ಸರ್ದಾರಾಚೆಂ ಸನ್ನಿಧಾನ್ – 6: ಸುಟ್ಕಾ ದೀವ್ನ್ ಕಾಟ್ಕಾಯ್

ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 6
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 6: ಸುಟ್ಕಾ ದೀವ್ನ್ ಕಾಟ್ಕಾಯ್

ವ್ಹಯ್. ಕುರಿಯೆಲಾಕ್ ಆಯಿಲ್ಲೆ ಸರ್ದಾರ್ ಸಿಮಾಂವ್ಚೆ ಆನಿ ಸರ್ದಾರ್ ಯೂಸುಫಾಚೆ ಶಿಪಾಯ್, ಪಾಟಿಂ ಸಿರಿಂಗಪಟ್ಟಣಾಕ್ ಪಾವ್ತಚ್ ತಾಣಿಂ ಚಿಂತ್‍ಲ್ಲೆಪರಿಂ, ತಾಂಕಾಂ ಶೀದಾ ವಚೊನ್, ಆಪಾಪ್ಲ್ಯಾ ಅಧಿಕಾರ್‍ಯಾಂಕ್ – ಸರ್ದಾರಾಂಕ್ – ಹರ್ಶೆಂಚೆಪರಿಂ ಮೆಳೊಂಕ್ ಅವ್ಕಾಸ್ ಲಾಭೊಂಕ್ ನಾ.

ತಾಂಚ್ಯಾ ಘೊಡ್ಯಾಂಚಿ ಜತನ್ ಘೆಂವ್ಚ್ಯಾ ಖಾತಿರ್, ಬೊಲ್ತ್ಯಾಚ್ ಶಿಪಾಯಾಂನಿ ಯೇವ್ನ್, ಘೊಡ್ಯಾಂಕ್ ತೆವ್ಶಿನ್ ವ್ಹೆಲೆ.

“ತುಮ್ಕಾಂ ಬಾದಶಹಾನ್ ಭೆಟ್ ದಿತಾ ಪರ್ಯಾಂತ್, ತುಮಿ ವಿಶೆವ್ ಘೆವ್ನ್ – ಹೆರ್ ಖಂಯೀ ವಚನಾಸ್ತಾಂ, ಆನಿ ಕೊಣಾಯ್ಕೀ ಮೆಳನಾಸ್ತಾಂ – ಹಾಂಗಾಚ್, ತೆವ್ಶಿಲ್ಯಾ ಗುಮ್ಮ್ಯಾಂತ್ ರಾವಜಾಯ್ ಮ್ಹಣ್ ಬಾದಶಹಾಚಿ ಹುಕುಮ್ ಆಸಾ” ಮ್ಹಣಾಲೊ ವಾಂಕ್ಡ್ಯಾ ನಾಕಾಚೊ ಕೋಸ್‍ಕಣ್ಣ ಷೇಕ್ ಆಲಿ, ಕಾಲುಬುಲೆ ಜಾಲ್ಲ್ಯಾ ಹ್ಯಾ ಶಿಪಾಯಾಂ ಕಡೆನ್.

“ಜಾವ್ಯೆತ್ ಸಾಹೇಬ್” ಮ್ಹಣಾಲೊ, ಯೂಸುಫ್ ಆಲಿಚ್ಯಾ ಠೊಲಿಯೆಂತ್ಲೊ ಎಕ್ಲೊ ಜಮೆದಾರ್, ರಂಗಪ್ಪ.

ಸರ್ದಾರ್ ಸಿಮಾಂವ್ಚೆ ಶಿಪಾಯ್ ಕೊಣೀ ಉಲಂವ್ಕ್ ನಾಂತ್. ಪಯ್ಲೆಂ ಸರ್ದಾರಾಕ್ ಭೆಟೊನ್, ಕುರಿಯೆಲಾಂತ್ಲಿ ಖಬರ್ ಜಿ ಘಡ್‍ಲ್ಲೆಪರಿಂ ಆಸಾ ತಶಿ ಸಾಂಗೊನ್, ಸರ್ದಾರಾಚಿ ಹುಕುಮ್ ಕಾಣ್ಗೆಜಾಯ್ ಮ್ಹಣ್ ತೆ ಚಡ್ಪಡ್ತಾಲೆ, ತರೀ ಹ್ಯಾ ನವ್ಯಾ ಹುಕ್ಮೆನ್ ಥಂಡ್ ಜಾವ್ನ್ ಚಿಂತುಂಕ್ ಪಡ್ಲೆ.

ತಾಣಿಂ ಥಂಡ್ ಜಾಂವ್ಕ್, ಆನಿ ಭಿತರ್ಲ್ಯಾ ಭಿತರ್ ಚಿಕ್ಕೆ ಆಕಾಂತೊಂಕ್ ಬರೆಂ ಕಾರಣ್‍ಯೀ ಆಸ್‍ಲ್ಲೆಂ.

ರಾವ್ಳೆರಾಚ್ಯಾ ನವ್ಯಾ ರಾಕ್ವಲ್ಯಾಂಚೊ ಪ್ರಸ್ತುತ್ ಮುಖದಮ್ ಜಾವ್ನಾಸ್‍ಲ್ಲೊ ಷೇಕ್ ಆಲಿ, ಆಟ್ ನೋವ್ ವರ್ಸಾಂ ಆದಿಂ, ಹೈದರಾಚ್ಯಾ ತೆಂಪಾರ್, ಮಂಗ್ಳುರಾಂತ್ ‘ಹೈದರ್ ಶಾ’ ಸರ್ಕಾರಾಚೊ ಎಕ್ಲೊ ಮುಖ್ಯ ಖಿಲ್ಲೆದಾರ್ ಆನಿ ಆಡಳ್ತೆದಾರ್ ಜಾವ್ನ್ ಆಸ್‍ಲ್ಲೊ. ತಾಚೊ ಆನ್ಯೇಕ್ಲೊ ಮಿತ್ರ್, ವೆಂಕಪ್ಪಯ್ಯ ಪ್ರಧಾನ್ ಮ್ಹಳ್ಳೊ, ತ್ಯಾಚ್ ವೆಳಾರ್ ಮಂಗ್ಳುರಾಂತ್ ‘ಹೈದರ್ ಶಾ’ ಸರ್ಕಾರಾಂತ್, ಷೇಕ್ ಆಲಿಚೊ ಉಜ್ವೊ ಹಾತ್‍ಸೊ ಜಾವ್ನ್ ‘ಮಂತ್ರಿ’ ವಾ ‘ಪ್ರಧಾನ್’ ಮ್ಹಳ್ಳೆಂ ಬಿರುದ್ ಘೆವ್ನ್ ಆಸ್‍ಲ್ಲೊ.

ಷೇಕ್ ಆಲಿಕ್ ಕ್ರಿಸ್ತಾಂವಾಂಚೆರ್ ದೊಳೊ ಆನಿ ಜಬ್ಬೊರ್ ಜಿದ್ದ್ ಆಸ್‍ಲ್ಲೆಂ. ಕಾಪ್ರಿಗುಡ್ಯಾ ವಯ್ಲ್ಯಾ ಸಾಂತೆಂತ್ ಕೋಣ್ ಎಕಾ ಕ್ರಿಸ್ತಾಂವ್ ಸ್ತ್ರೀಯೆಚ್ಯಾ ಆಂಗಾರ್ ತಾಣೆಂ ಹಾತ್ ಘಾಲ್ಲ್ಯಾ ಖಾತಿರ್ ಥೊಡ್ಯಾ ಕ್ರಿಸ್ತಾಂವ್ ಮಾನಾಯಾಂನಿ ತಾಚ್ಯಾ ಖಾಡಾಕ್ ಉಜೊ ದಿಲ್ಲೊ, ಆನಿ ಉಪ್ರಾಂತ್ ಜಾಲ್ಲ್ಯಾ ಮಾರ್‌ಫಾರಾ ವರ್ವಿಂ ತಾಚೆಂ ಕಿರಾ ಬೊಂಚಿ ಸಾರ್ಕೆಂ ಆಸ್‍ಲ್ಲೆಂ ನಾಕ್ ವಾಂಕ್ಡೆಂ ಜಾಲ್ಲೆಂ!

ವೆಂಕಪ್ಪಯ್ಯ ಪ್ರಧಾನಾಕ್, ಕ್ರಿಸ್ತಾಂವಾಂಚೆ ದುಸ್ಮಾನ್ ಜಾವ್ನ್ ಆಸ್‍ಲ್ಲ್ಯಾ ಥೊಡ್ಯಾ ಬೊಣ್ಕ್ಯಾಂಚೊ ಹಾತ್ ಆಸ್‍ಲ್ಲೊ. ಪುಣ್ ಹೈದರ್ ಆಲಿಕ್, ಕ್ರಿಸ್ತಾಂವ್ ಕುಳ್ವಾರಾಂ ಕಡೆನ್ ಹಗೆಂ ಬಾಂಧುನ್ ಘೆತ್ಲ್ಯಾರ್ ಬರೆಂಪಣ್ ನಾ ಮ್ಹಣ್ ಸುಸ್ತಲ್ಲ್ಯಾನ್, ತಾಣೆಂ ಕ್ರಿಸ್ತಾಂವಾಂಕ್ ವ್ಹಯ್ ಕರ್ನ್ ಘೆಂವ್ಚೆಂ ಏಕ್ ದೂರ್‌ದೃಷ್ಟೆಚೆಂ ಯೋಜನ್ ಹಾತಿಂ ಘೆವ್ನ್, ತ್ಯಾ ಸಂಬಂಧಿಂ ಪುಡ್ತುಗೆಜಾಂ ಕಡೆನ್‍ಯೀ 1769 ಇಸ್ವೆಂತ್ ಏಕ್ ಸೊಲ್ಲೊ ಕರ್ನ್, ಫುಡ್ಲೊ ಝುಂತ್ ಚಲಂವ್ಚ್ಯಾ ನಿಬಾನ್ ಹ್ಯಾ ದೊಗಾಂಯ್ಕೀ ಪಟ್ಟಣಾಕ್ ಹಾಡಯಿಲ್ಲೆ, ಆನಿ ತಾಂಚ್ಯಾ ಜಾಗ್ಯಾರ್ ಮಂಗ್ಳುರಾಂತ್ ದುಸ್ರ್ಯಾ ಹುದ್ದೆದಾರಾಂಕ್ ನಮಿಯಾರ್‌ಲ್ಲೆ.

ಥೊಡ್ಯಾಚ್ ತೆಂಪಾನ್ ಹೈದರಾಲಿಕ್ ಪಾಟಿಕ್ ವೈದಾಪಣ್ (ಕಠ್ಮಾಳ್) ಜಾವ್ನ್ ತೊ ಮೆಲೊ, ಆನಿ ಟಿಪ್ಪು ಸುಲ್ತಾನ್ ಪಾಟಾರ್ ಚಡ್ಲೊ. ವಯ್ಲೆ ದೊಗೀ ಲ್ಹಾನ್ ವ್ಹಡ್ ಕಾಮಾಂ ಪಳೆವ್ನ್ ಪಟ್ಟಣಾಂತ್‍ಚ್ ಉರ್ಲೆ. ತಾಂಕಾಂ ‘ಸರ್ದಾರ್’ ಪ್ರಶಸ್ತಿ ಆಜೂನ್ ದೀಂವ್ಕ್ ನಾತ್‍ಲ್ಲಿ.

ತ್ಯಾ ವೆಳಾರ್ ಸರ್ದಾರ್ ಸಿಮಾಂವ್ ಪೆದ್ರು ಪ್ರಭು, ಸರ್ದಾರ್ ಆಂತೊನ್ ಪಾವ್ಲ್ ಶೆಟ್ ಆನಿ ಸರ್ದಾರ್ ಯೂಸುಫ್ ಆಲಿ ತಸಲೆ ಭೋವ್ ಶ್ಯಾಥಿವಂತ್ ಆನಿ ನಾಂವಾಡ್ದಿಕ್ ಜಾವ್ನಾಸ್‍ಲ್ಲ್ಯಾನ್ ಷೇಕ್ ಆಲಿ ಆನಿ ವೆಂಕಪ್ಪಯ್ಯ ಪ್ರಧಾನ್, ಜೆರಾಲ್ ಥರಾನ್ ಕ್ರಿಸ್ತಾಂವಾಂಚೆರ್, ಆನಿ ಪ್ರತ್ಯೇಕ್ ಥರಾನ್ ಕ್ರಿಸ್ತಾಂವ್ ಸರ್ದಾರಾಂಚೆರ್ ಖಾರ್ ಜಾವ್ನ್, ತಾಂಚ್ಯಾ ಪಾಡಾವಾ ಖಾತಿರ್ ಮೀಟ್ ಆನಿ ಖೊಲೊ ಘೆವ್ನ್ ಮ್ಹಳ್ಳೆಪರಿಂ ರಾಕೊನ್ ಆಸ್‍ಲ್ಲೆ.

ದುರಾದೃಷ್ಟಾನ್ ಮ್ಹಳ್ಳೆಪರಿಂ ಸರ್ದಾರ್ ಸಿಮಾಂವ್ ಆನಿ ಸರ್ದಾರ್ ಆಂತೊನಿ ಮಧೆಂ ದುಸ್ಮಾನ್ಕಾಯ್ ಪಾಲೆವ್ನ್ – ಸರ್ದಾರ್ ಸಿಮಾಂವ್ಚಿ ಕಥಾ ಆಖೇರ್ ಜಾಲಿ ಮ್ಹಳ್ಳೆಪರಿಂ ದಿಸ್ಲ್ಯಾರೀ, ಕ್ರಮೇಣ್ ಸರ್ದಾರ್ ಆಂತೊನ್ ತಸೊ ಅಂತರ್‌ಲ್ಲ್ಯಾನ್ (‘ದೆವಾಚ್ಯೆ ಕುರ್ಪೆನ್’) ಆತಾಂ ಹಾಂಚಿ ವಾಂಕ್ಡಿ ದೀಷ್ಟ್ ಗುಪಿತ್ ಥರಾನ್ ಸರ್ದಾರ್ ಸಿಮಾಂವ್ಚೆರ್ ವೊಂದಾಲ್ಲಿ.

ತ್ಯಾ ಮಧೆಂ ಸರ್ದಾರ್ ಸಿಮಾಂವ್ ಉಪ್ರಾಂತ್ ಚಡಾವತ್ ಜಾವ್ನ್ ಭಾಯ್ರ್ ಆನಿ ಸಿರಿಂಗಪಟ್ಟಣಾ ಥಾವ್ನ್ ಪಯ್ಸ್‌ಚ್ ಆಸ್‍ಲ್ಲ್ಯಾ ವೆಳಾರ್, ತಾಣಿಂ ತಾಚೆ ವಿಷಯಿಂ ಟಿಪ್ಪು ಸರ್ದಾರಾಚ್ಯಾ ಮತಿಂಥ್ ದುಬಾವ್ ಉಟಶೆಂ ಕೆಲ್ಲಿಂ ಗುಪಿತ್ ಪ್ರಯತ್ನಾಂಯೀ ಫಳಾಧಿಕ್ ಜಾಂವ್ಕ್ ನಾತ್‍ಲ್ಲಿ – ಬದ್ಲಾ, ಹರ್ಯೆಕ್ ಪಾವ್ಟಿಂ ತೊ ಜಯ್ತೆವಂತ್ ಜಾವ್ನ್ಂಚ್ ಆಯಿಲ್ಲೊ.

ಪುಣ್ ಪಾಟ್ಲ್ಯಾ ಥೊಡ್ಯಾ ಹಫ್ತ್ಯಾಂನಿ, ಟಿಪ್ಪು ಸುಲ್ತಾನ್, ಆಪ್ಲ್ಯಾಚ್ ನಿಗೂಢ್ ಯೋಚನಾಂ ವರ್ವಿಂ ಸರ್ದಾರ್ ಸಿಮಾಂವ್ ಆನಿ ಹೆರ್ ಸಾಂಗಾತ್ಯಾಂ ವಿಷಯಿಂ ಚಿಕ್ಕೆ ಗಂಭೀರ್ ಜಾಲ್ಲೊ, ಆನಿ ಆಪ್ಲ್ಯಾ ಭೊಂವಾರಿಂ ಆಸ್‍ಲ್ಲ್ಯಾ ಸಬಾರ್ ಅಧಿಕಾರಿಂಕ್ ವೆವೆಗ್ಳೆ ಹುದ್ದೆ ತಾಣೆಂ ದಿಲ್ಲೆ…

ತಶೆಂ ಜಾಲ್ಲ್ಯಾನ್ ಷೇಕ್ ಆಲಿ ಆನಿ ವೆಂಕಪ್ಪಯ್ಯ ಪ್ರಧಾನ್, ಬಾದಶಹಾಚೆ ಕಾನ್ ಫುಂಕುಂಕ್ ಆನಿ ಆಪ್ಲಿ ಖಾಸ್ಗಿ ಫಿತೂರಿ ಚಲಂವ್ಕ್ ಸುಲಭ್ ಜಾಂವ್ಚ್ಯಾ ಪಾಂವ್ಡ್ಯಾರ್ ಮ್ಹಳ್ಳೆಪರಿಂ ಪಾವ್‍ಲ್ಲೆ.

ಷೇಕ್ ಆಲಿನ್, ಸರ್ದಾರ್ ಸಿಮಾಂವ್ಚ್ಯಾ ಆನಿ ಯೂಸುಫ್ ಆಲಿಚ್ಯಾ ಹ್ಯಾ ಶಿಪಾಯಾಂಕ್, ಬಾದಶಹಾಚಿ ಹುಕುಮ್ ಕಳಯಿಲ್ಲ್ಯಾ ಪ್ರಕಾರ್ ವೆಗ್ಳೆಂಚ್ ರಾಕೊನ್ ರಾವಜಾಯ್ ಜಾಲೆಂ. ತಾಂಚಿ ಪಹರಜ್ ಕರ್ನ್ – ತಾಂಕಾಂ ಖಾಣ್ ಪೀವನ್ ದಿಂವ್ಚ್ಯಾ ನಿಬಾನ್ ಥೊಡೆ ಗೂಢಚಾರ್ ಆಸ್‍ಲ್ಲೆ ಮ್ಹಣ್ ವೆಗ್ಳೆಂ ಸಾಂಗ್ಚಿ ಗರ್ಜ್ ನಾ.

ಆಪ್ಲ್ಯಾ ಠೊಲಿಯೆಂತ್ಲೆ ಶಿಪಾಯ್ ಯೇವ್ನ್ ಪಾವ್‍ಲ್ಲಿ, ಆನಿ ಬಾದಶಹಾಚ್ಯಾ ಹುಕ್ಮೆ ಪ್ರಕಾರ್ ತಾಂಕಾಂ ವೆಗ್ಳೆ ದವರ್‌ಲ್ಲಿ ಖಬರ್ ಸರ್ದಾರ್ ಸಿಮಾಂವ್ಕ್ ತಶೆಂ ಸರ್ದಾರ್ ಯೂಸುಫ್ ಆಲಿಕ್ ಕಳಿತ್ ಜಾಲಿ, ಆನಿ ತಾಂಕಾಂಯೀ ಹೆಂ ಚಿಕ್ಕೆ ವಿಚಿತ್ರ್ ದಿಸ್ಲೆಂ. ಸರ್ದಾರ್ ಸಿಮಾಂವ್ಕ್ ಬಾದಶಹಾಚೊ ವಿಚಿತ್ರ್ ಸ್ವಭಾವ್ ಹೆರಾಂ ಪ್ರಾಸ್ ಚಡ್ ಬರೊ ಕಳಿತ್ ಆಸ್‍ಲ್ಲ್ಯಾನ್ ತ್ಯಾ ವಿಷಯಿಂ ತಾಣೆಂ ಚಡ್ ಪರ್ವಾ ಕರುಂಕ್ ನಾ ಜಾಲ್ಯಾರೀ, ಮಂಗ್ಳುರ್ ಥಾವ್ನ್ ಕೊಣೆಂಯೀ ತಾಕಾ ಹ್ಯಾ ಶಿಪಾಯಾಂಚ್ಯಾ ಹಾತಾಂತ್ ಕಾಂಯ್ ಘುಟಾಚಿ ಖಬರ್ ಪುಣೀ ಲಿಖುನ್ ಧಾಡ್‍ಲ್ಲಿ ಆಸ್ಲ್ಯಾರ್, ತಿ ಬಾದಶಹಾಚ್ಯಾ ಹಾತಾಂತ್ ಪಡನಾತ್ಲ್ಯಾರ್ ಪುರೊ ಮ್ಹಣ್ ತಾಣೆಂ ಮತಿ ಭಿತರ್ ಮಾಗ್ಲೆಂ. ಹೆರ್ ಕಸಲಿಯೀ ತಾಕಾ ಭಿರಾಂತ್ ನಾತ್‍ಲ್ಲಿ.

ಸರ್ದಾರ್ ಯೂಸುಫ್ ಆಲಿಕ್‍ಯೀ ಭಿರಾಂತ್ ನಾತ್‍ಲ್ಲಿ ಖರೆಂ, ಪುಣ್ ತ್ಯಾ ಬಾವ್ಡ್ಯಾಕ್ ಹ್ಯಾ ಪರಿಸ್ಥಿತೆ ವರ್ವಿಂ, ಸರ್ದಾರ್ ಸಿಮಾಂವ್ಚೆರ್ ಕಸಲೆಂ ಪುಣೀ ನವೆಂ ಖರ್ಗ್ ಸನ್ನಿಹಿತ್ ಜಾಲಾಂ ಮ್ಹಣ್ ಚಡ್ ಕಾವ್ಜೆಣಿ ಆನಿ ಮತಿಂತ್ ಭ್ಯೆಂ ದಿಸೊಂಕ್ ಲಾಗ್ಲೆಂ.

ನೀಜ್ ಜಾವ್ನ್, ಕುರಿಯೆಲ್ ಥಾವ್ನ್ ಆಯಿಲ್ಲ್ಯಾ ಶಿಪಾಯಾಂಚೆರ್ ಅಪಾಲಿಪಾ ಜಬ್ಬೊರ್ ದೊಳೊ ಆಸ್‍ಲ್ಲೊ ಮಾತ್ರ್ ನಹಿಂ, ತೆ ನ್ಹಾಂವ್ಕ್ ವಾ ನಿದೊಂಕ್ ಗೆಲ್ಲ್ಯಾ ವೆಳಾರ್ – ಟಿಪ್ಪುಚ್ಯಾ ಹುಕ್ಮೆನ್, ಆನಿ ಪ್ರತ್ಯೇಕ್ ಜಾವ್ನ್ ಷೇಕ್ ಆಲಿಚ್ಯಾ ಆನಿ ವೆಂಕಪ್ಪಯ್ಯಾಚ್ಯಾ ಆಸಕ್ತೆನ್ – ತಾಂಚ್ಯಾ ವಸ್ತ್ರಾಂನಿ ಆನಿ ತಾಂಚ್ಯಾ ಖಾಸ್ಗಿ ವಸ್ತುಂನಿ, ಆನಿ ತಾಣಿಂ ಸವಾರಿ ಕೆಲ್ಲ್ಯಾ ಘೊಡ್ಯಾಂಚ್ಯಾ ಜೀನಾಂನಿ ಲೆಗೂನ್ ಕಾಂಯ್ ಲಿಪವ್ನ್ ದವರ್‌ಲ್ಲಿ ವರ್ದಿ ಪುಣೀ ಆಸಾಗೀ ಮ್ಹಣ್ ಭೋವ್ ಚತ್ರಾಯೆನ್ ತಪಾಸಣ್ ಕರ್ನ್‍ಯೀ ಜಾಲ್ಲೆಂ.

ಕಾಂಯ್ ದುಬಾವಾಕ್ ಇಡೆಂ ದಿಂವ್ಚೆ ತಸಲೆಂ ಪುನ್ಯಾನ್ ಕಿತೆಂಚ್ ಮೆಳೊಂಕ್ ನಾ.

ಬಂದಿಂತ್ ಆಸ್‍ಲ್ಲ್ಯಾ ಫಕೀರ್ ಮಹಮ್ಮದಾಕ್ ಪಯ್ಲೆಂ ಕಾಂಯ್ ಕಷ್ಟ್ ದೀಂವ್ಕ್ ನಾಂತ್. ಬಗಾರ್, ಬಾದಶಹಾಚ್ಯಾ ಸರ್ಕಾರಾಕ್ ಉಪ್ಕಾರ್ಚಿ ಕಾಂಯ್ ಖಬರ್ ವಾ ಹಿಶಾರೆ ತಾಕಾ ಕಳಿತ್ ಆಸ್‍ಲ್ಲೆಪರಿಂ ಉಗ್ಡಾಪೆ ತಾಣೆಂ ಕೆಲ್ಯಾರ್, ಬಾದಶಹಾ ತಾಚೆರ್ ಕಾಕುಳ್ತ್ ದಾಕಯ್ತಲೊ ಆನಿ ತಾಕಾ ನವೊ ಹುದ್ದೊ ದಿತಲೊ ಮ್ಹಣ್ ಆಶಾ ದಾಕಯಿಲ್ಲಿ.

ತೊ ಬಾವ್ಡೊ ಕಿತೆಂ ಸಾಂಗ್ತಲೊ? ಬೋಳೂರಾಂತ್ ದುಸ್ರೆ ಪಾವ್ಟಿಂ ಜಾಲ್ಲಿ ಝಡ್ತಿ ಆನಿ ಬಾದಶಹಾಚ್ಯಾ ಹುಕ್ಮೆ ಪ್ರಕಾರ್ ತೀಸ್ ದಿಸಾಂಚ್ಯಾ ವಾಯ್ದ್ಯಾಚೆಂ ಫರ್ಮಾಣ್ ಆಸ್‍ಲ್ಲೆಂ ತೀರ್ಪ್ ಆಯ್ಕೊನ್, ದುಸ್ರಿ ಕಸಲಿಚ್ ವಾಟ್ ನಾಸ್ತಾಂ ಆಪ್ಣೆಂ ಪೊಳಾಪಳ್ ಘೆತ್‍ಲ್ಲಿ ಮ್ಹಣ್ ತಾಣೆಂ ಆಡ್ದೊಸ್ ಮಾಗ್ಲೊ.

ತಿತ್ಲೆಂಚ್.

ಏಕ್ ಪಾವ್ಟಿಂ ಕೈದ್ಯಾಕ್, ಬಾದಶಹಾಚ್ಯಾ ಅಪೇಕ್ಷೆ ಪರ್ಮಾಣೆಂ – ಸರ್ದಾರ್ ಸಿಮಾಂವ್ಕ್ ಅನಿ ಸರ್ದಾರ್ ಯೂಸುಫ್ ಆಲಿಕ್ ಕಳಿತ್ ನಾಸ್ತಾನಾ – ಬಾದಶಹಾನ್ ಖಾಸ್ಗಿ ನ್ಯಾಯ್ ಕರ್ಚ್ಯಾ ಆನಿ ತೀರ್ಪ್ ದಿಂವ್ಚ್ಯಾ ಎಕಾ ವ್ಹರೆವಿಂಗಡ್ ಕಮ್ರಾಕ್ ವ್ಹರಯ್ಲೊ.

ಥಂಯ್ಸರ್ ಖುದ್ ಟಿಪ್ಪು ಸುಲ್ತಾನಾನ್‍ಂಚ್, ಫಕೀರ್ ಮಹಮ್ಮದಾ ಕಡೆನ್ ಸಬಾರ್ ಸವಾಲಾಂ ವಿಚಾರ್‌ಲ್ಲಿಂ. ತ್ಯಾ ವೆಳಾರ್‌ಯೀ ಭಿಯಾನ್ ಥರ್ಥರ್ಚ್ಯಾ ಫಕೀರ್ ಮಹಮ್ಮದಾ ವರ್ವಿಂ ಚಡಿತ್ ಕಾಂಯ್ ಸಾಂಗೊಂಕ್ ಸಾಧ್ಯ್ ಜಾಂವ್ಕ್ ನಾ.

ಟಿಪ್ಪುನ್ ಕಶೆಂ ಕಶೆಂ ಘುಂವ್ಡಾವ್ನ್ ವಿಚಾರ್ಲ್ಯಾರೀ, ಸರ್ದಾರ್ ಸಿಮಾಂವ್ ಬೋಳೂರಾಕ್ ಪಾವ್‍ಲ್ಲೊ – ರಾಜ್‍ದ್ರೋಹಿ ನಸ್ರಾನಿ ಥೊಡೆ ಕೈದಿ ಜಾಲ್ಲೆ – ತಾಂಚಿ ಝಡ್ತಿ ಕರ್ನ್ ತಾಂಕಾಂ ಮೊರ್ನಾಚಿ ಶಿಕ್ಷಾ ಫರ್ಮಾಯಿಲ್ಲಿ – ಉಪ್ರಾಂತ್ ತೆ ನಪಂಯ್ಚ್ ಜಾಲ್ಲೆ – ದುಸ್ರೆ ಪಾವ್ಟಿಂಚಿ ಝಡ್ತಿ – ಮಹಮ್ಮದಾಲಿನ್ ಜೀವ್ಘಾತ್ ಕರ್ನ್ ಘೆತ್‍ಲ್ಲೊ… ಹೆಂ ಸರ್ವ್ ಕಾಂಯ್ ಚಡುಣೆಂ ನಾಸ್ತಾನಾ, ಸರ್ದಾರ್ ಸಿಮಾಂವ್ನ್ ದಿಲ್ಲ್ಯಾ ವರ್ದೆಪರಿಂಚ್ ಫಕೀರ್ ಮಹಮ್ಮದಾನ್ ಸಾಂಗ್ಲೆಂ!

“ಕಿತ್ಲೆಂ ಚಡ್ ಆಮಿ ಹೆಂ ಚಿಂತಾಂವ್, ತಿತ್ಲೆಂ ಚಡ್ ವಿಚಿತ್ರ್ ಹೆಂ ಆಮ್ಕಾಂ ದಿಸ್ತಾ!” ಮ್ಹಣಾಲೊ ಟಿಪ್ಪು ಸುಲ್ತಾನ್, ಆಪ್ಲ್ಯಾ ಮಿಶ್ಯಾಂಚೆಂ ಪೋಂತ್ ಚಿಂವೊನ್.

“ಹುಜೂರ್!” ರಡ್ಲೊ ಫಕೀರ್ ಮಹಮ್ಮದ್. “ಮಾಫ್ ಕರಿಜಾಯ್, ಪೈಗಂಬರ್ ಬಾದಶಹಾ!”

“ಮಾಫ್!” ಧೆಂಕ್ಣೊ ಮಾರ್ಲೊ ಬಾದಶಹಾನ್. “ಆಮ್ಚ್ಯಾ ಸರ್ಕಾರಾಂತ್ ಆಸ್‍ಲ್ಲಿಂ ಸಮಸ್ಯಾಂ ಉಣಿಂ ಕರ್ಚ್ಯಾ ಪ್ರಾಸ್ ತಿಂ ಚಡ್ ಕೆಲ್ಲ್ಯಾ ಖಾತಿರ್ ತುಮ್ಕಾಂ ಜಾಯ್ ಮಾಫ್! ಬೇವಕೂಫ್ – ಆತಾಂ ಸಾಂಗ್ – ಆಮ್ಚಿ ಹುಕುಮ್ ನಾಸ್ತಾನಾ, ತ್ಯಾ ಸೂಅರಾಕ್ – ಕಿತೆಂ ತಾಚೆಂ ನಾಂವ್ – ಷೇರ್ ಖಾನ್, ದಾಲ್ಮೇದಾ! ತ್ಯಾ ಸೂಅರಾಕ್ ಬೋಳೂರ್ ಠಾಣ್ಯಾಂತ್ ಆಮ್ಚೊ ಪ್ರತಿನಿಧಿ ಜಾವ್ನ್ ನಮಿಯಾರ್‌ಲ್ಲೆಂ ಕೊಣೆಂ ಆನಿ ಕಶೆಂ?”

ಫಕೀರ್ ಮಹಮ್ಮದಾಕ್ ಉಲಂವ್ಕ್ ಜೀಬ್ ನಾತ್‍ಲ್ಲಿ – ಭಿಯಾನ್ ತಿ ರೂಕ್ ಜಾಲ್ಲಿ.

“ವ್ಹರಾ ತಾಕಾ ತೆವ್ಶಿನ್!”

ತಸೊ ತಾಕಾ ಪರ್ತ್ಯಾನ್ ಬಂಧಿಂತ್ ಘಾಲ್ಲೊ, ಆನಿ ಸರ್ವ್ ಥರಾಂಚೆ ಕಷ್ಟ್ ತ್ಯಾ ಉಪ್ರಾಂತ್ ತಾಕಾ ದೀಂವ್ಕ್ ಪ್ರಾರಂಭ್ ಕೆಲ್ಲೆ.

ಹಿ ಸಗ್ಳಿ ಖಬರ್ ಸರ್ದಾರ್ ಸಿಮಾಂವ್ಕ್ ಆಸ್‍ಲ್ಲಿ, ಆನಿ ಬಾದಶಹಾನ್ ಭೆಟೆ ಖಾತಿರ್ ತಾಕಾ ಎದೊಳ್‍ಯೀ ಆಪಂವ್ಕ್ ನಾತ್‍ಲ್ಲೆಂ.

ತಶೆಂ ಮ್ಹಣ್ತಾನಾ, ದುಸ್ರ್ಯಾ ದಿಸಾ ಆಪವ್ಣೆಂ ಆಯ್ಲೆಂ.

ಸರ್ದಾರ್ ಸಿಮಾಂವ್, ಬಾದಶಹಾಚ್ಯಾ ಸನ್ನಿಧಿಕ್ ಪಾವ್ತಾನಾ, ಥಂಯ್ಸರ್ ಸರ್ದಾರ್ ಯೂಸುಫ್‍ಯೀ ಆಪುಣ್ ಜಾವ್ನ್ ಪಯ್ಲೊಚ್ ಯೇವ್ನ್ ಪಾವ್‍ಲ್ಲೊ. ಬಂಧಿವಾನಾಪರಿಂ ಉಬೊಚ್ ತೊ ಆಸ್‍ಲ್ಲೊ.

ಹೆರ್ ಕೊಣ್‍ಯೀ ನಾತ್‍ಲ್ಲೆ.

“ಮ್ಹಜ್ಯಾ ಬಾದಶಹಾ ಟಿಪ್ಪು ಸುಲ್ತಾನ್ ಮನ್ಸೂರ್ ಆಲಿಖಾನ್ ಬಹಾದುರಾಂಕ್, ಸೆವಕಾಚೆಂ ಖಾಲ್ತೆಂ ವಂದನ್” ಮ್ಹಣಾಲೊ ಸರ್ದಾರ್ ಸಿಮಾಂವ್ ಚತ್ರಾಯೆನ್ ಪ್ರಣಾಮ್ ಕರ್ನ್.

ದಿವಾನ್ ಖಾನಾಚೆರ್ ವೊಣ್ಕೊನ್ ಆಸ್‍ಲ್ಲೊ ಟಿಪ್ಪು ಸುಲ್ತಾನ್, ಚಿಕ್ಕೆ ನೀಟ್ ಜಾಲೊ. ತಾಚೆ ವೋಂಟ್ ವ್ಹಯ್ಗೀ-ನಹಿಂಶೆ ಹಾಸ್ಲೆ.

“ಸ್ವಾಗತ್ ಮ್ಹಜ್ಯಾ ಮೊಗಾಚ್ಯಾ ಸರ್ದಾರಾ!” ಮ್ಹಣಾಲೊ ತೊ. “ಲಾಂಬ್ ಪಯ್ಣಾ ಉಪ್ರಾಂತ್, ಆನಿ ಆಮ್ಚೆ ಖಾತಿರ್ ಸಬಾರ್ ಸಾಹಸಿಕ್ ಕಾಮಾಂ ಯಶಸ್ವಿ ಥರಾನ್ ಕರ್ನ್ ಆಯ್ಲ್ಯಾ ಉಪ್ರಾಂತ್ ಹೊ ಥೊಡೊ ವಿಶೆವ್ ತುಮ್ಕಾಂ ಉಪ್ಕಾರ್ಲೊ ಮ್ಹಣ್ ಸಂಸೊಸ್ ಆಮಿ ಪಾವ್ತಾಂವ್.”

“ವ್ಹಯ್ ಹುಜೂರ್! ಬಾದಶಹಾಂಚ್ಯಾ ದಯಾಳಾಯೆ ಖಾತಿರ್ ಆಮಿ ಋಣಿ ಜಾವ್ನ್ ಆಸಾಂವ್.”

“ಆಸೊಂ, ಬಸಾತ್” ತಾಣೆಂ ಹಾತ್ ಭಾಸ್ ಕೆಲಿ, ಆನಿ ಕಾಂಪಿಣ್ ವ್ಹಾಜಯ್ಲಿ.

ಸರ್ದಾರ್ ದೊಗ್‍ಯೀ, ಪಾಯಾಂಚಿಂ ಚಿನೆಲಾಂ ನಿಕ್ಳಾವ್ನ್, ಫುಡ್ಲ್ಯಾ ದಿಂಬಾಂಚೆರ್ ದಿಂಬಿಯಾಂನಿ ಬಸ್ಲೆ. ತೆವ್ಶಿಲ್ಯಾನ್ ಚಾಕೊರ್, ರುಪ್ಯಾಚ್ಯಾ ಗಿಂಡ್ಲಾಂನಿ ತಾಪಯಿಲ್ಲೆಂ ದೂದ್ ಆನಿ ಹರ್ವಾಣಾಂತ್ ಥರಾವಳ್ ಫಳ್ ವಸ್ತು ಹಾಡ್ನ್ ದವರ್ನ್ ಪಾಶಾರ್ ಜಾಲೊ. ಬಾದಶಹಾನ್ ಏಕ್ ದೋನ್ ದಾಕೊ ತೊಂಡಾಂತ್ ಘಾಲ್ಯೊ, ದೂದ್ ತೊ ಪಿಯೆಲೊ.

ಸರ್ದಾರಾಂನಿಯೀ ತಶೆಂಚ್ ಕೆಲೆಂ. ತೆದೊಳ್ ಪರ್ಯಾಂತ್ ಕೊಣೀ ಉಲಂವ್ಕ್ ನಾಂತ್. ಸರ್ದಾರ್ ಸಿಮಾಂವ್ಚ್ಯಾ ಮತಿಂತ್ ಕಿತೆಶೆಂ ಜಾತಾಲೆಂ, ಆನಿ ಯೂಸುಫಾಕ್ ಬಸ್‍ಲ್ಲೆ ಕಡೆನ್ ಮುಯೊ ಚಾಬ್‍ಲ್ಲೊ ಅನುಭವ್ ಜಾತಾಲೊ.

“ಹ್ಮೂಂ!” ಸುಲ್ತಾನ್ ಥೊಡ್ಯಾ ವೆಳಾನ್ ಘುರ್ಮೆಲೊ. “ಕುರಿಯೆಲಾಂತ್ ಪಾಟಿಂ ಉರ್‍ಲ್ಲೆ ತುಮ್ಚೆ ಶಿಪಾಯ್ ಶಾಬಿತಾಯೆನ್ ಯೇವ್ನ್ ಪಾವ್ಲ್ಯಾತ್. ತುಮಿ ವಿಶೆವಾರ್ ಆಸ್‍ಲ್ಲ್ಯಾನ್, ತುಮ್ಕಾಂ ಧೊಶಿನಾಯೆ ಮ್ಹಣ್ ಆಮಿಂಚ್ ತಾಂಕಾಂ ಸಾಂಗ್‍ಲ್ಲೆಂ.”

“ಬಾದಶಹಾಚಿ ದಯಾ!”

“ತ್ಯಾ ಶಿಪಾಯಾಂ ಕಡೆನ್ ಬೋಳೂರ್ ಠಾಣ್ಯಾಚ್ಯಾ ಖಿಲ್ಲೆದಾರಾನ್ ಜರೂರ್ ಏಕ್ ವರ್ದಿ ಧಾಡ್ಲ್ಯಾ – ತುಜ್ಯಾ ನಾಂವಾರ್ ತಿ ಆಸಾ. ಆಮಿ ತಿ ಫೊಡುಂಕ್ ನಾ.”

“ಬಾದಶಹಾಂನಿ ಜರೂರ್ ಫೊಡುನ್ ತಿ ವಾಚ್ಯೆತಿ…”

“ವಾಚ್ಯೆತಿ, ಪುಣ್ ತುಂ ಹಾಂಗಾ ಆಸ್‍ಲ್ಲ್ಯಾನ್, ತುವೆಂಚ್ ತಿ ವಾಚುನ್ ಸಾಂಗ್ಚಿ ಬರೆಂ ಮ್ಹಣ್ ಆಮ್ಕಾಂ ಭೊಗ್ಲೆಂ. ಧರ್, ಫೊಡ್ನ್ ಪಳೆ. ಆಯ್ಕಯಾಂ ಕಿತೆಂ ಖಬರ್ ತಿ.”

ಚಾಮ್ಡ್ಯಾಂತ್ ರೆವ್ಡಾವ್ನ್ ಮ್ಹೊರ್ ಮಾರ್‌ಲ್ಲಿ ತಿ ಕೊವ್ಳಿ, ಸರ್ದಾರ್ ಸಿಮಾಂವ್ನ್ ಹಾತಾಂತ್ ಧರ್ಲಿ. ಮ್ಹೊರ್ ತಾಣೆಂ ಫೊಡ್ಲಿ. ಕೊವ್ಳಿ ಸೊಡಯ್ಲಿ. ವ್ಹಯ್ – ಇಸ್ಮಾಯಿಲ್ ಬಾಬಾನ್ – ಸರ್ದಾರ್ ಸಿಮಾಂವ್ಕ್ ಉರ್ದು ಕಳಿತ್ ನಾ ಮ್ಹಣ್ ಜಾವ್ಯೆತ್ – ಕನ್ನಡಾನ್ ತಿ ಬರಯಿಲ್ಲಿ. ಟಿಪ್ಪುಕ್ ದುಬಾವೊಂಕ್ ಅವ್ಕಾಸ್ ದೀನಾಯೆ ಮ್ಹಣ್, ಭಿತರ್ಲ್ಯಾ ಭಿತರ್ ಚಿಕ್ಕೆ ಕಾವ್ಜೆವ್ನ್, ವ್ಹಡ್ಲ್ಯಾನ್ ತಾಣೆಂ ತಿ ವಾಚ್ಲಿ:

“ಬಾದಶಹಾ ಟಿಪ್ಪು ಸುಲ್ತಾನ್ ಮನ್ಸೂರ್ ಆಲಿ ಖಾನ್ ಬಹಾದುರಾಂಚ್ಯಾ ಸರ್ಕಾರಾಂತ್ ಸರ್ದಾರ್ ಜಾವ್ನಾಸ್‍ಲ್ಲ್ಯಾ ಶ್ರೀಮಾನ್ ಸಿಮಾಂವ್ ಪೆದ್ರು ಪ್ರಭುಕ್, ಬೋಳೂರ್ ಠಾಣ್ಯಾಂತ್ಲ್ಯಾ ಇಸ್ಮಾಯಿಲ್ ಬಾಬಾಚೆಂ ವಂದನ್. ತುಮಿ ಧಾಡ್ನ್ ದಿಲ್ಲೊ ಕೈದಿ ಶಾಬಿತ್ ಆಮ್ಚ್ಯಾ ಬಂಧಿಂತ್ ಆಸಾ. ವಿಶೇಸ್ ಕಿತೆಂ ಮ್ಹಳ್ಯಾರ್ ತಾಚಿ ಝಡ್ತಿ ಖುದ್ ಬಾದಶಹಾ ಮುಖಾರ್ ಜಾಯ್ಜಯ್ – ತಶಿ ಭಾಸ್ ದೀನಾತ್ಲ್ಯಾರ್ ಆಪುಣ್ ಆಹಾರ್ ಘೆನಾಸ್ತಾಂ ಮೊರ್ತಾಂ ಮ್ಹಣ್ ತೊ ಹಟಾಕ್ ಲಾಗ್ಲಾ. ಆಮ್ಕಾಂ ಕಿತೆಂ ಕರ್ಚೆಂ ಮ್ಹಣ್ ಕಳನಾ. ಬಾದಶಹಾಂಚಿ ಖುಶಿ ಕಿತೆಂ ಮ್ಹಳ್ಳೆಂ ಸಮ್ಜೊನ್ ತುಮಿ ಆಮ್ಕಾಂ ವರ್ದಿ ಧಾಡ್ತಾಂ ಮ್ಹಳ್ಳೆಂ ಖಂಯ್, ದೆಕುನ್ ಹಿ ವರ್ದಿ ತುಮ್ಕಾಂ ಧಾಡ್ಲ್ಯಾ…

ಬಾದಶಹಾಚ್ಯಾ ಸರ್ಕಾರಾಂತ್ಲೊ ಖಾಲ್ತೊ,
ಭಕ್ಷಿ ಇಸ್ಮಾಯಿಲ್ ಬಾಬಾ ರುಜು…”

“ತಶಿ ಖಬರ್ ತರ್” ಟಿಪ್ಪು ಸುಲ್ತಾನ್ ನಾಕಾಂತ್ಲ್ಯಾನ್ ಹಾಸ್ಲೊ. “ಆಮಿ ಹೆರ್ ಕಾಂಯ್ ವಿಶೇಸ್ ಆಸಾಗೀ ಮ್ಹಣ್ ಚಿಂತ್‍ಲ್ಲೆಂ.”

ಸರ್ದಾರ್ ಸಿಮಾಂವ್ನ್ ಶ್ವಾಸ್ ಸೊಡ್ಲೊ.

“ತ್ಯಾ ಬದ್ಮಾಶಾಕ್ ಥಂಯ್ಚ್ ಕಿತ್ಯಾಕ್ ಪಾಶಿ ದೀಂವ್ಕ್ ನಾಂಯ್ ತುವೆಂ?” ಟಿಪ್ಪು ಸುಲ್ತಾನಾನ್ ವಿಚಾರ್ಲೆಂ.

“ತ್ಯಾ ಮನ್ಶ್ಯಾಚಿ ಝಡ್ತಿ ಕೆಲ್ಯಾರ್, ಆಮ್ಕಾಂ ಆಮ್ಚ್ಯಾ ಹೆರ್ ಥೊಡ್ಯಾ ರಾಜಕೀಯ್ ದುಸ್ಮಾನಾಂಚೊ ಘುಟ್ ಮೆಳತ್ ಮ್ಹಣ್ ಮ್ಹಾಕಾ ಭೊಗ್ಲೆಂ. ತ್ಯಾ ಮನ್ಶ್ಯಾಕ್ ಕುರಿಯೆಲಾಂತ್ ಮಾತ್ರ್ ನಹಿಂ, ಕುಂಬ್ಳಾ, ನೀಲೇಶ್ವರ್ ಆನಿ ಕಣ್ಣಾನೂರಾಂತ್ ಹಾತ್ ಆಸ್‍ಲ್ಲ್ಯಾ ವರ್ವಿಂ, ತ್ಯಾ ಸಂಬಂಧಿಂ ಬಾದಶಹಾಂಚಿ ಖುಶಿ ಕಿತೆಂ ಮ್ಹಣ್ ಸಮ್ಜೊಂಚ್ಯಾ ಖಾತಿರ್ ಹಾಂವೆಂ ತಾಕಾ ಬಂಧಿಕ್ ಧಾಡ್‍ಲ್ಲೊ, ಹುಜೂರ್!”

“ಬರೆಂಚ್!” ಟಿಪ್ಪು ಸುಲ್ತಾನ್ ಚಿಕ್ಕೆ ಮೊವಾಳ್ಳೊ; ತಾಚೆ ದೊಳೆ ಚಿಕ್ಕೆ ನಿತಳ್ಳೆ.

“ತ್ಯಾ ಶಿವಾಯ್, ಕೊಣ್‍ಯೀ ತೊ ಜಾಂವ್ದಿ, ಬಾದಶಹಾಚೆಂ ನಾಂವ್ ಕಾಡ್ನ್ ನೀತ್ ವಿಚಾರ್ತಾ ಜಾಲ್ಯಾರ್, ಅಲ್ಲಾಚೆ ದಯೆನ್ ತಾಂಕಾಂ ಕಾನ್ ದೀಂವ್ಕ್ ಆಮಿ ತಯಾರ್ ಆಸಾಂವ್ ನಹಿಂಗೀ?”

“ವ್ಹಯ್ ಹುಜೂರ್!”

“ತರ್ ತುಮಿ ಆಜ್ ಥಾವ್ನ್ ಕಾಮಾಕ್ ಲಾಗ್ಯಾತ್ – ಆಮ್ಚ್ಯಾ ಹುಕ್ಮೆ ಶಿವಾಯ್ ಸಿರಿಂಗಪಟ್ಟಣಾ ಥಾವ್ನ್ ಭಾಯ್ರ್ ಮಾತ್ರ್ ಕೆದಿಂಚ್ ವಚೊಂಕ್ ನಜೊ. ತ್ಯಾ ಕೈದ್ಯಾಕ್ – ಬೋಳೂರ್ ಥಾವ್ನ್, ಕುರಿಯೆಲಾಂತ್ಲ್ಯಾ ಹೆರ್ ಕೈದ್ಯಾಂಕ್ ಆಂಬುಡ್ತಾನಾ, ತಾಂಚೆ ಸಾಂಗಾತಾ ಫಾವೊ ತ್ಯಾ ಬಂದೋಬಸ್ತೆ ಖಾಲ್ ಪಟ್ಟಣಾಕ್ ಧಾಡುಂಕ್ ಹುಕುಮ್ ಧಾಡ್.”

“ಜೀ, ಹುಜೂರ್.”

“ಆನಿ ಸರ್ದಾರ್ ಸಿಮಾಂವ್, ಫಾಲ್ಯಾಂ ಸಕಾಳಿಂ ನೋವ್ ವೊರಾರ್ ಆಮ್ಕಾಂ ಭೆಟ್ ದೀ, ಆಮ್ಕಾಂ ಹೆರ್ ಥೊಡೆ ವಿವರ್ ಜಾಯ್…” ಮ್ಹಣೊನ್ ಟಿಪ್ಪು ಸುಲ್ತಾನ್ ಘುಂವೊನ್ ಭಿತರ್ ಚಲ್ಲೊ.

“ಜೀ ಹುಜೂರ್!” ಮ್ಹಣೊನ್ ಸರ್ದಾರ್ ದೊಗ್‍ಯೀ ಭಾಯ್ರ್ ಪಡ್ಲೆ.

“ತ್ಯಾ ತೊಪಾಸಿಕ್ ಲಗಾಡ್ ಕಾಡಿನಾತ್‍ಲ್ಲಿ ಆಮ್ಚಿ ವ್ಹಡ್ಲಿ ಚೂಕ್ ಜಾಲಿ ನಹಿಂಗೀ?” ಮ್ಹಣಾಲೊ ಯೂಸುಫ್ ಆಲಿ.

“ಹಾಂವ್‍ಯೀ ಚಿಂತಾಂ ತೆಂಚ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಸುಟ್ಕಾ ದೀವ್ನ್ ಆಮಿಂಚ್ ಕಾಟ್ಕಾಯ್ ವೋಡ್ನ್ ಘೆತ್‍ಲ್ಲೆಪರಿಂ ಜಾಯ್ನಾತ್ಲ್ಯಾರ್ ಪುರೊ!”

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel