ಸರ್ದಾರಾಚೆಂ ಸನ್ನಿಧಾನ್ – 4: ಸಂದೇಶ್ ಆನಿ ಆದೇವ್ಸ್

ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 4
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 4: ಸಂದೇಶ್ ಆನಿ ಆದೇವ್ಸ್

ಚಿಂತಿನಾಸ್ತಾನಾ ಮ್ಹಳ್ಳೆಪರಿಂ ಇತ್ಲಿಂ ಜಣಾಂ – ಸ್ತ್ರೀಯೊ ಆನಿ ದಾದ್ಲೆ ಯೇವ್ನ್ ಪಾವ್‍ಲ್ಲ್ಯಾ ವರ್ವಿಂಗೀ ಕೊಣ್ಣಾ, ವೆರೊನಿಕಾ ಕುಂವರ್ನಿಚಿ ಭಲಾಯ್ಕಿ ಚಿಕ್ಕೆ ಬರಿ ಜಾಲ್ಲೆಪರಿಂ ದಿಸ್ಲಿ, ಆನಿ ತಿ ಪಯ್ಲೆಂಚ್ಯಾ ಪ್ರಾಸ್ ಚಡ್ ಆನಿ ಸುಢಾಳ್ ಉಲಂವ್ಕ್ ಲಾಗ್ಲಿ.

ತಿಕಾ ಪುರಾಸಣ್ ಜಾತಾ, ತಿಣೆಂ ಉಲಂವ್ಚೆಂ ನಾಕಾ ಮ್ಹಳ್ಯಾರೀ ತಿ ಆಯ್ಕೊಂಕ್ ಕಬೂಲ್ ಜಾಲಿ ನಾ.

“ತುಮ್ಕಾಂ ಕಳಿತ್ ಆಸಜಾಯ್, ಕಣ್ಣಾನೂರಾಂತ್ ಕಿತೆಂ ಘಡ್ಲೆಂ ತೆಂ” ಮ್ಹಣಾಲಿ ತಿ. “ಜರ್ ದೆವಾಚ್ಯಾ ದಯೆನ್ ಆಮ್ಚೊ ಸರ್ದಾರ್ ಸಿಮಾಂವ್ ಥಂಯ್ಸರ್ ಯೇವ್ನ್ ಪಾವೊಂಕ್ ನಾತ್‍ಲ್ಲೊ ತರ್, ಬಲಾತ್ಕಾರಾನ್ ಮ್ಹಜೊ ಮಾನ್ ತಸೊ ಮ್ಹಜೊ ಜೀವ್ ಅಪಹಾರ್ ಜಾತೊ.”

ಮ್ಹಣೊನ್ ಥಂಯ್ಸರ್ ಘಡ್‍ಲ್ಲೆಂ ತಿಣೆಂ ಮಟ್ವ್ಯಾನ್ ಸಾಂಗ್ಲೆಂ.

“ಆನಿ ಜರ್ ತಿ ವೀರ್ ಸ್ತ್ರೀ ಥಂಯ್ಸರ್ ನಾತ್‍ಲ್ಲಿ ಆನಿ ಜರ್ ತಿಣೆಂ ಮ್ಹಾಕಾ ಆಪ್ಲೊ ಸ್ವಾದಿಕ್ ಸಾಂಗಾತ್ ದೀಂವ್ಕ್ ನಾತ್‍ಲ್ಲೊ…” ಮ್ಹಣಾಲಿ ತಿ ಉಮಾಳ್ಯಾಂನಿ. “ಹಾಂವ್ ಪಿಶಿಂ ಜಾತಿಂ.”

“ಕೋಣ್ ತಿ ವೀರ್ ಸ್ತ್ರೀ?” ಎಕ್ಲ್ಯಾ ದೊಗಾಂನಿ ವಿಚಾರ್ಲೆಂ.

“ತಿಚೆಂ ನಾಂವ್ ಆಮಿ ಪಯ್ಲೆಂ ಆಯ್ಕಲ್ಲೆಂ” ಸಾಂಗ್ಲೆಂ ತಿಣೆಂ. “ಆತಾಂ ಮ್ಹಾಕಾ ತಿಚಿ ಭೆಟ್ ಲಾಭ್‍ಲ್ಲ್ಯಾಕ್ ವರ್ತೊ ಸಂತೊಸ್ ಭೊಗ್ತಾ, ಆನಿ ತ್ಯಾ ವರ್ವಿಂ ಆಮ್ಕಾಂ ಚಡ್ ಬರೆಂಪಣ್ ಜಾತೆಲೆಂ ಮ್ಹಣ್ ಥಿರ್ ಜಾತಾ.”

“ಕೋಣ್ ತಿ ಸ್ತ್ರೀ?”

“ತಿ ವರ್ತವ್ತಾ ಬಂಟ್ವಾಳ್ಚಿ ಆಗ್ನೆಸ್ ಸಿಸಿಲಿಯಾ ಕುಂವರ್ನ್.”

“ಆಗ್ನೆಸ್ ಸಿಸಿಲಿಯಾ!” ಭೊಂವಾರಿಂ ಆಸ್‍ಲ್ಲ್ಯಾಂನಿ ಉದ್ಗಾರ್ ದಿಲೊ. ತಾಂಕಾಂ ಥೊಡೊ ಉಡಾಸ್ ಆಯ್ಲೊ.

“ವ್ಹಯ್” ಮ್ಹಣಾಲಿ ವೆರೊನಿಕಾ ಕುಂವರ್ನ್ ಏಕ್ ಲಾಂಬ್ ಶ್ವಾಸ್ ಸೊಡುನ್. “ವಿಶೇಸ್ ಕಿತೆಂ ಮ್ಹಳ್ಯಾರ್, ಮ್ಹಜ್ಯಾ ತಾಬೆನ್ ಆಸ್‍ಲ್ಲೆಂ ತೆಂ ಸಿನೊಲೆಚೆಂ ಅರ್ಧ್ ಆತಾಂ ತಿಚ್ಯಾ ತಾಬೆನ್ ಆಸಾ… ದೆಕುನ್ ಹ್ಯಾ ಉಪ್ರಾಂತ್ ಜಶೆಂ ತ್ಯಾ ಸಿನೊಲೆಚೆಂ ಸಂರಕ್ಷಣ್ ಕರ್ಚೊ ಅಧಿಕಾರ್ ತಿಚೊ, ತಶೆಂಚ್ ತಿಕಾ ಸರ್ವ್ ಸಹಕಾರ್ ದಿಂವ್ಚಿ ಜವಾಬ್ದಾರಿ ತುಮ್ಚಿ!”

ಹೆಂ ಆಯ್ಕಲ್ಲ್ಯಾಂಕ್ ಕಿತೆಂ ಆನಿ ಕಶೆಂ ಮ್ಹಣ್ಚೆಂ ಮ್ಹಣ್ ಕಳೊಂಕ್ ನಾ.

“ಆಯ್ಚ್ಯಾ ದಿಸಾ ತಿಯೀ ಆಮ್ಚೆ ಮಧೆಂ ಆಸ್‍ಲ್ಲಿ ಜಾಲ್ಯಾರ್ ಆಮ್ಕಾಂ ಸಕ್ಡಾಂಕ್ ಚಡ್ ಸಂತೊಸ್ ಜಾತೊ.”

ತಸೊ ಥೊಡೊ ವೇಳ್ ಪಾಶಾರ್ ಜಾಲೊ ವಾ ನಾ, ಭಾಯ್ಲ್ಯಾ ಕಾಳೊಕಾಂತ್ ಏಕ್ ಘುಗ್ ದೋನ್ ಪಾವ್ಟಿಂ ಮಟ್ವ್ಯಾನ್, ತಿಸ್ರ್ಯಾ ಪಾವ್ಟಿಂ ಲಾಂಬಾಯೆನ್ ಆನಿ ಉಪ್ರಾಂತ್ ದೋನ್ ಪಾವ್ಟಿಂ ಮಟ್ವ್ಯಾನ್ ಘುಗೆಲಿ. ‘ಚತ್ರಾಯ್! ಅಪಾಯ್ ಆಸಾ!’ ಮ್ಹಳ್ಳೆಂ ಸೂಚನ್ ದಿಂವ್ಚ್ಯಾ ತ್ಯಾ ಸಂಕೇತಾಚೊ ಅರ್ಥ್ ದುಮ್ಗಾ ಪಿಂತಾಕ್ ಆನಿ ಸಾಂಗಾತ್ಯಾಂಕ್ ಸಮ್ಜಲೊ.

ಘಡಿಭರ್ ತೆ ಘಾಬರ್ಲೆ, ಪುಣ್ ಘಡ್ಯೆನ್ ಚುರುಕ್ ಜಾಲೆ.

“ಚತ್ರಾಯೆನ್ ದಿವೊ ಪಾಲ್ವಯಾ!” ಮ್ಹಣಾಲೊ ದುಮ್ಗಾ ಪೀಂತ್. “ಕೊಣೆಂ ಆಮ್ಕಾಂ ವಿಕ್ರಿತ್ ಕೆಲಾಂ ಜಾವ್ಯೆತ್! ಪುಣ್ ಹ್ಯಾ ವೆಳಾ ಹಾಂಗಾ ಥಾವ್ನ್ ಪೊಳಾಪಳ್ ಘೆಂವ್ಚೆಂ ಸವಾಲ್ ನಾ!” ಮ್ಹಣೊನ್ ಮಾನಾಯ್ ಭಾಯ್ಲ್ಯಾ ಕಾಳೊಕಾಂತ್ ಲಿಪೊನ್, ತಾಂಕಾಂ ಜಾಣಾಂಸ್‍ಲ್ಲ್ಯಾ ತ್ಯಾ ಗೆರಿಲ್ಲಾ ದಾಡೆಕ್ ಆಯ್ತೆ ಜಾಲೆ.

ಪಯ್ಸ್ ಥಾವ್ನ್ ಘೊಡ್ಯಾ ಗೆಳಾಂಚೊ ಆವಾಜ್ ವಾರ್‍ಯಾರ್ ಯೇವ್ನ್ ಕಾನಾಕ್ ಆದಾಳ್ಳೊ.

“ಘೊಡೆ ದೋನ್‍ಂಚ್ ಆಸಾತ್ ಮ್ಹಣ್ ದಿಸ್ತಾ!” ಮ್ಹಣಾಲೊ ಕಾಲೆಸ್ತ್, ಧರ್ಣಿಕ್ ಕಾನ್ ದೀವ್ನ್.

ತಿತ್ಲ್ಯಾರ್, ಚಿಕ್ಕೆ ಪಯ್ಸ್ ಪಹರಜ್ ಕರ್ನ್ ಸಂಕೇತ್ ದಿಲ್ಲೊ ಹಮೀದ್ ಧಾಂವೊನ್ ಆಯ್ಲೊ.

“ಕೋಣ್?” ವಿಚಾರ್ಲೆಂ ದುಮ್ಗಾ ಪಿಂತಾನ್ ಕಾಳೊಕಾಂತ್ ರಾವೊನ್.

“ಹಾಂವ್ – ಹಮೀದ್!” ಜವಾಬ್ ಆಯ್ಲಿ.

“ಕಿತೆಂ ಗಜಾಲ್?”

“ಕೋಣ್‍ಗೀ ದೋಗ್ ಸವಾರ್ ಹೆವ್ಶಿನ್ ಯೆತಾತ್!”

“ದೋಗ್ ಸವಾರ್!” ದುಮ್ಗಾ ಪೀಂತ್ ಆಕಾಂತ್ಲೊ – “ಸಾಂಜೆರ್ ಉರ್ವಾ ಮೊಳ್ಯಾ ಕಡೆನ್ ಮ್ಹಾಕಾ ತೆ ಮೆಳ್‍ಲ್ಲೆ – ಹಸ್ಸನ್ ಮಹಮ್ಮದಾಚೆಂ ಘರ್ ಸೊಧುನ್ ಕಾಡ್ಚಿ ವಾಟ್ ತಾಣಿಂ ವಿಚಾರ್‌ಲ್ಲಿ… ಹಾಂವೆಂ ತಾಂಕಾಂ ವಿರೋಧ್ ವಾಟ್ ಸಾಂಗ್‍ಲ್ಲಿ, ಆನಿ ಜಾಗ್ವಣ್ ದಿಂವ್ಚ್ಯಾ ಖಾತಿರ್ ಆಮಿಂಚ್ ಹಸ್ಸನ್‍ಭಾಯಿಗೆರ್ ಧಾಂವ್‍ಲ್ಲ್ಯಾಂವ್, ಆನಿ ಥಂಯ್ಸರ್ ಆಮ್ಕಾಂ ಬಾಯೆಚಿ ಖಬರ್ ಮೆಳ್‍ಲ್ಲ್ಯಾನ್ ಹಾಂಗಾ ಯೇಂವ್ಕ್ ಆಮಿ ಸಕ್‍ಲ್ಲ್ಯಾಂವ್… ಪುಣ್ ಆತಾಂ…”

ಘೊಡ್ಯಾ ಗೆಳಾಂಚೊ ಆವಾಜ್ ಲಾಗಿಂ ಆಯ್ಲೊ.

ಜವಾನ್ ಶ್ವಾಸ್ ಧರುನ್ ಆಯ್ತೆ ರಾವ್ಲೆ.

ಕುವೆಲಿಗೆಲ್ಯಾ ಘರಾ ಥಾವ್ನ್ ಚಿಕ್ಕೆ ಮುಖಾರ್ ಸವಾರ್ ರಾವ್ಲೆ. ಗಯ್ರ್ಯಾ ನೆಕೆತ್ರಾಂಚ್ಯಾ ಉಜ್ವಾಡಾಂತ್ ಸರ್ವ್ ಮಸ್ಕ್ ದಿಸ್ತಾಲೆಂ.

ಲ್ಹಾನ್ ಸ್ವರಾನ್ ಎಕ್ಲ್ಯಾ ಸವಾರಾನ್ ದುಸ್ರ್ಯಾ ಲಾಗಿಂ ಕಿತೆಂಗೀ ವಿಚಾರ್ಲೆಂ. ತೆಂ ಹಾಂಕಾಂ ಆಯ್ಕೊಂಕ್ ನಾ.

“ತೆಂಚ್ ಘರ್ ಮ್ಹಣ್ ದಿಸ್ತಾ, ಪುಣ್ ಜಾಗ್‍ಮಾಗ್ ಆಸ್‍ಲ್ಲೆಪರಿಂ ದಿಸನಾ” ಆಯ್ಕಲೊ ಆನ್ಯೇಕ್ಲ್ಯಾಚೊ ಸ್ವರ್. “ಜಾಲ್ಯಾರೀ ಲಾಗ್ಸರ್‌ಚ್ ಆಸೊನ್, ಸಬಾರ್ ದೊಳೆ ಆಮ್ಚೆರ್ ನದರ್ ದವರ್ನ್ ಆಸಾತ್ ಮ್ಹಣ್ ಮ್ಹಾಕಾ ಭೊಗ್ತಾ. ಖಂಯ್ಚ್ಯಾಕೀ ದೆಂವೊನ್ ತಪಾಸಣ್ ಕರ್ನ್ ಪಳೆಯಾಂ.”

ಗೆಳಾಂ ಧರ್ಣಿಕ್ ಸಾರವ್ನ್ ಸುಂಯ್ಪುನ್ ಉಚಾಂಬಳ್ ಜಾಂವ್ಚ್ಯಾರ್ ಆಸ್‍ಲ್ಲ್ಯಾ ಘೊಡ್ಯಾಂಕ್ ತಾಣಿಂ ಥಾಂಬಯ್ಲೆಂ ಆನಿ ತೆ ಸಕಯ್ಲ್ ದೆಂವ್‍ಲ್ಲೆಂಚ್ ತಡವ್…

“ಖಬಡ್ದಾರ್!” ಕಾಳೊಕಾಂತ್ ಹಳ್ತಾನ್ ಪುಣ್ ದರ್ಪಾನ್ ಮ್ಹಣಾಲೊ ದುಮ್ಗಾ ಪೀಂತ್… “ತುಮ್ಚಿಂ ಹಾತೆರಾಂ ಆಪಡ್ನಾಕಾತ್! ತುಮ್ಕಾಂ ಆಮಿ ವೆಡೊ ಘಾಲಾ, ಆನಿ ಮರಣ್ ತುಮ್ಕಾಂ ಆಯ್ತೆಂ ಜಾಲಾಂ!”

“ಬರೆಂಚ್!” ಎಕ್ಲ್ಯಾ ಸವಾರಾಚೊ ಭುರ್ಗ್ಯಾಚ್ಯಾಗೀ ಸ್ತ್ರೀಯೆಚ್ಯಾ ಸ್ವರಾನ್‍ಸೊ ಹಾಸೊ ಆಯ್ಕಲೊ. “ತುಮಿ ಭಿಯೆಂವ್ಚಿ ಗರ್ಜ್ ನಾ…”

“ಮ್ಹಣ್ಜೇ?” ದುಮ್ಗಾ ಪೀಂತ್ ಘಡ್ಬಡ್ಲೊ.

“ಮ್ಹಣ್ಜೆ, ದಯಾ ಕರುನ್ ಆತಾಂಚ್ ಮ್ಹಾಕಾ ಮಾನಿನ್ ವೆರೊನಿಕಾ ಕುವೆಲ್ ಆಸ್‍ಲ್ಲೆ ಕಡೆನ್ ಆಪವ್ನ್ ವ್ಹರಾ!”

“ಪುಣ್…”

“ಆಗ್ನೆಸ್ ಸಿಸಿಲಿಯಾ..! ಭಯ್ಣೀ!”

ಭಿತರ್ ಥಾವ್ನ್ ವೆರೊನಿಕಾ ಕುಂವರ್ನಿನ್ ಅಸೊ ಉಲೊ ದಿಲೊ. ಆಗ್ನೆಸ್ ಕುಂವರ್ನಿಚೊ ಸ್ವರ್ ತಿಚ್ಯಾ ಕಾನಾಕ್ ಪಡ್ತಚ್, ನಿತ್ರಾಣ್ ಜಾಲ್ಲ್ಯಾ ತಿಚ್ಯಾ ಜಿವಾಂತ್ ಏಕ್ ಘಡಿ ಖಂಯ್ ನಾತ್‍ಲ್ಲೆಂ ತ್ರಾಣ್ ಆಯಿಲ್ಲೆಂ ಆನಿ ಉಟೊನ್ ಬಸ್ಲಿ ಆನಿ ತಶೆಂ ಆಪಂವ್ಕ್ ಲಾಗ್ಲಿ.

ಘಡ್ಯೆನ್ ವಾತಾವರಣ್ ಬದ್ಲಿ ಜಾಲೆಂ.

ದಿವೊ ದಿಸ್ಲೊ. ದಾರ್ ಉಗ್ತೆಂ ಜಾಲೆಂ ಆನಿ ಆಗ್ನೆಸ್ ಕುಂವರ್ನ್ ಭಿತರ್ ಧಾಂವ್ಲಿ. ತಿಕಾ ಆಡಾಯ್ತಲೊ ಕೊಣ್‍ಂಚ್ ನಾ ಜಾಲೊ.

ಹಾಂತುಳ್ಣಾರ್ ಉಟೊನ್ ಬಸ್‍ಲ್ಲ್ಯಾ ವೆರೊನಿಕಾ ಕುವೆಲಿಕ್ ಆಗ್ನೆಸ್ ಕುಂವರ್ನಿನ್ ದೆಖ್ಲಿ. ಹಾಂತುಳ್ಣಾ ಬಗ್ಲೆನ್ ದಿಂಬಿ ಮಾರ್ನ್ ತಿಣೆಂ ತಿಕಾ ವೆಂಗುನ್ ಧರ್ಲಿ.

“ಭಯ್ಣೀ…” ಸುಸ್ಕಾರ್ಲಿ ತಿ.

“ಭಾಗಿ ಹಾಂವ್!” ಉಸ್ಮಡ್ಲಿ ವೆರೊನಿಕಾ ಕುಂವರ್ನ್. “ಸದೆಂವ್ ಜಾಂವ್ ಭಾಗೆವಂತ್ ಖುರಿಸ್! ಹ್ಯಾ ಘಡ್ಯೆಕ್ ಹಾಂವ್ ರಾಕ್ತಾಲಿಂ.”

ತಿಕಾ ಚಿಕ್ಕೆ ಖೊಂಕ್ಲಿ ಆಯ್ಲಿ. ತಿ ಉದ್ವೇಗಾನ್ ಉಟೊನ್ ಬಸ್ತಾನಾ ತಿಚೊ ಘಾಯ್ ಪರ್ತ್ಯಾನ್ ಉಗ್ತೊ ಜಾಲ್ಲೊ, ಆನಿ ಭಿತರ್ಲ್ಯಾನ್ ವ್ಹಾಂವ್‍ಲ್ಲೆಂ ಥೊಡೆಂ ರಗತ್ ತೊಂಡಾಂತ್ಲ್ಯಾನ್ ಪಾಜಾರ್ಲೆಂ.

“ಭಯ್ಣಿ, ಕಿತೆಂ ಕೆಲೆಂಯ್!” ಮ್ಹಣಾಲಿ ಆಗ್ನೆಸ್ ಕುಂವರ್ನ್ ತಿಚೆಂ ತೋಂಡ್ ಪುಸುನ್, ಆನಿ ಹಾಳ್ವಾಯೆನ್ ತಿಕಾ ಉಶ್ಯಾಂಚೆರ್ ವಣ್ಕಾವ್ನ್.

ಥೊಡ್ಯಾ ವೆಳಾನ್ ವೆರೊನಿಕಾ ಕುಂವರ್ನ್ ಉಲಯ್ಲಿ:

“ಎಕಾ ಪ್ರತ್ಯೇಕ್ ಮಾಗ್ಣ್ಯಾಚ್ಯಾ ಜಮಾತೆ ಖಾತಿರ್ ಆಮಿ ಸರ್ವ್ ಹಾಂಗಾಸರ್ ಸಾಂಗಾತಾ ಮೆಳ್ಳ್ಯಾಂವ್… ಮಾಗ್ಣಿಂ ಶಿಕಯಾ…”

ತಾಣಿಂ ಮಾಗ್ಣಿಂ ಶಿಕಯ್ಲಿಂ.

ಮಿಸ್ತೆರಾಂಚೊ ನಿಯಾಳ್ ಕೆಲೊ.

ಲೋವ್ ಸ್ವರಾನ್ ‘ಸಾಂತಾ ಖುರ್ಸಾಚೆ ಕುರುಹೆನ್’ ತಾಣಿಂ ಗಾಯಾನ್ ಕೆಲೆಂ. ಉಪ್ರಾಂತ್, ತಾಣಿಂ ಸಕ್ಡಾಂನಿ ವೆರೊನಿಕಾ ಕುಂವರ್ನಿಚ್ಯಾ ಹಾಂತುಳ್ಣಾಕ್ ವೆಡೊ ಮಾರ್ಲೊ.

ತಿಚೆಂ ಮುಖಮಳ್ ಪ್ರಶಾಂತ್ ಆಸ್‍ಲ್ಲೆಂ.

ಉಪ್ರಾಂತ್ ತಿಚ್, ಸ್ಪಷ್ಟ್ ತಾಳ್ಯಾನ್ ವಿಚಾರಿ:

“ಭಯ್ಣಿ, ಆಗ್ನೆಸ್ ಸಿಸಿಲಿಯಾ – ಕಶಿ ತುಂ ಹಾಂಗಾಸರ್ ಯೇವ್ನ್ ಪಾವ್ಲಿಯ್? ನಿಜಾಯ್ಕೀ ಹೆಂ ಏಕ್ ಅಚರ್ಯೆಂ.”

“ಹಾಂತುಂ ಅಚರ್ಯೆಂ ನಾ” ಸಾಂಗ್ಲೆಂ ಆಗ್ನೆಸ್ ಕುಂವರ್ನಿನ್. “ಕಾಲ್ ಆಮ್ಚ್ಯಾ ಸರ್ದಾರಾಚೆ ಥೊಡೆ ಶಿಪಾಯ್ ಕುರಿಯೆಲ್ ಥಾವ್ನ್ ಪಟ್ಟಣಾಕ್ ವೆತಾನಾ ಜೋಡುದಾರಿ ಠಾಣ್ಯಾಂತ್ ದೆಂವ್ಲೆ…” ಅಶಿ, ತಿಣೆಂ ಘಡ್‍ಲ್ಲಿ ಗಜಾಲ್ ಸಾಂಗ್ಲಿ. ಮಟ್ವ್ಯಾನ್ ತಾಚೆಂ ಚಿತ್ರಣ್ ಅಶೆಂ:

ತೆ ಶಿಪಾಯ್ ಠಾಣ್ಯಾಂತ್ ದೆಂವ್ಲೆ ಆನಿ ಕೊತ್ವಾಲ್ ದೇಜಪ್ಪ ಸೆಟ್ಟಿ ಕಡೆನ್ ಉಲಂವ್ಕ್ ತೆ ರಾವ್ಲೆ. ಸೆಟ್ಟಿನ್ ತಾಂಚೆ ಕಡ್ಚಿ, ಕುರಿಯೆಲಾಂತ್ಲಿ ಖಬರ್ ಸಗ್ಳಿ ಸಮ್ಜೊನ್ ಘೆತ್ಲಿ. ಸರ್ದಾರ್ ಸಿಮಾಂವ್ ಆನಿ ಸರ್ದಾರ್ ಯೂಸುಫ್ ಆಲಿ, ಫಕೀರ್ ಮಹಮ್ಮದಾಕ್ ಘೆವ್ನ್ ಪಟ್ಟಣಾಕ್ ಗೆಲ್ಯಾತ್, ಮೊರ್ನಾಚ್ಯಾ ತಣಿರ್ ಆಸ್‍ಲ್ಲ್ಯಾ ವೆರೊನಿಕಾ ಕುವೆಲಿಕ್ ಕುರಿಯೆಲಾಕ್ ಹಾಡ್ಲ್ಯಾ – ತಿಕಾ ಬಹುಶಃ ಬೊಕ್ಕಪಟ್ಟಣಾಂತ್ಲ್ಯಾ ಹಸ್ಸನ್ ಮಹಮ್ಮದಾಗೆರ್ ದವರುಂಕ್ ಪುರೊ ಮ್ಹಳ್ಳಿ ಖಬರ್ ಮೆಳ್ಳಿ.

ಮಂಗ್ಳುರ್ ಥಾವ್ನ್ ಸರ್ದಾರಾಚಿ ಜಾಂವ್, ವೆರೊನಿಕಾ ಕುಂವರ್ನಿಚಿ ಜಾಂವ್ ಖಬರ್ ಆಯ್ಕೊಂಕ್ ಆಗ್ನೆಸ್ ಕುಂವರ್ನ್ ಚಡ್ಪಡ್ತಾಲಿ ಜಾಲ್ಲ್ಯಾನ್, ತಸಲಿ ಖಬರ್ ಕಾಂಯ್ ಯೆತಚ್ ತಿಳ್ಸಿಜಾಯ್ ಮ್ಹಣ್ – ಕಣ್ಣಾನೂರ್ ಥಾವ್ನ್ ಆದ್ಲ್ಯಾ ದಿಸಾ ಪಾಟಿಂ ಪಾವ್‍ಲ್ಲ್ಯಾಫಾರಾ, ದೇಜಪ್ಪ ಸೆಟ್ಟಿಕ್ ತಿಣೆಂ ಹಿಸೊ ದಿಲ್ಲೊ.

ಶಿಪಾಯ್ ಚಲ್ತಚ್, ಖುದ್ ದೇಜಪ್ಪಾಚ್, ರಫಾಯೆಲ್ ಮಿಂಗೆಲ್ ಕಾಮ್ತಿಗೆರ್ ಗೆಲ್ಲೊ ಆನಿ ತಾಣೆಂ ಖಬರ್ ದಿಲ್ಲಿ. ಆಗ್ನೆಸ್ ಕುಂವರ್ನಿಚೆಂ ಮನ್ ರಾವ್ಲೆಂ ನಾ. ಬಾಪಾಯ್ಕ್ ತಿಣೆಂ ಸಮ್ಜಯ್ಲೆಂ:

“ಹಾಂವ್ ಆಜ್‍ಚ್ ದಾವಿದಾಕ್ (ಸೆವಕಾಕ್) ಸಾಂಗಾತಾ ಘೆವ್ನ್ ಕುರಿಯೆಲಾಕ್ ವೆತಾಂ ಆನಾ…”

“ಕಶೆಂ ವೆತೆಲೆಂಯ್ ಧುವೇ – ಇತ್ಲೆ ಅಪಾಯ್ ಆಸ್ತಾನಾ?”

“ಆತಾಂ ಅಪಾಯ್ ನಾ, ಆನಾ. ತ್ಯಾ ಶಿವಾಯ್, ಆಜ್ ಸುಕ್ರಾರ್. ಆಮ್ಕಾಂ ಶಿಪಾಯ್ ಕೊಣೀ ಮೆಳ್ಚೆ ನಾಂತ್. ನಹಿಂ ಆಸ್ತಾಂ, ಆಮಿ ಸ್ವತಂತ್ರ್. ಆಮ್ಕಾಂ ಕೊಣೆಂಯೀ ಉಪಾದ್ರ್ ದೀಂವ್ಕ್ ನಜೊ ಮ್ಹಣ್, ಟಿಪ್ಪುನ್ ಮ್ಹೊರ್ ಮಾರ್ನ್ ದಿಲ್ಲಿ ಹುಕುಮ್ ಆಸಾ. ತಿವೀ ಹಾಂವ್ ಸಾಂಗಾತಾ ಘೆತಾಂ.”

“ಪುಣ್ ತುಂ ಚೆಡುಂ…”

“ತ್ಯಾ ಸಂಬಂಧಿಂ ಫಿಕಿರ್ ಕರಿನಾಕಾ, ಆನಾ. ಆದಿಂ ಏಕ್ ಪಾವ್ಟಿಂ ಜಮಲಾಬಾದ್ ಘಡಾಕ್ ವೆತಾನಾ ಗೆಲ್ಲೆಪರಿಂ, ಟಿಪ್ಪುಚ್ಯಾಚ್ ಸೈನಾಂತ್ಲ್ಯಾ ಸವಾರಾಂಪರಿಂ ಆಮಿ ಪಯ್ಣ್ ಕರ್ತಾಂವ್.”

“ಮ್ಹಾಕಾ ಸಮ್ಜನಾ. ತುಜಿ ಖುಷಿ ಕರ್, ಪುಣ್ ಬರೆಂ ಕರ್…”

“ಜರೂರ್ ಆನಾ” ಮ್ಹಣೊನ್ ಬಾಪಾಯ್ಚ್ಯಾ ಮಿಶ್ಯಾಂಚೆರ್ ತಿಣೆಂ ಏಕ್ ಉಮೊ ದಿಲೊ, ಆನಿ ಬಾಪಾಯ್ಚಿ ಕಬ್ಲಾತ್ ಘೆವ್ನ್ ತಿ ಭಾಯ್ರ್ ಸರ್ಲಿ.

ಚಿಂತ್‍ಲ್ಲೆಪರಿಂಚ್, ವಾಟೆರ್ ತಾಂಕಾಂ ಕಸಲಿಯೀ ಅಡ್ಕಳ್ ವಾ ಅವ್ಘಡ್ ಜಾಂವ್ಕ್ ನಾ.

ಅಂದಾಜಾನ್‍ಂಚ್ ಪಯ್ಣ್ ಕರುನ್, ಸಾಂಜೆಚ್ಯಾ ಚಡುಣೆಂ ಚಾರ್ ವೊರಾರ್ ತಿಂ ಉರ್ವಾಚ್ಯಾ ವಾಟೆನ್ ಆಯಿಲ್ಲಿಂ. ಥಂಯ್ ಥಾವ್ನ್ ಬೊಕ್ಕಪಟ್ಟಣಾಚಿ ವಾಟ್ ಘೆವ್ನ್ ಆಸ್ತಾನಾ, ತಾಂಕಾಂ ವಾಟೆರ್ ದೋಗ್ ಫಕೀರ್ ಮೆಳ್ಳೆ. (ವೆಸಾರ್ ಆಸ್‍ಲ್ಲೆ, ದುಮ್ಗಾ ಆನಿ ಕಾಲೆಸ್ತ್ – ಜೆ, ಸರ್ದಾರ್ ಸಿಮಾಂವ್ಚಿ ಜಾಂವ್, ವೆರೊನಿಕಾಚಿ ಜಾಂವ್, ಕಾಂಯ್ ಖಬರ್ ಮೆಳ್ತಾ ಜಾಲ್ಯಾರ್ ಪಳೆಂವ್ಕ್ ಮ್ಹಣ್ ವಾಟ್ ತಪಾಸುನ್ ಆಸ್‍ಲ್ಲೆ).

“ಓ-ಹೋ-ಹೊಯ್!” ದಾವಿದಾನ್ ತಾಂಕಾಂ ಹುಡ್ಕಿಲೆಂ.

“ಜೀ-ಜೀ!”

“ಆಮ್ಕಾಂ ಬೊಕ್ಕಪಟ್ಟಣಾಕ್ ವಚೊಂಕ್ ಜಾಯ್ ಆಸ್‍ಲ್ಲೆಂ.”

“ಬೊಕ್ಕಪಟ್ಟಣಾಕ್..? ಖಂಯ್ಸರ್..? ಜೀ… ಕೊಣಾಗೆರ್?” ಫಕೀರಾಂನಿ ಆಪ್ಣಾಂ ಮಧೆಂ ಎಕಾಮೆಕಾ ದೀಷ್ಟ್ ವಿನಿಮಯ್ ಕೆಲಿ.

“ಬೊಕ್ಕಪಟ್ಟಣಾಂತ್, ಸಾವ್ಕಾರ್ ಹಸ್ಸನ್ ಮಹಮ್ಮದ್ ಮ್ಹಳ್ಳೊ ಎಕ್ಲೊ ಆಸಾ. ಆಮ್ಕಾಂ ತಾಂಗೆರ್ ವಚೊಂಕ್ ಜಾಯ್.”

“ಸಾವ್ಕಾರ್ ಹಸ್ಸನ್ ಮಹಮ್ಮದ್!” ಜಾಂಟೊ ಫಕೀರ್ ಅತರ್ವಣಾ ಅಭಿನಯ್ಸುಂಕ್ ಲಾಗ್ಲೊ. “ಪುಣ್ ತುಮ್ಚಿ ವಾಟ್ ಚುಕ್ಲ್ಯಾ – ಏಕ್ ಮಯ್ಲ್ ಚಡಿತ್ ತುಮಿ ಪಯ್ಣ್ ಕೆಲೆಂ… ಹಾಂ, ತಾಚ್ಯಾ ಘರಾ ವಚಜಾಯ್ ಜಾಲ್ಯಾರ್ (ಫಟಿಚ್!) ಹಾಂಗಾ ಥಾವ್ನ್ ಏಕ್ ಮಯ್ಲ್ ಪಾಟಿಂ ವಚಜಾಯ್ ಆನಿ ದಾವ್ಯಾಕ್ ಘುಂವಜಾಯ್… ಭಾರೀ ಬರೊ ಮನಿಸ್ ತೊ..!”

“ದೇವ್ ಬರೆಂ ಕರುಂ..!”

ಸರ್ದಾರಾಂನಿ ತಾಂಚೆ ಘೊಡೆ ಪಾಟಿಂ ಘುಂವ್ಡಾವ್ನ್ ಥೊಡಿ ವಾಟ್ ಧಾಂವ್ಡಾಯ್ಲೆ. ಘುಂವ್ಡೆರ್ ದಾಟ್ ಮೊಳೊ ಆಸ್‍ಲ್ಲೆ ಕಡೆನ್, ಆಗ್ನೆಸ್ ಕುಂವರ್ನಿನ್ ಘೊಡೆ ರಾವಯ್ಲೆ, ಆನಿ ಸಾಂಗ್ಲೆಂ:

“ತಾಣಿಂ ಆಮ್ಕಾಂ ನಿಜಾಯ್ಕೀ ಸಾಂಗ್‍ಲ್ಲಿ ವಾಟ್ ಸಾರ್ಕಿ ನಹಿಂ. ಬೊಕ್ಕಪಟ್ಟಣ ಹ್ಯಾ ವಾಟೆನ್ ನಾ ಮ್ಹಣ್ ಹಾಂವ್ ಜಾಣಾಂ. ಹ್ಯಾ ಘೊಡ್ಯಾಂಕ್ ಘೆವ್ನ್ ಹಾಂವ್ ಹಾಂಗಾ ಆಡೊಸಾಕ್ ರಾವ್ತಾಂ… ತುಂ ತ್ಯಾ ಫಕೀರಾಂಚೊ ಪಾಟ್ಲಾವ್ ಕರ್… ತಾಂಕಾಂ ಕಳೊಂಕ್ ನಜೊ… ನೀಜ್ ಜಾವ್ನ್ ತೆ ಹಸ್ಸನ್ ಮಹಮ್ಮದಾಗೆರ್‌ಚ್ ವೆತೆಲೆ…”

ನಿಜಾಯ್ಕೀ ತಶೆಂಚ್ ಘಡ್ಲೆಂ.

ಫಕೀರಾಂಚ್ಯಾ ನದ್ರೆಕ್ ಪಡನಾಸ್ತಾಂ, ತಾಂಚೊ ಪಾಟ್ಲಾವ್ ಕರುನ್ ಗೆಲ್ಲೊ ದಾವಿದ್ ಚಡುಣೆಂ ಎಕಾ ವೊರಾನ್ ಪಾಟಿಂ ಆಯ್ಲೊ.

ಉಪ್ರಾಂತ್‍ಯೀ ಥೊಡೊ ವೇಳ್ ರಾವೊನ್, ಹೆ ದೊಗೀ ಸವಾರ್ ಹಸ್ಸನ್ ಮಹಮ್ಮದಾಗೆರ್ ಪಾವ್ಲೆ.

ಥಂಯ್ಸರ್ ಚಾಂದ್‍ಬೀಬಿ ಆನಿ ಫರೀದಾ ಬೇಗಮ್ ಪಯ್ಲೆಂ ಭಿಯೆಲಿಂ. ಫಾವೊತಿ ಭಾಸ್ ಉಲವ್ನ್ ಆನಿ ರುಜ್ವಾತ್ ದೀವ್ನ್ ಆಗ್ನೆಸ್ ಕುಂವರ್ನಿನ್ ತಾಂಕಾಂ ಸಮಾಧಾನ್ ಕೆಲೆಂ, ಆನಿ ವೆರೊನಿಕಾ ಕುಂವರ್ನ್ ಖಂಯ್ ಆಸಾ ಮ್ಹಳ್ಳೊ ಸಾರ್ಕೊ ಪತ್ತೊ ಘೆವ್ನ್, ಸವ್ಕಾಸಾಯೆನ್ ತಿ ವಾಟ್ ಧರ್ಲಿ.

ದುಮ್ಗಾ ಪಿಂತಾಕ್ ಆತಾಂ ನಿಜಾಯ್ಕೀ ಲಜ್ ಜಾಲ್ಲಿ.

“ಬಾಯೆ, ಆಮ್ಕಾಂ ಮಾಫ್ ಕರಿಜಾಯ್” ಮ್ಹಣಾಲೊ ತೊ. “ಪರಿಸ್ಥಿತೆ ಪ್ರಕಾರ್ ಆಮ್ಕಾಂ ತಶೆಂ ಚಲಜಾಯ್ ಜಾಲೆಂ. ಪುಣ್, ಆಮಿಯೀ ಆಜ್ ಹಾಂಗಾಸರ್ ಪಾವೊಂಕ್ ತುಮ್ಚಿಚ್ ಭೆಟ್ ಕಾರಣ್. ದೇವ್ ವರ್ತೊ…”

“ವ್ಹಡ್ ನಹಿಂ ದುಮ್ಗಾಬಾ” ಮ್ಹಣಾಲಿ ಆಗ್ನೆಸ್ ಕುಂವರ್ನ್. ಅಶೆಂ ತರೀ ಆಮಿ ಭೆಟ್ಲ್ಯಾಂವ್ ಮ್ಹಳ್ಳೊ ಆಮ್ಕಾಂ ವರ್ತೊ ಸಂತೊಸ್. ಫುಡೆಂಯೀ ತುಮಿಂಚ್ ಆಮ್ಕಾಂ ಸುಧಾರ್ಸಿಜಾಯ್.”

“ಜರೂರ್ ಬಾಯೆ, ಜರೂರ್!”

ಮಾನಿನ್ ವೆರೊನಿಕಾ ಕುವೆಲ್ ಆತಾಂ ಮಧೆಂ ಉಲಯ್ಲಿ:

“ಅಶೆಂ ಪುಣೀ ತುಮಿ ಭೆಟ್ಲ್ಯಾತ್ ಮ್ಹಣ್ ಮ್ಹಜೊ ಅತ್ಮೊ ಸಂತೊಸ್ ಪಾವ್ತಾ” ಮ್ಹಣಾಲಿ ತಿ. “ದೆವಾಕ್ ಅರ್ಗಾಂ, ಸದೆಂವ್ ಜಾಂವ್ ಭಾಗೆವಂತ್ ಖುರಿಸ್.”

ಆಗ್ನೆಸ್ ಕುಂವರ್ನಿಕ್ ತಿಣೆಂ ಲಾಗಿಂ ಆಪಯ್ಲಿ.

“ಭಯ್ಣಿ” ಮ್ಹಣಾಲಿ ತಿ. “ತುಜೆಂ ಘನ್, ಮನ್ ಆನಿ ಮೋಲ್ ಮ್ಹಾಕಾ ಸಮ್ಜಲಾಂ. ತಿ ಸಿನೊಲ್ ತುಜೆ ತಾಬೆನ್ ಸುರಕ್ಷಿತ್ ಆಸಾ… ಆನಿ ಹ್ಯಾ ಆಮ್ಚ್ಯಾ ಸರ್ವ್ ಭಾವಾಡ್ತಿ ಭಾಂವ್ಡಾಂಚೊ ಮೋಗ್ ಆನಿ ಜವಾಬ್ದಾರಿ ಆಜ್ ಥಾವ್ನ್ ತುಜಿ ಜಾವ್ನಾಸಾ…”

“ಭಯ್ಣೀ…” ಆಗ್ನೆಸ್ ಕುಂವರ್ನ್ ಸುಸ್ಕಾರ್ಲಿ.

“ಖಂತ್ ಕರಿನಾಕಾತ್… ಸರ್ದಾರ್ ಸಿಮಾಂವ್ ತುಮ್ಚೆ ಖಬ್ರೆಕ್ ಯೆತಲೊ. ಜರ್ ಎಕಾದಾವೆಳಾ ಯೇನಾ ಜಾಯ್ತ್ ತರ್” ಮ್ಹಣಾಲಿ ತಿ ಆಗ್ನೆಸ್ ಕುಂವರ್ನಿಚೆಂ ತೋಂಡ್ ಪೊಶೆವ್ನ್. “ತುವೆಂ ತರೀ ತಾಕಾ ಸೊಧುನ್ ಸಾಂಬಾಳ್ಚಿ ಗರ್ಜ್‍ಯೀ ಪಡತ್…”

ಆಗ್ನೆಸ್ ಕುಂವರ್ನಿಚೊ ಗಳೊ ಫುಮಾರ್ ಜಾಲೊ.

“ಆಮ್ಚ್ಯೊ ಜಮಾತಿ ಮುಖಾರ್ಸಿಯಾ… ಆಮ್ಚ್ಯಾ ಪುರ್ವಜಾಂಚೊ ಭಾವಾಡ್ತ್ ಉರಯಾ…”

“ತಶೆಂ ಕರ್ತೆಲ್ಯಾಂವ್!” ಸರ್ವ್ ದಾದ್ಲ್ಯಾಂನಿಯೀ ತಾಂಚೆ ಭರೊನ್ ಯೆಂವ್ಚೆ ತಾಳೆ ಮೆಳಯ್ಲೆ.

“ಕ್ರಿಸ್ತಾಚ್ಯಾ ಅತ್ಮ್ಯಾ ಮ್ಹಾಕಾ ಪವಿತ್ರ್ ಕರ್… ಖುಸಾಯಿಲ್ಲ್ಯಾ ಜೆಜು… ಮ್ಹಾಕಾ ಆಪವ್ನ್ ಘೆ…”

ಮಾನಿನ್ ವೆರೊನಿಕಾ ಕುವೆಲಿನ್, ಆಗ್ನೆಸ್ ಸಿಸಿಲಿಯಾಚೊ ಹಾತ್ ಧರ್‌ಲ್ಲೆಪರಿಂಚ್…

ತಿಚೊ ಭಾಗೆವಂತ್ ಅತ್ಮೊ ಉಬೊನ್ ಗೆಲೊ.

ಎಕಾ ಬಗ್ಲೆನ್ ಆಗ್ನೆಸ್ ಆನಿ ಆನ್ಯೇಕಾ ಬಗ್ಲೆನ್ ಮೋನಿಕಾ ತ್ಯಾ ಪಾರ್ಥಿವ್ ವಕ್ಷಾಚೆರ್ ಮುಖಮಳ್ ದಾಂಬುನ್ ಸುಸ್ಕಾರ್ತಾಲಿಂ. ಆವಾಜ್ ನಾಸ್ತಾಂ ತರೀ ಇಜಾಬೆಲ್ ತೆರೆಜ್ ಆನಿ ತಿಮ್ಮಿ ರಡ್ತಾಲಿಂ…

ಭೊಂವಾರಿಂ ಆಸ್‍ಲ್ಲ್ಯಾ ಸರ್ವ್ ದಾದ್ಲ್ಯಾಂಚೆ ದೊಳೆ ದುಖಾಂಚ್ಯಾ ಲ್ಹಾರಾಂನಿ ಉಪ್ಯೆತಾಲೆ…

ಕೆನರಾ ಕ್ರಿಸ್ತಾಂವಾಂಚ್ಯಾ ಬಂದಡೆ ವೆಳಾರ್ ಆನ್ಯೇಕ್ ಜ್ಯೋತಿ ಪಾಲ್ವಲಿ, ತರೀ, ಅನಂತಾಂತ್ ಪ್ರಕಾಸ್‍ಭರಿತ್ ಜಾಲಿ..!

ಭಾವಾಡ್ತಾ ಖಾತಿರ್ ತಿಚೊ ಪಾತ್ರ್ – ಜಾಂವ್ ಲ್ಹಾನ್ ಮಾತ್ರ್ ವಾ ಪರ್ವತಾ ಗಾತ್ರ್ – ತೊ ಫಾವೊತೆಪರಿಂ ಖೆಳೊನ್ ತಿ ಉತರ್‌ಲ್ಲಿ.

ಪಾಟಿಂ ಉರ್ಲೆಲ್ಯಾಂಕ್ ತೊಚ್ ಸಂದೇಶ್ ದೀವ್ನ್ ಆದೇವ್ಸ್ ತಿಣೆಂ ಕೆಲ್ಲೊ… ಪ್ರಕೃತೆಂತ್ ಆನಿ ರಚ್ನಾಂ ಮಧೆಂ ಬರ್‍ಯಾಂಚೆಂ ದಿರ್ವೆಂ ತೆಂ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel