ಭರತನಾಟ್ಯ ಮ್ಯಾರಥಾನ್: ದಾಖ್ಲೊ ರಚ್‍ಲ್ಲ್ಯಾ ರೆಮೋನಾ ಪಿರೇರಾಕ್ ರೋಹನ್ ಕಾರ್ಪೊರೇಶನ್ ಥಾವ್ನ್ ಸನ್ಮಾನ್
Posted on : August 2, 2025 at 4:01 PM
ಮಂಗ್ಳುರ್: ಸಾತ್ ದೀಸ್, 170 ಘಂಟೆ ನಿರಂತರ್ ಭರತನಾಟ್ಯ ಪ್ರದರ್ಶನ್ ಕರ್ನ್ ‘ಗೋಲ್ಡನ್ ಬುಕ್ ಆಫ್ ರೆಕಾರ್ಡ್ಸ್’ ದಾಖ್ಲೊ ರಚ್‍ಲ್ಲೆಂ ಅಮೋಘ್ ಸಾಧನ್ ಕೆಲ್ಲ್ಯಾ ಸಾಂ ಲುವಿಸ್ ವಿಶ್ವವಿದ್ಯಾಲಯಾಚೆಂ ವಿದ್ಯಾರ್ಥಿಣ್ ರೆಮೋನಾ ಇವೆಟ್ ಪಿರೇರಾಕ್ ಮಂಗ್ಳುರ್ಚೊ ಪ್ರತಿಷ್ಠಿತ್ ಉದ್ಯಮ್ ಸಂಸ್ಥೊ ರೋಹನ್ ಕಾರ್ಪೋರೇಶನ್ ತರ್ಫೆನ್ ಸನ್ಮಾನ್ ಕೆಲೆಂ.
ಇಜಯ್ ಮುಖ್ಯ್ ರಸ್ತ್ಯಾರ್ ಆಸ್ಚ್ಯಾ ರೋಹನ್ ಸಿಟಿಂತ್ ಆಸ್ಚ್ಯಾ ಸಂಸ್ಥ್ಯಾಚ್ಯಾ ದಫ್ತರಾಂತ್ ಹೆಂ ಸನ್ಮಾನ್ ಕಾರ್ಯೆಂ ಚಲ್ಲೆಂ. ಸಂಸ್ಥ್ಯಾಚೊ ಪ್ರವರ್ತಕ್ ಡೊ. ರೋಹನ್ ಮೊಂತೇರೊನ್ ರೆಮೋನಾಕ್ ಪ್ರಶಸ್ತಿ ಪತ್ರ್ ಆನಿ ಸ್ಮರಣಿಕಾ ದೀವ್ನ್ ಗೌರವ್ ಕೆಲೊ.
ಸ್ಥಳೀಯ್ ತಾಲೆಂತಾಂಕ್ ಪ್ರೋತ್ಸಾಹ್ ದಿಂವ್ಚ್ಯಾ ಆನಿ ಹಾಂಗಾಚಿ ಕಲಾ, ಸಂಸ್ಕೃತಿ ಜಾಗತಿಕ್ ಮಟ್ಟಾರ್ ಉಜ್ವಾಡಾಕ್ ಹಾಡ್ಚ್ಯಾ ಉದ್ದೇಶಾನ್ ಹೆಂ ಸನ್ಮಾನ್ ಕಾರ್ಯೆಂ ಆಸಾ ಕೆಲ್ಲೆಂ. “ರೆಮೋನಾಚ್ಯಾ ಸಾಧನಾ ವರ್ವಿಂ ಮಂಗ್ಳುರಾಕ್ ಮಾತ್ರ್ ನ್ಹಯ್, ಸಗ್ಳ್ಯಾ ದೇಶಾಕ್ ಮಾನ್ ಲಾಭ್ಲಾ. ಯುವಜಣಾಂಕ್ ತೆಂ ಸ್ಫೂರ್ತಿ” ಮ್ಹಣಾಲೊ ಡೊ. ರೋಹನ್. ಮುಖ್ಲ್ಯಾ ದಿಸಾಂನಿಯೀ ಅಸಲೆಂ ಸಾಧನ್ ಕೆಲ್ಲ್ಯಾ ಪ್ರತಿಭೆಂಕ್ ಹ್ಯಾಚ್ ವೆದಿರ್ ಸನ್ಮಾನ್ ಕರ್ತಾಂವ್ ಮ್ಹಣ್ ಭಾಸಾಯ್ಲೆಂ ಮೊಂತೇರೊನ್.
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
