ಸರ್ದಾರಾಚೆಂ ಸನ್ನಿಧಾನ್ – 10: ಲಡಾಯೆಕ್ ತಯಾರಾಯ್

ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 10
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 10: ಲಡಾಯೆಕ್ ತಯಾರಾಯ್

ಟಿಪ್ಪು ಸುಲ್ತಾನಾಚ್ಯಾ ವರ್ದೆ ಸಾಂಗಾತಾ ಆನಿ ಸರ್ದಾರ್ ಸಿಮಾಂವ್ಚ್ಯಾ ವರ್ದೆ ಸಾಂಗಾತಾ ತಾಚೆ ಸವಾರ್ ಭಾಯ್ರ್ ಸರೊನ್ ವೆತಾ ಪರ್ಯಾಂತ್ ಟಿಪ್ಪು ಹಾಜರ್ ಆಸ್‍ಲ್ಲ್ಯಾ ವರ್ವಿಂ, ಸರ್ದಾರ್ ಸಿಮಾಂವ್ನ್ ಆಪ್ಲ್ಯಾ ಸವಾರಾಂ ಲಾಗಿಂ ಕಾಂಯ್ ಉಲಂವ್ಕ್ ಅವ್ಕಾಸ್ ಮೆಳೊಂಕ್ ನಾ. ಬಾದಶಹಾನ್‍ಂಚ್ ತಶೆಂ ಕೆಲ್ಲೆಂ ಜಾವ್ಯೆತ್ ಮ್ಹಳ್ಳೊ ದುಬಾವ್ ಪರ್ತ್ಯಾನ್ ತಾಚ್ಯಾ ಮತಿಂತ್ ಚರ್ಲೊ.

ಆಪ್ಣೆಂ ವರ್ದಿ ಲಿಖುನ್ ಆದ್ಲ್ಯಾಚ್ ದಿಸಾ ದಿಲ್ಲ್ಯಾ ಖಾತಿರ್ ಥೊಡೆಂ ಪುಣೀ ಸಮಾಧಾನ್ ತಾಕಾ ಭೊಗ್ಲೆಂ. ತಿ ಸುರಕ್ಷಿತಾಯೆನ್ ಪಾವೊನ್ ತ್ಯಾ ವರ್ವಿಂ ಥೊಡೆಂ ಪುಣೀ ಬರೆಂಪಣ್ ಜಾಂವ್ದಿ ಮ್ಹಣ್ ಮತಿಂತ್‍ಚ್ ತಾಣೆಂ ಮಾಗ್ಲೆಂ.

ಉಪ್ರಾಂತ್ ಟಿಪ್ಪು ಸುಲ್ತಾನ್, ಸರ್ದಾರ್ ಸಿಮಾಂವ್ಕ್ ಆಪವ್ನ್ ರಾವ್ಳೆರಾಕ್ ಪ್ರವೇಶ್ ಜಾಲೊ.

“ಆತಾಂ ಜಾಲ್ಯಾರ್ ಥೊಡೆಂ ಉಲಯಾಂ” ಮ್ಹಣಾಲೊ ತೊ, ತೆ ಬಸ್ಲ್ಯಾ ಉಪ್ರಾಂತ್. “ತೆ ಸವಾರ್ ಕುರಿಯೆಲ್ ಥಾವ್ನ್ ಪಾಟಿಂ ಯೇಂವ್ಕ್ ಥೊಡೆ ದೀಸ್ ಲಾಗ್ತೆಲೆ. ತೆದೊಳ್ ಪರ್ಯಾಂತ್ ಆಮ್ಚ್ಯಾ ಫುಡ್ಲ್ಯಾ ಯೋಜನಾಂಚಿ ತಯಾರಾಯ್ ಕರುಂಕ್ ಆಮ್ಕಾಂ ಪುರ್ಸತ್ ಆಸಾ.”

ಸರ್ದಾರ್ ಸಿಮಾಂವ್ ಆಯ್ಕೊಂಕ್ ಬಸ್ಲೊ.

“ತುಂ ಜಾಣಾಂಯ್ ಸರ್ದಾರಾ” ಮ್ಹಣಾಲೊ ಬಾದಶಹಾ, ಘಡಿಭರ್ ಆಪ್ಲ್ಯೊ ಮಿಶ್ಯೊ ವೊಳಾವ್ನ್. “ವೆಗಿಂ ನಹಿಂ ಜಾಲ್ಯಾರೀ ಥೊಡ್ಯಾ ತೆಂಪಾನ್ ಪುಣೀ ತ್ಯಾ ಫಿಂರ್ಗ್ಯಾಂ (ಬ್ರಿಟಿಷಾಂ) ಕಡೆನ್ ಆಮಿ ಝುಜೊಂಕ್ ಆಸಾ, ಆನಿ ಆಮ್ಚೊ ಮಾನ್ ಭರ್ತಿ ಕರ್ನ್ ಘೆಂವ್ಕ್ ಆಸಾ.”

“ಆಮಿ ಕೆದಾಳಾಯ್ ತಯಾರ್ ಆಸಾಂವ್, ಹುಜೂರ್!”

“ವ್ಹಯ್, ಆಮಿ ತಯಾರ್ ಆಸಾಂವ್. ಲೇಕಿನ್ ಆಮ್ಚ್ಯಾ ರಿಸಾಲಾಂಚಿ ತಯಾರಾಯ್, ವಾ, ಆಮ್ಚ್ಯಾ ಸೈನಾಚಿ ಬಡಾವಣ್ ಪಾವನಾ.”

ಸರ್ದಾರ್ ಸಿಮಾಂವ್ನ್ ಜಾಪ್ ದಿಲಿ ನಾ. ಬಂದಡೆಂತ್ಲ್ಯಾ ಸಬಾರ್ ಕೈದ್ಯಾಂಕ್ ಸೈನಾಂತ್ ಭರ್ತಿ ಕರ್ನ್, ಅಧಿಕಾರಿಂನಿ ದಿಂವ್ಚ್ಯಾ ದಗ್ದೊಣೆಚ್ಯಾ ಕಾಯ್ಲಿಂತ್ ಥಾವ್ನ್ ವೈರಿಂಚ್ಯಾ ಗುಳ್ಯಾಂಕ್ ವಾ ತಲ್ವಾರಿಂಕ್ ಉಂಡಿ ಕರ್ಚ್ಯಾ ಉಜ್ಯಾಂತ್ ಉಡಂವ್ಚಿಂ ಸರ್ವ್ ಪ್ರಯತ್ನಾಂ ಚಲ್ತಾತ್ ಮ್ಹಳ್ಳೆಂ ತೊ ಜಾಣಾಂಸ್‍ಲ್ಲೊ.

“ಸರ್ಕಾರಾಚೆಂ ಖಜಾನ್ – ಸಬಾರ್ ಕಾರಣಾಂ ವರ್ವಿಂ – ಆಮಿ ಚಿಂತ್‍ಲ್ಲ್ಯಾ ಪ್ರಾಸ್ ಚಡ್ ಖಾಲಿ ಜಾಲಾಂ. ತಶೆಂ ಜಾಲ್ಲ್ಯಾ ವರ್ವಿಂ ಚಡ್ ರುಸುಮ್ ದೀವ್ನ್ ಚಡಿತ್ ಜವಾನಾಂಚಿ ಆಮ್ಕಾಂ ಆಸ್ಚಿ ಗರ್ಜ್ ಬಾಕಿ ದವರುಂಕ್ ಜಾಯ್ನಾ. ದೆಕುನ್ ಆಮಿ ಏಕ್ ಉಪಾಯ್ ಚಿಂತ್ಲಾ, ತೊ ಪೊಂತಾಕ್ ಪಾವಯ್ಜಾಯ್.”

“ಕಸಲೊ ಉಪಾಯ್ ಹುಜೂರ್?”

“ಸಾಂಗ್ತಾಂ, ಆಯ್ಕ್” ಮ್ಹಣ್ ಟಿಪ್ಪು, ಉಬೊ ಜಾವ್ನ್. ಹಾತ್ ಪಾಟಿಂ ಬಾಂಧುನ್ ಮುಖಾರ್ ಪಾಟಿಂ ಪಾಸಾಯೊ ಮಾರ್ನ್ ತೊ ಉಲಯ್ಲೊ: “ದೊಡ್ಡ ವೀರೇಂದ್ರಾಚ್ಯಾ ಪ್ರದೇಶಾಚೆರ್ ಲಡಾಯ್ ಮಾರುಂಕ್ ಆಮಿ ಚಿಂತ್ಲಾಂ.”

ಹೆಂ ವಾಕ್ಯೆಂ ಆಯ್ಕೊನ್ ಸರ್ದಾರ್ ಸಿಮಾಂವ್ಕ್ ಝಿಂಟ್ ಮಾರ್ಲಿ!

“ದೊಡ್ಡ ವೀರೇಂದ್ರಾಚ್ಯಾ – ಕೊಡಗ್ ಪ್ರಾಂತಾಚೆರ್, ಹುಜೂರ್?”

“ಆಮ್ಚ್ಯಾ ಸಾಮ್ರಾಜ್ಯಾಚ್ಯಾ ಗಡಿರ್ ತೆಂಕೊನ್ ಆಸ್ಚ್ಯಾ, ಲಾಂಬಾಯೆರ್ ಚಡುಣೆಂ ಸ ಮಯ್ಲಾಂ ರುಂದಾಯೆಚ್ಯಾ ಶಿರಂಟ್ ಪ್ರದೇಶಾಚೆರ್ ದಾಡ್ ಘಾಲ್ನ್, ಆಮಿ ತೊ ಸ್ವಾಧೀನ್ ಕರುಂಕ್ ಚಿಂತ್ಲಾಂ. ಸಗ್ಳ್ಯಾ ಕೊಡಗಾಚೆರ್ ನಹಿಂ.”

“ಪುಣ್ ತೊ ಪ್ರದೇಶ್ ಗಿಳ್ಚೊ ಕಾಂಯ್ ಆಮ್ಚೊ ಮತ್ಲಬ್ ನಹಿಂ” ತಾಚೆಂ ಶಿಂತ್ರ್ಯಾಳೆಂ ಮನ್ ತಾಣೆಂ ಉಚಾರ್ಲೆಂ. “ಆಮ್ಚ್ಯಾ ಸಾಮ್ರಾಜ್ಯಾಚಿ ಭದ್ರತಿ ಸಾಂಬಾಳ್ಚ್ಯಾ ಖಾತಿರ್, ತ್ಯಾ ಪ್ರದೇಶಾಚ್ಯಾ ಲೊಕಾಕ್ ಫಾವೊ ತೊ ಉದ್ಯೋಗ್ ದಿತಾಂವ್ ಮ್ಹಣ್ ರಾಜಾ ಕಡೆನ್ ಒಪ್ಪಂದ್ ಕರ್ಚೆಂ. ರಾಜಾ ಇನ್ಕಾರ್ ಕರಿಸೊ ನಾ. ಆಮ್ಚೆ ಕಡೆನ್ ಝುಜಾಕ್ ದೆಂವ್ಚೆ ತಿತ್ಲೆಂ ಧಯ್ರ್, ಜಾಂವ್ ಮನ್, ಜಾಂವ್ ಬಳ್, ತಾಚೆ ಕಡೆನ್ ನಾ ಮ್ಹಳ್ಳೆಂ ಆಮಿ ಜಾಣಾಂವ್.”

“ಪುಣ್ ಆಮ್ಕಾಂ ಆಮ್ಚ್ಯಾ ಸೆಜಾರ್‍ಯಾಂ ಕಡೆನ್ ಬರೊ ಸಂಬಂಧ್…”

“ಬರೊ ಆನಿ ಸುರಕ್ಷಿತ್ ಸಂಬಂಧ್ ದವರ್ಚೊಚ್ ಆಮ್ಚೊ ಉದ್ದೇಶ್ ಮ್ಹಳ್ಳೆಂ ಆಮಿ ಪಾಚಾರ್ತಾಂವ್” ಬಾದಶಹಾಚಿ ಜಾಪ್! ಕಸಲೆಂಯೀ ಮೇಟ್ ಕಾಡುಂಕ್ ಏಕ್ ಪಾವ್ಟಿಂ ಟಿಪ್ಪುನ್ ಚಿಂತ್ಲೆಂ ಜಾಲ್ಯಾರ್, ಉಪ್ರಾಂತ್ ಕೊಣೆಂಯೀ, ಕಸಲೆಂ ರಾಜಾಂವಿ ಕಾರಣ್ ಆಸೊನ್ ತರೀ ತೆಂ ಮೇಟ್ ಪಾಟಿಂ ಕಾಡಂವ್ಕ್ ಸಾಧ್ಯ್ ನಾತ್‍ಲ್ಲೆಂ.

“ತ್ಯಾ ಶಿವಾಯ್, ಆಮಿ ತೊ ಪ್ರದೇಶ್ ಸ್ವಾಧೀನ್ ಕರ್ನ್, ಆಮ್ಚ್ಯಾ ಶಿಪಾಯಾಂ ಖಾಲ್ ದವರುಂಕ್ ದುಸ್ರೆಂ ಏಕ್ ಕಾರಣ್ ಆಸಾ.”

“ದುಸ್ರೆಂ ಕಾರಣ್ ಹುಜೂರ್?” ವಿಚಾರ್ಚ್ಯಾ ಖಾತಿರ್ ಮಾತ್ರ್ ವಿಚಾರ್ಲೆಂ ಸರ್ದಾರ್ ಸಿಮಾಂವ್ನ್; ಪುಣ್ ತಾಚ್ಯಾ ತಕ್ಲೆಂತ್ ಘುಸ್ಪಡ್ ಉಟ್‍ಲ್ಲಿ.

“ಸಗ್ಳ್ಯಾ ತ್ಯಾ ಗಡಿರ್, ಆಮ್ಕಾಂ ಹೆರ್ ರಿತಿನ್ ಪಹರೊ ದವರ್ಚಿ ದುಸ್ರಿ ವಾಟ್ ನಾ. ತ್ಯಾ ರಾನ್ವಟ್ ಪ್ರದೇಶಾಂತ್ ಸಬಾರ್ ಉಗ್ತೆ ಗೊಂಯ್ಡೆ ಆಸಾತ್. ತ್ಯಾ ಗೊಂಯ್ಡ್ಯಾಂತ್ಲ್ಯಾನ್, ಹಾಂಗಾಚೆ ಸಬಾರ್ ಕೈದಿ ಆನಿ ಹೆರ್‌ಯೀ ಪಾಶಾರ್ ಜಾವ್ನ್ ಪರಾರಿ ಜಾತಾತ್. ದೆಕುನ್, ಆಮ್ಚ್ಯಾ ಯೋಜನಾ ಪ್ರಕಾರ್ ತಿಯೀ ವಾಟ್ ಆಮಿ ಬಂದ್ ಕೆಲ್ಲೆಪರಿಂ ಜಾತಾ. ಸಮ್ಜಲೆಂ?”

“ಸಮ್ಜಲೆಂ ಹುಜೂರ್!” ಸರ್ದಾರ್ ಸಿಮಾಂವ್ಕ್ ಸಮ್ಜಲೆಂ. ಆಕ್ರಮಣ್ ಚಲವ್ನ್, ತೊ ಪ್ರದೇಶ್ ಸ್ವಾಧೀನ್ ಕೆಲ್ಯಾರ್, ತ್ಯಾ ಪ್ರದೇಶಾಂತ್ಲ್ಯಾ ದಾದ್ಲ್ಯಾಂಕ್ ಕೈದಿ ಕರ್ನ್, ಟಿಪ್ಪುನ್ ದಿಂವ್ಚ್ಯಾ ‘ಉದ್ಯೋಗಾ’ ಮುಖಾಂತ್ರ್ ತಾಚ್ಯಾ ಸೈನಾಂತ್ ಥೊಡೆ ಹಜಾರ್ ಶಿಪಾಯ್ ಚಡಂವ್ಕ್ ಫುಂಕ್ಯಾ ಸವಾಯ್ ಏಕ್ ವಾಟ್ ಜಾತೆಲಿ. ತ್ಯಾ ಪ್ರದೇಶಾಂತ್, ಲಾಂಬಾಯೆರ್ ಟಿಪ್ಪುಚ್ಯಾ ಶಿಪಾಯಾಂಚಿಂ ಠಾಣಿಂ ಸ್ಥಾಪನ್ ಕೆಲ್ಯಾರ್, ಕ್ರಿಸ್ತಾಂವ್ ಕೈದ್ಯಾಂಕ್ ಸುಟ್ಕಾ ಲಾಭಂವ್ಚ್ಯಾ ಸಾಹಸಾಕ್‍ಯೀ ಅಡ್ಚಣಿ ಜಾತೆಲಿ.

“ತರ್ ಕಿತೆಂ ಚಿಂತಾಯ್?”

“ಕಾಂಯ್ ನಾ ಹುಜೂರ್” ಮ್ಹಣಾಲೊ ಸರ್ದಾರ್ ಸಿಮಾಂವ್.

“ತುಮ್ಚಿ ಖುಶಿ ಆಮ್ಚಿ ಹುಕುಮ್. ಖಂಯ್ಚೊಯೀ ನಿಚೆವ್ ಕರ್ಚ್ಯಾ ಆದಿಂ, ಬಾದಶಹಾ, ಸರ್ವ್ ವಿಷಯ್ ತಜ್ವೀಜ್ ಕರ್ನ್ ಪಳೆತಾತ್ ಮ್ಹಣ್ ಸೆವಕಾಂಕ್ ಕಳಿತ್ ಆಸಾ.”

“ವ್ಹಯ್” ಮ್ಹಣಾಲೊ ಟಿಪ್ಪು, ಜಾಕಾ ಹೆಂ ಆಯ್ಕೊನ್ ಸಮಾಧಾನ್ ಜಾಲೆಂಶೆಂ ದಿಸ್ತಾ. “ಆಮಿ ತಜ್ವೀಜ್ ಕರ್ನ್ ಪಳೆಲಾಂ ಮಾತ್ರ್ ನಹಿಂ, ಆಮ್ಚ್ಯಾ ಹೆರ್ ಥೊಡ್ಯಾ ಸರ್ದಾರಾಂ ಕಡೆನ್ ಆನಿ ಹುದ್ದೆದಾರಾಂ ಕಡೆನ್ ತರ್ಕ್ ಮಾಹೆತ್ ಆಮಿ ಘೆತ್ಲ್ಯಾ. ಷೇಕ್ ಆಲಿ ಆನಿ ವೆಂಕಪ್ಪಯ್ಯಾಕ್‍ಯೀ ಝುಂತಾಂತ್ ಪಾತ್ರ್ ಘೆಂವ್ಕ್ ಆಮಿ ಆಪಯಿಲ್ಲೆಂ. ತಶೆಂ ಮ್ಹಣ್ತಾನಾ ಆನ್ಯೇಕ್ ಆಮ್ಕಾಂ ಉಗ್ಡಾಸ್ ಯೆತಾ. ಕೊತ್ವಾಲ್ ವೆಂಕಪ್ಪಯ್ಯಾಕ್ ಆಮಿ ಕಾಲ್ ಶಿಕ್ಷಾ ದಿಲ್ಲಿ ತರೀ, ತಾಕಾ ಬಂಧಿಂತ್ ಘಾಲುಂಕ್ ದಿಲ್ಲೆಂ ಫರ್ಮಾಣ್ ಆಮಿ ಉಪ್ರಾಂತ್ ಪಾಟಿಂ ಕಾಡ್ಲಾಂ – ತ್ಯಾ ಮನ್ಶ್ಯಾಚಿ ಆಮ್ಕಾಂ ಗರ್ಜ್ ಆಸಾ…”

“ಬಾದಶಹಾಚಿ ಖುಶಿ.”

“ತೊ ಮನಿಸ್ ಬುದ್ವಂತ್ – ಆಮಿ ಸಾಂಗ್ಲಾಂ ಮ್ಹಣ್ ದಿಸ್ತಾ – ಅಬ್ಬಾಜಿಚ್ಯಾ (ಹೈದರಾಚ್ಯಾ) ತೆಂಪಾರ್ ತೊ ನಿಜಾಯ್ಕೀ ಪ್ರಧಾನ್‍ಸೊ ಜಾವ್ನಾಸ್‍ಲ್ಲೊ, ಆನಿ ಕುರಿಯೆಲಾಂತ್ ಸರ್ಕಾರಾಚೊ ಮುಖ್ಯ ಪ್ರತಿನಿಧಿ ಜಾವ್ನ್ ತೊ ವಾವುರ್ತಾಲೊ. ಅಬ್ಬಾಜಿಚ್ಯಾ ಮೊರ್ನಾ ನಂತರ್ ತಾಚೊ ಹುದ್ದೊ ಪಾಟಿಂ ಪರ್ತಲಾ ಜಾಲ್ಯಾರೀ ತಾಚಿ ಆದ್ಲಿ ಸವಯ್ ಸುಟೊಂಕ್ ನಾ. ತುಜೆರ್ ಆಮ್ಚೊ ವಿಶ್ವಾಸ್ ಚಡ್ ಆಸ್‍ಲ್ಲೊ ತಾಕಾ ಸೊಸುನ್ ವ್ಹರುಂಕ್ ಚಿಕ್ಕೆ ಕಷ್ಟ್ ಮಾರ್ತಾತ್. ತುವೆಂ ತಿ ಪರ್ವಾ ಕರಿನಾಯೆ.”

“ನಾ, ಹುಜೂರ್.”

“ಎಕಾದಾವೆಳಾ, ತುಜ್ಯಾ ಶಿಮ್ಟೆರ್ ತೊ ಯಾ ತಾಚೆ ಚೇಲಾ ಪಾಯ್ ದವ್ರುಂಕ್ ಪ್ರಯತ್ನ್ ಕರ್ತಿತ್, ತಾಂಚಿ ಖಬರ್ ತುವೆಂ ಘೆವ್ಯೆತ್.”

“ತಶೆಂ ಕರ್ಚಿ ಗರ್ಜ್ ಪಡಶಿ ನಾ ಹುಜೂರ್” ಮ್ಹಣಾಲೊ ಸರ್ದಾರ್ ಸಿಮಾಂವ್. ಬಾದಶಹಾಚ್ಯಾ ಹ್ಯಾ ಫರ್ಮಾಣಾಂತ್‍ಯೀ ಕಾಂಯ್ ಪುಣೀ ಶಿರಿಗುಂಡಿ ಆಸ್ಯೆತ್‍ಗೀ ಮ್ಹಣ್ ತೊ ಚಿಂತುಂಕ್ ಪಡ್ಲೊ.

“ಜಾಲ್ಯಾರೀ ಹೆಂ ತುಕಾ ಆಮಿ ಸಾಂಗ್ಲೆಂ” ಮ್ಹಣಾಲೊ ಬಾದಶಹಾ. “ತಾಕಾ ಮನ್ ಆಸಾ ಜಾಲ್ಯಾರ್, ತುಜೆ ಹುಜ್ರಿಂ ತಾಚಿ ಶ್ಯಾಥಿ ದಾಕಂವ್ಕ್ ತೊ ಪ್ರಯತ್ನ್ ಕರುಂದಿ. ಷೇಕ್ ಆಲಿಕ್‍ಯೀ ತೊಚ್ ಲಗಾಮ್ ಸಡಿಳ್ ಆಮಿ ಸೊಡ್ತಾಂವ್.”

ಟಿಪ್ಪುನ್ ಅಶೆಂ ಮ್ಹಳ್ಳ್ಯಾನ್ ಸರ್ದಾರ್ ಸಿಮಾಂವ್ಚ್ಯಾ ಮತಿಂತ್ ಚಡಿತ್ ಏಕ್ ಸಮಸ್ಯಾ ಉದೆಲ್ಲೆಪರಿಂ ಜಾಲೆಂ. ಷೇಕ್ ಆಲಿ, ತಲ್ವಾರಿಚ್ಯಾ ಪ್ರಯೋಗಾಂತ್ ಆಯ್ಲೆವಾರ್ ಶಿರಿಂಗಪಟ್ಟಣಾಂತ್ ಇಲ್ಲೆಂ ಚಡ್ ನಾಂವ್ ವ್ಹರುಂಕ್ ಆನಿ ಆಪ್ಲಿ ಶ್ಯಾಥಿ ದಾಕಂವ್ಚ್ಯಾ ಆತುರಾಯೆನ್ ಹಾತ್ ಖೊರ್ಜುಂಚೊ ಗ್ರಾಯ್ಕ್ ಜಾವ್ನಾಸಾ ಮ್ಹಣ್ ತಾಣೆಂ ಆಯ್ಕಲ್ಲೆಂ.

“ಆತಾಂ ತುವೆಂ ವಚ್ಯೆತ್” ಮ್ಹಣಾಲೊ ಟಿಪ್ಪು ಸುಲ್ತಾನ್. “ಆಜ್ ಆಯಿಲ್ಲೆಪರಿಂಚ್ ಫಾಲ್ಯಾಂ ರಾವ್ಳೆರಾಕ್ ಯೇ.”

ಸರ್ದಾರ್ ಸಿಮಾಂವ್ ಭಾಯ್ರ್ ಆಯ್ಲೊ. ತಾಚ್ಯಾ ಮತಿಂತ್, ತ್ಯಾ ದಿಸಾಚ್ಯಾ ಉಲೊಣ್ಯಾ ವರ್ವಿಂ ಕಾಂಯ್ ಸಮಾಧಾನ್ ಜಾಂವ್ಕ್ ನಾ. ಟಿಪ್ಪು ಸುಲ್ತಾನಾನ್ ತಿತ್ಲ್ಯೊ ಸರ್ವ್ ಗಜಾಲಿ ಕಾಡ್ಲ್ಯೊ ಜಾಲ್ಯಾರೀ, ಮಂಗ್ಳುರ್ಚ್ಯೊ ಆನಿ ಪ್ರತ್ಯೇಕ್ ಜಾವ್ನ್ ಬಂಟ್ವಾಳ್ಚ್ಯೊ ಖಬ್ರೊ ಕಾಂಯ್ ಉಲಂವ್ಕ್ ನಾತ್‍ಲ್ಲ್ಯಾ ವರ್ವಿಂ ತೊ ಚಿಕ್ಕೆ ನಿರಾಸ್ಲೊ ಮ್ಹಣ್ಯೆತ್. ತ್ಯೊ ಕಾಂಯ್ ಖಬ್ರೊ ಆನಿ ತ್ಯಾ ವಾಟೆನ್ ಕಾಂಯ್ ನವೆ ಪಾಸ್ ಆಸ್ಲ್ಯಾರ್ ಸಮ್ಜಜಾಯ್ ಮ್ಹಣ್ ತೊ ಆಶೆತಾಲೊ; ತೆಂ ತ್ಯಾ ದಿಸಾ ಪ್ರಯೋಜನ್ ಜಾಂವ್ಕ್ ನಾ. ತಶೆಂ ಆಸ್ತಾಂ, ತ್ಯಾ ರಾತಿಂ, ಶಿಪಾಯ್ ಸಗ್ಳೆ ನಿವೃತ್ತ್ ಜಾಲ್ಯಾ ಉಪ್ರಾಂತ್, ಮೈದಾನಾರ್ ವಾರೆಂ ಘೆಂವ್ಚ್ಯಾ ನಿಬಾನ್ ಭಾಯ್ರ್ ಆಯಿಲ್ಲೊ ಸರ್ದಾರ್ ಯೂಸುಫ್ ಆಲಿ, ಯೇವ್ನ್ ಸರ್ದಾರ್ ಸಿಮಾಂವ್ಕ್ ಭೆಟ್ಲೊ.

ಮಿತ್ರ್ ದೊಗೀ ಬಸೊನ್ ಉಲಯ್ಲೆ.

ವಿಶೇಸ್ ಕಾಂಯ್ ಘಡೊಂಕ್ ನಾತ್‍ಲ್ಲೆಂ. ಪುಣ್ ಯೂಸುಫ್ ಆಲಿನ್ ಸಾಂಗ್‍ಲ್ಲ್ಯಾ ಪರ್ಮಾಣೆಂ, ತಾಣಿಂ ದೊಗಾಂಯ್ನೀ ಜಾತಾ ತಿತ್ಲ್ಯಾ ಪಯ್ಸಾ ಪಯ್ಸ್ ಆನಿ ವೆವೆಗ್ಳೆ ಆಸಾ ಸಾರ್ಕೆಂ ವೇಳ್ ಚುಕವ್ನ್ ತಾಂಕಾಂ ಟಿಪ್ಪು ಆಪ್ಲ್ಯಾ ಭೆಟೆಕ್ ಆಪಯ್ತಾಲೊ ಮ್ಹಣ್ ಸಮ್ಜಲೆಂ. ತಾಂಚ್ಯಾ ಚಲನಾಂಚೆರ್ ದೊಳೊ ದವರುಂಕ್ ಗೂಢಚಾರ್ ಆಸ್ಯೆತ್ ಮ್ಹಳ್ಳೊ ದುಬಾವ್‍ಯೀ ಥಿರ್ ಜಾಲೊ.

“ತಾಂತುಂ ಭಿಯೆಂವ್ಚಿ ಗರ್ಜ್ ನಾ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಆಮಿ ಭಿಯೆಲ್ಯಾಂವ್ ಕೊಣ್ಣಾ ಮ್ಹಳ್ಳ್ಯಾ ದುಬಾವಾಕ್ ಇಡೆಂ ದಿಲ್ಯಾರ್, ಆಮ್ಚಿ ಕಾಂಯ್ ತರೀ ಚೂಕ್ ಆಸ್ಯೆತ್ ಮ್ಹಳ್ಳ್ಯಾ ದುಬಾವಾಕ್‍ಯೀ ಇಡೆಂ ದಿಲ್ಲೆಪರಿಂ ಜಾತಾ. ಶಿವಾಯ್…”

“ಶಿವಾಯ್?”

“ಶಿವಾಯ್, ಬಾದಶಹಾನ್ ಸಾಂಗ್‍ಲ್ಲ್ಯಾ ಪರ್ಮಾಣೆಂ, ಷೇಕ್ ಆಲಿ ಆನಿ ವೆಂಕಪ್ಪಯ್ಯಾ, ಆಮ್ಚೆರ್ ಕಾಂಯ್ ತಿತ್ಲ್ಯಾ ಮೊಗಾರ್ ನಾಂತ್. ಆಮಿ ಬಾದಶಹಾಕ್ ತಿತ್ಲೆ ಲಾಗಿಂ ಮ್ಹಳ್ಳೆಂ ಪಳೆಂವ್ಕ್ ತಾಂಕಾಂ ಕಷ್ಟ್ ಮಾರ್ತಾತ್.”

“ತರ್ ಕಾಂಯ್…”

“ವ್ಹಯ್. ಬಾದಶಹಾಕ್ ಕಳಿತ್ ನಾಸ್ತಾಂ, ಆಮ್ಚೆರ್ ದೊಳೊಸೊ ದವರ್ಚ್ಯಾ ಖಾತಿರ್ ಗೂಢಚಾರಿಂಕ್ ಉಪಯೋಗ್ಸುಂಚಿ ಮಾಂಡ್ಣಿ ತಾಂಚಿಚ್ ಜಾವ್ಯೆತ್. ಪುಣ್ ಭಿಯೆಂವ್ಚಿ ಗರ್ಜ್ ನಾ. ಆಮ್ಚ್ಯಾ ಶಿಮ್ಟೆರ್ ಪಾಯ್ ದವರ್ಲ್ಯಾರ್ ತಾಂಚಿ ಹಾಂವೆಂ ಖಬರ್ ಘೆವ್ಯೆತ್ ಮ್ಹಣ್ ಬಾದಶಹಾನ್ ಕಬ್ಲಾತ್ ದಿಲ್ಯಾ.”

“ಬರೆಂಚ್” ಮ್ಹಣಾಲೊ ಯೂಸುಫ್ ಆಲಿ. “ಜಾಲ್ಯಾರೀ, ಆಮಿ ಚತ್ರಾಯೆನ್ ಆಸ್ಚೆಂ ಬರೆಂ. ಬಾದಶಹಾನ್ ಮ್ಹಾಕಾ ದೋನ್ ದೀಸ್ ದೊನ್ಪಾರಾಂ ಉಪ್ರಾಂತ್ ಆಪವ್ನ್, ಆಮಿ ದಕ್ಷಿಣಾಕ್ ಪಾವ್‍ಲ್ಲಿ ಆನಿ ಪಾಟಿಂ ಆಯಿಲ್ಲಿ ರೀತ್ ಆನಿ ಥಂಯ್ಸರ್ ಘಡ್‍ಲ್ಲ್ಯೊ ಗಜಾಲಿ ವಿಚಾರ್ನ್ ಘೆತ್ಲ್ಯೊ.”

“ಆನಿ ತುವೆಂ ಸರ್ವ್ ಸಾಂಗ್ಲೆಂಯ್?”

“ವ್ಹಯ್ – ಪುಣ್ ರಹೀಮ್ ಕೋಣ್ ಮ್ಹಣ್, ಮ್ಹಳ್ಳ್ಯಾಕ್, ತೊ ಹಾಂಗಾ ಥಾವ್ನ್ ಸೈನ್ ತ್ಯಾಗ್ ಕರ್ನ್ ಚುಕಾರ್ ಮಾರ್‌ಲ್ಲೊ, ವಾ, ತುಜೊ ಜೀವ್ ಕಾಡುಂಕ್ ಪ್ರಯತ್ನ್ ಕೆಲ್ಲೊ ಗ್ರಾಯ್ಕ್ ಮ್ಹಣ್ ಮಾತ್ರ್ ಸಾಂಗೊಂಕ್ ನಾ.”

“ಬರೆಂ ಕೆಲೆಂಯ್.”

“ಪುಣ್ ಹಾಚೊ ಪರಿಣಾಮ್? ಹಾಂವೆಂ ಸಾಂಗ್‍ಲ್ಲ್ಯಾಂತ್ ಸತ್ ಕಿತ್ಲೆಂ ಆಸಾ ಮ್ಹಳ್ಳೆಂ ಸಾರ್ಕೆಂ ಸಮ್ಜೊಂಚ್ಯಾ ಖಾತಿರ್ ಹೆರ್ ಗೂಢಚಾರಿಂಕ್ ತೊ ಧಾಡ್ತಲೊ ಮ್ಹಳ್ಳೆಂ ನೀಜ್.”

“ಧಾಡುಂದಿ. ಪುಣ್ ಬೇಗಮೆಚ್ಯಾ ರಾವ್ಳೆರಾಂತ್ ಆಸ್‍ಲ್ಲ್ಯಾ ಕ್ರಿಸ್ತಾಂವಾಂಚಿ ಖಬರ್ ತುವೆಂ…”

“ಸಾಂಗೊಂಕ್ ನಾ…”

“ತರ್ ಆಮ್ಕಾಂ ಭಿರಾಂತ್ ನಾ, ಭಾಯೀ.”

“ಜಾಲ್ಯಾರೀ, ತುವೆಂ ಚಡ್ ಚತ್ರಾಯೆನ್ ಆಸ್ಚೆಂ ಬರೆಂ. ಪಾಟ್ಲ್ಯಾ ಥೊಡ್ಯಾ ಮಹಿನ್ಯಾಂ ಹೆವ್ಶಿನ್ ಕೆನರಾ ಪ್ರದೇಶಾಂತ್ ಘಡ್‍ಲ್ಲ್ಯಾ ಸಬಾರ್ ಘಟನಾಂನಿ ಜಾಯ್ತೆ ವಿಷಯ್ ಅಸ್ಪಷ್ಟ್ ಆಸಾತ್ – ತೆ ಜರೂರ್ ನಿತಳ್ ಜಾಯ್ಜಯ್ ಮ್ಹಣ್ತಾ ಬಾದಶಹಾ. ಬಂದಡೆ ವೆಳಾರ್, ತಾಚ್ಯಾ ಫರ್ಮಾಣಾ ಖಾಲ್‍ಚ್ ಸ್ವತಂತ್ರ್ ಉರ್‌ಲ್ಲ್ಯಾ ಘರಾಣ್ಯಾಂಚೆಂ ಆನಿ ವ್ಯಕ್ತಿಂಚೆಂ ತಪಾಸಣ್ ಕರುಂಕ್ ಪರತ್ ಹುಕುಮ್ ದಿಂವ್ಚಿ ಗರ್ಜ್ ಪಡ್ಯೆತ್ ಮ್ಹಳ್ಳೊ ಹಿಶಾರೊ ತಾಣೆಂ ದಿಲಾ.”

ಹೆಂ ಆಯ್ಕೊನ್ ಸರ್ದಾರ್ ಸಿಮಾಂವ್ಚೊ ಪಯ್ಲೆಂಚೊ ದುಬಾವ್ ಆನಿಕೀ ಥಿರ್ ಜಾಲೊ. ಪುರ್ತಿ ಖಬರ್ ನಾಸ್ತಾಂ, ಆನಿ ಕಳಿತ್ ಜಾಲ್ಯಾರೀ ಕಿತೆಂ ತರೀ ಕರುಂಕ್ ಅಸಹಾಯಕ್ ಜಾಲ್ಲ್ಯಾಕ್ ತೊ ಚುರ್ಚುರ್ಲೊ.

“ಕಶೆಂಯೀ ಜಾಂವ್” ಮ್ಹಳೆಂ ತಾಣೆಂ ಆಪ್ಲಿಂ ಚಿಂತ್ನಾಂ ಲಿಪವ್ನ್. “ತ್ಯಾ ಪಾಂಪಾಳ್ಯಾಕ್ ಪಾವ್ತಾನಾ ಆಮಿ ಉತರ್ಯೆತ್. ತೊಪಾಸಿ ದಾಲ್ಮೇದಾಕ್ ಹಾಡುಂಕ್, ಬಾದಶಹಾಚ್ಯಾ ಹುಕ್ಮೆ ಖಾಲ್ ಮ್ಹಜ್ಯಾಚ್ ಚವ್ಗಾಂ ಸವಾರಾಂಕ್ ಹಾಂವೆಂ ಧಾಡ್ಲ್ಯಾತ್. ಕಿತೆಂ ಜಾತಾ ಪಳೆಯಾಂ.”

“ಜಾಂವ್ಚೆಂ ಕಿತೆಂ!” ಮ್ಹಣಾಲೊ ಯೂಸುಫ್ ಆಲಿ. “ತ್ಯಾ ತೊಪಾಸಿನ್ ಶಾಬಿತಾಯೆನ್ ಹಾಂಗಾ ಪಾಂವ್ಚಿ ಖಾತ್ರಿ ಥಿರ್ ಜಾಲಿ. ಆನಿ ತೊ ಹಾಂಗಾ ಪಾವ್ಲ್ಯಾ ಉಪ್ರಾಂತ್ ತಾಚೆಂ ತೋಂಡ್ ಸೊಡವ್ನ್ ಕಿತೆಂ ಸರ್ವ್ ಕಿತಾಫತ್ ಜಾಂವ್ಕ್ ಆಸಾ ಮ್ಹಳ್ಳೆಂ ಅಲ್ಲಾಚ್ ಜಾಣಾಂ!”

“ಎದೊಳ್ ಆಮ್ಚ್ಯಾ ಅಲ್ಲಾನ್ ಆಮ್ಕಾಂ ರಾಕ್ಲಾಂ. ತರ್, ಫುಡೆಂಯೀ ತೊ ಆಮ್ಕಾಂ ರಾಕ್ತಲೊ” ಸರ್ದಾರ್ ಸಿಮಾಂವ್ನ್ ಧಯ್ರ್ ದಿಲೆಂ.

ಉಪ್ರಾಂತ್ ತೆ ವೆಗ್ಳೆ ಜಾಲೆ.

ದುಸ್ರೊ ದೀಸ್‍ಯೀ ತಸೊಚ್ ಪಾಶಾರ್ ಜಾಲೊ. ಸರ್ದಾರ್ ಸಿಮಾಂವ್ ಬಾದಶಹಾಕ್ ಭೆಟ್‍ಲ್ಲ್ಯಾ ವೆಳಾರ್, ಝುಜಾಚಿ ತಯಾರಾಯ್ ಆನಿ ಹೆರ್ ರಾಟಾವಳಿಚ್ ತೆ ಉಲಯ್ಲೆ ಜಾಲ್ಲ್ಯಾನ್, ಸರ್ದಾರ್ ಸಿಮಾಂವ್ನ್ ಅಪೇಕ್ಷಿಲ್ಲೆಂ ಕಾಂಯ್ ತಾಕಾ ಆಯ್ಕೊಂಕ್ ಮೆಳೊಂಕ್ ನಾ. ಏಕ್ ಗಜಾಲ್ ಮಾತ್ರ್ ಉಗ್ತಿ ಜಾಲಿ:

“ಹ್ಯಾಚ್ ಹಫ್ತ್ಯಾಚ್ಯಾ ಆಖೇರಿಕ್ ಆಮ್ಚಿಂ ಸಯ್ನಾಂ ಭಾಯ್ರ್ ಕಾಡುನ್, ಕೊಡಗಾಚ್ಯಾ ಗಡಿಕ್ ಪಯ್ಣಾಕ್ ಧಾಡಿಜಾಯ್” ಮ್ಹಣಾಲೊ ಟಿಪ್ಪು ಸುಲ್ತಾನ್. “ಆಜ್‍ಚ್ ಸಾಂಜೆರ್ ಆಮ್ಚೆ ಭಕ್ಷಿ, ಸುಫೆದಾರ್ ಆನಿ ಸರ್ದಾರ್ ಮೆಳೊಂದಿತ್. ತವಳ್ ತಾಂಚಿ ಹುಕುಮ್ ಆಮಿ ದಿತೆಲ್ಯಾಂವ್.”

“ಬಾದಶಹಾಚಿ ಖುಶಿ!”

“ಆನಿ ಹ್ಯಾ ಕಾರ್ಯಾ ವೆಳಾರ್ ಖುದ್ ಆಮಿಂಚ್ ಹಾಜರ್ ಜಾಂವ್ಕ್ ಚಿಂತ್ಲಾಂ. ಆಮ್ಚ್ಯೊ ಪಂದ್ರಾ ಕಂಪ್ಣ್ಯೊ ತೀನ್ ವಿಭಾಗಾಂನಿ ವಾಂಟೊನ್ ತಯಾರ್ ಜಾಂವ್ದಿತ್. ಮಧ್ಲ್ಯಾ ವಿಭಾಗಾಂತ್ ಆಮಿ ಆಸ್ತೆಲ್ಯಾಂವ್. ತುಜ್ಯಾ ಕಂಪ್ಣೆನ್ ಆಮ್ಚೆ ಅಂಗರಕ್ಷಕ್ ಜಾವ್ನ್ ತುಜ್ಯಾ ಖಾಲ್ ಯೇಜಾಯ್.”

“ಜೀ ಹುಜೂರ್!”

“ಸರ್ದಾರ್ ಯೂಸುಫ್ ಆಲಿಚಿ ಕಂಪ್ಣಿ, ಆನಿ ಆಮ್ಚಿಂ ಹೆರ್ ಸೈನಾಂ, ಸಜ್ಜ್ ಜಾವ್ನ್ ಪಟ್ಟಣಾಂತ್ ಆಸೊಂದಿತ್. ಹೈದರ್ ನಗರಾಕ್‍ಯೀ ಫಾವೊ ತಿ ಹುಕುಮ್ ಆಮಿ ಸಾಂಜೆರ್ ದಿತೆಲ್ಯಾಂವ್.”

“ಜೀ ಹುಜೂರ್!” ಸರ್ದಾರ್ ಸಿಮಾಂವ್ ಯಂತ್ರಾಪರಿಂ ಜಾಪ್ ದಿತಾಲೊ, ಪುಣ್ ತಾಚೆಂ ಮನ್ ದುಸ್ರೆ ಕಡೆನ್‍ಂಚ್ ಆಸ್‍ಲ್ಲೆಂ. ಖಂಯ್ಚ್ಯಾ ವೆಳಾರ್ ಥೊಡೆಂ ಸ್ವತಂತ್ರ್ ಕಾಮ್ ಹಾತಿಂ ಘೆಂವ್ಕ್ ಆಶೆತಾಲೊ, ತ್ಯಾಚ್ ಆಶೆಚಿ ಥಡಾ ಬಾಂಧುನ್, ಟಿಪ್ಪುಚ್ಯಾ ನಿಚೆವಾ ವರ್ವಿಂ ತೊ ಶಿರ್ಕಲ್ಲೊ.

ಜಾಂವ್ಚೆಂ ಸರ್ವ್ ಜಾಂವ್ಕ್ ಆನಿ ಘಡ್ಚೆಂ ಸರ್ವ್ ಘಡೊಂಕ್ ಆಸ್‍ಲ್ಲೆಂ.

ಟಿಪ್ಪುಚ್ಯಾ ಅಪೇಕ್ಷೆ ಪ್ರಕಾರ್ ಸರ್ವ್ ಭಕ್ಷಿ, ಸುಫೆದಾರ್ ಆನಿ ಸರ್ದಾರ್ ತ್ಯಾಚ್ ಸಾಂಜೆರ್ ರಾವ್ಳೆರಾಚ್ಯಾ ಬಗ್ಲೆನ್ ಆಸ್ಚ್ಯಾ ಖಳಾಂತ್ ಜಮ್ಲೆ.

ತುರ್ಬೆಂತ್ ವ್ಹಾಜ್ಲಿ. ಬಾದಶಹಾ ಆಪ್ಲ್ಯಾ ಅಂಗರಕ್ಷಕಾಂ ಆನಿ ಸರ್ದಾರ್ ಯೂಸುಫ್ ಆನಿ ದಿವಾನ್ ಪೂರ್ಣಯ್ಯ ಸಾಂಗಾತಾ ಯೇವ್ನ್ ಪಾವ್ಲೊ.

ಸಾಸಂವ್ ಪಡ್ಲ್ಯಾರ್ ಆಯ್ಕತ್ ಮ್ಹಣ್ಚೆ ತಿತ್ಲ್ಯಾ ತ್ಯಾ ನಿಶ್ಶಬ್ದ್ ವಾತಾವರಣಾಂತ್, ಬಾದಶಹಾನ್, ಉಪ್ರಾಂತ್ಲ್ಯಾ ದೋನ್ ದಿಸಾಂನಿ ಆಪ್ಣೆಂ ಕೊಡಗಾಚ್ಯಾ ಗಡಿ ಪ್ರದೇಶಾಚೆರ್ ಆಕ್ರಮಣ್ ಚಲಂವ್ಚೊ ನಿರ್ಧಾರ್ ಫಾಯ್ಸ್ ಕೆಲೊ. ತ್ಯಾ ಪ್ರಕಟಣಾ ವರ್ವಿಂ ಹಾಜರ್ ಆಸ್‍ಲ್ಲ್ಯಾಂ ಮಧೆಂ ಏಕ್ ಖಜ್ನೊ ಫುಟ್‍ಲ್ಲೆಪರಿಂ ಆಂಗ್ ಕಾಡಿ ಸಾರ್ಕೆಂ ಪ್ರತಿಕ್ರಿಯಾ ಜಾಲಿ.

ಉಪ್ರಾಂತ್ ಬಾದಶಹಾನ್ ಫುಡ್ಲೊ ವಿವರ್ ದಿಲೊ:

“ಲಡಾಯೆಕ್ ಭಾಯ್ರ್ ಸರ್ಚ್ಯೊ ಕಂಪ್ಣ್ಯೊ ಪಂದ್ರಾ – ಝಜಾರಿ ದೇಡ್ ಹಜಾರ್; ಪನ್ನಾಸ್ ಹಸ್ತಿ, ತಿನ್ಶಿಂ ಘೊಡೆ ಆನಿ ಪನ್ನಾಸ್ ದೊಡ್ತ್ಯಾ ಬೊಯ್ಲಾಂಚ್ಯೊ ಗಾಡಿಯೊ, ಆಹಾರಾಚ್ಯೊ ಗಾಡಿಯೊ ಆನಿ ಪಾಂಚ್ ಧಾಕ್ಟ್ಯೊ ನಾಳಿ.”

ಫಕತ್ ಗಡಿಚೆರ್ ದಾಡ್ ಜಾಲ್ಲ್ಯಾನ್, ಹಿ, ಲ್ಹಾನ್ ಪುಣ್ ಬಳಾಧಿಕ್ ಫವ್ಜ್ ಪಂದ್ರಾ ಬಾವೀಸ್ ದಿಸಾಂಕ್ ಪುಣೀ ಪಟ್ಟಣಾ ಥಾವ್ನ್ ಭಾಯ್ರ್ ಆಸ್ತೆಲಿ ಮ್ಹಳ್ಳೆಂ ಸ್ಪಷ್ಟ್ ಜಾಲೆಂ.

ಪುಣ್ ಕೊಡಗಾಚ್ಯಾ ವೀರ್ ಜವಾನಾಂಕ್ ಹ್ಯಾ ದಾಡೆಚಿ ಖಬರ್ ಪಯ್ಲಿಚ್ ಮೆಳತ್ ಜಾಲ್ಯಾರ್, ಟಿಪ್ಪುನ್ ಚಿಂತ್‍ಲ್ಲೆಂ ಕಾಮ್ ತಿತ್ಲೆಂ ಸುಲಭ್ ಜಾಂವ್ಚೆಂ ನಾ ಮ್ಹಣ್ ಸರ್ದಾರ್ ಸಿಮಾಂವ್ನ್ ದುಬಾವ್ ಉಚಾರ್ಲೊ.

“ಧಯ್ರಾಕ್ ನಾಂವಾಡ್‍ಲ್ಲೊ ಸರ್ದಾರ್! ಹ್ಹ-ಹ್ಹಾ!” ಮ್ಹಣಾಲೊ ಷೇಕ್ ಆಲಿ. “ಆತಾಂ ಲಡಾಯೆಚೆಂ ಚಿಲ್ಲರ್ ಸವಾಲ್ ಯೆತಾನಾ ಭಿಯೆತಾ!”

“ಚಿಂತ್ಚಿ ಗರ್ಜ್ ನಾ” ಮ್ಹಣಾಲೊ ಟಿಪ್ಪು ಸುಲ್ತಾನ್. “ತುಮಿ ಸಗ್ಳೆ ಆಮ್ಚ್ಯಾ ಸಾಂಗಾತಾ ಆಸ್ತೆಲ್ಯಾತ್ – ಸಕ್ಡಾಂಚ್ಯಾ ಧಯ್ರಾಚಿ ಪರೀಕ್ಷಾ ಜಾತೆಲಿ.”

ಹ್ಯಾ ವರ್ವಿಂ, ಷೇಕ್ ಆಲಿ ಆನಿ ವೆಂಕಪ್ಪಯ್ಯಾಯೀ ಠೊಲಿಯೆಂತ್ ಆಸ್ತೆಲೆ ಮ್ಹಳ್ಳೆಂ ಸ್ಪಷ್ಟ್ ಜಾಲೆಂ.

ತೊ ದೀಸ್ ಬ್ರೇಸ್ತಾರ್. ಸನ್ವಾರಾ ದೀಸ್ ಭಾಯ್ರ್ ಸರೊಂಕ್ ನಿರ್ಧಾರ್ ಕೆಲ್ಲೊ ಜಾಲ್ಲೆ ವರ್ವಿಂ, ಕೊಡಗಾಚ್ಯಾ ಲಡಾಯೆಕ್ ವಚೊಂಕ್ ಆಸ್‍ಲ್ಲ್ಯಾ ಸರ್ವ್ ಶಿಪಾಯಾಂಕ್ ಆನಿ ಮುಖೆಲಿಂಕ್ ತೆದೊಳ್ ಪರ್ಯಾಂತ್ ಜಾಯ್ ತಸೊ ವಿಶೆವ್ ಘೆಂವ್ಕ್ ವಾ ಮಜಾ ಮಾರುಂಕ್ ಸುಟ್ಕಾ ಪಾಚಾರ್ಲಿ.

ಸಭಾ ಫಾಸಾಳ್ಳ್ಯಾ ಉಪ್ರಾಂತ್ ಸರ್ದಾರ್ ಸಿಮಾಂವ್, ಆಪ್ಲ್ಯಾ ಬಿಡಾರಾಕ್ ಗೆಲೊ. ಲಡಾಯೆಕ್ ಭಾಯ್ರ್ ಸರೊನ್ ಗೆಲ್ಯಾ ಉಪ್ರಾಂತ್, ಪಟ್ಟಣಾಂತ್, ಸರ್ದಾರ್ ಯೂಸುಫ್ ಆಲಿ ಆಸ್ತಲೊ. ಕಸಲ್ಯಾಯೀ ನಿಬಾನ್, ಆಯಿಲ್ಲ್ಯಾ ವಾ ವೆಚ್ಯಾ ತಾರ್ ಸವಾರಾಂ ಕಡೆನ್ ಧಾಡ್ನ್ ಬಂಟ್ವಳಾಕ್ ಪಾವಂವ್ಚ್ಯಾ ಖಾತಿರ್, ಆಪ್ಣೆಂ ಲಡಾಯೆಕ್ ವೆಚಿ ಖಬರ್, ಆನಿ ಘೆಂವ್ಕ್ ಆಸ್‍ಲ್ಲ್ಯಾ ಚತ್ರಾಯೆಚೊ ವಿವರ್ ದೀವ್ನ್ ತಾಣೆಂ ಏಕ್ ಪತ್ರ್ ಬರವ್ನ್ ತಯಾರ್ ಕೆಲೆಂ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel