ಇಂಫೆರ್ನಾಚಿಂ ದಾರಾಂ – 8: “ಧಾಂವ್ ಪುತಾ… ಜೀವ್ ವಾಂಚಯ್!”
Posted on : April 26, 2025 at 9:00 AM
ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 8
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)
ಪ್ರಕರಣ್ 8: “ಧಾಂವ್ ಪುತಾ… ಜೀವ್ ವಾಂಚಯ್!”
ದೋನ್‍ಂಚ್ ದಿಸಾಂ ಆದಿಂ.
ದೋನ್ ವಾ ತೀನ್ – ಹಮೀದಾಕ್, ಸಾರ್ಕೊ ಉಗ್ಡಾಸ್ ನಾತ್‍ಲ್ಲೊ. ಪುಣ್ ದೀಸ್ ತೊ ಆಯ್ತಾರ್. ಆಯ್ತಾರಾಚಿ ರಾತ್. ನಹಿಂ, ಸೊಮಾರಾಚೆಂ ಫಾಂತೆಂ.
ತ್ಯಾ ಆಯ್ತಾರಾಚ್ಯಾ ರಾತಿಂ, ಕೊಡಿಯಾಳ್‍ಬೈಲ್, ಸಾವ್ಕಾರ್ ಮಾರ್ಸೆಲ್ ಕುವೆಲಿಚ್ಯಾ, ಬಿಡಾರ್ ಸಾಂಡ್ಲೆಲ್ಯಾ, ತ್ಯಾ ಘರಾಂತ್ ಜಮ್ಲೆಲಿ ಜಮಾತ್, ದುಖೇಸ್ತಾಂಚಿ ಜಾವ್ನಾಸ್‍ಲ್ಲಿ. ಕಿತ್ಯಾಕ್, ಹರ್ಶೆಂಚೆಪರಿಂ, ಜಮಾತೆಚೆಂ ಯೆಜ್ಮಾನ್ಪಣ್ ವಹಿಸುಂಚಿ ಮಾನಿನ್ ವೆರೊನಿಕಾ ಕುವೆಲ್ ತ್ಯಾ ದಿಸಾ ನಾತ್‍ಲ್ಲಿ. ಪಾಟ್ಲ್ಯಾಚ್ ಹಫ್ತ್ಯಾಂತ್, ಬೊಕ್ಕಪಟ್ಟಣಾ ಥಾವ್ನ್ ಕಾವೂರಾಕ್ ವಚೊನ್ ಯೆತಾಂ ಮ್ಹಣ್ ಭಾಯ್ರ್ ಸರೊನ್ ಗೆಲ್ಲಿ ಮಾನಿನ್ ತಿ, ವಾರ‍್ಯಾರ್ ಮ್ಹಳ್ಳೆಪರಿಂ – ನಪಂಯ್ಚ್ ಜಾಲ್ಲಿ.
ದುಮ್ಗಾ ಪೀಂತ್ ಆನಿ ತಾಚೆ ಮಾನಾಯ್, ವಾಜ್ಭಿ ಆನಿ ತೀಸ್ ದಿಸಾಂಚ್ಯಾ ವಾಯ್ದ್ಯಾ ಖಾತಿರ್, ಮಂಗ್ಳುರಾ ಭಾಯ್ರ್ ವಚೊನ್ ಲಿಪ್‍ಲ್ಲೆ ಜಾಲ್ಲ್ಯಾನ್, ಅಸಲ್ಯಾ, ಮಾಗ್ಣ್ಯಾಚ್ಯಾ ಜಮಾತಿಂಕ್, ಫುಡ್ಲೆ ಥೊಡೆ ದೀಸ್, ತಾಣಿಂ ಹಾಜರ್ ಜಾಂವ್ಚೆಪರಿಂ ನಾತ್‍ಲ್ಲೆಂ.
ತಾಂಚೆ ಪಯ್ಕಿಂತ್ಲ್ಯಾ ದೊಗಾಂಕ್, ಇಲಾರ್ ಸಿಕೇರಿಕ್ ಆನಿ ಕಾಲೆಸ್ತ್ ಮಸ್ಕರೇಞಾಕ್, ಹಸ್ಸನ್ ಮಹಮ್ಮದಾನ್ ತಾಂಡೆಲಾಂಪರಿಂ ನ್ಹೆಸವ್ನ್, ಆಪ್ಲ್ಯಾ ಮಂಜೆಂತ್ ಭಾಯ್ರ್ ವ್ಹೆಲ್ಲೆಂ.
ಕುಲ್ಶೇಕರ್ಚೊ ಜೋಕಿಮ್ ಸಿಲ್ವಾ ಪೈ ಎಕ್ಲೊ ಮಾತ್ರ್, ಕಾವೂರ್, ಇಜಾಬೆಲ್ ತೆರೆಜಾಚೆರ್ ಆನಿ ಬೊಕ್ಕಪಟ್ಟಣಾಂತ್ ಧುವ್ಡಿ ಮಿರಿಯಮಾಚೆರ್ ದೀಷ್ಟ್ ಘಾಲುಂಕ್ ಸಾಧ್ಯ್ ಜಾಂವ್ಚ್ಯಾ ಖಾತಿರ್, ತಸೊಚ್ ಲಿಪೊನ್ ಮಂಗ್ಳುರಾ ಭಿತರ್ ರಾವ್‍ಲ್ಲೊ. ದೆಕುನ್, ಚಿಕ್ಕೆ ಘಟ್‍ಮೂಟ್ ಮಾನಾಯಾಂ ಪಯ್ಕಿ ತೊ ಎಕ್ಲೊ ಮಾತ್ರ್ ಜಮಾತೆಕ್ ಆಯಿಲ್ಲೊ. ಹೆರ್ ಚವ್ಗ್ ಪಾಂಚ್ ಜಣ್ ಆಯಿಲ್ಲೆ, ಭೋವ್ ಪ್ರಾಯ್ವಂತ್ ಆನಿ ಪಿಡೇಸ್ತ್.
ನೋವ್ ಧಾ ಜಣ್ ಸ್ತ್ರೀಯೊ, ಚಡಾವತ್ ಪ್ರಾಯ್ವಂತ್ ವಾ ವಿಶ್ವ್ಯಾಂಚೆ ಆನಿ ಭಲಾಯ್ಕೆಚೆ ಊಣ್ ಆಸ್‍ಲ್ಲ್ಯೊ, ಜಮಾತೆಕ್ ಆಯಿಲ್ಲ್ಯೊ. ಇಜಾಬೆಲ್ ತೆರೆಜ್, ರಾತ್ ಆನಿ ವಾಟ್ ಪಯ್ಸ್ ದೆಕುನ್ ಯೇಂವ್ಕ್ ನಾ.
ತ್ಯಾ ದಿಸಾಚೆಂ ಯೆಜ್ನಾನ್‍ಪಣ್ ಮೊನಿಕಾ ಕುವೆಲಿನ್, ದುಖಾಂ ಗಳವ್ನ್ ವಹ್ಸಿಲ್ಲೆಂ. ದುಖಾಂ ಗಳವ್ನ್ ದುಕಿಚೆಚ್ ಮಿಸ್ತೆರ್ ತಿಣೆಂ ಶಿಕಯಿಲ್ಲೆ. ದುಖಾಂ ಗಳವ್ನ್ ತಾಣಿಂ ಸಕ್ಡಾಂನಿ, ವೆರೊನಿಕಾ ಕುವೆಲಿಚ್ಯಾ ಖಬ್ರೆ ಖಾತಿರ್ ಆನಿ ಶಾಬಿತಾಯೆ ಖಾತಿರ್, ಹಾತ್ ವಯ್ರ್ ಕರ್ನ್ ಮಾಗ್ಣೆಂ ಕೆಲೆಂ.
ಹಮೀದ್, ಸೊಪ್ಯಾ ವಯ್ಲ್ಯಾ ಕಾಳೊಕಾಂತ್ ಪಹರೊ ಬಸ್‍ಲ್ಲೊ.
ಜಮಾತ್ ಆಖೇರ್ ಜಾಲ್ಯಾ ಉಪ್ರಾಂತ್, ಜಾಕುಲೊ ಪೈ ಆನಿ ಚಡಾವತ್ ದಾದ್ಲೆ ಮನಿಸ್ ಆನಿ ಸ್ತ್ರೀಯೊ, ಮಧ್ಯಾನ್ ರಾತ್ ಜಾಂವ್ಚ್ಯಾ ಆದಿಂಚ್ ಪಾಟಿಂ ಗೆಲಿಂ.
ಮೊನಿಕಾಕ್ ಜಿವಾ ಭಿತರ್ ಚಿಕ್ಕೆ ಪುರಾಸಣ್‍ಶೆಂ ಭೊಗ್ತಾಲೆಂ ಜಾಲ್ಲ್ಯಾನ್, ಆನಿ ಪ್ರತ್ಯೇಕ್ ಜಾವ್ನ್ ಆಪ್ಲ್ಯಾ ಮಾಂಯ್ ಘರಾ ಏಕ್ ರಾತ್ ರಾಂವ್ಚೆಂ ತಿಕಾ ಮನ್ ಜಾಲ್ಲ್ಯಾನ್,
“ಹಾಂವ್ ರಾತಿಂ ಹಾಂಗಾಚ್ ವಿಶೆವ್ ಘೆವ್ನ್, ಫಾಂತ್ಯಾರ್ ಪಾಟಿಂ ಯೆತಾಂ. ಹಮೀದ್ ಸೊಪ್ಯಾರ್ ನಿದೊಂದಿ” ಮ್ಹಣಾಲಿ. ತಿಚ್ಯಾ ಸಾಂಗಾತಾ ಎಕ್ಲಿ ಮ್ಹಾತಾರಿ ರಾವ್ಲಿ.
ಫಾಂತ್ಯಾರ್, ದುಸ್ರೊ ಕೊಂಬೊ ಸಾದ್ ಘಾಲ್ತಚ್ ತಿ ಉಟ್ಲಿ. ಕಾಳೊಕಾಂತ್ ಮಾಗ್ಣೆಂ ತಿಣೆಂ ಕೆಲೆಂ. ಹಮೀದಾಕ್ ತಿಣೆಂ ಉಟಯ್ಲೆಂ. ಬೊಕ್ಕಪಟ್ಟಣಾಕ್ ವಚೊಂಕ್ ತಿಂ ಭಾಯ್ರ್ ಸರ್ಲಿಂ. ಅಸ್ತಮ್ತೆಚೆಂ ಥೊಡೆಂ ಚಾಂದ್ಣೆಂ ಆಸ್‍ಲ್ಲೆಂ. ಮೊನಿಕಾಚಿಂ ಚಿಂತ್ನಾಂ, ತಿಚ್ಯಾ ಪಯ್ಣಾಚೆರ್ ನಾತ್‍ಲ್ಲಿಂ.
ಪುಣ್ ಹಮೀದಾಕ್, ಆದ್ಲ್ಯಾ ರಾತಿಚೊ ಸಂಶಯ್ ಥಿರ್ ಜಾಲೊ. ಕೋಣ್‍ಗೀ ತಾಂಕಾಂ ರಾಕೊನ್ ರಾವೊನ್, ಆತಾಂ ತಾಂಚೊ ಪಾಟ್ಲಾವ್ ಕರ್ನ್ ಯೆತಾತ್ ಮ್ಹಣ್ ತಾಕಾ ಸ್ಪಷ್ಟ್ ಜಾಲೆಂ.
“ಅಮ್ಮಾ, ಮೋನಿಕಾಬಿ…” ಮ್ಹಣಾಲೊ ತೊ.
“ಕಿತೆಂ ಹಮೀದ್?”
“ಹೆಂ ಮ್ಹಾಕಾ ಬರೆಂ ಲಾಗನಾ. ಕೋಣ್‍ಗೀ ಆಮ್ಚೊ ಪಾಟ್ಲಾವ್ ಕರ್ನ್ ಯೆತಾತ್…”
ತಿತ್ಲ್ಯಾರ್ ತಿಂ, ಕುದ್ರೋಳೆಚ್ಯಾ ಸಂಧಾರ್ ಪಾವ್‍ಲ್ಲಿಂ. ಥಂಯ್ಸರ್ ಗಾಡಿಯೆ ಬೊಯ್ಲಾಂಚ್ಯಾ ಖಿಣ್ಕುಳ್ಯಾಂಚೊ ಆವಾಜ್ ತಾಂಕಾಂ ಆಯ್ಕಲ್ಲೊ. ಜಾಲ್ಯಾರೀ ಧೈರ್ ಘೆವ್ನ್, ತೊ ಕುದ್ರೋಳೆಚೊ, ಉದಾಕ್ ಸುಕ್‍ಲ್ಲೊ, ವ್ಹಾಳ್ ತಿಂ ಉತರ್ಲಿಂ.
“ಅಮ್ಮಾ… ಅಲ್ಲಾ..!” ಹಮೀದ್ ಆಡ್ ಪರ್ತಲೊ. ತಾಚ್ಯಾ ಢೊಖ್ಯಾರ್, ಹಾತ್-ಮೊಟ್ಯಾ ಎಕಾ ಸೊಂಟ್ಯಾಚೊ ಮಾರ್!
“ಜೆಜೂ! ಸಾಂತಾ ಖುರ್ಸಾ ಬಾಪಾ!” ಅಕ್ಲಾಸ್ಲಿ ಮೊನಿಕಾ. ಮುಖ್ಲ್ಯಾನ್, ಪಾಟ್ಲ್ಯಾನ್, ದಾವ್ಯಾನ್, ಉಜ್ವ್ಯಾನ್ ತಶೆ ಚವ್ಗ್ ಜಣ್ ತಿಕಾ ವೆಡೊ ಮಾರ್ನ್ ರಾವ್‍ಲ್ಲೆ.
“ಹ್ಹೆ-ಹ್ಹೆ-ಹ್ಹೇ! ನಸ್ರಾನಿ ಬಾಯ್ಲೇ, ಆವಾಜ್ ಜರ್ ಕರಿನಾ ಜಾಶಿ, ತುಕಾ ವಾಯ್ಟ್ ಜಾಂವ್ಚೆಂ ನಾ…” ಕಸಲ್ಯಾಗೀ ಹಾತೆರಾಚೊ ಧೊಮೊಸ್, ತಿಚ್ಯಾ ವಕ್ಷಾರ್ ಪಾಂಗ್ರಿಲ್ಲ್ಯಾ ಬುರ್ಖಾ ವಯ್ಲ್ಯಾನ್ ಆನಿ ಭಿತರ್ಲೊ ಪಾಲಂವ್ ಆನಿ ಬಾಜ್ವೆಚಿಂ ಕಾಪ್ಡಾಂ ಉತ್ರೊನ್, ತೆಂಕೊನ್ ಹಾಳ್ವಾಯೆನ್ ಕೊಂಕುಂಕ್ ಮ್ಹಳ್ಳೆಪರಿಂ ರಾವ್‍ಲ್ಲೊ.
ಜಾಲ್ಯಾರೀ, “ಕೋಣ್ ತುಮಿ? ಕಿತೆಂ ತುಮ್ಕಾಂ ಜಾಯ್?” ತಿಣೆಂ ವಿಚಾರ್‌ಲ್ಲೆಂ, ಅರ್ಧಿ ಮತ್ ಚುಕೊನ್ ಶೆವ್ಟಲ್ಲ್ಯಾ ಯುವಕ್ ಹಮೀದಾಕ್ ಆಯ್ಕಲೆಂ.
“ಹ್ಹೆ-ಹ್ಹೇ…” ಆಯ್ಕಲಿ ಜಾಪ್. “ನಸ್ರಾನಿ ಬಾಯ್ಲೇ, ಆವಾಜ್ ಕರಿನಾಕಾ. ಉಲಯ್ನಾಕಾ, ಗಾಡಿಯೆರ್ ಚಡ್! ಉಟಾವೋ ಇಸ್‍ಕೂ!”
ಲಜ್ಮಾಂಡ್ಯಾ ಆನಿ ಕ್ರೂರ್ ಹಾತಾಂನಿ, ಮೊನಿಕಾಕ್ ಆರಾವ್ನ್ ಆನಿ ಉಕ್ಲುನ್ ಗಾಡಿಯೆಚ್ಯಾ ಕಮಾನಾ ಭಿತರ್, ಭಾತೆಣಾಚೆರ್ ಆಪ್ಟಿಲೆಂ. ದುಸ್ರ್ಯಾ ಕ್ಷಣಾನ್, ಧರ್ಣಿರ್ ಶೆವ್ಟಲ್ಲ್ಯಾ ಹಮೀದಾಕ್‍ಯೀ, ದರ್ಗ್ಯಾ ಹಾತಾಂನಿ ಆರಾವ್ನ್, ಗಾಡಿಯೆಂತ್ ಶೆವ್ಟಿಲೊ.
ಮೋನಿಕಾಕ್, ಭಿಯಾನ್ ಜಾಂವ್ ಧಯ್ರಾನ್, ಕ್ರೋಧಾನ್ ಜಾಂವ್ ಸೈರಾಣಾನ್, ಕಸಲೊಚ್ ಆವಾಜ್ ಕರುಂಕ್ ಜೀಬ್ ಸುಟನಾ ಜಾಲಿ. ಸರ್ವ್ ತಿಚೆ ಭೊಗ್ಣಾರ್ ಆನಿ ಚಿಂತ್ನಾಂ ಸ್ತಬ್ದ್ ಜಾವ್ನ್, ತ್ಯಾ ಗಾಡಿಯೆಂತ್ ರುಕಾ ಕುಡ್ಕ್ಯಾಪರಿಂ, ಉಡಯಿಲ್ಲೆ ಕಡೆನ್ ಪಡೊನ್ ತಿ ರಾವ್ಲಿ. ಹಮೀದ್‍ಯೀ ತಸೊಚ್ ಉರ್ಲೊ. ಚವ್ಗ್ ಪಾಂಚ್ ಜಣ್ ಗಾಡಿಯೆಂತ್ ಚಡ್ಲೆ.
ಕಮಾನಾರ್ ಬಸ್‍ಲ್ಲ್ಯಾ ಗ್ರಾಯ್ಕಾಚ್ಯಾ ಮ್ಹಿನತೆನ್, ಆನಿ ಚಾಟಿಯೆಚ್ಯಾ ಮಾರಾನ್, ಥೊಡ್ಯಾ ವೆಳಾ ಉಪ್ರಾಂತ್, ಗಾಡಿ ಚಾಲು ಜಾಲಿ. ಕ್ರಮೇಣ್, ತಿ, ಉರ್ವಾ ಮಯ್ದಾನ್ ಉತ್ರೊನ್, ಚಡುಣೆಂ ಮೊಳ್ಯಾ ಲಾಗಿಂ ಪಾವ್ತಾನಾ ದೀಸ್ ಉಜ್ವಾಡ್ಲೊ. ಪಡ್‍ಲ್ಲೆ ಕಡೆನ್‍ಂಚ್, ಹಮೀದಾಚಿ ಮತ್ ನಿತಳ್ಳಿ. ಪುಣ್ ಮತ್ ಚುಕ್‍ಲ್ಲೆಪರಿಂಚ್, ಪಡೊನ್ ತೊ ರಾವ್ಲೊ.
ಗಾಡಿಯೆಚ್ಯಾ ಬೊಯ್ಲಾಂಕ್ ಪಿಶೆಂ ವಾರೆಂ’ಶೆಂ ಲಾಗ್ಲೆಂ. ತೆ, ಮೇಟ್ ಮುಖಾರ್ ಕಾಡಿನಾ ಜಾಲೆ. ತಾಂಕಾಂ ಭೆಂಕ್ಡಾಯ್ಲೆಂ, ಜಾಯ್ತೆಂ ಮಾರ್ಲೆಂ, ಬಡಯ್ಲೆಂ – ಪುಣ್ ಗಾಡಿ ಫುಡೆಂ ವಚನಾ ಜಾಲಿ.
“ವ್ಹಡ್ ನಹಿಂ – ಹಾಂಕಾಂ ಹಾಂಗಾ ದೆಂವಯಾ ಆನಿ ಗಾಡಿ ತೆವ್ಶಿನ್ ವ್ಹರಾ!” ಕೊಣೆಂಗೀ ತಾಕಿದ್ ದಿಲಿ. “ಥೊಡೊ ವೇಳ್ ತಾಂಚೆ ದೊಳೆ ಬಂದ್ ಕೆಲ್ಯಾರ್ ಜಾತಿತ್.”
“ತರ್ನಾಟೊ ತೋತಾ ಜಾಲಾ. ತಾಚೆ ದೊಳೆ ಬಾಂಧ್ಚಿ ಗರ್ಜ್ ನಾ” ಆನ್ಯೇಕ್ಲ್ಯಾನ್ ಜಾಪ್ ದಿಲಿ.
ಪರ್ತ್ಯಾನ್, ಲಜ್ಮಾಂಡ್ಯಾ ಹಾತಾಂನಿ, ಮೊನಿಕಾಚ್ಯಾ ದೊಳ್ಯಾಂಕ್, ಬುರ್ಖಾಚ್ಯಾ ವಯ್ಲ್ಯಾನ್‍ಂಚ್ ಏಕ್ ವಸ್ತುರ್ ರೆವ್ಡಾವ್ನ್ ಗಾಂಟ್ ಘಾಲಿ, ಆನಿ ತಿಕಾ ಹೆವ್ಶಿನ್ ವೊಡುನ್, ಧರ್ಣಿರ್ ರಾವಯ್ಲೆಂ. ಹಮೀದಾಕ್, ಪಾಯಾಂಕ್ ಧರ್ನ್ ವೋಡ್ನ್ ಸಕಯ್ಲ್ ಘಾಲೆಂ.
ದೊಗಾಂನಿ ಮೊನಿಕಾಚ್ಯಾ ಬಾವ್ಳ್ಯಾಂಕ್ ಧರುನ್, ಖರ್ಕಸ್ ವಾಟೆನ್ ವೊಡುನ್ ಆನಿ ಚಲವ್ನ್ ತಿಕಾ ವ್ಹೆಲೆಂ. ಆವಾಜ್ ಕರುಂಕ್ ವಾ ಝಗ್ಡೊಂಕ್ ತಿಚೆ ಥಂಯ್ ತ್ರಾಣ್ ಜಾಂವ್ ಮನ್ ಉಡೊನ್ ಗೆಲ್ಲೆಂ.
ನಿಶ್ಚೇಷ್ಟಿತ್ ಜಾಲ್ಲ್ಯಾ ಜಿನ್ಸಾರ್, ಹಮೀದಾಕ್ ಆನ್ಯೇಕ್ಲ್ಯಾನ್ ಖಾಂದಾರ್ ವ್ಹಾವವ್ನ್ ವ್ಹೆಲೊ. ತಶೆಂ, ಥೊಡಿ ವಾಟ್ ಗೆಲ್ಯಾ ಉಪ್ರಾಂತ್ ತಾಣಿಂ ಪಯ್ಣ್ ರಾವಯ್ಲೆಂ. ಹಮೀದಾಕ್ ಧರ್ಣಿರ್ ಉಡಯ್ಲೊ. ಮೊನಿಕಾಕ್ ಎಕಾ ರುಕಾ ಮುಳಾಂತ್ ರಾವಯ್ಲೆಂ. ತಿಚ್ಯಾ ದೊಳ್ಯಾಂಕ್ ಆಡ್ ಬಾಂಧ್‍ಲ್ಲೆಂ ವಸ್ತುರ್ ಎಕ್ಲ್ಯಾನ್ ಸೊಡಯ್ಲೆಂ. ಖಂಯ್ಸರ್ ಆಸಾಂ ಮ್ಹಣ್ ತಿಕಾ ಪಯ್ಲೆಂ ಸಮ್ಜೊಂಕ್ ನಾ. ಉಪ್ರಾಂತ್, ಖಂಯ್ಗೀ ಎಕಾ ರಾನಾಂತ್ ಆಪುಣ್ ಆಸಾಂ ಮ್ಹಣ್ ತಿ ಸಮ್ಜಲಿ. ತಾಂಕಾಂ ತ್ಯಾ ಉರ್ವಾಚ್ಯಾ ಮೊಳ್ಯಾ ಭಿತರ್ ಹಾಡ್ಲಾಂ ಮ್ಹಣ್ ಹಮೀದ್ ಸಮ್ಜಲೊ.
ತಾಂಚ್ಯಾ ಭೊಂವಾರಿಂ, ಅರ್ಕಟ್ ಪರ್ಕಟ್ ಶಿಪಾಯಾಂಪರಿಂ ನ್ಹೆಸ್‍ಲ್ಲೆ ಸ ಜಣ್ ಉಬೆ ಆಸ್‍ಲ್ಲೆ. ತಾಂಚ್ಯಾ ಮುಖೆಲ್ಯಾಪರಿಂ ದಿಸ್ಚೊ, ಶಿರ್ಪುಟೊ, ಲಾಂಬೆಟೊ ಫುಡೆಂ ಯೇವ್ನ್, ಮೊನಿಕಾಕ್ ಪಳೆವ್ನ್ ಲಾಳ್ ಗಳವ್ನ್ ಚಿಕ್ಕೆ ರಾವ್ಲೊ. ಮೊನಿಕಾಚಿ ತಕ್ಲಿ ಘುಂವ್‍ಲ್ಲೆಪರಿಂ ಜಾವ್ನ್, ತೆದೊಳ್ ಭೊಗನಾತ್‍ಲ್ಲಿ ಭಿರಾಂತ್, ತಿಚ್ಯಾ ಕಾಳ್ಜಾಂತ್ ಜೀವ್ ಜಾಲಿ.
“ಹ್ಹೆ-ಹ್ಹೆ-ಹ್ಹೇ…” ಹಾಸ್ಲೊ ತೊ. “ನಸ್ರಾನಿ ಸುಂದರೀ, ತುವೆಂ ಕಾಂಯ್ ಭಿಯೆಂವ್ಚಿ ಗರ್ಜ್ ನಾ. ತುಜ್ಯಾ ಜಿವಾಕ್ ಕಾಂಯ್ ಬಾಧಕ್ ನಾ. ಕಾಂಯ್ ಆವಾಜ್ ವಾ ಗಲಾಟೊ ಕರಿನಾಸ್ತಾಂ, ಹಾಂವೆಂ ಸಾಂಗ್‍ಲ್ಲೆಪರಿಂ ಆಯ್ಕಶಿ ಜಾಲ್ಯಾರ್, ತುಜ್ಯಾ… ಆಮ್ಚ್ಯಾ ಸುಖಾಕ್ ಕಾಂಯ್ ಉಣೆಂ ಜಾಂವ್ಚೆಂ ನಾ. ಹ್ಹೆ-ಹ್ಹೆ-ಹ್ಹೇ…” ಮ್ಹಣೊನ್ ತಿಚೊ ಬಾವ್ಳೊ ಧರುಂಕ್ ತೊ ಫುಡೆಂ ಸರ್ಲೊ.
ಕಾಂಠಾಳೊನ್ ಆನಿ ಭಿಯಾನ್ ತಿಣೆಂ ಏಕ್ ಮೇಟ್ ಪಾಟಿಂ ಕಾಡ್ಲೆಂ. “ಮ್ಹಜ್ಯಾ ಜಿವಾಚಿ ಮ್ಹಾಕಾ ಆಶಾ ನಾ” ಮ್ಹಣಾಲಿ ತಿ. “ಆತಾಂಚ್ ಮ್ಹಜೊ ಜೀವ್ ತುಮಿ ಕಾಡ್ಲ್ಯಾರೀ ಉಪ್ಕಾರ್‌ಚ್ ಜಾಯ್ತ್!”
“ಹ್ಹೆ-ಹ್ಹೇ…” ಖೆಂಕಾರ್ಲೊ ತೊ. “ತುಂ ಮೆಲ್ಯಾರ್ ಆಮ್ಕಾಂ ಕಾಂಯ್ ಫಾಯ್ದೊ ನಾ. ಸೊಡ್! ತುಜೆ ಕಡೆನ್ ಆತಾಂ ಉಲಂವ್ಕ್ ಮ್ಹಾಕಾ ವೇಳ್ ನಾ. ಉಲಯ್ತಾಂ ಆನಿ ಸಾಂಗ್ತಾಂ – ಫಾವೊ ತೊ ವೇಳ್ ಯೆತಾನಾ. ಚಲೋ…” ಮ್ಹಣಾಲೊ ತೊ ಸಾಂಗಾತ್ಯಾಂಕ್. “ಆತಾಂ ಹಿಕಾ ವ್ಹರುಂಕ್ ಸಾಧ್ಯ್ ನಾ. ಪರತ್ ಕಾಳೊಕ್ ಜಾತಾ ಮ್ಹಣಸರ್ ಹಾಂಗಾ ತಿ ಆಸೊಂದಿ. ಸಾಂಜೆರ್ ತಿಕಾ ವ್ಹರ್ಯೆತ್. ಖಾಮೋಶ್! ಅನಾವಶ್ಯೆಂ ಏಕ್ ದೀಸ್ ವ್ಯರ್ಥ್ ಜಾಲೊ…”
“ತರ್ನಾಟ್ಯಾಕ್ ಕಿತೆಂ ಕರ್ಚೆಂ? ತಾಕಾಯೀ ವ್ಹರ್ಚೊ?”
“ಹ್ಹೆ-ಹ್ಹೇ… ತಾಕಾ ವ್ಹರ್ಚೊ ನಹಿಂ… ತಾಕಾ ಸಾಂಜೆರ್ ಧಾಡ್ಚೊ” ಮ್ಹಣೊನ್ ಆಪ್ಲ್ಯಾ ಗಳ್ಯಾಚೆರ್ ಬೋಟ್ ವೋಡ್ನ್, ಗೊಮ್ಟಿ ಲುಂವ್ಚೊ ಘುರ್ತ್ ಕೆಲೊ ತಾಣೆಂ.
“ತರ್ ಆತಾಂ?”
“ಆತಾಂ ಆಮ್ಕಾಂ ಆಮ್ಚಿ ಹೆರ್ ಥೊಡಿ ತಯಾರಾಯ್ ಕರುಂಕ್ ಆಸಾ. ಎಕ್ಲೊ ಹಾಂಕಾಂ ಪಹರಜ್ ಕರ್ನ್ ರಾವೊಂದಿ.”
“ದೊಗಾಂಕ್ ರಾಕೊಂಕ್ ಎಕ್ಲೊಚ್…”
“ಪುರೊ. ತಾಂಚೆ ಹಾತ್, ವಾಲಿಂನಿ ಪಾಟಿಂ ಬಾಂಧುನ್, ಆನಿ ತಶೆಂಚ್ ಪಾಯಾಂಕ್‍ಯೀ ಪಾಸ್ ಘಾಲ್ನ್ ಸೊಡ್ಯಾ!”
“ತಿಂ ಬೋಬ್ ಪುಣೀ ಮಾರ್ತಿತ್ ಜಾಲ್ಯಾರ್?”
“ಹಾಂ, ವ್ಹಯ್. ತಾಂಕಾಂ ಬಾಂಧುನ್ ಜಾಲ್ಯಾ ಉಪ್ರಾಂತ್, ತ್ಯಾ ತರ್ನಾಟ್ಯಾಚ್ಯಾ ತೊಂಡಾಂತ್ ಥೊಡ್ಯೊ ಖೊಲ್ಯೊ ಚೆಪ್ಯಾ.”
“ಆನಿ… ತಿಚ್ಯಾ?”
“ತಿ ಬೋಬ್ ಮಾರಿಶಿ ನಾ. ಪ್ರಯತ್ನ್ ಪುಣೀ ಕರಿತ್ ಜಾಲ್ಯಾರ್, ರಾಕ್ವಲಿ, ಅಹಮ್ಮದೆ, ತಿಚಿ ಸುಕರ್ನಳಿ ಚಿಕ್ಕೆ ದಾಂಬುನ್ ಸೊಡ್… ಚಡ್ ನಹಿಂ. ಹ್ಹೆ-ಹ್ಹೇ! ತಶೆಂ ಕರುಂಕ್ ತುಕಾ ಖುಶಿ ಜಾತೆಲಿ. ಗರ್ಜೆ ಶಿವಾಯ್, ಆಪಡ್ನಾಕಾ ಹಾಂ… ಹ್ಹೆ-ಹ್ಹೆ-ಹ್ಹೆ!”
ಲಾಗ್ಸಾರ್ ಆಸ್‍ಲ್ಲ್ಯೊ ಥೊಡ್ಯೊ ವಾಲಿ ಕಾತರ್ನ್ ತಾಣಿಂ ಕಾಮ್ ಕೆಲೆಂ. ಅಹಮ್ಮದೆಕ್ ಆನಿ ತಿಕಾ, ಪೊಟಾಕ್ ಘಾಲುಂಕ್ ಕಾಂಯ್ ಇಲ್ಲೆಂ ಧಾಡ್ನ್ ದಿತಾಂ ಮ್ಹಣ್ ಭಾಸಾವ್ನ್, ಆನಿ ಉಪ್ರಾಂತ್ ಕೈದ್ಯಾಂಕ್ ಥೊಡೆಂ ತುಕ್ಲಾವ್ನ್, ಆನಿ ಬುರ್ಶೆಂ ಉಲವ್ನ್ ಪಾಂಚ್ ಜಣ್ ಥಂಯ್ ಥಾವ್ನ್ ಭಾಯ್ರ್ ಸರೊನ್ ಗೆಲೆ. ಅಹಮ್ಮದೆ ನಾಂವಾಚೊ, ಚಿಕ್ಕೆ ಪ್ರಾಯ್ವಂತ್ ಎಕ್ಲೊ, ರಾಕ್ವಲಿ ಜಾವ್ನ್ ಪಾಟಿಂ ಉರ್ಲೊ.
ಥೊಡೊ ವೇಳ್ ಪಾಶಾರ್ ಜಾಲೊ. ಅಹಮ್ಮದೆ, ಆಪ್ಣಾಕ್ ಸಾಂಗ್‍ಲ್ಲೆಂ ಹೆಂ ಕಾಮ್ ಬರೆಂ ನಹಿಂ ಮ್ಹಣ್ಚ್ಯಾ ಜಿನ್ಸಾರ್, ತಕ್ಲಿ ಹಾಲವ್ನ್ ಆನಿ ಆಪ್ಣಾಯಿತ್ಲ್ಯಾಕ್‍ಚ್ ಮ್ಹಣ್ಮುಣ್‍ಲ್ಲೆಪರಿಂ ಆವಾಜ್ ಕರ್ನ್, ಲಾಗ್ಸರ್ ಆನಿ ಮುಖಾರ್ ಪಾಟಿಂ ಪಾಸಾಯೊ ಮಾರಿತ್ತ್ ಥೊಡೊ ವೇಳ್ ರಾವ್ಲೊ. ಉಪ್ರಾಂತ್ ಥೊಡ್ಯಾ ವೆಳಾನ್, ಮೊನಿಕಾಕ್ ಚಿಕ್ಕೆ ಲಾಗಿಂ ಆಸ್‍ಲ್ಲ್ಯಾ ಎಕಾ ಫಾತ್ರಾರ್ ತೊ ಯೇವ್ನ್ ಬಸ್ಲೊ. ಮತಿಂತ್ ಕಸಲಿಂಗೀ ಚಿಂತ್ನಾಂ ಆಟಯಿತ್ತ್, ತಿಕಾಚ್ ಪಳೆಂವ್ಕ್ ತೊ ಲಾಗ್ಲೊ.
ಅಸಹಾಯಕ್ ಪರಿಸ್ಥಿತೆಂತ್ ಮೊನಿಕಾ ಆಸ್‍ಲ್ಲಿ. ಅಹಮ್ಮದೆಚಿಂ ಚಿಂತ್ನಾಂ ಕಸಲಿಂ ಮ್ಹಣ್ ತಿಕಾ ಕಳಿತ್ ನಾತ್‍ಲ್ಲೆಂ ಜಾಲ್ಯಾರೀ, ನರ್ ಮನಿಸ್ ನಾತ್‍ಲ್ಲ್ಯಾ ತ್ಯಾ ರಾನಾಂತ್, ಜೀವ್ ಗೆಲ್ಯಾರೀ ವ್ಹಡ್ ನಹಿಂ, ಪುಣ್, ಆಪ್ಲೊ ಮಾನ್ ರಾಕ್ಚಿ ದುಸ್ಸಾಧ್ಯತಾ ಚಿಂತುನ್ ಸಗ್ಳಿಚ್ ತಿ ಘಾಮೆಲಿ. ತರೀ, ಕುಲ್ಕುಲೊನ್ ಥರ್ಥರ್ಲಿ. ದೊಳೆ ತಿಣೆಂ ಘಟ್ಟ್ ಧಾಂಪ್ಲೆ ಜಾಲ್ಯಾರೀ, ಮುಖಾರ್ ಬಸೊನ್, ತಿಕಾಚ್ ಪಳೆವ್ನ್ ಆಸ್‍ಲ್ಲ್ಯಾ ಮನ್ಶ್ಯಾಕ್ ಚಿಂತುನ್ ತಿಚೆ ವಿಶ್ವೆ ಕಾಂಪ್ಲೆ.
“ದೆವಾ!” ಕಾಳ್ಜಾಚ್ಯಾ ಗುಂಡಾಯೆ ಥಾವ್ನ್ ತಿಣೆಂ ಪ್ರಾರ್ಥನ್ ಕೆಲೆಂ. “ಕಸಲೆಂ ಪುಣೀ ಸಂಯ್ಭಿಕ್ ಅವ್ಗಡ್ ಧಾಡ್ನ್, ಮ್ಹಾಕಾ ತುಜೆ ಸರ್ಶಿನ್ ಮಾಡ್ತಿರಾಂಚ್ಯಾ ಸರ್ಗಾಕ್ ಆಪಯ್! ಪುಣ್ ಬಾಪಾ, ಅಸಲ್ಯಾ ಪರಿಸ್ಥಿತೆಂತ್ಲಿ ಮ್ಹಾಕಾ ರಾಕ್… ಭಾಗೆವಂತ್ ಖುರ್ಸಾ, ಮ್ಹಾಕಾ ನಿವಾರ್… ಮಿಲಾಗ್ರಿಂಚ್ಯಾ ಸಾಯ್ಬಿಣಿ…”
ಬಗ್ಲೆನ್ ತಿಕಾ ಆವಾಜ್ ಆಯ್ಕಲೊ. ದೊಳೆ ಉಗ್ತೆ ಕರ್ನ್ ಹಾಳ್ವಾಯೆನ್ ತಕ್ಲಿ ತಿಣೆಂ ಘುಂವ್ಡಾಯ್ಲಿ. ತಿಚ್ಯಾ ಮತಿಂತ್ಲೆ ಅಕ್ಲಾಸ್ ಸಮ್ಜೊನ್ ಮ್ಹಳ್ಳೆಪರಿಂ, ಹಮೀದ್ ಆಪ್ಲೆ ಹಾತ್ ಆನಿ ಪಾಯ್ ಸುಟಂವ್ಕ್ ಧಡ್ಬಡ್ತಾಲೊ. ತಾಚೆಂ ಪ್ರಯತ್ನ್ ವ್ಯರ್ಥ್ ಜಾಂವ್ಚೆಂ ಪಳೆವ್ನ್, ಅಹಮ್ಮದೆ ಹಾಸ್ತಾಲೊ. ತಿತ್ಲ್ಯಾ ವರ್ವಿಂ ಪುಣೀ ತಾಚಿ ದೀಶ್ಟ್ ಆನಿ ಗುಮಾನ್, ಮೊನಿಕಾಚೆರ್ ಥಾವ್ನ್ ಸುಟ್‍ಲ್ಲ್ಯಾ ಖಾತಿರ್, ತಿಕಾ, ಘಡ್ಯೆಚೆಂ ಸಮಾಧಾನ್ ಜಾಲೆಂ.
ಹಮೀದ್ ಥೊಡೊ ವೇಳ್ ಉರ್ಡಲೊ. ಸಲ್ವಲೊ. ತಾಕಾ ಖರಸ್ ಆಯ್ಲಿ. ಖೊಂಕ್ಲಿ ಆಯ್ಲಿ. ತೊಂಡಾಂತ್ ಖೊಲಿಯೊ ಚೆಪೊನ್ ಆಸ್‍ಲ್ಲ್ಯಾ ವರ್ವಿಂ ತೊ ಫುಗಾರ್ ಜಾಲೊ, ಉಸ್ಮಡ್ಲೊ ಆನಿ ಥಂಡ್ ರಾವ್ಲೊ.
ಹ್ಯಾ ಘಟನಾ ವರ್ವಿಂ ಜಾವ್ಯೆತ್, ಉಪ್ರಾಂತ್ ಅಹ್ಮದೆನ್ ಮೊನಿಕಾಕ್‍ಚ್ ಪಳೆವ್ನ್ ಬಸ್ಚೆಂ ಬಂದ್ ಕೆಲೆಂ. ಉಟೊನ್ ಹಾಂಚೆ ಸರ್ಶಿನ್ ತೊ ಆಯ್ಲೊ, ಆನಿ ತಾಂಕಾಂ ಬಾಂಧುನ್ ಘಾಲ್ಲೆ ವಾಲಿಂಚೆ ಪಾಸ್ ಸಾರ್ಕೆ ಆಸಾತ್ ಮ್ಹಣ್ ದೃಢ್ ಕೆಲೆಂ. ಜಾತಚ್, ಬಗ್ಲೆಚ್ಯಾ ಬೊಲ್ಯಾಂಚ್ಯಾ ಆಡೊಸಾಂತ್ಲ್ಯಾನ್ ತೊ ಚಿಕ್ಕೆ ಪಯ್ಸ್ ಗೆಲೊ… ಕಾಂಯ್ ಉದಾಕ್ ಸೊಧುನ್ ಜಾವ್ಯೆತ್, ವಾ ಹೆರ್ ಕಾಂಯ್ ಕಾರಣಾನ್ ಜಾವ್ಯೆತ್. ಹಾಂಕಾಂ ತೆಂ ಪಡೊನ್ ವಚೊಂಕ್ ನಾತ್‍ಲ್ಲೆಂ. ಸದ್ದ್ಯಾಕ್, ಲಾಗಿಂ ತೊ ನಾ ಮ್ಹಳ್ಳೆಂಚ್ ಸಮಾಧಾನ್.
ಮೊನಿಕಾ, ಪರ್ತ್ಯಾನ್ ಆಪ್ಣಾಯಿತ್ಲ್ಯಾಕ್ ಮಾಗ್ಣೆಂ ಕರ್ತಾಲಿ. ಥೊಡ್ಯಾ ವೆಳಾನ್ ಆಪ್ಲೆ ಪಾಸ್ ಸುಟಂವ್ಕ್, ಹಮೀದಾನ್ ಪರ್ತ್ಯಾನ್ ಪ್ರಯತ್ನ್ ಕೆಲೆಂ. ವ್ಯರ್ಥ್. ತೊ ಥಕ್ಲೊ. ಖರ್ಶೆವ್ನ್, ಥಂಡ್ ಜಾಲೊ.
“ಹಮೀದ್?” ಮ್ಹಣಾಲಿ ಮೊನಿಕಾ ವ್ಹಳೂ.
“ಹ್ಮೂ…” ಹಮೀದಾನ್ ಜಾಪ್ ದಿಲಿ.
“ತುಂ ಭೆಷ್ಟೆಂ ಉರ್ಡೊನ್, ತುಕಾಚ್ ಘಾಯ್ ಕರ್ನ್ ಘೆತಾಯ್! ತುಜ್ಯಾ ಹಾತಾಂ ಪಾಯಾಂಕ್ ವಾಲಿ ಚಾಬ್ಲ್ಯಾತ್. ಕಾತ್ ಫುಟೊನ್ ರಗತ್ ದೆಂವ್ತಾ! ಸಮಾಧಾನ್ ಕಾಣ್ಗೆ.”
“ಉ-ಹ್ಮೂ” ಹಮೀದಾನ್ ಆವಾಜ್ ಕೆಲೊ.
“ಆನಿ ಹಮೀದ್?”
“ಆಮ್ಚೊ ರಾಕ್ವಲಿ ದಿಸನಾ. ಹಾಂವೆಂ ಬೋಬ್ ಘಾಲ್ಯಾರ್ ಕಾಂಯ್ ಪುಣೀ ಪ್ರಯೋಜನ್ ಜಾಯ್ತ್‍ವೇ?”
“ನಾ. ಪ್ರಯೋಜನ್ ಜಾಂವ್ಚೆಂ ನಾ” ಪಾಟ್ಲ್ಯಾನ್ ಅಹ್ಮದೆಚಿ ಜಾಗ್ವಣ್ ಆಯ್ಲಿ. ತೊ ಚಡ್ ಪಯ್ಸ್ ವಚೊಂಕ್ ನಾತ್‍ಲ್ಲೊ. ಲಾಗ್ಸರ್ ಕಾಂಯ್ ಉದಾಕ್ ಪುಣೀ ಆಸ್ಲ್ಯಾರ್ ಪಳೆಂವ್ಕ್ ತೊ ಗೆಲ್ಲೊ ವ್ಹಯ್. ಉದಾಕ್ ಮೆಳೊಂಕ್ ನಾತ್‍ಲ್ಲೆ ವರ್ವಿಂ, ಪಾಟಿಂ ಯೇವ್ನ್ ಥಂಯ್ಚ್ ಲಾಗ್ಸರ್ ಹಳ್ತಾಚಿ ಏಕ್, ಕುಂಕ್ಡಾಚಿ ನೀದ್ ಕಾಡ್ತಾಲೊ ತೊ. ಹಾಣಿಂ ಉಲಯಿಲ್ಲೊಸೊ ಆವಾಜ್ ಆಯ್ಕತಚ್ ಉಟೊನ್ ಜಟ್ಪಟ್ ಹೆವ್ಶಿನ್ ಆಯಿಲ್ಲೊ ತೊ.
“ಪ್ರಯೋಜನ್ ಜಾಂವ್ಚೆಂ ನಾ” ಪರ್ತ್ಯಾನ್ ಮ್ಹಣೊನ್, ಮೊನಿಕಾ ಸರ್ಶಿನ್ ತೊ ಆಯ್ಲೊ. “ತುವೆಂ ಇತ್ಲೆಂ ಉಲಯಿಲ್ಲ್ಯಾ ಖಾತಿರ್‌ಚ್, ತುಜಿ ತಿ ಕಾಂಡಿಯೆ ಸಾರ್ಕಿ ಗೊಮ್ಟಿ ಪೊಶೆವ್ನ್, ಸುಕರ್ನಳಿ ಚಿಕ್ಕೆ ಚಿರ್ಡಿಯಾಂ ಮ್ಹಣ್ ಭೊಗ್ತಾ ಮ್ಹಾಕಾ!” ದಾವ್ಲಿ ಫುಲಯಿಲ್ಲ್ಯಾ ಜಿನ್ಸಾರ್, ಏಕ್ ಹಾತ್ ತಾಣೆಂ ಮುಖಾರ್ ದಾಕಯ್ಲೊ. ಮೊನಿಕಾನ್ ಭಿಯಾನ್ ಶ್ವಾಸ್ ಧರ್ಲೊ.
“ಹ್ಮೂ-ಹ್ಮೂ!” ಆವಾಜ್ ಬಂದ್ ಕೆಲೊ ಹಮೀದಾನ್. ಅಹ್ಮದೆ ತಾಚ್ಯಾ ಕುಶಿನ್ ಘುಂವೊನ್ ಪಳೆಂವ್ಕ್ ಲಾಗ್ಲೊ. ಉಪ್ರಾಂತ್ ಲಾಗಿಂ ಗೆಲೊ.
“ಆಹಾಂ” ಮ್ಹಣಾಲೊ ತೊ. “ಸೂಆರ್! ತುಕಾ ಹಾಂವೆಂ ಪಳೆಲ್ಲೆಂ ಬರೆಂ ಜಾಲೆಂ. ನಾ ಜಾಲ್ಯಾರ್, ತುಜ್ಯಾ ತೊಂಡಾಂತ್ ಚೆಪ್‍ಲ್ಲ್ಯೊ ಖೊಲಿಯೊ, ಚಿಂವಡ್ ಜಾವ್ನ್ ಭಾಯ್ರ್ ಯೆತ್ಯೊ. ಬೋಬ್ ಮಾರ್ತೊಯ್ ತುಂ!”
ಬಾಗ್ವೊನ್, ತೆವ್ಶಿಲ್ಯಾನ್ ಪಡೊನ್ ಆಸ್‍ಲ್ಲೆಂ, ಪಯ್ಲೆಂ ಮೊನಿಕಾಚ್ಯಾ ದೊಳ್ಯಾಂಕ್ ಆಡ್ ಬಾಂಧುನ್ ಉಡಯಿಲ್ಲೆಂ, ವಸ್ತುರ್ ತಾಣೆಂ ವಿಂಚ್ಲೆಂ. ತೆಂ ವೊಳಾವ್ನ್, ಹಮೀದಾಚ್ಯಾ ತೊಂಡಾರ್, ವೊಂಟಾಂಚೆರ್ ಅರ್ನುನ್ ಪಾಟ್ಲ್ಯಾನ್ ಗಾಂಟ್ ಘಾಲ್ನ್ ಬಾಂಧ್ಲೆಂ. ಹಮೀದಾಕ್ ಶ್ವಾಸ್ ಸೊಡುಂಕ್ ಪಯ್ಲೆಂಚ್ಯಾ ಪ್ರಾಸ್ ಚಡ್ ತ್ರಾಸ್ ಜಾಲೆ.
ಅಹ್ಮದೆ, ತ್ಯಾ ಉಪ್ರಾಂತ್ ಹಾಂಚ್ಯಾ ಖಬ್ರೆಕ್ ಯೇಂವ್ಕ್ ನಾ. ಲಾಗ್ಸರ್‌ಚ್ ಆಡ್ ಪಡೊನ್ ಜೆಮೆಂವ್ಕ್ ಲಾಗ್ಲೊ ತೊ. ಸಾಂಜ್ ಜಾವ್ನ್ ಆಯ್ಲಿ. ಮುಖೆಲ್ಯಾನ್ ಭಾಸಾಯಿಲ್ಲೆಪರಿಂ, ಪೊಟಾಕ್ ಘಾಲುಂಕ್, ಎದೊಳ್‍ಯೀ ಯೇವ್ನ್ ಪಾವೊಂಕ್ ನಾತ್‍ಲ್ಲೆಂ. ಕೈದ್ಯಾಂ ಸಾಂಗಾತಾ, ತಾಕಾಯೀ ಉಪ್ವಾಸ್ ಜಾಲ್ಲೊ.
ಹೆವ್ಶಿಲ್ಯಾನ್ ಮೋನಿಕಾ, ಆಪ್ಲಿ ಪರಿಸ್ಥಿತಿ ಚಿಂತುನ್ ರಡ್ತಾಲಿ, ಮೊರ್ನಾಕ್ ಆಶೆತಾಲಿ ಆನಿ ಮಾಗ್ಣೆಂ ಕರ್ತಾಲಿ. ನಿಜಾಯ್ಕೀ, ಇಂಫೆರ್ನಾಚಿಂ ದಾರಾಂ ತಿಕಾ ಜೀವ್ ಆಸ್ತಾನಾಂಚ್ ಗಿಳುಂಕ್ ಉಗ್ತೆಂ ಜಾಲ್ಲೆಪರಿಂ ತಿಕಾ ಭೊಗ್ತಾಲೆಂ.
ತೆವ್ಶಿಲ್ಯಾನ್ ಹಮೀದ್, ತಾಚ್ಯಾಚ್ ರಾಟಾವಳಿಂನಿ ತಲ್ಲೀನ್ ಜಾಲ್ಲೊ. ಕಸೊ ಪುಣೀ, ಸಾಂಜೆ ಭಿತರ್ ಸುಟೊನ್, ಆಪ್ಲೊ ಆನಿ ಮೋನಿಕಾಬಿಚೊ ಜೀವ್ ವಾಂಚಯ್ಜಾಯ್ ಮ್ಹಳ್ಳ್ಯಾ ಶಪಥಾನ್ ತೊ ವಾವುರ್ತಾಲೊ.
ತೊ ಪಡೊನ್ ಆಸ್‍ಲ್ಲೆ ಕಡೆನ್‍ಂಚ್, ಪಾಜೆ ಫಾತ್ರಾಚೆಂ ಏಕ್ ಕೈಲಾಡ್ ಆಸ್‍ಲ್ಲೆಂ ತಾಚ್ಯಾ ಗುಮಾನಾಕ್ ಗೆಲ್ಲೆಂ. ಎಕಾ ಬಗ್ಲೆನ್ ಚಡುಣೆಂ ಅರ್ಧಿ ಹಾತಿ ಲಾಂಬಾಯೆಕ್, ಚೂಪ್ ಧಾರ್ ಆಸ್‍ಲ್ಲಿ. ಥಂಯ್ಚ್ ಲೊಳೊನ್, ಆವಾಜ್ ಕರಿನಾಸ್ತಾನಾ ಘುಂವೊನ್, ಪಾಟಿಂ ಬಾಂಧ್‍ಲ್ಲ್ಯಾ ಹಾತಾಂಚೊ ಕಟ್ ಧಾರೆಚ್ಯಾ ತೊಂಡಾರ್ ಝರಯ್ತಾಂ ಝರಯ್ತಾಂ – ಅಹ್ಮದೆನ್ ಜಾಗ್ರುತ್ ಜಾವ್ನ್ ಹೆವ್ಶಿನ್ ಪಳೆನಾ ಜಾಲ್ಯಾರ್ ಪುರೊ, ಅಲ್ಲಾ!
ವಾಲ್, ಕಾತಿಂತ್ ಆನಿ ಮಾಸಾಂತ್ ರಿಗೊನ್ ರಗತ್ ದೆಂವ್ತಾಲೆಂ. ಪುಣ್ ಹಮೀದಾನ್ ಆಪ್ಲೆಂ ಪ್ರಯತ್ನ್ ಸಾಂಡುಂಕ್ ನಾ.
ಕಟ್ ತುಟೊನ್, ಪಾಸ್ ಸುಟ್ಲೊ. ಲಾಗಿಂ ರೂಕ್ ಜಾಲ್ಲೆ ತಾಚೆ ಹಾತ್, ಸ್ವತಂತ್ರ್ ಜಾವ್ನ್, ಸವ್ಕಾಸ್ ಮುಖ್ಲ್ಯಾನ್ ಆಯ್ಲೆ – ದುಕಿನ್ ಆನಿ ಸಂತೊಸಾನ್ ತೆ ಕಾಂಪ್ತಾಲೆ. ದುಸ್ರ್ಯಾ ಘಡ್ಯೆ ತಾಚ್ಯಾ ಪಾಯಾಂಚೊ ಕಟ್ ಸುಟ್ಲೊ. ತೋಂಡ್ ಸ್ವತಂತ್ರ್ ಜಾಲೆಂ. ತೊಂಡಾಂತ್ಲೊ ಕೋಯ್ರ್ – ‘ಥೂ-ಥುಕ್!’ ಆವಾಜ್ ಜಾಲೊ. ಅಹ್ಮದೆ, ಜಾಗೊ ಜಾವ್ನ್, ಉಟೊನ್ ಬಸೊನ್, ದೊಳೆ ಘಷ್ಟಿತಾಲೊ. ತೆಂಚ್, ತಾಣೆಂ ತಾಚ್ಯಾ ಜಿಣಿಯೆಂತ್ ಕೆಲ್ಲೆಂ ನಿಮಾಣೆಂ ಕಾಮ್ ಜಾಂವ್ಕ್ ಪಾವ್ಲೆಂ…
ತಿತ್ಲ್ಯಾರ್, ಹಮೀದಾನ್ ಉಕ್ಲುನ್ ಮಾರ್‌ಲ್ಲೊ, ಜಿವ್ಯಾ ನಾರ್ಲಾ ಗಾತ್ರಾಚೊ ಚಿರ‍್ಯಾ ಫಾತೊರ್ ಅಹ್ಮದೆಚ್ಯಾ ಖಡ್ಡ್ಯಾರ್ ಭರಾನ್ ಆಪ್ಟಲ್ಲೆಪರಿಂಚ್, ಮೊನಿಕಾನ್ ಲ್ಹಾನ್ ಚೀತ್ಕಾರ್ ದಿಲೊ. ಅಹ್ಮದೆ, ಖಡ್ಡೊ ಫುಟೊನ್, ಮೆಂದು ಉಸ್ಳೊನ್, ಆಪ್ಲ್ಯಾಚ್ ರಗ್ತಾಂತ್, ಸಾಸ್ಣಾಕ್ ನಿದ್ಲೊ.
ಫುಡ್ಲ್ಯಾ ಘಡ್ಯೆ, ಹಮೀದ್, ಮೋನಿಕಾ ಸರ್ಶಿನ್ ಪಾವ್ಲೊ. ತಿಚ್ಯಾ ಹಾತಾಂಚೆ ಕಟ್ ಸೊಡಂವ್ಕ್ ಹಾತ್ ಘಾಲ್ತಾನಾ, ಕೊಣೆಂಗೀ ಹಾಸೊನ್, ಉಲವ್ನ್ ಲಾಗಿಂ ಯೆಂವ್ಚೊ ಆವಾಜ್ ತಾಂಕಾಂ ಆಯ್ಕಲೊ. ಹಮೀದಾಚೆ ಹಾತ್ ಕಾಂಪ್ಲೆ ಆನಿ ಘುಸ್ಪಡ್ಲೆ. ಆವಾಜ್ ಆನಿಕೀ ಲಾಗಿಂ ಆಯ್ಕತಾಲೊ.
“ಹಮೀದ್, ಧಾಂವ್!” ಸುಸ್ಕಾರ್ಲಿ ಮೋನಿಕಾ. ತಿಚ್ಯಾ ಹಾತಾಂಚೆ ಕಟ್ ಸುಟ್‍ಲ್ಲೆ ಜಾಲ್ಯಾರೀ, ಕೋಮಲ್ ತೆ ಹಾತ್ ರೂಕ್‍ಚ್ ಜಾಲ್ಲೆ. ತಿಚ್ಯಾನ್ ಹಾಲಂವ್ಕ್ ತೆ ಜಾಯ್ನಾತ್‍ಲ್ಲೆ. “ಮ್ಹಜೆ ಪಾಯ್ ಸುಟಯ್ಲ್ಯಾರೀ, ಹಾಲಂವ್ಕ್ ಜಾಂವ್ಚೆಂ ನಾಂತ್. ಮ್ಹಾಕಾ ಚಲೊಂಕ್ ಜಾಂವ್ಚೆಂ ನಾ. ತುಕಾ ಪುಣೀ ಸುಟ್ಕಾ ಲಾಭೊಂದಿ… ಹೆರಾಂಕ್ ಕಳಯ್ಶಿ… ಧಾಂವ್!”
“ಅಮ್ಮಾ… ಮೋನಿಕಾಬೀ, ತುಕಾ ಸೊಡ್ನ್ ಧಾಂವ್..? ಪಿಶೆಂ. ಪಯ್ಲೆಂ ಹಾಂವ್ ಮೊರ್ತಾಂ. ವೆರೊನಿಕಾಬಿಯೀ ನಾ…”
“ಪಿಶ್ಯಾಂಪರಿಂ ಉಲಯ್ನಾಕಾ!” ಅಮ್ಸರ್ಲಿ ಮೋನಿಕಾ. “ತುಂ ಭಾಯ್ರ್ ಉರ್ಲ್ಯಾರ್ ಮಾತ್ರ್, ಹೆರಾಂಕ್‍ಯೀ ಖಬರ್ ದೀವ್ನ್ ಆಮ್ಚಿಂ ಸೊಧ್ನಾಂ ಕರಯ್ಶಿ! ಹಾಂಗಾ ರಾವೊನ್ ಜರ್ ತುಂ ಮೊರ್ಶಿ! ದೆವಾ! ತೆ ಲಾಗಿಂ ಪಾವ್ಲೆ… ಧಾಂವ್ ಪುತಾ…”
“ಮಾಯೀ…” ತಿಚ್ಯಾ ಪಾಯಾಂಚೆರ್ ಮುಖ್ ತೆಂಕುನ್ ಸುಸ್ಕಾರೊನ್ ರಡ್ಲೊ ಹಮೀದ್. “ಅಮ್ಮಾ..!”
“ಬಾಳಾ!” ಮೊನಿಕಾಯೀ ದುಳ್ದುಳ್ಯಾಂ ರಡ್ತಾಲಿ – ಕಾಳ್ಜಾಚ್ಯಾ ನೀಜ್ ಉಮಾಳ್ಯಾಂನಿ. ತಾಚ್ಯಾ ಭುಜಾಂಕ್ ಧರ್ನ್ ತಿಣೆಂ ತಾಕಾ ಲಾಗಿಂ ವೊಡ್ಲೊ, ಆನಿ ಘಾಮಾನ್ ಆನಿ ದುಖಾಂನಿ ಭಿಜ್‍ಲ್ಲ್ಯಾ ತಾಚ್ಯಾ ದೊನೀ ಪೊಲ್ಯಾಂಕ್ ಉಮೊ ದಿಲೊ. “ಧಾಂವ್ ಬೇಟಾ! ಜೀವ್ ವಾಂಚಯ್!”
“ಅಮ್ಮಾ… ತುಕಾ ಸೊಧುನ್, ವೆಗಿಂ ಯೆತಾಂ… ದೀದೀ…” ಆನಿಕೀ ತೊ ರಡ್ತಾಲೊ.
ಹಾಸೊನ್, ಪಟ್ಟಾಂಗಾಂ ಮಾರ್ನ್ ಪಾಂಚ್ ಜಣ್ ಭೋವ್ ಲಾಗಿಂ ಪಾವ್ಲೆ – ಪ್ರವೇಶ್ ಜಾಲೆ. ಹಮೀದ್, ಹೆವ್ಶಿಲ್ಯಾ ಬೊಲ್ಯಾ ಬಗ್ಲೆನ್ ರಿಗೊನ್ ಧಾಂವ್ತಾನಾ ಹಾಂಕಾಂ ಝಳ್ಕಲೊ…
“ಕ್ಯಾ ಬಾತ್…” ಮೊಡೆಂಯೀ ತಾಂಕಾಂ ದಿಸ್ಲೆಂ. ಘಡ್ಯೆ ತೆ ಥಟಕ್ ಜಾಲೆ. ದುಸ್ರ್ಯಾ ಘಡ್ಯೆ ಎಕಾಚ್ ಮನ್ಶ್ಯಾಪರಿಂ, ಹಮೀದ್ ಧಾಂವ್‍ಲ್ಲ್ಯಾ ವಾಟೆನ್ ಧಾಂವ್ಲೆ.
“ದೆವಾ! ತ್ಯಾ ಭುರ್ಗ್ಯಾಕ್ ಬಚಾವ್ ಕರ್..!” ರುದಾನ್ ಕೆಲೆಂ ಮೋನಿಕಾನ್. ಸಾಂಗಾತಾ ಮೊರ್ಚೊ ಸ್ವಾರ್ಥ್ ತಿಣೆಂ ಚಿಂತುಂಕ್ ನಾ, ಬಗಾರ್ ಪೆಲ್ಯಾ ಭುರ್ಗ್ಯಾಚಿ ಬಚಾವಿ..! ನಿಜಾಯ್ಕೀ ಖರಿ ಸ್ತ್ರೀ ವರ್ತವ್ತಾ, ಬೃಹತ್ ಸೃಷ್ಟೆಂತ್ಲಿ ಮಹಿಮಾ – ಬೃಹತ್ ಸೃಷ್ಟೆಚಿ ಆವಯ್ ನೀಜ್, ನೀಜ್ ಸ್ತ್ರೀಯೆಚೆಂ ಕಾಳಿಜ್! ಆನಿ ಖರಿಚ್, ತಿ ವರ್ತವ್ತಾ, ಮೊಗಾಚ್ಯಾ ಹಜಾರ್ ಮುಖಾಂಚೆಂ ಎಕ್‍ಚ್ ಪ್ರತಿರೂಪ್.
(ಮುಂದರುಂಕ್ ಆಸಾ)
ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
