ಕಥೊಲಿಕ್ ಉದ್ಯಮಿಂಕ್ ‘ರಚನಾ’ ತರ್ಫೆನ್ ಆರ್ಟಿಫೀಶಿಯಲ್ ಇಂಟೆಲಿಜೆನ್ಸ್ ವಿಶಿಂ ತರ್ಬೆತಿ
Posted on : March 30, 2026 at 5:35 PM
ಮಂಗ್ಳುರ್, ಮಾರ್ಚ್ 28: ಕಥೊಲಿಕ್ ಚೇಂಬರ್ ಆಫ್ ಕಾಮರ್ಸ್ & ಇಂಡಸ್ಟ್ರಿ ‘ರಚನಾ’ ಹಾಚ್ಯಾ ಮುಖೇಲ್ಪಣಾರ್ ಕೃತಕ್ ಬುದ್ವಂತ್ಕಾಯ್ (Artificial Intelligence) ವಿಶಿಂ ದಿಯೆಸೆಜ್ ಮಟ್ಟಾಚೆಂ ತರ್ಬೆತಿ ಕಾರ್ಯಕ್ರಮ್ 28 ಮಾರ್ಚ್ 2026ವೆರ್, ಸನ್ವಾರಾ, ಬೆಂದೂರ್ಚ್ಯಾ ಸಾಂ. ಸೆಬೆಸ್ತ್ಯಾಂವ್ ಪ್ಯಾರಿಶ್ ಹೊಲಾಂತ್ ಚಲ್ಲೆಂ. ಕ್ಯಾಥೊಲಿಕ್ ವ್ಯಾಪಾರಿ ಸಮುದಾಯಾ ಥಾವ್ನ್ ಹ್ಯಾ ಕಾರ್ಯಕ್ರಮಾಕ್ ಬರಿ ಪ್ರತಿಕ್ರಿಯಾ ಮೆಳ್ಳಿ.
ಆಯ್ಚ್ಯಾ ಡಿಜಿಟಲ್ ಆರ್ಥಿಕತೆಂತ್ ಎಐ-ಚಾಲಿತ್ ಬದ್ಲಾವಣ್ ಆನಿ ತಾಚ್ಯಾ ಪ್ರಾಮುಖ್ಯತೆ ವಿಶಿಂ ಉದ್ಯಮಿಂಕ್ ಆನಿ ವೃತ್ತಿಪರಾಂಕ್ ಪ್ರಾಯೋಗಿಕ್ ಜಾಣ್ವಾಯ್ ದಿಂವ್ಚೊ ಉದ್ದೇಶ್ ಹ್ಯಾ ಉಪಕ್ರಮಾಚೊ ಜಾವ್ನಾಸ್ಲ್ಲೊ. ಸುಮಾರ್ 100 ಜಣಾಂನಿ ಹ್ಯಾ ಶಿಬಿಲಾಂತ್ ಭಾಗ್ ಘೆತ್ಲ್ಲೊ. ವ್ಯಾಪಾರಾಚ್ಯಾ ವಾಡಾವಳೆ ಖಾತಿರ್ ನವಿಂ ತಂತ್ರಜ್ಞಾನಾಂ ಆಪ್ಣಾಂವ್ಕ್ ತಾಂಚಿ ಆಸಕ್ತ್ ಹ್ಯಾ ಮುಖಾಂತ್ರ್ ಉಜ್ವಾಡಾಕ್ ಆಯ್ಲಿ.
ಸಂಪನ್ಮೂಳ್ ವ್ಯಕ್ತಿಂಚೆ ವಿಚಾರ್:
ಲಿಯೋ ವಿಕ್ಟರ್ ಝಲ್ಕಿ (ಎಐ ತಂತ್ರಜ್ಞ್ ಆನಿ ಸೈಬರ್ ಸೆಕ್ಯುರಿಟಿ ತಜ್ಞ್): ಕೃತಕ್ ಬುದ್ವಂತ್ಕಾಯೆನ್ ವಿವಿದ್ ಉದ್ಯಮಾಂನಿ ಹಾಡ್ಲ್ಲ್ಯಾ ಪರಿವರ್ತನಾ ವಿಶಿಂ ತಾಣೆಂ ಮಾಹೆತ್ ದಿಲಿ. “ಎಐ ಫಕತ್ ಫುಡಾರಾಚಿ ಗಜಾಲ್ ನ್ಹಯ್, ಬಗಾರ್ ಆಧುನಿಕ್ ಉದ್ಯಮಾಂಕ್ ತೆಂ ಏಕ್ ಗರ್ಜೆಚೆಂ ಸಾಧನ್. ಸಂಸ್ಥ್ಯಾಂನಿ ದಿಸಾಚೆಂ ಸದಾಂಚಿಂ ಕಾಮಾಂ ಸಲೀಸ್ ಕರುಂಕ್ ಆನಿ ಮುಖೆಲ್ ನಿರ್ಧಾರ್ ಘೆಂವ್ಕ್ ಎಐ ಮಜತ್ ಕರ್ತಾ” ಮ್ಹಣ್ ತಾಣೆಂ ಸಾಂಗ್ಲೆಂ. ಎಐ ವಾಪರ್ತಾನಾ ಆಸ್ಚ್ಯಾ ಸೈಬರ್ ಸೆಕ್ಯುರಿಟಿಚ್ಯಾ ಅಪಾಯಾಂ ವಿಶಿಂ ಜಾಗೃತಿ ದೀವ್ನ್, ಜವಾಬ್ದಾರಿಯುತ್ ಆನಿ ನೈತಿಕ್ ವಾಪಾರಾ ವಿಶಿಂ ತಾಣೆಂ ಸಮ್ಜಯ್ಲೆಂ.
ಮಾ. ದೊ. ಬಾಪ್ ಸುದೀಪ್ ಪಾವ್ಲ್ (ನಿರ್ದೇಶಕ್, ಸಂದೇಶ ಕಲ್ಚರ್ & ಎಜುಕೇಶನ್ ಫೌಂಡೇಶನ್): ತಾಂತ್ರಿಕ್ ಪ್ರಗತಿಚ್ಯಾ ನೈತಿಕ್ ಆನಿ ಸಾಮಾಜಿಕ್ ಪರಿಣಾಮಾಂ ವಿಶಿಂ ತಾಣೆಂ ಉಲವ್ಪ್ ಕೆಲೆಂ. ಕೃತಕ್ ಬುದ್ವಂತ್ಕಾಯೆಕ್ ಫಕತ್ ಆರ್ಥಿಕ್ ವಾಡಾವಳಿಚೆಂ ಸಾದನ್ ಮ್ಹಣ್ ಲೆಖಿನಾಸ್ತಾಂ, ಸಮುದಾಯಾಚೆಂ ಬರೆಂಪಣ್ ಆನಿ ಸರ್ವಾಂಚಿ ಅಭಿವೃದ್ಧಿ ಕರುಂಚೊ ಹಿ ಏಕ್ ವಾಟ್ ಮ್ಹಣ್ ಪಳೆವ್ಯಾಂ ಮ್ಹಣ್ ತಾಣೆಂ ಉಲೊ ದಿಲೊ. ತಂತ್ರಜ್ಞಾನ್ ವ್ಯಾಪಾರಾಂತ್ ವಾಪರ್ತಾನಾ ಮೌಲ್ಯಾಧಾರಿತ್ ಮುಖೇಲ್ಪಣ್ ಆನಿ ಸಮತೋಲನ್ ಆಸ್ಚೆಂ ಗರ್ಜ್ ಮ್ಹಣ್ ತಾಣೆಂ ಸಾಂಗ್ಲೆಂ.
ಪ್ರಾಯೋಗಿಕ್ ಮಾರ್ಗದರ್ಶನ್ ಆನಿ ಸಂವಾದ್:
ಹ್ಯಾ ಕಾರ್ಯಕ್ರಮಾಂತ್ ಸಂವಾದಾತ್ಮಕ್ (interactive) ಅಧಿವೇಶನಾಂ ಆಸ್ಲ್ಲಿಂ. ಲ್ಹಾನ್ ತಶೆಂ ಮಧ್ಯಮ್ ಉದ್ಯಮಿಂನಿ (SMEs) ಎಐ ಸಾಧನಾಂ ಮಾರ್ಕೆಟಿಂಗ್, ಗ್ರಾಹಕಾಂ ಲಾಗಿಂ ಸಂಪರ್ಕ್ ಆನಿ ಕಾರ್ಯಾಚರಣೆಚ್ಯಾ ದಕ್ಷತೆ ಖಾತಿರ್ ಕಶೆಂ ವಾಪರ್ಚಿಂ ಮ್ಹಣ್ ಪ್ರಾಯೋಗಿಕ್ ಮಾರ್ಗದರ್ಶನ್ ಮೆಳ್ಳೆಂ. ಭಾಗ್ ಘೆತ್ಲ್ಲ್ಯಾಂನಿ ಸಂಪನ್ಮೂಳ್ ವ್ಯಕ್ತಿಂ ಕಡೆನ್ ಸವಾಲಾಂ ವಿಚಾರುನ್, ಸ್ಥಳೀಯ್ ವ್ಯಾಪಾರಾಂತ್ ಆಸ್ಚ್ಯೊ ಸವಾಲಾಂ ಆನಿ ಅವ್ಕಾಸಾಂ ವಿಶಿಂ ಚರ್ಚಾ ಕೆಲಿ.
ರಚನಾ ಅಧ್ಯಕ್ಷಾಚೊ ಸಂದೇಶ್:
“ಸಾಂಪ್ರದಾಯಿಕ್ ವ್ಯಾಪಾರ್ ಮಾದರಿ ಆನಿ ಆಧುನಿಕ್ ತಾಂತ್ರಿಕ್ ಪ್ರಗತಿ ಮಧ್ಲೊ ಅಂತರ್ ಕಾಡ್ಚೊ ಉದ್ದೇಶ್ ಹ್ಯಾ ಉಪಕ್ರಮಾಚೊ ಜಾವ್ನಾಸಾ. ವೆಗಾನ್ ಬದಲ್ಚ್ಯಾ ಹ್ಯಾ ಕಾಳಾರ್ ಪ್ರಸ್ತುತ್ ಉರೊಂಕ್ ಗರ್ಜ್ ಆಸ್ಚಿ ಜಾಣ್ವಾಯ್ ಆನಿ ಕೌಶಲ್ಯಾಂ ದೀವ್ನ್ ಆಮ್ಚ್ಯಾ ಸಮುದಾಯಾಕ್ ಸಬಲೀಕರಣ್ ಕರ್ಚೊ ಆಮ್ಚೊ ಉದ್ದೇಶ್” ಮ್ಹಣ್ ರಚನಾ ಅಧ್ಯಕ್ಷ್ ರೊಯ್ ಕಾಸ್ತೆಲಿನೊನ್ ಸಾಂಗ್ಲೆಂ. ಹೆಂ ತರ್ಬೆತಿ ಸಂಪೂರ್ಣ್ ಫುಂಕ್ಯಾಕ್ ಚಲ್ಲಿ ಆನಿ ಫಕತ್ ಕಥೊಲಿಕ್ ವ್ಯಾಪಾರಿ ಸಮುದಾಯಾಚ್ಯಾ ತಶೆಂ ವೃತ್ತಿಪರಾಂಕ್ ಸೀಮಿತ್ ಆಸ್ಲ್ಲಿ.
ಕಾರ್ಯಕ್ರಮಾಕ್ ಪ್ರಾಯೋಗಿಕ್ ಆಯಾಮ್ ದೀವ್ನ್, ಯುವ ಉದ್ಯಮಿ ಆನಿ ತಂತ್ರಜ್ಞ್ ಅರುಣ್ ಲೋಬೊನ್ ವ್ಯಾಪಾರ್ ಕಾರ್ಯಾಚರಣಾ ಖಾತಿರ್ ಎಐ ಸಾದನಾಂಚೊ ಉಪ್ಯೋಗ್ ದಾಕವ್ನ್ ದಿಲೊ. ಡಿಜಿಟಲ್ ಮಾರ್ಕೆಟಿಂಗ್, ಗ್ರಾಹಕಾಂಚಿ ಭೆಟ್ ಆನಿ ಕಾಮಾಚೆಂ ಆಟೊಮೇಷನ್ – ಹ್ಯಾ ಕ್ಷೇತ್ರಾಂನಿ ಎಐ ಕಶೆಂ ವಾಪರ್ಯೆತ್ ಮ್ಹಣ್ ತಾಣೆಂ ವಿವರ್ ದಿಲೊ.
ಅಧ್ಯಕ್ಷ್ ರೊಯ್ ಕಾಸ್ತೆಲಿನೊನ್ ಸ್ವಾಗತ್ ಕೆಲೊ ಆನಿ ಸಂಪನ್ಮೂಳ್ ವ್ಯಕ್ತಿಂಚಿ ವಳಕ್ ಕರುನ್ ದಿಲಿ. ಕಾರ್ಯದರ್ಶಿ ಆಲ್ರನ್ ರೊಡ್ರಿಗಸಾನ್ ಧನ್ಯವಾದ್ ಪಾಟಯ್ಲೆ.
ಹ್ಯಾ ಶಿಬಿರಾಂತ್ ಕಷ್ಟಾಂಚೆ ವಿಚಾರ್ ಸಲೀಸಾಯೆನ್ ಸಮ್ಜೊಂಕ್ ಶಿಬಿರಾರ್ಥಿಂಕ್ ಸಾಧ್ಯ್ ಜಾಲೆಂ. ಎಐ ವಿಶಿಂ ಭಾಗ್ ಘೆತ್ಲ್ಲ್ಯಾಂಕ್ ಗುಂಡಾಯೆಚಿ ಸಮ್ಜಣಿ ಮೆಳೊನ್ ಹೆಂ ಕಾರ್ಯಕ್ರಮ್ ಯಶಸ್ವೆನ್ ಸಂಪ್ಲೆಂ.
ತಸ್ವೀರ್ಯೊ: ಸ್ಟ್ಯಾನ್ಲಿ ಬಂಟ್ವಾಳ್
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
