ಸರ್ದಾರಾಚೆಂ ಸನ್ನಿಧಾನ್ – 5: ದುಬಾವಾಚಿಂ ಖುಣಾಂ

ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 5
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 5: ದುಬಾವಾಚಿಂ ಖುಣಾಂ

ಥೊಡ್ಯಾಚ್ ಹಫ್ತ್ಯಾಂ ಆದಿಂ ಕಾವೂರಾಂತ್ ದುಮ್ಗಾ ಪಿಂತಾಚ್ಯಾ ಆವಯ್ಕ್ ಮಾತಿಯೆಕ್ ಪಾಯಿಲ್ಲೆಪರಿಂ, ಆತಾಂ ಕೊಡಿಯಾಳ್‍ಬೈಲಾಂತ್, ತಾಂಚ್ಯಾಚ್ ಮ್ಹಾಲ್ಗಡ್ಯಾ ಘರಾಚ್ಯಾ ವಠಾರಾಂತ್, ಮಾನಿನ್ ವೆರೊನಿಕಾ ಕುವೆಲಿಕ್ ಮಾತ್ಯೆ ಪಾಯ್ಲಿ.

ಕಿತ್ಲೆ ಕಷ್ಟ್ ಆನಿ ಕಿತ್ಲಿ ಖಂತ್ ಜಾಲ್ಯಾರೀ, ತೆಂ ಕಾಮ್ ತ್ಯಾಚ್ ರಾತಿಂ ತಾಣಿಂ ಆಖೇರ್ ಕೆಲೆಂ. ಭೊಂವಾರಿಂಚ್ಯಾ ಫುಲಾಂನಿ, ಹಾಜರ್ ಆಸ್ಲೆಲ್ಯಾಂಚ್ಯಾ ಪ್ರಾರ್ಥನಾಂನಿ ಆನಿ ದುಖಾಂನಿ ತ್ಯಾ ವೀರ್ ಕುಂವರ್ನಿಚೊ ಫೊಂಡ್ ಭರ್ಲೊ.

ತಿ ವೀರ್ ಮಾತ್ರ್ ನಹಿಂ, ಮಾಡ್ತಿರ್‌ಯೀ ಜಾವ್ನಾಸ್‍ಲ್ಲಿ.

ತ್ಯಾಚ್ ಕಾರಣಾ ವರ್ವಿಂ ಜಾವ್ಯೆತ್ – ಥಂಯ್ಸರ್ ತ್ಯಾ ವೆಳಾರ್ ಹಾಜರ್ ಆಸ್‍ಲ್ಲ್ಯಾಂಕ್ ತೆಂ ಕಳಿತ್ ನಾತ್‍ಲ್ಲೆಂ – ಫುಡ್ಲ್ಯಾ ಥೊಡ್ಯಾಚ್ ವರ್ಸಾಂ ಭಿತರ್ ತ್ಯಾ ವಠಾರಾಕ್ ದುಖಿ ಸಾಯ್ಬಿಣ್ ಪಾತ್ರೊನ್ ಜಾಲಿ. ತೆಣೆಂಚ್ಯಾಚ್ ಸರ್ವ್ ಜಾತಿಂಚ್ಯಾ ಲೊಕಾನ್ ಮಾನೆಸ್ತ್ ಜೋಕಿಮ್ ಜುವಾಂವ್ ಫೆರ್ನಾಂದಾಚ್ಯಾ ಮುಖೇಲ್ಪಣಾ ಖಾಲ್ ದುಡ್ವಾಚೆಂ ಆನಿ ವಾವ್ರಾಚೆಂ ದಾನ್ ದೀವ್ನ್, ಏಕ್ ಲ್ಹಾನ್ ಕೊಡಿಯಾಳ್‍ಬೈಲ್ ಕೊಪೆಲ್ ಬಾಂಧ್ಲೆಂ. 1857 ಇಸ್ವೆಂತ್ ತೆಂ ಪರ್ತುನ್ ಘಾಲೆಂ, ಆನಿ ತ್ಯಾಚ್ ಜಾಗ್ಯಾರ್ ಮಾನೆಸ್ತ್ ಜುಜೆ ಜುವಾಂವ್ ಕುವೆಲಿನ್ ಸಾಟ್ ಹಜಾರ್ ರುಪಯ್ ಖರ್ಚುನ್ ಏಕ್ ಮಜ್ಭೂತ್ ಬಾಂಧಾಪ್ ಆಸಾ ಕೆಲೆಂ, ಆನಿ ಹ್ಯಾ ಕಾಣಿಯೆಂತ್ ಘಡ್‍ಲ್ಲ್ಯಾ ವಿಷಯಾಂಚ್ಯಾ ಪಯ್ಲ್ಯಾ ಶತಮಾನಾಚೆಂ ಸ್ಮಾರಕ್‍ಶೆಂ, 1878 ಇಸ್ವೆಂತ್ ಕೆನರಾ ಮಿಸಾಂವ್ ಜೆಜ್ವಿತಾಂನಿ ವಹಿಸುನ್ ಘೆತ್‍ಲ್ಲ್ಯಾ ವೆಳಾರ್, ಮಂಗ್ಳುರ್ಚ್ಯಾ ಬಿಸ್ಪಾಕ್ ಕಾಣಿಕ್ ದಿಲೆಂ. ಆಜೂನ್ ಪರ್ಯಾಂತ್ ತೆಂ ‘ಬಿಸ್ಪಾಚೆಂ ಘರ್’ ಆನಿ ಕೊಪೆಲ್ ನಾಂವಾಡುನ್ ಆಸಾತ್.

ಮೊರ್ನಾ ಉಪ್ರಾಂತ್, ಫಾಂತ್ಯಾಫಾಂತ್ಯಾರ್‌ಚ್ ತಾಣಿಂ ದುಖಾಚಿ ಪೇಜ್ ಆನಿ ಚೆಟ್ನಿ ಘೆತಾನಾ ಝುಂತ್ ಚಲಯ್ಲೊ.

ಫುಡೆಂ ಕಿತೆಂ ಕರ್ಚೆಂ?

ತೆಂಚ್ ಸವಾಲ್ ಸಕ್ಡಾಂಚ್ಯಾ ಮತಿಂತ್ ಕಾಂತಯ್ತಾಲೆಂ.

“ಎದೊಳ್” ಮ್ಹಣಾಲೊ ದುಮ್ಗಾ ಪೀಂತ್, ಖಂತಿನ್. “ಕಿತೆಂ ಅನ್ವಾರ್ ಆಯ್ಲ್ಯಾರೀ ಆನಿ ಖಂಯ್ ಆಮಿ ಆಸ್ಲ್ಯಾರೀ, ಗರ್ಜೆ ವೆಳಾರ್ ನವೆಂ ಧಯ್ರ್ ಆನಿ ಭುಜಾವಣ್ ಘೆವ್ನ್ ಆಮ್ಚೆ ನಿಚೆವ್ ಥಿರ್ ಕರುಂಕ್ ತಿ ಏಕ್ ಆಕರ್ಷಣ್ ಜಾವ್ನಾಸ್‍ಲ್ಲಿ.”

“ತೆಂ ಜಾವ್ಯೆತ್ ಮಾಮಾ” ಮ್ಹಣಾಲಿ ಇಜಾಬೆಲ್ ತೆರೆಜ್. ಸರ್‌ಲ್ಲ್ಯಾಂ ಸಾಂಗಾತಾ ಆಮಿಯೀ ಮೊರೊಂಕ್ ಜಾಯ್ನಾ. ತಶೆಂಚ್ ದುಖಾಂತ್ ಆಮಿ ಬುಡೊನ್ ಉರೊಂಕ್ ಜಾಯ್ನಾ; ಆಮ್ಚಿಂ ಕಾಮಾಂ ಆಮಿ ಎದೊಳ್ ಕರ್ನ್ ಆಸ್‍ಲ್ಲೆಪರಿಂಚ್ ಮುಂದರ್ಸಿಯಾಂ.”

“ಬರಾಬರ್!” ಮ್ಹಣಾಲೊ ಸಾವ್ಕಾರ್ ಮಾರ್ಸೆಲ್ ಕುವೆಲ್. “ಎದೊಳ್ ಚಲೊನ್ ಆಸ್‍ಲ್ಲ್ಯೊ ಮಾಗ್ಣ್ಯಾಚ್ಯೊ ಜಮಾತಿ ಫುಡೆಂಯೀ ಚಲೊಂದಿತ್.”

“ತರ್ ಹಾಂಗಾ – ಹ್ಯಾ ಘರಾಂತ್?” ವಿಚಾರ್ಲೆಂ ಮೊನಿಕಾನ್.

“ಹ್ಯಾ ಘರಾಂತ್ ಆಮಿಂಚ್ ರಾವ್ಯಾಂ. ಥೊಡೊ ತೇಂಪ್ ಮಾತ್ರ್ ಹಾಂಗಾ ಬಿಡಾರ್ ಜಾಂವ್ಚೆಂ ನಾಕಾ. ಆಮಿ – ಹಾಂವ್ ಆನಿ ಭಾವೊಜಿ – ಭಾಯ್ಲ್ಯಾಬಾರ್ ಆಸೊನ್ ಆಮ್ಚೊ ವ್ಯವಹಾರ್ ಚಲಯ್ತಾಂವ್. ತುಮಿಯೀ ಎದೊಳ್ ಖಂಯ್ಸರ್ ಆಸ್‍ಲ್ಲ್ಯಾತ್ ತಶೆಂಚ್ ರಾವೊನ್ ನಮಿಯಾರ್‌ಲ್ಲ್ಯಾ ದಿಸಾಚ್ಯಾ ಜಮಾತೆ ವೆಳಾರ್ ಸಾಂಗಾತಾ ಮೆಳಾ.”

“ಮ್ಹಜಿ ಅಭಿಪ್ರಾಯ್ ತಿಚ್” ಮ್ಹಣಾಲಿ ಆಗ್ನೆಸ್ ಕುಂವರ್ನ್. “ಎದೊಳ್ ಆಮ್ಕಾಂ ಎಕಾಮೆಕಾಚಿ ವಳಕ್ ಚಡ್ ನಾತ್‍ಲ್ಲಿ. ಪುಣ್ ಹ್ಯಾ ಉಪ್ರಾಂತ್ ಎಕಾಮೆಕಾ ಕಡೆನ್ ಚಡ್ ಸಂಪರ್ಕ್ ದವರ್ನ್ ಚಲೊಂಕ್ ಆಮಿ ವಾಟೊ ಸೊಧಿಜಾಯ್.”

ತೆಂ ಸಕ್ಡಾಂಕ್ ವ್ಹಯ್ ಮ್ಹಣ್ ದಿಸ್ಲೆಂ.

“ಪುಣ್ ಕಶೆಂ?” ದುಮ್ಗಾ ಪಿಂತಾನ್ ಸವಾಲ್ ಕೆಲೆಂ.

“ಸುಲಭ್ – ಥಂಯ್ ಥಂಯ್ ಚಲಂವ್ಚ್ಯಾ ಆಮ್ಚ್ಯಾ ಜಮಾತಿಂ ವರ್ವಿಂ” ಮ್ಹಣಾಲಿ ತಿ. “ಪುಣ್ ವೆವೆಗ್ಳ್ಯಾ ವಠಾರಾಂನಿ ಆಸ್ಚ್ಯಾ ಆಮ್ಚ್ಯಾ ಬಂಧ್ವಾಂ ಆನಿ ಮಿತ್ರಾಂ ಕಡೆನ್ ಸಂಪರ್ಕಾಚೊ ಗಾಂಚ್ ದವರ್ನ್ ಘೆಂವ್ಚೆಂ ಕಾಮ್ ಚಡಾವತ್ ಜಾವ್ನ್ ತುಮಿ ದಾದ್ಲ್ಯಾಂನಿ ವಹ್ಸಿಜಾಯ್.”

“ತಾಕಾ ಆಮಿ ತಯಾರ್!”

“ಆನಿ ಪಟ್ಟಣಾಂತ್ ಆಸ್ಚ್ಯಾಂ ಕಡೆನ್ ಆಮಿ ಚಡ್ ಸಂಬಂಧ್ ವಾಡಯ್ಜಾಯ್ – ತಿಂ ವಿಧಾನಾಂ ಚಿಕ್ಕೆ ಪಾಟ್ಲ್ಯಾನ್ ವರವ್ನ್ ಪಳವ್ಯೆತ್.”

“ತುವೆಂ ಕಿತೆಂ ಸಾಂಗ್ಲ್ಯಾರೀ ಆಮಿ ತಯಾರ್ ಭಯ್ಣಿ” ಮ್ಹಣಾಲೊ ಸಾವ್ಕಾರ್ ಮಾರ್ಸೆಲ್ ಕುವೆಲ್. “ಪುಣ್ ಹ್ಯಾ ಉಪ್ರಾಂತ್ ತುಜಿ ಆಮ್ಕಾಂ ಚಡ್ ಗರ್ಜ್ ಆಸಾ. ದೆಕುನ್ ತುವೆಂ ಚಡ್ ಚತ್ರಾಯೆನ್ ಆಸಜಾಯ್.”

“ವ್ಹಯ್, ವ್ಹಯ್!” ಮ್ಹಣೊನ್ ಹೆರಾಂನಿ ತಕ್ಲಿ ಹಾಲಯ್ಲಿ. ಮಾನಿನ್ ವೆರೊನಿಕಾನ್ ಸಾಂಗ್‍ಲ್ಲೆಂ, ಆತಾಂ ಆಗ್ನೆಸ್ ಕುಂವರ್ನಿ ಕಡೆನ್ ಖುದ್ ಉಲಯ್ತಾನಾ ಆನಿ ತಿಣೆಂ ಉಲಯಿಲ್ಲೆಂ ಆಯ್ಕತಾನಾ, ತಿಚಿ ಜವಾಬ್ದಾರಿ ಸಮ್ಜೊನ್, ತಿಚೆ ಥಂಯ್ ಗೌರವಾಚಿಂ ಚಿಂತ್ನಾಂ ನವ್ಯಾನ್ ಥಂಯ್ಸರ್ ಉದೆಲಿಂ.

“ತುಮಿ ಜಾಣಾಂತ್” ಮ್ಹಣಾಲಿ ತಿ. “ಹಾಂವೆಂ ಚಿಂತುಂಕ್ ನಾ ಆನಿ ಹಾಂವ್ ಫಾವೊ ನಹಿಂ; ಪುಣ್ ಸಿನೊಲೆಚ್ಯಾ ಅರ್ಲುಕೆಚೆಂ ಅರ್ಧ್ ಮ್ಹಜೆ ಕಡೆನ್ ಪಾವ್ಲಾಂ. ತೆಂ ಘೆಂವ್ಕ್ ತುಮಿಂಚ್ ದಾದ್ಲೆ ಕೊಣೀ…”

“ನಾ, ನಾ!” ಮ್ಹಣಾಲೊ ದುಮ್ಗಾ ಪೀಂತ್. “ವೆರೊನಿಕಾ ಬಾಯೆನ್ ಅಪೇಕ್ಷಿಲ್ಲೆಪರಿಂ, ತುಜೆ ಕಡೆನ್‍ಂಚ್ ತೆಂ ಆಸಜಾಯ್ ಮ್ಹಳ್ಳಿ ಮಾಂಡಾವಳ್ ದೆವಾಚಿ ಜಾಲ್ಯಾ… ತಿಂ ಅರ್ಧಾಂ ದೊನೀ ಪರತ್ ಸಾಂಗಾತಾ ಮೆಳಾಸರ್…”

“ತುಮಿ ಮ್ಹಣ್ತಾತ್ ಜಾಲ್ಯಾರ್ – ಜಾಂವ್ ದೆವಾಚಿ ಖುಶಿ!” ಮ್ಹಣಾಲಿ ತಿ. “ಹ್ಯಾ ಉಪ್ರಾಂತ್, ಮಹಿನ್ಯಾಂತ್ ಏಕ್ ಪಾವ್ಟಿಂ ಪುಣೀ ಹಾಂವ್ ಹಾಂಗಾಸರ್ ಯೇವ್ನ್ ಆಸ್ತೆಲಿಂ, ಆನಿ ಹಾಂಗಾ ಥಾವ್ನ್ ಮಹಿನ್ಯಾಂತ್ ಏಕ್ ಪಾವ್ಟಿಂ ಪುಣೀ – ಆನಿ ಗರ್ಜ್ ಪಡ್ಲ್ಯಾರ್ ಮಧೆಂಯೀ – ತುಮಿ ಬಂಟ್ವಾಳಾಕ್ ಭೆಟ್ ದೀವ್ನ್ ಆಸಜಾಯ್.”

“ತಿ ಜವಾಬ್ದಾರಿ ಹಾಂವ್ ಆನಿ ಮ್ಹಜೆ ಸಾಂಗಾತಿ ವಹ್ಸಿತಾಂವ್ ಬಾಯೆ. ಆಮಿ ತ್ಯಾ ವಾಟೆನ್ ಪಾಶಾರ್ ಜಾವ್ನ್ಂಚ್ ಆಸ್ತಾಂವ್.”

“ಪುಣ್ ಚತ್ರಾಯ್ ದುಮ್ಗಾಬಾ” ಮೋನಿಕಾನ್ ಜಾಗಯ್ಲೆಂ. “ತುವೆಂ ತಡೀಪಾರ್ – ತಕ್ಲಿ ಚುಕವ್ನ್ ರಾವಾಜಾಯ್, ನಾ ಜಾಲ್ಯಾರ್ ಟಿಪ್ಪುಚ್ಯಾ ರಾವ್ಳೆರಾಂತ್ ಆಸ್ಚ್ಯಾ ತುಜ್ಯಾ ಭಾವಾಚ್ಯಾ ಜಿವಾಕ್ ಮೋಸ್ ಆಸಾ ಮ್ಹಣ್ ಆಮ್ಚ್ಯಾ ಸರ್ದಾರಾನ್ ಸಾಂಗ್‍ಲ್ಲೆಂ.”

“ಮ್ಹಾಕಾ ಬರೊ ಉಗ್ಡಾಸ್ ಆಸಾ – ಆಮ್ಚ್ಯಾ ಸರ್ದಾರಾನ್ ಸಾಂಗ್‍ಲ್ಲೆಂ ವಾ ಕೆಲ್ಲೆಂ ವಿಸ್ರತ್ ಕೋಣ್? ತರೀ, ತಕ್ಲಿ ಚುಕವ್ನ್ ಹಾಂವ್ ರಾವಾನ್, ಪುಣ್ ತಡೀಪಾರ್ ಬಿಲ್ಕುಲ್ ನಹಿಂ!”

“ತುಮಿ ಕರ್ತಾತ್ ತೆಂ ತುಮಿ ಜಾಣಾಂಸ್ತೆಲ್ಯಾತ್. ತುಮ್ಕಾಂ ದಾದ್ಲ್ಯಾಂಕ್ ಬೂದ್ ಸಾಂಗೊಂಕ್ ಆಮಿ ಯೇಂವ್ಕ್ ನಾಂವ್” ಮ್ಹಣಾಲಿ ಆಗ್ನೆಸ್ ಕುಂವರ್ನ್. “ಪುಣ್ ಚತ್ರಾಯ್ ಕರಾ. ಕಿತ್ಯಾಕ್, ತುಮ್ಕಾಂ ಕಾಂಯ್ ಫರಾಮಸ್ ಘಡತ್ ಜಾಲ್ಯಾರ್, ಆನಿಕೀ ಚಡ್ ಹೆರಾಂಕ್ ಕಷ್ಟ್ ಜಾತೆಲೆ. ಎದೊಳ್ ಆಮ್ಚ್ಯಾ ಸಮಾಜಿಂತ್ಲ್ಯಾ ಜಿವಾಂಚೆಂ, ರಗ್ತಾಚೆಂ ಆನಿ ದುಖಾಂಚೆಂ ಬಲಿದಾನ್ ವರ್ತೆಂ ಜಾಲಾಂ. ಆನಿಕೀ ಹೆಂ ಆಮಿ ಆಡಾಯ್ನಾಂವ್ ಜಾಲ್ಯಾರ್ ಹ್ಯಾ ಪ್ರದೇಶಾಂತ್ ಆಮ್ಚೊ ಧರ್ಮ್, ಆಮ್ಚಿ ಸಮಾಜ್ ಆನಿ ಸಂಸ್ಕೃತಿ ನಾಂವ್ ನಾಸ್ತಾನಾ ವೆತಿತ್.”

“ಸಾರ್ಕೆಂ ಸಾಂಗ್ಲೆಂಯ್ ಭಯ್ಣಿ” ಕಬೂಲ್ ಜಾಲೊ ಸಾವ್ಕಾರ್ ಮಾರ್ಸೆಲ್ ಕುವೆಲ್. “ಎದೊಳ್‍ಚ್ ಆಮ್ಚ್ಯಾ ಸಮಾಜೆನ್ ಭೊಗ್ಚೆಂ ಚಡ್ ಜಾಲಾಂ. ಹ್ಯಾ ಮೊಡ್ತಿಂತ್ ಆನಿ ದಗ್ದೊಣೆಂತ್ ಜಿವಾಚೊ ವಾ ಧನಾಚೊ ನಷ್ಟ್ ಜಾಯ್ನಾತ್ಲೆಂ ಘರಾಣೆಂ ಏಕ್‍ಯೀ ನಾ!” ತೊ ಉಸ್ವಾಸ್ಲೊ.

“ತ್ಯಾ ಸಮ್ಜೊಣೆ ವರ್ವಿಂ ಜಾವ್ಯೆತ್ ಮಾರ್ಸೆಲಾಬಾ” ಮ್ಹಣಾಲಿ ತಿ. “ಆಮ್ಚೆ ಕಷ್ಟ್ ಸೊಸುಂಕ್ ಆನಿ ಭಾವಾಡ್ತ್ ಉರಂವ್ಕ್ ಆಮ್ಕಾಂ ಧಯ್ರ್ ಮೆಳ್ತಾ ಆನಿ ಆಮ್ಚ್ಯಾ ನಷ್ಟಾಂತ್ ಆಮ್ಕಾಂ ಭುಜಾವಣ್ ಲಾಭ್ತಾ.”

ತಿಚಿಂ ಉತ್ರಾಂ ತಾಂಕಾಂ ಸರ್ವಾಂಕ್ ಸಮ್ಜಲಿಂ. ಮಾನಿನ್ ವೆರೊನಿಕಾ ಅಂತರ್ಲ್ಯಾರೀ, ತಿಚ್ಯಾ ಜಾಗ್ಯಾರ್ ತಸಲಿಚ್ ಏಕ್ ಬುದ್ವಂತ್ ಆನಿ ಧಯ್ರಾಧಿಕ್ ಸ್ತ್ರೀ ಆಯ್ಲ್ಯಾ ಮ್ಹಳ್ಳೆಂ ಸಮ್ಜೊನ್, ತಾಂಕಾಂ ಸಮಾಧಾನ್ ಭೊಗ್ಲೆಂ.

ಉಪ್ರಾಂತ್ ಥೊಡೊ ವೇಳ್ ತಿಂ ಉಲಯ್ಲಿಂ.

ಎಕಾಮೆಕಾಚಿ ವಳಕ್ ತಾಣಿಂ ದಿಲಿ ಆನಿ ಕೆಲಿ.

ಥೊಡ್ಯಾಂಕ್ ಕಳಿತ್ ನಾತ್‍ಲ್ಲ್ಯೊ, ಆನಿ ಪಾಟ್ಲ್ಯೊ ಆನಿ ಪೈಶಿಲ್ಯೊ – ಆಯ್ಕೊಂಕ್ ಆತುರಾಯ್ ಆಸ್‍ಲ್ಲ್ಯೊ ಗಜಾಲಿ ಎಕಾಮೆಕಾಕ್ ತಾಣಿಂ ಸಾಂಗ್ಲ್ಯೊ.

ತ್ಯಾ ವರ್ವಿಂ, ಸರ್ದಾರ್ ಸಿಮಾಂವ್ ಥಂಯ್ ತಾಂಕಾಂ ಆಸ್‍ಲ್ಲೊ ವಿಶ್ವಾಸ್ ಆನಿ ಅಭಿಮಾನ್ ಸಬಾರ್ ವಾಂಟ್ಯಾಂನಿ ಚಡತ್ತ್ ಗೆಲೊ.

“ತೆಂ ಸರ್ವ್ ಚಿಂತಾನಾ, ಆಮ್ಚ್ಯಾ ಪ್ರಾಸ್ ಹಜಾರ್ ವಾಂಟ್ಯಾಂನಿ ಚಡ್ ಅಪಾಯ್ ಆಸ್ಚ್ಯಾ ವಾಟೆನ್ ತೊ ಚಲ್ತಾ!” ಮ್ಹಣಾಲೊ ಗ್ರೆಗೊರ್ ತೆಲ್ಲಿಸ್.

“ಭಾಗೆವಂತ್ ಖುರಿಸ್ ತಾಕಾ ಸಾಂಬಾಳುಂದಿ” ಮಾಗಲಾಗ್ಲಿ ಮೋನಿಕಾ. “ತಾಚಿ ಆಮ್ಕಾಂ ಚಡ್ ಗರ್ಜ್ ಆಸಾ.”

ಥಂಯ್ ಆಸ್‍ಲ್ಲ್ಯಾ ಸಕ್ಡಾಂಚ್ಯಾ ಮತಿಂತ್ ತಿಂಚ್ ಚಿಂತ್ನಾಂ ಧಾಂವ್ಲಿಂ. ಪುಣ್ ಸಕ್ಡಾಂ ಪ್ರಾಸ್ ಚಡ್ ಜಾವ್ನ್, ಸರ್ದಾರ್ ಸಿಮಾಂವ್ಚ್ಯಾ ಸುರಕ್ಷಿತಾಯೆ ಖಾತಿರ್ ಆಗ್ನೆಸ್ ಕುಂವರ್ನಿಚೆಂ ಹೃದಯ್ ತಳ್ಮಳ್ಯಾಂನಿ ಮಾಗ್ತಾಲೆಂ ಮ್ಹಣ್ ಹೆರಾಂಕ್ ಅಂದಾಜ್ ಜಾಯ್ನಾತ್‍ಲ್ಲೆಂ.

“ತುಮಿ ಹಾಂಗಾಸರ್” ಮ್ಹಣಾಲಿ ತಿ ವಿಷಯ್ ಚಿಕ್ಕೆ ಬದ್ಲುನ್. “ಅಪಾಯಾಚೆಂ ಸೂಚನ್ ದಿತಾನಾ ಘುಗಿಚ್ಯಾ ಘುಗಾರ್‍ಯಾಚೆಂ ಸಂಕೇತ್ ದಿತಾತ್ ಮ್ಹಣ್ ಮ್ಹಾಕಾ ಸಮ್ಜಲ್ಲೆಂ ಬರೆಂ ಜಾಲೆಂ. ಹ್ಯಾ ಉಪ್ರಾಂತ್ ಆಮ್ಚ್ಯಾ ಬಂಟ್ವಾಳ್ಚ್ಯಾ ಆನಿ ಮಲೆನಾಡಾಂತ್ಲ್ಯಾ ರಾನಾಂನಿಯೀ ತೆಂಚ್ ಸಂಕೇತ್ ಆಮಿ ಪ್ರಯೋಗ್ ಕರ್ತಾಂವ್.”

“ಆನಿ ಖಂಯೀ ಹಿಂಡಾಂತ್ ಆಮಿ ವೇಸ್ ಬದ್ಲುನ್ ಆಸ್‍ಲ್ಲ್ಯಾ ವೆಳಾರ್, ಆಮ್ಚ್ಯಾ ವಳ್ಕಿಚ್ಯಾ ಕೊಣಾಯ್ಕೀ ಆಮ್ಚಿ ವಳಕ್ ಮೆಳಶಿ ಕರುಂಕ್ ಆಮಿ ದುಸ್ರೊ ಏಕ್ ಘುರ್ತ್ ಥಾರಾಯ್ಲಾ.”

ದುಮ್ಗಾ ಪಿಂತಾನ್ ವಿವರ್ಸಿಲೆಂ.

“ಜಮ್ಯಾಂತ್ ಆಸ್ತಾನಾ – ಸಾಂತ್, ನೇಮ್, ಜಾತ್ರೊ ತಸಲ್ಯಾ ವೆಳಾರ್ – ಜಾಂಬಾಯ್ ಆಯಿಲ್ಲೆಪರಿಂ ತೋಂಡ್ ಉಗ್ತೆಂ ಕರ್ಚೆಂ. ತೆದಾಳಾ ಹಾತ್ ಅಪ್ಸೊಚ್ ತೊಂಡಾಕ್ ಗೆಲ್ಲೆಪರಿಂ ಕರ್ನ್ ಲ್ಹಾನ್ ಖುರ್ಸಾಚೊ ಘುರ್ತ್ ಕರ್ಚೊ. ತೆಂ ಪಳೆಲ್ಲ್ಯಾಕ್ಷಣಾ, ತೆಣೆಂಚ್ ಆಮ್ಚೊ ಕೊಣೀ ಆಸ್ಲ್ಯಾರ್ ತೊಯೀ ಜಾಂಬಾಯ್ ಕಾಡ್ತಾ ಆನಿ ಖುರ್ಸಾಚೊ ಘುರ್ತ್ ಕರ್ತಾ. ಉಪ್ರಾಂತ್ ತಾಂಕಾಂ ಎಕಾಮೆಕಾಕ್ ಲಾಗಿಂ ಸರೊಂಕ್ ಸುಲಭ್ ಜಾತಾ.”

ದುಖಾಂತ್ ತರೀ, ಹೆಂ ಆಯ್ಕೊನ್ ಥಂಯ್ಸರ್ ಆಸ್‍ಲ್ಲ್ಯಾಂಕ್ ಹಾಸೊಂಕ್ ಆಯ್ಲೆಂ.

“ಬರೆಂಚ್” ಮ್ಹಣಾಲಿ ಆಗ್ನೆಸ್ ಕುಂವರ್ನ್. “ತೊ ಏಕ್ ಪ್ರಯೋಜನಾಕ್ ಪಡ್ಚೊ ವಿಷಯ್ ಜಾವ್ನ್ ಉರೊಂದಿ. ಆಮ್ಕಾಂ ಹೆರ್‌ಯೀ ಜಾಯ್ತೆಂ ಉಲಂವ್ಕ್ ಆಸಾ, ಆನಿ ಜಾಯ್ತೆಂ ಸಮ್ಜೊಂಕ್ ಆಸಾ ತರೀ, ಆಜಿಕ್ ಆಮಿ ಇತ್ಲ್ಯಾರ್ ಆಖೇರ್ ಕರ್ಚೆಂ ಬರೆಂ ಮ್ಹಣ್ ದಿಸ್ತಾ…”

“ವ್ಹಯ್” ಮ್ಹಣಾಲೊ ಹಸ್ಸನ್ ಮಹಮ್ಮದ್ ಮಧೆಂಚ್. “ಆತಾಂ ಉಜ್ವಾಡ್ಲೆಂ. ಆಮಿ ಚತ್ರಾಯೆನ್ ಶಿಂಪಡ್‍ಲ್ಲೆಂ ಬರೆಂ. ತುಮ್ಚಿ ಫುಡ್ಲಿ ಆಲೋಚನ್ ಕಿತೆಂ ಬಹೆನ್?” ತಾಣೆಂ ಆಗ್ನೆಸ್ ಕುಂವರ್ನಿ ಕಡೆನ್ ವಿಚಾರ್ಲೆಂ.

“ಆಮಿ ಆಜ್‍ಚ್ ಬಂಟ್ವಾಳಾಕ್ ಪಾಟಿಂ ಪಯ್ಣ್ ಕರ್ತಾಂವ್” ಮ್ಹಣಾಲಿ ತಿ. “ಥಂಯ್ ವಚೊನ್, ಆಮ್ಚ್ಯಾ ದೇಜಪ್ಪ ಸೆಟ್ಟಿ ಮುಖಾಂತ್ರ್ ಹಾಂಗಾಚಿ ಖಬರ್ ಪಯ್ಲೆಂ ಪಟ್ಟಣಾಕ್ ಧಾಡಿಜಾಯ್.”

“ಪಟ್ಟಣಾಕ್?”

“ವ್ಹಯ್ – ಆಮ್ಚ್ಯಾ ಸರ್ದಾರಾಕ್.”

“ಪುಣ್ ಆತಾಂ, ದಿಸಾ ಉಜ್ವಾಡೆಂ, ರಾಜ್ ವಾಟೆನ್ – ತೆಂಯೀ ಘೊಡ್ಯಾಂಚೆರ್ ಪಯ್ಣ್ ಕರ್ನ್ ವೆಚೆಂ…” ಸಾವ್ಕಾರ್ ದುಬಾವ್ ಉಲಯ್ಲೊ.

“ಆಮ್ಕಾಂ ಭಿರಾಂತ್ ನಾ. ಫಾವೊತಿ ಭದ್ರತಿ ಆಮ್ಚೆ ಲಾಗಿಂ ಆಸಾ.”

‘ಮಾನೆಸ್ತ್ ರಫಾಯೆಲ್ ಮಿಂಗೆಲ್ ಕಾಮತ್ ತಡೀಪಾರ್ ಜಾವ್ನ್ ತಲ್ಚೇರ್ ಆಸ್ತಾ ಪರ್ಯಾಂತ್, ವಾ ಉಪ್ರಾಂತ್ ಜಾಲ್ಯಾರೀ, ತಾಚ್ಯಾ ಘರಾಚೆರ್ ಸರ್ಕಾರಾಚ್ಯಾ ಕೊಣೀ ಹುದ್ದೆದಾರಾಂನಿ ದಾಡ್ ಘಾಲುಂಕ್ ಹಕ್ಕ್ ನಾ. ತ್ಯಾ ಘರಾಣ್ಯಾಂತ್ಲ್ಯಾ ಕೊಣಾಯ್ಕೀ ಆಮ್ಚ್ಯಾ ರಾಜಾ ಭಿತರ್ ವಾ ಭಾಯ್ರ್ ಪಯ್ಣ್ ಕರುಂಕ್ ಸ್ವಾತಂತ್ರ್ಯ್ ಆಸಾ ಮ್ಹಣ್ ಹೆಂ ಫರ್ಮಾಣ್ ದಿಲಾಂ. ಹಾಕಾ ಸರ್ವ್ ಮಾನ್ ದೀಂವ್ದಿತ್’.

ಅಶೆಂ ಟಿಪ್ಪುಚಿ ಮ್ಹೊರ್ ಆಸ್‍ಲ್ಲೆಂ – ಕನ್ನಡಾನ್ ಆನಿ ಇಂಗ್ಲೆಜಾನ್ ಲಿಖ್‍ಲ್ಲೆಂ – ಫರ್ಮಾಣ್ ತಿಚ್ಯಾ ತಾಬೆನ್ ಆಸ್‍ಲ್ಲೆಂ.

“ತರ್ ಟಿಪ್ಪುಚ್ಯಾ ಸವಾರಾಂಚೊ ವೇಸ್ ಕಿತ್ಯಾಕ್?”

“ಪಯ್ಣ್ ಕರುಂಕ್ ಸುಲಭ್ ಆನಿ ತುರ್ತ್ ಜಾತಾ. ತ್ಯಾ ಶಿವಾಯ್ ಸ್ತ್ರೀ ಮ್ಹಣ್ ಕಳನಾತ್ಲ್ಯಾರ್ ಚೊರಾಂಚೆಂ ಭ್ಯೆಂ ಚಿಕ್ಕೆ ಉಣೆಂ ಜಾತಾ.”

“ಪುಣ್ ಟಿಪ್ಪುಚ್ಯಾಚ್ ಥೊಡ್ಯಾ ಹುತಾವಳಿ ಶಿಪಾಯಾಂಚಿ ಅಡ್ಕಳ್ ಆಸ್ಯೆತ್ ನಹಿಂಗೀ?”

“ತಶೆಂ ಥೊಡೆ ಪುಣೀ ಅಪಾಯ್ ಆಸ್ಚೆಚ್ ತರೀ ಆಮಿ ವಾಟ್ ಧರಿಜಾಯ್ ಪಡ್ತಾ. ಆಮ್ಚೆ ಪ್ರಾಸ್ ಕಿತ್ಲೆಶ್ಯಾ ವ್ಹಡ್ ಅಪಾಯಾಂಕ್ ಹರ್ದೆಂ ದೀವ್ನ್ ಮೊರ್ನಾ ಕಡೆನ್ ಅಪಾಲಿಪಾ ಖೆಳ್‍ಲ್ಲೆ ಜಿವೆ ಜಿವೆ ದಾಖ್ಲೆ ಆಮ್ಚೆ ಮಧೆಂ ನಾಂತ್‍ಗೀ ಮಾರ್ಸೆಲಾಬಾ?” ವಿಚಾರ್ಲೆಂ ತಿಣೆಂ.

ನಿಜಾಯ್ಕೀ, ತಿಚ್ಯಾ ಸವಾಲಾಕ್ ಜಾಪ್ ದೀಂವ್ಕ್ ಮಾರ್ಸೆಲಾಬ್ ಸಕನಾ ಜಾಲೊ. ಹ್ಯಾ ಕುಂವರ್ನಿಚಿ ಆದಿಂ ಏಕ್ ಪಾವ್ಟಿಂ ತಾಕಾ ಭೆಟ್ ಜಾಲ್ಲಿ. ತಿಚಿ ಖಬರ್ ಹೆರ್ ಥೊಡಿ ತಾಣೆಂ ಆಯ್ಕಲ್ಲಿ. ಪುಣ್ ನಿಜಾಯ್ಕೀ ತಿಚೆಂ ರೂಪ್ ತಶೆಂಚ್ ಗೂಣ್ ಆನಿ ಧೀರ್‌ಪಣ್ ಕಿತ್ಲ್ಯಾ ವಯ್ಲ್ಯಾ ಮಟ್ಟಾಚೆಂ ಆಸ್ಯೆತ್ ಮ್ಹಳ್ಳೆಂ ಚಿಂತುನ್ ತಾಂಕಾಂ ಅಜ್ಯಾಪ್ ತಶೆಂ ಅಭಿಮಾನ್ ಭೊಗ್ಲೊ.

ಉಪ್ರಾಂತ್ ಘಳಾಯ್ ಕರುಂಕ್ ಅವ್ಕಾಸ್ ನಾತ್‍ಲ್ಲೊ.

ಎಕ್ಟಾಂಯ್ ಜಾಲ್ಲ್ಯಾ ಸರ್ವಾಂನಿ ಪರ್ತ್ಯಾನ್ ತ್ಯಾ ನವ್ಯಾಚ್ ಫೊಂಡಾ ಲಾಗಿಂ ವಚೊನ್, ಮಾನಿನ್ ವೆರೊನಿಕಾಕ್ ಅನಂತ್ ವಿಶೆವ್ ಮಾಗ್ಲೊ ಆನಿ ಆಗ್ನೆಸ್ ಕುಂವರ್ನಿಕ್ ಆದೇವ್ಸ್ ಮಾಗೊನ್ ಎಎಕ್ಲಿಂಚ್ ಫಾಸಾಳ್ಳಿಂ.

ಜೋಕಿಮ್ ಸಿಲ್ವಾ ಪೈ, ಮಿರಿಯಮಾಕ್ ಘೆವ್ನ್, ತಿಮ್ಮಿ ಸಾಂಗಾತಾ ಇಜಾಬೆಲ್ ತೆರೆಜಾಕ್ ಪಾವ್ನ್ ಯೆತಾಂ ಮ್ಹಣ್ ಕಾವೂರಾಕ್ ಗೆಲೊ.

ಗ್ರೆಗೊರ್ ತೆಲ್ಲಿಸ್, ಮಾನಿನ್ ಮೋನಿಕಾಕ್ ಹಸ್ಸನ್ ಮಹಮ್ಮದಾಗೆರ್ ಪಾವ್ನ್ ಯೆತಾಂ ಮ್ಹಣ್ ಆಯ್ತೊ ಜಾವ್ನ್ ಭಾಯ್ರ್ ಸರ್ಲೊ.

ದುಮ್ಗಾ ಪೀಂತ್, ಇಲಾರ್ ಸಿಕೇರ್ ಆನಿ ಕಾಲೆಸ್ತ್ ಮಸ್ಕರೆಞ, ತಾಂಚ್ಯಾ ಹೆರ್ ಸಾಂಗೊಡ್ಯಾಂ ಸಾಂಗಾತಾ, ತಾಂಚ್ಯಾ ಸದಾಂಚ್ಯಾ ಫಿರ್ಕೆಕ್ ಗೆಲೆ. ವೆಚ್ಯಾ ಆದಿಂ ದುಮ್ಗಾ ಪಿಂತಾನ್ ಪ್ರತ್ಯೇಕ್ ಥರಾನ್, ಆಗ್ನೆಸ್ ಕುಂವರ್ನಿಕ್, ಆಪುಣ್ ತವಳ್ ತವಳ್ ಬಂಟ್ವಾಳಾಕ್ ಭೆಟ್ ದೀವ್ನ್ ಆಸ್ತಲೊಂ ಮ್ಹಣ್ ಸಾಂಗೊನ್ ಆದೇವ್ಸ್ ಮಾಗ್ಲೊ.

ಚಾಂದ್‍ಬೀಬಿ ಆನಿ ಫರೀದಾ ಬೇಗಮೆ ಕಡೆನ್, ಆಗ್ನೆಸ್ ಕುಂವರ್ನ್ ಚಡ್ ಸುಲಭಾಯೆನ್ ಆನಿ ಸಳಾವಳಿನ್ ಉಲಯ್ಲಿ:

“ಆಮಿ ಆನಿಕ್‍ಯೀ ಚಡ್ ಆನಿ ಚಡ್ ಮೆಳ್ತೆಲ್ಯಾಂವ್” ಭಾಸಾಯ್ಲೆಂ ತಿಣೆಂ. “ಬಂಟ್ವಾಳ್ ಥಾವ್ನ್ ಫಿಂರ್ಗಿಪೇಂಟ್ ಪರ್ಯಾಂತ್ ಆಮ್ಕಾಂ ಜಾಯ್ತಿತ್ಲಿಂ ಮುಸ್ಲಿಮ್ ಘರಾಣಿಂ ಮೊಗಾಚಿಂ ಆನಿ ಮಜತೆಚಿಂ ಆಸಾತ್ – ತರ್ ಆಮ್ಚೆಂ ಕುಟಮ್ ಆನಿಕ್‍ಯೀ ವಾಡ್ತೆಲೆಂ, ವಾಡೊಂದಿ.”

“ತಶೆಂಚ್ ಜಾಂವ್, ಬಹೆನ್” ಚಾಂದ್‍ಬೀಬಿನ್ ದುಖಾಂ ಪುಸ್ಲಿಂ.

“ಸಂತೊಸ್, ದೀದಿ” ಮ್ಹಣೊನ್ ಫರೀದಾನ್ ದುಖಾಂ ಲಿಪಯ್ಲಿಂ.

ಸರ್ವ್ ಗೆಲ್ಯಾ ಉಪ್ರಾಂತ್, ಆಗ್ನೆಸ್ ಕುಂವರ್ನ್ – ಘೊಡೆ ಆಯ್ತೆ ಜಾತಾನಾ – ಪರ್ತ್ಯಾನ್, ಮಾನಿನ್ ವೆರೊನಿಕಾಚ್ಯಾ ಫೊಂಡಾ ಲಾಗಿಂ ಗೆಲಿ. “ಭಯ್ಣಿ, ಹಾಂವ್ ವಚೊನ್ ಯೆತಾಂ” ಮ್ಹಣಾಲಿ ತಿ ಥಂಯ್ಚ್ ದಿಂಬಿ ಮಾರುನ್. “ಅರ್ಧ್ಯಾರ್ ಆಸ್‍ಲ್ಲ್ಯಾ ಮ್ಹಜ್ಯಾ ಮಿಸಾಂವಾಕ್ ತುವೆಂ ಚಡಿತ್ ಜವಾಬ್ದಾರಿ ದಿಲ್ಯಾಯ್… ತುಂ ಆತಾಂ ಆಮ್ಚ್ಯಾ ದೊಳ್ಯಾಂ ಮುಖ್ಲಿ ಲಿಪ್ಲ್ಯಾಯ್ ಜಾಲ್ಯಾರೀ, ತುಜೆಂ ಆನಿ ಮ್ಹಜೆಂ ದೊಗಾಂಯ್ಚೆಂ ಕಾಮ್ – ಹಾಂವೆಂ ಆತಾಂ ವಹ್ಸಿಲಾಂ ತೆಂ – ಜಯ್ತೆವಂತ್ ಥರಾನ್ ಮ್ಹಜೆ ಕರ್ನಾ ಪೊಂತಾಕ್ ಪಾವಯ್…

“ಅನಂತ್ ಪ್ರಕಾಸ್ ತಿಚೆರ್ ಫಾಂಕಯ್ ಏ ಸೊಮ್ಯಾ…”

ತಿಚಿಂ ದುಖಾಂ ಗಳೊನ್, ಮೊತಿಯಾಂ ಕಶಿಂ ತ್ಯಾ ಮಾತ್ಯೆರ್ ಗಳ್ಳಿಂ.

ಉಪ್ರಾಂತ್ ತಿಣೆಂ ಸಾವ್ಕಾರ್ ಮಾರ್ಸೆಲ್ ಕುವೆಲಿಚಿ ರಜಾ ಘೆವ್ನ್ ದಾವಿದಾ ಸಾಂಗಾತಾ ಬಂಟ್ವಾಳ್ಚೆಂ ಪಯ್ಣ್ ಧರ್ಲೆಂ.

ವಾಟೆರ್ ಕಾಂಯ್ ಅನುಚಿತ್ ಘಡನಾಸ್ತಾಂ, ಬಂಟ್ವಾಳಾಕ್ ತಿಂ ಪಾವ್ಲಿಂ. ಕುರಿಯೆಲಾಂತ್ ಜಾಲ್ಲಿ ಗಜಾಲ್ ಸರ್ವ್, ಬಾಪಾಯ್ಕ್ ತಿಣೆಂ ಸಾಂಗ್ಲಿ.

ತಿಚ್ ಸರ್ವ್ ಖಬರ್ ಲಿಖುನ್, ಕೊತ್ವಾಲ್ ದೇಜಪ್ಪ ಸೆಟ್ಟಿಚ್ಯಾ ವಿಶ್ವಾಸಿ ತಾರ್ ಸವಾರಾ ಮುಖಾಂತ್ರ್ ಸರ್ದಾರ್ ಸಿಮಾಂವ್ಕ್ ಧಾಡ್ನ್ ದಿಂವ್ಚ್ಯಾ ಖಾತಿರ್ ತಿಣೆಂ ತಯಾರಿ ಕೆಲಿ.

“ಆಮ್ಚ್ಯಾ ಘರಾಚೆರ್ ಆಯಿಲ್ಲಿಂ ಅನ್ವಾರಾಂ, ಬಾಳಾ” ಮ್ಹಣಾಲೊ ತೊ ಪ್ರಾಯ್ವಂತ್ ಮಾನೆಸ್ತ್ ರಫಾಯೆಲ್ ಮಿಂಗೆಲ್ ಕಾಮತ್. “ಕಿತೆಂಗೀ ತ್ಯಾಚ್ ಸರ್ದಾರಾಚ್ಯಾ ಮಜತಿನ್ ನಿವಾರುನ್ ಆಸಾತ್. ಪುಣ್ ಸಗ್ಳೆ ಸಮಾಜೆಚೆರ್ ಆಯಿಲ್ಲಿ ಮೋಡ್ತ್ ಆನಿಕೀ ಸದ್ದ್ಯಾಕ್ ಥಾಂಬತ್ ಮ್ಹಣ್ ದಿಸನಾ… ಕಣ್ಣಾನೂರಾಂತ್ ಘಡ್‍ಲ್ಲೆ ವಿಷಯ್ – ತುವೆಂ ಸಾಂಗ್‍ಲ್ಲ್ಯಾ ಪರ್ಮಾಣೆಂ – ನಿಯಾಳ್ತಾನಾ, ತ್ಯಾ ಸರ್ದಾರ್ ಸಿಮಾಂವ್ ಪ್ರಭುಚ್ಯಾ ಫುಡ್ಲ್ಯಾ ಭದ್ರತೆಕ್ ಆಸ್ಚೊ ಅಪಾಯ್ ಚಿಂತುನ್ ಮ್ಹಜಿ ಕೂಡ್ ಕಾಂಪ್ತಾ… ತುಂ ಜಾಣಾಂಯ್ – ಮ್ಹಜೆ ಚಡ್ತಾವ್ ದೀಸ್ ಜಾಲೆ. ಜಾಲ್ಯಾರೀ ಹಾಂವೆಂ ದೊಳೆ ಧಾಂಪ್ಚ್ಯಾ ಆದಿಂ, ತುಜೊ ಫುಡಾರ್, ತುಜೊ ಖರೊ ಮೋಗ್ ಆನಿ ತುಜೊ ಸಂಸಾರ್ ಸುರಕ್ಷಿತ್ ಜಾಲ್ಲೊ ಪಳೆಂವ್ಕ್ ದೆವಾನ್ ಮ್ಹಾಕಾ ಫಾವೊ ಕೆಲ್ಯಾರ್ ಪುರೊ…”

ಮ್ಹಾತಾರ್‍ಯಾಚೆ ದೊಳೆ ಭಿಜ್ಲೆ.

“ತಶೆಂಚ್ ಜಾತೆಲೆಂ ಆನಾ” ಮ್ಹಣಾಲಿ ಆಗ್ನೆಸ್ ಕುಂವರ್ನ್. “ದೇವ್ ಮ್ಹಾಕಾ ಭೊಗ್ಸಿತಲೊ… ಆನಿ… ತಾಕಾ ಸಾಂಬಾಳ್ತಲೊ ಮ್ಹಣ್ ಹಾಂವ್ ಪಾತ್ಯೆತಾಂ.”

ತಿಚೆಯೀ ದೊಳೆ ಭಿಜ್ಲೆ, ಆನಿ ತ್ಯಾ ಕೋಮಲ್ ಕುಡಿ ಭಿತರ್, ಧಯ್ರಾಧಿಕ್ ತರೀ, ತೆಂ ಸ್ತ್ರೀ ಕಾಳಿಜ್ ಕಾಂಪ್ಲೆಂ.

* * * * *

ಅಶೆಂ ಆಸ್ತಾಂ, ಕುರಿಯೆಲಾಕ್ ಆಯಿಲ್ಲೆ ಸರ್ದಾರ್ ಸಿಮಾಂವ್ಚೆ ಆನಿ ಸರ್ದಾರ್ ಯೂಸುಫಾಚೆ ಶಿಪಾಯ್ ಸಿರಿಂಗಪಟ್ಟಣಾಕ್ ಪಾವ್ಲೆ.

“ತಾಣಿಂ ಪಾವ್ತಚ್, ಹೆರ್ ಕೊಣಾಯ್ಕೀ ಭೆಟ್ಚ್ಯಾ ಆದಿಂ ‘ಆಮ್ಕಾಂ’ ತಾಂಚೆ ಕಡೆನ್ ಉಲಯ್ಜಾಯ್” ಮ್ಹಳ್ಳೆಂ ಫರ್ಮಾಣ್ ತಾಂಕಾಂ ರಾಕೊನ್ ಆಸ್‍ಲ್ಲೆಂ..!

ಖುದ್ ಟಿಪ್ಪು ಸುಲ್ತಾನ್ ಆಲಿ ಖಾನ್ ಬಹಾದುರಾಚೆಂ ಫರ್ಮಾಣ್ ತೆಂ.

ತ್ಯಾ ಫರ್ಮಾಣಾಂತ್, ಸರ್ದಾರ್ ಸಿಮಾಂವ್ಚೆರ್ ಆನಿ ತಾಚ್ಯಾ ಸಾಂಗಾತ್ಯಾಂಚೆರ್ ಚರ್ಚ್ಯಾ ದುಬಾವಾಚಿಂ, ಅಪಾಯಾಚಿಂ ಆನಿ ಕಾಳೊಕಾಚಿ ಖುಣಾಂ ಆಸ್‍ಲ್ಲಿಂ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel