್ನ್ ಹಾಸ್ಲೊ ಟಿಪ್ಪು ಸರ್ದಾರ್, ತ್ಯಾಚ್ ಶ್ವಾಸಾನ್ ಫುಡ್ಲೆಂ ಸವಾಲ್ ವಿಚಾರ್ನ್: “ಆಸ್ಮಾಬೀಬಿಕ್ ತುಂ ವಳ್ಕತಾಯ್?”

“ಜೀ, ಹುಜೂರ್” ಯೂಸುಫ್ ಆಲಿನ್ ಚಿಕ್ಕೆ ಕಾವ್ಜೆವ್ನ್ ಜವಾಬ್ ದಿಲಿ: “ತಿ ಬೇಗಮ್ ಸಾಹಿಬಾ, ಮ್ಹಾಕಾ ಪಯ್ಶಿಲ್ಯಾನ್ ಸಯ್ರಿ ಜಾವ್ನಾಸಾ.”

“ಬರೆಂಚ್. ಆನಿ ಜಮೀಲಾ ನೂರ್ ಜಹಾನ್?”

“ತಿಕಾ-ತಿಕಾ ಆನಿ ಮ್ಹಾಕಾ ಬರಿ ಇಷ್ಟಾಗಾತ್ ಆಸಾ” ಮ್ಹಣಾಲೊ ಯೂಸುಫ್ ಆಲಿ, ಚಡ್ ಕಾಲುಬುಲೊ ಜಾವ್ನ್.

“ಆನಿಕ್‍ಯೀ ಬರೆಂಚ್” ಮ್ಹಣಾಲೊ ಟಿಪ್ಪು ಸುಲ್ತಾನ್ – ಯೂಸುಫ್ ಆಲಿನ್ ಚಡ್ ವಿಸ್ಮಿತ್ ಜಾಯ್ಶೆಂ: “ತುಮ್ಚ್ಯಾ ಇಷ್ಟಾಗಾತೆಕ್ ಆಮ್ಚಿ ಕಬ್ಲಾತ್ ಆಸಾ. ತುಮ್ಚೆಂ ಮಿಲನ್ ಮುಂದರ್ಸಿಯಾ, ಆನಿ ಜಾಂವ್ಚೆಂ ಜಾಲ್ಯಾರ್ – ಫುಡ್ಲ್ಯಾ ಪಂದ್ರಾ ದಿಸಾಂ ಭಿತರ್ ಎಕಾಮೆಕಾ ಕಡೆನ್ ತುಮ್ಚೆಂ ಲಗ್ನ್ ಜಾಂವ್ಚೆಂಯೀ ಆಮ್ಕಾಂ ಪಸಂದ್! ಪುಣ್ ಏಕ್ ಚತ್ರಾಯ್ – ತಾಂಕಾಂ, ಕರೀಮ್ ಖಾನಾ ಕಡೆನ್ ಕಿತ್ಲಿ ಸಳಾವಳ್ ಆಸಾ ಮ್ಹಳ್ಳೆಂಯೀ ತುವೆಂ ಸಮ್ಜೊಂಕ್ ಸುಲಭ್. ತಶೆಂಚ್, ಬಂದಡೆಂತ್ ಆಸ್‍ಲ್ಲ್ಯಾ ಆನಿ ಭಾಯ್ಲ್ಯಾ ನಸ್ರಾನಿಂ ಕಡೆನ್ ತಾಂಚೊ ಕಾಂಯ್ ವ್ಯವಹಾರ್ ಆಸನಾಯೆ ಮ್ಹಳ್ಳೆಂಯೀ ತುವೆಂ ಖಾತ್ರಿ ಕರಿಜಾಯ್!”

“ಜೀ, ಹುಜೂರ್!”

“ಆತಾಂ ತುವೆಂ ವಚ್ಯೆತ್. ಗರ್ಜ್ ಪಡ್ಲ್ಯಾರ್ ಆಪಂವ್ಕ್ ಧಾಡ್ತಾಂವ್.”

ತಶೆಂ, ಏಕ್ ನವೊ ಮನಿಸ್ ಜಾವ್ನ್, ಎಕಾ ನವ್ಯಾ ಸಂಸಾರಾಂತ್ ಕಸೊ, ಸರ್ದಾರ್ ಯೂಸುಫ್ ಆಲಿ ಭಾಯ್ರ್ ಪಡ್ಲೊ. ಥಂಯ್ ಥಾವ್ನ್ ವ್ಹಡಾ ಉಮೆದಿನ್ ಸರ್ದಾರ್ ಸಿಮಾಂವ್ಕ್ ಭೆಟೊಂಕ್ ತೊ ಗೆಲೊ.

ಸಬಾರ್ ದಿಸಾಂನಿ, ದಿಸಾ ಉಜ್ವಾಡೆಂಚ್ ಸರ್ದಾರ್ ಯೂಸುಫ್ ಆಪ್ಲ್ಯಾ ಭೆಟೆಕ್ ಆಯಿಲ್ಲೆಂ ಪಳೆವ್ನ್ ಸರ್ದಾರ್ ಸಿಮಾಂವ್ಕ್ ಸಂತೊಸ್ ಜಾಲೊ, ಸಾಂಗಾತಾಚ್ ಅಜ್ಯಾಪ್‍ಯೀ ಜಾಲೆಂ. ತಾಕಾ ಯೂಸುಫಾನ್ ಸಗ್ಳಿ ಕಥಾ ಸಾಂಗ್ಲಿ.

“ಬಾದಶಹಾನ್ ತುಕಾ ದಿಲ್ಲ್ಯಾ ದುಸ್ರ್ಯಾ ಕಾಮಾ ಖಾತಿರ್ ಹಾಂವ್ ಸಂತೊಸ್ ಪಾವ್ತಾಂ, ಯೂಸುಫ್ ಭಾಯೀ” ಮ್ಹಣಾಲೊ ಸರ್ದಾರ್ ಸಿಮಾಂವ್ ಥೊಡ್ಯಾ ವೆಳಾನ್. “ಜಮೀಲಾ ಕುಂವರ್ನಿಚೊ ತುಂ ಮೋಗ್ ಕರ್ನ್ ಆಸಾಯ್, ತಿಯೀ ತುಜೊ ಮೋಗ್ ಕರ್ತಾ ಮ್ಹಳ್ಳೆಂ ಹಾಂವ್ ಜಾಣಾಂ. ತುಮ್ಚ್ಯಾ ಎಕ್ವಟಾ ಖಾತಿರ್ ಆತಾಂ ಬಾದಶಹಾಚಿಚ್ ಸಹಿ ಮೆಳ್ಳಿ ಮ್ಹಳ್ಯಾರ್ ಬರೆಂಚ್. ತಾಂತುಂ ಹೆರ್ ಕಸಲಿಯೀ ಶಿರಿಗುಂಡಿ ನಾ ಮ್ಹಣ್ ಪಾತ್ಯೆಯಾಂ.”

“ಮ್ಹಜೆಂಯೀ ಪ್ರಾರ್ಥನ್ ತೆಂಚ್” ಮ್ಹಣಾಲೊ ಸರ್ದಾರ್ ಯೂಸುಫ್. “ಪುಣ್ ತುವೆಂ ಪಯ್ಲೆಂ ಕಾಜಾರ್ ಜಾಯ್ಜಯ್ ಮ್ಹಣ್ ಮ್ಹಜಿ ಅಪೇಕ್ಷಾ ಜಾವ್ನಾಸ್‍ಲ್ಲಿ. ತುಜಿ ಆಲೋಚನ್ ಕಶಿ ರಾವ್ಲ್ಯಾ ಮ್ಹಣ್ ವಿಚಾರ್ಯೆತ್‍ಗೀ?”

“ಹಾಂವ್‍ಂಚ್ ನೆಣಾಂ, ಯೂಸುಫ್ ಭಾಯೀ” ಮ್ಹಣಾಲೊ ಸರ್ದಾರ್ ಸಿಮಾಂವ್, ಹಾಸೊನ್. ತಾಚಿಂ ಚಿಂತ್ನಾಂ ಪಾಟಿಂ ಧಾಂವ್ಲಿಂ, ಬಂಟ್ವಾಳಾಂತ್ ಆರಂಭ್ ಜಾಲಿಂ, ಮಂಗ್ಳುರಾಂತ್ ಘುಂವ್ಲಿ, ಆನಿ ಪರತ್ ಬಂಟ್ವಾಳಾಕ್ ಆಯ್ಲಿಂ. ಆಗ್ನೆಸ್ ಕುಂವರ್ನ್ ಪಟ್ಟಣಾಕ್ ಭಾಯ್ರ್ ಸರೊನ್ ಆಯ್ಲ್ಯಾ ಮ್ಹಳ್ಳ್ಯಾ ಖಬ್ರೆಚೊ ಉಗ್ಡಾಸ್ ಯೇವ್ನ್ ಆತುರಾಯ್ ತಾಕಾ ಭೊಗ್ಲಿ.

“ಮ್ಹಜ್ಯಾ ಮೊಗಾಚೆಂ ಚಕ್ರ್, ಯೂಸುಫ್” ಮ್ಹಣಾಲೊ ತೊ ಗಂಭೀರ್ ಜಾವ್ನ್. “ಪಾಟ್ಲ್ಯಾ ತೀನ್ ವರ್ಸಾಂನಿ ಸಾರ್ಕೊ ಏಕ್ ಭೊಂವಾಡೊ ಘುಂವೊನ್, ಆರಂಭಾಚ್ಯಾ ಠಿಕಾಣ್ಯಾರ್ ಠಿಕ್ಲಾಂ. ಪುಣ್…”

“ಪುಣ್?”

“ಪುಣ್, ಆಮ್ಚೆಂ ಜೀವನ್‍ಂಚ್ ಜೀವನ್ಮರಣಾಚೆಂ ಸವಾಲ್ ಜಾವ್ನ್ ಆಸ್ಚ್ಯಾ ಹ್ಯಾ ವೆಳಾರ್, ಮೊಗಾ ಖಾತಿರ್ ಫುಡಾರಾ ವಿಷ್ಯಾಂತ್ ಚಿಂತುಂಕ್ ಮ್ಹಾಕಾ ಭಿರಾಂತ್ ದಿಸ್ತಾ. ತೆಂ ಆಸೊಂ” ಮ್ಹಣಾಲೊ ತೊ, ವಿಷಯ್ ಬದ್ಲುನ್. “ಆತಾಂ, ಬಾದಶಹಾನ್ ತುಕಾ ಫರ್ಮಾಯಿಲ್ಲ್ಯಾ ಪಯ್ಲೆಂಚ್ಯಾ ಕಾಮಾಚಿ ಖಬರ್ ಉಲಯಾಂ.”

“ವ್ಹಯ್, ತ್ಯಾ ವಿಷ್ಯಾಂತ್ ಕಿತೆಂ ತುಜಿ ಅಭಿಪ್ರಾಯ್?”

“ಅಭಿಪ್ರಾಯ್ ಇತ್ಲಿಚ್; ಕಾಮ್ ಸುಲಭ್, ಪುಣ್ ಅಪಾಯಾಚೆಂ.”

“ತಶೆಂ ಮ್ಹಾಕಾಯೀ ಭೊಗ್ಲಾಂ.”

“ಅಪಾಯ್ ಜಾಲ್ಯಾರೀ, ಫಾವೊ ತಿ ಚತ್ರಾಯ್ ಘೆವ್ನ್ ಚುಕವ್ಯೆತ್. ನಾ ಜಾಲ್ಯಾರ್ – ಆಮಿ ಬಾದಶಹಾಚೆ ಗೂಢಚಾರ್ ವಾ ಖಬ್ರಿ ಮ್ಹಣ್ ಹೆರಾಂಕ್ ಕಳಿತ್ ಜಾಲ್ಯಾರ್, ಆಮ್ಚ್ಯಾ ಮಾನಾಕ್ ಆನಿ ಆಮ್ಚ್ಯಾ ಜಿವಾಕ್ ಕುಸ್ಕುಟ್‍ಯೀ ಮೋಲ್ ನಾ. ಪುಣ್ ತಿ ಗಜಾಲ್ ವರ್ತಿ ನಹಿಂ, ಬಗಾರ್, ಚಡ್ ಖಂತಿಚಿ ಏಕ್ ಗಜಾಲ್ ವೆಗ್ಳಿ ಆಸಾ.”

“ಖಂಚಿ ತಿ?”

“ಅಸಲ್ಯಾ ಫರ್ಮಾಣಾ ವರ್ವಿಂ, ಬಾದಶಹಾ ಆಪ್ಲ್ಯಾಚ್ ಲಾಗ್ಶಿಲ್ಯಾಂಕ್, ಆಪ್ಲ್ಯಾಚ್ – ಎಕಾ ತಂಬಾಂತ್ಲ್ಯಾ ಹುದ್ದೆದಾರಾಂಕ್, ಸಯ್ರ್ಯಾಂಕ್ ಆನಿ ಅಧಿಕಾರಿಂಕ್ – ಎಕ್ಲ್ಯಾಕ್ ಆನ್ಯೇಕ್ಲ್ಯಾ ವಿರೋಧ್ ಖೆಳಯ್ತಾ ಆನಿ ನೀಜ್ ಭೇದ್-ಭಾವಾಕ್ ಆನಿ ದ್ವೇಷಾಕ್ ಇಡೆಂ ದಿತಾ. ಆತಾಂ ಆಮ್ಕಾಂ ಸಮ್ಜತಾ; ತಾಚ್ಯಾ ಕಾರ್ಬಾರಾಚೆಂ ಕಾರ್ಯಕ್ಷೇತ್ರ್ ಆತಾಂ ತಾಚ್ಯಾ ಹಾತಾಂತ್ ಏಕ್ ಗುರ್ಪೊಳೆಂ ಜಾಲಾಂ, ಆನಿ ತಾಚ್ಯಾ ಖಾಲ್ ಆಸ್ಚಿ ಹರ್ಯೆಕ್ ವ್ಯಕ್ತಿ ತಾಂತ್ಲೆ ಖೆಳಾಚೆ ಘುಲೆ ಜಾಲ್ಯಾತ್!”

“ತೆಂ ವ್ಹಯ್, ಪುಣ್ ಆತಾಂ ಕಿತೆಂ ಕರ್ಯಾಂ? ಜಿಣ್ಯೆ ಕಡೆನ್‍ಂಚ್ ಜುಗಾರ್ ಖೆಳ್‍ಲ್ಲ್ಯಾ ತುಜೆ ಥಾವ್ನ್ ಹಿಂ ಉತ್ರಾಂ ಆಯ್ಕತಾನಾ, ಮ್ಹಾಕಾ ಆತಾಂ, ಜಮೀಲಾಕ್ ಕಾಣ್ಗೆವ್ನ್ ಖಂಯ್ಸರ್‌ಯೀ ಪಯ್ಸ್ ಧಾಂವ್ಯಾಂ ಮ್ಹಣ್ ದಿಸ್ತಾ.”

“ತುಕಾ ಸಾಧ್ಯ್ ಜಾಲ್ಯಾರ್ ತುವೆಂ ತಶೆಂ ಕರ್ಯೆತ್. ಪುಣ್ ಮ್ಹಜ್ಯಾನ್ ತಶೆಂ ಕರುಂಕ್ ಸಾಧ್ಯ್ ನಾ. ತೀನ್ ವರ್ಸಾಂ ಆದಿಂ ಥೊಡೆ ಮಹಿನೆ ಬಾದಶಹಾಚ್ಯಾ ನದ್ರೆ ಥಾವ್ನ್ ಪಯ್ಸ್ ರಾವ್‍ಲ್ಲೊ ಗ್ರಾಯ್ಕ್ ಹಾಂವ್, ತಾಚ್ಯಾ ಉಲ್ಯಾಕ್ ಪಾಳೊ ದೀವ್ನ್ ಪರ್ತ್ಯಾನ್ ಪಾಟಿಂ ಆಯ್ಲೊಂ – ಪುಣ್ ನಿರಾಶಿ ಜಾಂವ್ಕ್ ನಾ – ಆನಿ ತಾಚ್ಯಾ ಗುರ್ಪೊಳ್ಯಾಂತ್ಲೊ ಘುಲೊ ಜಾಲೊಂ.”

“ಆನಿ ಆತಾಂ?”

“ಆನಿ ಆತಾಂ ಹೊ ಖೆಳ್ ಏಕ್ ನಹಿಂ ಆನ್ಯೇಕಾ ಥರಾನ್ ಆಖೇರ್ ಜಾಯ್ಜಯ್, ನಾ ಜಾಲ್ಯಾರ್, ಹೊ ಘುಲೊ ಭಾಯ್ರ್ ಪಡಜಾಯ್!”

“ಭಾಯೀ” ಮ್ಹಣಾಲೊ ಯೂಸುಫ್, ಉದ್ವೇಗಾನ್. “ತುಜಿಂ ಉತ್ರಾಂ ಆಯ್ಕತಾನಾ ಮ್ಹಾಕಾ ದಿಸ್ತಾ – ನಿರಾಶಾ ನಹಿಂ ಜಾಲ್ಯಾರೀ, ಎಕಾ ಥರಾಚಿ ಖಂತ್ ತುಕಾ ಧೊಸ್ತಾ!”

ಸರ್ದಾರ್ ಯೂಸುಫಾಚ್ಯಾ ತ್ಯಾ ಉತ್ರಾಂನಿ ಸತ್ ಆಸ್‍ಲ್ಲೆಂ. ಪುಣ್ ದೊಗಾಂಯ್ನೀ ಚಿಂತ್‍ಲ್ಲಿಂ ಕಾರಣಾಂ ವೆವೆಗ್ಳಿಂ ಆಸ್‍ಲ್ಲಿಂ.

“ತುವೆಂ ಸಾಂಗ್ಚೆಂ ಸತ್, ಯೂಸುಫ್ ಭಾಯೀ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಆದ್ಲಿಂ ಆನಿ ಆತಾಂಚಿಂ ಘಡಿತಾಂ ಚಿಂತುನ್ ಮನ್ ಆಮ್ಚೆಂ ರಡ್ತಾ, ಆನಿ ವಿಶ್ವಾಸ್ ಆಮ್ಚೊ ಹಾಸ್ತಾ!”

ತಾಚಿಂ ಉತ್ರಾಂ, ಸರ್ದಾರ್ ಯೂಸುಫ್ ಆಲಿಕ್ ಏಕ್ ಉಮಿಣಿ ಜಾವ್ನ್ ಆಯ್ಕಲಿಂ. ಪುಣ್ ತ್ಯಾ ಉತ್ರಾಂನಿ, ಸರ್ದಾರ್ ಸಿಮಾಂವ್ಕ್, ಕೆನರಾ ಕ್ರಿಸ್ತಾಂವಾಂಚ್ಯಾ ಬಂದಡೆ ಸಂಬಂಧಿಂ ಭೊಗ್‍ಲ್ಲ್ಯಾ ಅನುಭವಾಂಚೊ ಸಾರಾಂಶ್ ಆಟಾಪುನ್ ಆಸ್‍ಲ್ಲೊ. ಫುಡ್ಲೊ ಥೊಡೊ ವೇಳ್ ಉಲವ್ನ್ ತೆ ಬಸ್ಲೆ. ಕೊಡಗಾಚ್ಯಾ ಲಡಾಯೆ ವೆಳಾರ್, ಮೈಸೂರ್ಚಿಂ ರಿಸಾಲಾಂ ಸಲ್ವೊಂಕ್, ಭಿತರ್ಲ್ಯಾಚ್ ಕೊಣೆಂಗೀ, ಫುಡ್ಲ್ಯಾ ಪಾಡ್ತಿಕ್ ಖಬರ್ ಪಯ್ಲೆಂ ದಿಲ್ಲೆಂ ಕಾರಣ್ ಮ್ಹಣ್, ಆಪ್ಣಾಕ್ ದಿಸ್‍ಲ್ಲೆಪರಿಂ ಸರ್ದಾರ್ ಸಿಮಾಂವ್ನ್ ಯೂಸುಫಾಕ್ ಸಾಂಗ್ಲೆಂ. ದೆಕುನ್ ತ್ಯಾ ದಿಶೆನ್ ತಾಣೆಂ ಚತ್ರಾಯೆನ್ ಮೆಟಾಂ ಕಾಡಿಜಾಯ್ ಮ್ಹಣ್ ಜಾಗ್ವಣ್ ದಿಲಿ.

ಉಪ್ರಾಂತ್ ಸರ್ದಾರ್ ಯೂಸುಫ್ ವಚೊಂಕ್ ಉಟ್ಲೊ.

“ಜಾಯ್ತ್, ಯೂಸುಫ್ ಭಾಯೀ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಮ್ಹಾಕಾ ಭೆಟ್ ದೀಂವ್ಕ್ ತುಕಾ ಫುಡೆಂಯೀ ಯೇಂವ್ಕ್ ಸಾಧ್ಯ್ ಆಸಾ ಮ್ಹಳ್ಳೆಂ ಸಮ್ಜೊಂಕ್ ಹಾಂವ್ ಸಂತೊಸ್ ಪಾವ್ತಾಂ. ಯೆತಚ್ ರಾವ್, ಆನಿ ಪ್ರತ್ಯೇಕ್ ಜಾವ್ನ್, ತುಜಿಂ ಕಾಮಾಂ ಕಶಿಂ ಫುಡೆಂ ಸರ್ತಾತ್ ಮ್ಹಳ್ಳಿ ಖಬರ್ ಮ್ಹಾಕಾ ದೀವ್ನ್ಂಚ್ ರಾವ್.”

“ಜರೂರ್ ಭಾಯೀ. ತುಂಯೀ ವೆಗಿಂ ಸ್ವಸ್ಥ್ ಜಾ. ಉಪ್ರಾಂತ್ ಆಮಿ ಸಾಂಗಾತಾ ಭೊಂವೊಂಕ್ – ಆನಿ ಜಮೀಲಾಗೆರ್‌ಯೀ ವಚ್ಯೆತ್!”

“ತೆಂ ಉಪ್ರಾಂತ್ ಪಳೆಯಾಂ. ತುಜೆಂ ಕಾಮ್ ಜಾಂವ್ದಿ ಪಯ್ಲೆಂ.”

ಯೂಸುಫ್ ಥಂಯ್ ಥಾವ್ನ್ ಗೆಲೊ. ಪುಣ್ ತಾಣಿಂ ದೊಗಾಂಯ್ನೀ ಸಾಂಗಾತಾ ಜಮೀಲಾಗೆರ್ ವೆಚೊ ಸಂದರ್ಭ್ ತಾಂಕಾಂ ಬಿಲ್ಕುಲ್ ಲಾಭ್ಚೊ ನಾ ಮ್ಹಣ್ ದೊಗಾಂಯ್ಕೀ ಕಳಿತ್ ನಾತ್‍ಲ್ಲೆಂ.

ದುಸ್ರ್ಯಾ ದಿಸಾ, ಸರ್ದಾರ್ ಯೂಸುಫ್ ಆಲಿ, ಹರ್ಶೆಂಚ್ಯಾ ಪ್ರಾಸ್ ಚಡ್ ಚತ್ರಾಯೆನ್ ನ್ಹೆಸೊನ್ ಆಸ್ಮಾಬಿಗೆರ್ ಪಾವ್ಲೊ. ಆಸ್ಮಾಬಿ ತಾಚೆ ಕಡೆನ್ ಮರ್ಯಾದಿನ್ ಉಲಯ್ಲಿ. ಜಮೀಲಾಚಿ ಖಬರ್ ಕಶೆಂ ಸಾಂಗ್ಚಿ ಮ್ಹಣ್ ತಿಕಾ ಸಮ್ಜೊಂಕ್ ನಾ. ಭಿತರ್ಲ್ಯಾನ್ ಆಗ್ನೆಸ್ ಕುಂವರ್ನ್‍ಯೀ ಘಡ್ಬಡ್ಲಿ ಆನಿ ಲಜೆಲಿ.

“ಜಮೀಲಾ ನಾಂಗೀ?” ಸರ್ದಾರ್ ಯೂಸುಫಾನ್ ವಿಚಾರ್ಲೆಂ.

“ಆಸಾ, ಬೇಟಾ” ಮ್ಹಣಾಲಿ ಆಸ್ಮಾಬಿ, ದುಖಾಂ ತಡ್ವುನ್ ಧರ್ನ್. “ತಿಕಾ ಜಿವಾಕ್ ಚಿಕ್ಕೆ ಬರೆಂ ನಾ. ಭಿತರ್ ನಿದ್ಲ್ಯಾ.”

“ತರ್ ಹಾಂವ್ ಆನ್ಯೇಕ್ ಪಾವ್ಟಿಂ ಯೆತಾಂ” ಮ್ಹಣೊನ್ ಯೂಸುಫ್ ಆಲಿ ಗೆಲೊ, ನಿರಾಶಿ ಜಾವ್ನ್.

ಫುಡ್ಲ್ಯಾ ದಿಸಾಂನಿ ಹಫ್ತ್ಯಾಂತ್ ತೀನ್ ಪಾವ್ಟಿಂ ತೊ ಗೆಲೊ. ಪುಣ್ ಆಸ್ಮಾಬಿ, ಏಕ್ ನಹಿಂ ಆನ್ಯೇಕ್ ನೀಬ್ ಸಾಂಗ್ತಾಲಿ ಆನಿ ತಾಕಾ, ಖಂತಿನ್, ಪಾಟಿಂ ಧಾಡ್ತಾಲಿ. ಜಮೀಲಾಚಿ ತಾಕಾ ಭೆಟ್ ಜಾಂವ್ಕ್ ನಾ. ಆಗ್ನೆಸ್ ಕುಂವರ್ನಿನ್ ತಾಚೆ ಕಡೆನ್ ಬಿಲ್ಕುಲ್ ಉಲಂವ್ಚೆಪರಿಂ ನಾತ್‍ಲ್ಲೆಂ. ಸರ್ದಾರ್ ಯೂಸುಫ್ ಆಲಿಚ್ಯಾ ಮತಿಂತ್ ದುಬಾವ್ ಆನಿ ಎಕಾ ಥರಾಚೆಂ ಭ್ಯೆಂ ಚರೊಂಕ್ ಲಾಗ್ಲೆಂ. ತಾಣೆಂ ಸಾಂಗ್‍ಲ್ಲಿ ಖಬರ್ ಸರ್ದಾರ್ ಸಿಮಾಂವ್ಕ್‌ಯೀ ವಿಚಿತ್ರ್ ದಿಸ್ಲಿ.

ಟಿಪ್ಪು ಸುಲ್ತಾನಾಕ್‍ಯೀ ತಿ ಖಬರ್ ವಿಚಿತ್ರ್ ದಿಸ್ಲಿ ಆನಿ ಕ್ರಮೇಣ್ ತಾಚೆಂ ಪೀಂತ್ ಖದ್ವಳಾಂವ್ಕ್ ಲಾಗ್ಲಿ. ಆಪುಣ್ ಹೆರಾಂಕ್ ಖೆಳಯ್ತಾಂಗೀ, ವಾ ಹೆರಾಂಚ್ ಆಪ್ಣಾಕ್ ಖೆಳಯ್ತಾತ್‍ಗೀ ಮ್ಹಣ್ ತೊ ತಾಪೊಂಕ್ ಲಾಗ್ಲೊ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

ಪ್ರಕರಣ್ 25: ಉಸಲ್ಲ್ಯಾ ದಾಡ್ಯಾಂ ಮಧೆಂ

ಖುದ್ ಮೈಸೂರ್ಚೊ ವಾಗ್‍ಚ್ ದಾರಾರ್ ಯೇವ್ನ್ ಮಿಶ್ಯೊ ಹಾಲಂವ್ಚೆಂ ಪಳೆವ್ನ್ ಆನಿ ಸಮ್ಜೊನ್ ಆಸ್ಮಾಬಿಕ್ ಝಿಂಟ್ ಉಟ್ಲಿ. ಪುಣ್ ರಾವ್ಳೆರಾಚ್ಯಾ ತಂತ್ರಾಂ-ಕುತಂತ್ರಾಂನಿ ಹೆಳ್‍ಲ್ಲಿ ಗ್ರಾಯ್ಕಿಣ್ ತಿಯೀ ಜಾವ್ನಾಸ್‍ಲ್ಲ್ಯಾನ್, ತಿಕಾ ಭೊಗ್‍ಲ್ಲೆಂ ಆತುರಾಯೆಚೆಂ ಆನಿ ಭಿರಾಂತಿಚೆಂ ಕಸಲೆಂಚ್ ಖುಣ್ ಭಾಯ್ಲ್ಯಾನ್ ತಿಣೆಂ ದಾಕಂವ್ಕ್ ನಾ.

“ಬಾದಶಹಾ ಮನ್ಸೂರ್ ಅಲಿ – ಬೇಟಾಕ್ ಸಲಾಮ್” ಮ್ಹಣಾಲಿ ತಿ ಅಂಬುರ್ಕಿ ಹಾಸೊನ್, ಸಳಾವಳಿನ್. “ಕಿತೆಂ ಹೊ ಅಪ್ರೂಪ್ ಸಂದರ್ಶನಾಚೊ ಉಪ್ಕಾರ್?”

ಬಾದಶಹಾನ್ ವಂದನ್ ಪಾಟಿಂ ದಿಲೆಂ.

“ಸಬಾರ್ ದೀಸ್ ಥಾವ್ನ್ ಭೆಟ್ ದೀಜಾಯ್ ಮ್ಹಣ್ ಚಿಂತುನ್ ಆಸ್‍ಲ್ಲೊಂ ಧಾಕ್ಟ್ಯಾ ಆವಯ್” ಮ್ಹಣಾಲೊ ತೊ. “ಆಜ್ ಯೆಯಾಂ ಮ್ಹಣ್ ಭೊಗ್ಲೆಂ.” ಮೆಟಾಂ ಚಡೊನ್ ವಯ್ರ್ ಯೇವ್ನ್ ಥಂಯ್ಚ್ ಆಸ್‍ಲ್ಲ್ಯಾ ಪಲ್ಲಂಗಾರ್ ತೊ ಬಸ್ಲೊ – ಪಡ್ದೊ ಆಸ್‍ಲ್ಲ್ಯಾ ಜನೆಲಾ ಭಾಯ್ಲ್ಯಾನ್.

“ಕಾಂಯ್ ಪಾನಕ್ ದೀಂವ್, ಬೇಟಾ?” ವಿಚಾರ್ಲೆಂ ತಿಣೆಂ.

“ಕಾಂಯ್ ನಾಕಾ ಧಾಕ್ಟ್ಯಾ ಆವಯ್” ಮ್ಹಣಾಲೊ ತೊ. “ಹ್ಯಾ ದಿಸಾಂನಿ ಆಮ್ಚಿ – ಮ್ಹಜಿ ಭಲಾಯ್ಕಿ ಚಿಕ್ಕೆ ಬರಿ ನಾ – ಜಿರ್ವಣ್ ಸಾರ್ಕೆಂ ನಾ ಆನಿ ರಾತ್ಚಿ ನೀದ್ ನಾ. ರಾವ್ಳೆರಾಚ್ಯಾ ಹಕೀಮಾ ವರ್ವಿಂ ಕಾಂಯ್ ಕರುಂಕ್ ಸಾಧ್ಯ್ ಜಾಯ್ನಾ. ವಿಚಾರ್ಲ್ಯಾರ್ ಮ್ಹಜಿ ಭಲಾಯ್ಕಿ ಚಾಮುಂಡೇಶ್ವರಿ ಬೆಟ್ಟಾಪರಿಂ ಭದ್ರ್ ಆಸಾ ಮ್ಹಣ್ತಾ ತೊ. ದೆಕುನ್ ತುಜೆ ಕಡೆನ್ ವಿಚಾರ್ಯಾಂ – ವಕಾತ್ ವಿಚಾರ್‌ಲ್ಲೆಪರಿಂಯೀ ಜಾಲೆಂ, ತುಮ್ಚೆ ಕಡೆನ್ ಉಲವ್ನ್ ಗೆಲ್ಲೆಪರಿಂಯೀ ಜಾಲೆಂ ಮ್ಹಣ್ ಹೆವ್ಶಿನ್ ಆಯ್ಲೊಂ.”

“ವರ್ತೊ ಸಂತೊಸ್ ಜಾಲೊ” ಮ್ಹಣಾಲಿ ಆಸ್ಮಾಬಿ. “ತುಜ್ಯಾ ಪಿಡೆಕ್ ಹಾಂವ್ ಸಂಪೆಂ ವಕತ್ ಸಾಂಗ್ತಾಂ. ಆಜ್ ಥಾವ್ನ್ ತೀನ್ ದೀಸ್ ಪರ್ಯಾಂತ್, ಸಕಾಳಿಂ ಉಟ್‍ಲ್ಲ್ಯಾಫಾರಾ ಲಿಂಬ್ಯಾಚೊ ರೋಸ್ ಪಿಯೆಜಾಯ್. ಸಾಕರ್ ಘಾಲಿನಾಯೆ, ಏಕ್ ಖೊಡೊ ಮೀಟ್ ಭರ್ಶಿಲ್ಯಾರ್ ಪುರೊ. ದುಸ್ರೆಂ ವಕತ್ ನಾಕಾ. ತಕ್ಲೆಕ್ ಚಿಕ್ಕೆ ವಿಶೆವ್ ದೀ – ಲಡಾಯೆಚಿ ಜಾಂವ್ ದುಸ್ಮಾನಾಂಚಿ ವಿರಾರಾಯ್ ಥೊಡೆ ದೀಸ್ ಚಿಂತಿನಾಕಾ. ಸರ್ವ್ ಸಾರ್ಕೆಂ ಜಾತೆಲೆಂ.”

“ಬರೆಂ ಸಾಂಗ್ಲೆಂಯ್, ಧಾಕ್ಟ್ಯಾ ಆವಯ್” ಹಾಸ್ಲೊ ಟಿಪ್ಪು ಸುಲ್ತಾನ್. “ತುವೆಂ ಪಯ್ಲೆಂ ಸಾಂಗ್‍ಲ್ಲೆಂ ವಕತ್ ಸುಲಭ್ ಆನಿ ಹಾಂವ್ ತೆಂ ಕರ್ತಾಂ. ತಾಂತುಂ ಬರೆಂಪಣ್ ಜಾತೆಲೆಂ ಮ್ಹಳ್ಳೊ ವಿಶ್ವಾಸ್ ಮ್ಹಾಕಾ ಆಸಾ. ಪುಣ್ ತುವೆಂ ಸಾಂಗ್‍ಲ್ಲೆಂ ದುಸ್ರೆಂ ವಕತ್ ಬರೆಂ ಜಾಂವ್ಕ್ ಪುರೊ, ಪುಣ್ ಮ್ಹಜ್ಯಾನ್ ತೆಂ ಸದ್ದ್ಯಾಕ್ ಪುಣೀ ಕರುಂಕ್ ಜಾಯ್ಶೆಂ ನಾ.”

“ಕಿತ್ಯಾಕ್?”

“ಲಡಾಯ್ ಆನಿ ದುಸ್ಮಾನ್ ಜಾಲ್ಯಾಂತ್ ಮ್ಹಜೊ ಶ್ವಾಸ್. ಲಡಾಯೊ ಜಿಕ್ಚಿಂ ಆನಿ ದುಸ್ಮಾನಾಂಚೊ ಪಾಡಾವ್ ಕರ್ಚಿಂ ಚಿಂತ್ನಾಂ ಮ್ಹಜ್ಯಾ ತಕ್ಲೆಂತ್ಲಿಂ ಪಯ್ಸ್ ಸರ್ಲೆಲ್ಯಾ ದಿಸಾ ಮ್ಹಜೊ ಶ್ವಾಸ್‍ಯೀ ಬಂದ್ ಪಡ್ತಲೊ.”

“ತಶೆಂ ಮ್ಹಣನಾಕಾ ಬೇಟಾ. ಲಡಾಯ್ ಆನಿ ದುಸ್ಮಾನ್ ಎಕಾ ಮನ್ಶ್ಯಾಚ್ಯಾ ಮತಿಂತ್ ಆಸಾಸರ್ ತಾಕಾ ಸುಖ್ ಆಸ್ಚೆಂ ನಾ ಮ್ಹಣ್ ಆಮ್ಚೆಂ ಶಾಸ್ತ್ರ್ ಆಮ್ಕಾಂ ಸಾಂಗ್ತಾ.”

“ಜಾವ್ಯೆತ್” ಮಣಾಲೊ ಟಿಪ್ಪು ಸುಲ್ತಾನ್ ಭಿತರ್ಲ್ಯಾ ಭಿತರ್ ಚಿಕ್ಕೆ ತಾಪೊನ್ ಆನಿ ಚತುರ್ ಜಾವ್ನ್. ಲಡಾಯೆಚ್ಯಾ ಖಬ್ರೆಂತ್ ನಹಿಂ ಜಾಲ್ಯಾರೀ, ದುಸ್ಮಾನಾಂಕ್ ಮಜತ್ ದಿಂವ್ಚ್ಯಾ ರಾಟಾವಳಿಂತ್ ಪುಣೀ ಆಸ್ಮಾಬಿಚೆಂ ಘರಾಣೆಂ ಮೆತೆರ್ ಜಾವ್ನಾಸ್ಯೆತ್ ಮ್ಹಳ್ಳಿಂ ಚಿಂತ್ನಾಂ ತಾಚ್ಯಾ ಮತಿಂತ್ ಪಾಶಾರ್ ಜಾಲಿಂ. ತೊ ಮ್ಹಣಾಲೊ:

“ಪುಣ್ ಲಡಾಯೆಂತ್ ಜಯ್ತ್ ವ್ಹರ್ಚ್ಯಾಂತ್ ಆನಿ ಆಪ್ಲ್ಯಾ ದುಸ್ಮಾನಾಂಚೊ ಪಾಡಾವ್ ಕರ್ಚ್ಯಾಂತ್ ರಾಯಾಂಚೆಂ ಸುಖ್ ಆಸಾ ಮ್ಹಣ್ ಪೈಗಂಬರ್ ಸಾಂಗ್ತಾ. ಆನಿ ಹಾಂವ್ ಬಾದಶಹಾ ಮಾತ್ರ್ ನಹಿಂ, ಪೈಗಂಬರ್‌ಯೀ ಜಾವ್ನಾಸಾಂ!”

“ತುಜೆ ಕಡೆನ್ ಹಾಂವ್ ತರ್ಕ್ ಕರುಂಕ್ ಸಕನಾ, ಬೇಟಾ” ಮ್ಹಣಾಲಿ ತಿ ಚತ್ರಾಯೆನ್. ತಾಣೆಂ ಚಿಂತ್‍ಲ್ಲ್ಯಾಕ್ ಆನಿ ಸಾಂಗ್‍ಲ್ಲ್ಯಾಕ್ ಕೊಣಾ ಥಾವ್ನ್‌ಯೀ ವಿರೋಧ್ ತರ್ಕ್ ಸೊಸ್ಚೊ ಗ್ರಾಯ್ಕ್ ತೊ ನಹಿಂ ಮ್ಹಳ್ಳೆಂ ತಿ ಜಾಣಾಂಸ್‍ಲ್ಲಿ. ದೆಕುನ್ ತಿ ಮ್ಹಣಾಲಿ:

“ತುಂ ಸುಖಿ ಆನಿ ದೀರ್ಘಾಯು ಜಾವ್ನ್ ಆಸಜಾಯ್ ಮ್ಹಳ್ಳಿ ಆಮ್ಚಿ ಆಶಾ. ಕಶೆಂ ಸಾಂಗ್ಯೆತಾ – ಲಡಾಯೆಚೆಂ ಆನಿ ದುಸ್ಮಾನಾಂಚೆಂ ಸವಾಲ್ ಪಯ್ಲೆಂ ಆಖೇರ್ ಜಾಯ್ತ್ ಮ್ಹಣ್?”

“ಮ್ಹಣ್ಜೇ?” ಗುಳ್ಯಾಪರಿಂ ತಾಚ್ಯಾ ತೊಂಡಾಂತ್ಲೊ ಸಬ್ದ್ ಭಾಯ್ರ್ ಸರ್ಲೊ. ಧಯ್ರಾವಂತ್ ಜಾಲ್ಯಾರೀ – ಆಸ್ಮಾಬಿನ್ ತಶೆಂ ಮ್ಹಣನಾಯೆ ಆಸ್‍ಲ್ಲೆಂ ಮ್ಹಣ್, ಭಿತರ್ಲ್ಯಾನ್ ಶ್ವಾಸ್ ಧರುನ್ ಆಸ್‍ಲ್ಲ್ಯಾ ಆಗ್ನೆಸ್ ಕುಂವರ್ನಿಕ್‍ಯೀ ಭೊಗ್ಲೆಂ.

“ಮ್ಹಣ್ಜೆ, ಬೇಟಾ” ಮ್ಹಣಾಲಿ ಬೀಬಿ ಚತುರ್ ಜಾವ್ನ್. ತರೀ ತಿಚೆಂ ಉಲವ್ಣೆಂ, ಉಜ್ಯಾಕ್ ಆನಿಕ್‍ಯೀ ಇಲ್ಲೆಂ ತೇಲ್ ವೊತ್‍ಲ್ಲೆಪರಿಂಚ್ ಜಾಲೆಂ: “ಆಮ್ಚ್ಯೊ ಲಡಾಯೊ ಸರ್ವ್ ಕಾಬಾರ್ ಜಾಂವ್ಚ್ಯಾ ಆದಿಂ, ಆನಿ ಆಮ್ಚ್ಯಾ ಸರ್ವ್ ದುಸ್ಮಾನಾಂಚೊ ಪಾಡಾವ್ ಜಾಂವ್ಚ್ಯಾ ಆದಿಂ ಆಮ್ಚೆಂ ಆವ್ಕ್ ಸಂಪ್ಲ್ಯಾರ್ ಕಿತ್ಯಾಕ್ ಉಪ್ಕಾರ್ಲೆಂ?”

ಭಿತರ್ಲ್ಯಾನ್, ಆಗ್ನೆಸ್ ಕುಂವರ್ನಿನ್ ಕ್ಷಣಿಕ್ ಭಿಯಾನ್ ವೋಂಟ್ ಚಾಬೊನ್ ಧರ್ಲೆ.

ಟಿಪ್ಪು ಸುಲ್ತಾನ್ ಥೊಡಿಂ ಖಿಣಾಂ ಸ್ತಬ್ದ್ ಜಾಲೊ. ಉಪ್ರಾಂತ್ ಏಕ್ ಪಾವ್ಟಿಂ ಆಪ್ಲೆಂ ರೂಂದ್ ಹರ್ದೆಂ ಫುಲವ್ನ್ ಆನಿ ಆವಾಜ್ ಕರ್ನ್ ನಾಕಾಂತ್ಲ್ಯಾನ್ ಲಾಂಬ್ ಶ್ವಾಸ್ ಸೊಡುನ್, ಸವ್ಕಾಸ್ ತೊ ಉಬೊ ಜಾಲೊ. ಫುಡೆಂ ಉಲಯ್ತಾನಾ ತಾಚೊ ಸ್ವರ್ ಶಾಂತ್ ಜಾಲೊ, ಪುಣ್ ತಲ್ವಾರಿಚ್ಯಾ ಧಾರೆಚಿ ಹರಿತಾಯ್ ತಾಂತುಂ ಆಸ್‍ಲ್ಲಿ:

“ಮ್ಹಜ್ಯಾ ಆವ್ಕಾ ಉದ್ದೇಶಿಂ ತುಂ ಕಿತೆಂ ಜಾಣಾಂಯ್, ಧಾಕ್ಟ್ಯಾ ಆವಯ್?” ಮ್ಹಣಾಲೊ ತೊ, ಸವಾಲ್ ಆನಿ ಜಬಾಬ್ ಎಕಾಂತ್‍ಚ್ ಆಟಾಪ್‍ಲ್ಲ್ಯಾ ಜಿನ್ಸಾರ್. ಉಪ್ರಾಂತ್ ತುರ್ತಾನ್: “ಮ್ಹಜೆಂ ಆವ್ಕ್ ವೆಗಿಂ ಖತಮ್ ಕರಿಜಾಯ್ ಮ್ಹಣ್ ಮ್ಹಜ್ಯಾ ದುಸ್ಮಾನಾಂನಿ, ಮ್ಹಜ್ಯಾ ಲಾಗ್ಶಿಲ್ಯಾಂನಿ ಸಹಿತ್ ಆಶೆಂವ್ಚೆಂ ಭವಿಷ್ಯ್ ಉಚಾರ್ಚೆಪರಿಂ ತುಂ ಉಲಯ್ತಾಯ್! ತರ್ ಮ್ಹಜೆ ದುಸ್ಮಾನ್ ಕೋಣ್-ಕಿತೆಂ ಆನಿ ತೆ ಫಿತೂರಿ ಚಲಯ್ತಾತ್ ಕಾಂಯ್ ಕಿತೆಂ ಮ್ಹಳ್ಳೆಂ ತುಂ ಜಾಣಾಂಯ್ ತೆಂ ಆಯ್ಕೊಂಕ್ ಹಾಂವ್ ಅಪೇಕ್ಷಿತಾಂ.”

ತಾಣೆಂ ತಿಚೆ ದೊಳೆ ಧರ್ಲೆ.

ತಿ ಥರ್ಥರೊಂಕ್ ನಾ ಮ್ಹಳ್ಳೆಂ ತಾಕಾ ಸಮ್ಜಲೆಂ.

“ಬಾದಶಹಾ ಬೇಟಾ, ಸಮಾಧಾನ್ ಕಾಣ್ಗೆ” ಮ್ಹಣಾಲಿ ತಿ, ಚಿಕ್ಕೆ ಗಂಭೀರಾಯೆನ್ – ತೊ ಬಾದಶಹಾ ಜಾಂವ್ಕ್ ಪುರೊ, ಪುಣ್ ತಿಯೀ ಕಾಂಯ್ ಉಣ್ಯಾ ಕುಳಿಯೆಚಿ ನಹಿಂ. “ಹೆರ್ ಕಡೆನ್ ಜಾಲಾಂ ಜಾಂವ್ಕ್ ಪುರೊ, ಪುಣ್ ಆಮ್ಚ್ಯಾ ಮೈಸೂರ್ ಸರ್ಕಾರಾಚ್ಯಾ ರಾಟಾವಳಿಂನಿ ರಾವ್ಳೆರಾಚ್ಯೊ ಸ್ತ್ರೀಯೊ ಮೆತೆರ್ ಜಾಂವ್ಕ್ ನಾಂತ್. ಇಸ್ಲಾಮ್ ಧರ್ಮಾಚಿಂ ತತ್ವಾಂ ಆನಿ ಸೂತ್ರಾಂ – ಸೈರ್‍ಯಾಂ-ಪುರುಷಾಂ ಹುಜ್ರಿಂ ಲೆಗೂನ್ ಘೋಶಾ ಆನಿ ಮುಖಾವರಣ್ ಯುವತಿಯಾಂನಿ ಘಾಲ್ಚೆಂ ಸಹಿತ್ – ಆಮಿ ಪಾಳುನ್ ಆಯ್ಲ್ಯಾಂವ್.”

“ದೆಕುನ್?”

“ದೆಕುನ್, ಪುರುಷಾಂನಿ ಚಲಂವ್ಚ್ಯಾ ಸರ್ವ್ ವ್ಯವಹಾರಾಂ ಭಾಯ್ರ್ ಆಮಿ ಆಸಾಂವ್. ರಾವ್ಳೆರಾಂತ್ಲ್ಯಾ ರಾಯಾಳ್ ಪುರುಷಾಂಚೆ ಈಷ್ಟ್ ಕೋಣ್ ಮ್ಹಣ್ ಆನಿ ದುಸ್ಮಾನ್ ಕೋಣ್ ಮ್ಹಣ್ ಆಮಿ ಬಿಲ್ಕುಲ್ ನೆಣಾಂವ್. ಆನಿ…” ತಿ ಪಯ್ಲೆ ಪಾವ್ಟಿಂ, ಅಭಿಮಾನಾನ್‍ಶಿ ಆಂಬುರ್ಕಿ ಹಾಸ್ಲಿ.

“ಆನಿ?” ಸಮ್ಜೊಂಕ್ ತಾಣೆಂ ಖುಶಿ ವ್ಹೆಲಿ.

“ಆನಿ ಆಮ್ಚ್ಯಾ ಪುರುಷಾಂಚೆರ್ ತಾಂಕಾಂ ಸಂಪೂರ್ಣ್ ವಿಶ್ವಾಸ್ ಆಸಾ ಮ್ಹಣ್ ತೆ ನಾಂವಾಡ್ಲ್ಯಾತ್ ಆನಿ ತ್ಯಾ ವಿಶ್ವಾಸಾಂತ್ ಸಂತುಷ್ಟ್ ಜಾಲ್ಯಾತ್.”

ಟಿಪ್ಪು ಸುಲ್ತಾನ್ ಬಸ್ಲೊ. ತೊ ಶಾಂತ್ ಜಾಲೊ. ಪುಣ್ ತಾಣೆಂ ಆಯಿಲ್ಲೊ ಇರಾದೊ ಜಾರಿ ಜಾವ್ನಾ ದೆಕುನ್ ದುಸ್ರಿ ವಾಟ್ ಧರಿಜಾಯ್ ಮ್ಹಣ್ ತಾಣೆಂ ಚಿಂತ್ಲೆಂ. ಕೆದಾಳಾಯೀ ಸಲ್ವಣಿ ಸುಲಭಾಯೆನ್ ಗಿಳ್ಚೊ ಗ್ರಾಯ್ಕ್ ನಹಿಂ ತೊ.

“ತರ್ ತುಂ ಪಯ್ಲೆಂ ತಶೆಂ ಕಿತ್ಯಾಕ್ ಉಲಯ್ಲಿಯ್?” ವಿಚಾರ್ಲೆಂ ತಾಣೆಂ.

“ಹಾಂವ್ ಕಿತೆಂ ಉಲಯ್ಲಿಂ? ತುಜ್ಯಾ ಭಲಾಯ್ಕೆ ಖಾತಿರ್, ತುಜಿಂ ತಸಲಿಂ ಚಿಂತ್ನಾಂ ಪಯ್ಸ್ ದವರಿಜಾಯ್ – ತೆಂಯೀ ಥೊಡ್ಯಾಚ್ ದಿಸಾಂಕ್ ಮ್ಹಣ್ ಹಾಂವೆಂ ಸಾಂಗ್ಲೆಂ. ತರ್ಕ್ ಆರಂಭ್ ಕರ್ನ್ ತುವೆಂಚ್ ವೆಗ್ಳೊ ಅರ್ಥ್ ಕೆಲೊಯ್. ನಿಜಾಯ್ಕೀ, ತುಜ್ಯಾ ಭಲಾಯ್ಕೆ ಖಾತಿರ್ ತುವೆಂ ಥೊಡ್ಯಾ ದಿಸಾಂಚೊ ಶಾರೀರಿಕ್ ಆನಿ ಮಾನಸಿಕ್ ವಿಶೆವ್ ಘೆಜಾಯ್.”

“ಆತಾಂ ತುವೆಂ ಸಾಂಗ್ಚೆಂ ಸಮ್ಜಲೆಂ. ಪುಣ್ ತಶೆಂ ಕರುಂಕ್ ಮ್ಹಾಕಾ, ಆತಾಂಚ್ಯಾ ಪರಿಸ್ಥಿತೆಂತ್ ಸಾಧ್ಯ್ ನಾ ಆವಯ್!” ಖಾಲ್ತೊ ಜಾಲ್ಲ್ಯಾ ಭುರ್ಗ್ಯಾಂಚೆಂ ಅಭಿನಯನ್ ತಾಣೆಂ ಕೆಲೆಂ.

“ತರ್ ಹಾಂವ್ ತ್ಯಾ ವಿಷಯಿಂ ಉಲಯ್ನಾ ಬೇಟಾ!” ತಿಣೆಂಯೀ ತಶೆಂಚ್ ಅಭಿನಯನ್ ಕೆಲೆಂ. “ಅಲ್ಲಾಚ್ಯಾ ದಯೆನ್ ತುಂ ತುಜ್ಯಾ ಹರ್ಯೆಕಾ ವಾವ್ರಾಂತ್ ಜಯ್ತೆವಂತ್ ಜಾತಲೊಯ್.”

ಉಪ್ರಾಂತ್ ತಾಂಚ್ಯಾ ಸಂಭಾಷಣಾಚಿ ಧಾರ್ ಘುಂವ್ಲಿ. ಥೊಡ್ಯಾಚ್ ವೆಳಾ ಭಿತರ್ ಟಿಪ್ಪುನ್ ಆಪ್ಣಾಕ್ ಜಾಯ್ ಜಾಲ್ಲೊ ಪ್ರಸ್ತಾಪ್ ಪಾಟಿಂ ಹಾಡ್ಲೊ.

“ತೆಂ ವ್ಹಯ್‍ಮೂ ಧಾಕ್ಟ್ಯಾ ಆವಯ್ – ಆಮ್ಚಿ ರಾಯಾಳ್ ಭಯ್ಣ್ – ಕಿತೆಂ ತಿಚೆಂ ನಾಂವ್…”

“ಜಮೀಲಾ ನೂರ್ ಜಹಾನ್. ತಿಚೆಂ ನಾಂವ್ ಸಹಿತ್ ಉಗ್ಡಾಸ್ ನಾ ಮ್ಹಳ್ಯಾರ್, ಬಾದಶಹಾ ಬೇಟಾಕ್ ಆಮ್ಚೊ ಕಿತ್ಲೊ ಉಗ್ಡಾಸ್ ಆನಿ ಮೋಗ್!” ತಿಣೆಂ ಭೆಷ್ಟೆಂ ತುಕ್ಲಾಯ್ಲೆಂ. ಪುಣ್ ಭಿತರ್ಲ್ಯಾ ಭಿತರ್ ತಿ ಚಿಕ್ಕೆ ಕಾವ್ಜೆಲಿ.

“ಮಾಫ್ ಕರ್, ಧಾಕ್ಟ್ಯಾ ಆವಯ್” ಮ್ಹಣಾಲೊ ತೊ. ಆಮಿ ಲ್ಹಾನ್ ಭುರ್ಗಿಂ ಆಸ್ತಾನಾ ಮಾತ್ರ್ ರಾವ್ಳೆರಾಂತ್ ಸಾಂಗಾತಾ ಖೆಳ್ತಾಲ್ಯಾಂವ್. ತೆದಾಳಾ ಸಬಾರ್ ಭುರ್ಗಿಂ ಆಸ್‍ಲ್ಲಿಂ. ಉಪ್ರಾಂತ್ ಜಮೀಲಾಕ್ ಹಾಂವೆಂ ಪಳೆಂವ್ಕ್ ನಾ. ಅಪ್ರೂಪ್ ಕೆದಾಳಾಯೀ ಆಯ್ಲ್ಯಾರ್ ತಿ ಘೋಷಾ ಘಾಲ್ನ್ ಪಡ್ದ್ಯಾ ಪಾಟ್ಲ್ಯಾನ್ ರಾವೊನ್ ಉಲಯ್ತಾಲಿ.”

“ಆನಿ ಆತಾಂ ತುಂ ಹಾಂಗಾ ಯೇನಾಸ್ತಾಂ ವರ್ಸಾಂ ಸಾಡೆ ತೀನ್ ಜಾಲಿಂ ಮ್ಹಣ್ ದಿಸ್ತಾ.”

“ವ್ಹಯ್. ಆಜ್ ಜಮೀಲಾ ಖಂಯ್ ಪಾವ್ಲ್ಯಾ?”

“ತಿಕಾ ತಕ್ಲಿ ಫಡ್ತಾ ಮ್ಹಣ್ ವಿಶೆವ್ ಘೆತಾಲಿ. ಆತಾಂ ಉಟ್ಲ್ಯಾ ಜಾಲ್ಯಾರ್ ಪಳೆವ್ನ್ ಆಪಯ್ತಾಂ.

ಮ್ಹಣೊನ್ ಆಸ್ಮಾಬಿ ಭಿತರ್ ಗೆಲಿ. ಆತುರಾಯೆನ್ ಆಸ್‍ಲ್ಲ್ಯಾ ಆಗ್ನೆಸ್ ಕುಂವರ್ನಿಕ್, ಭಿಯೆನಾಕಾ ಮ್ಹಣ್ ತಿಣೆಂ ಧಯ್ರ್ ದಿಲೆಂ, ಆನಿ ವಿಚಾರ್‌ಲ್ಲ್ಯಾ ಸವಾಲಾಂಕ್ ಮಾತ್ರ್ ಜವಾಬ್ ದೀಂವ್ಕ್ ಸಾಂಗ್ಲೆಂ.

ಭಾಯ್ರ್ ತಿ ಆಯ್ಲಿ.

“ತಿ ಉಟ್ಲ್ಯಾ, ಆತ್ತಾಂ ಯೆತೆಲಿ.” ಟಿಪ್ಪುಕ್ ತಿಣೆಂ ಸಾಂಗ್ಲೆಂ.

ಥೊಡ್ಯೊ ಘಡಿಯೊ ತಶಿಂಚ್ ತಿಂ ಬಸ್ಲಿಂ. ಉಪ್ರಾಂತ್:

“ಹಾಂಗಾಸರ್ ಆಮ್ಚೆ ಸರ್ದಾರ್ ಯೆತಾತ್‍ಮೂ, ಧಾಕ್ಟ್ಯಾ ಆವಯ್?” ಟಿಪ್ಪುನ್ ವಿಚಾರ್ಲೆಂ, ಆನಿ ತಾಣೆಂಚ್ ಸಾಂಗ್ಲೆಂ ಹಾಸೊನ್: “ತಾಂಕಾಂ ರಾವ್ಳೆರಾಚ್ಯಾ ಹಕೀಮಾಚೆಂ ವಕತ್ ಲಾಗನಾ ಜಾವ್ಯೆತ್.”

“ತೆಂ ಹಾಂವ್ ನೆಣಾಂ” ಮ್ಹಣಾಲಿ ಆಸ್ಮಾಬಿ. “ಪುಣ್ ವಕ್ತಾ ಖಾತಿರ್ ಥೊಡೆ ಜಣ್ ಯೆತಾತ್ ಮ್ಹಳ್ಳೆಂ ನೀಜ್.”

ಹೊಚ್ ಸಂದರ್ಭ್ ಪಳೆವ್ನ್ – “ಸಲಾಮ್ ಬಾದಶಹಾ, ಭೈಯ್ಯಾ!” ಮ್ಹಣಾಲಿ ಜಮೀಲಾ (ಆಗ್ನೆಸ್ ಕುಂವರ್ನ್) ಪಡ್ದ್ಯಾ ಪಾಟ್ಲ್ಯಾನ್.

“ಆಹಾ!” ಮ್ಹಣಾಲೊ ಟಿಪ್ಪು. “ಬಹೆನ್ ಜಮೀಲಾಚೊ ಕಂಠಸ್ವರ್ ಆದ್ಲ್ಯಾ ಪ್ರಾಸ್ ಚಡ್ ಪರಿಪಕ್ವ್ ಆನಿ ಸುಮಧುರ್ ಜಾಲಾ! ಯೇ ಬಹೆನ್.”

“ಹಾಂಗಾ ಹೆರ್ ಕೊಣ್‍ಯೀ ನಾಂತ್” ಮ್ಹಣಾಲಿ ಆಸ್ಮಾಬಿ ಧಯ್ರ್ ಘೆವ್ನ್. “ಭಾಯ್ರ್ ಯೇವ್ನ್ ಬಸ್ ಬೇಟೀ…”

ಸಂಪೂರ್ಣ್ ಮುಸ್ಲಿಮ್ ಕುಂವರ್ನಿಚ್ಯಾ ನ್ಹೆಸ್ಣಾರ್, ಮಾತೆಂ ಧಾಂಪುನ್ ಆಗ್ನೆಸ್ ಕುಂವರ್ನ್, ಆಂಬುರ್ಕಿ ಹಾಸತ್ತ್ ಭಾಯ್ರ್ ಯೇವ್ನ್ ಆಸ್ಮಾಬಿಚ್ಯಾ ಬಗ್ಲೆನ್ ಬಸ್ಲಿ. ತಿಚ್ಯಾ ನ್ಹೆಸ್ಣಾ ವರ್ವಿಂ, ರಂಗಯಿಲ್ಲ್ಯಾ ಹಾತಾ-ನಾಕ್ಷಿಯಾಂಚಿಂ ನಾಜೂಕ್ ಲಾಂಬ್ ಬೊಟಾಂ ಆನಿ ಅರ್ಧೆಂ ಕಪಾಲ್ ಆನಿ ಕಾನ್‍ಯೀ ಧಾಂಪ್‍ಲ್ಲ್ಯಾ ವರ್ವಿಂ, ಕಾಳ್ಜಾಕೃತೆಚೆಂ, ಚಂದ್ರಾ ಸಾರ್ಕೆಂ ತಿಚೆಂ ಮುಖಮಳ್ ಮಾತ್ರ್ ಟಿಪ್ಪುಕ್ ದಿಸ್ಲೆಂ. ತಿಚೆ ತೆ ತಾಂಬ್ಡೆ ವೋಂಟ್, ಗುಲೊಬಿ ಪೊಲೆ ಆನಿ ಚಿತ್ಳಾ ಸಾರ್ಕೆ ದೊಳೆ ಪಳೆವ್ನ್ ತೊ ವಿಸ್ಮಿತ್ ಪಾವ್ಲೊ:

“ನಿಜಾಯ್ಕೀ, ಆಮ್ಚಿ ಜಮೀಲಾ ಬಹೆನ್ ಸಕಾಳಿಂಚ್ಯಾ ಸಾಳ್ಕಾಪರಿಂ ಫುಲೊನ್ ಸುಂದರ್ ಜಾಲ್ಯಾ!” ಮೆಚ್ವಾಲೊ ತೊ. ತಾಣೆಂ ಪಯ್ಲೆಂ ಮ್ಹಳ್ಳೆಪರಿಂ, ಭುರ್ಗೆಪಣಾ ಉಪ್ರಾಂತ್ ಜಮೀಲಾಕ್ ತಾಣೆಂ ಪಳೆಂವ್ಕ್ ನಾತ್‍ಲ್ಲ್ಯಾನ್ – ಆನಿ ಹ್ಯಾ ನ್ಹೆಸ್ಣಾಂತ್ ಆಗ್ನೆಸ್ ಕುಂವರ್ನಿಚೆ ಕಾನ್ ತಾಕಾ ದಿಸನಾತ್‍ಲ್ಲ್ಯಾನ್ – ಖರಿಚ್ ತಿ ಆಸ್ಮಾ ಬೀಬಿಚಿ ಕುಂವರ್ನ್ ಆನಿ ಆಪ್ಲಿ ಅರ್ಧಿ ಭಯ್ಣ್ ಜಮೀಲಾ ಮ್ಹಣ್ ತೊ ಪಾತ್ಯೆಲೊ. ತಿತ್ಲ್ಯಾ ಮಟ್ಟಾಕ್ ಆಗ್ನೆಸ್ ಕುಂವರ್ನ್ ಆನಿ ಆಸ್ಮಾಬಿ ಸುರಕ್ಷಿತ್ ಜಾವ್ನ್ ಉರ್ಲಿಂ.

“ತಿಕಾ ಎದೊಳ್ ಶಾದಿ ಜಾಂವ್ಕ್ ನಾ ಮ್ಹಳ್ಯಾರ್ ಅಜ್ಯಾಪ್!” ಟಿಪ್ಪು ಫುಡೆಂ ಉಲಯ್ಲೊ. “ಆನಿಕ್‍ಯೀ ಥೊಡ್ಯಾಚ್ ತೆಂಪಾ ಭಿತರ್ ತಿಕಾ ಶಾದಿ ಜರ್ ಜಾಯ್ನಾ, ತರ್ ತಿ ಆಮ್ಚ್ಯಾ ರಾವ್ಳೆರಾಂತ್ ಬೇಗಮೆಚಿ ಪ್ರಥಮ್ ಸಖಿ ಜಾಂವ್ಕ್ ಹಾಂವ್ ಶಿಫಾರಸ್ ಕರ್ತಾಂ ಆನಿ ಖಂಚ್ಯಾಯೀ ರಾಯ್ ಕುಟ್ಮಾಂತ್ಲಿ ಸಯ್ರಿಕ್ ತಿಕಾ ಲಾಗಂವ್ಕ್ ಪ್ರಯತ್ನ್ ಕರ್ತಾಂ.”

“ಬಾದಶಹಾ ಬೇಟಾಚ್ಯಾ ಕೃಪೆ ಖಾತಿರ್ ಹಾಂವ್ ಖುಶಿ ಪಾವ್ತಾಂ ಆನಿ ಉಪ್ಕಾರ್ ಬಾವುಡ್ತಾಂ” ಮ್ಹಣಾಲಿ ಆಸ್ಮಾಬಿ.

“ಜಮೀಲಾ ಬಹೆನ್ ಕಿತ್ಯಾಕ್ ಉಲಯ್ನಾಂಯ್?”

“ಹಾಂವ್‍ಯೀ ತುಜೊ ಉಪ್ಕಾರ್ ಬಾವುಡ್ತಾಂ ಮ್ಹಜ್ಯಾ ಬಾದಶಹಾ ಭಯ್ಯಾ” ಮ್ಹಣಾಲಿ ಆಗ್ನೆಸ್ ಕುಂವರ್ನ್. ಉಪಾಯ್ ನಾಸ್ತಾನಾ ತಿ ಉಲಯ್ಲಿ.

ಜಾಲ್ಯಾರೀ, ತಿಚೆಂ ಕಾಳಿಜ್ ಥರ್ಥರ್ಲೆಂ.

ಟಿಪ್ಪು ಸುಲ್ತಾನ್ ಆತಾಂ ತಾಚ್ಯಾ ಮತಿಂತ್ ಆಸ್‍ಲ್ಲ್ಯಾ ವಿಷಯಾಕ್ ಆಯ್ಲೊ, ಆನಿ ವಿಚಾರಿಲಾಗ್ಲೊ:

“ಹಾಂಗಾಸರ್ ಥೊಡೆ ಸರ್ದಾರ್ ಯೆತಾತ್ ಮ್ಹಳ್ಳೆಂ ತುಮಿ. ತಾಂಚೆ ಪಯ್ಕಿ ಆಮ್ಚೊ ನಾಂವಾಡ್ದಿಕ್ ಸರ್ದಾರ್ ಜಾವ್ನ್ ಆಸ್ಚೊ ಸರ್ದಾರ್ ಸಿಮಾಂವ್ ಪುಣೀ ಯೆತಾ ಕಿತೆಂ?”

“ತಾಚೆಂ ನಾಂವ್ ಆಮಿ ಆಯ್ಕಲಾಂ” ಮ್ಹಣಾಲಿ ಆಸ್ಮಾಬಿ. “ಪುಣ್ ಎದೊಳ್ ಹಾಂಗಾಸರ್ ಯೇಂವ್ಕ್ ನಾ. ತಾಚ್ಯಾ ಕಂಪ್ಣೆಂತ್ಲೆ ಶಿಪಾಯ್ ಥೊಡೆ ವಕ್ತಾ ಖಾತಿರ್ ಅಪ್ರೂಪ್‍ಶೆ ಯೇವ್ನ್ ವೆತಾತ್” ಕುಡ್ಸಿಲೆಂ ತಿಣೆಂ, ಚತ್ರಾಯೆನ್.

“ಹರ್ಯೆಕಾ ವಾಟೆನ್ ತೊ ಯೋಗ್ಯ್ – ಗ್ರೇಸ್ತ್, ಧಯ್ರಾಧಿಕ್, ಶ್ಯಾಥಿವಂತ್ ಆನಿ ಸುಂದರ್. ಪುಣ್ ಮೊಗಾಂತ್ ನಿರಾಶಿ ಜಾವ್ನ್ ಆಜೂನ್ ಎಕ್ಸುರೊಚ್ ತೊ ಉರ್ಲಾ. ತಿ ಬಂಟ್ವಾಳ್ಚಿ ನಸ್ರಾನಿ ಚೋಕ್ರಿ ನಿಜಾಯ್ಕೀ ನಶಿಬ್ ನಾತ್‍ಲ್ಲಿ!”

“ಪುಣ್ ತಾಚೆಂ ನಾಂವ್ ಆಯ್ಕತಾನಾ, ತೊ ಆಮ್ಚ್ಯಾ ಧರ್ಮಾಚೊ ನಹಿಂ ಮ್ಹಣ್ ದಿಸ್ತಾ” ಮ್ಹಣಾಲಿ ಆಗ್ನೆಸ್ ಕುಂವರ್ನ್. ಸರ್ದಾರ್ ಸಿಮಾಂವ್ಚಿ ಆಪ್ಣಾಕ್ ವಳಕ್ ಆಸಾ ಮ್ಹಣ್ ಪ್ರಸಕ್ತ್ ಪಾತ್ರಾಂತ್ ಟಿಪ್ಪುಕ್ ದುಬಾವ್ ಮಾರಿನಾಯೆ ಮ್ಹಣ್ ತಿಣೆಂ ತಶೆಂ ಮ್ಹಣೊನ್ ಸೊಡ್ಲೆಂ.

“ತುವೆಂ ಸಾಂಗ್ಚೆಂ ಸಾರ್ಕೆಂ. ತೊ ನಸ್ರಾನಿ” ಮ್ಹಣಾಲೊ ಟಿಪ್ಪು. “ಪುಣ್ ತುಜಿ ಸೊಭಾಯ್ ತೊ ಪಳೆತ್ ಜಾಲ್ಯಾರ್ ಆನಿ ತುಜ್ಯಾ ಮೊಗಾರ್ ಪಡತ್ ಜಾಲ್ಯಾರ್ ಆನಿ ಮತಾಂತರ್ ಜಾಂವ್ಕ್ ಕಬೂಲ್ ಜಾಲ್ಯಾರ್…”

“ಮಾಫ್ ಕರ್, ಬಾದಶಹಾ ಭಯ್ಯಾ!” ಮ್ಹಣಾಲಿ ಆಗ್ನೆಸ್ ಕುಂವರ್ನ್ ಖರಿಚ್ ಆಕಾಂತೊನ್. “ಪಯ್ಲ್ಯಾ ಸುವಾತೆರ್ ತೊ ನಸ್ರಾನಿ. ನಸ್ರಾನಿ ಮತಾಂತರ್ ಜಾಲ್ಯಾರ್ – ಭಾಯ್ಲ್ಯಾನ್ ಮಾತ್ರ್ ತಶೆ, ಪುಣ್ ತಾಂಚ್ಯಾ ಹೃದಯಾಂತ್ ತೆ ಬದಲ್ ಜಾಯ್ನಾಂತ್ ಮ್ಹಣ್ ಆಮಿ ಆಯ್ಕಲಾಂ.”

ಮುಸ್ಲಿಮ್ ಯುವತಿಚ್ಯಾ ಮೊಗಾರ್ ಪಡ್ಲಾ ಮ್ಹಳ್ಳೆಂ ನೀಬ್ ಘೆವ್ನ್ ಸರ್ದಾರ್ ಸಿಮಾಂವ್ಚೆರ್ ಬಲಾತ್ಕಾರ್ ಚಲಂವ್ಕ್ ತೊ ಏಕ್ ಉಪಾಯ್ ಜಾವ್ಯೆತ್ ಮ್ಹಣ್ ಚಿಂತುನ್ ತಿಕಾ ಸಹಜ್ ಜಾವ್ನ್ ಲಜ್ ಆನಿ ಭಿರಾಂತ್ ಭೊಗ್ಲಿ.

“ತುವೆಂ ಸಾಂಗ್ಚೆಂ ಬರಾಬರ್ ಬಹೆನ್” ಮ್ಹಣಾಲೊ ಟಿಪ್ಪು. “ತಾಚಿ ಗಜಾಲ್ ಸೊಡ್ಯಾಂ. ದುಸ್ರೊ ಎಕ್ಲೊ ಆಸಾ – ಸರ್ದಾರ್ ಯೂಸುಫ್ ಆಲಿ.”

“ತಾಚಿ ವಳಕ್ ಆಮ್ಕಾಂ ಆಸಾ” ಆಸ್ಮಾಬಿನ್ ಸಾಂಗ್ಲೆಂ. “ವಕ್ತಾ ಖಾತಿರ್ ನಹಿಂ ಜಾಲ್ಯಾರೀ ಸಳಾವಳಿನ್ ತೊ ಯೆತಾ.”

“ಆಮ್ಚೊ ತೊ ಪಯ್ಶಿಲ್ಯಾನ್ ಸಯ್ರೊ” ಮ್ಹಣಾಲಿ ಆಗ್ನೆಸ್ ಕುಂವರ್ನ್.

“ಆನಿ ಲಾಗ್ಶಿಲ್ಯಾನ್?” ವಿಚಾರ್ಲೆಂ ಸುಲ್ತಾನಾನ್.

“ತೊ ಆಮ್ಚೊ ದೋಸ್ತ್” ಮ್ಹಣಾಲಿ ಆಗ್ನೆಸ್ ಕುಂವರ್ನ್. ಆಸ್ಮಾಬಿಚ್ಯಾ ಉತ್ರಾಂಕ್ ಧಿಗೊ ದಿಂವ್ಚ್ಯಾ ಖಾತಿರ್ ತಿಣೆಂ ತಶೆಂ ಮ್ಹಳೆಂ ಜಾಲ್ಯಾರೀ, ತಿಕಾ ಚಿಕ್ಕೆ ಲಜ್ ಭೊಗ್ಲಿ. ಟಿಪ್ಪು ಸುಲ್ತಾನಾಚಿಂ ಫುಡ್ಲಿಂ ಉತ್ರಾಂ ಆಯ್ಕೊನ್ ತಿಚೆ ಪೊಲೆ ತಾಂಬ್ಶೆಲೆ.

“ಹಾಂವೆಂ ಆಯ್ಕಲಾಂ” ಹಾಸ್ಲೊ ತೊ. “ತುಮ್ಚ್ಯಾ ತೊಂಡಾಂ ಥಾವ್ನ್ ತಿ ಖಬರ್ ಹಾಂವೆಂಚ್ ಖುದ್ ಆಯ್ಕಲ್ಲ್ಯಾನ್ ಹಾಂವ್ ಪಾತ್ಯೆತಾಂ ಆನಿ ಸಮ್ಜತಾಂ. ತೊಯೀ ಮ್ಹಜೊ ಬರೊ ಸರ್ದಾರ್, ಪುಣ್ ಆಯ್ಲೆವಾರ್ ಥೊಡ್ಯಾ ದುಬಾವಾಂ ಖಾತಿರ್ ತಾಕಾ ಎಕಾ ಥರಾಚ್ಯಾ ಬಂದಡೆಂತ್ ದವರ್ಲಾಂ.”

“ಬಂದಡೆಂತ್?” ಆಸ್ಮಾಬಿ ಅಜ್ಯಾಪ್ಲಿ.

“ವ್ಹಯ್. ತಿ ಖಬರ್ ವೆಗ್ಳಿಚ್ – ದುಸ್ಮಾನಾಂಕ್ ಸಂಬಂಧ್ ಜಾಲ್ಲಿ” ಮ್ಹಣಾಲೊ ಟಿಪ್ಪು. “ತ್ಯಾ ಇಷ್ಟಾಗಾತೆಕ್ ಮಾತ್ರ್ ನಹಿಂ, ಸಯ್ರಿಕೆಕ್‍ಯೀ ಹಾಂವ್ ಖುಶೆನ್ ಕಬೂಲ್ ಜಾತಾಂ.”

“ತಾಕಾ ಪಸಂದ್ ಜಾಲ್ಯಾರ್ ಆಮ್ಚಿ ಅಡ್ಕಳ್ ನಾ” ಮ್ಹಣಾಲಿ ಆಸ್ಮಾಬಿ.

“ಪುಣ್ ಮ್ಹಜಿಂ ದೋನ್ ಶರ್ತಾಂ ಆಸಾತ್” ಟಿಪ್ಪುನ್ ತಾಂಕಾಂ ವಿಶ್ವಾಸಾಂತ್ ಘೆತ್ಲೆಂ. “ಆನಿ ಹೆಂ ಕಾಮ್ ಜಾಂವ್ಚೆಂ ಜಾಲ್ಯಾರ್ ಪಂದ್ರಾಚ್ ದಿಸಾಂ ಭಿತರ್ ಜಾಯ್ಜಯ್.”

ತಾಣೆಂ ತಾಂಕಾಂ ಆಪ್ಲಿ ಮಾಂಡ್ಣಿ ಕಳಿತ್ ಕೆಲಿ:

“ಆಜ್ ಥಾವ್ನ್ ತಾಕಾ ಭೊಂವೊಂಕ್ ಆನಿ ಪ್ರತ್ಯೇಕ್ ಜಾವ್ನ್ ಹಾಂಗಾ ಭೆಟ್ ದೀಂವ್ಕ್ ಸುಟ್ಕಾ ದಿತಾಂ – ತುಮ್ಚೊ ಮ್ಹಾಕಾ ವಿಶ್ವಾಸ್ ಆಸಾ. ತಾಕಾ, ಬಂದಡೆಂತ್ ಆಸ್‍ಲ್ಲ್ಯಾ ನಸ್ರಾನಿಂ ಕಡೆನ್ ಸಂಪರ್ಕ್ ಆಸ್ಲ್ಯಾರ್ ತುಮಿ ಸಮ್ಜಜಾಯ್, ಆನಿ ಮ್ಹಾಕಾ ತಿಳ್ಸಿಜಾಯ್. ತಾಚಿ ವ್ಹಡ್ ಚೂಕ್ ಆಸ್ಲ್ಯಾರ್ ಸಯ್ರಿಕ್ ರದ್ದ್. ಚೂಕ್ ಆಸೊನ್‍ಯೀ ತುಮಿ ಲಿಪಯ್ಲ್ಯಾರ್ ಫುಡೆಂ ತುಮ್ಚೆರ್ ಕಷ್ಟ್ ಯೆತಿತ್. ಲ್ಹಾನ್ ವಾ ಚಿಲ್ಲರ್ ಚುಕಿ ಆಸ್ಲ್ಯಾರ್ ಪರ್ವಾ ನಾ – ಪಂದ್ರಾ ದಿಸಾಂ ಭಿತರ್ ಶಾದಿ ಜಾಯ್ನಾತ್ಲ್ಯಾರ್, ಸೊಳಾವ್ಯಾ ದಿಸಾ, ಬಹೆನ್ ಜಮೀಲಾಕ್ ಹಾಂವ್ ವ್ಹರವ್ನ್ ಬೇಗಮೆಚ್ಯಾ ತಾಬೆನ್ ದಿತಾಂ.”

ತೊ ಉಟ್ಲೊ ಆನಿ ಚಲ್ಲೊ. ಪಯ್ಸ್ ಆಸ್‍ಲ್ಲ್ಯಾ ಅಂಗರಕ್ಷಕಾಂ ಸಾಂಗಾತಾ, ದೊಳ್ಯಾಂ ಆಡ್ ಜಾತಾಸರ್ ಆಸ್ಮಾಬಿ ಆನಿ ಆಗ್ನೆಸ್ ಕುಂವರ್ನ್ ತಾಚಿ ಪಾಟ್ ಪಳೆವ್ನ್ ರಾವ್ಲಿಂ. ಉಪ್ರಾಂತ್ ಎಕಾಮೆಕಾ ಪಳೆವ್ನ್ ತಾಣಿಂ ಶ್ವಾಸ್ ಸೊಡ್ಲೊ.

“ಕಸಲ್ಯಾ ಪರಿಸ್ಥಿತೆಂತ್ ಸಾಂಪಡ್ಲ್ಯಾಂವ್ ದೀದಿ-ಜೀ?” ಉಸ್ಮಡ್ಲಿ ಆಗ್ನೆಸ್ ಕುಂವರ್ನ್.

“ಭಿಯೆನಾಕಾ ಭೇಟಿ” ಆಸ್ಮಾಬಿನ್ ತಿಕಾ ಧಯ್ರ್ ದಿಲೆಂ. “ಎಕಾ ಅನ್ವಾರಾಂತ್ಲಿಂ ಆಮಿ ಸುಟ್ಲ್ಯಾಂವ್ ಖರೆಂ. ಆತಾಂ ಉಗ್ತೆ ಜಾಲ್ಲ್ಯಾ ದಾಡ್ಯಾಂ ಮಧೆಂ ಪಾವ್ಲ್ಯಾಂವ್!”

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

ಪ್ರಕರಣ್ 24: ಘಡಿತಾಂಚೊ ಖೆಳ್

ಕೆನರಾಂತ್ ದುಸ್ರ್ಯಾ ಪಾವ್ಟಿಂ ರಿಸಾಲಾಂ ದೆಂವೊನ್ ಮೆಳ್‍ಲ್ಲ್ಯಾಂಕ್ ಧರುನ್ ಚಡುಣೆಂ ಪಾಂಚ್ ಹಜಾರ್ ಲೊಕಾಕ್ ವಯ್ರ್ ಆಂಬುಡ್ನ್ ವ್ಹೆಲೆಂ. ಪಯ್ಣಾ ವೆಳಾರ್ ತಾಂಚೆ ಜಾಲ್ಲೆ ಕಷ್ಟ್ ಆನಿ ವಳ್ವಳೆ, ಆದ್ಲ್ಯಾ ಪ್ರಾಸ್ ಉಣೆಂ ನಹಿಂ. ನಸ್ರಾನಿಂಕ್ ಚಡ್ ಕಠೋರಾಯ್ ದಾಕಯ್ನಾಯೆ, ಬಗಾರ್ ಕುಶೆಲಾಂನಿ ಆನಿ ಪುಸ್ಲಾವ್ಣ್ಯಾನ್ ತಾಂಕಾಂ ಸುಂತಾ ಕರುನ್ ರಿಸಾಲಾಂನಿ ಭರ್ತಿ ಕರಿಜಾಯ್ ಮ್ಹಣ್ ಟಿಪ್ಪು ಸುಲ್ತಾನಾನ್ ಚಿಂತ್‍ಲ್ಲೆಂ ಜಾಲ್ಯಾರೀ ಸಬಾರ್ ಕಾರಣಾಂಕ್ ಲಾಗೊನ್ ದುಸ್ರ್ಯಾ ಪಾವ್ಟಿಂ ತಾಚೆಂ ಪಿಶೆಂ ಚಾಳ್ವಲೆಂ ಆನಿ ಆಮ್ಚ್ಯಾ ಪುರ್ವಜಾಂಕ್ ದಗ್ದೊಣೆಚೆಂ ವೊಜೆಂ ಆನಿ ಮಾಡ್ತಿರ್ಪಣಾಚೊ ಕುರೊವ್ ಜಾಂವ್ಕ್ ಪಾವ್ಲೆಂ.

ಆಮ್ಚ್ಯಾ ಪುರ್ವಜಾಂ ಪಯ್ಕಿ ಸಬಾರ್ ಜಣಾಂನಿ ಕುಡಿಚ್ಯಾ ಖುಶಾಲಾಯೆ ಖಾತಿರ್ ವಾ ಸ್ವಂತ್ ಫಾಯ್ದ್ಯಾ ಖಾತಿರ್ ಭಾವಾರ್ಥ್ ಸಾಂಡ್ಲೊ ಮ್ಹಣ್ ಥೊಡ್ಯಾಂನಿ – ಪಯ್ಸ್ ಆಸ್‍ಲ್ಲ್ಯಾ ಪಾದ್ರಿಂನಿ ಲೆಗೂನ್ – ಬರವ್ನ್ ದುರ್ಸಲ್ಲೆಂ ಆಸಾ. ಪುಣ್ ತ್ಯಾಚ್ ವೆಳಾರ್ ಪಟ್ಟಣಾಂತ್ ಕೈದಿ ಜಾವ್ನಾಸ್‍ಲ್ಲ್ಯಾ ಇಂಗ್ಲೆಜ್ ಆನಿ ಹೆರ್ ಥೊಡ್ಯಾ ವಿದೇಶೀ ಮಹಂತಾಂನಿ ಉಪ್ರಾಂತ್ ಸಾಂಗ್ಚೆ ಪರ್ಮಾಣೆಂ – ಬರೆಂ ಆನಿ ವಾಯ್ಟ್ ಸಗ್ಳ್ಯಾನ್ ಭರ್ಸೊನ್ ಆಸಾ – ಬಂದಡೆ ವೆಳಾರ್, ಭಾವಾರ್ಥಾ ಖಾತಿರ್ ಆನಿ ಸಮಾಜೆಂತ್ಲ್ಯಾ ಸ್ತ್ರೀಯಾಂಚ್ಯಾ ಮಾನಾಚ್ಯಾ ರಕ್ಷಣೆ ಖಾತಿರ್ ರಗತ್ ವ್ಹಾಳಯಿಲ್ಲೆಂ ಆನಿ ಜೀವ್ ದಿಲ್ಲೆಂ ಆಸಾ.

ವಯ್ಲೆಂ ಪ್ರಸಂಗ್ ತಶೆಂ ಘಡ್ಲೆಂ ಆನಿ ಚರಿತ್ರೆಂತ್ ಲಿಪ್ಲೆಂ.

ದುಸ್ರ್ಯಾ ಪಾವ್ಟಿಂ ಕುಡಾಯಿಲ್ಲ್ಯಾ ನೊಡ್ತೆರ್ ಕುಟ್ಮಾಂಕ್ ನಾಗೂರ್‌ಚ್ಯಾನ್, ಆನಿ ಸುಲ್ಕಾರ್ ಕ್ರಿಸ್ತಾಂವಾಂಕ್ ಬಿಸಲಿಕಟ್ಟಾಚ್ಯಾ ವಾಟೆನ್ ಘಾಟಾರ್ ಚಡವ್ನ್ ವ್ಹೆಲೆ. ನಾಗೂರ್ ಪಾವ್‍ಲ್ಲ್ಯಾಫಾರಾ ತಾಂಕಾಂ ಸುಂತಾ ಕರ್ನ್ ಸೆರಿಂಗಪಟ್ಟಣಾಕ್ ವ್ಹೆಲೆ ಆನಿ ಆದಿಂ ಸುಂತಾ ಕರ್ನ್ ದವರ್‍ಲ್ಲ್ಯಾಂ ಸಾಂಗಾತಾ ಭರ್ಶಿಲೆ. ಥೊಡ್ಯಾ ದಿಸಾಂ ಉಪ್ರಾಂತ್ ತಾಂಕಾಂ ಮೈಸೂರಾಕ್ ವ್ಹೆಲೆ ಆನಿ ಶಿಬಿರಾಂನಿ ದವರ್ಲೆ.

ಥಂಯ್ಸರ್ ದಿಸಾಕ್ ದೋನ್ ರಿಸಾಲಾಂ ಪ್ರಕಾರ್ ಘಡುನ್ ಫಾವೊ ತ್ಯಾ ಬಂದೋಬಸ್ತೆ ಖಾಲ್, ಸೈನಾಂ ವಾಡಂವ್ಚ್ಯಾ ಖಾತಿರ್ ಸೆರಿಂಗಪಟ್ಟಣಾಕ್ ಧಾಡ್ತಾಲೆ.

ಹಿಂ ರಿಸಾಲಾಂ ಪಟ್ಟಣಾಕ್ ಧಾಡ್‍ಲ್ಲ್ಯಾ ವೆಳಾರ್ ತಾಂಚಿಂ ಕುಟ್ಮಾಂ – ಸ್ತ್ರೀಯೊ ಆನಿ ಚಲಿಯೊ ಪಾಟಿಂ ಉರ್ತಾಲಿಂ. ತೊ ಅವ್ಕಾಸ್ ಪಳೆವ್ನ್ ರಾವ್ಳೆರಾಚೆ ಥೊಡೆ ಅಧಿಕಾರಿ, ಕುಲ್ಕಾರಾಂ ಕರ್ನಾ ಮಾಂಚಿಲಾಂ ವ್ಹಾವಂವ್ಕ್ ಲಾವ್ನ್ ಅಂಗರಕ್ಷಕಾಂ ಸಾಂಗಾತಾ ಆಯ್ಲೆ, ಆನಿ ಅಂತಃಪುರಾಕ್ ವ್ಹರ್ಚ್ಯಾ ನಿಬಾನ್ ಚಲಿಯಾಂಕ್ ವಿಂಚುಂಕ್ ಲಾಗ್ಲೆ.

ಸ್ತ್ರೀಯಾಂಚಿ ಆನಿ ಚಲಿಯಾಂಚಿ ಬೋಬ್ ಆಯ್ಕೊನ್, ದುಸ್ರ್ಯಾ ಸರ್ತೆ ಖಾತಿರ್ ಆನಿ ಘಾಯ್ ಥಾಂಬ್ಚ್ಯಾ ಖಾತಿರ್ ಪಾಟಿಂ ಉರ್‌ಲ್ಲೆ ಕ್ರಿಸ್ತಾಂವ್ ಯುವಕ್ ಉಪ್ರಾಟ್ಲೆ. ಅಧಿಕಾರಿಂಕ್ ಆನಿ ಅಂಗರಕ್ಷಕಾಂಕ್ ತಾಣಿಂ ಮಾರ್ನ್ ಧಾಂವ್ಡಾಯ್ಲೆ.

ದುಸ್ರ್ಯಾ ದಿಸಾಯೀ ತಶೆಂಚ್ ಘಡ್ಲೆಂ.

ಹಿ ಖಬರ್ ಟಿಪ್ಪುಕ್ ಮೀಟ್ ಮಿರ್ಸಾಂಗೆ ಸಮೇತ್ ಪಾವ್ಲಿ. ತಾಕಾ ಅಂತಃಪುರಾಂತ್ ನಿಜಾಯ್ಕೀ ಸ್ತ್ರೀಯಾಂಚೊ ಉಪಯೋಗ್ ನಾತ್‍ಲ್ಲೊ. ಪುಣ್ ಆಪ್ಲ್ಯಾ ಅಂತಃಪುರಾಂತ್ ಆರ್ಯ್ ಕುಳಿಯೆಚಿಂ ಆನಿ ಸರ್ವ್ ಜಾತಿಚಿಂ ಸೊಭಿತ್ ಚೆಡ್ವಾಂ ಆಸಾತ್ ಮಳ್ಳೆಂ ದರ್ಬಾರ್ ಜಾಯ್ ಆಸ್‍ಲ್ಲೆಂ.

ಎಕಾ ವಾಟೆನ್ ಕೈದಿ, ದುಸ್ರ್ಯಾ ವಾಟೆನ್ ರಿಸಾಲಾಂ ಖಾತಿರ್ ತರ್ಬೆತ್ ಜಾಂವ್ಕ್ ಆಸ್‍ಲ್ಲೆ, ಪುಣ್ ಮುಳಾವೆ ನಸ್ರಾನಿ ಉಪ್ರಾಟ್ಲೆ ಮ್ಹಣ್ ತೊ ಖುಬಾಳ್ಳೊ. ತಾಣೆಂ ಸೈನ್‍ಂಚ್ ಧಾಡ್ಲೆಂ, ಆನಿ ಸರ್ಕಾರಿ ಮನ್ಶ್ಯಾಂಚೆರ್ ಹಾತ್ ಉಕ್ಲುಂಕ್ ಧಯ್ರ್ ಘೆತ್‍ಲ್ಲ್ಯಾ ಸರ್ವಾಂಕ್ ಕೈದ್ ಕರಯ್ಲೆ.

ತಾಕಾ ಜಾಯ್ ಆಸ್‍ಲ್ಲೆಂ ಶಿಸ್ತ್.

ತಾಕಾ ಜಾಯ್ ಆಸ್‍ಲ್ಲೆಂ ದಾಕಂವ್ಕ್ ಆಪ್ಲ್ಯಾ ಅಧಿಕಾರಾಚೊ ಖಾರ್!

ಕೈದ್ ಕೆಲ್ಲ್ಯಾ ಹರ್ಯೆಕ್ಲ್ಯಾಕ್ ವ್ಹಾಣಾಂಚೆ, ಚಾಬ್ಕಾಂಚೆ, ಚಿಂಚೆಚ್ಯಾ ಫಾಂಟ್ಯಾಂಚೆ, ಬೆತಾಂಚೆ ಆನಿ ಸೊಂಟ್ಯಾಂಚೆ ಪಾಂಯ್ಶಿಂ-ಪಾಂಯ್ಶಿಂ ಮಾರ್ ತಾಣೆಂ ಫರ್ಮಾಯ್ಲೆ – ಆನಿ ಥಂಯ್ ಥಾವ್ನ್ ತೊ ಪಾಶಾರ್ ಜಾಲೊ.

ಜೆಮೆದಾರಾಂನಿ, ಸುಬೆದಾರಾಂನಿ ಆನಿ ಹವಿಲ್ದಾರಾಂನಿ ತಾಂಚೆಂ ಕಾಮ್ ದೊಡ್ತ್ಯಾ ಜಿದ್ದಾನ್ ಆನಿ ಹಗ್ಯಾನ್ ಜಾರಿ ಕೆಲೆಂ. ಸಬಾರ್ ಜಣ್ ಕೈದಿ ಮತ್ ಚುಕೊನ್ ಪಡ್ಲೆ. ಸಬಾರ್ ಜಣಾಂನಿ ಥಂಯ್ಚ್ ರಗತ್ ಪಾಜ್ರೊನ್ ಪ್ರಾಣ್ ಕೆಲೊ.

ಉರ್ಲೆಲ್ಯಾಂಚೆ ಕಷ್ಟ್ ತಿತ್ಲ್ಯಾರ್ ಆಖೇರ್ ಜಾಂವ್ಕ್ ನಾಂತ್. ತಾಂಚಿಂ ನಾಕಾಂ ಉಸ್ಳಾಯ್ಲಿಂ, ತಾಂಚೆ ಕಾನ್ ಆನಿ ವೋಂಟ್ ಚಿರ್ಲೆ, ಆನಿ ಗಾಡ್ವಾಂಚೆರ್ ಶಿಮ್ಟೆಕ್ ಫುಡ್ ಕರ್ನ್ ಬಸವ್ನ್ ತಾಂಕಾಂ ಭೊಂವ್ಡಾಯ್ಲೆ. ಯುವಕಾಂನಿ ಉಪ್ರಾಟಾಜಯ್ ಮ್ಹಣ್ ಧಯ್ರ್ ದಿಲ್ಲ್ಯಾಂಕ್‍ಯೀ ಮೆಳೊನ್ ಚಾರ್ ರಿಸಾಲಾಂ ಜಾತಿತ್ ತಿತ್ಲ್ಯಾ ಮಾನಾಯಾಂಚ್ಯಾ ಪೆಂಕ್ಡಾಕ್ ದೊರಿ ಬಾಂಧುನ್ ವೊತಾಂತ್ ಭೊಂವ್ಡಾಯ್ಲೆ ಆನಿ ತಾಂಚ್ಯಾ ಮಾತ್ಯಾರ್ ಮಾತ್ಯೆಚ್ಯೊ ಭಾಟಿಯೊ ದೀವ್ನ್ ತೀನ್ ದೀಸ್ ತಾಂಕಾಂ ಭಾಯ್ರ್ ರಾವಯ್ಲೆಂ.

ಪುಣ್ ತ್ಯಾಚ್ ಸಂಬಂಧಿಂ ಟಿಪ್ಪು ಸುಲ್ತಾನಾಚೊ ವಿರುದ್ಧ್ ಆನಿ ಅನಿಶ್ಚಿತ್ ಸ್ವಭಾವ್‍ಯೀ ದಿಷ್ಟಿಕ್ ಪಡ್ಲೊ. ಕ್ರಿಸ್ತಾಂವ್ ಕೈದ್ಯಾಂಚೆ ಕಷ್ಟ್ ಪಳೆವ್ನ್ ಸಮೇಸ್ತಾಂಕ್ ಕಳ್ವಳೆ ಭೊಗ್‍ಲ್ಲೆಪರಿಂಚ್, ಬಾದಶಹಾಚ್ಯಾ ಪ್ರಧಾನ್ ಖಾಜಿಕ್‍ಯೀ ಬಿರ್ಮತ್ ದಿಸ್ಲಿ ಆನಿ ಭಿರಾಂತ್ ಭೊಗ್ಲಿ.

“ಹುಜೂರ್!” ಮ್ಹಣಾಲೊ ತೊ ಹಾಳ್ವಾಯೆನ್. “ದಯಾಮಯೆಕ್ ನಾಂವಾಡ್‍ಲ್ಲ್ಯಾ ತುಮಿ ತ್ಯಾ ನಸ್ರಾನಿಂಕ್ ದಿಲ್ಲಿ ಶಿಕ್ಷಾ ಚಡ್ ಜಾಲಿ ಮ್ಹಣ್ ದಿಸ್ತಾ.”

“ವ್ಹಯ್‍ಗೀ! ತೆಂ ಕಶೆಂ?” ವಿಚಾರ್ಲೆಂ ಟಿಪ್ಪುನ್. “ಆಮ್ಚ್ಯಾ ರಿಸಾಲಾಂನಿ ಜಾಯ್ ಶಿಸ್ತ್! ಆಮ್ಚ್ಯಾ ಅಧಿಕಾರಾಕ್ ಜಾಯ್ ಸಮೇಸ್ತಾಂಚೆಂ ಖಾಲ್ತಿಮಾನ್!”

“ತಿಂ ದೊನ್‍ಯೀ ಆಸಾತ್ ಹುಜೂರ್!” ಮ್ಹಣಾಲೊ ಸರ್ದಾರ್ ಸಿಮಾಂವ್ ಧಯ್ರ್ ಘೆವ್ನ್. ವಯ್ಲಿಂ ದೃಶ್ಯಾಂ ಪಳೆವ್ನ್ ತಾಂಚೆಂ ಆಂಗ್ ಹಿಂವಾಳ್‍ಲ್ಲೆಂ; ತಾಚೆಂ ಕಾಳಿಜ್ ರಡ್‍ಲ್ಲೆಂ ಆನಿ ತ್ಯಾ ಮಾರ್ಥಿರಾಂ ಖಾತಿರ್ ಅಭಿಮಾನಾನ್ ಭರ್‌ಲ್ಲೆಂ. ಸಾಂಗಾತಾಚ್ಯಾ ಪ್ರತ್ಯಕ್ಷ್ ಥರಾನ್ ತಸಲಿ ಶಿಕ್ಷಾ ದಿಲ್ಲ್ಯಾ ಅಧಿಕಾರಿಂಚೆರ್ ಆನಿ ಪರೋಕ್ಷ್ ಥರಾನ್ ತ್ಯಾ ಶಿಕ್ಷೆಕ್ ಕಬ್ಲಾತ್ ದಿಲ್ಲ್ಯಾ ಟಿಪ್ಪುಚೆರ್‌ಯೀ ಕ್ರೋಧಾನ್ ತೊ ಭರ್‌ಲ್ಲೊ.

“ವ್ಹಯ್‍ಗೀ ಸರ್ದಾರ್ ಸಿಮಾಂವ್?” ಟಿಪ್ಪುನ್ ವಿಚಾರ್ಲೆಂ ಹಾಳ್ವಾಯೆನ್.

“ವ್ಹಯ್ ಹುಜೂರ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಆಮ್ಚ್ಯಾ ಅಧಿಕಾರಿಂನಿ ದಿಲ್ಲ್ಯಾ ವರ್ದೆ ವರ್ವಿಂ, ಲಾಗಿಂ ಚಾರ್ ರಿಸಾಲಾಂ ಉಸಳ್ಳಿಂ…”

“ಅಧಿಕಾರಿಂನಿ ದಿಲ್ಲ್ಯಾ ವರ್ದೆ ವರ್ವಿಂ?” ವಿಚಾರಿ ಟಿಪ್ಪು. “ತಾಣಿಂ ದಿಲ್ಲ್ಯಾ ವರ್ದೆಂತ್ ಅತಿಶಯ್ ಆಸ್ಯೆತ್‍ಗೀ?”

“ಜರೂರ್ ಆಸ್ಯೆತ್, ಹುಜೂರ್” ಮ್ಹಣಾಲೊ ಖಾಜಿ.

“ಬಾದಶಹಾಚ್ಯಾ ಸರ್ಕಾರಾಂತ್ ಅಮಾಲ್ ಪಿಯೆನಾಯೆ, ಸ್ತ್ರೀಯಾಂಚೆರ್ ಅತ್ಯಾಚಾರ್ ಚಲಯ್ನಾಯೆ ಮ್ಹಳ್ಳೊ ಕಾಯ್ದೊ ಆಸಾ. ತ್ಯಾ ಕಾಯ್ದ್ಯಾಂ ಖಾತಿರ್, ದುಸ್ಮಾನ್ ಲೆಗೂನ್, ನಾ ಖುಶೆನ್ ತರೀ ಬಾದಶಹಾಕ್ ಮಾನ್ ದಿತಾ…”

ಸರ್ದಾರ್ ಸಿಮಾಂವ್ಚ್ಯಾ ಉತ್ರಾಂಚಿ ಧಾರ್, ಟಿಪ್ಪು ಸುಲ್ತಾನಾಕ್ ಸಮ್ಜಲಿ. ಫುಲೊನ್ ಮಿಶ್ಯೊ ಚಿಂವೊಂಕ್ ತೊ ಲಾಗ್ಲೊ. ‘ನೀತ್ ವಾಂಟ್ಚ್ಯಾ ವಿಶ್ಯಾಂತ್ ಟಿಪ್ಪು ಸುಲ್ತಾನ್ ಬಹಾದುರ್ ಕೆದಿಂಚ್ ಚುಕೊನ್ ಪಡನಾ…’ ಮ್ಹಳ್ಳೊ ಹಿಸೊ ಸರ್ದಾರ್ ಸಿಮಾಂವ್ನ್ ತಾಕಾ ದಿಲ್ಲೊ.

ಫುಡ್ಲ್ಯಾ ಥೊಡ್ಯಾಚ್ ವೆಳಾನ್, ವಯ್ಲ್ಯಾ ಕೈದ್ಯಾಂಕ್ ಶಿಕ್ಷಾ ದಿಲ್ಲ್ಯಾ ಜೆಮೆದಾರ್, ಸುಬೆದಾರ್ ಆನಿ ಹವಿಲ್ದಾರಾಂಕ್, ತಶೆಂ ವಿಂಚುಂಕ್ ಗೆಲ್ಲ್ಯಾ ಅಧಿಕಾರಿಂಕ್ ಆನಿ ಅಂಗರಕ್ಷಕಾಂಕ್ ಉಲೊ ಗೆಲೊ. ಬಾದಶಹಾನ್ ಕಮರ್‌ಬಾಂಧಾಂತ್ ಬೊಟಾಂ ಶಿರ್ಕಾವ್ನ್ ರಾವ್‍ಲ್ಲೆ ಕಡೆನ್ ಥಾವ್ನ್ ತಾಂಚೆರ್ ದೀಶ್ಟ್ ಜೊಕ್ಲಿ. ಚಡಾವತ್ ಜಾವ್ನ್ ಕರೀಮ್ ಖಾನಾಚ್ಯಾ ಪಂಗ್ಡಾಂತ್ಲೆ ತೆ ಜಾವ್ನಾಸ್‍ಲ್ಲೆ.

ಥೊಡೊ ವೇಳ್ ಸವಾಲಾಂ ಆನಿ ಪ್ರತಿ ಸವಾಲಾಂ ಜಾಲಿಂ.

“ಆಮ್ಚ್ಯಾ ಉಗ್ಡಾಸಾ ಪರ್ಮಾಣೆಂ, ಆಮಿ ತ್ಯಾ ಕೈದ್ಯಾಂಕ್ ಮಾರ್ ಮಾತ್ರ್ ಫರ್ಮಾಯಿಲ್ಲೆ. ಹೆರ್ ಶಿಕ್ಷಾ ಫರ್ಮಾಂವ್ಕ್ ನಾ!”

ಕೊಣೀ ಉಲಂವ್ಕ್ ನಾ.

ದುಸ್ರ್ಯಾ ಘಡ್ಯೆ, ವೆಗ್ಳಿಚ್ ಏಕ್ ಕಂಪ್ಣಿ ಶಿಪಾಯ್ ಥಂಯ್ ಆಯ್ಲೆ. ಟಿಪ್ಪುಚ್ಯಾ ಹುಕ್ಮೆನ್ ಪಯ್ಲೆಂಚೆ ಅಧಿಕಾರಿ, ಅಂಗರಕ್ಷಕ್, ಜೆಮೆದಾರ್, ಸುಬೆದಾರ್ ಆನಿ ಹವಿಲ್ದಾರ್ ಬಂಧ್ ಜಾಲೆ. ಕ್ರಿಸ್ತಾಂವ್ ಕೈದ್ಯಾಂಕ್ ದಿಲ್ಲಿಚ್ ಶಿಕ್ಷಾ ತಾಂಕಾಂ ದೀಜಾಯ್ ಆನಿ ತಾಂಕಾಂ ತಡೀಪಾರ್ ಕರಿಜಾಯ್ ಮ್ಹಣ್ ಫರ್ಮಾಣ್ ಜಾಲೆಂ.

ಉಪ್ರಾಂತ್ ಬಾದಶಹಾ ಥಂಯ್ ರಾವನಾಸ್ತಾನಾ, ರಾವ್ಳೆರಾಕ್ ಪಾಟಿಂ ಗೆಲೊ. ಸರ್ದಾರ್ ಸಿಮಾಂವ್ಕ್‌ಯೀ ತಾಣೆಂ ಆಪಯ್ಲೊ.

ಹೆಂ ಸರ್ವ್ ಘಡ್ತಾನಾ ಆಗ್ನೆಸ್ ಕುಂವರ್ನ್ ಆಸ್ಮಾಬಿಗೆರ್ ಯೇವ್ನ್ ಪಾವ್‍ಲ್ಲಿ, ಪುಣ್ ತಿ ಖಬರ್ ಸರ್ದಾರ್ ಸಿಮಾಂವ್ಕ್ ನಾತ್‍ಲ್ಲಿ.

ಸಗ್ಳಿ ಖಬರ್ ಆಯ್ಕೊನ್ ಆಗ್ನೆಸ್ ಕುಂವರ್ನಿಕ್ ವರ್ತಿ ಖಂತ್ ಜಾಲಿ. ಅನಿ ಚಡ್ ತೇಂಪ್ ಪಟ್ಟಣಾಂತ್ ರಾವೊಂಕ್ ಉಪಾಯ್ ನಾ ಮ್ಹಣ್ ತಿಕಾ ಭೊಗ್ಲೆಂ, ತರೀ, ಹ್ಯಾ ಪುರ್ಗತರಿ ಥಾವ್ನ್, ಸರ್ದಾರ್ ಸಿಮಾಂವ್ ಭಾಯ್ರ್ ಗೆಲ್ಯಾ ಶಿವಾಯ್, ಆಪುಣ್‍ಯೀ ಭಾಯ್ರ್ ವಚಶಿ ನಾ ಮ್ಹಣ್ ಪರ್ತ್ಯಾನ್ ತಿಚೊ ನಿಚೆವ್ ದೃಢ್ ಜಾಲೊ.

ಆನ್ಯೇಕಾ ವಾಟೆನ್ ಯೂಸುಫ್ ಆಲಿಯೀ ಚಡುಣೆಂ ಬಂಧೆಂತ್ ಮ್ಹಳ್ಳೆಪರಿಂ ಆಸ್‍ಲ್ಲ್ಯಾನ್, ಕ್ರಿಸ್ತಾಂವ್ ಕೈದ್ಯಾಂಕ್ ಉಸ್ಳಾವ್ನ್ ಭಾಯ್ರ್ ವ್ಹರ್ಚೆಂ ಕಾಮ್‍ಯೀ ತತ್ಕಾಲಾಕ್ ಬಂದ್ ಜಾಲೆಂ ಮ್ಹಣ್ಯೆತ್.

ಟಿಪ್ಪು ಸುಲ್ತಾನ್ ಅನಿ ಸರ್ದಾರ್ ಸಿಮಾಂವ್ ರಾವ್ಳೆರಾಕ್ ಪಾವ್ಲ್ಯಾ ಉಪ್ರಾಂತ್ ಥೊಡೊ ವೇಳ್ ಪಾಶಾರ್ ಜಾಲೊ. ಸರ್ದಾರ್ ಸಿಮಾಂವ್ಚಿ ತಕ್ಲಿ ಘುಂವ್ತಾಲಿ, ತಿ ಟಿಪ್ಪು ಕಡೆನ್ ಉಲಯ್ತಾನಾ ಆನಿಕ್‍ಯೀ ಚಡ್ ಘುಂವೊಂಕ್ ಲಾಗ್ಲಿ.

“ತುಂ, ಹುಶಾರ್ ನಾತ್‍ಲ್ಲೊಯ್ ಸರ್ದಾರ್ ಸಿಮಾಂವ್” ಮ್ಹಣಾಲೊ ಟಿಪ್ಪು ಸುಲ್ತಾನ್. “ತಶೆಂ ಜಾಲ್ಲ್ಯಾನ್ ಚಡಿತ್ ಕೈದ್ಯಾಂಕ್ ಧರ್ನ್ ಹಾಡುಂಕ್ ರಿಸಾಲಾಂ ಧಾಡ್ತಾನಾ ಫಾವೊ ತೊ ವಿವರ್ ತುಜೆ ಕಡೆನ್ ಆಮಿ ವಿಚಾರುಂಕ್ ನಾ. ವ್ಹಡ್ ನಹಿಂ. ಆಮಿ ಚಿಂತ್‍ಲ್ಲೆಪರಿಂ ಹ್ಯಾ ಪಾವ್ಟಿಂ ಕೈದಿ ಸಾಂಪ್ಡೊಂಕ್ ನಾಂತ್. ತಶೆಂ ಮ್ಹಣ್ತಾನಾ, ಥೊಡ್ಯಾ ದಿಸಾಂ ಆದಿಂ ಆಮಿ ಉಲಯಿಲ್ಲೊ ಏಕ್ ಉಗ್ಡಾಸ್ ಯೆತಾ. ತಿ ಖಬರ್, ತ್ಯಾ ಬಂಟ್ವಾಳ್ಚ್ಯಾ ಕುಂವರ್ನಿಚಿ – ತುಂ ಜಾಣಾಂಯ್, ದೋನ್-ತೀನ್ ವರ್ಸಾಂ ಆದಿಂ ತಿಚೆ ಕಡೆನ್ ಕಾಜಾರ್ ಜಾತಾಂ ಮ್ಹಣ್ ಗೆಲ್ಲೊಯ್ ತುಂ. ಉಪ್ರಾಂತ್ ಜಾಣಾಂಯ್, ಕಿತೆಂ ಘಡ್ಲೆಂ ತೆಂ.”

“ಕಾಂಯ್ ಘಡೊಂಕ್ ನಾ, ಹುಜೂರ್” ಸರ್ದಾರ್ ಸಿಮಾಂವ್ಚಿ ತಕ್ಲಿ ಫಡಾಫಡ್ ರಾವ್ಲಿಶಿ ಭೊಗ್ಲೆಂ ತಾಕಾ.

“ತಿಚ್ ಚೂಕ್ ಜಾಲಿ” ಮ್ಹಣಾಲೊ ಟಿಪ್ಪು ಸುಲ್ತಾನ್. “ತುವೆಂ ತಿಚೆ ಕಡೆನ್ ಕಾಜಾರ್ ಜಾಯ್ಜಯ್ ಆಸ್‍ಲ್ಲೆಂ. ತವಳ್ ಆಮ್ಕಾಂ ಬಂಟ್ವಾಳ್ಚ್ಯಾ ಮಾಗಣ್ಯಾಂಚೊ ಸಹಕಾರ್ ಲಾಭ್ತೊ. ಬದ್ಲಾಕ್ ಆಮ್ಕಾಂ ತೆಣೆಂ ಚಡ್ ತಕ್ರಾರ್‌ಚ್ ಫಾವೊ ಜಾಲೆ. ಆಮಿ ಆಯ್ಕಲ್ಲ್ಯಾ ಪರ್ಮಾಣೆಂ ತಿ ಯುವತಿ ಚಡ್ ಸುಂದರ್ ಮಾತ್ರ್ ನಹಿಂ, ವಿಶೇಸ್ ಚತುರ್‌ಯೀ ಆಸಾ. ತಿಕಾ ಆಮಿ ಹ್ಯಾ ಪಾವ್ಟಿಂ ಥೊಡ್ಯಾ ವಿಚಾರಣ್ಯಾ ಖಾತಿರ್ ಜಮಲಾಬಾದ್ ಆಪವ್ನ್ ರಾವಯ್ಜಾಯ್ ಮ್ಹಣ್ ತಾಕಿದ್ ದಿಲ್ಲಿ. ಪುಣ್ ತಿ ಆಮ್ಚ್ಯಾ ಶಿಪಾಯಾಂಕ್ ಮೆಳೊಂಕ್ ನಾ…” ತೊ ಮಿಶ್ಯೊ ಚಿಂವೊಂಕ್ ಲಾಗ್ಲೊ.

“ಮೆಳೊಂಕ್ ನಾ ಹುಜೂರ್?” ಸರ್ದಾರ್ ಸಿಮಾಂವ್ನ್ ವಿಸ್ಮಿತ್ ಜಾಲ್ಲೆಪರಿಂ ವಿಚಾರ್ಲೆಂ. ತಿ ಮೆಳೊಂಕ್ ನಾ ಮ್ಹಳ್ಳೆ ಖಾತಿರ್, ಮತಿ ಭಿತರ್‌ಚ್ ದೆವಾಕ್ ತಾಣೆಂ ಅರ್ಗಾಂ ದಿಲಿಂ. ತಿ ಪಟ್ಟಣಾಕ್ ಯೆಂವ್ಚ್ಯಾ ವಾಟೆರ್ ಕೊಡಗಾಂತ್ ಚಿಕ್ಕೆ ಪಾಟಿಂ ರಾವ್ಲ್ಯಾ ಮ್ಹಣ್ ತಾಚ್ಯಾ ಸವಾರಾಂನಿ ತಾಕಾ ಸಾಂಗ್‍ಲ್ಲೆಂ.

“ನಾ, ಮೆಳೊಂಕ್ ನಾ – ಪುಣ್ ಖಂಯ್ ವೆತಾ ಪಳೆವ್ಯಾಂ” ಮ್ಹಣಾಲೊ ಟಿಪ್ಪು ಸುಲ್ತಾನ್, ಶಿಕಾರೆಚಿ ಖಬರ್ ಉಲಯಿಲ್ಲ್ಯಾ ಜಿನ್ಸಾರ್. “ತಿ ಗೊಂಯಾಂ ಗೆಲ್ಯಾ ಮ್ಹಣ್ ತಿಚ್ಯಾ ಬಾಪಾಯ್ನ್ ಸಾಂಗ್ಲೆಂ ಖಂಯ್.”

“ಜಾವ್ಯೆತ್, ಹುಜೂರ್” ಮ್ಹಣಾಲೊ ಸದಾರ್ ಸಿಮಾಂವ್, ಚತ್ರಾಯೆನ್. “ತಾಂಕಾಂ ಆದಿಂ ಗೊಂಯ್ಚ್ಯಾ ಪಾದ್ರಿಂಚಿ ಬರಿ ವಳಕ್ ಆಸ್‍ಲ್ಲಿ. ಆನಿ ತಾಂಗೆರ್ ಫಿಂರ್ಗಿ ಯುವತಿ ಎಕ್ಲಿ ಆಸ್‍ಲ್ಲಿ ಮ್ಹಣ್ ಸಾಂಗ್ಚೆಂ ಆಯ್ಕಲ್ಲೆಂ ಹಾಂವೆಂ.”

“ಆಮಿಂಯೀ ತೆಂ ಆಯ್ಕಲಾಂ. ತ್ಯಾ ಚಲಿಯೆಕ್ ಆಶೆವ್ನ್ ಮ್ಹಣ್ ದಿಸ್ತಾ, ಆಮ್ಚೊ, ಬೆಳ್ತಂಗಡಿಂತ್ ಕೊತ್ವಾಲ್ ಜಾವ್ನಾಸ್‍ಲ್ಲೊ ಸೆಲಿಮ್ ಖಾನ್ ಪಾಡಾವ್ ಜಾವ್ನ್ ಪೋಳ್ನ್ ಧಾಂವ್‍ಲ್ಲೊ.” ಉಪ್ರಾಂತ್ ತಾಣೆಂ ವಿಷಯ್ ಬದ್ಲಿಲೊ, ಆನಿ ಸವಾಲ್ ಕೆಲೆಂ: “ಭಾಯ್ಲ್ಯಾ ಪೆಂಟೆಂತ್ ಆಸ್ಚ್ಯಾ ಆಸ್ಮಾಬಿಕ್ ವಳ್ಕತಾಯ್‍ವೇ ತುಂ – ಆಮ್ಕಾಂ ಮೌಶಿ ಲೆಕ್ತಾ ತಿ. ರಾವ್ಳೆರಾಚ್ಯಾ ಖಜಾನಾ ಥಾವ್ನ್ ತಿಕಾ ಆನಿ ತಿಚ್ಯಾ ಧುವೆಕ್ ಖರ್ಚಾಕ್ ಭಾತೆಂ ವೆತಾ.”

“ಹಾಂವೆಂ ತೆಂ ನಾಂವ್ ಆಯ್ಕಲಾಂ. ಆಮ್ಚೆ ಶಿಪಾಯ್ ಥೊಡೆ ಪಾವ್ಟಿಂ ತಿಚ್ಯಾ ಪ್ರತ್ಯೇಕ್ ವಕ್ತಾಂ ಖಾತಿರ್ ವಚೊನ್ ಯೇವ್ನ್ ಆಸಾತ್.”

“ವ್ಹಯ್. ಆಮ್ಚೊ ಸರ್ದಾರ್ ಯೂಸುಫ್ ಆಲಿಯೀ ಥಂಯ್ ಸರಾಗ್ ಭೆಟ್ ದೀವ್ನ್ ಆಸ್‍ಲ್ಲೊ ಆಮ್ಕಾಂ ಕಳಿತ್ ಆಸಾ. ಪುಣ್ ತೆದಾಳಾ ಆಮಿ ಆಯ್ಕಲ್ಲೆಂ ಆನಿ ಆತಾಂ ಆಮಿ ಆಯ್ಕೊಂಚ್ಯಾಂತ್ ಫರಕ್ ಆಸಾ.”

ಹೆಂ ಆಯ್ಕೊನ್ ಸರ್ದಾರ್ ಸಿಮಾಂವ್ಕ್ ಕಾವ್ಜೆಣಿ ಭೊಗ್ಲಿ. ಸರ್ದಾರ್ ಯೂಸುಫಾಕ್ ಜಮೀಲಾಚೆರ್ ದೊಳೊ ಆಸಾ ಮ್ಹಣ್ ತಾಣೆಂ ಆಯ್ಕಲ್ಲೆಂ.

“ಪುಣ್ ಸರ್ವ್ ಭೆಷ್ಟೆಂ” ಮ್ಹಣಾಲೊ ಟಿಪ್ಪು ಸುಲ್ತಾನ್. “ಆಮಿ ಆಯ್ಕೊಂಚ್ಯಾ ಪರ್ಮಾಣೆಂ ತ್ಯಾ ಜಮೀಲಾಕ್ ಮಸ್ತ್ ಮಿತ್ರ್ ಆಸಾತ್ – ಕುತಂತ್ರಿ ಕಸಲ್ಯಾಗೀ ವ್ಯವಹಾರಾ ಖಾತಿರ್ ಥಂಯ್ಸರ್ ತೆ ಜಮ್ತಾತ್. ಕರೀಮ್ ಖಾನಾಕ್‍ಯೀ ತಾಂಚೆ ಕಡೆನ್ ಸಂಬಂಧ್ ಆಸಾ ಮ್ಹಣ್ ಕಳೊನ್ ಆಯ್ಲಾಂ. ಕಿತೆಂ ಫಿತೂರಿ ಚಲ್ತಾ ಮ್ಹಳ್ಳೆಂ ಸೊಧುನ್ ಕಾಡಿಜಾಯ್. ತುಜ್ಯಾ ಕಂಪೆನಿಂತ್ಲೆ ಶಿಪಾಯ್ ಥಂಯ್ಸರ್ – ವಕ್ತಾ ಖಾತಿರ್ – ಯೇವ್ನ್ ವಚೊನ್ ಸಳಾವಳಿರ್ ಆಸಾತ್. ತಾಣಿಂ ಚತ್ರಾಯೆನ್ ಕಾನ್-ದೊಳೆ ಉಗ್ತೆ ದವರ್ನ್, ಗಜಾಲ್ ಕಿತೆಂ ಮ್ಹಣ್ ಸಮ್ಜೊಂಕ್ ಪ್ರಯತ್ನ್ ಕರಿಜಾಯ್. ಹೆಂ ಉಗ್ಡಾಸ್ ಆಸೊಂದಿ…”

ಟಿಪ್ಪು ಸುಲ್ತಾನ್ ಭಿತರ್ ಚಲ್ಲೊ.

ಸರ್ದಾರ್ ಸಿಮಾಂವ್ ಭಾಯ್ರ್ ಗೆಲೊ. ತಾಚಿ ತಕ್ಲಿ ಆತಾಂ ಪಯ್ಲೆಂಚ್ಯಾ ಪ್ರಾಸ್ ಚಡ್ ಫಡ್ತಾಲಿ. ಕಿತೆಂಯೀ ಜಾಂವ್ದಿ, ದುಸ್ರ್ಯಾಚ್ ದಿಸಾ ಭಿತರ್ ಅಂತುಲೊ ಪಡ್ವಳಾಕ್ ವಾ ಹೆರ್ ಕೊಣಾಯ್ಕೀ ಧಾಡ್ನ್ ಆಸ್ಮಾಬಿಕ್ ಜಾಗ್ವಯ್ಜಾಯ್ ಮ್ಹಣ್ ತಾಣೆಂ ಚಿಂತ್ಲೆಂ. ಸಾಧ್ಯ್ ಜಾಲ್ಯಾರ್ ತಶೆಂಚ್ ಕೊಡಗಾಕ್‍ಯೀ ಎಕ್ಲ್ಯಾ ದೂತಾಕ್ ಧಾಡ್ನ್, ಆಗ್ನೆಸ್ ಕುಂವರ್ನಿನ್ ಪಯ್ಸ್ ರಾವ್ಲ್ಯಾರ್ ಬರೆಂ – ಟಿಪ್ಪು ಸುಲ್ತಾನಾಚ್ಯಾ ದಿಷ್ಟಿಕ್ ಪಡನಾಶೆಂ ರಾಂವ್ಚಿ ವರ್ತಿ ಗರ್ಜ್ ಆಸಾ ಮ್ಹಣ್ ಜಾಗ್ವಯ್ಜಾಯ್ ಮ್ಹಣ್ ತಾಣೆಂ ಚಿಂತ್ಲೆಂ. ತಾಣೆಂ ಚಿಂತ್‍ಲ್ಲೆಂ ತಾಚೆ ಕಡೆನ್‍ಂಚ್ ಉರ್ಲೆಂ. ಕೊಣೆಂಚ್ ಚಿಂತಿನಾತ್‍ಲ್ಲ್ಯಾ ಜಿನ್ಸಾರ್, ಆಗ್ನೆಸ್ ಕುಂವರ್ನ್ ಟಿಪ್ಪುಚ್ಯಾ ದೊಳ್ಯಾಂಕ್ ಸಾಂಪಡ್ಚಿ ಪರಿಸ್ಥಿತಿ ಉಬಿ ಜಾವ್ನ್ ಗೆಲಿ. ಸ್ತ್ರೀಯಾಂಚಿ ಬುದ್ವಂತ್ಕಾಯ್ ದಾದ್ಲ್ಯಾಂಕ್ ಮಿಕ್ವಲಿ.

ತ್ಯಾಚ್ ತೀನ್ ದಿಸಾಂ ಆದಿಂ, ಕೊಡಗಾ ಥಾವ್ನ್ ಪಯ್ಣ್ ಕರ್ನ್ ಆಯಿಲ್ಲ್ಯಾ ಬೊಯ್ಲಾಂಚ್ಯಾ ಗಾಡಿಯೆಂತ್ ಎಕ್ಲಿ ಮುಸ್ಲಿಮ್ ಸ್ತ್ರೀ ಪಟ್ಟಣಾಕ್ ಯೇವ್ನ್ ಪಾವ್ಲಿ. ಕಾಳೊಕ್ ಜಾಲ್ಯಾ ಉಪ್ರಾಂತ್ ತಿ ಸ್ತ್ರೀ ಆಸ್ಮಾಬಿಚ್ಯಾ ಬಿಡಾರಾ ಮುಖಾರ್ ಉಬಿ ಜಾಲಿ, ಆನಿ ಆಸ್ಮಾಬಿಚೊ ಸ್ವರ್ ಆಯ್ಕೊನ್ ಸಟ್ಟ್ ಕರ್ನ್ ಭಿತರ್ ಸರ್ಲಿ, ಆನಿ ಉರ್ದು ಭಾಶೆನ್ ಉಲಯ್ಲಿ. ಆಯಿಲ್ಲಿ ಗ್ರಾಯ್ಕಿಣ್ ಆಗ್ನೆಸ್ ಕುಂವರ್ನ್ ಮ್ಹಣ್ ಸಮ್ಜತಚ್ ಆಸ್ಮಾಬಿಕ್ ಜಾಲ್ಲೆಂ ಅಜ್ಯಾಪ್ ಸಾಂಗ್ಚೆಂ ನಹಿಂ. ತಿಕಾ ಭಿತರ್ ವ್ಹರ್ನ್ ಗಜಾಲ್ ತಿಣೆಂ ವಿಚಾರ್ನ್ ಘೆತ್ಲಿ ಆನಿ ವರ್ತ್ಯಾ ಖಂತಿಚೊ ಏಕ್ ಶ್ವಾಸ್ ತಿಣೆಂ ಸೊಡ್ಲೊ. ನಿಜಾಯ್ಕೀ ವರ್ತ್ಯಾ ಖಂತಿ ದುಖಾಂತ್ ತಿ ಆಸ್‍ಲ್ಲಿ.

“ನಿಜಾಯ್ಕೀ ಕಿತೆಂ ಉಲಂವ್ಚೆಂ ಮ್ಹಣ್ ಮ್ಹಾಕಾ ಸಮ್ಜನಾ, ಭೇಟಿ” ಮ್ಹಣಾಲಿ ತಿ. “ತುವೆಂ ಆಯಿಲ್ಲಿಂ ಕಾರಣಾಂ ವಾಜ್ಭಿ ಆಸ್ಯೆತ್, ಪುಣ್ ತುವೆಂ ಆಯಿಲ್ಲೊ ವೇಳ್ ಭೋವ್ ಅಪಾಯಾಚೊ. ಜಾಲ್ಯಾರೀ ಬರೊ ದೇವ್ ಆಮ್ಕಾಂ ಪಾಡ್ ಕರಿಸೊ ನಾ. ಮ್ಹಾಕಾ ದಿಸ್ತಾ, ಅಲ್ಲಾನ್‍ಂಚ್ ಅಜ್ಯಾಪಾಂನಿ ತುಕಾ ಹಾಂಗಾಸರ್ ಹಾಡಯ್ಲಾ… ತುಕಾ ಹಾಂಗಾಸರ್ – ಹ್ಯಾ ಘರಾಂತ್ ಕಾಂಯ್ ಚಡುಣೆಂ ದಿಸ್ಲೆಂವೇ?” ತಿ ಚಿಕ್ಕೆ ಸುಸ್ಕಾರ್ಲಿ.

ಆಗ್ನೆಸ್ ಕುಂವರ್ನ್ ಚಿಂತುಂಕ್ ಪಡ್ಲಿ. ಕಾವ್ಜೆವ್ನ್ ತಿಣೆಂ ಮ್ಹಳೆಂ:

“ಜಮೀಲಾ ಬಹೆನ್ ದಿಸನಾ, ಅವ್ವಾಜಿ…”

“ಸಾರ್ಕೆಂ ಮ್ಹಳೆಂಯ್ ಭೇಟಿ” ಆಸ್ಮಾಬಿಚಿಂ ದುಖಾಂ ಗಳ್ಳಿಂ. “ತುವೆಂ ಯೆಂವ್ಚ್ಯಾ ಥೊಡ್ಯಾ ದಿಸಾಂಕ್ ಪಾಟಿಂ ಘಾಲಿಜಾಯ್ ಮ್ಹಣ್ ಹಾಂವೆಂ ಸಾಂಗೊನ್ ಧಾಡ್‍ಲ್ಲೆಂ. ಕಾರಣ್, ತ್ಯಾ ವೆಳಾರ್ ಮ್ಹಜೆಂ ಜಮೀಲಾ ವ್ಹಡ್ಲ್ಯಾ ಪಿಡೆನ್ ಅಸ್ವಸ್ಥ್ ಆಸ್‍ಲ್ಲೆಂ… ತಿ ಖಬರ್ ಹಾಂವೆಂ ಗುಪಿತ್ ದವರ್ಲಿ, ಆನಿ ಹಾಂಗಾಚ್ ವಕ್ತಾಂ ದಿಲಿಂ.. ಪುಣ್ ಮ್ಹಜೆಂ ನಶಿಬ್ ಖೊಟೆಂ… ದೋನ್ ದಿಸಾಂ ಆದಿಂ ಮ್ಹಜೆಂ ಬಾಳ್ ಅಲ್ಲಾ ಸರ್ಶಿನ್ ಗೆಲೆಂ…” ಆಸ್ಮಾಬಿ ಆತಾಂ ರಡೊಂಕ್‍ಚ್ ಲಾಗ್‍ಲ್ಲಿ.

ಹಿ ಖಬರ್ ಆಯ್ಕೊನ್ ಆಗ್ನೆಸ್ ಕುಂವರ್ನಿಕ್ ಝಿಂಟ್ ಮಾರ್‌ಲ್ಲೆಪರಿಂ ಜಾಲೆಂ. ಉಲಂವ್ಕ್ ತಿಕಾ ಉತ್ರಾಂ ಸುಟ್ಲಿಂ ನಾಂತ್.

ಥೊಡ್ಯಾ ವೆಳಾನ್ ಆಸ್ಮಾಬಿಚೆಂ ದುಖ್ ರಾವ್ಲೆಂ:

“ಕಿತೆಂಯೀ ಜಾಂವ್, ಅಲ್ಲಾಚಿ ಖುಶಿ. ರಡೊನ್ ಬಸೊಂಕ್ ಆತಾಂ ವೇಳ್ ನಹಿಂ – ಬರ್‍ಯಾ ವೆಳಾರ್ ತುಕಾ ಅಲ್ಲಾನ್ ಹಾಡಯ್ಲಾಂ ಮ್ಹಳೆಂ ಹಾಂವೆಂ. ಆತಾಂ ಬರೆಂ ಕರ್ನ್ ಆಯ್ಕ್” ಮ್ಹಣೊನ್ ತಿಣೆಂ ವಿವರ್ ದಿಲೊ.

ಜಮೀಲಾ ಮೋರ್ನ್ ಪಾವ್‍ಲ್ಲಿ, ಅಸ್ವಸ್ಥ್ ಆಸ್‍ಲ್ಲಿ ಖಬರ್ ಸಹಿತ್, ಆಸ್ಮಾಬಿ ಆನಿ ದೊಗಾಂ ಚಾಕ್ರಾಂ ಬಗಾರ್ ಹೆರ್ ಕೊಣಾಯ್ಕೀ ಕಳಿತ್ ನಾತ್‍ಲ್ಲಿ – ವ್ಹಡ್ಲ್ಯಾ ಪಿಡೆನ್ ಅಸ್ವಸ್ಥ್ ಆಸ್ತಾನಾ, ತಸಲ್ಯಾಂಕ್ ವೊಸ್ಯಾ ಭದ್ರತೆಚ್ಯಾ ಆವರಾಕ್ ಧಾಡಿನಾತ್ಲ್ಯಾರ್ ಮೊರ್ನಾಚಿ ಶಿಕ್ಷಾ ಪರ್ಯಾಂತ್ ಫಾವೊ ಜಾತಾಲಿ. ಜಮೀಲಾ ಕಾಜಾರ್ ಜಾಲ್ಯಾರ್ ವಾ ಮೋರ್ನ್ ಪಾವ್ಲ್ಯಾರ್, ರಾವ್ಳೆರಾ ಥಾವ್ನ್ ಮೆಳ್ಚೆಂ ಭಾತೆಂ ಬಂದ್ ಜಾಂವ್ಕ್ ಆಸ್‍ಲ್ಲೆಂ. ಹೆಂ ಚಿಂತುನ್ ಆಸ್ಮಾಬಿನ್ ಸರ್ವ್ ಖಬರ್ ಗಪ್‍ಚಿಪ್ ದವರ್ನ್, ರಾತಾರಾತ್ ತಿಕಾ ಪಾಟ್ಲ್ಯಾ ವೊಡ್ತಾಂತ್ ಸಮಾಧ್ ದಿಲ್ಲಿ.

“ಆನಿ ಆತಾಂ, ಜಮೀಲಾಚ್ಯಾ ಸ್ಥಾನಾರ್ ರಾಯ್ ಕುಂವರ್ನ್ ಜಾವ್ನ್ ತುವೆಂಚ್ ಹಾಂಗಾ ಸುರಕ್ಷಿತಾಯೆನ್ ರಾವ್ಯೆತ್” ಮ್ಹಣಾಲಿ ಆಸ್ಮಾಬಿ.

“ಪುಣ್ ವಳಕ್?” ಆಗ್ನೆಸ್ ಕುಂವರ್ನಿನ್ ವಿಸ್ಮಿತ್ ಜಾವ್ನ್ ವಿಚಾರ್ಲೆಂ.

“ಪ್ರಾಯೆಕ್ ಆಯ್ಲ್ಯಾ ಉಪ್ರಾಂತ್, ಜಮೀಲಾಕ್ ಘೋಷಾ ಶಿವಾಯ್ ಕೊಣೆಂಯೀ ಪಳೆಂವ್ಕ್ ನಾ. ತುಮ್ಚಿ ನೀಳಾಯ್, ರುಂದಾಯ್, ತುಮ್ಚೊ ವರ್ಣ್ ಆನಿ ಸ್ವರ್‌ಯೀ ಚಡುಣೆಂ ಎಕ್‍ಚ್ ಆಸಾ. ಹೆರ್ ವಿಷಯಾಂನಿ ಅಲ್ಲಾ ಆಮ್ಕಾಂ ಸಾಂಬಾಳ್ತಲೊ. ಭಾಯ್ಲಿ ರಾಟಾವಳ್ ಹಾಂವ್ ಪಳೆತಾಂ.”

ತಶೆಂ, ಹ್ಯಾ ಘಡಿತಾಂಚ್ಯಾ ಖೆಳಾ ವರ್ವಿಂ ಆಗ್ನೆಸ್ ಸಿಸಿಲಿಯಾ ಕುಂವರ್ನ್ ಆಸ್ಮಾಬಿಚ್ಯಾ ಘರಾಂತ್, ರಾಯ್ ಕುಂವರ್ನ್‍ಶಿ ವೇಶಾಂತರ್ ಜಾಲಿ. ಕೊಣೀ ಯೆತಿತ್ ಜಾಲ್ಯಾರ್, ಜನೆಲಾಚ್ಯಾ ಪಡ್ದ್ಯಾ ಪಾಟ್ಲ್ಯಾನ್ ಜಾಲ್ಯಾರೀ ಮುಖಾವರಣ್ ದವರ್ನ್‍ಂಚ್ ಚತ್ರಾಯೆನ್ ರಾವಜಾಯ್ ಮ್ಹಣ್ ಥಾರಾಯ್ಲೆಂ.

ಅಶಿಂ ತಿಂ ಆಸ್ತಾನಾ, ಕ್ರಿಸ್ತಾಂವ್ ಕೈದ್ಯಾಂಕ್ ಹಾಡ್‍ಲ್ಲಿ, ದಗ್ದಿಲ್ಲಿ ಆನಿ ಉಪ್ರಾಂತ್ಲಿ ಖಬರ್ ತಾಣಿಂ ಆಯ್ಕಲ್ಲಿ.

ಸರ್ದಾರ್ ಸಿಮಾಂವ್ ಕಡೆನ್ ಟಿಪ್ಪು ಉಲವ್ನ್ ತೆ ಪಯ್ಸ್ ಗೆಲ್ಲ್ಯಾ ದಿಸಾಚ್ ಸಾಂಜೆರ್ ಸಾಧ್ಯಾ ಮುಸ್ಲಿಮಾಪರಿಂ ನ್ಹೆಸ್‍ಲ್ಲೆ ತೇಗ್ ಜಣ್ ಆಸ್ಮಾಬಿಚ್ಯಾ ಬಿಡಾರಾ ಸರ್ಶಿನ್ ಪಾವ್ಲೆ. ದೋಗ್ ಜಣ್ ಪಯ್ಸ್ ರಾವ್ಲೆ, ಆನಿ ತಿಸ್ರೊ ಬಿಡಾರಾಚ್ಯಾ ಬಾಗ್ಲಾರ್ ಯೇವ್ನ್ ರಾವ್ಲೊ: “ಸಲಾಮ್, ಛೋಟಾ ಮಾಜೀ…” ತಾಣೆಂ ಮಾತೆಂಗೊಳ್ ಪಾಗುರ್‌ಲ್ಲೆಂ ಶಾಲ್ ದೆಂವಯ್ಲೆಂ.

“ಸಲಾಮ್ – ಕೋಣ್?” ಆಸ್ಮಾಬಿನ್ ವಿಚಾರ್ಲೆಂ.

“ಹಾಂವ್ ಮಾಜೀ…” ಟಿಪ್ಪು ಸುಲ್ತಾನ್ ಬಾಗ್ಲಾರ್ ರಾವ್‍ಲ್ಲೊ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

ಪ್ರಕರಣ್ 23: ದೆಂವ್ಲಿಂ ರಿಸಾಲಾಂ

ಧುವೆಚೊ ನಿಚೆವ್ ಆಯ್ಕೊನ್ ಬಾಪಯ್ ಘಡ್ಬಡ್ಲೊ. ಆಪ್ಣೆಂ ಆಯ್ಕಲ್ಲ್ಯಾಂತ್ ಕಾಂಯ್ ಚೂಕ್ ಆಸಾ ಜಾವ್ಯೆತ್‍ಗೀ ಮ್ಹಣ್ ತಾಣೆಂ ಆಗ್ನೆಸ್ ಕುಂವರ್ನಿ ಕಡೆನ್ ವಿಚಾರ್ಲೆಂ.

“ವ್ಹಯ್, ಆನಾ” ಮ್ಹಣಾಲಿ ತಿ. “ಹಾಂವ್ ಪಟ್ಟಣಾಕ್ ವೆತಾಂ.”

“ಪುಣ್ ಹ್ಯಾ ವೆಳಾರ್ ವೆಚೆಂ…”

ಚಡ್ ಅಪಾಯಾಚೆಂ ನಹಿಂ ಆನಾ. ಟಿಪ್ಪುಚಿಂ ರಿಸಾಲಾಂ ಕೆನರಾಂತ್ ದೆಂವ್ತಾನಾ, ಹಾಂವ್ ಪಟ್ಟಣಾಂತ್ ಆಸ್ತೆಲಿಂ ಮ್ಹಣ್ ಕೊಣಾಯ್ಕೀ ದುಬಾವ್ ಮಾರಿಸೊ ನಾ. ನಹಿಂ ಆಸ್ತಾಂ, ಹಾಂವೆಂ ಪಟ್ಟಣಾಕ್ ವೆಚೆಂ ಪಯ್ಲೆ ಪಾವ್ಟಿಂ ಕಾಂಯ್ ನಹಿಂ.

ತೆಂಯೀ ವ್ಹಯ್. ಮಾನೆಸ್ತ್ ರಫಾಯೆಲ್ ಮಿಂಗೆಲ್ ಕಾಮತ್ ತಡೀಪಾರ್ ಜಾವ್ನ್ ತಲ್ಚೇರ್ ಆಸ್ತಾನಾ, ಕೊಡಗಾಕ್ ಆನಿ ಪಟ್ಟಣಾಕ್ ಸಬಾರ್ ಪಾವ್ಟಿಂ ತಿ ಪಾವ್‍ಲ್ಲಿ. ಥೊಡ್ಯಾ ಸ್ತ್ರೀಯಾಂಕ್ ಆನಿ ಭುರ್ಗ್ಯಾಂಕ್ ಪಟ್ಟಣಾ ಥಾವ್ನ್ ಚುಕವ್ನ್ ಭಾಯ್ರ್ ಹಾಡ್ಚೆಂ ಕಾಮ್ ತಿಣೆಂಯೀ ಕೆಲ್ಲೆಂ.

ಪಟ್ಟಣಾಂತ್ಲಿ ಆಸ್ಮಾ ಬೀಬಿ ಆನಿ ಪ್ರತ್ಯೇಕ್ ಜಾವ್ನ್ ರಾಯ್ ಕುಂವರ್ನ್ ಜಮೀಲಾಚಿ ವಳಕ್ ಆನಿ ಇಷ್ಟಾಗಾತ್ ತಿಕಾ ಜಾಲ್ಲಿ. ಪುಣ್ ಹೊ ವೇಳ್ ಚಡ್ ಅಪಾಯಾಚೊ ಮ್ಹಣ್ ತಿಚ್ಯಾ ಬಾಪಾಯ್ಕ್ ಭೊಗ್ತಾಲೆಂ.

“ಹ್ಯಾ ವೆಳಾರ್, ಪುತಾ…” ಮ್ಹಣಾಲೊ ತೊ. “ತುವೆಂ ಹೆರಾಂ ಸಾಂಗಾತಾ ಖಂಯೀ ಪಯ್ಸ್ ವೆಚೆಂ ಬರೆಂ ಮ್ಹಣ್ ಮ್ಹಾಕಾ ಭೊಗ್ತಾ.”

“ಮ್ಹಾಕಾ ಮಾಫ್ ಕರ್, ಆನಾ” ಮ್ಹಣಾಲಿ ಆಗ್ನೆಸ್ ಕುಂವರ್ನ್. “ಹ್ಯಾ ಪಾವ್ಟಿಂ, ಕಿತ್ಯಾಕ್‍ಗೀ, ಪಟ್ಟಣಾಕ್‍ಚ್ ವಚಜಾಯ್ ಮ್ಹಣ್ ಮ್ಹಜ್ಯಾ ಮತಿಂತ್ ಆಯ್ಲಾಂ. ತ್ಯಾ ಶಿವಾಯ್…” ತಿ ಚಿಕ್ಕೆ ನರ್ಗೊನ್‍ಶಿ ರಾವ್ಲಿ.

“ತ್ಯಾ ಶಿವಾಯ್, ಕಿತೆಂ ಬಾಳಾ?” ಬಾಪಾಯ್ನ್ ವಿಚಾರ್ಲೆಂ.

“ತ್ಯಾ ಶಿವಾಯ್ – ಆಮ್ಚ್ಯಾ ಸರ್ದಾರಾಚಿ ವರ್ದಿ ವಾಚುನ್ – ಹಾಂವೆಂ ತಾಚ್ಯಾ ಸರ್ಶಿನ್ ವಚಜಾಯ್ ಮ್ಹಣ್ ಮ್ಹಜೆಂ ಕಾಳಿಜ್ ಸಾಂಗ್ತಾ…”

“ತಾಚ್ಯಾ ಸರ್ಶಿನ್!” ತೊ ಪರ್ತ್ಯಾನ್ ಆಕಾಂತ್ಲೊ.

“ತಾಚ್ಯಾ ಸರ್ಶಿನ್ ಮ್ಹಳ್ಯಾರ್ ಸಕ್ಡಾಂಕ್ ದಿಸಾ ಸಾರ್ಕೆಂ ಬಗ್ಲೆನ್ ನಹಿಂ, ಆನಾ” ತಿಣೆಂ ಸಮ್ಜಯ್ಲೆಂ. “ಕಿತೆಂಯೀ ಅನಾಹುತ್ ಘಡ್ಯೆತ್ ಜಾಲ್ಲ್ಯಾ ಹ್ಯಾ ದಿಸಾಂನಿ – ತೊಯೀ ಅಸಹಾಯಕ್ ಸ್ಥಿತೆರ್ ಪಟ್ಟಣಾಂತ್ ಕೈದಿಸೊ ಜಾವ್ನ್ ಆಸ್ತಾನಾ – ಹಾಂವೆಂ ಜಾತಾ ತಿತ್ಲೆಂ ತಾಚ್ಯಾ ಲಾಗಿಂ ಆಸಜಾಯ್…”

ನಿಜಾಯ್ಕೀ ತಿಣೆಂ ತಾಚ್ಯಾ ಲಾಗಿಂ ಆಸಜಾಯ್, ನಾ ಜಾಲ್ಯಾರ್ ತಾಣಿಂ ಪರತ್ ಸಾಂಗಾತಾ ಮೆಳ್ಚೊ ಸಂಭವ್ ಘಡಸೊ ನಾ ಮ್ಹಣ್ ತಿಚೆಂ ಅಂತಸ್ಕರ್ನ್ ತಿಕಾ ಸಾಂಗ್ತಾಲೆಂ.

“ಜಾವ್ಯೆತ್ ಪುತಾ” ಮ್ಹಾತಾರ್‍ಯಾಚೊ ಸ್ವರ್ ಕಾಂಪ್ಲೊ. “ಪುಣ್ ಅಪಾಯ್ ಚಿಂತಾನಾ ಮ್ಹಜಿ ಕೂಡ್ ಕಾಂಪ್ತಾ…”

“ಆನಾ” ಧುವೆನ್ ಬಾಪಾಯ್ಕ್ ಧಯ್ರ್ ದೀಂವ್ಕ್ ಪ್ರಯತ್ನ್ ಕೆಲೆಂ. “ಬಂದಡ್ ಆರಂಭ್ ಜಾಲ್ಲ್ಯಾ ತವಳ್ ಥಾವ್ನ್ ಆಮ್ಚ್ಯಾ ಜಿವಾಚೆರ್, ಧನಾಚೆರ್ ಆನಿ ಮಾನಾಚೆರ್ ಅಪಾಯಾಂ ವಯ್ರ್ ಅಪಾಯ್ ಆಯ್ಲ್ಯಾತ್. ಎದೊಳ್ಚೆಪರಿಂಚ್ ಫುಡೆಂಯೀ ದೇವ್ ಆಮ್ಕಾಂ ರಾಕ್ತಲೊ.”

“ತಶೆಂ ಜಾಂವ್ ಪುತಾ” ಮ್ಹಣಾಲೊ ಬಾಪಯ್. ತಿಣೆಂ ಏಕ್ ನಿಚೆವ್ ಮತಿಂತ್ ಧರ್ಲ್ಯಾ ಉಪ್ರಾಂತ್ ತೊ ಬದ್ಲುಂಕ್ ಕಿತ್ಲೆಂ ದುಸ್ಸಾಧ್ಯ್ ಮ್ಹಣ್ ತಾಕಾ ಬರೆಂ ಕಳಿತ್ ಆಸ್‍ಲ್ಲೆಂ.

ವೆವೆಗ್ಳ್ಯಾ ರಸ್ತ್ಯಾಂನಿ, ವೆವೆಗ್ಳ್ಯಾ ಪ್ರದೇಶಾಂತ್ಲ್ಯಾ ಕ್ರಿಸ್ತಾಂವಾಂಕ್ ಜಾಗ್ವಣ್ ದಿಂವ್ಚೆಂ ಕಾಮ್ ಭರಾನ್ ಚಾಲು ಜಾಲ್ಲೆಪರಿಂಚ್, ಆಗ್ನೆಸ್ ಕುಂವರ್ನಿನ್ ಪಟ್ಟಣಾಕ್ ವೆಚಿ ತಯಾರಾಯ್ ಕೆಲಿ. ಮಂಗ್ಳುರಾಕ್ ಗೆಲ್ಲೆ ಸವಾರ್ ದೊನ್‍ಂಚ್ ದಿಸಾಂನಿ ಪಾಟಿಂ ಆಯ್ಲೆ. ತಾಣಿಂ ವ್ಹೆಲ್ಲ್ಯಾ ಆನಿ ಹಾಡ್‍ಲ್ಲ್ಯಾ ಖಬ್ರೆ ಪ್ರಕಾರ್, ಮಂಗ್ಳುರಾಂತ್ ಆನಿ ಭೊಂವಾರಿಂ ಆಸ್‍ಲ್ಲ್ಯಾಂಕ್ ಲಿಪಂವ್ಚಿ ಜವಾಬ್ದಾರಿ, ತಾಂಕ್ತಾ ತ್ಯಾ ಭಾಶೆನ್ ಸಾವ್ಕಾರ್ ಮಾರ್ಸೆಲ್ ಕುವೆಲಿನ್, ಗ್ರೆಗೊರ್ ತೆಲ್ಲಿಸಾನ್ ಆನಿ ದುಮ್ಗಾ ಪಿಂತಾಚ್ಯಾ ಪಂಗ್ಡಾಂತ್ಲ್ಯಾ ಮಾನಾಯಾಂನಿ ವಹ್ಸಿಲ್ಲಿ.

ಪಾಟಿಂ ಉರ್‌ಲ್ಲ್ಯಾಂ ಪಯ್ಕಿ ಭೋವ್ ಪ್ರಾಯ್ವಂತಾಂಕ್ ಆನಿ ಲ್ಹಾನಾಂಕ್ ಮಾತ್ರ್ ಘರಾಂನಿ ಸೊಡುನ್, ಹೆರಾಂಕ್ – ಪ್ರತ್ಯೇಕ್ ಕರ್ನ್ ಸ್ತ್ರೀಯಾಂಕ್ – ಪಯ್ಸ್ ವ್ಹರ್ಚೆಂ ಆನಿ ಹಿತಚಿಂತಕ್ ಮುಸ್ಲಿಮಾಂಚ್ಯಾ ವಾ ಹೆರ್ ಜಾತಿಂಚ್ಯಾ ಘರಾಂನಿ ಲಿಪಂವ್ಚಿ ವ್ಯವಸ್ಥಾ ಮಾನಿನ್ ಮೊನಿಕಾನ್, ಇಜಾಬೆಲ್ ತೆರೆಜಾನ್ ಆನಿ ಹೆರಾಂನಿ ಕರಯಿಲ್ಲಿ.

ಬಂಟ್ವಾಳ್ಚ್ಯಾ ವಠಾರಾಂತ್, ರಫಾಯೆಲ್ ಮಿಂಗೆಲ್ ಕಾಮ್ತಿಚ್ಯಾ ಘರಾಂತ್ ಮಾನೆಸ್ತ್ ಕಾಮತ್ ಅನಿ ಪ್ರಾಯ್ವಂತ್ ದಿಗು ಸೊಜ್ ಆನಿ ತಾಚಿ ಸ್ತ್ರೀ ಮಾತ್ರ್ ಉರ್ಲಿಂ. ಹೆರ್ ಸರ್ವ್ ನವ್ಕರ್ ಆನಿ ಡೊನಾ ಮರಿಯಾ ಲೂತೆಲಿಂ, ನ್ಹಂಯ್ ಉತ್ರೊನ್, ರಿಸಾಲಾಂ ವಚೊಂಕ್ ಸಾಧ್ಯ್ ನಾತ್‍ಲ್ಲ್ಯಾ ರಾನ್ವಟ್ ವಾಟೆನ್ ಲಿಪೊಂಕ್ ಗೆಲಿಂ. ರಿಸಾಲಾಂಚೆಂ ಸಂಚಲನ್, ಶಿಪಾಯಾಂಚೆ ದೊಳೆ ಚುಕಂವ್ಕ್ ಆನಿ ಗರ್ಜೆ ತೆಕಿದ್ ಸಂರಕ್ಷಣ್ ದೀಂವ್ಕ್ ಆದ್ಲೆಪರಿಂಚ್ ಮಾನಾಯ್ ಆಯ್ತೆ ಜಾಲೆ.

ಆಗ್ನೆಸ್ ಸಿಸಿಲಿಯಾ ಕುಂವರ್ನ್, ಸವಾರಾಂಚ್ಯಾಚ್ ವೆಸಾರ್, ನಾಯ್ಕ್ ಲೊರೆಸ್ ಆನಿ ನಾಯ್ಕ್ ಅಂಗರಾ ಸಾಂಗಾತಾ ಪಟ್ಟಣಾಕ್ ವಚೊಂಕ್ ಭಾಯ್ರ್ ಸರ್ಲಿ. ಆದಿಂಯೀ ಕೊಡಗಾಕ್ ವಚೊನ್ ಯೇವ್ನ್ ಆಸ್‍ಲ್ಲೊ ಅನುಭವ್ ತಿಕಾ ಆಸ್‍ಲ್ಲೊ, ಆನಿ ಭಿತರ್ಲ್ಯೊ ವಾಟೊಯೀ ಕಳಿತ್ ಆಸ್‍ಲ್ಲ್ಯೊ. ತಿಣೆಂ ಭಾಯ್ರ್ ಸರ್‌ಲ್ಲಿ ರೀತ್ ಆನಿ ತಿಚೆಂ ಧಯ್ರ್ ಪಳೆವ್ನ್ ಸವಾರಾಂಕ್ ಅಜ್ಯಾಪ್ ಜಾಲೆಂ.

“ವಾಟ್ ಭೋವ್ ಕಷ್ಟಾಂಚಿ ಆನಿ ಅಪಾಯಾಚಿ ಬಾಯೆ” ಮ್ಹಣಾಲೊ ನಾಯ್ಕ್ ಲೊರೆಸ್. “ಆಮಿ ಜಾಲ್ಯಾರ್ ದಾದ್ಲೆ…”

“ಹ್ಯಾ ಅಪಾಯಾಂಚ್ಯಾ ಕಾಳಾರ್ ಆಮಿ ಸಕ್ಕಡ್ ದಗ್ದೊಣೆಕ್ ಉಂಡಿ ಜಾಲ್ಲಿ ಏಕ್ ಜಾತ್ – ದಾದ್ಲೆ ವಾ ಸ್ತ್ರೀಯೊ ಮ್ಹಳ್ಳೊ ಬೇಧ್ ಚಿಂತುನ್ ಆಮ್ಚ್ಯಾ ಕಾಮಾಂಕ್ ಅಡ್ಕಳ್ ಯೇನಾಯೆ – ಯೆಂವ್ಚಿ ನಾ” ಮ್ಹಣಾಲಿ ಆಗ್ನೆಸ್ ಕುಂವರ್ನ್. ರಾತ್ಚೆಂ ಆಮಿ ಪಯ್ಣ್ ಕರ್ಚಿ ಗರ್ಜ್ ನಾ. ಕೊಡಗಾಕ್ ಪಾವ್ಲ್ಯಾ ಉಪ್ರಾಂತ್, ಥಂಯ್ ಥಾವ್ನ್ ತುಮಿ ಮುಖಾರ್ ವಚ್ಯೆತ್. ಹಾಂವ್ ಪಟ್ಟಣಾಕ್ ವೆಚಿ ರೀತ್ ಆನಿ ವಾಟ್ ಗುಪಿತ್ ಆಸೊಂದಿ.”

“ಜಾಯ್ತ್ ಬಾಯೆ. ಪುಣ್ ಸರ್ದಾರಾಕ್ ಆಮಿ ಕಿತೆಂ ಸಾಂಗಜಾಯ್?”

“ಹಾಂವ್ ತುಮ್ಚೆ ಸಾಂಗಾತಾ ಕೊಡಗಾಕ್ ಆಯ್ಲ್ಯಾಂ. ಉಪ್ರಾಂತ್ – ಫಾವೊ ತೊ ಸಂದರ್ಭ್ ಪಳೆವ್ನ್ ಪಟ್ಟಣಾಕ್ ಯೇಂವ್ಕ್ ಪುರೊ. ತ್ಯಾ ವಿಶ್ಯಾಂತ್ ತಾಣೆಂ ಕಾಂಯ್ ಕಾಳ್ಜಿ ಕರ್ಚಿ ನಾಕಾ ಮ್ಹಣ್ ಸಾಂಗ್ಲ್ಯಾರ್ ಪುರೊ.”

ನಾಯ್ಕ್ ಲೊರೆಸ್ ಕಬೂಲ್ ಜಾಲೊ. ಪುಣ್ ತಿಣೆಂ ಹ್ಯಾ ಜಿನ್ಸಾರ್ ಪಟ್ಟಣಾಕ್ ವೆಚ್ಯಾ ಸಾಹಸಾ ಖಾತಿರ್ ತಾಕಾ ಕಾವ್ಜೆಣಿ ಭೊಗ್ಲ್ಯಾರೀ ತಾಣೆಂ ತಿ ಭಾಯ್ಲ್ಯಾನ್ ದಾಕಂವ್ಕ್ ನಾ. ಬಹುಶಃ, ತಿಣೆಂ ಯೆಂವ್ಚ್ಯಾ ಖಾತಿರ್ ಸರ್ದಾರ್ ಸಿಮಾಂವ್ನ್ ಕಾಂಯ್ ಹಿಸೊ ದಿಲಾ ಕೊಣ್ಣಾ ಮ್ಹಣ್ ತಾಕಾ ಭೊಗ್ಲೆಂ.

ದುಸ್ರ್ಯಾ ದಿಸಾ, ದೀಸ್ ಉಜ್ವಾಡ್ಚ್ಯಾ ಆದಿಂ ಭಾಯ್ರ್ ಸರೊನ್ ತೆ ರಾವ್ಲೆ. ವಾಟೆ ಖಾತಿರ್ ಥೊಡೊ ಆಹಾರ್ ತಾಣಿಂ ಘೆತ್ಲೊ. ಆಗ್ನೆಸ್ ಕುಂವರ್ನ್‍ಯೀ ಪೇಟಾ ಭಿತರ್ ಕೇಸ್ ಲಿಪವ್ನ್ ಆನಿ ಮುಖಮಳ್ ಚಿಕ್ಕೆ ಮ್ಹೆಳವ್ನ್ ತಾರ್ ಸವಾರಾಂಪರಿಂಚ್ ನ್ಹೆಸ್‍ಲ್ಲಿ. ಸವಾರಾಂಕ್ ಭಾಯ್ರ್ ರಾವವ್ನ್ ಭಿತರ್ ತಿ ಗೆಲಿ: ಅಲ್ತಾರಿ ಮುಖಾರ್ ಮಾಗ್ಣೆಂ ಕರ್ನ್ ಬಾಪಾಯ್ಕ್ ಆದೇವ್ಸ್ ಮಾಗೊಂಕ್ ತಿ ಆಯ್ಲಿ: “ವಚೊನ್ ಯೆತಾಂ, ಆನಾ – ಖಂತ್ ಕರಿನಾಕಾ…”

“ನಾ, ಬಾಳಾ, ಖಂತ್ ಕರಿನಾ…” ತಾಚೆ ದೊಳೆ ಭಿಜ್ಲೆ. “ಹಾಂವೆಂ ಖಂತ್ ಕರ್ಚೆ ದೀಸ್ ಪಾಟಿಂ, ಆನಿ ಮ್ಹಜ್ಯಾ ಎಕ್ಸುರ್ಪಣಾಚೆ ದೀಸ್ ಫುಡೆಂ ಉರ್ಲೆ…”

“ನಾ, ಆನಾ, ಸಕ್ಕಡ್ ಸಾರ್ಕೆಂ ಜಾತೆಲೆಂ. ಪರ್ತ್ಯಾನ್ ಆಮಿ ಸಾಂಗಾತಾ ಮೆಳ್ತೆಲ್ಯಾಂವ್.”

“ಕಿತೆಂಯೀ ಜಾಂವ್ ಪುತಾ. ತುಂ – ತುಮಿಯೀ ಮ್ಹಜಿ ಖಂತ್ ಕರಿನಾಕಾತ್. ತುಜೊ ಫುಡಾರ್ – ಇತ್ಲೆಂ ಸರ್ವ್ ಭೊಗ್ಲ್ಯಾ ಉಪ್ರಾಂತ್ ಆನಿ ಘಡ್‍ಲ್ಲ್ಯಾ ಉಪ್ರಾಂತ್ ಭದ್ರ್ ಆನಿ ಶುಭ್ರ್ ಜಾಯ್ಜಯ್. ಆನಿ ತಶೆಂ ಜಾಂವ್ಕ್ ತಾಚ್ಯಾ ಬಗ್ಲೆನ್ ಮಾತ್ರ್ ಸಾಧ್ಯ್ ಮ್ಹಳ್ಳೆಂ ಜಾಣಾಂ ಪುತಾ. ನಹಿಂ ಜಾಲ್ಯಾರ್ ಹಾಂವ್ ತುಕಾ ವಚೊಂಕ್ ಬಿಲ್ಕುಲ್ ಸೊಡ್ತೊಂ ನಾ… ಆತಾಂ ವಚ್, ಬಾಳಾ!”

“ಬೆಸಾಂವ್ ದೀ, ಆನಾ…” ತಿ ಸುಸ್ಕಾರ್ಲಿ.

“ದೆವಾಚೆಂ ಬೆಸಾಂವ್, ಪುತಾ…” ತಾಣೆಂ ತಿಚ್ಯಾ ತಕ್ಲೆರ್ ಹಾತ್ ದವರ್ಲೊ ಆನಿ ತಿಚ್ಯಾ ಪೊಲ್ಯಾಚೊ ಉಮೊ ಘೆತ್ಲೊ.

ಮಾನೆಸ್ತ್ ರಫಾಯೆಲ್ ಮಿಂಗೆಲ್ ಕಾಮ್ತಿನ್ ಧುವೆ ಸಂಬಂಧಿಂ ಮ್ಹಳ್ಳಿಂ ಉತ್ರಾಂ ಸಂಪೂರ್ಣ್ ಸತ್ ಜಾವ್ನಾಸ್‍ಲ್ಲಿಂ. ನಿಜಾಯ್ಕೀ, ತಿಚೊ ಫುಡಾರ್ ಸರ್ದಾರ್ ಸಿಮಾಂವ್ಚ್ಯಾ ಬಗ್ಲೆನ್‍ಂಚ್ ಭದ್ರ್ ಆನಿ ಶುಭ್ರ್ ಮ್ಹಳ್ಳೆಂ ತಿಕಾ ಆತಾಂ ಸ್ಪಷ್ಟ್ ಜಾಲ್ಲೆಂ. ಲಗ್ಬಗ್ ಪಾಟ್ಲ್ಯಾ ತೀನ್ ವರ್ಸಾಂಚಿಂ ದೃಶ್ಯಾಂ ಪಾಟಾಪಾಟ್ ತಿಚ್ಯಾ ಮತಿಂತ್ ಪಾಶಾರ್ ಜಾಲಿಂ: ಪ್ರತ್ಯೇಕ್ ಜಾವ್ನ್ ಬಂದಡೆ ವೆಳಾರ್ ಟಿಪ್ಪುಚ್ಯಾ ಸರ್ಕಾರಾಂತ್‍ಚ್ ರಾವೊನ್ ತಾಣೆಂ ಕೆಲ್ಲಿಂ ಸಾಹಸಾಂ ಆನಿ ತ್ಯಾಗ್ ಹ್ಯಾ ದಿಸಾಂನಿ ತಾಚ್ಯಾಚ್ ಫುಡಾರಾಕ್ ಭೋವ್ ಮಾರೆಕಾರ್ ಜಾವ್ಯೆತ್ ಮ್ಹಣ್ ತಾಕಾ ಕಳಿತ್ ಜಾಲ್ಲೆಂ ಆಸ್ತಾಂಯೀ, ಹೆರಾಂಚಿಚ್ ಶಿವಾಯ್ ಸ್ವತಾಚಿ ಬಚಾವಿ ತೊ ಲೆಕಿನಾತ್‍ಲ್ಲೊ ಮ್ಹಳ್ಳೆಂ ಜಾಣಾಂ ಜಾವ್ನ್ ತಿ ಪಟ್ಟಣಾಕ್ ಭಾಯ್ರ್ ಸರ್‌ಲ್ಲಿ. ಪಟ್ಟಣಾಂತ್ ಅಸ್ವಸ್ಥ್ ವಾ ಕೈದಿ ಜಾವ್ನ್ ತೊ ಉರ್ಲಾ ಜಾಲ್ಯಾರ್, ತಾಣೆಂ ಚಿಂತ್‍ಲ್ಲಿಂ ಥೊಡಿಂ ಪುಣೀ ಕಾಮಾಂ ಆಪುಣ್ ಕರಿನ್, ಜೀವ್ ದೀನ್ – ಆನಿ ಸಾಧ್ಯ್ ಜಾಲ್ಯಾರ್ – ಟಿಪ್ಪುಚ್ಯಾ ಸರ್ಕಾರಾಂತ್ಲೊ ತಾಚೊ ಹುದ್ದೊ ಸೊಡವ್ನ್ ಪಯ್ಸ್ ತಾಕಾ ವ್ಹರಾನ್ ಮ್ಹಳ್ಳ್ಯಾ ನಿಚೆವಾಕ್ ತಿ ಪಾವ್‍ಲ್ಲಿ.

ಪಟ್ಟಣಾಕ್ ವಚೊಂಕ್, ಅವ್ಚಿತ್ ಜಾಲ್ಯಾರೀ, ತಿಣೆಂ ಚಿಂತ್‍ಲ್ಲೊ ವೇಳ್ ಆಯಿನ್ನ್ ಮ್ಹಣಜಾಯ್. ನಾ ಜಾಲ್ಯಾರ್ – ದುಸ್ರ್ಯಾ ಪಾವ್ಟಿಂ ಕೆನರಾಂತ್ ರಿಸಾಲಾಂ ದೆಂವ್‍ಲ್ಲ್ಯಾ ವೆಳಾರ್ – ತಿಚೆರ್ ವರ್ತೆಂ ಅನ್ವಾರ್ ಯೆವ್ಯೆತೆಂ. ತೆಂ ನಿವಾರ್ನ್ ಮ್ಹಳ್ಳೆಪರಿಂ ಪಾಟಿಂ ಪಡ್ಲೆಂ.

ನಿಜಾಯ್ಕೀ, 1787 ಇಸ್ವೆಂತ್, ಖಾಸ್ಗಿ ಹಟಾ ಖಾತಿರ್, ಟಿಪ್ಪು ಸುಲ್ತಾನಾಚಿಂ ರಿಸಾಲಾಂ ಕೆನರಾಚೆರ್ ದೆಂವ್‍ಲ್ಲ್ಯಾ ವೆಳಾರ್, ಪ್ರತ್ಯೇಕ್ ಜಾವ್ನ್ ಬೆಳ್ತಂಗಡಿ ಥಾವ್ನ್ ಸಕಯ್ಲ್ಯಾ ಬಂಟ್ವಾಳ್ ವಠಾರಾಂತ್ ಆನಿ ಫುಡೆಂ ಕುರಿಯೆಲ್ ಪ್ರದೇಶಾಂತ್ ಭೋವ್ ಚತ್ರಾಯೆನ್ ದಾಡ್ ಘಾಲ್ನ್ ಮೆಳ್ಳೆಲ್ಯಾಂಕ್ ಧರ್ನ್ ಹಾಡಿಜಾಯ್ ಮ್ಹಣ್ ತಾಣೆಂ ಹುಕುಮ್ ದಿಲ್ಲಿ.

ಕುರಿಯೆಲ್ ಥಾವ್ನ್ ಜಮಲಾಬಾದ್ ಆನಿ ಮಂಜರಾಬಾದ್ ಪರ್ಯಾಂತ್ ಬಂದಡೆ ವೆಳಾರ್ ಟಿಪ್ಪು ಸುಲ್ತಾನಾಚ್ಯಾ ಅಧಿಕಾರಾಕ್ ಮಾರ್ ಪಡ್‍ಲ್ಲೊ. ವಯ್ರ್ ಸಾಂಗ್‍ಲ್ಲೆಪರಿಂ ದುಸ್ರ್ಯಾ ಪಾವ್ಟಿಂ ರಿಸಾಲಾಂ ಧಾಡ್ತಾನಾ, ಬಂಟ್ವಾಳ್ಚ್ಯಾ ಮಾಗಣ್ಯಾಚೆರ್ ದೊಳೊ ದವರಿಜಾಯ್ ಮ್ಹಣ್ ತಾಣೆಂ ತಾಕಿದ್ ದಿಲ್ಲಿ. ದೋನ್ ವರ್ಸಾಂ ಆದಿಂ ಫಿಂರ್ಗಿಪೆಟೆಂತ್ ಸೆಲಿಮ್ ಖಾನಾಚ್ಯಾ ಠೊಲಿಯೆಚೊ ಪಾಡಾವ್, ಆನಿ ಥೊಡ್ಯಾಚ್ ದಿಸಾಂ ಆದಿಂ ಉಪ್ಪಿನಂಗಡಿಂತ್ ‘ಅವ್ಗಡ್’ ಜಾವ್ನ್ ತೊಪಾಸಿ ನಪಂಯ್ಚ್ ಜಾಲ್ಲೊ ಇತ್ಯಾದಿ ಸರ್ವ್ ಚಿಂತಾನಾ, ತ್ಯಾ ಘಡಿತಾಂಕ್ ಆನಿ ಬಂಟ್ವಾಳ್ಚ್ಯಾ ಕುಳ್ವಾರಾಂಕ್ ಸಂಬಂಧ್ ಆಸಾ ಮ್ಹಣ್ ತಾಕಾ ದುಬಾವ್ ಮಾರ್‌ಲ್ಲೊ. ದೆಕುನ್, ಗರ್ಜೆಚೆಂ ಥೊಡೆಂ ‘ವಿಚಾರಣ್’ ಕರ್ಚ್ಯಾ ಖಾತಿರ್ – ಫಾವೊ ತ್ಯಾ ಮರ್ಯಾದಿನ್ – ಆಗ್ನೆಸ್ ಕುಂವರ್ನಿಕ್ ಕೈದ್ ಕರ್ನ್ ಜಮಲಾಬಾದ್ ಘಡಾಂತ್ ದವರಿಜಾಯ್ ಮ್ಹಣ್ ತಾಣೆಂ ಫರ್ಮಾಯಿಲ್ಲೆಂ.

ತಶೆಂ ಜಾಯ್ತ್ ಜಾಲ್ಯಾರ್, ಸರ್ದಾರ್ ಸಿಮಾಂವ್ಕ್ ಸಾಂಗಾತಾ ಘೆವ್ನ್ ಆಪುಣ್ ತಿಚಿ ಝಡ್ತಿ ಕರ್ತಲೊಂ ಆನಿ ಸತ್ ಪಾರ್ಕಿತಲೊಂ ಮ್ಹಳ್ಳಿ ಗುಪಿತ್ ಮಾಂಡ್ಣಿ ತಾಣೆಂ ಕೆಲ್ಲಿ. ಪುಣ್ ಗಜಾಲ್ ವೆಗ್ಳಿಚ್ ಜಾಲಿ. ವಿಧಿಚೊ ಖೆಳ್ ಆನಿ ಆಮ್ಚ್ಯಾ ಥೊಡ್ಯಾ ಮಾಡ್ತಿರಾಂಚೊ ಗೋಳ್ ಬೊಲ್ತ್ಯಾಚ್ ವಾಟೆನ್ ಜಾಲೊ. ತಶೆಂ ಜರ್ ಜಾಂವ್ಕ್ ನಾತ್‍ಲ್ಲೆಂ, ತರ್ ಹಿ ಕಥಾಯೀ ಇತ್ಲ್ಯಾರ್ ಸಂಪ್ತಿ.

ಆಗ್ನೆಸ್ ಕುಂವರ್ನ್ ಆನಿ ತೆ ದೋಗ್ ಸವಾರ್ ಕೊಡಗಾಚ್ಯಾ ವಾಟೆನ್ ಭಾಯ್ರ್ ಸರೊನ್ ಗೆಲ್ಲ್ಯಾ ಚವ್ತ್ಯಾ ದಿಸಾ, ಉತ್ತರ್ ಆನಿ ದಕ್ಷಿಣ್ ಕೆನರಾಚೆರ್ ಟಿಪ್ಪುಚಿಂ ರಿಸಾಲಾಂ ದೆಂವ್ಲಿಂ. ಆದ್ಲೆಪರಿಂಚ್ ರಗತ್ ವ್ಹಾಳ್ಳೆಂ, ಘರಾಂ ಭಸ್ಮಾಲಿಂ ಆನಿ ಭಾತಾಂ-ಶೆತಾಂ ನಾಸ್ ಜಾಲಿಂ. ಪುಣ್ ಪಯ್ಲಿಚ್ ಜಾಗ್ವಣ್ ಮೆಳ್‍ಲ್ಲ್ಯಾನ್ ಚಡ್ ಆನಿ ಜಾಯ್ ಜಾಲ್ಲೆ ಕ್ರಿಸ್ತಾಂವ್, ಶಿಪಾಯಾಂಚ್ಯಾ ಹಾತಾಂತ್ ಸಾಂಪ್ಡೊಂಕ್ ನಾಂತ್. ತರೀ, ಖಾಲಿ ಹಾತಾಂನಿ ಪಾಟಿಂ ವಚೊಂಕ್ ಕಬೂಲ್ ನಾತ್‍ಲ್ಲ್ಯಾ ಶಿಪಾಯಾಂನಿ ಥೊಡಿಂ ಕ್ರೂರ್ ಕಾರ್ಬಾರಾಂ ಕೆಲಿಂ:

ನವ್ಯಾನ್‍ಂಚ್ ಆಯಿಲ್ಲ್ಯಾ ಜೆಮೆದಾರಾಂಕ್ ಆನಿ ಸುಬೆದಾರಾಂಕ್ ಕ್ರಿಸ್ತಾಂವ್ ಕೋಣ್, ಹಿಂದೂ ಕೋಣ್ ಮ್ಹಳ್ಳೆಂ ಸಮ್ಜೊಂಕ್ ಕಷ್ಟ್ ಮಾರ್ಲೆ. ದೆಕುನ್, ಮೆಳ್ಳೆಲ್ಯಾಂಕ್ ತಾಣಿಂ ಕುಡಾಯ್ಲೆಂ. ಥೊಡೆ ಕ್ರಿಸ್ತಾಂವ್, ಖಾಡಿ ಮಿಶಿ ವಾಡವ್ನ್ ಮಾಪ್ಳ್ಯಾಂಪರಿಂ ಆನಿ ಥೊಡೆ ಜಾನ್ವೆಂ ಘಾಲ್ನ್ ಭಟ್-ಬ್ರಾಹ್ಮಣಾಂಪರಿಂ ಭೊಂವ್ತಾತ್ ಮ್ಹಣ್ ತಾಂಕಾಂ ದುಬಾವ್ ಮಾರ್ಲೊ.

ಪರೀಕ್ಷಾ ಕರುಂಕ್ ಕಷ್ಟ್ ಮಾರ್ಲೆ ನಾಂತ್. ಲಜ್ ವಾ ದಾಕ್ಷೆಣ್‍ಯೀ ಭೊಗುಂಕ್ ನಾ. ಜಮಯಿಲ್ಲ್ಯಾ ಸರ್ವ್ ದಾದ್ಲ್ಯಾಂಕ್ ವಿವಸ್ತ್ರ್ ಕರ್ನ್ ತಪಾಸ್ಲೆಂ. ಸುಂತಾ ಕೆಲ್ಲೊ ಘುರ್ತ್ ಆಸ್‍ಲ್ಲ್ಯಾಂಕ್ ಸೊಡ್ಲೆಂ. ಹೆರಾಂಕ್ ತಾಂಚಿ ಜಾತ್ ಧರ್ಮ್ ಪಳೆನಾಸ್ತಾನಾ ಆಂಬುಡ್ನ್ ವ್ಹೆಲೆಂ. ತ್ಯಾ ವೆಳಾರ್, ಪಯ್ಲೆ ಪಾವ್ಟಿಂ ಪಟ್ಟಣಾಂತ್ ಪಾವೊನ್, ಜಬರ್ದಸ್ತೆನ್ ವಾ ಹೆರ್ ಕಾರಣಾಂನಿ ಸುಂತಾ ಜಾವ್ನಾಸೊನ್, ಪುಣ್ ಉಪ್ರಾಂತ್ ಚುಕವ್ನ್ ಯೇವ್ನ್ ಹಾಂಗಾಸರ್ ಮಾಪ್ಳ್ಯಾಂಪರಿಂ ಜಿಯೆವ್ನ್ ಆಸ್‍ಲ್ಲೆ ಥೊಡೆ ಜಣ್ ಬಚಾವ್ ಜಾಲೆ.

ಬಂಟ್ವಾಳ್, ರಫಾಯೆಲ್ ಮಿಂಗೆಲ್ ಕಾಮ್ತಿಗೆರ್ ಗೆಲ್ಲೆ ಶಿಪಾಯ್ ನಿರಾಶಿ ಜಾಲೆ. ಆಗ್ನೆಸ್ ಕುಂವರ್ನ್ ಥೊಡ್ಯಾ ದಿಸಾಂ ಆದಿಂ, ತಿಚ್ಯಾ ಫಿಂರ್ಗಿ ಸಾಂಗಾತಿಣಿ ಸಾಂಗಾತಾ ಗೊಂಯಾಂ ಗೆಲ್ಯಾ ಜಾವ್ಯೆತ್ ಮ್ಹಳ್ಳ್ಯಾ ಅರ್ಥಾರ್ ರಫಾಯೆಲ್ ಮಿಂಗೆಲ್ ಕಾಮತ್ ಉಲಯ್ಲೊ.

“ಹಾಂವೆಂ ಸಾಂಗ್ಚೆಂ ಪಾತ್ಯೆನಾಂತ್ ಜಾಲ್ಯಾರ್, ಮ್ಹಾಕಾಚ್ ತುಮಿ ವ್ಹರ್ಯೆತ್” ಮ್ಹಣಾಲೊ ತೊ. “ಮ್ಹಜೆ ಥಂಯ್ ಹ್ಯಾ ಆದಿಂ ದಯಾ ದಾಕಯಿಲ್ಲ್ಯಾ ಬಾದಶಹಾ ಕಡೆನ್ ಹಾಂವ್ ಉಲಯ್ತಾಂ, ಆನಿ ತಾಚ್ಯಾ ಖುಶೆಕ್ ಕಬೂಲ್ ಜಾತಾಂ…”

“ತುಜೆ ತಸಲ್ಯಾ ಬುಡ್ಡಾಂಚಿ ಆಮ್ಕಾಂ ಗರ್ಜ್ ನಾ. ತುಜ್ಯಾ ಧುವೆಕ್ ಹಾಡುಂಕ್ ಆಮ್ಕಾಂ ತಾಕಿದ್ ಆಸಾ. ಆಮಿ ಪರ್ತ್ಯಾನ್ ಯೆತೆಲ್ಯಾಂವ್ ಮ್ಹಣಾಲೊ ಸುಬೆದಾರ್, ನಂಜಿ ಹಾಸೊನ್. “ಧುವೆಕ್ ಲಿಪವ್ನ್ ತುವೆಂ ಆಮ್ಚೆ ಕಡೆನ್ ಫಟ್ ಮಾರ್ಲ್ಯಾಯ್ ಜಾಲ್ಯಾರ್ ತುಕಾಯೀ ಖಬಡ್ದಾರ್ – ಆನಿ ತುಜ್ಯಾ ಧುವೆಕ್‍ಯೀ ಖಬಡ್ದಾರ್!”

“ಜರೂರ್” ಮ್ಹಣಾಲೊ ರಫಾಯೆಲ್ ಮಿಂಗೆಲ್ ಕಾಮತ್, ಭಿತರ್ಲ್ಯಾ ಭಿತರ್ ಕಾಂಪೊನ್. “ತುಮಿ ಹಾಂಗಾಸರ್ ಪಹರೊ ದವರ್ಯೆತ್, ಆನಿ ಮ್ಹಜಿ ಧುವ್ ಯೆತಾ ಮ್ಹಣಸರ್ ರಾಕ್ಯೆತ್.”

“ತೆಂ ಆಮ್ಕಾಂ ಕಳ್‍ಲ್ಲೆಪರಿಂ ಕಿತೆಂಯೀ ಕರ್ತಾಂವ್, ಪುಣ್ ಜಾಗ್ರುತ್ – ಆಮ್ಚೆ ಕಡೆನ್ ಖೆಳನಾಕಾತ್ – ಬಾದಶಹಾಚ್ಯಾ ಕ್ರೋಧಾಕ್ ಬಲಿ ಜಾಯ್ನಾಕಾತ್” ಮ್ಹಣೊನ್, ಆಯಿಲ್ಲೆ ಗ್ರಾಯ್ಕ್ ಬೊಂಡೆ ಪಿಯೆವ್ನ್ ಪಾಟಿಂ ಗೆಲೆ.

“ಸರ್ವೆಸ್ಪರಾ ಸೊಮ್ಯಾ!” ಉಸ್ವಾಸ್ಲೊ ರಫಾಯೆಲ್ ಮಿಂಗೆಲ್ ಕಾಮತ್. “ಸನ್ನಿಹಿತ್ ಜಾಲ್ಲೆಂ ಅನ್ವಾರ್, ತುವೆಂಚ್ ವಾಟ್ ದಾಕವ್ನ್ ನಿವಾರ್ಲೆಂಯ್. ತೆ ಶಿಪಾಯ್ ಹ್ಯಾ ವಾಟೆನ್ ಆಸಾಸರ್ ಮ್ಹಜೆಂ ಚೆಡುಂ ಹಾಂಗಾಸರ್ ಪಾಟಿಂ ಯೇನಾ ಜಾಂವ್…”

ಥಂಯ್ ಥಾವ್ನ್ ಪಾಯ್ ಕಾಡ್ನ್ ಶಿಪಾಯ್ ಗೆಲ್ಲೆ ಜಾಲ್ಯಾರೀ ಥೊಡ್ಯಾ ದಿಸಾಂಕ್ ಪುಣೀ, ಯೆತಾ ಕೋಣ್, ವೆತಾ ಕೋಣ್ ಮ್ಹಳ್ಳೆಂ ಸಮ್ಜೊಂಚ್ಯಾ ಖಾತಿರ್, ಪಯ್ಸಾ-ಪಯ್ಸ್ ತಾಣಿಂ ಪಹರೊ ದವರ್‌ಲ್ಲೊ.

ಆನಿ ಬಾಪಾಯ್ಚ್ಯಾ ಮಾಗ್ಣ್ಯಾಚೊ ಫಳ್ ಮ್ಹಳ್ಳೆಪರಿಂ, ಆಗ್ನೆಸ್ ಕುಂವರ್ನ್, ಫುಡ್ಲ್ಯಾ ಥೊಡ್ಯಾ ದಿಸಾಂನಿ ನಹಿಂ, ಸಬಾರ್ ಮಹಿನ್ಯಾಂನಿ ಪಾಟಿಂ ಯೆಂವ್ಚ್ಯಾ ಸ್ಥಿತೆರ್ ನಾತ್‍ಲ್ಲಿ. ನಾಯ್ಕ್ ಲೊರೆಸ್, ನಾಯ್ಕ್ ಅಂಗರ ಆನಿ ಆಗ್ನೆಸ್ ಕುಂವರ್ನ್ ಬಂಟ್ವಾಳ್ ಥಾವ್ನ್ ಭಾಯ್ರ್ ಸರೊನ್, ಸವ್ಕಾಸಾಯೆನ್ ಪಯ್ಣ್ ಕರ್ನ್ ತಿಸ್ರ್ಯಾ ಸಕಾಳಿಂ ಕೊಡಗಾಕ್ ಪಾವ್‍ಲ್ಲಿಂ. ತ್ಯಾ ವೆಳಾರ್ ಕೊಡಗಾಂತ್ ‘ಟಿಪ್ಪುಕ್ ಬೂದ್ ಶಿಕಯ್ಲಿ’ ಮ್ಹಳ್ಳ್ಯಾ ಕಾರಣಾನ್ ದಬಾಜಾಚೆಂ ವಾತಾವರಣ್ ಆಸ್‍ಲ್ಲೆಂ. ಆಯಿಲ್ಲೆಂ ಅನ್ವಾರ್ ಬರ್‍ಯಾನ್ ನಿವಾರ್ಲೆಂ ದೆಕುನ್, ವೀರೇಂದ್ರ ರಾಜಾನ್ ಟಿಪ್ಪುಚ್ಯಾ ಶಿಪಾಯಾಂಕ್ ಕೈದಿ ಕರುಂಕ್ ನಾತ್‍ಲ್ಲೆ, ಬಗಾರ್ ತಾಣಿಂ ಜಾಯ್ ತಶೆಂ ಪಾಟಿಂ ವಚ್ಯೆತ್ ವಾ ತಲ್ಚೇರ್, ತಿರುವಾಂಕೂರ್ ವಾ ಕೆನರಾಕ್ ಪಾಟಿಂ ವಚ್ಯೆತ್ ಮ್ಹಣ್ ಕಬ್ಲಾತ್ ದಿಲಿ.

ಆಗ್ನೆಸ್ ಕುಂವರ್ನಿನ್, ಆಪ್ಲ್ಯಾ ಸಾಂಗಾತಾ ಆಯಿಲ್ಲ್ಯಾ ಸವಾರಾಂನಿ, ತಾಂಕಾಂ ಸಮ್ಜಲ್ಲ್ಯಾ ಭಾಶೆನ್ ಪಟ್ಟಣಾಕ್ ಪಾಟಿಂ ವಚ್ಯೆತ್ ಮ್ಹಣ್ ಸಾಂಗ್ಲೆಂ. ಆಪುಣ್ ಏಕ್ ದೋನ್ ದೀಸ್ ಕೊಡಗಾಂತ್ – ತವಳ್ ಥಂಯ್ಸರ್ ವಸ್ತಿ ಕರ್ನ್ ಸಾಗ್ವಳಿ ಆನಿ ತೊಟಾಚಿ ಕೃಷಿ ಕರ್ನ್ ಆಸ್‍ಲ್ಲ್ಯಾ ಮಾನೆಸ್ತ್ ಆಂತೊನ್ ವಾಸ್ ನಾಯ್ಕಾಚ್ಯಾ ಕುಟ್ಮಾ ಸಾಂಗಾತಾ – ರಾವೊನ್, ಉಪ್ರಾಂತ್ ಪಟ್ಟಣಾಕ್ ವೆತಾಂ ಮ್ಹಣ್ ಭಾಸಾಯ್ಲೆಂ. ಬಂದಡೆಂತ್ಲೆ ಚುಕವ್ನ್ ಆಯಿಲ್ಲ್ಯಾಂಕ್ ಫಾವೊ ತಿ ವಸ್ತಿ ಆನಿ ಕಾಮ್ ದಿಂವ್ಚೆಂ, ವಾ ತಾಂಕಾಂ ತಾಂಚ್ಯಾ ಮಾಲ್ಗಡ್ಯಾ ಗಾಂವಾಕ್ ಪಾಟಿಂ ವಚೊಂಕ್ ಜಾಯ್ ತಿ ಮಜತ್ ದಿಂವ್ಚಿ, ತಸಲ್ಯೊ ಜಾಯ್ತ್ಯೊ ರಾಟಾವಳಿ ಆಸ್‍ಲ್ಲೆ ದೀಸ್ ತೆ. ಕ್ರಿಸ್ತಾಂವಾಂಕ್ ಕೊಡಗಾಂತ್ ಫಾವೊ ತೊ ಮಾನ್ ಆನಿ ಪುರ್ತಿ ಸುಟ್ಕಾ ಆಸ್‍ಲ್ಲಿ.

ಆಂತೊನ್ ವಾಸ್ ನಾಯ್ಕಾಗೆರ್ ಆಸ್‍ಲ್ಲ್ಯಾ ವೆಳಾರ್ ಏಕ್ ದೋನ್ ದೀಸ್ ರಾವಜಾಯ್ ಮ್ಹಣ್ ಆಗ್ನೆಸ್ ಕುಂವರ್ನಿನ್ ಚಿಂತ್‍ಲ್ಲೆಂ ಜಾಲ್ಯಾರೀ, ತಿಕಾ ಥಂಯ್ಸರ್ ಸಗ್ಳೊ ಹಫ್ತೊ ರಾವಜಾಯ್ ಪಡ್ಲೆಂ. ತಿಣೆಂ ತಿಚ್ಯಾ ಇಷ್ಟಾಂಗೆಲ್ಯಾ ಪಾತ್ಯೆಣೆಚ್ಯಾ ಎಕಾ ಗೂಢಚಾರಾಕ್ ಪಟ್ಟಣಾಕ್ ಧಾಡ್ನ್, ಆಪುಣ್ ಥೊಡ್ಯಾ ದಿಸಾಂ ಭಿತರ್ ಯೆತಾಂ ಮ್ಹಣ್ ಆಸ್ಮಾ ಬೀಬಿಕ್ ಖಬರ್ ದಿಲ್ಲಿ. ಸದ್ದ್ಯಾಕ್ ಅಮ್ಸೊರ್ ಕರ್ಚೊ ನಾಕಾ, ಪಟ್ಟಣಾಂತ್ ಭಿರಾಂಕುಳ್ ಸಿರ್ಸಿರಿ ಆನಿ ಕಾಳಿ ಬೊಳ್ಣಿಗ್ ಪಡ್ಲ್ಯಾ, ತ್ಯಾ ಶಿವಾಯ್ ಪರಿಸ್ಥಿತಿಯೀ ಭೋವ್ ಗರಮ್ ಆಸಾ – ಬಾದಶಹಾ ದಿಸಾಕ್ ಏಕ್ ಪಿಶಿ ಹುಕುಮ್ ಜ್ಯಾರಿ ಕರ್ತಾ, ಆನಿ ತಾಕಾ ದುಬಾವ್ ಮಾರ್‌ಲ್ಲ್ಯಾ ಎಕ್ಲ್ಯಾ ಪುಣೀ ಅಧಿಕಾರಿಚೊ ದಿಸಾಕ್ ಎಕಾ ಲೆಖಾನ್ ಜೀವ್ ಕಾಡ್ತಾ ಮ್ಹಣ್ ಆಸ್ಮಾ ಬೀಬಿನ್ ಪಾಟಿಂ ಖಬರ್ ಧಾಡ್‍ಲ್ಲಿ.

ಹೆಂ ಆಯ್ಕೊನ್, ಜಾತಾ ತಿತ್ಲ್ಯಾ ವೆಗಿಂ ಪಟ್ಟಣಾಕ್ ವಚಜಾಯ್ ಮ್ಹಣ್ ಆಗ್ನೆಸ್ ಕುಂವರ್ನಿಚೊ ಅತ್ಮೊ ಚಡ್ಪಡ್ಲೊ. ಥಂಯ್ ವಚೊನ್ ಆಪ್ಣೆಂ ಕಿತೆಂ ಕರ್ಯೆತ್, ಕಶೆಂ ಕರ್ಯೆತ್ ಮ್ಹಳ್ಳೆಂ ತಿಕಾ ಕಳಿತ್ ನಾತ್‍ಲ್ಲೆಂ ಜಾಲ್ಯಾರೀ, ಸಂದಿಗ್ಧ್ ಪರಿಸ್ಥಿತೆಂತ್ ಆಪುಣ್ ಥಂಯ್ ಆಸ್ತೆಲಿಂ, ಆನಿ ಸಿನೊಲೆಚ್ಯಾ ಅರ್ಲುಕೆಚೆಂ ಅರ್ಧ್ ಪಾಟಿಂ ದಿತೆಲಿಂ ಮ್ಹಣ್ ತಿಕಾ ಭೊಗ್ತಾಲೆಂ.

ಸರ್ಕಾರಿ ಆನಿ ಖಾಸ್ಗಿ ಗೂಢಚಾರಾಂ ಮುಖಾಂತ್ರ್ ಹೆರ್ ಥೊಡ್ಯೊ ಖಬ್ರೊ ಆಯ್ಲ್ಯೊ. ರಾಯ್ ಕುಂವರ್ ಕರೀಮ್ ಖಾನಾನ್ ಆಪ್ಲ್ಯಾ ರಿಸಾಲ್ದಾರಾಂಚಿ ಆನಿ ಸರ್ದಾರಾಂಚಿ ಪಾಡ್ತ್ ಬಾಂಧುನ್ ಮೈಸೂರ್ಚೆಂ ಸಿಂಹಾಸನ್ ಆಪ್ಣಾಚೆಂ ಕರ್ನ್ ಘೆಂವ್ಕ್ ಫಿತೂರಿ ಚಲಯ್ತಾ ಮ್ಹಳ್ಳೆಂ ಟಿಪ್ಪುಕ್ ದುಬಾವ್ ಮಾರ್‌ಲ್ಲೊ, ಪುಣ್ ಕ್ರೂರ್ ಫಾರಿಕ್ಪಣ್ ಘೆಂವ್ಕ್ ಫಾವೊ ತೊ ವೇಳ್ ಯೇಂವ್ದಿ ಮ್ಹಣ್ ತೊ ರಾಕ್ತಾಲೊ..!

ಆತಾಂ ಆಪ್ಲ್ಯಾ ದೊಗಾಂ ಕುಂವರಾಂ ಶಿವಾಯ್ ಆಪ್ಣಾಚ್ಯಾಚ್ ಸಾವ್ಳೆಕ್ ಲೆಗೂನ್ ಪಾತ್ಯೆನಾತ್‍ಲ್ಲ್ಯಾ ಮನೋಗತಿಕ್ ಪಾವೊನ್, ಕ್ರೋಧಾನ್ ತೊ ಭರ್‌ಲ್ಲೊ.

ಸರ್ದಾರ್ ಸಿಮಾಂವ್ಚಿ ಭಲಾಯ್ಕಿ ಪಾಟಿಂ ಮೆಳ್‍ಲ್ಲಿ, ಪುಣ್ ಎಕಾನ್ಯೆಕಾ ನಿಬಾನ್, ಟಿಪ್ಪು ತಾಕಾ ಲಾಗಿಂಚ್ ದವರ್ನ್ ಆಸ್‍ಲ್ಲೊ, ಆನಿ ತಾಂಕ್ತಾ ತ್ಯಾ ಪರಿಂ ಹೆರಾ ಸವಾರಾಂ ಆನಿ ಸರ್ದಾರಾಂ ಸಾಂಗಾತಾ ಭೊಂವೊಂಕ್ ತಾಕಾ ಅವ್ಕಾಸ್ ದೀನಾತ್‍ಲ್ಲೊ.

ಥೊಡಿಂ ಕ್ರಿಸ್ತಾಂವ್ ಕುಟ್ಮಾಂ ಬಂದಡೆಂತ್ಲಿಂ ಚುಕೊನ್ ಧಾಂವೊಂಕ್ ಸರ್ದಾರ್ ಯೂಸುಫ್ ಆಲಿಚಿ ಸುಸ್ತ್‌ಚ್ ಕಾರಣ್ ಮ್ಹಳ್ಳೊ ದುಬಾವ್ ಟಿಪ್ಪುಕ್ ಮಾರ್‌ಲ್ಲೊ, ದೆಕುನ್ ಯೂಸುಫ್ ಆಲಿಕ್‍ಯೀ ತಾಣೆಂ ಎಕಾ ಥರಾಚ್ಯಾ ‘ಘರಾ ಬಂಧೆಂ’ತ್ ದವರ್‌ಲ್ಲೊ.

ಪುಣ್ ವಿಶೇಸ್ ಆಯ್ಲಿ ಖಬರ್ – ಕೆನರಾಂತ್ ರಿಸಾಲಾಂ ದೆಂವ್‍ಲ್ಲಿಂ! ರಾವ್ಳೆರಾಂತ್ಲ್ಯಾ ಘೊಟಾಳ್ಯಾ ಪ್ರಾಸ್, ಕ್ರಿಸ್ತಾಂವಾಂಕ್ ಚಡ್ ಖಂತಿಚಿ ಖಬರ್ ತಿ ಜಾವ್ನಾಸ್‍ಲ್ಲಿ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

ಪ್ರಕರಣ್ 22: ನಿಚೆವ್

ಜೆಮೆದಾರ್ ಅಂತುಲೊ ಪಡ್ವಳಾಕ್ ಹೆಂ ಪರ್ತ್ಯಾನ್ ನವೆಂಸಾಂವ್ ಜಾಲೆಂ.

ದೋನ್ ವೊರಾಂ ಭಿತರ್, ಸರ್ದಾರ್ ಸಿಮಾಂವ್ಚ್ಯಾ ಪಂಗ್ಡಾಂತ್ಲೆ ನಾಂವಾಡ್ದಿಕ್ ಘೊಡ್ಯಾಂ ಸವಾರ್ ಜಾವ್ನಾಸ್‍ಲ್ಲೆ ನಾಯ್ಕ್ ಮಿಂಗೆಲ್ ಆನಿ ಬೋರಣ್ಣ ತಾಚ್ಯಾ ಬಿಡಾರಾಕ್ ಆಯ್ಲೆ. ತಿತ್ಲ್ಯಾ ಭಿತರ್ ಸರ್ದಾರ್ ಸಿಮಾಂವ್ನ್ ಲ್ಹಾನ್ ಏಕ್ ವರ್ದಿ ತಯಾರ್ ಕರ್ನ್ ದವರ್‌ಲ್ಲಿ. ಟಿಪ್ಪು ಸುಲ್ತಾನಾಚೆಂ ನವೆಂ ಶಾಸನ್ ಆನಿ ತಾಂತ್ಲಿಂ ಶರ್ತಾಂ ತಾಂತುಂ ತಾಣೆಂ ವಿವರಿಲ್ಲಿಂ… “…ಕುರಿಯೆಲಾಂತ್ಲ್ಯಾ ಆಮ್ಚ್ಯಾ ಸರ್ವ್ ಮಿತ್ರಾಂಚಿ ಆನಿ ಪ್ರತ್ಯೇಕ್ ಜಾವ್ನ್ ಬಂಟ್ವಾಳಾಂತ್ ಆಸ್ಚ್ಯಾ ತುಮ್ಚಿ ಭದ್ರತಿ ದುಬಾವಾಚಿ ಆನಿ ಕಷ್ಟಾಂಚಿ ಜಾಲ್ಯಾ… ತುಕ್ಲಾಯಿಲ್ಲೆಪರಿಂ ದುಖ್‍ಲ್ಲೊ ಮೈಸೂರ್ಚೊ ವಾಗ್ ಆತಾಂ ಸಾವ್ಳಿ ಪಳೆವ್ನ್‌ಯೀ ದಾವ್ಲಿ ಮಾರ್ಚ್ಯಾ ಮನೋಗತೆಕ್ ಪಾವ್ಲಾ. ದೆಕುನ್, ಕುರಿಯೆಲಾಂತ್ಲ್ಯಾಂಕ್‍ಯೀ ಜಾಗವ್ನ್, ತುಮಿ ಸಕ್ಡಾಂನಿ ಎಕಾ ಮಹಿನ್ಯಾಚ್ಯಾ ವಾಯ್ದ್ಯಾಕ್ ಪುಣೀ ತುಮ್ಚ್ಯಾ ವಠಾರಾಂತ್ ಥಾವ್ನ್ ಪಯ್ಸ್ ಸರೊನ್ ಲಿಪಜಾಯ್. ಚಡಿತ್ ಹಾಂಗಾಸರ್ ಲಿಖುಂಕ್ ವೇಳ್ ನಾ. ಮ್ಹಾಕಾ, ಸದ್ದ್ಯಾಕ್ ಪುಣೀ ಪಟ್ಟಣ ವಾ ಟಿಪ್ಪುಚಿ ಪಾಸೊಳಿ ಸೊಡುಂಕ್ ಸಾಧ್ಯ್ ಜಾಂವ್ಚೆಂ ನಾ ಮ್ಹಣ್ ದಿಸ್ತಾ. ಸಾಧ್ಯ್ ಜಾಲ್ಲೆಂ ಜಾಲ್ಯಾರ್ ಹಾಂಗಾ ಥಾವ್ನ್ ಪಯ್ಸ್, ಪಯ್ಸ್ ವಚೊನ್ ಕೆದಿಂಚ್ ಪಾಟಿಂ ಯೇನಾಸ್ತಾನಾ ರಾವ್ಯೆತೆಂ ಮ್ಹಣ್ ಮ್ಹಾಕಾ ಭೊಗ್ತಾ…”

ನಾಯ್ಕ್ ಮಿಂಗೆಲಿಕ್ ಆನಿ ಬೋರಣ್ಣಾಕ್ ಸರ್ದಾರ್ ಸಿಮಾಂವ್ನ್ ಬಸೊಂಕ್ ಆನಿ ಫಳ್ಹಾರ್ ಘೆಂವ್ಕ್ ಸಾಂಗ್ಲೆಂ.

“ಭಲಾಯ್ಕಿ ಬರಿ ಜಾಲ್ಯಾಗೀ ಧನ್ಯಾ?” ಮಿಂಗೆಲಿನ್ ವಿಚಾರ್ಲೆಂ.

“ಭಲಾಯ್ಕಿ ಆನಿ ಥೊಡ್ಯಾ ದಿಸಾಂ ಭಿತರ್ ಬರಿ ಜಾಯ್ತ್. ತೆಂ ಆಸೊಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ತುಜೆಂ ಗಾಂವಾಂತ್ ಕೋಣ್ ಆಸಾ?” ಮಿಂಗೆಲಿಕ್ ತಾಣೆಂ ವಿಚಾರ್ಲೆಂ.

“ಮ್ಹಜಿ, ಭೋವ್ ಪ್ರಾಯ್ವಂತ್ ಆಜಿ ಎಕ್ಲಿ ಆಸ್‍ಲ್ಲಿ. ತಿ ಆತಾಂ ಆಸಾಗೀ ಗೆಲ್ಯಾ ಮ್ಹಳ್ಳಿ ಮ್ಹಾಕಾ ಖಬರ್ ನಾ.”

“ತರ್, ತುವೆಂ ಥೊಡ್ಯಾ ದಿಸಾಂಚ್ಯಾ ರಜೆರ್ ಗಾಂವಾಕ್ ವೆಚೆಂ ನೀಬ್ ಆಸಾ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಆನಿ ತುಜೆಂ ಕೋಣ್ ಗಾಂವಾಂತ್ ಆಸಾ?” ಬೋರಣ್ಣ ಬೆಳ್ಚಡ ಕಡೆನ್ ತಾಣೆಂ ವಿಚಾರ್ಲೆಂ.

ನಾಯ್ಕ್ ಬೋರಣ್ಣ ಹಾಸ್ಲೊ. ಸರ್ದಾರ್ ಸಿಮಾಂವ್ ತಾಂಕಾಂ ಕಸಲ್ಯಾ ಪುಣೀ ಕಾಮಾನ್ ಗಾಂವಾಕ್ ಧಾಡ್ತಾ ಮ್ಹಣ್ ತಾಕಾ ಸಮ್ಜಲೆಂ.

“ಮ್ಹಜಿಂ ಕೊಣೀ ನಾಂತ್ ಧನ್ಯಾ” ಮ್ಹಣಾಲೊ ತೊ. “ಪುಣ್ ಮ್ಹಜಿ ಬಾಯ್ಲ್ ಆನಿ ದೊಗಾಂ ಭುರ್ಗಿಂ ಮಾಂವಾಡ್ಯಾ ಆಸಾತ್ – ಹಾಂವ್ ಆದ್ಲೆ ಪಾವ್ಟಿಂ ಗೆಲ್ಲ್ಯಾ ವೆಳಾರ್ ಮ್ಹಜಿ ಬಾಯ್ಲ್ ಗರ್ಭೆಸ್ತ್ ಆಸ್‍ಲ್ಲಿ ಮ್ಹಣ್ ಹಾಂವ್ ಸಾಂಗೊಂಕ್ ತಯಾರ್ ಆಸಾಂ.”

“ಬರೆಂಚ್” ಸರ್ದಾರ್ ಸಿಮಾಂವ್‍ಯೀ ಹಾಸ್ಲೊ. “ತುಮಿ ದೊಗೀ ರಜೆರ್ ಗಾಂವಾಕ್ ಗೆಲ್ಯಾತ್ ಮ್ಹಣ್ ಜಾಯ್ಜಾಯ್. ತುಮ್ಚೊ ಪಾಗ್ ದಿಲಾ ಮ್ಹಣ್ ಮಾನೆಸ್ತ್ ಸಾಲ್ದೊರ್ ಪಿಂತಾ ಕಡೆನ್ ಸಾಂಗೊನ್ ಹಾಂವ್ ಬರಂವ್ಕ್ ಲಾಯ್ತಾಂ. ಆತಾಂ ಸದ್ದ್ಯಾಕ್ ಹೆಂ ಘೆಯಾತ್.”

ಬಗ್ಲೆಚ್ಯಾ ಕಂತ್ರಾಳಾಂತ್ಲೆಂ ಪೆಟುಲ್ ಉಗ್ತೆಂ ಕರ್ನ್ ತಾಂತ್ಲಿಂ ಥೊಡಿಂ ನಾಣಿಂ ಮೆಜುನ್, ವೆವೆಗ್ಳ್ಯಾ ಪಿಸ್ವೆಂನಿ ಘಾಲ್ನ್ ತಾಂಕಾಂ ತಾಣೆಂ ದಿಲಿಂ.

“ಆಮ್ಕಾಂ ಕಸಲಿ ಹುಕುಮ್ ಸರ್ದಾರಾ?” ಮಿಂಗೆಲಿನ್ ವಿಚಾರ್ಲೆಂ.

ಸರ್ದಾರಾನ್ ತಯಾರ್ ಕೆಲ್ಲಿ ವರ್ದಿ ನಾಯ್ಕ್ ಮಿಂಗೆಲಿಚ್ಯಾ ಹಾತಾಂತ್ ದಿಲಿ. ತಾಚಿ ಮ್ಹೊರ್ ಘಾಲ್ನ್ ಆಪ್ಲ್ಯಾ ಪಾಟ್ಲಾವ್ದಾರಾಂಕ್ ರಜೆರ್ ಧಾಡ್ಚಿ ಹುಕುಮ್‍ಯೀ ತಾಣೆಂ ದಿಲಿ.

“ಫಾಲ್ಯಾಂ ಸಕಾಳಿಂಚ್ ಘೊಡ್ಯಾಂಚೆರ್ ತುಮಿ ಕುರಿಯೆಲಾಚಿ ವಾಟ್ ಧರ್ನ್ ಪಯ್ಣ್ ಕರಿಜಾಯ್” ತಾಣೆಂ ಸಾಂಗ್ಲೆಂ. “ಕಿತ್ಲ್ಯಾ ತುರ್ತಾನ್ ಜಾತಾ ತಿತ್ಲ್ಯಾ ತುರ್ತಾನ್ ವೆಚೆಂ ಅಧಿಕ್ ಗರ್ಜೆಚೆಂ.”

“ಘೊಡ್ಯಾಂಚೆರ್! ಪುಣ್ ರಜೆರ್ ವೆತೆಲ್ಯಾಂನಿ ಘೊಡ್ಯಾಂಕ್ ವ್ಹರುಂಕ್ ರಜಾ ನಾ!”

“ಹಾಂವ್ ಜಾಣಾಂ” ಸರ್ದಾರ್ ಸಿಮಾಂವ್ನ್ ಸಾಂಗ್ಲೆಂ. “ಪುಣ್ ಹಾಂಗಾಸರ್ ದುಸ್ರಿ ವಾಟ್ ನಾ. ಫಾವೊ ತೆ ಉಪಾಯ್ ಸೊಧುನ್ ಅಪಾಯಾಂಕ್ ಹರ್ದೆಂ ದೀಜಾಯ್.”

“ಪುಣ್ ವಾಟ್?”

“ವಾಟ್ ಹಾಂವ್ ಸಾಂಗ್ತಾಂ. ಹಶೆಂಚೆಪರಿಂಚ್ ಸವಾರ್ ಆನಿ ಘೊಡೆ, ಶಹರಾಚ್ಯಾ ಆವರಾ ಭಾಯ್ರ್ ಕವಾಯತಿಕ್ ಫಾಲ್ಯಾಂ ಸಕಾಳಿಂ ವೆತಾನಾ ತುಮಿಂಯೀ ಬರೆ ದೋನ್ ಘೊಡೆ ಘೆವ್ನ್ ತಾಂಚ್ಯಾ ಸಾಂಗಾತಾ ಭಾಯ್ರ್ ವಚಜಾಯ್. ಹೆರಾಂಕ್ ವೆಗ್ಳೆಂ ಸೊಡುನ್, ಆಂಬ್ಯಾ ರುಕಾಂಚ್ಯಾ ವನಾ ಪಲ್ತಡಿ ಆಸ್ಚ್ಯಾ ಲ್ಹಾನ್ ಖಾಲಿ ಬಿಡಾರಾ ಬಗ್ಲೆನ್, ಜೆಮೆದಾರ್ ಅಂತುಲೊ ಪಡ್ವಳಾನ್ ಧಾಡ್‍ಲ್ಲೊ ಎಕ್ಲೊ ಮನಿಸ್ ತುಮ್ಕಾಂ ಆಮ್ಚ್ಯಾ ತಾರ್ ಸವಾರಾಂಚಿಂ ಸಮವಸ್ತ್ರಾಂ ದಿತಲೊ. ತಿಂ ಬದ್ಲುನ್ ನ್ಹೆಸೊನ್, ತುಮಿ ಕುರಿಯೆಲ್‍ಚಿ ವಾಟ್ ಧರ್ಯೆತ್. ಕವಾಯತಾಕ್ ಗೆಲ್ಲೆ ಸವಾರ್ ಪಾಟಿಂ ಯೆತಾನಾ, ತುಮಿ ತಾಂಚ್ಯಾ ಸಾಂಗಾತಾ ನಾಂತ್ ಮ್ಹಣ್ ಕೊಣಾಯ್ಕೀ ಕಳಶೆಂ ನಾ – ಕೊಡಗಾಚ್ಯಾ ಲಡಾಯೆಚಿ ಪರಿಪೂರ್ಣ್ ಖಬರ್ ನಾತ್‍ಲ್ಲ್ಯಾ ವರ್ವಿಂ ಆಮ್ಚ್ಯಾ ಘೊಡ್ಯಾಂಚೆಂ ಲೇಕ್ ಸಾರ್ಕೆಂ ದವರುಂಕ್‍ಯೀ ಸಾಧ್ಯ್ ನಾ.”

“ಸಮ್ಜಲೆಂ ಧನ್ಯಾ. ಪುಣ್ ತಾರ್ ಸವಾರಾಂಚಿ ನ್ಹೆಸಣ್ ಕಿತ್ಯಾಕ್?”

“ತಾರ್ ಸವಾರಾಂಚ್ಯಾ ನ್ಹೆಸ್ಣಾರ್ ಆಸ್ಲ್ಯಾರ್ ಭೋವ್ ತುರ್ತಾನ್ ತುಮಿ ಪಯ್ಣ್ ಕರ್ಯೆತ್, ಆನಿ ತುಮ್ಕಾಂ ಜಾಯ್ ಜಾಲ್ಲೆ ಕಡೆನ್ ವಿಶೆವಾ ಖಾತಿರ್ ವಾ ಆಹಾರಾ ಖಾತಿರ್ ರಾವ್ಯೆತ್. ಛತ್ರಾಂನಿ ವಾ ವಾಟೆಚ್ಯಾ ಠಾಣ್ಯಾಂನಿ ತುಮ್ಕಾಂ ಕೊಣೀ ಆಡಾಂವ್ಚೆ ನಾಂತ್. ಜಾಲ್ಯಾರೀ, ಠಾಣಿಂ ತುಮಿ ಪಯ್ಸ್ ಸೊಡುನ್ ಪಯ್ಣ್ ಕರ್ಚೆಂ ಬರೆಂ. ಪಾಟಿಂ ಮುಖಾರ್ ವೆಚೆ ಹೆರ್ ತಾರ್ ಸವಾರ್ ಥಂಯ್ ಕಾಂಯ್ ಆಸ್ತಿತ್ ಜಾಲ್ಯಾರ್, ಸವಾಲಾಂ ವಿಚಾರ್ತಿತ್.”

“ಆನಿ ನಿಮಾಣೆಂ ಆಮ್ಚೆಂ ಕಾಮ್ ಕಸಲೆಂ?”

“ನಿಮಾಣೆಂ ಜಾವ್ಯೆತ್, ನಹಿಂ ಜಾವ್ಯೆತ್. ಬಂಟ್ವಾಳ್ಚ್ಯಾ ಜೋಡು ಮಾರ್ಗಾರ್ ಆಸ್ಚ್ಯಾ ಠಾಣ್ಯಾಕ್ ತುಮಿ ಜರೂರ್ ವಚಜಾಯ್.”

“ಥಂಯ್ಚ್ಯಾ ಕೊತ್ವಾಲಾಚಿ ಆಮ್ಕಾಂ ವಳಕ್ ಆಸಾ.”

“ದೆಕುನ್‍ಂಚ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ತಾಕಾ ವ್ಹೊರೆವಿಂಗಡ್ ಆಪವ್ನ್ ಹಾಂವೆಂ ಧಾಡ್ಲಾ ಮ್ಹಣ್ ಸಾಂಗಜಾಯ್. ತೊ ತುಮ್ಕಾಂ ಬಂಟ್ವಾಳ್ಚ್ಯಾ ರಫಾಯೆಲ್ ಮಿಂಗೆಲ್ ಕಾಮ್ತಿಗೆರ್ ವೆಚಿ ವಾಟ್ ದಾಕಯ್ತಲೊ. ಕಾಳೊಕ್ ಜಾತಾ ಮ್ಹಣಾಸರ್ ಠಾಣ್ಯಾಂತ್ ರಾವೊನ್, ಘೊಡ್ಯಾಂಕ್ ಜಾಯ್ ಜಾಲ್ಯಾರ್ ಥಂಯ್ಚ್ ಸೊಡುನ್ ಕಾಮ್ತಿಗೆರ್ ತುಮಿ ವಚಜಾಯ್ ಆನಿ ಹಾಂವೆಂ ದಿಲ್ಲಿ ವರ್ದಿ ತಾಂಕಾಂ ಜರೂರ್ ಪಾವಯ್ಜಾಯ್.”

“ಜಾಯ್ತ್ ಸರ್ದಾರಾ. ತೊಂಡಾನ್ ಕಾಂಯ್ ಸಾಂಗೊಂಕ್ ಆಸಾವೇ?”

“ವಿಶೇಸ್ ಕಾಂಯ್ ನಾ. ಪುಣ್ ತಿಂ ಕಾಂಯ್ ಸವಾಲಾಂ ವಿಚಾರ್ತಿತ್ ತರ್, ತುಮ್ಕಾಂ ಕಳ್‍ಲ್ಲೆಪರಿಂ ಸತ್ತಿ ಜಾಪಿ ದಿಯಾ. ಪುಣ್ ಹಾಂವೆಂ ವಿಚಾರ್‌ಲ್ಲೆಪರಿಂ ಸಕ್ಡಾಂನಿ, ರಿಸಾಲಾಂ ದೆಂವ್ಚ್ಯಾ ಆದಿಂ ಲಿಪಜಾಯ್ ಆನಿ ಏಕ್ ಮಹಿನೊ ಪುಣೀ ಪಯ್ಸ್ ರಾವಜಾಯ್ ಮ್ಹಣ್ ದಾಂಬುನ್ ಸಾಂಗಾ.”

ತಶೆಂ ಹೆರ್ ಥೊಡೊ ವಿವರ್ ತಾಣೆಂ ತಾಂಕಾಂ ದಿಲೊ. ಸಾಂಗಾತಾಚ್ ತಾಣಿಂ ಮಂಜರಾಬಾದ್‍ಚಿ ವಾಟ್ ಸೊಡುನ್, ಸುಬ್ರಹ್ಮಣ್ಯಚ್ಯಾನ್ ಉಪ್ಪಿನಂಗಡಿ ವಚೊನ್ ಬಂಟ್ವಾಳ್ ಪಾಂವ್ಚೆಂ ಬರೆಂ ಮ್ಹಣ್ ತಾಣೆಂ ಸಾಂಗ್ಲೆಂ.

“ವರ್ದಿ ಆನಿ ಖಬರ್ ಪಾವಯ್ಲ್ಯಾ ಉಪ್ರಾಂತ್ ಆಮಿ ಕಿತೆಂ ಕರಿಜಾಯ್ ಧನ್ಯಾ?” ಬೋರಣ್ಣಾನ್ ವಿಚಾರ್ಲೆಂ.

“ಥಂಯ್ಸರ್ ತುಮ್ಕಾಂ ಕಿತೆಂ ಸಾಂಗ್ತಾತ್ ಪಳೆಯಾ. ತಿಚ್ ವರ್ದಿ ಕುರಿಯೆಲಾಂತ್ಲ್ಯಾ ಹೆರ್ ಕೊಣಾಯ್ಕೀ ದೀಂವ್ಕ್ ಆಸ್ಲ್ಯಾರ್ ತಾಂಚೆ ಥಾವ್ನ್ ತಿ ಜವಾಬ್ದಾರಿ ತುಮಿ ವಹಿಸುನ್ ಚತ್ರಾಯೆನ್ ತೆಂ ಕಾಮ್ ಕರಿಜಾಯ್. ತ್ಯಾ ಉಪ್ರಾಂತ್ ಜಾಲ್ಯಾರ್, ತುಮ್ಕಾಂ ಕಳ್‍ಲ್ಲೆಪರಿಂ ತುಮಿ ಪಾಟಿಂ ಯೆವ್ಯೆತ್. ಆತಾಂ ವಚೊನ್ ತುಮ್ಚಿ ತಯಾರಾಯ್ ಕರ್ಯಾ. ಹೆರ್ ಕಾಮಾಂ ಜೆಮೆದಾರ್ ಅಂತುಲೊ ಪಡ್ವಳ್ ಕರಯ್ತಲೊ.”

“ತರ್ ಆಮಿ ವೆತಾಂವ್ ಧನ್ಯಾ” ತೆ ದೊಗ್‍ಯೀ ಉಟ್ಲೆ. “ಆಮಿ ಫಾಲ್ಯಾಂ ವೆಚ್ಯಾ ಆದಿಂ ಪರ್ತ್ಯಾನ್…”

“ಮ್ಹಾಕಾ ಭೆಟ್ಚಿ ಗರ್ಜ್ ನಾ. ತುಮ್ಕಾಂ ಸಾಂಗ್‍ಲ್ಲಿಂ ಕಾಮಾಂ ಚತ್ರಾಯೆನ್ ಕರ್ಯಾ” ಮ್ಹಣೊನ್ ಸರ್ದಾರ್ ಸಿಮಾಂವ್ನ್ ತಾಂಕಾಂ ಧಾಡ್ಲೆಂ.

ನಿಯಮಿತ್ ಜಾಗ್ಯಾರ್ ಸಮವಸ್ತ್ರಾಂ ಬದ್ಲುನ್, ಭೋವ್ ವೆಗಾನ್ ತಾಣಿಂ ಪಯ್ಣ್ ಕೆಲೆಂ. ಶ್ರೀರಂಗಪಟ್ಟಣ ಥಾವ್ನ್ ಮೈಸೂರ್ ವೆಚೊ ರಸ್ತೊ ಧರ್ನ್, ತ್ಯಾ ದಿಸಾಚಿ ರಾತ್ ಯೆಂವ್ಚ್ಯಾ ಆದಿಂ ಹೊಳೆನರಸೀಪುರಾಕ್ ತೆ ಪಾವ್ಲೆ. ಥಂಯ್ಚ್ಯಾ ಎಕಾ ಸಾಧ್ಯಾ ಛತ್ರಾಂತ್ ತಾಣಿಂ ರಾತ್ ಪಾಶಾರ್ ಕೆಲಿ. ದುಸ್ರ್ಯಾ ದಿಸಾ ಫಾಂತ್ಯಾರ್‌ಚ್ ಉಟೊನ್, ಅರಕಲಗೂಡು ವೆಚ್ಯಾ ರಸ್ತ್ಯಾನ್, ಚಡುಣೆಂ ದೊನ್ಪಾರ್ ಜಾತಾನಾ ಸುಬ್ರಹ್ಮಣ್ಯ ತೆ ಪಾವ್ಲೆ. ಥಂಯ್ ಲಾಗ್ಸರ್ ತಾಣಿಂ ಥೊಡೊ ವಿಶೆವ್ ಘೆತ್ಲೊ ಆನಿ ಘೊಡ್ಯಾಂಕ್ ಥೊಡೊ ವಿಶೆವ್ ದಿಲೊ.

ಉಪ್ರಾಂತ್ ಭಾಯ್ರ್ ಸರೊನ್, ಉಪ್ಪಿನಂಗಡಿ ಪಾವ್ತಾನಾ ಕಾಳೊಕ್ ಜಾಲೊ ಜಾಲ್ಯಾರೀ, ರಸ್ತೊ ಬರೊ ಆಸ್‍ಲ್ಲ್ಯಾನ್ ಆನಿ ಘೊಡ್ಯಾಂಕ್ ರಾತಿಚ್ಯಾ ಪಯ್ಣಾಚಿ ಸವಯ್ ಆಸ್‍ಲ್ಲ್ಯಾನ್ ಪಯ್ಣ್ ತಾಣಿಂ ಮುಂದರ್ಸಿಲೆಂ. ವಾಟೆರ್ ಕಾಂಯ್ ಅವ್ಗಡ್ ವಾ ಅಡ್ಚಣಿ ನಾಸ್ತಾನಾ ರಾತಿಂಚ್ಯಾ ಸಾಡೆ-ಧಾ ವೊರಾಂಚೆರ್ ಬಂಟ್ವಾಳ್ ಠಾಣ್ಯಾಕ್ ತೆ ಪಾವ್ಲೆ. ಪಾವ್ಸ್ ನಾತ್‍ಲ್ಲೊ ಆನಿ ನ್ಹಂಯ್ತ್ ಉದಾಕ್ ದೆಂವ್‍ಲ್ಲೆಂ ಜಾಲ್ಲೆ ವರ್ವಿಂ ಉಬಾರ್ ನ್ಹಂಯ್ಚ್ಯಾ ಕಡ್ವಾರ್‍ಯೀ ಘೊಡ್ಯಾಂಚೆರ್ ಅಲ್ತಡಿ ತೆ ಸಕ್‍ಲ್ಲೆ.

ವಾಟೆರ್ ಕಾಂಯ್ ಅವ್ಗಡ್ ಘಡೊಂಕ್ ನಾತ್‍ಲ್ಲೆಂ ಖರೆಂ. ಪುಣ್ ಅವ್ಗಡ್ ಘಡನಾತ್ಲ್ಯಾರೀ, ತಾಂಚ್ಯಾ ಪಯ್ಣಾಚ್ಯಾ ಉದ್ದೇಶಾ ವರ್ವಿಂ ಸರ್ದಾರ್ ಸಿಮಾಂವ್ನ್ ಕಿತ್ಲಿ ಭಯಾನಕ್ ಜವಾಬ್ದಾರಿ ಘೆತ್‍ಲ್ಲಿ ಮ್ಹಳ್ಳೆಂ ತಾಂಕಾಂ ಕಳಿತ್ ನಾತ್‍ಲ್ಲೆಂ. ಜರ್‌ತರ್ ಬಂಟ್ವಾಳಾಕ್ ಪಾಂವ್ಚ್ಯಾ ಆದಿಂ ಟಿಪ್ಪುಚ್ಯಾ ಹೆರ್ ಶಿಪಾಯಾಂ ವಾ ದಲಾಲಿಂಚ್ಯಾ ಹಾತಾಂತ್ ವರ್ದಿ ಪಡ್‍ಲ್ಲಿ ಜಾಲ್ಯಾರ್, ತಾಂಕಾಂ ಚಿತ್ರ್‌ಹಿಂಸೆಚೆಂ ಮರಣ್ ಲಾಭ್ತೆಂ, ಆನಿ ಸರ್ದಾರ್ ಸಿಮಾಂವ್ಚಿ ಕಾಣಿ ಸಂಪ್ತಿ.

ನಿಜಾಯ್ಕೀ, ತಿ ವರ್ದಿ ಆನಿ ಕೊಣೆಂ ತಿ ಧಾಡ್‍ಲ್ಲಿ ಮ್ಹಳ್ಳಿ ಖಬರ್ ಪುಣೀ ಟಿಪ್ಪು ಸುಲ್ತಾನಾಚ್ಯಾ ಕಾನಾರ್ ಪಡ್‍ಲ್ಲಿ ಜಾಲ್ಯಾರ್, ಸರ್ದಾರ್ ಸಿಮಾಂವ್ಕ್ ಕಸಲೆಂ ಭಿರಾಂಕುಳ್ ಮೋರ್ನ್ ಜಾಲ್ಯಾರೀ ದೀಂವ್ಕ್ ತೊ ಪಾಟಿಂ ಸರ್ತೊ ನಾ ಮ್ಹಣ್ ಸರ್ದಾರ್ ಸಿಮಾಂವ್ಕ್ ಬರೆಂ ಕಳಿತ್ ಆಸ್‍ಲ್ಲೆಂ. (ತ್ಯಾ ಆದ್ಲ್ಯಾಚ್ ದೋನ್ ವರ್ಸಾಂ ಆದಿಂ, ತಿರುಮಲರಾಯಾಚ್ಯಾ ಆನಿ ರಾವ್ಳೆರಾಂತ್ ಸರ್ಕಾರಿ ಟಪ್ಪಾಲಾಚೊ ಆನಿ ಪೊಲಿಸಾಂಚೊ ಮಂತ್ರಿ ಜಾವ್ನಾಸ್‍ಲ್ಲ್ಯಾ ಶಾಮಯ್ಯ ಮ್ಹಳ್ಳ್ಯಾಚೆ ಗುರ್ಕಾರ್ಗೆ ಖಾಲ್, ಟಿಪ್ಪುಚೆರ್ ಉಪ್ರಾಟೊನ್ ಪಾಟ್ ಭಿತರ್ ಘಾಲ್ನ್ ಲಕ್ಷ್ಮಮ್ಮಣ್ಣಿ ರಾಣಿಯೆಚ್ಯಾ ಪುತಾಕ್ ದಿಂವ್ಚಿ ಫಿತೂರಿ ಭಾಯ್ರ್ ಪಡ್‍ಲ್ಲ್ಯಾ ವೆಳಾರ್, ಶಾಮಯ್ಯ ಆನಿ ಹೆರ್ ಸಬಾರ್ ಜಣಾಂಕ್ ಹಸ್ತಿಂಚ್ಯಾ ಪಾಯಾಂ ಥಳಾ ಭಾಕ್ರಿ ಕರ್ನ್ ಟಿಪ್ಪುನ್ ಮಾರಯಿಲ್ಲೆಂ. ತಾಂತುಂ, ಸರ್ದಾರ್ ಸಿಮಾಂವ್ಚೊ ನಹಿಂ, ಪುಣ್ ಹೆರ್ ಸಬಾರ್ ಕ್ರಿಸ್ತಾಂವಾಂಚೊ ಹಾತ್ ಆಸ್‍ಲ್ಲೊ ತೆಂ ಟಿಪ್ಪುಕ್ ಕಳಿತ್ ಆಸ್‍ಲ್ಲೆಂ.

ಹೆಂ ಸರ್ವ್ ಜಾಣಾಂಸೊನ್‍ಯೀ, ಸರ್ದಾರ್ ಸಿಮಾಂವ್ನ್ ವಯ್ಲಿ ವರ್ದಿ ಧಾಡ್ಚೆಂ ಸಾಹಸ್ ಕೆಲ್ಲೆಂ. ತೆಂ ಸಾಹಸ್ ಸಲ್ವಲ್ಯಾರ್ ನಹಿಂಚ್ ಆಪ್ಣಾಚೊ ಬಗಾರ್ ಸಬಾರ್ ಕ್ರಿಸ್ತಾಂವಾಂಚೊ ಆನಿ ಪ್ರತ್ಯೇಕ್ ಜಾವ್ನ್ ಬಂಟ್ವಾಳ್ಚ್ಯಾ ಘರಾಣ್ಯಾಚೊ ಸಂಹಾರ್ ಜಾತಲೊ ಮ್ಹಳ್ಳೆಂಯೀ ತಾಕಾ ಕಳಿತ್ ಆಸ್‍ಲ್ಲೆಂ. ಪುಣ್ ದುಸ್ರಿ ವಾಟ್ ತಾಕಾ ನಾತ್‍ಲ್ಲಿ. ಭಾಗೆವಂತ್ ಖುರ್ಸಾಚೆರ್ ಆನಿ ಭಾಗೆವಂತ್ ಕುಟ್ಮಾಚೆರ್ ಭರ್ವಸೊ ದವರ್ನ್, ಚಿಲ್ಲರ್ ಮ್ಹಣ್ ದಿಸ್ಚೆಂ, ಪುಣ್ ನಿಜಾಯ್ಕೀ ವರ್ತೆಂ ಸಾಹಸ್ ತಾಣೆಂ ಹಾತಿಂ ಘೆತ್‍ಲ್ಲೆಂ.

ತ್ಯಾ ವರ್ವಿಂ ಜಾವ್ಯೆತ್, ತಾಚೆ ಸವಾರ್, ಶಾಬಿತಾಯೆನ್ ಬಂಟ್ವಾಳ್ ಪಾವ್ಲೆ. ರಾತಿಂ ಉಟೊನ್ ಕೊತ್ವಾಲ್ ದೇಜಪ್ಪ ಶೆಟ್ಟಿ ತಾಂಕಾಂ ಭೆಟ್ಲೊ ಆನಿ ವಳ್ಕಲೊ. ತೆ ಆಯಿಲ್ಲೆಂ ಕಾರಣ್ ತಾಣೆಂ ಸಮ್ಜೊನ್ ಘೆತ್ಲೆಂ.

“ಆತಾಂ ರಾತ್ ಚಡ್ ಜಾಂವ್ಕ್ ನಾ” ಮ್ಹಣಾಲೊ ತೊ. “ತುಮ್ಚೆ ಘೊಡೆ ಹಾಂಗಾಸರ್ ಆಸೊಂದಿತ್. ವಾಟ್ ದಾಕಂವ್ಕ್ ಹಾಂವ್‍ಂಚ್ ಯೆತಾಂ” ಮ್ಹಣೊನ್ ತೊ ಭಾಯ್ರ್ ಸರ್ಲೊಚ್.

ಅರ್ಧ್ಯಾ ವೊರಾ ಭಿತರ್ ರಫಾಯೆಲ್ ಮಿಂಗೆಲ್ ಕಾಮ್ತಿಗೆಲ್ಯಾ ಘರಾ ಸಾಮ್ಕಾರ್ ತೆ ಪಾವ್ಲೆ. ಪೆಟೆ ಘೊಂಕ್ತಚ್, ಫುಡ್ಲೆಂ ದಾರ್ ಉಗ್ತೆಂ ಜಾಲೆಂ. ಬಗ್ಲೆಚ್ಯಾ ಚೌಕೆಂತ್ ಉಜ್ವಾಡ್ ದಿಸೊಂಕ್ ನಾ ಜಾಲ್ಯಾರೀ, ಥಂಯ್ಸರ್ ನಿದ್ಚಿ ತಯಾರಾಯ್ ಕರ್ನ್ ಆಸ್‍ಲ್ಲೆ ಮಾನಾಯ್ ಸಗ್ಳೆ ಜಾಗ್ರುತ್ ಜಾಲೆ ಮ್ಹಣ್ಚ್ಯಾಕ್ ದುಬಾವ್ ನಾ.

“ಕೋಣ್ ಥಂಯ್?” ರಫಾಯೆಲ್ ಮಿಂಗೆಲ್ ಕಾಮ್ತಿನ್ ಹುಡ್ಕಿಲೆಂ.

“ಆಮಿ, ಕಾಮ್ತಿಂನೊ” ಮ್ಹಣಾಲೊ ದೇಜಪ್ಪ ಶೆಟ್ಟಿ.

ತಾಚೊ ಸ್ವರ್, ಭಿತರ್ ಆಸ್‍ಲ್ಲ್ಯಾಂಕ್ ಸಮ್ಜಲೊ. ಪೆಟ್ಯಾಂಕ್ ಆಪವ್ನ್ ತಾಣಿಂ ಥಾಂಬಯ್ಲೆಂ. ಶೆಟ್ಟಿ ಆನಿ ಸಾಂಗಾತಿ ಫುಡೆಂ ಸರೊನ್ ಮೆಟಾಂ ಚಡ್ಲೆ. ತಿತ್ಲ್ಯಾರ್ ಆಗ್ನೆಸ್ ಕುಂವರ್ನ್‍ಯೀ ದಿವೊ ಘೆವ್ನ್ ಹುಂಬ್ರಾರ್ ಆಯ್ಲಿ.

“ಕಿತೆಂ ವಿಶೇಸ್?”

“ಕಾಂಯ್ ನಾ. ಹೆ ಸವಾರ್ ಪಟ್ಟಣಾ ಥಾವ್ನ್ – ಸರ್ದಾರಾ ಥಾವ್ನ್ – ಆಯ್ಲ್ಯಾತ್. ತಾಣಿಂ ಏಕ್ ವರ್ದಿ ಹಾಡ್ಲ್ಯಾ. ಜರೂರ್ ಖಂಯ್” ಶೆಟ್ಟಿನ್ ಸಾಂಗ್ಲೆಂ. “ತಾಂಕಾಂ ವಾಟ್ ದಾಕಯ್ತಾಂ ಮ್ಹಣ್ ಆಯ್ಲೊಂ ಹಾಂವ್.”

“ಬಸಾ, ಬಸಾ” ಮ್ಹಣಾಲೊ ರಫಾಯೆಲ್ ಮಿಂಗೆಲ್ ಕಾಮತ್. ತ್ಯಾ ಪ್ರಾಯ್ವಂತ್ ಮಾನೆಸ್ತಾಚೊ ಸ್ವರ್ ಚಿಕ್ಕೆ ಕಾಂಪ್ಲೊ. ಸರ್ದಾರ್ ಸಿಮಾಂವ್ಚ್ಯಾ ಖಬ್ರೆಕ್ ತಾಚಿ ಧುವ್ ಅತ್ರೆಗ್ತಾಲಿ ಮ್ಹಣ್ ತ್ಯಾ ಬಾಪಾಯ್ಕ್ ಕಳಿತ್ ಆಸ್‍ಲ್ಲೆಂ.

ಆಯಿಲ್ಲೆ ಗ್ರಾಯ್ಕ್ ಬಸ್ಲೆ. ನಾಯ್ಕ್ ಮಿಂಗೆಲಿನ್ ಘಾಮ್ ಪುಸ್ಲೊ. ಅತರ್ವಣಾಂನಿ ಮ್ಹಳ್ಳೆಪರಿಂ ತಾಚ್ಯಾ ಹಾತಾಂತ್, ಸರ್ದಾರ್ ಸಿಮಾಂವ್ನ್ ಧಾಡ್‍ಲ್ಲ್ಯಾ ವರ್ದೆಚಿ ಸುರುಳಿ ದಿಸ್ಲಿ. ಆಗ್ನೆಸ್ ಕುಂವರ್ನಿಕ್ ತಾಣೆಂ ತಿ ಮುಖಾರ್ ಧರ್ಲಿ. ಸುಮಾರ್ ತೀನ್ ವರ್ಸಾಂ ಆದಿಂ, ಸರ್ದಾರ್ ಸಿಮಾಂವ್ಚ್ಯಾ ಆನಿ ಸರ್ದಾರ್ ಆಂತೊನ್ ಶೆಟಿಚ್ಯಾ ಸಂಬಂಧಾಂತ್ ತಿಚಿ ಖಬರ್ ತಾಣೆಂ ಆಯ್ಕಲ್ಲಿ. ಆಜ್ ತಿಕಾ, ದಿವ್ಯಾಚ್ಯಾ ಉಜ್ವಾಡಾಂತ್ ತರೀ, ದೆಖ್ತಚ್ ತಿಚಿ ಸೊಭಾಯ್ ಆನಿ ಸುಲಕ್ಷಣ್ – ಕಿತ್ಯಾಕ್‍ಗೀ, ತಾಚ್ಯಾ ಧನಿಯಾಚ್ಯಾ ಬಗ್ಲೆನ್ ಸೊಭೊಂಕ್ ಯೋಗ್ಯ್ ಆಸ್‍ಲ್ಲಿ ಮಾನಿನ್ ತಿಚ್ ಮ್ಹಣ್ ತಾಕಾ ಭೊಗ್ಲೆಂ. ಆಗ್ನೆಸ್ ಕುಂವರ್ನಿನ್, ಸರ್ದಾರಾಚಿ ವರ್ದಿ, ದಿವ್ಯಾಚ್ಯಾ ಉಜ್ವಾಡಾ ಪಂದಾಕ್ ಮೌನ್‍ಪಣಿಂ ವಾಚ್ಲಿ. ತಿಚೆ ದೊಳೆ ಪ್ರಜಳ್ಳೆ ಆನಿ ತಿಚೆ ಪೊಲೆ ವರ್ಣಲ್ಲೆ ತಿಚ್ಯಾ ಬಾಪಾಯ್ಕ್ ಸಮ್ಜಲೆಂ.

“ಕಿತೆಂ ಖಬರ್ ಪುತಾ?” ವಿಚಾರ್ಲೆಂ ತಾಣೆಂ. ಕೊತ್ವಾಲ್ ದೇಜಪ್ಪ ಶೆಟ್ಟಿಚ್ಯಾ ತೊಂಡಾರ್‌ಯೀ ತಿಚ್ ಆತುರಾಯ್ ಖೊರ್ಜುತಾಲಿ.

ವರ್ದಿ ಆಸಾ ತಶಿ ತಿಣೆಂ ವಾಚುನ್ ಸಾಂಗ್ಲಿ. ಪುಣ್ ಆತಾಂ, ವಾಚುನ್ ಆಖೇರ್ ಕರ್ಚ್ಯಾ ಆದಿಂ ತಿಚೆ ದೊಳೆಯೀ ಚಿಕ್ಕೆ ಭಿಜ್ಲೆ.

“ಮ್ಹಜ್ಯಾ ಮಿನಿನ್ ಜೆಜು!” ಉದ್ಗಾರ್ಲೊ ರಫಾಯೆಲ್ ಮಿಂಗೆಲ್ ಕಾಮತ್. “ಹ್ಯಾ ಖರ್ಗಾಚಿ ಕರಂದಾಯ್ ಕೆದಾಳಾ ಆಖೇರ್ ಜಾಯ್ತ್?”

“ಸಿಂತಿಮೆಂತ್ ಉಚಾರುಂಕ್ ಆತಾಂ ವೇಳ್ ನಹಿಂ, ಆನಾ” ಮ್ಹಣಾಲಿ ತಾಚಿ ಧುವ್. “ಆತಾಂ ಗರ್ಜ್ ಆಮಿ, ತಾಣೆಂ ಸಾಂಗ್‍ಲ್ಲೆಪರಿಂ ಕಾರ್ಯಾಕ್ ದೆಂವ್ಚೆಂ. ಹಿ ಖಬರ್, ಮಂಗ್ಳುರಾಂತ್ಲ್ಯಾ ಆಮ್ಚ್ಯಾ ಭಾಂವ್ಡಾಂಕ್ ಜಾತಾ ತಿತ್ಲ್ಯಾ ವೆಗಿಂ ಪಾವಿತ್ ಕರುಂಕ್ ಹಾಂವೆಂಚ್ ವಚಜಾಯ್.”

“ಕಿತ್ಯಾಕ್?” ವಿಚಾರ್ಲೆಂ ಶೆಟ್ಟಿನ್. “ವರ್ದಿ ಧಾಡ್ಚೆಂ ಕಾಮ್ ಆಮಿಯೀ ಕರವ್ಯೆತ್.”

“ತೆಂಯೀ ವ್ಹಯ್” ಮ್ಹಣಾಲೊ ನಾಯ್ಕ್ ಬೋರಣ್ಣ. “ವರ್ದಿ ಹಾಂಗಾ ಥಾವ್ನ್ ಹೆರ್ ಕಡೆನ್ ಪಾವಂವ್ಕ್ ಆಸ್ಲ್ಯಾರ್…”

“ಪಾವಂವ್ಕ್ ಆಸ್ಲ್ಯಾರ್?”

“ತೆಂ ಕಾಮ್ – ತುಮ್ಚ್ಯಾ ಅಪೇಕ್ಷೆ ಪರ್ಮಾಣೆಂ ಆಮಿಂಚ್ ಕರಿಜಾಯ್ ಮ್ಹಣ್ ಸರ್ದಾರಾನ್ ಹುಕುಮ್ ದಿಲ್ಯಾ” ಮಣಾಲೊ ನಾಯ್ಕ್ ಮಿಂಗೆಲ್.

“ತೆಂ ತುಮ್ಚೆ ವರ್ವಿಂ ಜಾಯ್ತ್‌ಗೀ??” ಆಗ್ನೆಸ್ ಕುಂವರ್ನಿನ್ ವಿಚಾರ್ಲೆಂ.

“ಜರೂರ್ ಜಾಯ್ತ್, ಆನಿ ಜಾಯ್ಜಯಿಚ್. ಆಮ್ಕಾಂ ಖಂಯ್ ಆನಿ ಕಿತೆಂ ಮ್ಹಣ್ ಸಾಂಗ್ಲ್ಯಾರ್ ಜಾಲೆಂ. ಆಮ್ಚ್ಯಾ ಸರ್ದಾರಾ ಖಾತಿರ್ ತಸಲಿಂ ಕಾಮಾಂ ಕರ್ನ್ ಆಮಿ ಹೆಳ್ಳ್ಯಾಂವ್” ದರ್ಬಾರ್ ಉಲಯ್ಲೊ ನಾಯ್ಕ್ ಮಿಂಗೆಲ್.

“ತೆಂಯೀ ಬರೆಂಚ್” ಸಮಾಧಾನ್ ಉಚಾರ್ಲೆಂ ಆಗ್ನೆಸ್ ಕುಂವರ್ನಿನ್. “ಮಂಗ್ಳುರಾಕ್ ಹಿ ವರ್ದಿ – ಹಾಂವೆಂ ದಿಂವ್ಚ್ಯಾ ವರ್ದೆ ಸಾಂಗಾತಾ – ತುಮಿ ಪಾವಯ್ಶ್ಯಾತ್ ಜಾಲ್ಯಾರ್, ಹ್ಯಾ ವಠಾರಾಂತ್, ಆನಿ ಒಮ್ಜೂರ್ ಥಾವ್ನ್ ಕಾರ್ವಾರ್ ಪರ್ಯಾಂತ್‍ಯೀ ಖಬರ್ ದೀಂವ್ಕ್ ಆಮ್ಕಾಂ ಪುರ್ಸತ್ ಮೆಳ್ತಾ.

“ಹೆಣೆಂಚ್ಯಾ ಹೆರ್ ಥೊಡ್ಯಾ ಕುಳ್ವಾರಾಂಕ್ ಖಬರ್ ದಿಂವ್ಚಿ ಜವಾಬ್ದಾರಿ ಹಾಂವ್ ವಹ್ಸಿತಾಂ” ದೇಜಪ್ಪ ಶೆಟ್ಟಿನ್ ಉರ್ಬಾ ದಿಲಿ.

ತಶೆಂ ಎಕಾ ಒಪ್ಪಂದಾಕ್ ತಿಂ ಆಯ್ಲಿಂ: ದೇಜಪ್ಪ ಶೆಟ್ಟಿ ಠಾಣ್ಯಾಕ್ ಗೆಲೊ. ಸವಾರ್ ರಾವ್ಲೆ. ತಾಣಿಂ ಕೊಡಗಾಚ್ಯಾ ಲಡಾಯೆಚೊ ವಿವರ್‌ಯೀ ದಿಲೊ.

ತ್ಯಾಚ್ ರಾತಿಂ ಆಗ್ನೆಸ್ ಕುಂವರ್ನಿನ್ – ಕೊಣಾಕ್ ಆನಿ ಕೊಣಾ ಥಾವ್ನ್ ಮ್ಹಳ್ಳೆಂ ಕಳಯ್ನಾಸ್ತಾಂ – ದೋನ್ ಪತ್ರಾಂ ಬರಯ್ಲಿಂ. ತಾಂತ್ಲೆಂ ಏಕ್ ಕೊಡಿಯಾಳ್‍ಬೈಲ್ ಆನಿ ದುಸ್ರೆಂ ಕಾವೂರ್ ದೀಜಾಯ್ ಆನಿ ಹೆರ್ ವಿವರ್ ತೊಂಡ್ಪಾಶಿಂ ದೀಜಾಯ್ ಮ್ಹಣ್ ಫರ್ಮಾವ್ನ್ ಸವಾರಾಂಕ್ ದುಸ್ರ್ಯಾ ದಿಸಾ ಸಕಾಳಿಂ ಧಾಡ್ಲೆಂ. ಸವಾರ್ ಕುರಿಯೆಲಾಕ್ ಗೆಲ್ಲೆಪರಿಂಚ್, ಬಂಟ್ವಾಳ್ಚೆ ಥೊಡೆ ಮಾನಾಯ್ ಆನಿ ದೇಜಪ್ಪ ಶೆಟ್ಟಿಚೆ ಥೊಡೆ ಜಣ್, ತೊಂಡ್ಪಾಶಿಂ ವರ್ದಿ ಘೆವ್ನ್ ಚಾರಾಂಯೀ ಕುಶಿಂನಿ ಗೆಲೆ. ಉಪ್ರಾಂತ್ ರಫಾಯೆಲ್ ಮಿಂಗೆಲ್ ಕಾಮತ್ ಆನಿ ಧುವ್ ತಾಂಚ್ಯಾ ಫುಡಾರಾಚಿ ಮಾಂಡಾವಳ್ ಚಿಂತುನ್ ಉಲಂವ್ಕ್ ಬಸ್ಲಿಂ. ಖಬರ್ ದಿಲ್ಲಿಂ ಸರ್ವ್ ಕುಳ್ವಾರಾಂ ಆಪಾಪ್ಲಿ ಬುದ್ವಂತ್ಕಾಯ್ ಖರ್ಚುನ್ ಪಯ್ಸ್ ರಾವ್ತೆಲಿಂ ವಾ ಲಿಪ್ತೆಲಿಂ ಮ್ಹಳ್ಳೆಂ ತಾಂಕಾಂ ಕಳಿತ್ ಆಸ್‍ಲ್ಲೆಂ.

“ಹಾಂವ್ ಮಾತ್ರ್ ಹಾಂಗಾಚೊ ಹಾಲಾಸೊಂ ನಾ, ಪುತಾ” ಮ್ಹಣಾಲೊ ಕಾಮತ್. “ಕಸೊಯೀ ಹಾಂವ್ ನ್ಹಂಯ್ಕ್ ಬಾಗ್ವಾಲ್ಲೊ ಮ್ಹಾತಾರೊ ರೂಕ್ ಜಾಲಾಂ. ರಿಸಾಲಾಂ ಲಾಗಿಂ ಪಾಂವ್ಚ್ಯಾ ವೆಳಾರ್ ತುವೆಂ ಆನಿ ಹ್ಯಾ ಕುಳ್ವಾರಾಂತ್ ಆಸ್ಚ್ಯಾ ಸರ್ವ್ ಕ್ರಿಸ್ತಾಂವಾಂನಿ ಪಾಟ್ಲಿ ನ್ಹಂಯ್ ಉತ್ರೊನ್ ಲಿಪ್ಯೆತ್.”

“ತುಜಿ ಖುಶಿ ಆನಾ. ಹೆರಾಂನಿಯೀ ತಶೆಂ ಕರ್ಯೆತ್. ಪುಣ್ ಹಾಂವ್ ಮಾತ್ರ್ ಹಾಂಗಾ ರಾವನಾ. ಬೆಜಾರ್ ಕರಿನಾಕಾ ಆನಾ, ತುವೆಂ ಮ್ಹಾಕಾ ರಜಾ ದೀಜಾಯ್” ಮ್ಹಣಾಲಿ ತಿ. “ಕೊಡಗಾಚಿ ಲಡಾಯ್ ಆನಿ ಉಪ್ರಾಂತ್ಲಿ ಖಬರ್ ಸಗ್ಳಿ ತುವೆಂ ಆಯ್ಕಲ್ಯಾಯ್.

“ವ್ಹಯ್ ಪುತಾ. ಸರ್ದಾರ್ ಸಿಮಾಂವ್ ಕಠಿಣ್ ಘಾಯೆವ್ನ್ ಭಿತರ್ ಪಡ್ಲಾ ಮ್ಹಳ್ಳಿ ಗಜಾಲ್ ದುಖಾಚಿ. ತಾಣೆಂ ತ್ಯಾ ಟಿಪ್ಪುಚೊ ಜೀವ್ ಕಿತ್ಯಾಕ್ ಉರಯ್ಲೊಗೀ ಮ್ಹಣ್ತಾಂ ಹಾಂವ್!”

“ತಶೆಂ ಮ್ಹಣೊನ್ ಪ್ರಯೋಜನ್ ನಾ ಆನಾ. ತಾಣೆಂ ತಶೆಂ ಕೆಲ್ಲ್ಯಾ ವರ್ವಿಂ ಟಿಪ್ಪುಚೊ ದುಬಾವ್ ತಡ್ವುನ್ ಧರ್ಲಾ. ತ್ಯಾ ಶಿವಾಯ್” ಮ್ಹಣಾಲಿ ತಿ ಅಭಿಮಾನಾನ್. “ಪ್ರತ್ಯಕ್ಷ್ ಕಾಯ್ದೊ ಪಾಳ್ಚೊ, ಆನಿ ಸಾರ್ಕೆಂ ಆಸ್‍ಲ್ಲೆಂ ಕರ್ಚೊ ವೀರ್ ಸರ್ದಾರ್ ತೊ. ತರೀ, ಮ್ಹಜೆಂ ಮನ್ ಕಾಂತಯ್ತಾ.”

“ಕಿತ್ಯಾಕ್ ಪುತಾ?”

“ತಾಚ್ಯಾ ವರ್ದೆಂತ್ ಅರ್ಥ್ ಜಾತಾ – (ಮ್ಹಜೆಂ ಕಾಳಿಜ್ ಕೊಸಳ್ತಾ) ಖರೊಚ್, ತೊ ಪಟ್ಟಣಾಂತ್ ಕೈದಿ ಜಾವ್ನಾಸಾ. ತಾಕಾ ಥಂಯ್ ಥಾವ್ನ್ ಭಾಯ್ರ್ ಹಾಡುಂಕ್ ಆಮಿ ಪ್ರಯತ್ನ್ ಕರಿಜಾಯ್.”

“ಜಾವ್ಯೆತ್, ಪುಣ್ ಕಶೆಂ?”

“ಕಶೆಂ ಮ್ಹಳ್ಳೆಂ ಹಾಂವ್ ನೆಣಾಂ. ಪುಣ್ ತಾಚ್ಯಾ ವರ್ದೆಂತ್ಲ್ಯಾ ಉಲ್ಯಾಕ್ ಹ್ಯಾ ಪಾವ್ಟಿಂ ದುಸ್ರ್ಯಾಚ್ ಜಿನ್ಸಾರ್ ಹಾಂವೆಂ ಪಾಳೊ ದೀಜಾಯ್.”

“ಜಾವ್ಯೆತ್, ಪುಣ್ ಕಶೆಂ?”

“ತಾಚ್ಯಾ ವರ್ದೆಕ್ ಜವಾಬ್ ದೀಜಾಯ್… ಹಾಂವೆಂ ನಿಚೆವ್ ಕೆಲಾ.”

“ಕಸಲೊ ಪುತಾ?” ಮ್ಹಾತಾರ್‍ಯಾನ್ ಮಾತೆಂ ಖೊರ್ಪಿಲೆಂ.

“ತ್ಯಾ ದೊಗಾಂ ಸವಾರಾಂಕ್ ಕುರಿಯೆಲ್ ಥಾವ್ನ್ ವೆಗಿಂ ಹಾಂಗಾ ಪಾಟಿಂ ಯೇಂವ್ಕ್ ಹಾಂವೆಂ ಆಪಯ್ಲ್ಯಾತ್… ಆನಾ, ಹಾಂವ್ ಪಟ್ಟಣಾಕ್ ವೆತಾಂ!”

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

ಪ್ರಕರಣ್ 21: ಘಾಯೆಲ್ಲೊ ವಾಗ್

ದುಸ್ರ್ಯಾ ದಿಸಾ ಕಿತೆಂ ಕರಿಜಾಯ್ ಮ್ಹಳ್ಳೆಂ ಟಿಪ್ಪು ಸುಲ್ತಾನಾನ್ ರಾತಿಂಚ್ ಬರೆಂ ಚಿಂತುನ್ ದವರ್ಲೆಂ. ತ್ಯಾ ಪ್ರಕಾರ್, ಪಟ್ಟಣಾಂತ್ ಆಸ್‍ಲ್ಲ್ಯಾ ರಿಸಾಲ್ದಾರಾಂಕ್, ಸರ್ದಾರಾಂಕ್ ಆನಿ ಅಧಿಕಾರಿಂಕ್ ತಾಣೆಂ ರಾವ್ಳೆರಾಕ್ ಆಪಯ್ಲೆಂ.

ಸರ್ದಾರ್ ಸಿಮಾಂವ್ಕ್ ತಾಪ್ ಯೆತಾಲೊ ಮ್ಹಳ್ಳೆಂ, ಖುದ್ ಟಿಪ್ಪು ಸುಲ್ತಾನಾನ್‍ಂಚ್ ಸಕಾಳಿಂ ಫುಡೆಂ ತಾಕಾ ಭೆಟ್ ದೀವ್ನ್ ಸಮ್ಜೊನ್ ಘೆತ್ಲೆಂ, ಆನಿ ತಾಣೆಂ ತ್ಯಾ ದಿಸಾಚ್ಯಾ ಸಭೆಕ್ ಯೇನಾತ್ಲ್ಯಾರ್ ವ್ಹಡ್ ನಹಿಂ ಮ್ಹಣ್ ಮಾಫಿ ದಿಲಿ.

ತಾಣೆಂ ತ್ಯಾ ದೀಸ್ ದಿಂವ್ಚ್ಯಾ ಎಕಾ ಹುಕ್ಮೆಕ್ ಸರ್ದಾರ್ ಸಿಮಾಂವ್ನ್ ಹಾಜರ್ ಜಾಯ್ನಾತ್ಲೆಂಚ್ ಬರೆಂ ಮ್ಹಣ್ ತಾಚ್ಯಾ ಮತಿಂತ್ ಆಸ್‍ಲ್ಲೆಂ. ಜಾಲ್ಯಾರೀ ಸರ್ದಾರ್ ಸಿಮಾಂವ್ನ್ ಥೊಡ್ಯಾಚ್ ದಿಸಾಂ ಆದಿಂ ಆಪ್ಣಾಚೊ ಜೀವ್ ರಾಕ್‍ಲ್ಲೆಂ ಮತಿಂತ್ ದವರ್ನ್ ತೊ ಉಲಯ್ಲೊ:

“ಪಾಟ್ಲ್ಯಾ ದೋನ್-ತೀನ್ ವರ್ಸಾಂನಿ ಆಮ್ಚ್ಯಾ ಸೈನಾಂತ್ ಕೆನರಾಚ್ಯಾ ರಿಸಾಲಾಂನಿ ಆಮ್ಚ್ಯಾ ಝುಜಾಂನಿ ಬರಿ ಶಿಪಾಯ್ಗಿರಿ ದಾಕಯ್ಲ್ಯಾ.”

“ಹಾಂವ್‍ಯೀ ಕೆನರಾಂತ್ಲೊ ದೆಕುನ್, ಬಾದಶಹಾನ್ ಉಚಾರ್‌ಲ್ಲಿ ಶಿಫಾರಸ್ ಆಯ್ಕೊನ್ ಸಂತೊಸ್ ಪಾವ್ತಾಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. ಪುಣ್ ನಿಜಾಯ್ಕೀ ತಾಚ್ಯಾ ಮತಿಂತ್ ಸಂತೊಸ್ ನಾತ್‍ಲ್ಲೊ. ಕಾರಣಾಂ ತೊ ಬರೆಂ ಕರ್ನ್ ಜಾಣಾಂಸ್‍ಲ್ಲೊ:

ಟಿಪ್ಪು ಸುಲ್ತಾನಾನ್ ಕೈದಿ ಕರ್ನ್ ಹಾಡಯಿಲ್ಲ್ಯಾ ಕೆನರಾ ಕ್ರಿಸ್ತಾಂವಾಂಚೆಂ ಧಯ್ರ್ ಆನಿ ಸಾಹಸ್ ಆದಿಂಚ್ ಪಾರ್ಕಿಲ್ಲೆಂ. ದೆಕುನ್, ದೋನ್ ವರ್ಸಾಂ ಬಂದಡೆಚಿಂ ಸಂಪ್ತಚ್, ‘ಕೈದಿ ಜಾವ್ನಾಸ್‍ಲ್ಲ್ಯಾ ಕ್ರಿಸ್ತಾಂವ್ ಯುವಕಾಂಚ್ಯೊ ಕಂಪ್ಣ್ಯೊ ಆನಿ ರಿಸಾಲಾಂ ತಾಂಚ್ಯಾಚ್ ಮುಖೆಲ್ಯಾಂ ಖಾಲ್ ಘಡಿಜಾಯ್ (ಆನಿ ಆಮ್ಚ್ಯಾ ಶಿಪಾಯಾಂಚಿಚ್ ಸವ್ಲತಾಯ್ ಆನಿ ಸುಟ್ಕಾ ತಾಂಕಾಂ ಲಾಭಯ್ಜಾಯ್) ಪುಣ್ ಮಹಿನ್ಯಾಕ್ ಏಕ್ ಪಾವ್ಟಿಂ ತಾಂಚೆ ಪಯ್ಕಿಲ್ಯಾಂ ಪ-ಪಂಚ್ವೀಸ್ ಜಣಾಂಕ್ ಸುಂತಾ ಕರಿಜಾಯ್’ ಮ್ಹಳ್ಳಿ ಹುಕುಮ್ ತಾಣೆಂ ದಿಲ್ಲಿ. ತಶೆಂ ಜಾಲ್ಲ್ಯಾ ವರ್ವಿಂ ಚಾರ್ ಮಹಿನ್ಯಾಂ ಭಿತರ್ ಕೆನರಾ ರಿಸಾಲಾಂತ್ಲ್ಯಾ ಕಂಪ್ಣೆಚೆ ಕ್ರಿಸ್ತಾಂವ್ – ಸ್ವಂತ್ ಖುಶೆನ್ ವಾ ಭಾವಾರ್ಥ್ ಸಾಂಡ್ಚ್ಯಾ ಇರಾದ್ಯಾನ್ ನಹಿಂ ಜಾಲ್ಯಾರೀ – ರಗ್ತಾಚ್ಯಾ ಬಾಪ್ತಿಜ್ಮಾಕ್ ಪಾತ್ರ್ ಜಾವ್ನ್, ದೆಖಿಕ್ ಪುಣೀ ಮುಸ್ಲಿಮ್ ಜಾಲ್ಲೆ. ಸರ್ದಾರ್ ಸಿಮಾಂವ್ಕ್ ಹೆಂ ಕಾರಣ್ ಕೆದಾಳಾಯೀ ಗುಪಿತ್ ಚುರ್ಚುರ್‍ಯಾಂಚೆಂ ಜಾವ್ನ್ ಆಸ್‍ಲ್ಲೆಂ.

ದುಸ್ರೆಂ ಕಾರಣ್: ಹರ್ಯೆಕಾ ಲಡಾಯೆಂತ್ ಕೆನರಾ ರಿಸಾಲಾಂಕ್ ಮುಖಾರ್ ಧಾಡ್ತಾಲೆ ಆನಿ ತಾಂಚ್ಯಾ ಬಗ್ಲೆನ್ ಆನಿ ಪಾಟ್ಲ್ಯಾನ್ ಹೆರ್ ರಿಸಾಲಾಂ ಆಸ್ತಾಲಿಂ. ತಶೆಂ ಜಾಲ್ಲ್ಯಾನ್ ತಾಂಕಾಂ ಉಪ್ರಾಟೊಂಕ್ ವಾ ಚುಕವ್ನ್ ಕಾಣ್ಗೆಂವ್ಕ್ ಜಾಯ್ನಾತ್ಲೆಂ ಮಾತ್ರ್ ನಹಿಂ, ತಾಂಚೊಚ್ ಚಡ್ ಆನಿ ಚಡ್ ಸಂಹಾರ್ ಜಾತಾಲೊ. ಟಿಪ್ಪು ಸುಲ್ತಾನ್ ಲಡಾಯೆಂತ್ ಜಯ್ತೆವಂತ್ ಜಾವ್ನ್ ಪಾಟಿಂ ಯೆತಾನಾ ಕೆನರಾ ರಿಸಾಲಾಂ ಅರ್ಧ್ಯಾಕ್ ಅರ್ಧಿಂ ಖಾಲಿ ಜಾವ್ನ್ ಯೆತಾಲಿಂ.

“ತುವೆಂ ಸಂತೊಸ್ ಪಾಂವ್ಚೆಂ ವಾಜ್ಭಿ” ಮ್ಹಣಾಲೊ ಟಿಪ್ಪು ಸುಲ್ತಾನ್. “ಪ್ರತ್ಯೇಕ್ ಜಾವ್ನ್ ತಾಣಿಂ ಮರಾಠ್ಯಾಂ ಕಡೆನ್ ಆನಿ ನೈಜಾಮಾಚ್ಯಾ ಸೈನಾಂ ಕಡೆನ್ ಝಜ್‍ಲ್ಲಿ ಆನಿ ಜೀಕ್ ಹಾಡ್‍ಲ್ಲಿ ರೀತ್ ಗೆಲೆ ತ್ಯಾ ವರ್ಸಾ ಆಮಿ ಪಳೆಲ್ಯಾ ಉಪ್ರಾಂತ್, ತಾಂಚಿಂ ರಿಸಾಲಾಂ ಚಡಯ್ಜಾಯ್ ಮ್ಹಣ್ ಆಮಿ ಚಿಂತ್‍ಲ್ಲೆಂ. ಪುಣ್ ಚಡ್ಚ್ಯಾ ಪ್ರಾಸ್ ತಾಂಚೊ ಸಂಖೊ ಭೋವ್ ಉಣೊ ಜಾಲಾ. ತೊ ಭರ್ತಿ ಕರುಂಕ್ ಆಮಿ ಚಿಂತ್ಲಾಂ.”

“ಪುಣ್ ಕಶೆಂ ಹುಜೂರ್?” ಸರ್ದಾರ್ ಸಿಮಾಂವ್ ಭಿತರ್ಲ್ಯಾ ಭಿತರ್ ಆಕಾಂತ್ಲೊ.

“ಕಶೆಂ ಮ್ಹಳ್ಳೆಂ ಚಿಂತುನ್ ಎಕಾ ನಿರ್ಣಯಾಕ್ ಆಮಿ ಯೆತಾಂವ್” ಮ್ಹಣಾಲೊ ಟಿಪ್ಪು ಸುಲ್ತಾನ್, ವಿಷಯ್ ಬದ್ಲುನ್. “ಲಡಾಯೆಂತ್ ಆನಿ ರಿಸಾಲಾಂಚಿ ಖಬರ್ ಆನ್ಯೇಕ್ ಪಾವ್ಟಿಂ ಉಲಯಾಂ. ಹೆಂ ಸಾಂಗ್ – ಆಮ್ಚ್ಯಾ ರಾವ್ಳೆರಾಂತ್ ಆನಿ ಪಟ್ಟಣಾಂತ್ ದೋನ್ ಪಂಗಡ್ ಜಾಲ್ಯಾತ್ ಮ್ಹಣ್ ಆಮಿ ಆಯ್ಕತಾಂವ್. ಕಿತ್ಯಾಕ್ ಜಾವ್ಯೆತ್?”

“ಕಾಂಯ್ ಖಾಸ್ಗಿ ಕಾರಣಾಂ ವರ್ವಿಂ ಥೊಡಿಂ ಘರ್ಷಣಾಂ ಜಾಲ್ಯಾಂತ್ ಆಸ್ಯೆತ್ ಹುಜೂರ್. ಪುಣ್ ಪಂಗಡ್ ದೋನ್ ಜಾಲ್ಯಾತ್ ಮ್ಹಣ್ ಹಾಂವ್ ಪಾತ್ಯೆನಾ.”

“ತುವೆಂ ಪಾತ್ಯೆಂವ್ಚಿ ಗರ್ಜ್ ನಾ – ಪುಣ್ ಚಿಂತುನ್ ಪಳೆಲ್ಯಾರ್…” ಮ್ಹಣಾಲೊ ಟಿಪ್ಪು ಸುಲ್ತಾನ್ ಹಾಳ್ವಾಯೆನ್. “ಖಂಯ್ ಆಮಿ ಪಳೆಲ್ಯಾರೀ ಆಮ್ಕಾಂ ದಿಸ್ತಾತ್ ದೋನ್ ಪಂಗಡ್ – ಏಕ್ ಪಂಗಡ್ ರಾಜ್ ಭಕ್ತಾಂಚೊ, ಏಕ್ ಪಂಗಡ್ ರಾಜ್‍ದ್ರೋಹಿಂಚೊ!”

“ಮ್ಹಣ್ಜೆ ಹುಜೂರ್…”

“ಏಕ್ ಪಂಗಡ್…” ಉಲಯ್ಲೊ ಟಿಪ್ಪು ಸುಲ್ತಾನ್, ಸರ್ದಾರ್ ಸಿಮಾಂವ್ಕ್ ಅವ್ಕಾಸ್ ದೀನಾಸ್ತಾನಾ. “ಏಕ್ ಪಂಗಡ್ ಆಮ್ಚ್ಯಾ ಖುಶೆ ಪರ್ಮಾಣೆಂ ಆಮ್ಚಿಂ ಫರ್ಮಾಣಾಂ ಚಲಂವ್ಚೊ. ಆನಿ ಆನ್ಯೇಕ್ ಪಂಗಡ್ ಆಮ್ಚಿ ಖುಶಿ ಭಗ್ನ್ ಕರ್ಚೊ!”

“ಮ್ಹಣ್ಜೇ…”

“ಮ್ಹಣ್ಜೆ, ಏಕ್ ಪಂಗಡ್ ಆಮ್ಚ್ಯಾ ಖುಶೆ ಪ್ರಕಾರ್ ಕೈದ್ಯಾಂಚೆರ್ ನದರ್ ದವರ್ನ್ ಆಮ್ಚಿಂ ರಿಸಾಲಾಂ ವಾಡಂವ್ಚೊ, ಆನಿ ಆನ್ಯೇಕ್ ಪಂಗಡ್ ಕೈದ್ಯಾಂಕ್ ಹಾಂಗಾ ಥಾವ್ನ್ ಉಸ್ಳಾವ್ನ್ ತಾಣಿಂ ಪರಾರಿ ಜಾಂವ್ಕ್ ಮಜತ್ ದಿಂವ್ಚೊ!”

“ಹಾಂಗಾ ಥಾವ್ನ್ ಹುಜೂರ್?”

“ಜರೂರ್! ಆಮಿ ಕೊಡಗಾ ಥಾವ್ನ್ ಪಾಟಿಂ ಯೆಂವ್ಚ್ಯಾ ಭಿತರ್, ಶಹರ್‌ಗಂಜಾಮ್ ಶಿಬಿರಾಂತ್ಲ್ಯಾ ಬಂದಡೆಂತ್ ಆಸ್‍ಲ್ಲ್ಯಾಂ ಪಯ್ಕಿಂತ್ಲಿಂ ತೀನ್ ನಸ್ರಾನಿ ಕುಟ್ಮಾಂ ಪರಾರಿ ಜಾಲ್ಯಾಂತ್!”

ಸರ್ದಾರ್ ಸಿಮಾಂವ್ ಉಲಂವ್ಕ್ ನಾ. ತಾಪ್ ಆಯಿಲ್ಲ್ಯಾ ತಾಚ್ಯಾ ಆಂಗಾಂತ್ಲ್ಯಾನ್ ಥಂಡ್ ಚರ್ಲೆಂ.

“ಆನಿ ಹೆಂ ಘಡ್ತಾ ಹಾಂಗಾ ಮಾತ್ರ್ ನಹಿಂ – ಹಾಂಗಾ ಥಾವ್ನ್ ಕುರಿಯೆಲ್ ಪರ್ಯಾಂತ್ ಘಡ್ತೆಚ್ ಆಸಾ! ಕೈದಿ ತೊಪಾಸಿ ಆನಿ ತುಜೆ ದೋಗ್ ಸವಾರ್ ವಾಟೆರ್ ನಪಂಯ್ಚ್ ಜಾಲ್ಯಾತ್!”

“ಹುಜೂರ್!” ಸರ್ದಾರ್ ಸಿಮಾಂವ್ನ್ ಭಾಯ್ಲ್ಯಾನ್ ಆಕಾಂತ್ ದಾಕಯ್ಲೊ, ಪುಣ್ ಮತಿಂತ್ ತೊ ತೃಪ್ತ್ ಜಾಲೊ.

“ನಪಂಯ್ಚ್ ಮ್ಹಳ್ಯಾರ್, ಜಾದೂ ಘಡೊನ್ ನಹಿಂ, ಬಗಾರ್ ಉಬಾರ್ ಕಡ್ವಾರ್ ಅವ್ಗಡ್ ಜಾವ್ನ್ ಉದ್ಕಾಂತ್ ತೆ ಮಾಯಾಗ್ ಜಾಲ್ಯಾತ್!”

“ಹಾಂವ್ ದುಖ್ ಪಾವ್ತಾಂ, ಹುಜೂರ್!”

“ಅಶೆಂ ಘಡ್ತಾ ದೆಕುನ್ ಆಮಿಂಯೀ ದುಖ್ ಪಾವ್ತಾಂವ್” ಮ್ಹಣಾಲೊ ಟಿಪ್ಪು ಸುಲ್ತಾನ್. “ಪುಣ್ ಹೆಂ ಇತ್ಲ್ಯಾರ್ ಸೊಡ್ಲ್ಯಾರ್ ಜಾಯ್ನಾ. ಕಿತೆಂ ಪುಣೀ ವಕತ್ ಕರಿಜಾಯ್. ನಾ ಜಾಲ್ಯಾರ್ ಅಲ್ಲಾಚ್ಯಾ ದಯೆನ್ ಆಮ್ಚ್ಯಾ ತಾಬೆನ್ ಆಯಿಲ್ಲೆಂ ಆಮ್ಚೆಂ ಸಿಂಹಾಸನ್‍ಯೀ ನಪಂಯ್ಚ್ ಜಾಂವ್ಕ್ ಆಸಾ!”

“ತಶೆಂ ಜಾಂವ್ಚೆಂ ನಾ, ಹುಜೂರ್!”

“ತಶೆಂ ಜಾಂವ್ಚೆಂ ನಾ – ತುಜೆ ತಸಲೆ ಶಾತಿವಂತ್ ಆನಿ ವಿಶ್ವಾಸಿ ಮಿತ್ರ್ ಆಮ್ಚ್ಯಾ ಬಗ್ಲೆನ್ ಆಸ್ತಾತ್ ಪರ್ಯಾಂತ್” ಮ್ಹಣಾಲೊ ಟಿಪ್ಪು ಸುಲ್ತಾನ್. “ಆತಾಂ ತುಂ ವಿಶೆವ್ ಘೆ. ತುವೆಂ ವೆಗಿಂ ಸ್ವಸ್ಥ್ ಜಾಯ್ಜಯ್. ಆಮ್ಕಾಂ ತುರ್ತಾನ್ ಹಾತಿಂ ಘೆಂವ್ಚಿಂ ಕಾರ್ಯಕ್ರಮಾಂ ಸಬಾರ್ ಆಸಾತ್.”

ಮ್ಹಣೊನ್, ಸರ್ದಾರ್ ಸಿಮಾಂವ್ಕ್ ಸೊಡುನ್ ತೊ ರಾವ್ಳೆರಾಕ್ ಪಾಟಿಂ ಗೆಲೊ.

ಸಭಾಂಗಣಾಂತ್, ತಾಣೆಂ ಖುಶಿ ವ್ಹೆಲ್ಲ್ಯಾ ಪ್ರಕಾರ್ ಪ್ರಕಾರ್ ಥಂಯ್ಸರ್ ತಾಚೆ ಸರ್ದಾರ್, ರಿಸಾಲ್ದಾರ್ ಆನಿ ಅಮೀರ್, ತಶೆಚ್ ಥೊಡೆ ಜೆಮೆದಾರ್, ಸುಬೆದಾರ್ ಆನಿ ಹವಿಲ್ದಾರ್ ಹಾಜರ್ ಆಸ್‍ಲ್ಲೆ. ಕೊಡಗಾಚ್ಯಾ ಗಡಿರ್ ಪಾಟಿಂ ಉರ್‌ಲ್ಲೆ ರಿಸಾಲ್ದಾರ್ ಆನಿ ಮುಖೆಲಿ ಮಾತ್ರ್ ಥಂಯ್ಸರ್ ನಾತ್‍ಲ್ಲೆ.

ಸರ್ದಾರ್ ಯೂಸುಫ್ ಆಲಿ ಥಂಯ್ಸರ್ ಆಸ್‍ಲ್ಲೊ.

ತಶೆಂಚ್ ಷೇಕ್ ಆಲಿ ಆನಿ ವೆಂಕಪ್ಪಯ್ಯ ಪ್ರಧಾನ್ ಥಂಯ್ಸರ್ ಹಾಜರ್ ಆಸ್‍ಲ್ಲೆ.

ಬಾದಶಹಾ ಪ್ರವೇಶ್ ಜಾತಚ್, ಸಮೇಸ್ತಾಂನಿ ಉಟೊನ್ ತಾಕಾ ಪ್ರಣಾಮ್ ಕೆಲೊ.

ಬಾದಶಹಾನ್ ಆಪ್ಲೆಂ ಸ್ಥಾನ್ ಘೆತ್ಲೆಂ. ಆನಿ ಹೆರಾಂಕ್ ಬಸೊಂಕ್ ಸಂಜ್ಞಾ ದಿಲಿ. ತಾಚೆ ಅಂಗರಕ್ಷಕ್ ಪಾಟ್ಲ್ಯಾ ಕುಶಿನ್, ಆನಿ ಬಾಗ್ಲಾಂಚೆರ್ ದ್ವಾರಪಾಲಕ್ ಖಡಾ ಜಾಲೆ.

ಬಾದಶಹಾನ್ ಭೊಂವ್ತೊಣಿಂ ಏಕ್ ದೀಷ್ಟ್ ಘುಂವ್ಡಾಯ್ಲಿ. ಹಾಜರ್ ಆಸ್‍ಲ್ಲ್ಯಾಂನಿ ಶ್ವಾಸ್ ಧರ್ಲೊ. ಥೊಡ್ಯಾ ವೆಳಾನ್ ಬಾದಶಹಾ ಉಲಯ್ಲೊ:

“ಆಮ್ಚ್ಯಾ ಸಾಮ್ಕಾರ್ ಆನಿ ಆಮ್ಚ್ಯಾ ಭೊಂವಾರಿಂ ಆಸ್‍ಲ್ಲ್ಯಾಂ ಪಯ್ಕಿ ದೋಸ್ತ್ ಕೋಣ್, ದುಸ್ಮಾನ್ ಕೋಣ್ ಮ್ಹಳ್ಳೆಂ ಆಮಿ ನೆಣಾಂವ್ – ಕಿತೆಂ ಮ್ಹಣ್ತಾಯ್ ಸರ್ದಾರ್ ಯೂಸುಫ್?”

ಹೆಂ ಸವಾಲ್ ಆಯ್ಕೊನ್ ಸರ್ದಾರ್ ಯೂಸುಫಾನ್ ಏಕ್ ಪಾವ್ಟಿಂ ಆಂಗ್ ಕಾಡ್ಲೆಂ, ತರೀ ಜವಾಬ್ ದಿಲಿ:

“ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ಸಾಮ್ಕಾರ್ ದುಸ್ಮಾನ್ ಕೊಣೀ ರಾವೊಂಕ್ ಸಕ್ಚೆ ನಾಂತ್, ಹುಜೂರ್!”

“ತುಂ ಮ್ಹಣ್ತಾಯ್ ತಶೆಂ” ತಾಚೆ ವೋಂಟ್ ರುಂದಾಯಿಲ್ಲೆಪರಿಂ ಕರ್ನ್ ಬಾದಶಹಾ ಮ್ಹಣಾಲೊ. “ಪುಣ್ ಆಮಿ ಕೊಡಗಾಕ್ ಗೆಲ್ಲ್ಯಾ ವೆಳಾರ್ ತಶೆಂ ಘಡೊಂಕ್ ನಾ – ದುಸ್ಮಾನಾಚ್ಯಾ ಸಾಮ್ಕಾರ್ ರಾವೊಂಕ್ ಜಾಯ್ನಾಸ್ತಾಂ ಪಾಯ್ ಕಾಡುನ್ ಆಮಿಂಚ್ ಪಾಟಿಂ ಯೇಜಾಯ್ ಜಾಲೆಂ. ಪರ್ವಾ ನಾ. ತ್ಯಾ ರಾಜಾಚೆಂ ಲೇಖ್, ವೆಗಿಂಚ್ ಭಾಡ್ಯಾ ಸಮೇತ್ ಆಮಿ ವಸೂಲ್ ಕರ್ತೆಲ್ಯಾಂವ್. ಸವಾಲ್ ಇತ್ಲೆಂಚ್: ಹ್ಯಾ ಪಾವ್ಟಿಂ ಧಾಡ್ ಘಾಲುಂಕ್ ಆಮಿ ಭಾಯ್ರ್ ಸರ್‌ಲ್ಲಿ ಖಬರ್, ಕೊಡಗಾಚ್ಯಾ ರಾಜಾಕ್ ಪಯ್ಲೆಂಚ್ ಕಳಿತ್ ಜಾಲಿ. ಆಮ್ಚ್ಯಾ ದುಸ್ಮಾನಾಂಚೆ ಗೂಢಚಾರ್ ಜಾವ್ನ್ ಆಮ್ಚೆ ಲಾಗಿಂ ಆಸ್ಚ್ಯಾ ಘಾತ್ಕ್ಯಾಂಚೊ ಆಮಿ ಪತ್ತೊ ಧರುಂಕ್ ಆಸಾ. ಹ್ಯಾ ಖಾತಿರ್ ಏಕ್ ಲ್ಹಾನ್ ಠೊಲಿ ವೆಗಿಂಚ್ ಆಮಿ ರಚ್ತೆಲ್ಯಾಂವ್.”

ಥೊಡೊ ವೇಳ್ ರಾವೊನ್ ಉಪ್ರಾಂತ್ ತೊ ಮ್ಹಣಾಲೊ:

“ಆಮಿ ತಶೆಂ ನಮಿಯಾರ್‌ಲ್ಲ್ಯಾ ಠೊಲಿಯೆಂನಿ ಆಸ್ಚೆ ಸದಸ್ಯ್ ಉಗ್ಡಾಸ್ ದವರುಂದಿತ್: ತಾಂಕಾಂ ವಹಿಸುನ್ ದಿಲ್ಲೆಂ ಕಾಮ್ ಜಾರಿ ಕರುಂಕ್ ತೆ ಸಲ್ವತಿತ್ ಜಾಲ್ಯಾರ್ – ಕೊಣೀ ತೆ ಜಾಂವ್ದಿತ್ – ತಾಂಕಾಂ ಆಮ್ಚೆ ಥಾವ್ನ್ ಕಸಲಿಚ್ ದಯಾ ಮೆಳ್ಚಿ ನಾ!”

ಹಿಂ ಉತ್ರಾಂ ಆಯ್ಕೊನ್, ಥಂಯ್ ಆಸ್‍ಲ್ಲ್ಯಾ ಹರ್ಯೆಕ್ಲ್ಯಾಚ್ಯಾ ಮತಿಂತ್ ವೆವೆಗ್ಳಿ ಪ್ರತಿಕ್ರಿಯಾ ಜಾಲಿ, ಆನಿ ಚಡುಣೆಂ ಹರ್ಯೆಕ್ಲ್ಯಾಚ್ಯಾ ಕಾಳ್ಜಾಂತ್ ಫೊವ್ ಕಾಂಡುಂಕ್ ಸುರು ಜಾಲೊ.

“ದುಸ್ರೆಂ ಸವಾಲ್” ಮ್ಹಣಾಲೊ ಟಿಪ್ಪು. “ಆಮಿ ಪಟ್ಟಣಾ ಥಾವ್ನ್ ಭಾಯ್ರ್ ಆಸ್‍ಲ್ಲ್ಯಾ ವೆಳಾರ್, ನಸ್ರಾನಿ ಕೈದ್ಯಾಂ ಪಯ್ಕಿಂತ್ಲಿಂ ತೀನ್ ಕುಟ್ಮಾಂ ಪರಾರಿ ಜಾಲ್ಯಾಂತ್. ಅಶೆಂ ಘಡೊಂಕ್ ಭಾಯ್ಲ್ಯಾಂಚೊ ಹಾತ್ ಆಸಾ ಮ್ಹಳ್ಳೆಂ ಸ್ಪಷ್ಟ್ ಜಾತಾ ಖರೆಂ, ಪುಣ್ ಪಯ್ಲೆಂ – ಆಮ್ಚೆಚ್ ರಾಕ್ವಲಿ ನಿದ್ರೇಸ್ತ್ ಜಾತಾತ್ ಮ್ಹಣ್ ದಿಸ್ತಾ… ಯೂಸುಫ್?”

“ಜೀ ಹುಜೂರ್!”

“ಹಾಂಗಾಚ್ಯಾ ಬಂದೋಬಸ್ತೆಚಿ ಜವಾಬ್ದಾರಿ ತುಜಿ ಜಾವ್ನಾಸ್‍ಲ್ಲಿ. ಕೈದಿ ಪರಾರಿ ಜಾಲ್ಲಿ ಖಬರ್ ಆಮ್ಕಾಂ ದಿಂವ್ಚ್ಯಾ ಪ್ರಾಸ್, ತಾಣಿಂ ಪರಾರಿ ಜಾಯ್ನಾಶೆಂ ಆಡಾಯಿಲ್ಲೆಂ ಜಾಲ್ಯಾರ್ ಬರೆಂ ಆಸ್‍ಲ್ಲೆಂ. ಪರ್ವಾ ನಾ. ತಿಂ ನಸ್ರಾನಿ ಕುಟ್ಮಾಂ ಬಂದಡೆಂತ್ ಆಸ್‍ಲ್ಲ್ಯಾ ತಂಬಾಂಚ್ಯಾ ರಾಕ್ವಲ್ಯಾಂಕ್ ಉಸ್ಳಾಯ್, ತಾಂಕಾಂ ಎಎಕ್ಲ್ಯಾಕ್ ತೀಸ್ ಬೆತಾಂಚೆ ಮಾರ್ ದೀವ್ನ್ ತಾಂಚೊ ಎಏಕ್ ದೊಳೊ ನಿಕ್ಳಾಯ್ ಆನಿ ತಾಂಕಾಂ ಪಟ್ಟಣಾ ಭಾಯ್ರ್ ಧಾಂವ್ಡಾಂವ್ಕ್ ಲಾಯ್. ತಾಂಚ್ಯಾ ಜಾಗ್ಯಾರ್ ದುಸ್ರ್ಯಾಂಕ್ ರಾವಯ್!”

“ಜೀ, ಹುಜೂರ್!” ಮ್ಹಣಾಲೊ ಯೂಸುಫ್, ಲೋವ್ ಸ್ವರಾನ್.

ಥೊಡೊ ವೇಳ್, ಟಿಪ್ಪು ಸುಲ್ತಾನ್ ಮೌನ್ ರಾವ್ಲೊ. ಹಾಜರ್ ಆಸ್‍ಲ್ಲೆ ಗ್ರಾಯ್ಕ್‌ಯೀ ಆಪಾಪ್ಲ್ಯಾ ಚಿಂತ್ನಾಂನಿ ತಲ್ಲೀನ್ ಜಾವ್ನ್ ರಾವ್ಲೆ. ಉಪ್ರಾಂತ್ ಬಾದಶಹಾ, ಪಂಗ್ಡಾಂಚೊ ಪ್ರಸ್ತಾಪ್ ಉಲಯ್ಲೊ:

“ಹ್ಯಾ ಸಂಬಂಧಿಂ ಕಿತೆಂ ಗಜಾಲ್ ತಿ ಸಮ್ಜೊನ್ ಖುದ್ ಆಮಿಂಚ್ ಫಾವೊ ತೆಂ ಮೇಟ್ ಕಾಡ್ತಾಂವ್” ಮ್ಹಣಾಲೊ ತೊ. “ದೆಕುನ್ ಕೊಣೆಂಯೀ ಗರ್ಜೆಚೆಂ ಕಾಂಯ್ ಸಾಂಗೊಂಕ್ ವಾ ಹಿಶಾರೊ ದೀಂವ್ಕ್ ಆಸ್ಲ್ಯಾರ್, ಖಾಸ್ಗೆನ್ ಯೇವ್ನ್ಂಚ್ ಆಮ್ಚೆ ಕಡೆನ್ ಸಾಂಗ್ಯೆತ್.”

ಉಪ್ರಾಂತ್, ತಾಚ್ಯಾ ಮತಿಂತ್ ಆಸ್‍ಲ್ಲೊ ಪ್ರಮುಖ್ ವಿಷಯ್ ತಾಣೆಂ ಪಾಚಾರ್ಲೊ. “ಫುಡೆಂ ಚಡ್ ಗರ್ಜೆಚ್ಯೊ ಆನಿ ಮಹತ್ವಾಚ್ಯೊ ಲಡಾಯೊ ಹಾತಿಂ ಘೆಂವ್ಕ್ ಆಸ್‍ಲ್ಲ್ಯಾ ವರ್ವಿಂ, ಆಮ್ಚಿಂ ರಿಸಾಲಾಂ – ಮುಖ್ಯ ಜಾವ್ನ್ ಕೆನರಾ ರಿಸಾಲಾಂ – ಚಡ್ ಕರಿಜಾಯ್.

“ಹ್ಯಾ, ಆನಿ ಪ್ರತ್ಯೇಕ್ ಜಾವ್ನ್ ಹೆರ್ ಥೊಡ್ಯಾ ಖಾಸ್ಗಿ ಕಾರಣಾಂ ಖಾತಿರ್ ಏಕ್ ಫರ್ಮಾಣ್ ದಿಂವ್ಚೊ ನಿರ್ಣಯ್ ಆಮಿ ಕೆಲಾ. ತೊ ಜಾರಿ ಕರುಂಕ್ ಆಮ್ಚ್ಯಾ ಚಾರ್ ರಿಸಾಲಾಂನಿ ಹಾಂಗಾ ಥಾವ್ನ್ ಕೆನರಾ ಜಿಲ್ಲ್ಯಾಂಕ್ ದೆಂವಜಾಯ್, ಆನಿ ಥಂಯ್ಸರ್ ಆಸ್‍ಲ್ಲ್ಯಾ ಆಮ್ಚ್ಯಾ ಠಾಣ್ಯಾಂಚ್ಯಾ ಶಿಪಾಯಾಂಕ್‍ಯೀ ಸಾಂಗಾತಾ ಘೆವ್ನ್, ಕಾಮ್ ಪೊಂತಾಕ್ ಪಾವಯ್ಜಾಯ್.”

ಮ್ಹಣೊನ್, ಚವ್ಗಾಂ ರಿಸಾಲ್ದಾರಾಂಚಿಂ ನಾಂವಾಂ ತಾಣೆಂ ಸಾಂಗ್ಲಿಂ. ತೆ ಚವ್ಗ್‌ಯೀ ಮುಸ್ಲಿಮ್ ಜಾವ್ನಾಸ್‍ಲ್ಲೆ. ಪುಣ್ ಸರ್ದಾರ್ ಯೂಸುಫ್ ಆಲಿಚೆಂ ನಾಂವ್ ತಾಂಚೆ ಪಯ್ಕಿ ನಾತ್‍ಲ್ಲೆಂ.

ಉಪ್ರಾಂತ್ ಟಿಪ್ಪು ಸುಲ್ತಾನಾನ್ ಥೊಡೊ ವಿವರ್ ದಿಲೊ.

ತೀನ್ ವರ್ಸಾಂ ಆದಿಂ ತಸಲೆಂ ಫರ್ಮಾಣ್ ದೀವ್ನ್ ಕೆನರಾ ಕ್ರಿಸ್ತಾಂವಾಂಚೆರ್ – ಸಮಾಜೆಚೆರ್ ಆನಿ ಸಮಡ್ತಿಚೆರ್ – ಇಂಫೆರ್ನಾಚಿಂ ದಾರಾಂ ತಾಣೆಂ ಉಗಡ್‍ಲ್ಲಿಂ. ತ್ಯಾ ತೀನ್ ವರ್ಸಾಂ ಭಿತರ್ ಆಮ್ಚೊ, ಉಣೊ ಮ್ಹಳ್ಯಾರೀ 30-35 ಹಜಾರ್ ಲೋಕ್ ನಾಸ್ ಜಾಲ್ಲೊ. ಜಾಲ್ಯಾರೀ, ಟಿಪ್ಪುನ್ ಚಿಂತ್‍ಲ್ಲೆಂ ರಾಜಕೀಯ್ – ಥೊಡ್ಯಾ ಮಟ್ಟಾಕ್ ಧಾರ್ಮಿಕ್‍ಯೀ – ಧೋರಣ್ ಫಳಾಧಿಕ್ ಜಾಂವ್ಕ್ ನಾ.

ಕೆನರಾ ಕ್ರಿಸ್ತಾಂವಾಂಚ್ಯಾ ಬಂದಡೆ ವರ್ವಿಂ ಟಿಪ್ಪು ಸುಲ್ತಾನಾಚೆ ಹಾತ್ ಬಳಾಧಿಕ್ ಜಾಂವ್ಚ್ಯಾ ಬದ್ಲಾಕ್, ತಾಚ್ಯಾ ದುಸ್ಮಾನಾಂಚೆಚ್ ಹಾತ್ ಬಳಾಧಿಕ್ ಜಾವ್ನ್ ತಾಂಚೊ ಸಂಖೊ ಚಡ್ ಜಾಲ್ಲೊ.

ಪುಣ್ ಸುಲಭಾಯೆನ್ ಸಲ್ವಣಿ ಗಿಳ್ಚೊ ಗ್ರಾಯ್ಕ್ ಟಿಪ್ಪು ಸುಲ್ತಾನ್ ನಹಿಂ. ಕ್ರಿಸ್ತಾಂವ್ ಕೈದ್ಯಾಂಕ್ ದಿಂವ್ಚಿ ದಗ್ದೊಣಿ ಉಣಿ ಜಾಂವ್ಕ್ ತಾಣೆಂ ಫರ್ಮಾಯಿಲ್ಲೆಂ ವ್ಹಯ್; ಜಬರ್ದಸ್ತೆನ್ ಮತಾಂತರ್ ಕರುಂಕ್ ಸಾಧ್ಯ್ ನಾ ಮ್ಹಣ್ ತಾಕಾ ಸಮ್ಜಲ್ಲೆಂಯೀ ವ್ಹಯ್; ತಾಚ್ಯಾ ಕಂಪ್ಣೆಂನಿ ಆನಿ ರಿಸಾಲಾಂನಿ ಕ್ರಿಸ್ತಾಂವಾಂಚಿ ಗರ್ಜ್ ಆಸ್‍ಲ್ಲಿಯೀ ವ್ಹಯ್.

ಆಸ್ತಾಂ ಏಕ್ ವಿಷಯ್ ತಾಣೆಂ ಬರೊ ಮತಿಂತ್ ಧರ್‌ಲ್ಲೊ: ಬಂದಡೆ ವೆಳಾರ್ ತಾಚ್ಯಾ ಖಜಾನಾಕ್ ನಷ್ಟ್, ತಾಚ್ಯಾ ಮಾನಾಕ್ ಊಣ್ ಆನಿ ತಾಚ್ಯಾ ಮತಿಕ್ ಕರಂದಾಯ್ ಚಡ್ ಜಾಲ್ಲಿ. ಕ್ರಿಸ್ತಾಂವಾಂಚೆಂ ತೆಂ ಪ್ರತಿಭಟನ್, ತಾಣಿಂ ಚುಕವ್ನ್ ಧಾಂವ್ಚೆಂ, ಲಿಪೊನ್ ಝುಜ್ಚೆಂ ಆನಿ ಹರ್ಯೆಕಾ ಥರಾನ್ ಟಿಪ್ಪುಚ್ಯಾ ಸರ್ಕಾರಾಕ್ ತುಕ್ಲಾಂವ್ಚೆಂ – ತೊ ಭೊಗ್ಸುಂಕ್ ತಯಾರ್ ನಾತ್‍ಲ್ಲೊ. ದೆಕುನ್ ಆತಾಂ ತೊ ಘಾಯೆಲ್ಲೊ ವಾಗ್ ಜಾಲ್ಲೊ ಆನಿ ತಾಚೆ ದುಬಾವ್ ದೊನ್‍ಯೀ ವಾಟಾಂನಿ ಚಡ್ತಾಲೆ.

ಆನಿ ನಿಮಾಣಿ ಆಯಿಲ್ಲಿ ಖಬರ್, ಸರ್ಕಾರಾಚೊ ಕೈದಿ ಜಾವ್ನಾಸ್‍ಲ್ಲೊ ತೊಪಾಸಿ ದಾಲ್ಮೇದಾ ಮಾಯಾಗ್ ಜಾಲ್ಲಿ! ದೆಕುನ್ ತಾಣೆಂ ತೆಂ – ಬಂದಡೆಚ್ಯಾ ತಿಸ್ರ್ಯಾ ವರ್ಸಾಂತ್ – ಪರ್ತ್ಯಾನ್ ತೆಂಚ್ ಫರ್ಮಾಣ್ ಜಾರಿ ಕೆಲೆಂ.

ತ್ಯಾ ಪ್ರಕಾರ್, ಶಿಪಾಯಾಂನಿ ಕೆನರಾ ಜಿಲ್ಲ್ಯಾಂಚೆರ್ ದೆಂವೊನ್, ತೆದೊಳ್ ಸಾಂಪ್ಡೊಂಕ್ ನಾತ್‍ಲ್ಲ್ಯಾ, ಚುಕೊನ್ ಧಾಂವ್‍ಲ್ಲ್ಯಾ ಆನಿ ಗುಪಿತ್ ಝುಜ್ ಚಲಂವ್ಚ್ಯಾ ಹರ್ಯೆಕ್ಲ್ಯಾ ಕ್ರಿಸ್ತಾಂವ್ ಮನ್ಶ್ಯಾಕ್ – ದಾದ್ಲ್ಯಾಂಕ್ ತಶೆಂ ಸ್ತ್ರೀಯಾಂಕ್ ಧರುನ್ ಲಾಗ್ಶಿಲ್ಯಾ ಹುಜೂರಾಕ್ ದಾಖಲ್ ಕರ್ನ್ ಆದ್ಲೆಪರಿಂಚ್ ಪಟ್ಟಣಾಕ್ ಆಂಬುಡ್ನ್ ವಾ ವೋಡ್ನ್ ಹಾಡಿಜಾಯ್ ಮ್ಹಣ್ ಬರ್ಪಿನಿಶಿಂ ತಾಣೆಂ ತಾಕಿದ್ ದಿಲಿ. ಆನಿ ಕುರಿಯೆಲಾಂತ್ ತವಳ್ ತಾಣೆಂ ಅಮೀಲ್ ಜಾವ್ನ್ ನಮಿಯಾರ್‌ಲ್ಲ್ಯಾ ಗುಲಾಮ್ ಮಹಮ್ಮದಾ ಥಾವ್ನ್ ಹರ್ಯೆಕಾ ಠಾಣ್ಯಾಚ್ಯಾ ಕೊತ್ವಾಲಾಕ್‍ಯೀ ತಿ ಹುಕುಮ್ ಪಾವಜಾಯ್ ಮ್ಹಣ್ ತಾಣೆಂ ಖುಶಿ ವ್ಹೆಲಿ.

ತ್ಯಾ ಹುಕ್ಮೆ ಪ್ರಕಾರ್, ಕೆನರಾಂತ್ಲ್ಯಾ ಭೋವ್ ಥೊಡ್ಯಾ ಘರಾಣ್ಯಾಂಕ್ ಮಾತ್ರ್ ತಾಣೆಂ ರಿಯಾಯ್ತ್ ಭಾಸಾಯ್ಲಿ. ಕಿತ್ಯಾಕ್, ತ್ಯಾ ಘರಾಣ್ಯಾಂತ್ಲೆ ಮನಿಸ್ – ಸರ್ದಾರ್ ಸಿಮಾಂವ್‍ಪರಿಂ – ಟಿಪ್ಪುಚ್ಯಾ ಸರ್ಕಾರಾಂತ್ ಹುದ್ದೆದಾರ್, ಭಕ್ಷಿ, ಜೆಮೆದಾರ್, ಸುಬೆದಾರ್ ವಾ ಹವಿಲ್ದಾರ್ ಜಾವ್ನ್ ಆಸ್‍ಲ್ಲೆ ದೆಕುನ್. ತರೀ, ತಸಲ್ಯಾ ಘರಾಣ್ಯಾಂನಿ ‘ರಾಜ್‍ದ್ರೋಹಿಂಕ್’ ಆಸ್ರೊ ದಿಲಾ ಜಾಲ್ಯಾರ್ ತಪಾಸುಂಚೊ ಅಧಿಕಾರ್, ನವ್ಯಾ ಫರ್ಮಾಣಾ ಖಾಲ್ ರಿಸಾಲ್ದಾರಾಂಕ್ ದಿಲ್ಲೊ.

ಫಾವೊ ತ್ಯಾ ಮನ್ಶ್ಯಾಂಕ್ ವಿಂಚುನ್ ರಿಸಾಲಾಂ ಭಾಯ್ರ್ ಸರೊಂಕ್ ಎಕಾ ಹಫ್ತ್ಯಾಚಿ ಪುರ್ಸತ್ ತಾಣೆಂ ದಿಲಿ, ಪುಣ್ ಸಗ್ಳೆಂ ಯೋಜನ್ ಎಕಾ ಮಹಿನ್ಯಾ ಭಿತರ್ ಜಾರಿ ಜಾಯ್ಜಯ್ ಮ್ಹಳ್ಳಿ ಖುಶಿ ಉಚಾರ್ಲಿ.

ಹಿ ಸರ್ವ್ ಖಬರ್, ತ್ಯಾಚ್ ರಾತಿಂ ಸರ್ದಾರ್ ಯೂಸುಫಾನ್ ಜೆಮೆದಾರ್ ಅಂತುಲ್ಯಾ ಮುಖಾಂತ್ರ್ ಸರ್ದಾರ್ ಸಿಮಾಂವ್ಕ್ ಪಾವಯ್ಲಿ. ಸರ್ದಾರ್ ಸಿಮಾಂವ್ ಆಕಾಂತ್ಲೊ. ಟಿಪ್ಪುನ್ ಚಿಂತ್‍ಲ್ಲ್ಯಾ ಹ್ಯಾ ನವ್ಯಾ ನಿರ್ಣಯಾ ವರ್ವಿಂ ಕೆನರಾಂತ್ ಉರ್ಲೆಲ್ಯಾ ಕ್ರಿಸ್ತಾಂವಾಂನಿ ಸಂಪೂರ್ಣ್ ನಾಸ್ ಜಾಂವ್ಚೊ ಅಪಾಯ್ ಆಸ್‍ಲ್ಲೊ. ಪ್ರತ್ಯೇಕ್ ಜಾವ್ನ್ ಉಪ್ಪಿನಂಗಡಿ ಥಾವ್ನ್ ಬಂಟ್ವಾಳ್ – ಕುರಿಯೆಲ್ ಆನಿ ಜಮಲಾಬಾದ್ ಥಾವ್ನ್ ಬಂಟ್ವಾಳ್, ಕುರಿಯೆಲ್ ಪ್ರದೇಶಾಂನಿ ಆನಿ ತಶೆಂಚ್ ಕುರಿಯೆಲಾಂತ್ ಆದ್ಲೆ ಪಾವ್ಟಿಂ ತಡೀಪಾರ್ ವಾ ಫರಾರಿ ಜಾಲ್ಲ್ಯಾ ಮನ್ಶ್ಯಾಂಚಿಂ ಘರಾಂ ತಪಾಸುನ್ ಥಂಯ್ ಆಸ್‍ಲ್ಲ್ಯಾಂಕ್ ಧರ್ನ್ ಹಾಡಿಜಾಯ್ ಮ್ಹಣ್ ಟಿಪ್ಪುಚಿ ಅಭಿಪ್ರಾಯ್ ಆಸಾ ಮ್ಹಳ್ಳೆಂಯೀ ತಾಕಾ ಕಳಿತ್ ಜಾಲೆಂ.

ಹ್ಯಾ ಫರ್ಮಾಣಾ ವರ್ವಿಂ, ಕೆನರಾಂತ್ ತಾಣೆಂ ವಳ್ಕೊನ್ ಆಸ್‍ಲ್ಲ್ಯಾ ಹರ್ಯೆಕಾ ಮನ್ಶ್ಯಾಕ್ ಅಪಾಯ್ ಆಸ್‍ಲ್ಲೊ.

ಅಸ್ವಸ್ಥ್ ಜಾವ್ನ್ ಭಿತರ್ ತೊ ಆಸ್‍ಲ್ಲೆಂ ಬರ್‍ಯಾಕ್‍ಚ್ ಪಡ್ಲೆಂ. ಹಿ ಖಬರ್, ಟಿಪ್ಪುಚೆಂ ಫರ್ಮಾಣ್ ಆನಿ ರಿಸಾಲಾಂ ಬಂಟ್ವಾಳಾಕ್ ಆನಿ ಮಂಗ್ಳುರಾಕ್ ಪಾಂವ್ಚ್ಯಾ ತೀನ್ ಚಾರ್ ದಿಸಾಂ ಆದಿಂ ಪುಣೀ ಆಗ್ನೆಸ್ ಕುಂವರ್ನಿಕ್ ಆನಿ ಹೆರಾಂಕ್ ಪಾವಿತ್ ಕರಿಜಾಯ್ ಮ್ಹಣ್ ತಾಣೆಂ ನಿಚೆವ್ ಕೆಲೊ ಆನಿ ತಶೆಂ ಕರುಂಕ್ ಉಪಾಯ್ ಚಿಂತ್ಲೊ.

“ಅಂತುಲ್ಯಾ” ಮ್ಹಣಾಲೊ ತೊ. “ಹೆಂ ಕಾಮ್ ಭೋವ್ ಗರ್ಜೆಚೆಂ. ಹ್ಯಾ ದಿಸಾಂನಿ ಆಮ್ಚೆ ಘೊಡೆ ವ್ಯಾಯಾಮಾ ಖಾತಿರ್ ಪಟ್ಟಣಾ ಥಾವ್ನ್ ಭಾಯ್ರ್ ವೆತಾತ್‍ಮೂ?”

“ವೆತಾತ್ ಧನ್ಯಾ. ಪುಣ್…” ಅಂತುಲೊ ಆಕಾಂತ್ಲೊ.

“ತರ್ ಆಮ್ಚ್ಯಾ ಕಂಪ್ಣೆಂತ್ಲ್ಯಾ ಹುಶಾರ್ ದೊಗಾಂ ಸವಾರಾಂಕ್, ಮ್ಹಜಿ ಭಲಾಯ್ಕಿ ಸಮ್ಜೊಂಚ್ಯಾ ನಿಬಾನ್ ಆಪವ್ನ್ ಹಾಡ್…”

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

ಪ್ರಕರಣ್ 20: ಘಾಯಾಚೆರ್ ಮೀಟ್

ಉಪ್ಪಿನಂಗಡಿ ಥಾವ್ನ್ ತೊಪಾಸಿ ದಾಲ್ಮೇದಾಕ್ ಕೈದಿ ಕರ್ನ್ ಆನಿ ನಿಬಾಕ್ ಸಾಂಗಾತಾ ನಾಯ್ಕ್ ಲೊರೆಸಾಕ್ ಆನಿ ನಾಯ್ಕ್ ಅಂಗರಾಕ್ ಘೆವ್ನ್ ದುಮ್ಗಾ ಪೀಂತ್ ಆನಿ ಸಾಂಗಾತಿ ಕುರಿಯೆಲಾಕ್ ಪಾವ್ಲೆ.

ವಾಜ್ಭಿ ಕಾರಣಾಂ ಖಾತಿರ್ ಆನಿ ಚತ್ರಾಯೆ ಖಾತಿರ್, ಝರ್‌ಲ್ಲಿ ವಾಟ್ ಪಯ್ಸ್ ಸೊಡುನ್, ಗುಡ್ಯಾಂಚಿ ಆನಿ ರಾನಾಂಚಿ ವಾಟ್ ಚಲೊನ್ ತೆ ಕಾಫ್ರಿಗುಡ್ಯಾಕ್ ಪಾವ್‍ಲ್ಲೆ. ವಾಟೆರ್ ಬಂಟ್ವಾಳ್‍ಯೀ ರಾವೊನ್, ಹೆರಾಂಕ್ ಕಳಿತ್ ನಾಸ್ತಾಂ, ಫುಡ್ಲಿಂ ಕಾಮಾಂ ಕಶಿಂ ಕರಿಜಾಯ್ ಮ್ಹಣ್, ಆಗ್ನೆಸ್ ಕುಂವರ್ನಿ ಕಡೆನ್ ಆನಿ ತಿಚ್ಯಾ ಬಾಪಾಯ್ ಕಡೆನ್ ಉಲವ್ನ್ ದುಮ್ಗಾ ಪೀಂತ್ ಆಯಿಲ್ಲೊ.

ಕಾಫ್ರಿಗುಡ್ಯಾಚ್ಯಾ ತ್ಯಾ ನಿರ್ಜನ್ ವಠಾರಾಂತ್ ಬಿಡಾರ್ ನಾತ್‍ಲ್ಲ್ಯಾ ತ್ಯಾ ಎಕಾ ಘರಾಂತ್ ಕೈದ್ಯಾಂಕ್ ಬಂದ್ ದವರ್ಲೆ. ಖಾಂವ್ಕ್ ಪಿಯೆಂವ್ಕ್ ತಾಂಕಾಂ ಕಾಂಯ್ ಉಣೆಂ ಕರುಂಕ್ ನಾ.

ಉಪ್ರಾಂತ್ ತಾಣಿಂ ಘಳಾಯ್ ಕೆಲಿ ನಾ.

ಕುರಿಯೆಲಾಂತ್ ಚಡ್ ದೀಸ್ ಉರಜಾಯ್ ಮ್ಹಣ್ ತೊಪಾಸಿ ದಾಲ್ಮೇದಾಕ್ ಕಾಂಯ್ ಮನ್ ನಾತ್‍ಲ್ಲೆಂ. ಸುಟ್ಕಾ ಲಾಭ್ಚೊ ಸಂಭವ್ ಆಸ್‍ಲ್ಲ್ಯಾನ್ ಆನಿ ತೆದೊಳ್ ಪರ್ಯಾಂತ್ ತಾಚ್ಯಾ ಜಿವಾಕ್‍ಯೀ ಚಡ್ ಅಪಾಯ್ ಆಸಾ ಮ್ಹಳ್ಳೆಂ ಸಮ್ಜೊನ್ – ಆಶಾ ನಾತ್‍ಲ್ಲೆಂ ಬದಿಕ್ ಪಾಟಿಂ ಸಾಂಡುನ್ – ಹಾಂಗಾ ಥಾವ್ನ್ ಪಾಶಾರ್ ಜಾವ್ನ್ ಗೊಂಯಾಂ ಧಾಂವಜಾಯ್ ಮ್ಹಣ್ ತೊ ಚಡ್ಪಡ್ತಾಲೊ.

“ಕುರಿಯೆಲಾಕ್ ಆಮಿ ಪಾವ್ಲ್ಯಾಂವ್” ಮ್ಹಳ್ಳೆಂ ದುಮ್ಗಾ ಪಿಂತಾನ್ ತಾಚೆ ಕಡೆನ್ ತ್ಯಾ ರಾತಿಂ. “ತುಕಾ ಕಾಡ್ಚೆಂ ವಾ ಧಾಡ್ಚೆಂ ಆತಾಂ ಪುರ್ತೆಂ ಆಮ್ಚ್ಯಾ ಹಾತಾಂತ್ ಆಸಾ. ಪುಣ್ ತುವೆಂ ಆಮ್ಕಾಂ ಭಾಸಾಯಿಲ್ಲೆಂ ಆಸಾ…”

“ವ್ಹಯ್” ಮ್ಹಣಾಲೊ ತೊಪಾಸಿ ಆತುರಾಯೆನ್, ಪುಣ್ ದುಬಾವಾನ್. “ಹಾಂವೆಂ ಭಾಸಾಯಿಲ್ಲೆಂ ದಿರ್ವೆಂ ತುಮ್ಕಾಂ ದಾಕಂವ್ಕ್ ಹಾಂವ್ ಕಬೂಲ್ ಆಸಾಂ. ಪುಣ್…”

“ಪುಣ್?”

“ಪುಣ್ ದಿರ್ವೆಂ ತುಮ್ಚ್ಯಾ ಹಾತಾಕ್ ಮೆಳ್ಳೆಂ ಮ್ಹಣ್ತಚ್…”

“ತುಕಾ ಆಮಿ ಸುಟ್ಕಾ ದಿತಾಂವ್ ವಾ ನಾ ಮ್ಹಳ್ಳೊ ದುಬಾವ್?” ಗರ್ಜಲೊ ದುಮ್ಗಾ ಪೀಂತ್.

“ಮ್ಹಾಕಾ ತಶೆಂ ಭೊಗ್ತಾ” ಪಿಂರ್ಗಲೊ ತೊಪಾಸಿ. “ಪುಣ್ ತಶೆಂ ಚಿಂತ್‍ಲ್ಲ್ಯಾ ಖಾತಿರ್ ಮ್ಹಜಿ ಕಾಕುತ್ ಕರಿಜಾಯ್.”

“ಪಿಶ್ಯಾ!” ಮ್ಹಣಾಲೊ ಇಲಾರ್ ಸಿಕೇರ್ ಮಧೆಂಚ್. “ಆಮಿ ಕ್ರಿಸ್ತಾಂವ್. ದಿಲ್ಲಿ ಭಾಸ್ ಮೊಡುನ್ ಘಾತ್ ಕರುಂಕ್ ಆಮಿ ಶಿಕೊಂಕ್ ನಾಂವ್. ಆಮ್ಕಾಂ ಮನ್ ಆಸ್‍ಲ್ಲೆಂ ತರ್, ಉಪ್ಪಿನಂಗಡಿಚ್ಯಾ ನ್ಹಂಯ್ತ್ ತುಕಾ ಉಂದ್ರಾಪರಿಂ ಮೊರೊಂಕ್ ಸೊಡ್ಯೆತೊ…”

“ನಹಿಂ ಜಾಲ್ಯಾರ್…” ಮ್ಹಣಾಲೊ ದುಮ್ಗಾ ಪೀಂತ್. “ತುವೆಂ ಭಾಸಾಯಿಲ್ಲೆಂ ದಿರ್ವೆಂ ಖಂಯ್ ಆಸಾ ಮ್ಹಳ್ಳೆಂ ತುಜೆ ಥಾವ್ನ್ ಸಮ್ಜೊನ್ ಘೆಂವ್ಕ್‌ಯೀ ಕಷ್ಟ್ ಜಾಂವ್ಚೆ ನಾಂತ್. ತುಜ್ಯೊ ನಾಕ್ಶ್ಯೊ ಹುಮ್ಟುನ್ ವಾ ತುಜೆಂ ಎಎಕ್‍ಚ್ ಬೋಟ್ ಕಾತ್ರುನ್ ವಾ ಕಾತ್ ಮೋವ್ ಆಸ್‍ಲ್ಲೆ ಕಡೆನ್ ಉಜ್ಯಾಚ್ಯಾ ಕೊಲಿತಾನ್ ದಾಗುನ್…”

“ಸಾಯ್ಬಾ ಭೊಗೊಸ್!” ತೊಪಾಸಿ ಘಾಮೆಲೊ.

“ಬರಾಬರ್! ತುವೆಂ ಆಮ್ಚ್ಯಾಂಕ್ ಕೆಲ್ಲ್ಯಾ ಅನ್ಯಾಯಾ ಖಾತಿರ್ ತುಕಾ ತಸಲೊ ಸನ್ಮಾನ್ ಫಾವೊ. ತರೀ ತಶೆಂ ಕರುಂಕ್ ಮನ್ ನಾ. ಆಮ್ಕಾಂ ದುಡ್ವಾಚಿ ಗರ್ಜ್ ಆಸಾ. ದೆಕುನ್ ತುವೆಂ ಅಪಹರ್ಸಿಲ್ಲೆಂ ಥೊಡೆಂ ಪುಣೀ ದಿರ್ವೆಂ ಆಮ್ಕಾಂ ಮೆಳೊಂದಿ. ತವಳ್ ಪರ್ಯಾಂತ್ ಆಮ್ಚ್ಯಾ ಹಾತಾಂತ್ ತುಂ ಆಸಾಯ್. ಆಮ್ಚೆರ್ ಪಾತ್ಯೆವ್ನ್ ತುವೆಂ ಸುಟ್ಕಾ ಜೋಡ್ನ್ ಘೆಂವ್ಚೆಂ ತುಜ್ಯಾಚ್ ಹಾತಾಂತ್ ಆಸಾ.”

“ಹಾಂವ್ ತುಮ್ಕಾಂ ಪಾತ್ಯೆತಾಂ.”

“ತರ್, ತುವೆಂ ಲಿಪಯಿಲ್ಲೆಂ ದಿರ್ವೆಂ ಖಂಯ್ ಆಸಾ ಮ್ಹಳ್ಳೆಂ ಆಯ್ಕಯಾಂ. ಲಾಂಬಾಯೆಚಿ ಗರ್ಜ್ ನಾ!”

“ತೆಂ ಉರ್ವಾ ಮೊಳ್ಯಾ ಬಗ್ಲೆನ್ ಆಸಾ…”

“ಉರ್ವಾ ಮೊಳ್ಯಾ ಬಗ್ಲೆನ್!”

“ವ್ಹಯ್ – ಹಾಂವ್ ಸತ್ ಸಾಂಗ್ತಾಂ ಮ್ಹಣಾಲೊ ತೊಪಾಸಿ.

“ಉರ್ವಾ ಮೊಳ್ಯಾ ಥಾವ್ನ್ ಬೋಳೂರ್ ಠಾಣ್ಯಾಕ್ ವೆಚ್ಯಾ ನ್ಹಂಯ್ ದೆಗೆಚ್ಯಾ ವಾಟೆರ್ ಏಕ್ ನಿರ್ಜನ್ ಪ್ರದೇಶಾರ್ ಖೊಮಟ್ ಆಸಾ…”

“ಸಮ್ಜಲೆಂ” ಮ್ಹಣಾಲೊ ದುಮ್ಗಾ ಪೀಂತ್. “ಥಂಯ್ಸರ್ ಆದಿಂಯೀ ಎಕ್ಲೊ ತೊಪಾಸಿ – ತೊಪಾಸಿ ಕಾರ್ಡೊಜ್ – ತಾಚೊ ಗುಪಿತ್ ದಂಧೊ ಚಲಯ್ತಾಲೊ ಮ್ಹಣ್ ದಿಸ್ತಾ…”

ತೊಪಾಸಿ ದಾಲ್ಮೇದಾ ಒಪ್ಲೊ. ದುಮ್ಗಾ ಪಿಂತಾಕ್ ಆನಿ ಸಾಂಗಾತ್ಯಾಂಕ್ ಜಾಯ್ ತಸೊ ವಿವರ್ ತಾಣೆಂ ದಿಲೊ.

ತೊಪಾಸಿಕ್ ಆನಿ ಹೆರ್ ದೊಗಾಂಕ್ ತಾಣಿಂ ಫಾವೊ ತ್ಯಾ ಭದ್ರತೆ ಖಾಲ್ ಕಾಫ್ರಿ ಗುಡ್ಯಾರ್ ದವರ್ಲೆ.

ದುಮ್ಗಾ ಪೀಂತ್ ಆನಿ ಹೆರ್ ಚವ್ಗ್ ಜಣ್ ಮಾನಾಯ್ ರಾತಾರಾತ್ ಉರ್ವಾ ಪಾವ್ಲೆ.

ತೊಪಾಸಿನ್ ಸಾಂಗ್‍ಲ್ಲೆಂ ಖೊಮಟ್ ತಾಣಿಂ ಸೊಧುನ್ ಕಾಡ್ನ್ ಸುಲಭಾಯೆನ್ ಬೀಗ್ ಮೊಡ್ಲೆಂ. ಬಾರೀಕ್ ಉಜ್ವಾಡಾಂತ್ – ಭೊಂವಾರಿಂ ಗರ್ಜೆಚೊ ಪಹರೊ ದವರ್ನ್ – ಧರ್ಣ್ ತಾಣಿಂ ಉಸ್ತಿಲಿ. ರೆಂವಾಳ್ ಮಾತಿ ತಿ ಜಾಲ್ಲ್ಯಾ ವರ್ವಿಂ ತಾಂಕಾಂ ಚಡ್ ತ್ರಾಸ್ ಜಾಂವ್ಕ್ ನಾಂತ್. ಚಡ್ ವೇಳ್‍ಯೀ ಪಾಡ್ ಜಾಂವ್ಕ್ ನಾ.

ಏಕ್ ಲ್ಹಾನ್ ಲೊಂಕ್ಡಾಚಿ ಪೇಟ್ ಆನಿ ಫಿಚಾರ್ ಕೆಲ್ಲಿ ಏಕ್ ಹಳ್ತಾಚಿ ತಾಂಬ್ಯಾಚಿ ಮೊಡ್ಕಿ ತಾಂಕಾಂ ಮೆಳ್ಳಿ. ದೊನಾಂಯ್ತೀ ಜಾಯ್ತಿಂ ಭಾಂಗಾರಾಚಿಂ ಆನಿ ರುಪ್ಯಾಚಿಂ ನಾಣಿಂ ಆನಿ ಮೊಲಾಧಿಕ್ ಥೊಡೆ ಭಾಂಗಾರಾಚೆ ನಗ್ ಆಸ್‍ಲ್ಲೆ.

ಏಕ್ ಪಾವ್ಟಿಂಚ್ಯಾಕ್ – ಜಾವ್ಯೆತ್ ಜಿವಾಚ್ಯಾ ಆಶೆನ್ – ತೊಪಾಸಿ ದಾಲ್ಮೇದಾನ್ ಸತ್ ಸಾಂಗ್‍ಲ್ಲೆಂ. ಪುಣ್ ತೆಂ ದಿರ್ವೆಂ ತಶೆಂಚ್ ಥಂಯ್ ಸೊಡುಂಕ್ ತಾಂಕಾಂ ಧಯ್ರ್ ಪಾವ್ಲೆಂ ನಾ.

ತ್ಯಾ ವಾಟೆನ್ ದಿಸಾಚೆಂ ಜಾಂವ್ ರಾತಿಚೆಂ ಸಬಾರ್ ಕಾರ್ಬಾರಾಂ ಕರ್ನ್ ತೆ ಜಾಣಾಂಸ್‍ಲ್ಲೆ. ಕಾಳೊಕಾಂತ್ಲ್ಯಾನ್‍ಂಚ್ ತಿ ಪೇಟ್ ಆನಿ ಮೊಡ್ಕಿ ವ್ಹಾವವ್ನ್ ಉರ್ವಾ ಮೊಳ್ಯಾಕ್ ತೆ ಪಾವ್ಲೆ. ಬಂದಡೆ ವೆಳಾರ್ ಜಾಯ್ತೆಂ ರಗತ್ ವ್ಹಾಳ್‍ಲ್ಲ್ಯಾ, ಆನಿ ದುಮ್ಗಾ ಪಿಂತಾಚೊ ಆದ್ಲೊ ಧಯ್ರಾಧಿಕ್ ಸಾಂಗಾತಿ ಜಾವ್ನಾಸೊನ್ ಮಾರ್ಥಿರ್ ಮೆಲ್ಲ್ಯಾ ಸಂತಾನ್ ಕಾಮ್ತಿಚಿಂ ಹಾಡಾಂ ವಿಶೆವ್ ಘೆಂವ್ಚ್ಯಾ ತ್ಯಾ ವೊವ್ಳಿಚ್ಯಾ ರುಕಾ ಲಾಗ್ಸರ್, ಚತ್ರಾಯೆನ್ ಹೆಂ ದಿರ್ವೆಂ ತಾಣಿಂ ಲಿಪವ್ನ್ ದವರ್ಲೆಂ.

ದೀಸ್ ಉಜ್ವಾಡ್ಚ್ಯಾ ಆದಿಂ ಪಾಟಿಂ ಕಾಫ್ರಿಗುಡ್ಯಾಕ್ ತೆ ಪಾವ್ಲೆ.

ತೊಪಾಸಿ ದಾಲ್ಮೇದಾ ನಿದೊಂಕ್ ನಾತ್‍ಲ್ಲೊ.

“ತುವೆಂ ಸತ್ ಸಾಂಗ್ಲೆಂಯ್” ಮ್ಹಣಾಲೊ ದುಮ್ಗಾ ಪೀಂತ್. “ತುಕಾ ಆಮಿ ಭಾಸ್ ದಿಲ್ಲೆಪರಿಂ, ತುಜೊ ಜೀವ್ ಆಮಿ ದಾನ್ ದಿತಾಂವ್.”

“ತುಮ್ಚೊ ಉಪ್ಕಾರ್!” ಮ್ಹಣಾಲೊ ತೊಪಾಸಿ.

“ಆನಿ ಆಮಿ?” ವಿಚಾರಿಲಾಗ್ಲೊ ನಾಯ್ಕ್ ಲೊರೆಸ್.

“ತುಮ್ಕಾಂಯೀ ಆಮಿ ಸುಟ್ಕಾ ದಿತಾಂವ್.”

“ಪುಣ್ ಆಮಿ ಖಂಯ್ ವೆಚೆಂ? ಹಾಂಗಾಸರ್ ಸರ್ಕಾರಿ ಶಿಪಾಯಾಂಚ್ಯಾ ಹಾತಾಂತ್ ಸಾಂಪಡ್ಲ್ಯಾರ್ ಆಮ್ಕಾಂ ಬಚಾವಿ ನಾ.”

“ತೆಂ ಆಮಿ ಜಾಣಾಂವ್. ತುಮಿಂಯೀ ಹ್ಯಾ ಮನ್ಶ್ಯಾ ಸಾಂಗಾತಾ, ಟಿಪ್ಪು ಸುಲ್ತಾನಾಚ್ಯಾ ರಾಜಾ ಭಾಯ್ರ್ – ವಚ್ಯೆತ್. ಥಂಯ್ ತುಮ್ಕಾಂ ಜಾಯ್ ತೆಂ ಕಾಮ್ ವಾ ವ್ಯಾಪ್ತ್ ಸೊಧುನ್ ಥೊಡೊ ತೇಂಪ್ ತುಮಿ ಪಾಶಾರ್ ಕರ್ಯೆತ್ – ತುಮಿ ಪಾಟಿಂ ವೆಚೆಂ ಜಾಲ್ಯಾರ್‌ಯೀ ವಚ್ಯೆತ್.”

“ನಾ, ಆಮಿ ಸದ್ದ್ಯಾಕ್ ಪಾಟಿಂ ವಚೊನ್ ಟಿಪ್ಪು ಸುಲ್ತಾನಾಚ್ಯಾ ಕ್ರೋಧಾ ಮುಖಾರ್ ರಾಂವ್ಚೆಪರಿಂ ನಾ.”

“ತರ್ ತುಮಿಂಯೀ ಗೊಂಯಾಂಚ್ ವಚಾ.”

“ಆಮಿ ಕೆದಾಳಾ ಆನಿ ಕಶೆಂ ವೆಚೆಂ?”

ದುಮ್ಗಾ ಪಿಂತಾನ್ ಆನಿ ಸಾಂಗಾತ್ಯಾಂನಿ ತಾಂಕಾಂ ಏಕ್ ವಾಟ್ ದಾಕಯ್ಲಿ. ಥೊಡ್ಯಾಚ್ ದಿಸಾಂನಿ ಹಸ್ಸನ್ ಮಹಮ್ಮದಾಚಿ ಮಂಜಿ ಕಾರ್ವಾರ್ ಥಾವ್ನ್ ಮಂಗ್ಳುರಾಕ್ ಯೆಂವ್ಚಿ ಆಸ್‍ಲ್ಲಿ. ತಾಂತುಂ ತಾಣಿಂ ತಾಂಡೇಲಾಂಚ್ಯಾ ವೆಸಾನ್ ಪಾಶಾರ್ ಜಾವ್ನ್ ವಚ್ಯೆತ್ ಮ್ಹಣ್ ತಾಂಕಾಂ ಕಳಯ್ಲೆಂ.

“ತಿ ಮಂಜಿ ಹಾಂಗಾಸರ್ ಯೆತಾ ಪರ್ಯಾಂತ್ ಲಿಪೊನ್ ತುಮಿ ಹಾಂಗಾ ರಾವಜಾಯ್. ಮಂಜಿ ಪರತ್ ಭಾಯ್ರ್ ಸರ್ಚ್ಯಾ ಆದ್ಲ್ಯಾ ರಾತಿಂ, ಬೋಳೂರ್ ತಡಿಕ್ ವಚೊನ್ ಮಂಜೆರ್ ಚಡ್ಯೆತ್.”

“ತಶೆಂ ಜಾಂವ್” ಮ್ಹಣಾಲೊ ತೊಪಾಸಿ. “ಪುಣ್ ತೊ ಹಸ್ಸನ್ ಮಹಮ್ಮದ್ ಮ್ಹಾಕಾ – ಆಮ್ಕಾಂ ವಿಕ್ರಿತ್ ಕರಿಸೊನಾಮೂ?”

“ನಾ, ತಶೆಂ ಜಾಂವ್ಚೆಂ ನಾ – ತುಮಿ ಮಾತ್ರ್ ಎಕಾಮೆಕಾಕ್ ವಿಕ್ರಿತ್ ಕರಿನಾ ಜಾಲ್ಯಾರ್ ಜಾಲೆಂ. ಆನಿ ತುಂ ಮಾತ್ರ್…” ಮ್ಹಣಾಲೊ ದುಮ್ಗಾ ಪೀಂತ್ ತೊಪಾಸಿಕ್ ಪಳೆವ್ನ್. “ಏಕ್ ಪಾವ್ಟಿಂ ತ್ಯಾ ಮಂಜೆರ್ ಚಡ್ಲ್ಯಾ ಉಪ್ರಾಂತ್ ಪಾಟಿಂ ಪಳೆನಾಕಾ – ಪಾಟಿಂ ಯೆಂವ್ಚಿ ಆಲೋಚನ್ ಬಿಲ್ಕುಲ್ ಕರಿನಾಕಾ. ಹೊ ತುಕಾ ಆಮಿ ಕರ್ಚೊ ಉಪ್ಕಾರ್.”

“ಖಂಡಿತ್ ಜಾವ್ನ್ ಹಾಂವ್ ಪಾಟಿಂ ಯೆಂವ್ಚೊ ನಾ” ಮ್ಹಣಾಲೊ ತೊಪಾಸಿ. ಜಾಕಾ ಸದ್ದ್ಯಾಕ್ ಆಪುಣ್ ಬಚಾವ್ ಜಾಂವ್ಚೆಂಚ್ ಜಾಯ್ ಆಸ್‍ಲ್ಲೆಂ. ದಿರ್ವೆಂ ಗೆಲ್ಯಾರೀ ಜೀವ್ ಉರ್ತಾ ಮ್ಹಳ್ಳೆಂ ಚಿಂತುನ್ ತಾಕಾ ಸಂತೊಸ್ ಜಾಲ್ಲೊ.

ಪುಣ್ ತೊಪಾಸಿಚೊ ಸಂತೊಸ್, ನಾಯ್ಕ್ ಲೊರೆಸಾಕ್ ಆನಿ ನಾಯ್ಕ್ ಅಂಗರಾಕ್ ನಾತ್‍ಲ್ಲೊ. ಪಟ್ಟಣಾ ಥಾವ್ನ್ ತಾಣಿಂ ಆಯಿಲ್ಲೆಂ ಕಾಮ್ ಸಲ್ವಲ್ಲೆಂ ಮಾತ್ರ್ ನಹಿಂ, ಪಟ್ಟಣಾಕ್ ಆನಿ ಪ್ರತ್ಯೇಕ್ ಜಾವ್ನ್ ಸರ್ದಾರ್ ಸಿಮಾಂವ್ಚ್ಯಾ ನಾಂವಾಡ್ದಿಕ್ ಠೊಲಿಯೆಕ್ ಪಾಟಿಂ ವೆಚೆಂ ಚುಕ್ಲೆಂ ಮ್ಹಣ್ ತಾಂಕಾಂ ಖಂತ್ ಜಾಲ್ಲಿ.

ತೆಂ ಜಾಣಾಂ ಜಾವ್ನ್, ದುಮ್ಗಾ ಪಿಂತಾನ್ – ಆಗ್ನೆಸ್ ಕುಂವರ್ನಿನ್ ಸಾಂಗ್‍ಲ್ಲ್ಯಾ ಪರ್ಮಾಣೆಂ ಆನಿ ತೊಪಾಸಿಚ್ಯಾ ಹೆಳ್ಕೆ ವಿಣೆಂ, ಹ್ಯಾ ನಾಟಕೀಯ್ ಸಾಹಸಾಚೆಂ ಮೂಳ್ ಸಮ್ಜಯ್ಲೆಂ. ಎಕಾ ಅರ್ಥಾನ್ ಆತಾಂ ತಾಣಿಂ ಕರ್ಚೆಂ ಕಾಮ್ ಸರ್ದಾರ್ ಸಿಮಾಂವ್ಚೆಂಚ್ ಮ್ಹಣ್ ಸಮ್ಜೊನ್ ತಾಂಕಾಂ ಸಮಾಧಾನ್ ಆನಿ ಧಯ್ರ್ ಭೊಗ್ಲೆಂ.

ತಾಂಚ್ಯಾ ಖರ್ಚಾ ಖಾತಿರ್ ತಾಂಕಾಂ ಗುಪಿತ್ ಥೊಡೊ ದುಡುಯೀ ದಿಲೊ. ತ್ಯಾ ಶಿವಾಯ್ ಎಕಾನ್ಯೆಕಾ ನಿಬಾನ್ ತಾಣಿಂ ತೊಪಾಸಿ ಸಾಂಗಾತಾಚ್ ರಾವಜಾಯ್, ಆನಿ ಗೊಂಯಾಂ ಪಾವ್ತಾ ಪರ್ಯಾಂತ್ ಪುಣೀ ತಾಚೆರ್ ದೊಳೊ ದವರ್ನ್ ಆಸಜಾಯ್ ಮ್ಹಳ್ಳೊ ಹಿಶಾರೊಯೀ ದಿಲೊ.

ತಿಸ್ರ್ಯಾ ದಿಸಾ ಹಸ್ಸನ್ ಮಹಮ್ಮದಾಚಿ ಮಂಜಿ ಬಂದ್ರಾಕ್ ಯೇವ್ನ್ ಪಾವ್ಲಿ. ತಿ ಪಾಟಿಂ ಸುಟೊಂಕ್ ಎಕಾ ಹಫ್ತ್ಯಾಚಿ ಪುರ್ಸತ್ ಆಸ್‍ಲ್ಲಿ. ತಿತ್ಲ್ಯಾ ವೆಳಾರ್, ದುಮ್ಗಾ ಪೀಂತ್ ಆನಿ ಸಾಂಗಾತ್ಯಾಂನಿ ಹಸ್ಸನ್ ಮಹಮ್ಮದಾಕ್‍ಯೀ ವಿವರ್ ದಿಲೊ ಆನಿ ಹೆವ್ಶಿಲ್ಯಾಂಕ್ ಧಾಡುಂಕ್ ತಯಾರಾಯ್ ಕೆಲಿ.

ಮಂಜಿ ಭಾಯ್ರ್ ಸರ್ಚ್ಯಾ ಆದ್ಲ್ಯಾ ರಾತಿಂ ತೊಪಾಸಿ ದಾಲ್ಮೇದಾಕ್ ಆನಿ ತಾಚ್ಯಾ ದೊಗಾಂ ಸಾಂಗಾತ್ಯಾಂಕ್ ಬೋಳೂರ್ ತಡಿಕ್ ವ್ಹೆಲೆ. ಥಂಯ್ಸರ್ ಮಂಜೆ ಥಾವ್ನ್ ಹೊಡೆಂ ಯೆತಾ ಪರ್ಯಾಂತ್ ವಿಶೆವ್ ಘೆಂವ್ಕ್ ತಾಂಕಾಂ ಪುರ್ಸತ್ ದಿಲಿ. ತೊಪಾಸಿ, ತ್ಯಾಚ್ – ದಿರ್ವೆಂ ಮೆಳ್‍ಲ್ಲ್ಯಾ – ಪಣ್ಗಿಲ್ ಖೊಮ್ಟಾಂತ್ ವಚೊನ್ ರಾಂವ್ಚೆಂ ಬರೆಂ ಮ್ಹಣಾಲೊ. ತಶೆಂ ಥಂಯ್ಸರ್ ತೆ ಗೆಲೆ. ಸುರಕ್ಷಿತಾಯೆಚ್ಯಾ ಕಾರಣಾ ಖಾತಿರ್ ದುಮ್ಗಾ ಪೀಂತ್ ಆನಿ ತಾಚೆ ಹೆರ್ ಮಾನಾಯ್ ನ್ಹಂಯ್ ಲಾಗಿಂ ವಚೊಂಕ್ ನಾತ್‍ಲ್ಲೆ.

ಮಂಜೆ ಥಾವ್ನ್ ಖಬ್ರೆಕ್ ರಾಕೊನ್ ಆಸ್ತಾನಾ, ತೊಪಾಸಿ ತಾಚ್ಯಾ ಸಾಂಗೊಡ್ಯಾಂಚಿ ಸಳಾವಳ್ ಕರುಂಕ್ ಲಾಗ್ಲೊ:

“ಆಬ್ಳೆ, ಹಾಂಗಾಸರ್‌ಚ್ ಹಾಂವೆಂ ಸಾಂಗ್‍ಲ್ಲೆಂ ದಿರ್ವೆಂ ಆಸ್‍ಲ್ಲೆಂ, ತೆಂ ತಾಣಿಂ ಸರ್ವ್ ವ್ಹೆಲಾಂ. ತಾಂತ್ಲೆಂ ಇಲ್ಲೆಂ ಪುಣೀ ಸೊಡ್‍ಲ್ಲೆಂ ಜಾಲ್ಯಾರ್ ಖರ್ಚಾಕ್ ಉಪ್ಕಾರ್ತೆಂ.”

“ತೆಂ ವ್ಹಯ್. ಪುಣ್ ಆಮ್ಚ್ಯಾ ಖಾಣಾ ಜೆವ್ಣಾಕ್ ತಾಣಿಂ ಉಣೆಂ ಕರುಂಕ್ ನಾ” ಮ್ಹಣಾಲೊ ನಾಯ್ಕ್ ಲೊರೆಸ್. “ತ್ಯಾ ಶಿವಾಯ್ ಸುಟ್ಕಾ ದಿಂವ್ಚಿ ದೀವ್ನ್, ಆಮ್ಚ್ಯಾ ಸುರಕ್ಷಿತ್ ಪಯ್ಣಾಚಿ ಮಾಂಡಾವಳ್‍ಯೀ ತಾಣಿಂ ಕೆಲ್ಯಾ.”

“ತೆಂ ಹಾಂವ್ ನಹಿಂ ಮ್ಹಣನಾ” ಮ್ಹಣಾಲೊ ತೊಪಾಸಿ. “ಪುಣ್ ಆಮ್ಚೆ ಕಡೆನ್ ಥೊಡೊ ದುಡು ಆಸ್‍ಲ್ಲೊ ಜಾಲ್ಯಾರ್, ಆಮ್ಕಾಂ ಗೊಂಯಾಂ ಪಾವ್‍ಲ್ಲ್ಯಾಕ್ಷಣಾ ಕಸಲಿಯೀ ವ್ಯಾಪ್ತ್ ಕರುಂಕ್ ಸುಲಭ್ ಜಾತೆಂ ಮ್ಹಳ್ಳೆಂ ಹಾಂವೆಂ. ನಾ ಜಾಲ್ಯಾರ್ ತುಮಿ ಥಂಯ್ ವಚೊನ್ ಕಿತೆಂ ಕರ್ಯೆತ್?”

“ಆಮ್ಚಿ ವ್ಯಾಪ್ತ್ ಶಿಪಾಯಾಂಚಿ. ಗೊಂಯಾಂತ್‍ಯೀ ದೇಶೀ ಶಿಪಾಯಾಂಕ್ ಕಾಮಾಂ ಮೆಳ್ತಾತ್ ಖಂಯ್. ತುಜ್ಯಾ ವಳ್ಕಿನ್ ಪುಣೀ ಆಮ್ಕಾಂ ಕಾಮ್ ಲಾಗವ್ನ್ ದೀ.”

“ತೆಂ ಹಾಂವ್ ಬಿಲ್ಕುಲ್ ಕರ್ತಲೊಂ. ತುಮಿ ಮ್ಹಜೆ ಮಿತ್ರ್ ಜಾವ್ನ್ ರಾವಾಜಾಯ್ ಮಾತ್ರ್.”

“ತಶೆಂ ಕರುಂಕ್ ಆಮಿ ತಯಾರ್‌ಚ್ ಮ್ಹಳ್ಳೆಂ ನಹಿಂವೇ ಆಮಿ?”

“ತರ್ ಬರೆಂ. ಫುಡ್ಲಿ ಗಜಾಲ್ ಉಲಂವ್ಕ್ ಫುಡೆಂ ಆಮ್ಕಾಂ ಜಾಯ್ ತಿತ್ಲಿ ಪುರ್ಸತ್ ಆಸಾ. ತುಮ್ಕಾಂ ಆತಾಂ ಹಾಂವೆಂ ಏಕ್ ಘುಟ್ ಸಾಂಗ್ಯೆತ್‍ವೇ?”

“ಕಸಲೊ ತೊ?”

“ಹಾಂಗಾ ದಿರ್ವೆಂ ಲಿಪವ್ನ್ ದವರ್‌ಲ್ಲಿ ಖಬರ್ ಹಾಂವೆಂ ಸಾಂಗ್ತಾನಾ, ಪುರ್ತೊ ವಿವರ್ ದೀಂವ್ಕ್ ನಾತ್‍ಲ್ಲೊ. ಆತಾಂ ಮ್ಹಾಕಾ ದಿಸ್ತಾ, ಆಮ್ಚ್ಯಾ ನಶೀಬಾನ್ ಜಾಲ್ಯಾರೀ ಥೊಡೊ ಪುಣೀ ದುಡು ಉರ್ಲಾ ಜಾಲ್ಯಾರ್ ಆಮಿ ಪಳೆವ್ಯೆತ್.”

“ಮ್ಹಣ್ಜೇ…”

“ಮ್ಹಣ್ಜೆ, ಪಳೆಯಾಂ” ಮ್ಹಣೊನ್ ತೊಪಾಸಿ ತ್ಯಾ ಕುಡಾಂತ್ ಹೆವ್ಶಿನ್ ತೆವ್ಶಿನ್ ಭೊಂವ್ಲೊ. “ಭಾಯ್ಲ್ಯಾನ್ ಕೊಣೀ ಯೆತಾತ್ ಜಾಲ್ಯಾರ್ ಕಾನ್ ದೀವ್ನ್ ರಾವ್ಯಾ.”

ದೆಗೆನ್ ಆಸ್‍ಲ್ಲ್ಯಾ ಬಾಂಕಾರ್ ತೊ ಚಡ್ಲೊ, ಆನಿ ಪಾಕ್ಯಾಚ್ಯಾ ಎಕಾ ವಾಸ್ಯಾಚ್ಯಾ ಇಡಾಂತ್ ಹಾತ್ ಘಾಲ್ನ್ ಏಕ್ ಲ್ಹಾನ್ ಚೀಲ್ ಸಕಯ್ಲ್ ಕಾಡ್ನ್ ತಾಣೆಂ ಹಾಲಯ್ಲೆಂ.

ಜಾಲ್ಲ್ಯಾ ‘ಗಿಝಿಂಕ್’ ಆವಾಜಾ ವರ್ವಿಂ, ತ್ಯಾ ಚೀಲಾಂತ್ ನಾಣಿಂ ಆಸಾತ್ ಮ್ಹಳ್ಳೆಂ ಸ್ಪಷ್ಟ್ ಜಾಲೆಂ.

“ಹೆಂ ಆತಾಂ ಕೊಣೆಂ ದವರ್ಚೆಂ?” ವಿಚಾರಿಲಾಗ್ಲೊ ತೊಪಾಸಿ. “ತುಮ್ಚ್ಯಾ ಆಂಗಾರ್ ದವರ್ತಾತ್ ಜಾಲ್ಯಾರೀ ಮ್ಹಜಿ ಕಬ್ಲಾತ್‍ಚ್.”

“ತುಜೆ ಕಡೆನ್‍ಂಚ್ ದವರ್ – ತುಜೆ ಕಡೆನ್ ಆಸ್ಲ್ಯಾರ್ ಆಮ್ಚೆ ಕಡೆನ್‍ಂಚ್ ಆಸ್‍ಲ್ಲೆಪರಿಂ” ಮ್ಹಣಾಲೊ ಲೊರೆಸ್.

ಥೊಡ್ಯಾ ವೆಳಾನ್ ಹೊಡೆಂ ಆಯ್ಲೆಂ.

ಹಾಂಕಾಂ ಘೆವ್ನ್, ಫಾಂತ್ಯಾಚ್ಯಾ ಭರ್ತೆರ್ ಮಂಜಿ ಭಾಯ್ರ್ ಸರ್ಲಿ. ಸರ್ದಾರ್ ಸಿಮಾಂವ್ನ್ ಆಗ್ನೆಸ್ ಕುಂವರ್ನಿ ಥಾವ್ನ್ ವಿಚಾರ್‍ಲ್ಲೆಂ ಕಾಮ್ ಇತ್ಲ್ಯಾರ್ ಚಡ್ ವಾಂಟ್ಯಾಂನಿ ಫಳಾಧಿಕ್ ಜಾಲೆಂ.

ಹಿ ಖಬರ್ ದುಸ್ರ್ಯಾ ದಿಸಾ ಭಿತರ್ ಬಂಟ್ವಾಳ್ ಆಗ್ನೆಸ್ ಕುಂವರ್ನಿಕ್ ಪಾವ್ಲಿ. ತಿಕಾ ಭಾರಿಚ್ ಸಂತೊಸ್ ಜಾಲೊ – ಎಕಾ ವಾಂಟ್ಯಾನ್.

ದುಸ್ರ್ಯಾ ವಾಂಟ್ಯಾನ್ ತಿಕಾ ಖಂತ್ ಆನಿ ಗುಪಿತ್ ಆತುರಾಯ್ ಜಾಂವ್ಕ್ ಆಸ್‍ಲ್ಲಿ. ಪಟ್ಟಣ ಥಾವ್ನ್ ಚುಕವ್ನ್ ಆಯಿಲ್ಲ್ಯಾ ಥೊಡ್ಯಾಂ ಥಾವ್ನ್, ಕೊಡಗಾಚ್ಯಾ ಲಡಾಯೆಚಿ ಖಬರ್ ತಿಕಾ ಆಯ್ಲಿ. ತಾಂತುಂ, ಟಿಪ್ಪು ಸುಲ್ತಾನ್ ಸಲ್ವಲಾ ಮಾತ್ರ್ ನಹಿಂ, ಸರ್ದಾರ್ ಸಿಮಾಂವ್ ಕಠಿಣ್ ಘಾಯೆಲಾ ಮ್ಹಳ್ಳಿ ಖಬರ್‍ಯೀ ಚುಕಾಮುಕಿಂ ಯೇವ್ನ್ ಪಾವ್ತಚ್ ತಿಚೆಂ ಹೃದಯ್ ಉಮಾಳ್ಳೆಂ.

ಫುಡ್ಲಿ ಖಬರ್ ಫಾವೊ ತ್ಯಾಪರಿಂ ಹಾಡಯ್ಜಾಯ್, ಆನಿ ಗರ್ಜ್ ಪಡ್ಲ್ಯಾರ್ ಆಪುಣ್ ಜಾಲ್ಯಾರೀ ಖುದ್ ಪಟ್ಟಣಾಕ್ ವಚಜಾಯ್ ಮ್ಹಣ್ ತಿಣೆಂ ನಿಚೆವ್ ಕೆಲೊ.

* * * * *

ಕೊಡಗಾಚ್ಯಾ ಲಡಾಯೆ ಥಾವ್ನ್ ಪಾಟಿಂ ಆಯಿಲ್ಲೊ ಟಿಪ್ಪು ಸುಲ್ತಾನ್, ಝುಂತ್, ದರ್ಬಾರ್ ಸಭಾ ಕಸಲಿಯೀ ಆಪಯ್ನಾಸ್ತಾಂ ಶೀದಾ ರಾವ್ಳೆರಾಕ್ ಗೆಲೊ.

ಫಾವೊ ತೊ ವಿಶೆವ್ ಆನಿ ಚಿಕಿತ್ಸಾ ಘೆಂವ್ಚ್ಯಾ ಖಾತಿರ್, ಸರ್ದಾರ್ ಸಿಮಾಂವ್ಕ್ ತಾಣೆಂ ತಾಚ್ಯಾ ಬಿಡಾರಾಕ್ ಧಾಡ್ಲೊ. ಪಯ್ಣಾಚ್ಯಾ ಪುರಾಸಾಣೆ ವರ್ವಿಂ ಸರ್ದಾರ್ ಸಿಮಾಂವ್ಕ್ ಪರ್ತ್ಯಾನ್ ತಾಪ್ ಯೆತಾಲೊ ಆನಿ ಭೋವ್ ನಿತ್ರಾಣ್ ತೊ ಜಾಲ್ಲೊ.

ದುಸ್ರ್ಯಾ ದಿಸಾ ಆಯ್ಕೊಂಕ್ ಮೆಳ್‍ಲ್ಲ್ಯೊ ಗಜಾಲಿ, ಕೊಣಾಯ್ಕೀ ಸಮಾಧಾನ್ ದಿಂವ್ಚೆ ತಸಲ್ಯೊ ಜಾಂವ್ಕ್ ಪಾವ್‍ಲ್ನಾಂತ್.

ಕೊಡಗಾಚ್ಯಾ ಲಡಾಯೆಂತ್ ಜಾಲ್ಲೆಂ ನಾ ಸಮಾಧಾನ್ ಆನಿ ಅವಮಾನ್ ಗೀಳ್ನ್, ಟಿಪ್ಪು ಸುಲ್ತಾನಾನ್ ದುಸ್ರ್ಯಾಚ್ ದಿಸಾ, ರಾವ್ಳೆರಾಂತ್ಲ್ಯಾ ರಾಟಾವಳಿಂಚಿ ಖಬರ್ ಘೆತ್ಲಿ.

ತೊ ನಾತ್‍ಲ್ಲ್ಯಾ ವೆಳಾರ್, ಪಟ್ಟಣಾಂತ್ ಆಸ್‍ಲ್ಲ್ಯಾ ಅಧಿಕಾರ್‍ಯಾಂ ಮಧೆಂ ದೋನ್ ಪಾಡ್ತಿ ಜಾಲ್ಲಿಂ ಖುಣಾಂ ಆಯ್ಕೊನ್ ತೊ ಪುರ್ತೊ ಖುಬಾಳ್ಳೊ. ಎಕಾ ಪಾಡ್ತಿಚೆಂ ಮುಖೇಲ್ಪಣ್ ಸರ್ದಾರ್ ಯೂಸುಫ್ ಆಲಿಚ್ಯಾ ಹಾತಾಂತ್ ಆಸಾ ಮ್ಹಣ್ ತಾಣೆಂ ಆಯ್ಕೊನ್ ಘೆತ್ಲೆಂ. ಆನ್ಯೇಕಾ ಪಾಡ್ತಿಚೊ ಮುಖೆಲಿ ಕೋಣ್ ಮ್ಹಳ್ಳೆಂ ತಾಕಾ ಸ್ಪಷ್ಟ್ ಜಾಂವ್ಕ್ ನಾ.

ತೊ ನಾತ್‍ಲ್ಲ್ಯಾ ವೆಳಾರ್, ಥೊಡಿಂ ಕ್ರಿಸ್ತಾಂವ್ ಕುಟ್ಮಾಂ ಬಂದಡ್ ಚುಕವ್ನ್ ಪರಾರಿ ಜಾಲ್ಯಾಂತ್ ಮ್ಹಳ್ಳಿ ಖಬರ್ ತಾಕಾ ಆಯ್ಕೊಂಕ್ ಮೆಳ್ಳಿ. ತಾಚ್ಯಾ ಘಾಯಾಚೆರ್ ಮೀಟ್ ಪಡ್ಲೆಂ.

ತಾಚೆ ದೊಳೆ ತಾಂಬ್ಡೆ ಜಾಲೆ.

ತಾಚ್ಯಾ ಗೊಮ್ಟ್ಯಾಚ್ಯೊ ಶಿರೊ ಫುಗ್ಲ್ಯೊ.

ತಶೆಂ ಆಸ್ತಾಂ, ಮಂಜರಾಬಾದ್‍ಚ್ಯಾ ಕೊತ್ವಾಲಾನ್ ಧಾಡ್‍ಲ್ಲಿ ವರ್ದಿ ತಾಚ್ಯಾ ಹಾತಾಕ್ ಮೆಳ್ಳಿ: ಉಪ್ಪಿನಂಗಡಿ ಲಾಗಿಂ ಜಾಲ್ಲ್ಯಾ ‘ಅವ್ಗಡಾಚಿ’ ಆನಿ ಕೈದಿ ತೊಪಾಸಿ ದಾಲ್ಮೇದಾ ಆನಿ ಸರ್ದಾರ್ ಸಿಮಾಂವ್ಚೆ ದೋಗ್ ಸವಾರ್ – ಮೊಡಿಂ ಸಯ್ತ್ ಮೆಳನಾಸ್ತಾಂ – ನ್ಹಂಯ್ತ್ ನಪಂಯ್ಚ್ ಜಾಲ್ಲೆಂ ಆಯ್ಕೊನ್ ಧರ್ಣಿಕ್ ತಾಣೆಂ ಖೊಟ್ ಮಾರ್ಲಿ:

“ಖಾಮೋಶ್!” ತೊ ಗರ್ಜಾಲೊ. “ಪಳೆವ್ನ್ ಸೊಡ್ಯಾಂ!”

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

ಪ್ರಕರಣ್ 19: ವಾಗ್ದಾನ್

ಸರ್ದಾರ್ ಸಿಮಾಂವ್ಚ್ಯಾ ಸ್ಪಷ್ಟ್ ತಾಕಿದೆ ಪರ್ಮಾಣೆಂ ತಾಚೆ ಸವಾರ್ ಮುಖ್ಲ್ಯಾ ಸವಾರಾಂಕ್ ರಾಕೊನ್ ರಾವ್ಲೆ. ತೆ ಚಡುಣೆಂ ಫಾರಾಂಚ್ಯಾ ಲಾಂಬಾಯೆಕ್ ಪಾವ್ತಚ್, ದಿಂಬಿಯಾಂನಿ ದೀಷ್ಟ್ ಧರುನ್ ಆಸ್‍ಲ್ಲ್ಯಾ ಚವ್ಗಾಂ ಸವಾರಾಂನಿ ತಾಂಚ್ಯಾ ಹಾತೆರಾಂಚೆ ಘೊಡೆ ವೊಡ್ಲೆ.

ಪಾವ್ಸಾಕ್ ಶೆಳೆಲ್ಲಿ ಏಕ್ ಬಂದೂಕ್ ಫುಟೊಂಕ್ ನಾ ತರೀ, ಹೆರ್ ತೀನ್ ಫುಟ್ಲ್ಯೊ. ಮುಖಾರ್ ಆಸ್‍ಲ್ಲ್ಯಾ ಪಯ್ಕಿಂತ್ಲೊ ಎಕ್ಲೊ ಸವಾರ್, ಘೊಡ್ಯಾಚ್ಯಾ ಪಾಟಿರ್ ಥಾವ್ನ್ ಝಡೊನ್ ಪಾಟಿಂ ಉಸಳ್ಳೊ. ತಾಚೊ ಘೊಡೊ ಭಿಯಾನ್ ಉಜ್ವ್ಯಾಕ್ ಘುಂವೊನ್ ಹೆರಾಂಚ್ಯಾ ಅಡ್ಕಳಿಕ್ ಕಾರಣ್ ಜಾಲೊ. ದುಸ್ರೊ ಘೊಡೊ ಹರ್ದ್ಯಾಕ್ ಮಾರ್ ಜಾವ್ನ್ ಸವಾರಾ ಸಮೇತ್ ಧರ್ಣಿಕ್ ಶೆವ್ಟಲೊ. ತಿಸ್ರ್ಯಾಕ್ ಮಾರ್ ಜಾಂವ್ಕ್ ನಾ ತರೀ ತೊ ದೋನ್ ಪಾಯಾಂನಿ ಥಾಂಬ್ಲೊ.

ಹೆರ್ ಸವಾರಾಂನಿ ಲಗಾಮ್ ವೊಡ್ಲೆ. ಟಿಪ್ಪು ಸುಲ್ತಾನಾಚ್ಯಾ ಠೊಲಿಯೆಂತ್ಲೆ ಘೊಡೆ ಧಾಂವ್ತಾನಾ, ಪಾಟಿಂ ಕೊಣ್‍ಯೀ ರಾವ್ಲ್ಯಾತ್ ಆಸ್ಯೆತ್ ಮ್ಹಣ್ ತಾಣಿಂ ಚಿಂತುಂಕ್ ನಾತ್‍ಲ್ಲೆಂ. ಆತಾಂ ಚಡಿತ್ ಚಿಂತುಂಕ್ ತಾಂಕಾಂ ಪುರ್ಸತ್‍ಯೀ ನಾತ್‍ಲ್ಲಿ. ಮುಖಾರ್ ಆಸ್‍ಲ್ಲ್ಯಾಂಕ್ ಪಾಟಿಂ ರಾವೊಂಕ್, ಆನಿ ಪಾಟಿಂ ಆಸ್‍ಲ್ಲ್ಯಾಂಕ್ ಮುಖಾರ್ ಯೇಂವ್ಕ್ ತಾಂಚೆ ಮಧೆಂಚ್ ಸಮಸ್ಯಾ ಉದೆಲಿ. ಕಸಲ್ಯಾಯೀ ನಿರ್ಣಯಾಕ್ ತಾಣಿಂ ಯೆಂವ್ಚ್ಯಾ ಆದಿಂಚ್, ಸರ್ದಾರ್ ಸಿಮಾಂವ್ ಆನಿ ತಾಚೆ ಸಾಂಗಾತಿ, ಲಡಾಯೆಚಿ ಹಾಕ್ ದೀವ್ನ್ ತಾಂಚೆರ್ ಪಡ್‍ಲ್ಲೆ. ಸರ್ದಾರ್ ಸಿಮಾಂವ್ನ್ ಆಪ್ಲೊ ಘೊಡೊ ಉಜ್ವ್ಯಾಕ್ ಧಾಂವ್ಡಾವ್ನ್ ಬಗ್ಲೆನ್ ಫುಡೆಂ ಯೆತಚ್ ಆಸ್‍ಲ್ಲ್ಯಾ ಧನುರ್ಧಾರಿ ಸವಾರಾಚೆರ್ ಆಪ್ಟಿಲೊ. ಹಾತಾಂತ್ಲೆಂ ಧೊಣು ಚುಕೊನ್ ಧರ್ಣಿರ್ ಉಸ್ಳಲ್ಲ್ಯಾ ತ್ಯಾ ಸವಾರಾನ್ ಉಟಜಾಯ್ ಜಾಲ್ಯಾರ್ ಸರ್ದಾರ್ ಸಿಮಾಂವ್ಚಿ ಲಾಂಬ್ ತಲ್ವಾರ್ ತಾಚ್ಯಾ ಆಂಗಾಂತ್ ರೊಂಬ್‍ಲ್ಲಿ. ಪಾಟಿಂ ತೊ ಘುಂವ್ತಾನಾ ಆನ್ಯೇಕ್ಲೊ ಸವಾರ್ ತಾಚ್ಯಾ ಆಂಗಾಂತ್ ರೊಂಬ್‍ಲ್ಲಿ. ಪಾಟಿಂ ತೊ ಘುಂವ್ತಾನಾ ಆನ್ಯೇಕ್ಲೊ ಸವಾರ್ ತಾಚ್ಯಾ ಆಂಗಾರ್ ಪಡೊಂಕ್ ಯೆತಾಲೊ. ತಾಚ್ಯಾ ಘೊಡ್ಯಾಕ್ ಆಪ್ಟತಚ್ ತೊ ಘೊಡೊಯೀ ಉಚಾಂಬಳ್ ಜಾವ್ನ್ ಉಡ್ಲೊ. ಚುಕಂವ್ಕ್ ವೇಳ್ ನಾತ್‍ಲ್ಲೊ ಸರ್ದಾರ್ ಸಿಮಾಂವ್ ತಲ್ವಾರ್ ಝಳ್ಪಾವ್ನ್, ಧರ್ಣಿಕ್ ಉಡ್ತಾನಾ ತಾಚ್ಯಾ ತಲ್ವಾರಿಚೊ ಧೊಮೊಸ್ ತ್ಯಾ ಸರ್ದಾರಾಚ್ಯಾ ಬಾವ್ಳ್ಯಾಕ್ ತೊಪೊನ್ ಜಾಲ್ಲೊ.

ತಿತ್ಲ್ಯಾ ವೆಳಾ ಭಿತರ್ ಸರ್ದಾರ್ ಸಿಮಾಂವ್ಚ್ಯಾ ಸಾಂಗಾತ್ಯಾಂ ಪಯ್ಕಿ ದೋಗ್ ಜಣ್ ಪರ್ತಲ್ಲೆ. ತೇಗ್ ಜಣ್ ಘಾಯೆಲ್ಲೆ. ಕೊಡ್ಗ್ಯಾಂ ಪಯ್ಕಿ ಚವ್ಗ್ ಜಣ್ ಪರ್ತಲ್ಲೆ ಆನಿ ತೇಗ್ ಜಣ್ ಘಾಯೆಲ್ಲೆ. ಷೇಕ್ ಆಲಿನ್‍ಯೀ ತಾಚ್ಯಾ ವಾಂಟ್ಯಾಚ್ಯಾ ಧನುರ್ಧಾರಿಕ್ ಉಸ್ಳಾಯಿಲ್ಲೊ, ಪುಣ್ ತಾಚಿ ತಲ್ವಾರ್ ಕುಡ್ಕೆ ಜಾಲ್ಲಿ. ಥಾರೊ ಚುಕೊನ್ ಧರ್ಣಿರ್ ಪಡ್‍ಲ್ಲ್ಯಾ ತಾಕಾ ಕಾಬಾರ್ ಕರುಂಕ್ ಎಕ್ಲೊ ಕೊಡ್ಗೊ ಸವಾರ್ ಪೆಚಾಡ್ತಾಲೊ. ತಶೆಂಚ್ ಉರ್ಲ್ಯಾರ್ ಆನಿ ಥೊಡ್ಯಾಚ್ ವೆಳಾ ಭಿತರ್ ಷೇಕ್ ಆಲಿಚಿ ಕಾಣಿ ಕಾಬಾರ್ ಜಾತಿ. ಸರ್ದಾರ್ ಸಿಮಾಂವ್ನ್ ದಾವ್ಯಾ ಹಾತಾನ್ ಆಪ್ಲ್ಯಾ ಕಮರ್‌ಬಾಂಧಾಂತ್ಲಿ ಬಂದೂಕ್ ಕಾಡ್ನ್, ತಿಚ್ಯಾ ಕುಂದ್ಯಾನ್ ಕೊಡ್ಗ್ಯಾಚೊ ತಕ್ಲೊ ಭೆಸಾಂ ಕೆಲೊ.

ತಿತ್ಲೆಂಚ್. ದುಸ್ರ್ಯಾ ಘಡ್ಯೆ ಆನ್ಯೇಕ್ಲ್ಯಾ ಕೊಡ್ಗ್ಯಾ ಸವಾರಾನ್, ಜಿವಾಚ್ಯಾ ಅಕ್ಲಾಸಾಕ್ ಮ್ಹಳ್ಳೆಪರಿಂ ಆಪ್ಲ್ಯಾ ಹಾತಾಂತ್ಲಿ ಬಂದೂಕ್ ಉಕ್ಲುನ್, ಸರ್ದಾರ್ ಸಿಮಾಂವ್ಚೆರ್ ಫಾರ್ ಸೊಡ್ಲೊ. ಬಂದೂಕೆಚೊ ಬಾರೀಕ್ ಮೊನಿಸಾಂವ್ ಸರ್ದಾರ್ ಸಿಮಾಂವ್ಚ್ಯಾ ಭುಜಾಂತ್ ರಿಗೊನ್ ತೊ ಕೊಸಳ್ಳೊ. ತಾಚಿ ತಕ್ಲಿ ಘುಂವೊನ್ ತಾಚ್ಯಾ ದೊಳ್ಯಾಂಕ್ ಕಾಳೊಕ್ ಆಯ್ಲೊ. ಪಡ್‍ಲ್ಲೆ ಕಡೆನ್ ಥಾವ್ನ್ ಉಟೊಂಕ್ ತಾಕಾ ಜಾಯ್ನಾತ್‍ಲ್ಲ್ಯಾ ವೆಳಾರ್ ತಾಕಾ ತೊಪುನ್ ಮಾರುಂಕ್ ತೊ ದುಸ್ಮಾನ್ ಸವಾರ್ ಫುಡೆಂ ಸರ್ತಾಲೊ.

ಷೇಕ್ ಆಲಿನ್ ತೆಂ ಪಳೆಲೆಂ. ಘಡಿಯೆ ಆದಿಂ ಸರ್ದಾರ್ ಸಿಮಾಂವ್ನ್ ತಾಚೊ ಜೀವ್ ಬಚಾವ್ ಕೆಲ್ಲೊ ತಾಕಾ ಉಗ್ಡಾಸ್ ಆಯ್ಲೊ. ಸಮರಾಚ್ಯಾ ನಿತಿಂತ್ ವೈಯಕ್ತಿಕ್ ಜಿದ್ದಾಚಿ ತಾಕಾ ವಿಸರ್ ಪಡ್ಲಿ. ಪಡ್‍ಲ್ಲ್ಯಾ ಸವಾರಾಚಿ ತಲ್ವಾರ್ ಒಡುನ್, ದೊನ್‍ಂಚ್ ಕದಮಾಂನಿ ತೊ ಫುಡೆಂ ಉಡ್ಲೊ. ಸರ್ದಾರ್ ಸಿಮಾಂವ್ಚೆರ್‌ಚ್ ನದರ್ ದವರ್ನ್ ಆಸ್‍ಲ್ಲಾ ತ್ಯಾ ಸವಾರಾಚ್ಯಾ ಪಾಟಿಂತ್ಲ್ಯಾನ್ ಭಿತರ್ ಸರ್‌ಲ್ಲಿ ತಲ್ವಾರ್ ಪೊಟಾಂತ್ಲ್ಯಾನ್ ಭಾಯ್ರ್ ಸರ್ಲಿ. ತಿತ್ಲ್ಯಾರ್ ಸರ್ದಾರ್ ಸಿಮಾಂವ್ನ್ ದೊಳೆ ಉಗ್ತೆ ಕೆಲ್ಲೆ. ತೊ ಉಟೊನ್ ಬಸ್‍ಲ್ಲೊ.

ಲಡಾಯ್ ಆಖೇರ್ ಜಾಲಿ. ಕೊಡಗಾಚ್ಯಾ ಠೊಲಿಯೆಂತ್ಲೆ ಸಾರ್ಕೆ ಉರ್‌ಲ್ಲೆ ಸವಾರ್, ತಾಂಚೆ ಪಯ್ಕಿ ಘಾಯೆವ್ನ್ ಪಿಂರ್ಗೊನ್ ಆಸ್‍ಲ್ಲ್ಯಾ ದೊಗಾಂಕ್ ಘೆವ್ನ್ ಥಂಯ್ ಥಾವ್ನ್ ಪರಾರಿ ಜಾಲೆ. ಮೈಸೂರ್ಚೆ ಸವಾರ್ ತಾಂಚಿ ಪಾಟ್ ಧರುಂಕ್ ತಯಾರ್ ಆಸ್‍ಲ್ಲೆ. ತಾಣಿಂ ತಶೆಂ ಕರ್ಚಿ ಗರ್ಜ್ ನಾ ಮ್ಹಣ್ ಸರ್ದಾರ್ ಸಿಮಾಂವ್ನ್ ತಕ್ಲಿ ಹಾಲಯ್ಲಿ. ಪಾಟಿಂ ರಾವೊನ್, ಘಾಯೆಲ್ಲ್ಯಾ ತಾಂಚ್ಯಾ ಸಾಂಗಾತ್ಯಾಂಚಿ ಪ್ರಥಮ್ ಚಿಕಿತ್ಸಾ ಕರುಂಕ್ ಲಾಗ್ಲೆ.

ಸಕ್ಡಾಂ ಪ್ರಾಸ್ ಚಡ್, ಸರ್ದಾರ್ ಸಿಮಾಂವ್ ಘಾಯೆಲ್ಲೊ. ತಾಚ್ಯಾ ಭುಜಾಂತ್ ರಿಗ್‍ಲ್ಲ್ಯಾ ಮೊನಿಸಾಂವಾಚ್ಯಾ ಘಾಯಾಂತ್ಲ್ಯಾನ್ ರಗತ್ ವ್ಹಾಳೊನ್, ಕಮರ್‌ಬಂಧಾ ವಯ್ರ್ ತಾಚೆಂ ವಸ್ತುರ್ ಸಗ್ಳೆಂ ಭಿಜ್‍ಲ್ಲೆಂ. ತಾಚ್ಯಾ ಕಪಾಲಾಕ್‍ಯೀ ಮಾರ್ ಜಾವ್ನ್ ರಗತ್ ದೊಳ್ಯಾ ವಯ್ಲ್ಯಾನ್ ದೆಂವೊನ್ ತಾಚೆಂ ಕಾನ್ಸುಲ್ ತಾಂಬ್ಡೆಂ ಜಾಲ್ಲೆಂ. ನಿತ್ರಾಣ್ ತೊ ಜಾಲ್ಲೊ.

ಸವಾರಾಂನಿ ತಾಚ್ಯಾ ಭುಜಾ ವಯ್ಲೆಂ ವಸ್ತುರ್ ತಲ್ವಾರಿಚ್ಯಾ ಪೊಂತಾನ್ ಕಾತ್ರುನ್ ಕಾಡ್ನ್ ಥಂಯ್ಚ್ಯಾ ಥಂಯ್ ಘಾಯ್ ಬಾಂಧ್ಲೊ. ಮೊನಿಸಾಂವ್ ಕಾಡುಂಕ್ ಸದ್ದ್ಯಾಕ್ ಸಾಧ್ಯ್ ನಾತ್‍ಲ್ಲ್ಯಾ ವರ್ವಿಂ ಘಾಯಾಚಿ ದೂಕ್ ವರ್ತಿ ಜಾಲ್ಲಿ ಆನಿ ಫಡಾಫಡ್ ಸುರು ಜಾಲ್ಲಿ.

ತಸೊಚ್ ತಾಣಿಂ ಕಪಾಲಾಚೊ ಘಾಯ್‍ಯೀ ಬಾಂಧ್ಲೊ.

ಲಡಾಯೆಂತ್ ಮೋರ್ನ್ ಪಾವ್‍ಲ್ಲ್ಯಾ ಸವಾರಾಂಕ್ – ದೊನೀ ಪಾಡ್ತಿಚ್ಯಾಂಕ್ – ತಾಣಿಂ ಜಾತಾ ತ್ಯಾ ಪರ್ಮಾಣೆಂ ಮಾತ್ಯೆಕ್ ಪಾವ್ನ್ ವಯ್ರ್ ಫಾತೊರ್ ಧಾಂಪ್ಲೆ. ತಸೊ ಏಕ್ ದೋನ್ ತೀನ್ ವೊರಾಂಚೊ ವೇಳ್ ಪಾಶಾರ್ ಜಾಲೊ. ಉಪ್ರಾಂತ್ ಥೊಡೊ ವೇಳ್ ವಿಶೆವ್ ಘೆವ್ನ್ ಜಾತಚ್ ಪಾಟಿಂ ವಚೊಂಕ್ ತೆ ಭಾಯ್ರ್ ಸರ್ಲೆ.

ಘಾಯೆವ್ನ್ ಪಾಟಿಂ ಉರ್‌ಲ್ಲ್ಯಾ ಕೊಡ್ಗ್ಯಾ ಸವಾರಾಕ್ ತಾಣಿಂ ಸಾಂಗಾತಾ ಕೈದಿ ಕರ್ನ್ ಘೆತ್ಲೊ. ಘಾಯೆಲ್ಲ್ಯಾ ಪರಿಸ್ಥಿತೆಂತ್ ತಾಂಚೆಂ ಪಯ್ಣ್ ಭೋವ್ ಕಷ್ಟಾಂಚೆಂ ಆನಿ ಸವ್ಕಾಸ್ ಜಾಲೆಂ.

ತಾಣಿಂ ವಚೊನ್, ಟಿಪ್ಪು ಸುಲ್ತಾನ್ ಆನಿ ತಾಚ್ಯಾ ಅಂಗರಕ್ಷಕಾಂನಿ ಪಯ್ಲೆಂ ಪಾವೊನ್ ಥಾರೊ ಕೆಲ್ಲ್ಯಾ ಛತ್ರಾಕ್ ಪಾವ್ತಾನಾ ಸಾಂಜ್ ಜಾಲ್ಲಿ. ತಾಂಚಿ ಗತ್‍ಯೀ ಬಿರ್ಮತೆಚಿ ಜಾಲ್ಲಿ.

“ಕೋಣ್ ಥಂಯ್? ಖಬಡ್ದಾರ್!” ಛತ್ರಾಚ್ಯಾ ಆಡೊಸಾ ಥಾವ್ನ್ ಹುಡ್ಕಿಲ್ಲೊ ಆವಾಜ್ ಜಾಲೊ.

“ದೋಸ್ತ್ – ಬಾದಶಹಾ ಟಿಪ್ಪು ಸುಲ್ತಾನ್ ಬಹಾದುರಾಚ್ಯಾ ರಿಸಾಲಾಂತ್ಲೆ ಸವಾರ್.”

“ಕೋಣ್ ಸರ್ವ್ ಆಸಾತ್?”

“ಸರ್ದಾರ್ ಸಿಮಾಂವ್, ಕೊತ್ವಾಲ್ ಷೇಕ್ ಆಲಿ ಆನಿ ಹೆರ್.”

“ಫುಡೆಂ ಯೆವ್ಯೆತ್.”

ಸರ್ದಾರ್ ಸಿಮಾಂವ್ ಆನಿ ಸಾಂಗಾತಿ ಫುಡೆಂ ಸರ್ಲೆ. ಛತ್ರಾ ಭಿತರ್ ಆಸ್‍ಲ್ಲ್ಯಾ ಅಂಗರಕ್ಷಕಾಂ ಪಯ್ಕಿ ಥೊಡೆ ಭಾಯ್ರ್ ಆಯ್ಲೆ. ಆಯಿಲ್ಲ್ಯಾಂಚಿ ಆನಿ ತಾಂಚ್ಯಾ ಘೊಡ್ಯಾಂಚಿ ಜತನ್ ಘೆಂವ್ಕ್ ತೆ ಫುಡೆಂ ಸರ್ಲೆ.

ಘಾಯಾಂಚ್ಯಾ ದುಕಿನ್ ಆನಿ ರಗ್ತಾಚ್ಯಾ ನಷ್ಟಾನ್, ಸರ್ದಾರ್ ಸಿಮಾಂವ್ಕ್ ತಾಪ್ ಯೆತಾಲೊ. ತೆದೊಳ್ ಪರ್ಯಾಂತ್ ಮತಿಚ್ಯಾ ಥಿರಾಸಾಣೆನ್ ಆನಿ ಹಟಾನ್, ಘೊಡ್ಯಾಚ್ಯಾ ಕುಸಾಳಾಂಕ್ ಧೊಂಪ್ರಾಂ ಅರ್ನುನ್ ಧರ್ನ್ ನೀಟ್ ತೊ ಬಸ್‍ಲ್ಲೊ. ಹೆರಾಂನಿ ಆಧಾರ್ ದೀವ್ನ್ ಘೊಡ್ಯಾರ್ ಥಾವ್ನ್ ದೆಂವಯ್ತಾನಾ ತಾಚಿ ಮತ್ ಚುಕ್‍ಲ್ಲಿ.

ಬಾದಶಹಾ ಭಾಯ್ರ್ ಆಯ್ಲೊ. ಹೆರಾಂಚೆರ್ ಆನಿ ಪ್ರತ್ಯೇಕ್ ಜಾವ್ನ್ ಸರ್ದಾರ್ ಸಿಮಾಂವ್ಚೆರ್ ತಾಣೆಂ ದೀಷ್ಟ್ ಘಾಲಿ.

“ಉರ್ಲೆಲೆ ಖಂಯ್ ಆಸಾತ್?” ವಿಚಾರ್ಲೆಂ ತಾಣೆಂ ಥೊಡ್ಯಾ ವೆಳಾನ್.

“ತೆ, ಲಡಾಯೆಂತ್ ಮೋರ್ನ್ ಪಾವ್ಲೆ, ಹುಜೂರ್!” ಷೇಕ್ ಆಲಿನ್ ವಿವರ್ ದಿಲೊ. “ದುಸ್ಮಾನಾಂ ಪಯ್ಕಿಂತ್ಲ್ಯಾ ಎಕ್ಲ್ಯಾಕ್ ಆಮಿ ಕೈದಿ ಕರ್ನ್ ಹಾಡ್ಲಾ. ಮೆಲ್ಲ್ಯಾ ಪಾಂಚ್ ಜಣಾಂಕ್ ಆಮ್ಚ್ಯಾ ತೆಗಾಂ ಸಾಂಗಾತಾ ಥಂಯ್ಚ್ ಆಮಿ ಮಾತ್ಯೆಕ್ ಪಾಯ್ಲ್ಯಾತ್.”

“ಆಮ್ಚ್ಯಾ ಜಿವಾಚೆಂ ಸಂರಕ್ಷಣ್ ಕರುಂಕ್ ತುಮಿ ಕೆಲ್ಲೆಂ ಕಾಮ್ ವರ್ತೆಂ ಜಾವ್ನಾಸಾ. ಆಮಿ ತೆಂ ಉಗ್ಡಾಸ್ ದವರ್ತೆಲ್ಯಾಂವ್. ಪ್ರತ್ಯೇಕ್ ಜಾವ್ನ್…” ಮ್ಹಣಾಲೊ ತೊ, ಮತಿರ್ ನಾತ್‍ಲ್ಲ್ಯಾ ಸರ್ದಾರ್ ಸಿಮಾಂವ್ಚೆರ್ ಮರ್ಯಾದಿಚಿ ದೀಷ್ಟ್ ಘಾಲ್ನ್. “ಸರ್ದಾರ್ ಸಿಮಾಂವ್ ಕಿತ್ಲೊ ಘಾಯೆಲಾ?”

“ತಾಚ್ಯಾ ಭುಜಾಕ್ ಫಾರ್ ಲಾಗ್ಲಾ, ಆನಿ ತಾಚ್ಯಾ ಕಪಾಲಾಕ್ ಮಾರ್ ಜಾಲಾ. ತುರ್ತಾನ್ ಫಾವೊ ತಿ ಚಿಕಿತ್ಸಾ ಕೆಲ್ಯಾರ್, ತಾಚ್ಯಾ ಜಿವಾಕ್ ಅಪಾಯ್ ಆಸಾಸೊ ನಾ ಮ್ಹಣ್ ದಿಸ್ತಾ.”

“ಬರೆಂಚ್” ಮ್ಹಣಾಲೊ ಟಿಪ್ಪು ಸುಲ್ತಾನ್. “ಆಮ್ಚ್ಯಾ ಸಾಂಗಾತಾ ಪಯ್ಣ್ ಕರುಂಕ್ ತಾಕಾ ಸಾಧ್ಯ್ ಜಾತಾ ಪರ್ಯಾಂತ್ ಆಮಿ ಹಾಂಗಾಸರ್ ರಾವ್ಯೆತ್. ತಿತ್ಲ್ಯಾ ವೆಳಾರ್ ತಾಚಿ ಬರಿ ಶುಶ್ರೂಷಾ ಕರ್ಯಾ, ಆನಿ ತೊ ಮತಿರ್ ಯೆತಚ್ ಆಮ್ಕಾಂ ಖಬರ್ ದಿಯಾ.” ತೊ ಭಿತರ್ ಗೆಲೊ.

ಅರ್ಧ್ಯಾ ವೊರಾನ್ ಸರ್ದಾರ್ ಸಿಮಾಂವ್ ಮತಿರ್ ಆಯ್ಲೊ.

ಬಾದಶಹಾಚ್ಯಾ ಠೊಲಿಯೆಂತ್ಲ್ಯಾ ಹಕೀಮಾನ್, ತಾಚ್ಯಾ ಭುಜಾಚೊ ಘಾಯ್ ಉಸವ್ನ್, ಮೊನಿಸಾಂವ್ ಭಾಯ್ರ್ ಕಾಡ್ನ್, ವಕತ್ ಲಾವ್ನ್ ಬಾಂಧ್‍ಲ್ಲೆಂ. ತಾಚೆಂ ಕಾನ್ಸುಲ್ ನಿತಳ್ ಕರ್ನ್, ಕಪಾಲಾಚ್ಯಾ ಘಾಯಾಕ್‍ಯೀ ವಕತ್ ಲಾಯಿಲ್ಲೆಂ. ರಗ್ತಾಳಿ ಜಾಲ್ಲಿ ತಾಚಿ ಉಸ್ತಾಯ್ಕಿ ಕಾಡ್ನ್, ನಿತಳ್ ಮುಸ್ತಾಯ್ಕಿ ತಾಕಾ ನ್ಹೆಸಯಿಲ್ಲಿ.

ತೊ ಮತಿರ್ ಆಯ್ಲಾ ಮ್ಹಳ್ಳೆಂ ಆಯ್ಕತಚ್, ಬಾದಶಹಾಚ್ ತಾಚ್ಯೆ ಸರ್ಶಿನ್ ಆಯ್ಲೊ. ತಾಕಾ ಪಳೆವ್ನ್ ಉಲಂವ್ಕ್ ಪ್ರಯತ್ನ್ ಕರ್ಚ್ಯಾ ಸರ್ದಾರ್ ಸಿಮಾಂವ್ಕ್, ಉಲಯ್ನಾಕಾ ಮ್ಹಣ್ ತಾಣೆಂ ಹಾತ್ ಭಾಸ್ ಕೆಲಿ:

“ಉಲಯ್ನಾಕಾ, ಉಟನಾಕಾ, ಸರ್ದಾರ್ ಸಿಮಾಂವ್” ಮ್ಹಣಾಲೊ ತೊ. “ತುವೆಂ ಸಾಂಗೊಂಕ್ ಆಸ್‍ಲ್ಲೆಂ ಉಪ್ರಾಂತ್ ಸಾಂಗ್ಯೆತ್. ಆತಾಂ ಸಾಂಗೊಂಕ್ ಆಸ್‍ಲ್ಲೆಂ, ಆಮಿಂಚ್ ಸಾಂಗ್ತಾಂವ್.”

“ಜೀ…” ಮ್ಹಣ್ ಸರ್ದಾರ್ ಸಿಮಾಂವ್ನ್ ಆವಾಜ್ ಕೆಲೊ ಆನಿ ತೊ ಥಂಡ್ ರಾವ್ಲೊ. ಟಿಪ್ಪು ಸುಲ್ತಾನಾಚೆರ್ ತಾಣೆಂ ದೀಷ್ಟ್ ಘಾಲಿ. ತ್ಯಾ ಗಂಭೀರ್ ಮುಖಮಳಾಚೆರ್, ಪಾಟ್ಲ್ಯಾ ದೋನ್ ದಿಸಾಂ ಭಿತರ್‌ಚ್ ಜಾಲ್ಲಿ ಬದ್ಲಾವಣ್ ಪಾರ್ಕುನ್ ತೊ ಅಜ್ಯಾಪ್ಲೊ ಆನಿ ಬಿರ್ಮತ್ ಪಾವ್ಲೊ.

ನಿಜಾಯ್ಕೀ ಟಿಪ್ಪು ಸುಲ್ತಾನಾ ಥಂಯ್ ಪ್ರತ್ಯಕ್ಷ್ ಬದ್ಲಾವಣ್ ಜಾಲ್ಲಿ. ತಾಚ್ಯಾ ಅಭಿಮಾನಾಕ್ ವ್ಹಡ್ಲೊ ಮಾರ್ ಪಡ್‍ಲ್ಲೊ. ಕೊಡಗಾಚೆರ್ ಸುಲಭಾಯೆನ್ ದಾಡ್ ಘಾಲ್ನ್ ಫಾಯ್ದೊ ಜೊಡಿಜಾಯ್ ಮ್ಹಣ್ ತಾಣೆಂ ಚಿಂತ್‍ಲ್ಲೆಂ ಸ್ವಪಣ್ ಕೊಸ್ಳೊನ್ ಪಡ್‍ಲ್ಲೆಂ. ಚಿಂತಿನಾತ್‍ಲ್ಲೆಪರಿಂ ತಾಚ್ಯಾ ನಾಂವಾಡ್ದಿಕ್ ರಿಸಾಲಾಂನಿ ಪಾಟಿಂ ಸರಜಾಯ್ ಜಾಲ್ಲೆಂ. ಪಿರಿಯಾಪಟ್ಟಣಾಂತ್ ತಾಚಿ ಫವ್ಜ್ ಸಲ್ವಲ್ಲಿಚ್ ಮ್ಹಣ್ಯೆತ್. ತಶೆಂ ಜಾಲ್ಲ್ಯಾನ್, ತಾಣೆಂಚ್ – ಮೈಸೂರ್ಚೊ ವಾಗ್, ಪೈಗಂಬರ್ ಬಾದಶಹಾ, ಟಿಪ್ಪು ಸುಲ್ತಾನ್ ಮನ್ಸೂರ್ ಆಲಿ ಬಹಾದುರ್ ಖಾನಾನ್ – ಜಿವಾಚ್ಯಾ ಸಂರಕ್ಷಣಾ ಖಾತಿರ್, ಎಕಾ ಥರಾಚಿ ಪೊಳಾಪಳ್ ಘೆಜಾಯ್ ಪಡ್‍ಲ್ಲಿ..! ಬೆಟ್ಟದಪುರ ಆನಿ ಹೆಗ್ಗಡದೇವನ ಕೋಟೆ ತೆವ್ಶಿನ್ ಧಾಡ್‍ಲ್ಲ್ಯಾ ತಾಚ್ಯಾ ರಿಸಾಲಾಂಚಿ ಖಬರ್ ನಾತ್‍ಲ್ಲಿ…

ಹಿಂ ಸರ್ವ್ ಚಿಂತ್ನಾಂ ತಾಣೆಂ ವ್ಹಡ್ಲ್ಯಾನ್ ಉಚಾರ್ಲಿಂ. ಉಪ್ರಾಂತ್:

“ಜಾಲ್ಯಾರೀ ವೇಳ್ ಉತ್ರೊಂಕ್ ನಾ” ಮ್ಹಣಾಲೊ ತೊ. “ಥೊಡ್ಯಾಚ್ ವಾಯ್ದ್ಯಾ ಭಿತರ್, ಆಮ್ಚಿ ಪಾಂಚ್ ಹಜಾರಾಂ ವಯ್ರ್ ಫವ್ಜ್, ಸರ್ವ್ ಬಳಾಧಿಕ್ ರಕ್ಷಣಾಚ್ಯಾ ಆಧಾರಾನ್ ಕೊಡಗಾಚೆರ್ ಝುಜಾಕ್ ಭಾಯ್ರ್ ಸರಜಾಯ್. ತೆಂ ತಶೆಂ ಆಸೊಂ…

“ಹ್ಯಾ ಪಾವ್ಟಿಂಚ್ಯಾ ಆಮ್ಚ್ಯಾ ಪಾಡಾವಾಕ್, ಆಮ್ಚ್ಯಾ ಲಾಗ್ಶಿಲ್ಯಾಚ್ ಕೊಣೆಂಗೀ ದುಸ್ಮಾನಾಂಕ್ ಖಬರ್ ದಿಲ್ಲೆಂ ಕಾರಣ್ ಆಸ್ತೆಲೆಂ ಮ್ಹಣ್ ಆತಾಂ ಆಮಿ ಪಾತ್ಯೆತಾಂವ್. ನಹಿಂ ಜಾಲ್ಯಾರ್ ಅಶೆಂ ಜಾಂವ್ಕ್ ಕಾರಣ್ ನಾತ್‍ಲ್ಲೆಂ ಮ್ಹಳ್ಳೆಂ, ಬಿಲ್ಕುಲ್ ಸತ್. ತಸಲ್ಯಾ ರಾಜ್‍ದ್ರೋಹಿಂಕ್ ಧರುನ್ ಫಾಶಿ ದಿಂವ್ಚೊ ಆಮ್ಚೊ ಪಯ್ಲೊ ಕಾಯ್ದೊ. ತೆಂಯೀ ಆಸೊಂ…

“ಅಸಲ್ಯಾ ವೆಳಾರ್, ಸರ್ದಾರ್ ಸಿಮಾಂವ್, ತುಂಚ್ ಖುದ್ ಆಮ್ಚ್ಯಾ ಸಾಂಗಾತಾ ನಾತ್‍ಲ್ಲೊಯ್ ಜಾಲ್ಯಾರ್, ಗಜಾಲ್ ಆನಿ ಕಿತ್ಲಿ ಚಡ್ ವಾಯ್ಟಾಕ್ ಪಡ್ತಿ ಮ್ಹಳ್ಳೆಂ ಚಿಂತುನ್ ಆಮ್ಕಾಂ ಲಜ್ ಭೊಗ್ತಾ.

“ಆನಿ ಪ್ರತ್ಯೇಕ್ ಜಾವ್ನ್ ಆಯ್ಚ್ಯಾ ದಿಸಾ, ತುವೆಂ ಬುದ್ವಂತ್ಕಾಯ್ ಖರ್ಚುಂಕ್ ನಾತ್‍ಲ್ಲಿ ಜಾಲ್ಯಾರ್, ಆಮ್ಚೊ ಜೀವ್ ಸುರಕ್ಷಿತ್ ಉರಂವ್ಕ್ ಆಮ್ಕಾಂ ಸಾಧ್ಯ್ ಜಾತೆಂ ನಾ. ಕಸೊ ಆಮಿ ತುಜೊ ಉಪ್ಕಾರ್ ಬಾವುಡ್ಯೆತ್? ಕಿತೆಂ ಆಮಿ ತುಕಾ ದಿವ್ಯೆತ್..?”

“ಕಾಂಯ್ ನಾಕಾ ಹುಜೂರ್!” ಮ್ಹಣಾಲೊ ಸರ್ದಾರ್ ಸಿಮಾಂವ್.

“ತುಂ ತಶೆಂ ಮ್ಹಣ್ತಲೊಯ್ ಮ್ಹಣ್ ಆಮಿ ಜಾಣಾಂವ್” ಮ್ಹಣಾಲೊ ಟಿಪ್ಪು ಸುಲ್ತಾನ್, ಉಪ್ಕಾರಿ ಮನಾನ್, ಪುಣ್ ಗಂಭೀರ್ ಜಾವ್ನ್. “ಪುಣ್ ಉಪ್ರಾಂತ್ ಉಲಂವ್ಕ್ ಆಮ್ಕಾಂ ಪುರ್ಸತ್ ಮೆಳಾಶಿ ನಾ ವಾ ಉಗ್ಡಾಸ್ ಜಾಂವ್ಚೊ ನಾ. ದೆಕುನ್ ಆತಾಂ ಆಮಿ ತುಕಾ ಏಕ್ ಭಾಸ್ ದಿತಾಂವ್…”

ಥೊಡೊ ವೇಳ್, ಚಿಂತುನ್‍ಸೊ ತೊ ರಾವ್ಲೊ. ತಾಚ್ಯಾ ಮತಿಂತ್ ಕಿತೆಂ ಆಸಾ ಮ್ಹಳ್ಳೆಂ ಸರ್ದಾರ್ ಸಿಮಾಂವ್ಕ್ ಕಳಿತ್ ಜಾಂವ್ಕ್ ನಾ. ದೆಕುನ್ ತೊ ಉಲಂವ್ಕ್ ನಾ.

“ಆಮಿ ಜಾಣಾಂವ್” ಮ್ಹಣಾಲೊ ಟಿಪ್ಪು ಸುಲ್ತಾನ್. “ಆಯ್ಚ್ಯಾ ದಿಸಾ, ಆಮ್ಚ್ಯಾ ಭದ್ರತೆ ಖಾತಿರ್ ಫಾವೊ ತಿಂ ರಾಜಾಂವಾಂ ದೀವ್ನ್ ತುವೆಂ ಆಮ್ಕಾಂ ಉಪ್ಕಾರ್ ಕೆಲಾಯ್ ಮಾತ್ರ್ ನಹಿಂ – ಆಮ್ಚೆ ಖಾತಿರ್ ತುಜೊಚ್ ಜೀವ್ ವರ್ತ್ಯಾ ಅಪಾಯಾರ್ ಘಾಲಾಯ್. ಆಮಿ ಆಯ್ಲ್ಯಾ ಉಪ್ರಾಂತ್ ತುಮಿ ಲಡಾಯ್ ಕೆಲ್ಲಿ ರೀತ್, ಹೆರಾಂ ಥಾವ್ನ್ ಆಮಿ ಆಯ್ಕಲ್ಯಾ. ಷೇಕ್ ಆಲಿಚೊಯೀ ಜೀವ್ ತುವೆಂ ರಾಕ್ಲೊಯ್ ಖಂಯ್.”

“ಪುಣ್ ತಾಣೆಂಯೀ ಮ್ಹಜೊ ಜೀವ್ ರಾಕ್ಲಾ ಹುಜೂರ್!”

“ತುಜ್ಯಾ ಮೊಗಾನ್ ತಾಣೆಂ ತಶೆಂ ಕೆಲ್ಲೆಂ ನಹಿಂ, ಬಗಾರ್ ತಾಚೊ ಜೀವ್ ರಾಕ್‍ಲ್ಲ್ಯಾ ಖಾತಿರ್, ಋಣ್ ತಾಣೆಂ ಫಾರಿಕ್ ಕೆಲ್ಲೆಂ ಜಾವ್ಯೆತ್. ಪುಣ್ ತಾಣೆಂ ತಶೆಂ ಕೆಲ್ಲೆಂ ಬರೆಂ ಜಾಲೆಂ. ನಾ ಜಾಲ್ಯಾರ್ ತೊ ಆಜ್ ಆಮ್ಚೆ ಹುಜ್ರಿಂ ಯೇಂವ್ಕ್ ಸಕ್ತೊ ನಾ. ತೆಂ ಆಸೊಂ…

“ಆಮಿ ಮ್ಹಳೆಂ, ಆಮಿ ತುಕಾ ಏಕ್ ಭಾಸ್ ದಿತಾಂವ್ – ಹ್ಯಾ ಉಪ್ರಾಂತ್ ಖಂಯ್ಚ್ಯಾಯೀ ವೆಳಾರ್, ತುವೆಂ ಆಯ್ಚ್ಯಾ ದಿಸಾಚೊ ಉಗ್ಡಾಸ್ ಕಾಡುನ್, ತುಕಾ ಜಾಯ್ ಜಾಲ್ಲೊ ಏಕ್ ಉಪ್ಕಾರ್ ವಿಚಾರ್ಯೆತ್… ಆಮ್ಚ್ಯಾ ಜಿವಾಚೆಂ ಸಂರಕ್ಷಣ್ ಕೆಲ್ಲ್ಯಾ ಖಾತಿರ್ ಜಿವಾಕ್ ಏಕ್ ಜೀವ್ ಜಾಲ್ಯಾರ್‌ಯೀ ತುವೆಂ ಪಾಟಿಂ ವಿಚಾರ್ನ್ ಘೆವ್ಯೆತ್ – ಹಿ ತುಕಾ ಆಮ್ಚಿ ಭಾಸ್; ಹೆಂ ತುಕಾ ಆಮ್ಚೆಂ ವಾಗ್ದಾನ್… ಪೈಗಂಬರ್ ಟಿಪ್ಪು ಸುಲ್ತಾನಾನ್, ಕೆಲ್ಲ್ಯಾ ಉಪ್ಕಾರಾ ಖಾತಿರ್ ಪ್ರತ್ಯುಪ್ಕಾರ್ ಕರುಂಕ್ ನಾ ವಾ ದಿಲ್ಲಿ ಭಾಸ್ ಪಾಳುಂಕ್ ನಾ ಮ್ಹಣ್ ಕೊಣ್‍ಯೀ, ಕೆದಾಳಾಯೀ ಮ್ಹಣನಾ ಜಾಂವ್ದಿ…”

“ಬಾದಶಹಾಚಿ ದಯಾ…” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಪುಣ್ ಜೆಂ ಕಿತೆಂ ಹಾಂವೆಂ ಕೆಲಾಂ, ತೆಂ, ಪ್ರತ್ಯುಪ್ಕಾರ್ ಮೆಳಜಾಯ್ ಮ್ಹಣ್ ಕರುಂಕ್ ನಾ.”

“ಜಾವ್ಯೆತ್. ಪುಣ್ ಅಸಲ್ಯಾ ವಾಗ್ದಾನಾಂಕ್ ಪುಣೀ ಆಮ್ಕಾಂ ಸಮಾಧಾನ್ ಆಸ್ತೆಲೆಂ” ಟಿಪ್ಪು ಮ್ಹಣಾಲೊ. “ಕೊಣಾಕ್, ಖಂಚ್ಯಾ ವೆಳಾರ್ ಕಸಲೊ ಉಪ್ಕಾರ್ ಜಾಯ್ ಪಡತ್ ಮ್ಹಳ್ಳೆಂ ಸಾಂಗೊಂಕ್ ಜಾಯ್ನಾ. ಆತಾಂ ತುಂ ವಿಶೆವ್ ಘೆ. ಆಮ್ಚ್ಯಾ ಹೆರ್ ರಿಸಾಲಾಂಚಿ ಖಬರ್ ಆಯ್ಲ್ಯಾರೀ, ಯೇನಾತ್ಲ್ಯಾರೀ, ತುಂ ಪಯ್ಣ್ ಕರುಂಕ್ ಸ್ವಸ್ಥ್ ಜಾಲ್ಲ್ಯಾಫಾರಾ ಆಮಿ ಪಟ್ಟಣಾಕ್ ಪಾಟಿಂ ಭಾಯ್ರ್ ಸರ್ತಾಂವ್.”

ಟಿಪ್ಪು ಸುಲ್ತಾನ್ ಭಿತರ್ ಗೆಲೊ.

ಸರ್ದಾರ್ ಸಿಮಾಂವ್ ಆಪ್ಲ್ಯಾ ಚಿಂತ್ನಾಂನಿ ಮಗ್ನ್ ಜಾಲೊ. ಟಿಪ್ಪುನ್ ತಸಲಿ ಭಾಸ್ ದಿಲ್ಲ್ಯಾ ಖಾತಿರ್ ಎಕಾ ಥರಾಚೆಂ ಧಯ್ರ್ ತಾಕಾ ಪಡ್ಲೆಂ. ಕಸಲಿಯೀ ಗರ್ಜ್ ಪಡ್ಲ್ಯಾರ್, ದಿಲ್ಲೆಂ ಉತಾರ್ ಟಿಪ್ಪು ಸುಲ್ತಾನ್ ನೆಗಾರ್ ಕರಿಸೊ ನಾ ಮ್ಹಣ್ ತೊ ಜಾಣಾಂಸ್‍ಲ್ಲೊ. ಜಾಲ್ಯಾರೀ ತಾಣೆಂ ತ್ಯಾ ಜಿನ್ಸಾಚಿಚ್ ಭಾಸ್ ಕಿತ್ಯಾಕ್ ದಿಲಿ ಮ್ಹಳ್ಳೆಂ ಚಿಂತುನ್ ಥೊಡಿಂ ಸವಾಲಾಂ ಆನಿ ಥೊಡೆ ದುಬಾವ್ ತಾಚ್ಯಾ ಮತಿಂತ್ ಉಬ್ಜಲೆ.

ತಸೊಚ್ ವಿಶೆವ್ ಘೆವ್ನ್ ತೊ ಆಸ್ತಾನಾ, ಮಂಗ್ಳುರಾಕ್ ಧಾಡ್‍ಲ್ಲ್ಯಾ ಆಪ್ಲ್ಯಾ ಸವಾರಾಂಚೊ, ಆನಿ ಪ್ರತ್ಯೇಕ್ ಜಾವ್ನ್ ಬಂಟ್ವಾಳಾಕ್ ಧಾಡ್ನ್ ದಿಲ್ಲ್ಯಾ ವರ್ದೆಚೊ ತಾಕಾ ಉಗ್ಡಾಸ್ ಆಯ್ಲೊ. ಖಂಯ್ಚ್ಯಾಯೀ ಖಬ್ರೆ ಖಾತಿರ್ ತಾಚೆಂ ಮನ್ ಅತ್ರೆಗ್ತಾಲೆಂ. ಪುಣ್ ಸದ್ದ್ಯಾಕ್ ಕಾಯಿಂಚ್ ಕರುಂಕ್ ಸಾಧ್ಯ್ ನಾತ್‍ಲ್ಲಿ ಅಸಹಾಯಕ್ ಸ್ಥಿತಿ ತಾಚಿ ಜಾಲ್ಲಿ.

ದುಸ್ರ್ಯಾಚ್ ದಿಸಾ, ಮೈಸೂರ್ಚ್ಯಾ ದುಸ್ರ್ಯಾ ರಿಸಾಲಾಂಚಿ ಖಬರ್ ಆಯ್ಲಿ. ಪಿರಿಯಾಪಟ್ಟಣ ವಾಟೆಚಿ ಫೌಜ್ ಸಲ್ವಲ್ಲಿ ಖಬರ್, ಬೆಟ್ಟದಪುರ ಆಸ್‍ಲ್ಲ್ಯಾ ಫೌಜೆಕ್ ಮೆಳ್ತಚ್, ಥಂಯ್ಸರ್ ಗಡಿ ಭಿತರ್ ರಿಗೊನ್ ಝುಜ್ಚಿ ಆಲೋಚನ್ ತಾಣಿಂ ಸೊಡ್ಲಿ, ಆನಿ ಥಂಯ್ಸರ್ ತಾಂಕಾಂ ಆಡಾಂವ್ಕ್ ಪ್ರಯತ್ನ್ ಕರ್ಚೆ – ಫ್ರೇಜರ್ ಪೇಟೆಚ್ಯಾ ವಾಟೆನ್ ಆಯಿಲ್ಲ್ಯಾ ಫೌಜೆಚೆ ದೊಳೆ ಚುಕವ್ನ್ ಪಾಟಿಂ ವೆಚೆಂ ಪ್ರಯತ್ನ್ ತಾಣಿಂ ಕೆಲೆಂ. ತ್ಯಾ ಪ್ರಯತ್ನಾಂತ್, ದೋನ್‍ಯೀ ಪಾಡ್ತಿಂತ್ಲೆ ಶೆಂಬರ್-ಶೆಂಬರ್ ಜಾತಿತ್ ತಿತ್ಲೆ ಶಿಪಾಯ್ ಮೆಲೆ ಜಾಲ್ಯಾರೀ ಮೈಸೂರ್ಚಿ ಫೌಜ್ ಪಾಟಿಂ ಯೇಂವ್ಕ್ ಸಕ್ಲಿ. ಮೈಸೂರ್ಚ್ಯಾ ಗಡಿ ಭಿತರ್ ರಿಗೊಂಕ್ ಕೊಡಗಾಚ್ಯಾ ಶಿಪಾಯಾಂಕ್ ಧಯ್ರ್ ಪಾವ್ಲೆಂ ನಾ.

ಗಡಿಚ್ಯಾ ಲಾಂಬಾಯೆಕ್ ಕೊಗಡಾಚಿಂ ಸೈನಾಂ ಆಯ್ಲ್ಯಾಂತ್ ಆನಿ ಪೊನ್ನಂಪೇಟೆ ಥಾವ್ನ್ ಹೆಗ್ಗಡದೇವನ ಕೋಟೆಕ್ ಪಾಂಯ್ಶಿಂ ಕೊಡ್ಗ್ಯಾ ಶಿಪಾಯಾಂಚಿ ಫೌಜ್ ಯೇವ್ನ್ ಆಯ್ತಿ ರಾವ್ಲ್ಯಾ ಮ್ಹಳ್ಳೆಂ ಆಯ್ಕೊನ್, ಫುಡ್ಲ್ಯಾ ಹುಕ್ಮೆಕ್ ರಾಕೊನ್, ಮೈಸೂರ್ಚಿ ಫೌಜ್ ಪಾಟಿಂ ರಾವ್ಲಿ.

ಹೆಂ ಆಯ್ಕೊನ್ ಟಿಪ್ಪು ಸುಲ್ತಾನ್ ತಾಪ್ಲೊ ಜಾಲ್ಯಾರೀ, ಚಡ್ ನಷ್ಟ್ ಜಾವ್ನಾ ಮ್ಹಳ್ಳೆಂ ಚಿಂತುನ್ ತಾಣೆಂ ಸಮಾಧಾನ್ ಘೆತ್ಲೆಂ. ಸದ್ದ್ಯಾಕ್ ಸರ್ವ್ ರಿಸಾಲಾಂನಿ, ಆಪಾಪ್ಲಿ ವಾಟ್ ಧರ್ನ್, ಪಟ್ಟಣಾಕ್ ಪಾಟಿಂ ಪಯ್ಣ್ ಕರಿಜಾಯ್ ಮ್ಹಣ್ ತಾಣೆಂ ಫರ್ಮಾಣ್ ಧಾಡ್ಲೆಂ. ರಾವ್ಳೆರಾಕ್ ಪಾಟಿಂ ವಚೊನ್ ಫುಡ್ಲಿಂ ಕಾಮಾಂ ತುರ್ತಾನ್ ಕರಿಜಾಯ್ ಮ್ಹಣ್ ತೊಯೀ ಅಮ್ಸೊರ್ತಾಲೊ.

ತಿಸ್ರ್ಯಾ ದಿಸಾ, ಸರ್ದಾರ್ ಸಿಮಾಂವ್ ಉಟೊನ್ ಭಾಯ್ರ್ ಆಯ್ಲೊ. ತಾಚ್ಯಾ ಭುಜಾಚೊ ಘಾಯ್ ಥಾಂಬೊಂಕ್ ನಾತ್‍ಲ್ಲೊ ಜಾಲ್ಯಾರೀ ದೂಕ್ ಉಣಿ ಆಸೊನ್, ಪಯ್ಣ್ ಕರುಂಕ್ ತಾಕಾ ಸಾಧ್ಯ್ ಆಸ್‍ಲ್ಲೆಂ.

ಚವ್ತ್ಯಾ ದಿಸಾ ಪಟ್ಟಣಾಕ್ ತಾಣಿಂ ಪಯ್ಣ್ ಧರ್ಲೆಂ.

ಅಶೆಂ ಪಯ್ಣ್ ಕರ್ನ್ ಪಾಟಿಂ ವೆತಾನಾ, ಟಿಪ್ಪು ಸುಲ್ತಾನಾಕ್ ಎಕಾ ಥರಾಚಿ ಲಜ್ ಭೊಗ್ತಾಲಿ ಮ್ಹಳ್ಳೆಂ ನೀಜ್. ಸುಲಭಾಯೆನ್ ಬೂದ್ ಶಿಕಯ್ಜಾಯ್ ಮ್ಹಣ್ ವಚೊನ್, ಆಪುಣ್‍ಂಚ್ ಬೂದ್ ಶಿಕೊನ್ ಶಿಮ್ಟಿ ಪಂದಾಕ್ ಘಾಲ್ನ್ ಪಾಟಿಂ ಆಯಿಲ್ಲೆಪರಿಂ ತಾಚಿ ಗತ್ ಜಾಲ್ಲಿ. ತಶೆಂ ಗೆಲ್ಲ್ಯಾ ಘರಮ್ ಘಡ್ಯೆ, ರಾವ್ಳೆರಾಂತ್ ತಾಕಾ ಆಯ್ಕೊಂಕ್ ಮೆಳ್‍ಲ್ಲಿ ಖಬರ್ ಆನಿ ಪಳೆಂವ್ಕ್ ಮೆಳ್‍ಲ್ಲಿ ಪರಿಸ್ಥಿತಿ, ಜಿವ್ಯಾ ಘಾಯಾಚೆರ್ ಮಿಟಾಚೆಂ ಉದಾಕ್ ಸೊಡ್‍ಲ್ಲೆಪರಿಂ ಜಾಂವ್ಕ್ ಪಾವ್ಲಿ.

ತ್ಯಾ ವರ್ವಿಂ, ತಾಚ್ಯಾ ಸಬಾರ್ ಸರ್ದಾರಾಂನಿ ಆನಿ ಸೆವಕಾಂನಿ ತಾಚ್ಯಾ ಕ್ರೋಧಾಕ್ ಉಂಡಿ ಜಾಂವ್ಕ್ ಆಸ್‍ಲ್ಲೆಂ; ತ್ಯಾ ವರ್ವಿಂ ಸಬಾರ್ ಜಣಾಂನಿ ಕೈದಿ ಜಾಂವ್ಕ್ ಆಸ್‍ಲ್ಲೆಂ; ತ್ಯಾ ವರ್ವಿಂ ಥೊಡ್ಯಾಂನಿ ತಕ್ಲಿ ಹೊಗ್ಡಾಂವ್ಕ್ ಆಸ್‍ಲ್ಲೆಂ. ತ್ಯಾ ವರ್ವಿಂ ಸರ್ದಾರ್ ಸಿಮಾಂವ್ಚ್ಯಾ ಫುಡ್ಲ್ಯಾ ಜಿಣ್ಯೆಚೆರ್ ವಿಪರೀತ್ ಆನಿ ವೆಗ್ಳೊಚ್ ಪರಿಣಾಮ್ ಜಾಂವ್ಕ್ ಆಸ್‍ಲ್ಲೊ.

ತೀನ್ ದಿಸಾಂಚೆಂ ಪಯ್ಣ್ ಕರ್ನ್ ಪಟ್ಟಣಾಕ್ ತೆ ಪಾವ್ಲೆ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel