ಇಂಫೆರ್ನಾಚಿಂ ದಾರಾಂ – 11: ಬಲಿದಾನಾಂತ್ ಏಕ್ ಲ್ಹಾನ್ ವಾಂಟೊ

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 11
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 11: ಬಲಿದಾನಾಂತ್ ಏಕ್ ಲ್ಹಾನ್ ವಾಂಟೊ

ದುರದೃಷ್ಟಾನ್ ಜಾವ್ಯೆತ್, ವಾ ಕ್ರಿಸ್ತಾಂವಾಂಚೆರ್ ಆಯಿಲ್ಲೆ ಕಷ್ಟ್, ಕರ್ಕರೆ ಆನಿ ಕರಂದಾಯ್ ವೆಗಿಂ ಆಖೇರ್ ಜಾಯ್ನಾಯೆ ಮ್ಹಳ್ಳ್ಯಾ ಕಾರಣಾ ಖಾತಿರ್ ಜಾವ್ಯೆತ್, ನ್ಹಂಯ್ತ್ ಉಡ್‍ಲ್ಲೊ ಷೇರ್ ಖಾನ್, ಸರ್ದಾರ್ ಸಿಮಾಂವ್ಚ್ಯಾ ಹಾತಾಂತ್ಲೊ ಚುಕ್ಲೊ.

ತೊ ಉಡ್‍ಲ್ಲೊ ಆವಾಜ್, “ಧರಾ ತಾಕಾ!” ಮ್ಹಣ್ ಸರ್ದಾರಾನ್ ದಿಲ್ಲ್ಯಾ ಹುಕ್ಮೆ ಪಾಟಾಪಾಟ್‍ಚ್ ಆಯ್ಕೊನ್, ಹೊಡ್ಯಾಂತ್ಲೊ ಎಕ್ಲೊ ಸವಾರ್‌ಯೀ ನ್ಹಂಯ್ತ್ ಉಡೊನ್ ಉಪ್ಯೆಲ್ಲೊ. ಪುಣ್ ಉಜ್ವಾಡ್ ಕಸಲೊಯೀ ಫಾಂಕಂವ್ಕ್ ಅವ್ಕಾಸ್ ನಾತ್‍ಲ್ಲ್ಯಾ ವರ್ವಿಂ, ಆನಿ ಷೇರ್ ಖಾನ್, ಜಿವಾಚ್ಯಾ ಅಕ್ಲಾಸಾಕ್ ಉಡ್ತಾನಾ, ಹೊಡಿಂ ಆಸ್‍ಲ್ಲಿ ಕೂಸ್ ಚುಕೊನ್, ಉಳ್ಟ್ಯಾ ಬಗ್ಲೆನ್ ಉಡ್‍ಲ್ಲೊ ಜಾಲ್ಲ್ಯಾನ್, ಹಾಂಚ್ಯಾ ಹಾತಾಂತ್ಲೊ ತೊ ಚುಕ್ಲೊ. ಕಾಂಯ್ ಬುಡೊನ್ ತರೀ ಮೆಲೊ ಜಾವ್ಯೆತ್ ಮ್ಹಣ್ ಚಿಂತುಂಕ್‍ಯೀ ಕಾರಣ್ ಆಸ್‍ಲ್ಲೆಂ.

ತಾಕಾ ಧರ್ಚೆಂ ವಾ ಸೊಧುನ್ ಕಾಡ್ಚೆಂ ಕಾಮ್ ಸವಾರಾಂಕ್ ಫರ್ಮಾವ್ನ್ ಜಾತಚ್, ಸರ್ದಾರ್ ಸಿಮಾಂವ್ನ್ ಪಾಟಿಂ ಘುಂವೊನ್, ಭಿತರ್ಲ್ಯಾ ಆವರಾಕ್ ಗುಮಾನ್ ದಿಲೆಂ.

ಗಯ್ರ್ಯಾ ತ್ಯಾ ಉಜ್ವಾಡಾಂತ್, ತೆಂ ದೃಶ್ಯ್ ತಾಣೆಂ ದೆಖ್ಲೆಂ.

ಮನ್ ತಾಚೆಂ ಚುರ್ಚುರ್ಲೆಂ, ಕ್ರೋಧ್ ತಾಚೊ ಖತ್ಕತ್ಲೊ, ಆನಿ ಸವ್ಕಾಸ್ ಎಕೇಕ್ ಮೇಟ್ ತಾಣೆಂ ಫುಡೆಂ ದವರ್ಲೆಂ. ಜಮೆದಾರ್ ಅಂತುಲೊ ಪಡ್ವಳ್ ತಾಚ್ಯಾ ಪಾಟಾಪಾಟ್ ಶ್ವಾಸ್ ಧರ್ನ್ ಆಸ್‍ಲ್ಲೊ.

ತಾಣಿಂ ದೊಗಾಂಯ್ನಿ ತೆಂ ದೃಶ್ಯ್ ದೆಖ್ಲೆಂ.

ತಾಣಿಂ ದೊಗಾಂಯ್ನಿ ತಿ ಬೋಬ್, ತೆಂ ರೋದನ್, ತೆಂ ಪ್ರಾರ್ಥನ್ ಆಯ್ಕಲೆಂ…

“ಉಪ್ಕಾರ್ ತುಮ್ಚೊ..! ಜೆಜು!”

ಸರ್ದಾರ್ ಸಿಮಾಂವ್ನ್ ತಲ್ವಾರ್ ಕೋಶಿಯೆಂತ್ ಚೆಪ್ಲಿ, ಆನಿ ಎಕಾ ಕದಮಾನ್ ತಿಚೆ ಸರ್ಶಿನ್ ತೊ ಪಾವ್ಲೊ. ಅಂತುಲೊ ಪಡ್ವಳ್, ರಾವ್‍ಲ್ಲೆ ಕಡೆನ್‍ಂಚ್ ರೂಕ್ ಜಾವ್ನ್, ಕಾನ್-ದೊಳೆ ಸೊಡುನ್ ಪಳೆಂವ್ಕ್ ಲಾಗ್ಲೊ.

ತಿಣೆಂ ತಕ್ಲಿ ಉಕ್ಲುಂಕ್ ನಾ.

ಬಾಂಕುಲಾರ್ ಥಾವ್ನ್ ಸಕಯ್ಲ್ ಪಡೊನ್, ಗಳೊನ್, ಮುದೊ ಜಾವ್ನ್, ದೊಳೆ ಧಾಂಪುನ್ ಆನಿ ಹರ್ದ್ಯಾಕ್ ಹಾತ್ ದಾಂಬುನ್ ತಿ ಸುಸ್ಕಾರ್ತಾಲಿ. ಲಾಗ್ಸರ್ ಏಕ್ ಮುರ್ಮುರೆಂ ಕೊಲಿತ್ ಧುಂವರ್ತಾಲೆಂ.

ಸರ್ದಾರ್ ಸಿಮಾಂವ್ ತಿಚ್ಯಾ ಲಾಗಿಂ ಪಾವ್ತಚ್ ತಿ ಉಲಯ್ಲಿ: “ಉಪ್ಕಾರ್ ತುಮ್ಚೊ!”

“ಮೋನಿಕಾ!” ಸರ್ದಾರಾಚೊ ಸ್ವರ್ ಸಾರ್ಕೊ ಭಾಯ್ರ್ ಯೇಂವ್ಕ್ ಸಕ್ಲೊ ನಾ.

“ಉಪ್ಕಾರ್ ತುಮ್ಚೊ!” ತಿ ಪರಾತ್ಲಿ. “ತುಮ್ಚಿಚ್ ಆವಯ್, ಭಯ್ಣ್ ವಾ ಧುವ್ ಮ್ಹಣ್ ಚಿಂತುನ್ ಮ್ಹಜೊ ಮಾನ್ ರಾಕಾ… ಮ್ಹಜೊ ಜೀವ್ ಕಾಡ್ಯಾ… ಉಪ್ಕಾರ್…”

“ಮೋನಿಕಾ!” ಸರ್ದಾರಾನ್, ದಯಾಳಾಯೆನ್ ಪುಣ್ ಧೆಂಕ್ಣೊ ಮಾರ್ಲೊ. ತಿಚ್ಯಾ ದೊನೀ ಬಾವ್ಳ್ಯಾಂಕ್ ಧರ್ನ್ ತಾಣೆಂ ತಿಕಾ ನೀಟ್ ಕೆಲೆಂ.

“ಮೋನಿಕಾ, ಭಿಯೆನಾಕಾ…”

ತಿಂ ಉತ್ರಾಂ ತಿಚ್ಯಾ ಕಾನಾಂತ್ ರಿಗ್ಲಿಂ, ತಶೆಂ ಕ್ರಮೇಣ್ ಮತಿಕ್ ಗೆಲಿಂ ಆನಿ ತಿಕಾ ಚಿಕ್ಕೆ ಜಾಗ್ ಜಾಲಿ.

ದೊಳೆ ತಿಣೆಂ ಉಗ್ತೆ ಕೆಲೆ. ತಕ್ಲಿ ಸವ್ಕಾಸ್ ತಿಣೆಂ ಉಕಲ್ಲಿ.

“ಮೋನಿಕಾ ಭಯ್ಣಿ, ಹಾಂವ್ – ಭಿಯೆನಾಕಾ” ಮ್ಹಣಾಲೊ ಸರ್ದಾರ್.

ಸ್ವಪಣ್ ವಾ ಜಾಗ್ವಣ್ ಮ್ಹಣ್ ಪಾತ್ಯೆಂವ್ಕ್ ಕಷ್ಟಲ್ಲೆಪರಿಂ, ತಿ ಮಾನಿನ್, ಉತ್ರಾಂ ಸುಟನಾಸ್ತಾನಾ, ದೊಳೆ ರುಂದಾವ್ನ್ ಥೊಡೊ ವೇಳ್ ತಾಕಾಚ್ ಪಳೆವ್ನ್ ರಾವ್ಲಿ.

ಸರ್ದಾರಾನ್, ಘಡ್ಯೆನ್ ತಿ ದೀಶ್ಟ್ ಬಿರ್ಮತಿನ್ ಆರಾಯ್ಲಿ. ತಿಣೆಂ ನ್ಹೆಸ್‍ಲ್ಲೊ ಬುರ್ಖಾ, ತಿಚ್ಯಾ ಆಂಗಾರ್ ಥಾವ್ನ್ ವೆಗ್ಳೊ ಜಾವ್ನ್, ಪಿಂಜೊನ್, ಬಗ್ಲೆನ್ ಪಡೊನ್ ಆಸ್‍ಲ್ಲೊ. ತಿಚಿ ಬಾಜುಯೀ ಅರ್ಧಿ ಪಿಂಜೊನ್, ಭುಜ್ ಆನಿ ಪಾಟ್ ಅನಾವೃತ್ ದಿಸ್ತಾಲಿಂ, ಆನಿ ರೊತಾಂಚ್ಯಾ ಮಾರಾಂನಿ ಕಿಂಡೆವ್ನ್ ಹಾಕ್ ದಿತಾಲಿಂ. ತಿಚ್ಯಾ ಕಾನ್ಸುಲಾಚೆರ್, ಥಾಪ್ಡಾಯಿಲ್ಲಿಂ ಬೊಟಾಂ ಉದೆವ್ನ್ ತಾಂಬ್ಡಿಂ ರಾವ್‍ಲ್ಲಿಂ. ತಿಚೊ ವೋಂಟ್ ಫುಟೊನ್ ಆನಿ ನಾಕಾಂತ್ಲ್ಯಾನ್ ಏಕ್ ದೋನ್ ರಗ್ತಾ ಥೆಂಬೆ, ಮನ್ ನಾಸ್ತಾನಾ ಪಾಜಾರ್ತಾಲೆ.

ನಿಜಾಯ್ಕೀ, ಬಂದಡೆಚ್ಯಾ ವೆಳಾರ್, ನಿತಿಚ್ಯಾ ನಿಬಾನ್ ಮನ್ಶ್ಯಾಂಚ್ಯಾ ಜಿವಾಂಕ್ ಮೋಲ್ ನಾತ್‍ಲ್ಲೆಂ ಖರೆಂ. ಪುಣ್ ಹೆರ್ ಅಬ್ಳಾಸ್ ಆನಿ ಅಂಗಾಲಾಪಾ ವರ್ವಿಂ ಅಬಲ್ ಸ್ತ್ರೀಯಾಂಚೆರ್ ತಶೆಂ ಕೋಮಲ್ ಬಾಳ್ಶ್ಯಾಂಚೆರೀ ಅಕ್ರಮ್ ಆನಿ ಅತ್ಯಾಚಾರ್ ಚಲ್ಚಿ ರೀತ್ ಅಧಿಕ್ ಭಿರಾಂಕುಳ್ ಜಾಂವ್ಕ್ ಪಾವ್‍ಲ್ಲಿ ಮ್ಹಳ್ಳೆಂ ಸತ್, ಪರ್ತ್ಯಾನ್ ಏಕ್ ಪಾವ್ಟಿಂ ಸರ್ದಾರ್ ಸಿಮಾಂವ್ಚ್ಯಾ ಕಾಳ್ಜಾಂತ್ ಕಾಂಡುಂಕ್ ಲಾಗ್ಲೆಂ.

“…ಕ್ರಿಸ್ತಾಂವ್ ವೀರಾಂಚ್ಯಾ ರಗ್ತಾಂತ್ ಆನಿ ವಿಧ್ವಿಂಚ್ಯಾ ದುಖಾಂತ್ ತುಜೆಂ ದರ್ಬಾರ್ ವ್ಹಾಳೊಂಕ್ ಲಾಗ್ಲಾಂ..!” ಥೊಡ್ಯಾಚ್ ದಿಸಾಂ ಆದಿಂ, ದರಿಯಾ ದೌಲತಾಂತ್ ಮೋರ್ನ್ ಪಾವ್‍ಲ್ಲ್ಯಾ ತ್ಯಾ ವೀರ್ ಮೊಬ್ಲಿ ಅಂತೊನ್ ಶೆಣೈಚಿಂ ತಿಂ ನಿಮಾಣಿಂ ಉತ್ರಾಂ, ಹಠಾತ್ತ್ ಸರ್ದಾರಾಚ್ಯಾ ಮತಿಂತ್ ಆಯ್ಲಿಂ.

“ಮೋನಿಕಾ!” ಮ್ಹಣಾಲೊ ತೊ ಹಾಳ್ವಾಯೆನ್ ಧಯ್ರ್ ದೀವ್ನ್ ಆನಿ ಭುಜವ್ನ್.

“ಸರ್ದಾರಾ!” ಸುಸ್ಕಾರ್ಲಿ ತಿ, ಸಂತೊಸಾನ್. ತಾಚಿ ತಿಕಾ ವಳಕ್ ಮೆಳ್ಳಿ. ತಾಚ್ಯಾ ಆಧಾರಾನ್ ದಿಂಬಿಯಾಂಚೆರ್ ತಿ ಉಟ್ಲಿ, ಕಾಂಪೊನ್ ಆನಿ ಕಸ್ಕಸೊನ್.

“ಸ-ಸರ್ದಾರ್ ಭಾವಾ..!”

“ವ್ಹಯ್ ಭಯ್ಣಿ, ರಡನಾಕಾ…”

“ವೆರೊನಿಕಾಬಾಯ್…”

“ಹಾಂವ್ ಜಾಣಾಂ. ಖಂತ್ ಕರಿನಾಕಾ.”

“ಅರ್ಗಾಂ, ಅರ್ಗಾಂ ತುಕಾ ಭಾಗೆವಂತ್ ಖುರ್ಸಾ…” ಉಸ್ವಾಸ್ಲಿ ತಿ. ತಶೆಂಚ್ ತಿಣೆಂ ಏಕ್ ದೀಗ್ ಶ್ವಾಸ್ ಸೊಡ್ಲೊ, ಆನಿ ಸರ್ದಾರ್ ಸಿಮಾಂವ್ನ್ ಧರ್‌ಲ್ಲೆಪರಿಂಚ್, ಮತ್ ಚುಕೊನ್ ಸ್ತಬ್ದ್ ತಿ ಜಾಲಿ.

ಲಗ್‍ಬಗ್ ದೋನ್ ದೀಸ್, ತ್ಯಾ ಕೋಮಲ್ ಕುಡಿನ್ ಆನಿ ಮತಿನ್ ಸೊಸ್ಯೆತ್ ತಿತ್ಲೆಂ ಸೊಸುನ್ ಜಾಲ್ಲೆಂ. ಕ್ರಮೇಣ್ ಆಪ್ಲೊ ಮಾನ್ ಆನಿ ಜೀವ್ ಸುರಕ್ಷಿತ್ ಆಸಾತ್ ಮ್ಹಳ್ಳ್ಯಾ ಸಂತೊಸಾನ್ ತಿಚಿ ಮತ್ ಚುಕ್‍ಲ್ಲ್ಯಾಂತ್ ಅಜ್ಯಾಪ್ ನಾ. ಸರ್ದಾರ್ ಸಿಮಾಂವ್ಕ್‌ಯೀ ತೆಂ ಸಮ್ಜಲೆಂ. ಹಾಳ್ವಾಯೆನ್ ತಿಕಾ, ವಿಶೆವ್ ಘೆಂವ್ಕ್ ಜಾಯ್ಶೆಂ ನಿದಾವ್ನ್, ಉದಾಕ್ ಹಾಡವ್ನ್, ಪರಿಸ್ಥಿತೆ ತೆಕಿದ್ ಸುಶ್ರೂಶಾ ತಾಣಿಂ ಕೆಲಿ.

ನಿಜಾಯ್ಕೀ, ಮಾನಿನ್ ಮೋನಿಕಾ ಕುವೆಲ್ ತೆಲ್ಲಿಸಾನ್, ಪಾಟ್ಲ್ಯಾ ಥೊಡ್ಯಾ ಘಡಿಯಾಂನಿ ಭೊಗ್‍ಲ್ಲೆ ಕಷ್ಟ್ ಆನಿ ಅಕ್ಲಾಸ್ ಭೋವ್ ಕಠೋರ್ ಜಾವ್ನಾಸ್‍ಲ್ಲೆ.

ನಿಜಾಯ್ಕೀ, ಇಂಫೆರ್ನಾಚ್ಯಾ ದಾರಾಂತ್ಲ್ಯಾನ್ ಮ್ಹಳ್ಳೆಪರಿಂ ಪಾಶಾರ್ ಜಾವ್ನ್ ತಿ ಆಯಿಲ್ಲಿ. ಉಪ್ರಾಂತ್ ಜಾಲ್ಯಾರೀ, ಸರ್ದಾರ್ ಸಿಮಾಂವ್ಕ್ ಖಬರ್ ಸಾಂಗ್ತಾನಾ, ಸರ್ವ್ ವಿವರ್ ತಿಣೆಂ ದೀಂವ್ಕ್ ನಾತ್‍ಲ್ಲೊ. ಮಾನೆಸ್ತ್ ಘರಾಣ್ಯಾಂತ್ಲಿ ಸ್ತ್ರೀ ತಿ ಜಾವ್ನಾಸ್‍ಲ್ಲಿ. ಹೆರಾಂ ಥಾವ್ನ್ ಸಹಾನುಭೂತಿ ವಾ ಭುಜಾವಣ್ ಅಪೇಕ್ಸುನ್ ರಡ್ಚೆಂ ವಾ ಆಪ್ಲೆ ಅನುಭವ್ ಮೀಟ್ ಮಿರ್ಸಾಂಗ್ ಲಾವ್ನ್ ದಾದ್ಲ್ಯಾಂಕ್ ಸಾಂಗ್ಚೆಂ ಸಂಯ್ಬ್ ಆನಿ ತರ್ಬೆತಿ ತಿಕಾ ನಾತ್‍ಲ್ಲಿ.

ಪುಣ್, ಗರ್ಜೆಚೆ ವಿಷಯ್ ಸರ್ದಾರ್ ಸಿಮಾಂವ್ನ್ ಸಮ್ಜೊನ್ ಘೆತಾನಾ, ಮೋನಿಕಾ ಕುವೆಲ್-ತೆಲ್ಲಿಸಾನ್, ‘ಜಲಬಾಲೆ’ ಮಂಜೆಂತ್ ಥೊಡೊ ವೇಳ್ ಭೊಗ್‍ಲ್ಲ್ಯಾ ಕಷ್ಟಾಂ ಆನಿ ಕಳ್ವಳ್ಯಾಂಚೆಂ ದೃಶ್ಯ್, ಮತಿಂತ್ ಪಿಂತ್ರಾವ್ನ್ ಘೆವ್ನ್ ಸಮ್ಜೊಂಕ್ ತಾಕಾ ತ್ರಾಸ್ ಜಾಂವ್ಕ್ ನಾಂತ್.

ಉರ್ವಾಚ್ಯಾ ಮೊಳ್ಯಾಂತ್ಲಿ ತಿಕಾ ಹಾಡ್ನ್ ಮಂಜೆಂತ್ ಕೈದಿ ಕೆಲ್ಯಾ ಉಪ್ರಾಂತ್, ಷೇರ್ ಖಾನಾನ್ ಆನಿ ತಾಚ್ಯಾ ಸಾಂಗಾತ್ಯಾಂನಿ ಆಪ್ಲಿಂ ಕಾಮಾಂ ಆನಿ ದುಷ್ಟ್ ಇರಾದೆ ತುರ್ತಾನ್ ಜಾರಿ ಕರುಂಕ್ ಮನ್ ಕೆಲೆಂ.

ಫಾಂತ್ಯಾಚ್ಯಾ ಭರ್ತೆ ವೆಳಾರ್, ಬಂದ್ರಾಂತ್ಲಿ ಮಂಜಿ ಭಾಯ್ರ್ ಕಾಡ್ನ್, ತೆನ್ಕಾಕ್ ಪಯ್ಣ್ ಕರುಂಕ್ ತಾಣಿಂ ಚಿಂತುನ್ ಥಾರಾಯಿಲ್ಲೆಂ, ತ್ಯಾ ತೆಕಿದ್ ತಾಂಡೇಲ್ ಆನಿ ಕಲಾಸಿ ತಯಾರಾಯ್ ಕರ್ತಾಲೆ. ತ್ಯಾ ವೆಳಾರ್, ಷೇರ್ ಖಾನ್ ಆನಿ ತಾಚೆ ದೋಗ್ ಸಾಂಗಾತಿ ಸಕಯ್ಲ್ಯಾ ಆವರಾಂತ್ ದೆಂವೊನ್, ಮೋನಿಕಾಚಿ ಝಡ್ತಿ ಕರುಂಕ್, ಆನಿ ಕಸಲ್ಯಾ ಉಪಾಯಾಂನಿ ವಾ ಜಬರ್‌ದಸ್ತೆನ್ ಜಾಲ್ಯಾರೀ ತಿಚೆಂ ‘ತೋಂಡ್ ಸೊಡಂವ್ಕ್’ ಆಯ್ತೆ ಜಾಲ್ಲೆ.

“ನಸ್ರಾನಿ ಬಾಯ್ಲೇ… ತುಜೆ ಕಡೆನ್ ಸುಖ್ ದುಖ್ ಉಲಂವ್ಕ್ ಯೇಂವ್ಕ್ ನಾ ಹಾಂವ್… ಆಮ್ಕಾಂ ಚಡ್ ವೇಳ್ ನಾ…” ಮ್ಹಣ್ತಾನಾ, ಭಾಯ್ಲ್ಯಾನ್ “ಹೋಶ್ಯಾರ್!” ಆವಾಜ್ ಜಾಲ್ಲೊ. ಸರ್ಕಾರಿ ತಪಾಸಣಾಚೆ ಜಣ್ ಆಯಿಲ್ಲೆ. ಆವರಾಚೆಂ ದಾರ್ ಬಂದ್ ಕರ್ನ್, ಭಿಯಾನ್ ಆನಿ ಆಕಾಂತಾನ್ ಭಾಯ್ಲೆಂ ಸಂಭಾಷಣ್ ತಿಣೆಂ ಆಯ್ಕಲ್ಲೆಂ.

ಏಕ್ ದೋನ್ ಪಾವ್ಟಿಂ, ಬೋಬ್ ಘಾಲ್ನ್ ಪುಣೀ ಭಾಯ್ಲ್ಯಾಂಕ್ ಜಾಗಂವ್ಕ್ ತಿಕಾ ಮನ್ ಜಾಲೆಂ. ಪುಣ್ ತೆಯೀ ಸರ್ಕಾರಾಚೆಚ್ ಸೆವಕ್ ಜಾಲ್ಲ್ಯಾನ್, ತಿಕಾ ಸುಟ್ಕಾ ಲಾಭ್ಚೊ ಸಂಭವ್ ನಾ ಮ್ಹಣ್ ಸಮ್ಜೊನ್ ತಿ ಥಂಡ್ ರಾವ್ಲಿ.

ಸರ್ಕಾರಿ ದೂತ್, ಜಾಗ್ವಣ್ ದೀವ್ನ್ ಗೆಲ್ಲ್ಯಾ ಥೊಡ್ಯಾ ವೆಳಾ ಉಪ್ರಾಂತ್ ಷೇರ್ ಖಾನ್ ಆನಿ ತಾಚೆ ಸಾಂಗಾತಿ, ಪರ್ತ್ಯಾನ್ ಸಕಯ್ಲ್ ಯೇವ್ನ್, ಮೋನಿಕಾ ಆಸ್‍ಲ್ಲ್ಯಾ ಆವರಾಚೆಂ ದಾರ್ ಖೊಟಾವ್ನ್ ಭಿತರ್ ಸರ್‌ಲ್ಲೆ.

“ಜೆಜೂ!” ಮ್ಹಣ್ ಅಕ್ಲಾಸೊನ್, ಉಪ್ರಾಂತ್ ಅರ್ಧಿಕುರಿ ಕಿಂಕ್ರಾಟ್ ತಿಣೆಂ ದಿಲ್ಲಿ…

ಷೇರ್ ಖಾನ್ ಶೀದಾ ತಿಚ್ಯೆ ಸರ್ಶಿನ್ ಆಯ್ಲೊ. ಹೆರ್ ದೋಗ್ ಜಣ್ ಚಿಕ್ಕೆ ಪಾಟಿಂ ರಾವ್ಲೆ. ತೊ ಲಾಗಿಂ ಯೆತಚ್, ಮೋನಿಕಾ ಭಿಯಾನ್ ಉಬಿ ರಾವ್ಲಿ. ಭಿಯಾಚಿಂ ಖುಣಾಂ ಭಾಯ್ಲ್ಯಾನ್ ದಾಕಯ್ನಾಯೆ ಮ್ಹಣ್ ತಿಣೆಂ ನಿಚೆವ್ ಕೆಲೊ.

ಷೇರ್ ಖಾನಾನ್ ಆಪ್ಲ್ಯಾ ಹಾತಾಂತ್ಲಿ ತಲ್ವಾರ್ ಬಗ್ಲೆಚ್ಯಾ ಬಾಂಕುಲಾರ್ ಉಡಯ್ಲಿ. ತಾಚ್ಯಾ ಉಜ್ವ್ಯಾ ಬಾವ್ಳ್ಯಾಕ್ ಪಟ್ಟಿ ಆಸ್‍ಲ್ಲ್ಯಾನ್, ತೊ ಹಾತ್ ಸಾರ್ಕೊ ಘುಂವನಾತ್‍ಲ್ಲೊ.

ಮೋನಿಕಾ ಸರ್ಶಿನ್ ತೊ ಆಯ್ಲೊ. ದಾವೊ ಹಾತ್ ತಾಣೆಂ ಉಬಾರ್ಲೊ, ಆನಿ ತಿಚ್ಯಾ ಬುರ್ಖಾಚೆಂ ಮುಖಾವರಣ್ ಧರ್ನ್ ತಾಣೆಂ ವೊಡ್ಲೆಂ. ಬುರ್ಖಾ ಪಿಂಜೊನ್ ತಾಚ್ಯಾ ಹಾತಾಂತ್ ಆಯ್ಲೊ. ತೊ ತಾಣೆಂ ತೆವ್ಶಿನ್ ಉಡಯ್ಲೊ. ಮೋನಿಕಾಚೆ ಲಾಂಬ್ ಕೇಸ್ ಸುಟೊನ್ ತಿಚ್ಯಾ ಭುಜಾಂಚೆರ್ ಆನಿ ಪಾಟಿಚೆರ್ ವಿಸ್ಕಳೊನ್ ಗಳ್ಳೆ.

ಕ್ಷಣ್‍ಭರ್ ತಿಕಾಚ್ ನದರ್ ದೀವ್ನ್ ತೊ ರಾವ್ಲೊ.

“ಹ್ಹೆ-ಹ್ಹೇ!” ಕೆಲೆಂ ತಾಣೆಂ ಉಪ್ರಾಂತ್. “ಚಿಂತ್‍ಲ್ಲೆಂ ಏಕ್, ಆನಿ ಜಾಲೆಂ ದುಸ್ರೆಂಚ್. ಹಾಂಗಾಸರ್ ಆಮ್ಕಾಂ ಚಡ್ ವೇಳ್ ರಾವೊಂಕ್ ಜಾಯ್ನಾ. ತುಕಾ ಕಾಂಯ್ ಬಾಧಕ್ ವಾ ಹಿಂಸಾ ದೀನಾಸ್ತಾಂ ತೆನ್ಕಾಕ್ – ಹುಕ್ಮೆ ಪ್ರಕಾರ್, ಭಾಸಾಯಿಲ್ಲ್ಯಾ ಜಾಗ್ಯಾಕ್ – ಹಾಂವ್ ವ್ಹರುಂಕ್ ತಯಾರ್ ಆಸಾಂ. ಪುಣ್…”

ತೊ ಚಿಕ್ಕೆ ರಾವ್ಲೊ.

ಮೋನಿಕಾನ್ ಜಾಪ್ ಕೆಲಿ ನಾ.

“ಪುಣ್” ಮುಖಾರ್ ಉಲಯ್ಲೊ ತೊ. “ತುಕಾ ಹಾಂವೆಂ, ತುಜಿ ಭಯ್ಣ್ ಆಸ್‍ಲ್ಲೆ ಕಡೆನ್ ವ್ಹರ್ಚೆಂ ವಾ ಹಾಂಗಾಚ್ ಸೊಡ್ಚೆಂ – ತುಜೆರ್‌ಚ್ ಆಸಾ.”

ತಿ ಉಲಂವ್ಕ್ ನಾ. ಭಯ್ಣ್ ವೆರೊನಿಕಾ ಜೀವ್ ಆಸಾ ಮ್ಹಳ್ಳೆಂ ಆಯ್ಕತಚ್ ತಿಕಾ ಚಿಕ್ಕೆ ಸಮಾಧಾನ್ ಜಾಲೆಂ.

“ಕಿತ್ಯಾಕ್ ಉಲಯ್ನಾಂಯ್?” ಧೆಂಕ್ಣೊ ಮಾರ್ಲೊ ತಾಣೆಂ. “ತುಜಿ ಭಯ್ಣ್ ಆಸ್‍ಲ್ಲೆ ಕಡೆನ್ ವಚೊಂಕ್, ಆನಿ, ಹ್ಹೆ-ಹ್ಹೇ, ತಿಚಿ ಸವತಿಣ್ ಜಾವ್ನ್ ಸುಖಾನ್ ತಶೆಂ ಜಿಯೆಂವ್ಕ್ ತುಕಾ ಮನ್ ನಾ ಜಾವ್ಯೆತ್?”

“ಸವತಿಣ್?” ತಿಕಾ ಖಬರ್ ನಾಸ್ತಾಂ ಮ್ಹಳ್ಳೆಪರಿಂಚ್, ತೆಂ ಉತಾರ್ ತಿಚ್ಯಾ ತೊಂಡಾಂತ್ಲೆಂ ಭಾಯ್ರ್ ಆಯ್ಲೆಂ.

“ಹ್ಹೆ-ಹ್ಹೇ!” ಹಾಸ್ಲೊ ತೊ. “ತಾಂತುಂ ಕಿತೆಂ ಆಸಾ? ಧನ್‍ವಾನ್ ತಶೆಂ ಗರೀಬ್ ಮುಸ್ಲಿಮ್ ಮಾನಾಯಾಂಕ್ ಎಕಾ ಪ್ರಾಸ್ ಚಡ್ ಬಾಯ್ಲೊ ಆಸ್ಯೆತ್. ತುಜ್ಯಾ ಭಯ್ಣಿಕ್, ಕಾಜಾರ್ ಜಾಂವ್ಚ್ಯಾ ಇರಾದ್ಯಾನ್ ವ್ಹೆಲ್ಲೊ ಗ್ರಾಯ್ಕ್, ತುಜೊಯೀ ಜೀವ್ ಉರಂವ್ಕ್ ಆನಿ ತುಕಾಯೀ ಆಪ್ಲಿ… ಹ್ಹೆ-ಹ್ಹೇ!”

ಮೋನಿಕಾನ್ ಆಪ್ಲೆ ದೊನೀ ಹಾತ್ ಆಪ್ಲೆ ಕಾನ್ ಧಾಂಪುಂಕ್ ಪ್ರಯೋಗ್ ಕೆಲೆ. ಭಯ್ಣಿಕ್, ಆನಿ ಆಪ್ಣಾಕ್‍ಯೀ ರಾಕೊನ್ ಆಸ್‍ಲ್ಲೆಂ ಭಯಾನಕ್ ಯೆಮ್ಕೊಂಡ್ ಚಿಂತುನ್, ತಿಚ್ಯಾ ಕಾಳ್ಜಾಂತ್ ಸಳ್ಸಳೊ ಸರಳ್ ಪ್ರವೇಶ್ ಜಾಲ್ಲೆಪರಿಂ ತಿಕಾ ಭೊಗ್ಲೆಂ. ತಿತ್ಲೆಂಚ್ ನಹಿಂ –

ಷೇರ್ ಖಾನ್ ಲಾಗಿಂ ಆಯ್ಲೊ. ತಾಚ್ಯಾ ದೊಳ್ಯಾಂನಿ ಜಳ್ಮುಕಿಂ ಆನಿ ಕಾಮುಕಿ ಕಿಟಾಳಾಂ ಉಸಳ್ತಾತ್‍ಶಿಂ ದಿಸ್ತಾಲಿಂ. ಕಾನಾಂ ವಯ್ಲೆ ಹಾತ್ ಕಾಡುಂಕ್ ತಿಕಾ ತಾಣೆಂ ಹಾತ್ ಭಾಸ್ ಕೆಲಿ.

ಕೆವ್ಲ್ಯಾಕ್ ಆಪ್ಲ್ಯಾ ಆಂಗಾರ್ ಹಾತ್ ಘಾಲುಂಕ್ ಅವ್ಕಾಸ್ ದಿಂವ್ಚೊ ನಾಕಾ ಮ್ಹಣ್ ಜಾಣಾಂ ಜಾವ್ನ್, ಮೋನಿಕಾನ್ ಹಾತ್ ಸಕಯ್ಲ್ ಕಾಡ್ನ್ ಧರ್ಲೆ.

“ಹಾಂವೆಂ ಉಲಯಿಲ್ಲೆಂ ಆಯ್ಕೊಂಕ್ ನಾಕಾ ಜಾಲ್ಯಾರ್… ತುಜಿ ಮರ್ಜಿ” ಮ್ಹಣಾಲೊ ಷೇರ್ ಖಾನ್. “ಪುಣ್ ಘಳಾಯ್ ಕರುಂಕ್ ಆಮ್ಕಾಂ ಸಾಧ್ಯ್ ನಾ. ದೆಕುನ್, ವಿಚಾರ್‌ಲ್ಲ್ಯಾ ಸವಾಲಾಂಕ್ ತುರ್ತಾನ್ ಜಾಪ್ ದೀ.”

“ಕಿ-ಕಿತೆಂ ತುಮ್ಕಾಂ ಜಾಯ್?”

“ಸವಾಲಾಂ ಹಾಂವ್ ವಿಚಾರ್ತಾಂ” ಮ್ಹಣಾಲೊ ತೊ. “ಸಾರ್ಕಿ ಆನಿ ವೆಗಿಂ ಜಾಪ್ ದಿಲ್ಯಾರ್… ತುಕಾಚ್ ಬರೆಂ. ಹ್ಹೆ-ಹ್ಹೇ…”

ಮೋನಿಕಾ, ಭಿತರ್ಲ್ಯಾ ಭಿತರ್ ಥರ್ಥರೊಂಕ್ ಲಾಗ್ಲಿ.

“ದೆಕ್ಚೆಂ ವ್ಹಯ್ ಜಾಲ್ಯಾರ್, ಸವಾಲಾಂ ದೋನ್ ಮಾತ್ರ್ ಆಸಾತ್” ಮ್ಹಣಾಲೊ ತೊ. “ಪಯ್ಲೆಂ, ಪರಾರಿ ಜಾಲ್ಲೆ ನಸ್ರಾನಿ ಕೈದಿ, ಕಶೆಂ ಪರಾರಿ ಜಾಲ್ಯಾತ್ ಮ್ಹಳ್ಳೆಂ ತುವೆಂ ಆಮ್ಕಾಂ ಸಾಂಗಜಾಯ್.”

ಮೋನಿಕಾ ಉಲಂವ್ಕ್ ನಾ. ತಿಣೆಂ ಮನ್ ಘಟ್ ಕೆಲೆಂ.

“ತ್ಯಾ ಸವಾಲಾಕ್ ತುವೆಂ ಆತಾಂ ಜಾಪ್ ದೀನಾತ್ಲ್ಯಾರೀ ಪರ್ವಾ ನಾ” ಮ್ಹಣಾಲೊ ತೊ ದಾಂತ್ ಚಾಬೊನ್. “ಪುಣ್ ಹ್ಯಾ ಸವಾಲಾಕ್ ಜಾಪ್ ಜಾಯ್ – ತುಮ್ಚೆಂ, ಕೊಡಿಯಾಳ್‍ಬೈಲ್ ಘರಾಣ್ಯಾಂತ್ಲೆಂ ಭಾಂಗಾರ್ ಆನಿ ದಿರ್ವೆಂ ಖಂಯ್ ಲಿಪಯ್ಲಾಂ ಮ್ಹಳ್ಳೆಂ ತುವೆಂ ಸಾಂಗಜಾಯ್.”

ತಿ ಉಲಂವ್ಕ್ ನಾ.

“ತುವೆಂ ಸಾಂಗ್ಲ್ಯಾರ್, ಬರಾಬರ್. ತೆಂ ಪುಂಜಾವ್ನ್ ಹಾಡುಂಕ್ ಹ್ಯಾ ಮ್ಹಜ್ಯಾ ಸಾಂಗಾತ್ಯಾಂಕ್ ಹಾಂವ್ ಪಾಟಿಂ ಸೊಡ್ತಾಂ, ಆನಿ ತುಕಾ ಸುರಕ್ಷಿತ್ ವ್ಹರ್ತಾಂ.”

ನಾನಾಂತಿಂ ಚಿಂತ್ನಾಂ ತಿಚ್ಯಾ ಮತಿಂತ್ ಆಯ್ಲಿಂ, ಪುಣ್, ತಿ ಉಲಂವ್ಕ್ ನಾ.

“ಉಲಯ್ನಾಂಯ್? ಪಳೆಯಾಂ ನಸ್ರಾನಿ ಬಾಯ್ಲೆಚೆಂ ಧಯ್ರ್ ಕಿತ್ಲೆಂ ಆಸಾ ತೆಂ. ಪಳೆಯಾಂ ತಿಚ್ಯಾ ಚಕಮಕಿ ಸೊಭಾಯೆ ಭಿತರ್ ಗರ್ವ್ ಕಿತ್ಲೆಂ ಆಸಾ ತೆಂ!”

ಮೋನಿಕಾ ಉಲಂವ್ಕ್ ನಾ.

ಷೇರ್ ಖಾನಾನ್ ಸಾಂಗಾತ್ಯಾಂಕ್ ಸಂಜ್ಞಾ ದಿಲಿ. ಘಡ್ಯೆನ್ ತಾಚ್ಯಾ ಹಾತಾಂತ್, ನಾರಾನ್ ಅರ್ನುನ್ ವೊಳ್ಳೊಲೊ, ಗಾಂಟಿಂಚೊ ಚಾಬುಕ್ ತಾಣಿಂ ಪಾವಿತ್ ಕೆಲೊ.

“ಹೆವ್ಶಿನ್ ಪಳೆ” ಮ್ಹಣಾಲೊ ತೊ. “ತುಜ್ಯಾ ಆಂಗಾಕ್ ತೀಬ್ ತಿಳೊ ಲಾಗನಾಸ್ತಾಂ ತುಕಾ ಹಾಂವ್ ವ್ಹರ್ತೊಂ, ಆನಿ ತುಮ್ಚ್ಯಾ ಕರ್ಮಾಕ್ ತುಮ್ಕಾಂ ಸೊಡ್ತೊಂ. ಪುಣ್ ಕಾಲ್ ತೊ ‘ಸೈತಾನ್ ಸರ್ದಾರ್ ಸಿಮಾಂವ್’ ಆಯಿಲ್ಲ್ಯಾನ್ ಹಾಂವೆಂ ಕಾರ್ಯಕ್ರಮ್ ತಬ್ದೀಲ್ ಕರಿಜಾಯ್ ಪಡ್ಲಾಂ. ಹಾಂಗಾಸರ್ ಪಾವ್ಲ್ಯಾ ಉಪ್ರಾಂತ್ – ಖಿಲ್ಲೆದಾರ್ ನಹಿಂ ಬಗಾರ್ ಕೈದಿ ಜಾವ್ನ್ – ಖಾಲಿ ಹಾತಾಂನಿ ಹಾಂವ್ ಪಾಟಿಂ ವಚೊಂಕ್ ಸಕನಾ.”

ಉಸ್ಮಡ್ಲೊ ತೊ, ಚಾಬುಕ್ ಹಾತಾಂತ್ ವೊಳಾವ್ನ್.

“ದಿರ್ವೆಂ ವಾ ದಿರ್ವ್ಯಾಚಿ ಖಬರ್ ನಾತ್ಲ್ಯಾ ಶಿವಾಯ್ ವೆಚ್ಯಾ ಬದ್ಲಾಕ್ – ತೆಂ ಆಸೊಂ.” ಏಕ್ ಪಾವ್ಟಿಂ ತೊ ಘುಂವ್ಲೊ, ಆನಿ ಪರ್ತ್ಯಾನ್ ತಿ ಬೊಕ್ಡೆಚಿ ಸೊಂಡಿ ತಿಕಾ ಲಾಗಿಂ ಹಾಡ್ನ್ ಆಯ್ಲೊ, ಮ್ಹಣೊನ್ –

“ಬರ‍್ಯಾನ್, ಸತ್ ವೆಗಿಂ ಸಾಂಗ್ತಾಯ್ ತರ್, ಜಾಲೆಂ. ತುಂ ಬಚಾವ್ ಜಾಶಿ ಆನಿ ತುಜ್ಯಾ ಭಯ್ಣಿಕ್‍ಯೀ ದೆಕೊಂಕ್ ಸಕ್ಶಿ. ನಾ ತರ್, ತೋಂಡ್ ತುಂ ಸೊಡ್ತಾಸರ್ ತುಜೆಂ ಆಂಗ್ ಭೆಸಾಂ ಕರ್ತಾಂ!”

“ಜೆಜು!” ಮ್ಹಳೆಂ ತಿಣೆಂ ಮತಿಂತ್. ಉಪ್ರಾಂತ್ ತಿಣೆಂ ಜಾಪ್ ದಿಲಿ: “ಹಾಂವೆಂ ಸಾಂಗ್ಚೆಂ ಕಾಂಯ್ ನಾ. ತುಂ ಜರ್ ವರ್ತವ್ತಾಯ್ ಮನ್ಶ್ಯಾ ವರ್ಗಾಚಿ ಪ್ರಾಣಿ, ಮ್ಹಜೊ ಜೀವ್ ಕಾಡ್!”

ಸರ್ದಾರ್ ಸಿಮಾಂವ್ ಮಂಗ್ಳುರಾಕ್ ಯೇವ್ನ್ ಪಾವ್ಲಾ ಮ್ಹಳ್ಳೆಂ ಆಯ್ಕತಚ್, ತಿಚೆ ಥಂಯ್ ಏಕ್ ನವೆಂ ಧಯ್ರ್, ಆನಿ ಅಚರ್ಯಾಚಿ ಆಶಾ, ತಸೊ ಭರ್ವಸೊ ಉದೆಲ್ಲೊ.

“ವೇಳ್ ಜಾತಾ” ಮ್ಹಣಾಲೊ, ದೊಗಾಂತ್ಲೊ ಎಕ್ಲೊ.

ದುಸ್ರ್ಯಾ ಘಡ್ಯೆ, ಮೋನಿಕಾನ್ ಕಠಿಣ್ ದುಖ್ ಭೊಗ್‍ಲ್ಲಿ ಏಕ್ ಕಿಂಕ್ರಾಟ್ ಚಾಬೊನ್ ಧರ್ಲಿ, ಆನಿ ಉಬಿ ಆಸ್‍ಲ್ಲೆ ಕಡೆನ್‍ಂಚ್ ದಿಂಬಿಯಾಂನಿ ತಿ ಗಳ್ಳಿ.

ಷೇರ್ ಖಾನಾಚ್ಯಾ ಹಾತಾಂತ್ಲೊ ಚಾಬುಕ್ – ಏಕ್ ಪಾವ್ಟಿಂ, ದೋನ್ ಪಾವ್ಟಿಂ, ತೀನ್ ಪಾವ್ಟಿಂ, ಚಾರ್ ಪಾವ್ಟಿಂ – ಆನಿ ದೇವ್ ಜಾಣಾಂ ಕಿತ್ಲೆ ಪಾವ್ಟಿಂ – ತ್ಯಾ ವೀರ್ ಮಾನಿನಿಚ್ಯಾ ಪಾಟಿರ್ ಖೊಂಚ್ ಮಾರ್ನ್, ಭುಜಾಂ-ಬಾವ್ಳೆ-ಹರ್ದ್ಯಾಕ್ ಚಾಬೊನ್, ರೆವೊಡ್ ಘಾಲ್ನ್, ವಸ್ತ್ರಾಂ ಫಾಳ್ನ್ ಆನಿ ರಗತ್ ಚಾಕೊನ್ ಪಾಟಿಂ ಗೆಲೊ.

“ಹೆಂ ಜಾವ್ನಾಸಾ ಭೋವ್ ಥೊಡೆಂ!” ಖರ್ಶೆಲೊ ಖಾನ್. “ಮ್ಹಜೊ ಉಜ್ವೊ ಹಾತ್ ದೂಕ್ ಆಸಾ ಮ್ಹಣ್ ತುಜೆಂ ನಶಿಬ್ ಬರೆಂ ಆಸಾ. ನಾ ಜಾಲ್ಯಾರ್ – ಆತಾಂ ಪುಣೀ ಸಾಂಗ್ – ತುಮಿ ಲಿಪಯಿಲ್ಲೆಂ ದಿರ್ವೆಂ ಖಂಯ್ ಆಸಾ?”

“ಜೆಜು… ಜೆಜು… ಜೆಜು..!” ತೊಂಡಾ ಭಿತರ್ ಶಿವಾಯ್, ಮೋನಿಕಾನ್ ಹೆರ್ ಸಬ್ದ್ ಉಚಾರುಂಕ್ ನಾ. ಉಚಾರ್ಚೆಂ ತ್ರಾಣ್ ವಾ ಗರ್ಜ್ ತಿಕಾ ಉರೊಂಕ್ ನಾ. ಆಪ್ಲ್ಯಾ ಕುಡಿನ್ ತ್ಯಾ ಘಡ್ಯೆ ಭೊಗ್‍ಲ್ಲೆ ಕಳ್ವಳೆ, ದೂಕ್ ಆನಿ ಹುಲೊಪ್ ತಿ ಸ್ಪಷ್ಟ್ ಜಾಣಾಂ ಜಾಲಿ. ತರೀ, ತಿಚಿ ಮತ್ ಚುಕೊಂಕ್ ನಾ. “ಧರ್ಮಾ ಖಾತಿರ್ ಆನಿ ಶೆಗುಣಾಂ ಖಾತಿರ್, ಆದಿಂ ಥಾವ್ನ್ ಮಾಡ್ತಿರಾಂನಿ ಜೀವ್ ದಿಲಾ ಜಾಲ್ಯಾರ್, ಆನಿ ತಸಲ್ಯಾಚ್ ಕಾರಣಾಂ ಖಾತಿರ್ ಕೆನರಾ ಕ್ರಿಸ್ತಾಂವ್ ಸಮಾಜ್‍ಯೀ ಬಲಿದಾನ್ ದಿತಾ ಜಾಲ್ಯಾರ್ ಆಬ್ಳೆ, ತಾಂತುಂ ಮ್ಹಜೊಯೀ ಕಿರ್ಕೊಳ್ ವಾಂಟೊ ಹೊ ದೆವಾ, ಒಪ್ಸುನ್ ಘೆ…” ಚಿಂತ್ಲೆಂ ತಿಣೆಂ.

“ಆನಿಕ್‍ಯೀ ಸಾಂಗನಾಂಯ್?”

ತಿಣೆಂ ಜಾಪ್ ದೀಂವ್ಕ್ ನಾತ್‍ಲ್ಲಿ ಪಳೆವ್ನ್, ಪರ್ತ್ಯಾನ್ ತೊ ಲಾಗಿಂ ಆಯ್ಲೊ. ಕೆಸಾಂಕ್ ಚಪ್ಕೊ ಮಾರ್ನ್ ತಿಚಿ ತಕ್ಲಿ ತಾಣೆಂ ವಯ್ರ್ ಕಾಡ್ಲಿ. ತಿತ್ಲ್ಯಾರೀ ಉಲಂವ್ಕ್ ತಿ ತಯಾರ್ ನಾ ಮ್ಹಣ್, ತಿಚೆ ದೊಳೆ ಪಳೆತಚ್ ತಾಕಾ ಸಮ್ಜಲೆಂ. ಸಂತೊಸಾನ್ ಮೊರೊಂಕ್ ತಿ ಕಬೂಲ್ ಆಸಾ ಮ್ಹಣ್ ತೆ ದೊಳೆ ಪಾಚಾರ್ತಾಲೆ.

“ಪಳೆಯಾಂ ತರ್” ಮ್ಹಣಾಲೊ ತೊ ಪಾಟಿಂ ಘುಂವೊನ್. ಸಾಂಗಾತ್ಯಾಕ್ ದುಸ್ರಿ ಏಕ್ ಹಾತ್ ಭಾಸ್ ತಾಣೆಂ ಕೆಲಿ. ತ್ಯಾ ಪ್ರಕಾರ್ ಎಕ್ಲೊ ಫುಡೆಂ ಯೇವ್ನ್, ಬಗ್ಲೆನ್ ಆಸ್‍ಲ್ಲ್ಯಾ ಪೊಂಟುಲಾಂತ್ಲ್ಯಾ ಇಂಗ್ಳ್ಯಾಂಚೆರ್ ಏಕ್ ಸುಕಿ ಬೊಡಿ ದವರ್ನ್ ಫುಂಕುಂಕ್ ಲಾಗ್ಲೊ.

“ಆತಾಂ ಪುಣೀ ಸಾಂಗ್ತಾಯ್?”

ತಿ ಉಲಂವ್ಕ್ ನಾ.

“ತರ್ ಆಯ್ಕ್” ಮ್ಹಣಾಲೊ ತೊ, ಆಪ್ಣಾಕ್ ದುಸ್ರಿ ಕಸಲಿಯೀ ವಾಟ್ ನಾತ್‍ಲ್ಲೆಪರಿಂ ಚುರ್ಚುರೊನ್‍ಶೆಂ. “ಘಾಯ್ ಆನಿ ಉಜ್ಯಾಚೆ ದಾಗ್ ತುಜ್ಯಾ ಆಂಗಾರ್ ಆಸ್ಲ್ಯಾರ್, ತುಕಾ ಹಾಂವೆಂ ಖಂಯೀ ವ್ಹರ್ಚೆಪರಿಂ ನಾ. ಪುಣ್ ತುಜೆಂ ತೋಂಡ್ ಸೊಡಯ್ಲ್ಯಾ ಬಗಾರ್, ಆನಿ ತುಜೆಂ ಗರ್ವ್ ಉದಾಕ್ ಕೆಲ್ಯಾ ಬಗಾರ್ ಹಾಂವ್ ಷೇರ್ ಖಾನ್ ನಹಿಂ. ತರ್ ಉಲಯ್!”

ತಿ ಉಲಂವ್ಕ್ ನಾ.

ಷೇರ್ ಖಾನ್ ತಾಪ್ಲೊ. ಘುಂವೊನ್, ಪೊಂಟುಲಾಂತ್ ಪೆಟೊನ್, ಮುರ್ಮುರೊನ್, ಪೊಂತಾರ್ ಕೇಂಡ್ ಜಾಲ್ಲೆಂ ಕೊಲಿತ್ ತಾಣೆಂ ಹೆವ್ಶಿನ್ ಕಾಡ್ಲೆಂ. ತಿಚೆ ಸರ್ಶಿನ್ ತೊ ಆಯ್ಲೊ.

“ಆಯ್ಕ್” ಮ್ಹಣಾಲೊ ತೊ ದಾಂತ್ ಚಾಬೊನ್. “ನಿಮಾಣೆ ಪಾವ್ಟಿಂ ತುಕಾ ಹಾಂವ್ ವಿಚಾರ್ತಾಂ. ಹಾಂವೆಂ ವಿಚಾರ್‌ಲ್ಲ್ಯಾ ಸವಾಲಾಂಕ್ ಜರೂರ್ ಜಾಪಿ ದೀ. ನಹಿಂ ತರ್, ಹೆಂ ಕೊಲಿತ್ ಆಪ್ಲೆಂ ಕಾಮ್ ಆರಂಭ್ ಕರ್ತೆಲೆಂ ತುಜ್ಯಾ ಆಂಗಾರ್ – ಖಂಯ್ ಮ್ಹಳ್ಳೆಂ ತುಂ ಜಾಣಾಂಯ್.”

ತಾಚೆ ಸಾಂಗಾತಿ ಹಾಸ್ಲೆ.

ತಿಣೆಂ ದೀರ್ಘ್ ಏಕ್ ಶ್ವಾಸ್ ಸೊಡ್ಲೊ, ಆನಿ ದೊಳೆ ಧಾಂಪ್ಲೆ.

“ಹೋಯ್!” ಭಾಯ್ರ್ ಥಾವ್ನ್ ಆವಾಜ್ ಆಯ್ಕಲೊ. ಷೇರ್ ಖಾನ್ ಆನಿ ಸಾಂಗಾತಿ ಸ್ತಬ್ದ್ ಜಾಲೆ.

ದುಸ್ರೆ ಪಾವ್ಟಿಂ ಆನಿ ತಿಸ್ರೆ ಪಾವ್ಟಿಂ ಆವಾಜ್ ಜಾತಾನಾ, ಮೋನಿಕಾ ವರ್ವಿಂ ಸೊಸುಂಕ್ ಜಾಲೆಂ ನಾ. ಕೊಣ್‍ಯೀ ಜಾಂವ್ದಿತ್, ಪುಣ್ ಘಡ್ಯೆಚೆಂ ಯೆಮ್ಕೊಂಡ್ ನಿವಾರೊಂದಿ ಮ್ಹಣ್ ಚಿಂತುನ್, ಆಸ್‍ಲ್ಲೆಂ ತ್ರಾಣ್ ಜಮವ್ನ್ ಏಕ್ ಕಿಂಕ್ರಾಟ್ ದೀಂವ್ಕ್ ತಿಣೆಂ ಪ್ರಯತ್ನ್ ಕೆಲೆಂ. ತ್ಯಾಚ್ ವೆಳಾರ್ ಷೇರ್ ಖಾನಾನ್ ಆಪ್ಲೊ ದಾವೊ ಹಾತ್ ಫುಲವ್ನ್ ತಿಚ್ಯಾ ತೊಂಡಾರ್ ಮಾರ್ಲೊ.

ಉಪ್ರಾಂತ್ ತೆ ಭಾಯ್ರ್ ಧಾಂವ್ಲೆ. ಭಾಯ್ಲ್ಯಾನ್ ಥೊಡೆಂ ಸಂಭಾಷಣ್ ಜಾಂವ್ಚೆಂ ತಿಣೆಂ ಆಯ್ಕಲೆಂ.

ಥೊಡ್ಯಾಚ್ ವೆಳಾನ್, ಮಾರ್-ಫಾರ್ ಆನಿ ಝಗ್ಡಿಂ ಜಾಂವ್ಚೆಂ ತಿಕಾ ಆಯ್ಕಲೆಂ.

ಕಿತೆಂ ಮ್ಹಣ್ ಸಮ್ಜನಾಸ್ತಾಂ, ಥರ್ಥರೊನ್ ತಿ ಆಸ್ತಾನಾ, ಷೇರ್ ಖಾನ್ ಆನಿ ತಾಚೊ ಎಕ್ಲೊ ಸಾಂಗಾತಿ ಭಿತರ್ ದೆಂವೊನ್ ಆಯ್ಲೆ.

“ಕಿತೆಂ ಜಾಲ್ಯಾರೀ, ತಾಂಕಾಂ ಭಿತರ್ ಯೇಂವ್ಕ್ ದೀನಾಯೆ” ಮ್ಹಣ್ತಾಲೊ ಷೇರ್ ಖಾನ್. ತ್ಯಾಚ್ ವೆಳಾರ್ ಸರ್ದಾರ್ ಸಿಮಾಂವ್ ಭಿತರ್ ಯೇವ್ನ್ ಪಾವ್‍ಲ್ಲೊ.

* * * * *

“ಪುರೊ, ಭಯ್ಣಿ ಪುರೊ. ಆತಾಂ ತುಂ ವಿಶೆವ್ ಘೆ. ಭಿಯೆನಾಕಾ ಆನಿ ಕಸಲಿಯೀ ಖಂತ್ ಕರಿನಾಕಾ” ಮ್ಹಣಾಲೊ ಸರ್ದಾರ್ ಸಿಮಾಂವ್.

‘ಜಲಬಾಲೆ’ ಮಂಜೆಂತ್ ಘಡ್ಬಡ್ ಜಾಲ್ಲ್ಯಾ ಎಕಾ ವೊರಾ ಉಪ್ರಾಂತ್, ಮಾನಿನ್ ಮೋನಿಕಾ, ಸರ್ದಾರ್ ಸಿಮಾಂವ್ಚ್ಯಾ ಮಂಜೆಂತ್ ವಿಶೆವ್ ಘೆತಾಲಿ. ತಿಚೊ ದೊಳೊ ಆಡ್ ಜಾಲ್ಲೊ ಪಳೆವ್ನ್ ಸರ್ದಾರ್ ಸಿಮಾಂವ್, ಭಾಯ್ರ್ ಆಯ್ಲೊ.

“ಫುಡ್ಲಿ ಕಿತೆಂ ಹುಕುಮ್ ಧನಿಯಾ?” ವಿಚಾರ್ಲೆಂ ಅಂತುಲ್ಯಾನ್.

“ಫುಡ್ಲಿ ಹುಕುಮ್ ದಿತಾಂ – ದೀಸ್ ಉಜ್ವಾಡೊಂದಿ. ಆತಾಂ ಇಲ್ಲೊ ವಿಶೆವ್ ಘೆವ್ಯಾಂ” ಮ್ಹಣಾಲೊ ಸರ್ದಾರ್.

ತಾಣಿಂ ಆತಾಂ ತಾಂಚೊ ‘ಮಾಪ್ಳ್ಯಾಂಚೊ’ ವೇಸ್ ಬದ್ಲುನ್, ಹರ್ಶೆಂಚೆಪರಿಂ ತೆ ನ್ಹೆಸ್‍ಲ್ಲೆ.

ತಿತ್ಲ್ಯಾ ತುರ್ತಾನ್ ‘ಜಲಬಾಲೆ’ ಮಂಜೆಂತ್ ಕೆಲ್ಲ್ಯಾ ಕಾರ್ಬಾರಾ ವರ್ವಿಂ ಸರ್ದಾರ್ ಸಿಮಾಂವ್ಕ್ ಸಮಾಧಾನ್ ಜಾಲ್ಲೆಂ. ಮೋನಿಕಾ ಸಲ್ವಾರ್ ಜಾಲ್ಲಿ. ತಾಚೆ ಸರ್ವ್ ಸವಾರ್ ಆನಿ ಶಿಪಾಯ್ ಶಾಬಿತ್ ಆಸ್‍ಲ್ಲೆ.

ಮೋನಿಕಾಚಿ ಮತ್ ಚುಕ್‍ಲ್ಲೆಪರಿಂಚ್, ತಿಕಾ ಸನಿನ್ ಕರ್ನ್, ಭುರ್ಗ್ಯಾಪರಿಂ ಘೆವ್ನ್ ಹೊಡ್ಯಾಕ್ ತೊ ಪಾಟಿಂ ಆಯಿಲ್ಲೊ. ಷೇರ್ ಖಾನ್ ಪರಾರಿ ಜಾಲ್ಲೆ ವರ್ವಿಂ, ಥಂಯ್ಸರ್ ರಾವೊನ್ ವಾ ಹೆರಾಂಕ್ ಶಿಕ್ಷಾ ದೀವ್ನ್ ಫಾಯ್ದೊ ನಾ ಮ್ಹಣ್, ತುರ್ತಾನ್ ತೆ ‘ರೆಜೀನಾ’ ಮಂಜೆಕ್ ಪಾಟಿಂ ಆಯಿಲ್ಲೆ. ಮೋನಿಕಾಕ್ ಜಾಯ್ ತಿ ಪ್ರಥಮ್ ಚಿಕಿತ್ಸಾ ಆನಿ ಆಹಾರ್ ದೀವ್ನ್ ಸವ್ಕಾಸಾಯ್ ತಾಣಿಂ ಲಾಭಯಿಲ್ಲಿ.

ತ್ಯಾ ಇಡ್ಯಾಂತ್ ಸರ್ದಾರ್ ಸಿಮಾಂವ್ನ್ ‘ಸ್ತೆಲ್ಲಾ’ ಮಂಜೆಕ್ ಸಂದೇಶ್ ಧಾಡ್ನ್ ತಿಣೆಂ ಅಳ್ವ್ಯಾಚ್ಯಾ ಬಾಗ್ಲಾರ್ ರಾಂವ್ಚಿ ಗರ್ಜ್ ನಾ, ಬಗಾರ್ ತಿ ಪಯ್ಲೆಂ ಆಸ್‍ಲ್ಲೆ ಕಡೆನ್ ವಚೊನ್, ನಾಂಗೊರ್ ದೆಂವವ್ನ್ ರಾವಜಾಯ್ ಮ್ಹಣ್ ಹುಕುಮ್ ದಿಲ್ಲಿ.

ದೀಸ್ ಉಜ್ವಾಡ್ತಾನಾ ಸರ್ದಾರ್ ಸಿಮಾಂವ್ ಭಾಯ್ರ್ ಆಯ್ಲೊ.

ಭಿತರ್ಲ್ಯಾ ಆವರಾಂತ್ ಮೋನಿಕಾ, ಲ್ಹಾನ್ ಭುರ್ಗ್ಯಾಪರಿಂ ನೀದ್ ಕಾಡ್ತಾಲಿ. ತಿಚೆರ್ ದೀಷ್ಟ್ ಘಾಲ್ತಚ್, ಸರ್ದಾರ್ ಸಿಮಾಂವ್ಕ್, ಮಾನಿನ್ ವೆರೊನಿಕಾ ಕುವೆಲಿಚೊ ಪರತ್ ಉಗ್ಡಾಸ್ ಆಯ್ಲೊ. ಸಮಾಜೆಚ್ಯಾ ಬಲಿದಾನಾಂತ್ ತಾಂಚೊಯೀ ಏಕ್ ವಾಂಟೊ…

“ಹಮೀದ್ ಆನಿ ಮೋನಿಕಾ ಮೆಳ್ಳಿಂ. ತರ್ ವೆರೊನಿಕಾಯೀ ಮೆಳಜಾಯಿಚ್” ಚಿಂತ್ಲೆಂ ತಾಣೆಂ. ಮಾಗ್ಲೆಂ ತಾಣೆಂ.

ಫುಡೆಂ ಕಶೆಂ ಆನಿ ಖಂಚ್ಯಾನ್ ವೆಚೆಂ ಮ್ಹಣ್ ಚಿಂತುನ್ ತೊ ಆಸ್ತಾನಾ, ಠಾಣ್ಯಾ ಥಾವ್ನ್ ಖುದ್ದ್ ಇಸ್ಮಾಯಿಲ್ ಬಾಬಾ ಯೇವ್ನ್, ಮಂಜೆರ್ ಚಡ್ಲೊ.

ಭೋವ್ ಆತುರಾಯೆಚಿ ಖಬರ್ ತೊ ಹಾಡ್ನ್ ಆಯಿಲ್ಲೊ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

ಆಮಿ ಫಾಯ್ಸ್ ಕೆಲ್ಲ್ಯೊ ಆದ್ಲ್ಯೊ ಕಾದಂಬರಿ