ಎಕಾ ಪೆಟ್ಯಾಚೆಂ ಫಾರಿಕ್ಪಣ್ – 2: ಪರಿಸರಾಂತ್ ಏಕ್ ಭೊಂವ್ಡಿ
Posted on : May 27, 2025 at 7:00 PM
ಎಕಾ ಪೆಟ್ಯಾಚೆಂ ಫಾರಿಕ್ಪಣ್! – ದುಸ್ರೊ ಭಾಗ್
Location: ಪಶ್ಚಿಮ್ ಘಾಟಾಕ್ ಲಾಗಿಂ
ಮುಖ್ಲಿಂ ಘಡಿತಾಂ ವರ್ಣುಂಚ್ಯಾ ಪಯ್ಲೆಂ ಆಮ್ಚೊ ತೊ ಜಾಗೊ ಕಸೊ ಆಸ್‍ಲ್ಲೊ ಮ್ಹಣ್ ಸಾಂಗ್ತಾಂ. ಹಾಂಗಾ ದಿಲ್ಲೆಂ ಚಿತ್ರ್ ಪಳೆಯಾ. ತೆಂ ಆಮ್ಚೆಂ ಪರಿಸರ್ ಜಾವ್ನಾಸ್‍ಲ್ಲೆಂ. ಘರಾ ಥಾವ್ನ್ ಮುಖಾರ್ ದೀಶ್ಟ್ ಭೊಂವ್ಡಾಯ್ಲ್ಯಾರ್, ವಿಶಾಲ್ ಗಾದೆ. ಪಲ್ತಡಿಚೊ ಗುಡೊ ಭೋವ್ ಉಬಾರ್. ಆಮ್ಚೆಂ ಬೈಲ್ (ಮಟ್ಲ ಮ್ಹಣ್ ತಾಚೆಂ ನಾಂವ್, ಪಲ್ತಡಿಚ್ಯಾ ಗುಡ್ಯಾ ತೆಣೆಂಚ್ಯಾ ಸುವಾತೆಕ್ ಸುಧೆಮುಗೇರ್ ಮ್ಹಣ್ತಾಲೆ) ಭೋವ್ ಲಾಂಬ್ ಆಸ್‍ಲ್ಲೆಂ. ದಾವ್ಯಾ ಕುಶಿಕ್ ಬಯ್ಲಾಂತ್ ಗೆಲ್ಯಾರ್ ಇಲ್ಲಿಶಿ ಚಡ್ಣಿ. ಆಮ್ಚಿ ಕೂಸ್/ಪ್ರದೇಶ್ ನ್ಹಂಯ್ ಕುಶಿನ್ ಲಾಗ್ಸರ್ ಆಸ್‍ಲ್ಲಿ. ವಯ್ರ್ ಥಾವ್ನ್ ಉದಾಕ್ ನ್ಹಂಯ್ ಕುಶಿಕ್ ವ್ಹಾಳೊನ್ ಯೆತಾಲೆಂ. ಆಮ್ಚೆ ತೆಣೆಂಚ್ಯಾ ಘರಾಂಕ್ ವಯ್ಲ್ಯಾ ಕುಶಿಚೆ ‘ಸಕಯ್ಲ್ಯಾ ಘರ್ಚಿಂ ವಾ ಸಕಯ್ಲಿಂ’ ಮ್ಹಣ್ತಾಲಿಂ.
ಫರಕ್ ಮ್ಹಳ್ಯಾರ್ ಆಮ್ಚ್ಯಾ ಬಯ್ಲಾಚ್ಯಾ ವಯ್ರ್ ವಯ್ರ್ ಗೆಲ್ಯಾರ್ ಗಾದೆ ಆನಿ ಕುಶಿಂಚ್ಯಾ ಗುಡೆ-ಜಾಗ್ಯಾಂಚಿ ಉಬಾರಾಯ್ ಉಣಿ ಉಣಿ ಜಾತಾಲಿ. ತೆಂಚ್ ಆಮ್ಚೆ ತಿಶಿನ್, ನ್ಹಂಯ್ಕ್ ಲಾಗಿಂ ಪಾವ್ತಾಸ್ತಾನಾ ಬಯ್ಲಾಂ ಗೂಂಡ್ ಆನಿ ದೊನೀ ಕುಶಿಂಚೆ ಜಾಗೆ ಉಬಾರ್ ಆಸ್ತಾಲೆ. ತ್ಯಾ ವರ್ವಿಂ ಆಲ್ತಡಿ ಆನಿ ಪಲ್ತಡಿಚಿಂ ಘರಾಂ ಉಬಾರ್ ಜಾಗ್ಯಾಂನಿ ಆಸ್ತಾಲಿಂ. ದೆಕುನ್ ಗಾದ್ಯಾಂಕ್, ಬಯ್ಲಾಕ್ ದೆಂವಜೆ ತರ್ ದೆಂವ್ಣಿ ಚಡ್. ಮನ್ಶ್ಯಾಂಕ್ ದೆಂವೊಂಕ್ ಮೆಟಾಂ ಆನಿ ಪಾಂಪಾಳಿಂ ಆಸ್ತಾಲಿಂ. ತೆದ್ನಾಂ ರುಕಾಚಿಂಚ್ ಪಾಂಪಾಳಿಂ. ಗೊರ್ವಾಂಕ್, ರೆಡ್ಯಾಂಕ್ ದೆಂವಂವ್ಕ್ ವೆಗ್ಳಿಚ್ ವಾಟ್ ಆಸ್ತಾಲಿ.
ಘರಾ ಥಾವ್ನ್ ಪಳೆಲ್ಯಾರ್…
ಪಾರಂಪರಿಕ್ ಜಾವ್ನ್ ಉದ್ಕಾಚೊ ವ್ಹಾಳೊ ಅಗಾಧ್ ಆಸ್ಚ್ಯಾ ಜಾಗ್ಯಾಂನಿ ಗೂಂಡ್ ತೋಡ್ ಆಸ್ತಾಲೆಂ. ಬಯ್ಲಾಚ್ಯಾ ದೊನೀ ಕುಶಿಂನಿ ತೊಡಾಂ ಆಸಜೆಚ್. ದೆಕುನ್ ಘರಾ ಮುಖ್ಲ್ಯಾ ಜಾಲಾ ಥಾವ್ನ್ ಮೆಟಾಂ ದೆಂವ್ತಾನಾ ತೋಡ್ ಉತ್ರೊಂಕ್ ಆಸ್ತಾಲೆಂ. ಗೂಂಡ್ ಚಡ್ ಆಸ್ಲ್ಯಾರ್ ಘಟ್ ಪಾಂಪಾಳೆಂ ಅವಶ್ಯಕ್. ಪಾಂಪಾಳ್ಯಾಚಿ ತಿಶಿಲಿ ಕೂಸ್ ಮೇರ್. ತಾಕಾ ಕಟಮಣಿ/ಕಟಪುಣಿ ಮ್ಹಣ್ತಾಲೆ. ತಿಯೀ ಉಬಾರ್. ಉಪ್ರಾಂತ್ ಗಾದೆ. ಗಾದ್ಯಾಂ ಮಧೆಂ ಮೇರ್ ವಾ ಕಟಮಣಿ ಗಾದ್ಯಾಂಕ್ ವಿಭಾಗ್ ಕರ್ತಾಲ್ಯೊ. ವಯ್ಲೊ ಗಾದೊ, ಮಧ್ಲೊ ಆನಿ ಸಕಯ್ಲೊ ಗಾದೊ – ಹರ್ಯೆಕಾ ಗಾದ್ಯಾಕ್ ಏಕ್ ನಾಂವ್. ಪಲ್ತಡಿಯೀ ತಿಚ್ ವ್ಯವಸ್ಥಾ. ಗಾದ್ಯಾಚ್ಯಾ ಪೊಂತಾಕ್, ಲಾಂಬಾಯೆಕ್ ಆಸ್ಚ್ಯಾ ಕಟಮಣಿ ಮುಳಾಂತ್ ಖಣಿ, ತಿ ವ್ಹಡ್ ಆಸ್ಲ್ಯಾರ್ ತಾಚೆರೀ ಏಕ್ ಲ್ಹಾನ್ ಪೊಳೆಂ ವಾ ರುಕಟ್ ಘಾಲ್ನ್ ಪಾಂಪಾಳ್ಯಾಪರಿಂ ಘಾಲ್ತಾಲೆ. (ಹ್ಯೊ ಖಣಿಯೊ ಗಾದ್ಯಾಂತ್ಲೆಂ, ಚಡಾವತ್ ಪಾವ್ಸಾಂತ್, ಚಡ್ತಿಕ್ ಉದಾಕ್ ವ್ಹಾಳೊಂಕ್ ಉಪ್ಕಾರ್ತಾತ್). ಉಪ್ರಾಂತ್ ಪರತ್ ವ್ಹಡ್ ಕಟಮಣಿ, ತಿಶಿಲ್ಯಾನ್ ತೋಡ್ ಆನಿ ತಾಕಾ ಲಾಗೊನ್ ಪರತ್ ದೊಂಗೊರ್. ತೆಣೆಂಯೀ ತಶೆಂಚ್ ಗರ್ಜ್ ಪಡ್ಲ್ಯಾರ್ ಪಾಂಪಾಳೆಂ, ನಾತ್ಲ್ಯಾರ್ ಚಲೊನ್‍ಂಚ್ ಚಡೊಂಕ್, ಮನ್ಶ್ಯಾಂಕೀ ಜಾನ್ವಾರಾಂಕೀ, ಖೊಂಡ್‍ಲ್ಲಿ ವಾಟ್.
ಆತಾಂ ಬಯ್ಲಾಚೆರ್ ದೀಶ್ಟ್ ಘಾಲ್ಯಾಂ. ಮೈಲಾಂ ಥಾವ್ನ್ ಉದೆವ್ನ್ ಆಯಿಲ್ಲ್ಯಾ ಬಯ್ಲಾಂತ್ ಪೊಂತಾನ್ ಪೋಂತ್ ಲಗ್ಬಗ್ ಶೆಂಬರ್ ಗಾದೆ. ಗಾದ್ಯಾಂನಿ ಭಾತಾಚೆಂಚ್ ಬೆಳೆಂ ದೆಕುನ್ ಉದಾಕ್ ಸಮತಟ್ಟ್ ರಾಂವ್ಚ್ಯಾಕ್ ವ್ಯವಸ್ಥಾ ಕರಿಜೆ ದೆಕುನ್, ಥಂಯ್ ಥಂಯ್ ಮೇರ್. ತ್ಯಾ ತುದಿಯೆ ಥಾವ್ನ್ ಸಕಯ್ಲ್ಯಾ, ನ್ಹಂಯ್ ತಡಿಚ್ಯಾ ಗಾದ್ಯಾಂ ಪರ್ಯಾಂತ್, ಗಾದ್ಯಾಂಚೆಂ ಮಟ್ಟ್ ಸಕಯ್ಲ್ ಸಕಯ್ಲ್ ಆಸ್ತಾಲೆಂ. ಗಾದ್ಯಾಂತ್ ಭರ್‌ಲ್ಲೆಂ ಉದಾಕ್ ಸಕಯ್ಲ್ಯಾ ಗಾದ್ಯಾಂಕ್ ಸೊಡುಂಕ್ ಮೆರೆಂನಿ ವ್ಯವಸ್ಥಾ ಆಸ್ತಾಲಿ (ತಾಕಾಚ್ ‘ತೂಂಬ್’ ಮ್ಹಣ್ಚೆಂ).
ಪಯ್ಲೆಂ ಫಕತ್ ಗಾದೆಚ್ ಆಸ್ತಾಲೆ ಜಾಲ್ಲ್ಯಾನ್ ಬೈಲಾಚ್ಯಾ ಪಯ್ಶಿಲೆ ಜಾಗೆ, ರೂಕ್, ಮನಿಸ್ ದಿಸ್ತಾಲೆ. ಉಪ್ರಾಂತ್ ಎಕಾ ಬೊಣ್ಕ್ಯಾನ್ ಮಾಡಿಯೊ ದವರ್ಲ್ಯಾ ಉಪ್ರಾಂತ್ ಸಕ್ಡಾಂನಿ ಮಾಡಿಯೊ ಲಾಯ್ಲ್ಯೊ.
ಗಾದೆ ಆನಿ ಕೃಷಿ…
ಆತಾಂ, ಆಮ್ಚ್ಯಾ ಘರಾಕ್ ಕೇಂದ್ರೀಕೃತ್ ಕರ್ನ್ ಸಗ್ಳೆಂ ಪಳೆಂವ್ಚೆಂ ಹ್ಯಾ ಕಾಣಿಯೆಕ್ ಅವಶ್ಯಕ್. ತ್ಯಾ ಕಾಳಾರ್ ಗಾದ್ಯಾಂನಿ ಉದ್ಕಾಚಿ ವ್ಯವಸ್ಥಾ ಆಸ್ಲ್ಯಾರ್ ತಿನೀ ಬೆಳಿಂ ಭಾತಾಚಿಂಚ್. ಪಾವ್ಸ್ ಪಡ್ತಾನಾ ಎಣೆಲ್/ಯೆಣೆಲ್ – ಹೆಂ ಮೊಂತಿ ಫೆಸ್ತಾಚ್ಯಾ ಸಂದರ್ಭಾರ್ ಲುಂವೊಂಕ್ ಜಾತಾ. ಉಪ್ರಾಂತ್ಲೆಂ ಸುಗ್ಗಿ ಬೆಳೆಂ ಡಿಸೆಂಬರ್ ತಿತ್ಲ್ಯಾರ್ ಲುಂವೊಂಕ್ ಜಾಂವ್ಚೆಂ. ತೆದ್ನಾಂ ಆಖ್ಖ್ಯಾ ಬಯ್ಲಾಂತ್ (ಗಾಂವಾಂತೀ) ಹಿಂ ದೊನೀ ಬೆಳಿಂ ಸಲೀಸಾಯೆನ್ ಜಾತಾಲಿಂ. ಉದಾಕ್ ಧಾರಾಳ್ ಆಸ್ತಾಲೆಂ. ಪುಣ್ ಉಪ್ರಾಂತ್ಲೆಂ ಬೆಳೆಂ ಸಕ್ಡಾಂಕ್ ಸಾಧ್ಯ್ ಜಾಯ್ನಾತ್‍ಲ್ಲೆಂ. ಉದಾಕ್ ಕೊಣಾ ಲಾಗಿಂ ಆಸ್ತಾ ತಾಂಕಾಂ ಮಾತ್ರ್ ಕರುಂಕ್ ಜಾತಾಲೆಂ. ದೆಕುನ್‍ಂಚ್ ‘ಬಳ್ ಆಸ್‍ಲ್ಲ್ಯಾಚೆಂ ಬೊಳ್ಕೆಂ, ಉದಾಕ್ ಆಸ್‍ಲ್ಲ್ಯಾಚೆಂ ಕೊಳ್ಕೆಂ’ ಮ್ಹಣ್ ಸಾಂಗ್ಣಿ ಉದೆಲ್ಲಿ.
ಆಮ್ಗೆರ್ ಮಧ್ಲೊ ಗಾದೊ, ತಾಕಾ ‘ಗುಂಡಿ’ ಮ್ಹಣ್ ನಾಂವ್, ತಾಂತುಂ ತಿನೀ ಬೆಳಿಂ ಜಾತಾಲಿಂ. ತ್ಯಾಚ್ ಗಾದ್ಯಾಂತ್ ತಳೆಂ ಆಸ್‍ಲ್ಲೆಂ. ತಾಂತುಂ ಕೆದ್ನಾಂಯೀ ಉದಾಕ್ ಆಸ್ತಾಲೆಂ. ಗಿಮಾಂತ್ ಸಗ್ಳ್ಯಾಂನಿ ಉದಾಕ್ ಸುಕ್ಲ್ಯಾರೀ ತಾಂತುಂ ಜಾಯ್ ಪುರ್ತೆಂ ಉದಾಕ್ ಮೆಳ್ತಾಲೆಂ. ಸೆಜಾರ್ಚಿಂ ಆನಿ ಪಯ್ಸ್ ಪಯ್ಸ್ ಥಾವ್ನ್ ಲೋಕ್ ಉದಾಕ್ ವ್ಹರುಂಕ್ ಆಮ್ಚ್ಯಾ ತಳ್ಯಾಕ್ ಪಾವ್ತಾಲೊ. (ಕೆದ್ನಾಂ ಪಲ್ತಡಿಚ್ಯಾಂನಿ ಬೋರ್‌ವೆಲ್ ಘಾಲೆಂಗೀ ತ್ಯಾ ದುಸ್ರ್ಯಾ ವರ್ಸಾಚ್ ಗಿಮಾಂತ್ ಆಮ್ಚ್ಯಾ ತಳ್ಯಾಂತ್ ಉದಾಕ್ ಖಾಲಿ!). ಹೆರ್ ಗಾದ್ಯಾಂನಿ ಧಾನಿ ಕರ್ಚಿ ಆಸ್‍ಲ್ಲಿ. ತಾಕಾ ಉದಾಕ್ ಗರ್ಜ್ ನಾತ್‍ಲ್ಲೆಂ. ಕೊಸುನ್ ಬಿಂ ಘಾಲ್ಯಾರ್ ಜಾಲೆಂ. ಮೂಗ್, ಸೊವ್ಳಿ (ಧವಿ ಆನಿ ಕಾಳಿ), ಉಡಿತ್, ಕುಳಿತ್ ಚಡಾವತ್ ಕಾಡ್ಚ್ಯೊ ಧಾನಿ. ಉದಾಕ್ ಆಸಾ ತರ್ ಮೊಗ್ಣಿ, ಮ್ಹಳ್ಯಾರ್ ರಾಂದ್ವಯ್ ಕರ್ತಾಲಿಂ. ಗಿಮಾಂತ್ ಆನಿ ಪಾವ್ಸಾಂತ್ ಜಾಂವ್ಚ್ಯಾ ರಾಂದ್ವಯೆಕ್ ಫರಕ್ ಆಸ್ತಾಲೊ. ಮೊಗಿಂ ಗಿಮಾಂತ್‍ಚ್ ಜಾಂವ್ಚಿಂ; ತೊವ್ಶಿಂ ಪಾವ್ಸಾಂತ್‍ಚ್ ಜಾಂವ್ಚಿಂ. ಹೆರ್ ಗೊಸಾಳಿಂ, ಬೆಂಡಾ, ಅಲ್ಸಾಂದೆ, ಕುವಾಳೆ, ವಾಂಯ್ಗಿಂ ಇತ್ಯಾದಿ ದೊನೀ ಸೀಸನಾಂನಿ ಜಾತಾಲಿಂ. ಗಿಮಾಂತ್ಲ್ಯಾ ರಾಂದ್ವಯೆಕ್ ಸಕಾಳಿಂ ಸಾಂಜೆರ್ ಉದಾಕ್ ಘಾಲ್ಚಿ ಡ್ಯೂಟಿ ಆಮ್ಕಾಂ ಭುರ್ಗ್ಯಾಂಕ್.
ಪ್ರಯೋಗ್ ಕರ್ಚೆಂ ಮನ್ಶ್ಯಾಚೊ ಸ್ವಭಾವ್. ಕೊಬು, ಕಾಳಿಂಗ್, ಜೋಳ ಇತ್ಯಾದಿ ಆಮ್ಚ್ಯಾ ಜಾಗ್ಯಾಂತ್ ಜಾಲ್ಯಾಂತ್.
ಪಾಚ್ವಿ ಧರ್ತಿ, ಪ್ರಕೃತಿಚೆಂ ದಾಯ್ಜ್…
ಬಯ್ಲಾಂತ್ ಹರ್ ಮೆರೆಂನಿ ಮಾಡ್ ಆಸ್ತಾಲೆ. ಥಂಯ್ ಥಂಯ್ ಕೆಂಳ್ಬೆ ಆಸ್ಲ್ಯಾರ್, ಮಾಡಿಯೊಯೀ ಆಸ್ತಾಲ್ಯೊ. ಮಧೆಂ ಮಧೆಂ ಪೊಣ್ಸಾಚೆ, ಆಂಬ್ಯಾಚೆ, ಕಾಜುಚೆ ರೂಕ್‍ಯೀ ಆಸ್ತಾಲೆ. ಆಲ್ತಡಿ ಆನಿ ಪಲ್ತಡಿಯೀ ದರಬಸ್ತ್ ರೂಕ್. ಪೊಣೊಸ್, ಆಂಬೆ, ಪೆರಾಂ, ಅಂಬಾಡೆ, ಕಾಜು, ಪೊಪಾಯ್, ಸೀತಾಫಲ, ಜಾಂಬ್ಳಾಂ, ಜಾಂಬಾಂಚೆ ರೂಕ್ ನಾತ್‍ಲ್ಲಿಂ ಘರಾಂ ಆಸನಾತ್‍ಲ್ಲಿಂ. ಗುಡ್ಯಾಂನಿ ಬಿಂಡಾಂ ಆನಿ ಹೆರ್ ರಾನ್/ಕಾಟ್ ಫಳಾಂಚೆ ದರಬಸ್ತ್ ರೂಕ್. ಕಾಪುಸ್ ತಸಲೆ ಕಮರ್ಶಿಯಲ್ ಫಳಾಂ ದಿಂವ್ಚೆ ರೂಕ್‍ಯೀ ಆಸ್‍ಲ್ಲೆ. ಘರಾ ಬಗ್ಲೆನ್‍ಂಚ್ ವ್ಹಡ್ ಕಣಕ್ ಆಸ್‍ಲ್ಲಿ. ಗುಡ್ಯಾಂನಿ ಬೆಣ್ಸಾಂ ಆನಿ ಹೆರ್ ಸೀಸನಲ್ ಫಳಾಂ ದರಬಸ್ತ್.
ತಿತ್ಲೆಂ ಸಕ್ಕಡ್ ಆಸೊನ್ ಫುಲಾಂಚಿಂ ಝಾಡಾಂ ನಾತ್ಲ್ಯಾರ್ ಜಾತಾವೇ? ಚಡಾವತ್ ಚಲಿಯಾಂಕ್ ಫುಲಾಂಚಿ ಪಿಸಾಯ್ ಚಡ್. ದೆಕುನ್ ತಾ’ತಾಂಚ್ಯಾ ಅಭಿರುಚಿ ಪರ್ಮಾಣೆಂ ಫುಲಾಂಚಿ ಕೃಷಿ ಆಸ್ತಾಲಿ. ರಥಪುಷ್ಪ, ಗ್ಲಾಸ್ ಫುಲಾಂ ತಸಲ್ಯಾ ಗಾಂವ್ಟಿ ಝಾಡಾಂಕ್ ಕೊಣೆಂಯೀ ಪೋಸ್ ಕರಿಜೆ ಮ್ಹಣ್ ನಾತ್‍ಲ್ಲೆಂ. ತಿಂ ಅಪಾಪಿಂಚ್ ವಾಡೊನ್ ಫುಲಾಂ ದಿತಾಲಿಂ. ಸೈಂಟ್ ತೆರೇಸಾ ಇಸ್ಕೊಲ್-ಕೊವೆಂತಾಂತ್ ಜಬರ್ದಸ್ತ್ ಫುಲಾಂಚೆಂ ತೋಟ್ ಆಸ್‍ಲ್ಲೆಂ. ಪಾವ್ಸಾಂತ್ ಸೊರ್ಕೆಲ್ಲೆ ಫಾಂಟೆ ಇತ್ಯಾದಿ ಕಾತರ್ನ್ ಮಾರ್ಗಾ ದೆಗೆರ್ ತಾಣಿಂ ದವರ್ಚೆಂ, ತೆಂ ಇಸ್ಕೊಲಾಚ್ಯಾ ಭುರ್ಗ್ಯಾಂನಿ ಘರಾ ವ್ಹರ್ಚೆಂ. ತಶೆಂ ನಮೂನ್ಯಾವಾರ್ ಫುಲಾಂಚಿಂ ಝಾಡಾಂ ಹಳ್ಳೆಂಚ್ಯಾ ಹಿತ್ಲಾಂನಿ ವಾಡ್ತಾಲಿಂ.
ಗಾದ್ಯಾಂತ್, ಮೆರೆಂನಿ ಕಾರೆಣೊ, ಹಳದ್; ಸೀಸನಾ ಪರ್ಮಾಣೆಂ ಕಾಸುಳ್, ಮುಡ್ಲ್ಯೊ, ಆಳುಂ ದರಬಸ್ತ್. ಗುಡ್ಯಾರ್ ತೈಕುಳೊ ಜಾಯ್ ಪುರ್ತೊ. ಖಂಯ್ ಪಾಯ್ ದವರ್ಲ್ಯಾರೀ ಉಪ್ಕಾರಾಚೆಂಚ್ ಆದಳ್ತಾಲೆಂ.
ಮ್ಹಣ್ತಾನಾ ತೆದ್ನಾಂಚೆಂ ಪರಿಸರ್ ಕಿತ್ಲೆಂ ನಿತಳ್, ಶುಭ್ರ್ ಆನಿ ಗ್ರೇಸ್ತ್ ಮ್ಹಣ್ ತುಮ್ಕಾಂ ಕಳ್ತಾ, ನ್ಹಯ್ವೇ? ತೆದ್ನಾಂಚೆಂ ತೆಂ ವಾತಾವರಣ್ ನಿಜಾಯ್ಕೀ ನಿರ್ಮಳ್ ಆನಿ ಶ್ರೇಷ್ಠ್.
ಪಾವ್ಸಾಂತ್ ಗಾದ್ಯಾಂತ್ ರಾಸ್ ರಾಸ್ ಕೊಂಗೆ ಮೆಳ್ತಾಲೆ. ಮಾಸ್ಳ್ಯಾಂಕ್ ಆನಿ ಕುರ್ಲ್ಯಾಂಕೀ ಬೊರ್ಗೊಳ್ ನಾತ್‍ಲ್ಲೊ. ಸೀಸನಾ ತೆಕಿದ್ ಲ್ಹಾನ್ ವ್ಹಡ್ ಫುಲಾಂ ಆನಿ ಫಳಾಂ ಧರ್ಮಾರ್ಥ್ ದಿತಾಲಿ ಪ್ರಕೃತಿ ಮಾಂಯ್.
ಮನ್ಶ್ಯಾಂ ಸಂಗಿಂ ‘ಟೊಮಿ’ಚಿ ಸವಾರಿ
ಸಾದ್ಯ್ ಜಾಲ್ಲ್ಯಾ ತವಳ್ ಆಮಿ ಗಾದ್ಯಾ-ಮೆರೆಂನಿ ಭೊಂವ್ತಾಲ್ಯಾಂವ್. ತೆದ್ನಾಂ ಟೊಮಿಯೀ ಆಮ್ಚೊ ಸಾಂಗಾತಿ. ಗುಡ್ಯಾಕ್ ವಾ ಖಂಯ್ ಗೆಲ್ಯಾರೀ ಆಮ್ಕಾಂ ಧಯ್ರಾಕ್ ತೊ ಜಾಯ್ಜೆ. ವಯ್ರ್ ವಿವರಿಲ್ಲ್ಯಾ ಹರ್ ಪ್ರದೇಶಾಂಚಿ ಇಂಚ್ ಇಂಚ್ ವಳಕ್ ಟೊಮಿಕ್ ಆಸ್‍ಲ್ಲಿ. ಕಸೆಂ ಮನಿಸ್ ತ್ಯಾ ಪ್ರದೇಶಾಚೊ ‘ಧನಿ’ಗೀ, ಧನ್ಯಾಚೊ ಸೆವಕ್‍ಚ್ ಜಾವ್ನಾಸ್ಚ್ಯಾ ಪೆಟ್ಯಾಕೀ ತ್ಯಾ ಸುವಾತೆಚೆರ್ ‘ಹಕ್ಕ್’ ಸಹಜ್ ನ್ಹಯ್ವೇ?
ಕೊಣೀ ಪರ್ಕಿ ಮನಿಸ್ ವಾ ಮೊನ್ಜಾತ್ ಆಪ್ಲ್ಯಾ ‘ಟೆರಿಟರಿ’ಕ್ ಪ್ರವೇಶ್ ಜಾಲ್ಯಾರ್ ತಕ್ಷಣ್ ಜಾಗಂವ್ಚೆಂ ತಾಚೆಂ ಕರ್ತವ್ಯ್. ತ್ಯಾ ವರ್ವಿಂ ಘರಾ ಭಿತರ್ ವಾ ವಾವ್ರಾಂತ್ ಮೆತೆರ್ ಜಾಲ್ಲ್ಯಾ ಮನ್ಶ್ಯಾಂಕ್ ಏಕ್ ಕಾಡಿ ಹಾಲ್ಲ್ಯಾರೀ, ಪರ್ಕಿ ಸಾವ್ಳಿ ಪಡ್ಲ್ಯಾರೀ, ಲ್ಹಾನ್ ಆವಾಜ್ ಜಾಲ್ಯಾರೀ ಆತಾಂಚ್ಯಾ ಸಿಸಿಟಿವಿಪರಿಂ ಗುಮಾನ್ ಕರ್ನ್ ಅಲಾರ್ಮ್ ವ್ಹಾಜಂವ್ಚಿ ಜವಾಬ್ದಾರಿ ಪೊಸ್ಕ್ಯಾ ಪೆಟ್ಯಾಂಚಿ. ಆಮ್ಚೊ ಟೊಮಿಯೀ ತಾಂತುಂ ಶ್ರದ್ಧೆನ್, ಪ್ರಾಮಾಣಿಕ್ಪಣಿಂ ವಾವುರ್ತಾಲೊ.
ದುಸ್ಮಾನಾಚೊ ಉದೆವ್…
ತಶೆಂ ಏಕ್ ಪಾವ್ಟಿಂ ಏಕ್ ಆಗಂತುಕ್, ಪೆಟ್ಯಾ ಪೀಲ್, ಆಮ್ಚ್ಯಾ ಮೆರೆಂನಿ ದಿಷ್ಟಿಕ್ ಪಡ್ತಾನಾ ಟೊಮಿ ಉಚಾಂಬಳ್ ಜಾಲ್ಲೊ. ಹಿ ಖಂಚ್ಯಾ ಗ್ರಹಾ ಥಾವ್ನ್ ಆಯಿಲ್ಲಿ ಜೀವಿಗೀ ಮ್ಹಳ್ಳೆಪರಿಂ ಟೊಮಿ ಸಂಗಿಂ ಆಮಿಯೀ ಚಕಿತ್ ಜಾಲ್ಲ್ಯಾಂವ್. ಧೊವ್ಯಾಚ್ ಲೊಂವಾಚೆಂ ಪೀಲ್ ತೆಂ. ಉಪ್ರಾಂತ್ ಕಳ್ಳೆಂ, ಪಲ್ತಡಿಚ್ಯಾ ಮಲಯಾಳಿ ಕುಟ್ಮಾನ್ ತಾಕಾ ನವ್ಯಾನ್ ಪೊಸುಂಕ್ ಹಾಡ್‍ಲ್ಲೆಂ, ಮ್ಹಣ್.
ತೆಂಚ್ ಪೀಲ್ ವ್ಹಡ್ ಜಾವ್ನ್ ಆಮ್ಚ್ಯಾ ಟೊಮಿಕ್‍ಚ್ ಸಂಹಾರ್ ಕರುಂಕ್ ಯೆವ್ಜಿತೆಲೆಂ ಮ್ಹಣ್ ತೆದ್ನಾಂ ಕೊಣೆಂಚ್ ಕಲ್ಪನ್ ಕೆಲ್ಲೆಂ ನಾ. ಆಮ್ಚ್ಯಾ ಹ್ಯಾ ಗಾದ್ಯಾಂ ಮೆರೆಂನಿ ದೊದೋನ್ ಪಾವ್ಟಿಂ ಝಗ್ಡೊನ್ ವೀದ್‍ವಾವ್ಳಿ ಕರುನ್, ರಗ್ತಾನ್ ತಿಂ ನ್ಹಾತಾತ್ ಮ್ಹಣ್ ಕೊಣಾಕೀ ಅಂದಾಜ್ ನಾತ್‍ಲ್ಲೊ.
(ತಿಸ್ರ್ಯಾ ಭಾಗಾಂತ್ ಮುಂದರಿಲಾಂ)
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
