ಇಂಫೆರ್ನಾಚಿಂ ದಾರಾಂ – 19: ಆರ‍್ಯದ್ ಇರಟತ್ತ್ – ಕೋಣ್ ಥಂಯ್ ಕಾಳೊಕಾಂತ್?

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 19
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 19: ಆರ‍್ಯದ್ ಇರಟತ್ತ್ – ಕೋಣ್ ಥಂಯ್ ಕಾಳೊಕಾಂತ್?

ಆತಾಂ ತಿಸ್ರೆ ಪಾವ್ಟಿಂ ತಿಸ್ರ್ಯಾ ತೊಪಾಸಿಕ್ ಹ್ಯಾ ಘಟನಾಂನಿ ಸರ್ದಾರ್ ಸಿಮಾಂವ್ನ್ ಇತ್ಲ್ಯಾ ಅವ್ಚಿತ್ ಥರಾನ್ ಪ್ರವೇಶ್ ದಿಲ್ಲೊ ಪಳೆವ್ನ್, ಜಮೆದಾರ್ ಅಂತುಲೊ ಆನಿ ಅಮೀಲ್ದಾರ್ ರಾಮಪ್ಪ ದೊಗೀ ಕಾಲುಬುಲೆ ಆನಿ ದಿಞ್ಮೂಡ್ ಜಾಲ್ಲ್ಯಾಂತ್ ಅಜ್ಯಾಪ್ ನಾ.

ಕಾಂಯ್ ಫರಾಮಸ್ ಜಾವ್ನ್, ಕಾಂಯ್ ಸಾಂಗ್ತಲೊ ಪಿಸೊ ವಾ ಆಯ್ಕತೆಲೆ ಪಿಶೆ ಮ್ಹಳ್ಳೆಂ ಸಮಸ್ಯೆಂ ಮತಿಂತ್ ಉದೆವ್ನ್ ತೆ ಬಾವ್ಡೆ ಶೆರ್ಮೆಲೆ ಆನಿ ತೋಂಡ್ ಉಗ್ತೆಂ ಧರ್ನ್ ಉಸ್ಮಡೊಂಕ್ ಲಾಗ್ಲೆ.

“ತುಮಿ ಘಡ್ಬಡ್ಲ್ಯಾತ್ ಮ್ಹಣ್ ದಿಸ್ತಾ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಹ್ಯಾ ಉತ್ರಾಚೊ ವಿವರ್ ಆನಿ ರುಜ್ವಾತ್ ತುಮ್ಕಾಂ ವೆಗಿಂಚ್ ಮೆಳ್ತೆಲಿಂ. ಪುಣ್ ಆತಾಂ ಆಮಿ ಘಳಾಯ್ ಕರಿನಾಸ್ತಾಂ ಹಾಂಗಾ ಥಾವ್ನ್ ಪಾಶಾರ್ ಜಾಂವ್ಚೆಂ ಚಡ್ ಗರ್ಜೆಚೆಂ.”

“ಪುಣ್ ಧನಿಯಾ” ಮ್ಹಣಾಲೊ ಅಂತುಲೊ, ಕಸೊಯೀ ಜಾಗೊ ಜಾವ್ನ್. “ಜರ್, ತುವೆಂ ಸಾಂಗ್ಚ್ಯಾ ಪರ್ಮಾಣೆಂ ತೊ ದಗಲ್ಬಾಜಿ ಷೇರ್ ಖಾನ್ ಹಾಂಗಾ ಆಸಾ, ತರ್ ತಾಕಾ ಆಮಿ ಧರಿನಾಸ್ತಾಂ…”

“ಪಿಶ್ಯಾಂಪರಿಂ ಉಲಯ್ನಾಕಾ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಆಮಿ ಹಾಂಗಾಸರ್ – ಸ್ವಾಗತ್ ನಾತ್‍ಲ್ಲ್ಯಾ ಹ್ಯಾ ರಾವ್ಳೆರಾಂತ್ ಆನಿ ಹ್ಯಾ ತುಳುವ್ಯಾ ಮಲೆಯಾಳಿ ತಂಬಾಂತ್ – ತೆಗ್‍ಚ್ ಜಣ್ ಆಸಾಂವ್. ಬಲಾತ್ಕಾರೆನ್ ಜಾಂವ್ ಆಮ್ಚ್ಯಾ ಆತಾಂಚ್ಯಾ ಸಕ್ತೆನ್ ತಾಕಾ ಆಮಿ ಕೈದ್ ಕರುಂಕ್ ಸಾಧ್ಯ್ ನಾ.”

“ತರ್…”

“ತರ್-ಗೀರ್ ಕಾಂಯ್ ನಾ” ಸರ್ದಾರಾನ್ ಹುಕುಮ್ ದಿಲಿ. “ಭಾಯ್ರ್ ಸರಾ, ಚಡ್ ವೇಳ್ ನಾ. ಆತಾಂ ಆಮಿ ಷೇರ್ ಖಾನಾಕ್ ಧರ್ಚೆಂ ಕಾಂಯ್ ತಿತ್ಲೆಂ ಚಡ್ ಗರ್ಜೆಚೆಂ ನಹಿಂ. ಬಗಾರ್, ಜಾತಾ ತಿತ್ಲ್ಯಾ ವೆಗಿಂ ಕಣ್ಣಾನೂರಾಕ್ ಪಾವೊನ್, ಬೇಗಮ್ ಜಹನಾರಾ ಬೀಬಿಚ್ಯಾ ಪಾಳಯಾ ಭಿತರ್ ರಿಗೊನ್, ಗರ್ಜ್ ಪಡ್ಲ್ಯಾರ್ ತಿಚ್ಯಾ ರಾವ್ಳೆರಾಂತ್ ಪ್ರವೇಶ್ ಜಾಂವ್ಚೆಂ ಚಡ್ ಗರ್ಜೆಚೆಂ.”

“ಮ್ಹಾಕಾ ಹೆಂ ಸಮ್ಜನಾ” ಪಿಂರ್ಗಲೊ ಅಂತುಲೊ.

“ತುಕಾ ಸಮ್ಜಜಾಯ್ ಮ್ಹಳ್ಳಿ ಗರ್ಜ್ ನಾ, ಭಾಯ್ರ್ ಸರಾ” ಮ್ಹಣಾಲೊ ಸರ್ದಾರ್ ಸಿಮಾಂವ್.

“ಪುಣ್ ಆಮ್ಚೆ ಘೊಡೆ…” ನರ್ಗಲೊ ರಾಮಪ್ಪ.

“ಭಾಯ್ರ್ ಸರಾ!” ಮ್ಹಣತ್ತ್, ಸರ್ದಾರ್ ಸಿಮಾಂವ್ನ್ ಆಪ್ಲೊ ಕಮರ್‌ಬಾಂದ್ ಪರತ್ ರೆವ್ಡಾವ್ನ್ ಅರ್ನುನ್ ಬಾಂಧ್ಲೊ.

ಅಂತುಲೊ ಆನಿ ರಾಮಪ್ಪ – ನೀದ್ ಕಾಡ್ಚೊ ಅವ್ಕಾಸ್ ಚುಕ್ಲೊ ತರೀ ಆಯ್ತೆ ಜಾಲೆ.

ದಿವ್ಯಾಚೊ ಉಜ್ವಾಡ್, ಸರ್ದಾರಾಚ್ಯಾ ಹುಕ್ಮೆ ಪ್ರಕಾರ್ ತಾಣಿಂ ಚಿಕ್ಕೆ ಬಾರೀಕ್ ಕೆಲೊ.

ತಾಂಕಾಂ ಪಾಂಗ್ರುಂಕ್ ದಿಲ್ಲ್ಯೊ ಕಾಂಬ್ಳಿ, ತಿನೀ ಖಾಟ್ಯಾಂಚೆರ್, ಚಡುಣೆಂ ಎಕ್ಲೊ ಮನಿಸ್ ಪಾಂಗ್ರುನ್ ನಿದ್‍ಲ್ಲೆಪರಿಂ ದಿಸಾ ಸಾರ್ಕ್ಯೊ ತಾಣಿಂ ಮಾಂಡ್ಲ್ಯೊ.

ಬಾಗ್ಲಾರ್ ರಾವೊನ್ ಘಡಿಭರ್ ತಾಣಿಂ ಭಾಯ್ಲ್ಯಾನ್ ನದರ್ ದಿಲಿ ಆನಿ ಕಾನ್ ದಿಲೆ. ಕೊಣಾಯ್ಚಿ ಝಳಕ್ ಜಾಂವ್ ಆವಾಜ್ ನಾತ್‍ಲ್ಲೊ ಸ್ಪಷ್ಟ್ ಜಾತಚ್, ಭಾಯ್ರ್ ತೆ ಆಯ್ಲೆ. ತ್ಯಾ ಬಾಂಧ್ಪಾ ಥಾವ್ನ್ ಚಡುಣೆಂ ತೀಸ್ ಚಾಳೀಸ್ ಮೆಟಾಂ ಪಯ್ಸ್ ಕಾಳೊಕಾಂತ್ ಯೇವ್ನ್ ತೆ ರಾವ್ಲೆ.

“ಕಾಂಯಿಂಚ್ ಆವಾಜ್ ಕರಿನಾಕಾತ್” ಸರ್ದಾರ್ ಸಿಮಾಂವ್ನ್ ಚತ್ರಾಯ್ ದಿಲಿ. “ಆಮ್ಚ್ಯಾ ಉದ್ಕಾಂತ್ ಪಾಲ್ಯಾಚೊ ರೋಸ್ ಘಾಲ್ಲೆ ಗ್ರಾಯ್ಕ್ ವಾ ತಾಂಚೆ ದಲಾಲಿ ತ್ಯಾ ಕುಡಾ ಲಾಗಿಂ ಯೆತೆಲೆ. ಮ್ಹಜ್ಯಾ ಅಂದಾಜಾ ಪ್ರಕಾರ್, ಬಹುಶಃ ತೊ ತೊಪಾಸಿಯೀ ಯೆತಲೊ.

“ತೊಪಾಸಿ?” ಉಸ್ವಾಸ್ಲೊ ಅಂತುಲೊ.

“ವ್ಹಯ್, ತೊಪಾಸಿ” ಹಾಳ್ವಾಯೆನ್ ಮ್ಹಣಾಲೊ ಸರ್ದಾರ್ ಸಿಮಾಂವ್. “ತಾಚೆಂ ನೀಜ್ ನಾಂವ್ ಹಾಂವ್ ಉಪ್ರಾಂತ್ ಸಾಂಗ್ತಾಂ. ಸದ್ದ್ಯಾಕ್ ತೊ ಆಮ್ಚೊ ಷೇರ್ ಖಾನ್ ಮ್ಹಣ್ ಆಮಿ ಉಗ್ಡಾಸ್ ದವರ್ಲ್ಯಾರ್ ಪುರೊ. ಆತಾಂ ಥಂಡ್ ರಾವಾ.”

ತಶೆಂ, ಕಾಳೊಕಾಂತ್ ಥಂಡ್ ತೆ ರಾವ್ಲೆ.

ಥೊಡ್ಯಾಚ್ ವೆಳಾನ್, ಸರ್ದಾರ್ ಸಿಮಾಂವ್ನ್ ಸಾಂಗ್‍ಲ್ಲೆಪರಿಂಚ್ ಜಾಲೆಂ:

ದಾವ್ಯಾ ಕುಶಿಕ್, ರಾವ್ಳೆರಾಚ್ಯಾ ಮುಖ್ಯ ಭಾಗಾ ಥಾವ್ನ್ ಲ್ಹಾನ್ ಏಕ್ ಉಜ್ವಾಡಿ ಹೆವ್ಶಿನ್ ತಾಂಕಾಂ ದಿಸ್ಲಿ. ಲಾಂಟಾನ್ ಘೆತ್‍ಲ್ಲಿ ವ್ಯಕ್ತಿ ಧರ್ಲ್ಯಾರ್ ಚವ್ಗ್ ಜಣ್ ತೆ ಆಸ್‍ಲ್ಲೆ. ಚತ್ರಾಯೆನ್, ಹಾಂಕಾಂ ನಿದೊಂಕ್ ದಿಲ್ಲ್ಯಾ ಕುಡಾ ಸರ್ಶಿನ್ ತೆ ಯೆತಾಲೆ.

“ಕಿತೆಂ ಕರ್ಯಾಂ?” ಅಂತುಲ್ಯಾನ್, ಲೋವ್ ತಾಳ್ಯಾನ್ ವಿಚಾರ್ಲೆಂ.

“ರಾಮಪ್ಪ ಹಾಂಗಾಚ್ ರಾವ್” ಸಾಂಗ್ಲೆಂ ಸರ್ದಾರ್ ಸಿಮಾಂವ್ನ್ ತಿತ್ಲ್ಯಾಚ್ ಲೋವ್ ತಾಳ್ಯಾನ್. “ಹಾಂವ್ ಜರ್ ಮುಖಾರ್ ವೆತಾಂ, ತರ್, ಅಂತುಲೊ ಮ್ಹಜ್ಯಾ ಬರಾಬರ್ ಯೇ. ಎಕಾದಾವೆಳಾ ತೆ ತೇಗ್ ವಾ ಚವ್ಗ್‌ಯೀ ಜಣ್ ಕುಡಾ ಭಿತರ್ ರಿಗ್ತಿತ್ ಜಾಲ್ಯಾರ್, ತಾಂಚೆ ಪಯ್ಕಿ ಷೇರ್ ಖಾನ್ ಆಸಾ ಜಾಲ್ಯಾರ್ ಆಮಿ ಪಳೆಜಾಯ್ ಆನಿ ತಾಕಾ ಉಕ್ಲಿಜಾಯ್.”

“ಕಶೆಂ?” ಅಂತುಲ್ಯಾನ್ ಆಕಾಂತಾಚೊ ಏಕ್ ಶ್ವಾಸ್ ಸೊಡ್ಲೊ.

“ಪಳೆಯಾಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಜರ್ ಷೇರ್ ಖಾನ್ ತಾಂಚೆ ಮಧೆಂ ನಾ, ತರ್, ತಾಂಕಾಂ ತ್ಯಾ ಕುಡಾ ಭಿತರ್ ಫಿಚಾರ್ ಕರ್ನ್, ಭಾಯ್ಲ್ಯಾನ್ ಖಿಳೊ ಶಿರ್ಕಾವ್ನ್ ಆಮಿ ಚಲ್ಯಾಂ – ಘಾತಾಚೊ ಪಾಸ್ ಮಾಡ್‍ಲ್ಲ್ಯಾಂಕ್, ಆಮ್ಚ್ಯಾ ಹಾತಾಚಿ ಥೊಡಿ ವಳಕ್ ದಿವ್ಯಾಂ.”

ತೆ ಚುರುಕ್ ಜಾಲೆ.

ತೆ ಚವ್ಗ್ ಜಣ್, ತಾಂಚೆಯಿತ್ಲ್ಯಾಕ್ ವ್ಹಳೂ ಮ್ಹಣ್ಮುಣೊನ್, ಆವಾಜ್ ಕರಿನಾಸ್ತಾನಾ ಕುಡಾಚ್ಯಾ ದಾರಾರ್ ಪಾವ್ಲೆ, ಆನಿ ರಾವ್ಲೆ.

ಸರ್ದಾರ್ ಸಿಮಾಂವ್, ರಾವ್‍ಲ್ಲೆ ಕಡೆನ್ ಥಾವ್ನ್ ಮಾಜ್ರಾಚಿಂ ಮೆಟಾಂ ಕಾಡ್ನ್ ಫುಡೆಂ ಸರ್ಲೊ. ಅಂತುಲೊ ಪಡ್ವಳ್‍ಯೀ ತಾಚ್ಯಾ ಬರಾಬರ್ ಫುಡೆಂ ಆಯ್ಲೊ. ಆಯಿಲ್ಲ್ಯಾ ಗ್ರಾಯ್ಕಾಂಚ್ಯಾ ಉಜ್ವಾಡಾಕ್ ಪಡನಾಶೆಂ ರಾವೊನ್ ತಾಣಿಂ ಪಳೆಲೆಂ ಆನಿ ಆಯ್ಕಲೆಂ. ದಾರಾರ್ ರಾವೊನ್, ಭಿತರ್ ಪಳೆವ್ನ್ ತೆ ಉಲಯ್ತಾಲೆ:

“ಹ್ಹ-ಹ್ಹ! ತೆಗ್‍ಯೀ ಜಣ್ ಮಾಂಕ್ಡಾ ಸರ್ಗಾರ್ ಗೆಲ್ಯಾತ್.”

“ವ್ಹಯ್‍ಮೂ?”

“ವ್ಹಯ್.”

“ತರ್ ಕಾಮ್ ಸುಲಭ್ ಜಾಲೆಂ” ಮ್ಹಣಾಲೊ, ನಿಮಾಣೊ ಆಸ್‍ಲ್ಲೊ ಗ್ರಾಯ್ಕ್.

“ಸೈತಾನ್ ಸರ್ದಾರಾಚೆಂ ಕಾರ್ಬಾರ್ ಇತ್ಲ್ಯಾರ್, ಅಶೆಂ ಕಾಬಾರ್ ಜಾಲೆಂ. ಹ್ಹೆ-ಹ್ಹೆ! ಭಿತರ್ ವಚಾ, ಆನಿ ತೆಗಾಂಯ್ಚೆ ಹಾತ್ ಪಾಯ್ ಬಾಂಧುನ್ ಘಾಲಾ. ತಾಂಕಾಂ ಜಾಗ್ ಜಾತಚ್, ತಾಂಚಿ ಖಬರ್ ಘೆವ್ಯಾಂ.”

“ತಿತ್ಲಿ ಲಾಂಬಾಯ್ ಆನಿ ರಾಟಾವಳ್ ಕಿತ್ಯಾಕ್? ತಾಂಕಾಂ ಆತಾಂಚ್ ಫೈಸಲ್ ಕೆಲ್ಯಾರ್ ತಕ್ಲೀಫ್ ತಿರ್ಸತ್ ನಹಿಂವೇ?” ವಿಚಾರಿಲಾಗ್ಲೊ ಆನ್ಯೇಕ್ಲೊ.

“ನಾ, ತಶೆಂ ಕರುಂಕ್ ಜಾಯ್ನಾ” ಮ್ಹಣಾಲೊ ನಿಮಾಣೊ ಆಸ್‍ಲ್ಲೊ ಗ್ರಾಯ್ಕ್. “ನೀಲೇಶ್ವರ್‍ಚ್ಯಾ ರಾಯಾಕ್ ತೆಂ ಬರೆಂ ಲಾಗ್ಚೆಂ ನಾ. ತ್ಯಾ ಶಿವಾಯ್, ಹ್ಹೆ-ಹ್ಹೆ! ತ್ಯಾ ಸೈತಾನ್ ಸರ್ದಾರಾಕ್ ಜಿವೊಚ್ ಕೈದಿ ಕರ್ನ್ ವ್ಹರ್ನ್ ದಿಲ್ಯಾರ್, ಮ್ಹಾಕಾ ಫಾಯ್ದೊ ಆಸಾ ದುಬಾರ್!”

ಹೆಂ ಆಯ್ಕೊನ್ ಸರ್ದಾರ್ ಸಿಮಾಂವ್ಚೆಂ ಆಂಗ್ ಶಿಜ್ಲೆಂ ಆನಿ ತಾಕಾ ಹಾಸೊಂಕ್‍ಯೀ ಆಯ್ಲೆಂ. ಪ್ರತ್ಯೇಕ್ ಜಾವ್ನ್, ನಿಮಾಣೆಂ ಉಲಯಿಲ್ಲ್ಯಾ ಗ್ರಾಯ್ಕಾಚೊ ಸ್ವರ್ ತಾಣೆಂ ಪಾರ್ಕಿಲೊ.

ತೊ ಜಾವ್ನಾಸ್‍ಲ್ಲೊ ಸ್ವರ್ ‘ಷೇರ್ ಖಾನಾ’ಚೊ.

ತೊಚ್ ಜಾವ್ನಾಸ್‍ಲ್ಲೊ ಸ್ವರ್, ಕಣ್ಣಾನೂರ್ ಬೇಗಮೆಚ್ಯಾ ಆಸ್ಥಾನಾಂತ್ಲ್ಯಾ ತೊಪಾಸಿಚೊ!

ಘಡ್ಯೆನ್ ತಾಣೆಂ ನಿಚೆವ್ ಕೆಲೊ.

“ತೆ ಕುಡಾಕ್ ಭಿತರ್ ಸರ್ಲ್ಯಾರ್ ಹಾಂವ್ ಫುಡೆಂ ಉಡ್ತಾಂ” ಮ್ಹಣಾಲೊ ತೊ ಅಂತುಲ್ಯಾಚ್ಯಾ ಕಾನಾಂತ್. “ತುವೆಂ ಮ್ಹಜ್ಯಾ ಬರಾಬರ್‌ಚ್ ಯೇಜಾಯ್, ಆನಿ ದಾರಾಚಿಂ ಬಾಗ್ಲಾಂ – ಬಾಗಿಲ್ ಬಂದ್ ಕರ್ನ್ ಖಿಳೊ ಸಾಂಪ್ಡಾಯ್ಜಾಯ್.”

ಅಂತುಲ್ಯಾನ್, ಭಿಯಾನ್ ತರೀ ಕಬ್ಲಾತ್ ದಿಲಿ.

“ಮ್ಹಜಾ ಬರಾಬರ್ ಯೇ – ಆತಾಂಚ್!”

ಸರ್ದಾರ್ ಸಿಮಾಂವ್ ಫುಡೆಂ ಸರ್ಲೊ.

ಚವ್ಗಾಂತ್ಲೆ ತೇಗ್ ಜಣ್ ಕುಡಾ ಭಿತರ್ ರಿಗ್ಲೆ. ಚವ್ತೊ – ನಿಮಾಣೊ – ಹಾತಾಂತ್ ಲಾಂಟಾನ್ ಘೆವ್ನ್ ಬಾಗ್ಲಾರ್ ಭಿತರ್ ಪಳೆವ್ನ್ ರಾವ್ಲೊ.

ಚಾರ್‌ಚ್, ಆವಾಜ್ ನಾತ್‍ಲ್ಲ್ಯಾ ಕದಮಾಂನಿ ಸರ್ದಾರ್ ಸಿಮಾಂವ್ ಥಂಯ್ಸರ್ ಪಾವ್ಲೊ. ಕೋಣ್ ವಾ ಕಿತೆಂ ಮ್ಹಣ್ ಸಮ್ಜೊಂಚ್ಯಾ ಆದಿಂಚ್ ತಾಚ್ಯಾ ತಲ್ವಾರಿಚೆಂ ಥೊರುಂ ಷೇರ್ ಖಾನಾಚ್ಯಾ ಢೊಖ್ಯಾರ್, ಮುಸ್ಳಾಚ್ಯಾ ಫಾರಾ ಜಿನ್ಸಾರ್ ಧಾಡಾಲ್ಲೆಂ.

ಉಬೊ ತೊ ಆಸ್‍ಲ್ಲೆಪರಿಂಚ್ ತಾಚಿ ಕೂಡ್ ಕಾಂಪ್ಲಿ ಆನಿ ತಾಚಿ ಮತ್ ಚುಕ್ಲಿ. ತಾಚ್ಯಾ ಹಾತಾಂತ್ಲೊ ಲಾಂಪ್ಯಾಂವ್ ಉಸಳ್ಚ್ಯಾ ಆದಿಂಚ್ ಸರ್ದಾರಾನ್ ಎಕಾ ಹಾತಾನ್ ತೊ ಧರ್ಲೊ, ಆನಿ ಆನ್ಯೇಕಾ ಬಾವ್ಳ್ಯಾನ್ ಆರಾವ್ನ್ ಧರ್ನ್ ಷೇರ್ ಖಾನಾಕ್ ತಾಣೆಂ ಸೊಪ್ಯಾರ್ ದವರ್ಲೊ.

ತ್ಯಾಚ್ ವೆಳಾರ್, ಭಿತರ್ ಗೆಲ್ಲೆ ತೆಗೀ ಜಣ್ ಖಾಟ್ಯಾಂ ಲಾಗಿಂ ಪಾವೊನ್ – ಥಂಯ್ಸರ್ ಮನಿಸ್ ನಿದೊನ್ ನಾಂತ್, ಬಗಾರ್ ಕಾಂಬ್ಳಿ ಮಾಂಡುನ್ ದವರ್ಲ್ಯಾತ್ ಮ್ಹಳ್ಳೆಂ ಸಮ್ಜೊನ್ – ಆಕಾಂತೊನ್ ಶಾಪ್ ಉಚಾರ್ನ್ ಪಾಟಿಂ ಪರ್ತತಾಲೆ. ತಾಂಚೊ ಮುಖೆಲಿ ದುಸ್ರ್ಯಾ ಎಕ್ಲ್ಯಾಚ್ಯಾ ವೆಂಗೆಂತ್ ಕೊಸ್ಳೊನ್ ಪರ್ತೊಂಚೆಂ ದೆಖೊನ್ ತಾಂಕಾಂ ಝಿಂಟ್ ಮಾರ್ಲಿ ಆನಿ ಭಾಯ್ರ್ ಧಾಂವೊಂಕ್ ತಾಣಿಂ ಉಡಿ ಮಾರ್ಲಿ. ಪುಣ್,

ತ್ಯಾ ಅಮ್ಸೊರಾಂತ್ ತಾಂಚೆಚ್ ಎಕಾಮೆಕಾಚೆ ಪಾಯ್ ಗಾಂಟಾಲೆ.

ಆನಿ ತ್ಯಾಚ್ ವೆಳಾರ್, ಜಮೆದಾರ್ ಅಂತುಲ್ಯಾನ್ ಬಾಗ್ಲಾಚೆಂ ದಾಡ್ಡೆಂ ದಾರ್ ವೊಡುನ್ ಖಿಳೊ ಸಾಂಪ್ಡಾಯ್ಲೊ. ಭಿತರ್ ಥಾವ್ನ್ ಕ್ರೋಧಾಚೆ ಆನಿ ಆಕಾಂತಾಚೆ ಉದ್ಗಾರ್ ಆಯ್ಕೊಂಕ್ ಲಾಗ್ಲೆ.

ಸರ್ದಾರ್ ಸಿಮಾಂವ್ಚೆಂ ಅರ್ಧೆಂ ಪುಣೀ ಯೋಜನ್ ಫಳಾಧಿಕ್ ಜಾಲೆಂ. ಷೇರ್ ಖಾನ್ ತಾಚ್ಯಾ ಹಾತಾಂತ್ ಕೈದಿ ಜಾಲ್ಲೊ. ತಾಕಾ ಥಂಯ್ ಥಾವ್ನ್ ಭಾಯ್ರ್ ವ್ಹರ್ಚೆಂ ಆನಿ ನಿತಿಕ್ ಉಬೊ ಕರ್ಚೆಂ ಸಮಸ್ಯೆಂ ಮಾತ್ರ್ ಬಾಕಿ ಉರ್‌ಲ್ಲೆಂ.

ಷೇರ್ ಖಾನಾಕ್ ಸರ್ದಾರ್ ಸಿಮಾಂವ್ನ್ ಲ್ಹಾನ್ ಭುರ್ಗ್ಯಾಕ್ ಘೆತ್‍ಲ್ಲೆಪರಿಂ ಖಾಂದ್ಯಾರ್ ಉಡಯ್ಲೊ, ದಿವೊ ತಾಣಿಂ ಪಾಲ್ವಯ್ಲೊ.

“ಆತಾಂಚ್ ಆಮಿ ಭಾಯ್ರ್ ಸರಜಾಯ್” ಮ್ಹಣಾಲೊ ಸರ್ದಾರ್ ಸಿಮಾಂವ್, ಸಮಾಧಾನೆನ್, ಭೊಂವ್ಡೆಕ್ ಭಾಯ್ರ್ ಸರೊನ್ ಉಲಂವ್ಚೆಪರಿಂ. “ಉಜ್ವಾಡ್ಚ್ಯಾ ಆದಿಂ ಹಾಂಗಾ ಥಾವ್ನ್ ಥೊಡಿಂ ಮಯ್ಲಾಂ ಪಯ್ಸ್ ಆಮಿ ಪಾವಜಾಯ್.”

“ಪುಣ್ ಕಶೆಂ ಸರ್ದಾರಾ?” ಅಜ್ಯಾಪ್ಲೊ ಅಂತುಲೊ. “ವಾಟ್ ಕಷ್ಟಾಂಚಿ ಆನಿ ಕಾಳೊಕಿ. ತ್ಯಾ ಶಿವಾಯ್, ಆಮ್ಚೆ ಘೊಡೆ ತಾಂಚ್ಯಾ ತಾಬೆನ್ ಆಸಾತ್.”

“ತುವೆಂ ಮ್ಹಣ್ಚೆಂ ಸಾರ್ಕೆಂ.”

“ತರ್…”

“ತರ್ ಆಮಿ ವಚಜಾಯಿಚ್ – ಗೆಲ್ಯಾ ಶಿವಾಯ್ ನಿರ್ವೊಗ್ ನಾ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಕಶೆಂ ಪುಣೀ ಆಮ್ಚ್ಯಾ ಘೊಡ್ಯಾಂಕ್ ತುಮಿ ಆತಾಂಚ್ ಸ್ವಾಧೀನ್ ಕರ್ನ್ ಹಾಡಿಜಾಯ್.”

“ಘೊಡ್ಯಾಂಕ್ ಆಮಿ ಹಾಡ್ಲ್ಯಾರೀ” ವಿಚಾರ್ಲೆಂ ರಾಮಪ್ಪಾನ್. “ಪ್ರವೇಶ್ ದ್ವಾರಾಂತ್ಲ್ಯಾನ್ ಭಾಯ್ರ್ ಆಮಿ ಕಶೆಂ ವೆಚೆಂ? ನಹಿಂ ಆಸ್ತಾಂ ತುಮ್ಚ್ಯಾ ಖಾಂದ್ಯಾರ್, ಹ್ಯಾ ಮನ್ಶ್ಯಾಚೆಂ ವೊಜೆಂ ಆಸಾ.”

“ಪ್ರವೇಶ್ ದ್ವಾರಾಚಿ ಕರಂದಾಯ್, ಆನಿ ಹ್ಯಾ ಮನ್ಶ್ಯಾಚಿ ಜಡಾಯ್ ಮ್ಹಾಕಾ ಆಸೊಂದಿ” ಮ್ಹಣಾಲೊ ಸರ್ದಾರ್. “ಹಾಂವ್ ತುಮ್ಕಾಂ ಪ್ರವೇಶ್ ದಾರಾ ಲಾಗಿಂ ಮೆಳ್ತಾಂ. ತುಮಿ ವಚೊನ್ ಆಮ್ಚ್ಯಾ ಘೊಡ್ಯಾಂಕ್ ಥಂಯ್ಸರ್ ಹಾಡ್ನ್ ಯೆಯಾ.”

ಘೊಡ್ಯಾಶಾಲ್ ಆಸ್ಚೆಂ ವಠಾರ್ ಖಂಯ್ಸರ್ ಮ್ಹಳ್ಳೆಂ ತಾಣಿಂ ಪಯ್ಲೆಂಚ್ ಅಂದಾಜ್ ಕರ್ನ್ ಪಾರ್ಕಿಲ್ಲೆಂ. ನಹಿಂ ಆಸ್ತಾಂ, ಆತಾಂ ರಾವ್ಳೆರಾಚ್ಯಾ ವಾಟೆನ್ ಚಡ್ ಜಾಗ್‍ಮಾಗ್ ಜಾಲ್ಲೆಪರಿಂ ಆವಾಜ್ ಜಾತಾಲೊ ಜಾಲ್ಲ್ಯಾನ್, ಶಾಲಾಂತ್ಲೆ ಏಕ್ ದೋನ್ ಘೊಡೆಯೀ ಖಿಂಳ್ಚೆಂವ್ಕ್ ಲಾಗ್ಲೆ. ತಶೆಂ, ಅಂತುಲೊ ಆನಿ ರಾಮಪ್ಪ, ಕಾಳೊಕಾಂತ್ ತೆವ್ಶಿನ್ ಗೆಲೆ.

ಹೆವ್ಶಿಲ್ಯಾನ್ ಆವಾಜ್ ಜಾತಾಲೊ ಜಾಲ್ಯಾರೀ, ಘೊಡ್ಯಾ ಶಾಲಾಚ್ಯಾ ರಾಕ್ವಲ್ಯಾಕ್ ಪಯ್ಲೆಂ ಜಾಗ್ ಜಾಂವ್ಕ್ ನಾ. ತೊ ಬಾವ್ಡೊ, ಶಾಲಾಚ್ಯಾ ಬಾಗ್ಲಾರ್ ಆಪ್ಲೊ ಭಾಲೊ ಕುಂದ್ಯಾಕ್ ತೆಂಕುನ್ ದವರ್ನ್ ಆಪ್ಲಿ ಕಾಂಬೊಳ್ ಹಾಂತುಳ್ನ್ ನೀದ್ ಕಾಡ್ತಾಲೊ. ಲಾಂಪ್ಯಾಂವ್, ವಾತ್ ಬಾರೀಕ್ ಕರ್ನ್ ಲಾಗ್ಸರ್‌ಚ್ ತಾಣೆಂ ದವರ್‌ಲ್ಲೊ.

ಅಂತುಲ್ಯಾಕ್ ಆನಿ ರಾಮಪ್ಪಾಕ್ ಹೆಂ ಬರ‍್ಯಾಕ್‌ಚ್ ಪಡ್ಲೆಂ. ಪರಿಸ್ಥಿತಿ ತಾಣಿಂ ಘಡ್ಯೆನ್ ಪಾರ್ಕಿಲಿ. ಲಾಂಪ್ಯಾಂವ್ ಲಾಗಿಂ ಹಾಡುಂಕ್ ಆನಿ ವಾತ್ ವ್ಹಡ್ ಕರುಂಕ್ ಅಂತುಲ್ಯಾನ್ ರಾಮಪ್ಪಾಕ್ ಹಾತ್ ಭಾಸ್ ಕೆಲಿ. ತಾಣೆಂ ತಶೆಂಚ್ ಕೆಲೆಂ.

ಕುಂದ್ಯಾಕ್ ತೆಂಕೊನ್ ಆಸ್‍ಲ್ಲೊ ಭಾಲೊ ಅಂತುಲ್ಯಾನ್ ಹಾತಿಂ ಘೆತ್ಲೊ, ಆನಿ ಧೊಮೊಸ್ ರಾಕ್ವಲ್ಯಾಚ್ಯಾ ಗಳ್ಯಾ ಮುಖಾರ್ ಜೊಕುನ್ ಧರ್ಲೊ ಆನಿ ಪಾಯಾನ್ ತಾಕಾ ಧೊಂಕುಳ್ಳೊ.

“ಆರ‍್ಯದ್ ಇರಟತ್ತ್ – ಕೋಣ್ ಥಂಯ್ ಕಾಳೊಕಾಂತ್?” ಮ್ಹಳ್ಳ್ಯಾ ಸವಾಲಾ ಬರಾಬರ್, ರಾಕ್ವಲಿ ಜಾಗೊ ಜಾವ್ನ್ ಉಟೊಂಕ್ ಆಯ್ತೊ ಜಾಲೊ. ಲಾಂಪ್ಯಾಂವಾಚ್ಯಾ ಉಜ್ವಾಡಾಂತ್, ಭಾಲ್ಯಾಚಿ ಧೊಮೊಸ್ ದೊಳ್ಯಾಂ ಮುಖಾರ್ ಝಳ್ಕತಚ್ ತಾಚಿಂ ಅಂತರ್ಮಳಾಂ ಉಡ್ಲಿಂ. ಏಕ್ ಬೋಬ್ ದೀಂವ್ಕ್ ತಾಣೆಂ ತೋಂಡ್ ಉಗ್ತೆಂ ಕೆಲೆಂ.

“ಆವಾಜ್ ಕರಿನಾಕಾ, ಹಾಲನಾಕಾ – ತುಜ್ಯಾ ಜಿವಾಕ್ ಬಾಧಕ್ ನಾ” ಮ್ಹಣಾಲೊ ಅಂತುಲೊ ಪಡ್ವಳ್.

“ಎಂದ್ ವೇಣಂ – ಕಿತೆಂ ಜಾಯ್?” ಪಿಂರ್ಗಲೊ ರಾಕ್ವಲಿ.

“ಎಂದ್ ವೇಂಡ – ಆಮ್ಚೆ ಘೊಡೆ ಜಾಯ್, ಆನಿ ತುಜೆ ಥಾವ್ನ್ ಅಡ್ಕಳ್ ನಾತ್‍ಲ್ಲಿ ಜಾಯ್. ತಸೊಚ್ ರಾವ್.” ಅಂತುಲ್ಯಾನ್ ಹಾತ್ ಭಾಸ್ ಕೆಲಿ.

ರಾಮಪ್ಪಾನ್ ಲಾಂಪ್ಯಾಂವ್ ಸಕಯ್ಲ್ ದವರ್ಲೊ. ಲಾಗಿಂ ಯೇವ್ನ್ ತುರ್ತಾನ್ ರಾಕ್ವಲ್ಯಾಚೊ ಪೇಟಾ ಸೊಡವ್ನ್ ತಾಚ್ಯಾ ತೊಂಡಾರ್ ರೆವ್ಡಾವ್ನ್ ಅರ್ನುನ್ ತಾಣೆಂ ಬಾಂಧ್ಲೊ. ತಶೆಚ್ ತಾಚೆ ಹಾತ್ ಪಾಯ್ ಫಿಚಾರ್ ತಾಣೆಂ ಕೆಲೆ.

ಉಪ್ರಾಂತ್, ವೇಳ್ ಕಾಡಿನಾಸ್ತಾಂ, ಶ್ವಾಸ್ ಧರ್ನ್, ಉಜ್ವಾಡಿ ಘೆವ್ನ್ ಲಾಯಾ ಭಿತರ್ ತೆ ಗೆಲೆ. ನವೆಂಸಾಂವ್ ಸಮ್ಜೊನ್ ಥೊಡೆ ಘೊಡೆ ಹಾಳ್ವಾಯೆನ್ ಖಿಂಳ್ಚೆತಾಲೆ; ಹೆರ್ ಥೊಡೆ ಗೆಳಾಂನಿ ಧರ್ಣ್ ಬೊಖುರ್ತಾಲೆ.

“ರಾಕುಸ್! ಛುಪ್ ರಾವ್!” ಅಂತುಲ್ಯಾನ್ ಆವಾಜ್ ದಿಲೊ.

‘ಮ್ಹಾಕಾ ಸಮ್ಜಲೆಂ – ತುವೆಂ ಗಲಾಟೊ ಕರ್ಚಿ ಗರ್ಜ್ ನಾ’ ಮ್ಹಣ್ಚ್ಯಾ ಜಿನ್ಸಾರ್ ಸರ್ದಾರ್ ಸಿಮಾಂವ್ಚ್ಯಾ ರಾಕುಸಾನ್ ನಾಕಾ ಬುಡಾಂ ಫುಲವ್ನ್, ಲ್ಹಾನ್ ಹಾಸೊ ದಿಲ್ಲ್ಯಾ ಜಿನ್ಸಾರ್ ಆವಾಜ್ ಕೆಲೊ.

ಅಂತುಲೊ ಆನಿ ರಾಮಪ್ಪ ಫುಡೆಂ ಸರ್ಲೆ. ರಾಕುಸಾಚಿ ಆನಿ ತಾಂಚ್ಯಾ ಹೆರ್ ದೋನ್ ಘೊಡ್ಯಾಂಚಿ ಪಾಟ್ ಆನಿ ಸೊಂಡಿ ತಾಣಿಂ ಪೊಶೆಲಿ. ಮುಖಾರ್‌ಚ್ ಮಾಂಕ್ಡೆಕ್ ಶಿರ್ಕಾವ್ನ್ ದವರ್‌ಲ್ಲಿ ಜೀನ್ ಆನಿ ಲಗಾಮ್ ಕಾಡ್ನ್, ಘೊಡ್ಯಾಂಕ್ ತಾಣಿಂ ನ್ಹೆಸಯ್ಲೆಂ.

ತಾಂಕಾಂ ಘೆವ್ನ್ ಭಾಯ್ರ್ ತೆ ಆಯ್ಲೆ.

ರಾಕ್ವಲಿ, ದೊಳೆ ಸೊಡುನ್ ಖರ್ಶೆತಾಲೊ, ಘುರ್ಮೆತಾಲೊ.

ವೇಳ್ ಕಾಡಿನಾಸ್ತಾಂ, ಹೆದ್ದಾರಾಚಿ ವಾಟ್ ತಾಣಿಂ ಧರ್ಲಿ.

“ಕೋಣ್?” ಆಯ್ಕಲೊ ಆವಾಜ್ ಸರ್ದಾರಾಚೊ.

“ಆಮಿ ಧನ್ಯಾ!”

“ಭೋವ್ ಬರೆಂ. ಭಾಯ್ರ್ ಸರ್ಯಾಂ. ಹಾಂಗಾಸರ್, ದೆವಾಚ್ಯೆ ದಯೆನ್ ಸರ್ವ್ ಶಾಬಿತ್ ಆಸಾ.”

ನಿಜಾಯ್ಕೀ, ಥಂಯ್ಸರ್ ದೆವಾಚ್ಯೆ ದಯೆನ್, ಸರ್ವ್ ವಿಷಯ್ ಶಾಬಿತ್ ಥರಾನ್ ಜಾರಿ ಜಾಲ್ಲೆ.

ಇತ್ಲೆಂ ಆಯ್ಕೊನ್, ಅಂತುಲ್ಯಾಕ್ ಆನಿ ರಾಮಪ್ಪಾಕ್ ನವೊ ಜೀವ್ ಭರ್ಲೊ; ನವೆಂ ಧಯ್ರ್ ಆಯ್ಲೆಂ.

ಘೊಡ್ಯಾಂಕ್ ಹಾಡ್ಚಿ ತಾಕಿದ್ ದೀವ್ನ್, ಅಂತುಲ್ಯಾಕ್ ಆನಿ ರಾಮಪ್ಪಾಕ್ ತೆವ್ಶಿನ್ ಧಾಡ್ನ್, ಷೇರ್ ಖಾನಾಚಿ ಮತಿಹೀನ್ ಕೂಡ್ ಖಾಂದ್ಯಾರ್ ಘೆವ್ನ್, ಸರ್ದಾರ್ ಸಿಮಾಂವ್, ಹೆದ್ದಾರ್ವಟ್ಯಾ ಲಾಗಿಂ ಪಾವ್‍ಲ್ಲೊ.

ಥಂಯ್ಸರ್‌ಯೀ ದಿವ್ಯಾಚೊ ಬಾರೀಕ್ ಉಜ್ವಾಡ್ ಆಸ್‍ಲ್ಲೊ.

“ಆರ‍್ಯದ್, ಇರಟತ್ತ್?” ಕಾಳೊಕಾಂತ್ ತಾಕಾ ಸವಾಲ್ ಆಯ್ಲೆಂ. ಹೆಂ ಆಯ್ಕಲ್ಯಾರೀ ಸರ್ದಾರ್ ಸಿಮಾಂವ್ನ್ ಜಾಪ್ ದೀಂವ್ಕ್ ನಾ.

“ಅಡೋ, ಆರ‍್ಯದ್?” ರಾಕ್ವಲ್ಯಾನ್, ಚಿಕ್ಕೆ ಭಿಯಾನ್ ಪರ್ತ್ಯಾನ್ ವಿಚಾರ್ಲೆಂ.

“ಹಾಂವ್ – ಸರ್ದಾರ್ ಸಿಮಾಂವ್.” ಸರ್ದಾರ್ ಸಿಮಾಂವ್ನ್ ಅಂದಾಜಾನ್ ಏಕ್ ತೀರ್ ಸೊಡ್ಲೊ. ಥೊಡ್ಯಾಚ್ ವೆಳಾ ಆದಿಂ ಭಿತರ್ ಯೆತಾನಾ, ತ್ಯಾ ರಾಕ್ವಲ್ಯಾಚ್ಯಾ ಗಳ್ಯಾಂತ್ ತಾಣೆಂ ಏಕ್ ಲ್ಹಾನ್ ಖುರಿಸ್ ಪಳೆಲ್ಲೊ. ತಾಚಿ ದಿಂಡಿ ಕೂಡ್ ಆನಿ ಚಾರೊ ಪಳೆವ್ನ್, ತೊಯೀ ಏಕ್ ಸುಲ್ಕಾರ್ ಕೊಂಕ್ಣೊ ಜಾವ್ನಾಸ್ಯೆತ್ ಮ್ಹಣ್ ತಾಣೆಂ ಅಂದಾಜ್ ಕೆಲೊ.

“ಸರ್ದಾರ್ ಸಿಮಾಂವ್!” ಮ್ಹಳೆಂ ರಾಕ್ವಲ್ಯಾನ್ ಅಜ್ಯಾಪ್ ಜಾವ್ನ್. “ತುಂ ಹಾಂಗಾಸರ್ ಕಿತೆಂ ಕರ್ತಾಯ್?”

“ಆಸೊಂ. ಪಯ್ಲೆಂ ಸಾಂಗ್ – ತುಂ ಕಾಂಯ್, ಮಂಗ್ಳುರ್ಗಾರ್ ಆನಿ ಕ್ರಿಸ್ತಾಂವ್?” ಸರ್ದಾರ್ ಸಿಮಾಂವ್ನ್ ವ್ಹಳೂ ವಿಚಾರ್ಲೆಂ.

“ವ್ಹಯ್ ಧನ್ಯಾ” ಆಯ್ಲಿ ಜಾಪ್. “ಹಾಂವ್ ಜಾವ್ನಾಸಾಂ, ಎಕ್ಲೊ ಮಂಗ್ಳುರ್ಗಾರ್ ಕ್ರಿಸ್ತಾಂವ್. ಕಾರ್ಕಳ್ ಮ್ಹಜ್ಯಾ ಪುರ್ವಜಾಂಚೊ ಗಾಂವ್.”

“ಬರೆಂಚ್ ಜಾಲೆಂ. ತುಕಾ ಬರೆಂ ಮಾಗ್ತಾಂ ಹಾಂವ್.”

“ಪುಣ್ ತುಂ ಹ್ಯಾ ರಾತಿಂ…”

“ಮ್ಹಜ್ಯಾ ಗಾಂವ್ ಭಾವಾ ಕಡೆನ್ ಏಕ್ ಉಪ್ಕಾರ್ ಮಾಗೊಂಕ್ ಆಯ್ಲಾಂ. ಚಡಿತ್ ಗಜಾಲಿ ಉಲಂವ್ಕ್ ಮ್ಹಾಕಾ ಆತಾಂ ಪುರ್ಸತ್ ನಾ. ಆಮ್ಕಾಂ, ಆತಾಂಚ್ ಹಾಂಗಾ ಥಾವ್ನ್ ಭಾಯ್ರ್ ವಚೊಂಕ್ ಜಾಯ್. ದೆಕುನ್ ತುಜಿ ಮಜತ್ ಜಾಯ್.”

“ನಾಂವಾಡ್ದಿಕ್ ಸರ್ದಾರ್ ಸಿಮಾಂವ್ನ್ ವಿಚಾರ್ಲೆಂ ಮ್ಹಣ್ತಚ್, ಕೋಣ್ ತೊ ಕೆನರೀನ್ ಕ್ರಿಸ್ತಾಂವ್ ಕಾಂಯ್ ಇನ್ಕಾರ್ ಕರಿತ್? ಪ್ರಭೋ, ತುಜಿ ಖಬರ್ ಹಾಂವೆಂ ಜಾಯ್ತಿ ಆಯ್ಕಲ್ಯಾ. ತುಜಿ ಭೆಟ್ ಅಶಿ ಜಾಯ್ತ್ ಮ್ಹಣ್ ಹಾಂವೆಂ ಸಪ್ಣಾಂತ್‍ಯೀ ಚಿಂತುಂಕ್ ನಾ. ತುಮಿ ಕಾಲ್ ರಾತಿಂ ಹಾಂಗಾಸರ್ ಪ್ರವೇಶ್ ಜಾತಚ್, ತುಮಿ ಕೋಣ್ ಕಿತೆಂ ಮ್ಹಳ್ಳೆಂ ಹಾಂವೆಂ ಆಯ್ಕಲೆಂ. ಪಯ್ಲೆಂ ಕಳಿತ್ ಆಸ್‍ಲ್ಲೆಂ ಜಾಲ್ಯಾರ್, ತುಮ್ಕಾಂ ಭಿತರ್ ಯೇಂವ್ಕ್ ಹಾಂವ್ ಸೊಡ್ತೊಂ ನಾ. ಕಿತ್ಯಾಕ್, ಟಿಪ್ಪುಚೆ ತುಮಿ ನಾಂವಾಡ್ದಿಕ್ ಸರ್ದಾರ್ ಮ್ಹಣ್ ಸಂಸಾರಾಕ್ ಕಳಿತ್ ಆಸ್‍ಲ್ಲ್ಯಾ ವರ್ವಿಂ – ಹಾಂಗಾ ತುಮಿ ಪ್ರವೇಶ್ ಜಾಲ್ಲ್ಯಾನ್, ದುಸ್ಮಾನ್ ಆನಿ ಘಾತ್ಕಿ ಮುಸಾಂಚ್ಯಾ ಫೊಳಿಯೆಂತ್ ತುಮಿ ಪಾಯ್ ದವರ್‌ಲ್ಲೆಪರಿಂ ಜಾಲಾಂ.”

“ತೆಂ ಆಮಿ ಜಾಣಾಂವ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ತುವೆಂ ಅಶೆಂ ಉಲಯಿಲ್ಲೆಂ ಆಯ್ಕೊನ್ ಮ್ಹಾಕಾಯೀ ವರ್ತೊ ಸಂತೊಸ್. ಹಾಂವೆಂ ಪಯ್ಲೆಂಚ್ ಮ್ಹಳ್ಳೆಪರಿಂ, ಚಡಿತ್ ಗಜಾಲಿ ಉಲಂವ್ಕ್ ಆತಾಂ ಪುರ್ಸತ್ ನಾ. ಜಾಲ್ಯಾರೀ…” ಚೇರ್ ಖಾನಾಕ್ ತಾಣೆಂ ಖಾಂದ್ಯಾ ವಯ್ಲೊ ಗಳವ್ನ್ ಸಕಯ್ಲ್ ದವರ್ಲೊ. “ಜಾಲ್ಯಾರೀ – ತುಜೆಂ ನಾಂವ್, ಆನಿ ತುಂ ಹಾಂಗಾಸರ್ ಚಾಕ್ರೆಕ್ ಕಸೊ ಪಾವ್ಲೊಯ್ ಮ್ಹಳ್ಳೆಂ ಸಮ್ಜೊಂಕ್ ಅಪೇಕ್ಷಿತಾಂ ಹಾಂವ್.”

ರಾಕ್ವಲಿ ಸಗ್ಳೊ ಮೋವ್ ಜಾಲೊ.

“ಮ್ಹಜೆಂ ನಾಂವ್ – ಕಾರ್ಕಳ್ಚೊ ಅಲೆಕ್ಸ್ ಕಾಮತ್” ಸಾಂಗ್ಲೆಂ ತಾಣೆಂ. “ಆಮ್ಚ್ಯಾ ಪುರ್ವಜಾಂಕ್ – ಮ್ಹಜ್ಯಾ ಆವಯ್ ಬಾಪಾಯ್ಕ್ ಆನಿ ಸೆಜಾರ‍್ಯಾಂಕ್ ಟಿಪ್ಪುಚ್ಯಾ ಶಿಪಾಯಾಂನಿ ಧರ್ತಾನಾ, ಹಾಂವ್ ಚುಕವ್ನ್ ಧಾಂವ್ಲೊಂ. ಉಪ್ರಾಂತ್ ಥೊಡೆ ದೀಸ್, ಕಾರ್ಕಳ್ಚ್ಯಾ ಸಾಂ ಲೊರೆನ್ಜೊ ಆನಿ ಬಿದ್ರುಲ್‍ಚ್ಯಾ ಸಾಂತಾ ಖುರ್ಸಾಚ್ಯಾ ಫಿರ್ಗಜಾಂ ಮಧ್ಲ್ಯಾ ಕ್ರಿಸ್ತಾಂವಾಂಕ್ ಮಜತ್ ದೀಂವ್ಕ್ ಹಾಂವೆಂ ಪ್ರಯತ್ನ್ ಕೆಲೆಂ. ಶೆಕಿಂ ಮ್ಹಜೆರ್‌ಯೀ ತಡೀಪಾರ್ ಹುಕುಮ್ ಜಾರಿ ಜಾಲ್ಲ್ಯಾನ್, ದುಸ್ರೊ ಉಪಾಯ್ ನಾಸ್ತಾನಾ ಹಾಂವ್, ದಕ್ಷಿಣಾಕ್ ಪೋಳ್ನ್ ಆಯ್ಲಾಂ, ಆನಿ ಅಸೊ ಹ್ಯಾ ರಾಯಾಚ್ಯಾ ಚಾಕ್ರೆಂತ್ ರಾವ್ಲೊಂ.”

“ಹಾಂಗಾಸರ್ ಹೆರ್ ಕ್ರಿಸ್ತಾಂವ್ ಆಸಾತ್‍ಗೀ?”

“ಭೋವ್ ಥೊಡೆ ಆಸಾತ್.”

“ತಾಂಚೆ ಆತ್ಮಿಕ್ ಕಾಯ್ದೆ?”

“ತಾಂಕ್ತಾ ತ್ಯಾ ಭಾಶೆನ್ – ಆಪಾಪ್ಲ್ಯಾ ಕೊಶೆಡ್ದಾ ಪರ್ಮಾಣೆಂ ತೆ ಪಾಳ್ತಾತ್. ವರ್ಸಾಂತ್ ಏಕ್ ದೋನ್ ಪಾವ್ಟಿಂ, ತಲ್ಚೇರ್ ಥಾವ್ನ್ ಗೇಸ್ಕನ್ ಅಂತೊನಿಯೋ ದೆ ಕುನ್ಹಾ ಮ್ಹಳ್ಳೊ ಫಿಂರ್ಗಿ ಪಾದ್ರಿ ಹ್ಯಾ ವಾಟೆನ್ ಪಯ್ಣ್ ಕರ್ನ್ ವೆತಾ, ಆನಿ ಗುಪಿತ್ ಆಮ್ಕಾಂ ಸಾಕ್ರಾಮೆಂತ್ ವಾಂಟ್ತಾ.”

“ಸಂತೊಸ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ತಿ ಖಬರ್ ಆನ್ಯೇಕ್ ಪಾವ್ಟಿಂ ಉಲವ್ಯಾಂ. ಪುಣ್ ಆತಾಂ, ಮ್ಹಾಕಾ ಆನಿ ಮ್ಹಜ್ಯಾ ಸಾಂಗಾತ್ಯಾಂಕ್ ಹಾಂಗಾ ಥಾವ್ನ್ ಭಾಯ್ರ್ ವಚೊಂಕ್ ಜಾಯ್. ತೆ ಆತ್ತಾಂ ಘಡ್ಯೆ ಯೆಂವ್ಚೆ ಜಾಲೆ. ಚಡಿತ್ ವಿವರ್ ದೀಂವ್ಕ್ ಪುರ್ಸತ್ ನಾ.”

“ವಿವರ್ ನಾಕಾ. ತುಮಿ ವಚ್ಯೆತ್” ಮ್ಹಣಾಲೊ ಅಲೆಕ್ಸ್ ಕಾಮತ್. “ಪುಣ್ ತುಮ್ಕಾಂ ಹಾಂವೆಂ ಸೊಡ್ಲಾಂ ಮ್ಹಣ್ ಕಳನಾಯೆ. ತುಮಿ ಮ್ಹಜೆ ಹಾತ್ ಪಾಯ್ ಆನಿ ತೋಂಡ್ ಬಾಂಧುನ್ ಮ್ಹಾಕಾ ಹಾಂಗಾ ಘಾಲಿಜಾಯ್, ಆನಿ ಭಾಯ್ರ್ ಚಲಜಾಯ್.”

“ಸಮ್ಜಲೆಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. ತಿತ್ಲ್ಯಾರ್ ಅಂತುಲೊ ಆನಿ ರಾಮಪ್ಪ, ಘೊಡ್ಯಾಂಕ್ ಘೆವ್ನ್ ಥಂಯ್ಸರ್ ಪಾವ್ಲೆ: “ಆರ‍್ಯದ್ ಇರಟತ್ತ್?”

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel