ಇಂಫೆರ್ನಾಚಿಂ ದಾರಾಂ – 9: ಪರ್ವತಾ ಗಾತ್ರ್ – ತಾಂತಾಂಚೊ ಪಾತ್ರ್

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 9
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 9: ಪರ್ವತಾ ಗಾತ್ರ್ – ತಾಂತಾಂಚೊ ಪಾತ್ರ್

ತ್ಯಾ ವೆಳಿಂ ಮೊಳ್ಯಾಂತ್ ಪುರ್ತೊ ಕಾಳೊಕ್ ಜಾಲ್ಲೊ. ಮನ್ಶ್ಯಾಕ್ ಪಯ್ಸ್ ಮನಿಸ್ ದಿಸನಾತ್‍ಲ್ಲೊ. ಖಂಯ್ ಕಿಡಿ ಕುರ್ವಾಯೆಂಚೊ, ಖಂಯ್ ಪಯ್ಸ್ ರಾನ್ ಮೃಗಾಂಚೊ, ಖಂಯ್ ಅಪ್ರೂಪ್ ಸುಕ್ಣಿಂ ಸಾವ್ಜಾಂಚೊ ಆನಿ ಖಂಯ್ ಲಾಗಿಂ-ಪಯ್ಸ್ ಮನ್ಶ್ಯಾಂನಿ ಆಪಂವ್ಚೊ-ಜಾಗಂವ್ಚೊ ಆವಾಜ್ ಮಾತ್ರ್ ಆಯ್ಕತಾಲೊ.

ಹಮೀದಾಕ್ ಧರುಂಕ್ ಧಾಂವ್ಡಾವ್ನ್ ವ್ಹರ್ನ್ ಗೆಲ್ಲ್ಯಾಂ ಪಯ್ಕಿಂತ್ಲೆ ದೋಗ್ ತೇಗ್ ಜಣ್ ಥೊಡ್ಯಾ ವೆಳಾನ್ ಪಾಟಿಂ ಆಯ್ಲೆ. ತಾಣಿಂ ಗಾಳಿ ಸೊವೆ ದೀವ್ನ್, ಉಲವ್ನ್ ಲಾಗಿಂ ಯೆಂವ್ಚೆಂ ಆಯ್ಕೊನ್, ಮೋನಿಕಾಕ್ ವರ್ತಿ ಭಿರಾಂತ್ ದಿಸ್ಲಿ. ಖಂಯ್ ಹಮೀದ್ ಸಾಂಪಡ್ಲೊ ಜಾವ್ಯೆತ್ ಮ್ಹಣ್ ತಿ ಆಕಾಂತ್ಲಿ. ತಾಂಚ್ಯಾ ಉಲವ್ಣ್ಯಾಕ್ ಆತುರಾಯೆನ್ ತಿಣೆಂ ಕಾನ್ ದಿಲೆ.

“ಚೋರ್, ಬದ್ಮಾಶ್! ಚಡ್ ಪಯ್ಸ್ ಧಾಂವ್ಚೊ ನಾ ತೊ.”

“ಹೊ ಅಟ್ಟಾಂಗ್ ಅಂಧ್ಕಾರ್ ನಹಿಂ ಜಾಲ್ಲೊ ಜಾಲ್ಯಾರ್, ತಾಕಾ ಎದೊಳ್ಚ್ಯಾ ಭಿತರ್‌ಚ್ ಧರ್ನ್ ಫೈಸಲ್ ಕರ್ಯೆತೆಂ.”

“ತಾಕಾ ಆಮಿ ಸಕಾಳಿಂಚ್ ಕಾಪುಂಕ್ ನಾತ್‍ಲ್ಲಿ ಆಮ್ಚಿ ಚೂಕ್!”

“ಕರ್ಚೆಂ ಕಿತೆಂ? ತೊ ಅಹ್ಮದೆ, ತಸೊಯೀ ನಿದೊನ್ ಪಡ್ತೊ ಮ್ಹಣ್ ಕೋಣ್ ಜಾಣಾಂ!”

“ತೊ ಹರಾಮ್ ಚೋರ್, ನಿದೊನ್ ಪಡ್‍ಲ್ಲ್ಯಾ ಖಾತಿರ್, ತಾಚಿ ಕಾಣಿ ಕಶಿಯೀ ಖತಮ್ ಜಾಲಿ. ಪುಣ್ ಹೊ ಯುವಕ್ ಹಾತ್ ಚುಕೊನ್ ಭಾಯ್ರ್ ಪಾವತ್ ಜಾಲ್ಯಾರ್, ಆಮ್ಕಾಂ ಚಡ್ ಕಷ್ಟ್ ಆಸಾತ್.”

“ಖಂಯ್ ವಚತ್ ತೊ? ಹ್ಯಾ ಮೊಳ್ಯಾಂ ಥಾವ್ನ್ ಭಾಯ್ರ್ ಭಿತರ್ ವಚೊಂಕ್, ದೋನ್‍ಂಚ್ ವಾಟೊ ಆಸಾತ್. ತ್ಯಾ ದೊನೀ ಗೊಂಯ್ಡ್ಯಾಂಚೆರ್ ಆಮ್ಚೊ ಎಎಕ್ಲೊ ಜಣ್ ರಾವ್ಲಾ. ಉಜ್ವಾಡ್ತಾ ಪರ್ಯಾಂತ್, ತೆಣೆಂ ತೊ ಪಾಶಾರ್ ಜಾಯ್ನಾತ್ಲ್ಯಾರ್, ಉರ್‌ಲ್ಲೆಂ ಕಾಮ್ ಫಾಲ್ಯಾಂ ಜಾರಿ ಕರ್ಯೆತ್.”

ಇತ್ಲೆಂ ಆಯ್ಕೊನ್, ಹಮೀದ್ ಸಾಂಪ್ಡೊಂಕ್ ನಾ ಮ್ಹಳ್ಳೆಂ ಸಮ್ಜೊನ್, ಮೋನಿಕಾಕ್ ಸಮಾಧಾನ್ ಜಾಲೆಂ. ಸಾಂಗಾತಾಚ್, ಮೊಳ್ಯಾಂತ್ಲೊ ಭಾಯ್ರ್ ವಚೊಂಕ್ ತಾಕಾ ಕಷ್ಟ್ ಆಸಾತ್ ಮ್ಹಳ್ಳೆಂ ಆಯ್ಕೊನ್ ತಿಕಾ ಖಂತ್ ಜಾಲಿ.

ತಿ ಆಸ್‍ಲ್ಲೆ ಕಡೆನ್ ಯೇವ್ನ್ ತೆ ಪಾವ್ಲೆ.

“ಹ್ಯಾ ಗಲಾಟ್ಯಾಂತ್, ನಸ್ರಾನಿ ಬಾಯ್ಲ್ ಪುಣೀ…”

“ನಾ, ಧಾಂವೊಂಕ್ ನಾ… ಆಸಾ!”

“ತಿಣೆಂ ಧಾಂವ್ಚೆಂ ಆನಿ ಮ್ಹಜ್ಯಾ ಸಾಂಗಾತಾ ಮಾತ್ರ್… ಹ್ಹೆ-ಹ್ಹೆ!”

ತಾಂಚೆ ಕಡೆನ್ ಎಕ್‍ಚ್ ಲಾಂಟಾನ್ ಆಸ್‍ಲ್ಲೊ. ತ್ಯಾ ಉಜ್ವಾಡಾಂತ್, ತಿಕಾ ಭೊಂವಾಡೊ ಘಾಲ್ನ್ ತೆ ರಾವ್ಲೆ.

“ಹ್ಹೆ-ಹ್ಹೆ!” ಹಾಂಕ್ರೆಲೊ ಮುಖೆಲಿ. “ಹ್ಯಾ ಅಂಧ್ಕಾರಾಂತ್‍ಯೀ ತುಜೆಂ ವದನ್ ತುವೆಂ ಲಿಪಯ್ಜಾಯ್ ಮ್ಹಣ್ ನಾ!” ತಿಚ್ಯಾ ಮುಖಮಳಾರ್ ಆಸ್‍ಲ್ಲೆಂ ರೇಂದಾಚೆಂ ಆವರಣ್, ಬಳಾನ್ ತಾಣೆಂ ಹೆವ್ಶಿನ್ ವೊಡ್ಲೆಂ. “ಹ್ಹೆ-ಹ್ಹೇ! ಅಂಧ್ಕಾರಾಂತ್ ಜಾಲ್ಯಾರೀ, ಪಳೆಂವ್ಕ್ ಪಾಡ್ ನಾ. ಸಗ್ಳ್ಯಾ ದಿಸಾ, ತ್ಯಾ ಅಹ್ಮದೆಕ್ ಹಾಂಗಾ ಸೊಡ್ಚ್ಯಾ ಬದ್ಲಾಕ್, ಹಾಂವೆಂಚ್ ರಾವಜಾಯ್ ಆಸ್‍ಲ್ಲೆಂ. ಹ್ಹೆ-ಹ್ಹೆ! ಕಿತೆಂ ಮ್ಹಣ್ತಾಯ್?”

ಮೋನಿಕಾನ್ ಕಿತೆಂಯೀ ಮ್ಹಳೆಂ ನಾ.

“ತಸಲ್ಯಾ ತಾರಿಪೆಕ್ ಆನಿ ಮಜೆಕ್ ವೇಳ್ ಆಸಾ ಸಾಯ್ಬಾ!” ಮ್ಹಣಾಲೊ ಆನ್ಯೇಕ್ಲೊ. “ಅಸೊ ಉಜ್ವಾಡ್ ಘೆವ್ನ್…”

“ತ್ಯಾ ಶಿವಾಯ್…” ತಿಸ್ರ್ಯಾನ್ ಮೆಳಯ್ಲೆಂ. “ತೊ ಬದ್ಮಾಶ್ ಹೆಣೆಂ ಖಂಯ್ ಅಂಧ್ಕಾರಾಂತ್ ರಾವೊನ್… ಅಹ್ಮದೆಪರಿಂಚ್ ಆಮ್ಚ್ಯಾಯೀ…”

“ಬರೆಂ. ಮ್ಹಾಕಾಯೀ ಸಮ್ಜತಾ!” ಭಿತರ್ಲ್ಯಾ ಭಿಯಾನ್ ಮುಖೆಲಿ ಒಪ್ಲೊ. ತಾಚೊ ಹಾಸೊ ಲಿಪ್ಲೊ. “ಬರೆಂ” ಮ್ಹಣಾಲೊ ತೊ ಮೋನಿಕಾಕ್. “ತುಜ್ಯಾ ಜಿವಾಕ್ ಮುಷ್ಕಿಲ್ ನಾ – ತುಂ ದುಸ್ರ್ಯಾಂಚೊ ಮ್ಹಾಲ್. ಆವಾಜ್ ಕರಿನಾಸ್ತಾಂ, ಆನಿ ಅಡ್ಕಳ್ ಕರಿನಾಸ್ತಾಂ ಯೆತಾಯ್ ಜಾಲ್ಯಾರ್ ಬರೆಂಚ್.”

“ಬರೆಂಚ್, ಪಯ್ಲೆಂ ಮ್ಹಜೊ ಜೀವ್ ತುಮಿ ಕಾಡ್ಲ್ಯಾರ್!” ಮ್ಹಣಾಲಿ ಮೋನಿಕಾ ಧಯ್ರಾನ್.

“ನಾ, ತುಜ್ಯಾ ಮೊಡ್ಯಾ ಕಡೆನ್ ಕೊಣಾಯ್ಕೀ ಕಾಮ್ ನಾ. ಬರ‍್ಯಾನ್ ತುಂ ಯೆತಾಯ್ ವಾ ನಾ? ನಾ ಜಾಲ್ಯಾರ್, ತುಜೆ ಹಾತ್ ಪಾಯ್ ಆನಿ ತೋಂಡ್ ಬಾಂಧುನ್ ವ್ಹರುಂಕ್ ವೇಳ್ ಲಾಗ್ಚೊ ನಾ!” ಮ್ಹಣಾಲೊ ಮುಖೆಲಿ ಚಿಕ್ಕೆ ಗರಮ್ ಜಾವ್ನ್.

ಮೋನಿಕಾನ್ ಚಿಂತ್ಲೆಂ, ಹಾತ್ ಪಾಯ್ ಆನಿ ತೋಂಡ್ ಥಡಾ ಜಾವ್ನ್, ಕಾಮುಕ್ಯಾಂಚ್ಯಾ ಹಾತಾಂತ್ ಲಜೆಚೆಂ ವೊಜೆಂ ಜಾವ್ನ್ ವೆಚ್ಯಾ ಬದ್ಲಾಕ್, ಹಾತ್ ಪಾಯ್ ಸುಟೆ ಆಸೊನ್, ಥೊಡೊ ವೇಳ್ ಪುಣೀ ಸ್ವತಂತ್ರ್ ರಾವೊನ್ ಆಪ್ಲೊ ಮಾನ್ ಸಾಂಬಾಳ್ಚೆಂ ಬರೆಂ ಮ್ಹಣ್, ಮತಿಂತ್ ತಿಣೆಂ ತರ್ಕ್ ಕೆಲೆಂ. ಆನಿ, “ಹಾಂವ್ ಯೆತಾಂ, ಮ್ಹಜೆಂ ಆಂಗ್ ಆಪಡ್ಚಿ ಗರ್ಜ್ ನಾ” ಮ್ಹಳೆಂ.

“ಭೋವ್ ಬರೆಂ – ಚಲೋ!”

ತಶೆಂ, ಎಕ್ಲೊ ಮುಖಾರ್, ಆನ್ಯೇಕ್ಲೊ ಲಾಂಟಾನ್ ಘೆವ್ನ್, ಉಪ್ರಾಂತ್ ಮೋನಿಕಾ, ಆನಿ ಪಾಟ್ಲ್ಯಾನ್ ಮುಖೆಲಿ ರಾವೊನ್, ನ್ಹಂಯ್ ದೆಗೆಕ್ ವೆಚ್ಯಾ ದಿಕ್ಕಾನ್ ತೆ ಗೆಲೆ. ಆಹಾರಾ ವಿಣೆಂ ಆನಿ ಮುಯೆವ್ನ್, ಮೋನಿಕಾಚ್ಯಾ ಪಾಯಾಂಕ್ ಚಲೊಂಕ್ ತ್ರಾಣ್ ನಾತ್‍ಲ್ಲೆಂ. ಜಾಲ್ಯಾರೀ, ಧಯ್ರಾನ್ ಮೆಟಾಂ ಕಾಡ್ನ್ ಫುಡೆಂ ತಿ ಗೆಲಿ. ಖರ್ಕಸ್, ಫಾತ್ರಾಳ್ಯಾ ಆನಿ ಕಾಂಟ್ಯಾಂಚ್ಯಾ ವಾಟೆನ್ ಮೆಟಾಂ ಕಾಡ್ತಾನಾ ತಿಚ್ಯಾ ದೊಳ್ಯಾಂತ್ಲ್ಯಾನ್ ಕಾಜುಲೆ ಉಸಳ್ತಾಲೆ.

ಚಡುಣೆಂ ತೀಸ್ ಕದಮಾಂಚಿ ವಾಟ್ ಜಾಯ್ತ್ ತಿತ್ಲ್ಯಾರ್, ಪಾಯ್ ಚಿಕ್ಕೆ ಚುಕೊನ್ ಮೋನಿಕಾ ಲಕ್ಲಿ ಆನಿ ಬಗ್ಲೆಚ್ಯಾ ಬೊಲ್ಯಾರ್ ತೆಂಕ್ಲಿ. ತಿಚ್ಯಾ ಫುಡ್ಲ್ಯಾನ್ ಆಸ್‍ಲ್ಲ್ಯಾ ಗ್ರಾಯ್ಕಾನ್, ಬಾವ್ಳ್ಯಾಕ್ ಧರ್ನ್ ತಿಕಾ ನೀಟ್ ಕೆಲೆಂ ಆನಿ ಫುಡೆಂ ವೊಡ್ಲೆಂ. ಕಾಂಟ್ಯಾಂಕ್ ಶಿರ್ಕಲ್ಲೊ ತಿಚೊ ಬುರ್ಖಾಚೊ ಪಾಲಂವ್, ಚಿಕ್ಕೆ ಪಿಂಜೊನ್ ಗೆಲೊ.

ತಸಲ್ಯಾ ವಾಟೆನ್ ಮುಖಾರ್ ತಿಕಾ ತೆ ವ್ಹರ್ನ್ ಗೆಲೆ. ಖಂಯ್, ಕಿತೆಂ ಮ್ಹಣ್ ತಿಕಾ ಕಳಿತ್ ನಾತ್‍ಲ್ಲೆಂ. ಅರ್ಧ್ಯಾ ವೊರಾಚಿ ವಾಟ್ ಚಮ್ಕೊನ್, ಮೊಳೊ ತಾಣಿಂ ಪಾಟಿಂ ಸೊಡ್ಲೊ. ಮೋನಿಕಾಕ್ ಹಮೀದಾಚೊ ಉಗ್ಡಾಸ್ ಆಯ್ಲೊ.

* * * * *

ತುರ್ಕಿ ದುಸ್ಮಾನ್ ಲಾಗಿಂ ಯೆತಾನಾ, ಆಪ್ಲ್ಯಾಚ್ ರಿತಿನ್ ಆನಿ ರಡೊನ್, “ವೆಗಿಂ ಯೆತಾಂ ದೀದೀ…” ಮ್ಹಣೊನ್ ಉಡ್ಕಿ ಮಾರ್ನ್, ಬೊಲ್ಯಾಂತ್ ರಿಗೊನ್, ಹಮೀದ್ ಧಾಂವ್‍ಲ್ಲೊ. ಕಾಳೊಕ್‍ಯೀ ಪಡೊನ್ ಯೆತಾಲೊ ಜಾಲ್ಲ್ಯಾನ್, ತಾಚಿ ಪಾಟ್ ಧರುಂಕ್ ಆಯಿಲ್ಲ್ಯಾಂಚೆ ದೊಳೆ ಚುಕಂವ್ಕ್ ತಾಕಾ ಚಡ್ ಕಷ್ಟ್ ಜಾಂವ್ಕ್ ನಾಂತ್. ಜಾಲ್ಯಾರೀ, ರಾನಾ ಮೊಲ್ಯಾಂತ್ಲ್ಯಾನ್ ಜಾತಾ ತಿತ್ಲೆಂ ಪಯ್ಸ್ ತೊ ಪಾವ್ಲೊ.

ಜಾಲ್ಯಾರೀ, ಮೊಳ್ಯಾಂತ್ಲೆಂ ಭಾಯ್ರ್ ವಚೊಂಕ್ ತಾಚ್ಯಾ ಮತಿಂತ್ ಯೇಂವ್ಕ್ ನಾ. ಮೋನಿಕಾಚಿ ಕಾಂಯ್ ಖಬರ್ ಘೆತ್ಲ್ಯಾ ಶಿವಾಯ್, ಆನಿ ಸದ್ದ್ಯಾಕ್ – ತಿಚ್ಯಾ ಜಿವಾಕ್ ಪುಣೀ ಬಾಧಕ್ ಆಸ್ಲ್ಯಾರ್ – ಆಪ್ಲೊ ಜೀವ್ ಪುಣೀ ದೀವ್ನ್ ತಿಕಾ ರಾಕ್ಲ್ಯಾ ಶಿವಾಯ್, ಭಾಯ್ರ್ ಧಾಂವೊಂಕ್‍ಯೀ ತೊ ಕಬೂಲ್ ನಾತ್‍ಲ್ಲೊ. ಪುಣ್ ಶಿಪಾಯಾಂಚ್ಯಾ ಹಾತಾಂತ್ ಪರ್ತ್ಯಾನ್ ಕೆದಿಂಚ್ ಸಾಂಪಡ್ನಾಯೆ ಮ್ಹಳ್ಳೆಂ ಸವಾಲ್ ಪಯ್ಲೆಂಚೆಂ ಜಾವ್ನಾಸ್‍ಲ್ಲೆಂ.

ಥೊಡ್ಯಾ ವೆಳಾ ಉಪ್ರಾಂತ್, ತಾಚಿ ಪಾಟ್ ಧರ್ನ್ ಕೊಣೀ ಯೇನಾಂತ್, ಬಗಾರ್, ಥಂಯ್ ಹಾಂಗಾ ಬೋಂಟ್ ಆಂಬುಡ್‍ಲ್ಲೆಪರಿಂ ಸೊಧ್ನಾಂ ಕರ್ತಾತ್ ಮ್ಹಣ್ ತಾಕಾ ಸಮ್ಜಲೆಂ. ಪಯ್ಲೆಂಚಿ ಭುಕ್, ಹಾತಾಂ ಪಾಯಾಂಚೆ ಘಾಯ್, ಆಪ್ಟಲ್ಲೆ-ಧಪ್ಟಲ್ಲೆ ಮಾರ್, ಕಾಂಟೆ-ಕಾಂಟಿ ಭೊಖ್ರಾಲ್ಲೊ ಹುಲೊಪ್… ಹಿಂ ಸರ್ವ್ ಮೆಳೊನ್ ತಾಚೊ ಜೀವ್ ಅರ್ಧೊ ಜಾಲ್ಲೊ. ಫುಡೆಂ ಖಂಯೀ ವೆಚೆ ತಿತ್ಲೆಂ ತ್ರಾಣ್ ತಾಚೆ ಥಂಯ್ ಉರೊಂಕ್ ನಾತ್‍ಲ್ಲೆಂ. ಶಿವಾಯ್, ದೊಳ್ಯಾಂತ್ ಬೋಟ್ ಘಾಲ್ಯಾರೀ ದಿಸನಾ ಮ್ಹಣ್ಚೆ ತಿತ್ಲೊ ಕಾಳೊಕ್ ಆಸ್‍ಲ್ಲೊ.

ತಾಚಿಂ ಸೊಧ್ನಾಂ ಕರ್ತೆಲ್ಯಾಂಚೊ ಆವಾಜ್, ತಾಕಾ ಭೋವ್ ಪಯ್ಸ್ ಥಾವ್ನ್ ಆಯ್ಕತಾಲೊ. ಕ್ರಮೇಣ್, ತೊಯೀ ಬಂದ್ ಜಾಲೊ. ಫುಡ್ಲಿ ಆಲೋಚನ್ ಕರ್ಚ್ಯಾ ಆದಿಂ, ಚಿಕ್ಕೆ ವಿಶೆವ್ ಘೆಂವ್ಚ್ಯಾ ಖಾತಿರ್, ಎಕಾ ರುಕಾಚ್ಯಾ ಕುತ್ಯೆಕ್ ತೆಂಕೊನ್ ತೊ ಬಸ್ಲೊ.

ಮೋನಿಕಾಚೊ ಉಗ್ಡಾಸ್ ತಾಕಾ ಆಯ್ಲೊ. ‘ಧಾಂವ್ ಪುತಾ, ಜೀವ್ ವಾಂಚಯ್’ ಮ್ಹಳ್ಳೆಂ ತಿಣೆಂ – ಆಪ್ಲ್ಯಾ ಜಿವಾಚಿ ಬಚಾವಿ ಲೆಕಿನಾಸ್ತಾನಾ. ತೆಂ ಚಿಂತುನ್, ಅಪ್ಶೆಚ್ ತಾಚೆ ದೊಳೆ ಹುಲ್ಪಲೆ ಆನಿ ದುಖಾಂ ದೆಂವ್ಲಿಂ. ಕಸಲೊ ತೊ ಮಯ್ಪಾಸ್, ಕಸಲೊ ತೊ ಮಾಯಾಮೋಗ್! ‘ವೆರೊನಿಕಾಬಿಚಿ ಖಬರ್ ನಾ. ಹಿಕಾ, ಕಶೆಂ ಪುಣೀ ಹಾಂವೆಂ ಬಚಾವ್ ಕರ್ನ್ ಪಾಟಿಂ ಹಾಡಿಜಾಯ್‍ಚ್’ ಮ್ಹಳ್ಳೊ ನಿಚೆವ್ ತಾಚೆ ಥಂಯ್ ಥಿರ್ ಜಾಲೊ.

ಖಂಯ್ ವೆಚೆಂ, ಕೊಣಾಕ್ ಸಾಂಗ್ಚೆಂ ಮ್ಹಣ್ ತಾಕಾ ಕಳಿತ್ ನಾತ್‍ಲ್ಲೆಂ. ಮೋನಿಕಾಬಿ ನಾತ್‍ಲ್ಲ್ಯಾ ಶಿವಾಯ್, ಬೊಕ್ಕಪಟ್ಟಣಾಕ್ ಆಪುಣ್ ಕೆದಿಂಚ್ ಪಾಯ್ ದವರ್ಚೊ ನಾ ಮ್ಹಳ್ಳೊಯೀ ನಿಚೆವ್ ತಾಣೆಂ ಕೆಲೊ.

“ಮೋನಿಕಾಬಿ!” ಎಕಾಚ್‍ಫರಾ ತಾಚ್ಯಾ ಮತಿಂತ್ ಉಗ್ಡಾಸ್ ಆಯ್ಲೊ. “ಹಾಂವ್ ಹಾಂಗಾ ಕಿತೆಂ ಕರ್ತಾಂ? ತಿಕಾ ಶಿಪಾಯಾಂನಿ ಕಸಲಿ ಶಿಕ್ಷಾ ದಿಲ್ಯಾ ವಾ ತಿಕಾ ಖಂಯ್ ವ್ಹೆಲ್ಯಾ ಜಾವ್ಯೆತ್? ಅಲ್ಲಾ! ನಿಜಾಯ್ಕೀ ಹಾಂವ್ ಎಕ್ಲೊ ಪಿಸೊ! ಹಾಂವೆಂ ತೆಣೆಂಚ್ ಖಂಯೀ ತಿಚ್ಯಾ ಲಾಗ್ಸರ್ ಲಿಪೊನ್ ರಾವಜಾಯ್ ಆಸ್‍ಲ್ಲೆಂ!” ಚುರ್ಚುರ್ಲೊ ತೊ.

ಹ್ಯಾ ವೆಳಾರ್ ಕಾಳೊಕಾಂತ್ಲ್ಯಾನ್ ಥಂಯ್ ವೆಚೆಂ ಸಾಧ್ಯ್ ನಾತ್‍ಲ್ಲೆಂ, ತರೀ, ತಾಚೆಂ ಮನ್ ರಾವ್ಲೆಂ ನಾ. ಪರ್ತ್ಯಾನ್ ತೊ ಉಟ್ಲೊ. ನಿತ್ರಾಣಾ ವರ್ವಿಂ ಆಂಗಾಚ್ಯಾ ದುಕಿ ವರ್ವಿಂ ತಾಚಿ ತಕ್ಲಿ ಘುಂವ್ಲಿ. ಥೊಡೊ ವೇಳ್ ರುಕಾಕ್ ತೆಂಕೊನ್ ತೊ ರಾವ್ಲೊ. ಕ್ರಮೇಣ್ ತಾಚಿ ಮತ್ ನಿತಳ್ಳಿ.

ಬಾರೀಕ್‍ಶೆಂ ಚಾಂದ್ನೆಂ ಉದೆವ್ನ್, ಆಲ್ಯಾ ಪಾಲ್ಯಾಂತ್ಲ್ಯಾನ್ ಗಾಳೊನ್, ಮೊಳ್ಯಾಂತ್ ಥೊಡೊ ಪ್ರಕಾಸ್ ದಿತಾಲೆಂ. ತಾಂತ್ಲ್ಯಾನ್ ಹಮೀದ್, ಅಂದಾಜ್ ಕರ್ನ್ ಆನಿ ಭೋವ್ ಚತ್ರಾಯೆನ್ ಮೆಟಾಂ ಕಾಡ್ನ್, ತಾಕಾ ಆನಿ ಮೊನಿಕಾಕ್ ಪಯ್ಲೆಂ ಬಾಂಧುನ್ ಘಾಲ್ಲಿ ಸುವಾತ್ ಸೊಧುನ್ ಭೊಂವ್ಲೊ.

ಕಿತ್ಲೆಶ್ಯಾ ವೆಳಾ ಉಪ್ರಾಂತ್ ಥಂಯ್ಸರ್ ಯೇವ್ನ್ ತೊ ಪಾವ್ಲೊ. ತಾಚ್ಯಾ ಹಾತಾಂತ್ ಸುಕ್ಯಾ ಲಾಂಕ್ಡಾಚೊ ಏಕ್ ಸೊಂಟೊ ಆಸ್‍ಲ್ಲೊ. ಅಹ್ಮದೆಚ್ಯಾ ರಗ್ತಾಚೊ ಪರ್ಮಳ್ ಆದ್ಳೊನ್ ಥಂಯ್ಸರ್ ಆಯಿಲ್ಲಿಂ ಥೊಡಿಂ ಲ್ಹಾನ್ ಮೃಗಾಂ, ಕೊಲೆ ಜಾವ್ಯೆತ್, ಫಾಸಾಳ್ಳಿಂ ಆನಿ ಆಡೊಸಾಕ್ ಧಾಂವ್ಲಿಂ.

ಹಮೀದ್ ಥಟಕ್ ಜಾಲೊ. ಅಹ್ಮದೆಚೆಂ ಮೊಡೆಂ ಥಂಯ್ಚ್ ಆಸ್‍ಲ್ಲೆಂ, ಪುಣ್ ಮೋನಿಕಾ ಜಾಂವ್, ಶಿಪಾಯ್ ಜಾಂವ್, ಥಂಯ್ಸರ್ ನಾತ್‍ಲ್ಲೆ. ಎಕಾ ಥರಾಚಿ ಭೀಭತ್ಸಾಯ್ ತಾಕಾ ಭೊಗ್ಲಿ.

“ಮೋನಿಕಾ ದೀದೀ…” ವ್ಹಡ್ಲ್ಯಾನ್ ಸುಸ್ಕಾರ್ಲೊ ತೊ. ಪುಣ್ ರಾನಾ ಸಹಜ್ ಪ್ರಕೃತೆಚಿ ಪ್ರತಿಧ್ವನಿ ಶಿವಾಯ್ ಹೆರ್ ಕಸಲಿಯೀ ಜವಾಬ್ ತಾಕಾ ಮೆಳೊಂಕ್ ನಾ. ಆಪುಣ್ ಧಾಂವ್‍ಲ್ಲ್ಯಾ ಖಾತಿರ್ ಆನಿ ಧಾಂವ್ಲ್ಯಾರೀ ವೆಗಿಂ ಪುಣೀ ಪಾಟಿಂ ಯೇನಾತ್‍ಲ್ಲ್ಯಾ ಖಾತಿರ್, ಆಪ್ಣಾಕ್‍ಚ್ ತೊ ಕಾಂಠಾಳ್ಳೊ.

ತಶೆಂಚ್ ರಾವೊನ್ ಕಿತೆಂ ಪ್ರಯೋಜನ್? ಕಾಂಯ್ ಪುಣೀ ಕರಿಜಾಯ್, ಕೊಣಾಕ್ ಪುಣೀ ಕಳಯ್ಜಯ್… ಕೊಣಾಕ್? ಧನಿ, ಹಸ್ಸನ್ ಮಹಮ್ಮದ್ ಗಾಂವಾಂತ್ ನಾ… ಹೆರ್ ಕೊಣಾಕ್ ಖಬರ್ ದಿಂವ್ಚಿ?

“ಬರಾಬರ್!” ವ್ಹಡ್ಲ್ಯಾನ್ ಆಲೋಚನ್ ಆಯ್ಲಿ ತಾಕಾ. “ಕಶೆಂ ಪುಣೀ ವಚೊನ್ ಕಾವೂರ್, ತೆರೆಜಾಬಿಗೆರ್ ಖಬರ್ ದಿಂವ್ಚಿ!” ಧಯ್ರ್ ಘೆತ್ಲೆಂ ತಾಣೆಂ.

ಕಾವೂರಾಂತ್ ದುಮ್ಗಾ ಪೀಂತ್ ನಾತ್‍ಲ್ಲೊ ಜಾಲ್ಯಾರೀ, ಕೊಣಾಯ್ಚ್ಯಾ ಝಳ್ಕೆಕ್ ಪಡನಾಸ್ತಾನಾ, ಘರಾಕ್ ಭೆಟ್ ದೀವ್ನ್ ತೊ ಯೆತಾ, ವಾ ಕಸಲ್ಯಾ ಪುಣೀ ಉಪಾಯಾಂನಿ ಖಬರ್ ದೀವ್ನ್ ಆನಿ ಘೆವ್ನ್ ಆಸಾ ಮ್ಹಣ್, ಬೊಕ್ಕಪಟ್ಟಣಾಂತ್ ಉಲಯಿಲ್ಲೆಂ ತಾಣೆಂ ಆಯ್ಕಲ್ಲೆಂ. ತ್ಯಾ ಶಿವಾಯ್, ವೆರೊನಿಕಾಬಿಚಿ ಆನಿ ಆತಾಂ ಜರೂರ್ ಮೋನಿಕಾಬಿಚಿ ಖಬರ್ ಪುಣೀ ಆಯ್ಕಲ್ಯಾರ್, ತೊ ‘ಕಾವೂರ್ಚೊ ಸಿಂಹ್’ – ಖಂಯ್ ಆಸ್ಲ್ಯಾರೀ ಕಾರ್ಯಾಕ್ ದೆಂವ್ಲ್ಯಾ ಶಿವಾಯ್ ರಾವಸೊ ನಾ ಮ್ಹಣ್ ಹಮೀದಾನ್ ರಾಜಾಂವ್ ಕೆಲೆಂ.

ದೀಸ್ ಉಜ್ವಾಡ್ಚ್ಯಾ ಆದಿಂಚ್ ಕಾವೂರಾಕ್ ವಚಜಾಯ್ ಮ್ಹಣ್ ತಾಣೆಂ ಚಿಂತ್ಲೆಂ. ಕೊಣಾಯ್ಚ್ಯಾ ಝಳ್ಕೆಕ್ ಪಡನಾಯೆ, ಸಾಧ್ಯ್ ಜಾಲ್ಯಾರ್ ವೇಸ್ ಚಿಕ್ಕೆ ಬದ್ಲುನ್ ವಚ್ಯೆತ್ ಮ್ಹಣೊನ್‍ಯೀ ದಿಸ್ಲೆಂ ತಾಕಾ.

ತ್ಯಾಚ್ ಪ್ರಕಾರ್, ತಾಚ್ಯಾ ಮತಿಂತ್ ಏಕ್ ಯೋಜನ್ ಘುಂವ್ಲೆಂ. ಆಪ್ಲ್ಯಾ ಆಂಗಾ ವಯ್ಲೆಂ, ರಗ್ತಾನ್ ಆನಿ ಘಾಮಾನ್ ದಾಟ್ಲೆಲೆಂ ಖೊಮಿಸ್ ಕಾಡ್ನ್ ತಾಣೆಂ ಸಕಯ್ಲ್ ಉಡಯ್ಲೆಂ. ಆಡ್ವಿ ಆಸ್‍ಲ್ಲಿ ಆಪ್ಲಿ ಲುಂಗಿ, ಕಾಚ್ ಮಾರುನ್ ತೊ ನ್ಹೆಸ್ಲೊ. ಉಪ್ರಾಂತ್ ಥೊಡೊ ವಿಶೆವ್ ಘೆಂವ್ಚ್ಯಾ ಖಾತಿರ್ ಥೊಡೊ ವೇಳ್ ತೊ ಬಸ್ಲೊ. ತೆದೊಳ್, ರಾತ್ ಚಡುಣೆಂ ಮ್ಹಧ್ಯಾನ್ ಜಾಯ್ತ್ ಮ್ಹಣ್ ತಾಣೆಂ ಅಂದಾಜ್ ಕೆಲೊ. ಉಗ್ಡಾಸ್ ಯೇವ್ನ್, ಅಹ್ಮದೆಚಿ ಮಟ್ವಿ ತಾಲ್ವಾರ್ ತಾಣೆಂ ಸ್ವಾಧೀನ್ ಕೆಲಿ.

ಮೊಳ್ಯಾಂತ್ಲೊ ಭಾಯ್ರ್ ವಚಜಾಯ್ ಮ್ಹಳ್ಳ್ಯಾ ಇರಾದ್ಯಾನ್ ತೊ ಉಟ್ಲೊ. ಭಾಯ್ರ್ ವೆಚಿ ವಾಟ್ ಸಾರ್ಕಿ ತಾಕಾ ಕಳಿತ್ ನಾತ್‍ಲ್ಲಿ, ಆನಿ ಸೊಧುನ್ ಸಮ್ಜಾ ಸಾರ್ಕೊ ಉಜ್ವಾಡ್‍ಯೀ ನಾತ್‍ಲ್ಲೊ. ತ್ಯಾ ಶಿವಾಯ್, ಶಿಪಾಯಾಂನಿ ತಾಕಾ ಧಾಂವ್ಡಾವ್ನ್ ವ್ಹೆಲ್ಲ್ಯಾ ಥೊಡ್ಯಾ ವೆಳಾನ್, ಮೊಳ್ಯಾಕ್ ಭಾಯ್ರ್ ಭಿತರ್ ವೆಚ್ಯಾ ಗೊಂಯ್ಡ್ಯಾಂಚೆರ್ ರಾಕೊನ್ ರಾವೊಂಕ್ ದೊಗಾಂಕ್ ಹುಕುಮ್ ದಿಲ್ಲಿ ತಾಣೆಂ ಆಯ್ಕಲ್ಲಿ. ಹೆಂ ಚಿಂತುನ್, ಪರ್ತ್ಯಾನ್ ತಾಕಾ ಭಿರಾಂತ್ ದಿಸ್ಲಿ.

ಜಾಂವ್ಚೆಂ ತೆಂ ಜಾತೆಲೆಂ, ತಾಣೆಂ ನಿಚೆವ್ ಕೆಲ್ಲೊ. ತಲ್ವಾರ್ ಹಾತಾಂತ್ ಘೆವ್ನ್, ತಾಂಕಾಂ ಮೊಳ್ಯಾಕ್ ಹಾಡ್‍ಲ್ಲ್ಯಾ ವಾಟೆಚೊ ಚಡುಣೆಂ ಅಂದಾಜ್ ಕರ್ನ್, ಆವಾಜ್ ಕರಿನಾಸ್ತಾಂ ಮಾಜ್ರಾಚಿಂ ಮೆಟಾಂ ಕಾಡ್ನ್, ವೋಯ್ ಸೊಧುನ್ ತೊ ಭಾಯ್ರ್ ಸರ್ಲೊ.

ಥೊಡ್ಯಾಚ್ ವೆಳಾನ್ ವಾಟ್ ತಾಕಾ ಚುಕ್ಲಿ, ಪುಣ್ ನಿಚೆವ್ ತಾಚೊ ಚುಕೊಂಕ್ ನಾ. ಕಾಂಟೆ-ಕುಂಟೆ ಆನಿ ಬೊಲಿಂ, ದಾಂಟೊನ್, ಆದ್ಳೊನ್, ರಿಗೊನ್ ಆನಿ ಉತ್ರೊನ್ ಕಸೊಯೀ, ವೋಯ್ ದೆಗೆರ್ ತೊ ಪಾವ್ಲೊ. ಉಜ್ವಾಡ್ ಸಾರ್ಕೊ ನಾತ್‍ಲ್ಲ್ಯಾ ವೆಳಾರ್, ತಿ ವೋಯ್ ದೆಖ್ತಾನಾ, ತಾಂತ್ಲ್ಯಾನ್ ಮನಿಸ್ ನಹಿಂ, ಮಾಜ್ರಾಕ್ ಲೆಗುನ್ ರಿಗೊನ್ ಪಾಶಾರ್ ಜಾಂವ್ಕ್ ಸಾಧ್ಯ್ ನಾ ಮ್ಹಣ್ ದಿಸ್ತಾಲೆಂ.

ಪುಣ್ ಹಮೀದ್, ಹಟಾನ್ ಕಾರ್ಯಾಕ್ ದೆಂವ್ಲೊ. ಹಾತಾಂತ್ ಆಸ್‍ಲ್ಲ್ಯಾ ತಲ್ವಾರಿಚೊ ಪ್ರಯೋಗ್ ಕರ್ನ್, ಚತ್ರಾಯೆನ್, ಕಣ್ಕಿಚೆ ಕಾನೆ ಆನಿ ದಾಡ್ಡೆಚೆ ಹಾತ್ ಲುಂವೊನ್, ವೋಂಯ್ತ್ ಬಾರೀಕ್ ವಾಟ್ ತಾಣೆಂ ಸೊಡಯ್ಲಿ. ತಿತ್ಲೆಂ ಜಾತಾನಾ ಉಜ್ವಾಡೊಂಕ್ ಲಾಗಿಂ ಜಾಲ್ಲೆಂ.

ಕಣ್ಕಿಚೊ, ಹಳ್ತಾಚೊ ಏಕ್ ಸೊಂಟೊ ಬೆಂಡುನ್ ತಾಣೆಂ ಘೆತ್ಲೊ. ತಲ್ವಾರ್ ಮೊಳ್ಯಾಂತ್ ಪಾಟಿಂ ಉಡಯ್ಲಿ, ಆನಿ ಚತ್ರಾಯೆನ್ ಮೊಳ್ಯಾಂತ್ಲೊ ತೊ ಭಾಯ್ರ್ ಪಡ್ಲೊ. ದಿಕ್ಕಾಚೊ ಅಂದಾಜ್ ಧರ್ನ್, ದಾವ್ಯಾಕ್ ಘುಂವೊನ್ ಕಾವೂರ್ಚಿ ವಾಟ್ ತಾಣೆಂ ಧರ್ಲಿ. ದೀಸ್ ಉಜ್ವಾಡೊಂಕ್ ಜಾತಾನಾ, ಕಾವೂರ್ಚ್ಯಾ ಫಾಲ್ಕ್ಯಾಂತ್ ತೊ ಪಾವ್ಲೊ. ಭೋವ್ ನಿತ್ರಾಣ್ ತೊ ಆಸ್‍ಲ್ಲ್ಯಾನ್, ಥಂಯ್ಚ್ ಮುರ್ಯಾಂಚ್ಯಾ ಆನಿ ರುಕಾಂಚ್ಯಾ ಆಡೊಸಾಂತ್, ವಿಶೆವ್ ಘೆಂವ್ಚ್ಯಾ ಖಾತಿರ್ ತೊ ರಾವ್ಲೊ.

ಥಂಯ್ಚ್ ತಾಕಾ ದೊಳೊ ಆಡ್ ಜಾಲೊ. ಪರ್ತ್ಯಾನ್ ಜಾಗ್ ಜಾತಾನಾ, ವೊರಾಂ ಸಕಾಳಿಂಚಿಂ ಧಾ ಜಾತಿತ್. ಆಡೊಸಾಂತ್ಲೊ ಹೆವ್ಶಿನ್ ಯೇವ್ನ್, ವಾಟೆಕ್ ಚಿಕ್ಕೆ ಲಾಗಿಂ ರಾವೊನ್, ಕೊಣೀ ಪಾಶಾರ್ ಪುಣೀ ಜಾತಾತ್ ಜಾಲ್ಯಾರ್ ಸಮ್ಜೊಂಚ್ಯಾ ಖಾತಿರ್ ದೀಷ್ಟ್ ತಾಣೆಂ ಭೊಂವ್ಡಾಯ್ಲಿ.

ಥೊಡ್ಯಾಚ್ ವೆಳಾನ್, ಪಾಟ್ಲ್ಯಾ ವಾಟೆನ್, ಘರಾ ತೆವ್ಶಿನ್ ವಚೊಂಕ್ ಕೊಣೆಂಗೀ ಚಲೊನ್ ಯೆಂವ್ಚೆಂ ತಾಕಾ ಆಯ್ಕಲೆಂ. ಉಪ್ರಾಂತ್ ಝಳ್ಕಲೆಂ – ತಿಮ್ಮಿ. ತಾಕಾ ಚಿಕ್ಕೆ ಜೀವ್ ಭರ್ಲೊ.

ದಾವ್ಯಾ ಹಾತಾಕ್ ವಾಳ್ಚೆಭಾಜಿಯೆಚೆಂ ಕೊಂಡ್ಲೆಂ ಆನಿ ಉಜ್ವ್ಯಾ ಹಾತಾಂತ್ ದುದಾಚಿ ಕೊವ್ಳಿಗ್ ಘೆವ್ನ್ ತಿಮ್ಮಿ ಲಾಗಿಂ ಪಾವ್ಲೆಂ. ಹಮೀದ್ ಆಡೊಸಾಕ್‍ಚ್ ರಾವೊನ್, ದೋನ್ ಪಾವ್ಟಿಂ ‘ಶ್ಶೂ! ಶ್ಶೂ!’ ಕರಿಲಾಗ್ಲೊ. ತಿಮ್ಮಿ ರಾವ್ಲೆಂ ಆನಿ ಆವಾಜ್ ಆಯ್ಕಲ್ಲ್ಯಾ ಕುಶಿಕ್ ಘುಂವ್ಲೆಂ.

“ಕೋಣ್?”

“ಹಾ-ಹಾಂವ್!”

“ಹಾಂವ್ ಮ್ಹಳ್ಯಾರ್?”

“ಹಾಂವ್ – ಹಮೀದ್” ಮ್ಹಣೊನ್, ಬೊಲ್ಯಾಚ್ಯಾ ಆಡೊಸಾಕ್ ಆಸ್‍ಲ್ಲೊ ಹಮೀದ್, ಚಿಕ್ಕೆ ಹೆವ್ಶಿನ್ ಆಯ್ಲೊ. ತಿಮ್ಮಿಕ್ ಪಯ್ಲೆಂ ವಳಕ್ ಮೆಳೊಂಕ್ ನಾ. ಪಯ್ಲೆಂ ತಾಣೆಂ ಆಂಗ್ ಕಾಡ್ಲೆಂ. ಉಪ್ರಾಂತ್ ತೆಂ ಘಡ್ಬಡ್ಲೆಂ.

“ಎಲಾ, ಎಲಾ, ದೇವೆರೆ! ಹಿ ಕಸಲಿ ಕಥಾ? ತುಂ ಖಂಚ್ಯಾ ಘಾಣ್ಯಾಂತ್ ಮೊಳೊನ್ ಆಯ್ಲಾಯ್ ಮಹಾರಾಯಾ!”

“ಸಕ್ಕಡ್‍ಯೀ ಸಾಂಗ್ತಾಂ ತಿಮ್ಮಿ. ತುಮ್ಗೆರ್ ಯೇಂವ್ಕ್ ಹಾಂವ್ ವಾಟ್ ರಾಕ್ತಾಲೊಂ.”

“ಹ್ಯಾ ಜಿನ್ಸಾರ್, ದಿಸಾ ಉಜ್ವಾಡೆಂ ತುವೆಂ ಯೇನಾತ್ಲೆಂ ಬರೆಂ ಜಾಲೆಂ. ಪುಣ್ ಗಜಾಲ್ ಕಿತೆಂ? ವೆರೊನಿಕಾ ಬಾಯೆಚಿ ಕಾಂಯ್ ಖಬರ್…”

“ವೆರೊನಿಕಾ ಬಾಯೆಚಿ ಖಬರ್ ನಾ… ಆತಾಂ ಖಬರ್ ಮೋನಿಕಾಬಿಚಿ!”

“ಮೋನಿಕಾ ಬಾಯೆಚಿ! ಕಿತೆಂ?”

“ಮೋನಿಕಾಬಿಕ್ ಧರ್ನ್ ವ್ಹೆಲ್ಯಾ!”

“ಅಯ್ಯೋ..! ದೇವೆರೇ!” ತಿಮ್ಮಿನ್ ಕೊವ್ಳಿಗ್ ಹಾತಾಂತ್ಲಿ ಝಡ್ಚ್ಯಾ ಆದಿಂ ಸಕಯ್ಲ್ ದವರ್ಲಿ. ವಾಳ್ಚೆಭಾಜಿ ಸಕಯ್ಲ್ ಉಡಯ್ಲಿ. ವಾರ‍್ಯಾರ್ ಹಾತ್ ಧುವ್ನ್ ರಡೊಂಕ್ ತೆಂ ಲಾಗ್ಲೆಂ.

“ತುವೆಂ ಆತಾಂ ಗಲಾಟೊ ಕರ್ಚಿ ಗರ್ಜ್ ನಾ. ತಿಕಾ ಠಾಣ್ಯಾಕ್ ವ್ಹರೊಂಕ್ ನಾ. ಕಾಲ್ ಸಗ್ಳೊ ದೀಸ್, ಉರ್ವಾಚ್ಯಾ ಮೊಳ್ಯಾಂತ್ ದವರ್ನ್, ರಾತಿಂ ಖಂಯ್ಗೀ ವ್ಹೆಲ್ಯಾ.”

“ತರ್ ತುಂ ಎದೊಳ್ ಖಂಯ್ ಮಾತಿ ಖಾತಾಲೊಯ್?”

“ಮ್ಹಾಕಾಯೀ ಧರ್ನ್ ಬಾಂಧುನ್ ಘಾಲ್ಲೊ ತಿಮ್ಮಿ!”

“ವ್ಹಯ್ಗೀ! ಬೆಜಾರ್ ಕರಿನಾಕಾ” ಚಿಂತುಂಕ್ ಲಾಗ್ಲೆಂ ತಿಮ್ಮಿ. “ಆನಿ, ಅಮ್ಮಯ್ಯ, ಹಿ ಗಜಾಲ್ ಇಜ್ಜಮ್ಮಾಕ್ ಸಾಂಗನಾತ್‍ಲ್ಲಿ ಬರಿ.”

“ತರ್ ಹಾಂವೆಂ ಕಿತೆಂ ಕರಿಜಾಯ್? ಭುಕೆನ್ ಹಾಂವ್ ಮೊರ್ತಾಂ.”

“ಧರ್, ತರ್ – ಆತಾಂ ಹೆಂಚ್ ಪಿಯೆ. ಇಜ್ಜಮ್ಮಾಕ್ ಹಾಂವ್ ಮಾಗಿರ್ ದುಸ್ರೆಂ ಹಾಡ್ನ್ ದಿತಾಂ” ಮ್ಹಣೊನ್ ತಿಮ್ಮಿನ್ ದುದಾಚಿ ಕೊವ್ಳಿಗ್ ಉಕ್ಲುನ್ ಹಮೀದಾಕ್ ಪಿಯೆಂವ್ಕ್ ದಿಲಿ. ತಿತ್ಲೆಂ ಮೊಲಾಧಿಕ್ ಆನಿ ರುಚಿಚೆಂ ಪೀವನ್, ಸಂಸಾರಾಂತ್ ದುಸ್ರೆಂ ನಾ ಮ್ಹಣ್ಚೆಪರಿಂ ತ್ಯಾ ಯುವಕಾನ್ ದೂದ್ ಘೆತ್ಲೆಂ, ಆನಿ ನಿಮಾಣೊ ಥೆಂಬೊ ಪರ್ಯಾಂತ್, ಉಪ್ಕಾರಿ ಮನಾನ್ ಸುಕಯ್ಲೊ.

ಫುಡೆಂ ಕಿತೆಂ ಕರ್ಚೆಂ ಮ್ಹಣ್, ಥೊಡೊ ವೇಳ್ ತಾಣಿಂ ವಿಚಾರ್ ಕೆಲೊ. ಹಮೀದಾನ್ ಸದ್ದ್ಯಾಕ್ ಬೊಕ್ಕಪಟ್ಟಣಾಕ್ ವೆಚೆಂ ಸಾರ್ಕೆಂ ನಹಿಂ ಮ್ಹಣ್ ತಿಮ್ಮಿಯೀ ಒಪ್ಲೆಂ.

“ತರ್ ಅಶೆಂ ಕರ್ಯಾಂ” ಮ್ಹಣಾಲೆಂ ತೆಂ. “ದಿಸಾ ಉಜ್ವಾಡೆಂ ತುವೆಂ ಆಮ್ಗೆರ್‌ಯೀ ಯೆಂವ್ಚೆಪರಿಂ ನಾ. ತುಂ ಹಾಂಗಾಚ್ ಲಿಪೊನ್ ರಾವ್ ಆನಿ ವಿಶೆವ್ ಘೆ. ತುಕಾ ಮಾಗಿರ್ ಇಲ್ಲೆಂ ಜೇಂವ್ಕ್ ಆನಿ ಪಿಯೆಂವ್ಕ್ ಹಾಡ್ನ್ ದಿತಾಂ ಹಾಂವ್. ಕಾಂಯ್, ಸಾಂಜೆಯಿತ್ಲ್ಯಾಕ್ ತೊ ಸಿಲ್ವಾ ನಾಗೆರ್ ಯೇಂವ್ಕ್ ಪುರೊ. ತಾಚೆ ಕಡೆನ್ ಹಾಂವ್ ಹಿ ಗಜಾಲ್ ಸಾಂಗೊನ್ ದವರ್ತಾಂ. ತುಂ ಮಾತ್ರ್, ಅಳೇ, ಚತ್ರಾಯ್, ಶೀದಾ ಮುಖ್ಲ್ಯಾ ವಾಟೆನ್ ಯೇನಾಕಾ. ಘಾಟ್ಯೆಚ್ಯಾ ಬಗ್ಲೆನ್, ಕಾಜುಚ್ಯಾ ಫಾಡಿಂತ್ಲ್ಯಾನ್ ಯೇವ್ನ್, ರಾಂದ್ಚ್ಯಾ ಕುಡಾಚ್ಯಾ ಪಾಟ್ಲ್ಯಾ ಬಾಗ್ಲಾ ಕಡೆನ್ ರಾವ್.”

“ಜಾಯ್ತ್ ತಿಮ್ಮಿ. ಹಾಂವ್ ತರ್, ಪಳೆ, ತ್ಯಾ ಗುಂರ್ಪ್ಯಾ ಬಗ್ಲೆನ್ ಆಸ್ಚ್ಯಾ ಚಿರ‍್ಯಾಂಚ್ಯಾ ಧೊಲಿಂತ್ ನಿದೊನ್ ರಾವ್ತಾಂ. ಮ್ಹಜಿ ತಕ್ಲಿ ಘುಂವ್ತಾ, ಆಂಗ್ ಜಳ್ತಾ ಆನಿ ದೊಳೆ ಹುಲ್ಪತಾತ್” ಮ್ಹಣಾಲೊ ಹಮೀದ್.

“ಬಿರ್ಮತ್! ಜಾಯ್ತ್, ರಾವ್. ಯೆತಾಂ.”

ತಶೆಂ, ತಿಮ್ಮಿ ಭಿತರ್ಲ್ಯಾ ಭಿತರ್ ಕಿತ್ಲೆಂ ಆಕಾಂತ್ಲ್ಯಾರೀ, ಭಾಯ್ಲ್ಯಾನ್ ಕಸಲಿಂಯೀ ಖುಣಾಂ ದಾಕಯ್ನಾಸ್ತಾಂ ಗೆಲ್ಲೆಂ. ದೊನ್ಪಾರ್ ಜಾಂವ್ಚ್ಯಾ ಆದಿಂ, ಕೆಂಳ್ಬ್ಯಾಂಚ್ಯಾ ಶೆಣಯ್ತಾಂತ್ ಪೊಟ್ಲಿ ಬಾಂಧುನ್ ಧಂಯ್ ಭರ್ಶಿಲ್ಲೆಂ ಶಿತ್ ಆನಿ ಭಾಜ್‍ಲ್ಲೆಂ ಖಾರೆಂ, ತಶೆಂಚ್ ಕೊವ್ಳಿಗೆಂತ್ ಉದಾಕ್ ಘೆವ್ನ್, ಗುಂರ್ಪ್ಯಾ ಲಾಗಿಂ ಯೇವ್ನ್ ಹಮೀದಾಕ್ ಉಟವ್ನ್, ಜೇಂವ್ಕ್ ದೀವ್ನ್, “ಕಾಳೊಕ್ ಜಾಲ್ಯಾ ಉಪ್ರಾಂತ್ ಯೇ” ಮ್ಹಣ್ ಸಾಂಗೊನ್ ಪಾಶಾರ್ ಜಾಲ್ಲೆಂ.

ತ್ಯಾಚ್ ಪ್ರಕಾರ್, ಕಾಳೊಕ್ ಜಾತಾನಾ, ಹಮೀದ್, ದುಮ್ಗಾ ಪಿಂತಾಚ್ಯಾ ಘರಾಚಿ ಪಾಟ್ಲಿ ವಾಟ್ ಧರ್ನ್ ಗೆಲ್ಲೊ. ತೊ ಪಾಟ್ಲ್ಯಾ ಬಾಗ್ಲಾರ್ ಪಾವ್ತಾನಾ, ಘರಾಚ್ಯಾ ಮುಖ್ಲ್ಯಾ ವಾಟೆನ್ ದುಸ್ರೊಚ್ ಗಲಾಟೊ ಜಾಲೊ. ಚವ್ಗ್ ಪಾಂಚ್ ಜಣಾಂನಿ ಉಲಯಿಲ್ಲೊ, ಹುಡ್ಕಿಲ್ಲೊ ಆನಿ ಮಾರಾಂಚೊ ಆವಾಜ್ ಆಯ್ಕಲೊ.

ಷೇರ್ ಖಾನ್ ಆನಿ ತಾಚೆ ಸಾಂಗಾತಿ, ಸಕಾಳಿಂಚ್ಯಾ ಆದೇಸಾಂತ್, ಉರ್ವಾಚ್ಯಾ ಮೊಳ್ಯಾಂತ್, ಹಮೀದಾಕ್ ಸೊಧುನ್ ಸಲ್ವಲ್ಲೆ.

“ಸಾಲಾ… ಬದ್ಮಾಶ್, ಮೊರೊಂದಿ.” ತೀರ್ಪ್ ದಿಲೆಂ, ಷೇರ್ ಖಾನಾನ್. “ಮ್ಹಾಕಾ ಆಜ್ ರಾತಿಂಚ್ ಪಯ್ಣ್ ಕರುಂಕ್ ಜಾಯ್. ಪುಣ್ ವೆಚ್ಯಾ ಆದಿಂ ಕಾವೂರಾಂತ್ ಥೊಡೆಂ ಕಾಮ್ ಆಸಾ. ಥಂಯ್ಸರ್ ದಾದ್ಲೆ ಮನಿಸ್ ನಾಂತ್ – ತ್ಯಾ ಘರಾಂತ್ ಜಾಯ್ತೆಂ ದಿರ್ವೆಂ ಆಸಾ. ಆನಿ, ಹ್ಹೆ-ಹ್ಹೆ! ಕಾಲ್ ಧರ್‌ಲ್ಲ್ಯಾ ಮ್ಹಾಲಾ ಸಾಂಗಾತಾ, ಮ್ಹಜೆ ಖಾತಿರ್ ವ್ಹರೊಂಕ್ ಏಕ್ ಚೆಡುಂ ಥಂಯ್ಸರ್ ಆಸಾ. ಹ್ಹೆ-ಹ್ಹೆ! ಥಂಯ್ಸರ್ ಮೆಳ್‍ಲ್ಲೊ ದುಡು ಆನಿ ಭಾಂಗಾರ್, ಹಾಂವ್ ತುಮ್ಕಾಂ ವಾಂಟುನ್ ದಿತಾಂ.”

ತಶೆಂ, ತ್ಯಾ ಸಾಂಜೆರ್ ಕಾವೂರಾಕ್ ತೆ ಪಾವ್‍ಲ್ಲೆ. ಪುಣ್ ಘರಾಕ್ ಲಾಗಿಂ ಪಾವ್ತಾನಾ – ಕಾಂಯ್, ಮೊಳ್ಯಾಂತ್ ಧಾಂವ್‍ಲ್ಲೊ ಯುವಕ್, ಥಂಯ್ ಪುಣೀ ಗೆಲಾ ಜಾಲ್ಯಾರ್ ವಿಚಾರ್ಚೆಂ ನೀಬ್ – ತಾಕಾ ಝಳ್ಕಲ್ಲೆಂ ಮಾತ್ರ್. ತೆ ಫುಡ್ಲ್ಯಾ ಬಾಗ್ಲಾರ್ ಪಾವೊನ್, ಆವಾಜ್ ಕರ್ತಾನಾ, ಚಿಕ್ಕೆ ಆದಿಂ ಆಯಿಲ್ಲೊ ಜಾಕುಲೊ ಪೈ ಥಂಯ್ಸರ್ ಆಸ್‍ಲ್ಲೊ – ಇಜಾಬೆಲ್ ತೆರೆಜಾಕ್ ಸಾಂಡುನ್ ಧಾಂವೊಂಕ್ ನಾ ಕಬೂಲ್ ಜಾಲೊ. ಗೊಟ್ಯಾಂತ್ ಆಸ್‍ಲ್ಲೊ ಬೊಮ್ಮಾಯೀ ‘ಇಜ್ಜಮ್ಮಾಕ್’ ರಾಕೊಂಕ್ ಧಾಂವೊನ್ ಆಯ್ಲೊ. ಅವ್ಚಿತ್ ತಶಿ ಫರಾಮಸ್ ಜಾಲ್ಲ್ಯಾನ್, ಸಾರ್ಕೆಂ ಝಗ್ಡೊಂಕ್‍ಯೀ ಅವ್ಕಾಸ್ ನಾಸ್ತಾನಾ ತಶೆ ಕೈದಿ ತೆ ಜಾಲ್ಲೆ.

ಭಾಯ್ಲ್ಯಾನ್ ಆವಾಜ್ ಜಾತಾನಾ, ತಿಮ್ಮಿನ್ ರಾಂದ್ಚ್ಯಾ ಕುಡಾಕ್ ಸಾಲಾಚೆಂ ದಾರ್ ಬಂದ್ ಕರ್ನ್, ಪಾಟ್ಲ್ಯಾನ್ ಕೆಂಳ್ಬ್ಯಾ ಹಿತ್ಲಾಚೆಂ ದಾರ್ ಉಗ್ತೆಂ ಕೆಲ್ಲೆಂ. ಥಂಯ್ಸರ್ ಹಮೀದ್ ರಾವೊನ್ ಥರ್ಥರ್ತಾಲೊ. ದುಸ್ರೆಂ ಕಿತೆಂ ಕರ್ಚೆಂ ಮ್ಹಣ್ ಮತಿಕ್ ಯೇನಾಸ್ತಾನಾಂ, ಹಮೀದಾಕ್ ತಾಣೆಂ ಉತ್ವಾರ್ ಚಡವ್ನ್ ಬೀಗ್ ಘಾಲೆಂ, ಆನಿ ಪಾಟ್ಲ್ಯಾ ಬಾಗ್ಲಾಂತ್ಲ್ಯಾನ್ ಭಾಯ್ರ್ ತೆಂ ಧಾಂವ್ಲೆಂ. ಸೊಪ್ಯಾರ್ ಆನಿ ಸಾಲಾಂತ್ ಡೊಂಬಿ ಆನಿ ಇಜಾಬೆಲ್ ತೆರೆಜಾಚೆರ್ ಅತ್ಯಾಚಾರ್ ಜಾಂವ್ಚಿಂ ಖುಣಾಂ ಸಮ್ಜತಚ್, ಚಡ್ ತೆಂ ಭಿಯೆಲೆಂ, ಆನಿ ಕೋಣ್ ಪುಣೀ ಪುನೆಗೆಲ್ಲ್ಯಾಂಕ್ ಮೆಳ್ಳ್ಯಾರ್ ಆಪಂವ್ಚ್ಯಾ ಇರಾದ್ಯಾನ್ ಸಕಯ್ಲ್ ಧಾಂವ್ಲೆಂ.

ಪುಣ್ಯಾನ್ ತ್ಯಾಚ್ ವೆಳಾರ್, ಸರ್ದಾರ್ ಸಿಮಾಂವ್ ಆನಿ ತಾಚೆ ಸವಾರ್ ಯೇವ್ನ್ ಫಾಲ್ಕ್ಯಾಂತ್ ಪಾವ್‍ಲ್ಲೆ.

* * * * *

ಉತ್ವಾರ್ ಥಾವ್ನ್ ಸಕಯ್ಲ್ ದೆಂವವ್ನ್, ತಿಮ್ಮಿನ್ ಭಾಯ್ರ್ ಹಾಡ್‍ಲ್ಲ್ಯಾ ಹಮೀದಾನ್, ಆನಿ ಭರ್ಶಿಕ್ ತಿಮ್ಮಿನ್ ದಿಲ್ಲೊ ವಿವರ್, ಸರ್ದಾರ್ ಸಿಮಾಂವ್ನ್ ಆಯ್ಕೊನ್ ಘೆತ್ಲೊ. ಚಡಿತ್ ವಿವರಾಚಿ ತಾಕಾ ಗರ್ಜ್ ನಾ ಜಾಲಿ. ಹಮೀದಾಚಿ ಆನಿ ತಿಮ್ಮಿಚಿ ಶಿಫಾರಸ್ ತಾಣೆಂ ಉಚಾರ್ಲಿ.

“ಕಾಫಿ ಪಿಯೆಯಾ – ಭಾಯ್ರ್ ಸರ್ಯಾಂ!” ಮ್ಹಣಾಲೊ ಸರ್ದಾರ್ ಸಿಮಾಂವ್.

“ಹಾಂವ್‍ಯೀ ಯೆತಾಂ!” ಮ್ಹಣಾಲೊ ಜಾಕುಲೊ.

“ತುಜಿ ಆನಿ ಬೊಮ್ಮಾಚಿ ಗರ್ಜ್ ಆತಾಂ ನಾ. ಪಯ್ಲೆಂ, ಮೋನಿಕಾ ಬಾಯೆಕ್ ಹಾಂವ್ ಪಾಟಿಂ ಹಾಡ್ತಾಂ… ಬಹುಶ್ಯ ದೀಸ್-ದೋನ್ ದಿಸಾಂ ಭಿತರ್!” ಆಯ್ಕಲ್ಲ್ಯಾ ಗ್ರಾಯ್ಕಾಂಕ್, ನವ್ಯಾ ಭರ್ವಸ್ಯಾಚೊ ನವೊ ಜೀವ್ ಭರ್ಲೊ.

“ಆನಿ ವೆರೊನಿಕಾಬಾಯ್?” ಇಜಾಬೆಲ್ ತೆರೆಜಾನ್ ಲೋವ್ ವಿಚಾರ್ಲೆಂ.

“ಹಾಂವ್ ನೆಣಾಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಭವಿಷ್ಯಾಚ್ಯಾ ಗರ್ಭಾಂತ್ ಹಾತ್ ಘಾಲುಂಕ್ ಹಾಂವ್ ಸಕನಾ. ಪುಣ್, ಆಜ್-ಕಾಲ್ ಜಾಲ್ಲ್ಯಾ ಘಟನಾಂಕ್ ಗಾಂಟ್ ಆಸಾ ಮ್ಹಣ್ಚ್ಯಾಕ್ ದುಬಾವ್ ನಾ – ಆಮ್ಚೆಂ ಎದೊಳ್ಚೆಂ ಕಾಮ್ ವ್ಯರ್ಥ್ ಜಾಂವ್ಕ್ ನಾ!”

ಅಂತುಲ್ಯಾನ್, ಪರ್ತ್ಯಾನ್ ಆಪ್ಲಿಚ್ ಮಿಶಿ ವೊಳಾಯ್ಲಿ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

ಆಮಿ ಫಾಯ್ಸ್ ಕೆಲ್ಲ್ಯೊ ಆದ್ಲ್ಯೊ ಕಾದಂಬರಿ