ಎಕಾ ಪೆಟ್ಯಾಚೆಂ ಫಾರಿಕ್ಪಣ್ – 5: ಮಾರಣಾಂತಿಕ್ ಲಡಾಯ್
Posted on : June 29, 2025 at 4:25 PM
ಎಕಾ ಪೆಟ್ಯಾಚೆಂ ಫಾರಿಕ್ಪಣ್ – ಪಾಂಚ್ವೊ ಭಾಗ್
ಸಕಾಳಿಂ ಫುಡೆಂಚ್ ಅಪಶಕುನಾಚೆಂ ವಾರೆಂ ವ್ಹಾಳೊಂಕ್ ಲಾಗ್‍ಲ್ಲೆಂ. ವಾತಾವರಣ್ ಸಗ್ಳೆಂ ಸ್ತಬ್ಧ್ ಜಾಲ್ಲೆಂ. ಪಯ್ಸ್ ಖಂಯ್ಗೀ ಕೊಲೆ ವಿಕಾರ್ ರಿತಿನ್ ವಿಳಾಪ್ ದಿತಾಲೆ. ಸದಾಂ ಸಕಾಳಿಂ ಸಂತೊಸಾನ್ ಚಿಲಿಪಿಲಿ ಕರುನ್ ಉಬೊನ್ ಆಸ್‍ಲ್ಲಿಂ ಸುಕ್ಣಿಂ ವಿದ್ರೂಪ್ ಗಾಯನಾಂ ಕರ್ತಾಲಿಂ. ಪರಿಸರ್ ಸಗ್ಳೆಂ ಆಕಾಂತಾನ್ ಭರ್‌ಲ್ಲೆಂ.
ಘರಾ ಭಾಯ್ರ್ ಪಳೆಲ್ಯಾರ್ ಸಗ್ಳ್ಯಾಂನಿ ಮೋಡ್ ಘಾಲಾಂ. ಆಜ್ ಕಿತೆಂಗೀ ಕರಾಳ್ ಖಬರ್ ಆಯ್ಕೊಂಕ್ ಮೆಳ್ತೆಲಿ ಮ್ಹಳ್ಳೆಪರಿಂ ಭೊಗ್ಲೆಂ. ಕುಸ್ಕುಟಾಚೆಂ ವಾರೆಂ ಸಯ್ತ್ ವ್ಹಾಳನಾಸ್ತಾನಾ ರೂಕ್ ಝಾಡಾಂ ಇಮಾಜೆಪರಿಂ ಹಾಲನಾಸ್ತಾನಾ ರಾವ್‍ಲ್ಲಿಂ. ಮತ್ ಕಿತೆಂಗೀ ವಾಯ್ಟ್ ಘಡ್ಚ್ಯಾರ್ ಆಸಾ ಮ್ಹಣ್ ಅಲಾರಾಂ ವ್ಹಾಜಯ್ತಾಲಿ.
ಮ್ಹಜೆಂ ಸಿಕ್ಸ್ತ್ ಸೆನ್ಸ್ ಅವ್ಗಡಾಚೆಂ ಮುನ್ಸೂಚನ್ ದೀಲಾಗ್ಲೆಂ.
ಟೊಮಿಕ್‍ಯೀ ತಶೆಂಚ್ ಜಾತಾಲೆಂ ಮ್ಹಣ್ ದಿಸ್ತಾ. ಪೊಟಾಕ್ ಖಾಂವ್ಕ್ ಘಾಲ್ಲೆಂ ಹುಂಗೊನ್ ಸಯ್ತ್ ಪಳೆಂವ್ಕ್ ನಾ ತಾಣೆಂ. ಕಸಲಿ ಬೆಜಾರಾಯ್‍ಗೀ ವಾ ಕರ್ಕರೆಗೀ ಕೋಣ್ ಜಾಣಾಂ, ತೊ ಪುರ್ತೊ ಅಸಮಾಧಾನೆನ್ ಆಸ್‍ಲ್ಲೊ. ತಾಚ್ಯೊ ಆಸ್ಡ್ಯೊ ವಯ್ರ್ ಪಂದಾ ಜಾತಾಲ್ಯೊ. ಮಧೆಂ ಮಧೆಂ ವಿಚಿತ್ರ್ ರಿತಿನ್ ರುದಾನ್ ಕರ್ತಾಲೊ. ದೆದೆಸ್ಪರ್ ದಿಸ್ತಾಲೊ.
ಪ್ರವೇಶ್ ಜಾಲೊ ಸಯ್ತಾನ್
‘ಮೋಡ ಕವಿದ ವಾತಾವರಣ’ ಆಸ್‍ಲ್ಲ್ಯಾ ದೀಸ್ ಮ್ಹಾಕಾಯೀ ಕಿತೆಂಗೀ uneasiness ಭೊಗ್ಚೆಂ ಮ್ಹಣ್ ಆಸ್ತಾ. ಆಕಾಸಾರ್ ಪಳೆಲ್ಯಾರ್ ಪಾವ್ಸಾಚೆಂ ಮೋಡ್ ನ್ಹಯ್ ಮ್ಹಣ್ ಕಳ್ತಾಲೆಂ. ವೆಗಿಂಚ್ಯಾಕ್ ಮೋಡ್ ನಿತಳ್ಚಿಂ ಲಕ್ಷಣಾಂ ದಿಸ್ಲಿಂ ನಾಂತ್. ಥೊಡ್ಯಾ ವೆಳಾನ್ ಸದಾಂಚ್ಯಾ ದಿನಚರಿಂತ್ ಬುಡ್‍ಲ್ಲ್ಯಾ ಘರ್ಚ್ಯಾ ಕೊಣಾಯ್ಕೀ ವಾತಾವರಣಾ ವಿಶಿಂ ಖಂತ್ ಕರುಂಕ್ ಆಸ್ಪದ್ ನಾತ್‍ಲ್ಲೊ. ಸದಾಂಚಿಂ ಕಾಮಾಂ ಚಲ್ತಾಲಿಂ.
ತಿತ್ಲ್ಯಾರ್…
ವ್ಹಯ್, ತಿತ್ಲ್ಯಾರ್ ಏಕ್ ಸುಕ್ಣೆಂ ಬಯ್ಲಾಂತ್ಲ್ಯಾ ಮಾಡಾರ್ ಆಸ್‍ಲ್ಲೆಂ ಖಿಳಂಚ್ ಮಾರುನ್ ಉಬೊನ್ ಧಾಂವ್ಲೆಂ. ಪಾಟಾಪಾಟ್ ಹೆರ್ ಸುಕ್ಣಿಂಯೀ ತಶೆಂಚ್ ಕಿಂಕ್ರಾಟುನ್ ಪಯ್ಸ್ ಗೆಲಿಂ. ಥಂಯ್ ಹಾಂಗಾ ಧರ್ಣ್ ಭೊಕುರ್ನ್ ಆನಿ ಮಾತಿ ಖೊರ್ವಟಾವ್ನ್ ಆಸ್‍ಲ್ಲಿಂ ಕುಂಕ್ಡಾಂ ಮಾಯಾಗ್ ಜಾಲಿಂ. ಘುಗ್ ಏಕ್ ಜೊರಾನ್ ಹುಂಕಾರ್ಲಿ. ಕುಪುಲ್ ಕಾಂಕಾರುನ್ ರಾನಾ ತೆವ್ಶಿನ್ ಉಬ್ಲಿ. ಕುಂಕ್ಡಾ ಪಿಲಾಂ ಲಾಗಿಂ ಮಿರವ್ನ್ ಆಸ್‍ಲ್ಲೆಂ ಘರ್ಚೆಂ ಮಾಜಾರ್ ಆಕಾಂತಾನ್ ರಿವರ್ಸ್ ಕಾಡ್ನ್ ಕುಜ್ನಾಕ್ ಧಾಂವ್ಲೆಂ. ಕಾವ್ಳೆ ಸಂಗಿಂ ಜಮ್ಲೆ, ಬೊಬಾಟುನ್ ಕಿತೆಂಗೀ ಮುನ್ಸೂಚನ್ ದಿಂವ್ಚೆಪರಿಂ ವಾ ಅನಾಹುತ್ ಘಡ್ಚ್ಯಾರ್ ಆಸಾ ಮ್ಹಣ್ ಹಿಶಾರೊ ದಿತಾಲೆ. ಆಜ್ ಆಪ್ಣಾಕ್ ಫೆಸ್ತ್ ರಾಕೊನ್ ಆಸಾ ಮ್ಹಳ್ಳೆಪರಿಂ ಘೊಣಿ, ಗೀದ್ ಉಬಾರಾಯೆರ್ ಥಾವ್ನ್ ಬಯ್ಲಾಚೆರ್ ದೀಶ್ಟ್ ಜೊಕಿಲಾಗ್ಲಿಂ.
ತ್ಯಾಚ್ ವೆಳಾರ್…
ಕುರ್ವೊನ್ ಆಸ್‍ಲ್ಲೊ ಟೊಮಿ ಎಕಾಚ್ಛಾಣೆಂ ಉಟ್ಲೊ. ಆಂಗ್ ಸರ್ಸರಿತ್ ಫಾಪುಡ್ನ್, ಲಾಂಬ್ ಜಾಂಬಾಯೊ ಕಾಡಿಲಾಗ್ಲೊ. ಪ್ರಕೃತೆಚಿ ಭಾಸ್ ತಾಕಾ ಸಮ್ಜಲ್ಲಿ. ಪಿಂರ್ಗೊನ್ ಆಸ್‍ಲ್ಲೊ ಆಮ್ಚೊ ಪೆಟೊ ಕಿತ್ಯಾಗೀ ಉಲ್ಲಾಸಾನ್ ಭರ್ಲೊ. ತೊ ಸುಡ್ಸುಡಿತ್ ಜಾಲ್ಲೊ. ಪಲ್ತಡಿ ಕುಶಿನ್ ಪಳೆವ್ನ್ ಆಕ್ಷೇಪ್ ಉಚಾರ್ಚ್ಯಾ ರಿತಿನ್ ವಯ್ರ್ ವಯ್ರ್ ಭೊಂಕಿಲಾಗ್ಲೊ.
ತಿತ್ಲ್ಯಾರ್‌ಚ್…
ವ್ಹಯ್. ತಿತ್ಲ್ಯಾರ್‌ಚ್ ಜಾಹೀರ್ ಜಾಲ್ಲೆಂ ದುಸ್ಮಾನಾಚೆಂ ಆಗಮನ್!
ತಿತ್ಲೆಂಚ್… ಬಯ್ಲಾಂತ್ಲೆಂ ವಾತಾವರಣ್ ಪುರ್ತೆಂ ಬದ್ಲಲೆಂ. ಪರಿಸರ್ ಹಾಲ್ಕಂದ್ಲೆಂ ಮ್ಹಣ್ ದಿಸ್ತಾ. ವಿಕಾಳ್ ವಾರೆಂ ವ್ಹಾಳ್ತಾ ಮ್ಹಳ್ಳೆಪರಿಂ ರೂಕ್ ಝಾಡಾಂ ಪ್ರತಿಭಟನಾತ್ಮಕ್ ರಿತಿನ್ ಧಲ್ಲಿಂ. ಮೊಡಾಂಯೀ ಘಡೊಂಕ್ ಆಸ್ಚೆಂ ಆಪ್ಣೆಂ ಪಳೆಂವ್ಕ್ ಜಾಂವ್ಚೆಂ ನಾ ಮ್ಹಣ್ ಪಯ್ಸ್ ಧಾಂವ್ಲಿಂ. ಸರ್ವ್ ಸುಕ್ಣಿಂ, ಕಿಡಿ, ಮೊನ್ಜಾತಿ ಮುಯೊ ಘುಡ್-ಬಿಳಾಂ-ಮಾಟ್ಯಾಂನಿ ರಿಗ್ಲ್ಯೊ. ರೆಡೆ, ಗೊರ್ವಾಂ ಆಕಾಂತಾನ್ ಹಾಂಬೆಲಾಗ್ಲಿಂ. ತಳ್ಯಾಂತ್ ವಾರೆಂ ಸೆಂವೊಂಕ್ ಚಡ್ಪಡೊನ್ ಆಸ್‍ಲ್ಲ್ಯೊ ಖೊರ್ವೊ, ಖಿಜಾನಾಂ (ಮಾಸ್ಳ್ಯೊ) ಜಿವಾಚ್ಯಾ ಅಕ್ಲಾಸಾನ್ ಥಳಾಂತ್ ಜಿರ್ಲ್ಯೊ. ಮ್ಹಣ್ಮುಣೊನ್ ಆಸ್‍ಲ್ಲೆ ಮಾಣ್ಕೆ ಖಿಣಾ ಭಿತರ್ ಉಡೊನ್ ಲಿಪ್ಲೆ. ತೊಡಾಂ, ಖಣಿಯಾಂನಿ ಪಾಸಾಯೊ ಮಾರ್ಚಿಂ ಯವಾಳಿಂ ನಪಂಯ್ಚ್ ಜಾಲ್ಲಿಂ.
ಘಡಿಯೆ ಭಿತರ್ ಆಮ್ಚೊ ಪೆಟೊ, ಟೊಮಿ, ಬಯ್ಲಾಕ್ ಧಾಂವ್‍ಲ್ಲೊ.
ಪಲ್ತಡಿಚ್ಯಾ ವಾಟೆರ್ ಮಲಯಾಳಿಂಚೊ ಗೊರೊ ಪೆಟೊ ಹಂಕಾರಾಚ್ಯಾ ಅಮಾಲಾನ್ ವಾ ವ್ಹಡ್ಪಣಾಚ್ಯಾ ದವ್ಲತೆನ್ ಜಶೆಂ ಹಳ್ತಾಚಿಂ ಮೆಟಾಂ ಕಾಡುನ್ ಆಮ್ಚ್ಯಾ ಕಟಮಣಿರ್ ಪ್ರವೇಶ್ ಜಾಲೊ. ತಾಚಿ ಝಳಕ್ ಮೆಳ್‍ಲ್ಲ್ಯಾನ್‍ಂಚ್ ಟೊಮಿ ಉಚಾಂಬಳ್ ಜಾಲ್ಲೊ. ತಾಕಾ ಆಪ್ಲ್ಯಾ ಟೆರಿಟರಿಂತ್ ಪ್ರವೇಶ್ ಜಾಂವ್ಕ್ ಸೊಡಿನಾ ಮ್ಹಣ್ ಪ್ರತಿಭಟನ್ ಕರುಂಕ್ ತೊ ಬಯ್ಲಾಕ್ ದೆಂವ್‍ಲ್ಲೊ. ಪಳೆಲ್ಲೆ ಪಳೆಲ್ಲೆಪರಿಂಚ್ ಟೊಮಿ ಆನಿ ಗೊರೊ ಪೆಟೊ ಮುಖಾಮುಖಿ ಜಾಲ್ಲೆ.
ಉಪ್ರಾಂತ್ಲೆಂ ದೃಶ್ಯ್ ಆಟಾಪುಂಕ್ ವಾ ಜಿರಂವ್ಕ್ ಜಾಂವ್ಚೆಂ ನ್ಹಯ್.
ಪ್ರಾಯೆನ್ ಟೊಮಿ ವ್ಹಡ್. ಆಪ್ಲೆಂ ಘರ್, ಆಪ್ಲಿಂ ಮನ್ಶ್ಯಾಂ, ಆಪ್ಲೊ ಜಾಗೊ ಮ್ಹಳ್ಳೊ ವಿಶ್ವಾಸ್ ಆನಿ ಧಯ್ರ್ ಟೊಮಿಚೆಂ. ತಿಶಿಲೊ ಪೆಟೊ ಅಕ್ರಮ್ ಪ್ರವೇಶ್ ಕೆಲ್ಲೊ ದುಸ್ಮಾನ್. ಅನ್ನಾಡಿಂ ಥಂಯ್ ಕಸಲೆಂ ಆ್ಯಟಿಟ್ಯೂಡ್ ಆಸ್ತಾ ತೆಂಚ್ ತಾಚೆಂಯೀ ಜಾವ್ನಾಸ್‍ಲ್ಲೆಂ. ಕಸಲ್ಯಾಗೀ ಹಗ್ಯಾನ್ ತೊ ಭರ್ಲಾ ಮ್ಹಣ್ ದಿಸ್ತಾಲೆಂ. ಬೀಫ್ ಖಾವ್ನ್ ಸೊರ್ಕೆಲ್ಲೊ ತೊ ಮಹಿನ್ಯಾಂತ್ ದೋನ್ ಚಾರ್ ಪಾವ್ಟಿಂ ಹಾಡಾಂ ವಾ ಮಾಸ್ಳೆ ಕಾಂಟೆ ಲೆಂವ್ಚ್ಯಾ ಟೊಮಿ ಸಾಮ್ಕಾರ್ ಗೊಲಿಯಾತಾ ರುಪಾರ್ ವರ್ತವ್ತಾಲೊ.
ಜೀವನ್ಮರಣಾಚೆಂ ಝಗ್ಡೆಂ
ರಾಕೊಂಕ್ ಅವ್ಕಾಸ್‍ಚ್ ನಾತ್‍ಲ್ಲೊ. ಬ್ಯಾಕ್‍ಗ್ರೌಂಡ್ ಆವಾಜ್ ವಾ ಮ್ಯೂಸಿಕಾಚಿ ಗರ್ಜ್‍ಚ್ ನಾತ್‍ಲ್ಲಿ. ಶೆವಟ್ ಸ್ಪಷ್ಟ್ ಆಸ್‍ಲ್ಲೊ. ಸೊಸ್ಣಿಕಾಯ್ ದೊಗಾಂಯ್ಕೀ ನಾತ್‍ಲ್ಲಿ. ಅತಿಕ್ರಮಿ ಪೆಟ್ಯಾನ್ ಟೊಮಿಚೆರ್ ಆಪ್ಟೊನ್ ಘಾಸ್ ಘಾಲೊಚ್. ಸಂಯ್ಭಾನ್ ಮಯ್ಪಾಸಿ ಆನಿ ಚಡ್‍ಶ್ಯಾ ಆತ್ಮ್‌ವಿಶ್ವಾಸಾನ್ ಭರ್‌ಲ್ಲ್ಯಾ ಟೊಮಿಕ್ ತೊ ಪಯ್ಲೊ ಆಘಾತ್. ತಾಕಾ ಏಕ್ ಘಡಿ ಆಪುಣ್ ಮೆಲೊಂಚ್ ಮ್ಹಣ್ ಭೊಗ್ಲೆಂ ಕೊಣ್ಣಾ… ಪುಣ್ ಸೊಡುಂಕ್ ಜಾತಾವೇ? ಟೊಮಿಯೀ ಉಡ್ಲೊಚ್.
ತಶೆಂ ಸುರು ಜಾಲ್ಲಿ ಲಡಾಯ್ ಅರ್ಧೊ ಘಂಟೊಭರ್ ಚಲ್ಲಿ. ಪಯ್ಲೆಂ ಪಯ್ಲೆಂ ಪೆಟ್ಯಾಂಚಿ ಸದಾಂಚಿ ಲಡಾಯ್ ಮ್ಹಣ್ ಭೊಗ್‍ಲ್ಲೆಂ. ಬೋಬ್ ಮಾರುನ್ ಪೆಟ್ಯಾಂಕ್ ಪಯ್ಸ್ ಕರುಂಕ್ ಪ್ರಯತ್ನ್ ಕೆಲ್ಯಾರೀ, ನಾ, ದೊಗಾಂಕೀ ಸಂಸಾರಾಚಿ ಪರ್ವಾ ನಾ. ಮನ್ಶ್ಯಾಂಚಿ ಲಕ್ಷ್ಯಾ ನಾ. ಕಿತ್ಲ್ಯಾಗೀ ತೆಂಪಾ ಥಾವ್ನ್ ಮುರ್ಮುರೊನ್ ಆಸ್‍ಲ್ಲೊ ರಾಗ್, ಜಳೊನ್ ಆಸ್‍ಲ್ಲೆಂ ಹಗೆಂ ಪೆಟೊನ್ ಆಬ್ಳೆ ಎಕಾಮೆಕಾ ಫಾಪ್ಸುನ್‍ಂಚ್ ಘಾಲಿಜೆ ಮ್ಹಣ್ ದೊಗೀ ಪೆಚಾಡ್ತಾಲೆ. ದೊಗಾಂಯ್ಚ್ಯಾ ಮುಸ್ಕಾರ್ ಆನಿ ಆಂಗಾ ಥಾವ್ನ್ ರಗತ್ ಪಾಜರ್ತಾಲೆಂ.
ಆಪ್ಲ್ಯಾ ಆಂಗಾರ್ ದುಸ್ಮಾನಾನ್ ಘಾಲ್ಚಿ ಘಾಸ್ ಚುಕಂವ್ಕ್ ಆನಿ ಮುಖ್ಲ್ಯಾಚೆರ್ ಘಾಸ್ ಘಾಲ್ನ್ ಕೊಚಾಂವ್ಕ್ ದೊಗೀ ಪೆಟೆ ಉಡ್ಡತಾಲೆ. ಮಧೆಂ ಮಧೆಂ ತಾಚೆರ್ ಆನಿ ಹಾಚೆರ್ ಹಲ್ಲೊ ಜಾತಾಲೊ. ಲಡಾಯ್ ಸುರು ಜಾಲ್ಲಿ ಕಟಪುಣಿಚ್ಯಾ ಮಧೆಂಗಾತ್. ಥೊಡ್ಯಾ ಮಿನುಟಾಂನಿ ಎಕಾಮೆಕಾಚೆರ್, ಕುಸ್ತಿಪಟುಂನಿ ಎಕಾಮೆಕಾ ವೋಡ್ನ್ ಘಾಲ್ಚೆಪರಿಂ, ಟೊಮಿ ಆನಿ ದುಸ್ಮಾನ್ ಎಕಾಮೆಕಾಚೆರ್ ಆಕ್ರಮಣ್ ಕರುನ್ ಝರ್ಕಟೊನ್ ಲೊಳ್ಳೆ. ಏಕ್ ಪಾವ್ಟಿಂ ಖಣಿಯೆಕ್ ಉಸಳ್ಳ್ಯಾರ್ ಆನ್ಯೇಕ್ ಪಾವ್ಟಿಂ ಗಾದ್ಯಾಂತ್ ರೊಂಬ್ಲೆ. ಎಕ್ಲೊ ಚುಕಾರಿ ಮಾರ್ತಾನಾ ಆನ್ಯೇಕ್ಲೊ ಮಾರುಂಕ್ ಪಾಟ್ ಧರ್ತಾಲೊ. ಎಕ್ಲೊ ಘಾಸ್ ಘಾಲುಂಕ್ ಆಯ್ತೊ ಜಾತಾನಾ ದುಸ್ರೊ ಚುಕಂವ್ಕ್ ದರ್ವಡ್ತಾಲೊ.
ದೊಗಾಂಯ್ಚಿ ದುಸ್ಮಾನ್ಕಾಯ್ ಅಪಾಲಿಪಾ ಖೆಳ್ತಾಲಿ. ದೊಗೀ ಆಪ್ಲ್ಯಾ ವಿರೋಧಿಕ್ ಶೆವ್ಟಾಂವ್ಕ್, ನಾಸ್ ಕರುಂಕ್ ಜಿದ್ದ್ ಧರುನ್ ಝಗಡ್ತಾಲೆ.
ತಶೆಂ ಅಶೆಂ ಮ್ಹಣ್ ಪೆಟ್ಯಾಂಚಿ ಲಡಾಯ್ ರಾವನಾಸ್ತಾನಾ ಘೋರ್ ಝುಜಾಕ್ ಪಾವ್ಲಿ. ಮಾಡಾ ಮುಳಾಂನಿ, ಮಾಡಿಯೆ ಭೊಂವ್ತಿಂ, ಕೆಂಳ್ಬ್ಯಾ ಇಡ್ಯಾಂನಿ ಮ್ಹಣ್ ಗೆಲ್ಲೆ ಗೆಲ್ಲೆ ಕಡೆನ್ ದೊಗೀ ಎಕಾಮೆಕಾ ಫಾಪ್ಸುನ್ ಘಾಲ್ನ್ ರಗ್ತಾಚೊ ವ್ಹಾಳ್ ವ್ಹಾಳಯ್ಲಾಗ್ಲೆ. ದೊಗೀ ನಿತ್ರಾಣ್ ಜಾಲ್ಲೆ ತರೀ ಲಡಾಯ್ ರಾವಂವ್ಕ್ ಬಿಲ್ಕುಲ್ ಕಬೂಲ್ ನಾತ್‍ಲ್ಲೆ. ಬೊಯ್ತಾಡ್ಯಾಂನಿ ಮಾರ್ನ್, ಫಾತೊರ್ ಉಡವ್ನ್ ಪೆಟ್ಯಾಂಕ್ ಪಯ್ಸ್ ಕರುಂಕ್ ಪೆಚಾಡ್ಲ್ಯಾರೀ, ಊಹುಂ, ದೊಗೀ ಝುಜಾ ಥಾವ್ನ್ ಅಲಗ್ ಜಾಂವ್ಕ್ ತಯಾರ್ ನಾ ಜಾಲೆ.
ದೊಗಾಂ ಪಯ್ಕಿ ಎಕ್ಲ್ಯಾನ್ ಮೊರ್ಚೆಂ ಖಚಿತ್ ಜಾಲ್ಲೆಂ.
ವೀಸ್ ಮಿನುಟಾಂ ಜಾತಾಸ್ತಾನಾ ಝುಜಾಚೊ ವೇಗ್ ಇಲ್ಲೊ ದೆಂವ್ಲೊ. ದೊಗೀ ಪೆಟೆ ವಿದ್ರೂಪ್ ಜಾಲ್ಲೆ. ಕಾನ್, ವೋಂಟ್, ಗೊಮ್ಟಿ ತಲ್ವಾರಿನ್ ಕಾತರ್‌ಲ್ಲೆಪರಿಂ ಭೆಸಾಂ ಜಾವ್ನ್, ಚೀರ್ನ್, ಕಾತ್ ಉಮ್ಕಳ್ತಾಲಿ, ಮಾಸ್ ತಿಳ್ತಾಲೆಂ, ಹಾಡಾಂ ಉಗ್ತಿಂ ಜಾಲ್ಲಿಂ. ರಗ್ತಾನ್ ಭರ್‌ಲ್ಲ್ಯಾನ್ ಪೆಟ್ಯಾಂಚೊ ರಂಗ್ ತಾಂಬ್ಡೊ ಜಾಲ್ಲೊ. ಉಬಿರ್, ಕಿಂರ್ಚಿ, ಕೋಯ್ರ್ ಪೂರಾ ಆಂಗಾಕ್ ಚಿಡ್ಕೊನ್ ಆಮ್ಚೊ ಪೆಟೊ ಖಂಚೊ, ದುಸ್ಮಾನ್ ಖಂಚೊ ಮ್ಹಣ್ ಪಾರ್ಕುಂಕ್ ತ್ರಾಸ್ ಜಾಲೆ.
ಸೊಡ್ನ್ ದೀಂವ್ಕ್ ಟೊಮಿ ಆಯ್ಕನಾತ್‍ಲ್ಲೊ. ಆಯಿಲ್ಲೆಂ ಕಾಮ್ ತಿರ್ಸಲ್ಯಾ ಶಿವಾಯ್ ಪಾಟಿಂ ಸರನಾ ಮ್ಹಣ್ ದುಸ್ಮಾನಾಚೆಂ ಜಿದ್ದ್. ಜೀವ್ ಗೆಲ್ಯಾರೀ ಸಯ್, ಆಪ್ಲ್ಯಾ ಜಾಗ್ಯಾರ್ ದುಸ್ಮಾನಾಕ್ ಬಚಾವಿ ಖಂಡಿತ್ ಆಸ್ಚಿ ನಾ ಮ್ಹಣ್ ಟೊಮಿಚಿ ಗಿರಾಂತ್. ಚಡ್ ವೇಳ್ ಕಾಡಿನಾಸ್ತಾನಾ ಟೊಮಿಕ್ ಲಗಾಡ್ ಕಾಡಿಜೆಚ್ ಮ್ಹಣ್ ಮಲಯಾಳಿ ಪೆಟ್ಯಾಚೆಂ ಧ್ಯಾನ್.
ಹಿ ಭಿರಾಂಕುಳ್ ಲಡಾಯ್ ಕಿತ್ಲೊ ವೇಳ್ ಲಾಂಬತ್ ಮ್ಹಣ್ ಕೊಣೀ ನೆಣಾಂ ಜಾಲೊ.
ಹಾಂವ್ ಟೊಮಿಚ್ಯಾ ಪಾಡ್ತಿನ್ ಆಸ್‍ಲ್ಲೊಂ. ಪಯ್ಸ್ ರಾವೊನ್ ಪಳೆತಾಲೊಂ. ಟೊಮಿಚಿ ಪರಿಸ್ಥಿತಿ ಪಳೆತಾನಾ ಬಿರ್ಮತ್ ದಿಸ್ತಾಲಿ. ಸದಾಂ ಮೊಗಾನ್ ಪೊಶೆಂವ್ಚ್ಯಾ ಟೊಮಿಚಿ ಅವಸ್ಥಾ ಪಳೆಂವ್ಕ್ ಜಾಯ್ನಾತ್‍ಲ್ಲಿ. ತೊ ತಿತ್ಲೊ ಘಾಯೆಲ್ಲೊ. ದುಸ್ಮಾನಾಕ್ ಟೊಮಿ ಲಗಾಡ್ ಕಾಡುಂದಿ ಮ್ಹಣ್ ಮ್ಹಜೆಂಯೀ ಮನ್ ಆಂವ್ಡೆತಾಲೆಂ. ಪಾಕಿಸ್ತಾನಿ ಉಗ್ರಗಾಮಿ ಭಾರತಾಚ್ಯಾ ಗಡಿ ಭಿತರ್ ರಿಗ್ಲ್ಯಾರ್ ಭಾರತೀಯ್ ಸೈನಿಕ್ ಖಂಚ್ಯಾ ಮನಸ್ಥಿತೆಂತ್ ಆಸ್ತಾತ್‍ಗೀ ತಸಲಿಚ್ ಪರಿಗತ್ ಮ್ಹಜಿ ಜಾಲ್ಲಿ.
ದೆಕುನ್ ಹಾಂವ್ ಟೊಮಿ ಎಟ್ಯಾಕ್ ಕರುಂದಿ ಮ್ಹಣ್ ಆಶೆತಾಲೊಂ. ಟೊಮಿಕ್‍ಯೀ ಘರ್ಚೊ ಮನಿಸ್ ಪಾಟ್ಲ್ಯಾನ್ ಆಸಾ ಮ್ಹಣ್ ಧಯ್ರ್ ಭೊಗ್ಲೆಂ. ಆನಿ ತಡವ್ ಕರ್ಚೊ ನಾಕಾ ಮ್ಹಣ್ ಟೊಮಿ ಕಾರ್ಯಗತ್ ಜಾಲೊಚ್. ಪಾಟಿಂ ಫುಡೆಂ ಪಳೆನಾಸ್ತಾನಾ ದುಸ್ಮಾನಾಚೆರ್ ಉಡ್ಲೊ.
ತಿಚ್ ತಾಣೆಂ ಕೆಲ್ಲಿ ವ್ಹಡ್ ಚೂಕ್. ತಿಶಿಲ್ಯಾನ್ ಟೊಮಿಕ್‍ಚ್ ಪಾರ್ಕುನ್ ಆಸ್‍ಲ್ಲ್ಯಾ ಮಲಯಾಳಿ ಪೆಟ್ಯಾಚಿಂ ಚಿಂತ್ನಾಂ ವೆಗ್ಳಿಂಚ್ ಆಸ್‍ಲ್ಲಿಂ. ತಾಣೆಂ ದುಸ್ರೊಚ್ ನಿರ್ಧಾರ್ ಘೆತ್‍ಲ್ಲೊ.
ಟೊಮಿಚ್ ಆಕ್ರಮಣ್ ಕರುಂದಿ ಮ್ಹಣ್ ತೊ ರಾಕ್ತಾಲೊ. ತಾಚೆಂ ಪ್ಲ್ಯಾನ್ ‘ಬಿ’ ರೆಡಿ ಜಾಲ್ಲೆಂ…..
(ಮುಖ್ಲ್ಯಾ ಭಾಗಾಂತ್ ನಿರ್ಣಾಯಕ್ ಘಾಸ್…)
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
