ಅಬುಧಾಬಿ: ಕೆಸಿಒ@30 – ಜುಬ್ಲೆವ್ ವರ್ಸಾಚ್ಯಾ ಆಚರಣಾಕ್ ಮಿಸಾ ಮುಖಾಂತ್ರ್ ಚಾಲನ್
Posted on : February 18, 2025 at 11:42 AM
ಅಬುಧಾಬಿ: 1995 ಇಸ್ವೆಂತ್ ಸ್ಥಾಪನ್ ಜಾಲ್ಲ್ಯಾ ಕೊಂಕ್ಣಿ ಸಾಂಸ್ಕೃತಿಕ್ ಸಂಘಟನಾಚೆಂ 30ವ್ಯಾ ವರ್ಸಾಚ್ಯಾ ಜುಬ್ಲೆವಾಚೆಂ ಆಚರಣ್ ಎವ್ಕರಿಸ್ತಿಕ್ ಪವಿತ್ರ್ ಬಲಿದಾನಾ ಮುಖಾಂತ್ರ್ ಸುರು ಜಾಲೆಂ. ಫೆಬ್ರವರಿ 15ವೆರ್ ಸಾಂಜೆಚ್ಯಾ 5.30 ವೊರಾರ್ ಅಬುಧಾಬಿಚ್ಯಾ ಸಾಂ ಜುಜೆ ಕಾಥೆದ್ರಾಲಾಂತ್ ಮೀಸ್ ಭೆಟಯ್ಲೆಂ. ಸಾಂ ಪಾವ್ಲ್ ಇಗರ್ಜೆಚೊ ವಿಗಾರ್ ಬಾ. ಮ್ಯಾಕ್ಸಿಮ್ ಕಾರ್ಡೋಜಾ, ಕಾಪುಚಿನ್ ಮುಖ್ಯ್ ಯಾಜಕ್ ಜಾವ್ನಾಸೊನ್, ಬಿಸ್ಪ್ ಪಾವ್ಲೊ ಮಾರ್ಟ್‍ನೆಲ್ಲಿಚೊ ಕಾರ್ಯದರ್ಶಿ ಬಾ. ಡೆರಿಕ್ ಡಿಸೋಜ, ಕಾಪುಚಿನ್, ಸಾಂ ಜುಜೆ ಕಾಥೆದ್ರಾಲಾಚೊ ಸಹಾಯಕ್ ವಿಗಾರ್ ಬಾ. ಮೇರಿಯನ್ ಮಿರಾಂದಾ, ಕಾಪುಚಿನ್ ಹಾಣಿಂ ಸಹ ಭೆಟವ್ಣಿ ಕೆಲಿ.
ಬಾ. ಡೆರಿಕಾನ್ ಸೆರ್ಮಾಂವ್ ಸಾಂಗ್ಲೊ. ಸಾಂ ಲೂಕಾಚ್ಯಾ (6:20) ‘ಭಾಗಿ ತೆ ದುಬ್ಳೆ, ಸರ್ಗಿಂಚೆಂ ರಾಜ್ ತಾಂಚೆಂ’ ಉತ್ರಾಚೆರ್ ನಿಯಾಳ್ ದಿಲೊ. ಸಾಂ ಜುಜೆ ಕೊಯರ್ ಪಂಗ್ಡಾನ್ ಭಕ್ತಿ ಗೀತಾಂ ಮುಖಾಂತ್ರ್ ಲಿತುರ್ಜಿಂತ್ ಸಾಂಗಾತ್ ದಿಲೊ. ಕೊಂಕ್ಣಿ ಕಥೊಲಿಕ್ ಸಮುದಾಯಾಚ್ಯಾ ಭಾವಾಡ್ತ್ಯಾಂನಿ ಮಿಸಾಂತ್ ವಾಂಟೊ ಘೆತ್ಲೊ.
ಮುಖ್ಲ್ಯಾ ವರ್ಸಾಂತ್ ಜುಬ್ಲೆವಾ ಬಾಬ್ತಿನ್ ಜಾಯ್ತಿಂ ಕಾರ್ಯಿಂ ಯೆವ್ಜಿಲ್ಯಾಂತ್. ಕೆ.ಸಿ.ಒ.ಚ್ಯಾ ಹ್ಯಾ ಕಾರ್ಯಾಂಚೊ ಚಡ್ತಿಕ್ ವಿವರ್ ಫೇಸ್‍ಬುಕ್ ಪೇಜ್ KCO Trust India ಆನಿ ಇನ್‍ಸ್ಟಾಗ್ರಾಮಾಂತ್ www.instagram.com/kcotrust ಮೆಳ್ತಾ.
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
