ಇಂಫೆರ್ನಾಚಿಂ ದಾರಾಂ – 20: ವಾಟ್ ಪರ್ನಿ – ಪಾಸ್ ನವೆ!

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 20
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 20: ವಾಟ್ ಪರ್ನಿ – ಪಾಸ್ ನವೆ!

ಅಲೆಕ್ಸ್ ಕಾಮತಾನ್ ವಿಚಾರ್‌ಲ್ಲ್ಯಾ ಹ್ಯಾ ಸವಾಲಾಕ್ ಅಂತುಲ್ಯಾನ್ ತಕ್ಷಣ್ ಜಾಪ್ ದೀಂವ್ಕ್ ನಾ. ಬದ್ಲಾಕ್ ತಾಣೆಂ ಸುಕ್ಣ್ಯಾಪರಿಂ ಲ್ಹಾನ್ ಏಕ್ ಸಾಂಕೇತಿಕ್ ಆವಾಜ್ ಕೆಲೊ. ಸರ್ದಾರ್ ಸಿಮಾಂವ್ನ್ ತಶಿಚ್ ಪ್ರತಿ ಜಾಪ್ ದಿಲಿ.

ಅಂತುಲೊ ಪಡ್ವಳ್ ಆನಿ ರಾಮಪ್ಪ ನಾಯ್ಕ್, ಘೊಡ್ಯಾಂಕ್ ಘೆವ್ನ್ ಮುಖಾರ್ ಆಯ್ಲೆ.

ಷೇರ್ ಖಾನ್ ಆನಿಕ್‍ಯೀ ಮತಿರ್ ಯೇಂವ್ಕ್ ನಾತ್‍ಲ್ಲೊ.

“ತರ್ ಆಮಿ ಆತಾಂ ವೆತಾಂವ್” ಮ್ಹಣಾಲೊ ಸರ್ದಾರ್ ಸಿಮಾಂವ್.

“ವಚ್ಯೆತ್ – ಮ್ಹಜ್ಯಾ ಜಿವಾಕ್ ಆನಿ ನವ್ಕರೆಕ್ ಕಿತ್ಲೊ ಅಪಾಯ್ ಆಸ್ಲ್ಯಾರೀ ತುಮಿ ವಚ್ಯೆತ್” ಮ್ಹಣಾಲೊ ಕಾಮತ್. “ಪುಣ್, ಸದ್ದ್ಯಾಕ್ ಪುಣೀ ಮ್ಹಜೊ ಜೀವ್ ಆನಿ ನವ್ಕರಿ ಉರಶೆಂ, ಹಾಂವೆಂ ಮಾಗ್‍ಲ್ಲೊ ಉಪ್ಕಾರ್ ತುಮಿ ಮ್ಹಾಕಾ ಕರಿಜಾಯ್.”

ಸರ್ದಾರ್ ಸಿಮಾಂವ್ಕ್ ಹೆಂ ಆಯ್ಕೊನ್ ಚುರ್ಚುರೆ ಭೊಗ್ಲೆ.

“ಇಷ್ಟಾ” ಮ್ಹಣಾಲೊ ತೊ. “ತುವೆಂ ಕೆಲ್ಲೊ ಉಪ್ಕಾರ್ ಆಮಿ ಮತಿಂತ್ ದವರ್ತೆಲ್ಯಾಂವ್. ಆಮಿ ಧರ್‍ಲ್ಲ್ಯಾ ಕಾಮಾಂತ್ ಜಯ್ತೆವಂತ್ ಜಾವ್ನ್ ಪಾಟಿಂ ಆಮಿ ಆಯ್ಲ್ಯಾರ್, ತುಜ್ಯಾ ಜಿವಾಕ್ ಚಡ್ ಸುರಕ್ಷಿತಾಯ್ ಆನಿ ತುಜ್ಯಾ ನವ್ಕರೆಕ್ ಚಡ್ ಭದ್ರತಿ ದಿಂವ್ಚ್ಯಾ ಖಾತಿರ್ ವಾವ್ರುಂಕ್ ಆಮಿ ಉಗ್ಡಾಸ್ ದವರ್ತೆಲ್ಯಾಂವ್. ತೆದೊಳ್ ಪರ್ಯಾಂತ್, ಆಮ್ಚ್ಯಾ ಪುರ್ವಜಾಂಚೊ ದೇವ್ ತುಕಾ ರಾಕೊಂದಿ.”

ತಶೆಂ ಮ್ಹಣೊನ್ ಅಂತುಲ್ಯಾಕ್ ಗಜಾಲ್ ತಾಣೆಂ ಕಳಯ್ಲಿ. ಉಪ್ರಾಂತ್, ತುರ್ತಾನ್ ತಾಣೆಂ ಅಲೆಕ್ಸ್ ಕಾಮ್ತಿಚೆ ಹಾತ್ ಪಾಯ್ ಬಾಂಧ್ಲೆ, ಆನಿ ತೋಂಡ್‍ಯೀ ಬಂದ್ ಕೆಲೆಂ.

ಪಾಟಿಂ, ರಾವ್ಳೆರಾಚ್ಯಾ ಉಜ್ವ್ಯಾ ಕುಶಿನ್ ಚಡ್ ಉಜ್ವಾಡ್ ಝಳ್ಕೊಂಕ್ ಆನಿ ಚಡ್ ಆವಾಜ್ ಆಯ್ಕೊಂಕ್ ಸುರು ಜಾಲೊ. ಭಿತರ್ಲಿ ಬೊಬಾಟ್ ಆನಿ ಗಲಾಟೊ ಆಯ್ಕೊನ್, ಭಾಯ್ಲ್ಯಾನ್ ಆಯಿಲ್ಲ್ಯಾ ಗ್ರಾಯ್ಕಾಂನಿ, ಭಿತರ್ ಸರ್ದಾರ್ ಸಿಮಾಂವ್ ಆನಿ ತಾಚೆ ಸಾಂಗಾತಿಚ್ ಸಾಂಪಡ್ಲ್ಯಾತ್ ಮ್ಹಣ್ ಚಿಂತುನ್ ತಾರಿಫೊ ಕೆಲ್ಯೊ. ಉಪ್ರಾಂತ್ ತಾಂಕಾಂ ದುಬಾವ್ ಮಾರ್ಲೊ. ಪ್ರಮಾದ್ ಸಮ್ಜೊನ್, ತುರ್ತಾನ್ ತಾಣಿಂ ಬಾಗಿಲ್ ಉಗ್ತೆಂ ಕೆಲೆಂ.

ಭಿತರ್ ತಾಂಚೆಚ್ ಜಣ್ ಶಿರ್ಕೊನ್ ಚಡ್ಪಡ್ಚೆ ಪಳೆವ್ನ್ ತೆ ಘಡ್ಬಡ್ಲೆ. ಷೇರ್ ಖಾನಾಕ್ ತಾಣಿಂ ಉಲೊ ದಿಲೊ. ತೊ ನಾತ್‍ಲ್ಲೊ ಪಳೆವ್ನ್ ತೆ ಆಕಾಂತ್ಲೆ. ರಾಯಾಕ್ ಖಬರ್ ಧಾಡ್ಲಿ. ನಿದ್‍ಲ್ಲೊ ಉಟೊನ್, ಎಕ್ಲ್ಯಾ ದೊಗಾಂ ಅಂಗರಕ್ಷಕಾಂ ಸಾಂಗಾತಾ ರಾಯ್ ಥಂಯ್ ಯೇವ್ನ್ ಪಾವ್ಲೊ.

ಜಾಲ್ಲಿ ಫರಾಮಸ್ ಸಮ್ಜತಚ್ ಚಡ್ ದಿವೆ ಪೆಟ್ಲೆ. ಚಡ್ ಆವಾಜ್ ಜಾಲೊ.

“ಚಿಂತ್‍ಲ್ಲೆಂ ಏಕ್, ಜಾಲೆಂ ದುಸ್ರೆಂಚ್!” ಮ್ಹಣಾಲೊ ರಾಯ್. “ತ್ಯಾ ಶಿವಾಯ್, ಹಿ ಆಲೋಚನ್ ಕೆಲ್ಲೊ, ಆನಿ ತಾಂಕಾಂ ಕೈದ್ ಕರುಂಕ್ ಉಪಾಯ್ ಚಿಂತ್‍ಲ್ಲೊ ಗ್ರಾಯ್ಕ್ ಷೇರ್ ಖಾನ್‍ಯೀ ದಿಸನಾ ಜಾಲಾ…”

“ಬರಾಬರ್! ಷೇರ್ ಖಾನಾಕ್‍ಚ್ ತಾಣಿಂ ಕೈದ್ ಕೆಲಾ. ಪಯ್ಸ್ ತೆ ವಚಶೆ ನಾಂತ್… ತಾಂಚೆ ಘೊಡೆ…

“ಥೊಡ್ಯಾ ಶಿಪಾಯಾಂಕ್ ಉಟಯಾ!

“ಘೊಡ್ಯಾ ಶಾಲ್ ಬಂದ್ ಕರಾ!

“ಪ್ರವೇಶ್ ದಾರಾರ್ ಪಹರೊ ಭದ್ರ್ ಕರಾ!

“ಢಾಲ್ ವ್ಹಾಜಯಾ!”

ಢಾಲ್ ವ್ಹಾಜಯ್ಲಿ.

ಸೈನಿಕ್ ಉಟೊನ್, ಘೊಡ್ಯಾ ಶಾಲಾ ಲಾಗಿಂ ಆನಿ ಪ್ರವೇಶ್ ದಾರಾ ಕಡೆನ್ ಯೇವ್ನ್ ಪಳೆತಾತ್ ಜಾಲ್ಯಾರ್ ದೋನ್‍ಯೀ ಕಡೆನ್ ದೋಗ್‍ಯೀ ರಾಕ್ವಲಿ, ಹಾತ್ ಪಾಯ್ ಆನಿ ತೋಂಡ್ ಬಾಂಧವ್ನ್ ಹುಳ್ವುಳ್ತಾಲೆ, ಆನಿ ಬೋಬ್ ಮಾರುಂಕ್ ಜಾಯ್ನಾಸ್ತಾಂ, ತೊಂಡಾ ಭಿತರ್, ಆನಿ ನಾಕಾಂತ್ಲ್ಯಾನ್ ಥೊಡೊ ಆವಾಜ್ ಕರ್ತಾಲೆ.

ತಾಂಚೆ ಹಾತ್ ಪಾಯ್ ಆನಿ ತೋಂಡ್ ಸೊಡವ್ನ್ ವಿಚಾರ್ ಕರ್ತಚ್, ಘಡ್‍ಲ್ಲ್ಯಾ ಗಜಾಲಿಂಚೊ ವಿವರ್ ಸುಸ್ತಾಲೊ.

“ತುಮಿ ನಿದೊನ್ ಪಡ್‍ಲ್ಲ್ಯಾತ್ ಮ್ಹಣ್ ದಿಸ್ತಾ!” ರಾಯಾನ್ ಧೆಂಕ್ಣೊ ಮಾರ್ಲೊ.

“ನಾ ಮಹಾ ಪ್ರಭೋ” ಮ್ಹಣಾಲೊ ಕಾಮತ್. “ಕಸಲೊಗೀ ಆವಾಜ್ ಕಾಳೊಕಾಂತ್ ಆಯ್ಕತಚ್, ‘ಕೋಣ್ ಥಂಯ್ ಕಾಳೊಕಾಂತ್?’ ಮ್ಹಣ್ ಹಾಂವೆಂ ಸವಾಲ್ ಕೆಲೆಂ. ಜವಾಬ್ ಜಾವ್ನ್ ದೋನ್ ತೀನ್ ವಾಟೆಂನಿ ತೆ ಮ್ಹಜ್ಯಾ ಆಂಗಾರ್ ಪಡ್ಲೆ, ಆನಿ ತಾಣಿಂ ಮ್ಹಾಕಾ ಬಾಂಧುನ್ ಘಾಲೊ.”

“ಮ್ಹಾಕಾಯೀ ತಶೆಂಚ್ ತಾಣಿಂ ಬಾಂಧುನ್ ಘಾಲ್ಲೊ” ಮ್ಹಣಾಲೊ ಘೊಡ್ಯಾ ಶಾಲಾಚೊ ರಾಕ್ವಲಿ. “ತಾಣಿಂ ಮ್ಹಾಕಾ ಜಿವೆಶಿಂ ಮಾರಿನಾತ್‍ಲ್ಲೆಂ…”

“ಆಮ್ಚೆಂ ದುರಾದೃಷ್ಟ್” ಮ್ಹಣಾಲೊ ರಾಯ್. “ತೆ ಆಯಿಲ್ಲೆ ಗ್ರಾಯ್ಕ್ ತಶೆಚ್ ಗೆಲ್ಲೆ ಜಾಲ್ಯಾರ್ ವ್ಹಡ್ ನಹಿಂ ಆಸ್‍ಲ್ಲೆಂ. ಪುಣ್ ತಾಂಕಾಂ ಕೈದ್ ಕೆಲ್ಯಾರ್, ಆಮ್ಕಾಂ ಸಕ್ಡಾಂಕ್ ಕಣ್ಣಾನೂರ್‍ಚ್ಯಾ ಬೇಗಮೆಚಿ ಶಿಫಾರಸ್ ಆನಿ ಇನಾಮ್ ಫಾವೊ ಜಾತಾ ಮ್ಹಣ್ ಸಾಂಗೊನ್ ತ್ಯಾ ಷೇರ್ ಖಾನಾನ್ ಅಧಿಕ್ ಪ್ರಸಂಗ್ ಕೆಲೆಂ, ಆನಿ ತೊಚ್ ಕೈದ್ ಜಾಲೊ. ತಾಕಾ ತೆ ಲಗಾಡ್ ಪುಣೀ ಕಾಡ್ತಿತ್ ಜಾಲ್ಯಾರ್, ಬೇಗಮೆಚ್ಯಾ ಕ್ರೋಧಾಕ್ ಆಮಿ ಉಂಡಿ ಜಾಯ್ಜಯ್ ಪಡ್ತೆಲೆಂ. ಆತಾಂಚ್ಯಾ ಪರಿಸ್ಥಿತೆಂತ್ ತಶೆಂ ಜಾಲ್ಲೆಂ ಆಮ್ಕಾಂ ನಾಕಾ” ಮ್ಹಣೊನ್ ತೊ ಆಪ್ಲ್ಯೊ ಮಿಶ್ಯೊ ಪುಸುಂಕ್ ಆನಿ ಪೋಟ್ ಪೊಶೆಂವ್ಕ್ ಲಾಗ್ಲೊ.

“ತರ್ ಆತಾಂ ಕಿತೆಂ ಕರ್ಯಾಂ?” ಎಕ್ಲ್ಯಾ ಹುದ್ದೆದಾರಾನ್ ಥೊಡ್ಯಾ ವೆಳಾನ್ ಲೋವ್ ವಿಚಾರ್ಲೆಂ.

“ಕಿತೆಂ ಕರ್ಯಾಂ ಮ್ಹಣ್ ಆಮ್ಕಾಂ ಸಮ್ಜನಾ” ಮ್ಹಣಾಲೊ ರಾಯ್. “ತೊ ಸರ್ದಾರ್ ಸಿಮಾಂವ್, ಷೇರ್ ಖಾನಾಚೊ ಪಾಟ್ಲಾವ್ ಕರ್ನ್, ತಾಕಾ ಧರ್ಚ್ಯಾ ಖಾತಿರ್‌ಚ್ ಹಾಂಗಾ ಆಯಿಲ್ಲೊ ಮ್ಹಣ್ ದಿಸ್ತಾ. ತೆಂ ಆಮ್ಕಾಂ ಪಯ್ಲೆಂ ಸುಸ್ತನಾತ್‍ಲ್ಲಿ ಆಮ್ಚಿ ಚೂಕ್.”

“ಪುಣ್ ಷೇರ್ ಖಾನ್ ವೇಸ್ ಬದ್ಲುನ್…”

“ಆಸ್‍ಲ್ಲೊ ವ್ಹಯ್, ಪುಣ್ ತಸಲಿ ವೇಸ್ ಬದ್ಲಾವಣ್ ಸರ್ದಾರ್ ಸಿಮಾಂವ್ ಕಡೆನ್ ಚಲೊಂಕ್ ನಾ ಮ್ಹಳ್ಳೆಂಯೀ ಸ್ಪಷ್ಟ್ ಜಾಲೆಂ ನಹಿಂವೇ?”

“ತರ್ ಕಿತೆಂ ಕರ್ಯಾಂ?”

“ಸರ್ದಾರ್ ಸಿಮಾಂವ್ ಆತಾಂ ಜಾತಾ ತಿತ್ಲ್ಯಾ ವೆಗಿಂ ಕುರಿಯೆಲಾಕ್ ಪಾಟಿಂ ವೆತಲೊ ಮ್ಹಳ್ಳೆಂ ಖಂಡಿತ್. ಆಮ್ಚೆ ಕಡೆನ್ ಚಡ್ ಶಿಪಾಯ್ ನಾಂತ್, ತರೀ, ಪಾಂಚ್ ಜಣ್ ಸವಾರ್ ಆತಾಂಚ್ ಭಾಯ್ರ್ ಸರೊನ್, ಕಾಸರ್‌ಗೋಡ್ ಥಾವ್ನ್ ಜಾಲ್ಸೂರ್ಚಿ ಭಿತರ್ಲಿ ವಾಟ್ ಧರುನ್ ಕುಂಬ್ಳಾ ವಚೊಂದಿತ್, ಆನಿ ಕುಂಬ್ಳಾಚ್ಯಾ ರಾಯಾಕ್ ಹಿ ಖಬರ್ ದೀವ್ನ್, ಕಶೆಂ ಪುಣೀ ಸರ್ದಾರ್ ಸಿಮಾಂವ್ಕ್ ಆಡಾವ್ನ್, ಷೇರ್ ಖಾನಾಕ್ ಸೊಡಂವ್ದಿತ್.”

“ತ್ಯಾ ಆದಿಂಚ್ ಸರ್ದಾರ್ ಸಿಮಾಂವ್ ತಾಂಕಾಂ ವಾಟೆರ್ ಭೆಟತ್ ಜಾಲ್ಯಾರ್…”

“ಕಳ್‍ಲ್ಲೆಪರಿಂ, ಹುಶಾರಾಯೆನ್ ಕಾಮ್ ತೆ ಕರುಂದಿತ್!”

ಮ್ಹಣೊನ್ ರಾಯ್ ಪರ್ತ್ಯಾನ್ ನಿದೊಂಕ್ ಗೆಲೊ.

ಥೊಡ್ಯಾ ವೆಳಾನ್, ನೀಲೇಶ್ವರ್‍ಚೆ ಪಾಂಚ್ ಜಣ್ ಸವಾರ್ ಭಾಯ್ರ್ ಸರೊನ್, ಮತಿ ಭಿತರ್‌ಚ್ ಪುರ್ಪುರೊನ್, ಉತ್ತರಾಚಿ ವಾಟ್ ಧರುನ್ ಗೆಲೆ. ತಾಂಚ್ಯಾ ಸವಾರೆಂತ್ ದರ್ವಡ್ ನಾತ್‍ಲ್ಲಿ. ಸರ್ದಾರ್ ಸಿಮಾಂವ್ಕ್ ಭೆಟಜಾಯ್ ಮ್ಹಣ್ ತಾಂಕಾಂ ಆತುರಾಯ್ ನಾತ್‍ಲ್ಲಿ.

ತ್ಯಾಚ್ ವೆಳಾರ್, ಸರ್ದಾರ್ ಸಿಮಾಂವ್ ಆನಿ ತಾಚೆ ಸಾಂಗಾತಿ, ದಕ್ಷಿಣಾಚ್ಯಾ ವಾಟೆನ್ ಥೊಡಿಂ ಮಯ್ಲಾಂ ಪಯ್ಸ್ ಪಾವ್‍ಲ್ಲೆ. ಮತಿರ್ ನಾತ್‍ಲ್ಲ್ಯಾ ಷೇರ್ ಖಾನಾಕ್, ಸರ್ದಾರ್ ಸಿಮಾಂವ್ನ್ ಆಪ್ಲ್ಯಾ ಮುಖ್ಲ್ಯಾನ್ ಘೊಡ್ಯಾಚೆರ್ ವೊಮ್ತೊ ನಿದಾವ್ನ್, ತಾಚೆ ಹಾತ್ ಆನಿ ಪಾಯ್ ಘೊಡ್ಯಾಚ್ಯಾ ಪೊಟಾ ಪಂದ್ಲ್ಯಾನ್ ಗಾಂಟಾಯಿಲ್ಲೆ.

ಕಾಳೊಕಿ ವಾಟ್ ಜಾಲ್ಲ್ಯಾನ್, ತಾಂಚೆಂ ಪಯ್ಣ್ ತುರ್ತಾನ್ ಜಾಯ್ನಾತ್‍ಲ್ಲೆಂ. ಜಾಲ್ಯಾರೀ, ದೀಸ್ ಉಜ್ವಾಡ್ಚ್ಯಾ ಭಿತರ್ ಜಾತಾ ತಿತ್ಲ್ಯಾ ಪಯ್ಸ್ ಪಾವಜಾಯ್ ಮ್ಹಳ್ಳ್ಯಾ ಇರಾದ್ಯಾನ್, ಘೊಡ್ಯಾಂಕ್ ಜಾಯ್ ತಶೆಂ ಸ್ವಾತಂತ್ರ್ಯ್ ದೀವ್ನ್ ವಾಟ್ ತಾಣಿಂ ಮುಖಾರ್ಸಿಲಿ.

ದೀಸ್ ಉಜ್ವಾಡ್ತಾಂ ಉಜ್ವಾಡ್ತಾಂ, ಚಡುಣೆಂ ಸಾತ್ ಮಯ್ಲಾಂ ಪಯ್ಸ್ ನೀಲೇಶ್ವರ್ ಥಾವ್ನ್ ದಕ್ಷಿಣಾಕ್ ತೆ ಪಾವ್‍ಲ್ಲೆ. ಉಪ್ರಾಂತ್‍ಯೀ ಥೊಡಿಂ ವೊರಾಂ, ನಿರ್ಜನ್ ತಿ ವಾಟ್ ಚಮ್ಕೊನ್ ದಕ್ಷಿಣಾಂತ್, ಕರಾವಳೆರ್ ನಾಂವಾಡ್ದಿಕ್ ಛತ್ರ್ ಆಸ್‍ಲ್ಲ್ಯಾ ಪಯ್ಯನೂರಾ ಲಾಗಿಂ ತೆ ಪಾವ್ಲೆ.

ರೂಂದ್ ವಾಟ್ ಸೊಡುನ್, ಬಗ್ಲೆನ್ ಆಸ್ಚ್ಯಾ ಎಕಾ ರಾನಾಂತ್ ರಿಗೊನ್, ಲ್ಹಾನ್ ಏಕ್ ವ್ಹೊಳಿ ಆಸ್‍ಲ್ಲೆ ಕಡೆನ್ ತಾಣಿಂ ತುಂಬು ಮಾರ್ಲೊ. ಥಕ್‍ಲ್ಲ್ಯಾ ಘೊಡ್ಯಾಂನಿ ತಶೆಂ ಮನ್ಶ್ಯಾಂನಿ, ಝರಿಚೆಂ ನಿತಳ್ ಉದಾಕ್ ಪಿಯೆವ್ನ್ ತಾನ್ ಭಾಗಯ್ಲಿ.

ಷೇರ್ ಖಾನಾಕ್, ಫಾಂತ್ಯಾಚೆಂ ವಾರೆಂ ಆನಿ ತೊಂಡಾಕ್ ಮಾರ್‌ಲ್ಲೆಂ ಶೆಳೆಂ ಉದಾಕ್ ಲಾಗೊನ್ ಜಾಗ್ ಜಾಲಿ. ಘೊಡ್ಯಾಂಕ್ ಬಾಂಧ್‍ಲ್ಲ್ಯಾ ಲಾಗ್ಸರ್‌ಚ್, ತಾಚೆಯೀ ಹಾತ್ ಬಾಂಧುನ್ ಧರ್ಣಿರ್ ತಾಕಾ ಉಡಯಿಲ್ಲೊ.

ದೊಳೆ ತಾಣೆಂ ಉಗ್ತೆ ಕೆಲೆ. ವಯ್ಲಿಂ ರೂಕ್ ಝಾಡಾಂ ಪಳೆವ್ನ್ ಆನಿ ಆಪ್ಲೆ ಹಾತ್, ಪಾಯ್ ಬಾಂಧುನ್ ಆಸ್‍ಲ್ಲೆ ಸಮ್ಜೊನ್ ತೊ ಅಜ್ಯಾಪ್ಲೊ ಆನಿ ಆಪುಣ್ ಕಾಂಯ್ ಸಪ್ಣೆತಾಂಗೀ ಮ್ಹಣ್ ಆಕಾಂತ್ಲೊ.

ಅಂತುಲ್ಯಾನ್ ತಾಕಾ ಉಟೊನ್ ಬಸಯ್ಲೊ.

“ಉ-ಉದಾಕ್” ಮ್ಹಣಾಲೊ ತೊ.

“ಧರ್, ಉದಾಕ್ ಹಾಂಗಾಸರ್ ಆಸಾ” ಮ್ಹಣಾಲೊ ಅಂತುಲೊ, ಹಾತಾಂತ್ಲಿ ತಾಂಬ್ಯಾಚಿ ಗಿಂಡಿ ಮುಖಾರ್ ಧರುನ್.

“ರಾವ್, ತಾಕಾ ಪಿಯೆಂವ್ಕ್ ದೀನಾಕಾ!” ತಾಕಿದ್ ದಿಲಿ ಸರ್ದಾರ್ ಸಿಮಾಂವ್ನ್. “ತಾಣೆಂ ತಾನೆಕ್ ಘೆಂವ್ಚ್ಯಾ ಆದಿಂ, ಆಮ್ಚ್ಯಾ ಥೊಡ್ಯಾ ಸವಾಲಾಂಕ್ ನೀಟ್ ಜವಾಬ್ ದೀಂವ್ಕ್ ಜಾಯ್.”

ಷೇರ್ ಖಾನಾಕ್ ಸರ್ದಾರ್ ಸಿಮಾಂವ್ಚಿ ವಳಕ್ ಮೆಳ್ಳಿ. ಭಿಯಾನ್ ಥರ್ಥರೊಂಕ್ ತೊ ಲಾಗ್ಲೊ. ಉಲಂವ್ಚ್ಯಾ ಖಾತಿರ್ ವೋಂಟ್ ತಾಣೆಂ ಲೆಂವ್ಲೆ. ಪುಣ್ ಉಲಂವ್ಕ್ ತೊ ಸಕನಾ ಜಾಲೊ.

“ತುವೆಂ ಉಲಂವ್ಚಿ ಗರ್ಜ್ ನಾ” ಮ್ಹಣಾಲೊ ಸರ್ದಾರ್ ಸಿಮಾಂವ್, ಜೊ ಆತಾಂ ಆಪ್ಲಿ ತಲ್ವಾರ್ ಭಾಯ್ರ್ ಕಾಡುನ್ ಷೇರ್ ಖಾನಾಚ್ಯಾ ಲಾಗಿಂ ರಾವ್‍ಲ್ಲೊ. “ಆಮ್ಚ್ಯಾ ಸವಾಲಾಂಕ್, ಪಾಟಿಂ ಫುಡೆಂ ಪಳೆನಾಸ್ತಾನಾ ಶೀದಾ ಜಾಪ್ ದೀ.”

“ಕಿ-ಕಿತೆಂ ತುಮ್ಕಾಂ ಜಾಯ್?”

“ಬೋಳೂರ್ ಠಾಣ್ಯಾಚೊ ಮಾಜಿ ಖಿಲ್ಲೆದಾರ್ ಫಕೀರ್ ಮಹಮ್ಮದ್ ಖಂಯ್ಸರ್ ಆಸಾ?”

“ಹಾ-ಹಾಂವ್ ನೆಣಾಂ!” ಪಿಂರ್ಗಲೊ ಕೈದಿ.

“ತುಂ ಜಾಣಾಂಯ್ – ಖಂಯ್ಸರ್ ತೊ ಆಸಾ?”

“ಹಾಂವ್ ನೆಣಾಂ!” ರಡ್ಲೊ ಷೇರ್ ಖಾನ್.

“ತುಂ ಜಾಣಾಂಯ್! ತುಜೆ ಕಡೆನ್ ಉತ್ರಾಂಚೊ ಖೆಳ್ ಖೆಳೊನ್ ವೇಳ್ ಪಾಡ್ ಕರುಂಕ್ ಆಮ್ಕಾಂ ಮನ್ ನಾ” ಸ್ವರ್ ಉಬಾರಿನಾಸ್ತಾಂ, ಸರ್ದಾರ್ ಸಿಮಾಂವ್ನ್ ಧೆಂಕ್ಣೊ ಮಾರ್ಲೊ. “ಸಾಂಗ್ – ಫಕೀರ್ ಮಹಮ್ಮದ್ ಖಂಯ್ಸರ್ ಆಸಾ?”

“ಹಾಂವ್ ಸತ್ತ್ ಉಲಯ್ತಾಂ – ಹಾಂವ್ ನೆಣಾಂ!”

“ಬರೆಂ ತರ್ – ತುಕಾ ಇಲ್ಲಿ ಜಾಣ್ವಾಯ್ ದಿವ್ಯಾಂ!” ಸರ್ದಾರ್ ಸಿಮಾಂವ್ನ್, ತಲ್ವಾರಿಚೆಂ ಪೋಂತ್ ದಾವ್ಯಾ ಹಾತಾಚ್ಯಾ ಚಿಮ್ಟೆನ್ ಧರುನ್, ಥೊರುಂ ಪರ್ಯಾಂತ್ ತೆಂ ಬಾಗಾವ್ನ್ ತಲ್ವಾರಿಚೆಂ ಆಟ್ಟೆಂ ತಾಣೆಂ ಕೆಲೆಂ. ಉಜ್ವೊ ಹಾತ್ ತಾಣೆಂ ನೀಟ್ ಕೆಲೊ, ಆನಿ ದಾವ್ಯಾ ಹಾತಾಚಿ ಚಿಮ್ಟಿ ತಾಣೆಂ ಸೊಡ್ಲಿ. ಖೊಂಚ್ ಮಾರ್‌ಲ್ಲ್ಯಾ ಜಿನ್ಸಾರ್ ತಾಚ್ಯಾ ಹಾತಾಂತ್ಲಿ ತಲ್ವಾರ್ ನೀಟ್ ಜಾಲಿ.

ತಲ್ವಾರಿಚ್ಯಾ ಧೊಮೊಸಾರ್ ಥೊಡೆಂ ರಗ್ತಾ ಖತ್ ಜಾಲೆಂ.

“ಮಾಂಯ್ – ಭೊಗೊಸ್!” ಷೇರ್ ಖಾನಾನ್ ಕಿಂಕ್ರಾಟ್ ದಿಲಿ. “ಸಿಞÉೂರ್ – ಮ್ಹಾಕಾ ಬೊಗೊಸ್! ಮ್ಹಜೊ ಜೀವ್ ವಾಂಚಯ್ – ತುಕಾ ಜಾಯ್ ತೆಂ ಸಾಂಗ್ತಾಂ! ಅಯ್ಯೋ!” ತಾಚೊ ದಾವೊ ಕಾನ್ ಸಗ್ಳೊ ಕಾತ್ರೊನ್, ಝಡೊನ್ ಧರ್ಣಿರ್ ಪಡ್ಲೊ. ತಾಚೆಂ ಕಾನ್ಸುಲ್ ರಗ್ತಾಳೆಂ ಜಾಲೆಂ.

“ತಶೆಂ ಉಲಯ್!” ಮ್ಹಣಾಲೊ ಸರ್ದಾರ್ ಸಿಮಾಂವ್. ತೊ ಆತಾಂ, ಪಾಟ್ಲೊ ಥೊಡೊ ಉಗ್ಡಾಸ್ ಯೇವ್ನ್ ಧಾರುಣ್ ಜಾಲ್ಲೊ. “ತುಜೊ ಜೀವ್ ಕಾಡ್ಚೆ ತಿತ್ಲಿ ಆಮ್ಕಾಂ ಗರ್ಜ್ ನಾ. ಪುಣ್, ಆಮಿ ವಿಚಾರ್‌ಲ್ಲ್ಯಾ ಸವಾಲಾಂಕ್ ಫಾವೊತಿ ಜಾಪ್ ತುಜೆ ಥಾವ್ನ್ ಮೆಳನಾತ್ಲ್ಯಾರ್, ತುಜೊ ಜೀವ್ ಉರಂವ್ಚೆ ತಿತ್ಲಿ ದಾಕ್ಷೆಣ್‍ಯೀ ಆಮ್ಕಾಂ ಆಸ್ಚಿ ನಾ – ಕಿತ್ಯಾಕ್, ತುವೆಂ ಥೊಡ್ಯಾಚ್ ದಿಸಾಂ ಆದಿಂ, ಅಧಿಕಾರ್ ನಾಸ್ತಾಂ, ಬೋಳೂರ್ ಠಾಣ್ಯಾಚೊ ಖಿಲ್ಲೆದಾರ್ ಮ್ಹಣ್ ಭೊಂವ್‍ಲ್ಲೆಂ, ಅಧಿಕಾರ್ ನಾಸ್ತಾಂ ಥೊಡ್ಯಾ ಸ್ತ್ರೀಯಾಂಕ್ ಅಪಹರ್ಸುಂಕ್ ಪ್ರಯತ್ನ್ ಕೆಲ್ಲೆಂ, ಆನಿ ಅಧಿಕಾರ್ ನಾಸ್ತಾಂ ಥೊಡ್ಯಾ ಘರಾಣ್ಯಾಂಚೆರ್ ಜುಲುಮ್ ಚಲಂವ್ಕ್ ಮನ್ ಕೆಲ್ಲೆಂ ಮಾತ್ರ್ ನಹಿಂ ಆಸ್ತಾಂ, ಕಾಲ್ಚ್ಯಾಚ್ ದಿಸಾ, ನಹಿಂ ಕಾಲ್ಚ್ಯಾ ರಾತಿಂ – ಆಮ್ಚಿ ಮತ್ ಚುಕವ್ನ್ ಉಪ್ರಾಂತ್ ಬಹುಶಃ ತುಕಾ ಜಾಯ್ ತಶೆಂ ಫಾರಿಕ್ಪಣ್ ಘೆಂವ್ಕ್ ಚಿಂತ್‍ಲ್ಲೆಂ – ತುಕಾ ಧಾ ಪಾವ್ಟಿಂ ಮೊರೊಂಕ್ ಪುರೊ! ಆತಾಂ ಬರ‍್ಯಾನ್ ಉಲಯ್ – ಕಿತೆಂ ಜಾವ್ಯೆತ್ ಹ್ಯಾ ಫಿತೂರೆಚೆಂ ಕಾರಣ್?”

“ನಾ-ನಾ…” ಪಿಂರ್ಗಲೊ ತೊ.

“ವ್ಹಯ್ – ಆತಾಂ ಉಲಯ್!” ಅಂತುಲ್ಯಾನ್ ಲಾಗಿಂ ಯೇವ್ನ್ ತಾಚ್ಯಾ ಕುಸಾಳಾಂಕ್ ಏಕ್ ಖೊಟ್ ಘಾಲಿ.

“ಅಯ್ಯೋ! ದಯಾ ಕರಾತ್!”

“ದಯಾ ಕರ್ತಾಂವ್, ಪುಣ್ ಉಲಯ್ – ತುಂ ಕೋಣ್ ಮ್ಹಳ್ಳೆಂ ಆಮಿ ಆತಾಂ ಜಾಣಾಂವ್. ತುವೆಂ ಸತ್ ಸಾಂಗೊನ್ ತುಜೊ ಕಿರ್ಕೊಳ್ ಜೀವ್ ವಾಂಚವ್ಯೆತ್. ನಾ ಜಾಲ್ಯಾರ್, ತುಜ್ಯಾ ಸರ್ವ್ ಅಪ್ರಾಧಾಂ ಖಾತಿರ್, ವಿಶೇಸ್ ರಾಜ್‍ದ್ರೋಹಿ ಆನಿ ಗುಪ್ತ್‌ಚಾರ್ ಮ್ಹಳ್ಳ್ಯಾ ಬದ್ಲಾಮಾಚೆರ್, ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ನಿತಿಕ್ ಉಬೊ ಜಾವ್ಯೆತ್.”

‘ಷೇರ್ ಖಾನ್’ ಪಿಂರ್ಗಲೊ ಮಾತ್ರ್. ಕಸಲೊ ಉಪಾಯ್ ಘೆವ್ನ್ ವಾ ಕಸಲಿ ಫಟ್ ಮಾರುನ್ ಜೀವ್ ವಾಂಚವ್ಯೆತ್ ವಾ ಚುಕವ್ನ್ ಧಾಂವ್ಯೆತ್ ಮ್ಹಣ್ ತೊ ಚಿಂತಾಲೊ ಜಾವ್ಯೆತ್.

“ಉಲಯ್‍ಗಾ!” ಅಂತುಲೊ ತಾಕಾ ಪರ್ತ್ಯಾನ್ ಖೊಟಾಂವ್ಕ್ ಫುಡೆಂ ಸರ್ಲೊ.

“ಅಯ್ಯೋ – ಉಲಯ್ತಾಂ!”

“ತುವೆಂ ವೆಗಿಂ ಉಲಂವ್ಚೆಂ ಬರೆಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಕಿತ್ಯಾಕ್ ಮ್ಹಳ್ಯಾರ್ – ಎದೊಳ್ ಆಮ್ಕಾಂ ಉಗ್ಡಾಸ್ ಯೇಂವ್ಕ್ ಚಿಕ್ಕೆ ಪಾಟಿಂ ಜಾಲ್ಯಾರೀ – ತುಂ ಕೋಣ್ ಮ್ಹಳ್ಳೆಂ ಆತಾಂ ಆಮಿ ಸ್ಪಷ್ಟ್ ಜಾಣಾಂವ್.”

“ಕೋಣ್ ಧನ್ಯಾ, ಹೊ ಬೇವಕೂಫ್?” ಅಂತುಲ್ಯಾನ್ ವಿಚಾರ್ಲೆಂ.

“ಹೊ ಬೇವಕೂಫ್ ಮಾತ್ರ್ ನಹಿಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಬಗಾರ್, ತಾಂಚ್ಯಾ ಪಿಳ್ಗೆಂತ್ಲೊ – ಮಾಲ್ಖ್ರಿಯಾದಾಂತ್ಲೊ ಅವ್ವಲ್ ಮಾಲ್ಖ್ರಿಯಾದ್! ಲಿಯಾಂವ್ ಜೋಸೆ ದಾಲ್ಮೇದಾ ತಾಚೆಂ ನೀಜ್ ನಾಂವ್! ಎಕಾ ಅರ್ಥಾನ್, ಘಾತ್ಕಿ ತೊಪಾಸಿಂಚೊ ಹೊ ಮುಖೆಲಿ ಮ್ಹಣ್ಯೆತ್!”

ತಶಿಂ ಉತ್ರಾಂ ಥುಕುನ್, ಸರ್ದಾರ್ ಸಿಮಾಂವ್ನ್ ವಿವರ್ ದಿಲೊ:

ವ್ಹಯ್. ಲಿಯಾಂವ್ ಜೋಸೆ ದಾಲ್ಮೇದಾ ಎಕ್ಲೊ ಅರ್ಧೊ ಫಿಂರ್ಗಿ ತೊಪಾಸಿ ಜಾವ್ನಾಸ್‍ಲ್ಲೊ. ತಾಚ್ಯಾ ಜಲ್ಮಾಚ್ಯಾ ಗುಣಾನ್ ಆನಿ ದೇಶೀ ವಿದೇಶೀ ಭಾಸಾಂಚ್ಯಾ ಜಾಣ್ವಾಯೆನ್, ಹೆರ್ ತೊಪಾಸಿಂಚೊ ಗುರ್ಕಾರ್ ಜಾವ್ನಾಸೊನ್, ಹೆರ್ ತೊಪಾಸಿಂಚ್ಯಾ ಫಾಯ್ದ್ಯಾಂತ್ ವಾಂಟೊ ಮೆಳಾ ಸಾರ್ಕೆಂ ಆಪ್ಲ್ಯಾ ರಾಟಾವಳಿಂಚೆಂ ಜಾಳ್ ತಾಣೆಂ ವಿಸ್ತಾರಾಯಿಲ್ಲೆಂ.ಆದಿಂ ಬಂಟ್ವಳಾಂತ್ ದೊತೊರ್ ಮರ್ಯಾಣ್, ಆನಿ ಥೊಡ್ಯಾ ತೆಂಪಾ ಆದಿಂ ಮಂಗ್ಳುರಾಂತ್ ತೊಪಾಸಿ ಜುವಾಂವ್ ಕಾರ್ಡೊಜ್, ತಾಚೆ ಪ್ರಮುಖ್ ದಲಾಲಿ ಜಾವ್ನಾಸ್‍ಲ್ಲೆ…

ಗೊಯಾಂತ್ ರಾವೊನ್ ಮರಾಠ್ಯಾಂಕ್ ಪುಡ್ತುಗೆಜಾಂಚೊ ಘುಟ್ ತೊ ವಿಕ್ತಾಲೊ ಮ್ಹಣ್ ಪುಡ್ತುಗೆಜ್ ಸರ್ಕಾರಾಕ್ ಕಳೊನ್ ಯೆತಚ್, ತಾಕಾ ಧರುನ್ ಉಮ್ಕಳಾವ್ನ್ ಮಾರುಂಕ್ ತ್ಯಾ ಸರ್ಕಾರಾನ್ ಗುಪಿತ್ ತಾಕಿದ್ ದಿಲಿ. ಹೆಂ ಕಳೊನ್ ಯೆತಚ್ ದಾಲ್ಮೇದಾ ಪುಣೆಕ್ ಪೊಳ್ಳೊ ಆನಿ ಮರಾಠ್ಯಾಂಚ್ಯಾ ತಂಬಾಂತ್ ರಾವೊನ್ ಘೊಳ್ಳೊ. ಹ್ಯಾ ವೆಳಾರ್ ದೇಶೀ ವಿದೇಶೀ ಸರ್ಕಾರಾಂ ಮಧೆಂ ಚಡ್ ದುಸ್ಮಾನ್ಕಾಯ್ ಉರಶಿ, ಆನಿ ತಶೆಂಚ್ ವಿದೇಶೀ ಆನಿ ಗಾಂವ್ಚ್ಯಾ ಪಾದ್ರಿಂ ಮಧೆಂ ಚೂಕ್ ಸಮ್ಜಣಿ ಚಡಶಿ ಶಿಂತ್ರ್ಯೊ ಖೆಳೊನ್ ಧನ್ ಪುಂಜಾಯಿಲ್ಲ್ಯಾಂ ಪಯ್ಕಿ ಅವ್ವಲ್ ಖಿಲಾಡಿ ತೊ ಜಾವ್ನಾಸ್‍ಲ್ಲೊ…

ತಸಲ್ಯಾ ವಹಿವಾಟಾಂತ್ ಏಕ್ ಪಾವ್ಟಿಂ, ಮರಾಠ್ಯಾಂ ಖಾತಿರ್ ಬೇಹುಗಿರಿ ಚಲಯ್ತಾನಾ, ಟಿಪ್ಪು ಸುಲ್ತಾನಾಚ್ಯಾ ಗುಪ್ತಚಾರಾಂಕ್ ತೊ ಸಾಂಪಡ್ಲೊ ಆನಿ ಪಟ್ಟಣಾಚ್ಯಾ ಜಯ್ಲಾಂತ್ ಶಿರ್ಕಲೊ. ಥಂಯ್ಸರ್ ತಾಚಿ ಝಡ್ತಿ ಜಾವ್ನ್ ತಾಕಾ ಫಾಶಿ ಜಾಂವ್ಕ್ ಆಸ್‍ಲ್ಲಿ…

ತಾಚಿ, ಹೆರಾಂ ಸಾಂಗಾತಾ ತನ್ಖಿ ಜಾತಾನಾ ಸರ್ದಾರ್ ಸಿಮಾಂವ್ನ್‌ಯೀ ತಾಚಿ ಖಬರ್ ಆಯ್ಕಲ್ಲಿ, ಆನಿ ಏಕ್ ದೋನ್ ಪಾವ್ಟಿಂ ತಾಕಾ ಪಳೆಲ್ಲೊ. ಪುಣ್ ಮರಾಠ್ಯಾಂಚೊ ಆನಿ ಪುಡ್ತುಗೇಜಾಂಚೊ ಚಡ್ ಘುಟ್ ತಾಚೆ ಥಾವ್ನ್ ಭಾಯ್ರ್ ಕಾಡಿಜಾಯ್ ಮ್ಹಣ್, ತಾಚೆರ್ ಮೊರ್ನಾಚೆಂ ಫರ್ಮಾಣ್ ಜಾರಿ ಕರಿನಾಸ್ತಾನಾ ಪಾಟಿಂ ಘಾಲ್ಲೆಂ. ತ್ಯಾ ಆಯಿನ್ನ್ ವೆಳಾರ್ ದಾಲ್ಮೇದಾನ್ ಪಹರೆಗಾರಾಂಕ್ ಲೋಂಚ್ ಖಾವವ್ನ್ ಆನಿ ವೇಸ್ ಬದ್ಲುನ್ ಚುಕಾರಿ ಮಾರ್ಲಿ…

ಟಿಪ್ಪುಚ್ಯಾ ಕ್ರೋಧಾಕ್ ಉಂಡಿ ಜಾವ್ನ್, ಜಯ್ಲಾಚ್ಯಾ ಕೊತ್ವಾಲಾಚೊ ಆನಿ ಪಾಂಚ್ ಜಣಾಂ ಪಹರೆಗಾರಾಂಚೊ ಜೀವ್ ಗೆಲೊ ಜಾಲ್ಯಾರೀ, ದಾಲ್ಮೇದಾ ಚುಕ್ಲೊ ತೊ ಚುಕ್ಲೊಚ್…

ಕೊಡಗಾಕ್ ತೊ ಪೊಳ್ಳಾ ಮ್ಹಳ್ಳಿ ಖಬರ್ ಮೆಳ್ತಚ್, ತಾಕಾ ಧರುನ್ ಫೈಸಲ್ ಕರುಂಕ್ ಥಂಯ್ಸರ್ ಟಿಪ್ಪು ಸುಲ್ತಾನಾಚೆ ಜಣ್ ಗುಪಿತ್ ಗೆಲೆ. ಪುಣ್ ತೊ ಸೊವ್ ಕಸೊಗೀ ಪಯ್ಲೊಚ್ ಆದ್ಳೊನ್ ದಾಲ್ಮೇದಾ ತಲ್ಚೇರಾಕ್ ಪರಾರಿ ಜಾಲಾ ಮ್ಹಣ್ ಕಳೊನ್ ಆಯ್ಲೆಂ. ಉಪ್ರಾಂತ್, ಗುಪ್ತಚರಾಂಚೊ ಮುಖೆಲಿ ಜಾವ್ನ್, ಕಣ್ಣಾನೂರ್‍ಚ್ಯಾ ಬೇಗಮೆ ಖಾಲ್ ಹುದ್ದೆದಾರ್ ತೊ ಜಾಲಾ ಮ್ಹಳ್ಳಿ ಖಬರ್ ಆಯಿಲ್ಲಿ. ಪುಣ್ ಕ್ರಮೇಣ್ ಟಿಪ್ಪು ಸುಲ್ತಾನಾಕ್ ಚಡ್ ವ್ಹಡ್ ರಾಟಾವಳಿಂಚೆಂ ಆನಿ ಝುಜಾಂಚೆಂ ವೊಜೆಂ ಮಾತ್ಯಾರ್ ಆಯಿಲ್ಲ್ಯಾನ್, ದಾಲ್ಮೇದಾಚಿ ಖಬರ್ ಸದ್ದ್ಯಾಕ್ ಬಗ್ಲೆನ್ ಉರ್‌ಲ್ಲಿ. ಪುಣ್ ದಾಲ್ಮೇದಾಚ್ಯೊ ಶಿಂತ್ರ್ಯೊ ಜಾಂವ್, ಹುತಾವಳಿ ಜಾಂವ್, ಬಾಕಿ ಉರೊಂಕ್ ನಾಂತ್ ಮ್ಹಳ್ಳೆಂ ಸ್ಪಷ್ಟ್ ಜಾಲ್ಲೆಂ.

ಸರ್ದಾರ್ ಸಿಮಾಂವ್ನ್ ಅಸೊ ದಿಲ್ಲೊ ವಿವರ್ ಆಯ್ಕೊನ್, ಅಂತುಲೊ ಆನಿ ರಾಮಪ್ಪ ವಿಜ್ಮಿತ್ ಪಾವ್ಲೆ.

“ತರ್ ಹಾಚೊ ಗಳೊ ಕಾಪುನ್ ಹಾಚಿ ಕಾಣಿ ಇತ್ಲ್ಯಾರ್ ಖತಮ್ ಕರ್ಯಾಂ ಧನ್ಯಾ” ಮ್ಹಣಾಲೊ ರಾಮಪ್ಪ. ನಿಜಾಯ್ಕೀ ಆಪ್ಲಿ ಕಾಣಿ ಕಾಬಾರ್ ಜಾಲಿ ಮ್ಹಣ್ ದಾಲ್ಮೇದಾನ್‍ಯೀ ಚಿಂತ್ಲೆಂ.

“ಪ್ರಭೋ” ರಡ್ಲೊ ತೊ. “ಮ್ಹಜಿ ಕಾಕುತ್ ಕರಾ… ಮ್ಹಜೊ ಜೀವ್ ಸಾಲ್ವಾರ್ ಕರಾ… ತುಮ್ಕಾಂ ಉಪ್ಕಾರಾಕ್ ಪಡ್ಚೆ ವಿಷಯ್ ಹಾಂವ್ ಸತ್ತ್ ಸಾಂಗ್ತಾಂ.”

“ಆಮ್ಕಾಂ ಉಪ್ಕಾರಾಕ್ ಪಡ್ಚೆ ವಿಷಯ್!” ಹಾಸ್ಲೊ ಸರ್ದಾರ್ ಸಿಮಾಂವ್, ಸಂತೊಸಾ ವಿಣೆಂ. “ಆಸೊಂ. ತುಜ್ಯಾ ಆವ್ಕಾಕ್ ಆನಿ ಥೊಡಿ ಲಾಂಬಾಯ್ ಆಮಿ ದಿತಾಂವ್. ಆಮಿ ವಿಚಾರ್‌ಲ್ಲ್ಯಾ ಸವಾಲಾಕ್ – ಎಕಾಚ್ ಸವಾಲಾಕ್ ಜಾಪ್ ದೀ.”

“ವಿಚಾರ್ಯಾ ಪ್ರಭೋ, ವಿಚಾರ್ಯಾ. ಉಪ್ರಾಂತ್ ಪಾರ್ಕಿಯಾ.”

“ಭೋವ್ ಬರೆಂ” ಮ್ಹಣಾಲೊ ಸರ್ದಾರ್ ಸಿಮಾಂವ್, ಆನಿ ಮತಿಕ್ ಆಯಿಲ್ಲೆಂ ಪಯಿಲ್ಲೆಂ ಸವಾಲ್ ತಾಣೆಂ ವಿಚಾರ್ಲೆಂ: “ಮಾನಿನ್ ವೆರೊನಿಕಾ ಕುವೆಲ್ ಖಂಯ್ಸರ್ ಆನಿ ಕಿತ್ಯಾ ಖಾತಿರ್ ಆಸಾ?”

“ತಿ-ತಿ” ಉಸ್ವಾಸ್ಲೊ ದಾಲ್ಮೇದಾ. “ಕಣ್ಣಾನೂರ್ ಬೇಗಮೆಚ್ಯಾ ರಾವ್ಳೆರಾಂತ್ ಆಸಾ. ಫಕೀರ್ ಮಹಮ್ಮದಾ ಕಡೆನ್, ಕಬ್ಲತ್ ಆಸೊನ್, ನಹಿಂ ಜಾಲ್ಯಾರ್ ಜಬರ್ದಸ್ತೆನ್ ಕಾಜಾರ್ ಕರುಂಕ್ ತಿಕಾ ವ್ಹೆಲ್ಯಾ.”

ಸರ್ದಾರ್ ಸಿಮಾಂವ್ಚಿಂ ನಾಕಾ ಬುಡಾಂ ಫುಲ್ಲಿಂ. ತಾಚ್ಯಾ ದೊಳ್ಯಾಂನಿ ಕಿಟಾಳಾಂ ಝಳ್ಕೊನ್ ಪಾಶಾರ್ ಜಾಲಿಂ.

“ತುವೆಂ ಸಾಂಗ್ಚೆಂ ಸತ್‍ಮೂ?” ವಿಚಾರ್ಲೆಂ ತಾಣೆಂ.

“ಬಿಲ್ಕುಲ್ ಸತ್” ತಾಕಾ ಜಾಪ್ ಮೆಳ್ಳಿ.

“ಜಾಯ್ತ್ ತರ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಆಯ್ಚ್ಯಾ ಮಟ್ಟಾಕ್, ಆನಿ ತುವೆಂ ಸಾಂಗ್‍ಲ್ಲ್ಯಾ ಉತ್ರಾಚಿ ರುಜ್ವಾತ್ ಆಮ್ಕಾಂ ಮೆಳ್ತಾ ಪರ್ಯಾಂತ್ ತುಜೊ ಜೀವ್ ಆಮಿ ದಾನ್ ದಿತಾಂವ್.”

“ಆನಿ ಜರ್ ಹಾಂವೆಂ ಸಾಂಗ್‍ಲ್ಲೆಂ ಸತ್ ಮ್ಹಣ್ ಜಾಲೆಂ, ತರ್…”

“ತರ್ ಕಿತೆಂ ಮ್ಹಳ್ಳೆಂ ಉಪ್ರಾಂತ್ ಸಾಂಗ್ತಾಂ. ತೆದೊಳ್ ಪರ್ಯಾಂತ್ -ಥೊಡ್ಯಾ ದಿಸಾಂಕ್ – ಆಮ್ಚೊ ಕೈದಿ ಜಾವ್ನ್ ತುವೆಂ ರಾವಜಾಯ್.”

“ತುಮ್ಚೊ ಉಪ್ಕಾರ್!” ಮ್ಹಣಾಲೊ ದಾಲ್ಮೇದಾ. ಥೊಡ್ಯಾ ದಿಸಾಂಕ್ ಪುಣೀ ಜೀವ್ ವಾಂಚ್ಲೊ. ತಿತ್ಲ್ಯಾ ವೆಳಾ ಭಿತರ್ ಹೆರ್ ಜಾಯ್ತೆಂ ಘಡ್ಯೆತ್ ಮ್ಹಣ್ ಚಿಂತುನ್ ತೊ ಖುಷಿ ಪಾವ್ಲೊ.

ಕಣ್ಣಾನೂರ್‍ಚಿ ಖಬರ್ ಆಯ್ಕೊನ್, ಸರ್ದಾರ್ ಸಿಮಾಂವ್ ಶೀದಾ ಥಂಯ್ಸರ್ ವೆತಲೊ. ಗೆಲ್ಯಾರ್, ಜಿವಂತ್ ಪಾಟಿಂ ತೊ ಯೇಂವ್ಕ್ ಸಕ್ಚೊ ನಾ ಮ್ಹಣ್ ದಾಲ್ಮೇದಾನ್ ಚಿಂತ್ಲೆಂ.

ಸರ್ದಾರ್ ಸಿಮಾಂವ್ಕ್ ಹೆಂ ಸಮ್ಜಲೆಂ.

“ರಾಮಪ್ಪ, ತುಜಿ ಪೊಟ್ಲಿ ಘೆವ್ನ್ ಮ್ಹಜ್ಯಾ ಸಾಂಗಾತಾ ಪಯ್ಯನೂರ್ ಛತ್ರಾಕ್ ಯೇ” ಮ್ಹಣಾಲೊ ತೊ. ಉಪ್ರಾಂತ್ ಅಂತುಲ್ಯಾಕ್ ಪಳೆವ್ನ್: “ಹ್ಯಾ ಮನ್ಶ್ಯಾಚಿ ಆನಿ ಆಮ್ಚ್ಯಾ ಘೊಡ್ಯಾಂಚಿ ಬರಿ ಜತನ್ ಘೆ. ರಾಮಪ್ಪಾಕ್ ವೆಗಿಂ ಪಾಟಿಂ ಧಾಡ್ತಾಂ, ಆನಿ ಸಾಂಗೊನ್ ಧಾಡ್ತಾಂ” ಮ್ಹಣಾಲೊ. ಅಂತುಲೊ ಪಡ್ವಳ್ ಘಾಬರ್ಲೊ, ಪುಣ್ ಥಂಡ್ ರಾವ್ಲೊ.

ಥೊಡ್ಯಾ ವೆಳಾನ್ ಸರ್ದಾರ್ ಸಿಮಾಂವ್ ಆನಿ ರಾಮಪ್ಪ, ಪಯ್ಯನೂರ್‍ಚಿ ವಾಟ್ ಧರುನ್ ಗೆಲೆ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel