ಇಂಫೆರ್ನಾಚಿಂ ದಾರಾಂ – 2: ಇಂಫೆರ್ನಾಚ್ಯಾ ದಾರಾಂಚೆಂ ಖುಣ್

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 2
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 2: ಇಂಫೆರ್ನಾಚ್ಯಾ ದಾರಾಂಚೆಂ ಖುಣ್

ದುಸ್ರೊ ದೀಸ್ ಸುಕ್ರಾರ್. ಸರ್ದಾರ್ ಸಿಮಾಂವ್ನ್ ತ್ಯಾ ದಿಸಾ, ಟಿಪ್ಪು ಸರ್ದಾರಾಚ್ಯಾ ಹುಕ್ಮೆ ಪ್ರಕಾರ್ ವಿಶೆವ್ ಘೆತ್ಲೊ. ಭಾಯ್ಲ್ಯಾ ದೆಖಿಕ್, ಕೂಡ್ ತಾಚಿ ವಿಶೆವ್ ಘೆತಾಲಿ ಖರಿ, ಪುಣ್ ಮತ್ ತಾಚಿ ಚಿಂತ್ನಾಂನಿ ಉಚಾಂಬಳ್ ಜಾಲ್ಲಿ.

‘ಸರ್ದಾರಾಂಚಿ ಸಿನೊಲ್ ಶೆವಟಿಂ ತರೀ ಜಯ್ತೆವಂತ್ ಜಾತೆಲಿ ಖರಿ. ಪುಣ್ ತ್ಯಾ ಜಯ್ತಾ ಖಾತಿರ್, ಕೆನರಾ ಕ್ರಿಸ್ತಾಂವ್ ಸಮಾಜೆಂತ್, ಪಾಟ್ಲ್ಯಾ ದೋನ್ ವರ್ಸಾಂ ಪ್ರಾಸ್ ಚಡ್, ಜೀವ್ ಕಾತ್ರೊಂಕ್, ರಗ್ತಾಂ-ದುಖಾಂ ವ್ಹಾಳೊಂಕ್ ಆನಿ ಘರಾಂ-ದಾರಾಂ ಪರ್ತೊಂಕ್ ಆಸ್ಯೆತ್’ ಮ್ಹಳ್ಳಿ ಭವಿಷ್ಯ್ ವಾಣಿ, ಪರತ್ ಪರತ್, ತಾಚ್ಯಾ ಧ್ಯಾನಾಚೆರ್ ಆಪ್ಟತಾಲಿ…

ಜಾಂವ್ಕ್‌ಯೀ ವ್ಹಯ್: ಸಿನೊಲೆಚ್ಯಾ – ಖುರ್ಸಾಚ್ಯಾ ಅನಂತ್ ಜಯ್ತಾ ಖಾತಿರ್, ಕ್ರಿಸ್ತಾನ್‍ಂಚ್ ಆಪ್ಲೊ ನಿಮಾಣೊ ರಗ್ತಾಚೊ ಥೆಂಬೊ ಪರ್ಯಾಂತ್ ವ್ಹಾಂವವ್ನ್, ಜೀವ್ ಲೆಗುನ್ ದಿಲ್ಲೊ ಜಾಲ್ಯಾರ್, ಆಮಾ ಪಾಪಿಯಾಂಚ್ಯಾ ಕಷ್ಟಾಂತ್‍ಯೀ ತೆಂ ಜಯ್ತ್ ಆಟಾಪ್ತಾ. ತರ್, ತಸಲೊ ತ್ಯಾಗ್ ಕರ್ನ್ ಆನಿ ತಸಲೆಂ ಮಾಡ್ತಿರ್ಪಣ್ ಭೊಗುನ್, ಭಾವಾರ್ಥಾಚೆಂ ಬೊಂದೆರ್ ಊಂಚ್ ಉಬಾರ್ಚೊ ಉಲೊ ಕೆನರಾ ಕ್ರಿಸ್ತಾಂವಾಂಕ್ ಆಯ್ಲೊ ಜಾಲ್ಯಾರ್ – ತೆಂ ತಾಂಚೆಂ ಭಾಗ್‍ಚ್ ಸಯ್… ಖರೆಂ, ಪುಣ್ ಸಂಸಾರಿ ಆನಿ ಸಾಮಾಜಿಕ್ ದೃಷ್ಟೆನ್ ತೆಂ ಏಕ್ ವರ್ತೆಂ ದುರ್ಭಾಗ್, ತಶೆಂ, ಚಾರಿತ್ರಿಕ್ ಅನ್ವಾರ್‌ಯೀ ವ್ಹಯ್.

‘ತಸಲ್ಯಾ ವೆಳಾರ್, ಜಿವಾಂಚಿ ಜಾಂವ್, ಸುಖಾಚಿ ಪರ್ವಾ ಕರಿನಾಸ್ತಾಂ ಸಮಡ್ತಿಚಿ ಆನಿ ಸಮಾಜೆಚಿ ಸೆವಾ ಕರ್ತೆಲ್ಯಾ ಥೊಡ್ಯಾ ವೀರ್ ಸ್ತ್ರೀ-ಪುರುಷಾಂ ಸಾಂಗಾತಾ ಮ್ಹಜೊಯೀ ಜೀವ್ ಗಾಂಚ್ ಜಾವ್ನ್ ವಾಂಚ್ಲಾ’ – ಚಿಂತ್ಲೆಂ ಸರ್ದಾರ್ ಸಿಮಾಂವ್ನ್, ‘ಪುಣ್ ತೆವ್ಶಿಲ್ಯಾನ್ ಟಿಪ್ಪುಚೊ ಸರ್ದಾರ್ ಜಾವ್ನ್ ತಾಚೆ ಖಾತಿರ್ – ತಾಣೆಂ ದಿಲ್ಲ್ಯಾ ಹುಕ್ಮೆ ಪ್ರಕಾರ್’ ಹಾಂವೆಂ ಜಿಕಜಾಯ್. ಹೆವ್ಶಿಲ್ಯಾನ್ ಆಮ್ಚ್ಯಾ ಪುರ್ವಜಾಂಚ್ಯಾ ಭಾವಾರ್ಥಾ ಖಾತಿರ್‌ಯೀ ಹಾಂವೆಂ ಜಿಕಜಾಯ್… ಹೆಂ ಕಿತ್ತುನ್ ಪರ್ಯಾಂತ್ ಸಾಧ್ಯ್ ಜಾವ್ಯೆತ್?’

ಸಾಹಸ್ ಆನಿ ವೀರ್ ಕೃತ್ಯಾಂ, ಸರ್ದಾರ್ ಸಿಮಾಂವ್ಚ್ಯಾ ಜಿಣಿಯೆಂತ್ ಭುಕ್ ಆನಿ ಆಹಾರ್ ತಶಿಂ ಜಾವ್ನಾಸ್‍ಲ್ಲಿಂ. ಕಸಲ್ಯಾಯೀ ಪರಿಸ್ಥಿತೆಂತ್, ಮೊರ್ನಾಕ್ ಭಿಯೆಲ್ಲೊ ಗ್ರಾಯ್ಕ್ ತೊ ನಹಿಂ. ಗರ್ಜ್ ಪಡ್ಲ್ಯಾರ್, ತಾಣೆಂ ಆದ್ಲ್ಯಾ ದಿಸಾ ಪಳೆಲ್ಲ್ಯಾ – ಮೊಬ್ಲಿ ಆಂತೊನ್ ಶೆಣೈಚ್ಯಾ – ಮೊರ್ನಾ ತಸಲಿ ಸಾಕ್ಸ್ ದೀಂವ್ಕ್‌ಯೀ ತೊ ಆಯ್ತೊ ಆಸ್‍ಲ್ಲೊ. ಜಾಲ್ಯಾರೀ, ಸಾಹಸಾಂತ್ ಸಲ್ವೊನ್ ಆನಿ ಸಾಂಪ್ಡೊನ್ ಲಜೆ ಭಿಕಾರಿ ಜಾವ್ನ್ ಮೊರೊಂಕ್ ತಾಕಾ ನಾಕಾ ಆಸ್‍ಲ್ಲೆಂ. ತಶೆಂ ಜಾಲ್ಯಾರ್, ಆಪ್ಣಾಚೆರ್ ಪಾತ್ಯೆವ್ನ್ ಆಸ್‍ಲ್ಲ್ಯಾಂಚೊ ಅರ್ಧ್ಯಾರ್ ಹಾತ್ ಸೊಡ್‍ಲ್ಲೆಪರಿಂ ಜಾಯ್ತ್ ಮ್ಹಣ್ ತಾಕಾ ಭೊಗ್ತಾಲೆಂ.

ತಾಚ್ಯಾ ಅಶಾಂತ್ ಮನಾಂತ್ ಅಸಲಿಂ ಚಿಂತ್ನಾಂ ಹುತಾವಳ್ ಕರ್ನ್ ಆಸ್ತಾನಾ, ತ್ಯಾಚ್ ದಿಸಾ, ಗುಪಿತ್ ಥರಾನ್ ತಾಕಾ ದೋಗ್ ಜಣ್ ಭೆಟೊಂಕ್ ಆಯ್ಲೆ. ಪಯ್ಲೆಂ ಆಯಿಲ್ಲೊ ಗ್ರಾಯ್ಕ್ ಮಾನೆಸ್ತ್ ಸಾಲ್ವದೊರ್ ಪೀಂತ್, ಟಿಪ್ಪುಚ್ಯಾ ರಾವ್ಳೆರಾಂತ್ ಕಾರಖೂನ್ ಹುದ್ದೆದಾರ್, ಆನಿ ಭಾವ್, ಮಂಗ್ಳುರಾಂತ್ ಬಹಿಷ್ಕಾರ್ ಪಡೊನ್, ಪೊಕ್ರಿಪಣಾಂ ಆಧಾರ್ಚ್ಯಾ ದುಮ್ಗಾ ಪಿಂತಾಚೊ!

“ದೇವ್ ಬರೊ ದೀಸ್ ದೀಂವ್, ಸರ್ದಾರ್ ಸಿಮಾಂವ್.”

“ತುಕಾಯೀ ದೀಂವ್ ಮಾನೆಸ್ತ್ ಪೀಂತ್… ಕಿತೆಂ, ಅಪೇಕ್ಸುಂಕ್ ನಾತ್‍ಲ್ಲಿ ಹಿ ಅವ್ಚಿತ್ ಭೆಟ್?”

ಸಾಲ್ವದೊರ್ ಪೀಂತ್ ಬಸ್ಲೊ. ಚಿಂತೇಸ್ತ್ ಆನಿ ಭಿಯೆಲ್ಲೆಪರಿಂ, ಹ್ಯಾ ಭೆಟೆಕ್, ಗುಪಿತ್ ಆಯಿಲ್ಲೆಪರಿಂ ತೊ ದಿಸ್ತಾಲೊ.

“ಸರ್ದಾರ್ ಸಿಮಾಂವ್” ಮ್ಹಣಾಲೊ ತೊ. “ಬಾದಶಹಾಚ್ಯೆ ಹುಕ್ಮೆನ್, ತುಂ ಪರತ್ ಮಂಗ್ಳುರಾಕ್ ಪಾಟಿಂ ವೆತಾಯ್ ಮ್ಹಣ್ ಹಾಂವೆಂ ಆಯ್ಕಲೆಂ…”

“ತಶೆಂ ಕೊಣೆಂ ಸಾಂಗ್ಲೆಂ?”

“ಖುದ್ದ್ ಬಾದಶಹಾನ್‍ಂಚ್!”

“ಮತ್ಲಬ್?” ವಿಚಾರ್ಲೆಂ ಸರ್ದಾರ್ ಸಿಮಾಂವ್ನ್. ತಾಚ್ಯಾ ಮತಿಕ್ ಆಜೂನ್ ಸಮಾಧಾನ್ ನಾತ್‍ಲ್ಲೆಂ.

“ಮತ್ಲಬ್ ಕಾಂಯ್ ನಾ… ಪುಣ್ ಮ್ಹಜ್ಯಾ ಮತಿಕ್ ಕಸಲೆಂಚ್ ಸಮಾಧಾನ್ ನಾ. ಕಾಲ್ ರಾತಿಂ, ಬಾದಶಹಾನ್ ಮ್ಹಾಕಾ ಆಪಂವ್ಕ್ ಧಾಡ್ಲೊ. ಭಿಯಾನ್ ಹಾಂವ್ ಗೆಲೊಂ.”

“ವಿವರ್ಸಿ” ಮ್ಹಣಾಲೊ ಸರ್ದಾರ್ ಸಿಮಾಂವ್. ತಾಚಿ ಮತ್ ಚುರುಕ್ ಜಾಲಿ. ತಾಚೊ ದುಬಾವ್ ಚಡ್ ಜಾಲೊ.

“ತಾಣೆಂ ಮ್ಹಾಕಾ ಆಪಂವ್ಕ್ ಧಾಡ್ಲೊ. ಹಾಂವ್ ಥಂಯ್ ಪಾವ್ತಚ್, ದುಮ್ಗಾಚಿ, ಮ್ಹಜ್ಯಾ ಭಾವಾಚಿ, ಖಬರ್ ತೊ ಉಲಯ್ಲೊ.”

“ದುಮ್ಗಾಚಿ? ಮಾನೆಸ್ತ್ ದುಮ್ಗಾ ಪಿಂತಾಚಿ? ಕಿತೆಂ ಖಂಯ್?” ವಿಚಾರ್ಲೆಂ ಸರ್ದಾರ್ ಸಿಮಾಂವ್ನ್. ಪಾಟ್ಲ್ಯಾ ದೋನ್ ಹಫ್ತ್ಯಾಂನಿ ಘಡೊನ್ ಗೆಲ್ಲೆ ವಿಷಯ್… ದೃಶ್ಯಾ ಪಾಟ್ಲ್ಯಾನ್ ದೃಶ್ಯ್… ತಾಚ್ಯಾ ಮತಿಂತ್ ಖೆಳೊನ್ ದಿಸ್ಲೆ.

“ದುಮ್ಗಾ ವಿಷಯಾಂತ್, ಬಾದಶಹಾನ್ ಜಾಯ್ತ್ಯೊ ಗಜಾಲಿ ಆಯ್ಕಲ್ಯಾತ್ ಖಂಯ್” ಮ್ಹಣಾಲೊ ಸಾಲ್ವದೊರ್ ಪೀಂತ್, ಖಂತಿನ್. “ತಾಕಾ ತಡೀಪಾರ್ ಕೆಲ್ಲಿ ಹುಕುಮ್ ಆಸ್ಲ್ಯಾರೀ, ಮಂಗ್ಳುರಾ ಭಿತರ್‌ಚ್ ರಾವೊನ್, ತಾಣೆಂ, ಸರ್ಕಾರಾ ವಿರೋಧ್ ಕರ್ಚೆ ಅತ್ಯಾಚಾರ್ ಚಡ್ ಜಾತಾತ್ ಖಂಯ್… ದೆಕುನ್, ಹ್ಯಾ ಉಪ್ರಾಂತ್, ಸರ್ಕಾರಾಚ್ಯಾ ವಿರೋಧ್ ಜಾಂವ್, ಹೆರ್ ಖಂಯ್ಚ್ಯಾಯೀ ಥರಾನ್, ತಾಚಿಂ ಪೊಕ್ರಿಪಣಾಂ ಆಯ್ಕೊಂಕ್ ಮೆಳ್ತಿತ್ ಜಾಲ್ಯಾರ್, ಬಾದಶಹಾ – ಪಾಟಿಂ ಫುಡೆಂ ಪಳೆನಾಸ್ತಾಂ ಮ್ಹಾಕಾ ಫಾಶಿ ದಿತಾ ಖಂಯ್..!”

“ತಶೆಂ ಫರ್ಮಾಣ್ ಆದಿಂಯೀ ಆಸ್‍ಲ್ಲೆಂ.”

“ತಿತ್ಲೆಂಚ್ ನಹಿಂ, ಕಾವೂರಾಂತ್ ಆಸ್ಚ್ಯಾ ಆಮ್ಚ್ಯಾ ಘರಾಚೆರ್ ಎದೊಳ್ ಆಸ್‍ಲ್ಲಿ, ಭದ್ರತೆಚಿ ಹುಕುಮ್ ತೊ ರದ್ದ್ ಕರ್ತಾ ಖಂಯ್!”

“ಸಮ್ಜಲೆಂ!”

“ತಶೆಂ ಮ್ಹಳ್ಯಾರ್ – ಆತಾಂ ಮಾಂಯ್ ಸರ್ಲ್ಯಾ – ಮ್ಹಜ್ಯಾ ಭಾಚಿಯೆಕ್, ಇಜ್ಜಾಕ್, ಶಿಪಾಯ್ ಧರ್ನ್ ವ್ಹರ್ತೆಲೆ ಆನಿ ಜಾಯ್ ತಶೆಂ ಅಕ್ರಮ್ ಚಲಯ್ತೆಲೆ!”

“ಮಾನೆಸ್ತ್ ಪೀಂತ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಗರ್ಜೆ ಶಿವಾಯ್ ತಕ್ಲಿ ತಾಪಯ್ನಾಕಾ. ಬಾದಶಹಾನ್ ಮ್ಹಣ್ಚೆಂ ಸಾರ್ಕೆಂಚ್.”

“ತರೀ, ತುಕಾ ಸಮ್ಜನಾಂಗೀ ಸರ್ದಾರ್ ಸಿಮಾಂವ್?”

“ಸಮ್ಜತಾ.. ಸಾರ್ಕೆಂ ಉಲಂವ್ಚೆಂ ಜಾಲ್ಯಾರ್, ತುವೆಂ ಆನಿ ಕಾಂಯ್ ಸಾಂಗ್ಚಿ ಗರ್ಜ್ ನಾ” ಮ್ಹಣೊನ್, ಸರ್ದಾರ್ ಸಿಮಾಂವ್, ಆಪ್ಲ್ಯಾ ಆವರಾಚ್ಯಾ ದಾರಾ ಕಡೆನ್ ವಚೊನ್, ಚತ್ರಾಯೆನ್ ಭಾಯ್ರ್ ಪಳೆವ್ನ್, ಭಿತರ್ ಆಯ್ಲೊ. ತ್ಯಾ ತೆಂಪಾರ್ ವೊಣ್ತಿಂಕ್‍ಯೀ ಕಾನ್ ಆಸ್‍ಲ್ಲೆ.

“ತರ್” ಪಿಂರ್ಗಲೊ ಸಾಲ್ವದೊರ್ ಪೀಂತ್. “ತುಂ ಕಸೊಯೀ ಗಾಂವಾಕ್ ಪಾಟಿಂ ವೆತಾಯ್… ಕಶೆಂ ಪುಣೀ ದುಮ್ಗಾಕ್ ಹಿ ಗಜಾಲ್ ಸಮ್ಜವ್ನ್, ತಾಣೆಂ ತಡೀಪಾರ್ ರಾವಶೆಂ…”

“ತಶೆಂ ಹಾಂವೆಂ, ಹ್ಯಾ ಆದಿಂಚ್ ಸಾಂಗೊನ್ ಜಾಲಾಂ” ಮ್ಹಣಾಲೊ ಸರ್ದಾರ್ ಸಿಮಾಂವ್ ಮಧೆಂಚ್. “ತುಜ್ಯಾ ಜಿವಾಚ್ಯಾ ಭದ್ರತೆ ಖಾತಿರ್ ಪುಣೀ ತೊ ಚತ್ರಾಯ್ ಘೆತಲೊ ಮ್ಹಳ್ಳೊ ವಿಶ್ವಾಸ್ ಮ್ಹಾಕಾ ಆಸಾ.”

“ಆನಿ ಆಮ್ಚ್ಯಾ ಭಾಚಿಯೆಚೊ, ಇಜ್ಜಾಚೊ ವಿಷಯ್, ಹ್ಯಾ ಆದಿಂ ಏಕ್ ಪಾವ್ಟಿಂ ತುವೆಂ ತಾಕಾ…”

“ಆಸೊಂದಿ… ಇಜಾಬೆಲ್ ತೆರೆಜಾ ವಿಷ್ಯಾಂತ್, ಹಾಂವೆಂ ಕಿತೆಂ ಕರಿಜಾಯ್ ಮ್ಹಣ್ಚೆಂ ತುವೆಂ?”

“ತೆಂಚ್ ಮ್ಹಾಕಾ ಸಮ್ಜನಾ. ಯೆವಾಂಚ್ಯಾ ತಾಣೆಂ ಥೊಡೊ ಕಾಳ್ ಘರಾಂತ್ಲೆಂ ಪಯ್ಸ್ ಲಿಪೊನ್ ರಾಂವ್ಚೆಂ ಬರೆಂ.”

“ಬರೆಂ ತರ್. ಹಾಂವ್ ಗಾಂವಾಕ್ ಗೆಲ್ಲ್ಯಾ ವೆಳಾರ್ ತ್ಯಾ ಸಂಬಂಧಿಂ ಕಿತೆಂ ತರೀ ವ್ಯವಸ್ಥಾ ಕರಿನ್.”

“ತುಕಾ ದೇವ್ ರಾಕೊಂದಿ, ಆನಿ ಬರೆಂ ಕರುಂದಿ, ಸರ್ದಾರ್ ಸಿಮಾಂವ್!” ಮ್ಹಣೊನ್ ಸಾಲ್ವದೊರ್ ಪೀಂತ್ ಭಾಯ್ರ್ ಗೆಲೊ.

ಥೊಡ್ಯಾಚ್ ವೆಳಾನ್, ಸರ್ದಾರ್ ಯೂಸುಫ್ ಆಲಿ ಆಯ್ಲೊ.

“ಅಲ್ಲಾಚೆಂ ಸಮಾಧಾನ್ ತುಕಾ, ದೋಸ್ತ್ ಭಾಯೀ” ಮ್ಹಣಾಲೊ ತೊ.

“ತುಕಾಯೀ ತೆಂಚ್, ಯೂಸುಫ್ ಭಾಯೀ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಕಿತೆಂ ವಿಶೇಸ್?”

“ತುವೆಂ ಫಿರ್ಚೆ ಕಡೆನ್ ಕಿತೆಂ ತರೀ ವಿಶೇಸ್ ಆಸ್ತೆಲೆಂಚ್.”

“ಮತ್ಲಬ್?”

ಯೂಸುಫ್ ಆಲಿನ್, ತಕ್ಷಣ್ ಜಾಪ್ ದಿಲಿ ನಾ. ಬದ್ಲಾಕ್, ಕಮರ್‍ಬಾಂಧಾಂತ್ಲಿ ತಲ್ವಾರ್ ವಾಂಕ್ಡಿ ನಿಸ್ರಾವ್ನ್, ಸರ್ದಾರ್ ಸಿಮಾಂವ್ ಸರ್ಶಿನ್ ತೊ ಬಸ್ಲೊ.

“ನಾ ಸಮಾಧಾನ್… ತಶೆಂ ಜಾಲಾಂ ಮ್ಹಜೆಂ ಮನ್” ಮ್ಹಣಾಲೊ ತೊ, ದೊಳೆ ಘುಂವ್ಡಾವ್ನ್.

“ಕಾರಣ್ ಜಾಣಾಂಯ್ವೇ – ಕಿತ್ಯಾಕ್ ಮ್ಹಣ್?”

“ತುಕಾ ಹಾಂವೆಂ, ಥೊಡ್ಯಾಚ್ ದಿಸಾಂ ಆದಿಂ, ಕುರಿಯೆಲಾಂತ್ ಆಸ್ತಾನಾ ಸಾಂಗ್‍ಲ್ಲೆಂ” ಮ್ಹಣಾಲೊ ಸರ್ದಾರ್ ಯೂಸುಫ್, ಹಾಳ್ವಾಯೆನ್. “ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ಸರ್ಕಾರಾಂತ್ ಹುದ್ದೆದಾರ್ ಜಾವ್ನಾಸ್ಚೆಂಚ್ ಏಕ್ ಜುಗಾರ್.”

“ವ್ಹಯ್, ತ್ಯಾ ಜುಗಾರೆಂತ್ ಎದೊಳ್ ಹಾಂವ್ ಜಿಕ್ಲಾಂ… ಅಲ್ಲಾನ್ ಆಮ್ಕಾಂ ರಾಕ್ಲಾಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. ತರೀ, ಮತಿ ಭಿತರ್ ‘ಜುಗಾರ್’ ಮ್ಹಳ್ಳೊ ಸಬ್ದ್ ಆಯ್ಕತಾನಾ ತೊ ಲಜೆತಾಲೊ. ಕಿತ್ಯಾಕ್, ಲಾಗಿಂ ಅಡೇಜ್ ವರ್ಸಾಂ ಆದಿಂ, ಸರ್ದಾರ್ ಆಂತೊನ್ ಪಾವ್ಲ್ ಶೆಟಿ ಕಡೆನ್ ‘ಜುಗಾರ್’ ಖೆಳೊನ್, ಜಾಲ್ಲ್ಯಾ ಕಿತಾಫತೆಚೊ ತಾಕಾ ಉಗ್ಡಾಸ್ ಯೆತಾಲೊ ಆನಿ ಪಶ್ಚಾತ್ತಾಪ್ ಭೊಗ್ತಾಲೆಂ.

“ವ್ಹಯ್, ಅಲ್ಲಾನ್‍ಂಚ್ ಆಮ್ಕಾಂ ರಾಕ್ಲಾಂ – ತುಜಿ ಸಟ್ವಿ ಬರಿ ಆಸಾ” ಮ್ಹಣಾಲೊ ಸರ್ದಾರ್. “ಪುಣ್ ಹರ್ಯೆಕಾ ಬರ‍್ಯಾ ವಿಷಯಾಕ್‍ಯೀ ಅಂತ್ಯ್ ಆಸಾ ದೆಕುನ್, ಆತಾಂ ಮ್ಹಾಕಾ ಖಂತ್ ಭೊಗ್ತಾ.”

“ಖಂತ್‍ಯೀ ಜಾಂವ್ಕ್ ಪುರೊ, ಭ್ರಾಂತ್‍ಯೀ ಜಾಂವ್ಕ್ ಪುರೊ” ಹಾಸ್ಲೊ ಸರ್ದಾರ್ ಸಿಮಾಂವ್. “ಸಾಂಗ್ತಾಯ್ ಜಾಲ್ಯಾರ್, ಚಿಕ್ಕೆ ಉಗ್ತೆಂ ಸಾಂಗ್.”

“ಬರೆಂ, ತುಂ ಕುರಿಯೆಲಾಕ್ ಫಾಲ್ಯಾಂ ಭಾಯ್ರ್ ಸರ್ತಾಯ್‍ಮೂ?”

“ವ್ಹಯ್, ಬಾದಶಹಾಚಿ ಹುಕುಮ್ ತಶಿ.”

“ದೋನ್ ಹಫ್ತ್ಯಾಂ ಉಪ್ರಾಂತ್, ಪಾವ್ ಕಂಪ್ನಿ (ಪಂಚ್ವೀಸ್) ಸವಾರಾಂಕ್ ಘೆವ್ನ್ ಹಾಂವ್‍ಯೀ ಕುರಿಯೆಲಾಕ್ ಭಾಯ್ರ್ ಸರ್ತಾಂ.”

“ಮತ್ಲಬ್?”

“ಬಾದಶಹಾಚಿ ಹುಕುಮ್ ತಶಿ!”

“ಪ್ರತ್ಯೇಕ್ ಕಾರಣ್ ಕಾಂಯ್?”

“ತುಕಾ ಸಹಾಯ್ ಕರುಂಕ್, ಆನಿ ಕುರಿಯೆಲಾಂತ್ ತುಕಾ ಫರ್ಮಾಯಿಲ್ಲಿಂ ಕಾಮಾಂ, ಜಾರಿ ಜಾಲ್ಯಾರೀ ನಾ ತರೀ, ತುಜ್ಯಾ ಸಾಂಗಾತಾನ್‍ಂಚ್ ಪಾಟಿಂ ಯೇಂವ್ಕ್ ಮ್ಹಾಕಾ ತಾಕಿದ್!”

“ಸಂತೊಸಾಚಿ ಖಬರ್!” ಹಾಸ್ಲೊ ಸರ್ದಾರ್ ಸಿಮಾಂವ್.

“ಖುದಾ, ಬಚಾವ್ ಕರ್!” ಉದ್ಗಾರ್ಲೊ ಸರ್ದಾರ್ ಯೂಸುಫ್.

“ಖುದಾ ವ್ಹಯ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಪುಣ್ ತಾಚ್ಯಾ ನಾಂವಾನ್, ಗರ್ಜೆಚ್ಯಾ ವೆಳಾರ್, ಮ್ಹಾಕಾ ಬಚಾವ್ ಕರುಂಕ್ ತುಂಚ್ ಯೇವ್ನ್ ಪಾವ್ತಾಯ್ ಮ್ಹಣ್ಚೆಂಯೀ ಸತ್ ಯೂಸುಫ್ ಭಾಯೀ.”

“ಮೊರ್ನಾ ಕಡೆನ್ ತುವೆಂ ಕುಸ್ತಿ ಕರ್ಚಿಂ ಅತರ್ವಣಾಂ ಮ್ಹಾಕಾ ಸಮ್ಜನಾತ್‍ಲ್ಲೆಪರಿಂ, ಥೊಡೆ ಪಾವ್ಟಿಂ ತುಜ್ಯಾ ಉತ್ರಾಂಚಿಂ ಫೊಕಣಾಂಯೀ ಮ್ಹಾಕಾ ಸಮ್ಜನಾಂತ್” ಮ್ಹಣಾಲೊ ಸರ್ದಾರ್ ಯೂಸುಫ್ ಅಲಿ, ಶಿಣೊನ್.

“ತಾರಿಫ್ ಹಾಂವ್ ಉಲಂವ್ಕ್ ನಾ” ಸರ್ದಾರ್ ಸಿಮಾಂವ್ನ್ ಭುಜಯ್ಲೆಂ. “ತುಂ ಸಾಂಗಾತಾ ಆಸ್ತಾನಾ, ಮ್ಹಜೆಂ ನಶಿಬ್ ಬರೆಂ ಉರ್ತಾ ಮ್ಹಣೊಂಕ್ ಜಾಯ್ತೆ ಪುರಾವೆ ಆಸಾತ್…”

“ವ್ಹಾ!”

“ವ್ಹಯ್. ದೋನ್ ಅಡೇಜ್ ವರ್ಸಾಂ ಆದಿಂ, ಬಂಟ್ವಳಾಂತ್ ಮ್ಹಾಕಾ ಆನಿ ಸರ್ದಾರ್ ಆಂತೊನ್ ಶೆಟಿಕ್, ತಲ್ವಾರಿಂಚಿ ಲಡಾಯ್ ಜಾತಾನಾ ತುಂ ಯೇವ್ನ್ ಪಾವ್‍ಲ್ಲೊಯ್…”

“ತಾಂತುಂ ಕಿತೆಂ ಆಸಾ? ಹಾಂವ್ ಯೇವ್ನ್ ಪಾವ್ತಾನಾ ತುವೆಂ ತಾಕಾ ಸಲ್ವವ್ನ್ ಜಾಲಾಂ…”

“ತರೀ, ಬಾದಶಹಾ ಮುಖಾರ್ ತುಜಿ ಸಾಕ್ಸ್ ಉಪ್ಕಾರ್ಲಿ.”

“ಪುಣ್, ತುಂ ಮಾತ್ರ್ ಥೊಡೊ ಕಾಳ್ ನಪಂಯ್ಚ್ ಜಾಲ್ಲೊಯ್. ಹ್ಯಾ ಪಾವ್ಟಿಂ ತಶೆಂ ಕಾಂಯ್ ಜಾಯ್ನಾಯೆ ಮ್ಹಣ್ ತುಜಿ ಪಹರಜ್ ಕರುಂಕ್ ಮ್ಹಾಕಾ ನಮಿಯಾರ್ಲಾ. ತುಕಾ ಹೆಂ ಸಮ್ಜಲೆಂಮೂ? ಹಾಂವ್ ಸಲ್ವಲ್ಯಾರ್, ಮ್ಹಜ್ಯಾ ಜಿವಾಕ್ ಬಿಲ್ಕುಲ್ ಮೋಲ್ ನಾ!”

“ಸಮ್ಜಲೆಂ ಭಾಯೀ, ಸಮ್ಜಲೆಂ. ತುಂ ಸಾಂಗಾತಾ ಆಸ್ಲ್ಯಾರ್‌ಚ್ ಹಾಂವ್‍ಯೀ ಸುರಕ್ಷಿತ್ ಮ್ಹಳ್ಳೆಂ ನೀಜ್. ಥೊಡ್ಯಾ ದಿಸಾಂ ಆದಿಂ, ಬಾರ್ಕೂರ್ ಥಾವ್ನ್ ಕುರಿಯೆಲಾಕ್, ಆನಿ ಕುರಿಯೆಲ್ ಥಾವ್ನ್ ಪಟ್ಟಣಾಕ್ ಪಾವ್ತಾ ಪರ್ಯಾಂತ್, ಬಾದಶಹಾಚ್ಯೆ ಹುಕ್ಮೆನ್, ತುಂ ಮ್ಹಜ್ಯಾ ಸಾಂಗಾತಾ ಆಸ್‍ಲ್ಲ್ಯಾ ವರ್ವಿಂಚ್, ಹಾಂವ್ ಶಾಬಿತ್ ಉರ್ಲಾಂ ಮ್ಹಣ್ ಭೊಗ್ತಾ ಮ್ಹಾಕಾ.”

“ತುಕಾ ಕಿತೆಂಯೀ ಭೊಗ್ತಾ ಜಾವ್ಯೆತ್. ಪುಣ್ ಮ್ಹಾಕಾ ಭೊಗ್ತಾ ತೆಂ ಮ್ಹಾಕಾ ಬರೆಂ ಲಾಗನಾ” ಮ್ಹಣೊನ್ ಯೂಸುಫ್ ಅಲಿ ವಚೊಂಕ್ ಉಟ್ಲೊ. ಸರ್ದಾರ್ ಸಿಮಾಂವ್‍ಯೀ ಉಟ್ಲೊ.

“ಭಿಯೆನಾಕಾ ಯೂಸುಫ್ ಭಾಯೀ” ಮ್ಹಣಾಲೊ ತೊ. “ಮ್ಹಜಿ ಆನಿ ತುಜಿ ದೋಸ್ತಿಚ್ ಆಮ್ಕಾಂ ರಾಕ್ತೆಲಿ.”

“ತುಂ ಮ್ಹಣ್ತಾಯ್, ತಶೆಂ ಜಾಂವ್. ಜಾಲ್ಯಾರ್ ತುಕಾ ಹಾಂವ್, ಫಾಲ್ಯಾಂ ತುಂ ಭಾಯ್ರ್ ಸರ್ಚ್ಯಾ ಆದಿಂ ಮೆಳ್ತಾಂ. ನಾ ಜಾಲ್ಯಾರ್, ಎಕಾ ಹಫ್ತ್ಯಾ ಉಪ್ರಾಂತ್, ಹುಕ್ಮೆ ಪ್ರಕಾರ್, ಕುರಿಯೆಲಾಂತ್ ಮೆಳ್ತಾಂ.”

ಎಕಾಮೆಕಾಚ್ಯಾ ಭುಜಾಂಚೆರ್ ಹಾತ್ ದವರ್ನ್ ತಾಣಿಂ ಇಷ್ಟಾಗಾತ್ ಉಚಾರ್ಲಿ.

ಸರ್ದಾರ್ ಯೂಸುಫ್ ಅಲಿ, ಚಿಂತೇಸ್ತ್ ಜಾವ್ನ್ ಭಾಯ್ರ್ ಗೆಲೊ.

ಸರ್ದಾರ್ ಸಿಮಾಂವ್, ಆನಿಕೀ ಚಡ್ ಚಿಂತ್ನಾಂನಿ ತಲ್ಲೀನ್ ಜಾವ್ನ್, ಭಿತರ್‌ಚ್ ರಾವ್ಲೊ.

ಸಾಂಜೆಚೊ ವೇಳ್ ಜಾತಾನಾ, ಸರ್ದಾರ್ ಸಿಮಾಂವ್ನ್, ಆಪ್ಲೊ ಜೆಮೆದಾರ್ ಜಾವ್ನಾಸ್‍ಲ್ಲ್ಯಾ ಅಂತುಲ್ಯಾ ಪಡ್ವಳಾಕ್ ಆಪವ್ನ್, ದುಸ್ರ್ಯಾ ದಿಸಾ, ಆಪ್ಲ್ಯಾ ಸವಾರಾಂ ಸಮೇತ್, ಮಂಗ್ಳುರಾಕ್ ಭಾಯ್ರ್ ಸರ್ಚಿ ಸರ್ವ್ ಫಾವೊತಿ ತಯಾರಾಯ್ ಕರುಂಕ್ ಹುಕುಮ್ ದಿಲಿ.

ರಾತ್ ಆಯ್ಲಿ. ದಿಸಾ ಮಧೆಂ, ಟಿಪ್ಪು ಸರ್ದಾರಾನ್, ಸರ್ದಾರ್ ಸಿಮಾಂವ್ಕ್ ಭೆಟ್ ದೀಂವ್ಕ್ ನಾ, ಜಾಂವ್, ಆಪಂವ್ಕ್‌ಯೀ ಧಾಡುಂಕ್ ನಾ.

ಪುರಾಸಣ್ ಕಿತ್ಲಿ ಆಸ್‍ಲ್ಲಿ ಜಾಲ್ಯಾರೀ, ಮತಿಕ್ ಸಮಾಧಾನ್ ನಾತ್‍ಲ್ಲ್ಯಾ ವರ್ವಿಂ, ಸರ್ದಾರ್ ಸಿಮಾಂವ್ಕ್, ಅರ್ಧುಕುರಿ ಶಿವಾಯ್, ಸಾರ್ಕಿ ನೀದ್ ಪಡೊಂಕ್ ನಾ. ಹಾಂತುಳ್ನಾಚೆರ್ ಘಡ್ಯೆಕ್ ಏಕ್ ಪಾವ್ಟಿಂ ಕೂಸ್ ಬದ್ಲುನ್ ತೊ ಉರ್ಲೊ.

ಅಂತುಲೊ ಪಡ್ವಳ್, ಆನಿ ತಾಚೆ ಸವಾರ್, ಚಿಕ್ಕೆ ಪಯ್ಸ್ ಆಸ್‍ಲ್ಲ್ಯಾ ಆಪಾಪ್ಲ್ಯಾ ಗುಮ್ಮ್ಯಾಂನಿ, ಗಮ್ಮತಾಂ ಮಾರ್ನ್, ತಯಾರಾಯ್ ಕರ್ನ್ ವಾ ವಿಶೆವ್ ಘೆವ್ನ್ ಆಸ್‍ಲ್ಲೆ. ಸರ್ದಾರ್ ಸಿಮಾಂವ್ನ್ ವಿಶೆವ್ ಘೆಂವ್ಚ್ಯಾ ಆವರಾಚ್ಯಾ ಭಾಯ್ಲ್ಯಾನ್, ತಾಚೊಚ್ ಎಕ್ಲೊ ಸವಾರ್, ಚೆನ್ನಪ್ಪ ಗೌಡ, ರಾಕ್ವಲಿ, ಚಡ್ ಪಹರ‍್ಯಾಚಿ ಗರ್ಜ್ ನಾಸ್ತಾನಾ, ಬಾವ್ಡೊ, ನಿದೊನ್ ಆಸ್‍ಲ್ಲೊ.

ರಾತ್, ಮಧ್ಯಾನ್ ಉತರ್ಲಿ.

ಸರ್ದಾರ್ ಸಿಮಾಂವ್ಕ್ ನೀದ್ ಪಡೊಂಕ್ ನಾತ್‍ಲ್ಲಿ. ತಾಚ್ಯಾ ಕುಡಾಂತ್ಲೊ ತೆಲಾಚೊ ದಿವೊ ಬಾರೀಕ್ ಕರ್ನ್, ಆಡ್ ತೊ ಪಡ್‍ಲ್ಲೊ. ಮಂಗ್ಳುರಾಕ್ ಪಾಟಿಂ ವಚೊನ್, ಜಯ್ತೆವಂತ್ ಜಾವ್ನ್ ಪರ್ತ್ಯಾನ್ ಪಾಟಿಂ ಯೆಂವ್ಚೆಂ ಕಶೆಂ ಮ್ಹಳ್ಳೊ ಸಮಸ್ಸೊ ತಾಕಾ ಧೊಸ್ತಾಲೊ. ತಕ್ಷಣ್…

ತಾಚಿಂ ಚಿಂತ್ನಾಂ ಥಟಕ್ಲಿಂ. ಕುಡಾ ಭಾಯ್ಲ್ಯಾನ್ ಕೋಣ್‍ಗೀ, ಹಾಳ್ವಾಯೆನ್ ಮೆಟಾಂ ಕಾಡ್ತಾತ್ ಮ್ಹಣ್, ಶಿಕಾರೆಂತ್ ಆನಿ ಅಪಾಯಾಂನಿ ತೀಕ್ಷ್ಣ್ ಜಾಲ್ಲ್ಯಾ ತಾಚ್ಯಾ ಮತಿಕ್ ಝಳ್ಕಲೆಂ. ಜಾಗೃತ್ ಜಾವ್ನ್, ಉಸ್ವಾಸ್ ಬಾಂಧುನ್, ಕಾನ್ ತಾಣೆಂ ಫುಲಯ್ಲೆ.

ಥೊಡೊ ವೇಳ್ ನಿಶ್ಶಬ್ದ್. ಸಿರಿರಂಗಪಟ್ಟಣ ಘಡಾಚ್ಯಾ ಊಂಚ್ ಆನಿ ರೂಂದ್ ಪಾಗೊರಾಂಚೆರ್, ಪಹರ‍್ಯಾಂಚೊ (ರಾಕ್ವಲ್ಯಾಂಚೊ) ಘಡ್ಯೆನ್ ಘಡಿ ಆವಾಜ್ ಸೊಡ್ಲ್ಯಾರ್, ಹೆರ್ ಕಾಂಯ್ ಆಯ್ಕನಾತ್‍ಲ್ಲೆಂ. ತರೀ, ವಾರ‍್ಯಾಂತ್‌ಚ್, ಕಸಲೊ ಪುಣೀ ಅಪಾಯ್ ಗರ್ಭಿತ್ ಆಸಾ ಮ್ಹಣ್ ತಾಕಾ ಭೊಗ್ಲೆಂ.

ತೊ ಉಟ್ಲೊ. ಕುಡಾಂತ್ಲೊ ದಿವೊ ತಾಣೆಂ ಪಾಲ್ವಯ್ಲೊ. ಥೊಡ್ಯಾಚ್ ವೆಳಾನ್, ಬಾಗ್ಲಾಚ್ಯಾ ಆನಿ ಜನೆಲಾಚ್ಯಾ ಪಡ್ದ್ಯಾಂತ್ಲ್ಯಾನ್, ಭಾಯ್ಲ್ಯಾ ಚಾಂದ್ನ್ಯಾಚಿ ಝಳಕ್ ಭಿತರ್ ಮಾರ್ಲಿ. ಮಾಂಚ್ಯಾಚ್ಯಾ ಪಾಯಾಕ್ ಶಿರ್ಕಾಯಿಲ್ಲ್ಯಾ ಕೋಶಿಯೆ ಥಾವ್ನ್, ಸರ್ದಾರ್ ಸಿಮಾಂವ್ನ್ ಹಳೂ ಆಪ್ಲಿ ತಲ್ವಾರ್ ಭಾಯ್ರ್ ನಿಸ್ರಾವ್ನ್, ಹಾತಾಂತ್ ಧರ್ಲಿ.

ಅಪಾಯ್ ಕಸಲೊ ಮ್ಹಣ್ ಕಳಿತ್ ನಾತ್ಲ್ಯಾರೀ, ಅಪಾಯ್ ನೀಜ್ ಜಾವ್ನ್ ಆಸಾ ಮ್ಹಣ್ ಮನಾ ದ್ವಾರಿಂ ತಾಕಾ ಭಾವ್ ಜಾಲೊ. ತಿತ್ಲ್ಯಾರ್…

ಕುಡಾ ಭಾಯ್ಲ್ಯಾನ್, ಕೊಣೆಂಗೀ ಶ್ವಾಸ್ ಬಾಂಧ್‍ಲ್ಲೆಪರಿಂ, ಆನಿ ಫಾತ್ರಾಂಚ್ಯಾ ಧರ್ಣಿರ್ ಪಾಯ್ ಫಾಪುಡ್‍ಲ್ಲೆಪರಿಂ ಅಸ್ಪಷ್ಟ್ ಆವಾಜ್ ಆಯ್ಕಲೊ.

ಸರ್ದಾರ್ ಸಿಮಾಂವ್, ತಲ್ವಾರ್ ಹಾತಿಂ ಘೆವ್ನ್, ಆವಾಜ್ ನಾತ್‍ಲ್ಲ್ಯಾ ದೋನ್ ಕದಮಾಂನಿ ದಾರಾ ಭಾಯ್ರ್ ಪಾವ್ಲೊ. ಗೈರ‍್ಯಾ ತ್ಯಾ ಉಜ್ವಾಡಾಂತ್, ಚೌಕೆಚ್ಯಾ ತ್ಯಾ ಸೊಪ್ಯಾರ್ – ಚೆನ್ನಪ್ಪ ಗೌಡ ಪಹರಜ್ ಕರ್ನ್ ಬಸಜಾಯ್ ಆಸ್‍ಲ್ಲ್ಯಾ ತ್ಯಾ ಮಾಂಚ್ಯಾಚೆರ್, ದೋನ್ ವ್ಯಕ್ತಿ ಝಗಡ್ತಾತ್‍ಶೆಂ, ಮಸ್ಕೆಂ ದಿಸ್ಲೆಂ.

ಕೋಣ್-ಕಿತೆಂ ಮ್ಹಣ್ ಸಾರ್ಕೆಂ ದಿಸನಾತ್‍ಲ್ಲೆ ವರ್ವಿಂ, ತಲ್ವಾರ್ ತೊಪುಂಕ್ ಸಾಧ್ಯ್ ನಾತ್‍ಲ್ಲೆಂ ದೆಕುನ್, ಸರ್ದಾರ್ ಸಿಮಾಂವ್ನ್, “ಖಬಡ್ದಾರ್!” ಆವಾಜ್ ದಿಲೊ. ಝಗ್ಡೆಂ ತಕ್ಷಣ್ ರೂಕ್ ಜಾಲೆಂ. ದೊಗಾಂ ಪಯ್ಕಿಂತ್ಲಿ ಏಕ್ ವ್ಯಕ್ತಿ, ದುಸ್ರ್ಯಾ ಘಡ್ಯೆ ಸಟ್ಟ್ ಕರ್ನ್ ಉಟೊನ್, ಸರ್ದಾರ್ ಸಿಮಾಂವ್ಚ್ಯಾ ಆಂಗಾರ್ ಉಡೊಂಕ್ ಮ್ಹಳ್ಳೆಪರಿಂ ಪಾಟಿಂ ಘುವ್ಲಿ. ಸರ್ದಾರ್, ತಲ್ವಾರ್ ಜೊಕುನ್ ತಯಾರ್ ಆಸ್‍ಲ್ಲೊ. ತಲ್ವಾರಿಚೆರ್ ಪ್ರತಿಬಿಂಬಿತ್ ಜಾಲ್ಲಿ ಚಾಂದ್ನ್ಯಾಚಿ ಝಳಕ್ ಆದ್ಳೊನ್, ತ್ಯಾ ವ್ಯಕ್ತಿನ್, ಮನ್ ಬದ್ಲುನ್, ಏಕ್ ಹುಂಕಾರೊ ದೀವ್ನ್, ಸೊಪ್ಯಾರ್ ಥಾವ್ನ್ ಭಾಯ್ರ್ ಉಡ್ಕಿ ಮಾರ್ಲಿ.

ಸರ್ದಾರ್ ಸಿಮಾಂವ್, ತಸಲ್ಯಾ ಸನ್ನಿವೇಶಾಂನಿ, ವಿದ್ಯುತ್ ವೆಗಾನ್ ಖೆಳೊನ್ ಹೆಳ್‍ಲ್ಲೊ ಗ್ರಾಯ್ಕ್. “ಕೌನ್ ಹೈ?” ಮ್ಹಣ್ ತಾಣೆಂ ವಿಚಾರ್ತಾನಾಂಚ್, ತಿ ವ್ಯಕ್ತಿ ಭಾಯ್ರೊ ಉಡೊಂಕ್ ಆಯ್ತಿ ಜಾಲ್ಲೆಂ ತಾಕಾ ಸಮ್ಜಲೆಂ. ಸ್ವಯಂಪ್ರೇರಿತ್ ವೆಗಾನ್ ತಾಚೆಂ ಮೇಟ್ ಫುಡೆಂ ಗೆಲೆಂ, ಆನಿ ತಲ್ವಾರ್ ಧರ್‌ಲ್ಲೊ ಬಾವ್ಳೊಯೀ ನೀಟ್ ಜಾಲೊ. ಭಾಯ್ರ್ ಉಡ್ತೆಲ್ಯಾ ಗ್ರಾಯ್ಕಾಕ್, ತೊ ಭಾಯ್ರ್ ಉಡ್ತಾನಾಂಚ್, ತಲ್ವಾರಿಚೊ ಚಿಕ್ಕೆ ಸ್ಪರ್ಶ್ ಜಾಲ್ಲ್ಯಾನ್, ತೊ ಹುಂಕಾರ್ಲೊ, ಆಂಗ್ಣಾಕ್ ಪಾಂಯ್ ತೆಂಕ್ತಾನಾ ಥಾರೊ ಚುಕೊನ್ ಚಿಕ್ಕೆ ದಂಡಳ್ಳೊ. ಪುಣ್, ಸರ್ದಾರ್ ಸಿಮಾಂವ್ ಸಕಯ್ಲ್ ಪಾಂವ್ಚ್ಯಾ ಆದಿಂಚ್, ಉಟೊನ್, ಧಾಂವೊನ್, ಸಾವ್ಳೆಂಚ್ಯಾ ಕಾಳೊಕಾಂತ್ಲ್ಯಾನ್ ಪಾಶಾರ್ ಜಾವ್ನ್ ಗೆಲೊ. ಎಕಾ ಶಿಪಾಯಾಪರಿಂ ತೊ ನ್ಹೆಸೊನ್ ಆಸ್‍ಲ್ಲೊ ಮ್ಹಣ್ ಸರ್ದಾರ್ ಸಿಮಾಂವ್ಕ್ ಸುಸ್ತಾಲೆಂ.

ತಾಚೊ ಪಾಟ್ಲಾವ್ ಕರ್ಚಿ ಗರ್ಜ್ ನಾ ಮ್ಹಣ್ ನಿಶ್ಚಯ್ಸುನ್, ಸರ್ದಾರ್ ಸಿಮಾಂವ್ ಆಪ್ಲ್ಯಾ ಕುಡಾಕ್ ಪಾಟಿಂ ಆಯ್ಲೊ. ದಿವೊ ಲಾವ್ನ್, ಉಜ್ವಾಡ್ ಘೆವ್ನ್, ಭಾಯ್ರ್ ಯೇವ್ನ್ ತಾಣೆಂ ಪಳೆಲೆಂ – ಚೆನ್ನಪ್ಪ ಗೌಡ, ಥಂಯ್ಸರ್ ಮತ್ ಚುಕೊನ್ ಪರ್ತಲ್ಲೊ. ತಾಚ್ಯಾ ಆಂಗಾರ್ ಘಾಯ್ ನಾತ್‍ಲ್ಲೊ ಜಾಲ್ಯಾರೀ, ತಾಚ್ಯಾ ಗೊಮ್ಟ್ಯಾಚ್ಯೊ ಶಿರೊ ಫುಲೊನ್ ಆನಿ ತಾಚೆಂ ಮುಖ್ ಸುಜೊನ್, ಜೀಬ್ ಭಾಯ್ರ್ ಘಾಲ್ನ್ ಶ್ವಾಸ್ ಘೆಂವ್ಕ್ ತೊ ಕಷ್ಟತಾಲೊ ಪಳೆವ್ನ್, ಸರ್ದಾರ್ ಸಿಮಾಂವ್ಕ್ ಸಮ್ಜಲೆಂ: ಧಾಂವ್‍ಲ್ಲ್ಯಾ ಗ್ರಾಯ್ಕಾನ್, ಚೆನ್ನಪ್ಪ ಗೌಡಾಕ್, ನಿದ್‍ಲ್ಲೆ ಕಡೆಂಚ್, ಗೊಮ್ಟಿ ಚಿಡ್ಡುನ್ ಲಗಾಡ್ ಕಾಡುಂಕ್ ಪ್ರಯತ್ನ್ ಕೆಲ್ಲೆಂ. ಸರ್ದಾರ್ ಸಿಮಾಂವ್ ಜರ್ ನಿದೊನ್ ಉರ್‌ಲ್ಲೊ, ತರ್, ಚೆನ್ನಪ್ಪ ಗೌಡಾಚಿ ಕಾಣಿ ಕಾಬಾರ್ ಜಾತಿ!

ಕೋಣ್ ಜಾವ್ಯೆತ್ ತೊ ದುಸ್ಮಾನ್?

ಕಸಲಿ ಜಾವ್ಯೆತ್, ರಾಕ್ವಲಿ ಚೆನ್ನಪ್ಪ ಗೌಡಾಚೆರ್ ತಾಚಿ ದುಸ್ಮಾನ್ಕಾಯ್?

ಹ್ಯಾ ಸವಾಲಾಂಚಿ ಜಾಪ್ ಚಿಂತುಂಕ್ ತೊ ವೇಳ್ ನಹಿಂ. ಫುಗಾರ್ ಜಾವ್ನ್, ಮೊರೊಂಕ್ ಲಾಗಿಂ ಪಾವ್‍ಲ್ಲ್ಯಾ ಚೆನ್ನಪ್ಪ ಗೌಡಾಕ್, ಸರ್ದಾರ್ ಸಿಮಾಂವ್ನ್ ಫಾವೊತಿ ಶುಶ್ರೂಷಾ ಕೆಲಿ. ಥೊಡ್ಯಾ ವೆಳಾನ್, ತೊ ಜವಾನ್, ಸನಿನ್ ಜಾವ್ನ್ ಪಿಂರ್ಗಲೊ. ಸರ್ದಾರ್ ಸಿಮಾಂವ್ನ್, ತಾಕಾ ಪಿಯೆಂವ್ಕ್ ಥೊಡೆಂ ಉದಾಕ್ ದಿಲೆಂ, ಆನಿ ತಾಕಾ ವಿಶೆವ್ ಘೆಂವ್ಕ್ ಸೊಡ್ಲೊ.

ಥೊಡ್ಯಾ ವೆಳಾನ್, ಉಲಂವ್ಕ್ ಸಾರ್ಕೆಂ ಜಾತಾನಾ, ಸರ್ದಾರ್ ಸಿಮಾಂವ್ನ್ ಆಪ್ಲ್ಯಾ ಪಹರ‍್ಯಾಗಾರಾಚೊ ಚತ್ರಾಯೆನ್ ವಿಚಾರ್ ಕೆಲೊ.

ನಾ – ಚೆನ್ನಪ್ಪ ಗೌಡಾಕ್, ಸರ್ದಾರ್ ಸಿಮಾಂವ್ಚ್ಯಾ ಸವಾರಾಂ ಕಡೆನ್ ಜಾಂವ್, ಪಟ್ಟಣಾಂತ್ಲ್ಯಾ ಹೆರ್ ಕೊಣೀ ಶಿಪಾಯಾಂ ಕಡೆನ್ ಜಾಂವ್, ಝಗ್ಡೆಂ ವಾ ತಕ್ರಾರ್ ನಾತ್‍ಲ್ಲೆಂ; ಕೊಣಾಯ್ ಕಡೆನ್ ದುಸ್ಮಾನ್ಕಾಯ್ ಲೆಗುನ್ ನಾತ್‍ಲ್ಲಿ. ಇತ್ಲೆಂ ಸಮ್ಜತಚ್, ಸರ್ದಾರ್ ಸಿಮಾಂವ್ಚಿಂ ಚಿಂತ್ನಾಂ ಗುಂಡಾಯೆಕ್ ದೆಂವ್ಲಿಂ ಆನಿ ಗಂಭೀರ್ ಜಾಲಿಂ…

ರಾಕ್ವಲ್ಯಾಕ್, ಆವಾಜ್ ನಾಸ್ತಾನಾ ನಿದಾವ್ನ್, ಉಪ್ರಾಂತ್ ಸರ್ದಾರ್ ಸಿಮಾಂವ್ಕ್‌ಚ್ ಲಗಾಡ್ ಕಾಡ್ಚಿ, ಕೊಣಾಯ್ಚಿಗೀ ಫಿತೂರಿ ಜಾವ್ನಾಸ್‍ಲ್ಲಿ! ವಾ… ಸರ್ದಾರ್ ಸಿಮಾಂವ್ನ್, ಪರತ್ ಮಂಗ್ಳುರಾಕ್ ಪಾವನಾಯೆ ಮ್ಹಣ್ ಕೊಣಾಚೊ ಪುಣೀ ಮತ್ಲಬ್ ಆಸ್‍ಲ್ಲೊ..!

ಆಪ್ಲ್ಯಾ ಫುಡ್ಲ್ಯಾ ಯತ್ನಾಂನಿ ಚಡ್ ಚತ್ರಾಯ್ ಸಾಂಬಾಳ್ಚ್ಯಾ ಖಾತಿರ್ ಹಿ ಏಕ್ ಜಾಗ್ವಣ್ ಮ್ಹಣ್, ಸರ್ದಾರ್ ಸಿಮಾಂವ್ ಚುರುಕ್ ಜಾಲೊ. ರಾತಿಂ ಘಡ್‍ಲ್ಲಿ ಗಜಾಲ್, ಕೊಣಾಯ್ಕೀ ಬಿಲ್ಕುಲ್ ಸಾಂಗನಾಯೆ ಮ್ಹಣ್ ಚೆನ್ನಪ್ಪ ಗೌಡಾಕ್ ತಾಣೆಂ ತಾಕಿದ್ ದಿಲಿ.

ಉಜ್ವಾಡೊನ್ ಯೆತಾನಾಂಚ್, ಸರ್ದಾರ್ ಸಿಮಾಂವ್ ಭಾಯ್ರ್ ಆಯ್ಲೊ. ಆದ್ಲ್ಯಾ ರಾತಿಂ ಘರ್ಷಣ್ ಜಾಲ್ಲಿ ಸುವಾತ್ ತಾಣೆಂ ಪಳೆಲಿ. ಥಂಯ್ಸರ್ ದೋನ್ ವಸ್ತು ತಾಕಾ ಝಳ್ಕಲ್ಯೊ: ಸೊಪ್ಯಾ ಬಗ್ಲೆನ್, ಶಿಪಾಯಾಂನಿ ಬಾಂಧ್ಚೆ ತಸಲೊ ಏಕ್ ಪೇಟಾ (ಮುಂಡಾಸ್) ಪಡೊನ್ ಆಸ್‍ಲ್ಲೊ. ಬರೆಂ. ಚಿಕ್ಕೆ ಲಾಗ್ಸರ್ ಥೊಡೆ ರಗ್ತಾ ಥೆಂಬೆ, ಕಾಳ್ಬಾಣೆನ್ ಘೆಟ್ಯಾ ಖತಾಂ ಜಾವ್ನ್ ದಿಷ್ಟಿಕ್ ಪಡ್ಲೆ. ಬಾಗ್ವೊನ್ ಪಳೆತಾ ಜಾಲ್ಯಾರ್, ಪೊಂತಾರ್ ರಗತ್ ಘಟ್ ಜಾಲ್ಲೆಂ ಏಕ್ ಕಣ್ಗೆಚೆಂ ಪಾಳ್‍ಶೆಂ, ಏಕ್ ದಾದ್ಲ್ಯಾಚೆಂ ಕಿರಂಗಳ್ಚೆಂ ಬೋಟ್, ಕುಡ್ಕೆ ಜಾವ್ನ್ ಝಡೊನ್ ಪಡ್‍ಲ್ಲೆಂ ದಿಸ್ಲೆಂ. ಸರ್ದಾರ್ ಸಿಮಾಂವ್ಚ್ಯಾ ತಲ್ವಾರಿನ್, ತಿತ್ಲೆಂ ತರೀ ಕಾಮ್ ಕೆಲ್ಲೆಂ!

ಮನ್ಶ್ಯಾಚೆಂ ಏಕ್ ಬೋಟ್ ಪಳೆವ್ನ್ ಸರ್ದಾರ್ ಸಿಮಾಂವ್ಚೆರ್ ಕಸಲೊಯೀ ಪರಿಣಾಮ್ ಜಾಂವ್ಕ್ ನಾ. ಪುಣ್, ಶಿಪಾಯಾಚೊ ಪೇಟಾ ಪಳೆವ್ನ್ ತಾಕಾ ಅಜ್ಯಾಪ್ ಆನಿ ಆತುರಾಯ್ ಭೊಗ್ಲಿ.

ಸರ್ದಾರ್ ಸಿಮಾಂವ್ ತ್ಯಾ ದಿಸಾ ಕುರಿಯೆಲಾಕ್ ವೆತಾ ಮ್ಹಣ್, ತಾಚ್ಯಾಚ್ ಖಾಸ್ಗಿ ಸವಾರಾಂಕ್ ಸೊಡ್ಲ್ಯಾರ್, ಕಳಿತ್ ಆಸ್‍ಲ್ಲೆಂ – ಟಿಪ್ಪು ಸುಲ್ತಾನಾಕ್, ಸಾಲ್ವದೊರ್ ಪಿಂತಾಕ್ ಆನಿ ಯೂಸುಫ್ ಆಲಿಕ್ ಮಾತ್ರ್…

ಆನಿ, ಹಾಂಗಾಸರ್ ನಿಕ್ಳೊನ್ ಪಡ್‍ಲ್ಲ್ಯಾ ಪೇಟಾಚೊ ವರ್ಣ್ ಆನಿ ಶೈಲಿ – ಸರ್ದಾರ್ ಯೂಸುಫ್ ಆಲಿಚ್ಯಾ ಖಾಸ್ಗಿ ಸವಾರಾಂನಿ ನ್ಹೆಸ್ಚ್ಯಾ ಮುಂಡಾಸಾಂಚಿ ಜಾವ್ನಾಸ್‍ಲ್ಲಿ..!

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

ಆಮಿ ಫಾಯ್ಸ್ ಕೆಲ್ಲ್ಯೊ ಆದ್ಲ್ಯೊ ಕಾದಂಬರಿ