ಇಂಫೆರ್ನಾಚಿಂ ದಾರಾಂ – 26: ಸಮಸ್ಯಾಂಚಿ ಖಾತಡ್

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 26
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 26: ಸಮಸ್ಯಾಂಚಿ ಖಾತಡ್

“ವ್ಹಯ್, ಮ್ಹಾಕಾ ಹಾಂಗಾಸರ್ ಆಹಾರ್ ಹಾಡ್ನ್ ಯೆಂವ್ಚ್ಯಾ ತ್ಯಾ ಚಾಕರ್ನಿಕ್‍ಯೀ ವ್ಹರಿಜಾಯ್” ಮ್ಹಣಾಲಿ ವೆರೊನಿಕಾ ಪರ್ತ್ಯಾನ್.

ಸರ್ದಾರ್ ಸಿಮಾಂವ್ನ್ ತರ್ಕ್ ಕರುಂಕ್ ನಾ. ಚುಕವ್ನ್ ಭಾಯ್ರ್ ವೆತಾನಾ ಎಕ್ಲ್ಯಾ ಸ್ತ್ರೀಯೆಕ್‍ಚ್ ವ್ಹರೊಂಕ್ ಕಿತ್ಲೆ ಕಷ್ಟ್ ಆಸಾತ್ ಮ್ಹಳ್ಳೆಂ ತೊ ಜಾಣಾಂಸ್‍ಲ್ಲೊ. ಆತಾಂ ಆನ್ಯೇಕ್ಲ್ಯಾಕ್‍ಯೀ ವ್ಹರಿಜಾಯ್ ಜಾಲ್ಯಾರ್ ಕಷ್ಟ್ ಆನಿ ಅಪಾಯ್ ಚಡ್ ಆಸಾತ್ ಮ್ಹಣ್ ತೊ ಜಾಣಾಂಸ್‍ಲ್ಲೊ. ಪುಣ್ ತರ್ಕ್ ಕರುನ್ ಕಿತೆಂ ಫಾಯ್ದೊ? ಕಸಲಿಂಯೀ ಹಾತೆರಾಂ ಘೆವ್ನ್ ಝುಜಾಕ್ ದೆಂವ್ಚೆಂ ವಾ ಕಸಲ್ಯೊಯೀ ಕ್ರೂರ್ ಮೊನ್ಜಾತಿ ಆಸ್‍ಲ್ಲ್ಯಾ ಅಟ್ಟಾಂಗ್ ರಾನಾಂತ್ಲ್ಯಾನ್ ಪಾಶಾರ್ ಜಾಂವ್ಚೆಂ, ಸರ್ದಾರ್ ಸಿಮಾಂವ್ಕ್ ಸಮಸ್ಯೆಂ ಮ್ಹಣ್ ದಿಸನಾತ್‍ಲ್ಲೆಂ. ಪುಣ್ ಸ್ತ್ರೀಯಾಂ ಕಡೆನ್ ತರ್ಕ್ ಕರ್ಚೆಂ ವಾ ತಾಂಚೆಂ ರಾಜಾಂವ್ ಸಮ್ಜೊಂಚೆಂ ಆಯ್ಲೆವಾರ್ ಭೋವ್ ಕಷ್ಟಾಂಚೆಂ ಸಮಸ್ಯೆಂ ತಾಕಾ ಜಾಲ್ಲೆಂ.

ತರೀ ಉಗ್ಡಾಸ್ ತಾಕಾ ಆಯ್ಲೊ…

ಎಕಾ ದಾದ್ಲ್ಯಾನ್ ಸ್ತ್ರೀಯೆ ಥಾವ್ನ್ ಹುಕುಮ್ ಘೆಂವ್ಚಿ ಸಾಧ್ಯತಾ ಸಪ್ಣಾಂತ್‍ಯೀ ತೊ ಮಾಂದ್ತೊ ನಾ. ಪುಣ್ ಆತಾಂ ಪರಿಸ್ಥಿತಿ ತಶಿ ರಾವ್‍ಲ್ಲಿ. ತ್ಯಾ ಶಿವಾಯ್…

ಪಾಟ್ಲ್ಯಾ ಲಗ್‍ಬಗ್ ದೋನ್ ವರ್ಸಾಂ ಥಾವ್ನ್, ತಾಚ್ಯಾ ಜಿಣ್ಯೆಂತ್ಲಿಂ ಥೊಡಿಂ ಮಹಾನ್ ವಿಶೇಸ್ ಘಡಿತಾಂ, ನಹಿಂಗೀ ಸ್ತ್ರೀಯೆ ಖಾತಿರ್ ವಾ ಸ್ತ್ರೀಯೆ ವರ್ವಿಂ ಸಂಭವ್‍ಲ್ಲಿಂ..?

ಘಟನಾ ಪಾಟ್ಲ್ಯಾನ್ ಘಟನ್ – ದೃಶ್ಯಾ ಪಾಟ್ಲ್ಯಾನ್ ದೃಶ್ಯ್ ತಾಚ್ಯಾ ಮತಿಚ್ಯಾ ಪಡ್ದ್ಯಾರ್ ಪಾಶಾರ್ ಜಾವ್ನ್ ಗೆಲಿಂ.

ಹಟಾನ್ ತಾಕಾ ಉಗ್ಡಾಸ್ ಆಯ್ಲೊ ಸಿರಿಂಗಪಟ್ಟಣಾಚೊ, ಮಂಜರಾಬಾದಾಚೊ, ಬೆಳ್ತಂಗಡಿಚ್ಯಾ ಜಮಲಾಬಾದಾಚೊ, ಫಿಂರ್ಗಿಪೆಟೆಚೊ ಆನಿ ಬಂಟ್ವಾಳ್ಚೊ!

ಜಬರ್ದಸ್ತೆನ್ ತಾಕಾ ಉಗ್ಡಾಸ್ ಆಯ್ಲೊ ಆಗ್ನೆಸ್ ಸಿಸಿಲಿಯಾ ಕುಂವರ್ನಿಚೊ!

“ಕಿತೆಂ ಚಿಂತುಂಕ್ ಪಡ್ಲೊಯ್?”

“ಕಾಂಯ್ ಚಡಿತ್ ನಾ” ಮ್ಹಣಾಲೊ ತೊ. “ಎಕಾ ಸ್ತ್ರೀಯೆಕ್ ಹ್ಯಾ ಅಸಾಧ್ಯ್ ಘಡಾ ಥಾವ್ನ್ ಭಾಯ್ರ್ ವ್ಹರೊಂಕ್ ಕಿತ್ಲೆ ಕಷ್ಟ್ ಆಸಾತ್ ಮ್ಹಳ್ಳೆಂ ಹಾಂವ್ ಚಿಂತಾಲೊಂ…”

“ತಶೆಂ ಆಸ್ತಾಂ ಆನ್ಯೇಕಾ ಸ್ತ್ರೀಯೆಕ್ ಹಾಂಗಾ ಥಾವ್ನ್ ಭಾಯ್ರ್ ವ್ಹರಿಜಾಯ್ ಮ್ಹಣ್ ಹಾಂವೆಂ ವಿಚಾರ್‌ಲ್ಲೆಂ ತುಕಾ ವಿಚಿತ್ರ್ ದಿಸ್ಲೆಂ?”

“ವ್ಹಯ್ ಜಾವ್ಯೆತ್.”

“ವ್ಹಡ್ ನಹಿಂ – ಪುಣ್ ತಿಕಾ ಹಾಂಗಾ ಥಾವ್ನ್ ಭಾಯ್ರ್ ವ್ಹೆಲ್ಯಾ ಶಿವಾಯ್, ಹಾಂವೆಂಯೀ ಭಾಯ್ರ್ ವೆಚೆಪರಿಂ ನಾ” ಮ್ಹಣಾಲಿ ತಿ ಹಾಳ್ವಾಯೆನ್.

“ವಿಚಿತ್ರ್ ಸಾಯ್ಬಾ, ಸ್ತ್ರೀಯಾಂಚೊ ಸಂಸಾರ್!” ಸರ್ದಾರ್ ಸಿಮಾಂವ್ ಅಮ್ರುಕೊ ಹಾಸೊನ್ ಮ್ಹಣಾಲೊ.

ವೆರೊನಿಕಾಯೀ ಹಾಸ್ಲಿ.

“ತುವೆಂ ಮ್ಹಣ್ಚೆಂ ಬರಾಬರ್!” ಮ್ಹಣಾಲಿ ತಿ. “ಸುಖಾಂತ್ ಜಾಂವ್ ದುಖಾಂತ್, ಆನಂದಾಂತ್ ಜಾಂವ್ ಆಟೆವಿಟ್ಯಾಂನಿ ತೆಂಚ್ ಉತಾರ್ ತುಂ ಉಚಾರ್ತಲೊಯ್ ಆನಿ ತ್ಯಾ ಸತಾಕ್ ತುಂ ಮತ್ ದಿತಲೊಯ್!”

“ಆಹಾಂ!” ಮ್ಹಣಾಲೊ ತೊ. “ತಿ ಚಾಕರ್ನ್ ಕೋಣ್ ಜಾವ್ಯೆತ್?”

“ತಿ ವರ್ತವ್ತಾ ಆತಾಂ ಮ್ಹಜ್ಯಾ ಭೋವ್ ಮೊಗಾಚಿ ಇಷ್ಟಿಣ್.”

“ಪುಣ್ ತಿ ಮುಸ್ಲಿಮ್ ಜಾಲ್ಲೆ ವರ್ವಿಂ, ತಿಣೆಂ ಹಾಂಗಾ ಥಾವ್ನ್ ಭಾಯ್ರ್ ಜಾಯ್ ತಶೆಂ ವಚ್ಯೆತ್ ನಹಿಂವೇ?”

“ವಚ್ಯೆತ್ – ವಚೊಂಕ್ ತಿಕಾ ಮನ್ ಆಸಾ, ಪುಣ್ ವಚೊಂಕ್ ಬೇಗಮ್ ತಿಕಾ ಸೊಡಿನಾ.”

“ವಿಚಿತ್ರ್ ಹ್ಯೊ ಗಜಾಲಿ! ಸಮಸ್ಯಾಂ ವಯ್ರ್ ಸಮಸ್ಯಾಂ!” ಅಜ್ಯಾಪ್ಲೊ ತೊ.

ತಿತ್ಲ್ಯಾರ್, ತೆವ್ಶಿಲ್ಯಾನ್ ಕೊಣೆಂಗೀ ಯೆಂವ್ಚೊ ಆವಾಜ್ ಆಯ್ಕಲ್ಲ್ಯಾನ್, ಹಾಣಿಂ ಉಲಂವ್ಚೆಂ ಬಂದ್ ಕೆಲೆಂ. ತಿ ದಾರ್ ಬಂದ್ ಕರ್ನ್ ಭಿತರ್ ರಾವ್ಲಿ. ರಾಕ್ವಲಿ ಭಾಯ್ಲ್ಯಾ ಬಗ್ಲೆನ್ ಬಸ್ಲೊ. ವೆರೊನಿಕಾ ಆಪ್ಲ್ಯಾ ಕುಡಾಂತ್ ಮಾಗ್ಣೆಂ ಕರ್ನ್ ಉಪ್ರಾಂತ್ ಥೊಡೊ ವಿಶೆವ್ ಘೆತಾನಾ, ಸರ್ದಾರ್ ಸಿಮಾಂವ್ ತಿಕಾ ಹಾಂಗಾ ಥಾವ್ನ್ ಸುಟ್ಕಾ ಲಾಭವ್ನ್ ಭಾಯ್ರ್ ವ್ಹರ್ಚೆಂ ಯೋಜನ್ ಫುಡೆಂ ಚಿಂತುಂಕ್ ಲಾಗ್ಲೊ.

ನಿಜಾಯ್ಕೀ, ಕಣ್ಣಾನೂರ್ ರಾವ್ಳೆರಾಚ್ಯಾ ಘಡಾ ಥಾವ್ನ್ ಭಾಯ್ರ್ ವೆಚ್ಯಾ ಖಾತಿರ್, ರಾವ್ಳೆರಾಚ್ಯಾ ವೊಡ್ತಾಚ್ಯಾ ಮ್ಹಾಲ್ಯಾಚಿ ತಾಣೆಂ ವಳಕ್ ಕೆಲ್ಲಿ ಆನಿ ತಾಕಾ ಆಪ್ಲ್ಯಾ ಪಕ್ಷೆಕ್ ಘೆತ್‍ಲ್ಲಿ ರೀತ್ ವಿಶೇಸ್ ಜಾವ್ನಾಸ್‍ಲ್ಲಿ.

ವೆರೊನಿಕಾಕಡ್ಚಿ ಮುದಿ ಘೆವ್ನ್ ತಿಕಾ ಮಜತ್ ದೀಂವ್ಕ್ ಕಬೂಲ್ ಜಾಲ್ಲ್ಯಾ ಖಾತಿರ್ ಚಾಬ್ಕಾಂಚೆ ಮಾರ್ ಖಾವ್ನ್ ಬಂಧೆಂತ್ ಪಡ್‍ಲ್ಲ್ಯಾ ತ್ಯಾ ಮ್ಹಾಲ್ಯಾಕ್, ಆದ್ಲ್ಯಾಚ್ ದಿಸಾ ಸುಟ್ಕಾ ಲಾಭ್‍ಲ್ಲಿ. ತ್ಯಾಚ್ ರಾತಿಂ, ಸರ್ದಾರ್ ಸಿಮಾಂವ್ ತಾಚ್ಯಾ ಕೊಟ್ರೆಕ್ ಗೆಲ್ಲೊ. ವಠಾರಾಚ್ಯಾ ಬಗ್ಲೆನ್ ಆಸ್ಚ್ಯಾ ಗುಮ್ಮ್ಯಾಂಚ್ಯಾ ಎಕಾ ಪೊಂತಾರ್ ಆಸ್ಚ್ಯಾ ತ್ಯಾ ಕೊಟ್ರೆಂತ್ ತೊ ಮ್ಹಾಲಿ ಎಕ್ಲೊಚ್ ರಾವ್ತಾಲೊ ಮ್ಹಣ್ ಸರ್ದಾರ್ ಸಿಮಾಂವ್ನ್ ಪಯ್ಲೆಂಚ್ ಖಾತ್ರಿ ಕೆಲ್ಲೆಂ.

ಸರ್ದಾರ್ ಸಿಮಾಂವ್ ತಾಚ್ಯಾ ಕೊಟ್ರೆಕ್ ವೆತಾನಾ ಮ್ಹಾಲ್ಯಾಕ್ ನೀದ್ ಪಡೊಂಕ್ ನಾತ್‍ಲ್ಲಿ. ಸರ್ದಾರ್ ಸಿಮಾಂವ್ನ್ ತಾಚೆಂ ದಾರ್ ಠೊಕ್ಲೆಂ.

“ಕೊ-ಕೋಣ್ ಥಂಯ್?” ಮ್ಹಾಲ್ಯಾನ್ ಭಿಯಾನ್ ವಿಚಾರ್ಲೆಂ.

“ಭು-ಭೂ-ಭು!” ಆವಾಜ್ ದಿಲೊ ಸರ್ದಾರ್ ಸಿಮಾಂವ್ನ್, ಹಾಳ್ವಾಯೆನ್.

“ಕೊ-ಕೋಣ್?” ಮ್ಹಾಲೊ, ಬಿರ್ಮತ್, ಭಿಯಾನ್ ವಿಚಾರಿಲಾಗ್ಲೊ.

“ಹಾಂವ್ – ಮಿತ್ರ್” ಮ್ಹಳೆಂ ಸರ್ದಾರ್ ಸಿಮಾಂವ್ನ್. “ದಾರ್ ಉಗ್ತೆಂ ಕರ್.”

ಮ್ಹಾಲ್ಯಾನ್ ಧೈರ್ ಘೆತ್ಲೆಂ. ಪಂಟಿ ತಾಣೆಂ ಪೆಟಯ್ಲಿ ಆನಿ ದಾರ್ ಕಾಡ್ಲೆಂ. ದಾರಾರ್ ರಾವ್‍ಲ್ಲ್ಯಾ ಭಿರಾಂಕುಳ್ ಮನ್ಶ್ಯಾಕ್ ಪಳೆವ್ನ್ ತೊ ಪುರ್ತೊ ಆಕಾಂತ್ಲೊ.

“ಕೊ-ಕೋಣ್ ತುಂ?” ಫುಮಾರ್ಲೊ ತೊ.

“ತುವೆಂ ಭಿಯೆಂವ್ಚಿ ಗರ್ಜ್ ನಾ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಹಾಂವ್ ತುಜೊ ಮಿತ್ರ್ ಜಾವ್ನ್ ಆಯ್ಲಾಂ.”

“ಹಾಂ?”

“ವ್ಹಯ್” ಮ್ಹಣಾಲೊ ಸರ್ದಾರ್ ಸಿಮಾಂವ್. ಲಾಗ್ಸರ್ ಆಸ್ಚ್ಯಾ ಬಾಂಯ್ತ್ಲೆಂ ಉದಾಕ್ ವ್ಹರ್ಚ್ಯಾ ನಿಬಾನ್ ತಾಣೆಂ ಹಾಡ್‍ಲ್ಲೊ ಕೊಳ್ಸುಲೊ ಸಕಯ್ಲ್ ದವರ್ಲೊ. “ಹಾಂವ್ ತುಜೊ ಮಿತ್ರ್ ಜಾವ್ನ್ ಆಯ್ಲಾಂ.”

“ಪು-ಪುಣ್, ಕೋಣ್ ತುಂ?”

“ಸಾಂಗ್ತಾಂ, ಘಡ್ಬಡ್ ಕರಿನಾಕಾ” ಮ್ಹಣಾಲೊ ಸರ್ದಾರ್ ಸಿಮಾಂವ್. ಭಿತರ್ ಸರೊನ್. “ದಾರ್ ಬಂದ್ ಕರ್. ಚಡ್ ವೇಳ್ ರಾವೊಂಕ್ ಮ್ಹಾಕಾ ಪುರ್ಸತ್ ನಾ.”

ಮ್ಹಾಲೊ ಸಗ್ಳೊ ಭಿಯೆಲ್ಲೊ ಜಾಲ್ಯಾರೀ, ತಾಣೆಂ ದಾರ್ ಬಂದ್ ಕೆಲೆಂ.

“ಖಂಯ್ ಥಾವ್ನ್ ತುಂ ಆಯ್ಲಾಯ್?” ಮ್ಹಳೆಂ ತಾಣೆಂ. “ಭಿಕ್ ಪುಣೀ ಮಾಗೊಂಕ್ ಆಯ್ಲಾಯ್ ಜಾಲ್ಯಾರ್, ತುಕಾ ದೀಂವ್ಕ್ ಮ್ಹಜೆ ಕಡೆನ್ ಕಾಂಯ್ ನಾ.”

“ತುಜಿ ಭಿಕ್ ಮ್ಹಾಕಾ ನಾಕಾ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಪುಣ್, ತುವೆಂ ಪಯ್ಲೆಂ ವಿಚಾರ್‌ಲ್ಲ್ಯಾ ಸವಾಲಾಕ್ ಹಾಂವ್ ಜಾಪ್ ದಿತಾಂ – ಹಾಂವ್ ರಾವ್ಳೆರಾ ಥಾವ್ನ್ ಆಯ್ಲಾಂ.”

“ರಾವ್ಳೆರಾ ಥಾವ್ನ್! ಹಾಂವೆಂ ಪರ್ತ್ಯಾನ್ ಕಿತೆಂ ಕೆಲಾಂ?”

“ಕಾಂಯ್ ಕರುಂಕ್ ನಾಂಯ್. ತುವೆಂ ಭಿಯೆಂವ್ಚಿ ಗರ್ಜ್ ನಾ.”

“ಕಿತೆಂ ತುಕಾ ಜಾಯ್? ತುಜಿ ಮ್ಹಾಕಾ ವಳಕ್ ನಾ…”

“ವ್ಹಯ್. ತುಂ ಮ್ಹಾಕಾ ವಳ್ಕನಾಂಯ್. ತುವೆಂ ತ್ಯಾ ಕಿರಿಸ್ತಾನ್ ಸ್ತ್ರೀಯೆಕಡ್ಚಿ ಮುದಿ ಘೆವ್ನ್, ತಿಕಾ ಮಜತ್ ದೀಂವ್ಕ್ ಭಾಸಾಯಿಲ್ಲ್ಯಾ ಖಾತಿರ್ ತುಕಾ ಚಾಬ್ಕಾಂನಿ ಮಾರ್ನ್ ಬಂಧೆಂತ್ ಘಾಲ್ಲ್ಯಾ ದಿಸಾಚ್ ಕಾಮ್ ವಿಚಾರ್ನ್ ಹಾಂವ್ ಹಾಂಗಾಸರ್ ಆಯಿಲ್ಲೊಂ. ತಾಣಿಂ ಮ್ಹಾಕಾ ರಾಕ್ವಲ್ಯಾಚೆಂ ಕಾಮ್ ದಿಲಾಂ.”

“ಪು-ಪುಣ್ ತ್ಯಾ ರಾಕ್ವಲ್ಯಾಕ್ ತೋಂಡ್ ಯೇನಾ ಮ್ಹಣ್ ಹಾಂವೆಂ ಆಯ್ಕಲಾಂ!”

“ತುವೆಂ ಆಯ್ಕಲ್ಲೆಂ ಸಾರ್ಕೆಂಚ್ – ರಾಕ್ವಲ್ಯಾಚೆಂ ಕಾಮ್ ಕರ್ತಾನಾ ಮ್ಹಾಕಾ ತೋಂಡ್ ಯೇನಾ!”

“ತುಕಾ! ತರ್…”

“ವ್ಹಯ್ – ಹಾಂವ್‍ಂಚ್ ತೊ ರಾಕ್ವಲಿ. ಪುಣ್ ಮ್ಹಾಕಾ ತೋಂಡ್ ಯೆತಾ ಮ್ಹಣ್ ಕೊಣಾಯ್ಕೀ ಸಾಂಗ್ಶಿ ಜಾಲ್ಯಾರ್ ತುಜೊ ಜೀವ್ ಉರಾಸೊ ನಾ. ತುಕಾ ಕಾಬಾರ್ ಕರ್ನ್ ಹಾಂವ್ ಹಾಂಗಾ ಥಾವ್ನ್ ಪರಾರಿ ಜಾತಾಂ.”

ಮ್ಹಾಲಿ ಪುರ್ತೊ ಆಕಾಂತ್ಲೊ.

“ಹಾಂವ್ ಕೊಣಾಯ್ಕೀ ಸಾಂಗೊಂಕ್ ವಚನಾ” ಮ್ಹಣಾಲೊ ತೊ. “ತ್ಯಾ ಶಿವಾಯ್ – ತ್ಯಾ ಶಿವಾಯ್, ಹಾಂವ್ ಹಾಂಗಾಸರ್ ಚಡ್ ದೀಸ್ ರಾವನಾ. ಖಂಯ್ಸರೀ ಕಾಮ್ ಮೆಳತ್ ಜಾಲ್ಯಾರ್ ಹಾಂಗಾ ಥಾವ್ನ್ ಉಸ್ಳೊಂಕ್ ಹಾಂವ್ ಚಿಂತಾಂ.”

“ತರ್, ತುಂಚ್ ಮ್ಹಾಕಾ ಜಾಯ್ ಜಾಲ್ಲೊ ಮನಿಸ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಕಿತ್ಯಾಕ್ ಮ್ಹಳ್ಯಾರ್ – ಹಾಂವ್‍ಯೀ ಹಾಂಗಾ ಥಾವ್ನ್ ಉಸ್ಳೊಂಕ್ ಚಿಂತಾಂ!”

“ತುಂಯೀ ಉಸ್ಳೊಂಕ್ ಚಿಂತಾಯ್!” ಚಡ್ ಅಜ್ಯಾಪ್ಲೊ ತೊ ಮ್ಹಾಲಿ. “ತುಕಾ ಕಿತೆಂ ಜಾಲಾಂ ಮ್ಹಣ್? ತುವೆಂ ಯೇವ್ನ್ ಕಿತ್ಲೆ ದೀಸ್ – ಏಕ್ ಹಫ್ತೊಯೀ ಜಾಂವ್ಕ್ ನಾ ಪುರ್ತೊ.”

“ತೆಂ ವ್ಹಯ್. ಪುಣ್ ಚಡ್ ದುಡು ಮೆಳ್ಳ್ಯಾರ್ ಕೋಣ್ ಸೊಡ್ತಾ? ಮ್ಹಜಿಂ ಕಾಮಾಂಚ್ ತಶಿಂ. ಹಾಂಗಾಚ್ಯಾ ಬೇಗಮೆಕ್ ಶಿಪಾಯ್ ಜಾಯ್, ಬರೊ ಪಾಗ್ ದಿತಾತ್ ಮ್ಹಣ್ ಆಯ್ಕೊನ್ ಹಾಂವ್ ಹಾಂಗಾ ಆಯ್ಲೊಂ. ಪುಣ್ ಕಾಂಯ್ ಪ್ರಯೋಜನ್ ನಾ. ತ್ಯಾ ಶಿವಾಯ್…”

“ತ್ಯಾ ಶಿವಾಯ್?” ಮ್ಹಾಲ್ಯಾಚಿ ಆತುರಾಯ್ ಚಡ್ಲಿ. ಸರ್ದಾರ್ ಸಿಮಾಂವ್ಕ್‌ಯೀ ಜಾಯ್ ಜಾಲ್ಲೆಂ ತಿತ್ಲೆಂಚ್.

“ತ್ಯಾ ಶಿವಾಯ್, ಹಾಂಗಾಸರ್ ಚಡ್ ದೀಸ್ ರಾವ್ಲ್ಯಾರ್ ಜಿವಾಕ್ ಸಂಚಿಕಾರ್ ಆಸಾ.”

“ಜಿವಾಕ್ ಸಂಚಿಕಾರ್! ಕಸೊ?”

“ಥೊಡ್ಯಾಚ್ ದಿಸಾಂ ಭಿತರ್ ಟಿಪ್ಪು ಸುಲ್ತಾನಾಚಿಂ ರಿಸಾಲಾಂ ಹಾಂಗಾ ಯೇವ್ನ್ ಪಾವ್ತೆಲಿಂ ಖಂಯ್. ಬೇಗಮೆಕ್ ಬೂದ್ ಶಿಕಯ್ತೆಲಿಂ ಖಂಯ್. ಹಾಂಗಾ ಆಸ್‍ಲ್ಲ್ಯಾ ಸರ್ವ್ ದಾದ್ಲ್ಯಾಂಕ್ ಫಾಶಿ ದಿತೆಲಿಂ ಖಂಯ್.”

“ಹಾಂ..?” ಮ್ಹಾಲಿ ಪುರ್ತೊ ಕಕ್ಕಾಬಿಕ್ಕಿ ಜಾಲೊ. “ಹೆಂ ಸರ್ವ್ ತುಕಾ ಕೊಣೆಂ ಸಾಂಗ್ಲೆಂ?”

“ತೆಂ ಹಾಂವ್ ಸರ್ವ್ ಜಾಣಾಂ. ಟಿಪ್ಪು ಸುಲ್ತಾನಾಚೆ ಥೊಡೆ ಖಬ್ರಿ ಆನಿ ಗೂಢಚಾರ್ ಆತಾಂ ಹಾಂಗಾಸರ್ ಆಸಾತ್.”

“ಹಾಂ..?” ಮ್ಹಾಲ್ಯಾನ್ ಆನಿಕ್‍ಯೀ ಚಡ್ ವಿಜ್ಮಿತ್ ಜಾವ್ನ್ ತೋಂಡ್ ಸೊಡ್ಲೆಂ.

“ತುಂ ಇತ್ಲೊಯೀ ಬುದ್ದು ಮ್ಹಣ್ ಹಾಂವ್ ನೆಣಾಸ್‍ಲ್ಲೊಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ತುಕಾ ಇತ್ಲ್ಯಾ ಭಿತರ್‌ಚ್ ಸಮ್ಜಜಾಯ್ ಆಸ್‍ಲ್ಲೆಂ. ಕಣ್ಣಾನೂರ್ಚೆಂ – ಹಾಂಗಾಚ್ಯಾ ಬೇಗಮೆಚೆಂ – ಕಾರ್ಬಾರ್ ವೆಗಿಂ ಕಾಬಾರ್ ಜಾತೆಲೆಂ ಮ್ಹಣ್ ಮ್ಹಾಕಾ ಖಂಡಿತ್ ಖಬರ್ ಆಸಾ. ದೆಕುನ್ ಹಾಂವೆಂ ಹಾಂಗಾ ಥಾವ್ನ್ ಜಾತಾ ತಿತ್ಲ್ಯಾ ವೆಗಿಂ ಉಸ್ಳೊಂಕ್ ಚಿಂತ್ಲಾಂ. ತ್ಯಾ ಶಿವಾಯ್, ಟಿಪ್ಪು ಸುಲ್ತಾನಾಚಿಂ ರಿಸಾಲಾಂ ಹಾಂಗಾಚ್ಯಾ ಘಡಾ ಲಾಗಿಂ ಪಾವೊನ್ ದಾಡ್ ಘಾಲ್ಚ್ಯಾ ಆದಿಂ, ಹಾಂಗಾ ಥಾವ್ನ್ ಭಾಯ್ರ್ ವೆಚ್ಯಾ ಹರ್ಯೆಕಾ ದಾದ್ಲ್ಯಾಕ್, ಟಿಪ್ಪುಚೊ ತೊ ಸರ್ದಾರ್ ಆಪ್ಲ್ಯಾ ಸೈನಾಂತ್ ಕಾಮ್ ದಿತಾ ಖಂಯ್, ಆನಿ…”

“ಆನಿ?”

“ಆನಿ ಹಾಂಗಾ ಮೆಳ್ಚ್ಯಾ ಪ್ರಾಸ್ ಚಾರ್ ವಾಂಟ್ಯಾಂನಿ ಚಡ್ ಪಾಗ್ ದಿತಾ ಖಂಯ್!”

“ವ್ಹಯ್ಗೀ! ಕೋಣ್ ತೊ ಸರ್ದಾರ್?”

“ತೆಂ ಸರ್ವ್ ಸಾಂಗೊಂಕ್ ಜಾಯ್ನಾ – ತುಕಾ ಪಾತ್ಯೆಂವ್ಚೆಂ ಕಶೆಂ?”

“ತರ್ ತುಂ ಮ್ಹಜೆ ಸರ್ಶಿನ್ ಕಿತ್ಯಾಕ್ ಆಯಿಲ್ಲೊಯ್?” ಮ್ಹಾಲಿ ಚಿಕ್ಕೆ ಚುರುಕ್ ಜಾಲೊ. “ಪಯಿಲ್ಲೆ ಸುವಾತೆರ್ ತುಂ ಮೊನೊ ಮ್ಹಣ್ತಾಲೆ. ದುಸ್ರ್ಯಾ ಸುವಾತೆರ್ – ತುಕಾ, ಭಾಯ್ಲೊ, ಭಿತರ್ಲೊ ಸರ್ವ್ ಘುಟ್ ಕಳಿತ್ ಆಸಾ ಮ್ಹಣ್ತಾಯ್.”

“ಜಾಯ್ತ್” ಮ್ಹಣಾಲೊ ಸರ್ದಾರ್ ಸಿಮಾಂವ್, ಚಿಕ್ಕೆ ಗಂಭೀರಾಯೆಚೆಂ ಅಭಿನಯನ್ ದಾಕವ್ನ್. “ಹಾಂವ್, ನೀದ್ ಪಡನಾ ಮ್ಹಣ್, ಚಿಕ್ಕೆ ಭೊಂವ್ಚ್ಯಾ ಖಾತಿರ್ ಭಾಯ್ರ್ ಆಯಿಲ್ಲೊಂ. ತುಜೆ ಕಡೆನ್ ಚಡ್ ಉಲಯ್ಲ್ಯಾರ್ ಕಾಂಯ್ ಪ್ರಯೋಜನ್ ಆಸಾ ಮ್ಹಣ್ ಮ್ಹಾಕಾ ದಿಸನಾ…”

“ಅರೇ ಕರ್ಮಾಂನೊ! ತುವೆಂ ಮ್ಹಜ್ಯಾ ಸವಾಲಾಕ್ ಜಾಪ್ ದೀಂವ್ಕ್ ನಾಂಯ್!”

“ಕಸಲೆಂ ಸವಾಲ್?”

“ತುಂ ಮೊನೊ ಮ್ಹಣ್ತಾಲೆ…”

“ಪೆದ್ದಾ, ಮನ್ಶ್ಯಾನ್ ಹ್ಯಾ ಸಂಸಾರಾಂತ್ ದೀಸ್ ಕಾಡುಂಕ್ ಜಾಯ್ತೆ ಉಪಾಯ್ ವಾಪಾರುಂಕ್ ಆಸಾತ್. ಹಾಂವ್ ಪಳೆ…”

“ಕಿತೆಂ ಪಳೆ?”

“ಹಾಂವ್ ಪಳೆ – ಪಯ್ಲೊ ಮರಾಠ್ಯಾಂಚ್ಯಾ ಸೈನಾಂತ್ ಆಸ್‍ಲ್ಲೊಂ. ತಾಣಿಂ ಚಲಂವ್ಚಿ ನೀಜ್ ಶಿಪಾಯ್‍ಗಿರಿ ನಹಿಂ, ಬಗಾರ್, ಅಪಾಲಿಪಾ ಲುಟ್ಕಾರ್ಗಿ ಮ್ಹಣ್ ಮ್ಹಾಕಾ ಸಮ್ಜತಚ್, ಥಂಯ್ ಥಾವ್ನ್ ಹಾಂವ್ ಜುರ್ಲೊಂ ಆನಿ ಗಾಂವ್ ದೇಶ್ ಭೊಂವೊನ್, ತೆನ್ಕಾ ತುದಿಯೆರ್ ಪಾಂವ್ಚ್ಯಾ ಆದಿಂ, ಹರಪನಹಳ್ಳಿ, ರಾಯದುರ್ಗಾ, ಚಿತಾಲ್‍ದುರ್ಗಾ ಆನಿ ಹೆರ್ ಸಬಾರ್ ಪಾಳಯಾಂನಿ ಶಿಪಾಯ್ ಜಾವ್ನ್ ಹಾಂವ್ ವಾವುರ್ಲಾಂ.”

“ಉಪ್ರಾಂತ್?”

Watch Video on VJP Saldanha

“ಉಪ್ರಾಂತ್…” ಸರ್ದಾರ್ ಸಿಮಾಂವ್ನ್ ಉತ್ರಾಂ ಖೆಳಯ್ಲಿಂ. “ನಾಣಿಂ ಚಡ್ ಮೆಳ್‍ಲ್ಲೆ ಕಡೆನ್ ಜಿಣಿ ಬರಿ ಮ್ಹಣ್ ಜಾಣಾಂಸೊನ್ ಆನಿಕ್‍ಯೀ – ಜಾಯ್ ತಶೆಂ ನಾಂವ್ ಆನಿ ವೇಸ್ ಬದ್ಲುನ್ ಹಾಂವ್ ಭೊಂವ್ಲೊಂ. ತಸಲ್ಯಾ ಭೊಂವ್ಡೆ ವೆಳಾರ್, ಚಿಂತಿನಾಸ್ತಾನಾ ಪಯ್ಯನೂರಾಕ್ ಪಾವ್‍ಲ್ಲ್ಯಾ ವೆಳಾರ್, ಥಂಯ್ಸರ್ ತುಮ್ಚ್ಯಾ ಬೇಗಮೆಚೊ ಅಧಿಕಾರಿ, ನವೆ ಶಿಪಾಯ್ ಜಾಯ್ ಮ್ಹಣ್ ಆನಿ ಚಡ್ ಪಾಗ್ ಮೆಳ್ತಾ ಮ್ಹಣ್ ಆಪೊಣೆಂ ದಿತಾಲೊ. ಮ್ಹಾಕಾ ಕಿತೆಂಗೀ ಭೊಗ್ಲೆಂ. ತೋಂಡ್ ಯೇನಾತ್ಲೊ ಎಕ್ಲೊ ಮೊನೊ ಮ್ಹಣೊನ್ ಹಾಂವ್ ಮುಖಾರ್ ಪಡ್ಲೊಂ, ಆನಿ ಹಾಂಗಾ ಪಾವ್ಲೊಂ…”

“ತರ್ – ಉಪ್ರಾಂತ್?”

“ಉಪ್ರಾಂತ್, ದೋನ್ ತೀನ್ ದಿಸಾಂ ಭಿತರ್ ಹಾಂಗಾಚಿ ಪಿತುಳ್ ಹಾಂವೆಂ ಪಾರ್ಕಿಲಿ, ಆನಿ ಮ್ಹಜೆಂ ಫುಡ್ಲೆಂ ಯೋಜನ್ ಕೆಲೆಂ.”

“ಕಸಲೆಂ ಯೋಜನ್?”

“ಹಾಂಗಾ ಥಾವ್ನ್ ಚಲ್ಚೆಂ.”

“ಪುಣ್…”

“ಪುಣ್ ತುಕಾ ಪಾತ್ಯೆಂವ್ಕ್ ಕಷ್ಟ್ ಮಾರ್ತಿತ್. ಟಿಪ್ಪು ಸುಲ್ತಾನಾಚೆ ದಲಾಲಿ ಆನಿ ಗೂಢಚಾರ್ ಹಾಂಗಾ ಆಸಾತ್. ತ್ಯಾ ವರ್ವಿಂ ಜಾಲ್ಲ್ಯೊ ಗಜಾಲಿ ಹಾಂವೆಂ ತುಕಾ ಸಾಂಗ್ಲ್ಯೊ. ತುಕಾ ಧಯ್ರ್ ನಾ ಜಾಲ್ಯಾರ್…”

“ಧಯ್ರ್ ಆಸಾ…”

“ವಾ, ಪಾತ್ಯೆಣಿ ನಾ ಜಾಲ್ಯಾರ್ – ಹಾಂಗಾ ಪಳೆ” ಮ್ಹಣೊನ್, ಸರ್ದಾರ್ ಸಿಮಾಂವ್ನ್ ಆಪ್ಲ್ಯಾ ದಗ್ಲ್ಯಾ ಭಿತರ್ ಹಾತ್ ಘಾಲ್ನ್ – ಭಾಂಗಾರಾಚಿಂ – ದೋನ್ ನಾಣಿಂ ಭಾಯ್ರ್ ಕಾಡ್ಲಿಂ. ಜಿಂ ಪಳೆವ್ನ್ ಮ್ಹಾಲಿ ಸಗ್ಳೊಚ್ ಆಂವ್ಡೆಂವ್ಕ್ ಲಾಗ್ಲೊ.

“ತಿಂ – ತಿಂ ನಾಣಿಂ ಖಂಯ್ ಥಾವ್ನ್?” ವಿಚಾರ್ಲೆಂ ತಾಣೆಂ.

“ತಿಂ ಮ್ಹಾಕಾ ಮುಂಗಾಣ್ ಮೆಳ್ಳ್ಯಾಂತ್. ಜಾಯ್ ಜಾಲ್ಯಾರ್ ಧರ್ – ತುಕಾ ಮ್ಹಜೆಂ ಇನಾಮ್” ಮ್ಹಣೊನ್ ಸರ್ದಾರ್ ಸಿಮಾಂವ್ನ್ ಏಕ್ ನಾಣೆಂ ಮ್ಹಾಲ್ಯಾಕ್ ದಿಲೆಂ. ತೆಂ ಘೆವ್ನ್ ಮ್ಹಾಲ್ಯಾ ಕೆವ್ಲ್ಯಾಚ್ಯಾ ತೊಂಡಾಂತ್ಲ್ಯಾನ್ ಲಾಳ್ ಗಳ್ಳಿ. ಸರ್ದಾರ್ ಸಿಮಾಂವ್ ಮ್ಹಣಾಲೊ:

“ಹಿಂ ಮ್ಹಾಕಾ ಮೆಳ್‍ಲ್ಲೆ ಕಡೆನ್ ಹಾಂವ್ – ಆಮಿ – ಗೆಲ್ಯಾರ್ ಆಮ್ಕಾಂ ಆನಿಕ್‍ಯೀ ಚಡ್ ಮೆಳ್ತಾತ್.”

“ತುವೆಂ ಮ್ಹಳ್ಳೆಂಯ್ – ಕೋಣ್‍ಗೀ ಸರ್ದಾರ್ ಮ್ಹಣ್. ಕೋಣ್ ತೊ ಸರ್ದಾರ್? ಕಾಂಯ್ ಸರ್ದಾರ್ ಸಿಮಾಂವ್ ಮ್ಹಣ್ತಾತ್, ತೊಚ್ ನಹಿಂಮೂ?”

“ನಾ, ತೊ ನಹಿಂ” ಸರ್ದಾರ್ ಸಿಮಾಂವ್ ಸತ್ ಉಲಯ್ಲೊ. “ಆತಾಂ ರಿಸಾಲಾಂ ಘೆವ್ನ್ ದಕ್ಷಿಣಾಕ್ ಆಯಿಲ್ಲ್ಯಾ ತ್ಯಾ ಸೇನಾಪತಿಚೆಂ ನಾಂವ್, ಸರ್ದಾರ್ ಯೂಸುಫ್ ಆಲಿ, ತಾಚಿ ಖಬರ್, ಆನಿ ತಾಚೆಂ ದರ್ಬಾರ್ ಆಯ್ಕಲ್ಯಾ ಉಪ್ರಾಂತ್ ಹಾಂಗಾ ರಾವತ್ ಕೋಣ್? ಹಾಂವ್ ಚಲ್ತಾಂ. ಮ್ಹಜೆ ಸಾಂಗಾತಾ ಯೇಂವ್ಕ್ ಕಬೂಲ್ ಆಸ್‍ಲ್ಲ್ಯಾ ಕೊಣಾಯ್ಕೀ ಎಏಕ್ ಭಾಂಗಾರಾಚೆಂ ನಾಣೆಂ ದೀಂವ್ಕ್ ಹಾಂವ್ ಕಬೂಲ್ ಆಸಾಂ. ಪುಣ್ ಕರ್ಚೆಂ ಕಿತೆಂ – ಹಾಂವ್ ಕೊಣಾಯ್ಕೀ ಪಾತ್ಯೆನಾ.”

“ಪುಣ್… ಪುಣ್ ಮ್ಹಾಕಾಯೀ ತುಂ ಪಾತ್ಯೆನಾಂಯ್ಗೀ?”

“ಕಶೆಂ ಪಾತ್ಯೆಂವ್ಚೆಂ?”

“ಇತ್ಲೆಂ ಉಲಯ್ಲ್ಯಾ ಉಪ್ರಾಂತ್…” ಮೋವ್ ಜಾಲೊ ಮ್ಹಾಲಿ. “ಮ್ಹಾಕಾ ಬಾಯ್ಲ್ ಭುರ್ಗಿಂ ಕೊಣೀ ನಾಂತ್. ಪಾವನಾತ್‍ಲ್ಲ್ಯಾಕ್, ಘೊಡ್ಯಾಪರಿಂ ಚಾಬ್ಕಾಚೆ ಮಾರ್ ಖೆಲ್ಯಾ ಉಪ್ರಾಂತ್, ಮ್ಹಜೆಂ ಸುಣೆಂಯೀ ಹಾಂಗಾ ರಾವಶೆಂ ನಾ ಮ್ಹಣ್ ಹಾಂವೆಂ ಖಂಡಿತ್ ಚಿಂತ್ಲಾಂ. ನಿಜಾಯ್ಕೀ, ತುವೆಂ ಸಾಂಗ್‍ಲ್ಲೆಂ ವ್ಹಯ್ ಜಾಲ್ಯಾರ್, ಆನಿ ತುಂ ಹಾಂಗಾ ಥಾವ್ನ್ ಚಲ್ತಾಯ್ ಮ್ಹಳ್ಳೆಂ ಸತ್ ಜಾಲ್ಯಾರ್ – ಅಲ್ಲಾಚ್ಯಾ ನಾಂವಾನ್ – ಹಾಂವ್‍ಯೀ ತುಜ್ಯಾ ಸಾಂಗಾತಾ ಯೆತಾಂ. ಹಾಂಗಾ ಥಾವ್ನ್ ಪೊಳ್ತಾಂ.”

“ಪುಣ್ ಕಶೆಂ ಹ್ಯಾ?” ಮ್ಹಣಾಲೊ ಸರ್ದಾರ್ ಸಿಮಾಂವ್, ಭಿತರ್ಲ್ಯಾ ಭಿತರ್ ಖುಶಿ ಜಾವ್ನ್. ಹಾತಾಂತ್ಲೆಂ ಆನ್ಯೇಕ್ ಭಾಂಗಾರಾಚೆಂ ನಾಣೆಂ ತಾಣೆಂ ಮ್ಹಾಲ್ಯಾಚ್ಯಾ ಹಾತಾರ್ ಘಾಲೆಂ. “ಹಾಂವ್, ಹಾಂಗಾ ಥಾವ್ನ್ ಕಶೆಂ ಭಾಯ್ರ್ ಚಲ್ಚೆಂ ಮ್ಹಣ್ ಮಾತೆಂ ಖೊರ್ಪುನ್ ಆಸಾಂ. ತುಂ ಕಾಂಯ್ ಉಪಾಯ್ ಸಾಂಗ್ಶಿವೇ?”

“ತುಂ ಅಲ್ಲಾಚ್ಯಾ ಆನಿ ಪವಿತ್ರ್ ಖುರಾನಾಚ್ಯಾ ನಾಂವಾನ್ ಸತ್ ಸಾಂಗ್ತಾಯ್‍ಮೂ?”

“ಅರೆ ಕರ್ಮಾಂನೊ!”

“ತರ್ ಏಕ್ ವಾಟ್ ಆಸಾ – ತುಂ ಮ್ಹಾಕಾ ಸಾಂಗಾತಾ ವ್ಹರ್ತಾಯ್ ಜಾಲ್ಯಾರ್, ಹಾಂವ್ ಸಾಂಗ್ತಾಂ.”

“ಹಾಂವೆಂ ವೆಚೆಂ ಜಾಲ್ಯಾರ್, ಖಂಡಿತ್ ಜಾವ್ನ್ ತುವೆಂಯೀ ಮ್ಹಜ್ಯಾ ಸಾಂಗಾತಾ ಯೇಂವ್ಕ್ ಜಾಯ್. ತಿತ್ಲೆಂಚ್ ನಹಿಂ, ಆನ್ಯೇಕ್ ಶರ್ತ್ ಆಸಾ.”

“ಕಸಲೆಂ?”

“ಮ್ಹಾಕಾ ರಾಕ್ವಲಿ ಕರ್ನ್ ದವರ್ಲಾ ಪಳೆ – ತ್ಯಾ ಸ್ತ್ರೀಯೆಕ್‍ಯೀ ಆಮಿ ವ್ಹರಿಜಾಯ್.”

“ಬರಾಬರ್!” ಮ್ಹಣಾಲೊ ಮ್ಹಾಲಿ, ಚುರುಕ್ ಜಾವ್ನ್. “ತಿಕಾ ಮಜತ್ ದೀಂವ್ಕ್ ಹಾಂವೆಂ ಮನ್ ಕೆಲೆಂ. ಪುಣ್ ಹಾಂವ್ ಸಾಂಪಡ್ಲೊಂ. ತಿಣೆಂ ಮ್ಹಾಕಾ ದಿಲ್ಲಿ ಮುದಿಯೀ ತಾಣಿಂ ಅಪಹರ್ಸಿಲಿ. ಹಾಂವ್ ಕಷ್ಟಲೊಂ, ತರೀ, ತಿ ಬಾವ್ಡಿ ಸಂಪೂರ್ಣ್ ಕೈದಿ ಜಾಲಿ ಮ್ಹಣ್ ಮ್ಹಾಕಾ ಚುರ್ಚುರ್ತಾ…”

ಅಶೆ ತಶೆಂ ಉಲವ್ನ್, ಸರ್ದಾರ್ ಸಿಮಾಂವ್ನ್ ತ್ಯಾ ಮೊಯ್ದಿನೆಕ್ (ಮ್ಹಾಲ್ಯಾಕ್) ಪೂರ್ಣ್ ಸ್ವಾಧೀನ್ ಕೆಲೊ. ಮಹಾದ್ವಾರಾಚ್ಯಾ ಕೊಟ್ರೆಂತ್ ಚವೀಸ್ ವೊರಾಂಕ್ ದೋನ್ ಪಾವ್ಟಿಂ ಪಹರೊ ಬದ್ಲಿ ಜಾತಾಲೊ – ದೊನ್ಪಾರಾಂ ಥಾವ್ನ್ ಮಧ್ಯಾನ್ ಪರ್ಯಾಂತ್ ಎಕ್ಲೊ, ಉಪ್ರಾಂತ್ ಆನ್ಯೇಕ್ಲೊ. ಮಧ್ಯಾನೆ ಉಪ್ರಾಂತ್ ಪಹರ‍್ಯಾಕ್ ಯೆಂವ್ಚೊ ಗ್ರಾಯ್ಕ್, ಮ್ಹಾಲ್ಯಾಚೊ ಸಯ್ರೊ ಆನಿ ಪಾತ್ಯೆಣೆಚೊ ಮಿತ್ರ್ ಜಾವ್ನಾಸ್‍ಲ್ಲೊ.

ತಾಕಾ ಥೊಡಿಂ ನಾಣಿಂ ದಿಲ್ಯಾರ್, ಕಸಲ್ಯಾ ಪುಣೀ ನಿಬಾನ್, ವಾ ಹೆರಾಂಕ್ ಕಳಿತ್ ಜಾಯ್ನಾತ್‍ಲ್ಲೆಪರಿಂ ಮಧ್ಯಾನೆ ಉಪ್ರಾಂತ್ ಮಹಾದ್ವಾರ್ ಉಗ್ತೆಂ ಕರ್ನ್ ಘಡಿಭರ್ ಸೇತ್ವೊ ದೆಂವಯೆತ್ ಮ್ಹಣ್ ತಾಣಿಂ ಮಾಂಡ್ಣಿ ಕೆಲಿ. ಹರ್ಯೆಕ್ ಸುಕ್ರಾರ್, ಘಡಾಂತ್ಲ್ಯಾ ಶಿಪಾಯಾಂಕ್ ರಜೆಚೊ ದೀಸ್ ಜಾವ್ನಾಸ್‍ಲ್ಲೊ, ಆನಿ ಬ್ರೇಸ್ತಾರಾಚ್ಯಾ ಮಧ್ಯಾನೆರ್ ಆಯಿಲ್ಲೊ ಪಹರೊ, ಸುಕ್ರಾರಾಚಿ ಮಧ್ಯಾನ್ ರಾತ್ ಪರ್ಯಾಂತ್ ಬದ್ಲಿ ಜಾಯ್ನಾತ್‍ಲ್ಲೊ. ಹೆಂ ಜಾಣಾಂ ಜಾವ್ನ್‍ಂಚ್, ಬ್ರೇಸ್ತಾರಾಚ್ಯಾ ರಾತಿಂ ಥಂಯ್ ಥಾವ್ನ್ ಭಾಯ್ರ್ ವಚೊನ್ ಪಯ್ಯನೂರ್ಚಿ ವಾಟ್ ಧರಿಜಾಯ್ ಮ್ಹಣ್ ಸರ್ದಾರ್ ಸಿಮಾಂವ್ನ್ ಚಿಂತ್‍ಲ್ಲೆಂ. ಎಕಾದಾವೆಳಾ, ಮ್ಹಾಲ್ಯಾಚೊ ಮಿತ್ರ್, ಸಹಕಾರ್ ದೀಂವ್ಕ್ ಪಾಟಿಂ ಪುಣೀ ಸರತ್ ಜಾಲ್ಯಾರ್?

ತಸೊ ತೊ ಪಾಟಿಂ ಸರತ್ ಜಾಲ್ಯಾರ್, ಉಪಾಯಾಂನಿ ತಾಕಾ ಭಾಯ್ರ್ ಆಪವ್ನ್ ನಿದಾವ್ಯೆತ್ ಆನಿ ಚಾವಿಯೆಚೊ ಪ್ರಯೋಗ್ ಕರ್ನ್ ಪಾಶಾರ್ ಜಾವ್ಯೆತ್ ಮ್ಹಣ್ ಸರ್ದಾರ್ ಸಿಮಾಂವ್ನ್ ಚಿಂತ್‍ಲ್ಲೆಂ. ಪುಣ್ ಘಡಾ ಥಾವ್ನ್ ಏಕ್ ಪಾವ್ಟಿಂ ಭಾಯ್ರ್ ಪಡ್ಲ್ಯಾ ಉಪ್ರಾಂತ್ ತುರ್ತಾನ್ ಪಯ್ಸ್ ಪಾವಜಾಯ್ ಜಾಲ್ಲ್ಯಾನ್, ಭಾಯ್ಲ್ಯಾ ಕೊಣಾಯ್ಕೀ ಪಯ್ಲೆಂಚ್ ಧರುನ್ ಎಕಾ ಪುಣೀ ಘೊಡ್ಯಾಕ್ ಹಾಡವ್ನ್ ದವರಿಜಾಯ್ ಮ್ಹಣೊನ್‍ಯೀ ತಾಣೆಂ ಚಿಂತ್‍ಲ್ಲೆಂ.

ತಶೆಂ ಆಸ್ತಾಂ, ಆತಾಂ, ಚಾಕರ್ನಿಕ್‍ಯೀ ಸಾಂಗಾತಾ ವ್ಹರಿಜಾಯ್ ಮ್ಹಣ್ ವೆರೊನಿಕಾನ್ ಸಳ್ ಧರ್‌ಲ್ಲ್ಯಾ ವರ್ವಿಂ, ಸಮಸ್ಸೆಂ ತಾಚ್ಯಾ ಮತಿಂತ್ ಚಡ್ ಭಿಗಡ್ಲೆಂ. ಪುಣ್ ವೆರೊನಿಕಾಚೆಂ ಉತಾರ್ ಇನ್ಕಾರ್ ಕರುಂಕ್ ತಾಕಾ ಮನ್ ಜಾಂವ್ಕ್ ನಾ. ತ್ಯಾ ತೆಕಿತ್, ಘೊಡೊ ನಾತ್ಲ್ಯಾರ್ ವ್ಹಡ್ ನಹಿಂ – ಘಡಾ ಥಾವ್ನ್ ಭಾಯ್ರ್ ಪಡ್ಲ್ಯಾ ಉಪ್ರಾಂತ್ ಚಿಕ್ಕೆ ವೇಸ್ ಬದ್ಲುನ್, ರಾತಾರಾತ್ ರಾನಾ ಮೊಲ್ಯಾಂತ್ಲಿ ತರೀ ವಾಟ್ ಚಮ್ಕೊನ್ ಪಯ್ಯನೂರಾಕ್ ವೆಚೆಂ ಮ್ಹಣ್ ತಾಣೆಂ ನಿಚೆವ್ ಕೆಲೊ. ಹಿ ಸರ್ವ್ ಮಾಂಡಾವಳ್, ವೆಳಾ ಪರ್ಮಾಣೆಂ, ಪುಣ್ ಭೋವ್ ಚತ್ರಾಯೆನ್ ಮ್ಹಾಲ್ಯಾಕ್ ತಾಣೆಂ ಸಮ್ಜಯಿಲ್ಲಿ.

ನವೆಂಚ್ ಏಕ್ ಸಾಹಸ್, ಆನಿ ಉಪ್ರಾಂತ್ ಚಡ್ ಸಂಪತ್ತೆಚಿ ಜಿಣಿ ಮ್ಹಳ್ಳೆಂ ಆಶೆಚೆಂ ಸಪಣ್ ಚಿಂತುನ್ ಮ್ಹಾಲಿಯೀ ವೊರಾಂ ಮೆಜ್ತಾಲೊ. ತಾಚೊ ಮಿತ್ರ್ – ಮಹಾದ್ವಾರಾ ಕಡೆನ್ ರಾತಿಚೊ ಪಹರೆಗಾರ್ – ಮಿತ್ರಾಚಿ ಹಿ ಗರ್ಜ್ ಆಯ್ಕೊನ್, ಸಹಕಾರ್ ದೀಂವ್ಕ್ ಪಯ್ಲೊ ಚಿಕ್ಕೆ ನರ್ಗಲೊ ಜಾಲ್ಯಾರೀ, ಭಾಂಗಾರಾಚೆಂ ಏಕ್ ನಾಣೆಂ ಹಾತಾರ್ ಪಡ್ತಚ್, ಆನಿ ಭಾಯ್ರ್ ವೆಚ್ಯಾ ಆದಿಂ ಚಡಿತ್ ನಾಣಿಂ ಹಾತಾರ್ ಪಡ್ತೆಲಿಂ ಮ್ಹಳ್ಳಿ ಭಾಸ್ ಮೆಳ್ತಚ್ – ಖುಶೆನ್ ಕಬೂಲ್ ಜಾಲೊ.

ಬುಧ್ವಾರಾಚೊ ದೀಸ್ ಪಾಶಾರ್ ಜಾಲೊ. ಬುಧ್ವಾರಾಚಿ ರಾತ್‍ಯೀ ಪಾಶಾರ್ ಜಾವ್ನ್ ಬ್ರೇಸ್ತಾರಾಚೊ ದೀಸ್ ಉದೆಲೊ. ಮತಿ ಭಿತರ್‌ಚ್ ಸರ್ದಾರ್ ಸಿಮಾಂವ್ಚಿ ಆತುರಾಯ್ ಚಡ್ಲಿ.

ತ್ಯಾ ಇಡ್ಯಾಂತ್, ಆದ್ಲ್ಯಾ ದಿಸಾ – ವೆರೊನಿಕಾಕ್ ದುಸ್ರೆಂಚ್ ಏಕ್ ಸಮಸ್ಯೆಂ ಮುಖಾರ್ ಆಯ್ಲೆಂ. ದುಸ್ರಿ ಕಸಲಿಚ್ ವಾಟ್ ನಾಸ್ತಾನಾ, ಸರ್ದಾರ್ ಸಿಮಾಂವ್ ಕಡೆನ್ ತಿ ಉಲಯ್ಲಿ. ತಿಣೆಂ ವಿಚಾರ್ಲೆಂ:

“ಬ್ರೇಸ್ತಾರಾಚ್ಯಾ ರಾತಿಂ ಆಮಿ ವೆಚೆಂ ನೀಜ್‍ಮೂ?”

“ವ್ಹಯ್, ನೀಜ್ – ಸರ್ವ್ ತಯಾರಾಯ್ ಆಮಿ ಕೆಲ್ಯಾ.”

“ಹಾಂಗಾ ಥಾವ್ನ್ – ಹ್ಯಾ ಕುಡಾ ಥಾವ್ನ್ ಹಾಂವೆಂ ರಾವ್ಳೆರಾ ಭಾಯ್ರ್ ವೆಚೆಂ ಕಶೆಂ?”

“ತಶೆಂ ಕರುಂಕ್ ಕಷ್ಟ್ ನಾಂತ್. ಮಧ್ಯಾನೆ ಉಪ್ರಾಂತ್, ದಿವೆ ಪಾಲ್ವಯಿಲ್ಲ್ಯಾ ಉಪ್ರಾಂತ್, ಹಾಂವ್ ತುಕಾ ಹಿಶಾರೊ ದಿತಾಂ. ಆವಾಜ್ ಕರಿನಾಸ್ತಾಂ – ವೊಡ್ತಾಂತ್ಲ್ಯಾನ್ ಪಾಶಾರ್ ಜಾವ್ನ್ ಮಹಾದ್ವಾರಾ ಕಡೆನ್ ಆಮಿ ವಚಜಾಯ್.”

“ಆಮಿ ವಚ್ಯೆತ್. ಹಾಂವೆಂ, ಚಾಕರ್ನಿ ಕಡೆನ್ ವಿಚಾರ್ನ್ ಏಕ್ ಬುರ್ಖಾ ತಯಾರ್ ದವರ್ಲಾ. ಪುಣ್ ಚಾಕರ್ನ್?” ವಿಚಾರ್ಲೆಂ ತಿಣೆಂ ಕಾವ್ಜೆವ್ನ್.

“ತಿಣೆಂ ವೆಗ್ಳ್ಯಾಚ್ ವಾಟೆನ್ ವಚೊನ್, ಮಹಾದ್ವಾರಾ ಥಾವ್ನ್ ಚಿಕ್ಕೆ ಪಯ್ಸ್ ವೊಡ್ತಾಂತ್ ರಾವಜಾಯ್. ತಿಕಾ ಚತ್ರಾಯ್ ಸಾಂಗ್. ಕಾಂಯ್ ಅಡ್ಕಳ್ ಜಾವ್ನ್, ತಿಕಾ ಯೇಂವ್ಕ್ ಘಳಾಯ್ ಪುಣೀ ಜಾಲ್ಯಾರ್ – ಹಾಂವ್ ಜವಾಬ್ದಾರ್ ನಹಿಂ.”

“ನಾ. ತಿಚೆ ವರ್ವಿಂ ಘಳಾಯ್ ಜಾಂವ್ಚಿ ನಾ. ಪುಣ್…”

“ಪುಣ್?”

“ತುಂ ಬೆಜಾರ್ ಪಾವನಾಂಯ್ ಜಾಲ್ಯಾರ್ ಸಾಂಗ್ತಾಂ.”

“ಕಿತೆಂ ಗಜಾಲ್?” ಸರ್ದಾರ್ ಸಿಮಂವ್ನ್, ಆತುರಾಯೆನ್ ಆನಿ ದುಬಾವಾನ್ ವಿಚಾರ್ಲೆಂ.

“ತಿ-ತಿ ಚಾಕರ್ನ್ ಎಕ್ಲಿಚ್ ಆಸ್ಚಿ ನಾ.”

“ಕಿತೆಂ!”

“ವ್ಹಯ್ – ತಿಚ್ಯಾ ಸಾಂಗಾತಾ, ತಿಚೊ ಚಿಕ್ಕೆ ಪ್ರಾಯ್ವಂತ್ ಬಾಪಯ್ ಆಸ್ತಲೊ ಖಂಯ್.”

“ಸಾಯ್ಬಾ, ಭೊಗೊಸ್!” ಮ್ಹಣಾಲೊ ಸರ್ದಾರ್ ಸಿಮಾಂವ್. ದುಸ್ರೆಂ ಕಿತೆಂ ಮ್ಹಣ್ಚೆಂ ಮ್ಹಣ್ ತಾಕಾ ಸಮ್ಜೊಂಕ್ ನಾ.

“ತುಕಾ ರಾಗ್ ಯೇಂವ್ಕ್ ನಾಮೂ?”

“ರಾಗ್ ಯೆಂವ್ಚೊ ವೇಳ್ ಆತಾಂ ನಹಿಂ” ಮ್ಹಣೊನ್ ತೊ ಥಂಡ್ ರಾವ್ಲೊ.

“ಕಿತ್ಯಾಕ್ ಉಲಯ್ನಾಂಯ್?”

“ಕಿತೆಂ ಉಲಂವ್!” ಮ್ಹಣಾಲೊ ತೊ ಚಿಕ್ಕೆ ಶಿಣೊನ್. “ತಿ ಚಾಕರ್ನ್ ಸಾಂಗಾತಾ ನಾತ್ಲ್ಯಾ ಶಿವಾಯ್ ತುಂ ಯೇನಾಂಯ್. ತಿಚೊ ಮ್ಹಾತಾರೊ ಬಾಪಯ್ ನಾತ್ಲ್ಯಾ ಶಿವಾಯ್ ತಿ ಯೇನಾ! ಸಮಸ್ಯಾಂಚಿ ಖಾತಡ್!”

“ಮ್ಹಾಕಾ ಮಾಫ್ ಕರ್…”

“ಜಾಂವ್. ಯೆತಾತ್ ತಿಂ ಯೇಂವ್. ಪುಣ್ ಆಮ್ಚಿ ಪಾಟ್ಲಾಮ್ ಆನಿಕೀ ವ್ಹಡ್ ಜಾಂವ್ಚಿ ನಾ ಮ್ಹಣ್ ಪಾತ್ಯೆತಾಂ ಹಾಂವ್!”

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ನಮಾನ್ ತುಕಾ ಕೊಂಕ್ಣಿ ಸಾಧಕಾ – 1 | ವಿ ಜೆ ಪಿ ಸಲ್ಡಾನ್ಹಾ

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel