ಇಂಫೆರ್ನಾಚಿಂ ದಾರಾಂ – 3: ಸ್ವಪಣ್ ಆನಿ ಜಾಗ್ವಣ್
Posted on : March 22, 2025 at 10:41 AM
ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 3
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)
ಪ್ರಕರಣ್ 3: ಸ್ವಪಣ್ ಆನಿ ಜಾಗ್ವಣ್
ಸಕಾಳಿಂಚೊ ತಿಸ್ರೊ ಜಾವ್ ಆರಂಭ್ ಜಾಂವ್ಚ್ಯಾ ಆದಿಂಚ್, ಸರ್ದಾರ್ ಸಿಮಾಂವ್ಚೆ ಸವಾರ್, ಜಮೆದಾರ್ ಅಂತುಲೊ ಪಡ್ವಳಾಚ್ಯಾ ಗುರ್ಕಾರ್ಗೆ ಖಾಲ್, ಪೊಟಾಕ್ ಇಲ್ಲೆಂ ಘಾಲ್ನ್ ಆನಿ ಭುತಿಯೊ ಭಿಛಾಣಿಂ ಬಾಂಧುನ್, ಭಾಯ್ರ್ ಸರೊಂಕ್ ಆಯ್ತೆ ಜಾಲೆ. ಹ್ಯಾ ಪಾವ್ಟಿಂಯೀ ಸರ್ದಾರಾನ್, ಬಾರಾ ಜಣಾಂಕ್ ಸಾಂಗಾತಾ ವ್ಹರುಂಕ್ ಮನ್ ಕೆಲ್ಲೆಂ.
ಸವಾರ್ ಆನಿ ಘೊಡೆ ತಯಾರ್ ರಾವ್ತಚ್, ಸರ್ದಾರ್ ಸಿಮಾಂವ್, ‘ರಾಕುಸಾ’ಚೊ ಲಗಾಮ್ ಅಂತುಲ್ಯಾ ಕಡೆನ್ ದೀವ್ನ್, ರಾವ್ಳೆರಾಕ್ ವಚೊನ್, ಟಿಪ್ಪು ಸುಲ್ತಾನಾಚಿ ಕಬ್ಲಾತ್ ಘೆವ್ನ್ ಆಯ್ಲೊ.
“ಅಲ್ಲಾ ಹೋ ಅಕ್ಬರ್! ಪೈಗಂಬರ್ ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ಸರ್ಕಾರಾಚೊ ಪ್ರತಿನಿಧಿ ಜಾವ್ನ್, ಕುರಿಯೆಲಾಂತ್ ಜಾಂವ್ಕ್ ಆಸ್ಚಿಂ ಸರ್ವ್ ಕಾಮಾಂ ಬರ‍್ಯಾನ್ ಪೊಂತಾಕ್ ಪಾವ್ನ್, ಆಜ್ ಥಾವ್ನ್ ಚಾಳೀಸ್ ದಿಸಾಂ ಭಿತರ್ ಪಾಟಿಂ ಯೇ” ಮ್ಹಣ್ ಟಿಪ್ಪುನ್, ತಾಕಿದ್, ಭಾಂಗಾರಾಚ್ಯಾ ಪನ್ನಾಸ್ ಪಗೋಡಾಂಚಿ ಚಾಮ್ಡ್ಯಾಚಿ ಥೈಲಿ, ಆನಿ ಆಪ್ಲಿ ಮ್ಹೊರ್ ಆಸ್‍ಲ್ಲಿ ಮುದಿ ತಾಕಾ ದಿಲ್ಲಿ.
ಭಾಯ್ರ್ ಸರ್ಚ್ಯಾ ಆದಿಂ ತಾಕಾ ಆನ್ಯೇಕ್ ಉಗ್ಡಾಸ್ ಆಯ್ಲೊ – ಸರ್ದಾರ್ ಯೂಸುಫ್ ಆಲಿ ತಾಕಾ ಆದೇವ್ಸ್ ಮಾಗೊಂಕ್ ಯೇಂವ್ಕ್ ನಾತ್‍ಲ್ಲೊ. ತಾಚ್ಯಾ ಮತಿಂತ್ ನಾನಾಂತೆ ದುಬಾವ್ ಖೆಳ್ತಾಲೆ. ಯೂಸುಫ್ ಆಲಿಚ್ಯಾ, ಭಾವಾ ಸಾರ್ಕ್ಯಾ, ಮಿತ್ರತ್ವಾಚೆರ್ ದುಬಾವ್ ಚಿಂತುಂಕ್ ತೊ ಕಬೂಲ್ ನಾತ್‍ಲ್ಲೊ. ತರೀ, ಹ್ಯಾ ಘಡ್ಯೆ ಯೂಸುಫ್ ಥಂಯ್ಸರ್ ನಾತ್‍ಲ್ಲ್ಯಾನ್, ತಾಚಿ ಆಸಕ್ತ್ ಆನಿ ಆತುರಾಯ್ ಉಬಿ ಜಾಲ್ಲ್ಯಾಂತ್ ವಿಶೇಸ್ ನಾ.
ತ್ಯಾಚ್ ದಿಸಾ ಫಾಂತ್ಯಾರ್, ಎಕಾ ಶಿಪಾಯಾಚೊ ಪೇಟಾ ಆನಿ ದಾವ್ಯಾ ಹಾತಾಚೆಂ ಬೋಟ್ ಮೆಳ್‍ಲ್ಲ್ಯಾ ವೆಳಾರ್, ತಿ ಖಬರ್ ಕೊಣಾಯ್ಕೀ ಸಾಂಗೊಂಕ್ ನಜೊ ಮ್ಹಣ್, ಚೆನ್ನಪ್ಪ ಗೌಡಾಕ್, ತಾಣೆಂ ಪರ್ತ್ಯಾನ್ ತಾಕಿದ್ ದಿಲ್ಲಿ.
ತಾಣೆಂ ಮೊರಜಾಯ್, ವಾ, ಕುರಿಯೆಲಾಕ್ ಪಾಟಿಂ ವಚನಾಯೆ ಮ್ಹಣ್ ಆಶೆಂವ್ಚೆ ದುಸ್ಮಾನ್ ಕೊಣ್‍ಯೀ ತಾಚ್ಯಾ ಮತಿಕ್ ಝಳ್ಕಲೆನಾಂತ್. ಟಿಪ್ಪುಚ್ಯಾ ಮೊಗಾಚೊ ಸರ್ದಾರ್ ಆನಿ ಮಿತ್ರ್ ತೊ ಜಾವ್ನಾಸ್‍ಲ್ಲೊ, ಆನಿ ತಾಚೆಂ ಸ್ಥಾನ್ ಅಪಹರ್ಸುಂಚಿ ಆಶಾ ಆಸ್‍ಲ್ಲೆ ಗ್ರಾಯ್ಕ್ ಆತಾಂ ಕೊಣ್‍ಯೀ ಆಸ್ತಿತ್ ಮ್ಹಣ್ ತೊ ಪಾತ್ಯೆಂವ್ಕ್ ನಾ… (ತಸಲೊ ಸ್ವಾರ್ಥ್ ಆನಿ ಘಾತ್ ಚಿಂತ್‍ಲ್ಲೊ ಗ್ರಾಯ್ಕ್, ಅಡೇಜ್ ವರ್ಸಾಂ ಆದಿಂಚ್ ಸಲ್ವೊನ್ ಆನಿ ಜೀವ್ ಸಾಂಡುನ್ ಗೆಲ್ಲೊ).
ತರೀ, ದುಸ್ಮಾನ್ ನಾಂತ್ ಮ್ಹಣೊಂಕ್ ಸಾಧ್ಯ್ ನಾ. ದುಸ್ಮಾನ್ ಜರ್ ನಾತ್‍ಲ್ಲೆ, ತರ್, ಆದ್ಲ್ಯಾ ರಾತಿಂ ತಾಚ್ಯಾ ಜಿವಾಕ್ ಅಪಾಯ್, ತಿತ್ಲ್ಯಾ ಲಾಗಿಂ ಯೇವ್ನ್ ಪಾಶಾರ್ ಜಾತೊ ನಾ.
ಮೆಳ್‍ಲ್ಲೊ ಪೇಟಾ, ಸರ್ದಾರ್ ಯೂಸುಫ್ ಆಲಿಚ್ಯಾ ಠೊಲಿಯೆಚ್ಯಾ ಸಮವಸ್ತ್ರಾಂಕ್ ಸಂಬಂಧ್ ಜಾಲ್ಲೊ ಜಾಲ್ಲ್ಯಾನ್, ಕೋಣ್ ಆನಿ ಕಿತೆಂ ಮ್ಹಳ್ಳೆಂ ಸಮ್ಜೊನ್, ರಹಸ್ಯ್ ಭೆತುಂಕ್, ಯೂಸುಫ್ ಆಲಿಚ್ ಮ್ಹಿನತ್ ಘೆತಲೊ ಮ್ಹಣ್ ಸರ್ದಾರ್ ಸಿಮಾಂವ್ನ್ ಘಡ್ಯೆನ್ ನಿಶ್ಚಯ್ ಕೆಲೆಂ. ತ್ಯಾಚ್ ಪ್ರಕಾರ್, ತೊ ಪೇಟಾ ಆನಿ ತೆಂ ಬೋಟ್ ಪೊಟ್ಲಿ ಬಾಂಧುನ್, ಆಪ್ಲ್ಯಾ ಠೊಲಿಯೆಚ್ಯಾ ವರ್ಣಾಚ್ಯಾ ಶೆಲ್ಯಾಂತ್ ಗುಟ್ಲಾವ್ನ್, “ಹೆಂ ವ್ಹರ್ನ್ ಖುದ್ದ್ ಸರ್ದಾರ್ ಯೂಸುಫ್ ಆಲಿಚ್ಯಾ ಹಾತಾಂತ್ ದೀ. ಹಾಂವೆಂ ಧಾಡ್ಲಾಂ ಮ್ಹಣ್ ಆನಿ ಹಾಚೆಂ ಕಾರಣ್ ಆನಿ ಕೋಣ್-ಕಿತೆಂ ಮ್ಹಳ್ಳೆಂ ಹಾಂವೆಂ ಅಪೇಕ್ಷಿಲಾಂ ಆನಿ ಸಲಾಮ್ ದಿಲಾ ಮ್ಹಣ್ ಸಾಂಗ್” ಮ್ಹಣ್ ಫರ್ಮಾವ್ನ್ ಚೆನ್ನಪ್ಪ ಗೌಡಾಕ್ ತಾಣೆಂ ಧಾಡ್‍ಲ್ಲೊ. ಚೆನ್ನಪ್ಪಾನ್, ತಕ್ಷಣ್ ಜಾಪ್ ಹಾಡ್ಚಿ ಗರ್ಜ್ ನಾ ಮ್ಹಣೊನ್‍ಯೀ ತಾಣೆಂ ಸಾಂಗ್‍ಲ್ಲೆಂ.
ಚೆನ್ನಪ್ಪ ಗೌಡ ವಚೊನ್ ಆಪ್ಲೆಂ ಕಾಮ್ ಜಾರಿ ಕರ್ನ್ ಪಾಟಿಂ ಆಯ್ಲ್ಯಾ ಉಪ್ರಾಂತ್‍ಚ್, ಸರ್ದಾರ್ ಸಿಮಾಂವ್ನ್ ಅಂತುಲ್ಯಾಕ್ ಆಪಂವ್ಕ್ ಧಾಡ್ನ್, ಕುರಿಯೆಲಾಕ್ ಭಾಯ್ರ್ ಸರ್ಚಿ ತಯಾರಾಯ್ ಕರುಂಕ್ ಫರ್ಮಾಯಿಲ್ಲೆಂ.
ರಾವ್ಳೆರಾಕ್ ತೊ ವಚೊನ್, ಪಾಟಿಂ ಯೇವ್ನ್, ಆಬ್ಳೆ, ಭಾಯ್ರ್ ಸರ್ಚೊ ವೇಳ್ ಜಾಲ್ಲೊ ತರೀ, ಸರ್ದಾರ್ ಆಲಿಚಿ ಝಳಕ್ ವಾ ಖಬರ್ ನಾತ್‍ಲ್ಲ್ಯಾನ್, ಉಬಿ ಜಾಲ್ಲಿ ತಾಚಿ ಆಸಕ್ತ್ ಆನಿ ಆತುರಾಯ್, ಘಡ್ಯೆನ್ ಭಿತರ್ಲ್ಯಾ ಭಿತರ್ ಮುರ್ಮುರೊಂಕ್ ಲಾಗ್ಲಿಂ. ತಶೆಂ ಮಣ್ ಕೊಣಾಯ್ಕೀ ಕಳೊಂಕ್ ನಾ.
ಭಾಯ್ರ್ ಸರ್ಚ್ಯಾ ಆತುರಾಯೆನ್ ಆನಿ ಅಶಾಂತೆನ್, ಸವಾರಾಂಚೆ ಅರಬಿ ಘೊಡೆ ಅರ್ನಿಲ್ಲ್ಯಾ ಲಗಾಮಾಂಚೆರ್ ನಾಚ್ತಾಲೆ ಆನಿ ಖಿಂಳ್ಚೆತಾಲೆ. ವೇಳ್ ಲಾಂಬಂವ್ಕ್ ಸರ್ದಾರ್ ಸಿಮಾಂವ್ಕ್‌ಯೀ ಮನ್ ನಾತ್‍ಲ್ಲೆಂ. ಥೊಡಿ ಪುಣೀ ಭೆಟ್ವಳ್ ಆಸ್‍ಲ್ಲಿ ಜಾಲ್ಯಾರ್ ಕ್ರಿಸ್ತಾಂವಾಂಚ್ಯಾ ಕೈದಿ ಖಾನ್ಯಾಂಕ್ ಆನಿ ವಾವ್ರಾವರಾಂಕ್ ಗುಪಿತ್ ಭೆಟ್ ದೀವ್ನ್, ಥೊಡಿ ಖಬರ್ ಘೆವ್ನ್, ಥೊಡಿ ಮಜತ್ ದೀವ್ನ್ ವಾ ಥೊಡೆ ಹಿಶೆ ದೀವ್ನ್ ಯೆವ್ಯೆತೆಂ ಮ್ಹಣ್ ತಾಚೆಂ ಮನ್ ಅತ್ರೆಗ್ತಾಲೆಂ, ತಶೆಂಚ್, ಚುರ್ಚುರ್ತಾಲೆಂ.
ತ್ಯಾ ಘಡ್ಯೆ, ತಾಣೆಂ ತಶೆಂ ಕರ್ಚೆಂ ಸಾಧ್ಯ್ ನಾತ್‍ಲ್ಲೆಂ – ಉಜ್ಯಾಚ್ಯಾ ಕೆಂಡಾಂಚೆರ್ ರಾವ್‍ಲ್ಲೆಪರಿಂ, ತಾಚಿ ಪರಿಸ್ಥಿತಿ ಜಾವ್ನಾಸ್‍ಲ್ಲಿ. ಮೆಟಾನ್ ಮೇಟ್ ತಾಚ್ಯಾ ಉಲವ್ಣ್ಯಾಚೆರ್ ತಶೆಂ ವರ್ತನಾಚೆರ್, ಟಿಪ್ಪುಚೆ ಆನಿ ಕ್ರಿಸ್ತಾಂವಾಂಚ್ಯಾ ದುಸ್ಮಾನಾಂಚೆ ಹಜಾರ್ ಕಾನ್ ದೊಳೆ ತ್ಯಾ ಘಡ್ಯೆ ಉಗ್ತೆ ಆಸ್‍ಲ್ಲೆ ಮ್ಹಣ್ ತೊ ಬರೆಂ ಜಾಣಾಂಸ್‍ಲ್ಲೊ.
ತಾಣೆಂ ಹುಕುಮ್ ದಿಲಿ. ಸಿರಿರಂಗಪಟ್ಟಣಾ ಥಾವ್ನ್ ತಾಚಿ ತಿ ಲ್ಹಾನ್ ಠೊಲಿ ಸರ್ವ್ ದರ್ಬಾರಾನ್ ಭಾಯ್ರ್ ಸರ್ಲಿ. ಹಳ್ತ್ ವೆಗಾನ್, ಪಯ್ಣ್ ಆರಂಭ್ ಜಾಲೆಂ.
ಪಟ್ಟಣಾಚ್ಯಾ ಬಾಂಧ್ಪಾಸಾ ಥಾವ್ನ್ ಥೊಡ್ಯಾ (ಚಾಳೀಸ್?) ದಿಸಾಂಕ್ ಪುಣೀ ಭಾಯ್ರ್ ಉರೊನ್, ಬಂದಡೆ ಭಾಯ್ರ್ ಆಸ್‍ಲ್ಲ್ಯಾ ಆಪ್ಲ್ಯಾ ಸಮಾಜ್ ಬಂಧ್ವಾಂಕ್ ಆನಿ ಮೊಗಾಚ್ಯಾಂಕ್ ಭೆಟೊಂಕ್ ಸಾಧ್ಯ್ ಆಸಾ ಮ್ಹಣ್ ಚಿಂತುನ್ ಸರ್ದಾರ್ ಸಿಮಾಂವ್ಚೆಂ ಮನ್, ಥೊಡೆಂ ಪುಣೀ ಸಂತೊಸ್ಲೆಂ. ‘ಉಪ್ರಾಂತ್ಲಿ ಗಜಾಲ್ ನಹಿಂವೇ… ತ್ಯಾ ಪಾಂಪಾಳ್ಯಾ ಕಡೆನ್ ಪಾವ್ಲ್ಯಾ ಉಪ್ರಾಂತ್‍ಚ್ ಉತರ್ಯೆತ್. ತೆದೊಳ್ ಪರ್ಯಾಂತ್, ಕರುಂಕ್ ಜಾಯ್ತೆಂ ಆಸಾ’ ಮ್ಹಣ್ ಚಿಂತುನ್, ಪ್ರಚಲಿತ್ ಪರಿಸ್ಥಿತೆಚೆರ್ ತಾಚಿ ಮತ್, ತಲ್ಲೀನ್ ಜಾಲಿ.
ಆದ್ಲ್ಯಾ ರಾತಿಂ, ರಾಕ್ವಲ್ಯಾಕ್ ಆವಾಜ್ ನಾಸ್ತಾಂ ನಿದಾವ್ನ್, ಆಪ್ಲ್ಯಾ ಜಿವಾಚೆರ್ ದಾಡ್ ಚಲಂವ್ಕ್ ಆಯಿಲ್ಲೊ ಗ್ರಾಯ್ಕ್ ಕೋಣ್ ಜಾವ್ಯೆತ್, ವಾ ಕೊಣಾಚೊ ಹಾತ್ ಜಾವ್ಯೆತ್ ಮ್ಹಳ್ಳಿಂ ಚಿಂತ್ನಾಂ ಪರತ್ ತಾಕಾ ಧೊಸುಂಕ್ ಲಾಗ್ಲಿಂ – ಭಿಯಾನ್ ನಹಿಂ ಜಾಲ್ಯಾರೀ, ‘ಅಂಧ್ಕಾರಾಂತ್, ಅಜ್ಞಾತ್ ದುಸ್ಮಾನಾ ಕಡೆನ್ ಝುಜ್ಚ್ಯಾ ಪ್ರಾಸ್, ದುಸ್ಮಾನ್ ಕೋಣ್ ಮ್ಹಳ್ಳೆಂ ಕಳಿತ್ ಆಸ್ಲ್ಯಾರ್ ಬರೆಂ’ ಮ್ಹಳ್ಳೊ, ತಾಚೊ ವಾಜ್ಭಿ ವಾದ್ ಜಾವ್ನಾಸ್‍ಲ್ಲೊ. ಸಾಂಗಾತಾಚ್, ಆದ್ಲ್ಯಾ ರಾತಿಚ್ಯಾ ತ್ಯಾ ಘಾತ್ಕಿ ಆನಿ ಭಿವ್ಕುರ‍್ಯಾ ಪ್ರಯತ್ನಾಂತ್, ಸರ್ದಾರ್ ಯೂಸುಫ್ ಆಲಿಚೊ ಹಾತ್ ಕೆದಿಂಚ್ ನಾತ್‍ಲ್ಲೊ ಮ್ಹಳ್ಳೆಂಯೀ ಸ್ಪಷ್ಟ್ ಸಮ್ಜೊಂಕ್, ತಾಚೆಂ ಮನ್ ಅತ್ರೆಗ್ತಾಲೆಂ. ಕಿತ್ಯಾಕ್, ತ್ಯಾ ಸಕಾಳಿಂ ಕುರಿಯೆಲಾಕ್ ಭಾಯ್ರ್ ಸರ್ತಾನಾ, ಸರ್ದಾರ್ ಯೂಸುಫ್ ಯೇಂವ್ಕ್ ನಾತ್‍ಲ್ಲೆ ವರ್ವಿಂ, ತಾಚಿ ಆತುರಾಯ್ ಉಣಿಂ ಜಾಂವ್ಕ್ ನಾತ್‍ಲ್ಲಿ.
ನಿಜಾಯ್ಕೀ, ತ್ಯಾ ವೆಳಾರ್, ಸರ್ದಾರ್ ಯೂಸುಫ್ ಆಲಿಚಿ ಗಜಾಲ್ ದುಸ್ರಿಚ್ ಜಾಲ್ಲಿ. ತೊ, ಪುರ್ತೊ ವಿರಾರ್ ಜಾಲ್ಲೊ.
ಸಕಾಳಿಂ ಉಟೊನ್, ಕವಾಯತಾಕ್ ಭಾಯ್ರ್ ಸರ್ತಾನಾ, ಚೆನ್ನಪ್ಪ ಗೌಡಾನ್ ಯೇವ್ನ್, ಏಕ್ ಪೊಟ್ಲಿ ತಾಚ್ಯಾ ಹಾತಾಂತ್ ದೀವ್ನ್: “ಹೆಂ, ಸರ್ದಾರ್ ಸಿಮಾಂವ್ನ್, ತುಮ್ಕಾಂ ದೀವ್ನ್ ಧಾಡ್ಲಾಂ. ಹಾಚೆಂ ಕಾರಣ್, ಕೋಣ್-ಕಿತೆಂ ಮ್ಹಳ್ಳೆಂ ತುಮ್ಚೆ ಥಾವ್ನ್ ಸಮ್ಜೊಂಕ್ ತಾಣೆಂ ಅಪೇಕ್ಷಿಲಾಂ” ಮ್ಹಣೊನ್ ಸೊಡ್ಲೆಂ.
ಸರ್ದಾರ್ ಯೂಸುಫ್ ಚಿಕ್ಕೆ ಕಾವ್ಜೆಲೊ. ಕಸಲಿ ಗಜಾಲ್ ಜಾವ್ಯೆತ್?
ಪೊಟ್ಲಿ ಘೆವ್ನ್, ದಾರಾರ್ ಥಾವ್ನ್ ತೊ ಪಾಟಿಂ ಘುಂವ್ಲೊ. ಬಗ್ಲೆಚ್ಯಾ ಬಾಂಕುಲಾರ್ ದವರ್ನ್ ಪೊಟ್ಲಿ ತಾಣೆಂ ಸೊಡಯ್ಲಿ…
“ಕಿತೆಂ!” ಮ್ಹಣಾಲೊ ತೊ ಆಪ್ಣಾಯಿತ್ಲ್ಯಾಕ್, ವಿಜ್ಮಿತ್ ಜಾವ್ನ್. “ಮ್ಹಜ್ಯಾ ಖಾಸ್ಗಿ ಕಂಪ್ನೆಚ್ಯಾ ಸವಾರಾಂಚೊ ಪೇಟಾ..!”
ಮ್ಹಣ್ತಚ್, ವಸ್ತ್ರಾ ಫಾಳಿಯೆಂತ್ ಗುಟ್ಲಾಯಿಲ್ಲಿ ಲ್ಹಾನ್ ಪೊಟ್ಲಿ ತಾಕಾ ಝಳ್ಕಲಿ. ರೆವೊಡ್ ಸುಟಯ್ತಚ್, ಮನ್ಶ್ಯಾಚ್ಯಾ ದಾವ್ಯಾ ಹಾತಾಚೆಂ ಬೋಟ್…
“ಕ್ಯಾ ಮತ್ಲಬ್…” ಮ್ಹಣೊನ್, ಚೆನ್ನಪ್ಪ ಕಡೆನ್ ವಿವರ್ ವಿಚಾರ್ಚ್ಯಾ ಇರಾದ್ಯಾನ್, ದಾರಾ ಭಾಯ್ರ್ ತಾಣೆಂ ಕದಮಾಂ ಕಾಡ್ಲಿಂ. ಚೆನ್ನಪ್ಪ ಥಂಯ್ ರಾವೊಂಕ್ ನಾತ್‍ಲ್ಲೊ… ಆಪ್ಣಾಕ್ ಸಾಂಗ್‍ಲ್ಲೆಂ ಕಾಮ್ ಮುಗ್ದುನ್, ತೊ ಪಾಟಿಂ ಗೆಲ್ಲೊ.
ಸರ್ದಾರ್ ಯೂಸುಫ್ ಆಲಿಚಿಂ ಚಿಂತ್ನಾಂ ಉಚಾಂಬಳ್ ಜಾಲಿಂ. ದಾವ್ಯಾ ಥಳ್ವ್ಯಾಚೆರ್ ಉಜ್ವಿ ಮೂಟ್ ಮಾರ್ನ್, ಪಾಸಾಯ್ ಮಾರಿತ್ತ್…
“ಕಸಲಿ ಗಜಾಲ್ ಜಾವ್ಯೆತ್? ಮ್ಹಜ್ಯಾ ಮಿತ್ರ್ ಸರ್ದಾರಾನ್, ಮ್ಹಜ್ಯಾಚ್ ಕಂಪ್ನೆಚ್ಯಾ ಎಕ್ಲ್ಯಾ ಶಿಪಾಯಾಚೊ ಪೇಟಾ, ಆನಿ ಬಹುಶಃ ತಾಚೆಂಚ್, ಬೋಟ್ ಧಾಡ್ಲಾಂ..! ಮತ್ಲಬ್..?
“ಕಾರಣ್ ಕೋಣ್-ಕಿತೆಂ ಮ್ಹಳ್ಳೆಂ ಸಮ್ಜೊಂಕ್ ತಾಚಿ ಅಪೇಕ್ಷಾ… ಜಾವ್ಯೆತ್… ಬರಾಬರ್ – ಹೊ ಪೇಟಾ ಆನಿ ಬೋಟ್ ಕೊಣಾಚೆಂ ಮ್ಹಣ್ ಸಮ್ಜೊಂಕ್ ತೊ ಅಪೇಕ್ಷಿತಾ… ಕಿತೆಂ ಪುಣೀ ಜಟಾಪಟ್ ಜಾಲ್ಯಾ… ಆನಿ ಸರ್ದಾರ್ ಸಿಮಾಂವ್ಚ್ಯಾ ಹಾತಾಂತ್ ತೊ ಮನಿಸ್ ಮೊರೊಂಕ್ ನಾ, ಬಗಾರ್, ಪೇಟಾ ಆನಿ ಬೊಟಾ ಕುಡ್ಕೊ ಸಾಂಡುನ್ ಗೆಲಾ!
“ಕೋಣ್ ಜಾವ್ಯೆತ್..?
“ಖುದಾ ಬಚಾವೊ!” ಯೂಸುಫ್ ಆಪ್ಣಾಯಿತ್ಲ್ಯಾಕ್‍ಚ್ ಉಡೊನ್ ಪಡ್ಲೊ. “ಜಟಾಪಟ್ ಕಸಲಿ ಮ್ಹಣ್ ಹಾಂವ್ ನೆಣಾಂ… ಪುಣ್, ಪುಣ್ ತಾಂತುಂ ಮ್ಹಜೊ ಕಾಂಯ್ ಹಾತ್ ಆಸಾ ಮ್ಹಣ್, ಸರ್ದಾರ್ ಸಿಮಾಂವ್, ಬಿಲ್ಕುಲ್ ದುಬಾವ್ಲಾ!
“ನಾ ದೋಸ್ತ್!” ಮ್ಹಣಾಲೊ ತೊ ವ್ಹಡ್ಲ್ಯಾನ್. “ಹೆಂ ಕೆದಿಂಚ್ ಜಾಂವ್ಕ್ ನಜೊ! ಯೂಸುಫ್ ಆಲಿಚೊ ಜೀವ್ ಆಸಾಸರ್…” ಆಪ್ಲೆಂಚ್ ಹರ್ದೆಂ ಪೆಟುನ್, “ತಸಲೊ ದುಬಾವ್ ತುವೆಂ ಚಿಂತುಂಕ್ ಕೆದಿಂಚ್ ಇಡೆಂ ಮೆಳಶೆಂ ನಾ..! ಪಯ್ಲೆಂ, ಹೊ ಮನಿಸ್ ಕೋಣ್ ಮ್ಹಳ್ಳೆಂ ಸೊಧುನ್ ಕಾಡಿಜಾಯ್. ಮ್ಹಜೊ ಪಾಟ್ಲಾವಿ ತೊ ವ್ಹಯ್ ಜಾಲ್ಯಾರ್, ಆನಿ ತುಜೆ ಕಡೆನ್, ಕಸಲ್ಯಾಯೀ ಕಾರಣಾನ್ ತೊ ಆದಾಳ್ಳಾ ಜಾಲ್ಯಾರ್, ತಾಚೆಂ ಬೋಟ್ ನಹಿಂ, ತಾಚೆಂ ರು… ರುಂಡ್ ಉಸ್ಳಾಯ್ತಾಂ, ಆನಿ ಉಪ್ರಾಂತ್ ತುಕಾ ಸಾಂಗ್ತಾಂ… ಯಾ’ಲ್ಲಾ!” ಮ್ಹಣೊನ್, ಗರಮ್ ಜಾವ್ನ್, ಸರ್ದಾರ್ ಯೂಸುಫ್ ಆಲಿ ಕಾರ್ಯಾಕ್ ದೆಂವ್ಲೊ.
ಪೊಟ್ಲಿ ತಾಣೆಂ ಗುಟ್ಲಾಯ್ಲಿ ಆನಿ ಥಂಯ್ಚ್ ಕೊನ್ಶ್ಯಾಕ್ ಮಾರ್ಲಿ. ಪುಣ್ ಬೋಟ್ ಮಾತ್ರ್ ಚಿಂದೆಂತ್ ರೆವ್ಡಾವ್ನ್ ಆಪ್ಲ್ಯಾ ಕಮರ್‌ಬಾಂಧಾಂತ್ ಶಿರ್ಕಾಯ್ಲೆಂ.
ಉಪ್ರಾಂತ್, ಕವಾಯತ್ ಜಾಂವ್ಚ್ಯಾ ಆಂಗ್ಣಾಕ್ ತೊ ಗೆಲೊ. ತಾಚ್ಯಾ ಕಂಪ್ನೆಚ್ಯಾ ಥಂಯ್ ಆಸ್ಲೆಲ್ಯಾ ಶಿಪಾಯಾಂಕ್ ಆನಿ ಸವಾರಾಂಕ್ ದೆಕ್ತಾನಾ, ತಾಚೆ ದೊಳೆ, ಆಪ್ಶೆಚ್, ತಾಂಚ್ಯಾ ದಾವ್ಯಾ ಹಾತಾಚೆರ್ ಪಡ್ತಾಲೆ.
ಪ್ರಯೋಜನ್ ಜಾಂವ್ಕ್ ನಾ.
ಕವಾಯತ್ ಜಾಲ್ಯಾ ಉಪ್ರಾಂತ್, ಸರ್ದಾರ್ ಯೂಸುಫ್ ಆಲಿನ್, ರಿವಾಜಿ ಪ್ರಕಾರ್ ಸುಲ್ತಾನಾಚಿ ಭೆಟ್ ಕರ್ನ್, ತ್ಯಾ ದಿಸಾಚ್ಯಾ ಕಾಮಾಂಚಿ ಹುಕುಮ್ ಘೆಂವ್ಚ್ಯಾ ಖಾತಿರ್, ರಾವ್ಳೆರಾಕ್ ವಚೊಂಕ್ ಆಸ್‍ಲ್ಲೆಂ. ತ್ಯಾ ವಾವ್ರಾಂತ್ ತೊ ಮೆತೆರ್ ಜಾವ್ನ್ ಆಸ್ತಾನಾ, ಸರ್ದಾರ್ ಸಿಮಾಂವ್ ಆನಿ ತಾಚೆ ಸಾಂಗಾತಿ, ಸಿರಿರಂಗಪಟ್ಟಣ ಥಾವ್ನ್ ಪಯ್ಸ್ ಪಾವ್‍ಲ್ಲೆ.
ವಾಟ್ ಆನಿ ವಾತಾವರಣ್ ದೊನೀ ಬರಿಂ ಆಸ್‍ಲ್ಲ್ಯಾನ್, ತೀಸ್ ಮಯ್ಲಾಂಚೆಂ ಪಯ್ಣ್ ಜಾತಾ ಪರ್ಯಾಂತ್, ವಿಶೆವಾಕ್ ತೆ ರಾವೊಂಕ್ ನಾಂತ್. ಹರ್ಶೆಂಚೆಪರಿಂ ಜಾಲ್ಯಾರ್, ಸರ್ದಾರ್ ಸಿಮಾಂವ್ ಹಾಸನ್-ಮಂಜರಾಬಾದ್, ವಾ, ಮೂಡಿಗೆರೆ-ಜಮಲಾಬಾದ್ ವಾಟೆನ್ ಪಯ್ಣ್ ಕರ್ತೊ. ಹ್ಯಾ ಪಾವ್ಟಿಂ, ಮಧ್ಲ್ಯಾ ಖಂಚ್ಯಾಯೀ ಠಾಣ್ಯಾಂಕ್ ಜಾಂವ್, ತುಂಡುಪುಟ್ಟು ರಾಯಾಂಕ್ ಜಾಂವ್, ಭೆಟ್ ದಿಂವ್ಚಿ ಗರ್ಜ್ ತಾಕಾ ನಾತ್‍ಲ್ಲಿ. ತ್ಯಾ ಶಿವಾಯ್, ಜಾತಾ ತಿತ್ಲ್ಯಾ ವೆಗಿಂ ಯೇವ್ನ್ ಕೊಡಿಯಾಳಾಕ್ ಪಾವಜಾಯ್ ಮ್ಹಣ್ ತಾಕಾ ಮನ್ ಜಾಲ್ಲೆಂ. ದೆಕುನ್, ಮಡಿಕೇರಿಚ್ಯಾನ್, ಚಿಕ್ಕೆ ಲಾಗ್ಶಿಲಿ ವಾಟ್ ತಾಣಿಂ ಧರ್‌ಲ್ಲಿ.
ಮಧೆಂ ಏಕ್ ಕಡೆನ್ ಮಾತ್ರ್, ತೀನ್ ಚಾರ್ ವೊರಾಂಚೊ ವಿಶೆವ್ ಘೆವ್ನ್ ಆನಿ ಸವಾರಾಂನಿ ತಶೆಂ ಘೊಡ್ಯಾಂನಿ ಆಹಾರ್-ಉದಾಕ್ ಘೆವ್ನ್, ಆಯ್ತಾರಾಚ್ಯಾ ಚವ್ತ್ಯಾ ಜಾವಾರ್, ತೆ ಯೇವ್ನ್ ಮಡಿಕೇರಿ ಪಾವ್ಲೆ. ರಾವೊಂಕ್ ತಾಂಕಾಂ ಮನ್ ನಾತ್‍ಲ್ಲೆಂ ಜಾಲ್ಯಾರೀ, ಫಾವೊತೊ ಸತ್ಕಾರ್ ಘೆತ್ಲ್ಯಾ ಶಿವಾಯ್ ವಚೊಂಕ್, ಕೊಡಗಾಚ್ಯಾ ರಾಯಾನ್, ತಾಂಕಾಂ ಸೊಡುಂಕ್ ನಾ.
ತ್ಯಾ ವೆಳಾರ್, ದೊಡ್ಡ ವೀರೇಂದ್ರ ರಾಜ, ಕೊಡಗಾಂತ್ ರಾಜ್ವಟ್ಕಾಯ್ ಚಲಯ್ತಾಲೊ. ಟಿಪ್ಪುಕ್ ತಾಚೆರ್ ದೊಳೊ ಆನಿ ದುಸ್ಮಾನ್ಕಾಯ್ ಆಸ್‍ಲ್ಲಿ, ತರೀ, ಝುಜ್ ಜಾಂವ್ಕ್ ನಾತ್‍ಲ್ಲೆಂ. ಬಂದಡೆಂತ್ಲೆಂ ಚುಕವ್ನ್ ಧಾಂವ್‍ಲ್ಲ್ಯಾ ಸಬಾರ್ ಕೆನರಾ ಕ್ರಿಸ್ತಾಂವಾಂಕ್, ತೆ ಬರೆ ರೈತ್ ಆನಿ ಕೃಷೆಂತ್ ಹುಶಾರ್ ದೆಕುನ್, ದೊಡ್ಡ ವೀರೇಂದ್ರ ರಾಜಾಚ್ಯಾ ಕೊಡಗಾಂತ್ ಆಸ್ರೊ ಮೆಳ್ತಾಲೊ. ತೆಂ ಸರ್ದಾರ್ ಸಿಮಾಂವ್ಕ್ ಕಳಿತ್ ಆಸ್‍ಲ್ಲೆಂ. ತ್ಯಾ ಶಿವಾಯ್, ಸರ್ದಾರ್ ಸಿಮಾಂವ್, ಕಸಲ್ಯಾಯೀ ಕುಸ್ತೆಂತ್, ಪಂಥಾಟಾಂತ್, ಝುಜಾಚ್ಯೆ ವಿದ್ಯೆಂತ್ ಆನಿ ಸಾಹಸ್ ಕೃತ್ಯಾಂನಿ ನಾಂವಾಡೊನ್ ಆಸ್‍ಲ್ಲ್ಯಾ ವರ್ವಿಂ, ದೊಡ್ಡ ವೀರೇಂದ್ರ ರಾಜಾ ತಾಕಾ ಮಿತೃತ್ವಾಂತ್ ಮಾಂದ್ತಾಲೊ.
ಥಂಯ್ ಥಾವ್ನ್ ಪಯ್ಣ್ ಮುಕಾರ್ಸುಂಚ್ಯಾ ಆದಿಂ, ದೊಡ್ಡ ವೀರೇಂದ್ರ ರಾಜ ಆನಿ ಸರ್ದಾರ್ ಸಿಮಾಂವ್ ಥೊಡೊ ವೇಳ್ ಗುಪಿತ್ ಉಲಯ್ಲೆ. ಕಸಲ್ಯಾಯೀ ಕಾರಣಾನ್, ಖಂಚ್ಯಾಯೀ ವೆಳಾರ್, ಸರ್ದಾರ್ ಸಿಮಾಂವ್ಚೆಂ ನಾಂವ್ ಸಾಂಗೊನ್ ಆಯಿಲ್ಲ್ಯಾಂಕ್ ಆಸ್ರೊ ಆನಿ ಮಜತ್ ಬಾಕಿ ಜಾಂವ್ಚಿ ನಾ ಮ್ಹಣ್ ರಾಯಾನ್ ಭಾಸ್ ದಿಲಿ. ತ್ಯಾ ಶಿವಾಯ್, ಸರ್ದಾರ್ ಸಿಮಾಂವ್ನ್ ಆನಿ ತಾಚ್ಯಾ ಸಾಂಗಾತ್ಯಾಂನಿ ಥಂಯ್ಸರ್ ಭೆಟ್ ದೀವ್ನ್ ಸತ್ಕಾರ್ ಘೆತ್‍ಲ್ಲಿ ಖಬರ್, ಟಿಪ್ಪುಚ್ಯಾ ಕಾನಾಕ್ ಪಡನಾತ್ಲ್ಯಾರ್ ಬರೆಂ – ಗರ್ಜೆ ಶಿವಾಯ್ ದುಬಾವಾಕ್ ಇಡೆಂ ಜಾತಾ – ಮ್ಹಣೊನ್‍ಯೀ ತೆ ಒಪ್ಲೆ ಆನಿ ಸುಟ್ಲೆ.
ಉಪ್ರಾಂತ್, ಸರ್ದಾರ್ ಸಿಮಾಂವ್, ರಾತ್ ಪಾಶಾರ್ ಕರ್ಚ್ಯಾ ಖಾತಿರ್, ಘಾಟ್ಯೆ ಸಕಯ್ಲ್ಯಾ ಎಕಾ ಛತ್ರಾಂತ್ ಶಿವಾಯ್, ಹೆರ್ ಖಂಯೀ ರಾವೊಂಕ್ ನಾ. ಘೊಡ್ಯಾಂಕ್ ಹಳ್ತಾನ್ ಧಾಂವ್ಡಾವ್ನ್, ಆನಿ ವಾಟೆರ್ ಮೆಳ್ಳೆಲ್ಯಾ ಠಾಣ್ಯಾಂನಿ ಹಾತ್-ಪಾಯ್ ಚಿಕ್ಕೆ ಸಡಿಳ್ ಕರ್ನ್, ಸೊಮಾರಾ ಸಾಂಜೆರ್, ತೆ ಯೇವ್ನ್, ಬಂಟ್ವಾಳ್ ಜೋಡುದಾರಿ (ಜೋಡು ಮಾರ್ಗ) ಠಾಣ್ಯಾಕ್ ಪಾವ್ಲೆ.
ತ್ಯಾ ಠಾಣ್ಯಾಚೊ ಕೊತ್ವಾಲ್, ದೇಜಪ್ಪ ಸೆಟ್ಟಿ, ಸರ್ದಾರ್ ಸಿಮಾಂವ್ಕ್ ಆದಿಂ ಥಾವ್ನ್‌ಯೀ ವಳ್ಕಿಚೊ, ಆನಿ ಪಾತ್ಯೆಣೆಚೊ ದೋಸ್ತ್. ಪಾಟ್ಲ್ಯಾ ವರ್ಸಾಂನಿ, ಸರ್ದಾರ್ ಸಿಮಾಂವ್ಚ್ಯಾ ಬಹಾದುರೆ ವರ್ವಿಂ, ಬೆಳ್ತಂಗಡಿ, ಬಂಟ್ವಾಳ್ ಆನಿ ಫಿಂರ್ಗಿಪೆಟ್ ಫಿರ್ಕಾಂನಿ ಜಾಲ್ಲ್ಯಾ ಥೊಡ್ಯಾ ವಿಶೇಸ್ ಘಡಿತಾಂನಿ, ದೇಜಪ್ಪ ಸೆಟ್ಟಿಚೊ ಗುಪಿತ್ ಹಾತ್ ಆಸ್‍ಲ್ಲೊ.
ಧಾ-ಬಾರಾ ಸವಾರ್, ಠಾಣ್ಯಾಚ್ಯಾ ಉಕ್ಕಡಾ ಭಾಯ್ಲ್ಯಾನ್ ಯೇವ್ನ್ ಪಾವ್ತಚ್, ದೇಜಪ್ಪ ಪಯ್ಲೆಂ ಚಿಕ್ಕೆ ಕಾವ್ಜೆಲೊ. ವಳಕ್ ಮೆಳ್ತಚ್, ಸಂತೊಸಾನ್ ತಾಣೆಂ ತಾಂಕಾಂ ಸ್ವಾಗತ್ ಕೆಲೊ. ತಾಚ್ಯೆ ಒತ್ತಾಯೆ ಖಾತಿರ್, ಆನಿ ಹೆರ್ ಥೊಡಿ ಖಬರ್ ಸಮ್ಜೊನ್ ಘೆಂವ್ಚ್ಯಾ ಖಾತಿರ್, ಸರ್ದಾರ್ ಸಿಮಾಂವ್ನ್ ಥಂಯ್ ವೇಳ್ ಪಾಶಾರ್ ಕರುಂಕ್ ನಿಶ್ಚಯ್ಸಿಲೆಂ.
ತ್ಯಾ ರಾತಿಂ ಹೆರ್ ಸಗ್ಳೆ ವಿಶೆವ್ ಘೆಂವ್ಕ್ ಗೆಲ್ಯಾ ಉಪ್ರಾಂತ್, ಸರ್ದಾರ್ ಸಿಮಾಂವ್ ಆನಿ ದೇಜಪ್ಪ ಸೆಟ್ಟಿ ಗಜಾಲಿ ಕಾಡುಂಕ್ ಬಸ್ಲೆ. ಸರ್ದಾರಾನ್ ವಿಚಾರಿನಾಸ್ತಾನಾಂಚ್, ಕೊತ್ವಾಲಾನ್ ಸಾಂಗ್ಲೆಂ:
“ಗಾಂವಾರ್ ಶಿಸ್ತ್ ಭೋವ್ ಉಣಿಂ ಜಾಲ್ಯಾ. ಚೊರಾಂಚೊ ಆನಿ ಲುಟ್ಕಾರಾಂಚೊ ಅವ್ತಾರ್ ಜೋರ್ ಜಾಲಾ. ತಶೆಂ ಥಂಯ್ ಹಾಂಗಾ ಉಪಾದ್ರ್ ದೀವ್ನ್ ಭೊಂವ್ಚ್ಯಾ ಪಂಗ್ಡಾಂನಿ, ಥೊಡೆ ಕ್ರಿಸ್ತಾಂವ್‍ಯೀ ಆಸಾತ್.”
“ಕ್ರಿಸ್ತಾಂವ್?”
“ವ್ಹಯ್ ಸರ್ದಾರ್. ಕುಳ್ವಾರಾಂ ಹೊಗ್ಡಾಯಿಲ್ಲೆ ಆನಿ ಬಂದಡೆಂತ್ಲೆ ಚುಕವ್ನ್ ಆಯಿಲ್ಲೆ ಥೊಡೆ ಜಣ್. ತಸಲ್ಯಾಂಕ್ ಧರುಂಕ್ ಹಾಂವೆಂ ಚಡ್ ಮನ್ ಕರುಂಕ್ ನಾ.”
ಸರ್ದಾರಾನ್ ತಾಚೊ ಮತಿಂತ್‍ಚ್ ಉಪ್ಕಾರ್ ಬಾವುಡ್ಲೊ. ಬಂದಡೆ ವೆಳಾರ್, ಕೆನರಾ ಕ್ರಿಸ್ತಾಂವಾಂಚಿ – ಧಾರ್ಮಿಕ್, ಸಾಮಾಜಿಕ್ ಆನಿ ನೈತಿಕ್ – ಗತ್, ಕಿತ್ಲಿ ಅಸ್ಕತ್ ಆನಿ ಭಿರಾಂಕುಳ್ ಜಾಂವ್ಕ್ ಪಾವ್ಲ್ಯಾ ಮ್ಹಳ್ಳೆಂ ತಾಕಾ ಕಳಿತ್ ಆಸ್‍ಲ್ಲೆಂ. ದೇಜಪ್ಪಾನ್ ಸಾಂಗ್‍ಲ್ಲ್ಯೊ, ತ್ಯೊ, ಚೊರ್ಪಣ್ ಆನಿ ಲೂಟಿಚ್ಯೊ, ಗಜಾಲಿ, ನಿಜಾಯ್ಕೀ ಟಿಪ್ಪುಚ್ಯಾ ಸರ್ಕಾರಾಚ್ಯಾ ನದ್ರೆಂತ್ ಅನೀತಿಚ್ಯೊ ಜಾವ್ನಾಸ್‍ಲ್ಲ್ಯೊ. ಪುಣ್, ಟಿಪ್ಪುಚ್ಯಾ ರಿಸಾಲಾಂಚೆ ದೊಳೆ ಚುಕವ್ನ್, ಖಂಯ್ ರಾನಾಂ ಮೊಲ್ಯಾಂನಿ ಆನಿ ಧೊಲಿಂ ಭುಂಯಾರಾಂನಿ ಲಿಪೊನ್ ಆಲೊ ಪಾಲೊ, ಫಳ್ ವಸ್ತು ಆನಿ ಕಾಂದೆ ಪಾಳಾಂ ಖಾವ್ನ್ ದೀಸ್ ಕಾಡ್ತೆಲ್ಯಾಂಚ್ಯಾ ನದ್ರೆಂತ್, ತ್ಯೊ ಗಜಾಲಿ ಗರ್ಜೆಚ್ಯೊ ಜಾವ್ನಾಸ್‍ಲ್ಲ್ಯೊ. ತಸಲ್ಯಾ ಪೊಕ್ರಿಪಣಾಂನಿ, ಕಾವೂರ್ಚ್ಯಾ ದುಮ್ಗಾ ಪೀಂತ್ ಆನಿ ಸಾಂಗಾತ್ಯಾಂ ತಸಲ್ಯಾ ಕಿತ್ಲ್ಯಾ ಜಣಾಂಚೊ ಹಾತ್ ಆಸ್‍ಲ್ಲೊ ಮ್ಹಳ್ಳೆಂ ಸರ್ದಾರ್ ಸಿಮಾಂವ್ಕ್ ಕಳಿತ್ ಆಸ್‍ಲ್ಲೆಂ.
“ಥೊಡೆ ಪಾವ್ಟಿಂ ಸುಕ್ಯಾ ಸಾಂಗಾತಾ ಜಿವೆಂಯೀ ಲಾಸ್ತಾ. ಬರ‍್ಯಾ ಇರಾದ್ಯಾಂ ಖಾತಿರ್ ಝುಜ್ತೆಲ್ಯಾಂ ಸಾಂಗಾತಾ, ದೇವ್ ವಾ ದೆಂವ್ಚಾರ್ ದೊನೀ ನಾತ್‍ಲ್ಲೊ, ಆನಿ ಅನ್ಯಾಯಾ ಖಾತಿರ್ ಮಾತ್ರ್ ಜಿಯೆತಲೊಯೀ ಆಸ್ತಾ. ತಸಲೊ ಕೊಣೀ ಮೆಳತ್ ಜಾಲ್ಯಾರ್, ಕಸಲ್ಯಾಯೀ ಜಾತಿಚೊ ತೊ ಜಾಂವ್, ತಾಕಾ ಭೊಗ್ಶಿನಾಕಾ.”
“ಸಮ್ಜಲೆಂ, ಸರ್ದಾರ್ ಪ್ರಭು.”
“ತೆಂ ಆಸೊಂ… ಹೆರ್…” ಮ್ಹಣಾಲೊ ಸರ್ದಾರ್ ಸಿಮಾಂವ್, ಆಪ್ಲಿ ಆತುರಾಯ್ ಲಿಪವ್ನ್. “ಹಾಂಗಾಚಿ, ಬಂಟ್ವಾಳಾಂತ್ಲಿ ಖಬರ್ ಕಿತೆಂ?”
“ಸಮ್ಜಲೆಂ” ಮ್ಹಣಾಲೊ ಸೆಟ್ಟಿ, ಮಿಶ್ಯಾಂ ಭಿತರ್ ಹಾಸೊನ್. “ರಫಾಯೆಲ್ ಮಿಂಗೆಲ್ ಕಾಮ್ತಿಚೆಂ ಘರಾಣೆಂ ಶಾಬಿತ್ ಆಸಾ. ಕಾಮತ್ (ಟಿಪ್ಪುಚ್ಯೆ ಹುಕ್ಮೆನ್ ತಡೀಪಾರ್ ಜಾಲ್ಲೊ) ತಲ್ಚೇರಾಂತ್ ಬರೊ ಆಸಾ ಖಂಯ್. ತವಳ್ ತುವೆಂ ಹಾಂಗಾಸರ್ ಬಚಾವ್ ಕೆಲ್ಲಿ ಚಲಿ – ಡೊನಾ ಮರೀಯಾ – ತಾಚಿ ಜತನ್ ಘೆಂವ್ಚ್ಯಾ ಖಾತಿರ್ ವಚೊನ್ ಥಂಯ್ ರಾವ್ಲ್ಯಾ.”
“ತರ್ ಹಾಂಗಾಸರ್…”
“ಹಾಂಗಾಸರ್ ತಿ ಎಕ್ಲಿಚ್ ಆಸಾ…” ಜಾಯ್ ಮ್ಹಣ್ ಸೆಟ್ಟಿನ್, ಆಗ್ನೆಸ್ ಸಿಸಿಲಿಯಾ ಕುಂವರ್ನಿಚೆಂ ನಾಂವ್ ಕಾಡುಂಕ್ ನಾ. “ನಾ ಮ್ಹಣ್ಚ್ಯಾಕ್ ವಕ್ಲಾಂಚೆ ಆನಿ ಘರ್ ಕಾಮಾಚಿಂ, ಜಾತಿ ಭಾಯ್ಲಿಂ ಮ್ಹಣೊನ್, ಥೊಡಿಂ ಬಾಯ್ಲ್ ಮನ್ಶ್ಯಾಂ ಆಸಾತ್.”
“ಹೆಂ…” ಮ್ಹಣಾಲೊ ಸರ್ದಾರ್, ಧ್ಯಾನಿ ಸ್ವರಾನ್. “ತಿಚ್ಯಾ ಸುರಕ್ಷಿತಾಯೆಚಿ ಕಾಂಯ್ ಭಿರಾಂತ್…”
“ನಾ” ಮ್ಹಣಾಲೊ ಸೆಟ್ಟಿ. “ಮ್ಹಜೆ ದೋಗ್ ಪಾತ್ಯೆಣೆಚೆ ಶಿಪಾಯ್, ದೀಸ್ ರಾತ್ ತ್ಯಾ ಘರಾಚೆರ್ ಪಹರೊ ಕರ್ನ್ ಆಸಾತ್.”
“ಬರೆಂ ಜಾಲೆಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಕಶೆಂಯೀ ಆನಿ ಥೊಡ್ಯಾ ತೆಂಪಾನ್, ತಿಚೊ ಬಾಪಯ್, ತಡೀಪಾರ್ ಶಿಕ್ಷೆಚಿ ಅವ್ಧಿ ಕಾಬಾರ್ ಕರ್ನ್ ಪಾಟಿಂ ಯೆತಲೊ.”
“ತುಂ ಏಕ್ ಪಿಸೊ… ಮ್ಹಾಕಾ ಮಾಫ್ ಕರ್” ಮ್ಹಣಾಲೊ ಸೆಟ್ಟಿ, ಧೈರ್ ಘೆವ್ನ್. “ಕೊಣಾ ಖಾತಿರ್ ಆನಿ ಕಿತ್ಯಾ ಖಾತಿರ್, ಅತ್ರೆಗಾನ್, ಜೀವ್ ಧರ್ನ್ ತಿ ಆಸಾ ಮ್ಹಳ್ಳೆಂ ತುಂ ಜಾಣಾಂಯ್. ಚಡಿತ್ ಉಲಯ್ಲ್ಯಾರ್, ಹಾಂವ್ ಪಿಸೊ!”
ಸರ್ದಾರ್ ಸಿಮಾಂವ್ನ್ ಜಾಪ್ ದೀಂವ್ಕ್ ನಾ – ತಶೆಂ ಕರುಂಕ್ ಆಪ್ಣಾಕ್‍ಚ್ ತೊ ಪಾತ್ಯೆಂವ್ಕ್ ನಾ.
ಬಸ್‍ಲ್ಲೆ ಕಡೆನ್ ಥಾವ್ನ್ ತೊ ಉಟ್ಲೊ, ಆನಿ ಉದೆಂತಿಚ್ಯಾ ಜನೆಲಾಂತ್ಲ್ಯಾನ್ ಭಾಯ್ರ್ ಪಳೆವ್ನ್ ರಾವ್ಲೊ. ಪ್ರಶಾಂತ್ ತ್ಯಾ ರಾತಿಂ, ಚಾಳಿಸ್ ಪನ್ನಾಸ್ ಮಯ್ಲಾಂ ಪಯ್ಶಿಲ್ಯಾ ಘಾಟಾಚ್ಯಾ ದೊಂಗ್ರಾಂಚಿ ಫಂಗ್ತ್ ಉಜ್ವಾಡಾವ್ನ್ ವಯ್ರ್ ಯೆಂವ್ಚೊ ಆನಿ ಕುಪಾಂನಿ ಅಪಾಲಿಪಾ ಜಾಂವ್ಚೊ ಚಂದ್ರ್, ತಾಚ್ಯಾ ದಿಷ್ಟಿಕ್ ಪಡ್ಲೊ. ತಾಕಾಚ್ ಪಳೆವ್ನ್, ಚಿಂತ್ನಾಂಚ್ಯಾ ಲಾರಾಂಚೆರ್ ಉಪ್ಯೆವ್ನ್ ಮ್ಹಳ್ಳೆಪರಿಂ ಮೌನ್ ತೊ ರಾವ್ಲೊ.
ಪ್ರಶಾಂತ್ ರಾತಿಚಿಂ ವೊರಾಂ ತಿಂ. ತರೀ, ವಾದಾಳಾಂತ್ಲಿಂ ಲಾರಾಂ ತಿಂ. ತಾಚೊ ಅತ್ಮೊ ಉಚಾಂಬಳ್ ಜಾಲ್ಲೊ. ಥೊಡ್ಯಾಚ್ ದಿಸಾಂ ಆದಿಂ ಮಂಗ್ಳುರಾಂತ್ ಭೆಟ್ ಜಾವ್ನ್, ಸಮಾಜೆಂತ್ಲ್ಯಾ ವೀರ್ ಸ್ತ್ರೀಯಾಂ ಥಂಯ್ ಆಪ್ಲೊ ಮಾನ್ ಜಾಗ್ವಯಿಲ್ಲ್ಯಾ ವೆರೊನಿಕಾ ಕುವೆಲಿಚೊ ತಾಕಾ ಉಗ್ಡಾಸ್ ಆಯ್ಲೊ. ಪುಣ್…
“ಸರ್ದಾರ್ ಸಿಮಾಂವ್ ಪ್ರಭು” ಮ್ಹಣಾಲೊ ದೇಜಪ್ಪ ಸೆಟ್ಟಿ, ಹಾಳ್ವಾಯೆನ್. “ಹಾಂವೆಂ ಉಲಯಿಲ್ಲೆ ವರ್ವಿಂ ತುಜೆಂ ಮನ್ ದುಕ್ಲೆಂ ಜಾಲ್ಯಾರ್ ಮ್ಹಾಕಾ ಮಾಫ್ ಕರಿಜಾಯ್. ತುಂ ಜಾಣಾಂಯ್, ಆಮಿ, ವೀರ್ ಕಾಮಾಂನಿ ಆನಿ ಸಾಹಸ್ ಕೃತ್ಯಾಂನಿ ಭರ್‌ಲ್ಲ್ಯಾ ತುಜ್ಯಾ ವಿಚಿತ್ರ್ ಜಿಣಿಯೆಂತ್, ನೀಜ್ ಮೊಗಾಚಿ ಸಂತೃಪ್ತಿ, ಸಮಾಧಾನ್ ಆನಿ ಪರಿಪೂರ್ಣತಾಯ್… ತುಜೆ ಖಾತಿರ್ ಆಶೆತಾಂವ್… ಕಿತ್ಯಾಕ್, ತಶೆಂ ಜಾತಾ ವರೇಗ್ – ದೋನ್ ಅಮೂಲ್ಯ್ ಜೀವ್ ಕರ್ಗತಾತ್ – ದೋನ್ ವೀರ್ ಅತ್ಮೆ ಕಷ್ಟತಾತ್…”
“ಆಮಿ ಮ್ಹಳ್ಯಾರ್ ಕೋಣ್?”
“ಆಮಿ ಮ್ಹಳ್ಯಾರ್, ಹಾಂವ್, ಮ್ಹಜಿ ಭಯ್ಣ್ ಭಿರ್ಮಣ್ಣಿ ಶೆಟ್ತಿ, ತುಜಿ ಭಯ್ಣ್ ರೆಮೆದ್ ಪ್ರಭಿಣ್‍ಬಾಯ್, ಆನಿ ತುಕಾ ವಳ್ಕೊನ್ ಮಾಂದ್ಚೆ ಸರ್ವ್ ಈಷ್ಟ್ ಮಂತ್ರ್…”
ಅಸ್ತಮ್ತಿ ಥಾವ್ನ್ ಭೋವ್ ವೆಗಾನ್ ಧಾಂವೊನ್ ಯೆಂವ್ಚ್ಯಾ ಘೊಡ್ಯಾಚಿಂ ಗೆಳಾಂ ತಾಂಕಾಂ ಆಯ್ಕಲಿಂ. ದುಸ್ರ್ಯಾ ಘಡ್ಯೆ, ಭಾಯ್ಲ್ಯಾ ಉಕ್ಕಡಾ ಲಾಗಿಂ ಘೊಡೊ ಯೇವ್ನ್ ಪಾವ್‍ಲ್ಲೊ ತಾಂಕಾಂ ಸಮ್ಜಲೆಂ. ಪಹರ‍್ಯಾಗಾರಾನ್ ಆವಾಜ್ ದಿಲೊ:
“ಖಬರ್ದಾರ್! ಕೌನ್ ಹೈ?”
“ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ಬೋಳಾರ್ ಖಿಲ್ಲೆದಾರಾಚೊ ತಾರ್ ಸವಾರ್.”
“ಕಿತೆಂ ಜಾಯ್?”
“ರಾವೊಂಕ್ ವೇಳ್ ನಾ… ಘೊಡೊ ಬದ್ಲುಂಕ್ ಜಾಯ್… ಆನಿ ಹಾಂಗಾಚ್ಯಾ ಸನ್ಮಾನ್ಯ್ ಕೊತ್ವಾಲಾ ಕಡೆನ್ ಏಕ್ ಸಬ್ದ್ ಉಲಂವ್ಕ್ ಜಾಯ್… ರಾತ್ ಉಜ್ವಾಡ್ಚ್ಯಾ ಪರ್ಯಾಂತ್, ಸಾಂಗಾತಾ ಪಯ್ಣ್ ಕರುಂಕ್ ಹಾಂಗಾಚೊ ಎಕ್ಲೊ ಸವಾರ್ ಜಾಯ್…”
ಇತ್ಲೆಂ ಆಯ್ಕೊನ್, ದೇಜಪ್ಪ ಸೆಟ್ಟಿ, ಎಕಾ ಹಾತಾಂತ್ ಲಾಂಟಾನ್ ಆನಿ ಆನ್ಯೇಕಾ ಹಾತಾಂತ್ ತಲ್ವಾರ್ ಘೆವ್ನ್, ಖುದ್ದ್ ಮುಖಾರ್ ಗೆಲೊ. ಪಾಟಾಪಾಟ್ ಸರ್ದಾರ್ ಸಿಮಾಂವ್ ರಾವ್ಲೊ. ಕೊತ್ವಾಲಾಚಿ ವಳಕ್ ಮೆಳ್ತಚ್, ತಾರ್ ಸವಾರಾನ್ ಸಲಾಮ್ ಕೆಲೊ.
“ತುರ್ತಾಚಿ, ಕೊಣಾಕ್ ಖಬರ್?” ವಿಚಾರ್ಲೆಂ ಸೆಟ್ಟಿನ್. ವೀರಪ್ಪ ನಾಯ್ಕಾಕ್ ತೊಯೀ ವಳ್ಕೊನ್, ಉಲವ್ನ್ ಜಾಣಾಂಸ್‍ಲ್ಲೊ.
“ಬರಯಿಲ್ಲಿ, ಮ್ಹೊರ್ ಮಾರ್‌ಲ್ಲಿ ವರ್ದಿ, ಖುದ್ದ್ ಬಾದಶಹಾಕ್. ಆನಿ…”
“ಆನಿ ತುವೆಂ ಭಿಯೆಂವ್ಚಿ ಗರ್ಜ್ ನಾ.”
“ತೊಂಡ್ಪಾಶಿಂ ವರ್ದಿ – ಸ… ಸರ್ದಾರ್ ಸಿಮಾಂವ್ಕ್.”
“ಕಿತೆಂ?” ಘಡ್ಬಡ್ಲೊ ದೇಜಪ್ಪ.
“ತುಜೆಂ ಕಾಮ್ ಹಾಂಗಾಚ್ ತಿರ್ಸಲೆಂ… ಹಾಂವ್ ಹಾಂಗಾ ಆಸಾಂ” ಮ್ಹಣೊನ್ ಸರ್ದಾರ್ ಸಿಮಾಂವ್, ಉಜ್ವಾಡಾಂತ್ ಫುಡೆಂ ಸರ್ಲೊ.
ತಾರ್ ಸವಾರ್ ಪಯ್ಲೆಂ ಪಾತ್ಯೆನಾ ಜಾಲೊ… ಸರ್ದಾರ್ ಸಿಮಾಂವ್ಕ್ ತೊ ವಳ್ಕತಾಲೊ. ದುಸ್ರ್ಯಾ ಘಡ್ಯೆ, ಸಂತೊಸಾನ್ ಆನಿ ದಾದೊಸ್ಕಾಯೆನ್ ತಾಚಿಂ ದುಖಾಂ ಉಸಳ್ಳಿಂ. ಧೊಂಪ್ರಾಂ ಬಾಗ್ವಲಿಂ ಆನಿ ಉತ್ರಾಂ ಭಾಯ್ರ್ ಸರ್ಲಿಂ…
“ಸಾಯ್ಬಾ, ಸರ್ದಾರಾ! ಕುರಿಯೆಲಾಂತ್ ಕಿತಾಫತ್ ಜಾಲ್ಯಾ…”
“ಕಿತೆಂ ಜಾಲಾಂ?” ಸರ್ದಾರ್ ಸಿಮಾಂವ್ನ್, ಥಂಡಾಯೆನ್ ವಿಚಾರ್ಲೆಂ.
“ಬೋಳೂರ್ ಠಾಣ್ಯಾಚೊ ಖಿಲ್ಲೆದಾರ್ ಪರಾರಿ ಜಾಲಾ!” ಜಾಪ್ ಮೆಳ್ಳಿ.
(ಮುಂದರುಂಕ್ ಆಸಾ)
ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
