ಎಕಾ ಪೆಟ್ಯಾಚೆಂ ಫಾರಿಕ್ಪಣ್ – 6: ಟೊಮಿಚೊ ಕಠೋರ್ ನಿಚೆವ್
Posted on : July 15, 2025 at 5:45 PM
ಎಕಾ ಪೆಟ್ಯಾಚೆಂ ಫಾರಿಕ್ಪಣ್ – ಸವೊ ಭಾಗ್
ಮಲಯಾಳಿ ಪೆಟೊ ಖಂಚ್ಯಾಕೀ ತಯಾರ್ ಆಸ್‍ಲ್ಲೊ. ತಾಚೊ ಏಕ್ ಮಾತ್ರ್ ಇರಾದೊ ಟೊಮಿಕ್ ಶೆವ್ಟಾಂವ್ಚೊ, ಶಿವಾಯ್ ಹೆರ್ ಖಂಚ್ಯಾಚಿಯೀ ಪರ್ವಾ ತಾಕಾ ನಾತ್‍ಲ್ಲಿ. ತಾಕಾ ತ್ಯಾ ಪರಿಸರಾಂತ್ ದುಸ್ರೆಂ ಕಿತೆಂಚ್ ದಿಸನಾತ್‍ಲ್ಲೆಂ, ಟೊಮಿಕ್ ಸೊಡ್ನ್. ಪುಣ್ ಟೊಮಿ ಸಾಧೊ ಪೆಟೊ. ತೊ ಘಾತ್ಕಿ ನ್ಹಯ್ ವಾ ಅನಾವಶ್ಯೆಂ ಲಡಾಯೆಕ್ ದೆಂವ್ಚೊಯೀ ನ್ಹಯ್. ಪುಣ್ ಆಜ್ ತಾಚೆಂ ಸ್ವಾಭಿಮಾನ್ ಪುರ್ತೆಂ ಹಾಲ್ಕಂದ್‍ಲ್ಲೆಂ.
ಜೀಕ್ ವಾ ಸಲ್ವಣ್, ಜಯ್ತ್ ವಾ ಮರಣ್ – ಹೆಂ ಕಸಲೆಂ ಜಾಲ್ಯಾರೀ ಪರ್ವಾ ನಾ… ಪಾಂಯ್ ಪಾಟಿಂ ಕಾಡ್ಚೆಪರಿಂಚ್ ನಾ. ಝುಜ್ಚೆಂ ಅನಿವಾರ್ಯ್. ಫಲಿತಾಂಶ್, ಪರಿಣಾಮ್ ಚಿಂತುಂಕೀ ಆಸ್ಪದ್ ನಾ…
ಟೊಮಿ ನಿಜಾಯ್ಕೀ ನಿತ್ರಾಣ್ ಜಾಲ್ಲೊ. ತರೀ ಆಪ್ಲ್ಯಾಚ್ ಆಂಗ್ಣಾಂತ್ ದುಸ್ಮಾನಾಕ್ ಶರಣ್ ಜಾಂವ್ಚಿ ಗಜಾಲ್‍ಚ್ ನಾ ಮ್ಹಣ್ ತೊ ಖಚಿತ್ ನಿಚೆವಾಂತ್ ಠಿಕ್‍ಲ್ಲೊ. ಲಡಾಯ್ ಆಖೇರ್ ಕರುಂಕ್ ದುಸ್ಮಾನ್ ಅಪೇಕ್ಷಿನಾ ಮ್ಹಣ್ ತಾಕಾ ಸಮ್ಜಲ್ಲೆಂ. ಲಡಾಯ್ ಸೊಡ್ನ್ ಧಾಂವ್ಚೆಂ ಮನ್ ಟೊಮಿಕೀ ನಾತ್‍ಲ್ಲೆಂ. ವೀರ್ ನ್ಹಯ್ ಜಾಂವ್ಕ್ ಪುರೊ, ಪುಣ್ ಭಿಂವ್ಕುರೊ ಖಂಡಿತ್ ನ್ಹಯ್ ಮ್ಹಣ್ ತೊ ಪಾತ್ಯೆತಾಲೊ. ಕಿತೆಂಯೀ ಪುಣೀ ಏಕ್ ನಿರ್ಧಾರ್ ಜಾಯ್ಜೆಚ್ ಆಸ್‍ಲ್ಲೊ. ದೆಕುನ್ ಟೊಮಿ ತಡವ್ ಕರುಂಕ್ ಆಶೆನಾಸ್ತಾನಾ ಶೀದಾ ದುಸ್ಮಾನಾಚೆರ್ ಉಡ್ಲೊ.
ತಾಣೆಂ ತಶೆಂ ಕೆಲ್ಲೆಂಚ್ ವ್ಹಡ್ ಪ್ರಮಾದ್ ಜಾಲೆಂ. ಭಾರಿಚ್ ಮ್ಹಾರಗ್ ಪಡ್ಲೆಂ.
ತೆದೊಳ್‍ಚ್ ದುಸ್ಮಾನ್ ಚತುರ್ ಜಾಲ್ಲೊ. ತೊಯೀ ಕಠಿಣ್ ಘಾಯೆಲ್ಲೊ ತರೀ ತಾಚೆ ಥಂಯ್ ಆಸ್‍ಲ್ಲೊ ಆಕ್ರೋಶ್ ತಾಚೆಂ ಬಳ್ ಚಡಯ್ತಾಲೊ. ವಿಚಿತ್ರ್ ಹಗೆಂ ತಾಚೊ ಹುರುಪ್ ವಾಡಯ್ತಾಲೆಂ. ಶಿವಾಯ್ ತಾಕಾ ಆಪ್ಣೆಂ ಜಿಕಜೆಚ್ ಮ್ಹಳ್ಳೊ ಏಕ್ ಮಾತ್ರ್ ಶೆವಟ್ ಕಾಂತಯ್ತಾಲೊ. ಆಪ್ಲೊ ದುಸ್ಮಾನ್ ಟೊಮಿ ಚಡ್ ವೇಳ್ ಝುಜೊಂಕ್ ಸಕ್ಚೊ ನಾ ಮ್ಹಣ್ ತಾಕಾ ಅಂದಾಜ್ ಜಾಲ್ಲೊ. ತಾಣೆಂ ಟೊಮಿಕ್ ನಿತ್ರಾಣ್ ಜಾಂವ್ಚೆಪರಿಂ ಕೆಲ್ಲೆಂ. ಟೊಮಿಕ್ ತಿ ಅಂದಾಜ್ ನಾತ್‍ಲ್ಲಿ.
ವಿ.ಜೆ.ಪಿ. ಸಲ್ಡಾನ್ಹಾಚ್ಯಾ ಅತ್ಯಂತ್ ಶ್ರೇಷ್ಠ್ ಕೃತಿ ‘ದೆವಾಚ್ಯೆ ಕುರ್ಪೆನ್’ ಕಾದಂಬರಿಚ್ಯಾ ಕ್ಲೈಮ್ಯಾಕ್ಸಾಂತ್ ಘಡ್ಚ್ಯಾ ತಲ್ವಾರಿಂಚ್ಯಾ ಲಡಾಯೆಪರಿಂಚ್ ಪೆಟ್ಯಾಂಚಿ ಹಿ ಲಡಾಯ್ ಚಲ್ತಾಲಿ. ಗಡಾಯ್ ಫಾತ್ರಾಂತ್ ಜಾಲ್ಲ್ಯಾ ಲಡಾಯೆಂತ್ ನಾಯಕ್ ಸರ್ದಾರ್ ಸಿಮಾಂವ್ ಆನಿ ವಿಲನ್ ಸರ್ದಾರ್ ಆಂತೊನ್ ನಿತ್ರಾಣ್ ಜಾವ್ನ್ ಪಡ್‍ಲ್ಲೆ. ಉಪ್ರಾಂತ್ ನಪಂಯ್ಚ್ ಜಾಂವ್ಚೊ ನಾಟಕ್ ಖೆಳ್‍ಲ್ಲ್ಯಾ ಕಂತ್ರಿ ಆಂತೊನಿನ್ ಘಾತ್ಕಿ ಖೆಳ್ ಮಾಂಡ್‍ಲ್ಲೊ. ನಿಮಾಣೆಂ ಬಂಟ್ವಾಳ್ ಆಗ್ನೆಸ್ ಕುಂವರ್ನಿಚ್ಯಾಚ್ ಘರಾ ದೊಗೀ ಪಾವ್‍ಲ್ಲೆ. ಥಂಯ್ ಜೀವನ್ಮರಣಾಚಿ ಲಡಾಯ್ ಜಾಂವ್ಕ್ ಆಸ್‍ಲ್ಲಿ.
ಸರ್ದಾರ್ ಸಿಮಾಂವ್ ಆನಿ ಸರ್ದಾರ್ ಆಂತೊನ್ ಅಂತಿಮ್ ಝುಜಾಕ್ ಆಯ್ತೆ ಜಾಲ್ಲೆ. ತಾಂತುಂ ದೊಗಾಂಯ್ಚೆಂ ವ್ಯಕ್ತಿತ್ವ್ ಸಾದರ್ ಜಾಲ್ಲೆಂ. ಘಾತ್ಕಿ ಆಂತೊನ್ ಕಠಿಣ್ ಆಣ್ವೊ. ಆಪ್ಲ್ಯಾ ಸ್ವಾರ್ಥ್ ಆನಿ ಅಬ್ಲೆಸಾ ಖಾತಿರ್ ಸರ್ದಾರ್ ಸಿಮಾಂವ್ಕ್ ಜಿವೆಶಿಂ ಮಾರುಂಕ್‍ಚ್ ತೊ ಆಶೆತಾಲೊ. ತ್ಯಾ ಶೆವಟಾ ಖಾತಿರ್ ಕಿತೆಂಯೀ ಕರುಂಕ್ ತೊ ಪಾಟಿಂ ಸರನಾತ್‍ಲ್ಲೊ. ಪುಣ್ ಸರ್ದಾರ್ ಸಿಮಾಂವ್ ವಾಯ್ಟ್ ಆಧಾರ್ಲೆಲ್ಯಾ ಆಂತೊನಿಕ್ ಬಂಧಿ ಕರುಂಕ್‍ಚ್ ಪ್ರಯತ್ನ್ ಕರ್ತಾಲೊ. ತಲ್ವಾರಿಚೆರ್ ತಲ್ವಾರ್ ಆಪ್ಟೊನ್, ಏಕ್ ತಲ್ವಾರ್ ಕೊಣಾ ಎಕ್ಲ್ಯಾಚ್ಯಾ ಆಂಗಾಂತ್ ರಿಗೊನ್ ಜೀವ್ ಉಸ್ಳೊಂಚಿ ಘಡಿ ತಯಾರ್ ಜಾಲ್ಲಿ.
ತ್ಯಾಚ್ ಝುಜಾಪರಿಂ ಹಾಂಗಾ ಆಮ್ಗೆಲೊ ಟೊಮಿ ಆನಿ ತೊ ಗೊರೊ ಪೆಟೊ ಚಾಬೊನ್ ಪಡ್ತಾಲೆ. ವಿಲನ್ ಆಂತೊನಿಪರಿಂಚ್ ಮಲಯಾಳಿ ಪೆಟೊ ಟೊಮಿಕ್ ಸಂಹಾರ್ ಕರುಂಕ್ ಪೆಚಾಡ್ತಾಲೊ. ಅನಿರೀಕ್ಷಿತ್ ಸಂಗ್ರಾಮಾಕ್ ತಯಾರಿ ನಾಸ್ತಾನಾ ಸಾಂಪಡ್‍ಲ್ಲ್ಯಾ ಅಮಾಯಕ್ ಟೊಮಿಕ್ ದುಸ್ಮಾನಾ ಥಾವ್ನ್ ಬಚಾವಿ ಘೆಂವ್ಚಿಚ್ ಉರ್ಬಾ ಶಿವಾಯ್ ಘಾತ್ ಕರ್ಚೊ ಇರಾದೊ ನಾತ್‍ಲ್ಲೊಚ್.
ಟೊಮಿ ಉಡ್ತಚ್, ತ್ಯಾಚ್ ಘಡಿಯೆಚಿ ನಿರೀಕ್ಷಾ ಕರ್ನ್ ಆಸ್‍ಲ್ಲೊ ದುಸ್ಮಾನ್‍ಯೀ ಟೊಮಿಚೆರ್ ಘಾಸ್ ಘಾಲುಂಕ್ ಉಡ್ಲೊ. ಟೊಮಿ ಪ್ರಾಯೆನ್ ವ್ಹಡ್ ಆನಿ ಏಕ್ ಸಾಧೊ ಪೆಟೊ ಜಾವ್ನಾಸ್‍ಲ್ಲೊ. ಪುಣ್ ಸರ್ಸರಿತ್ ಬಿಫಾ ಮಾಸ್ ಖಾವ್ನ್ ಸಕ್ತೆವಂತ್ ಆಸ್‍ಲ್ಲ್ಯಾ ಮಲಯಾಳಿಂಗೆಲ್ಯಾ ಪೆಟ್ಯಾ ಥಂಯ್ ಬರೆಂಚ್ ತ್ರಾಣ್ ಆಸ್‍ಲ್ಲೆಂ. ತ್ಯಾ ಶಿವಾಯ್ ಶಿಂತ್ರ್ಯಾಳೊ. ತಾಚೆ ಮುಖಾರ್ ಟೊಮಿ ಅಸ್ಕತ್ ಜಾಲೊ.
ಪಯ್ಲೆಂಚ್ ಪುರಾಸಣೆನ್ ಥಕ್‍ಲ್ಲೊ ಟೊಮಿ, ದುಸ್ಮಾನಾಚ್ಯಾ ಸಂಕಲ್ಪಾಚಿ ಅಂದಾಜ್ ನಾಸ್ತಾನಾ ಘಾತಾಕ್ ಸಾಂಪಡ್‍ಲ್ಲೊ. ಪಯ್ಲ್ಯಾ ಹಂತಾರ್ ಟೊಮಿನ್ ಜಾಯ್ತೊ ಮಾರ್ ದಿಲ್ಲೊ ತರೀ ತಿತ್ಲೊಚ್ ವಾ ಚಡ್ ತೊಯೀ ಘಾಯೆಲ್ಲೊ. ಲಡಾಯ್ ವೆಗಿಂಚ್ ಮುಗ್ದುಂಕ್ ಆನಿ ಟೊಮಿಕ್ ಶಿಂದುನ್ ಘಾಲುಂಕ್ ದುಸ್ಮಾನ್ ಅಪೇಕ್ಷಿತಾಲೊ. ತ್ಯಾಚ್ ಖಾತಿರ್ ಪೆಚಾಡ್ತಾಲೊ.
ತೆಂ ದೃಶ್ಯ್ ಕಠೋರ್ ದಿಸ್ತಾಲೆಂ. ದೊಗೀ ಪೆಟ್ಯಾಂಚ್ಯಾ ಆಂಗಾರ್ ರಗತ್ ಪಾಜರ್ತಾಲೆಂ. ದೊಗಾಂಯ್ಚ್ಯಾ ತೊಂಡಾ ಥಾವ್ನ್ ಲಾಳ್ ಮಿಶ್ರಿತ್ ರಗತ್ ದೆಂವ್ತಾಲೆಂ. ದಾಂತ್ ತಾಂಬ್ಡೆ ಜಾಲ್ಲೆ. ತಾಂಚೆ ದೊಳೆ ಏಕಾಗ್ರತೆನ್ ಭರೊನ್, ಉಜ್ಯಾಚ್ಯಾ ಆಗ್ಟ್ಯಾಪರಿಂ ಪೆಟ್ತಾಲೆ.
ಮಲಯಾಳಿ ಪೆಟ್ಯಾಚೆ ಮುಖ್ಲೆ ದಾಂತ್ (ಕೋರೆ ಹಲ್ಲು) ಆಪ್ಣಾಕ್ ರಗ್ತಾಚಿ ತಾನ್ ವಿಪ್ರೀತ್ ಚಡ್ಲ್ಯಾ ಜಶೆಂ ವಿಕಾರ್ ರಿತಿನ್ ಜಳ್ಜಳ್ತಾಲೆ. ಟೊಮಿಚ್ಯಾ ಆಂಗಾಂತ್ ರಿಗೊನ್ ಮಾಸ್ ಶಿಂದುಂಕ್ ಆನಿ ರಗತ್ ವ್ಹಾಳಂವ್ಕ್ ತೆ ಆಂವ್ಡೆತಾಲೆ. ತಾಚೆ ದೊಳೆ ಜಳ್ತಾಲೆಚ್ ಮ್ಹಣ್ಯೆತ್.
ತಶೆಂಚ್ ಜಾಲೆಂ. ತಾಣೆಂ ಟೊಮಿಚೆರ್ ಆಕ್ರಮಣ್ ಚಡಯ್ಲೆಂ. ಚಡಿತ್ ವೇಗ್ ಆನಿ ಬಳ್ ಆಪ್ಣಾವ್ನ್ ತೊ ಟೊಮಿಚೆರ್ ಉಡ್ಲೊ ಆನಿ ಕಿತ್ಲೆಂ ತಾಂಕ್ತಾ ತಿತ್ಲೆಂ ಚಾಬ್ಲೆಂ. ತಾಚ್ಯಾ ಘಾಸಾಂನಿ ಟೊಮಿ ಸಂಪೂರ್ಣ್ ಭೆಸಾಂ ಜಾಲೊ. ತಾಚೆಂ ಬಳ್ ಉಬೊನ್ ಗೆಲೆಂ. ತಾಚೊ ಹುರುಪ್ ಜಿರ್ಲೊ, ಭರ್ವಸೊ ಕರ್ಗಲೊ, ಆನಿ, ತೊ ಥಂಯ್ಚ್ ಪರ್ತಲೊ.
ಪಯ್ಸ್ ಖಂಯ್‍ಗೀ ಎಕಾ ಘುಗಿನ್ ಬೋಬ್ ಘಾಲಿ…
ಧರ್ಣಿರ್ ಪಡ್‍ಲ್ಲ್ಯಾ ಟೊಮಿಚೆರ್ ತರೀ ದುಸ್ಮಾನ್ ಬಿರ್ಮತ್ ಪಾವ್ಲೊ ನಾ. ಸುಶೆಗಾತ್ ತಾಣೆಂ ಟೊಮಿಕ್ ಹದಾ ಕೆಲೊ. ಜಯ್ತಾಚೊ ಹಂಕಾರ್ ತಾಚೆ ಥಂಯ್ ಭರ್‌ಲ್ಲೊ.
ತಿತ್ಲ್ಯಾರ್ ಅಪಾಯ್ ಸಮ್ಜಲ್ಲ್ಯಾ ಹಾಂವೆಂ ಮೆಳ್‍ಲ್ಲೊ ಬೊಯ್ತಾಡೊ ಘೆವ್ನ್ ಪೆಟ್ಯಾಂ ಲಾಗಿಂ ಯೇವ್ನ್ ತ್ಯಾ ದಳ್ದಿರ್ ಸುಣ್ಯಾಕ್ ಧಾಂವ್ಡಾಯ್ಲೆಂ. ಟೊಮಿ ಶೆವ್ಟಲ್ಲೆಂ ಪಳೆವ್ನ್ ತೊ ಸಲ್ವಲ್ಲೊ ಖಚಿತ್ ಜಾವ್ನ್ ತಾಕಾ ಸಮಾಧಾನ್ ಜಾಲ್ಲೆಂ ದಿಸ್ತಾ, ಚಡ್ ಪ್ರತಿಭಟನ್ ಕರಿನಾಸ್ತಾನಾ ತೊ ತಾಚ್ಯಾ ಘರಾ ತೆವ್ಶಿನ್, ಕುಂಟೊನ್ ತರೀ, ಚಮ್ಕಲೊ.
ಮ್ಹಾಕಾ ಟೊಮಿಚಿ ಪರಿಸ್ಥಿತಿ ಪಳೆವ್ನ್ ಕಿತೆಂ ಕರ್ಚೆಂ ಕಳ್ಳೆಂ ನಾ. ತಾಚೆ ಘಾಯ್, ತಾಚಿ ಸ್ಥಿತಿ ಪಳೆವ್ನ್ ತೊ ಬಿಲ್ಕುಲ್ ವಾಂಚೊಂಕ್ ಸಾಧ್ಯ್ ನಾ ತಶೆಂ ಭೊಗ್ಲೆಂ. ಉಟೊಂಕ್ ಸೊಡ್ಯಾಂ ತೋಂಡ್ ಹಾಲಂವ್ಕೀ ತಾಕಾ ಅಸಾಧ್ಯ್ ಜಾಲ್ಲೆಂ. ಭೋವ್ ಕ್ಷೀಣ್ ಜಾಲ್ಲೊ ತಾಚೊ ತಾಳೊ, ಟೊಮಿ ನಿಮಾಣ್ಯಾ ಘಡಿಯಾಂಕ್ ಲಾಗಿಂ ಪಾವ್‍ಲ್ಲ್ಯಾಚೊ ಸಂಕೇತ್ ತಶೆಂ ಭೊಗ್ಲೆಂ.
ತಾಣೆಂ ವಾಂಚೊನ್ ಉರ್ಚಿ ಆಶಾ ಸಾಂಡ್ಲಿ.
ಮ್ಹಜ್ಯಾ ಮಾಂಯ್ಚಿ ಶುಶ್ರೂಷಾ
ಉಪ್ರಾಂತ್ ಘಡ್‍ಲ್ಲೆಂ ಏಕ್ ಅಚರ್ಯೆಂಚ್ ಮ್ಹಣಜೆ. ಟೊಮಿ ವಾಂಚನಾ ಮ್ಹಣ್ ಹಾಂವೆಂ ಚಿಂತ್‍ಲ್ಲೆಂ. ಮ್ಹಜ್ಯಾ ಮಾಂಯ್ನ್ ಅಜ್ಯಾಪ್ ಕರ್ನ್ ದಾಕಯ್ಲೆಂ. ಟೊಮಿಚೆಂ ಆವ್ಕ್ ಆನಿಕೀ ಬಾಕಿ ಆಸ್‍ಲ್ಲೆಂ. ತ್ಯಾ ನಿಸ್ತೇಜ್, ಕಂಗಾಲ್ ಪರಿಸ್ಥಿತೆ ಥಾವ್ನ್ ಟೊಮಿ ವಾಂಚೊನ್, ಬರೊ ಜಾಲ್ಲೆಂ ವರ್ಣುಂಕ್ ಜಾಯ್ನಾ.
ಮೊನ್ಜಾತಿಂಕ್ ದೆವಾನ್ ಏಕ್ ವಿಶಿಸ್ಟ್ ಬೆಸಾಂವ್ ದಿಲಾಂ. ತಿಂ ಆಪ್ಲೆ ಘಾಯ್ ಲೆಂವೊಂನ್‍ಂಚ್ ಗೂಣ್ ಕರ್ತಾತ್. ತಿ ವಿಶಿಸ್ಟ್ ಸಕತ್ ತಾಂಚಿ. ಪೆಟೆ, ಮಾಜ್ರಾಂ ಆಪ್ಲ್ಯಾ ಘಾಯಾಂಕ್ ಲೆಂವೊನ್ ಗೂಣ್ ಕರ್ಚೆಂ ತುಮಿ ಪಳೆಲಾಂ ಆಸ್ತೆಲೆಂ. ಥೊಡೆ ಪಾವ್ಟಿಂ ಸಾಂಗಾತಿ ಆಸ್ಲ್ಯಾರ್ ತಿಂಯೀ ಅಶೆಂ ಕರುಂಕ್ ಕುಮಕ್ ಕರ್ತಾತ್. ತ್ಯಾ ವರ್ವಿಂ ಚಿಂತಾಜನಕ್ ಪರಿಸ್ಥಿತೆಂತ್ಲೆಂ ವಾಂಚೊನ್ ಉರ್ತಾತ್.
ಟೊಮಿಚಿ ಪರಿಸ್ಥಿತಿಯೀ ಭೋವ್ ಕರಾಳ್ ಜಾಲ್ಲಿ. ಮಾಂಯ್ನ್ ಕಿತೆಂ ಕೆಲ್ಲೆಂ, ಕಶೆಂ ಚಿಕಿತ್ಸಾ ದಿಲ್ಲಿ ತೆಂ ಆತಾಂ ಸಾರ್ಕೆಂ ಉಡಾಸಾಕ್ ಯೇನಾ. ಪುಣ್ ತಿಣೆಂ ಟೊಮಿಕ್ ಜಾಯ್ತೊ ಆಧಾರ್ ದಿಲ್ಲೊ. ಪಯ್ಲೆಂಚ್ ಬಿರ್ಮತಿಚೊ ಸಾಗೊರ್ ತಿ. ದುಕ್ರಾಂಕ್ ತೇಲ್ ಪುಸ್‍ಲ್ಲ್ಯಾ ವಿಶಿಂ ಹಾಂವೆಂ ಸಾಂಗ್‍ಲ್ಲೆಂ ತುಮ್ಕಾಂ ಉಡಾಸ್ ಆಸಾಮೂ? ತಸಲಿ ದಯಾಳಿ ತಿ ಹ್ಯಾ ಪರಿಗತೆಂತ್ ಕಿತೆಂ ಪೂರಾ ಕರಿಶಿನಾ?!
ಫ್ಲಾರೆನ್ಸ್ ನೈಟಿಂಗೇಲಾನ್ ಝುಜಾಂತ್ ಘಾಯೆಲ್ಲ್ಯಾ, ಮಾರಣಾಂತಿಕ್ ಪರಿಸ್ಥಿತೆಂತ್ ಶೆವ್ಟಲ್ಲ್ಯಾ ಸೊಜೆರಾಂಚಿ ಚಿಕಿತ್ಸಾ, ಶುಶ್ರೂಷಾ ಕೆಲ್ಲೆಪರಿಂಚ್ ಮಾಂಯ್ನ್ ಆಮ್ಚ್ಯಾ ಟೊಮಿಕ್ ಸುಧಾರ್ಸಿಲೆಂ. ಪಯ್ಲೆಂ, ಮರ್ಣಾಕ್ ಸಾಂಪಡ್ಲೊಚ್ ಮ್ಹಣ್ ದಿಸ್‍ಲ್ಲೊ ಟೊಮಿ ಥೊಡ್ಯಾ ದಿಸಾಂನಿ ವಾಂಚೊಂಕ್ ಸಕ್ತಾ ಮ್ಹಳ್ಳ್ಯಾ ಭರ್ವಸ್ಯಾದಾಯಕ್ ಸ್ಥಿತೆಕ್ ಪಾವ್ಲೊ. ಉಪ್ರಾಂತ್ ಕ್ರಮೇಣ್ ಇಲ್ಲೊ ಇಲ್ಲೊ ಬರೊ ಜಾವ್ನ್ ಆಯ್ಲೊ. ದೀಸ್ ಉಬೊನ್ ವೆತಾನಾ ತಾಚೆ ಘಾಯ್‍ಯೀ ಗೂಣ್ ಜಾವ್ನ್ ಆಯ್ಲೆ ಆನಿ ಟೊಮಿ ಪಯ್ಲೆಂಚೆಪರಿಂ ಚಡುಣೆಂ ಸಾರ್ಕೊ ಜಾಲೊ.
ಆಮಿ ಆಮ್ಚ್ಯಾ ರಾಟಾವಳಿಂನಿ, ವ್ಯಸ್ತ್ ಜವಾಬ್ದಾರೆಂನಿ ಬುಡ್‍ಲ್ಲ್ಯಾಂವ್. ಟೊಮಿ ಬರೊ ಜಾಲ್ಯಾ ಉಪ್ರಾಂತ್ ಲಡಾಯೆಚಿಂ ದೃಶ್ಯಾಂಯೀ ಮತಿಂತ್ ಲೀನ್ ಜಾಲಿಂ. ತಾಚಿ ಖಂತ್‍ಯೀ ಪಯ್ಸ್ ಜಾಲಿ. ದೀಸ್ ಸದಾಂಚೆಪರಿಂ ಧಾಂವ್ತಾಲೆ. ಕಾಳ್ ವೆಗಾನ್ ಪಾಶಾರ್ ಜಾತಾಲೊ.
ಪುಣ್ ಫುಡೆಂ ಕಿತೆಂ ಘಡ್ತೆಲೆಂ, ಕಿತೆಂ ಪಳೆಂವ್ಕ್ ಆಸಾ ಮ್ಹಣ್ ಆಮ್ಕಾಂ ಕೊಣಾಯ್ಕೀ ಕುಸ್ಕುಟಾಚೊ ಜೋಪ್ ನಾತ್‍ಲ್ಲೊ. ಮುಖಾರ್ ಪರತ್ ಏಕ್ ಲಡಾಯ್ ಘಡೊಂಕ್ ಆಸಾ, ಹೆಚ್ ಪೆಟೆ ಪರ್ತ್ಯಾನ್ ಮುಖಾಮುಖಿ ಜಾವ್ನ್ ರಗ್ತಾಚಿ ತಾನ್ ಭಾಗಂವ್ಕ್, ಎಕಾಮೆಕಾ ಫಾಪ್ಸುನ್ ಘಾಲುಂಕ್ ಝುಜ್ತೆಲೆ ಮ್ಹಣ್ ಕೊಣಾಕ್ ತರೀ ಸಪಣ್ ಪಡ್ಲಾಂಗೀ?
ಬಿಲ್ಕುಲ್ ನಾ.
ಪುಣ್, ಆಮ್ಕಾಂ ಕೊಣಾಕೀ ಕಳಿತ್ ನಾತ್‍ಲ್ಲೆಂ ತೆಂ ಟೊಮಿಚ್ಯಾ ಮತಿಂತ್ ಶಿಜ್ತಾಲೆಂ! ಘಡ್‍ಲ್ಲೆಂ ಝುಜ್ ಆನಿ ಉಪ್ರಾಂತ್ಲೆಂ, ಆಮಿ ವಿಸ್ರಲ್ಯಾಂವ್ ತರೀ, ಟೊಮಿಕ್ ತೆಂ ವಿಸ್ರೊಂಕ್ ಸಾಧ್ಯ್ ನಾತ್‍ಲ್ಲೆಂ. ತಾಚ್ಯಾ ಜಿವಿತಾಂತ್ ಘಡ್‍ಲ್ಲೆಂ ಮಾರೆಕಾರ್ ಘಡಿತ್ ತೆಂ. ತಾಚ್ಯಾಚ್ ಘರ್ಚ್ಯಾ ಜಾಗ್ಯಾರ್ ಪರ್ಕಿ ದುಸ್ಮಾನಾನ್ ಯೇವ್ನ್ ಆಪ್ಣಾಕ್ ಸಂಹಾರ್ ಕರುಂಕ್ ಪೆಚಾಡ್‍ಲ್ಲೆಂ, ಆಪುಣ್ ತ್ಯಾ ವಿಕಾಳ್ ಲಡಾಯೆಂತ್ ಫಸ್ವಲ್ಲೆಂ, ಘಾಯೆವ್ನ್ ಭೆಸಾಂ ಜಾಲ್ಲಿ ಕೂಡ್… ಏಕ್‍ಯೀ ತಾಣೆಂ ವಿಸ್ರೊಂಕ್ ನಾತ್‍ಲ್ಲೆಂ.
ತಸಲೊ ಘೋರ್ ಅಕ್ಮಾನ್ ಕೋಣ್ ಸೊಸ್ತಿತ್?!? ತಸಲಿ ಸಲ್ವಣ್ ಕೋಣ್ ವಿಸರ್ತಿತ್???
ಏಕ್ ಕಠೋರ್ ನಿರ್ಧಾರ್ ತಾಣೆಂ ಘೆತ್‍ಲ್ಲೊ!!
ಜೀವ್ ಉರೊನ್, ಸಬಾರ್ ದೀಸ್ ವಳ್ವಳೊನ್, ಕಳ್ವಳೊನ್, ದೂಕ್ ಸೊಸುನ್, ಭೊಂಗಾನಿ, ಸವ್ಕಾಸ್ ಬರೊ ಜಾವ್ನ್ ಆಯಿಲ್ಲ್ಯಾ ಟೊಮಿಕ್ ಆತಾಂ ಎಕ್‍ಚ್ ಶೆವಟ್. ದೀಸ್ ರಾತ್ ತಾಕಾ ತಿಚ್ ಆಲೋಚನ್. ಆಪ್ಣಾಕ್ ಜಾಲ್ಲ್ಯಾ ಅಕ್ಮಾನಾಕ್ ಹಗೆಂ ತಿರ್ಸಿಜೆ… ಫಾರಿಕ್ಪಣ್ ಘೆಜೆ… ಆಪ್ಣಾಕ್ ಶೆವ್ಟಾಯಿಲ್ಲ್ಯಾ ಅನ್ನಾಡ್ಯಾಕ್ ಬೂದ್ ಶಿಕಯ್ಜೆ…!!
ವ್ಹಯ್. ಟೊಮಿ ಥಂಯ್ ಹೆಂಚ್ ಶಿಜೊನ್ ಆಸ್‍ಲ್ಲೆಂ. ತೊ ಬರೊ ಜಾವ್ನ್ ಸುಧ್ರಲ್ಲೊ ಪಳೆವ್ನ್ ಆಮ್ಕಾಂ ಕೊಣಾಯ್ಕೀ ತಾಚ್ಯಾ ಸಂಕಲ್ಪಾವಿಶಿಂ ಕುಸ್ಕುಟಾಚೊ ಅಂದಾಜ್ ನಾತ್‍ಲ್ಲೊ. ಹಿಶಿಲ್ಯಾನ್ ಟೊಮಿಕ್ ಘಾತ್ ಕರ್ನ್ ಗೆಲ್ಲೊ ಮಲಯಾಳಿ ಪೆಟೊ ಸಬಾರ್ ತೇಂಪ್ ಆಮ್ಚ್ಯಾ ಜಾಗ್ಯಾಂತ್ ದಿಸ್ಲೊ ನಾ.
ಪುಣ್ ದೆವಾನ್ ನಿರ್ಮಿಲ್ಲೆಂ ಮನ್ಶ್ಯಾನ್‍ಯೀ ಆಡಾಂವ್ಕ್ ಜಾಯ್ನಾ. ಆನಿ ಮೊನ್ಜಾತಿಂಕ್ ಸಾಧ್ಯ್‌ಗೀ?!
ಫಾರಿಕ್ಪಣಾಕ್ ಟೊಮಿ ಆಂವ್ಡೆತಾಲೊ. ದುಸ್ಮಾನಾಕ್ ಶಿಂದುನ್ ಘಾಲುಂಕ್ ತೊ ಯೆವ್ಜಿತಾಲೊ. ತ್ಯಾ ತೆಕಿದ್ ನಿರ್ಧಾರ್ ತಾಚೆ ಥಂಯ್ ಖಚಿತ್ ಜಾಲ್ಲೊ. ನಿಚೆವ್ ಘಟ್ ಜಾಲ್ಲೊ. ಆದ್ಲೆ ಪಾವ್ಟಿಂ ಜಾಲ್ಲಿ ಚೂಕ್ ಪರತ್ ಜಾಂವ್ಕ್ ನಜೊ! ಆಪ್ಣಾಕ್ ಜಾಲ್ಲೊ ಅನ್ಯಾಯ್, ಲುಕ್ಸಾಣ್ ಸೊಸುಂಕ್ ತೊ ಕಬೂಲ್ ನಾತ್‍ಲ್ಲೊ.
ದೆಕುನ್ ಫಾರಿಕ್ಪಣಾಕ್ ತೊ ತಾನೆತಾಲೊ. ಹೆಂ ತಾಚ್ಯಾ ಮತಿಂತ್ಲೆಂ ದುಸ್ಮಾನ್ ಮಲಯಾಳಿ ಪೆಟ್ಯಾಕೀ ಕಳಿತ್ ಜಾಲೆಂಗೀ ವಾ ತಾಕಾಯೀ ತಶೆಂಚ್ ಭೊಗ್ಲೆಂಗೀ, ಪರತ್ ದೊಗಾಂಯ್ಚಿ ಮುಖಾಮುಖಿ ಜಾಲಿಚ್.
ದೆವಾಚೆಂ ನಿರ್ಮೊಣೆಂ ಜಾರಿ ಜಾಂವ್ಕ್ ಆಸ್‍ಲ್ಲೆಂ. ಆನಿ ಹಾಂವೆಂ ತಾಕಾ ಸಾಕ್ಸ್ ಜಾಂವ್ಕ್ ಆಸ್‍ಲ್ಲೆಂ.
ತ್ಯಾಚ್ ಬಯ್ಲಾಂತ್, ತ್ಯಾಚ್ ಜಾಗ್ಯಾರ್, ತ್ಯಾಚ್ ದೋಗ್ ಪೆಟ್ಯಾಂಚಿ ಲಡಾಯ್ ಪರತ್ ಜಾಂವ್ಚ್ಯಾರ್ ಆಸ್‍ಲ್ಲಿ. ಪರತ್ ಏಕ್ ನಿರ್ಣಾಯಕ್ ಸಂಗ್ರಾಮ್, ಅಂತಿಮ್ ತೀರ್ಪ್ ದಿಂವ್ಚೆಂ ಝುಜ್ ಚಲೊಂಕ್ ಆಸ್‍ಲ್ಲೆಂ.
ಮುಖ್ಲ್ಯಾ ಭಾಗಾಂತ್ ಅಂತಿಮ್ ಝುಜ್!!
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
