ಸರ್ದಾರಾಚೆಂ ಸನ್ನಿಧಾನ್ – 11: ಆದೇಶ್ ಆನಿ ಆತುರಾಯ್

ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 11
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 11: ಆದೇಶ್ ಆನಿ ಆತುರಾಯ್

ಮಾನಿನ್ ವೆರೊನಿಕಾ ಕುವೆಲಿಚೆಂ ಮೋರ್ನ್ ಜಾಲ್ಲ್ಯಾ ಥೊಡ್ಯಾಚ್ ದಿಸಾಂ ಉಪ್ರಾಂತ್, ದುಮ್ಗಾ ಪೀಂತ್ ಆನಿ ತಾಚೆ ದೋಗ್ ಸಾಂಗಾತಿ ಬಂಟ್ವಾಳಾಕ್ ಪಾವ್‍ಲ್ಲೆ. ಆಗ್ನೆಸ್ ಕುಂವರ್ನಿನ್ ಆಪವ್ಣೆಂ ದಿಲ್ಲ್ಯಾ ಪ್ರಕಾರ್ ತ್ಯಾ ದಿಸಾಚ್ಯಾ ಸಾಂಜೆರ್, ವೆವೆಗ್ಳ್ಯಾ ವಾಟಾಂನಿ ರಫಾಯೆಲ್ ಮಿಂಗೆಲ್ ಕಾಮ್ತಿಗೆರ್ ತೆ ಪಾವ್‍ಲ್ಲೆ.

ಮಡಿಕೇರಿಕ್ ವಚೊನ್, ಥಂಯ್ಚ್ಯಾ ಥೊಡ್ಯಾ ಹಾತಾಂಚೊ ಆಧಾರ್ ಘೆವ್ನ್, ಬಂಧಿಂತ್ ಆನಿ ಬಂದಡೆಂತ್ ಆಸ್‍ಲ್ಲ್ಯಾ ವಿಂಚ್ಣಾರ್ ಥೊಡ್ಯಾಂಕ್ ಪುಣೀ ಉಸ್ಳಾವ್ನ್ ಹಾಡ್ಚೆಂ ಕಾಮ್ ತಾಣಿಂ ಪರ್ತ್ಯಾನ್ ಆರಂಭ್ ಕೆಲ್ಲೆಂ.

ಆಗ್ನೆಸ್ ಕುಂವರ್ನ್, ಘರಾಚ್ಯಾ ಪಾಟ್ಲ್ಯಾ ಕುಶಿನ್ ಆಸ್ಚ್ಯಾ ಕುಡಾಂತ್ ತಾಂಚೆ ಕಡೆನ್ ಉಲಯ್ತಾಲಿ.

“ಭೋವ್ ಚತ್ರಾಯೆನ್ ಆಸಜಾಯ್ ದುಮ್ಗಾಬಾ” ಮ್ಹಣಾಲಿ ಆಗ್ನೆಸ್ ಕುಂವರ್ನ್. “ಪಯ್ಲೆಂಚ್ ತುಜೆರ್ ತಡೀಪಾರ್ ಫರ್ಮಾಣ್ ಆಸಾ. ತ್ಯಾ ಭಾಯ್ರ್ ಟಿಪ್ಪುಚ್ಯಾ ರಾಜಾ ಭಿತರ್ – ಪಟ್ಟೆರ್ ನಾಂವಾಂ ಆಸ್‍ಲ್ಲ್ಯಾ – ತುಮ್ಕಾಂ ಧರ್ನ್ ದಿಲ್ಲ್ಯಾಂಕ್ ಸರ್ಕಾರಾನ್ ಇನಾಮ್ ಭಾಸಾಯಿಲ್ಲೆಂಯೀ ಆಸಾ ಮ್ಹಣ್ ಆಯ್ಕಲಾಂ ಹಾಂವೆಂ.”

“ಆಮ್ಚಿಂ ನಾಂವಾಂ ಪಟ್ಟೆರ್ ಆಸಾತ್ ಬಾಯೆ” ಮ್ಹಣಾಲೊ ದುಮ್ಗಾ ಪೀಂತ್. “ಪುಣ್ ಆಮ್ಚಿಂ ನಾಂವಾಂ ದಿಲ್ಲೆ ಗ್ರಾಯ್ಕ್ ಚಡಾವತ್ ಖಾಲಿ ಜಾಲ್ಯಾತ್. ತ್ಯಾ ಶಿವಾಯ್ ಆಮ್ಕಾಂ ಕೊಣೆಂಯೀ ವಳ್ಕಜಾಯ್ ನಹಿಂ?”

“ಜಾಲ್ಯಾರ್‌ಯೀ…”

“ಜಾಲ್ಯಾರ್‌ಯೀ ಚತ್ರಾಯ್ ಆಮಿ ಕರ್ತೆಲ್ಯಾಂವ್ – ತಶೆಂ ಕರಿಜಾಯ್ ಮ್ಹಣ್ ಆಮ್ಚ್ಯಾ ಸರ್ದಾರ್ ಸಿಮಾಂವ್ನ್ ಆಮ್ಕಾಂ ತಾಕಿದ್ ದಿಲ್ಯಾ.”

ತೆಂ ನಾಂವ್ ಆಯ್ಕೊನ್ ಆಗ್ನೆಸ್ ಕುಂವರ್ನಿಚಿಂ ಚಿಂತ್ನಾಂ ದುಸ್ರ್ಯಾಚ್ ವಾಟೆನ್ ಘುಂವ್ಲಿಂ. ಮಂಗ್ಳುರಾಂತ್ಲಿ ಖಬರ್ ತಿಣೆಂ ಸಗ್ಳಿ ಲಿಖುನ್ ತಾಕಾ ಧಾಡ್ಲ್ಯಾ ಆನಿ ಆಪುಣ್ ಫುಡ್ಲ್ಯಾ ಖಬ್ರೆಕ್ ರಾಕ್ತಾಂ ಮ್ಹಣಾಲಿ ತಿ.

ಅಶೆಂ ಆನಿ ತಶೆಂ ಥೊಡೊ ವೇಳ್ ತಿಂ ಉಲಯ್ಲಿಂ.

ದುಮ್ಗಾ ಪಿಂತಾನ್, ಸರ್ದಾರ್ ಸಿಮಾಂವ್ ತಾಂಕಾಂ ಕಾವೂರ್ಚ್ಯಾ ಫಾಲ್ಕ್ಯಾಂತ್ ಭೆಟ್‍ಲ್ಲಿ ರೀತ್, ಆನಿ ಉಪ್ರಾಂತ್ ತಾಣೆಂ ಕೆಲ್ಲಿಂ ಕಾರ್ಬಾರಾಂ ಸಾಂಗ್ತಾನಾ, ಬಂಟ್ವಾಳಾಂತ್ ಆನಿ ಬೆಳ್ತಂಗಡಿಂತ್ ತಾಚೆ ವರ್ವಿಂ ಘಡ್‍ಲ್ಲ್ಯೊ ಗಜಾಲಿ ಆಗ್ನೆಸ್ ಕುಂವರ್ನಿನ್ ಆನಿ ತಿಚ್ಯಾ ಬಾಪಾಯ್ನ್ ಹಾಂಕಾಂ ಸಾಂಗ್ಲ್ಯೊ.

ಸಾಂಜ್ ಜಾವ್ನ್ ಭಾಯ್ಲ್ಯಾನ್ ಕಾಳೊಕ್ ಚರ್‌ಲ್ಲೊ.

“ಆನಿ ಚಡ್ ವೇಳ್ ಕಾಡಿನಾಕಾತ್ ಪುತಾ” ಮ್ಹಣಾಲೊ ಕಾಮತ್. “ಸೈರ್‍ಯಾಂಕ್ ವಾಡ್ಚಿ ಮಾಂಡಾವಳ್ ಕರಾ. ಉಪ್ರಾಂತ್ ತೆ ವಿಶೆವ್ ಘೆಂವ್ದಿತ್. ದುಸ್ರೆಂ ಕಾಂಯ್ ಉಲಂವ್ಚೆಂ ಆಸ್ಲ್ಯಾರ್ ಫಾಲ್ಯಾಂ ಉಲಯೆತ್.”

“ಫಾಲ್ಯಾಂ ಮಾತ್ರ್ ಆಮಿ ಫಾಂತ್ಯಾರ್‌ಚ್ ಭಾಯ್ರ್ ಸರ್ತಾಂವ್” ಮ್ಹಣಾಲೊ ದುಮ್ಗಾ ಪೀಂತ್. “ಶಿಣ್ ಕರಿನಾಯೆ. ಜಾಂವ್ಚಿಂ ಕಾಮಾಂ ಪಾಟಿಂ ಘಾಲುಂಕ್ ಜಾಯ್ನಾಂತ್.”

“ತುಮ್ಚಿ ಖುಶಿ!”

ತಿತ್ಲ್ಯಾರ್, ಚಿಕ್ಕೆ ಪಯ್ಸ್ ಪೆಟೆ ಘೊಂಕ್ಲೆ. ಆನಿ – ಪಯ್ಸ್ ಥಾವ್ನ್ ಘೊಡೊ ಹಳ್ತಾನ್ ಧಾಂವೊನ್ ಯೆಂವ್ಚೊ ಆವಾಜ್ ಆಯ್ಕಲೊ. ರಾಂದ್ಪಾಚ್ಯಾ ಕುಡಾಕ್ ಗೆಲ್ಲಿ ಆಗ್ನೆಸ್ ಕುಂವರ್ನ್ ಚಿಕ್ಕೆ ಆಕಾಂತೊನ್ ಹಾಂಚೆ ಸರ್ಶಿನ್ ತುರ್ತಾನ್ ಆಯ್ಲಿ.

“ಕೋಣ್ ಜಾವ್ಯೆತ್ ಆನಾ?”

“ಹಾಂವ್‍ಂಯೀ ಚಿಂತಾಂ ತೆಂಚ್. ಕೊಣೀ ಜಾಂವ್ದಿತ್, ಪುಣ್ ಘಳಾಯ್ ಕರ್ಚಿ ನಾಕಾ, ವಾ ನಶಿಬ್ ಪಾರ್ಕುಂಕ್ ಆಮಿ ರಾಕ್ಚೆಂ ನಾಕಾ” ಮ್ಹಣಾಲೊ ಕಾಮತ್. “ಸೈರ್‍ಯಾಂಕ್ ಬಾಬಿ ಸಾಂಗಾತಾ, ವಯ್ರ್, ಪಾಟ್ಲ್ಯಾ ರಾನಾಕ್ ಧಾಡ್. ಆಮಿ ಆಪಯ್ತಾಂ ಮ್ಹಣಸರ್ ಬಾಬಿಯೀ ಥಂಯ್ ರಾವೊಂದಿ.”

ತ್ಯಾ ಬಂಟ್ವಾಳಾಂತ್ಲ್ಯಾ ಮ್ಹಾಲ್ ಘರಾಣ್ಯಾಚೆರ್, ಬಂದಡ್ ಚಾಲು ಜಾಂವ್ಚ್ಯಾ ಚಿಕ್ಕೆ ಆದಿಂ ಥಾವ್ನ್ಂಚ್ ಯೇಂವ್ಕ್ ಲಾಗ್‍ಲ್ಲ್ಯಾ ಅನ್ವಾರಾಂ ವರ್ವಿಂ, ತ್ಯಾ ತ್ಯಾ ವೆಳಾರ್ ಫಾವೊ ತಿ ಬಂದೋಬಸ್ತ್ ಆನಿ ಚತ್ರಾಯ್ ಘೆಂವ್ಚೆಂ ಕಾಮ್ ಸ್ವಯಂಪ್ರೇರಿತ್ ಜಾವ್ನ್ ಚಲೊನ್ ಆಯಿಲ್ಲೆಂ. ಮುಖ್ಲ್ಯಾನ್ ಕೊಣೀ ದುಸ್ಮಾನ್ ಆಯ್ಲ್ಯಾರ್, ಪಾಟ್ಲ್ಯಾ ಬಾಗ್ಲಾಂತ್ಲ್ಯಾನ್ ನಿಸ್ರೊನ್, ನ್ಹಂಯ್ ದೆಗೆಚ್ಯಾ ರಾನಾಂತ್ ಸುರಕ್ಷಿತ್ ರಾವೊಂಕ್ ಸಾಧ್ಯ್ ಆಸ್‍ಲ್ಲೆಂ.

“ಚಡ್ ಪಯ್ಸ್ ಆಮಿ ವಚನಾಂವ್. ಗರ್ಜ್ ಪಡ್ಲ್ಯಾರ್ ತುಮ್ಚೆ ಖಾತಿರ್ ಝುಜೊನ್ ಮೊರೊಂಕ್ ಜಾಲ್ಯಾರೀ ಆಮಿ ತಯಾರ್” ಮ್ಹಣಾಲೊ ಇಲಾರ್ ಸಿಕೇರ್.

“ತಿತ್ಲಿ ಗರ್ಜ್ ಪಡಶಿ ನಾ. ಜಾಲ್ಯಾರೀ ಚತ್ರಾಯ್ ಕರ್ಚಿ ಬರಿ. ಘಳಾಯ್ ಕರಿನಾಕಾತ್” ಮ್ಹಣಾಲಿ ಆಗ್ನೆಸ್ ಕುಂವರ್ನ್. ನಾ ಖುಶೆನ್ ತರೀ, ದುಮ್ಗಾ ಪೀಂತ್ ಆನಿ ಸಾಂಗಾತಿ, ಪಾಟ್ಲ್ಯಾ ಬಾಗ್ಲಾಂತ್ಲ್ಯಾನ್ ಪಾಶಾರ್ ಜಾಲೆ.

ಘೊಡ್ಯಾಚ್ಯಾ ಗೆಳಾಂಚೊ ಆವಾಜ್ ಲಾಗಿಂ ಆಯ್ಲೊ.

ಘರಾಂತ್ಲ್ಯೊ ಸ್ತ್ರೀಯೊ ಭಿತರ್ ರಾವ್ಲ್ಯೊ. ಮಾನೆಸ್ತ್ ರಫಾಯೆಲ್ ಮಿಂಗೆಲ್ ಕಾಮತ್ ಮಾತ್ರ್, ಸೊಪ್ಯಾರ್ ಉಮ್ಕಳೊನ್ ಜಳ್ಚ್ಯಾ ದಿವ್ಯಾ ಪಂದಾಕ್, ಹಾತಾಂತ್ ಕೋಂತ್ ಘೆವ್ನ್ ಬಸೊನ್ ರಾವ್ಲೊ – ಚಾಕೊರ್ ಆನಿ ಹೆರ್ ಕಾಮಾಗಾರ್, ತೆಣೆಂ ತೆಣೆಂ ತಾಂತಾಂಚ್ಯಾ ಕಾಮಾಚ್ಯಾ ಜಾಗ್ಯಾರ್, ಕಾಳೊಕಾಂತ್ ಪುಣ್ ಚತ್ರಾಯೆನ್ ರಾವ್ಲೆ.

ಘೊಡ್ಯಾ ಸವಾರ್ ಎಕ್ಲೊಚ್ ಆಸ್‍ಲ್ಲೊ.

“ಕೋಣ್ ಘರಾ? ಕಾಮ್ತಿನೊಂ…” ಮ್ಹಣಾಲೊ ತೊ, ಆನಿ ಆಂಗ್ಣಾಂತ್ ಯೇವ್ನ್ ಘೊಡ್ಯಾರ್ ಥಾವ್ನ್ ದೆಂವ್ಲೊ.

“ಕೋಣ್, ದೇಜಪ್ಪ ಶೆಟ್ಟಿವೇ?” ಮ್ಹಣಾಲೊ ಕಾಮತ್, ಆಯಿಲ್ಲ್ಯಾ ಗ್ರಾಯ್ಕಾಚೊ ತಾಳೊ ಆಯ್ಕೊನ್. ವಳಕ್ ಮೆಳೊನ್ ತಾಕಾಯೀ ಸಂತೊಸ್ ಜಾಲ್ಲೆಪರಿಂಚ್ ಉಟೊನ್ ತೊ ಮುಖಾರ್ ಆಯ್ಲೊ. ಹೆರ್ ಮಾನಾಯಾಂಕ್‍ಯೀ ಉಸ್ವಾಸ್ ಸುಟ್ಲೊ.

“ನಮಸ್ಕಾರ್ ಕಾಮ್ತಿನೊಂ” ಮ್ಹಣೊನ್ ಹಾಸತ್ತ್ ಮೆಟಾಂ ಚಡೊನ್ ದೇಜಪ್ಪ ಶೆಟ್ಟಿ ವಯ್ರ್ ಆಯ್ಲೊ.

“ನಮಸ್ಕಾರ್, ನಮಸ್ಕಾರ್. ಯೆಯಾ” ಮ್ಹಣಾಲೊ ಕಾಮತ್ ತಾಕಾ ಸ್ವಾಗತ್ ದೀವ್ನ್. “ಕಿತೆಂ, ಕಾಳೊಕ್ ಜಾಲೊ?”

“ಕಾಳೊಕ್ ಜಾಲ್ಯಾ ಉಪ್ರಾಂತ್‍ಚ್ ಯೇಜಾಯ್ ಪಡ್ಲೆಂ… ಹೆಂ, ಆಗ್ನೆಸ್ ಬಾಯ್ ನಾಂವೇ?” ವಿಚಾರ್ಲೆಂ ತಾಣೆಂ ಸ್ವರ್ ದೆಂವವ್ನ್.

“ಆಸಾ, ಖಂಯ್ ಭಿತರ್ ಕಾಮಾರ್ ಆಸಾ ಮ್ಹಣ್ ದಿಸ್ತಾ. ಹ್ಯಾ, ಬಾಯೇ…” ಬಾಪಾಯ್ನ್ ಉಲೊ ದಿಲೊ. “ಅಳೆ, ಚಿಕ್ಕೆ ಭಾಯ್ರ್ ಯೇ. ಕೋಣ್ ಆಯ್ಲ್ಯಾತ್ ಪಳೆ.”

“ಕೋಣ್ ಆನಾ?” ಆಗ್ನೆಸ್ ಕುಂವರ್ನ್ ಭಾಯ್ರ್ ಆಯ್ಲಿ. “ಓಹೋ, ದೇಜಪ್ಪಣ್ಣಾಂಗೀ? ಕೊತ್ವಾಲಾಕ್ ತಿಣೆಂ ‘ನಮಸ್ಕಾರ’ ದೀವ್ನ್, ಬಾಪಾಯ್ಚ್ಯಾ ಬಗ್ಲೆನ್ ತಿ ಉಬಿ ರಾವ್ಲಿ.

ರಫಾಯೆಲ್ ಮಿಂಗೆಲ್ ಕಾಮ್ತಿನ್ ಪಾನ್‍ಪೊಡಿಚೆಂ ಹರ್ವಾಣ್ ಮುಖಾರ್ ದವರ್ಲೆಂ. “ಏಕ್ ಬೊಂಡೊ ಪುಣೀ…”

“ನಾಕಾ, ಕಾಂಯ್ ನಾಕಾ. ಮ್ಹಾಕಾ ರಾವೊಂಕ್ ವೇಳ್ ನಾ” ಮ್ಹಣಾಲೊ ದೇಜಪ್ಪ ಶೆಟ್ಟಿ.

“ತರ್…”

“ತರ್, ವಿಶೇಸ್ ಕಾಂಯ್ ನಾ” ಮ್ಹಣಾಲೊ ಶೆಟ್ಟಿ. ಆಪ್ಲ್ಯಾ ಸಮವಸ್ತ್ರಾಚ್ಯಾ ಖೊಮ್ಸಾ ಭಿತರ್ ಹಾತ್ ಘಾಲ್ನ್ ಏಕ್ ಪಿಸ್ವಿ ತಾಣೆಂ ಭಾಯ್ರ್ ಕಾಡ್ಲಿ. “ಆಗ್ನೆಸ್ ಬಾಯೆಕ್ ಏಕ್ ವಸ್ತ್ ಪಾವಿತ್ ಕರುಂಕ್ ಆಸ್‍ಲ್ಲಿ.”

“ಖಂಯ್, ಕೊಣಾ ಥಾವ್ನ್?”

“ನಾಂವಾಂ ಕಾಡ್ಚಿ ಗರ್ಜ್ ನಾ. ಪಳೆತಚ್ ತುಮ್ಕಾಂ ಸಮ್ಜತೆಲೆಂ” ಮ್ಹಣೊನ್ ಠಾಣ್ಯಾವಾಲ್ಯಾನ್, ಸರ್ದಾರ್ ಸಿಮಾಂವ್ಚಿ ಫಿಚಾರ್ ವರ್ದಿ ಮುಖಾರ್ ಧರ್ಲಿ. ಬಾಪಾಯ್ನ್ ತಿ ಘೆವ್ನ್ ಧುವೆಚ್ಯಾ ಹಾತಾಂತ್ ದಿಲಿ.

ಆಗ್ನೆಸ್ ಕುಂವರ್ನಿನ್ ತಿ ರಶೀಮಾಚಿ ಪಿಸ್ವಿ ಹಾತಾಂತ್ ಧರ್ನ್ ವಯ್ರ್ ಪಂದಾಕ್ ಪರ್ತಿಲಿ. ಖಂಯ್ ವಾ ಕೊಣಾ ಥಾವ್ನ್ ಮ್ಹಳ್ಳೆಂ ಭಾಯ್ಲ್ಯಾನ್ ಕಾಂಯ್ ಬರಂವ್ಕ್ ನಾತ್‍ಲ್ಲೆಂ.

“ತ್ಯಾ ವರ್ದೆಂತ್ ಸಾಂಗ್‍ಲ್ಲೆಂ ಚತ್ರಾಯೆನ್ ಪುಣ್ ತುರ್ತಾನ್ ಜಾರಿ ಕರಿಜಾಯ್ ಮ್ಹಣ್ ಸಾಂಗ್ಲಾಂ ಖಂಯ್…” ಮ್ಹಣಾಲೊ ದೇಜಪ್ಪ ಶೆಟ್ಟಿ.

“ಪಳೆ ಪುತಾ, ವಾಚ್” ಬಾಪಾಯ್ನ್ ಆತುರಾಯ್ ಉಚಾರ್ಲಿ. “ಕಾಂಯ್ ಚಡಿತ್ ಅನ್ವಾರ್ ನಾ ಜಾಲ್ಯಾರ್ ಪುರೊ – ಆಮ್ಚ್ಯಾ ಮಿನಿನ್ ಜೆಜು!”

ಆಗ್ನೆಸ್ ಕುಂವರ್ನಿನ್, ಥಂಯ್ಚ್ ಜನೆಲಾರ್ ಆಸ್‍ಲ್ಲಿ ಕಾತರ್ ಹೆವ್ಶಿನ್ ಕಾಡ್ನ್, ಪಿಸ್ವಿ ಉಗ್ತಿ ಕರ್ನ್ ಭಿತರ್ ಆಸ್‍ಲ್ಲ್ಯಾ ಪತ್ರಾಚಿ ಕೊವ್ಳಿ ಸೊಡಯ್ಲಿ. ಕೊಣಾ ಥಾವ್ನ್ ತೆಂ ಪತ್ರ್ ಆಯ್ಲಾಂ ಮ್ಹಳ್ಳೊ ದುಬಾವ್ ತಿಕಾ ಪಯ್ಲೊಚ್ ಮಾರ್‌ಲ್ಲೊ. ಪುಣ್ ಆತಾಂ ತ್ಯಾ ಪತ್ರಾಚ್ಯಾ ಆಖೇರಿಕ್ ಆಸ್‍ಲ್ಲೆಂ ನಾಂವ್ ವಾಚ್ತಚ್, ನವ್ಯಾನ್ ತಿಚ್ಯಾ ಕುಡಿಂತ್ ಉಲ್ಲಾಸ್ ಚರ್ಲೊ. ದಿವ್ಯಾಚ್ಯಾ ಪಂದಾಕ್ ರಾವೊನ್ ತಿಣೆಂ ತೆಂ ಪತ್ರ್, ಪಯ್ಲೆ ಪಾವ್ಟಿಂ ಅಮ್ಸೊರಾನ್ ಆನಿ ದುಸ್ರೆ ಪಾವ್ಟಿಂ ಸವ್ಕಾಸ್ ವಾಚ್ಲೆಂ. ಉಪ್ರಾಂತ್ ಏಕ್ ಲಾಂಬ್ ಶ್ವಾಸ್ ಸೊಡ್ಲೊ.

“ಕೊಣಾಚೆಂ ಪುತಾ?”

“ಸರ್ದಾರಾಚೆಂ…” ಮ್ಹಣಾಲಿ ತಿ ಹಾಳ್ವಾಯೆನ್.

“ಕಾಂಯ್ ವಿಶೇಸ್…”

“ನಾ. ಹಾಂಗಾಚಿ ಖಬರ್ ತಾಕಾ ಪಾವ್ಲಿ. ಪಾಟ್ಲ್ಯಾ ದಿಸಾಂನಿ ಕೊಡಿಯಾಳ್‍ಬೈಲಾಂತ್ ಜಾಲ್ಲ್ಯಾ ಮೊರ್ನಾಚಿ ಖಬರ್ ಆಯ್ಕೊನ್ ತಾಕಾ ಖಂತ್ ಭೊಗ್ಲಿ. ತುಂ ಬರ್‍ಯಾ ಥರಾನ್ ತಲ್ಚೇರ್ ಥಾವ್ನ್ ಪಾಟಿಂ ಯೇವ್ನ್ ಪಾವ್‍ಲ್ಲ್ಯಾ ಖಾತಿರ್ ಸಂತೊಸ್ ತಾಣೆಂ ಉಚಾರ್ಲಾ…” ಮ್ಹಣಾಲಿ ತಿ, ಮುಖ್ಯ್ ಗಜಾಲಿ ಲಿಪವ್ನ್.

“ಬರ್‍ಯಾ ಥರಾನ್ ಕಿತೆಂ…” ಮ್ಹಣಾಲೊ ರಫಾಯೆಲ್ ಮಿಂಗೆಲ್ ಕಾಮತ್ ಪಾಟ್ಲೊ ಉಗ್ಡಾಸ್ ಕಾಡ್ನ್ ಉಪ್ಕಾರಿ ಮನಾನ್. “ತಾಚಿ ದಯಾ ನಹಿಂ ಜಾಲ್ಲಿ ಜಾಲ್ಯಾರ್, ಹಿಂ ಮ್ಹಜಿಂ ಹಾಡಾಂ ಕುಂಬು ಜಾತಿಂ ಆನಿ ಹೆಂ ಆಮ್ಚೆಂ ಘರಾಣೆಂ ಧುಳ್ ಜಾತೆಂ!”

“ಹೆಂ – ಹಿ ಖಬರ್ ತುಜ್ಯಾ ಹಾತಾಂತ್ ಕೆದಾಳಾ ಯೇವ್ನ್ ಮೆಳ್ಳಿ ದೇಜಪ್ಪಣ್ಣಾ?” ಆಗ್ನೆಸ್ ಕುಂವರ್ನಿನ್ ವಿಚಾರ್ಲೆಂ.

“ಆಜ್‍ಚ್ ಸಾಂಜೆರ್ ದೀಸ್ ಬುಡ್ಚ್ಯಾ ಆದಿಂ.”

“ಆನಿ ತೆ ಸವಾರ್ ಆಜ್ ರಾವೊಂಕ್ ನಾಂತ್?”

“ನಾ. ಆಜ್ ವಚೊನ್ ತೆ ಫಿಂರ್ಗಿಪೆಟ್ ಛತ್ರಾಂತ್ ವಿಶೆವ್ ಘೆವ್ನ್ ಫಾಲ್ಯಾಂ ಬೋಳೂರಾಕ್ ವೆತೆಲೆ.”

“ಆನಿ ಪಾಟಿಂ?”

“ಫಾಲ್ಯಾಂಚೊ ಏಕ್ ದೀಸ್ ಥಂಯ್ಸರ್ ರಾವೊನ್ ಪೊರ್ವಾಂ ಫಾಂತ್ಯಾರ್ ತಾಣಿಂ ಭಾಯ್ರ್ ಸರ್ತಾಂ ಮ್ಹಳಾಂ” ಮ್ಹಣಾಲೊ ಶೆಟ್ಟಿ. ತೊ ಆದಿಂ ಥಾವ್ನ್‌ಯೀ ಸರ್ದಾರ್ ಸಿಮಾಂವ್ಚೊ ವಿಶ್ವಾಸಿ ಮಿತ್ರ್ ಆನಿ ಹ್ಯಾ ಘರಾಣ್ಯಾಚೊ ಪಾತ್ಯೆಣೆಚೊ ಈಷ್ಟ್ ಜಾವ್ನಾಸ್‍ಲ್ಲೊ. ಭಾಯ್ಲ್ಯಾ ದೆಖಿಕ್ ಆಗ್ನೆಸ್ ಕುಂವರ್ನ್ ಏಕ್ ಕೋಮಲ್ ಯುವತಿ ವ್ಹಯ್ ತರೀ ಆತಾಂ ತಿಣೆಂ ಸವಾಲಾಂ ವಿಚಾರ್ಚ್ಯಾ ಸ್ವರಾಂತ್ ವೀರ್ಪಣಾಚಿ ಆನಿ ನೀಜ್ ಎಕಾ ಝುಜಾರ್‍ಯಾಚಿ ಆತುರಾಯ್ ಆನಿ ಕಠಿಣಾಯ್ ಆಸ್‍ಲ್ಲಿ ಮ್ಹಣ್ ತೊ ಸಮ್ಜಾಲೊ.

“ತೆ ಪಾಟಿಂ ಯೆತಾನಾ ಹೆಣೆಂಚ್ ಯೆತೆಲೆಮೂ?”

“ವ್ಹಯ್. ಪುಣ್ ಹಾಂಗಾ ಥಾವ್ನ್ ತೆ ದುಸ್ರಿ ವಾಟ್ ಧರ್ತೆಲೆ. ಯೆತಾನಾ ಜಮಲಾಬಾದ್‍ಚ್ಯಾ ವಾಟೆನ್ ತೆ ಆಯಿಲ್ಲೆ; ಪಾಟಿಂ ವೆತಾನಾ ಮಂಜರಾಬಾದ್‍ಚ್ಯಾ ವಾಟೆನ್ ತೆ ವೆತೆಲೆ ಖಂಯ್. ಇತ್ಲೆಂ ತ್ಯಾ ಸವಾರಾನ್ ಮ್ಹಾಕಾ ಲೋವ್ ಸಾಂಗ್ಲೆಂ. ಆನಿ ಹಾಂವೆಂ ಕರ್ಚೆಂ ಕಸಲೆಂಯೀ ಕಾಮ್ ಆಸ್ಲ್ಯಾರ್ ತುಮಿ ತೆಂ ವಿಚಾರುಂಕ್ ಭಿಯೆಂವ್ಚಿ ಗರ್ಜ್ ನಾ.”

“ತೆಂ ಆಮಿ ಜಾಣಾಂವ್ ದೇಜಪ್ಪಣ್ಣಾ” ಮ್ಹಣಾಲೊ ಕಾಮತ್.

“ಹಾಂವ್ – ಹಾಂವ್ ಹಾಂಗಾಸರ್ ನಾತ್‍ಲ್ಲ್ಯಾ ವೆಳಾರ್‌ಯೀ ತುವೆಂ ಮಸ್ತ್ ಉಪ್ಕಾರ್ ಕೆಲಾ. ತುಕಾ ದೇವ್ ಬರೆಂ ಕರುಂ.”

“ತಾಂತುಂ ಕಿತೆಂ ಕಾಮ್ತಿನೊ?” ಮ್ಹಣಾಲೊ ತೊ ಬೊಣ್ಕೊ. “ಆಸ್ತ್ ಬದಿಕ್ ಕೊಣಾಕ್ ಜಾಯ್? ಆಮ್ಕಾಂ ಜಾಯ್ ಏಕ್ ಬರೆಂ ಉತಾರ್ ಆನಿ ಬರೆಂ ಸೆಜ್‍ಸಾಂಬಾರ್!”

“ಸಕ್ಡಾಂನಿ ತುಜೆಪರಿಂಚ್ ಚಿಂತ್‍ಲ್ಲೆಂ ಜಾಲ್ಯಾರ್ ಆಮ್ಚ್ಯಾ ಹ್ಯಾ ನಾಡಾಚಿ ಗತ್ ಅಶಿ ಜಾತಿ ನಾ.”

“ಬರೆಂ ತರ್, ಹಾಂವ್ ವಚೊನ್ ಯೆತಾಂ” ಮ್ಹಣೊನ್ ಏಕ್ ಪಾನ್‍ಪೊಡ್ ಚಾಬೊನ್, ದೇಜಪ್ಪ ಶೆಟ್ಟಿ ಭಾಯ್ರ್ ಸರೊನ್ ಗೆಲೊ.

ತೊ ಗೆಲ್ಲ್ಯಾ ಥೊಡ್ಯಾ ವೆಳಾನ್ ದುಮ್ಗಾ ಪೀಂತ್ ಆನಿ ತಾಚೆ ಸಾಂಗಾತಿ ಪರ್ತ್ಯಾನ್ ಘರಾ ಆಯ್ಲೆ. ದೇಜಪ್ಪ ಶೆಟ್ಟಿ ಕಿತ್ಲ್ಯಾ ಪಾತ್ಯೆಣೆಚೊ ಈಷ್ಟ್ ಜಾಲ್ಯಾರೀ, ಹೆ ಆಸ್‍ಲ್ಲಿ ಖಬರ್ ತಾಕಾ ಕಳಿತ್ ನಾತ್‍ಲ್ಲಿ. ಗರ್ಜೆ ಶಿವಾಯ್ ಘುಟ್ ಭಾಯ್ರ್ ಘಾಲ್ಚ್ಯಾಂತ್ ಬುದ್ವಂತ್‍ಕಾಯ್ ನಾ ಮ್ಹಳ್ಳೆಂ ಸೂತ್ರ್ ತ್ಯಾ ಘರಾಣ್ಯಾಕ್ ಬರೆಂ ಕಳಿತ್ ಆಸ್‍ಲ್ಲೆಂ.

“ದುಮ್ಗಾಬಾ, ತುಮ್ಕಾಂ ಬರ್‍ಯಾ ವೆಳಾರ್ ದೆವಾನ್ ಹಾಂಗಾ ಹಾಡಯ್ಲ್ಯಾತ್. ತುಮ್ಕಾಂ ಫಾಲ್ಯಾಂ ಹಾಂಗಾ ಥಾವ್ನ್ ವಚೊಂಕ್ ಜಾಯ್ನಾ… ದುಸ್ರೆಂಚ್ ಏಕ್ ಕಾಮ್ ಆಸಾ” ಮ್ಹಣಾಲಿ ಆಗ್ನೆಸ್ ಕುಂವರ್ನ್.

“ವ್ಹಯ್ಗೀ ಬಾಯೆ? ಕೊಣಾಚೆಂ?”

“ಸರ್ದಾರಾಚೆಂಚ್!”

“ಸರ್ದಾರಾಚೆಂಚ್!” ತ್ಯಾ ಮಾನಾಯಾಚೆಂ ಆನಿ ತಾಚ್ಯಾ ಧಯ್ರಾಧಿಕ್ ಸಾಂಗಾತ್ಯಾಂಚೆಂ ಹರ್ದೆಂ ಫುಲ್ಲೆಂ!

“ಕಸಲೆಂ ಕಾಮ್ ಪುತಾ?” ವಿಚಾರಿಲಾಗ್ಲೊ ಕಾಮತ್ ಚಿಕ್ಕೆ ಕಾವ್ಜೆವ್ನ್. “ಗರ್ಜೆ ಶಿವಾಯ್ ಅಪಾಯ್ ಪುಣೀ…”

“ತೆಂ ಸಕ್ಕಡ್ ಉಪ್ರಾಂತ್ ಸಾಂಗ್ತಾಂ ಆನಾ” ಹಾಸ್ಲಿ ಆಗ್ನೆಸ್ ಕುಂವರ್ನ್, ಬಾಪಾಯ್ಚಿ ಕಾವ್ಜೆಣಿ ನಿವಾರ್ಚ್ಯಾ ಇರಾದ್ಯಾನ್. “ಆತಾಂ ಆಮಿ ಜಿಯೆಂವ್ಚ್ಯಾ ಪ್ರಾಸ್, ವಾ, ಎದೊಳ್ ಜಿಯೆಲ್ಲ್ಯಾ ಪ್ರಾಸ್ ಚಡಿತ್ ಅಪಾಯ್ ಕಸಲೊ ಆಸ್ಯೆತ್?”

“ತೆಂಯೀ ವ್ಹಯ್.”

“ಆತಾಂ ಆಮಿ ಪಯ್ಲೆಂ ಇಲ್ಲೆಂ ಪೊಟಾಕ್ ಘಾಲ್ಯಾಂ. ಉಪ್ರಾಂತ್ ತುಮ್ಕಾಂ ಸಾಂಗ್ತಾಂ” ಮ್ಹಣೊನ್ ಆಗ್ನೆಸ್ ಕುಂವರ್ನ್ ಉಟ್ಲಿ.

ಜೆವಣ್ ಜಾವ್ನ್, ಮಾನೆಸ್ತ್ ರಫಾಯೆಲ್ ಮಿಂಗೆಲ್ ಕಾಮತ್ ಆನಿ ದಾದ್ಲೆ ಮನಿಸ್ ಯೇವ್ನ್ ಸಾಲಾಂತ್ ಬಸ್ಲೆ. ಥೊಡ್ಯಾ ವೆಳಾನ್ ಆಗ್ನೆಸ್ ಕುಂವರ್ನ್ ಆನಿ ತಿಚಿ ಸಾಂಗಾತಿಣ್ ಡೊನಾ ಮರಿಯಾ ದೆ ಲೂತೆಲಿಮ್‍ಯೀ ಆಯ್ಲಿಂ. ಭಾಯ್ಲ್ಯಾನ್ ಗರ್ಜೆಚೊ ಪಹರೊ ಕರುಂಕ್ ಥೊಡ್ಯಾಂಕ್ ಸೊಡ್ಲ್ಯಾರ್, ಹೆರ್ ಮಾನಾಯಾಂನಿ ವಿಶೆವ್ ಘೆಂವ್ಕ್ ವಚ್ಯೆತ್ ಮ್ಹಣ್ ಧನ್ಯಾನ್ ತಾಕಿದ್ ದಿಲಿ.

ಆಗ್ನೆಸ್ ಕುಂವರ್ನಿನ್ ಸರ್ದಾರ್ ಸಿಮಾಂವ್ಚಿ ವರ್ದಿ ಸವ್ಕಾಸ್ ವಾಚುನ್ ಸಾಂಗ್ಲಿ. ತಾಂತ್ಲೆ ಮುಖ್ಯ ವಿಷಯ್ ಹೆ ಜಾವ್ನಾಸ್‍ಲ್ಲೆ:

ಆಯ್ಲೆವಾರ್ಚ್ಯಾ ಘಟನಾಂ ವರ್ವಿಂ ಟಿಪ್ಪು ಸುಲ್ತಾನ್ ಚಡ್ ಉಚಾಂಬಳ್ ಜಾಲಾ, ಆನಿ ರಾವ್ಳೆರಾ ಭಿತರ್ ಜಾಂವ್, ಕೊಣಾಯ್ಚೆರ್‌ಚ್ ಸಂಪೂರ್ಣ್ ವಿಶ್ವಾಸ್ ದವರುಂಕ್ ತೊ ಸಕನಾ ಜಾಲಾ…

ಸದ್ದ್ಯಾಕ್ ಲ್ಹಾನ್ ವ್ಹಡ್ ಲಡಾಯೊ ಕರುಂಕ್ ತಾಣೆಂ ಚಿಂತ್ಲಾಂ ಜಾಲ್ಲ್ಯಾನ್ ಥೊಡೊ ಕಾಳ್ ಪುಣೀ – ಕಿತ್ಲೊ ಮ್ಹಣ್ ಸಾಂಗೊಂಕ್ ಸಾಧ್ಯ್ ನಾ – ಸರ್ದಾರ್ ಸಿಮಾಂವ್ಕ್ ಸಿರಿರಂಗಪಟ್ಟಣಾಂತ್ ಟಿಪ್ಪು ಸುಲ್ತಾನಾಚೊ ಸಾಂಗಾತ್ ಸೊಡುನ್ ಮಂಗ್ಳುರಾಕ್ ಯೇಂವ್ಕ್ ಅಸಾಧ್ಯ್ ಜಾಂವ್ಚೆಪರಿಂ ಟಿಪ್ಪುನ್ ತಾಕಿದ್ ದಿಲ್ಯಾ…

ದೆಕುನ್, ದೆವಾನ್ ಫುಡ್ಲಿ ವಾಟ್ ದಾಕಯ್ತಾ ಮ್ಹಣಸರ್ ಕೆನರಾಂತ್ ಆಸ್‍ಲ್ಲ್ಯಾ ಕ್ರಿಸ್ತಾಂವಾಂನಿ ಧಯ್ರ್ ಸಾಂಡಿನಾಸ್ತಾಂ ತಾಂಚಿಂ ಕಾಮಾಂ ಚಾಲು ಆನಿ ತಾಂಚೊ ಭಾವಾಡ್ತ್ ಜಿವೊ ದವರಿಜಾಯ್… ತ್ಯಾ ವಾವ್ರಾಚೆಂ ಮುಖೇಲ್ಪಣ್ ಆತಾಂ ಆಗ್ನೆಸ್ ಕುಂವರ್ನಿಚೆಂ ಜಾಂವ್ಕ್ ಪಾವ್‍ಲ್ಲೆಂ…

ಪ್ರತ್ಯೇಕ್ ಜಾವ್ನ್, ತೊಪಾಸಿ ದಾಲ್ಮೇದಾಚಿ ಖಬರ್ – ತಾಕಾ ಪಟ್ಟಣಾಕ್ ಹಾಡುಂಕ್ ಖುದ್ ಸರ್ದಾರ್ ಸಿಮಾಂವ್ಚ್ಯಾ ಚವ್ಗಾಂ ಸವಾರಾಂಕ್ ಕುರಿಯೆಲಾಕ್ ಧಾಡ್ಲ್ಯಾತ್. ಥಂಯ್ಚ್ಯಾ ಚವ್ಗಾಂ ಸವಾರಾಂಕ್ ಸಾಂಗಾತಾ ಘೆವ್ನ್ ಕೈದ್ಯಾಕ್ ಪಟ್ಟಣಾಕ್ ಹಾಡ್ತೆಲೆ… ತ್ಯಾ ಕೈದ್ಯಾನ್ ಪಟ್ಟಣಾಕ್ ಪಾವ್ಲ್ಯಾರ್ ಕ್ರಿಸ್ತಾಂವಾಂಚೊ ಜಾಯ್ತೊ ಘುಟ್ ಭಾಯ್ರ್ ಪಡತ್, ಆನಿಕ್‍ಯೀ ಚಡ್ ಕ್ರಿಸ್ತಾಂವಾಂಚೊ ಸಂಹಾರ್ ಜಾಯ್ತ್…

ದೆಕುನ್, ಆಗ್ನೆಸ್ ಕುಂವರ್ನಿನ್ ಲಾಗ್ಶಿಲ್ಯಾ ಆನಿ ಪಾತ್ಯೆಣೆಚ್ಯಾ ಥೊಡ್ಯಾ ಮಾನಾಯಾಂಕ್ ಫರ್ಮಾವ್ನ್, ತ್ಯಾ ತೊಪಾಸಿನ್ ಗಡಿ ಭಾಯ್ರ್ ಪಾವನಾಶೆಂ ಕಿತೆಂ ಪುಣೀ ಕಾರ್ಯೆಂ ಹಾತಿಂ ಘೆವ್ನ್ ಉಪ್ಕಾರ್ ಕರಿಜಾಯ್, ಸಾಂಗಾತಾಚ್ ಆಪ್ಲ್ಯಾ ಸವಾರಾಂ ಪಯ್ಕಿ ತುರ್ಕಾಕ್ ಎಕ್ಲ್ಯಾಕ್ ಸೊಡ್ನ್ ಹೆರಾಂಕ್ ಕಾಯಮ್ ಲಿಪಯ್ಜಾಯ್ ವಾ ತಾಂಕಾಂ ಗಡಿ ಭಾಯ್ರ್ ಶಾಬಿತ್ ಪಾವಯ್ಜಾಯ್…

“ದೆಕುನ್‍ಂಚ್ ಹಾಂವೆಂ ಮ್ಹಳ್ಳೆಂ, ದುಮ್ಗಾಬಾ” ಉಪ್ರಾಂತ್ ಆಗ್ನೆಸ್ ಉಲಯ್ಲಿ: “ಅಸಲ್ಯಾ ವೆಳಾರ್ ದೆವಾನ್‍ಂಚ್ ತುಮ್ಕಾಂ ಹಾಡಯ್ಲ್ಯಾತ್.”

“ಜಾವ್ಯೆತ್” ಮ್ಹಣಾಲೊ ದುಮ್ಗಾ ಪೀಂತ್ ಮಿಶ್ಯೊ ವೊಳಾವ್ನ್. “ಆಟ್ ಜಣಾಂ ಸವಾರಾಂಕ್, ರಾನಾಚ್ಯಾ ವಾಟೆರ್ ದಾಡ್ ಘಾಲ್ನ್ ತ್ಯಾ ಕೈದ್ಯಾಕ್ ಲಗಾಡ್ ಕಾಡುಂಕ್ ಸುಲಭ್.”

“ಹಾಂಗಾಸರ್ ‘ಲಗಾಡ್ ಕಾಡ್ಚೆಂ’ ಸವಾಲ್‍ಯೀ ಚಿಕ್ಕೆ ಚತ್ರಾಯೆನ್ ಚಿಂತಿಜಾಯ್ ಪಡ್ತಾ” ಮ್ಹಣಾಲಿ ಆಗ್ನೆಸ್ ಕುಂವರ್ನ್. “ಸರ್ದಾರ್… ಸರ್ದಾರಾಚ್ಯಾ ಸವಾರಾಂಚೊ ಜೀವ್ ಉರಂವ್ಚೆಂಯೀ ಗರ್ಜೆಚೆಂ.”

ದುಮ್ಗಾ ಪೀಂತ್ ಮಾತೆಂ ಖೊರ್ಪುಂಕ್ ಲಾಗ್ಲೊ…

“ತೆ ಪಾಟಿಂ ಕೆದಾಳಾ ಯೆತಾತ್?”

“ಪೊರ್ವಾಂ ಸಕಾಳಿಂ ಕಿತೆಂ ಕರ್ಚೆಂ ಮ್ಹಳ್ಳೆಂ ಆಮಿ ಫಾಲ್ಯಾಂ ಚಿಂತುನ್ ಪಳೆಯೆತ್.”

“ಪುಣ್ ಆಮ್ಚ್ಯಾ ಹೆರ್ ಧಾ-ಪಂದ್ರಾ ಪುಣೀ ಮಾನಾಯಾಂಕ್ ಜಮಯ್ಜಾಯ್ ನಹಿಂವೇ?”

“ಗರ್ಜ್ ನಾ. ತುಮಿ ಆತಾಂ ತೇಗ್ ಪುರೊ. ಹಾಂಗಾಸರ್ ಧಾ-ವೀಸ್ ಜಣಾಂಕ್ ಆಮಿ ಎಕ್ಟಾಂವ್ಕ್ ಸಕ್ತಾಂವ್. ಜಾಯ್ತಿಂ ಹಾತೆರಾಂಯೀ ಆಸಾತ್.”

“ಪುಣ್ ಏಕ್ ಉಡಾಸ್ ದವರ್‍ಯಾಂ ಪುತಾ” ಮ್ಹಣಾಲೊ ರಫಾಯೆಲ್ ಮಿಂಗೆಲ್ ಕಾಮತ್. “ತೆ ಆಟ್‍ಯೀ ಜಣ್ ಸವಾರ್, ಲಡಾಯೆಕ್ ಶಸ್ತ್ರ್ ಸಜ್ಜಿತ್ ಜಾವ್ನ್ ಘೊಡ್ಯಾಂಚೆರ್ ವೆತೆಲೆ.”

“ಉಡಾಸ್ ಆಸಾ ಆನಾ” ಮ್ಹಣಾಲಿ ಆಗ್ನೆಸ್ ಕುಂವರ್ನ್. “ಕಿತೆಂ ಕರ್ಯೆತ್ ಮ್ಹಳ್ಳೆಂ ಏಕ್ ಸೂಚನ್ ಹಾಂವ್ ದಿತಾಂ. ಕಿತ್ಯಾಕ್ ಮ್ಹಳ್ಯಾರ್, ತ್ಯಾ ಸವಾರಾಂನಿ ‘ಚೊರಾಂಚ್ಯಾ’ ಹಾತಾಂತ್ ಪಡ್ಚೆಪರಿಂ ನಾ. ಆನಿ ಹ್ಯಾ ವಠಾರಾಂತ್, ಸರ್ಕಾರಾಚ್ಯಾ ದೂತಾಂಚೆರ್ ನಸ್ರಾನಿ ಪುಂಡಾಂನಿ ದಾಡ್ ಘಾಲಿ ಮ್ಹಳ್ಳಿ ಖಬರ್ ಜಾಂವ್ಕ್‌ಯೀ ಸಾಧ್ಯ್ ನಾ. ಆತಾಂ ಆಮಿ ವಿಶೆವ್ ಘೆವ್ನ್, ಫುಡ್ಲೆಂ ಕಾಮ್ ಫಾಲ್ಯಾಂ ಪಳೆಯಾಂ.” ತಶೆಂ ತೆ ಫಾಸಾಳ್ಳೆ.

ದಾಡ್ ಘಾಲ್ಚ್ಯಾ ಆನಿ ಲಡಾಯೆಚ್ಯಾ ವಿದ್ಯೆಂತ್ ದಾದ್ಲ್ಯಾಂಕ್‍ಯೀ ಸೂಚನ್ ದಿಂವ್ಚಿ ಎಕ್ಲಿ ತರ್ನಾಟಿ ಸ್ತ್ರೀ ಹಾಂಗಾಸರ್ ಆಸಾ ಮ್ಹಳ್ಳೆಂ ಸಮ್ಜೊನ್, ದುಮ್ಗಾ ಪೀಂತ್ ಆನಿ ಸಾಂಗಾತಿ ವಿಜ್ಮಿತ್ ಪಾವ್ಲೆ. ತಿಚ್ಯಾ ನಿರ್ದೇಶಾ ಖಾಲ್ ತರೀ ನವ್ಯಾನ್ ದುಸ್ಮಾನಾಂ ಕಡೆನ್ ಆದಾಳ್ಚಿ ತಾಂಚಿ ಆತುರಾಯ್ ಚಡ್ಲಿ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel