ಸರ್ದಾರಾಚೆಂ ಸನ್ನಿಧಾನ್ – 7: ಸಿನೊಲೆಚಿಂ ಅರ್ಧಾಂ

ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 7
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 7: ಸಿನೊಲೆಚಿಂ ಅರ್ಧಾಂ

ನಿಜಾಯ್ಕೀ, ತೊಪಾಸಿ ದಾಲ್ಮೇದಾಕ್ ಕುರಿಯೆಲ್ ಥಾವ್ನ್ ಸಿರಿಂಗಪಟ್ಟಣಾಕ್ ಹಾಡ್ಲ್ಯಾರ್, ಆನಿ ಟಿಪ್ಪು ಸುಲ್ತಾನಾ ಮುಖಾರ್ ತೊ ಪಡತ್ ಜಾಲ್ಯಾರ್, ಸರ್ದಾರ್ ಸಿಮಾಂವ್ನ್ ಬಂದಡೆ ವೆಳಾರ್ ಕ್ರಿಸ್ತಾಂವಾಂಕ್ ಕೆಲ್ಲ್ಯಾ ಮಜತೆಚೊ ಥೊಡೊ ಪುಣೀ ಘುಟ್ ಭಾಯ್ರ್ ಪಡ್ಚೊ ಸಂಭವ್ ಆಸ್‍ಲ್ಲೊ.

ಸರ್ದಾರ್ ಸಿಮಾಂವ್ ತೆಂಚ್ ಚಿಂತಾಲೊ. ಪುಣ್ ಸರ್ದಾರ್ ಯೂಸುಫ್ ಆಲಿಕ್ ತಿ ಗಜಾಲ್ ಕಳಿತ್ ನಾತ್‍ಲ್ಲಿ. ಆಪ್ಲ್ಯಾ ಕಂಪ್ಣೆ ಥಾವ್ನ್ ಪೊಳಾಪಳ್ ಘೆವ್ನ್, ಪರತ್ ಹಾತಾಕ್ ಮೆಳ್ಳ್ಯಾರೀ ಸುಟ್ಕಾ ಲಾಭ್‍ಲ್ಲ್ಯಾ ರಹೀಮಾ ವರ್ವಿಂ ಆಪ್ಲ್ಯಾ ಫುಡಾರಾಕ್ ಬಾಧಕ್ ಆಸಾ ಮ್ಹಳ್ಳಿ ಭಿರಾಂತ್ ತಾಕಾ ಧೊಸ್ತಾಲಿ.

ಆನಿ ಆತಾಂ, ದಕ್ಷಿಣಾಂತ್ಲ್ಯಾ ಘಟನಾಂನಿ ಪಾತ್ರ್ ಘೆವ್ನ್, ಸರ್ವಾಂಚಿ ವಳಕ್ ಆಸ್‍ಲ್ಲೊ ತೊಪಾಸಿಯೀ ಪಟ್ಟಣಾಕ್ ಯೆಂವ್ಚೊ ಸಂಭವ್ ಟಿಪ್ಪುನ್‍ಂಚ್ ಉಗ್ತೊ ಕೆಲ್ಲ್ಯಾನ್ ಅಪಾಯಾಚಿಂ ಕುಪಾಂ ದಾಟ್ ಜಾಲ್ಲಿಂ.

“ಸರ್ದಾರಾಂಕ್ ಸಲಾಮ್! ಹ್ಹ-ಹ್ಹಾ! ಮಿತ್ರ್ ದೊಗ್‍ಯೀ ವಾರೆಂ ಘೆಂವ್ಕ್ ಭಾಯ್ರ್ ಸರ್ಲ್ಯಾತ್ ಮ್ಹಣ್ ದಿಸ್ತಾ! ಹ್ಹ-ಹ್ಹಾ!”

ಸರ್ದಾರ್ ಸಿಮಾಂವ್ ಆನಿ ಸರ್ದಾರ್ ಯೂಸುಫ್, ಹೆಂ ಆಯ್ಕೊನ್ ಘುಂವ್ಲೆ. ನಿಜಾಯ್ಕೀ, ಚಿಂತಿನಾಸ್ತಾನಾಂಚ್, ಕವಾಯತಾಚೆಂ ಖಳ್ ಉತ್ರೊನ್, ತುರಂಗಾಚ್ಯಾ ಬಗ್ಲೆನ್ ಪಾಶಾರ್ ಜಾವ್ನ್, ತೆವ್ಶಿಲ್ಯಾ ಮೈದಾನಾಕ್ ತೆ ಪಾವ್‍ಲ್ಲೆ.

ತಾಂಕಾಂ ಸಲಾಮ್ ದಿಲ್ಲೊ ಗ್ರಾಯ್ಕ್ ಷೇಕ್ ಆಲಿ ಜಾವ್ನಾಸ್‍ಲ್ಲೊ.

“ತುಕಾಯೀ ಸಲಾಮ್” ಮ್ಹಳೆಂ ಯೂಸುಫ್ ಆಲಿನ್.

“ಬಾದಶಹಾಚ್ಯಾ ಭೆಟೆಕ್ ಗೆಲ್ಲ್ಯಾತ್ ಮ್ಹಣ್ ದಿಸ್ತಾ. ಹ್ಹ-ಹ್ಹಾ!”

“ವ್ಹಯ್, ತಾಂತುಂ ತುಕಾ ಕಿತೆಂ?” ಮ್ಹಣಾಲೊ ಸರ್ದಾರ್ ಸಿಮಾಂವ್.

“ನಹಿಂ” ಮ್ಹಣಾಲೊ ಷೇಕ್ ಆಲಿ. “ಬಾದಶಹಾ ತುಮ್ಚೆ ಕಡೆನ್ ಉಲವ್ನ್ ಆಸ್ತಾನಾ, ಆಮಿ ಬಾದಶಹಾಚಿ ದುಸ್ರಿಚ್ ಏಕ್ ಹುಕುಮ್ ಜಾರಿ ಕರ್ತಾಲ್ಯಾಂವ್. ನಹಿಂ ಜಾಲ್ಯಾರ್ ತೆಂ ದೃಶ್ಯ್ ಪಳೆಂವ್ಕ್ ತುಮ್ಕಾಂ ಅವ್ಕಾಸ್ ಆಸ್ತೊ. ‘ದಮ್ಮಯ್ಯಾ, ಸರ್ದಾರ್ ಸಿಮಾಂವ್ ಕಡೆನ್ ಪುಣೀ ಏಕ್ ಸಬ್ದ್ ಉಲಂವ್ಕ್ ಮ್ಹಾಕಾ ಸಂದ್ರಾಪ್ ದಿಯಾ’ ಮ್ಹಣೊನ್ ತೊ ಪರಾತ್ತಾಲೊ. ಮ್ಹಾಕಾಯೀ ತಾಚಿ ಬಿರ್ಮತ್ ದಿಸ್ಲಿ. ಪುಣ್ ಕಿತೆಂ ಕರುಂಕ್ ಸಕ್ತಾಂ? ಬಾದಶಹಾಚಿ ಹುಕುಮ್ ತಿ ಹುಕುಮ್… ನಿರಾಪ್ರಾಧಿ ಜಾಲ್ಯಾರೀ, ದುಸ್ರ್ಯಾಂಚ್ಯಾ ಬುದ್ವಂತ್ಕಾಯೆ ವರ್ವಿಂ ತಾಣೆಂ ತಶೆಂ ವಚಜಾಯ್ ಪಡ್ಲೆಂ.”

“ಕೋಣ್, ಆನಿ ಕಸಲಿ ಹುಕುಮ್?” ಸರ್ದಾರ್ ಸಿಮಾಂವ್ನ್ ಚಿಕ್ಕೆ ವಿರಾರ್ ಜಾವ್ನ್ ವಿಚಾರ್ಲೆಂ. “ತುಜೆಂ ಉಮಿಣ್ಯಾಂಚೆಂ ಉಲೊಣೆಂ ಆಮ್ಕಾಂ ಗರ್ಜ್ ನಾ ಮ್ಹಣ್ ದಿಸ್ತಾ!”

“ಬರಾಬರ್, ವ್ಹಯ್ ತೆಂ ಹ್ಹ-ಹ್ಹಾ!” ನಂಜೆನ್‍ಸೊ ಖೆಂವ್ಚೆಲೊ ಷೇಕ್ ಆಲಿ. “ಕಿತ್ಲೆಂ ಮ್ಹಳ್ಯಾರೀ ತುಮಿ ಬಾದಶಹಾಚ್ಯಾ ದರ್ಬಾರಾಂತ್ಲೆ ಶ್ರೇಷ್ಠ್ ಸರ್ದಾರ್.”

“ತಾಂತುಂ ತುಕಾ ಕಿತೆಂ? ತುಂಯೀ ಬಾದಶಹಾಚ್ಯಾ ಸರ್ಕಾರಾಂತ್ಲೊ ಎಕ್ಲೊ ಹುದ್ದೆದಾರ್!”

“ವ್ಹಯ್, ಶ್ರೇಷ್ಠ್ ಜಾಂವ್ ಕನಿಷ್ಠ್, ಅಮೀರ್ ಜಾಂವ್ ಗರೀಬ್” ಮ್ಹಣಾಲೊ ಷೇಕ್ ಆಲಿ ಹಾತ್ ತೆಣೆಂ ಉಬಾರ್ನ್ ದಾಕವ್ನ್. ವೋ ಥಂಯ್ ಪಳೆಯಾ – ತಿ ಗತ್ ಸಕ್ಡಾಂಚಿ ಜಾವ್ಯೆತ್!”

ತಿತ್ಲೆಂ ಮ್ಹಣೊನ್ ತೊ ಪಾಶಾರ್ ಜಾಲೊ.

ಸರ್ದಾರ್ ಸಿಮಾಂವ್ ಆನಿ ಸರ್ದಾರ್ ಯೂಸುಫ್ ಆಲಿ ಚಿಕ್ಕೆ ವಿಜ್ಮಿತ್ ಜಾಲೆ. ಷೇಕ್ ಆಲಿನ್ ದಾಕಯಿಲ್ಲ್ಯಾ ವಾಟೆನ್ ತಾಣಿಂ ದೀಷ್ಟ್ ಭೊಂವ್ಡಾಯ್ಲಿ. ತುರಂಗಾಚ್ಯಾ ಬಗ್ಲೆನ್ ಲಾಂಬಾಯೆನ್ ಉಬಾರ್‌ಲ್ಲೆ ಥೊಡೆ ಫಾಶೆಚೆ ಖಾಂಬೆ ಆಸ್‍ಲ್ಲೆ. ಪಾಟ್ಲ್ಯಾ ಥೊಡ್ಯಾ ಮಹಿನ್ಯಾಂನಿ ತ್ಯಾ ಖಾಂಬ್ಯಾಂಕ್ ಭೆಟ್ವಳ್‍ಚ್ ನಾತ್‍ಲ್ಲಿ. ಚೂಕ್ ಆಸೊನ್ ವಾ ನಾ ಆಸೊನ್, ಕೋಣ್ ನಹಿಂ ಕೊಣಾಚಿಂ ಮೊಡಿಂ, ಚಡಾವತ್ ಕ್ರಿಸ್ತಾಂವಾಂಚಿಂ, ಥಂಯ್ಸರ್ ಉಮ್ಕಳೊನ್ ಆಸ್ಚೆಂ ದೃಶ್ಯ್ ಸದಾಂಚೆಂ ಜಾವ್ನ್ ಆಸ್‍ಲ್ಲೆಂ.

ಅಪ್ಶಿಚ್ ಸರ್ದಾರಾಂಚಿ ದೀಶ್ಟ್ ತ್ಯಾ ಖಾಂಬ್ಯಾಂ ತೆವ್ಶಿನ್ ಗೆಲಿ. ಷೇಕ್ ಆಲಿನ್ ಜಾಯ್ ಮ್ಹಣೊನ್‍ಂಚ್ ತೆವ್ಶಿನ್ ದಾಕಯಿಲ್ಲೆಂ ಮ್ಹಣ್ ದಿಸ್ತಾ.

ಥಂಯ್ಸರ್ ಏಕ್ ಮೊಡೆಂ ಉಮ್ಕಳ್ತಾಲೆಂ ಆನಿ ತ್ಯಾ ಉಗ್ತಾಡಾಂತ್ ವಾರ್‍ಯಾಕ್ ಧಲ್ತಾಲೆಂ.

ಸರ್ದಾರ್ ದೊಗೀ, ಚಿಂತಾತುರ್ ಜಾವ್ನ್ ಲಾಗಿಂ ಗೆಲೆ. ಮಾತ್ಯಾರ್ ಕೇಸ್ ನಾತ್‍ಲ್ಲೆ ಜಾಲ್ಯಾರೀ, ಖಾಡ್ ಮಿಶಿ ಲಾಂಬ್ ಆಸೊನ್ ವಸ್ತ್ರಾಂ ವಿಣೆಂ ಆಸ್‍ಲ್ಲಿ ತಿ ನಿರ್ಜೀವ್ ಕೂಡ್ ಎಕಾ ಕ್ರಿಸ್ತಾಂವಾಚಿ ನಹಿಂ ಮ್ಹಣ್ ಸರ್ದಾರ್ ಸಿಮಾಂವ್ಕ್ ಸಮ್ಜಲೆಂ.

ತಕ್ಷಣ್ ಸರ್ದಾರ್ ಯೂಸುಫ್ ಆಲಿನ್ ಚಿಕ್ಕೆ ಅಕ್ಲಾಸೊನ್‍ಸೊ ಆವಾಜ್ ಕೆಲೊ.

“ಕಿತೆಂ ವಿಶೇಸ್ ಭಾಯೀ?” ಸರ್ದಾರ್ ಸಿಮಾಂವ್ನ್ ಪ್ರಶ್ನಾರ್ಥಕ್ ದೀಶ್ಟ್ ಲಾವ್ನ್ ಸವಾಲ್ ಕೆಲೆಂ.

“ವಳಕ್ ಧರುಂಕ್ ನಾಂಯ್ಗೀ ಹ್ಯಾ ಮನ್ಶ್ಯಾಚಿ?”

“ನಾ, ಕಿತ್ಯಾಕ್?” ಸರ್ದಾರ್ ಸಿಮಾಂವ್ನ್ ಮೊಡ್ಯಾಚೆರ್ ಚತ್ರಾಯೆನ್ ದೀಶ್ಟ್ ಘಾಲಿ. ಗಳ್ಪಾಸಾಂತ್ ಫುಗಾರ್ ಜಾವ್ನ್ ಜೀವ್ ತುಟ್ಚ್ಯಾ ವೆಳಾಚೆ ಸರ್ವ್ ಆಟೆವಿಟೆ ತಶೆಚ್ ರೂಕ್ ಜಾವ್ನ್ ಉರ್‌ಲ್ಲ್ಯಾ ಲಕ್ಷಣಾ ಮಧೆಂ ಸರ್ದಾರ್ ಸಿಮಾಂವ್ನ್ ತಾಚಿ ವಳಕ್ ಧರ್ಲಿ.

ತೊ ಜಾವ್ನ್ ಆಸ್‍ಲ್ಲೊ ಫಕೀರ್ ಮಹಮ್ಮದ್!

ಟಿಪ್ಪು ಸುಲ್ತಾನಾನ್ ಘಳಾಯ್ ಕರುಂಕ್ ನಾತ್‍ಲ್ಲಿ. ಸರ್ದಾರ್ ಸಿಮಾಂವ್ಕ್ ಕಳಿತ್ ನಾಸ್ತಾನಾಂಚ್, ಆನಿ ಹೆರ್ ಕೊಣಾಯ್ಕೀ ರಾಕನಾಸ್ತಾಂ, ಫಕೀರ್ ಮಹಮ್ಮದಾಕ್ ಫಾಶಿ ವೊಡುಂಕ್ ಫರ್ಮಾಣ್ ತಾಣೆಂ ದಿಲ್ಲೆಂ, ತಶೆಂಚ್ ತೆಂ ಜಾರಿ ಜಾವ್ನ್‌ಯೀ ಗೆಲ್ಲೆಂ!

“ನಿಜಾಯ್ಕೀ ಬಾದಶಹಾಚ್ಯಾ ನಿತಿಕ್ ತಡವ್ ನಾ!” ಮ್ಹಣಾಲೊ ಸರ್ದಾರ್ ಯೂಸುಫ್ ಆಲಿ. “ತಾಚಿ ಝಡ್ತಿ ಜಾಲ್ಲಿಯೀ ಆಮ್ಕಾಂ ಖಬರ್ ನಾ ಮ್ಹಳ್ಯಾರ್…”

“ಹಾಂವ್‍ಯೀ ತೆಂಚ್ ಚಿಂತಾಂ” ಮ್ಹಣಾಲೊ ಸರ್ದಾರ್ ಸಿಮಾಂವ್ ಗಂಭೀರ್ ಜಾವ್ನ್. ಲಾಗ್ಸರ್ ಕೊಣೀ ಆಸಾತ್‍ಗೀ ಮ್ಹಣ್ ತಾಣೆಂ ದೀಶ್ಟ್ ಭೊಂವ್ಡಾಯ್ಲಿ ಆನಿ ಮ್ಹಳೆಂ. “ಆಮಿ ಹಾಂಗಾಸರ್ ನಾತ್‍ಲ್ಲ್ಯಾ ವೆಳಾರ್ ಸರ್ಕಾರಾಚ್ಯಾ ಆನಿ ರಾವ್ಳೆರಾಚ್ಯಾ ವ್ಯವಹಾರಾಂನಿ ಜಾಯ್ತೆಂ ಬದ್ಲಾಪ್ ಜಾಲ್ಲೆಂ ದಿಸ್ತಾ, ಆನಿ ಆಮಿ ಆಜ್ ಹಾಂಗಾಸರ್ ಸೈರೆಶೆ ಜಾಲ್ಯಾಂವ್ ಮ್ಹಣ್ ಮ್ಹಾಕಾ ಭೊಗ್ತಾ.”

“ಮ್ಹಾಕಾಯೀ ತಶೆಂಚ್ ಭೊಗ್ತಾ. ದೆಕುನ್ ಚಡ್ ಚತ್ರಾಯೆನ್ ಆಮಿ ಆಸ್ಚಿ ಗರ್ಜ್. ಚಲ್ಯಾಂ ಹಾಂಗಾ ಥಾವ್ನ್.”

“ಯಾ” ಒಪ್ಲೊ ಸರ್ದಾರ್ ಸಿಮಾಂವ್. ಫಕೀರ್ ಮಹಮ್ಮದಾಚ್ಯಾ ಕುಡಿರ್ ಪರ್ತ್ಯಾನ್ ತಾಣೆಂ ದೀಶ್ಟ್ ಘಾಲಿ. ಭಾಯ್ರ್ ಗಳೊಂಕ್ ಲಾಗಿಂ ಜಾಲ್ಲೆ ತೆ ದೊಳೆ ಉಗ್ತೆಚ್ ಆಸೊನ್, ತಾಕಾ ದುರ್ಸತಾತ್‍ಶೆಂ ಭೊಗ್ಲೆಂ ತಾಕಾ.

ವ್ಹಯ್, ಎಕಾ ಥರಾನ್ ತಾಚ್ಯಾ ಫಾಶೆಕ್ ಸರ್ದಾರ್ ಸಿಮಾಂವ್‍ಚ್ ಕಾರಣ್ ಜಾವ್ನಾಸ್‍ಲ್ಲೊ. ತಶೆಂ ಜಾಂವ್ಕ್ ನಾತ್‍ಲ್ಲೆಂ ಜಾಲ್ಯಾರ್ ಕುರಿಯೆಲಾಂತ್ಲ್ಯಾ ತ್ಯಾ ವೀರ್ ಸ್ತ್ರೀ-ಪುರುಷಾಂನಿ ಆನಿಕ್‍ಯೀ ಚಡ್ ಕಷ್ಟಜಾಯ್ ಆನಿ ಮೊರಜಾಯ್ ಆಸ್ತೆಂ.

ಉಪ್ರಾಂತ್ ಈಶ್ಟ್ ದೊಗೀ ಥಂಯ್ ಥಾವ್ನ್ ಪಾಶಾರ್ ಜಾವ್ನ್ ಆಪಾಪ್ಲ್ಯಾ ಬಿಡಾರಾಕ್ ಗೆಲೆ.

ಸರ್ದಾರ್ ಸಿಮಾಂವ್ ಚಡ್ ಚಿಂತ್ನಾಂ ಆಟಂವ್ಕ್ ಲಾಗ್ಲೊ. ಕುರಿಯೆಲಾಂತ್ಲ್ಯಾ ದುಸ್ರ್ಯಾ ಖಬ್ರೆಕ್ ತೊ ಆಶೆತಾಲೊ. ಇಸ್ಮಾಯಿಲ್ ಬಾಬಾನ್ ಧಾಡ್‍ಲ್ಲ್ಯಾ ವರ್ದೆ ಪ್ರಾಸ್, ನೀಜ್ ಜಾವ್ನ್, ಮಾನಿನ್ ವೆರೊನಿಕಾ ಕುವೆಲಿಚಿ ಆನಿ ಪ್ರತ್ಯೇಕ್ ಜಾವ್ನ್ ಆತಾಂ ಆಗ್ನೆಸ್ ಕುಂವರ್ನಿಚಿ ಖಬರ್ ತಾಕಾ ಜಾಯ್ ಆಸ್‍ಲ್ಲಿ.

ಪುಣ್ ಅಸಲ್ಯಾ ಪರಿಸ್ಥಿತೆಂತ್ ತಾಣಿಂ ಖಬರ್ ಧಾಡ್ಚಿ ಜಾಲ್ಯಾರೀ ಕಶಿ ಆನಿ ಕೊಣಾ ಕಡೆನ್? ನಿಜಾಯ್ಕೀ, ಕುರಿಯೆಲ್ ಥಾವ್ನ್ ಯೆಂವ್ಚ್ಯಾ ಸರ್ವ್ ತಾರ್ ಸವಾರಾಂಚೆರ್ ಟಿಪ್ಪುಚೆ ಗೂಢಚಾರ್ ಚತ್ರಾಯೆನ್ ದೊಳೊ ದವರ್ನ್ ಆಸ್‍ಲ್ಲೆ ಮ್ಹಣ್ ಪಾತ್ಯೆಂವ್ಕ್ ಇಡೆಂ ಆಸ್‍ಲ್ಲೆಂ.

ತಾಚಿ ಆಶಾ, ತಿತ್ಲ್ಯಾ ಸುಲಭಾಯೆನ್ ನಿರಾಶಾ ಜಾಂವ್ಕ್ ನಾ.

ತ್ಯಾಚ್ ದಿಸಾ ಸಾಂಜೆರ್, ಜೆಮೆದಾರ್ ಅಂತುಲೊ ಪಡ್ವಳ್ ಅಶೆಂ ಮ್ಹಣಾಲೊ:

“ಸರ್ದಾರಾ, ಮಂಗ್ಳುರ್ ಥಾವ್ನ್ ತುಮ್ಕಾಂಚ್ ಮ್ಹಣ್ ಲಿಖ್‍ಲ್ಲಿ ಏಕ್ ವರ್ದಿ ಆಸಾ ಖಂಯ್.”

“ಆಸಾ ಖಂಯ್?” ಸರ್ದಾರ್ ಸಿಮಾಂವ್ನ್ ಆತುರಾಯೆನ್ ಆನಿ ಚಿಕ್ಕೆ ಭಿರಾಂತಿನ್‍ಂಚ್ ವಿಚಾರ್ಲೆಂ. “ಖಂಯ್ ಆನಿ ಕೊಣಾ ಕಡೆನ್?”

“ಆತಾಂ ತಿ ಕೊಣಾಯ್ ಕಡೆನ್ ನಾ” ಮ್ಹಣಾಲೊ ಅಂತುಲೊ ಪಡ್ವಳ್. “ಜೋಡುಮಾರ್ಗ ಠಾಣ್ಯಾಚ್ಯಾ ಕೊತ್ವಾಲಾನ್, ಆಮ್ಚ್ಯಾ ಪಂಗ್ಡಾಂತ್ಲ್ಯಾ ದಾಮು ಪೂಜಾರಿ ಕಡೆನ್ ತಿ ದಿಲ್ಲಿ ಖಂಯ್, ಆನಿ ಹೆರಾಂಚ್ಯಾ ಹಾತಾಕ್ ಪಾವನಾಶೆಂ ತುಮ್ಚ್ಯಾಚ್ ಹಾತಾಕ್ ಮೆಳಜಾಯ್ ಮ್ಹಣ್ ಜಾಗ್ವಣ್ ಸಾಂಗ್‍ಲ್ಲಿ ಖಂಯ್.”

“ತರ್ ಕಾಂಯ್ ಅಪ್ಘಾತ್..”

“ಜಾಂವ್ಕ್ ನಾ ಧನ್ಯಾ” ಹಾಸ್ಲೊ ಅಂತುಲೊ ಪಡ್ವಳ್. “ಆಮ್ಚ್ಯಾ ದಾಮು ಪೂಜಾರಿಕ್ ‘ಕಣ್ಣೊಜಿ ಕೊಲೊ’ ಮ್ಹಣ್ ಆಮಿ ಭೆಷ್ಟೆಂ ಆಪಯ್ನಾಂವ್. ಪೋರ್ ಆಮ್ಚಿ ಠೊಲಿ ಪಟ್ಟಣಾಕ್ ಲಾಗಿಂ ಪಾವ್ತಾನಾ, ಭಾಯ್ಲ್ಯಾ ಆಂಬ್ಯಾ ರುಕಾಂಚ್ಯಾ ಉಪವನಾಂತ್ ಚಿಕ್ಕೆ ನಿತಳ್ ಜಾಂವ್ಕ್ ರಾವ್ಲಿ. ತ್ಯಾ ವೆಳಾರ್ ಹೆರಾಂಚೆಯೀ ದೊಳೆ ಚುಕವ್ನ್ ದಾಮು ಪೂಜಾರಿನ್ ಎಕಾ ರುಕಾಚ್ಯಾ ಆಡೊಸಾಕ್ ವಚೊನ್ ಬಸೊನ್ ತಿ ವರ್ದಿ ಲಿಪಯ್ಲಿ ಆನಿ ಸೊಡ್ಲಿ.”

“ಆನಿ ಉಪ್ರಾಂತ್?”

“ಉಪ್ರಾಂತ್, ಕಾಲ್ ಆಮ್ಚ್ಯಾ ಶಿಪಾಯಾಂಕ್ ಸುಟಿ ಮೆಳ್‍ಲ್ಲ್ಯಾ ವೆಳಾರ್, ಲಾಂಕುಡ್ ಹಾಡ್ಚ್ಯಾ ಖಾತಿರ್ ಗೆಲ್ಲ್ಯಾ ದಾಮು ಪೂಜಾರಿನ್ ತಿ ಹಾಡ್ಲಿ ಆನಿ ಆಜ್ ಮ್ಹಜೆ ಕಡೆನ್ ದಿಲಿ.”

ಇತ್ಲೆಂ ಮ್ಹಣೊನ್ ಅಂತುಲ್ಯಾನ್ ಆಪ್ಲ್ಯಾ ರುಮಾಲಾ ಪಂದ್ಲಿ ತಿ ಶಿಂವ್‍ಲ್ಲಿ ಲ್ಹಾನ್ ಇಲೂದೆಚಿ ಪಿಸ್ವಿ ಕಾಡ್ನ್ ಸರ್ದಾರಾಚ್ಯಾ ಹಾತಾಂತ್ ದಿಲಿ.

ಸರ್ದಾರಾಕ್ ಹಾಸೊಂಕ್ ಆಯ್ಲೆಂ. ತಾಚ್ಯಾ ಸಾಂಗಾತಾ ತಾಚ್ಯಾ ಕಂಪ್ಣೆಂತ್ ಆಸ್‍ಲ್ಲೆ ಸರ್ವ್ ಶಿಪಾಯ್ ಆನಿ ಸೆವಕ್ ಗರ್ಜೆ ತೆಕಿದ್ ಬುದ್ವಂತ್ಕಾಯ್ ಖರ್ಚುನ್ ಕಾಮ್ ಕರ್ತಾತ್ ಮ್ಹಳ್ಳೆಂ ಸಮ್ಜೊನ್ ತಾಕಾ ಸಮಾಧಾನ್ ಜಾಲೆಂ.

“ತ್ಯಾ ಜೆಮೆದಾರ್ ದಾಮುಕ್ ಫಾಲ್ಯಾಂ ಏಕ್ ಇನಾಮ್ ದೀಂವ್ಕ್ ಮ್ಹಾಕಾ ಉಗ್ಡಾಸ್ ಕರ್” ಮ್ಹಣಾಲೊ ತೊ ಅಂತುಲ್ಯಾ ಕಡೆನ್. “ಆತಾಂ ತುವೆಂ ವಚ್ಯೆತ್. ಉಪ್ರಾಂತ್, ರಾತಿಚೆಂ ಜೆವಣ್ ತಯಾರ್ ಕರುಂಕ್ ಆಯ್ಲ್ಯಾರ್ ಪುರೊ.”

“ಜಾಯ್ತ್ ಸರ್ದಾರ್ ಸಾಯ್ಬಾ” ಮ್ಹಣೊನ್ ಸಲಾಮ್ ಮಾರ್ನ್ ಅಂತುಲೊ ಪಡ್ವಳ್ ಭಾಯ್ರ್ ಗೆಲೊ.

ಸರ್ದಾರಾನ್ ಆಪ್ಲ್ಯಾ ಹಾತಾಂತ್ ಆಸ್‍ಲ್ಲಿ ಇಲೂದೆಚಿ ಪಿಸ್ವಿ ಪಳೆಲಿ. ತಕ್ಷಣ್ ಉಗ್ಡಾಸ್ ತಾಕಾ ಆಯ್ಲೊ – ಎಕಾ ವರ್ಸಾಚ್ಯಾಕ್‍ಯೀ ಚಿಕ್ಕೆ ಆದಿಂ ಜಾವ್ಯೆತ್, ಒಮ್ಜೂರಾಂತ್ ಅಜ್ಞಾತ್ ತೊ ಆಸ್‍ಲ್ಲ್ಯಾ ವೆಳಾರ್ ಎಕೆ ರಾತಿಂ, ಬಂಟ್ವಾಳ್ ಥಾವ್ನ್, ಜಾಕೊಬ್ ಮ್ಹಳ್ಳ್ಯಾ ನಾಂವಾಚ್ಯಾ ಎಕ್ಲ್ಯಾ ಮಾನಾಯಾನ್ ತಾಕಾ ಏಕ್ ವರ್ದಿ ಹಾಡ್‍ಲ್ಲಿ… ತವಳ್ಚೆಪರಿಂಚ್ ಗುಲೊಬಾಂಚೊ ಸುಗಂಧ್ ತಾಚ್ಯಾ ನಾಕಾಕ್ ಆದಾಳ್‍ಲ್ಲೆಪರಿಂ ಭೊಗ್ಲೆಂ ತಾಕಾ.

ಹಾತಾಂತ್ಲಿ ಪಿಸ್ವಿ, ಭಾಲಿಯೆಚ್ಯಾ ಪೊಂತಾನ್ ತಾಣೆಂ ಉಗ್ತಿ ಕೆಲಿ. ತಾಂತುಂ ಏಕ್ ಲೊಕಾಟೊ ಆಸ್‍ಲ್ಲೊ. ವ್ಹಯ್, ತಾಣೆಂ ಚಿಂತ್‍ಲ್ಲೆಪರಿಂಚ್ – ಹಾತ್ ಬರಪ್ ಆಗ್ನೆಸ್ ಕುಂವರ್ನಿಚೆಂ ಜಾವ್ನ್ ಆಸ್‍ಲ್ಲೆಂ.

ತಾಚೆ ಹಾತ್ ಚಿಕ್ಕೆ ಕಾಂಪ್‍ಲ್ಲೆಪರಿಂ ಜಾತಚ್, ಭಿತರ್ಲೆಂ ಕಾಗಾತ್ ತಾಣೆಂ ಸೊಡಯ್ಲೆಂ ಆನಿ ವಾಚ್ಲೆಂ:

“ಮ್ಹಜ್ಯಾ ಸರ್ದಾರಾ…

ಅಶೆಂ ತುಕಾ ಪರ್ತ್ಯಾನ್ ಲಿಖುಂಕ್ ಮ್ಹಾಕಾ ಫಾವೊ ಜಾಯ್ತ್ ಮ್ಹಣ್ ಹಾಂವೆಂ ಚಿಂತುಂಕ್ ನಾ. ತುಂ ಕಣ್ಣಾನೂರ್ ಥಾವ್ನ್ ಶಾಬಿತಾಯೆನ್ ಪಟ್ಟಣಾಕ್ ಪಾವ್ಲಾಯ್ ಮ್ಹಳ್ಳೆಂ ಆಯ್ಕೊನ್ ಹಾಂವ್ ಸಂತೊಸ್ ಪಾವ್ತಾಂ ಆನಿ ದೆವಾಕ್ ಅರ್ಗಾಂ ದಿತಾಂ.

ಆನಾಚಿ ತಡೀಪಾರ್ ಅವ್ಧಿ ಆಖೇರ್ ಜಾಲ್ಯಾ. ಹಾಂವೆಂ ತಲ್ಚೇರ್ ವಚೊನ್ ತಾಕಾ ಪಾಟಿಂ ಆಪವ್ನ್ ಹಾಡ್ಲಾ. ಯೆಂವ್ಚ್ಯಾ ಆದಿಂ ಆಮಿ ಥೊಡೆ ದೀಸ್ ಕಣ್ಣಾನೂರ್ ಬೇಗಮೆಚ್ಯಾ ರಾವ್ಳೆರಾಂತ್ ಉರ್‌ಲ್ಲ್ಯಾಂವ್… ಥಂಯ್ಸರ್ ತುಂ ಸುಬೇದಾರ್ ಭು-ಭೂಚ್ಯಾ ವೇಸಾರ್ ಆಸ್‍ಲ್ಲೊಯ್ ಮ್ಹಜ್ಯಾ ಹ್ಯಾ ಭುಖೆಲ್ಲ್ಯಾ ದೊಳ್ಯಾಂನಿ ಪಳೆಲೆಂ… ತುಂ ಜನೆಲಾಂತ್ಲ್ಯಾನ್ ಭಾಯ್ರ್ ಉಡೊನ್ ಕಾಳೊಕಾಂತ್ಲ್ಯಾನ್ ಖಂದ್ಕಾಂತ್ ಪಡೊನ್ ಮಾಯಾಗ್ ಜಾತಾನಾ… ಮ್ಹಜಿ – ಆಮ್ಚಿ ಜಿಣಿ ಕಾಬಾರ್ ಜಾಲಿ ಮ್ಹಣ್ ಚಿಂತ್‍ಲ್ಲೆಂ ಹಾಂವೆಂ. ದೆವಾನ್ ತಶಿ ಖುಶಿ ವ್ಹರೊಂಕ್ ನಾ… ಕಿತ್ಯಾ ಮ್ಹಣ್ ಹಾಂವ್ ನೆಣಾಂ!

ಏಕ್ ಭೋವ್ ದುಖಾಚಿ ಖಬರ್ ಹಾಂಗಾಸರ್ ಹಾಂವೆಂ ಧಾಡುಂಕ್ ಆಸಾ. ತಿ ಧಾಡುಂಕ್ ಹಾಂವ್ ಪಶ್ಚಾತ್ತಾಪ್ ಪಾವ್ತಾಂ. ಪುಣ್ ತುಜ್ಯಾ ದುಖಾಂತ್‍ಯೀ ಹಾಂವ್ ವಾಂಟೆಲಿ ಜಾತಾಂ ಮ್ಹಣ್ ಖಾಲ್ತೆಪಣಿಂ ತುಕಾ ಸಾಂಗೊಂಕ್ ಅಪೇಕ್ಷಿತಾಂ.

ಆಮ್ಚ್ಯಾ ಸಮೇಸ್ತಾಂಚಿ ಮಾನಾ ಪಾತ್ರ್, ಆನಿ ಪ್ರತ್ಯೇಕ್ ಜಾವ್ನ್ ತುಜಿ ಮೊಗಾ ಪಾತ್ರ್ ಜಾವ್ನಾಸ್‍ಲ್ಲಿ ಭಾಗೆವಂತ್ ವೀರ್ ಸ್ತ್ರೀ, ಕೊಡಿಯಾಲ್‍ಬೈಲ್‍ಚಿ ಮಾನಿನ್ ವೆರೊನಿಕಾ ಕುವೆಲ್, ಹ್ಯಾಚ್ ಸರ್ಲೆಲ್ಯಾ ಸುಕ್ರಾರಾಚ್ಯಾ ಮಧ್ಯಾನೆರ್ ದೆವಾಧಿನ್ ಜಾಲಿ. ತ್ಯಾ ದೀಸ್ ಹಾಂವ್ ಥಂಯ್ಸರ್ ಪಾವ್‍ಲ್ಲಿಂ. ತಿಚೊ ಭಾವ್ ಆನಿ ಮಿವ್ಣೊ ಮಾತ್ರ್ ನಹಿಂ ಆಸ್ತಾಂ, ತುಜ್ಯಾ ವಳ್ಕಿಚೆ ವೀರ್ ಸರ್ದಾರ್ ಆನಿ ಹೆರ್ ಸ್ತ್ರೀಯೊಯೀ ಹಾಜರ್ ಆಸ್‍ಲ್ಲ್ಯೊ… ಆನಿ ಪ್ರತ್ಯೇಕ್ ಜಾವ್ನ್ ಆಮ್ಚ್ಯಾ ಹರ್ಯೆಕ್ಲ್ಯಾಚ್ಯಾ ಧ್ಯಾನಾಂತ್ ತುಂಯೀ ಹಾಜರ್ ಆಸ್‍ಲ್ಲೊಯ್.

ತಿಕಾ ತ್ಯಾಚ್ ಘರ್ಚ್ಯಾ ವಠಾರಾಂತ್ ಮಾತ್ಯೆಕ್ ಪಾಯ್ಲಿ. ಥಂಯ್ಸರ್ ಆನಿ ಭೊಂವಾರ್ ಎದೊಳ್ ಜಾವ್ನಾಸ್‍ಲ್ಲಿಂ ಸರ್ವ್ ಕಾಮಾಂ ಎದೊಳ್ಚೆಪರಿಂಚ್ ಜಾವ್ನ್ ಮುಖಾರ್ ವೆತೆಲಿಂ ಮ್ಹಳ್ಳೊ ಭರ್ವಸೊ ಆಸಾ…

ಆನ್ಯೇಕ್ ವಿಷಯ್ – ಜೊ ಕಸೊ ಲಿಖ್ಚೊ ಮ್ಹಳ್ಳೆಂ ಮ್ಹಾಕಾ ಸಮ್ಜನಾ, ತರೀ ಲಿಖ್ತಾಂ… ವೆರೊನಿಕಾ ಕುಂವರ್ನಿ ಕಡೆನ್ ಆಸ್‍ಲ್ಲೆಂ ಅರ್ಲುಕೆಚೆಂ ಅರ್ಧ್ ಆತಾಂ ತಿಣೆಂ ಆನಿ ಹೆರಾಂನಿ ಮ್ಹಜ್ಯಾ ತಾಬೆನ್ ಸೊಡ್ಲಾಂ. ಚಿಂತಿನಾತ್‍ಲ್ಲ್ಯಾ ವಾಟೆನ್ ಹಿ ನವಿಚ್ ಆನಿ ಚಡಿತ್ ಜವಾಬ್ದಾರಿ ಆತಾಂ ಮ್ಹಜೆರ್ ಆಯ್ಲ್ಯಾ ದೆಕುನ್ ಭಿರಾಂತ್ ಮ್ಹಾಕಾ ದಿಸ್ತಾ… ತಸಲ್ಯಾ ಜವಾಬ್ದಾರೆಕ್ ಹಾಂವ್ ಫಾವೊ ನಹಿಂ ಮ್ಹಣ್ ಹೆರಾಂ ಪ್ರಾಸ್ ಬರೆಂ ಕರ್ನ್ ಹಾಂವ್‍ಂಚ್ ಜಾಣಾಂ!

ತ್ಯಾ ಶಿವಾಯ್, ತ್ಯಾ ಜವಾಬ್ದಾರೆಕ್ ಹಾಂವ್ ಫಾವೊ ಮ್ಹಣ್ ತುಂ ಲೆಖ್ತಾಯ್ಗೀ, ಆನಿ ತಿ ಸಿನೊಲ್ ಮ್ಹಜೆ ಕಡೆನ್ ಆಸೊಂಕ್ ತುಜಿ ಕಬ್ಲಾತ್ ಆಸಾಗೀ ಮ್ಹಳ್ಳೆಂಯೀ ಹಾಂವ್ ನೆಣಾಂ!

ಇತ್ಲೆಂ ತುಕಾ ಲಿಖ್ಲಾಂ, ಆನಿ ಆಮ್ಚ್ಯಾ ಮಿತ್ರಾ ಮಾರಿಫಾತ್ ತುಕಾ ಪಾವಂವ್ಚ್ಯಾ ಖಾತಿರ್ ಹೆಂ ಧಾಡ್ನ್ ದಿಲಾಂ. ತುಜ್ಯಾ ಹಾತಾಕ್ ಶಾಬಿತ್ ತೆಂ ಪಾವೊಂದಿ ಮ್ಹಣ್ ದೀಸ್ ರಾತ್ ಮಾಗ್ತಾಂ… ತುಜ್ಯಾ ಸರ್ವ್ ಬರೆಪಣಾ ಖಾತಿರ್ ಆನಿ ಸುರಕ್ಷಿತಾಯೆ ಖಾತಿರ್ ಹೊ ಅಸ್ಕತ್ ಅತ್ಮೊ ಮಾಗ್ತಾ ಆನಿ ಅತ್ರೆಗ್ತಾ.

ಮ್ಹಣೊನ್ ರಾವ್ತಾಂ ಆನಿ ರಾಕ್ತಾಂ…

-ಆಗ್ನೆಸ್ ಸಿಸಿಲಿಯಾ.”

ಸರ್ದಾರ್ ಸಿಮಾಂವ್ನ್ ಹೆಂ ವಾಚುನ್ ಏಕ್ ಲಾಂಬ್ ಶ್ವಾಸ್ ಸೊಡ್ಲೊ. ಸವ್ಕಾಸಾಯೆನ್ ತೊ ಬಸ್ಲೊ, ಆನಿ ಪರ್ತ್ಯಾನ್ ದೋನ್ ಪಾವ್ಟಿಂ ತಿ ವರ್ದಿ, ತೆಂ ಪತ್ರ್ ವಾಚುನ್, ಉತ್ರಾನ್ ಉತಾರ್ ತಾಂತ್ಲೆಂ ಮತಿಂತ್ ತಾಣೆಂ ಖಂಚಯ್ಲೆಂ.

ನಿಜಾಯ್ಕೀ, ತ್ಯಾ ಸುಕ್ರಾರಾಚ್ಯಾ ರಾತಿಂ ನಿದೆಂತ್ಲೊ ಮಾರ್ನ್ ಉಟಯಿಲ್ಲೆಪರಿಂ ಜಾಲ್ಲ್ಯಾ ವೆಳಾರ್‌ಚ್ ವೆರೊನಿಕಾ ಕುವೆಲಿನ್ ಪ್ರಾಣ್ ಕೆಲ್ಲೊ, ಆನಿ ತಾಚ್ಯಾ ವೃತ್ತಾಂತ್ಲೊ ಏಕ್ ಗಾಂಚ್ ತುಟ್‍ಲ್ಲೊ ಮ್ಹಣ್ ತಾಕಾ ಸಮ್ಜಲೆಂ.

ಉಪ್ರಾಂತ್ ತೊ ಉಟ್ಲೊ, ಆನಿ ಸಾಲಾಚ್ಯಾ ಕೊನ್ಶ್ಯಾಕ್ ಹಿಂವೆ ಖಾತಿರ್ ಪೆಟವ್ನ್, ಕೆದಾಳಾಯೀ ಕೊಲಿತಾಂ-ಕೆಂಡಾಂನಿ ಜಿವೆಂ ಆಸ್ಚ್ಯಾ ಆಗ್ಟ್ಯಾಂತ್ ತಾಣೆಂ ತೆಂ ಪತ್ರ್, ಲೊಕಾಟೊ ಆನಿ – ಚುರ್ಚುರೊನ್ ತರೀ – ತಿ ಪಿಸ್ವಿ ಉಡಯ್ಲಿ. ತಿಂ ಜಳೊನ್ ಭಸ್ಮ್ ಜಾಲಿಂ ಮ್ಹಣ್ ಖಾತ್ರಿ ಜಾತಚ್ ತಾಕಾ ಸಮಾಧಾನ್ ಭೊಗ್ಲೆಂ.

ನಿಜಾಯ್ಕೀ, ಜೆಮೆದಾರ್ ದಾಮು ಪೂಜಾರಿನ್ ತಿತ್ಲಿ ತಕ್ಲಿ ಖರ್ಚುಂಕ್ ನಾತ್‍ಲ್ಲಿ ಜಾಲ್ಯಾರ್, ಆನಿ ಎಕಾದಾವೆಳಾ ದುಸ್ಮಾನಾಂಚ್ಯಾ ತಶೆಂ ಟಿಪ್ಪುಚ್ಯಾ ಹಾತಾಂತ್ ತೆಂ ಪತ್ರ್ ಪಡ್‍ಲ್ಲೆಂ ಜಾಲ್ಯಾರ್, ತಾಚ್ಯಾ ಆನಿ ಸಂಬಂಧ್ ಜಾಲ್ಲ್ಯಾ ತ್ಯಾ ಸಮೇಸ್ತಾಂಚ್ಯಾ ಗಳ್ಯಾಕ್ ದುಸ್ರೊ ಪಾಸ್ ನಾಕಾ ಆಸ್‍ಲ್ಲೊ. ತಸಲ್ಯಾ ಸಂದರ್ಭಾರ್ ಆಗ್ನೆಸ್ ಕುಂವರ್ನಿಚೆರ್ ಯೆವ್ಯೆತ್ ಆಸ್‍ಲ್ಲೆಂ ಅನ್ವಾರ್ ಚಿಂತುನ್ ಮತಿಂತ್ ತೊ ಥರ್ಥರ್ಲೊ.

ತ್ಯಾ ದೀಸ್ ಪರ್ತ್ಯಾನ್ ಭಾಯ್ರ್ ವಾರ್‍ಯಾಕ್ ವೆಚಿ ಆಲೋಚನ್ ತಾಣೆಂ ಸೊಡ್ಲಿ. ತಶೆಂಚ್ ವಸ್ತುರ್ ಸೊಡ್ನ್, ಚಾಕ್ರಾ ಕರ್ನಾ ಏಕ್ ಗೊಬ್ಳೊ ಹುನ್ ಕಾಫಿ ಹಾಡವ್ನ್ ಖಾಟ್ಯೆರ್ ತೊ ಬಸ್ಲೊ.

ಆಗ್ನೆಸ್ ಕುಂವರ್ನಿನ್ ಲಿಖ್‍ಲ್ಲೆಂ ಉತ್ರಾನ್ ಉತಾರ್ ನಿಯಾಳ್ ತಾಣೆಂ ಕೆಲೊ. ನಿಜಾಯ್ಕೀ ರೊಜಾರಿಚ್ಯಾ ಪಂದ್ರಾಯೀ ಖಣಾಂನಿ ಆಟಾಪುನ್ ಆಸ್ಚೆಪರಿಂ ತಾಚಿಂ ಭೊಗ್ಣಾಂ ಜಾಲಿಂ.

ಖಬರ್ ಆಯಿಲ್ಲ್ಯಾ ಖಾತಿರ್ ಸಂತೊಸ್, ವೆರೊನಿಕಾ ಕುಂವರ್ನಿಚ್ಯಾ ಮೊರ್ನಾ ಖಾತಿರ್ ದುಖ್, ಆನಿ ಅನೈಚ್ಛಿಕ್ ಥರಾನ್ ಜಾಲ್ಯಾರೀ, ಸಿನೊಲೆಚ್ಯಾ ಅರ್ಲುಕೆಚೆಂ ಅರ್ಧ್ ಆತಾಂ ಆಗ್ನೆಸ್ ಕುಂವರ್ನಿ ಕಡೆನ್ ಶಾಬಿತ್ ಆಸಾ ಮ್ಹಣ್ ತಿಚೆ ಥಾವ್ನ್‍ಂಚ್ ಆಯ್ಕೊನ್ ಆನಂದ್ ತಾಕಾ ಭೊಗ್ಲೊ.

ವ್ಹಯ್. ವೆರೊನಿಕಾ ಕುಂವರ್ನಿಚ್ಯಾ ಮೊರ್ನಾಚಿ ಖಬರ್ ಆಯ್ಕೊನ್ ತಾಕಾ ನೀಜ್ ಜಾವ್ನ್ ಖಂತ್ ಜಾಲಿ. ತಾಚೊಚ್ ಜೀವ್ ವಾಂಚಂವ್ಚ್ಯಾ ಖಾತಿರ್ ತಿಣೆಂ ಆಪ್ಲೊ ಪ್ರಾಣ್ ಕೆಲ್ಲೊ. ತಿಚಿ ವಳಕ್ ಆನಿ ತಾಂತ್ಲಿಂ ಘಟನಾಂ, ತಾಚ್ಯಾ ಜಿಣಿಯೆಚ್ಯಾ ವಿಚಿತ್ರ್ ನಾಟಕಾಂತ್ ಏಕ್ ಪ್ರಮುಖ್ ಅಂಕ್ ಜಾವ್ನ್ ಪಾಶಾರ್ ಜಾಲ್ಲಿಂ.

ತರೀ, ತ್ಯಾಚ್ ಧಾರೆ ವರ್ವಿಂ ನವೊ ಪಡ್ದೊಯೀ ಆಬ್ಳೆ ಅಸೊ ಉಗ್ತೊ ಜಾಲ್ಲೊ. ಪ್ರಾಯ್ ಧಾಂವ್‍ಲ್ಲೆಪರಿಂಚ್ ಹೊ ನಾಟಕ್‍ಯೀ ಆಖೇರ್ ಜಾಂವ್ಕ್ ಧಾಂವ್ತಾ ಮ್ಹಳ್ಳೆಪರಿಂ ತಾಕಾ ಭೊಗ್ಲೆಂ.

ಸರ್ದಾರಾಂಚ್ಯಾ ಸಿನೊಲೆಚ್ಯಾ ಮಹಿಮೆ ವರ್ವಿಂ ಹೆರಾಂಕ್ ಜಾಯ್ತೆಂ ಬರೆಂಪಣ್ ಜಾಲ್ಲೆಂ… ಪುಣ್ ದುಮ್ಗಾ ಪಿಂತಾಚ್ಯಾ ಆವಯ್ ಕಡೆನ್ ತೆಂ ಅರ್ಧ್ ಆಸ್ತಾನಾ ತಿ ಮೋರ್ನ್ ಪಾವ್ಲಿ; ವೆರೊನಿಕಾ ಕುಂವರ್ನಿ ಕಡೆನ್ ಆಸ್ತಾನಾ ತಿಯೀ ಅಂತರ್ಲಿ… ಆತಾಂ ಆಗ್ನೆಸ್ ಕುಂವರ್ನಿ ಕಡೆನ್! ಹೆಂ ಚಿಂತುನ್ ತಳ್ಮಟ್ಯಾಕ್ ಮಾರ್‌ಲ್ಲೆಪರಿಂ ತೊ ನೀಟ್ ಜಾಲೊ.

ಸಿನೊಲೆಚಿಂ ಅರ್ಧಾಂ ಪರತ್ ಏಕ್ ಜಾಯ್ಜಯ್, ನಹಿಂ ತರ್ ತಾಣೆಂ ಮೆಲ್ಯಾರೀ, ಆಗ್ನೆಸ್ ಕುಂವರ್ನಿಕ್ ವಾಯ್ಟ್ ಘಡನಾಯೆ ಮ್ಹಣ್ ತಾಣೆಂ ನಿಚೆವ್ ಕೆಲೊ.

ಪುಣ್ ಖಂಯ್? ಕಶೆಂ?

ತಾಚಿ ತಕ್ಲಿ ವಿರಾರ್ ಜಾಲಿ.

ತ್ಯಾ ವಿರಾರಾಯೆಕ್ ದುಸ್ರ್ಯಾಚ್ ದಿಸಾ, ಖುದ್ ಟಿಪ್ಪು ಸುಲ್ತಾನಾನ್ ಕ್ರೂರ್ ವಾರೆಂ ಘಾಲೆಂ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel