New in Konkani – ಕೊಂಕ್ಣಿ ವೆಬ್ ಸೀರೀಸ್: ಎಕಾ ಪೆಟ್ಯಾಚೆಂ ಫಾರಿಕ್ಪಣ್!
Posted on : May 19, 2025 at 5:11 PM
ವಾಚ್ಪ್ಯಾಂಚ್ಯಾ ಗುಮಾನಾಕ್: ಮೊಗಾಳ್ ವಾಚ್ಪ್ಯಾಂನೊ ಆನಿ ಅಭಿಮಾನಿಂನೊ, ಹಿ ಏಕ್ ಆಕರ್ಷಕ್ ಆನಿ ರೋಚಕ್ ನೀಜ್ ಕಾಣಿ. ಮ್ಹಣ್ಜೆ ಮ್ಹಜ್ಯಾಚ್ ಗಾಂವಾಂತ್ ಆನಿ ಘರಾಂತ್ ವರ್ಸಾಂ ಆದಿಂ ಘಡ್‍ಲ್ಲೆಂ ಘಡಿತ್. ಆಮ್ಚ್ಯಾ ಘರ್ಚ್ಯಾ ಪೆಟ್ಯಾಚಿ ಕಾಣಿ ಹಿ. ಹಿ ಹಾಂವೆಂ ಆಮ್ಚ್ಯಾ ಬುಡ್ಕುಲೊ ವಾಟ್ಸಪ್ ಗ್ರೂಪಾಂನಿ ಪ್ರಕಟ್ ಕೆಲ್ಲಿ. ಸಾರ್ವಜನಿಕಾಂಕ್‍ಯೀ ವಾಚುಂಕ್ ಮೆಳೊಂದಿ ಮ್ಹಣ್ ಆತಾಂ ಹಾಂಗಾಯೀ ಪ್ರಕಟ್ ಕೆಲ್ಯಾ. ಒಟ್ಟುಕ್ 7 ಅವಸ್ವರಾಂಚಿ ಹಿ ಕಥಾ, ಸಾಂಕಳ್ ಕಾಣಿಯೆ ರುಪಾರ್ ಪ್ರಕಟ್ ಕರ್ತಾಂವ್. ವಾಚುನ್ ಅಭಿಪ್ರಾಯ್ ಉಚಾರಾ.
ದುಸ್ರೆಂ, ‘ವೆಬ್ ಸೀರೀಸ್’ ಮ್ಹಣ್ ಕಿತ್ಯಾಕ್ ವೊಲಾಯ್ಲೆಂ ಮ್ಹಳ್ಯಾರ್ ತೆಂ ಆಯ್ಚೆಂ ಸೆನ್ಸೇಶನ್. ತುಮಿ ಸಾಂಕಳ್ ಕಾಣಿಯೊ ವಾಚ್ಲ್ಯಾತ್, ಟಿವಿ ಧಾರಾವಾಹಿ ಪಳೆಲ್ಯಾತ್. ವೆಬ್ ಸೀರೀಸ್ ತ್ಯಾ ಪ್ರಾಸ್ ವಿಭಿನ್ನ್. ಕೊಂಕ್ಣೆಂತ್ ದರಬಸ್ತ್ ಸಾಂಕಳ್ ಕಾಣಿಯೊ ಆಯ್ಲ್ಯಾತ್. ಹೆಂಯೀ ತಶೆಂಚ್, ಪುಣ್ ಆಯ್ಚ್ಯಾ ಕಾಳಾಕ್ ಜೊಕ್ತೆಂ ಜಾವ್ನ್, ಮಟ್ವ್ಯಾನ್ ಅವಸ್ವರ್ ರಚ್ಲ್ಯಾತ್. ವಾಚ್ತಾನಾ ತುಮಿಯೀ ತ್ಯಾ ತ್ಯಾ ಸನ್ನಿವೇಶಾಂನಿ ಹಾಜರ್ ಆಸಾತ್ ಮ್ಹಣ್ ಭೊಗ್ತಾ. ದೆಕುನ್ ಹೆಂ ಬರ್ಪಾ ರುಪಾಚೆಂ ವೆಬ್ ಸೀರೀಸ್. ತುಮ್ಕಾಂ ಪಸಂದ್ ಜಾತಾ ಮ್ಹಣ್ ಭರ್ವಸ್ತಾಂ.
ತುಮಿ ಆಮ್ಚ್ಯಾ ವಾಟ್ಸಪ್ ಗ್ರೂಪಾಂತ್ ನಾಂತ್ ತರ್, ಭರ್ತಿ ಜಾಂವ್ಚ್ಯಾಕ್ ಲೇಖನಾಚ್ಯಾ ಆಖೇರಿಕ್ ಲಿಂಕ್ ದಿಲಾಂ. ಕ್ಲಿಕ್ ಕರ್ನ್ ಪ್ರವೇಶ್ ಜೊಡ್ಯೆತ್. ತುಮ್ಕಾಂ ಸ್ವಾಗತ್.
-ಲೇಖಕ್
ಅವಸ್ವರ್ 1: ಪಾಟ್‍ಥಳ್ ಆನಿ ಬಯ್ಲಾಕ್ ಪ್ರವೇಶ್
ಕಾಳ್: 1980-90ವೊ ಧಾಕ್ಡೊ
ಗಾಂವ್: ಬೆಳ್ತಂಗಡಿ ನ್ಹಂಯ್ಚ್ಯಾ ತಡಿರ್ ಆಸ್ಚಿ ಲ್ಹಾನ್ ಹಳ್ಳಿ
ಪೆಟೆ – ಮನ್ಶ್ಯಾಚ್ಯಾ ಅತೀ ಚಡ್ ಆಪ್ತ್ ಮೊನ್ಜಾತಿಂ ಪಯ್ಕಿ ಅತೀ ಪ್ರಮುಖ್. ನಾಗರಿಕತೆಚ್ಯಾ ಆರಂಭಾ ಥಾವ್ನ್ ಪೆಟೆ ಮನ್ಶ್ಯಾಚೆ ಸಾಂಗಾತಿ. ಹ್ಯಾ ಡಿಜಿಟಲ್ ಯುಗಾಂತ್‍ಯೀ ಅತ್ಯಾಧುನಿಕ್ ಶ್ಹೆರಾಂಚ್ಯಾ ಮಲ್ಟಿ ಸ್ಟೋರಿ ಕಟ್ವಣಾಂತ್ಲ್ಯಾ ಏ.ಸಿ. ಬೆಡ್‍ರೂಮಾಂನಿ ಪೆಟ್ಯಾಂಕ್ ರಾಯಾಳ್ ಉಪಚಾರ್ ಮೆಳ್ತಾ. ತರ್ ಹಳ್ಳೆಂತ್ ಪೆಟೆ ಅನಿವಾರ್ಯ್‍ಚ್ ನ್ಹಯ್ವೇ? ಖಂಡಿತ್ ವ್ಹಯ್.
ತಿ ಸುವಾತ್ ಹಾಂವ್ ಜಲ್ಮೊನ್ ವಾಡ್‍ಲ್ಲಿ; ಮ್ಹಜ್ಯಾ ಉಗ್ಡಾಸಾಂತ್, ಮರ್ಣಾ ಶಿವಾಯ್, ಹಾಂವೆಂ ವಿಸ್ರೊಂಕ್ ಸಕನಾತ್‍ಲ್ಲಿ ಹಳ್ಳಿ. ಆತಾಂ ಆಮ್ಚ್ಯಾ ಹ್ಯಾ ಕಾಣಿಯೆಂತ್ ಮನಿಸ್, ಜಾಗೊ ಮುಖ್ಯ್ ನ್ಹಯ್, ತರೀ ಗರ್ಜೆಚೆಚ್. ಪುಣ್ ಪಯ್ಲೆಂ ಆಮಿ ಶೀದಾ ಆಮ್ಚ್ಯಾ ಕಥಾ ನಾಯಕಾಕ್ (Protagonist) ಜಾಣಾಂ ಜಾವ್ಯಾಂ; ಉಪ್ರಾಂತ್ ಖಳ್‍ನಾಯಕಾಕ್ (Antagonist).
ದೋಗ್ ಪೆಟೆ: ಏಕ್ ಆಮ್ಚೊ ಮೊಗಾಚೊ, ಆನ್ಯೇಕ್ಲೊ ವಿಲನ್!
ಮ್ಹಜ್ಯಾ ನೆಂಟುಲ್ಯಾಪಣಾರ್ ಖಂಚೊ ಪೆಟೊ ಆಸ್‍ಲ್ಲೊ ನೆಣಾಂ. ಹಾಂವ್ ವಾಡೊನ್ ಯೆತಾನಾ ಟೊಮಿ ಆಮ್ಚೊ ಸಾಂಗಾತಿ. ಲಾಂಬ್ ಕಾಳ್ ತೊ ಜಿಯೆಲ್ಲೊ. ಮಾಮೂಲಿ ರಂಗಾಚೊ, ಸಾಧೊ, ಗಾಂವ್ಟಿ ಪೆಟೊ ತೊ. ತಾಕಾ ವಿಶೇಸ್ ವಿದ್ಯಾ ದೀಂವ್ಕ್ ಆಮ್ಕಾಂ ತರೀ ಕಳಿತ್ ಆಸಜೆ ನ್ಹಯ್ವೇ? ಸದಾಂಚೆ ಥೊಡೆ ಖೆಳ್, ‘ಸೆಕೆಂಡ್’ ದೀ ಮ್ಹಳ್ಯಾರ್ ಹಾತ್ ದಿತಾಲೊ ಸೊಡ್ಲ್ಯಾರ್ ಬೊಂಟೆಕ್ (ಶಿಕಾರೆಕ್) ವೆಚೆಂ ವಾ ಹೆರ್ ವ್ಯಾಯಾಮಾಂ ವಾ ಸಾಹಸಿಕ್ ಕೃತ್ಯಾಂ ತಾಕಾ ಕಳಿತ್ ನಾತ್‍ಲ್ಲಿಂ. ಚಾಬ್ಕೊರ್‌ಯೀ ನ್ಹಯ್, ಉಪಾದ್ರ್ ದಿಂವ್ಚೊಯೀ ನ್ಹಯ್ ತೊ. ಮೊಗಾಳಿ, ವಿಶ್ವಾಸಿ, ಮೊವಾಳ್ ವ್ಯಕ್ತಿತ್ವಾಚೊ ತೊ ಜಾವ್ನಾಸ್‍ಲ್ಲೊ. ‘ಟೊಮಿ’ ಮ್ಹಳ್ಯಾರ್ ಭಿಯೆಂವ್ಚಿ ಗಜಾಲ್‍ಚ್ ನಾತ್‍ಲ್ಲಿ, ಕೊಣಾಯ್ಕೀ.
ಗಾಂವಾಂತ್ ಪೆಟ್ಯಾಂಚಿ ಲಡಾಯ್!
ಪೆಟ್ಯಾಂನಿ ಎಕಾಮೆಕಾ ಝಗಡ್ಚೆಂ ಸಾಮಾನ್ಯ್ ತರೀ, ವಿಪ್ರೀತ್ ಧೊಶಿ ಖಂಚ್ಯಾ ವೆಳಾರ್ ಮ್ಹಣ್ ತುಮಿ ಜಾಣಾಂತ್‍ಮೂ! ಪಾವ್ಶಿಲೆ ಆಟಿ-ಸೊಣ್ ಮಹಿನೆ ಮ್ಹಳ್ಯಾರ್ ಪೆಟ್ಯಾಂಕ್ ‘ಮಿಲನ ಮಹೋತ್ಸವ’ – ವಾರ್ಷಿಕ್ ಸಮ್ಮೇಳ್!! ಮ್ಹಣ್ಜೆ ತೆದ್ನಾಂ ನೈಸರ್ಗಿಕ್ ರಿತಿನ್ ಪೆಟ್ಯಾ ಸಂಕುಲಾಕ್ ಸಂತತ್ ಉತ್ಪನ್ನ್ ಕರ್ಚೆಂ ಯಜ್ಞ್. ಖಂಯ್ ಪಳೆಲ್ಯಾರೀ ಕೊಲ್ಗ್ಯಾ ಭೊಂವ್ತಿಂ ಪೆಟ್ಯಾಂಚೆಂ ಸೈನ್… ಕೊಲ್ಗ್ಯಾಂಕ್ ದೀಸ್ ರಾತ್ ಪಾರೊತ್… ಕಾರಣ್, ಇರಾದೊ ತುಮಿ ಜಾಣಾಂತ್.
ತ್ಯಾ ವೆಳಿಂ ಕೊಲ್ಗ್ಯಾಕ್ ಜಿಕೊಂಕ್ ಆನಿ ಆಪ್ಣಾಂವ್ಕ್ ಪೆಟ್ಯಾಂನಿ ಎಕಾಮೆಕಾ ಚಾಬ್ಚೆಂ, ಝಗ್ಡೊನ್ ಪಡ್ಚೆಂ ಗಾಂವ್‍ಭರ್ ಚಲ್ತಾಲೆಂ. ವ್ಹಡಾಂಕ್ ತರೀ ಕಿತೆಂ ಘಡ್ತಾ ತೆಂ ಕಳ್ತಾ. ಪುಣ್ ಇಸ್ಕೊಲಾಕ್ ಪಂಗಡ್ ಬಾಂಧುನ್ ಲಾಂಬ್ ವಾಟ್ ಚಲೊನ್ ವೆಚ್ಯಾ ಧಾಕ್ಟ್ಯಾ ಭುರ್ಗ್ಯಾಂಕ್ ತೊ ಏಕ್ ಮಿಸ್ತೆರ್! ಪಾರ್ಪೊಳ್ ಚೆಡೆ ಕಶೆಂ ಸಕ್ಕಡ್ ಧೊಸ್ತಾಲೆ ತ್ಯಾ ಪೆಟ್ಯಾಂಕ್ ಮ್ಹಣ್ ಸಾಂಗ್ಲ್ಯಾರ್, ವಿಷಯ್ ದುಸ್ರೊಚ್ ಜಾತಾ.
ಪೆಟ್ಯಾಂಚೊ ಜಾತ್ರೊ ತೊ, ವಿಭಿನ್ನ್ ಕಾರಣಾಂಚೊ! ತ್ಯಾ ಸೀಸನಾಚಿ ಗಡ್ದಿ, ಗಲಾಟೊ ಸೊಡ್ಲ್ಯಾರ್ ಸೆಜಾರಿ ಪೆಟ್ಯಾಂನಿ ಚಾಬೊನ್ ಪಡ್ಚೆಂ ಅಪ್ರೂಪ್. ಕಾಜಾರ್, ಫೆಸ್ತಾ ತಸಲೆ ಸಂಭ್ರಮ್ ಚಲ್ಲ್ಯಾರ್ ಜೆವ್ಣಾಚ್ಯೊ ಶಿರೊತ್ಯೊ ಉಡಯಿಲ್ಲೆ ಕಡೆನ್ ಪೆಟೆ, ಮಾಜ್ರಾಂ, ಕುಂಕ್ಡಾ, ಕಾವ್ಳ್ಯಾಂಚಿ ಲಡಾಯ್ ಸಹಜ್. ಪರ್ಕಿ ಪೆಟೊ ಕೊಣೀ ಆಪ್ಲ್ಯಾ ಸುತ್ತೂರಾಂತ್ (ಟೆರಿಟರಿಂತ್) ರಿಗ್ಲ್ಯಾರ್, ಘುಸ್ಲ್ಯಾರ್ ಅಲರ್ಟ್ ಜಾಲ್ಲೆ ಪೆಟೆ ಸಾಂಕ್ಳಿಂತ್ ಆಸ್ಲ್ಯಾರ್ ಜೋರ್ ಭೊಂಕ್ತಾಲೆ, ಬಾಂಧುಂಕ್ ನಾತ್ಲ್ಯಾರ್ ಧಾಂವೊನ್ ಪ್ರತಿಭಟನ್ ಕರ್ತಾಲೆ. ತಶೆಂ ಎಕ್ಲ್ಯಾನ್ ವಾ ಗಾಂವ್ಚ್ಯಾಂನಿ ಪಂಗಡ್ ಕರುನ್ ಅಪರಿಚಿತ್ ಪೆಟ್ಯಾಂಚೆರ್ ಝುಜ್ ಚಲಂವ್ಚೆಂ ಆಸ್ತಾ.
ತೆಂ ಸೊಡ್ಲ್ಯಾರ್ ಪೆಟ್ಯಾಂಚೊ ವ್ಹಡ್ ಮನಸ್ತಾಪ್ ಅಪ್ರೂಪ್.
ಹಾಂವ್ ವಾಡೊನ್ ಯೆತಾನಾ, ಟೊಮಿಕ್‍ಯೀ ಪ್ರಾಯ್ ಜಾವ್ನ್ ತಾಚ್ಯಾ ತರ್ನಾಟ್ಪಣಾಕ್ ಆದೇವ್ಸ್ ಮಾಗೊನ್ ‘ಸೀನಿಯರ್ ಸಿಟಿಜನ್’ ಜಾಂವ್ಚ್ಯಾ ತೆವ್ಶಿನ್ ತೊ ಚಮ್ಕತಾಲೊ…
ತೆದ್ನಾಂಚ್ ಏಕ್ ಆಗಂತುಕ್ ಆಮ್ಚ್ಯಾ ಸೆಜಾರಾ ಪ್ರವೇಶ್ ಜಾಲ್ಲೊ!
ಪಲ್ತಡಿ ಆಸ್ಚ್ಯಾ ಮಲಯಾಳಿ ಕುಟ್ಮಾನ್ ನವೆಂಚ್ ಏಕ್ ‘ಫಿಂರ್ಗಿ’ ಪೀಲ್ ಹಾಡ್‍ಲ್ಲೆಂ. ತಿಂ ಥಂಯ್ ನವ್ಯಾನ್ ಘರ್ ಕರ್ನ್ ರಾವ್‍ಲ್ಲಿಂ, ಪುಣ್ ಗಾಂವ್ಚಿಂ ಆನಿ ವಳ್ಕಿಚಿಂಚ್. ಧವ್ಯಾ ಲೊಂವೆಚೊ ಪೆಟೊ ತೊ, ವೆಗ್ಳ್ಯಾಚ್ ಜಾತಿಚೊ. ಗಾಂವ್ಟಿ ಪೆಟ್ಯಾ ಪ್ರಾಸ್ ವಿಶೇಸ್ ವ್ಹಡ್ ವಾ ಬಳ್ವಂತ್ ಮ್ಹಣೊಂಕೀ ಜಾಯ್ನಾ; ಗ್ರೇಸ್ತಾಂನಿ ಬೆಡ್‍ರೂಮಾರ್ ನಿದಾಂವ್ಚ್ಯಾ ಜಾತಿಚೊಯೀ ನ್ಹಯ್. ತೊ ಪರಿಸರಾಂತ್ಲ್ಯಾ ಸಕ್ಡಾಂಕ್ ಆಕರ್ಷಣಾಚೊ, ಕುತೂಹಲಾಚೊ ಜಾಲ್ಲೊ…
ತಶೆಂ ಸಯ್ರೊ ಜಾವ್ನ್ ಆಯಿಲ್ಲೊ ತೊ ಗೊರೊ ಪೆಟೊ ಆಮ್ಚ್ಯಾ ಬಯ್ಲಾಂತ್ಲ್ಯಾ ಎಸ್ಟಾಬ್ಲಿಶ್ಡ್ ಟೊಮಿಕ್ ಮಾರಣಾಂತಿಕ್ ಜಾತಲೊ ಮ್ಹಣ್ ಕೊಣೆಂಯೀ ಚಿಂತ್‍ಲ್ಲೆಂಚ್ ನಾ.
(ದುಸ್ರ್ಯಾ ಭಾಗಾಂತ್ ಮುಂದರಿಲಾಂ)
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
