ಸರ್ದಾರಾಚೆಂ ಸನ್ನಿಧಾನ್ – 27: ಲಾಗಿಂ ಪುಣ್ ಪಯ್ಸ್

ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 26
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 27: ಲಾಗಿಂ ಪುಣ್ ಪಯ್ಸ್

ಟಿಪ್ಪು ಸುಲ್ತಾನಾನ್‍ಂಚ್ ಕಬ್ಲಾತ್ ದಿಲ್ಯಾ ಉಪ್ರಾಂತ್, ಯೂಸುಫ್ ಆನಿ ಜಮೀಲಾಚೆಂ ಕಾಜಾರ್ ಜಾಂವ್ಕ್ ಕಷ್ಟ್ ಆಸ್ಚೆ ನಾಂತ್ ಮ್ಹಣ್ ಸರ್ದಾರ್ ಸಿಮಾಂವ್ನ್ ಚಿಂತ್‍ಲ್ಲೆಂ. ಆತಾಂ ಯೂಸುಫಾಚಿ ಜಾಲ್ಲಿ ಕಿತಾಫತ್ ಆಯ್ಕೊನ್ ತೊಯೀ ಚಿಂತುಂಕ್ ಪಡ್ಲೊ. ಟಿಪ್ಪು ಸುಲ್ತಾನಾನ್‍ಂಚ್, ಹೆಣೆಂ ಕಬ್ಲಾತ್ ದೀವ್ನ್ ತೆಣೆಂ ಅಡ್ಕಳ್ ಘಾಲ್ನ್ – ಯೂಸುಫಾಕ್ ವಾ ಹೆರಾಂಕ್ ಸಾಂಪ್ಡಾಂವ್ಚ್ಯಾ ಖಾತಿರ್ ಕಾಂಯ್ ಖೆಳ್ ಪುಣೀ ಕೆಲಾಗೀ ಮ್ಹಣ್ ತೊ ಚಿಂತುಂಕ್ ಪಡ್ಲೊ.

ಆತಾಂ ತೊ ಬರೊ ಜಾಲ್ಲೊ. ತಾಚ್ಯೊ ಹರ್ಶೆಂಚ್ಯೊ ರಾಟಾವಳಿ – ವ್ಯಾಯಾಮ್ ಆನಿ ಹಳ್ತಾರ್ ಸವಾರಿ ಆನಿ ಶಸ್ತ್ರಾಭ್ಯಾಸ್ ತಾಣೆಂ ಆರಂಭ್ ಕೆಲ್ಲಿಂ. ದಿಸಾಕ್ ಏಕ್ ಪಾವ್ಟಿಂ, ಹರ್ಶೆಂಚ್ಯಾ ದಸ್ತುರೆ ಪರ್ಮಾಣೆಂ ಬಾದಶಹಾಕ್‍ಯೀ ತೊ ಭೆಟ್ತಾಲೊ – ತೀನ್ ದಿಸಾಂ ಆದಿಂ ಟಿಪ್ಪು ಸುಲ್ತಾನಾನ್ ತಾಚೆ ಕಡೆನ್ ಉಲವ್ನ್ ಆಸ್ತಾನಾ ಮ್ಹಳ್ಳೆಂ: “ಆಮಿ ಆನಿಕ್‍ಯೀ ಥೊಡೆ ದೀಸ್ ವಿಶ್ರಾಂತ್ ಘೆವ್ಯಾಂ, ಸರ್ದಾರ್ ಸಿಮಾಂವ್. ಆನಿ ಆಟ್-ಧಾ ದಿಸಾಂ ಭಿತರ್ ಬಹುಶಃ ಆಮ್ಕಾಂ ಎಕಾ ಲಗ್ನಾಚಿ ಗೊವ್ಜಿ ಆಸ್ತೆಲಿ.” ಹಾಸ್ಲೊ ತೊ.

“ಲಗ್ನಾಚಿ ಹುಜೂರ್?” ಸರ್ದಾರ್ ಸಿಮಾಂವ್ನ್‌ಯೀ ಅಂಬುರ್ಕೊ ಹಾಸೊನ್, ಸವಾಲಾಕ್ ಜವಾಬ್ ದಿಲಿ. “ಕಾಂಯ್…”

“ವ್ಹಯ್” ಮ್ಹಣಾಲೊ ಟಿಪ್ಪು ಮಧೆಂಚ್. “ಲಗ್ನ್, ಸರ್ದಾರ್ ಯೂಸುಫ್ ಆಲಿಚೆಂ – ಆಮ್ಚಿ ಅರ್ಧಿ ಭಯ್ಣ್ ಜಾವ್ನಾಸ್ಚ್ಯಾ ಕುಂವರ್ನ್ ಜಮೀಲಾ ನೂರ್‌ಜಹಾನಾ ಕಡೆನ್. ಪುಣ್ ವಿಶೇಸ್ ಕಿತೆಂ ಮ್ಹಳ್ಯಾರ್, ಆಮಿ ದೊನ್‍ಯೀ ಪಾಡ್ತಿಂಕ್ ಕಬ್ಲಾತ್ ದಿಲ್ಯಾ ಉಪ್ರಾಂತ್ – ಆತಾಂ ಥೊಡೆ ದೀಸ್ ಜಾಲೆ – ತಿಂ ಎಕಾಮೆಕಾ ಕಡೆನ್ ಉಲಂವ್ಕ್ ವಾ ದೀಸ್ ನಿಘಂಟ್ ಕರುಂಕ್ ಸಕೊಂಕ್ ನಾಂತ್. ಹಾಂತುಂ, ಆಮ್ಚ್ಯಾ ಧಾಕ್ಟ್ಯಾ ಆವಯ್ಚೊ – ಬೇಗಮ್ ಆಸ್ಮಾಬಿಚೊ ಕಾಂಯ್ ಹಾತ್ ಆಸಾಗೀ ಮ್ಹಣ್ ಆಮ್ಕಾಂ ಆತಾಂ ದುಬಾವ್ ಮಾರ್ತಾ. ಆಸ್ಲ್ಯಾರ್ ಖಬಡ್ದಾರ್!”

“ಹುಜೂರ್?”

“ಸಯ್ರಿಂ ಆಮ್ಚಿಂಚ್ ಜಾಲ್ಯಾರೀ, ತಾಂಕಾಂ, ಬಂದಡೆಂತ್ ಆಸ್‍ಲ್ಲ್ಯಾ ಲೊಕಾ ಕಡೆನ್ ಸಂಬಂಧ್ ಆಸಾ ಮ್ಹಣ್ ಆಮಿ ತುಜೆ ಕಡೆನ್ ಆದಿಂ ಏಕ್ ಪಾವ್ಟಿಂ ಸಾಂಗ್‍ಲ್ಲೆಂ. ಆತಾಂ ಆಮ್ಚೊ ದುಬಾವ್ ಸತ್ ಜಾಂವ್ಚೆಪರಿಂ ದಿಸ್ತಾ” ಮ್ಹಣಾಲೊ ಟಿಪ್ಪು ಸುಲ್ತಾನ್ ಮಿಶ್ಯೊ ಚಿಂವೊನ್, ಆನಿ ಚಿಂತುನ್. “ತಾಂಚೆ ಮಧೆಂ ಶಾದಿ ಜಾಲ್ಯಾರ್, ಫುಡೆಂ ತಸಲಿಂ ರಾಜ್‍ದ್ರೋಹಿ ಕಾಮಾಂ ಕರುಂಕ್ ಅವ್ಕಾಸ್ ಮೆಳಾಸೊ ನಾ. ಆನಿ, ಆಮ್ಚ್ಯಾ ಧಾಕ್ಟ್ಯಾ ಆವಯ್ಕ್, ರಾವ್ಳೆರಾಚ್ಯಾ ಖಜಾನಾ ಥಾವ್ನ್ ಮೆಳ್ಚೆಂ ವೇತನ್‍ಯೀ ಜಾಯ್ತೆಂ ಉಣೆಂ ಜಾತೆಲೆಂ…”

“ಹಾಂವ್ ತೆಂ ಪಾತ್ಯೆನಾ, ಹುಜೂರ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಹಾಂವೆಂ ಆಯ್ಕಲ್ಲ್ಯಾ ಪರ್ಮಾಣೆಂ, ಸರ್ದಾರ್ ಯೂಸುಫ್ ಆನಿ ರಾಜ್‍ಕುಮಾರಿ ಜಮೀಲಾ, ಎಕಾಮೆಕಾ ಪ್ಯಾರ್ ಕರ್ತಾತ್.”

“ಪ್ಯಾರ್! ಜಾವ್ಯೆತ್ ಸರ್ದಾರ್ ಸಿಮಾಂವ್!” ನಾಕಾಂತ್ಲ್ಯಾನ್ ಹಾಸ್ಲೊ ಟಿಪ್ಪು. “ತುಂ ನೆಣಾಂಯ್ – ಅಸ್ವಸ್ಥ್ ಜಾವ್ನ್ ಸಬಾರ್ ದೀಸ್, ಭಿತರ್ ತುಂ ಆಸ್‍ಲ್ಲೊಯ್. ಹೆರ್ ವ್ಯಾರ್ ಆನಿ ವ್ಯವಹಾರ್ ಬಳಾಧಿಕ್ ಆನಿ ಚಡ್ ಫಾಯ್ದ್ಯಾಚೊ ಜಾಲ್ಯಾರ್, ಪ್ಯಾರ್ ಜಾತಾ ಬಹರ್. ಆಸೊಂ, ಪಳೆಯಾಂ, ಕಿತೆಂ ಜಾತಾ ತಿ ಖಬರ್.”

ತಶೆಂ ತೆ ಮೆಕ್ಳೆ ಜಾಲ್ಲೆ. ಪುಣ್ ಸರ್ದಾರ್ ಸಿಮಾಂವ್ಚ್ಯಾ ಮತಿಂತ್ ಮಾತ್ರ್ ಗೊಂದೊಳ್ ಉಟ್‍ಲ್ಲೊ. ತಾಚೊಯೀ ದುಬಾವ್ ಜಿವೊ ಜಾಲ್ಲೊ. ಆಸ್ಮಾಬಿಚ್ಯಾ ಘರಾಚೆರ್ ಸುಲ್ತಾನಾನ್ ದೊಳೊ ದವರ್ಲಾ ಮ್ಹಣ್ ತಾಕಾ ಸ್ಪಷ್ಟ್ ಜಾಲೆಂ. ನಿಜಾಯ್ಕಿ, ತಿಕಾ ಜಾಗಂವ್ಚ್ಯಾ ಖಾತಿರ್ ಥೊಡ್ಯಾ ದಿಸಾಂ ಆದಿಂ ಜೆಮೆದಾರ್ ಅಂತುಲೊ ಪಡ್ವಳಾಕ್ ತಾಣೆಂ ಧಾಡ್‍ಲ್ಲೊ, ಪುಣ್ ತ್ಯಾ ಉಪ್ರಾಂತ್ ಕಸಲಿಯೀ ಖಬರ್ ತಾಣೆಂ ಆಯ್ಕೊಂಕ್ ನಾತ್‍ಲ್ಲಿ.

ಆಪ್ಲ್ಯಾ ಬಿಡಾರಾಕ್ ಪಾವ್ತಚ್, ಸರ್ದಾರ್ ಸಿಮಾಂವ್ನ್ ಅಂತುಲೊ ಪಡ್ವಳಾಕ್ ಸಾಂಗೊನ್ ಧಾಡ್ಲೊ. ತೊ ಯೆತಚ್ ವಿಚಾರ್ಲೆಂ:

“ತುಕಾ ಹಾಂವೆಂ ಥೊಡ್ಯಾ ದಿಸಾಂ ಆದಿಂ, ಜಾಗ್ವಣ್ ದಿಂವ್ಚ್ಯಾ ಖಾತಿರ್ ಆಸ್ಮಾಬಿಗೆರ್ ಧಾಡ್‍ಲ್ಲೊ, ಉಗ್ಡಾಸ್ ಆಸಾವೇ ತುಕಾ?”

“ಆಸಾ – ಬರೊ ಆಸಾ ಧನ್ಯಾ – ಸರ್ದಾರಾ.”

“ಕಿತ್ಯಾಕ್ ‘ಬರೊ’?”

“ಹಾಂವೆಂ ತ್ಯಾ ದಿಸಾಚ್ ಸಾಂಗಜಾಯ್ ಮ್ಹಣ್ ಚಿಂತ್‍ಲ್ಲೆಂ. ಉಪ್ರಾಂತ್, ತಿ ಕಾಂಯ್ ವಿಶೇಸ್ ಖಬರ್ ನಹಿಂ ಮ್ಹಣ್ ಹಾಂವ್ ಥಂಡ್ ರಾವ್ಲೊಂ.”

“ಕಸಲಿ ಖಬರ್?”

“ತುವೆಂ ಸಾಂಗ್‍ಲ್ಲೆಪರಿಂ ತಾಂಕಾಂ ಜಾಗ್ವಣ್ ಹಾಂವೆಂ ದಿಲಿ. ತ್ಯಾ ಪರ್ಮಾಣೆಂ ಚತ್ರಾಯ್ ಘೆತಾಂವ್ ಮ್ಹಣ್ ಆಸ್ಮಾಬಿನ್ ಭಾಸ್ ದಿಲಿ. ತ್ಯಾ ಪರ್ಮಾಣೆಂ, ಭದ್ರತೆಚ್ಯಾ ಕಾರಣಾಂ ಖಾತಿರ್ ಆಮಿಯೀ ಥೊಡೆ ದೀಸ್ ಥಂಯ್ ಯೆಂವ್ಚೆಂ ನಾಕಾ ಮ್ಹಣಾಲಿ ತಿ. ವಿಶೇಸ್ ಕಿತೆಂ ಮ್ಹಳ್ಯಾರ್…”

“ಕಿತೆಂ?”

“ಹರ್ಶೆಂ ಭಿತರ್ ಥಾವ್ನ್ ಸಳಾವಳಿನ್ ಉಲವ್ನ್ ಆಸ್‍ಲ್ಲಿ ಜಮೀಲಾ ಕುಂವರ್ನ್ ತ್ಯಾ ದಿಸಾ ಉಲಂವ್ಕ್‌ಚ್ ನಾ. ಹಾಂವೆಂ ಜಮೀಲಾ ದೀದಿ ನಾಂಗೀ ಮ್ಹಣ್ ವಿಚಾರ್ಲೆಂ. ತ್ಯಾ ಸವಾಲಾಕ್ ಜವಾಬ್ ದಿಂವ್ಚ್ಯಾ ಬದ್ಲಾಕ್ ಆಸ್ಮಾಬಿಚೆಂ ಮುಖಮಳ್ ದುಖೇಸ್ತ್ ಆನಿ ಗಂಭೀರ್ ಜಾಲೆಂ. ಹಾಂವೆಂ ಪರ್ತ್ಯಾನ್ ತೆಂಚ್ ಸವಾಲ್ ದೋನ್ ಪಾವ್ಟಿಂ ವಿಚಾರ್ಲೆಂ.”

“ತಿಣೆಂ ಕಿತೆಂ ಮ್ಹಣ್ ಜವಾಬ್ ದಿಲಿ?”

“ಜಮೀಲಾ ಚಿಕ್ಕೆ ಹುಶಾರ್ ನಾ, ಭಿತರ್ ವಿಶೆವ್ ಘೆತಾ ಮ್ಹಣಾಲಿ ತಿ. ಪುಣ್ ತಿಣೆಂ ಉಲಯಿಲ್ಲಿ ರೀತ್ ಮ್ಹಾಕಾ ಚಿಕ್ಕೆ ಪರ್ಕಿ ದಿಸ್ಲಿ. ಉಪ್ರಾಂತ್ ಹಾಂವೆಂ ತೊ ವಿಷಯ್ ತಿತ್ಲೊ ಮತಿಂತ್ ವ್ಹರುಂಕ್ ನಾ.”

“ವ್ಹಡ್ ನಹಿಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಸಮಸ್ಯಾಂ ಭಿಗ್ಡೊನ್ ಯೆತಾತ್ ಮ್ಹಳ್ಳೆಂ ನೀಜ್. ಚಡ್ ಚತ್ರಾಯೆನ್ ಆಮಿ ಆಸಜಾಯ್. ಹೆಂ – ಆಗ್ನೆಸ್ ಕುಂವರ್ನಿಚಿ ಕಾಂಯ್ ಖಬರ್ ಆಸಾವೇ?”

“ನಾ, ಧನ್ಯಾ” ಮ್ಹಣಾಲೊ ಅಂತುಲೊ ಪಡ್ವಳ್ ಚಿಕ್ಕೆ ಕಾವ್ಜೆವ್ನ್. “ಕೊಡಗಾ ಥಾವ್ನ್ ಥೊಡ್ಯಾಚ್ ದಿಸಾಂ ಭಿತರ್ ಪಟ್ಟಣಾಕ್ ಯೆತಾ ಮ್ಹಣ್ ತಿಣೆಂ ಮ್ಹಳ್ಳೆಂ ಖಂಯ್. ಪುಣ್ ಎದೊಳ್ ಖಬರ್ ನಾ.”

“ಆತಾಂ, ತಿಚ್ಯಾ ಭದ್ರತೆಚಿ ಜವಾಬ್ದಾರಿಯೀ ಆಮ್ಚಿಚ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಚತ್ರಾಯೆನ್ ಆಯ್ಕ್ – ವಾಟಾಂ ವಾಟಾಂನಿ ಜಣ್ ಧಾಡ್. ಪಟ್ಟಣಾಕ್, ಥೊಡ್ಯಾ ದಿಸಾಂಚ್ಯಾ ಉತ್ರಾಕ್ ಪುಣೀ ತಿಣೆಂ ಯೇನಾಯೆ, ಬಗಾರ್, ಕೊಡಗಾಂತ್‍ಚ್ ತಿಣೆಂ ರಾವ್ಲ್ಯಾರ್ ಸುರಕ್ಷಿತ್ ಮ್ಹಣ್ ತಿಕಾ ಖಬರ್ ದೀಜಾಯ್. ಪ್ರತ್ಯೇಕ್ ಜಾವ್ನ್ – ಬಾದಶಹಾಚೆಂ ಗುಮಾನ್ ಆತಾಂ, ದುಬಾವಾ ಸಮೇತ್ ಆಸ್ಮಾಬಿಚ್ಯಾ ಘರಾಚೆರ್ ಆಸಾ, ಜಾಲ್ಲೆ ವರ್ವಿಂ, ಆಗ್ನೆಸ್ ಕುಂವರ್ನಿನ್ ತ್ಯಾ ಘರಾಚೊ ಆಸ್ರೊ ಸೊಧಿನಾಯೆ ಮ್ಹಣ್ ತಿಕಾ ಖಬರ್ ದಿಂವ್ಚಿ ಗರ್ಜ್ ಆಸಾ.”

“ಜಾಯ್ತ್ ಧನ್ಯಾ – ಪುಣ್ ತಿ ಆತಾಂ ಖಂಯ್ ಆಸಾ ಮ್ಹಳ್ಳೆಂ ಆಮ್ಕಾಂ ಪಯ್ಲೆಂ ಕಳಿತ್ ಜಾಯ್ಜಯ್.”

“ಆಜ್ ನಹಿಂ ಫಾಲ್ಯಾಂ ಕಳಿತ್ ಜಾತೆಲೆಂ – ವೇಳ್ ಉತ್ರಾನಾ ಜಾಲ್ಯಾರ್ ಸಯ್.” ಸರ್ದಾರ್ ಸಿಮಾಂವ್ನ್ ಶ್ವಾಸ್ ಸೊಡ್ಲೊ. “ಸ್ತ್ರೀಯಾಂಚ್ಯಾ ಮತಿಂತ್ ಆಲೋಚನ್ಯೊ ಕಶ್ಯೊ ಘುಂವ್ತಾತ್ ಮ್ಹಳ್ಳೆಂ ಸಾಂಗೊಂಕ್ ಕಷ್ಟ್. ಪಟ್ಟಣಾ ಥಾವ್ನ್, ಆನಿ ಟಿಪ್ಪುಚ್ಯಾ ಶಿಪಾಯಾಂ ಥಾವ್ನ್ ಜಾತಾ ತಿತ್ಲೆಂ ಪಯ್ಸ್ ವೆಚ್ಯಾ ಬದ್ಲಾಕ್ ಲಾಗಿಂ ತಿ ಆಯ್ಲ್ಯಾ! ಚಿಂತುನ್ ಪಳೆಲ್ಯಾರ್ – ತಿ ತಶೆಂ ಕರಿತ್ ಮ್ಹಣ್ ಕೊಣಾಯ್ಕೀ ದುಬಾವ್ ಮಾರಿಸೊ ನಾ.” ತಾಕಾ ಅಭಿಮಾನ್‍ಯೀ ಭೊಗ್ಲೊ.

“ತೆಂ ವ್ಹಯ್ ಧನ್ಯಾ.”

“ಆತಾಂ ವಚ್, ಕಾಮಾಕ್ ಲಾಗ್.”

“ಜರೂರ್ ಧನ್ಯಾ, ಸರ್ದಾರಾ!” ಮ್ಹಣೊನ್ ಅಂತುಲೊ ಥಂಯ್ ಥಾವ್ನ್ ಪಾಶಾರ್ ಜಾಲೊ.

ಸರ್ದಾರ್ ಸಿಮಾಂವ್, ಆನಿಕ್‍ಯೀ ಚಿಂತುಂಕ್ ಪಡ್ಲೊ. ಎಕಾಮೆಕಾ ಕಡೆನ್ ಮೊಗಾರ್ ಆಸ್‍ಲ್ಲಿಂ ತರೀ, ಹ್ಯಾ ವೆಳಾರ್ ಜಮೀಲಾನ್ ಯೂಸುಫ್ ಆಲಿಕ್ ಮೆಳನಾಸ್ತಾನಾ ಖೆಳ್ ಖೆಳೊಂಕ್ ಕಾರಣ್ ಕಸಲೆಂ ಜಾವ್ಯೆತ್ ಮ್ಹಣ್ ತಾಕಾ ಸಮ್ಜನಾ ಜಾಲೆಂ. ತೆಂ ಕಾರಣ್ ಸರ್ದಾರ್ ಯೂಸುಫ್ ಆಲಿಕ್‍ಯೀ ಸಮ್ಜನಾತ್‍ಲ್ಲೆಂ. ಪುಣ್ ತ್ಯಾಚ್ ಸಾಂಜೆರ್ ತಾಕಾ ತೆಂ ಕಳಿತ್ ಜಾಲೆಂ.

ತ್ಯಾ ಸಾಂಜೆರ್, ಸರ್ದಾರ್ ಯೂಸುಫ್ ಆಲಿ, ಅಪಧಯ್ರಾನ್‍ಸೊ, ಆಸ್ಮಾಬಿಚ್ಯಾ ಘರಾ ಪಾವ್ಲೊ. ಹರ್ಶೆಂಚೆಪರಿಂಚ್ ಆಸ್ಮಾಬಿನ್ ತಾಕಾ ಸ್ವಾಗತ್ ಕೆಲೊ. ತಶ್ಯೊಚ್, ಗರ್ಜ್ ನಾತ್‍ಲ್ಲ್ಯೊ ಥೊಡ್ಯೊ ಗಜಾಲಿ ಜಾತಚ್ –

“ಜಮೀಲಾ ಕುಂವರ್ನ್ ನಾಂಗೀ?” ವಿಚಾರ್ಲೆಂ ತಾಣೆಂ.

“ನಾ, ಬೇಟಾ…” ತಿಚೆಂ, ಮಿರಿಯೆಲ್ಲೆಂ ಮುಖಮಳ್ ಬಾವ್ಲೆಂ.

“ನಾ! ನಾ?” ಮ್ಹಣಾಲೊ ತೊ, ನಿರಾಶಿ ಜಾವ್ನ್.

“ಬೇಟಾ, ಅಲ್ಲಾಚ್ಯಾ ನಾಂವಾನ್ ಹಾಂವೆಂ ಸಾಂಗ್ಚೆಂ ಬರೆಂ ಕರ್ನ್ ಆಯ್ಕ್” ಮ್ಹಣಾಲಿ ತಿ, ಸವ್ಕಾಸ್, ಪುಣ್ ಗಂಭೀರ್ ಜಾವ್ನ್.

“ಹಾಂವ್ ಆಯ್ಕತಾಂ ಬೀಬಿ ಸಾಹಿಬಾ…” ತಾಣೆಂ ಮ್ಹಳೆಂ. “ಸಪ್ಣೆತಾಂ ತರೀ, ಹಾಂವ್ ಆಯ್ಕತಾಂ.” ತೊ ಕಾಲುಬುಲೊ ಜಾಲೊ.

“ಆನಿ ಏಕ್ ಉಪ್ಕಾರ್ ತುಜೆ ಕಡೆನ್ ಹಾಂವ್ ಮಾಗ್ತಾಂ” ಮ್ಹಣಾಲಿ ತಿ. “ಆತಾಂ ಹಾಂವೆಂ ಸಾಂಗ್ಚಿ ಗಜಾಲ್, ಹರ್ಯೆಕ್ ಉತಾರ್ ಲೆಗುನ್ – ಹೆರಾಂಕ್ ಸಾಂಗನಾ ಮ್ಹಣ್ ಖುರಾನಾಚ್ಯಾ ನಾಂವಾನ್ ತುವೆಂ ಪ್ರಮಾಣ್ ಕರಿಜಾಯ್!”

“ಕಿತ್ಯಾಕ್ ಬೀಬಿ ಸಾಹಿಬಾ?” ತೊ ಘಡ್ಬಡ್ಲೊ.

“ಪ್ರಮಾಣ್ ಕರ್ ಬೇಟಾ.” ತಿಣೆಂ ಪರಾತ್ತಿಲೆಂ. “ತಶೆಂ ಕೆಲ್ಯಾರ್ ಮಾತ್ರ್ ತುಕಾ ನೀಜ್ ಗಜಾಲ್ ಹಾಂವ್ ಸಾಂಗ್ತಾಂ ಆನಿ ತುಜೊ ದುಬಾವ್ ಪರಿಹಾರ್ ಕರ್ತಾಂ. ತ್ಯಾ ವರ್ವಿಂ ತುಕಾಯೀ ಬರೆಂ, ಆನಿ ಆಮ್ಕಾಂಯೀ ಬರೆಂ. ಹಾಂವೆಂ ಸಾಂಗ್ಚಿ ಖಬರ್ ಕೊಣಾಕ್‍ಚ್ ಸಾಂಗಾಸೊನಾಂಯ್ ಮ್ಹಣ್ ಪ್ರಮಾಣ್ ಕರ್. ಹಾಂವ್ ಇತ್ಲೆಂ ವಿಚಾರ್ತಾಂ ದೆಕುನ್, ಮ್ಹಾಕಾ ಮಾಫ್ ಕರ್.

ಸರ್ದಾರ್ ಯೂಸುಫ್ ಆಲಿನ್ ಪ್ರಮಾಣ್ ಕೆಲೆಂ.

ಆಸ್ಮಾಬಿನ್ ನೀಜ್ ಗಜಾಲ್ ಸಾಂಗ್ಲಿ. ಭೋವ್ ಕಷ್ಟಾಂನಿ ಸಾಂಗ್ಲಿ.

ಜಮೀಲಾ ಥೊಡ್ಯಾ ದಿಸಾಂ ಆದಿಂ ಕಾಳಿ ಬೊಳ್ನಿಗ್ ಜಾವ್ನ್ ಅಂತರ್‌ಲ್ಲಿ ಖಬರ್, ಆನಿ ತೊ ವಿಷಯ್ ಟಿಪ್ಪುಚ್ಯಾ ಭಿಯಾನ್ ಆನಿ ಹೆರ್ ಖಾಸ್ಗಿ ಕಾರಣಾನ್ ಗುಪಿತ್ ದವರ್‌ಲ್ಲಿ ಗಜಾಲ್ ತಿಣೆಂ ಸಾಂಗ್ಲಿ, ಆನಿ ತೆದೊಳ್ ಪರ್ಯಾಂತ್, ಯೂಸುಫಾ ಥಾವ್ನ್‌ಯೀ ತಿ ಖಬರ್ ಲಿಪಯಿಲ್ಲ್ಯಾ ಖಾತಿರ್ ತಿಣೆಂ ಮಾಫ್ ಮಾಗ್ಲೆಂ, ಆನಿ ಉಪ್ರಾಂತ್, ತಡ್ವುಂಕ್ ತಾಂಕನಾಸ್ತಾನಾ ದುಖಾಂ ತಿಣೆಂ ಗಳಯ್ಲಿಂ.

ಹೆಂ ಸಗ್ಳೆಂ ಆಯ್ಕೊನ್ ಸರ್ದಾರ್ ಯೂಸುಫ್ ಆಲಿಚ್ಯಾ ಮಾತ್ಯಾರ್ ಮೊಳಬ್ ಕೊಸ್ಳೊನ್ ಪಡ್‍ಲ್ಲೆಪರಿಂ ಜಾಲೆಂ. ಪಾತ್ಯೆಂವ್ಕ್ ತಾಕಾ ಕಷ್ಟ್ ಮಾರ್ಲೆ ತರೀ, ಥೊಡೊ ವೇಳ್, ಬಸ್‍ಲ್ಲೆ ಕಡೆನ್‍ಂಚ್ ರೂಕ್ ಜಾಲ್ಲೆಪರಿಂ ಥಂಡ್ ತೊ ಜಾಲೊ. ಜಮೀಲಾಚೊ ನಿಜಾಯ್ಕೀ ತೊ ಮೋಗ್ ಕರ್ತಾಲೊ ಜಾಲ್ಲ್ಯಾನ್, ತಿಚ್ಯಾ ಮೊರ್ನಾಚಿ ಖಬರ್ ಆಯ್ಕೊನ್ ಆನಿ ಪ್ರಸ್ತುತ್ ಘಡಿತಾಂ ಚಿಂತುನ್ ಪಿಶ್ಯಾಪರಿಂ ತೊ ಜಾಲೊ. ತಾಚ್ಯಾ ಮತಿಂತ್ ತಾಚೊ ಸಗ್ಳೊ ಫುಡಾರ್ ಅಂಧ್ಕಾರ್ ಜಾವ್ನ್ ತಾಕಾ ದಿಸ್ಲೊ. ಫುಡೆಂ ಜಿಯೆಂವ್ಚಿ ತಾಚಿ ಉರ್ಬಾ ಉಬೊನ್ ಗೆಲಿ.

ಜಾಲ್ಯಾರೀ ತಸಲ್ಯೊ ಗಜಾಲಿ ಪಾತ್ಯೆಂವ್ಕ್ ಕಷ್ಟ್.

“ಬಾದಶಹಾಕ್ ಹಿ ಗಜಾಲ್ ನಿಜಾಯ್ಕೀ ಕಳಿತ್ ನಾಂಗೀ?” ಕ್ರಮೇಣ್ ವಿಚಾರ್ಲೆಂ ತಾಣೆಂ – ಅಜ್ಯಾಪಾನ್, ಭರ್ವಶ್ಯಾ ವಿರೋಧ್ ಭರ್ವಸೊ ಚಿಂತುನ್.

“ನಾ, ಬೇಟಾ, ಬಾದಶಹಾಕ್ ಕಳಿತ್ ನಾ” ಮ್ಹಣಾಲಿ ತಿ, ಲಜೆನ್ ಆನಿ ಖಂತಿನ್.

“ಪುಣ್ ಬಾದಶಹಾಚ್ ಖುದ್ ಹಾಂಗಾ ಯೇವ್ನ್ ತುಮ್ಚೆ ಕಡೆನ್ ಉಲವ್ನ್ ಗೆಲ್ಲೊ ಖಂಯ್ – ನಹಿಂವೇ?”

“ಮ್ಹಜೆ ಕಡೆನ್ ತೊ ಉಲಯಿಲ್ಲೊ. ಜಮೀಲಾ ಕಡೆನ್ ನಹಿಂ.”

“ಜಮೀಲಾ ಕಡೆನ್ ನಹಿಂ! ತರ್ ಆನಿ ಕೊಣಾ ಕಡೆನ್?”

ಸರ್ದಾರ್ ಯೂಸುಫಾನ್, ಖುರಾನಾಚ್ಯಾ ನಾಂವಾನ್ ಸೊಪುತ್ ಘಾಲಾ ಮ್ಹಣ್ ಆಸ್ಮಾಬಿನ್ ಉಗ್ಡಾಸ್ ಕೆಲೊ, ಆನಿ ಆಪ್ಣೆಂ, ಘಡನಾತ್‍ಲ್ಲ್ಯಾ ಆನಿ ದುಸ್ರಿ ವಾಟ್ ನಾತ್‍ಲ್ಲ್ಯಾ ಕಾಳಾಕ್ ಕಶೆಂ ಆಗ್ನೆಸ್ ಕುಂವರ್ನಿಚೊ ಪ್ರಯೋಗ್ ಕೆಲೊ ಮ್ಹಳ್ಳೆಂ ಸಾಂಗ್ಲೆಂ. ವಿವರಿಲೆಂ.

ಯೂಸುಫಾಕ್, ಪಯ್ಲೆಂಚ್ಯಾ ಖಂತಿ ಪ್ರಾಸ್ ಉಪ್ರಾಂತ್ಲಿಂ ಆಶ್ಚರ್ಯಾಚಿಂ ಚಿಂತ್ನಾಂ ಬಳಾಧಿಕ್ ಜಾಲಿಂ.

“ಬಾದಶಹಾಕ್ ಕಾಂಯ್ ದುಬಾವ್ ಮಾರುಂಕ್ ನಾಂಗೀ?” ವಿಚಾರ್ಲೆಂ ತಾಣೆಂ. “ಆಗ್ನೆಸ್ ಕುಂವರ್ನಿಕ್ ತಾಣೆಂ ಪಳೆಂವ್ಕ್ ನಾಂಗೀ?”

“ದುಬಾವ್ ಮಾರುಂಕ್ ನಾ.” ಆಸ್ಮಾಬಿನ್ ಪರ್ತ್ಯಾನ್ ವಿವರ್ ದಿಲೊ.

“ಆನಿ ಹಿ ಖಬರ್ ಸರ್ದಾರ್ ಸಿಮಾಂವ್ಕ್‌ಯೀ ಕಳಿತ್ ನಾ!” ತೊ ಆನಿಕ್‍ಯೀ ಅಜ್ಯಾಪ್ಲೊ.

“ನಾ, ಕಳಿತ್ ನಾ – ತಾಕಾಯೀ ಕಳಿತ್ ಜಾಯ್ನಾಯೆ.”

“ಕಾರಣ್?”

“ಕಾರಣ್ ಆಮ್ಚ್ಯಾ ಸಮೇಸ್ತಾಂಚ್ಯಾ ಭದ್ರತೆಚೆಂ. ಚಡಿತ್ ಕಾರಣ್ ಆಗ್ನೆಸ್ ಕುಂವರ್ನ್‍ಂಚ್ ತುಕಾ ಸಾಂಗ್ತೆಲಿ.”

ಆಸ್ಮಾಬಿನ್ ತಿತ್ಲೆಂ ಉಲಯ್ತಚ್, ಭಿತರ್ಲ್ಯಾನ್ ಆಸ್‍ಲ್ಲ್ಯಾ ಆಗ್ನೆಸ್ ಕುಂವರ್ನಿನ್ ಜನೆಲಾಚೊ ಪಡ್ದೊ ಬಗ್ಲೆನ್ ಕೆಲೊ. ಮುಖಾವರಣಾಂತ್ಲ್ಯಾನ್ ತಿಚೆ ದೊಳೆ ಮಾತ್ರ್ ದಿಸ್ತಾಲೆ. ಘಡಿಭರ್ – ತಿಚೊ ಸ್ವರ್ ಆಯ್ಕತಾ ಪರ್ಯಾಂತ್, ತಿಚ್ ಜಮೀಲಾ ಜಾವ್ಯೆತ್ ಮ್ಹಣ್ ಯೂಸುಫ್ ಆಲಿಕ್‍ಯೀ ಭೊಗ್ಲೆಂ.

ಆಗ್ನೆಸ್ ಕುಂವರ್ನಿನ್ ಮುಖಾವರಣ್ ನಿಸ್ರಾಯ್ಲೆಂ. ತೆದಾಳಾ ಯೂಸುಫಾಕ್ ವಳಕ್ ಮೆಳ್ಳಿ – ಆದಿಂ ಬಂಟ್ವಾಳಾಂತ್ ಸರ್ದಾರ್ ಆಂತೊನ್ ಪಾವ್ಲ್ ಶೆಟಿಕ್ ಕೈದ್ ಕರುಂಕ್ ಗೆಲ್ಲ್ಯಾ ವೆಳಾ ತಾಣೆಂ ತಿಕಾ ಪಳೆಲ್ಲೊ ಉಗ್ಡಾಸ್ ಆಯ್ಲೊ.

ಆಗ್ನೆಸ್ ಕುಂವರ್ನಿನ್, ಆಪುಣ್ ಥಂಯ್ ಆಸ್‍ಲ್ಲಿ ಖಬರ್, ಸರ್ದಾರ್ ಸಿಮಾಂವ್ಕ್‌ಯೀ ಕಿತ್ಯಾಕ್ ಕಳಿತ್ ಜಾಯ್ನಾಯೆ ಮ್ಹಳ್ಳ್ಯಾ ಖಾತಿರ್ ಕಾರಣಾಂಚೊ ಮಟ್ವ್ಯಾನ್ ವಿವರ್ ದಿಲೊ. ತಾಚ್ಯಾ ಹುಕ್ಮೆ ಶಿವಾಯ್, ತಾಕಾ ಆಶೆವ್ನ್, ತಾಚೊ ಪಾಟ್ಲಾವ್ ಕರ್ನ್ ತಿ ಆಯ್ಲ್ಯಾ ಮ್ಹಣ್ ತಾಕಾ ಭೊಗನಾಯೆ ಮ್ಹಳೆಂ ತಿಣೆಂ.

“ಪುಣ್ ಮ್ಹಾಕಾ ಹೆಂ ರಾಜಾಂವ್ ಸಮ್ಜನಾ” ಮ್ಹಣಾಲೊ ಸರ್ದಾರ್ ಯೂಸುಫ್ ಆಲಿ. “ಕಿತೆಂಯೀ ಅಪಾಯ್ ಆಸ್ಲ್ಯಾರ್…”

“ತೊ ಆನಿಕ್‍ಯೀ ಚಡಯ್ನಾಯೆ, ಯೂಸುಫ್ ಭಾಯೀ” ಮ್ಹಣಾಲಿ ಆಗ್ನೆಸ್ ಕುಂವರ್ನ್. “ಗರ್ಜ್ ಆಸ್ಲ್ಯಾರ್, ಹಾಂವ್ ಪಟ್ಟಣಾಂತ್ ಆಸ್ಚಿ ಖಬರ್, ಮ್ಹಜೆ ಥಾವ್ನ್ಂಚ್ ತಾಕಾ ಕಳಿತ್ ಜಾಯ್ಜಯ್. ದೆಕುನ್ ಉಪ್ಕಾರ್ ತುಜೊ – ತಾಕಾ ಹಿ ಖಬರ್ ಸಾಂಗನಾಯೆ.”

“ಹಾಂವ್ ತರ್ಕ್ ಕರಿನಾ – ಹಾಂವ್ ಸಾಂಗನಾ” ಮ್ಹಣಾಲೊ ಸರ್ದಾರ್ ಯೂಸುಫ್, ಹಾತಾ-ಥಳ್ವ್ಯಾನ್ ಆಪ್ಲೆಂ ಕಪಾಲ್ ಪುಸುನ್. “ಖಂಯ್ಚ್ಯಾಕ್‍ಯೀ, ಮ್ಹಜೆಂ ಜೀವನ್ ರಿತೆಂ ಜಾಲೆಂ. ಹ್ಯಾ ಫುಡೆಂ ಹೆಂ ಘರ್‌ಯೀ ಮ್ಹಾಕಾ ಅಂತರ್ಲೆಂ.”

“ತಶೆಂ ಮ್ಹಣನಾಕಾ ಬೇಟಾ” ಆಸ್ಮಾಬಿ ಸುಸ್ಕಾರ್ಲಿ: “ಜಮೀಲಾ ನಾತ್ಲ್ಯಾರೀ, ತಿಚಿ ಆವಯ್ – ತುಜಿ ಆವಯ್ – ಆಸಾ ಮ್ಹಣ್…”

“ಚಿಂತುಂಕ್ ಪ್ರಯತ್ನ್ ಕರ್ತಾಂ” ಮ್ಹಣೊನ್ ಯೂಸುಫ್ ಉಟ್ಲೊ.

ಜಮೀಲಾಕ್ ಮಾತ್ಯೆಕ್ ಪಾಯಿಲ್ಲಿ ಸುವಾತ್ ವಿಚಾರ್ನ್ ಥಂಯ್ಸರ್ ತೊ ಗೆಲೊ. ಥೊಡೊ ವೇಳ್ ಥಂಯ್ ತೊ ರಾವ್ಲೊ.

“ಜಮೀಲಾ ಪ್ಯಾರೀ…” ರಡ್ಲೆಂ ತಾಚೆಂ ಮನ್. ಕೊಸಳ್ಳೆಂ ತಾಚೆಂ ಕಾಳಿಜ್. “ಕಿತ್ಲ್ಯಾ ಲಾಗಿಂ ಆಮಿ ಆಯ್ಲ್ಯಾಂವ್, ಪುಣ್ ಕಿತ್ಲ್ಯಾ ಪಯ್ಸ್ ಆಮಿ..! ವಿಧಿಚೊ ಖೆಳ್, ಮೊಗಾ, ಪರ್ವಾ ನಾ. ಹಾಂವ್‍ಯೀ ಹಾಂಗಾಸರ್ ಚಡ್ ದೀಸ್ ರಾವಾಸೊ ನಾ ಮ್ಹಣ್ ಮ್ಹಾಕಾ ಖಂಡಿತ್ ಭೊಗ್ತಾ… ತುಂ ಗೆಲ್ಲೆ ಕಡೆನ್ ಹಾಂವ್‍ಯೀ ವೆಗಿಂ ಯೆತಲೊಂ… ತೆದೊಳ್ ಪರ್ಯಾಂತ್…” ಉಪ್ರಾಂತ್, ದುಖ್ತೆಂ ಮನ್, ರಡ್ತೆಂ ಕಾಳಿಜ್ ವ್ಹಾವಂವ್ಚಿಂ ಜಡ್ ಮೆಟಾಂ ಕಾಡ್ನ್, ಸರ್ದಾರ್ ಸಿಮಾಂವ್ ಸರ್ಶಿನ್ ತೊ ಪಾವ್ಲೊ. ಇಷ್ಟಾಚೆಂ ಮುಖಮಳ್ ನಿಸ್ತೇಜಿತ್ ಜಾಲ್ಲೆಂ ಸರ್ದಾರ್ ಸಿಮಾಂವ್ಕ್ ದಿಸ್ಲೆಂ.

“ಕಿತೆಂ ಯೂಸುಫ್ ಭಾಯೀ, ಕಾಂಯ್ ಬರಿ ಖಬರ್ ಪುಣೀ?” ವಿಚಾರ್ಲೆಂ ತಾಣೆಂ.

“ನಾ ಭಾಯೀ” ಮ್ಹಣಾಲೊ ಯೂಸುಫ್. “ಬಾದಶಹಾ ಸಾಂಗೊಂದಿ, ಖುದ್ ಅಲ್ಲಾ ಸಾಂಗೊಂದಿ – ಆಮ್ಚೆಂ – ಮ್ಹಜೆಂ ಆನಿ ಜಮೀಲಾಚೆಂ ಲಗ್ನ್ ಸಾಧ್ಯ್ ನಾ.”

“ಕಿತೆಂ?” ಸರ್ದಾರ್ ಸಿಮಾಂವ್ ಅಜ್ಯಾಪ್ಲೊ. “ಕಿತ್ಯಾಕ್?”

“ಹಾಂವ್ – ಆಮಿ” ಯೂಸುಫ್ ಘುಸ್ಪಡ್ಲೊ. “ಜಮೀಲಾ ಮ್ಹಜೊ ಮೋಗ್ ಕರ್ಚ್ಯಾ ಸ್ಥಿತೆರ್ ನಾ!”

“ಪುಣ್ ಕಿತ್ಯಾಕ್? ತುಜೊ ಸಂಪೂರ್ಣ್ ಮೋಗ್ ತಿಕಾ…”

“ಆತಾಂ ಪಾವನಾ. ಆಮ್ಚೆಂ ಲಗ್ನ್ ಸಾಧ್ಯ್ ನಾ” ಮ್ಹಣಾಲೊ ಯೂಸುಫ್ ಆಲಿ, ಪುರಾಸಣೆನ್. “ಹಾಚ್ಯಾ ಪ್ರಾಸ್ ವರ್ತೆಂ ಸರ್ದಾರ್ ಭಾಯೀ, ವಿಚಾರಿನಾಕಾ.”

“ಪುಣ್ ಯೂಸುಫ್…”

“ಉಪ್ಕಾರ್! ವಿಚಾರಿನಾಕಾ, ಸಾಂಗನಾಕಾ. ನಾ, ಹಾಂವ್ ಪಿಸೊ ಜಾಂವ್ಕ್ ನಾ. ಆತಾಂಚ್ ಹಾಂವ್ ಬಾದಶಹಾ ಸರ್ಶಿನ್ ವೆತಾಂ, ಆನಿ ಹಿ ಖಬರ್ ತಾಕಾ ಸಾಂಗ್ತಾಂ…” ತೊ ವಚೊಂಕ್ ಆಯ್ತೊ ಜಾಲೊ. ಕಾಜಾರಾಚೊ ಪ್ರಸ್ತಾಪ್ ಬಂದ್ ಜಾಂವ್ಚ್ಯಾಂತ್ ಹೆರಾಂಚಿ ಭದ್ರತಿ ಆಸಾ ಮ್ಹಣ್ ತಾಣೆಂ ಚಿಂತ್ಲೆಂ.

“ಪುಣ್ ಯೂಸುಫ್, ಕಿತೆಂ ಅಮ್ಸೊರ್?”

“ಅಸಲ್ಯಾ ವಿಷಯಾಂನಿ ಘಳಾಯ್ ಬರಿ ನಹಿಂ. ಹಾಂವ್ ಕಿತೆಂ ಕರ್ತಾಂ ಮ್ಹಳ್ಳೆಂ ಹಾಂವ್ ಜಾಣಾಂ. ತುಂ ಕಾಂಯ್ ಚಿಂತಾ ಕರಿನಾಕಾ” ಮ್ಹಣೊನ್, ಜೀವ್ ನಾತ್‍ಲ್ಲೊ ಏಕ್ ಅಂಬುರ್ಕೊ ಹಾಸೊ ದೀವ್ನ್, ಸರ್ದಾರ್ ಯೂಸುಫ್ ಆಲಿ, ಥಂಯ್ ಥಾವ್ನ್ ಪಾಶಾರ್ ಜಾಲೊ.

ವಿಜ್ಮಿತ್ ಜಾಲ್ಲ್ಯಾ ಸರ್ದಾರ್ ಸಿಮಾಂವ್ಕ್ ಯೂಸುಫಾಚಿ ಬಿರ್ಮತ್‍ಯೀ ದಿಸ್ಲಿ. ಅಸಲ್ಯಾ ಪರಿಸ್ಥಿತೆಕ್ ಜಮೀಲಾಚ್ ಕಾರಣ್ ಜಾಯ್ಜಯ್ ಮ್ಹಣ್ ಚಿಂತುನ್, ಮತಿಂತ್ ತಾಣೆಂ ತಿಚೊ ಶಿಣ್ ಚಿಂತ್ಲೊ. ಪುಣ್, ನಿಜಾಯ್ಕೀ, ಯೂಸುಫ್ ಆನಿ ಜಮೀಲಾ ಮೊಗಾಂತ್ ಎಕಾಮೆಕಾಕ್ ಕಿತ್ಲ್ಯಾ ಲಾಗಿಂ ಪಾವ್‍ಲ್ಲಿಂ, ಪುಣ್ ಕಿತ್ಲ್ಯಾ ಪಯ್ಸ್ ಸರ್‌ಲ್ಲಿಂ ಮ್ಹಣ್ ತಾಕಾ ಕಳಿತ್ ನಾತ್‍ಲ್ಲೆಂ. ಆಗ್ನೆಸ್ ಕುಂವರ್ನಿಚೊ ಉಗ್ಡಾಸ್ ಯೇವ್ನ್ ತಾಚ್ಯಾ ಆಂಗಾಂತ್ ಊಬ್ ಚರ್ಲಿ. ಪುಣ್ ಥಂಯ್ಸರ್‌ಯೀ, ಘಡಿತಾಂಚ್ಯಾ ಖೆಳಾ ವರ್ವಿಂ, ಕಿತ್ಲ್ಯಾ ಲಾಗಿಂ ಪುಣ್ ಪಯ್ಸ್ ಆಸಾತ್ ಮ್ಹಣ್ ತೊಯೀ ನೆಣಾಂಸ್‍ಲ್ಲೊ.

ಟಿಪ್ಪು ಸುಲ್ತಾನಾಕ್ ಭೆಟ್ ದೀವ್ನ್, ಸರ್ದಾರ್ ಯೂಸುಫ್ ಆಲಿನ್ – ಸರ್ದಾರ್ ಸಿಮಾಂವ್ ಕಡೆನ್ ಉಲಯಿಲ್ಲೆಪರಿಂಚ್ – ಆಪ್ಲಿ ವರ್ದಿ ದಿಲಿ.

ಬಾದಶಹಾಚಿಂ ನಾಕಾ-ಬುಡಾಂ ಫುಲ್ಲಿಂ, ತೊ ತಾಪ್ಲೊ.

“ತುಂ ತಿಚೊ ಮೋಗ್ ಕರ್ತಾಯ್‍ಮೂ?:

“ಜೀ ಹುಜೂರ್!”

“ಆನಿ ತಿ ತುಜೊ…”

“ಮೋಗ್ ಕರಿನಾ… ಖಂಯ್ ಹುಜೂರ್!”

“ಕಾರಣ್?”

“ಹಾಂವ್… ನೆಣಾಂ ಹುಜೂರ್!”

“ಕಾರಣಾಂಕ್ ಆಗ್ ಲಾಯ್!” ಮ್ಹಣಾಲೊ ಟಿಪ್ಪು, ಪಾಯ್ ರುಂದಾವ್ನ್, ಕಮರ್-ಬಾಂಧಾಂತ್ ಬೊಟಾಂ ಶಿರ್ಕಾವ್ನ್. “ತಿಚಿಂ ಕಾರಣಾಂ ಆಮ್ಕಾಂ ನಾಕಾತ್. ಆಮ್ಚಿ ಹುಕುಮ್ ಆಮಿ ದಿಲ್ಯಾ, ತಿ ಪಾಳುಂಕ್ ತಾಣಿಂ ಕಬ್ಲಾತ್ ದಿಲ್ಯಾ. ಪಳೆತಾಂವ್ ಆಮಿ – ಸಯ್ರಿಂ ಜಾಲ್ಯಾರೀ – ಬಾದಶಹಾಚ್ಯಾ ಹುಕ್ಮೆಚಿಂ ಖೆಳ್ಕುಳಾಂ ಕರುಂಕ್ ಸಕ್ತಾತ್‍ಗೀ ಮ್ಹಣ್!”

ಯೂಸುಫ್ ಆಲಿ ಥರ್ಥರ್ಲೊ. ಟಿಪ್ಪು ಸುಲ್ತಾನ್ ಪಿಸೊ ಜಾಂವ್ಚೆ ತಿತ್ಲೊ ತಾಪ್‍ಲ್ಲೊ. ಆಪ್ಲಿಂ ಯೋಜನಾಂ ಜಯ್ತೆವಂತ್ ಜಾಂವ್ಕ್ ಲಾಗಿಂ ಯೆಂವ್ಚೆ ತಿತ್ಲಿಂಚ್ ಪಯ್ಸ್ ಸರ್ತಾತ್ ಮ್ಹಣ್ ತಾಕಾ ಭೊಗ್ಲೆಂ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel