ಇಂಫೆರ್ನಾಚಿಂ ದಾರಾಂ – 28: ಉಬೊನ್ ಗೆಲೊ ಅವ್ಕಾಸ್

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 28
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 28: ಉಬೊನ್ ಗೆಲೊ ಅವ್ಕಾಸ್

ತಶಿಂ ಭಿತರ್ ಆಯಿಲ್ಲಿಂ ಗೆಳಾಂ, ಶೀದಾ ರಾವ್ಳೆರಾ ಲಾಗಿಂ ಯೇವ್ನ್ ರಾವ್ಲಿಂ.

ಖಾಸ್ಗಿ ಕಾರಣಾ ಖಾತಿರ್ ಆನಿ ತಸಲಿಂ ಚಿಂತ್ನಾಂ ಆಟವ್ನ್ ಜಾಗೊಚ್ ಆಸ್‍ಲ್ಲೊ ಸರ್ದಾರ್, ಹ್ಯಾ ನವ್ಯಾ ಘಡಿತಾ ವರ್ವಿಂ ಚುರುಕ್ ಜಾಲೊ. ತಾಚಿ ಆತುರಾಯ್ ಆಪ್ಶಿಚ್ ಚಡ್ ಜಾಲಿ.

ರಾವ್ಳೆರಾಚ್ಯಾ ದ್ವಾರಾರ್ ಆಸ್‍ಲ್ಲ್ಯಾ ಪಹರೆಗಾರಾನ್ ಆವಾಜ್ ದಿತಚ್, ಥೊಡ್ಯಾ ವೆಳಾನ್ ಬೇಗಮ್ ಯೇವ್ನ್ ಉಲಂವ್ಚೆಂ ಆಯ್ಕಲೆಂ. ಫುಡ್ಲ್ಯಾ ಥೊಡ್ಯಾಚ್ ವೆಳಾನ್ ಫಕೀರ್ ಮಹಮ್ಮದಾಚೊಯೀ ಸ್ವರ್ ಆಯ್ಕಲೊ.

ತಿತ್ಲ್ಯಾ ವೆಳಾನ್, ಸರ್ದಾರ್ ಸಿಮಾಂವ್, ಕಾಳೊಕಾಂತ್‍ಚ್ ಭಾಯ್ರ್ ಯೇವ್ನ್, ಕಾಳೊಕಾಂತ್‍ಚ್ ಮೆಟಾಂ ದೆಂವೊನ್, ಕಾಳೊಕಾಂತ್‍ಚ್ ಕುಂದ್ಯಾಚ್ಯಾ ಆಡೊಸಾಕ್ ರಾವೊನ್ – ಖುಶೆ ವಿರೋಧ್ ಜಾಲ್ಯಾರೀ – ಸಕಯ್ಲೊ ಸಂವಾದ್ ಆಯ್ಕೊಂಕ್ ಲಾಗ್ಲೊ.

ತುರ್ತಾನ್ ಘೊಡ್ಯಾರ್ ಆಯಿಲ್ಲೊ ಗ್ರಾಯ್ಕ್ ತೊಪಾಸಿ ದಾಲ್ಮೇದಾ ಮ್ಹಣ್ ಸರ್ದಾರ್ ಸಿಮಾಂವ್ಕ್ ಸಮ್ಜಲೆಂ. ತಾಣೆಂ ಅಮ್ಸೊರಾನ್ ಬೇಗಮೆಕ್ ಪಯ್ಲೆಂ ಕಿತೆಂಗೀ ಸಾಂಗ್ಲೆಂ.

ಫಕೀರ್ ಮಹಮ್ಮದಾನ್‍ಯೀ ಚಿಕ್ಕೆ ಭಿಯಾಚೊ ಆನಿ ಕಾವ್ಜೆಣೆಚೊ ಆವಾಜ್ ದಿಲೊ.

“ತುವೆಂ ಸಾಂಗ್ಚೆಂ ಸತ್‍ಮೂ?” ಬೇಗಮೆನ್ ವಿಚಾರ್ಲೆಂ.

“ಬಿಲ್ಕುಲ್ ಸತ್, ಬೇಗಮ್ ಸಾಹೀಬಾ” ಮ್ಹಣಾಲೊ ದಾಲ್ಮೇದಾ.

“ತರ್, ತುಮಿ ಚಿಂತ್‍ಲ್ಲಿಂ ಸರ್ವ್ ಯೋಜನಾಂ ವೊಮ್ತಿಂ ಪಡ್ಲಿಂ!”

“ಪುರ್ತಿಂ ವೊಮ್ತಿಂ ಪಡೊಂಕ್ ನಾಂತ್, ಬೇಗಮ್ ಸಾಹಿಬಾ. ಚಿಂತಿನಾತ್‍ಲ್ಲ್ಯಾ ವೆಳಾರ್ ತೊ, ಸರ್ದಾರ್ ಸಿಮಾಂವ್ ಕುರಿಯೆಲಾಕ್ ಯೇವ್ನ್ ಮೆತೆರ್ ಜಾಲ್ಲ್ಯಾ ವರ್ವಿಂ ಕಿತಾಫತ್ ಜಾಲಿ!”

“ಹರ್ಯೆಕ್ ಪಾವ್ಟಿಂ ಆನಿ ಹರ್ಯೆಕ್ಲ್ಯಾಕ್ ಖಬರ್ ಸರ್ದಾರ್ ಸಿಮಾಂವ್ಚಿ!” ಮ್ಹಣಾಲಿ ಬೇಗಮ್. “ತೊ ಆತಾಂ ಖಂಯ್ ಆಸಾ ಮ್ಹಣ್ ಕಾಂಯ್ ಖಬರ್ ಆಸಾವೇ?”

“ನಾ, ಸಾರ್ಕಿ ಖಬರ್ ನಾ. ಪುಣ್ ತೊ ಹಾಂಗಾಚ್ ಖಂಯ್ ಪುಣೀ ಲಾಗ್ಸರ್ ಆಸಾ ಮ್ಹಳ್ಳೆಂ ಖಂಡಿತ್.”

“ಮ್ಹಣ್ಜೇ?”

“ನೀಲೇಶ್ವರಾಂತ್ ತಾಕಾ ಕೈದಿ ಕರುಂಕ್ ಹಾಂವೆಂ ಪ್ರಯತ್ನ್ ಕೆಲ್ಲೆಂ. ಪುಣ್…”

“ಪುಣ್ ತುಕಾಚ್ ತಾಣೆಂ ಕೈದಿ ಕೆಲೊ, ಆನಿ ಪಯ್ಯನೂರ್ ಪರ್ಯಾಂತ್ ಹಾಡ್ಲೊ ಮ್ಹಣ್ ಖಬರ್ ಆಸಾ.”

“ಪಯ್ಯನೂರಾಂತ್ ಹಾಂವೆಂ ಚುಕಯ್ಲೆಂ.”

“ಪುಣ್ ಸರ್ದಾರ್ ಸಿಮಾಂವ್?”

“ಖಂಯ್ ಗೆಲಾ ಮ್ಹಣ್ ಸಾರ್ಕೆಂ ಕಳಿತ್ ನಾ. ಜಾಲ್ಯಾರೀ ಹೆಣೆಂಚ್ – ಖಂಯ್ಸರ್ ಪುಣೀ ಲಾಗ್ಸರ್‌ಚ್ ತೊ ಆಸಾ ಜಾವ್ಯೆತ್. ಆನಿ ಆತಾಂ, ಸರ್ದಾರ್ ಯೂಸುಫ್ ಆಲಿ, ಚಡುಣೆಂ ಅರ್ಧಿ ಕಂಪ್ಣಿ ಶಿಪಾಯಾಂಕ್ ಘೆವ್ನ್ ಲಾಗಿಂ ಪಾವ್ಲಾ ಮ್ಹಣ್ತಚ್, ಅಪಾಯ್ ಚಡ್ ಆಸಾ. ಸರ್ದಾರ್ ಯೂಸುಫ್ ಆಲಿನ್ ಪಯ್ಯನೂರ್ ಛತ್ರಾಂತ್ ಠಾಣೆಂ ಕೆಲಾಂ…”

“ತಾಚಿ ಫುಡ್ಲಿ ಆಲೋಚನ್?”

“ದೋನ್ ದೀಸ್ ಛತ್ರಾಂತ್ ತೊ ರಾವ್ತಲೊ. ಸರ್ದಾರ್ ಸಿಮಾಂವ್ಚಿ ಖಬರ್ ಮೆಳನಾತ್ಲ್ಯಾರ್, ಶಿಪಾಯಾಂಕ್ ಘೆವ್ನ್ ಹಾಂಗಾಸರ್ ತೊ ಯೆತಲೊ ಖಂಯ್.”

“ತಾಣೆಂ ಹಾಂಗಾ ಯೇನಾಶೆಂ ಕರಿಜಾಯ್ – ಆಯ್ಲ್ಯಾರ್ ಸರ್ದಾರ್ ಸಿಮಾಂವ್ನ್ ಎಕ್ಲ್ಯಾನ್‍ಂಚ್ ಹಾಂಗಾಸರ್ ಯೇಂವ್ಕ್ ಜಾಯ್.”

“ಪುಣ್ ಆತಾಂ ಆಮಿ ಕಿತೆಂ ಕರ್ಚೆಂ? ಅಪಾಯ್ ಸನ್ನಿಹಿತ್ ಜಾಲಾ” ಮ್ಹಣಾಲೊ ಫಕೀರ್ ಮಹಮ್ಮದ್ ಭಿಯಾನ್.

“ತ್ಯಾ ಯೂಸುಫ್ ಆಲಿನ್ ಆನಿ ತಾಚ್ಯಾ ಶಿಪಾಯಾಂನಿ ಹಾಂಗಾಸರ್ ಯೇನಾಶೆಂ ಆಡಾಯ್ಜಾಯ್.”

“ತೆಂ ಚಡ್ ಗರ್ಜೆಚೆಂ. ಪುಣ್ ಕಶೆಂ?”

“ಹಾಂವ್ ತೆಂಚ್ ಚಿಂತಾಂ…” ಮ್ಹಣಾಲಿ ಬೇಗಮ್. ಥೊಡೊ ವೇಳ್ ತಶೆಂ ಚಿಂತುನ್ ತಿಣೆಂ ವಿಚಾರ್ಲೆಂ:

“ಯೂಸುಫ್ ಆಲಿ ಆತಾಂ ಖಂಯ್ಸರ್ ಆಸಾ ಮ್ಹಳೆಂಯ್?”

“ಪಯ್ಯನೂರ್ ಛತ್ರಾಂತ್.”

“ಆನಿ ತಾಚೆ ಶಿಪಾಯ್?”

“ತೆ ದರ್ಯಾ ವೆಳೆರ್ ಲಂಗರ್ ಮಾರ್‌ಲ್ಲ್ಯಾ ಮಂಜೆಂತ್ ಆಸಾತ್.”

“ಛತ್ರಾಂತ್ ಯೂಸುಫ್ ಆಲಿ ಎಕ್ಲೊಚ್ ಆಸಾಮೂ?”

“ವ್ಹಯ್. ತಾಚ್ಯಾ ಸಾಂಗಾತಾ ಎಕ್ಲೊ ವಾ ದೋಗ್ ಚಾಕೊರ್ – ಶಿಪಾಯ್ ಮಾತ್ರ್ ಆಸಾತ್.”

“ತರ್, ತಾಕಾ ಭೆಟ್ ದೀಂವ್ಕ್ ತುಮಿ ಆಜ್‍ಚ್ ಭಾಯ್ರ್ ಸರೊನ್ ವಚಜಾಯ್…”

“ವಚೊನ್?”

“ತುಮಿ ದಾದ್ಲೆ ಜಾವ್ನ್‌ಯೀ ಕಿತೆಂ ಫಾಯ್ದೊ?” ಮ್ಹಣಾಲಿ ಬೇಗಮ್. “ತಾಕಾ ತುಮಿ ಭೆಟ್ ದೀಜಾಯ್. ಪುಣ್ ಸಯ್ರ್ಯಾಂಪರಿಂ ನಹಿಂ – ಕಸಲ್ಯಾ ಪುಣೀ ಉಪಾಯಾನ್ ತಾಕಾ ಲಗಾಡ್ ಕಾಡ್ಲ್ಯಾರ್, ಸದ್ದ್ಯಾಚೊ ಅಪಾಯ್ ಪಯ್ಸ್ ಸರತ್.”

ಬೇಗಮೆನ್, ತಿತ್ಲ್ಯಾ ಸುಲಭಾಯೆನ್ ಆನಿ ಸಮಾಧಾನೆನ್ ದಿಲ್ಲೆಂ ಸೂಚನ್ ಆಯ್ಕೊನ್ ಫಕೀರ್ ಮಹಮ್ಮದ್ ಆನಿ ದಾಲ್ಮೇದಾ ಥಟಕ್ ಜಾಲೆ.

“ಕಿತ್ಯಾಕ್ ಘಡ್ಬಡ್ಲ್ಯಾತ್?”

“ಘಡ್ಬಡೊಂಕ್ ನಾಂವ್, ಪುಣ್ ಚಿಂತುಂಕ್ ಪಡ್ಲ್ಯಾಂವ್.”

“ಆತಾಂ ಚಡ್ ಚಿಂತುಂಕ್ ಪುರ್ಸತ್ ನಾ. ಆಜ್‍ಚ್ ರಾತಿಂ ತುಮಿ ಭಾಯ್ರ್ ಸರೊನ್ ವಚಜಾಯ್. ಫಾಲ್ಯಾಂಚ್ಯಾ ದಿಸಾ ಭಿತರ್, ಭೋವ್ ಚತ್ರಾಯೆನ್ ಹಿ ಆಲೋಚನ್ ತುಮಿ ಪೊಂತಾಕ್ ಪಾವಯ್ಜಾಯ್.”

ಕಾಳೊಕಾಂತ್ ವಯ್ರ್ ರಾವೊನ್ ಹಿಂ ಉತ್ರಾಂ ಆಯ್ಕಲ್ಲ್ಯಾ ಸರ್ದಾರ್ ಸಿಮಾಂವ್ಕ್ ಹಾಸೊಂಕ್ ಆಯ್ಲೆಂ.

“ತಶೆಂ ಜಾಂವ್” ಮ್ಹಣಾಲೊ ಫಕೀರ್ ಮಹಮ್ಮದ್. “ಆತಾಂ ಕಶಿಯೀ ರಾತ್. ಫಾಂತ್ಯಾರ್ ಆಮಿ ಭಾಯ್ರ್ ಸರ್ತಾಂವ್.”

“ಜಾವ್ಯೆತ್” ಮ್ಹಣಾಲಿ ಬೇಗಮ್. “ತುಮಿ ವಚೊನ್, ಯೂಸುಫ್ ಆಲಿಕ್ ಕಸಲ್ಯಾ ಪುಣೀ ಉಪಾಯಾಂನಿ ಲಗಾಡ್ ಕಾಡ್ಲ್ಯಾರ್, ತಾಚೆ ಶಿಪಾಯ್ ಧುಸ್ಪಡ್ತೆಲೆ ಆನಿ ಪಾಟಿಂ ಧಾಂವ್ತೆಲೆ. ಶೆಕಿಂ, ತೊ ಸರ್ದಾರ್ ಸಿಮಾಂವ್ – ಭಿಯೆನಾ ಜಾಲ್ಯಾರ್ – ಎಕ್ಲೊಚ್ ಹಾಂಗಾ ಯೆತಲೊ.”

“ತ್ಯಾ ಭಿತರ್, ಹಾಂಗಾಸರ್ ಆಸ್‍ಲ್ಲ್ಯಾ ತ್ಯಾ ನಸ್ರಾನಿ ಸ್ತ್ರೀಯೆಕ್ ಹಾಂವ್ ಮ್ಹಜಿಚ್ ಕರ್ನ್ ಘೆತಲೊಂ” ಮಿಠಿಯೊ ಮಾರ್ಲ್ಯೊ ಫಕೀರ್ ಮಹಮ್ಮದಾನ್.

ಹೆಂ ಆಯ್ಕೊನ್, ಸರ್ದಾರ್ ಸಿಮಾಂವ್ಚೆಂ ರಗತ್ ಕಡ್ಲೆಂ, ತರೀ, ಪರ್ತ್ಯಾನ್ ತಾಕಾ ಹಾಸೊಂಕ್ ಆಯ್ಲೆಂ – ಕಿತ್ಯಾಕ್ ತ್ಯಾಚ್ ರಾತಿಂ, ಫುಡ್ಲ್ಯಾ ಥೊಡ್ಯಾ ಘಡಿಯಾಂ ಭಿತರ್, ಥಂಯ್ ಥಾವ್ನ್ ಪಾಶಾರ್ ಜಾಂವ್ಕ್ ಆಸಾ ಮ್ಹಳ್ಳೆಂ ತಾಕಾ ಉಗ್ಡಾಸ್ ಆಯ್ಲೆಂ. ತ್ಯಾ ಇಡ್ಯಾಂತ್, ಬೇಗಮೆನ್ ಉಲಯಿಲ್ಲೆಂ ತಾಚ್ಯಾ ಕಾನಾರ್ ಪಡ್ಲೆಂ:

“ತುಕಾ ಜಾಯ್ ತಶೆಂ ತುವೆಂ ಕರ್ಯೆತ್. ಪುಣ್, ಪಯ್ಲೆಂ ಪಯ್ಯನೂರಾಕ್ ವಚೊನ್, ಹಾಂವೆಂ ಸಾಂಗ್‍ಲ್ಲೆಂ ಕಾಮ್ ಪೊಂತಾಕ್ ಪಾವಯ್ಜಾಯ್.”

‘ಪೊಂತಾಕ್ ಪಾವಯಾ’ ಚಿಂತ್ಲೆಂ ಸರ್ದಾರ್ ಸಿಮಾಂವ್ನ್. ‘ತುಮ್ಚ್ಯಾಕ್‍ಯೀ ಆದಿಂ ಹಾಂವ್, ಪಯ್ಯನೂರಾಕ್ ಪಾವ್ತಲೊಂ. ತಶೆಂ ಜಾಲ್ಯಾರ್ – ನಷ್ಟ್ಯಾಂನೊ – ತುಮ್ಕಾಂ ದುಸ್ರೊಚ್ ಸ್ವಾಗತ್ ಜಾತಲೊ!’

ತಾಣೆಂ ತಶೆಂ ಚಿಂತ್‍ಲ್ಲ್ಯಾಂತ್ ಚೂಕ್ ನಾ.

ಮಧ್ಯಾನ್ ಜಾತಚ್, ವೆರೊನಿಕಾ ಕುವೆಲಿಕ್, ಚಾಕರ್ನಿಕ್, ತಿಚ್ಯಾ ಬಾಪಾಯ್ಕ್ ಆನಿ ಮ್ಹಾಲಿ ಮೊಯ್ದಿನೆಕ್ – ದೇವ್ ಜಾಣಾಂ, ಆನಿ ಹೆರ್ ಕೋಣ್ – ಸಾಂಗಾತಾ ಘೆವ್ನ್ ತೊ ಭಾಯ್ರ್ ಚಲ್ತಲೊ, ಆನಿ ಪಯ್ಯನೂರಾಕ್ ಪಾವ್ತಲೊ. ದೆವಾಚ್ಯೆ ದಯೆನ್, ತ್ಯಾ ಯೋಜನಾಂತ್ ತೊ ಯಶಸ್ವಿ ಜಾತಾನಾ – ಬೇಗಮೆಚ್ಯಾ ಹುಕ್ಮೆ ಪ್ರಕಾರ್ – ಜಾಯ್ ಜಾಲ್ಲೆಚ್ ದೊಗೀ ಮಾಲ್‍ಖ್ರಿಯಾದ್, ಫಕೀರ್ ಮಹಮ್ಮದ್ ಆನಿ ತೊಪಾಸಿ ದಾಲ್ಮೇದಾ (ಯಾನೆ ಷೇರ್ ಖಾನ್) ಪಯ್ಯನೂರ್ ಛತ್ರಾಕ್ ಪಾವ್ತೆಲೆ. ತಾಂಕಾಂ ಕೈದ್ ಕರ್ನ್, ಪಾಟಿಂ ಮಂಗ್ಳುರಾಕ್ ವ್ಹರ್ನ್ ನಿತಿಕ್ ಉಬೆ ಕರುಂಕ್ ಸುಲಭ್ ಜಾತೆಲೆಂ…

ತಸಲ್ಯಾ ಚಿಂತ್ನಾಂಚ್ಯಾ ಧಾರೆಂತ್ ತೊ ಆಪ್ಲೆಸ್ತಕಿಂ ಖುಷಿ ಪಾವ್ಲೊ.

ತಶೆಂ ಚಿಂತುನ್ ಆಸ್ತಾನಾ, ಸಕಯ್ಲ್ ಉಲಯಿಲ್ಲಿಂ ಉತ್ರಾಂ ಪರ್ತ್ಯಾನ್ ತಾಚ್ಯಾ ಕಾನಾರ್ ಪಡ್ಲಿಂ:

“ಫಾಂತ್ಯಾರ್ ಆಮ್ಕಾಂ ಕಶೆಂಯೀ ವಚೊಂಕ್ ಆಸಾ” ಮ್ಹಣಾಲೊ ಫಕೀರ್ ಮಹಮ್ಮದ್. “ತ್ಯಾ ದೆಕುನ್, ಆತಾಂಚ್, ತ್ಯಾ ನಸ್ರಾನಿ ಬಾಯ್ಲೆ ಕಡೆನ್ ಥೊಡ್ಯೊ ಗಜಾಲಿ ಕಾಡ್ನ್…”

“ಬರಾಬರ್!” ಕೇಕೆಲೊ ದಾಲ್ಮೇದಾ. “ತುಕಾ ಮಜತ್ ದೀಂವ್ಕ್ ಹಾಂವ್ ಯೆತಾಂ. ಹ್ಹೆ-ಹ್ಹೇ..! ನೀಟ್ ಆಸ್‍ಲ್ಲ್ಯಾ ಫಿದಾಲ್ಕಿಣಿಂಕ್ ಬಾಗಾಂವ್ಕ್ ಆನಿ ಪಾತಳ್ ಕರುಂಕ್…”

“ಪುಣ್ ಆಯ್ಚ್ಯಾ ಮಟ್ಟಾಕ್ ಹಿಂಸಾ ನಜೊ!” ಮ್ಹಣಾಲಿ ಬೇಗಮ್.

“ಹಿಂಸಾ ನಾಸ್ತಾನಾ – ಹ್ಹೆ-ಹ್ಹೇ!” ಖತ್ಕತ್ಲೊ ತೊಪಾಸಿ. “ಹಿಂಸಾ ನಾಸ್ತಾನಾ, ಫಕತ್ ಪುಸ್ಲಾವ್ಣ್ಯಾಚ್ಯಾ ಥೊಡ್ಯಾ ಕೆಟಾಂನಿ ತಿಕಾ ಹಾಂವ್ ಕಶೆಂ ಸಾರ್ಕ್ಯಾ ವಾಟೆಕ್ ಹಾಡ್ತಾಂ ಪೊಯ್!”

ತ್ಯಾಚ್ ರಾತಿಂ, ತ್ಯಾಚ್ ವೆಳಾರ್ ಅಸಲೆಂ ಅನುಚಿತ್ ಆನಿ ಅಪೇಕ್ಷಿನಾತ್‍ಲ್ಲೆಂ ಸಮಸ್ಯೆಂ ಉಬೆಂ ಜಾಯ್ತ್ ಮ್ಹಣ್ ಸರ್ದಾರ್ ಸಿಮಾಂವ್ನ್ ಲೆಖುಂಕ್ ನಾತ್‍ಲ್ಲೆಂ.

ತಸಲಿ ಕಾಂಯ್ ಅಡ್ಕಳ್ ಯೆಂವ್ಚೆಂ ಪ್ರಸಂಗ್‍ಯೀ ತಾಕಾ ಖರೆಂಚ್ ನಾಕಾ ಆಸ್‍ಲ್ಲೆಂ.

ತಾಚೆಂ ರಗತ್ ಹುನ್ ಜಾಲೆಂ.

ತಾಚೆಂ ಮನ್, ಬಳ್ವಷ್ಟಿಂ, ತಾಪ್ಲೆಂ.

“ಜಾಯ್ತ್ ತರ್” ಮ್ಹಣಾಲಿ ಬೇಗಮ್. “ಫಾಲ್ಯಾಂ ಪಯ್ಯನೂರ್ ಥಾವ್ನ್ ಜಯ್ತೆವಂತ್ ಜಾವ್ನ್ ಪಾಟಿಂ ಯೇವ್ನ್, ತುಮ್ಚೆಂ ಇನಾಮ್ ಘೆಂವ್ಚ್ಯಾ ಖಾತಿರ್ ವಾಟ್ ತುಮಿ ತಯಾರ್ ಕರ್ಯೆತ್.”

“ತಿ ಸ್ತ್ರೀ ಮ್ಹಾಕಾಚ್ ಜಾಯ್!” ಅತ್ರೆಗ್ಲೊ ಫಕೀರ್ ಮಹಮ್ಮದ್.

“ತಿಕಾ ತುಂಚ್ ಘೆ” ಹಾಸ್ಲೊ ದಾಲ್ಮೇದಾ. “ಫಾಲ್ಯಾಂ ಅಡ್ಕಳ್ ನಾಸ್ತಾಂ ತಿಣೆಂ ತುಜಿಚ್ ಜಾಯ್ ಸಾರ್ಕೆಂ ಕಹೆಂ ಚಲಜಾಯ್ ಮ್ಹಳ್ಳೆಂ ತುಕಾ ಹಾಂವ್ ದಾಕಯ್ತಾಂ. ಚಲ್, ಯಾ.”

“ಪುಣ್ ಚತ್ರಾಯ್!” ಮ್ಹಣಾಲಿ ಬೇಗಮ್. “ಹಾಂವೆಂ ಸಾಂಗ್‍ಲ್ಲೊ ಉಗ್ಡಾಸ್ ದವರ್ಯಾ. ಆತಾಂ ಮ್ಹಾಕಾ ಥೊಡೊ ವಿಶೆವ್ ಜಾಯ್.”

ಬೇಗಮ್ ಜಹನಾರಾ ಆಪ್ಲ್ಯಾ ಅಂತಃಪುರಾಕ್ ಭಿತರ್ ಗೆಲಿ.

ಸರ್ದಾರ್ ಸಿಮಾಂವ್, ಕಾಳೊಕಾಂತ್ ಖುಬಾಳೊನ್ ಚುರುಕ್ ಜಾಲೊ.

“ತುಂ ಹಾಂಗಾಚ್ ರಾವ್” ಮ್ಹಣಾಲೊ ಫಕೀರ್ ಮಹಮ್ಮದ್. “ಹಾಂವ್ ಪಯ್ಲೆಂ ವಚೊನ್, ತ್ಯಾ ನಸ್ರಾನಿ ಬಾಯ್ಲೆಕ್, ಫುಡೆಂಚ್ಯಾ ಜೀವನಾಚೊ ಥೊಡೊ ಅನುಭವ್ ದಿತಾಂ…”

“ಹ್ಹೆ-ಹ್ಹೇ” ಹಾಸ್ಲೊ ದಾಲ್ಮೇದಾ. “ಹಾಂವ್‍ಯೀ ತುಜ್ಯಾ ಬರಾಬರ್ ಯೆತಾಂ. ಕುರಿಯೆಲಾಂತ್ಲ್ಯಾ ಫಿದಾಲ್ಕಿಣಿಂಚೊ ಮ್ಹಾಕಾಯೀ ಹುಸ್ಕೊ ಆಸಾ. ತಾಂಚ್ಯಾ ಹಿಮ್ಮತೆಚೆಂ ಮ್ಹಾಕಾಯೀ ಹಟ್ ಆಸಾ. ತಾಂಕಾಂ ಮೋವ್ ಕರ್ಪಾಚ್ಯಾ ವಿದ್ಯೆಚೆಂ ಥೊಡೆಂ ಶಿಕ್ಷಣ್ ಹಾಂವ್‍ಂಚ್ ಖುದ್ದ್ ತುಕಾ ದಿತಲೊಂ.”

“ಜಾವ್ಯೆತ್, ತರ್ ಯಾ.”

ಇತ್ಲೆಂ ಆಯ್ಕೊನ್, ಕಿತ್ಲೊ ತಾಪ್‍ಲ್ಲೊ ತರೀ, ಸರ್ದಾರ್ ಸಿಮಾಂವ್, ಸಟ್ಟ್ ಕರ್ನ್ ಪಾಟಿಂ ಘುಂವ್ಲೊ, ಆನಿ ಭಿತರ್ ಸರೊನ್, ಮಾನಿನ್ ವೆರೊನಿಕಾಚ್ಯಾ ಕುಡಾ ಭಾಯ್ಲ್ಯಾನ್, ತಾಚ್ಯಾ ಹರ್ಶೆಂಚ್ಯಾ ದಾಡ್ಡ್ಯಾ ಕದೆಲಾರ್, ಬಸೊನ್, ತಲ್ವಾರಿಚಿ ಕೊಶಿ ಕದೆಲಾಚ್ಯಾ ಪಾಟ್ಲ್ಯಾ ಪಾಯಾಕ್ ಶಿರ್ಕಾವ್ನ್, ಕೃತಕಿಂ ಘೊರೆಂವ್ಕ್ ಲಾಗ್ಲೊ.

ಕೆವ್ಲೆ, ಫಕೀರ್ ಮಹಮ್ಮದ್ ಆನಿ ದಾಲ್ಮೇದಾ ವಯ್ರ್ ಆಯ್ಲೆ.

ಹ್ಯಾ ಅನಿರೀಕ್ಷಿತ್ ಘಟನಾ ಖಾತಿರ್ ಸರ್ದಾರ್ ಸಿಮಾಂವ್ ತಾಪ್ಲೊ, ಚುರ್ಚುರ್ಲೊ, ಪುಣ್ ಅರ್ಧ್ಯೊ ಆಸ್ಡ್ಯೊ ಧಾಂಪುನ್, ಖೆಳ್ ಪಳೆಂವ್ಕ್ ಲಾಗ್ಲೊ.

ಕೆವ್ಲೆ, ಫಕೀರ್ ಮಹಮ್ಮದ್ ಆನಿ ತೊಪಾಸಿ ದಾಲ್ಮೇದಾ ವಯ್ರ್ ಪಾವ್ಲೆ.

ಮಾನಿನ್ ವೆರೊನಿಕಾ ಕುವೆಲ್ ಆಸ್‍ಲ್ಲ್ಯಾ ಕುಡಾಚ್ಯಾ ದಾರಾ ಭಾಯ್ಲ್ಯಾನ್ ತೆ ರಾವ್ಲೆ.

ಫಕೀರ್ ಮಹಮ್ಮದಾನ್ ದಾರ್ ಥಾಪುಡ್ಲೆಂ.

ಆವಾಜ್ ನಾ.

ತಾಣೆಂ ಪರ್ತ್ಯಾನ್ ದಾರ್ ಥಾಪುಡ್ಲೆಂ.

ಥೊಡ್ಯಾ ವೆಳಾನ್-

“ಕೋಣ್?” ವಿಚಾರ್ಲೆಂ ವೆರೊನಿಕಾನ್, ಭಿತರ್ ಥಾವ್ನ್.

“ಖಿಳ್ ಕಾಡ್!”

“ಕೋಣ್?”

“ಖಿಳ್ ಕಾಡ್ – ಆಮಿ – ತುಜೆ ಸಯ್ರೆ” ಫಕೀರ್ ಮಹಮ್ಮದಾನ್ ದಾಂತ್ ಸೊಡ್ಲೆ.

“ಪುಣ್, ಆತಾಂ ರಾತ್ – ತುಮಿ ಕೋಣ್?”

“ಖಿಳ್ ಕಾಡ್ ಮಾನಾ…” ಮ್ಹಣಾಲೊ ದಾಲ್ಮೇದಾ. “ತುಜೆ ಕಡೆನ್ ಭೋವ್ ಗರ್ಜೆಚೆಂ ಉಲಂವ್ಕ್ ಆಸಾ.”

“ಗರ್ಜೆಚೆಂ ಉಲಂವ್ಕ್ ಆಸ್ಲ್ಯಾರ್, ಸಕಾಳಿಂ ಉಲವ್ಯೆತ್” ಮ್ಹಣಾಲಿ ವೆರೊನಿಕಾ ಭಿತರ್ ಥಾವ್ನ್. ತಿಕಾ ಭಿರಾಂತ್ ದಿಸ್ಲಿ.

“ಸಕಾಳಿಂ ಆಮಿ ನಾಂವ್” ಮ್ಹಣಾಲೊ ಫಕೀರ್ ಮಹಮ್ಮದ್. “ತುಕಾ ಥೊಡೆಂ ಗರ್ಜೆಚೆಂ ಸಾಂಗೊಂಕ್ ಆಸಾ – ಖಿಳ್ ಕಾಡ್!”

“ನಾ, ಆತಾಂ ಜಾಯ್ನಾ…”

“ಜರೂರ್ ಜಾತಾ! ನಹಿಂ ಜಾಲ್ಯಾರ್ ದಾರ್ ಫೊಡ್ತಾಂವ್!”

“ತುಮ್ಕಾಂ ಜಾಯ್ ಜಾಲ್ಯಾರ್ ಫೊಡ್ಯೆತ್ – ಹಾಂವ್, ಹ್ಯಾ ರಾತಿಂ ಖಿಳ್ ಕಾಡಿನಾ – ಕಾಡಿಜಾಯ್ ಜಾಲ್ಯಾರ್, ಬೇಗಮ್ ಯೇವ್ನ್ ವಿಚಾರುಂದಿ!”

ಫಕೀರ್ ಮಹಮ್ಮದ್ ಆನಿ ದಾಲ್ಮೇದಾ, ಚಿಕ್ಕೆ ಚಾಪ್ಪೆ ಜಾಲೆ.

ವೆರೊನಿಕಾಚೊ – ಸಮಾಜೆಂತ್ಲ್ಯಾ ಎಕಾ ಸ್ತ್ರೀಯೆಚೊ ವೀರಾವೇಶ್ ಸಮ್ಜೊನ್, ಸರ್ದಾರ್ ಸಿಮಾಂವ್ಕ್ ಅಭಿಮಾನ್ ಭೊಗ್ಲೊ.

“ಬೇಗಮ್ ಜಹನಾರಾ ಬೀಬಿನ್ ಆಮ್ಕಾಂ ಧಾಡ್ಲಾಂ” ಮ್ಹಣಾಲೊ ಫಕೀರ್ ಮಹಮ್ಮದ್. “ತುಕಾ ಗರ್ಜೆಚ್ಯೊ ಥೊಡ್ಯೊ ಗಜಾಲಿ ಸಾಂಗೊಂಕ್ ಆಸಾತ್.”

“ಸಾಂಗೊಂಕ್ ಆಸ್‍ಲ್ಲೆಂ, ಫಾಲ್ಯಾಂ ಸಾಂಗ್ಯೆತ್.”

“ನಾ, ಆಜ್ ಸಾಂಗೊಂಕ್ ಆಸ್‍ಲ್ಲೆಂ, ಫಾಲ್ಯಾಂ ಸಾಂಗೊಂಕ್ ಜಾಯ್ನಾ. ಮರ್ಯಾದಿನ್, ದಾರ್ ಕಾಡ್ತಾಯ್ ಜಾಲ್ಯಾರ್ ಕಾಡ್.”

“ನಾ, ಆತಾಂ ಹಾಂವ್ ಕಾಡಿನಾ. ತುಮಿ ವಚ್ಯೆತ್.”

ದಾಲ್ಮೇದಾನ್ ಏಕ್ ಪೊಜ್ಡಿ ಗಾಳ್ ದಿಲಿ.

ಫಕೀರಾನ್ ದಾರಾಚೆರ್ ಏಕ್ ಖೊಟ್ ಮಾರ್ಲಿ:

“ದಾರ್ ಕಾಡ್!”

“ಬೋ… ದಾರ್ ಕಾಡ್!”

ಸರ್ದಾರ್ ಸಿಮಾಂವ್ಕ್, ಕದೆಲಾಚೆರ್ ನಿದೆಚೆಂ ಅಭಿನಯನ್ ಕರುಂಕ್ ಕಷ್ಟ್ ಮಾರ್ಲೆ.

ಫಕೀರಾನ್ ದಾರಾಚೆರ್ ಪರ್ತ್ಯಾನ್ ಖೊಟ್ ಮಾರ್ಲಿ.

“ಜಬರ್‌ದಸ್ತೆನ್ ಜರ್ ತುಮಿ ಯೇಂವ್ಕ್ ಸೊಧ್ತಾತ್, ತುಮಿ ಯೆವ್ಯೆತ್” ಮ್ಹಣಾಲಿ ವೆರೊನಿಕಾ ಭಿತರ್ ಥಾವ್ನ್.

“ನಸ್ರಾನಿ ಬಾಯ್ಲೇ, ದಾರ್ ಕಾಡ್!” ಫಕೀರಾನ್ ಪರ್ತ್ಯಾನ್ ದಾರಾಚೆರ್ ಖೊಟ್ ಮಾರ್ಲಿ.

“ನಾ, ಬೇಗಮ್ ಶಾಹೀದಾ ಆಯ್ಲ್ಯಾ ಶಿವಾಯ್ ಹಾಂವ್ ದಾರ್ ಕಾಡಿನಾ” ಮ್ಹಣಾಲಿ ವೆರೊನಿಕಾ, ಭಿತರ್ ಥಾವ್ನ್.

ಫಕೀರಾನ್ ದಾರಾಚೆರ್ ಪರ್ತ್ಯಾನ್ ಖೊಟ್ ಮಾರ್ಲಿ.

ದಾರ್ ಹಾಲೊಂಕ್ ಲಾಗ್ಲೆಂ. ದಂಡಳೊಂಕ್ ಲಾಗ್ಲೆಂ.

ತಿತ್ಲ್ಯಾ ವೆಳಾನ್, ಪಹರೆಗಾರ್‌ಯೀ ಉಟ್ಲೊ:

“ಭು-ಭೂ-ಭ್ಹು!”

“ಖಬಡ್ದಾರ್ – ಸೂಅರ್!” ಮ್ಹಣಾಲೊ ಫಕೀರ್.

“ಭು-ಭೂ-ಭು..!”

ತೊ ಸ್ವರ್ ಆಯ್ಕೊನ್ ಮ್ಹಳ್ಳೆಪರಿಂ, ಮಾನಿನ್ ವೆರೊನಿಕಾ ಕುವೆಲಿನ್ ದಾರಾಚಿ ಖಿಳ್ ಕಾಡ್ಲಿ.

ಆವ್ರಾಂತ್ ವ್ಹಾಳೊನ್ ಆಯಿಲ್ಲ್ಯಾ ಲಾಂಕ್ಡಾಪರಿಂ, ಫಕೀರ್ ಮಹಮ್ಮದ್ ಆನಿ ತೊಪಾಸಿ ದಾಲ್ಮೇದಾ – ಭಿತರ್ ಪಾವ್ಲೆ.

ವೆರೊನಿಕಾನ್ ಏಕ್ ಮೇಟ್ ಪಾಟಿಂ ಕಾಡ್ಲೆಂ.

“ಹ್ಹೆ-ಹ್ಹೇ!” ಹಾಸೊನ್, ತೊಪಾಸಿ, ಬಾಗ್ಲಾ ಕಡೆನ್ ಹಾತ್ ಬಾಂಧುನ್ ರಾವ್ಲೊ. “ಪಳೆಯಾಂ, ತುಜೆಂ ಕಾಮ್ ಮುಖಾರ್ಸಿ.”

“ಹ್ಹಿ-ಹ್ಹೀ..!” ಹಾಂಕ್ರೆಲೊ ಫಕೀರ್ ಮಹಮ್ಮದ್. “ತುಜೆ ನಕ್ರೆ ಆನಿ ತಾರಿಫ್ ಆಯ್ಚ್ಯಾನ್ ಆಖೇರ್! ಫಾಲ್ಯಾಂ ಥಾವ್ನ್ ತುಂ ಮ್ಹಜಿ ಬಾಯ್ಲ್ ಜಾವ್ನ್ ವಾಂಚೊಂಕ್ ತಯಾರಾಯ್ ಕರ್!”

ವೆರೊನಿಕಾ ಕುವೆಲ್ ಉಲಂವ್ಕ್ ನಾ. ತಿ ಆಕಾಂತ್ಲಿ.

ಫಕೀರ್ ಮಹಮ್ಮದ್ ಫುಡೆಂ ಸರ್ಲೊ. ದಾವ್ಲ್ಯೊ ಫುಲವ್ನ್ ಮ್ಹಳ್ಳೆಪರಿಂ ತಾಣೆಂ ಬಾವ್ಳೆ ರುಂದಾಯ್ಲೆ.

“ಪಯ್ಸ್ ರಾವ್!” ಮ್ಹಳೆಂ ತಿಣೆಂ.

“ಆನಿಕ್‍ಯೀ ಚಡ್ ಕಾಳ್ ಹಾಂವೆಂ ಪಯ್ಸ್ ರಾಂವ್ಚಿ ಗರ್ಜ್ ನಾ” ಮ್ಹಣಾಲೊ ಫಕೀರ್ ಮಹಮ್ಮದ್. “ಫಾಲ್ಯಾಂ ಫಾಂತ್ಯಾರ್ ವಚೊನ್, ಫಾಲ್ಯಾಂ ಸಾಂಜೆರ್ ಆಮಿ ಪಾಟಿಂ ಯೆತಾಂವ್. ತೆದಾಳಾ ತುಂ ಮ್ಹಜಿ ಸ್ತ್ರೀ ಜಾಂವ್ಕ್ ಪಾವ್ತೆಲಿಯ್.”

“ತಸಲಿ ಲಜೆಚಿ ಗಜಾಲ್ ಸಾಧ್ಯ್ ನಾ!” ಮ್ಹಣಾಲಿ ವೆರೊನಿಕಾ. ಫುಡ್ಲ್ಯಾ ಥೊಡ್ಯಾ ಘಡಿಯಾಂ ಭಿತರ್, ಥಂಯ್ ಥಾವ್ನ್ ಭಾಯ್ರ್ ವಚೊಂಕ್ ಆಸಾ ಮ್ಹಳ್ಳೊ ಉಗ್ಡಾಸ್ ತಿಕಾಯೀ ಆಸ್‍ಲ್ಲೊ. ತಿಂಚ್ ಚಿಂತ್ನಾಂ ತಿಕಾ ಧಯ್ರ್ ದಿತಾಲಿಂ.

“ಸಾಧ್ಯ್ ಆಸಾ, ಬಾಯ್ಲೇ, ಆಸಾ” ಮ್ಹಣೊನ್ ಫಕೀರ್ ಮಹಮ್ಮದಾನ್ ಮೇಟ್ ಫುಡೆಂ ಕಾಡ್ಲೆಂ.

ಪಹರೆಗಾರ್‌ಯೀ ದಾರಾರ್‌ಚ್ ಆಸ್‍ಲ್ಲೊ.

ಥಂಯ್ಚ್ ಲಾಗ್ಸರ್ ಆಸ್‍ಲ್ಲೊ ತೊಪಾಸಿ ದಾಲ್ಮೇದಾ, ಹಾಸೊಂಕ್ ಲಾಗ್ಲೊ:

“ಬರಾಬರ್ ಭಾಯೀ” ಮ್ಹಣಾಲೊ ತೊ ಫಕೀರಾ ಕಡೆನ್. “ಚಡ್ ಉಲವ್ನ್ ವೇಳ್ ಪಾಡ್ ಕರುಂಕ್ ಆಮ್ಕಾಂ ಪುರ್ಸತ್ ನಾ. ಫಾಲ್ಯಾಂಚ್ಯಾ ಕರ್ತುಬಾಂಚಿ ತಿಕಾ ಆತಾಂಚ್ ಥೊಡಿ ರೂಚ್ ದೀ.”

“ಹ್ಹಿ-ಹ್ಹೀ – ತಶೆಂಚ್ ಕರುಂಕ್ ಹಾಂವ್ ಚಿಂತಾಂ – ಹ್ಹಿ-ಹ್ಹೀ!”

“ಆನಿ ತಶೆಂ ಕರುಂಕ್ ತುಂ ದಾಕ್ಷೆತಾಯ್ ಜಾಲ್ಯಾರ್, ಹಾಂವ್ ತುಕಾ ದಾಕಯ್ತಾಂ” ಮ್ಹಣೊನ್, ಲಾಳ್ ಗಳವ್ನ್, ದಾಲ್ಮೇದಾಯೀ ಫುಡೆಂ ಸರ್ಲೊ.

ಸರ್ದಾರ್ ಸಿಮಾಂವ್ಚ್ಯಾ ಸಂಯಮಾಚೆಂ ಶಿಂತಿದ್ ಸಡಿಳ್ ಜಾಲೆಂ.

ಫಕೀರ್ ಮಹಮ್ಮದಾನ್ ಫುಡೆಂ ಸರೊನ್, ಮಾನಿನ್ ವೆರೊನಿಕಾ ಕುವೆಲಿಚೊ ಏಕ್ ಬಾವ್ಳೊ ಧರ್‌ಲ್ಲೊ.

ತ್ಯಾಚ್ ವೆಳಾರ್, ತೊಪಾಸಿ ದಾಲ್ಮೇದಾನ್ ಫುಡೆಂ ಸರೊನ್, ಮಾನಿನ್ ವೆರೊನಿಕಾ ಕುವೆಲಿಚೊ ಆನ್ಯೇಕ್ ಬಾವ್ಳೊ ಧರ್‌ಲ್ಲೊ.

ತಿಣೆಂ ಏಕ್ ಕಿಂಕ್ರಾಟ್ ದಿಲಿ.

ದಾರಾರ್ ಆಸ್‍ಲ್ಲೊ ಪಹರೆಗಾರ್ ಭಿತರ್ ಉಡ್ಲೊ.

ಫುಡ್ಲಿ ಗಜಾಲ್ ಕ್ಷಣಾ ಭಿತರ್ ಘಡೊನ್ ಗೆಲಿ.

ಪಹರೆಗಾರಾನ್, ಫಕೀರ್ ಮಹಮ್ಮದಾಚ್ಯಾ ಗೊಮ್ಟ್ಯಾ ಪಾಟ್ಲ್ಯಾನ್ ಉಜ್ವ್ಯಾ ಹಾತಾನ್, ಆನಿ ತೊಪಾಸಿ ದಾಲ್ಮೇದಾಚ್ಯಾ ಗೊಮ್ಟ್ಯಾ ಪಾಟ್ಲ್ಯಾನ್ ದಾವ್ಯಾ ಹಾತಾನ್ ಚೊಬ್ಕೊ ಮಾರ್ನ್ ಧರುನ್, ಕರ್ಡಾಚ್ಯಾ ಪೆಂಡಿಯೆಪರಿಂ ತಾಂಕಾಂ ಉಕ್ಲುನ್, ಅಷ್ಟಮೆಚ್ಯಾ ವೆಳಾರ್ ನಾರ್ಲ್ ಬಾಂಧ್ಚ್ಯಾ ಜಿನ್ಸಾರ್ ತಾಂಚೆ ಢೊಖೆ ಆಪ್ಟಿಲೆ.

ಫಕೀರ್ ಮಹಮ್ಮದ್ ಆನಿ ತೊಪಾಸಿ ದಾಲ್ಮೇದಾ, ಆಕಾಂತೊನ್, ದುಖಿನ್ ಆನಿ ತಕ್ಲಿ ಗಿರ್ಗಿರೊನ್ ಘಡಿಭರ್ ಧರ್ಣಿಕ್ ಶೆವ್ಟಲೆ.

ದುಸ್ರ್ಯಾ ಘಡ್ಯೆ ತೆ ಉಟೊನ್ ಉಬೆ ಜಾಲೆ.

“ಖಾಮೋಶ್!”

“ಬದ್ಮಾಶ್!”

“ಬರಾಬರ್!” ಮ್ಹಣಾಲೊ ಪಹರೆಗಾರ್, ಥಂಡಾಯೆನ್ ತರೀ, ದೊಳ್ಯಾಂತ್ಲ್ಯಾನ್ ಕಿಟಾಳಾಂ ಉಬವ್ನ್. “ತುಮಿಂಚ್ ತೆ! ಆಣ್ವೆ!”

ತೋಂಡ್ ಯೇನಾತ್ಲೊ ಹೊ ‘ಸುಫೆದಾರ್ ಭು-ಭು’ ಅಸೊ ಕ್ರೋಧಾನ್ ಉಲಂವ್ಚೊ ಆಯ್ಕೊನ್ ಫಕೀರ್ ಮಹಮ್ಮದ್ ಪುರ್ತೊ ಆಕಾಂತ್ಲೊ. ಮತ್ಲಬ್ ಕಿತೆಂ ಮ್ಹಣ್ ತಾಕಾ ಸಮ್ಜನಾ ಜಾಲೊ.

ತೊಪಾಸಿ ದಾಲ್ಮೇದಾಯೀ ಅಜ್ಯಾಪ್ಲೊ, ಪುಣ್ ಕೃತಕ್ ಗಂಭೀರಾಯ್ ದಾಕವ್ನ್:

“ಹೇಯ್!” ಮ್ಹಣಾಲೊ ತೊ, ಆಪ್ಲ್ಯಾ ಪೆಂಕ್ಡಾಚಿ ಭಾಲ್ ಭಾಯ್ರ್ ಕಾಡುನ್. “ಕೊಣಾಚ್ಯಾ ಆಂಗಾರ್ – ತುವೆಂ, ಎಕಾ ಕಿರ್ಕೊಳ್ ರಾಕ್ವಲ್ಯಾನ್ – ಹಾತ್ ಘಾಲೊಯ್? ಹ್ಯಾ ಅಕ್ಮಾನಾ ಖಾತಿರ್ ತುವೆಂ ಮೊರಜಾಯ್!”

“ಅಮ್ಸರ್ನಾಕಾತ್ ಪೊಜ್ಡ್ಯಾಂನೊ ಆನಿ ಲೆಂವ್ಟ್ಯಾಂನೊ!” ದೆಂಖ್ಣೊ ಮಾರ್ಲೊ ಸರ್ದಾರ್ ಸಿಮಾಂವ್ನ್. ತ್ಯಾ ಧೆಂಖ್ಣ್ಯಾ ಬರಾಬರ್ ತಾಚೊ ದಾವೊ ಪಾಯ್, ಚಾಬ್ಕಾಚ್ಯಾ ವೆಗಾನ್ ವಯ್ರ್ ಯೇವ್ನ್, ತಿ ಖೊಟ್ ತೊಪಾಸಿಚ್ಯಾ ಹಾತಾಚ್ಯಾ ಮುಟ್ಟೆರ್ ಬಸೊನ್ ತ್ಯಾ ಬಾವ್ಡ್ಯಾಚಿ ಮನ್ಗಾಂಟ್ ಫುಟೊನ್, ಭಾಲ್ ಪಲ್ತಡಿ ಉಸ್ಳೊನ್ ಜಾಲ್ಲಿ. ತ್ಯಾಚ್ ಮಾಪಾನ್, ಸರ್ದಾರ್ ಸಿಮಾಂವ್ನ್ ತ್ಯಾ ರಾತಿಂ ವೆಚೆಂ ಸವಾಲ್‍ಯೀ ಉಬೊನ್ ಗೆಲ್ಲೆಂ.

ಪಾವನಾತ್‍ಲ್ಲ್ಯಾಕ್, ತ್ಯಾ ರಾಕ್ವಲ್ಯಾಚ್ಯಾ ಹಾತಾಂತ್ ತಲ್ವಾರ್ ಝಳ್ಜಳ್ತಾಲಿ!

“ಕೊ-ಕೋಣ್ ಹ್ಯಾ ತುಂ?” ವಿಚಾರಿ ಫಕೀರ್ ಮಹಮ್ಮದ್.

“ಆಣ್ವ್ಯಾಂನೊ – ತುಮ್ಚೊ ಮೊರ್ನಾ-ದೂತ್!” ಮ್ಹಣಾಲೊ ಹಾಳ್ವಾಯೆನ್.

ಫಕೀರ್ ಮಹಮ್ಮದಾಚ್ಯಾ ಹಾತಾಂತ್ ತಲ್ವಾರ್ ಆಸ್‍ಲ್ಲಿ ತರೀ, ತಾಪ್ ಆಯಿಲ್ಲ್ಯಾ ಜಿನ್ಸಾರ್ ತಿ ಕುಡ್ಕುಡೊಂಕ್ ಲಾಗ್ಲಿ:

“ತು-ತೂಂ!” ಘಡ್ಬಡ್ಲೊ ತೊ.

“ತು-ತೂಂ!” ಆಕಾಂತ್ಲೊ ತೊಪಾಸಿ.

“ವ್ಹಯ್ – ಹಾಂವ್‍ಂಚ್ ತೊ! ಸರ್ದಾರ್ ಸಿಮಾಂವ್!” ಮ್ಹಣಾಲೊ ಸರ್ದಾರ್ ಸಿಮಾಂವ್. “ತುಮ್ಕಾಂ ನಿತಿಕ್ ಉಬೆ ಕರುಂಕ್ ಹಾಂವ್ ಆಯ್ಲಾಂ.”

ತ್ಯಾ ಉತ್ರಾಂನಿ – ಸರ್ದಾರ್ ಸಿಮಾಂವ್ನ್, ತ್ಯಾ ರಾತಿಂ ಥಂಯ್ ಥಾವ್ನ್ ಗುಪಿತ್ ಪಾಶಾರ್ ಜಾಂವ್ಕ್ ಚಿಂತ್‍ಲ್ಲೆಂ ಯೋಜನ್ ವೊಮ್ತೆಂ ಪಡ್ಲೆಂ.

ಮಾನಿನ್ ವೆರೊನಿಕಾ ಕುವೆಲಿಕ್‍ಯೀ ತೆಂ ಸಮ್ಜಲೆಂ. ತಿ ಕಳ್ವಳ್ಳಿ. ಪುಣ್ ದುಸ್ರ್ಯಾ ಘಡ್ಯೆ ಗಂಭೀರ್ ಜಾಲಿ.

ತಿತ್ಲ್ಯಾ ವೆಳಾ ಭಿತರ್ ತೊಪಾಸಿನ್ ಆನಿ ಫಕೀರ್ ಮಹಮ್ಮದಾನ್ ಆವಾಜ್ ದಿಲ್ಲೊ – ಬೋಬ್ ಘಾಲ್ನ್ ಜಾಲ್ಲಿ.

ಸಕಯ್ಲ್ ಥಾವ್ನ್ ಪಾಟಿಂ ಆವಾಜ್ ಆಯ್ಕಲೊ. ನವ್ಯಾನ್ ಪೆಟಯಿಲ್ಲೆ ದಿವೆ ದಿಸೊಂಕ್ ಲಾಗ್ಲೆ. ಲಸ್ಕರಾಂನಿ ಧಾಂವೊನ್ ಯೆಂವ್ಚಿಂ ಮೆಟಾಂ ಆಯ್ಕೊಂಕ್ ಲಾಗ್ಲಿಂ.

ಫಕೀರ್ ಮಹಮ್ಮದ್ ಆಪ್ಲಿ ತಲ್ವಾರ್ ಭಾಯ್ರ್ ಕಾಡುನ್ ಆಯ್ತೊ ಜಾಲ್ಲೆಪರಿಂಚ್, ಹೆರಾಂಕ್ ಆಪಯ್ತಾಲೊ. ತೊಪಾಸಿಯೀ ಆವಾಜ್ ದಿತಾಲೊ.

ಸರ್ದಾರ್ ಸಿಮಾಂವ್ – ಎಕ್ಸುರೊ ತರೀ – ನಿಮಾಣ್ಯಾ ಮ್ಹಳ್ಳೆಪರಿಂ ಝುಜಾಕ್ ಆಯ್ತೊ ಜಾಲೊ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel