ಮಂಗ್ಳುರ್ಚ್ಯಾ ಉದ್ಯಮಿಂಕ್ ‘ರಚನಾ’ ತರ್ಫೆನ್ ಎಐ (AI) ತರ್ಬೆತಿ ಕಾರ್ಯಾಗಾರ್
Posted on : April 15, 2026 at 1:14 PM
ಮಂಗ್ಳುರ್: ಸ್ಥಳೀಯ್ ಉದ್ಯಮ್ ಶೆತಾಂತ್ ಡಿಜಿಟಲ್ ತಂತ್ರಜ್ಞಾನ್ ವಾಪಾರ್ಚ್ಯಾ ಇರಾದ್ಯಾನ್, ಕಥೊಲಿಕ್ ಉದ್ಯಮಿ ಆನಿ ವೃತ್ತಿಪರಾಂಚೊ ಸಂಸ್ಥೊ ‘ರಚನಾ’ ತರ್ಫೆನ್ ಮ್ಯಾಂಗಲೋರ್ ಕ್ಲಬ್ಬಾಂತ್ ಎಪ್ರಿಲ್ 14ವೆರ್, ಮಂಗ್ಳಾರಾ ‘ವ್ಯವಹಾರ್ ಆನಿ ಉತ್ಪಾದಕತೆ ಖಾತಿರ್ ಎಐ ಪರಿಕರಾಂ’ ಮ್ಹಳ್ಳ್ಯಾ ವಿಷಯಾಚೆರ್ ಎಕಾ ದಿಸಾಚೆಂ ವೃತ್ತಿಪರ್ ಕಾರ್ಯಾಗಾರ್ ಮಾಂಡುನ್ ಹಾಡ್ಲೆಂ. ಕೃತಕ್ ಬುದ್ವಂತ್ಕಾಯ್ (AI) ವಿಶಿಂ ಆಸ್ಚೆ ಗೊಂದೊಳ್ ನಿವಾರ್ಚ್ಯಾ ಉದ್ದೇಶಾನ್ ಚಲ್ಲ್ಲ್ಯಾ ಹ್ಯಾ ಕಾರ್ಯಾಗಾರಾಂತ್, ಎಐ ಮ್ಹಳ್ಳೆಂ ಮನ್ಶ್ಯಾಚ್ಯಾ ಬುದ್ವಂತ್ಕಾಯೆಕ್ ಬದ್ಲಿ ನ್ಹಯ್, ಬದ್ಲಾಕ್ ತೆಂ ಏಕ್ ‘ಬುದ್ವಂತ್ ಸಹಾಯಕ್’ ಮ್ಹಣ್ ಪ್ರತಿಪಾದನ್ ಕೆಲೆಂ.
ಸಂದೇಶಾಚೊ ನಿರ್ದೇಶಕ್ ಬಾಪ್ ಸುದೀಪ್ ಪೌಲಾನ್ ಮಾಗ್ಣ್ಯಾ ಸವೆಂ ಕಾರ್ಯಕ್ರಮಾಕ್ ಚಾಲನ್ ದಿಲೆಂ. ರಚನಾ ಅಧ್ಯಕ್ಷ್ ರೊಯ್ ಕ್ಯಾಸ್ತೆಲಿನೊನ್ ಯೆವ್ಕಾರ್ ಮಾಗೊನ್, ಆಜ್ ವೆಗಾನ್ ಬದ್ಲೊನ್ ಆಸ್ಚ್ಯಾ ಹ್ಯಾ ಸಂಸಾರಾಂತ್ ತಂತ್ರಜ್ಞಾನ್ ಆಪ್ಣಾಂವ್ಚೆಂ ಭೋವ್ ಗರ್ಜೆಚೆಂ ಮ್ಹಳೆಂ. ಆಮ್ಚ್ಯಾ ಸಾಂದ್ಯಾಂನಿ ಆಜ್ ಫುಡ್ ಜಾಂವ್ಚ್ಯಾ ಸವಾಲಾಂಕ್ ಮಾತ್ರ್ ನ್ಹಯ್, ಫಾಲ್ಯಾಂಚ್ಯಾ ಅವ್ಕಾಸಾಂಕ್ ತಯಾರ್ ಜಾಂವ್ಚೆಂಚ್ ಹ್ಯಾ ತರ್ಬೆತಿಚೊ ಮುಖ್ಯ್ ಉದ್ದೇಶ್. ಹೊ ಆಮ್ಚ್ಯಾ ಸಮುದಾಯಾಚ್ಯಾ ಪ್ರಗತೆಚೊ ಏಕ್ ನವೊ ಅಧ್ಯಾಯ್ ಮ್ಹಣ್ ತಾಣೆಂ ವರ್ಣಿಲೆಂ.
ಆಕ್ಸಿಡೇನ್ ಎನ್ವಿರೋ ಎಲ್ಎಲ್ಪಿಚೊ ನಿರ್ದೇಶಕ್ ಆನಿ ಮುಖ್ಯ್ ತರ್ಬೆತ್ದಾರ್ ಲಿಯೊ ವಿಕ್ಟರ್ ಝಾಲ್ಕಿನ್, ಎಐಚ್ಯಾ ಪ್ರಾಯೋಗಿಕ್ ವಾಪರಾಚೆರ್ ತಾಂತ್ರಿಕ್ ಮಾಹೆತ್ ದಿಲಿ. ಎಐ ವರ್ವಿಂ ಉದ್ಯೋಗ್ ಹೊಗ್ಡಾಂವ್ಚ್ಯಾ ಭಿರಾಂತೆ ವಿಶಿಂ ಉಲ್ಲೇಖ್ ಕರ್ನ್, “ಎಐ ಮನ್ಶ್ಯಾಕ್ ಬದ್ಲಿ ಕರಿನಾ, ಪುಣ್ ಎಐಚೆಂ ಜ್ಞಾನ್ ಆಸ್ಚೊ ಮನಿಸ್ ಹೆಂ ಜ್ಞಾನ್ ನಾತ್ಲೆಲ್ಯಾ ಮನ್ಶ್ಯಾಚೊ ಜಾಗೊ ಭರ್ತಿ ಕರ್ತಲೊ” ಮ್ಹಣ್ ಸ್ಪಷ್ಟೀಕರಣ್ ದಿಲೆಂ. ಚಾಟ್ಜಿಪಿಟಿ ತಸಲ್ಯಾ ಸಾಧನಾಂ ಥಾವ್ನ್ ನಿಖರ್ ಮಾಹೆತ್ ಜೊಡ್ಚ್ಯಾ ‘ಪ್ರಾಂಪ್ಟ್ ಫ್ರೇಮ್ವರ್ಕ್’ (Persona, Task, Context, Examples, Format, and Tone) ವಿಶಿಂ ತಾಣೆಂ ಉದ್ಯಮಿಂಕ್ ವಿವರ್ ದಿಲೊ.
ಡಿಜಿಟಲ್ ಯುಗಾಚ್ಯಾ ನೈತಿಕ್ ಸವಾಲಾಂ ವಿಶಿಂಯೀ ಪ್ರಸ್ತಾಪ್ ಕೆಲ್ಲ್ಯಾ ಝಾಲ್ಕಿನ್, Data Privacy ವಿಶಿಂ ಚತ್ರಾಯ್ ಸಾಂಗ್ಲಿ. ಎಐ ವ್ಯವಸ್ಥಾ ಉಪಯೋಗ್ ಕರ್ಚ್ಯಾ ಮಾಹಿತಿಚೆರ್ ಹೊಂದ್ವೊನ್ ಆಸ್ಚೆ ವರ್ವಿಂ ತೆಂ ದುರುಪಯೋಗ್ ಜಾಂವ್ಚೊ ಅಪಾಯ್ ಆಸಾ; ದೆಕುನ್ ನೈತಿಕತೆಕ್ ವಿಸ್ರೊಂಕ್ ನಜೊ ಮ್ಹಣ್ ತಾಣೆಂ ಸಾಂಗ್ಲೆಂ. ತಶೆಂಚ್, ಪೋಷಕಾಂನಿ ಆಪ್ಲ್ಯಾ ಭುಗ್ರ್ಯಾಂಚ್ಯಾ ಸ್ನ್ಯಾಪ್ಚಾಟ್ ತಸಲ್ಯಾ ಸಾಮಾಜಿಕ್ ಜಾಳಿಜಾಗ್ಯಾಂಚ್ಯಾ ಉಪಯೋಗಾ ವಿಶಿಂಯೀ ಗುಮಾನ್ ದೀಜೆ ಮ್ಹಣ್ ಉಲೊ ದಿಲೊ.
ಕಾರ್ಯಾಗಾರಾಚ್ಯಾ ಪ್ರಾಯೋಗಿಕ್ ಅವ್ಧೆಂತ್, ಭಾಗ್ ಘೆತ್ಲೆಲ್ಯಾಂನಿ ಎಐ ತಂತ್ರಜ್ಞಾನ್ ವಾಪರ್ನ್ ಉದ್ಯಮ್-ವ್ಯವಹಾರಾಚ್ಯಾ ಪ್ರಚಾರಾ ಖಾತಿರ್ ಪೋಸ್ಟರ್, ವೀಡಿಯೊ ಆನಿ ಪದಾಂ ತಯಾರ್ ಕರ್ಚ್ಯಾ ವಿಶಿಂ ಜಾಣ್ವಾಯ್ ಜೊಡ್ಲಿ.
ಶಿಬಿರಾರ್ಥಿಂಕ್ ಆಸಾ ಕೆಲ್ಲ್ಯಾ ಕ್ವಿಜ್ ಸ್ಪರ್ಧ್ಯಾಂತ್ ಸೃಜನಾ ಮಥಾಯಸಾಕ್ ಇನಾಮ್ ಮೆಳ್ಳೆಂ. ‘ಫಾರ್ಚೂನ್ ವೀಲ್’ ಲಕ್ಕಿ ಡ್ರಾಂತ್ ರಮೋಲಾ ಆಗ್ನೆಸ್ ಮೊಂತೇರೊ, ಜೀವನ್ ಸುನಿಲ್ ವೇಗಸ್, ವಿರಾಜ್ ಸಿಕ್ವೇರಾ, ಜೋಯಲ್ ಕ್ರಾಸ್ತಾ ಆನಿ ಆಶಾ ಡಿಸೋಜಾನ್ ಇನಾಮಾಂ ಜಿಕ್ಲಿಂ. ಕಾರ್ಯಾಗಾರಾಂತ್ ಭಾಗ್ ಘೆತ್ಲೆಲ್ಯಾ ಸರ್ವ್ ಅಭ್ಯರ್ಥಿಂಕ್ ಪ್ರಮಾಣಪತ್ರಾಂ ವಾಂಟ್ಲಿಂ.
ತಸ್ವೀರ್ಯೊ: ಸ್ಟ್ಯಾನ್ಲಿ ಬಂಟ್ವಾಳ್, ಬಿಕರ್ನಕಟ್ಟೆ
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
