ಇಂಫೆರ್ನಾಚಿಂ ದಾರಾಂ – 25: ವಿಚಿತ್ರ್ ನೀಜ್ – ಸ್ತ್ರೀಯೆಚೆಂ ಕಾಳಿಜ್!

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 25
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 25: ವಿಚಿತ್ರ್ ನೀಜ್ – ಸ್ತ್ರೀಯೆಚೆಂ ಕಾಳಿಜ್!

“ದೇವ್, ತುಜ್ಯಾ ಬಾವ್ಳ್ಯಾಂಕ್ ಬಳ್ ದೀಂವ್ದಿ” ತಿಂಚ್ ಉತ್ರಾಂ, ಥೊಡ್ಯಾಚ್ ತೆಂಪಾ ಆದಿಂಯೀ ತಿಣೆಂ ಉಚಾರ್‌ಲ್ಲಿಂ. ತೆದಾಳಾಯೀ ತೊ ಜಯ್ತೆವಂತ್ ಜಾಲ್ಲೊ.

ಹ್ಯಾ ಪಾವ್ಟಿಂ ತಿಂ ಉತ್ರಾಂ ಕಶಿಂ ಜಾರಿ ಜಾತಿತ್ ಮ್ಹಣ್ ತೊಚ್ ನೆಣಾಸ್‍ಲ್ಲೊ.

“ಎಕಾ ಹಫ್ತ್ಯಾಚೊ ವಾಯ್ದೊ ತುಕಾ!” ಮ್ಹಳ್ಳೆಂ ಫಕೀರ್ ಮಹಮ್ಮದಾನ್. ಮ್ಹಣ್ತಚ್, ಎಕಾ ಹಫ್ತ್ಯಾ ಭಿತರ್, ತಾಣೆಂ ಮಾನಿನ್ ವೆರೊನಿಕಾಕ್ ಹಾಂಗಾ ಥಾವ್ನ್ ಸಾಲ್ವಾರ್ ಕರಿಜಾಯ್, ಆನಿ ಫಕೀರ್ ಮಹಮ್ಮದಾಕ್‍ಯೀ ಹಾಂಗಾ ಥಾವ್ನ್ ಕೈದ್ ಕರ್ನ್ ವ್ಹರಿಜಾಯ್!

ತಾಚ್ಯಾ ಮತಿಂತ್, ಫಕೀರ್ ಮಹಮ್ಮದಾಕ್ ಕೈದ್ ಕರ್ನ್ ವ್ಹರ್ಚೆಂ ಸಮಸ್ಸೆಂ ಮಾತ್ರ್ ಜಾಲ್ಲೆಂ ಜಾಲ್ಯಾರ್, ತೆಂ ಕಾಂಯ್ ತಿತ್ಲೆಂ ವಿಶೇಸ್ ದಿಸ್ತೆಂ ನಾ. ಕಿತ್ಯಾಕ್, ಥೊಡ್ಯಾಚ್ ದಿಸಾಂ ಭಿತರ್ ತಾಚಿ ಖಾಸ್ಗಿ ಶಿಬಂದಿ, ಸರ್ದಾರ್ ಯೂಸುಫ್ ಆಲಿ ಆನಿ ತಾಚೆ ಶಿಪಾಯ್ ಯೇವ್ನ್ ಪಾವ್ತೆಲೆ ಮ್ಹಳ್ಳೊ ಭರ್ವಸೊ ಆಸ್‍ಲ್ಲೊ. ರಾಜಕೀಯ್ ಆನಿ ಉದ್ಯೋಗಾಚ್ಯಾ ದೃಷ್ಟೆನ್ ತೆಂ ಬರೆಂಚ್ ಜಾವ್ಯೆತೆಂ. ಪುಣ್ – ಹ್ಯಾ ರಾಟಾವಳೆಂತ್, ಥೊಡ್ಯಾ ಪ್ರಮುಖ್ ಕ್ರಿಸ್ತಾಂವಾಂಕ್ ತಾಣೆಂ ಮಜತ್ ದಿಲ್ಯಾ ಮ್ಹಳ್ಳೊ ವಿಷಯ್, ಶಿಪಾಯಾಂಕ್ ಕಳಿತ್ ಜಾಂವ್ಕ್ ನಜೊ ಆಸ್‍ಲ್ಲೊ. ತೆದೊಳ್‍ಚ್, ಟಿಪ್ಪು ಸುಲ್ತಾನಾಕ್ ತಾಚೆರ್ ದುಬಾವ್ ಜಾಂವ್ಕ್ ಜಾಯ್ತೆ ಗೊಂಯ್ಡೆ ಉಗ್ತೆ ಜಾಲ್ಯಾತ್ ಮ್ಹಳ್ಳೆಂ ತೊ ಜಾಣಾಂಸ್‍ಲ್ಲೊ.

ತ್ಯಾ ಇಡ್ಯಾಂತ್ – ಫಕೀರ್ ಮಹಮ್ಮದಾನ್ ಸಾಂಗ್‍ಲ್ಲೆಂ ತೆಂ ಸತ್ ಜಾಲ್ಯಾರ್ – ಷೇರ್ ಖಾನ್ – ತೊಚ್ ಮಾರೆಕಾರ್ ತೊಪಾಸಿ ದಾಲ್ಮೇದಾ – ಚುಕವ್ನ್ ಧಾಂವ್ಲಾ ಜಾಲ್ಯಾರ್ ಅಪಾಯ್ ಚಡ್ ಜಾಲಾ. ಆಪ್ಲೊ ಮೊಗಾಚೊ ಸೆವಕ್ ಆನಿ ಪಾಟ್ಲಾವ್ದಾರ್ ಜಾವ್ನ್, ಸಬಾರ್ ಅಪಾಯಾಂನಿ ಆನಿ ಕಷ್ಟಾಂ-ಅನ್ವಾರಾಂನಿ ಭಾಗೆಲಿ ಜಾವ್ನಾಸ್‍ಲ್ಲೊ ಜಮೆದಾರ್ ಅಂತುಲೊ ಪಡ್ವಳ್ ಅಂತರ್ಲೊ ಜಾವ್ಯೆತ್‍ಗೀ?

ತಾಚೊ ದುಬಾವ್ ದುಬಾರಿ ಜಾಲೊ. ತಾಚಿ ಖಂತ್, ಮತಿ ಭಿತರ್ ಚಡ್ ಕರ್ಕರ‍್ಯಾಂಚಿ ಜಾಲಿ. ಪುಣ್ ಭಾಯ್ಲ್ಯಾನ್ ತಾಣೆಂ ತಿ ದಾಕಂವ್ಕ್ ನಾ.

“ಕಿತೆಂ ಚಿಂತಾಯ್ ಜಾವ್ಯೆತ್?” ವೆರೊನಿಕಾನ್ ವಿಚಾರ್ಲೆಂ.

“ವಿಶೇಸ್ ಕಾಂಯ್ ನಾ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಆನಿ ಎಕಾ ಹಫ್ತ್ಯಾ ಆದಿಂಚ್ ಆಮಿ ಹಾಂಗಾ ಥಾವ್ನ್ ಭಾಯ್ರ್ ಸರಜಾಯ್.”

“ಕಿತ್ಯಾಕ್ ಮ್ಹಣ್ ಹಾಂವ್ ನೆಣಾಂ” ಮ್ಹಣಾಲಿ ಮಾನಿನ್ ವೆರೊನಿಕಾ, ಆಪ್ಲ್ಯಾ ತಳ್ವ್ಯಾಂಚೆರ್ ಕಪಾಲ್ ತೆಂಕುನ್. “ಹಾಂವೆಂ ಹಾಂಗಾ ಥಾವ್ನ್ ಬರ್ಯಾ ಥರಾನ್ ಪಾಟಿಂ ವಚೊಂಕ್ ಸಾಧ್ಯ್ ಜಾಯ್ನಾತ್ಲ್ಯಾರೀ ಪರ್ವಾ ನಾ ಮ್ಹಣ್ ಮ್ಹಾಕಾ ಭೊಗ್ತಾ!”

“ಕಿತೆಂ ಮ್ಹಣ್ತಾಯ್ ಭಯ್ಣಿ!”

“ಕಿತೆಂ ಮ್ಹಣ್ತಾಂ ಮ್ಹಳ್ಳೆಂ ಹಾಂವ್ ಜಾಣಾಂ” ಮ್ಹಣಾಲಿ ತಿ. “ದೆವಾಚ್ಯೊ ವಿಚಿತ್ರ್ ವಾಟೊ ಆಮ್ಕಾಂ ಕಳಿತ್ ನಾಂತ್. ತಾಣೆಂ, ಸಾಸ್ಣಾ ಥಾವ್ನ್ ಫಾವೊ ಕೆಲ್ಲೆಪರಿಂ ಆಮಿ ತ್ಯೊ ಚಮ್ಕಜಾಯ್.”

ಸರ್ದಾರ್ ಸಿಮಾಂವ್ ಆಯ್ಕೊಂಕ್‍ಚ್ ಪಡ್ಲೊ. ತಿ ಫುಡೆಂ ಉಲಯ್ಲಿ:

“ಚಿಕ್ಕೆ ಆದಿಂ…”

“ಚಿಕ್ಕೆ ಆದಿಂ?”

“ಚಿಕ್ಕೆ ಆದಿಂ, ತ್ಯಾ ಫಕೀರ್ ಮಹಮ್ಮದಾನ್ ತಶೆಂ ಶರ್ತ್ ಉಡಯಿಲ್ಲೆಂ ಆಯ್ಕಲ್ಯಾರೀ, ಮ್ಹಾಕಾ ಭಿರಾಂತ್ ದಿಸನಾ.”

“ಕಿತ್ಯಾಕ್?”

“ತುಂ ಹಾಂಗಾ ಯೇವ್ನ್ ಪಾವ್‍ಲ್ಲ್ಯಾ ಖಾತಿರ್ ಮ್ಹಜೊ ಅತ್ಮೊ ಭೋವ್ ಸಂತೊಸ್ಲಾ. ಹಾಂಗಾ ಥಾವ್ನ್, ಶಾಬಿತಾಯೆನ್ ಯಶಸ್ವಿ ಜಾವ್ನ್ ತುವೆಂ ಪಾಟಿಂ ವಚಜಾಯ್ – ತುಜ್ಯಾ ಜಯ್ತಾಂತ್ ಹೆರ್, ಜಾಯ್ತ್ಯಾ ಬರ್ಯಾ ಕ್ರಿಸ್ತಾಂವಾಂಚೆಂ ರಕ್ಷಣ್ ಹೊಂದೊನ್ ಆಸಾ.”

“ಜಾವ್ಯೆತ್” ಮ್ಹಣಾಲೊ ಸರ್ದಾರ್ ಸಿಮಾಂವ್, ಚಿಕ್ಕೆ ಘುಸ್ಪಡೊನ್. “ಪುಣ್ ಕಿತ್ಯಾಕ್ ಅಸಲೆಂ ಉಮಿಣೆಂಚೆಂ ಉಲವ್ಣೆಂ?”

“ಉಮಿಣಿ ಕಸಲಿಯೀ ನಾ” ಮ್ಹಣಾಲಿ ತಿ. “ತುಂ ಜಾಣಾಂಯ್ – ಭಾಗೆವಂತ್ ಖುರ್ಸಾಚ್ಯಾ ಸಿನೊಲೆಚಿಂ – ಅರ್ಲುಕೆಚಿಂ ಅರ್ಧಾಂ ಆಮ್ಚೆ ಕಡೆನ್ ಆಸಾತ್…”

“ವ್ಹಯ್ – ಪುಣ್ ತಿ ಖಬರ್ ಆತಾಂ ಕಿತ್ಯಾಕ್ ಆಯ್ಲಿ? ಫಾವೊ ತ್ಯಾ ವೆಳಾರ್ ತಿಂ ಅರ್ಧಾಂ ಸಾಂಗಾತಾ ಮೆಳ್ತೆಲಿಂ ಮ್ಹಳ್ಳೆಂ ಹಾಂವೆಂ. ಪುಣ್ ತಶೆಂ ಜಾಂವ್ಚ್ಯಾ ಆದಿಂ ಆಮ್ಚ್ಯಾ ಸಮಾಜೆಂತ್ ಆನಿ ಆಮ್ಚೆ ಥಂಯ್ – ದೇವ್‍ಚ್ ಜಾಣಾಂ – ಜಾಯ್ತೆಂ ಘಡೊಂಕ್ ಆಸ್ತೆಲೆಂ.”

“ತೊಚ್ ಮ್ಹಾಕಾ ಆಜ್ ಅವ್ಚಿತ್ ಉಡಾಸ್ ಆಯ್ಲೊ. ಮ್ಹಾಕಾಯೀ ನೀಜ್ ಭೊಗ್ತಾ – ಕೊಣಾಯ್ ವರ್ವಿಂ ಜಾಂವ್ – ತಿಂ ಅರ್ಧಾಂ ಸಾಂಗಾತಾ ಮೆಳ್ತೆಲಿಂ ಆನಿ ಮಹಿಮಾಂ ಘಡ್ತೆಲಿಂ.”

ಸರ್ದಾರ್ ಸಿಮಾಂವ್ ಹೆಂ ಆಯ್ಕೊನ್ ಖರೊಚ್ ಘುಸ್ಪಡ್ಲೊ ಜಾವ್ಯೆತ್, ಭೋವ್ ಕಷ್ಟೊನ್ ಆನಿ ಭಿಯಾನ್ ಆನಿ ಪುರಾಸಣೆನ್ ತಿ ಚಿಕ್ಕೆ ಸಯ್ರ್-ಭಯ್ರ್ ಜಾಲ್ಯಾ ಮ್ಹಣ್ ತಾಣೆಂ ಚಿಂತ್ಲೆಂ.

“ಜಾಯ್ತ್ ಭಯ್ಣಿ, ತುಕಾ ಮಸ್ತ್ ಪುರೊ ಜಾಲಾಂ” ಮ್ಹಣಾಲೊ ತೊ. “ತುಂ ಆತಾಂ ವಿಶೆವ್ ಘೆ. ಚತ್ರಾಯೆನ್ ಫಾಲ್ಯಾಂ ಉಲವ್ಯಾಂ.”

“ಜಾವ್ಯೆತ್. ತ್ಯಾ ಆದಿಂ ಏಕ್ ಸವಾಲ್.”

“ಕಸಲೆಂಯೀ ವಿಚಾರ್.”

“ಮ್ಹಾಕಾ ತಿ ಚಾಕರ್ನ್ ಆಹಾರ್ ಹಾಡ್ನ್ ಆಯಿಲ್ಲಿ…”

“ಹಾಂವ್ ಜಾಣಾಂ” ಮ್ಹಣಾಲೊ ತೊ. “ತುಮಿ ಥೊಡೊ ವೇಳ್ ಉಲಯ್ತಾಲ್ಯಾತ್.”

“ಕಿತೆಂ ಉಲಯ್ತಾಲ್ಯಾಂವ್ ಮ್ಹಣ್ ತುವೆಂ ಆಯ್ಕಲೆಂಗೀ?”

“ನಾ, ಮ್ಹಾಕಾ ತುಮ್ಚೊ ಸ್ವರ್ ಮಾತ್ರ್ ಆಯ್ಕತಾಲೊ. ಚಾಕರ್ನಿನ್ ಚಡ್ ವೇಳ್ ರಾವೊಂಕ್ ದೀನಾಯೆ ಮ್ಹಣ್ ಮ್ಹಾಕಾ – ರಾಕ್ವಲ್ಯಾಕ್ – ತಾಕಿದ್ ಆಸಾ. ತ್ಯಾ ಶಿವಾಯ್…”

“ತ್ಯಾ ಶಿವಾಯ್…”

“ಸಾಂಗ್ತಾಂ. ತಿ ಬುರ್ಖಾ ಘಾಲ್ನ್ ಆಯಿಲ್ಲಿ. ತಿ ಭಾಯ್ರ್ ಯೆತಾನಾ ತುಂ ಶಾಬಿತಾಯೆನ್ ಭಿತರ್ ಆಸಾಯ್ ಮ್ಹಳ್ಳೆಂ ಮ್ಹಾಕಾ ಕಳೊಂಕ್ ಜಾಯ್ ಆಸ್‍ಲ್ಲೆಂ.”

“ಕಿತ್ಯಾಕ್ ಜಾವ್ಯೆತ್?”

“ಹಾಂವ್ ಹಾಂಗಾ ಪಾವ್ಲಾಂ, ಪುಣ್ ನಿಜಾಯ್ಕೀ ಹಾಂವ್ ಕೋಣ್ ಮ್ಹಳ್ಳೆಂ ತುಕಾ ಕಳಿತ್ ನಾತ್‍ಲ್ಲೆಂ – ಏಕ್. ದುಸ್ರೆಂ…”

“ದುಸ್ರೆಂ?”

“ದುಸ್ರೆಂ – ವರ್ತ್ಯಾ ಅಪಾಯಾಂತ್ ಆಸ್‍ಲ್ಲ್ಯಾ ವೆಳಾರ್, ಚುಕವ್ನ್ ಧಾಂವೊಂಕ್ ಮನಿಸ್ ಕಸಲೊಯೀ ಅಪಾಯ್ ಘೆತಾ. ತಶೆಂ ತುಂ ತ್ಯಾ ಚಾಕರ್ನಿಕ್ ಭುಲವ್ನ್, ತಿಚೆಂ ನ್ಹೆಸಣ್ ಘೆವ್ನ್, ತಿಚೊ ಬುರ್ಖಾ ಶಿರ್ಕಾವ್ನ್ ಕಾಂಯ್ ಭಾಯ್ರ್ ವಚೊಂಕ್ ಪ್ರಯತ್ನ್ ಕರ್ತಾಯ್ ಕೊಣ್ಣಾ ಮ್ಹಣ್ ಮ್ಹಾಕಾ ಭಿರಾಂತ್ ದಿಸ್ಲಿ. ಕಿತ್ಯಾಕ್, ಹ್ಯಾ ಕುಡಾಂತ್ಲಿ ಭಾಯ್ರ್ ಆಯ್ಲ್ಯಾರೀ, ಘಡಾ ಥಾವ್ನ್ ಭಾಯ್ರ್ ವಚೊಂಕ್ ಸಾಧ್ಯ್ ನಾ. ಶಿವಾಯ್, ತಸಲೆಂ ಪ್ರಯತ್ನ್ ತುವೆಂ ಕೆಲಾಂಯ್ ಮ್ಹಣ್ ಕಳಿತ್ ಜಾಲ್ಲೆಂ ಜಾಲ್ಯಾರ್, ಹ್ಯಾ ರಾಕ್ವಲ್ಯಾಚೆಂ ಕಾಮ್ ವಾ ತಕ್ಲಿಯೀ ಉಸ್ಳೊಂಕ್ ವಾಟ್ ಜಾತಿ!”

ಇತ್ಲೆಂ ಆಯ್ಕೊನ್ ವೆರೊನಿಕಾಚಿ ಕೂಡ್ ಕಾಂಪ್ಲಿ. ತರೀ ತಿ ಹಾಸ್ಲಿ: “ನಾ, ತಶೆಂ ಹಾಂವ್ ಕರ್ತಿಂ ನಾ. ಏಕ್ ಪಾವ್ಟಿಂ ಪ್ರಯತ್ನ್ ಕರ್ನ್, ಎಕಾ ಬಿರ್ಮತ್ ಮನ್ಶ್ಯಾಕ್ ಚಾಬ್ಕಾಂಚೆ ಮಾರ್ ಆನಿ ಉಪಾಶಿಂ ಜಯ್ಲಾಚಿ ಶಿಕ್ಷಾ ಫಾವೊ ಜಾಲಿ!”

“ಆಹಾಂ! ಕೋಣ್ ತೊ ಮನಿಸ್?”

“ತೊ ಹಾಂಗಾಚ್ಯಾ ವೊಡ್ತಾಚೊ ಮ್ಹಾಲಿ.”

“ತುವೆಂ ಮ್ಹಾಕಾ ಸಾಂಗ್‍ಲ್ಲೆಂ ಬರೆಂ ಜಾಲೆಂ. ಗರ್ಜ್ ಪಡ್ಲ್ಯಾರ್, ತೊ ಮನಿಸ್ ಆಮ್ಕಾಂ ಫುಡೆಂ ಉಪ್ಕಾರೊಂಕ್ ಪುರೊ.”

“ಹಾಂವ್ ಪಾತ್ಯೆನಾ. ತ್ಯಾ ಶಿವಾಯ್…”

“ತ್ಯಾ ಶಿವಾಯ್…”

“ತ್ಯಾ ಶಿವಾಯ್…” ಮ್ಹಣಾಲಿ ತಿ ಚಿಂತುನ್. “ಮ್ಹಾಕಾ ಆಹಾರ್ ಹಾಡ್ನ್ ಆಯಿಲ್ಲ್ಯಾ ತ್ಯಾ – ತ್ಯಾ ಚಾಕರ್ನಿಕ್ ಹಾಂವ್ ವಳ್ಕಲ್ಯಾ ಉಪ್ರಾಂತ್…” ತಿಕಾ ಫುಡೆಂ ಉತ್ರಾಂ ನರ್ಗಲಿಂ.

“ವಳ್ಕಲ್ಯಾ ಉಪ್ರಾಂತ್?” ಸರ್ದಾರ್ ಸಿಮಾಂವ್ನ್ ಆತುರಾಯ್ ದಾಕಯ್ಲಿ.

“ವಳ್ಕಲ್ಯಾ ಉಪ್ರಾಂತ್ – ಮ್ಹಜ್ಯಾಚ್ ಬಚಾವೆ ಖಾತಿರ್ ಜಾಲ್ಯಾರೀ – ತಿಚೆರ್ ಅನ್ವಾರ್ ಯೇಂವ್ಕ್ ಸೊಡ್ಚೆ ಸ್ಥಿತೆರ್ ಹಾಂವ್ ನಾ.”

“ಮ್ಹಾಕಾ ಹೆಂ ಸಮ್ಜನಾ.” ತಾಕಾ ಸಮ್ಜೊಂಕ್ ನಾ.

“ವೇಳ್ ಯೆತಾನಾ ತುಕಾ ಸಮ್ಜೆತೆಲೆಂ” ಮ್ಹಣಾಲಿ ತಿ, ಅಮ್ರುಕಿ ಹಾಸೊನ್. “ಆನಿ ತ್ಯಾ ವೆಳಾರ್, ಮ್ಹಜೆಂ ಹೆಂ ಉತಾರ್ ಸಂತೊಸಾನ್, ತುಂ ಸಂತೊಸಾನ್ ಮಾಂದ್ತಲೊಯ್.”

“ಸೃಷ್ಟೆಂತ್ ವಿಚಿತ್ರ್ ನೀಜ್ – ಎಕ್ಯೆ ಸ್ತೀಯೆಚೆಂ ಕಾಳಿಜ್!” ಮ್ಹಣ್ಮುಣ್ಲೊ ಸರ್ದಾರ್ ಸಿಮಾಂವ್. “ದೇವ್ ಬರಿ ರಾತ್ ದೀಂವ್ ಭಯ್ಣಿ – ದಾರ್ ಬಂದ್ ಕರ್ನ್ ಚತ್ರಾಯೆನ್ ಖಿಳ್ ಘಾಲ್.

“ಜಾಯ್ತ್ – ದೇವ್ ಬರಿ ರಾತ್ ದೀಂವ್…”

ತಿಣೆಂ ದಾರ್ ಬಂದ್ ಕೆಲೆಂ. ಸರ್ದಾರ್ ಸಿಮಾಂವ್, ಏಕ್ ಲಾಂಬ್ ಶ್ವಾಸ್ ಸೊಡುನ್, ಸಾಂತಾಂ-ಭಕ್ತಾಂಚೊ ಉಗ್ಡಾಸ್ ಕರುನ್, ಭಾಯ್ಲ್ಯಾ ದಾರಾರ್ ಆಡ್ ನಿದ್ಲೊ.

ಮಾನಿನ್ ವೆರೊನಿಕಾ ಕುವೆಲಿಚ್ಯಾ ಉತ್ರಾಂನಿ ಕಸಲೊಗೀ ನಿಗೂಢ್ ಅರ್ಥ್ ವಾ ಭವಿಷ್ಯ್ ವಾಣಿ ಆಸಾ ಮ್ಹಣ್ ತಾಕಾ ಪರತ್, ಪರತ್ ಭೊಗ್ಲೆಂ. ನೀದ್ ತಾಕಾ ಪಡೊಂಕ್ ನಾ.

ಭಿತರ್, ವೆರೊನಿಕಾ ಕುವೆಲಿಕ್‍ಯೀ ನೀದ್ ಪಡೊಂಕ್ ನಾ. ತರೀ ತಿಚ್ಯಾ ಮತಿಂತ್ ಎಕಾ ಥರಾಚೆಂ ಸಮಾಧಾನ್ ಭೊಗ್ತಾಲೆಂ. ದುಸ್ರೊ ಆನಿ ತಿಸ್ರೊ ದೀಸ್, ಹೆರ್ ಕಸಲಿಂಯೀ ವಿಶೇಸ್ ಘಟನಾಂ ನಾಸ್ತಾನಾ ಪಾಶಾರ್ ಜಾಲೆ.

ವೆರೊನಿಕಾಕ್ ಖಾಂವ್ಕ್ ಪಿಯೆಂವ್ಕ್ ವೆಳಾ ವೆಳಾರ್ ತಿಚ್ ‘ಚಾಕರ್ನ್’ ಹಾಡ್ತಾಲಿ. ದೊಗಾಂಯೀ ಹೆರಾಂಕ್ ಆಯ್ಕನಾತ್‍ಲ್ಲೆಪರಿಂ ಎಕಾಮೆಕಾಕ್ ಆಪಾಪ್ಲಿಂ ಕಾಳ್ಜಾಂ ಉಗ್ತಿಂ ಕರ್ನ್ ಉಲಯ್ತಾಲಿಂ. ಎಕ್ಲ್ಯಾಕ್ ಆನ್ಯೇಕ್ಲ್ಯಾಚೆಂ ಮನ್ ಆಸಾ ತಶೆಂ ಸಮ್ಜೊಂಕ್ ಚಡ್ ಕಷ್ಟ್ ಮಾರುಂಕ್ ನಾಂತ್.

ತಾಂಚೆ ಮಧ್ಲಿ ಸಳಾವಳ್ ಆನಿ ಇಷ್ಟಾಗಾತ್ ಚಡ್ ಥಿರ್ ಜಾವ್ನ್ ಪರ್ಮಳೊಂಕ್ ಲಾಗ್ಲಿಂ. ಸರ್ದಾರ್ ಸಿಮಾಂವ್ನ್ ಥಂಯ್ ಥಾವ್ನ್ ಸುರಕ್ಷಿತಾಯೆನ್ ಭಾಯ್ರ್ ವಚಜಾಯ್ ಮ್ಹಣ್ ವೆರೊನಿಕಾ ಆಶೆತಾಲಿ ಆನಿ ತ್ಯಾ ಖಾತಿರ್ ದೀಸ್ ರಾತ್ ಮಾಗ್ಣೆಂ ಕರ್ತಾಲಿ.

ಸರ್ದಾರ್ ಸಿಮಾಂವ್ ಥಂಯ್ಚ್ ಆಸಾ ಮ್ಹಣ್ ಆಗ್ನೆಸ್ ಕುಂವರ್ನಿಕ್ ಕಳಿತ್ ನಾತ್‍ಲ್ಲೆಂ. ವೆರೊನಿಕಾನ್ ತಿ ಗಜಾಲ್ ಗುಪಿತ್ ದವರ್‌ಲ್ಲಿ.

“ಸರ್ದಾರ್ ಸಿಮಾಂವ್ನ್, ಖುಶೆನ್ ಜಾಂವ್ ಜಬರ್ದಸ್ತೆನ್ ಹಾಂಗಾ ಯೇವ್ನ್ ಪಾವಾಸರ್, ಹಾಂಗಾಸರ್ ಆಸ್‍ಲ್ಲ್ಯಾ – ಪ್ರತ್ಯೇಕ್ ಜಾವ್ನ್ ಕೆನರೀನ್ ಜಿಲ್ಲ್ಯಾಂತ್ಲ್ಯಾ – ಕ್ರಿಸ್ತಾಂವಾಂನಿ ಭಾಯ್ರ್ ವಚನಾಯೆ ಮ್ಹಣ್ ಬೇಗಮೆಚಿ ತಾಕಿದ್ ಆಸಾ” ಮ್ಹಣಾಲಿ ಏಕ್ ದೀಸ್ ಆಗ್ನೆಸ್ ಕುಂವರ್ನ್ ಆತುರಾಯೆನ್, ಸಾಂಗಾತಾಚ್, ಭಿತರ್ಲ್ಯಾ ಅತ್ರೆಗಾನ್. “ಪುಣ್ ತೊ ಹಾಂಗಾಸರ್ ಯೆಂವ್ಚೊ ಭರ್ವಸೊ ಆಸಾಗೀ ಭಯ್ಣಿ?”

“ಮ್ಹಜೆ ಪ್ರಾಸ್ ತುಂ ತಾಕಾ ಚಡ್ ವಳ್ಕತಾಯ್” ಮ್ಹಣಾಲಿ ವೆರೊನಿಕಾ. “ತಾಣೆಂ ಹಾಂಗಾಸರ್ ಯೇಜಾಯ್ ಮ್ಹಳ್ಳಿ ಜರ್ ದೆವಾಚಿ ಖುಶಿ ಜಾವ್ನಾಸಾ, ತರ್ ತೊ ಹಾಂಗಾ ಯೇವ್ನ್ ಪಾವ್ತಲೊ ಮ್ಹಳ್ಳೊ ಭರ್ವಸೊ ಮಾತ್ರ್ ನಹಿಂ, ವಿಶ್ವಾಸ್‍ಯೀ ಆಮ್ಕಾಂ ಆಸಜಾಯ್.”

“ಜಾಯ್ತ್. ತಾಚೆರ್ ಪಯ್ಸ್ ಥಾವ್ನ್ ಏಕ್ ದೀಶ್ಟ್ ಮಾತ್ರ್ ಘಾಲುಂಕ್ ಮೆಳ್‍ಲ್ಲಿ ಜಾಲ್ಯಾರ್, ಮ್ಹಜ್ಯಾ ಅತ್ಮ್ಯಾಕ್ ಸಮಾಧಾನ್ ಜಾತೆಂ.”

“ಕಶೆಂ ಸಾಂಗ್ಯೆತಾ ಭಯ್ಣಿ. ತಸಲೆಂ ಸಮಾಧಾನ್ ತುಕಾ ಲಾಭೊಂಕ್ ಚಡ್ ದೀಸ್ ವಚಶೆನಾಂತ್ ಜಾಂವ್ಕ್‍ಯೀ ಪುರೊ.”

ತೊ ನಿಜಾಯ್ಕೀ ಹಾಂಗಾ ಆಸಾ ಮ್ಹಣ್ ತಿಕಾ ಸಾಂಗೊಂಕ್ ವೆರೊನಿಕಾಚೆಂ ಮನ್ ಥೊಡೆ ಪಾವ್ಟಿಂ ಚಡ್ಪಡ್ತಾಲೆಂ. ಸಾಂಗಾತಾಚ್, ಕಸಲ್ಯಾ ಪುಣೀ ಗುಪಿತ್ ಕಾರಣಾಂ ಖಾತಿರ್ ‘ವೇಳ್ ಆಯಿನ್ನ್ ನಹಿಂ’ ಮ್ಹಣ್ ತಿಕಾ ಭೊಗ್ತಾಲೆಂ. ಶಿವಾಯ್, ದೆವಾಚಿ ಖುಶಿ ತಶಿ ಜಾಲ್ಯಾರ್, ಸರ್ದಾರ್ ಸಿಮಾಂವ್ನ್ ಆನಿ ಆಗ್ನೆಸ್ ಕುಂವರ್ನಿನ್ – ತಾಣಿಂಚ್ – ಖುದ್ದ್ ಎಕಾಮೆಕಾಕ್ ಮೆಳೊನ್, ಸರ್ಲೆಲ್ಯಾ ಅನುಭವಾಂ ಥಾವ್ನ್ ಫುಡೆಂ ಉರ್ಲೆಲ್ಯಾ ಸಂಸಾರಾಂತ್ ಪಾಯ್ ದವರಿಜಾಯ್ ಮ್ಹಳ್ಳಿ ತಿಚಿ ಅಭಿಪ್ರಾಯ್ ಜಾವ್ನಾಸ್‍ಲ್ಲಿ.

ತಶಿಂ ವೊರಾಂ ಆನಿ ತಶೆ ದೀಸ್ ಪಾಶಾರ್ ಜಾತಾಲೆ.

ಸಾಂಗಾತಾಚ್, ಫಕೀರ್ ಮಹಮ್ಮದಾನ್ ವೆರೊನಿಕಾ ಕುವೆಲಿಕ್ ದಿಲ್ಲ್ಯಾ ಹಫ್ತ್ಯಾಚ್ಯಾ ವಾಯ್ದ್ಯಾಚೊ ವೇಳ್‍ಯೀ ಚರೊನ್ ಲಾಗಿಂ ಯೆತಾಲೊ.

ತ್ಯಾ ಇಡ್ಯಾಂತ್, ವೆರೊನಿಕಾ ಆನಿ ಆಗ್ನೆಸಾ ಮಧ್ಲೊ ವಿಶ್ವಾಸಾಚೊ ಆನಿ ಮೊಗಾಚೊ ಬಾಂಧ್ ಚಡ್ ಥಿರ್ ಜಾಂವ್ಚೆ ತಸಲೆಂ ದುಸ್ರೆಂ ಏಕ್ ಪ್ರಸಂಗ್ ಆಸ್‍ಲ್ಲೆಂ.

ಜಹನಾರಾ ಬೇಗಮೆನ್, ಆಗ್ನೆಸ್ ಕುಂವರ್ನಿಕ್ – ಘಡಾಂತ್ ಆಶ್ರಿತ್ ಜಾವ್ನ್ ಆಸ್ತಾನಾ, ಕಾಂಯ್ ತರೀ ಕಾಮ್ ದೀಂವ್ಕ್ ಜಾಯ್ ಮ್ಹಣ್ ವಿಚಾರ್‌ಲ್ಲ್ಯಾ ಖಾತಿರ್ – ಆಪ್ಣಾಚಿ ಖಾಸ್ಗಿ ದಾಸಿ (ಸಾಂಗಾತಿಣ್) ಜಾಂವ್ಕ್ ಕಬ್ಲಾತ್ ದಿಲ್ಲಿ. ಉಪ್ರಾಂತ್, ಬೇಗಮೆಚ್ಯಾ ಆನಿ ತಿಚ್ಯಾ ಸಾಂಗಾತ್ಯಾಂಚ್ಯಾ ಅಪೇಕ್ಷೆ ಪರ್ಮಾಣೆಂ – ತಿಣೆಂ ವೆರೊನಿಕಾ ಕುವೆಲಿಕ್ ಆಹಾರ್ ವ್ಹರ್ನ್ ದಿಂವ್ಚೆಂ, ಚಾಕರ್ನಿಚೆಂ ಕಾಮ್ ಕರಿಜಾಯ್ ಮ್ಹಣ್ ಫರ್ಮಾಯಿಲ್ಲೆಂ.

ತಶೆಂ ಫರ್ಮಾಂವ್ಕ್ ಕಾರಣ್ ತಾಂಚ್ಯಾ ಶಿಂತ್ರ್ಯಾಳ್ಯಾ ಮತಿಂತ್ ಆಸ್‍ಲ್ಲೆಂ: ವೆರೊನಿಕಾ ಕುವೆಲ್ ಕ್ರಿಸ್ತಾಂವ್. ಆಗ್ನೆಸ್ ಕುಂವರ್ನ್‍ಯೀ ಕ್ರಿಸ್ತಾಂವ್. ಥಂಯ್ಸರ್ ಆಶ್ರಿತ್ ಜಾವ್ನಾಸ್‍ಲ್ಲ್ಯಾ ಥೊಡ್ಯಾ ಕ್ರಿಸ್ತಾಂವಾಂಕ್ ಆಗ್ನೆಸ್ ಮುಖೆಲ್ನ್ ಜಾವ್ನಾಸ್‍ಲ್ಲಿ. ತಶೆಂ ಆಸ್ತಾಂ ತಾಂಚ್ಯಾ ಬಚಾವೆ ಖಾತಿರ್ ಪುಣೀ, ವೆರೊನಿಕಾನ್ ಘುಂವೊನ್ ಫಕೀರ್ ಮಹಮ್ಮದಾ ಕಡೆನ್ ಕಾಜಾರ್ ಜಾಂವ್ಕ್ ಕಬ್ಲಾತ್ ದೀಂವ್ಕ್ ಜಾಯ್ ಮ್ಹಣ್ ಪುಸ್ಲಾಂವ್ಕ್ ಬೇಗಮೆನ್ ಆಗ್ನೆಸಾಕ್ ತಾಕಿದ್ ದಿಲ್ಲಿ.

“ತುಜೆರ್ ಹೊಂದ್ವೊನ್ ಆಸಾ” ಮ್ಹಳ್ಳೆಂ ಬೇಗಮೆನ್ ಆಗ್ನೆಸಾ ಕಡೆನ್. “ತುಜ್ಯಾ ಬಾಪಾಯ್ಚಿ ಆನಿ ಹೆರ್ ಕ್ರಿಸ್ತಾಂವಾಂಚಿ ಬಚಾವಿ ತುಜೆರ್ ಹೊಂದ್ವೊನ್ ಆಸಾ. ದೆಕುನ್, ಅವಶ್ಯ್ ಜಾವ್ನ್ ಮ್ಹಜ್ಯಾ ಬಾಪುಲ್ ಭಾವಾ ಕಡೆನ್ (ವೆರೊನಿಕಾನ್) ಲಗ್ನ್ ಜಾವ್ನ್, ಅನಾವಶ್ಯ್ ರಗ್ತಾಪಾತ್ ತುವೆಂ ಉರಯ್ಜಾಯ್.”

“ರಗ್ತಾಪಾತ್!”

“ವ್ಹಯ್. ಸರ್ದಾರ್ ಸಿಮಾಂವ್ ಮ್ಹಳ್ಳೆಂ ನಾಂವ್ ತುವೆಂ ಆಯ್ಕಲಾಂಯ್‍ವೇ?”

“ಆ-ಆಯ್ಕಲಾಂ” ಮ್ಹಳ್ಳೆಂ ಆಗ್ನೆಸಾನ್ ಫುಮಾರ್ ಜಾವ್ನ್. ಬಿರ್ಮತ್, ತೆಂ ನಾಂವ್ ತಿಣೆಂ ಆಯ್ಕಲ್ಲೆಂ ಮಾತ್ರ್ ನಹಿಂ, ತಿಚ್ಯಾ ಜಿವಾಂತ್ಲ್ಯಾ ಹರ್ಯೆಕಾ ರಗ್ತಾ ಕಣಾಂತ್ ತೆಂ ರೊಂಬೊನ್ ಆಸ್‍ಲ್ಲೆಂ.

“ಹಾಂ, ಆಯ್ಕಲಾಂಯ್‍ಮೂ! ತೊ ಮನಿಸ್ ವೆಗಿಂಚ್ ಹೆವ್ಶಿನ್ ಯೆಂವ್ಚ್ಯಾರ್ ಆಸಾ. ಹ್ಯಾ ಸ್ತ್ರೀಯೆಕ್ (ವೆರೊನಿಕಾಕ್) ತಿಚ್ಯೆ ಖುಶೆ ವಿರೋಧ್ ಆಮಿ ಕೈದಿ ಕರ್ನ್ ದವರ್ಲಾ ಮ್ಹಣ್ ಸಮ್ಜಲ್ಯಾರ್, ಹಾಂಗಾಸರ್ ಗರ್ಜೆ ಶಿವಾಯ್ ರಗತ್ ವ್ಹಾಳ್ತೆಲೆಂ, ಆನಿ ಹೆರಾಂಕ್‍ಯೀ ವಾಯ್ಟ್ ಜಾತೆಲೆಂ.”

“ಪುಣ್.”

“ಪುಣ್, ವೆರೊನಿಕಾ ತಿಚ್ಯಾ ಖುಶೆನ್ ಆಮ್ಚಿ ಜಾಲ್ಯಾ ಮ್ಹಣ್ ಸಮ್ಜಲ್ಯಾರ್, ತೊಯೀ ಆಮ್ಚೊ, ಆನಿ ಪ್ರತ್ಯೇಕ್ ಜಾವ್ನ್ ಮ್ಹಜೊ ಸಯ್ರೊ ಆನಿ ಮಿತ್ರ್ ಜಾವ್ನ್ ಯೆತಲೊ. ತಾಣೆಂ ತಶೆಂ ಯೆಂವ್ಚೊ ಸಂಭವ್ ನಾ ಮ್ಹಣ್ ಜರ್ ಮ್ಹಾಕಾ ಕಳತ್, ತರ್ – ತಿ ಸ್ತ್ರೀಯೀ ಮೊರ್ತೆಲಿ, ತುಮಿಯೀ ಮೊರ್ತೆಲ್ಯಾತ್ ಆನಿ – ಆಮ್ಚ್ಯಾ ರಾಜಕೀಯ್ ಬಚಾವೆ ಖಾತಿರ್ – ಸರ್ದಾರ್ ಸಿಮಾಂವ್‍ಯೀ ಮೊರ್ತಲೊ!”

ಹೆಂ ರಾಜಾಂವ್ ಆಗ್ನೆಸ್ ಕುಂವರ್ನಿಕ್ ಸುಸ್ತೊಂಕ್ ನಾ. ಬಗಾರ್ ತಿ ಬೇಗಮ್, ಬರ‍್ಯಾ ತಿತ್ಲಿಚ್ ವಾಯ್ಟ್, ಮೊವಾಳ್ ತಿತ್ಲಿಚ್ ಧಾರುಣ್ ಆನಿ ಹುಶ್ಯಾರ್ ತಿತ್ಲಿಚ್ ಪಿಶಿಯೀ ಜಾವ್ನಾಸಾ ಮ್ಹಳ್ಳೊ ಉಗ್ಡಾಸ್ ತಿಕಾ ಆಯ್ಲೊ.

“ಹಾಂವೆಂ ಸಾಂಗ್‍ಲ್ಲೆಂ ಸಮ್ಜಲೆಂಮೂ?”

“ಸಮ್ಜಲೆಂ.”

“ತರ್ ಸಲ್ವನಾಕಾ!” ಅಸಲ್ಯಾ ಉತ್ರಾಂನಿ, ಆನಿ ತಸಲ್ಯಾ ಇರಾದ್ಯಾನ್, ತ್ಯಾ ಬೇಗಮೆನ್ ಆಗ್ನೆಸ್ ಕುಂವರ್ನಿಕ್ ತಾಕಿದ್ ದಿಲ್ಲಿ. ಪುಣ್ ತಿಣೆಂ ರಾವ್ಳೆರಾಂತ್ ಜಾಂವ್, ಭಾಯ್ರ್ ಘುಂವ್ತಾನಾ, ಮುಸ್ಲಿಮ್ ಸ್ತ್ರೀಯಾಂಪರಿಂಚ್ ನ್ಹೆಸಜಾಯ್ ಆನಿ ದಿಸಜಾಯ್ ಮ್ಹಣ್ ತಿಣೆಂ ಫರ್ಮಾಯಿಲ್ಲೆಂ. ತಸಲೆಂ ಫರ್ಮಾಣ್ ನಹಿಂ ಜಾಲ್ಲೆಂ ಜಾಲ್ಯಾರ್ – ರಾಕ್ವಲ್ಯಾಕ್ ತಿಚಿ ಪಯ್ಲಿಚ್ ವಳಕ್ ಮೆಳ್ತಿ, ಆನಿ ಹಿ ಕಥಾ ದುಸ್ರ್ಯಾ ವಾಟೆನ್ ವ್ಹಾಳ್ತಿ.

ವಯ್ಲಿ ಗಜಾಲ್ ಆಗ್ನೆಸ್ ಕುಂವರ್ನಿನ್ ದೋನ್ ತೀನ್ ದಿಸಾಂ ಭಿತರ್ ಮಾನಿನ್ ವೆರೊನಿಕಾ ಕುವೆಲಿಕ್ ವಿವರಿಂ ಸಾಂಗ್ಲಿ.

“ತರ್ ತುಂ ಕಿತೆಂ ಮ್ಹಣ್ತಾಯ್?” ವಿಚಾರ್ಲೆಂ ವೆರೊನಿಕಾನ್ ಆಪ್ಲೆಸ್ತಕಿಂ ಚಿಕ್ಕೆ ಖಂತೀಷ್ಟ್ ಜಾವ್ನ್.

“ಹಾಂವ್ ಕಾಂಯ್ ಮ್ಹಣನಾ” ಮ್ಹಣಾಲಿ ಆಗ್ನೆಸ್, ಸರಳ್ ಮನಾನ್. “ಬೇಗಮೆಚೊ ಇರಾದೊ ಆನಿ ತಾಕಿದ್ ತುಕಾ ಹಾಂವೆಂ ಸಾಂಗ್ಲಿ.”

“ತಿಚಿ ತಾಕಿದ್ ಪಾಳುಂಕ್, ತಿಕಾ ಜಾಯ್ ಜಾಲ್ಲೆಪರಿಂ ಮ್ಹಜೆಂ ಮನ್ ಪುಸ್ಲಾಂವ್ಕ್ ತುಂ…”

“ನಾ, ಹಾಂವ್ ಅಪೇಕ್ಷಿನಾ.”

“ಕಿತ್ಯಾಕ್?”

“ನಾ, ಹಾಂವ್ ಅಪೇಕ್ಷಿನಾ.”

“ಬೇಗಮೆನ್ ಆನಿ ತಿಚ್ಯಾ ಸಾಂಗೊಡ್ಯಾಂನಿ ಅಪೇಕ್ಷಿಲ್ಲೆಪರಿಂ ಹಾಂವೆಂ ಕೆಲ್ಯಾರ್, ಜಾಯ್ತೆಂ ರಗತ್ ವ್ಹಾಳ್ಚೆಂ ಉಣೆಂ ಜಾತೆಲೆಂ…”

“ಆಸ್ಯೆತ್.”

“ತುಕಾ ಆನಿ ಹೆರ್ ಥೊಡ್ಯಾ ಕ್ರಿಸ್ತಾಂವಾಂಕ್ ಸುಟ್ಕಾ ಲಾಭ್ತೆಲಿ…”

“ಜಾಂವ್ಕ್ ಪುರೊ.”

“ಪ್ರತ್ಯೇಕ್ ಜಾವ್ನ್ – ಸರ್ದಾರ್ ಸಿಮಾಂವ್ಚ್ಯಾ ಜಿವಾಕ್ ಬಾಧಕ್ ಆಸ್ಚೆಂ ನಾ.”

ಇತ್ಲೆಂ ಮ್ಹಣೊನ್, ಮಾನಿನ್ ವೆರೊನಿಕಾ, ಆಗ್ನೆಸ್ ಸಿಸಿಲಿಯಾಚೆಂ ಮುಖಮಳ್ ಪಳೆವ್ನ್ ಥೊಡೊ ವೇಳ್ ರಾವ್ಲಿ.

ಆಗ್ನೆಸ್ ಸಿಸಿಲಿಯಾಚೆ ದೊಳೆ ಭರೊನ್ ಆಯ್ಲೆ.

“ಭಯ್ಣಿ – ತುವೆಂ ಮ್ಹಣ್ಚೆಂ ಸಾರ್ಕೆಂ.”

“ಮ್ಹಣ್ತಚ್…”

“ಮ್ಹಣ್ತಚ್ – ಏಕ್ ಮಾತ್ರ್ ಉಗ್ಡಾಸ್ ದವರ್” ಮ್ಹಣಾಲಿ ತಿ, ಚಿಕ್ಕೆ ಕಠಿಣಾಯೆನ್. “ಜಾಯ್ತೆಂ ರಗತ್ ವ್ಹಾಳ್ಚೆಂ ಉಣೆಂ ಜಾಂವ್ಕ್, ಮ್ಹಾಕಾ ಆನಿ ಹೆರ್ ಥೊಡ್ಯಾ ಕ್ರಿಸ್ತಾಂವಾಂಕ್ ಸುಟ್ಕಾ ಲಾಭಂವ್ಕ್ ಆನಿ ಪ್ರತ್ಯೇಕ್ ಜಾವ್ನ್…” ಫುಡೆಂ ಉಲಂವ್ಕ್ ತಿ ಸಕ್ಲಿ ನಾ. ಸುಸ್ಕಾರ್ಲಿ ತಿ.

“ಪ್ರತ್ಯೇಕ್ ಜಾವ್ನ್?” ವೆರೊನಿಕಾನ್ ಹಾಳ್ವಾಯೆನ್ ವಿಚಾರ್ಲೆಂ.

“ಪ್ರತ್ಯೇಕ್ ಜಾವ್ನ್ – ತುವೆಂ ಮ್ಹಳ್ಳೆಪರಿಂ – ಸರ್ದಾರ್ ಸಿಮಾಂವ್ ಪ್ರಭುಚ್ಯಾ ಜಿವಾಕ್ ಬಾಧಕ್ ನಾಶೆಂ ಕರುಂಕ್, ಹಾಂವ್ ಮ್ಹಜೊ ಜೀವ್ ತರೀ ಭೋವ್ ಖುಶೆನ್ ದೀನ್! ಪುಣ್…”

“ಪುಣ್?” ವಿಚಾರ್ಲೆಂ ವೆರೊನಿಕಾನ್ ಉಸ್ವಾಸ್ ಧರುನ್.

“ಪುಣ್ ಲಜ್ ಹಿಂಡೊನ್, ಧರ್ಮ್ ಸಾಂಡುನ್ ಭಾವಾರ್ಥ್ ಹಾಂವ್ ವಿಕುಂಕ್ ಕೆದಿಂಚ್ ಸಕ್ಚಿಂ ನಾ!”

ಆತಾಂ, ಸರ್ತೆನ್ ವೆರೊನಿಕಾಚೆ ದೊಳೆ ಭಿಜ್ಲೆ. ವ್ಹಡ್ ಭಯ್ಣಿಪರಿಂ ವಾ ಆವಯ್‍ಪರಿಂ ಆಗ್ನೆಸಾಕ್ ತಿಣೆಂ ವೇಂಗ್ ಮಾರುನ್ ಧರ್ಲಿ. ಮೊಗಾಚ್ಯಾ ಆನಿ ಸಂತೊಸಾಚ್ಯಾ ಉಮಾಳ್ಯಾನ್ ತಿಚೊ ಸ್ವರ್ ಕಾಂಪ್ಲೊ ಆನಿ ಗದ್ಗದಿತ್ ಜಾಲೊ: “ಭಾಗಿ-ಬಾ, ತುಕಾ ವಳ್ಕಲ್ಲಿಂ ಹಾಂವ್ ಭಾಗಿ!” ಮ್ಹಣಾಲಿ ತಿ. “ಪುಣ್ ಕಿತೆಂ ಆಮಿ ಕರ್ಯಾಂ?”

“ಮಾಗ್ಯಾಂ” ಮ್ಹಣಾಲಿ ಆಗ್ನೆಸ್, ಧಯ್ರಾನ್. “ಹ್ಯಾ ಇಂಫೆರ್ನಾಚ್ಯಾ ದಾರಾಂಚ್ಯಾ ದವಡ್ಯಾಂ ಥಾವ್ನ್ ಸುಟೊಂಕ್ ದೆವಾ ಕಡೆನ್ ಮಾಗ್ಯಾಂ.”

“ಆನಿ ಎಕಾದಾವೆಳಾ ದೇವ್ ಆಮ್ಚೆಂ ಮಾಗ್ಣೆಂ ಆಯ್ಕನಾತ್ಲ್ಯಾರ್?”

“ತಿ ತಾಚಿ ಖುಶಿ!” ಮ್ಹಣಾಲಿ ಆಗ್ನೆಸ್. “ಜೀವ್ ಆಸೊನ್ ಆಮಿ ಜಾಯ್ತೆಂ ಸೊಸ್ಲಾಂ. ಆನಿ ಎಕಾದಾವೆಳಾ – ಬಂದಡೆಚ್ಯಾ ಹ್ಯಾ ಭಿರಾಂಕುಳ್ ಕಾಳಾರ್ – ಭಾವಾರ್ಥಾ ಖಾತಿರ್ ಜಾಂವ್ ಭಾಂವ್ಡಾಂ ಖಾತಿರ್ ಜೀವ್ ದಿಲ್ಲ್ಯಾ ಹಜಾರೊಂ ದಾದ್ಲೆ, ಸ್ತ್ರೀಯೊ ಆನಿ ಭುರ್ಗ್ಯಾಂಪರಿಂ ಆಮಿಯೀ ಮೊರಜಾಯ್ – ಖುಶೆನ್ ಮೊರ್‍ಯಾಂ… ತಶೆಂ ಪುಣೀ ಮಾಡ್ತಿರಾಂ ಜಾವ್ನ್ ಆಮ್ಚ್ಯಾ ಪುರ್ವಜಾಂಚೊ ಭಾವಾರ್ಥ್ ಉರಯಾಂ!”

ಮಾನಿನ್ ವೆರೊನಿಕಾ ಕುವೆಲ್ ಇತ್ಲೆಂ ಆಯ್ಕೊನ್ ಉಲಂವ್ಕ್ ಸಕನಾ ಜಾಲಿ. ಪುಣ್ ತಿಚೆ ಪೊಲೆ ಭಿಜ್ಲೆ. ತಶೆಂ, ಥೊಡೊ ವೇಳ್ ಎಕಾಮೆಕಾಕ್ ಪೊಟ್ಲುನ್ ಧರ್ನ್ ತಿಂ ರಾವ್ಲಿಂ.

ವೆರೊನಿಕಾಚೊ ಭಾವಾರ್ಥ್ ಉಣೊ ನಾತ್‍ಲ್ಲೊ. ತರೀ, ಆಗ್ನೆಸ್ ಕುಂವರ್ನಿಚ್ಯಾ ಹ್ಯಾ ಉತ್ರಾಂನಿ ಚಡ್ ಅಜ್ಯಾಪ್, ಧಯ್ರ್ ಆನಿ ಆನಂದ್ ತಿಕಾ ಲಾಭ್ಲೊ. ಬಂಟ್ವಾಳ್ಚ್ಯಾ ತ್ಯಾ ಕುಂವರ್ನಿ ಥಂಯ್, ತಿಣೆಂ ಆಯ್ಕಲ್ಲ್ಯಾ ಪ್ರಾಸ್ ಆನಿ ಅಪೇಕ್ಷಿಲ್ಲ್ಯಾ ಪ್ರಾಸ್ ಚಡ್ ತಿಣೆಂ ದೆಖ್ಲೆಂ. ತ್ಯಾ ವರ್ವಿಂ ತಾಂಚೆ ಮಧ್ಲೊ ಮೊಗಾಚೊ ಆನಿ ವಿಶ್ವಾಸಾಚೊ ಬಾಂಧ್ ಚಡ್ ಥಿರ್ ಜಾಲೊ.

ತೆವ್ಶಿಲ್ಯಾನ್ ಸರ್ದಾರ್ ಸಿಮಾಂವ್ ಕಾಮಾಕ್ ದೆಂವ್‍ಲ್ಲೊ. ರಾಕ್ವಲ್ಯಾಚ್ಯಾ ಕಾಮಾಂತ್ ಬೇಗಮೆಕ್ ಆನಿ ಫಕೀರ್ ಮಹಮ್ಮದಾಕ್ ತಾಣೆಂ ಸಮಾಧಾನ್ ದಿಲ್ಲೆಂ. ತಶೆಂ ಜಾಲ್ಲ್ಯಾನ್, ದಿಸಾಚ್ಯಾ ವೆಳಾರ್ ಚಿಕ್ಕೆ ಭಾಯ್ರ್ ವೊಡ್ತಾಂತ್ ಭೊಂವೊಂಕ್ ತಾಕಾ ಸುಟ್ಕಾ ಆಸ್‍ಲ್ಲಿ.

ತಸಲ್ಯಾ ಭೆಟ್ವಳೆಚ್ಯಾ ವೆಳಾರ್, ವೆರೊನಿಕಾಕ್ ರಾವಯಿಲ್ಲ್ಯಾ ಕುಡಾಚ್ಯಾ ಭಾಯ್ಲ್ಯಾ ಕುಡಾಚಿ ಚಾವಿ ಖುದ್ದ್ ಬೇಗಮೆಚ್ಯಾ ಹಾತಾಂತ್ ದೀವ್ನ್ ವಚಜಾಯ್ ಮ್ಹಳ್ಳಿ ತಾಕಿದ್ ತಾಕಾ ಆಸ್‍ಲ್ಲಿ. ತಶೆಂಚ್ ತೊ ಕರ್ತಾಲೊ.

ತ್ಯಾಚ್ ಭೆಟ್ವಳೆ ವೆಳಾರ್, ರಾವ್ಳೆರಾಚೆಂ ವಠಾರ್, ಸರ್ವ್ ಬಾಗ್ಲಾಂ ಆನಿ ಜನೆಲಾಂ, ಘಡಾಕ್ ಪ್ರವೇಶ್ ಜಾಂವ್ಚ್ಯೊ ತಶೆಂ ಭಾಯ್ರ್ ವೆಚ್ಯೊ ವಾಟೊ ಸರ್ವ್ ತಾಣೆಂ ಸಮ್ಜೊನ್ ಘೆತ್ಲ್ಯೊ.

ನಿಜಾಯ್ಕೀ, ರಾವ್ಳೆರಾಚೆಂ ವಠಾರ್ ಏಕ್ ಸುಭದ್ರ್ ಕೊಟೆಂ (ಘಡ್) ಜಾವ್ನಾಸ್‍ಲ್ಲೆಂ. ಸಗ್ಳ್ಯಾ ವಠಾರಾಚ್ಯಾ ಭೊಂವಾರಿಂ ರಕ್ಷಣೆಚೊ ಏಕ್ ಪಾಗೊರ್ ಆಸ್‍ಲ್ಲೊ. ತ್ಯಾ ಪಾಗೊರಾ ಭಾಯ್ಲ್ಯಾನ್ ಚಡುಣೆಂ ಧಾ ವಾಂವಾಂ ರುಂದಾಯೆಚೆಂ ಆನಿ ತೀನ್ ಆಳ್ ಗುಂಡಾಯೆಚೆಂ ಏಕ್ ಖಂದಕ್ ಆಸ್‍ಲ್ಲೆಂ. ವರ್ಸಾಚೆ ಬಾರಾಯೀ ಮಹಿನೆ ತ್ಯಾ ಖಂದ್ಕಾಂತ್ ಕುಸಡ್ ಆನಿ ಉಬ್ರಾಳೆಂ ಉದಾಕ್ ಭರೊನ್ ಆಸ್‍ಲ್ಲೆಂ.

ರಾವ್ಳೆರಾಕ್ ವಚಜಾಯ್ ಜಾಲ್ಯಾರ್, ಪಯ್ಲೆಂ ಘಡಾಕ್ ಪ್ರವೇಶ್ ಜಾಯ್ಜಯ್. ಘಡಾಕ್ ಪ್ರವೇಶ್ ಜಾಂವ್ಕ್, ದಾಟ್ ರುಕಾಚ್ಯಾ ಬಾಗ್ಲಾಂನಿ ಫಿಚಾರ್ ಕೆಲ್ಲೆಂ ಎಕ್‍ಚ್ ಹೆದ್ದಾರ್ ಆಸ್‍ಲ್ಲೆಂ. ತ್ಯಾ ಮಹಾದ್ವಾರಾಚ್ಯಾ ಬಗ್ಲೆನ್ ಜನೆಲಾಂತ್ಲ್ಯಾನ್ ಭಾಯ್ರ್ ತಶೆಂ ಭಿತರ್ ಪಳೆಂವ್ಕ್ ಆಸ್ಪದ್ ಆಸೊನ್ ಏಕ್ ಲ್ಹಾನ್ ಕೊಟ್ರಿ ಆಸ್‍ಲ್ಲಿ ಆನಿ ತ್ಯಾ ಕೊಟ್ರೆಂತ್ ರಾತ್ ದೀಸ್ ಪಹರೊ ಆಸ್ತಾಲೊ. ದ್ವಾರಾಚಿ ಚಾವಿ ತ್ಯಾ ರಾಕ್ವಲ್ಯಾ ಕಡೆನ್ ಆಸ್ತಾಲಿ.

ತೆಂ ಮಹಾದ್ವಾರ್ ಫಿಚಾರ್ ಜಾವ್ನ್ ಆಸ್ತಾನಾ, ರಾವ್ಳೆರಾಕ್ ಕೊಣೆಂಚ್ ಪ್ರವೇಶ್ ಜಾಂವ್ಕ್ ಸಾಧ್ಯ್ ನಾತ್‍ಲ್ಲೆಂ. ತಶೆಂಚ್, ಭಾಯ್ರ್ ವಚೊಂಕ್‍ಯೀ ಸಾಧ್ಯ್ ನಾತ್‍ಲ್ಲೆಂ. ತಿಚ್ ಏಕ್ ವ್ಹಡ್ ಭದ್ರತಿ, ಆನಿ ವ್ಹಡ್ ಅಡ್ಕಳ್. ಪುಣ್ ತ್ಯಾ ಅಡ್ಕಳೆ ಪ್ರಾಸ್ ವರ್ತಿ ಅಡ್ಕಳ್, ದ್ವಾರಾಚ್ಯಾ ಭಾಯ್ಲ್ಯಾನ್ ಆಸ್‍ಲ್ಲಿ. ತೊ ಜಾವ್ನಾಸ್‍ಲ್ಲೊ – ತ್ಯಾ ಕಾಳಾಚ್ಯಾ ನಿವಾಸಿ ಘಡಾಂಚ್ಯೆ ಬಂದೋಬಸ್ತೆ ಖಾತಿರ್ ಸಬಾರ್ ಘಡಾಂಕ್ ಆಸ್‍ಲ್ಲೆಪರಿಂ – ವಯ್ರ್ ಸಕಯ್ಲ್ ದೆಂವಂವ್ಚಿ ಮಾಂಡಾವಳ್ ಆಸ್‍ಲ್ಲೊ ಸೇತುವೊ. ತೊ ಸೇತುವೊ (ಬೃಹತ್ ಪಾಂಪಾಳೆಂ) ಫಾವೊ ತೆ ಗಾಂಚ್ ಆನಿ ಚಾಕ್‍ಚಕ್ (ರೊದಾಂ) ಆಸೊನ್, ಮಹಾದ್ವಾರಾ ಲಾಗಿಂ ಘಡಾಚ್ಯಾ ಫಾತ್ರಾಂಚ್ಯಾ ವಣದಿಕ್ ಲಾಗೊನ್ ಆಸ್‍ಲ್ಲೊ. ಫಾವೊ ತಿ ಯಾಂತ್ರಿಕ್ ಮಾಂಡಾವಳ್ ಆಸೊನ್, ತೆಂ ಪಾಂಪಾಳೆಂ ದೆಂವಂವ್ಚಿ ವಾ ವಯ್ರ್ ಉಕ್ಲುನ್ ಪಾಟಿಂ ಘಡಾಕ್ ತೆಂಕೊನ್ ಉಬೆಂ ರಾವಂವ್ಚಿ ಮೂಟ್, ಕೊಟ್ರೆ ಭಿತರ್ ಆಸ್‍ಲ್ಲಿ.

ಹೆಂ ಸರ್ವ್ ಸರ್ದಾರ್ ಸಿಮಾಂವ್ನ್ ಸಮ್ಜೊನ್ ಘೆತ್ಲೆಂ.

ಚವ್ತ್ಯಾ ದಿಸಾ, ತಾಣೆಂ, ಬಂಧೆಂತ್ಲೊ ಭಾಯ್ರ್ ಆಯಿಲ್ಲ್ಯಾ ಮ್ಹಾಲ್ಯಾಚಿ ವಳಕ್ ಧರ್ಲಿ ಆನಿ ತಶೆಂಚ್ ಆಪ್ಲೆಂ ಯೋಜನ್ ಮಾಂಡುನ್ ಹಾಡ್ಲೆಂ.

ತಿ ಖಬರ್ ತಾಣೆಂ ತ್ಯಾಚ್ ರಾತಿಂ ವೆರೊನಿಕಾಕ್ ವಿವರ್ ದೀವ್ನ್ ಸಾಂಗ್ಲಿ.

“ತೊ ಮ್ಹಾಲಿ ಆಮ್ಚ್ಯಾ ಪಕ್ಷೆಕ್ ಮೆಳ್ತಾ ಮ್ಹಳ್ಳೆಂ ಖಂಡಿತ್. ತಶೆಂ ಜಾಲ್ಯಾರ್, ಯೆಂವ್ಚ್ಯಾ ಬ್ರೇಸ್ತಾರಾಚ್ಯಾ ರಾತಿಂ ಆಮಿ ಹಾಂಗಾ ಥಾವ್ನ್ ಭಾಯ್ರ್ ವಚ್ಯೆತ್” ಮ್ಹಣಾಲೊ ತೊ. “ಉಪ್ರಾಂತ್, ಹಾಂಗಾ ಆಸ್‍ಲ್ಲ್ಯಾಂಕ್ ಕೈದ್ ಕರುಂಕ್ ಶಿಪಾಯಾಂ ಸಮೇತ್, ಟಿಪ್ಪು ಸುಲ್ತಾನಾಚ್ಯಾ ನಾಂವಾನ್ ಯೆವ್ಯೆತ್.”

“ಹಾಂಗಾ ಥಾವ್ನ್ ಪಯ್ಲೆಂ ಭಾಯ್ರ್ ವೆಚೆಂ ಕೊಣೆಂ?” ತಿಣೆಂ ವಿಚಾರ್ಲೆಂ.

“ಆಮಿ ತೆಗಾಂನಿ – ತುವೆಂ, ಹಾಂವೆಂ ಆನಿ ತ್ಯಾ ಮ್ಹಾಲಿ ಮನ್ಶ್ಯಾನ್.”

“ನಾ” ಮ್ಹಣಾಲಿ ತೊ. “ಆಮಿ ಚವ್ಗಾಂನಿ ವಚಜಾಯ್. ಆಮ್ಚ್ಯಾ ಸಾಂಗಾತಾ – ಮ್ಹಾಕಾ ಆಹಾರ್ ಹಾಡ್ನ್ ಯೆಂವ್ಚ್ಯಾ ತ್ಯಾ ಚಾಕರ್ನಿಕ್‍ಯೀ ಆಮಿ ವ್ಹರಿಜಾಯ್.”

“ಕಿತೆಂ!” ಸರ್ದಾರ್ ಸಿಮಾಂವ್ ಆಕಾಂತ್ಲೊ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel