‘ಬಾಪಾಚೆ ಪುತಾಚೆ ನಾಂವಿಂ’ ನಿರ್ಮಾಪಕಾಚ್ಯಾ ಮಾತ್ಯಾಕ್ ತೊಪಿ, ಪ್ರೇಕ್ಷಕಾಂಚ್ಯಾ ದೊಳ್ಯಾಂಕ್ ಮಾತಿ?!

Disclaimer – ವಾಚ್ಪ್ಯಾಂಚ್ಯಾ ಗುಮಾನಾಕ್:

ಪರತ್ ಏಕ್ ಖಡಕ್ ವಿಮರ್ಸೊ ಉದೆಲಾ. ಅಸಲೊ ವಿಮರ್ಸೊ ಕರುಂಕ್ ಖಂಡಿತ್ ಸಂತೊಸ್ ಆಸನಾ. ಬರೆಂ ಆಸ್‍ಲ್ಲೆಂ ಬರೆಂ ಮ್ಹಣೊಂಕ್ ಆಮಿ ಸದಾಂಚ್ ಮುಖಾರ್. ಪುಣ್ ಥೊಡೆ ಪಾವ್ಟಿಂ, ಅನಿವಾರ್ಯ್ ಜಾತಾನಾ, ಜರ್ ಏಕ್ ಸಂಗತ್ ಭಾಶೆಕ್ ವಾ ಸಮುದಾಯಾಕ್ ಬಾಧಕ್ ಮ್ಹಣ್ ಭೊಗ್ತಾನಾ ತೆಂ ಖಂಡನ್ ಕರ್ಚೆಂಯೀ ಆಮ್ಚೆಂ ಕರ್ತವ್ಯ್. ತಸಲ್ಯಾ ವಸ್ತುನಿಷ್ಠ್ ಠಿಕೆಂಕ್ ‘ಬುಡ್ಕುಲೊ’ ನಾಂವಾಡ್ಲಾ. ಆನಿ ಕೊಂಕ್ಣಿ ಸಿನೆಮಾಂ ವಿಶಿಂ ಆಮಿ ದಿಲ್ಲೊ ಪ್ರಚಾರ್, ಪಾಟಿಂಬೊ ತಶೆಂ ಕೆಲ್ಲೊ ವಿಮರ್ಸೊ ಹೆರ್ ಕೊಣೆಂಚ್ ಕರುಂಕ್ ನಾ.

ಪಾಟ್ಲ್ಯಾ ವರ್ಸಾ ತೀನ್ ಕೊಂಕ್ಣಿ (ಮಂಗ್ಳುರಿ) ಫಿಲ್ಮಾಂ ರಿಲೀಸ್ ಜಾಲಿಂ. ತಾಣಿಂ ಭಾರಿಚ್ ಆವಾಜ್ ಕೆಲೊ, ಕೊಂಕ್ಣಿ ಫಿಲ್ಮಾಂಚೊ ಸುಗ್ಗೆ ಕಾಳ್ ಸುರ್ವಾತ್ಲಾ ಮ್ಹಣ್ ಥೊಡ್ಯಾಂನಿ ಆರಾಬಾಯ್ ದಿಲಿ. ಪುಣ್ ಹಕೀಗತ್ ಕಿತೆಂ? ನಿಷ್ಪಕ್ಷಪಾತ್ ಜಾವ್ನ್ ಉಲಂವ್ಚೆ ವಾ ಬರಂವ್ಚೆ ಹ್ಯಾ ಸಮಾಜೆಂತ್ ಭೋವ್ ವಿರಳ್ ಜಾಲ್ಯಾತ್. ಮುಖಸ್ತುತಿಚ್ ಚಡ್ ಹಾಂಗಾ. ಸತ್ ಕಿತೆಂ ಮ್ಹಳ್ಯಾರ್, ಹ್ಯಾ ತಿನಾಂ ಪಯ್ಕಿ ಏಕ್ ಸೊಡ್ಲ್ಯಾರ್ ಹೆರ್ ದೊನೀ ಫಿಲ್ಮಾಂ ಕೊಂಕ್ಣೆಚಿ ಮರ್ಯಾದ್ ಕಾಡ್ಚಿಂಚ್ ಜಾವ್ನಾಸ್‍ಲ್ಲಿಂ.

‘ಫೊಂಡಾಚೊ ಮಿಸ್ತೆರ್’ ಏಕ್ average ಫಿಲ್ಮ್, ತರೀ, ತಾಕಾ ದುರ್ಸೊಂಕ್ ಜಾಯ್ನಾ. ತೆಂ ಪಕ್ಕಾ ಏಕ್ ಕೊಮೆಡಿ ಆನಿ ಮನೋರಂಜನಾತ್ಮಕ್ ಫಿಲ್ಮ್. ಪುಣ್ ‘ಮೈ ಡಿಯರ್ ಫಾದರ್’ ಆನಿ ‘ಬಾಪಾಚೆ ಪುತಾಚೆ ನಾಂವಿಂ’ ಫಿಲ್ಮಾಂ ಆಸಾತ್ ನೆ, ಕಿತ್ಲಿಂ ಅಪಕ್ವ್ ಆನಿ ನಾಪಾಸ್ ಮ್ಹಳ್ಯಾರ್, ಹ್ಯಾ ಕಾಳಾರ್, ತೆಂಯೀ ತರ್ನಾಟೆ ಸಯ್ತ್ ಅಶೆಂ ಕಿತ್ಯಾಕ್ ವಾಟ್ ಚುಕ್ಲ್ಯಾತ್ ಮ್ಹಣ್ ಚುರ್ಚುರೆ ಭೊಗ್ಲೆ.

ಹೊ ವಿಮರ್ಸೊ ‘ಬಾಪಾಚೆ ಪುತಾಚೆ ನಾಂವಿಂ’ ಫಿಲ್ಮಾಚೊ. ಹ್ಯಾ ಫಿಲ್ಮಾನ್ ಜಾಯ್ತ್ಯೊ ನಕಾರಾತ್ಮಕತ್ ಸಂಗ್ತಿ ಉಜ್ವಾಡಾಕ್ ಹಾಡ್ಲ್ಯಾತ್. ಫಿಲ್ಮಾಚ್ಯಾ ನಾಂವಾರ್ ಕಸಲೊ ಮೋಸ್ ಕೊಡ್ಯಾಳಾಂತ್ ಚಲ್ತಾ ಮ್ಹಣ್ ಜಾಯ್ತೆ ಜಾಣಾಂತ್. ಹೊ ವೊಸೊ ಆಮ್ಚ್ಯಾ ಸಮಾಜೆಂತ್‍ಯೀ ರಿಗ್ಲಾ ಮ್ಹಳ್ಳೆಂ ದುಖಾಚಿ ಸಂಗತ್. ಆಸೊಂ, ಕೊಣೀ ದುಡು ದಿತಾ ಆನಿ ಘೆತ್ಲಲೊ ಬರೆಂ ಫಿಲ್ಮ್ ಕಾಡ್ತಾ ತರ್ ದುರ್ಸೊಂಕ್ ಅವ್ಕಾಸ್ ನಾ.

ಪುಣ್ ಹಾಂಗಾ ಜಾತಾ ತಿತ್ಲೆಂ ಕೀಳ್ ಫಿಲ್ಮ್ ಕಾಡ್ನ್, ತ್ಯಾ ವಯ್ರ್ ಹೆರಾಂಕ್ ಲ್ಹಾನ್ ಕರ್ನ್ ಉಲಯ್ಲ್ಯಾರ್ ಆಮಿ ಸೊಸುಂಕ್ ಜಾಯ್ನಾ. ಬಿಪಿಎನ್ ಫಿಲ್ಮಾಚ್ಯಾಂನಿ ಕೆಲ್ಲೆಂ ಹೈಪ್, ಭಟ್ಟಂಗಿಂ ಮುಖಾಂತ್ರ್ ಉಚಾರ್ಲೆಲಿಂ ವೈಭವಾಚಿಂ ಉತ್ರಾಂ, ಇಷ್ಟಾಂಚೊ ಹೊಗ್ಳಿಕೆಚೊ ಪ್ರಲಾಪ್ ಆನಿ ಸ್ವತಃ ಫಿಲ್ಮ್ ಮೇಕರಾಂಚಿ ಬಡಾಯ್ – ಹೆಂ ಸಗ್ಳೆಂ ಪರಿಶೀಲನ್ ಕರ್ತಾನಾ, ತಾಂಚೊ ಉದ್ದೇಶ್ ಬರೊ ಬಿಲ್ಕುಲ್ ನಾತ್‍ಲ್ಲೊ ಮ್ಹಣ್ ಸಮ್ಜತಾ. ತ್ಯಾ ವರ್ವಿಂಚ್ ಹೊ ವಿಮರ್ಸೊ ಉಬ್ಜಲಾ.

ಮಾನೆಸ್ತ್ ಮೈಕಲ್ ಸೊಜ್ ಆಮ್ಚ್ಯಾ ಸಮಾಜೆಚೊ ಏಕ್ ತಾರೊಕ್, ಆಶಾ ಕಿರಣ್ ಆನಿ ಫುಡಾರಿ. ಎದೊಳ್ ಪರ್ಯಾಂತ್, ಆಖ್ಖ್ಯಾ ಸಮಾಜೆಚೊ ಮುಖೆಲಿ ಮ್ಹಣ್ಚೆ ತಸಲಿ ಏಕ್ ವ್ಯಕ್ತಿ ಮ್ಹಾಕಾ ದಿಸೊಂಕ್ ನಾತ್‍ಲ್ಲಿ. (ಥೊಡ್ಯಾಂಕ್ ಜಾವ್ಯೆತೆಂ, ಪುಣ್ ತಾಣಿಂ ತೊ ಅವ್ಕಾಸ್ ಹೊಗ್ಡಾಯ್ಲೊ). ಮೈಕಲ್ ಸೊಜ್ ಹೊ ಊಣ್ ಭರ್ತಿ ಕರ್ಚೊ ತಾಂಡೆಲಿ. ಕಿತ್ಯಾಕ್ ಮ್ಹಳ್ಯಾರ್ ತೊ ರಾವ್ಳೆರಾಂನಿ ಮಾತ್ರ್ ಜಿಯೆನಾ. ನಿಮಾಣ್ಯಾಂತ್ಲ್ಯಾ ನಿಮಾಣ್ಯಾ ವ್ಯಕ್ತಿಕ್‍ಯೀ ಪಾಂವ್ಚೊ ಖಾಲ್ತೊ ಮನಿಸ್, ದಯಾಳ್ ವ್ಯಕ್ತಿ. ಥೊಡೆ ದಾನಿ, ಥೊಡ್ಯಾಂಕ್ ಮಾತ್ರ್ ಮಜತ್ ಕರ್ತಾತ್ (ತಾಂತುಂ ಜಾಯ್ತೆ ಜಣ್ ಅಯೋಗ್ಯ್ ಆಸ್ತಾತ್). ಪುಣ್ ಮೈಕಲ್ ಸೊಜ್ ಸಕ್ಡಾಂಕೀ ಮಜತ್ ದಿತಾ, ಉದಾರ್ ಮನ್ ಆನಿ ವಿಶಾಲ್ ಮನೋಭಾವಾನ್ ದಿತಾ. ಮಾಂಯ್‍ಭಾಸ್, ಮನಿಸ್, ಸಮುದಾಯ್ ಆನಿ ಆಖ್ಖ್ಯಾ ಸಮಾಜೆಚೊ ಹುಸ್ಕೊ ಆಸೊನ್ ಸರ್ವಾಂ ಖಾತಿರ್ ವ್ಹಡ್ ಮಾಪಾನ್ ದಾನ್ ಆನಿ ದೇಣ್ಗಿ ದಿಂವ್ಚೊ ಮಹಾನ್ ಮನಿಸ್ ತೊ.

ತಶೆಂ ಆಸ್ತಾಂ, ತಾಣೆಂ ಧಾ ಜಣಾಂಕ್ ಉಪ್ಕಾರ್ ಜಾಂವ್ದಿ ಮ್ಹಣ್ ವ್ಹಡ್ ಐವಜ್ (ಪಾಟಿಂ ಅಪೇಕ್ಷಿನಾಸ್ತಾನಾ) ದೀವ್ನ್ ಏಕ್ ಯೋಜನ್ ರುತಾ ಕೆಲ್ಯಾರ್ ತಾಚೊ ದುರುಪಯೋಗ್ ಜಾತಾ ಮ್ಹಳ್ಯಾರ್ ಕಶೆಂ ಒಪ್ಚೆಂ? ಕಿತ್ಯಾಕ್ ಸೊಸ್ಚೆಂ?

ಮೈಕಲ್ ಸೊಜಾನ್ ‘ಬಾಪಾಚೆ ಪುತಾಚೆ ನಾಂವಿಂ’ ಫಿಲ್ಮಾಕ್ ದಿಲ್ಲೊ ದುಡು ಪುರ್ತೊ ಫುಂಕ್ಯಾಕ್! ಪುಣ್ ತೆಂ ಫಿಲ್ಮ್ ಕಶೆಂ ಉದೆಲಾಂ ಮ್ಹಳ್ಯಾರ್ ಆಘಾತ್ ಜಾತಾ. ಬಡಾಯ್, ಪೊಕ್ಳೆ ಆನಿ ಗಪ್ಳಾಸ್ ಉಲಯಿಲ್ಲೆಂ ಸೊಡ್ಲ್ಯಾರ್ ತಾಂತುಂ ಸಾರ್ಕೆಂ ಕಾಮ್, ಪರಿಶ್ರಮ್ ಕುಸ್ಕುಟಾಚೆಂಯೀ ದಿಸನಾ. Passion ನಾಸ್ತಾನಾ ಕೆಲ್ಲೆಂ ಹರಕೆ ಸಂದಾಯಪರಿಂ ಆಸಾ, ತಿತ್ಲೆಂಚ್. ತಿತ್ಲ್ಯಾ ಬಜೆಟಿರ್ ಅಡೇಜ್ ಘಂಟ್ಯಾಂಚೆಂ ಆಪುರ್ಬಾಯೆಚೆಂ ಫಿಲ್ಮ್ ಕಾಡ್ಯೆತೆಂ. ಪುಣ್ ಹಾಂಗಾ ನಾಮ್‍ಕೇವಾಸ್ತೆ ಫಿಲ್ಮ್ ಕಾಡ್ಲಾಂ ತೆಂ ಪಕ್ಕಾ.

ತಶೆಂ ಪಳೆಂವ್ಕ್ ಗೆಲ್ಯಾರ್ ‘ಮೈ ಡಿಯರ್ ಫಾದರ್’ ಏಕ್ ಗಲೀಜ್ ಫಿಲ್ಮ್ ತರೀ, ನಿರ್ದೇಶಕ್ ಆನಿ ಪಂಗ್ಡಾನ್ ಬರಿಚ್ ವಾಂವ್ಟ್ ಕಾಡ್ಲ್ಯಾ, ಭೊಂಗ್ ಆಯ್ಲ್ಯಾತ್ ಮ್ಹಳ್ಳೆಂ ಉಟೊನ್ ದಿಸ್ತಾ ಫಿಲ್ಮಾಂತ್. ಪುಣ್ ಆಪ್ಣೆಂ ಹಾಲಿವುಡ್ ಲೆವೆಲಾಕ್ ಪಾವ್ಲ್ಯಾಂವ್ ಮ್ಹಳ್ಳೆಪರಿಂ ಬಂಡಲಾಂ ಮಾರ್ಲೆಲ್ಯಾ ‘ಬಿಪಿಎನ್’ ಫಿಲ್ಮಾನ್ ಗುಡೊ ಖೊಂಡುನ್ ಝರ್ಲೊ ಧರ್ಲಾ, ತಿತ್ಲೆಂಚ್.

ಹ್ಯಾ ಸಂದರ್ಭಾರ್, ಫಿಲ್ಮ್ ಪಳೆಲ್ಲ್ಯಾ ಹರ್ಯೆಕ್ಲ್ಯಾಂನಿ ಮ್ಹಾಕಾ ಫೀಡ್‍ಬ್ಯಾಕ್ ದಿಲ್ಲೆಂ ಫಕತ್ ಗಾಳಿ-ಸೊವೆ ಮಾತ್ರ್. ಗಾಂವ್ಚೆ ಆನಿ ಗಲ್ಫಾಂತ್ಲೆ ಮನಿಸ್ ಇತ್ಲೆ ಭಿಗಡ್ಲ್ಯಾತ್ ಮ್ಹಳ್ಯಾರ್ ಅಸಲೆಂ ಕಚ್ಡಾ ಸಿನೆಮಾ ಪಳೆಲ್ಲೆಂಚ್ ಜಿಣ್ಯೆಂತ್ ಕೆಲ್ಲೆಂ ಅತೀ ವ್ಹಡ್ ಮೂರ್ಖ್ ಕಾಮ್ ಮ್ಹಣಾಲೆ. ಆಪ್ಲ್ಯಾ ಪಾತ್ಯೆಣೆಕ್ ದಖೊ ಆನಿ ವಿಶ್ವಾಸಾಕ್ ಆಘಾತ್ ಜಾಲಾ ಮ್ಹಣ್ತಾತ್ ಸಬಾರ್.

ದೆಕುನ್ ಏಕ್ ಖಡಕ್ ವಿಮರ್ಸೊ ಬರಯ್ಲಾ. ಹೆಂ ಬರಪ್ ಕೊಣಾಯ್ ವಿರೋಧ್ ನ್ಹಯ್. ಖಚಿತ್ ಜಾವ್ನ್ ಸಾಂಗ್ತಾಂ, ವೈಯಕ್ತಿಕ್ ಜಾವ್ನ್ ಕಿತೆಂಚ್ ನಾ. ಫಕತ್ ವಿಷಯಾಚೆರ್ ಮಾತ್ರ್ ಹೆಂ ಬರಯ್ಲಾಂ. ವಾಸ್ತವ್ ಕಿತೆಂ ಮ್ಹಳ್ಯಾರ್, ಫಿಲ್ಮಾಚ್ಯಾ ನಾಂವಾಂನ್ ಪ್ರೇಕ್ಷಕಾಂಕ್ ಮಾತ್ರ್ ನ್ಹಯ್ ಆಮ್ಚ್ಯಾ ಸಮುದಾಯಾಕ್, ಸವೆಂ ಭಾಶೆಕ್‍ಯೀ ಲ್ಹಾನ್ ಕೆಲಾಂ, ಸವೆಂ ‘ವಂಚನ್’ ಜಾಲಾಂ ಮ್ಹಳ್ಳೆಂ ಸ್ಪಷ್ಟ್. ಮೈಕಲ್ ಸೊಜಾಚ್ಯಾ ದುಡ್ವಾಕ್ ಆನಿ ವಿಶ್ವಾಸಾಕ್ ದಖೊ ದಿಲಾ.

ದೆಕುನ್ ಹ್ಯಾ ಸರ್ವ್ ಸಂಗ್ತಿಂಚೆಂ ಪರಿಶೀಲನ್ ಮೈಕಲ್ ಸೊಜಾನ್, ಜೊಕ್ತ್ಯಾ ರಿತಿನ್ ಕರಿಜೆ ಮ್ಹಣ್ ‘ಬುಡ್ಕುಲೊ’ ಉಲೊ ದಿತಾ. ಹ್ಯಾ ಲೇಖನಾಚ್ಯಾ ನಿಮಾಣೆಂ ಹ್ಯಾ ವಿಶಿಂ ಆಗ್ರಹ್ ಆಸಾ.

-ಲೇಖಕ್

ಹಿ ಏಕ್ ನಿಜಾಯ್ಕೀ ಆಘಾತಾಚಿ ಗಜಾಲ್… ಕೆನರಾ ಕೊಂಕ್ಣಿ ಕಥೊಲಿಕ್ ಸಮುದಾಯಾಕ್ ಸಕ್ಡಾಂನಿಯೀ ‘ಚಿಲ್ಲರ್’ ವಾ ‘ಚೀಪ್’ ಮ್ಹಣ್ ಚಿಂತ್ಲಾಂ ಆನಿ ‘ನಾಲಾಯಕ್’ ಮ್ಹಣ್ ಘೆತ್ಲಾಂಗೀ ಮ್ಹಳ್ಳೊ ದುಬಾವ್ ಉದೆತಾ. ಆಮ್ಚೊ ಲೋಕ್ ಆನಿ ಹಾಂಗಾಚೆ ಮನಿಸ್ ‘ಲೆಕಾಕ್‍ಚ್ ನಾಂತ್’, ತಾಂಕಾಂ ಕಾಸಾಚೆಂ ಮೋಲ್ ನಾ ಮ್ಹಳ್ಳೆಂ ಧೋರಣ್ ಉಟೊನ್ ದಿಸ್ತಾ. ಅಸಲ್ಯೊ ಗಜಾಲಿ ದೊಳ್ಯಾಂ ಮುಖಾರ್ ಘಡ್ತಾನಾ ಕಶೆಂ ವೊಗೆ ರಾಂವ್ಚೆಂ? ಕಿತ್ಲೊ ತೇಂಪ್ ಸೊಸ್ಚೆಂ? ಹ್ಯಾ ಗೊಂದೊಳಾಂತ್ ಆಸ್ತಾನಾ, ಘಟ್ಟ್ ನಿಚೆವ್ ಕೆಲೊ, ತಾಳೊ ಉಬಾರಿಜೆಚ್ ಮ್ಹಣ್. ಆನಿ ಹ್ಯಾ ಸಂಗ್ತಿಂತ್ ಸಬಾರಾಂನಿ ಒತ್ತಾಯ್ ಕೆಲ್ಲಿಯೀ ಆಸಾ. ಅನ್ಯಾಯ್ ಖಂಡನ್ ಕರ್ಚೆಂ ಏಕ್ ಮಾತ್ರ್ ಕೊಂಕ್ಣಿ ಮಾಧ್ಯಮ್ ‘ಬುಡ್ಕುಲೊ’ ಮ್ಹಳ್ಳೆಂ ತೆ ಜಾಣಾಂತ್ ದೆಕುನ್ ತಾಂಚ್ಯಾ ವಿಶ್ವಾಸಾಕ್ ಧಿನ್ವಾಸ್.

ಆದ್ಲ್ಯಾ ವರ್ಸಾಚ್ಯಾ ಆಖ್ರೇಕ್ ದೋನ್ ಕೊಂಕ್ಣಿ ಫಿಲ್ಮಾಂ ಆಯ್ಲಿಂ. ದೊನೀ ಎಕಾ ಪ್ರಾಸ್ ಆನ್ಯೇಕ್ ಲೋ ಕ್ಲಾಸ್ ಫಿಲ್ಮಾಂ! ಆಸೊಂ, ತಾತಾಂಚಿ ಶ್ಯಾಥಿ ತಿತ್ಲಿಚ್ ಮ್ಹಣ್ ಸೊಸ್ಯೆತೆಂ. ಪುಣ್ ನಾ, ಆಪ್ಣೆಂ ಚಾರ್ಕಂಡ್ ದೀವ್ನ್‌ಯೀ ಮೃಷ್ಟಾನ್ನ ಭೋಜನ ದಿಲಾಂ ಮ್ಹಳ್ಳೆಪರಿಂ ಪೆಂಪಾರೆಂ ವ್ಹಾಜಂವ್ಚೆಂ ಎಕಾ ಕುಶಿನ್ ತರ್, ಆಪುಣ್‍ಂಚ್ ಸರ್ವಶ್ರೇಷ್ಠ್, ಹೆರ್ ಸರ್ವ್ ನಿಕೃಷ್ಟ್ ಮ್ಹಣ್ಚೆಂಯೀ ಪಳೆಂವ್ಕ್ ಮೆಳ್ಳೆಂ. ದೆಕುನ್ ಹಾಂವೆಂ ಲಿಖ್ಣಿ ಪಾಜಿಜೆಚ್ ಪಡ್ಲೆಂ.

ಎದೊಳ್‍ಚ್ ಕಳಯ್ಲಾಂ, ಮ್ಹಾಕಾ ಸ್ಟ್ಯಾನಿ ಬೇಳಾನ್ ಆಪ್ಲ್ಯಾ ‘ಬಾಪಾಚೆ ಪುತಾಚೆ ನಾಂವಿಂ’ ಸಿನೆಮಾಕ್ ಆಪಯಿಲ್ಲೆಂ ಆನಿ ರಿವ್ಯೂ ಬರಯ್ ಮ್ಹಣ್‍ಯೀ ಆಹ್ವಾನ್ ದಿಲ್ಲೆಂ. ಮಾಂಡ್ ಸೊಭಾಣಾಚ್ಯಾ ಗದ್ದಾಳಾಯೆಚ್ಯಾ ‘ಅಸ್ಮಿತಾಯ್’ ಫಿಲ್ಮಾಚೆರೀ ಹಾಂವೆಂ ‘ವಿಮರ್ಸೊ ಬರಯ್ನಾ’ ಮ್ಹಣ್ ಚಿಂತ್‍ಲ್ಲೆಂ, ಪುಣ್ ತ್ಯಾ ಫಿಲ್ಮ್ ತಯಾರಕಾಂನಿ ದಿಲ್ಲ್ಯಾ ಸ್ಟೇಟ್‍ಮೆಂಟಾಂಕ್ ಲಾಗೊನ್ ಖಡಕ್ ವಿಮರ್ಸೊ ಬರಯ್ಜೆಚ್ ಪಡ್ಲೊ. ಆತಾಂಯೀ, ನಿರ್ದೇಶಕ್ ಸ್ಟ್ಯಾನಿ ಬೇಳಾನ್ ಉಚಾರ್ಲೆಲೆಂ ಆಯ್ಕೊನ್ ತಾಚ್ಯಾ ಫಿಲ್ಮಾಚೊ ವಿಮರ್ಸೊ ಕರಿಜೆಚ್ ಮ್ಹಣ್ ಭೊಗ್ಲೆಂ.

ಎಕಾ ವರ್ಸಾ ಥಾವ್ನ್ ಸೋಶಿಯಲ್ ಮೀಡಿಯಾಂತ್ ಖುದ್ ಸ್ಟ್ಯಾನಿ ಬೇಳಾನ್ ಕೆಲ್ಲೊ ಪ್ರಚಾರ್, ದಿಲ್ಲೆಂ ಬಿಲ್ಡಪ್ ಪಳೆವ್ನ್ ಕಾಂಯ್ ಏಕ್ ಅದ್ಭುತ್ ಸಿನೆಮ್ ರಚುನ್ ಆಸಾತ್ ಮ್ಹಣ್ ಭೊಗ್ತಾಲೆಂ. ಸ್ಟ್ಯಾನಿ ಸ್ವತಃ ಏಕ್ ವಿಮರ್ಶಕ್, ಚಿಂತ್ಪಿ ಮ್ಹಳ್ಳೆಂ ತಾಚಿಂ ಫೇಸ್‍ಬುಕ್ ಬರ್ಪಾಂ ಸಾಕ್ಸ್ ದಿತಾತ್. ಪತ್ರಾಂನಿಯೀ ತೊ ನಿರಂತರ್ ಬರವ್ನ್ ಆಸಾ. ಚಡಾವತ್ ತಾಣೆಂ ಕರ್ಚೆಂ ವಿಶ್ಲೇಷಣ್ ವಾ ವಿಮರ್ಸೊ. ರಾಜಕೀಯ್ ಪಾಡ್ತಿ, ಮುಖೆಲಿ, ಅಧಿಕಾರಿ, ಸರ್ಕಾರ್, ಪ್ರಧಾನಿ, RSS ಮಾತ್ರ್ ನ್ಹಯ್ ಅಮೆರಿಕಾಚ್ಯಾ ಅಧ್ಯಕ್ಷಾಚಿಯೀ ಠಿಕಾ ಕರ್ಚಿ ತಾಂಕ್ ಆಸ್ಚ್ಯಾ ಸ್ಟ್ಯಾನಿ ಥಂಯ್ ಊಂಚಿ ಕಾಣಿಯೆಗಾರ್ ಆಸಾ ಮ್ಹಣ್ ಹಾಂವ್ ಭರ್ವಸ್ತಾಲೊಂ.

ತೆಂ ಸರ್ವ್ ಧರ್ಣಿಕ್ ಶೆವ್ಟಲಾಂ. ತಾಚ್ಯಾ ಎಕಾಚ್ ಸಿನೆಮಾ ವರ್ವಿಂ ತಾಚೆರ್ ಆಸ್‍ಲ್ಲೊ ಸರ್ವ್ ಭರ್ವಸೊ ವ್ಹಾಳೊನ್ ಗೆಲೊ…

ಕಾರಣ್ – ತಾಚೆಂ ‘ಬಾಪಾಚೆ ಪುತಾಚೆ ನಾಂವಿಂ’ ಸಿನೆಮ್. ಇತ್ಲೆಂ ಉತಳ್ ಸಿನೆಮ್ ರಚುನ್, ತಾಚೆ ವಯ್ರ್ ಆಪ್ಣೆಂ ಹಾಲಿವುಡ್ ಸ್ಟೈಲಿರ್ ರಚ್ಲಾಂ ಮ್ಹಳ್ಳೆಪರಿಂ ಸ್ಟೇಟ್‍ಮೆಂಟ್ ದಿಲ್ಲೆಂ ಪಳೆತಾನಾ ಹಾಂಗಾ ಸತ್ ಖಂಚೆಂ ಫಟ್ ಖಂಚೆಂ ಮ್ಹಣ್ ತೀರ್ಮಾನ್ ಕರುಂಕ್ ಕಷ್ಟ್ ಮಾರ್ತಾತ್.

ತರ್ ಫಿಲ್ಮ್ ತಿತ್ಲೆಂಯೀ ಪಾಡ್ ಆಸಾಗೀ ಮ್ಹಣ್ ಕೊಣೀ ವಿಚಾರ್ತಾತ್ ತರ್, “ಬಿಲ್ಕುಲ್ ವ್ಹಯ್. ಕೊಂಕ್ಣೆಂತ್ ಆಯ್ಲೆಲ್ಯಾ ಬಜೀ ಬುರ್ನಾಸ್ ಫಿಲ್ಮಾಂ ಪಯ್ಕಿ ಪಯ್ಲ್ಯಾ ಸ್ಥಾನಾಕ್ ಸ್ಪರ್ಧೊ ದಿಂವ್ಚ್ಯಾ ಮಟ್ಟಾಚೆಂ ಸಿನೆಮ್ ಹೆಂ” ಮ್ಹಣ್ ಸಾಂಗ್ತಾಂ. ತೆ ರುಜು ಕರುಂಕ್‍ಚ್ ಹೆಂ ಬರಪ್.

ಸೆನ್ಸಾರ್ ಸರ್ಟಿಫಿಕೇಟ್ ದಾಕಯ್ನಾಸ್ತಾನಾ ಸುರು ಜಾಲ್ಲೆಂ ಫಿಲ್ಮ್ ಪಳೆತಾನಾ (ಸೆನ್ಸಾರ್ ಸರ್ಟಿಫಿಕೇಟಿಂತ್ ದುಸ್ರೆಂ ಕಿತೆಂಯೀ ನ್ಹಯ್ ತರೀ, ಫಿಲ್ಮಾಚಿ ಅವ್ಧಿ (duration) ಕಿತ್ಲಿ ಮ್ಹಣ್ ಹಾಂವ್ ಪಳೆತಾಂ) ಸುರ್ವೆರ್‌ಚ್ ಕೀಡ್ ಕಾಂತಂವ್ಕ್ ಲಾಗ್ಲಿ ಮ್ಹಾಕಾ. ಟೈಟಲ್ ಕಾರ್ಡಾಂಚಿ ಸೊಭಾಯ್, ತಿ ಲಾಂಬಾಯ್-ರುಂದಾಯ್ ಆನಿ ತಡವ್ ಪಳೆತಾನಾ ಮ್ಹಾಕಾ ದೋನ್ ಚಿಂತ್ನಾಂ ಆಯ್ಲಿಂ – ಏಕ್, ಹ್ಯಾ ಫಿಲ್ಮಾಂತ್ ಅದ್ಭುತ್ ಕಿತೆಂಗೀ ಆಸ್ತೆಲೆಂ, ದುಸ್ರೆಂ, ಹ್ಯಾ ಫಿಲ್ಮಾಂತ್ ಪಳೆಂವ್ಚೆ ತಸಲೆಂ ಕಾಂಯ್ಚ್ ನಾ ಕೊಣ್ಣಾ – ಮ್ಹಜೆಂ ಹಣೆಬರಪ್, ದುಸ್ರೆಂಚ್ ಸತ್ ಜಾಲೆಂ. (ಟೈಟಲಾಂಚಿ ಲದಿನ್ ತಿತ್ಲಿ ಲಾಂಬ್ ಕಿತ್ಯಾಕ್ ಮ್ಹಳ್ಳೊ ಘುಟ್ ಉಪ್ರಾಂತ್ ಕಳ್ಳೊ).

ಜಲ್ದಿ ವಿಕೆಟ್ – ಫಸ್ಟ್ ಬಾಲಾಂತ್‍ಚ್ LBW!

ಜಬರ್ದಸ್ತ್ ಆವಾಜಾನ್ ಫಿಲ್ಮ್ ಸುರು ಜಾತಾ. ಕಾಜಾರಾಚ್ಯಾ ಸಿಲ್ವರ್ ಜುಬಿಲಿಚೊ ಸಂಭ್ರಮ್, ರಾತಿಕ್. ಎಕಾಚ್ಛಾಣೆಂ ಟ್ವಿಸ್ಟ್! ದುಸ್ರ್ಯಾ ಸಕಾಳಿಂಚೊ ಡೈಲಾಗ್ ಆಯ್ಕೊನ್ ಆಂಗಾರ್ ಮುಯೊ ಚರ್‌ಲ್ಲೆಪರಿಂ ಭೊಗ್ಲೆಂ! ಆವಯ್-ಬಾಪಯ್ ಆದ್ಲ್ಯಾ ದಿಸಾ ಲಗ್ನಾಚೊ ರುಪ್ಯೋತ್ಸವ್ ಆಚರ್ಸಿತಾತ್. ಬಾಪಯ್ ಧುವೆಕ್ ಸಕಾಳಿಂ ಮ್ಹಣ್ತಾ, “ತೆಂ ಪೂರಾ ಆಸೊಂ… ಪೊರ್ವಾಂ ತುಜೊ 25ವೊ ಬರ್ತ್‍ಡೇ, ಗ್ರ್ಯಾಂಡ್ ಕರ್ಯಾಂ…”

ಅಕ್ಕಲ್ ಆಸ್ಲೆಲ್ಯಾ ಹರ್ಯೆಕ್ಲ್ಯಾಕ್ ಹೊ ಡೈಲಾಗ್ ಆಯ್ಕೊನ್ ‘ಎಬೇ, ಶೀ’ ಮ್ಹಣ್ ಲಜ್ ಭೊಗ್ಲಿ. (ಮ್ಹಜೆ ಲಾಗಿಂ ಉಲಯಿಲ್ಲ್ಯಾ ಹರ್ಯೆಕ್ಲ್ಯಾನ್ ಹೆಂಚ್ ಸಾಂಗ್ಲಾಂ). ಉಪ್ರಾಂತ್ ಕಾಣಿ ವೆವೆಗ್ಳೆ ಟ್ವಿಸ್ಟ್ ಘೆವ್ನ್ ಮುಂದರುನ್ ವೆತಾ ಮ್ಹಣ್ತಾನಾಂಚ್ ರಪಕ್ಕ ಇಂಟರ್ವಲ್!! ‘ಹೆಂ ಕಿತೆಂ?’ ಮ್ಹಣ್ ಸ್ವಯ ಆಸ್ಲೆಲ್ಯಾ ಸಕ್ಡಾಂಕ್ ವಿಜ್ಮಿತ್ ಜಾಲ್ಲೆಂ. ಮಾಗಿರ್ ಕಶೆಂಯೀ ಸಿನೆಮ್ ಮುಂದರುನ್ ವಿಚಿತ್ರ್ ಘುಂವ್ಡ್ಯೊ ಆಟಾಪುನ್ ಫ್ಲ್ಯಾಶ್‍ಬಾಕಾಕ್ ವಚೊನ್ ಸಂಪ್ತಾ. ಪುರ್ತಿ ಅವ್ಧಿ ಪಾವ್ಣೆಂ ದೋನ್ ಘಂಟೆಯೀ ನಾಂತ್ (102 ಮಿನುಟಾಂ ಮ್ಹಣ್ ತಾಣಿಂಚ್ ಸಾಂಗ್ಲಾಂ). ಇತ್ಲೆಂಯೀ ಮಟ್ವೆಂ ಏಕ್ ಫಿಲ್ಮ್‌ಗೀ!??

ಅದ್ಭುತ್ ಬ್ಯಾಕ್‍ಗ್ರೌಂಡ್ ಸ್ಕೋರ್ (BGM)

ಏಕ್ ಬರಿ ಗಜಾಲ್ ಪಯ್ಲೆಂಚ್ ಸಾಂಗ್ತಾಂ. ಹ್ಯಾ ಫಿಲ್ಮಾಂತ್ ಆಸ್ಚೆಂ ಊಂಚಿ ಕಿತೆಂಗೀ ಮ್ಹಳ್ಯಾರ್ ತಾಚೆಂ ಬ್ಯಾಕ್‍ಗ್ರೌಂಡ್ ಮ್ಯೂಸಿಕ್ ಮಾತ್ರ್. ಕಶೆಂ ‘ಅಸ್ಮಿತಾಯ್’ ಮ್ಹಳ್ಳ್ಯಾ ಲಾಚಾರ್ ಫಿಲ್ಮಾಕ್ ಕ್ಯಾಜೆಟನ್ ಡಯಾಸಾಚ್ಯಾ ವಂಡರ್‌ಫುಲ್ ಮ್ಯೂಸಿಕಾನ್ ಜೀವ್ ದಿಲ್ಲೊಗೀ, ತಶೆಂಚ್ ‘ಬಾಪಾಚೆ ಪುತಾಚೆ ನಾಂವಿಂ’ ಫಿಲ್ಮಾಂತ್ ಸಂಜಯ್ ರೊಡ್ರಿಗಸಾಚೆಂ ಅದ್ಭುತ್ ಬಿಜಿಎಂ ಆಸೊನ್, ಪ್ರೇಕ್ಷಕಾಂಚಿ ಸಂಭಾವ್ಯ್ ನೀದ್ ಧಾಂವ್ಡಾಯ್ತಾ. ಹೆಂ ಕ್ಲಾಸ್ ಮ್ಯೂಸಿಕ್ ನಾತ್‍ಲ್ಲೆಂ ತರ್ ಪಳೆಂವ್ಕ್ ಹ್ಯಾ ಸಿನೆಮಾಂತ್ ಕಾಂಯ್ ನಾ.

Twist with Deception!

ಹಾಂ, ಹಾಂ… ಕಳ್ಳೆಂ ಕಳ್ಳೆಂ. ತುಮ್ಚೆ ಪಯ್ಕಿ ಜಾಯ್ತೆ ಜಣ್ ‘ವಯ್ಲೊ ಡೈಲಾಗ್ ಸಿನೆಮಾಂತ್ ನಾಂಚ್ ನಾ, ತಾಂತುಂ ಬಾಪಯ್ 24ವೊ ಬರ್ತ್‍ಡೇ ಮ್ಹಣ್ತಾ, ಸಬ್‍ಟೈಟಲಾಂತ್‍ಯೀ ತೊಚ್ ಸಂಖೊ ದಿಲಾ’ ಮ್ಹಣ್ ಉದ್ಗಾರ್ ಕಾಡ್ತೆಲ್ಯಾತ್! ವ್ಹಯ್ ತುಮಿ ಸಾಂಗ್ಚೆಂ ಸಾರ್ಕೆಂ. ಸತ್ ಕಿತೆಂ ಮ್ಹಳ್ಯಾರ್ ತುಮಿ ಪಳೆಲ್ಲ್ಯಾ ಫಿಲ್ಮಾಂತ್ ಹೊ ಡೈಲಾಗ್ ಧರುನ್ ಅರ್ಧ್ಯಾ ಡಜನಾ ವಯ್ರ್ ದೃಶ್ಯಾಂನಿ ಎಡಿಟ್ ಕೆಲ್ಲೆ ಡೈಲಾಗ್ಸ್ ದಾಕಯ್ಲ್ಯಾತ್. ಮ್ಹಳ್ಯಾರ್ ಎಕ್‍ಚ್ ಫಿಲ್ಮ್ ದೋನ್ ರುಪಾಂನಿ ಪ್ರದರ್ಶನಾಕ್ ಪಡ್ಲಾಂ!

ಸಮ್ಜಲೆಂ ನಾಂಗೀ? ಘುಟ್ ಇತ್ಲೊಚ್. ಪಯ್ಲೊ ಪ್ರೀಮಿಯರ್ ಶೋ ಮ್ಹಣ್ ನಿರ್ಮಾಪಕ್, ಬಿಸ್ಪ್ (ತೊ ತ್ಯಾ ದೀಸ್ ಯೇಂವ್ಕ್ ನಾ), ಧಾರಾಳ್ ಪಾದ್ರಿ-ಮಾದ್ರಿಂ, ವಿಐಪಿ, ಮಾಧ್ಯಮಾಂಚೆ, ಮಿತ್ರ್, ಸಾಂಗೊಡಿ ಆನಿ ಭಿತರ್ಲೆ ಮ್ಹಣ್ ಲಗ್ಬಗ್ 300 ಜಣಾಂಕ್ ಆಪವ್ನ್ ದಾಕಯಿಲ್ಲೆಂ ಫಿಲ್ಮ್ಂಚ್ ವೆಗ್ಳೆಂ, ಉಪ್ರಾಂತ್ ಘಾಲ್ಲ್ಯಾ ಶೋಂನಿ ದಾಕಯಿಲ್ಲೆಂ ಫಿಲ್ಮ್ಂಚ್ ವೆಗ್ಳೆಂ. ಹಾಂತುಂಚ್ ಕಳ್ತಾ ಕಿತ್ಲೆಂ ‘ಡಿಸೆಪ್ಶನ್’ ಚಲ್ಲಾಂ ವಾ ‘ವಂಚನ್’ ಜಾಲಾಂ ಮ್ಹಣೊನ್.

ವ್ಹಯ್, ಫಿಲ್ಮ್ ಎಡಿಟ್ ಕೆಲಾಂ! ಕೆದ್ನಾಂ ಮ್ಹಳ್ಯಾರ್, ಪಯ್ಲೆಂಚೆಂ ಎಡಿಟ್ ಕರಿನಾತ್‍ಲ್ಲೆಂ ಫಿಲ್ಮ್ ಮಾನಾಚೆ, ಘನಾಚೆ ಸಯ್ರೆ ಮ್ಹಣ್ ಆಪಯ್ಲೆಲ್ಯಾಂಕ್ ದಾಕವ್ನ್ (ತಾಂಕಾಂ ತೀನ್ ಕಾಸಾಂಚೆಂ ಮೋಲ್ ನಾ!?), ಉಪ್ರಾಂತ್ ಆಯಿಲ್ಲೆಂ ಫೀಡ್‍ಬ್ಯಾಕ್ (ಸಕ್ಡಾಂನಿ ಚುಕಿಚ್ ದಾಕವ್ನ್ ದಿಲ್ಲ್ಯೊ) ಆಯ್ಕೊನ್ ಜಟ್‍ಪಟ್ ರೀರೆಕಾರ್ಡಿಂಗ್ ಕರ್ನ್ ಫಿಲ್ಮ್ ಬದ್ಲಿಲಾಂ. ಮ್ಹಳ್ಯಾರ್ ಮಹಾಜಣಾಂಕ್ ದಾಕಯಿಲ್ಲ್ಯಾ ಫಿಲ್ಮಾಂತ್ ತಿತ್ಲ್ಯೊ ಚುಕಿ, ಪ್ರಮಾದ್ ಆಸ್‍ಲ್ಲ್ಯೊ ‘ವ್ಹಯ್’ ಮ್ಹಣ್ ಫಿಲ್ಮ್ ಕಾಡ್ಲೆಲ್ಯಾಂನಿ ಟೆಸ್ಟಿಮೊನಿ ದಿಲ್ಲೆಪರಿಂ ಜಾಲೆಂ. “ವ್ಹಯ್, ಆಪ್ಣೆಂ ಪಯ್ಲೆಂ ದಾಕಯಿಲ್ಲೆಂ ಫಿಲ್ಮ್ ಗೋಬರ್, ಬುರ್ನಾಸ್… ಲೊಕಾನ್ ಥುಕ್‍ಲ್ಲ್ಯಾನ್ ಆಮಿ ಜಾತಾ ತಿತ್ಲೆಂ ತಿದ್ವಿಲೆಂ, ಸುಧ್ರಾಯ್ಲೆಂ…” ಮ್ಹಣ್ ಫಿಲ್ಮ್ ರಚ್ಣಾರಾಂನಿ ಅಫಿಡವಿಟ್ ದಿಲ್ಲೆಪರಿಂಚ್ ಜಾಲೆಂ ಹೆಂ.

ಹೆಂ ಮ್ಹಾಕಾ ಕಶೆಂ ಕಳ್ಳೆಂ ಮ್ಹಳ್ಯಾರ್ ಹಾಂವೆಂ ದೊನೀ ಫಿಲ್ಮಾಂ ಪಳೆಲ್ಯಾಂತ್! ಪ್ರೀಮಿಯರ್ ಶೋ ಪಳೆವ್ನ್ ಫೋನಾಂಚಿ ಖಾತಡ್. ಹರ್ಯೆಕ್ಲೊಯೀ ‘ವ್ಯಾಕ್, ಹೆಕ್ಕ್, ಥುಕ್’ ಕರಿಲಾಗ್ಲೊ (ಉಗ್ತ್ಯಾನ್ ಮಾತ್ರ್ ಸೈಲಾಪ್ ಉಲಯ್ಜೆ ಪಡ್ತಾ, ಮಜ್‍ಬೂರಿ ಮ್ಹಣ್ ತೆ ಒಪ್ಲೆ). ಸ್ಟ್ಯಾನಿ ಬೇಳಾಚಿ ಕಾಣಿ ಆನಿ ಫಿಲ್ಮ್ ಇತ್ಲ್ಯಾ ನಿಕೃಷ್ಟ್ ಮಟ್ಟಾರ್ ಉದೆತ್ ಮ್ಹಣ್ ಹಾಂವೆಂ ಕಲ್ಪನ್‍ಂಚ್ ಕರುಂಕ್ ನಾತ್‍ಲ್ಲೆಂ.

ಉಪ್ರಾಂತ್ಲ್ಯಾ ದಿಸಾಂನಿ ಮ್ಹಜೊ ಈಶ್ಟ್, ಎಕ್ಲೊ ಪಾದ್ರ್ಯಾಬ್ ಆಪ್ಲ್ಯಾ ಪಂಗ್ಡಾ ಸವೆಂ ಫಿಲ್ಮ್ ಪಳೆಂವ್ಕ್ ಯೆತಾಂ, ‘ತುಂಯೀ ಯೇ’ ಮ್ಹಣಾಲೊ. ತಶೆಂ ದುಸ್ರೆ ಪಾವ್ಟಿಂ ಪಳೆತಾನಾ ಖಚಿತ್ ಜಾಲ್ಲೆಂ ಇತ್ಲೆಂ ಕೀ, ರಿಪೇರಿ ಕೆಲ್ಲೆಂ ಫಿಲ್ಮ್ ಪ್ರದರ್ಶನಾಕ್ ಘಾಲಾಂ ಮ್ಹಣ್. ವಿಶೇಸ್ ಮ್ಹಳ್ಯಾರ್, ಅಶೆಂ ‘ರಿಪೇರಿ’ ಕೆಲ್ಲ್ಯಾನ್ ತಾಣಿಂ ಆಪ್ಣೆಂ ಪಯ್ಲೆಂ ಕೆಲ್ಲ್ಯೊ ಚುಕಿ ತಿದ್ವುಂಕ್ ನ್ಹಯ್, ಬಗಾರ್ ಲಿಪಂವ್ಕ್/ಫಟಂವ್ಕ್ ಪೆಚಾಡ್ಲ್ಯಾತ್ ಮ್ಹಣ್ ನಖ್ಖಿ ಜಾಲೆಂ.

ಯೆಸ್, ಫಟಯ್ಲಾಂ. ಎಕಾ ವರ್ಸಾ ಥಾವ್ನ್ ಬಿಲ್ಡಪ್ ದೀವ್ನ್, ಹೈಪ್ ಕರ್ನ್ ‘ಗುಜಿರಿ’ ಫಿಲ್ಮ್ ದಾಕಯ್ಲಾಂ ತರ್, ತಾಣಿಂ ಇತ್ಲೊ ತೇಂಪ್ ಕೆಲ್ಲೆಂ ಕಿತೆಂ ಮ್ಹಳ್ಳೆಂ ಸವಾಲ್ ಉದೆತಾ. ಹೆ ಪೂರಾ ಇತ್ಲೆ ಬುದ್ವಂತ್, ಹೆಳ್‍ಲ್ಲೆ, ಜಾಣಾರಿ ಆಸೊನ್‍ಯೀ ತಿತ್ಲ್ಯೊ ಚುಕಿ ಕಶೆಂ ಉದೆಲ್ಯೊ? ಕಿತ್ಯಾಕ್ ತ್ಯೊ ಚುಕಿ ಆಡಾಂವ್ಕ್ ಕೊಣೆಂಯೀ ಕಿತೆಂಯೀ ಕೆಲೆಂ ನಾ?

ಹಿ ಕಾಣಿ ನ್ಹಯ್, ಅಸ್ಕತ್ ಪಿಂರ್ಗೊಣಿ!

ಹಾಂ, ಫಕತ್ ಡೈಲಾಗ್ ನ್ಹಯ್, ಸಗ್ಳ್ಯಾ ಫಿಲ್ಮಾಚೆಂ ಹಣೆಬರಪ್ ಸಾಂಗ್ತಾಂ. ಹೆಂ ನಿಜಾಯ್ಕೀ ಖಂಚ್ಯಾ ವರ್ಗಾಚೆಂ ಫಿಲ್ಮ್ ಮ್ಹಣ್ ಸಾಂಗೊಂಕ್ ಕಷ್ಟ್. ಸಾಮಾಜಿಕ್ ಸಮಸ್ಸೊ ವಾ ಕುಟ್ಮಾಂತ್ಲ್ಯಾ ಗಜಾಲಿಂಚೆರ್ ಫಿಲ್ಮ್ ಕಾಡ್ಚೆಂ ಪ್ರಯತ್ನ್ ಮ್ಹಣ್ ತೆಚ್ ಸಾಂಗ್ತಾತ್. ಪುಣ್ ಫಿಲ್ಮ್ ಮಾತ್ರ್ ಕ್ರೈಮ್ ಥ್ರಿಲ್ಲರಾಪರಿಂ ಕಾಡ್ಲಾಂ. ಸಸ್ಪೆನ್ಸ್ ಎಲಿಮೆಂಟ್ಸ್ (?) ಘಾಲುನ್ ಪಕ್ಕಾ ಕ್ರಿಮಿನಲ್ ಕಾಸ್ತಾಚಿ ಮೂವಿ ಮ್ಹಳ್ಳೆಪರಿಂ ಸರ್ಕಸ್ ಕೆಲಾಂ.

ಆಸೊಂ, ಪುಣ್ ತಾಂತುಂ ಯಶಸ್ವಿ ಜೊಡ್ಚ್ಯಾ ಬದ್ಲಾಕ್ ಶೆಣ್ ಘಾಲ್ಲೆಂಚ್ ದಿಸ್ತಾ.

ದೋನ್ ಪಾತ್ರ್, ಮ್ಹಾತಾರ್‍ಯಾಂಚೆ, ಕಾಣಿಯೆಚೆ ಮುಖ್ಯ್ ಗಾಂಚ್ (ನಟ್: ರೊನ್ಸ್ ಲಂಡನ್ ಆನಿ ಡಯಾನ್ ಮುಖಾಮಾರ್). ಹಾಂಚೆ ಮುಖಾಂತ್ರ್ ಕಾಂಯ್ ಮಲಯಾಳಮಾಂತ್ಲೆಂ ಪ್ರಖ್ಯಾತ್ ‘ದೃಶ್ಯಂ’ ಸಿನೆಮ್ ರಿಮೇಕ್ ಕೆಲಾಂ ಮ್ಹಣ್ ಚಿಂತ್ಲಾಂ ಆಸ್ತೆಲೆಂ ಮಾನೆಸ್ತಾಂನಿ… ಪುಣ್ ಹೆಂ ಏಕ್ ಪಕ್ಕಾ ಚೀಪ್ ರೇಟ್ ಸರ್ಕಸ್. ಕಾಂಯ್ ಇಸ್ಕೊಲ್ ವಾ ಕೊಲೆಜಿಚ್ಯಾ ಸ್ಕಿಟ್ ಸ್ಪರ್ಧ್ಯಾಂನಿ ಖೆಳವ್ನ್ ದಾಕವ್ಯೆತೆ ತಸಲಿ ಕಾಣಿ ಹಿ. ಕಿತ್ಯಾಕ್ ಮ್ಹಳ್ಯಾರ್ ಥಂಯ್ ಏಕ್ ಪಾವ್ಟಿಂಕ್ ಮಾತ್ರ್ ಖೆಳವ್ನ್ ದಾಕಂವ್ಚೆಂ. ವಿಮರ್ಸೊ ಕರುಂಕ್ ಅಸಾಧ್ಯ್. ಡಿಸೆಪ್ಶನ್ ತಂತ್ರ್ ವಾಪಾರುನ್ ಜಡ್ಜಾಂಕ್ ಇಂಪ್ರೆಸ್ ಕರುನ್ ಅಂಕ್ ಜೊಡ್ಲ್ಯಾರ್ ಇನಾಮ್ ಜೊಡ್ಯೆತ್ ಜಾಲ್ಲಿ ಕಲಾ. ತಿತ್ಲೆಂಚ್.

ಹೆ ದೋಗ್ ಪಾತ್ರ್, ಪ್ರಾಯ್ವಂತಾಂಚ್ಯಾ ಆಸ್ರ್ಯಾಂತ್ಲೆ ವ್ಯಕ್ತಿ, ಕಾಣಿಯೆಚೆ ಮುಖ್ಯ್ ಪಾತ್ರ್ ಜಾವ್ನಾಸ್ಚ್ಯಾ ಕುಟ್ಮಾಕ್ ರೆವ್ಡತಾತ್. ಪಯ್ಲ್ಯಾ ದೃಶ್ಯಾಂತ್‍ಚ್ ಹಾಂಚೆಂ ಯೆಣೆಂ ಜಾತಾ. ಕಥಾ ನಾಯಕ್ (ವಾಲ್ಟರ್ ನಂದಳಿಕೆ), ತಾಚಿ ಧುವ್, ನಾಯಕಿ (ಸ್ವೀಡಲ್ ಸೊಜ್) ಆನಿ ಹ್ಯಾ ದೋನ್ ಪಾತ್ರಾಂಚಿ ಮುಖಾಮುಖಿ, ಜುಗಲ್‍ಬಂಧಿಚ್ ಫಿಲ್ಮಾಚೆಂ ತೀರ್ಲ್. ಪುಣ್ ಕಥಾ ಬಾಂಧುನ್ ಹಾಡ್‍ಲ್ಲಿ ರೀತ್, ವಿಣ್‍ಲ್ಲಿ ಗತ್ ಮಾತ್ರ್ ತೀರ್-ತಿರ್ಕುಟ್!

ಪ್ರೇಕ್ಷಕಾಂಕ್ ಇಂಪ್ರೆಸ್ ಕರ್ತಾಂವ್ ಮ್ಹಣ್, ಥ್ರಿಲ್ಲರ್-ಸಸ್ಪೆನ್ಸ್ ಫಿಲ್ಮಾಪರಿಂ, ಸಯ್ರೆ ಜಾವ್ನ್ ಆಯಿಲ್ಲೆ ಹೆ ದೋಗ್ ಮ್ಹಾತಾರೆ ‘ಕಾಣೆ’ ಜಾತಾತ್. ಉಪ್ರಾಂತ್ಲೊ ತಾಂಚ್ಯಾ ಸೊಧ್ನೆಚೊ ಸಗ್ಳೊ ನಾಟಕ್ ಬಜೀ ಹಾಸ್ಯಾಸ್ಪದ್. ಆಮ್ಚೊ ಲೋಕ್ ಬೆಪ್ಪಾ, ಕೊಂಕ್ಣಿ ಪ್ರೇಕ್ಷಕ್ ಶತಮೂರ್ಖ್ ಮ್ಹಳ್ಳೆಂ ಭೊಗಪ್ ವಾ ತೀರ್ಮಾನ್ ಕರ್ನ್‍ಂಚ್ ಫಿಲ್ಮ್ ಅಶೆಂ ಕಾಡ್ಲಾಂ ಆನಿ ದಾಕಯ್ಲಾಂ ಮ್ಹಣ್ಚ್ಯಾಂತ್ ದುಬಾವ್‍ಚ್ ನಾ.

ಪಾತ್ರೀಕರಣಾಂತ್ಲಿ ಘುಸ್ಪಡ್ ಆನಿ ಸಲ್ವಣ್

ಕಥಾ ನಾಯಕ್ ಲ್ಹಾನ್‍ಪಣಾಲ್ಯಾ ಕಾರಣಾಂಕ್ ಲಾಗೊನ್ ಪ್ರಾಯ್ವಂತಾಂಕ್ ಕಾಂಠಾಳ್ತಾ. ತಾಚಿ ಧುವ್ ಬಾಪಾಯ್ಚಿಂ ವ್ಹಡಿಲಾಂ ನಾತ್ಲೆಲ್ಯಾನ್ ವಾಟೆರ್ ಪಳೆಲ್ಲ್ಯಾ ಪ್ರಾಯ್ವಂತಾಂಚೆರ್ ‘ಮೊಗಾರ್’ ಪಡ್ತಾ! (ಬಾಪಾಯ್ಚ್ಯಾ ಕುಟ್ಮಾಂತ್ ಆಜೊ ಆಜಿ ನಾತ್ಲ್ಯಾರ್ ಕಿತೆಂ, ಆವಯ್ಚ್ಯಾ ಕುಟ್ಮಾಂತ್ ಆಜೊ-ಆಜಿ ನಾತ್‍ಲ್ಲಿಂಗೀ ಮ್ಹಣ್ ವಿಚಾರ್ಚೆಪರಿಂ ನಾ!). ಜುಬ್ಲೆವಾ ವೆಳಾರ್ ಜಾಲ್ಲ್ಯಾ ಡ್ರಾಮಾ ಉಪ್ರಾಂತ್, ದುಸ್ರ್ಯಾ ಸಕಾಳಿಂ ಧುವ್ ಬಾಪಯ್ ಲಾಗಿಂ ಮಾಫ್ ಮಾಗ್ತಾ. ಪುಣ್ ಪರತ್ ತೆಂ ಬಾಪಯ್ ವಿರೋಧ್ ರಫ್-ಟಫ್ ಜಾತಾ. ಹೆಂ ಟ್ವಿಸ್ಟ್ ಕಶೆಂ ಮ್ಹಣ್ ಕಾಣಿಯೆಗಾರಾನ್‍ಂಚ್ ಸಾಂಗಜೆ.

ಹಟಾಕ್ ಪಡ್‍ಲ್ಲೆಂ ಧುವ್, ತ್ಯಾಚ್ ‘ಆಬಾಂಕ್’ ಆಸ್ರ್ಯಾ ಥಾವ್ನ್ (ಬಹುಶಃ ಡೊನಾಲ್ಡ್ ಟ್ರಂಪಾನ್ ವೆನೆಜುವೆಲಾ ಅಧ್ಯಕ್ಷಾಕ್ ಉಕಲ್ನ್ ಹಾಡ್‍ಲ್ಲೆಪರಿಂ) ಆಸ್ರ್ಯಾ ಥಾವ್ನ್ ಶೀದಾ ಘರಾಂತ್‍ಚ್ ಹಾಡ್ನ್ ದವರ್ತಾ. ಪಯ್ಲೆ ಪಾವ್ಟಿಂ ತಾಂಕಾಂ ಪಳೆವ್ನ್ ಖುಬಾಳೊನ್ ಉಚಾಂಬಳ್ ಜಾಲ್ಲೊ ನಾಯಕ್, ಆತಾಂ ಮಾತ್ರ್ ಏಕ್‍ದಮ್ ಥಂಡ್ ಪ್ರತಿಕ್ರಿಯಾ ದಿತಾ. ತ್ಯಾ ‘ಭಿಕಾರಿಂಕ್’ ಘರಾಂತ್ ಸತ್ಕಾರ್ ಕರಯ್ತಾ…

ದುಸ್ರ್ಯಾ ಸಕಾಳಿಂ ಪರತ್ ಏಕ್ ಟ್ವಿಸ್ಟ್ (ಹ್ಯಾ ಫಿಲ್ಮಾಂತ್ ರಾತ್ ವಚೊನ್ ದೀಸ್ ಉಜ್ವಾಡ್ತಾನಾಂಚ್ ಘುಂವ್ಡ್ಯೊ ಉದೆಂವ್ಚೆಂ ಏಕ್ ಫಾರ್ಮುಲಾಗೀ ಕಾಕತಾಳೀಯ್‍ಗೀ ಕಳನಾ!).

ಸಯ್ರೆ ಆಗಂತುಕ್ ಕಾಣೆ ಜಾಲ್ಯಾತ್. ಆತಾಂ ಸುರು ಜಾತಾ ಅಸ್ಲಿ ಪ್ರಹಸನ್! ಕಾಣಿಯೆಗಾರಾಚಿ ಜಾಣ್ವಾಯ್ ಉಮಾಳೊನ್ ಆನಿ ನಿರ್ದೇಶಕಾಚಿ ಬುದ್ವಂತ್ಕಾಯ್ ಉಸ್ಪೊನ್ ಹಿಂ ದೃಶ್ಯಾಂ ಉದೆಲ್ಯಾಂತ್!! ‘ದೃಶ್ಯಂ’ ಸಿನೆಮಾ ‘ಡಿಸೆಪ್ಶನ್’ ಫಿಲೊಸೊಫಿಚೆರ್ ಉದೆಲಾಂ. ದೆಕುನ್ ‘ಬಿಪಿಎನ್’ ಸಿನೆಮಾಂತ್‍ಯೀ ಪ್ರೇಕ್ಷಕಾಂಕ್ ಡಿಸೆಪ್ಶನ್ ದಾಕಂವ್ಕ್ ನಿರ್ದೇಶಕ್ ಖಂಡಾಪಟ್ಟೆ ಒದ್ದಾಡ್ಲಾ. ಪುಣ್ ನಿಮಾಣೆಂ ಆಪುಣ್ ಕಿತ್ಲೊ ಫ್ಲಾಪ್ ಮ್ಹಣ್ ತಾಣೆಂಚ್ ರುಜು ಕೆಲಾಂ.

ಮ್ಹಾತಾರೆ ನಾಪತ್ತೆ ಜಾಲ್ಲ್ಯಾ ಪಾಟ್ಲ್ಯಾನ್ ವೆವೆಗ್ಳಿ ಸಾಧ್ಯತಾ ಆಸ್ಯೆತ್ ಮ್ಹಣ್ ಕೆಲ್ಲ್ಯಾ ಸರ್ಕಾಸಾಕ್ ಕುಸ್ಕುಟಾಚೆಂ ರಾಜಾಂವ್ ನಾ. ಏಕ್ ಸಾಧ್ಯತಾ, ತಾಂಕಾಂ ಮಾರ್ಕುನ್ (ವಾಲ್ಟಿಚೊ ಪಾತ್ರ್) ಸಹಾಯಕಾ (ಮೆಲ್ಲುಚೊ ಪಾತ್ರ್) ಮುಖಾಂತ್ರ್ ಲಿಪಯ್ಲಾಂ; ದುಸ್ರಿ ಸಾಧ್ಯತಾ ತಾಂಚಿ ಖುನ್ ಕೆಲ್ಯಾ – ವೀಕ್ಷಕಾಂನಿ ಅಶೆಂ ಚಿಂತಿಜೆ ಮ್ಹಣ್ ವಾಂವ್ಟ್ ಕಾಡ್ಲ್ಯಾ.

ವಾಲ್ಟಿನ್ (ಉಗ್ತ್ಯಾನ್ ಸಾಂಗ್‍ಲ್ಲ್ಯಾ ಪ್ರಕಾರ್) ‘ಏಕ್ ಮರ್ಡರ್ ಸೀನ್ ಆಸಾ’ ಮ್ಹಳ್ಳೆಂ ಹಾಂವೆಂ ಆಯ್ಕಲಾಂ. ಮಾರ್ಕು ಏಕ್ ಗ್ರೇಸ್ತ್ ಕಾರ್ಬಾರಿ. ಪುಣ್ ತಾಚ್ಯಾ ಡೈಲಾಗಾಂತ್ ತಶೆಂ ಕ್ಯಾರೆಕ್ಟರೈಸೇಶನಾಂತ್ ಖರಿ ಗ್ರೇಸ್ತ್‌ಕಾಯ್ ನಾ. ಮರ್ಡರ್ ಸೀನ್ ಆಸ್ಯೆತ್ ಮ್ಹಳ್ಳ್ಯಾ ಸರ್ಕಸಾಂತ್ ತಾಚ್ಯಾ ಬನಿಯನಾಚ್ಯಾ ಎಕಾ ಭಾಗಾಂತ್ ಮಾತ್ರ್ ರಗ್ತಾಚೊ ರಂಗ್ ಸಾರಯ್ಲಾ. ಪೈಂಟ್ ಕಾಡ್ತೆಲ್ಯಾಚ್ಯಾ ಹಾತಾಂ-ಬೊಟಾಂಕ್ ಚಡ್ ಪೈಂಟ್ ಲಾಗಜೆ… ತಾಚ್ಯಾ ಬಾಯ್ಲೆಚ್ಯಾ ಎಕಾ ಪಾಯಾಚೆರ್ ಇಲ್ಲೊಸೊ ‘ರಂಗ್’ ಘಾಲಾ. “ಹೆಂ ಕಿತೆಂ?” ಮ್ಹಣ್ ಮುಖ್ಲೊ ಪಾತ್ರ್ ವಿಚಾರ್ತಾನಾ, “ಹೆ ಹೆ… ಪೆಟ್ಯಾಚ್ಯಾ ಘುಡಾಕ್ ಪೈಂಟ್ ದಿತಾಲೊಂ…” ಮ್ಹಣ್ತಾ ಸಾವ್ಕಾರ್!

ಪೈಂಟ್ ಕಾಡುಂಕ್ ಜಣ್ ಕರ್ಚೆ ತಿತ್ಲಿ ಗತ್ ನಾತ್‍ಲ್ಲೊ ಪಿಟ್ಟಾಸಿ ಸಾವ್ಕಾರ್‌ಗೀ ಹೊ ಮ್ಹಣ್ ತುಮಿ ಅಜ್ಯಾಪ್ಲ್ಯಾರ್ ತಾಕಾ ಜಾಪ್ ನಾ!

ಡೈಲಾಗಾಂತ್ ಆಪ್ಲ್ಯಾ ಧುವೆಚೊ ಜಲ್ಮಾ ದೀಸ್ ವೆಗ್ಳೊಚ್ ಸಂಭ್ರಮ್ ಕರುಂಕ್ ವೆಚೊ ಬಿಂದಾಸ್ ಮಾರ್ಕು, ಪೆಟ್ಯಾಚ್ಯಾ ಘುಡಾಕ್ ಪೈಂಟ್ ಕಾಡುಂಕ್ ಖರ್ಚುಂಕ್ ಬಿಕ್ಕತಾ! ಗ್ರೇಸ್ತ್ ಪಾತ್ರ್ ರಚ್ತಾನಾ ತಾಚಿಂ ಉತ್ರಾಂ ಆನಿ ವರ್ತನ್ ತಾಕಾ ತಾಳ್ ಪಡಜೆ ಮ್ಹಳ್ಳಿ ಸಮ್ಜಣಿ ನಾತ್ಲ್ಯಾರ್ ಕಶೆಂ?

ಆಬ್ ದೊಗೀ ಉಜ್ವಾಡ್ಚ್ಯಾ ಪಯ್ಲೆಂಚ್ ಘರಾಂತ್ಲೆಂ ನಪಂಯ್ಚ್ ಜಾಲ್ಯಾತ್. ತ್ಯಾ ಉಪ್ರಾಂತ್ ಧುವ್ ಆನಿ ಬಾಪಾಯ್ಚೆಂ ಘರ್ಷಣ್ ಚಲ್ತಾ, ಕಿತೆಂ ಪೂರಾ ಘಡ್ತಾ. ಕಿತ್ಲ್ಯಾಗೀ ವೆಳಾ ಉಪ್ರಾಂತ್ ಘೊವ್ ಆನಿ ಬಾಯ್ಲ್, ಘರಾ ಪಾಟ್ಲ್ಯಾನ್ ವಚೊನ್ ಕಿತೆಂ ಮಾಸ್ ಶಿಂದುಂಕ್ ಗೆಲ್ಲಿಂಗೀ? ಫಾಂತ್ಯಾ ಪಯ್ಲೆಂಚ್ ಜರ್ ಮರ್ಡರ್ ಕೆಲಾಂ ತರ್ ಪರತ್ ಕಿತ್ಯಾಕ್ ರಗ್ತಾಕ್ ಆಪಡ್ಚೆಂ? ಕಾಂಯ್, ಆದ್ಲ್ಯಾ ಕಾಳಾರ್ ರೊಸಾ ದಿಸಾ ದುಕ್ರಾಕ್ ಸಾಂಜೆ ಪಯ್ಲೆಂಚ್ ಬಾಂಧುನ್ ಘಾಲ್ನ್ ರಾತಿಂ ಮಧ್ಯಾನೆರ್ ಸುರಿ ಘಾಲ್ಚೆಪರಿಂ, ಫಾಂತ್ಯಾರ್ ಬಾಂಧುನ್ ಘಾಲ್ಲ್ಯಾ ತ್ಯಾ ಮ್ಹಾತಾರ್‍ಯಾಂಚಿ ಗೊಮ್ಟಿ ದಿಸಾ ಉಜ್ವಾಡಾಕ್ ಲುಂವ್ಲಿ ಮ್ಹಣ್ ಪ್ರೇಕ್ಷಕಾಂನಿ ಚಿಂತಿಜೆಗೀ?

ತೆಂ ಎಕಡ್ಚ್ಯಾನ್ ತರ್, ಮೆಲ್ಲುಚೊ ಪಾತ್ರ್ ನಿಜಾಯ್ಕೀ ಪ್ರಶ್ನಾರ್ಹ್. ತೊ ಎಕಡ್ಚ್ಯಾನ್ ಸುರಿಯೆಚೊ ಘುಟ್ಮಳ್ ರಚ್ತಾ, ಸೆಜಾರ್ಚ್ಯಾ (ತೆಂ ಘರ್ ಖಂಯ್ ಆಸಾ ಮ್ಹಳ್ಳೆಂಚ್ ಸವಾಲ್) ಘರ್ಚ್ಯಾ ಸಿಸಿಟಿವಿಚೆಂ ಹಾರ್ಡ್ ಡಿಸ್ಕ್‌ಚ್ ಉಸ್ಳಾಯ್ತಾ! ಥಂಯ್ ಹಾಂಗಾ ಭೊಂವ್ತಾ, ಪೊಲಿಸ್ ಸ್ಟೇಶನಾಕ್‍ಯೀ ಪಾವ್ತಾ. ತಾಚೊ ಅವ್ತಾರ್ ಮರ್ಡರ್ ಪಕ್ಕಾ ಮ್ಹಣ್ ಗವಾಯ್ ದೀಂವ್ಕ್ ಪೆಚಾಡ್ತಾ.

ಆನ್ಯೇಕ್ ಕಿರ್ಕೊಳ್ ಗಜಾಲ್ ಮ್ಹಳ್ಯಾರ್, ಧುವ್ ಆನಿ ಸಾಂಗಾತಿಣ್ (ಗಾವ್ಪಿಣ್ ಜೋಶಾಲ್) ನಾಪತ್ತೆ ಜಾಲ್ಲೆಲ್ಯಾಂಚ್ಯಾ ಸೊಧ್ನೆರ್ ಗಾಂವ್‍ಭರ್ ಭೊಂವ್ತಾತ್. ವಾಟೆರ್ ಬಯ್ಲಾಂತ್ ‘ದುಕ್ರಾ’ಚಿ ಹತ್ಯಾ ಜಾಲ್ಲೆ ಕಡೆನ್ ಆಸ್ಚೆಂ ದೃಶ್ಯ್ (ಡೈಲಾಗ್ಸ್) ಬಜೀ ಚೀಪ್ ಗಿಮಿಕ್. ವಿಚಿತ್ರ್ ಮ್ಹಳ್ಯಾರ್ ರಿಕ್ಷಾರ್ ವಚೊನ್ ಆಸ್ಚಿಂ ತಿಂ, ಎಕಾಚ್ಛಾಣೆಂ ‘ರಿವರ್ಸ್’ ವೆತಾತ್. ಬಾಂಯ್ತ್ ಪುಣೀ ಪಡ್ಲ್ಯಾತ್ ಆಸ್ಯೆತ್ (ಲೊಟುನ್ ಘಾಲಾಂ ವಾ ಉಡ್ಲ್ಯಾತ್ ಕೊಣ್ಣಾ?) ಮ್ಹಣ್ ತಿಳುಂಕ್ ವೆತಾತ್. ಇತ್ಲ್ಯಾಕೀ, ರಿಕ್ಷಾರ್ ಶೀದಾ ವಚೊನ್ ಆಸ್ಲೆಲ್ಯಾಂಕ್ ರಸ್ತ್ಯಾ ದೆಗೆಕ್ ಘರ್ ಆಸೊನ್ ತಾಚ್ಯಾ ಪಾಟ್ಲ್ಯಾನ್ ಆಸ್‍ಲ್ಲಿ ಬಾಂಯ್ ಕಶೆಂ/ಕೆದಾಳಾ ದಿಸ್ಲಿ? ಪಾತ್ರಾಕ್ ದಿಸ್‍ಲ್ಲಿಗೀ ವಾ ನಿರ್ದೇಶಕಾನ್ ಪಯ್ಲೆಂಚ್ ಬಾಂಯ್ ಪಳೆಲ್ಲ್ಯಾನ್ ತಶೆಂ ದೃಶ್ಯ್ ವಿಣ್ಲೆಂಗೀ? ಬಾಂಯ್ ದಿಸಜೆ ಆಸ್‍ಲ್ಲಿ ರಿಕ್ಷಾಂತ್ಲ್ಯಾ ದೊಗಾಂ ಪಯ್ಕಿ ಎಕ್ಲ್ಯಾಕ್ – ಹೆಂ ಮಿನಿಮಮ್ ಬೇಸಿಕ್ಸ್ ಕಳಿತ್ ನಾಸ್ತಾನಾ ಫಿಲ್ಮ್ ಕಾಡ್ಚೆಂಗೀ? (ಇತ್ಲ್ಯೊ ಕಿರ್ಕೊಳ್ ಗಜಾಲಿ ಕಳಿತ್ ನಾಂತ್, ಪುಣ್ ಬಡಾಯ್ ಉಲಂವ್ಚ್ಯಾಕ್ ಮೀತ್ ನಾ! ಹೆರಾಂಚೆಂ ಸರ್ವ್ ನಾಟಕ್, ತರ್ ಹೆಂ ಪೂರಾ ಕಿತೆಂ?).

ಆನಿ ನಿಮಾಣೆಂ, ರಾತಿಂಚ್ಯಾ ವೆಳಾರ್ ಮ್ಹಾತಾರೆ ಮೆಳ್ತಾತ್. ಹಾಂಗಾಚೊ ನಾಟಕ್ ಆನಿಕೀ ಸಿಲ್ಲಿ! ದೀಸ್ ಆನಿ ರಾತ್, ಆಪ್ಣಾಚ್ಯಾ ಉಸ್ತುವಾರಿಂತ್ ಆಸ್ಲೆಲೆ ಮ್ಹಾತಾರೆ ದಿಸನಾಂತ್, ತಾಂಕಾಂ ಕಿತೆಂ ಜಾಲಾಂ ಕೊಣ್ಣಾ ಮ್ಹಳ್ಳ್ಯಾ ಖಂತಿನ್, ದುಖಿನ್ ಆಸ್‍ಲ್ಲಿ ನಾಯಕಿ, ದೊಗಾಂಕೀ ಪಳೆಲ್ಲೆಂಚ್ ಸಮಾಧಾನಾಚೊ ಉಸ್ವಾಸ್ ಸೊಡ್ಚ್ಯಾ ಬದ್ಲಾಕ್ ರಾಗಾನ್ ‘ನಾಗಿಣ್’ ಜಾತಾ. ಪಾಟಿಂ ಫುಡೆಂ ಪಳೆನಾಸ್ತಾನಾ ಗಾಳಿ ಸೊವ್ತಾ. ಹೆಂ ಪರಿವರ್ತನ್ ಕಶೆಂ ಜಾಂವ್ಚೆಂ?

ತೆ ದೊಗೀ ಕಶೆಂ, ಕಿತ್ಯಾಕ್ ಥಂಯ್ ಪಾವ್ಲೆ ಮ್ಹಣ್ ಸಯ್ತ್ ವಿಚಾರ್ ಕರಿನಾಸ್ತಾನಾ ತೆಂ ತಾಂಚೆರ್ ಖುಬಾಳ್ತಾ, ಆನಿ ಬಾಪಾಯ್ಕ್ ಸಡನ್ಲಿ ಡಿಫೆಂಡ್ ಕರ್ತಾ. ಬಾಪಯ್‍ಚ್ ಸಾರ್ಕೊ ಆನಿ ಚುಕಿದಾರ್ ತೆಚ್ ಮ್ಹಣ್ ವಕಾಲಾತ್ ಉಚಾರ್ತಾ. ರೀಸನಿಂಗ್, ಲಾಜಿಕ್, ಸೆನ್ಸ್ ಮ್ಹಳ್ಳೆಂ ಹ್ಯಾ ಸಗ್ಳ್ಯಾ ಫಿಲ್ಮಾಂತ್ ಖಂಯ್ಸರೀ ದಿಸನಾ.

ಟ್ವಿಸ್ಟ್ ಆನಿ ಸಸ್ಪೆನ್ಸ್ ಮ್ಹಳ್ಳೆಂ ಅಪಹಾಸ್ಯ್

ತಿತ್ತುನ್ ಪರ್ಯಾಂತ್ ಬಾಪಾಯ್ಕ್ ಕಾಂಠಾಳ್ಚೆಂ ಧುವ್, ಅಪರಿಚಿತ್ ಮ್ಹಾತಾರ್‍ಯಾಂಕೀ ಮಯ್ಪಾಸಾನ್ ಪಳೆಂವ್ಚೆಂ ಚೆಡುಂ, ಕಿತ್ಯಾಕ್ ಎಕಾಚ್ಛಾಣೆಂ ಪಳ್ಟಿ ಮಾರ್ತಾ!? ತರ್ ಎಕಾ ಪಾತ್ರಾಕ್ ಥಿರಾಸಾಣ್ (Stability) ಮ್ಹಳ್ಳೆಂಚ್ ನಾಂಗೀ? ಪಾತ್ರಾಂನಿ ಪರ್ನಗೊಂಜಿ ಪಿರ್ನಗೊಂಜಿ ವರ್ತನ್ ಕರ್ಚೆಂ ಅದ್ಭುತ್ ಕಥನಾಚಿ ವ್ಹಡ್ವಿಕಾಯ್‍ಗೀ?

ಉಟ್ತಾ ಬಸ್ತಾನಾ ಪಲ್ಟಿ ಮಾರ್ಚೆಂ ಹೆಂ ಚೆಡುಂ ಖಂಚ್ಯಾ ಆಧಾರಾನ್ ತ್ಯಾ ಅನಾಥ್ ಮನ್ಶ್ಯಾಂಚ್ಯಾ ಮೊಗಾರ್ ಪಡ್ತಾ, ಆನಿ ತಾಂಕಾಂ ದೊದೋನ್ ಪಾವ್ಟಿಂ ಘರಾ ಆಪವ್ನ್ ಹಾಡ್ತಾ? ಅಸಲಿ ಕ್ಷುಲ್ಲಕ್ ಕಾಣಿ, ಪ್ಯಾಥೆಟಿಕ್ ಪಾತ್ರೀಕರಣ್ ಆಖ್ಖ್ಯಾ ಸಂಸಾರಾಂತ್ ದುಸ್ರಿ ಆಸ್ಚಿ ನಾ.

ಸಗ್ಳ್ಯಾ ಫಿಲ್ಮಾಚೆಂ ಹಾಸ್ಯಾಸ್ಪದ್ ಕ್ರಕ್ಸ್ ಮ್ಹಳ್ಯಾರ್ ಪುತಾಕ್ ಬಾಪಾಯ್ಚಿ ಆನಿ ಬಾಪಾಯ್ಕ್ ಪುತಾಚಿ ಎಕಾಚ್ ಘಡಿಯೆ ವಳಕ್ ಮೆಳ್ಚಿ! ಹೆಂ ನಿಜಾಯ್ಕೀ ಸಾಂತ್ ಆಂತೊನಿಚೆಂಚ್ ಅಜ್ಯಾಪ್ ಆಸ್ಯೆತ್?!

ತ್ಯಾ ಆದಿಂ ದೋನ್ ಪಾವ್ಟಿಂ ತಾಂಚಿ ಮುಲಾಖಾತ್ ಜಾತಾ. ಪುಣ್ ಅಪರಿಚಿತ್‍ಚ್ (ಪ್ರೇಕ್ಷಕಾಂಕ್ ಫಟಂವ್ಕ್!?) ತೆ ಉರ್ತಾತ್. ಪುಣ್ ಕೋಮಾರ್ ಆಸ್‍ಲ್ಲೊ ಪೇಶೆಂಟ್ ಎಕಾಚ್ಛಾಣೆಂ ಮತಿರ್ ಆಯಿಲ್ಲೆಪರಿಂ ಮ್ಹಾತಾರೊ ಪುತಾಚ್ಯಾ ಕಾನ್ಸುಲಾಕ್ ವ್ಹಾಜಯ್ತಾ. ಆನಿ ಬಾಪಾಯ್ಚೊ ಹಾತ್ ಆಪ್ಲ್ಯಾ ಪೊಲ್ಯಾಕ್ ಸ್ಪರ್ಶ್ ಜಾಲ್ಲೆಂಚ್, ಕರೆಂಟ್ ಶಾಕ್ ದಿತಾನಾ ಮತಿರ್ ನಾತ್ಲೆಲ್ಯಾನ್ ಉಟ್ಚೆಪರಿಂ, ಭೋವ್ಶ್ಯಾ ಹಾತಾಚ್ಯಾ ಸ್ಪರ್ಶಾಚಿ ವಳಕ್ ಜಾವ್ನ್ ‘ಪಪ್ಪಾ’ಕ್ ಪೂತ್ ವಳ್ಕತಾ.

ಪುತಾಕ್ ಪುಣೀ ಬಾಪಾಯ್ಚಿ ವಳಕ್ ಮೆಳೊಂಕ್ ಸಾಧ್ಯ್ ಆಸಾ (ಮತಿಂತ್ ಗಯ್ರೊ ಉಡಾಸ್ ಆಸ್ಲ್ಯಾರ್), ಪುಣ್ ತ್ಯಾ ಮ್ಹಾತಾರ್ಯಾಕ್ ಕಶೆಂ ಪುತಾಚಿ ವಳಕ್ ಮೆಳ್ಳಿ? ಪಯ್ಲ್ಯಾ ಆನಿ ದುಸ್ರ್ಯಾ (ಎಡಿಟ್ ಕೆಲ್ಲ್ಯಾ) ದೊನೀ ಫಿಲ್ಮಾಂನಿ ಜಾಪ್ ನಾ!

ಉಪ್ರಾಂತ್ಲ್ಯಾ ಫ್ಲ್ಯಾಶ್‍ಬ್ಯಾಕ್ ವರ್ವಿಂ ಪೂತ್ 12 ವರ್ಸಾಂಚೊ ಆಸ್ತಾನಾ ಬಾಪಾಯ್ಚೊ ಸಂಪರ್ಕ್ ತುಟ್ತಾ. (ತ್ಯಾ ಉಪ್ರಾಂತ್ ತಾಚೊ ಬೋರ್ಡಿಂಗಾಚೊ ಆನಿ ಇಸ್ಕೊಲ್, ಕೊಲೆಜಿಚೊ ಖರ್ಚ್ ಸಾಂತ್ ಆಂತೊನಿನ್‍ಂಚ್ ಪಳೆಲ್ಲೊ ಮ್ಹಣ್ ದಿಸ್ತಾ!). ಪ್ರಸ್ತುತ್ ದೃಶ್ಯ್ ತಾಚ್ಯಾ ಕಾಜಾರಾಚ್ಯಾ 25 ವರ್ಸಾಂ ಉಪ್ರಾಂತ್ಲೆಂ. ತಾಚೆಂ ಕಾಜಾರ್ 25 ವರ್ಸಾಂ ಪ್ರಾಯೆರ್ ಜಾಲ್ಲೆಂ ಮ್ಹಣ್ ಧರ್ಲ್ಯಾರೀ ಬಾಪಯ್ ಆನಿ ಪುತಾಚೊ ವೆಗ್ಳಾಚಾರ್ ಜಾವ್ನ್ ಮಿನಿಮಮ್ 38 ವರ್ಸಾಂ ಸಂಪ್ಲ್ಯಾಂತ್. ತ್ಯಾ 4 ದಶಕಾಂಚ್ಯಾ ಸುದೀರ್ಘ್ ಕಾಳಾಂತ್ ಎಕಾಮೆಕಾ ಸಂಪರ್ಕ್‍ಚ್ ನಾತ್‍ಲ್ಲ್ಯಾ ತ್ಯಾ ದೊಗಾಂಕ್ ಎಕಾಮೆಕಾಚಿ ವಳಕ್ ಎಕಾಚ್ ವೆಳಾರ್ ಮೆಳ್ಚಿ ಆಟ್ವೆಂ ಗ್ಲೋಬಲ್ ವಂಡರ್ ನ್ಹಯ್ ತರ್ ಆನಿ ಕಿತೆಂ?

ಕಾಣಿಯೆಗಾರಾನ್ ಸಾರ್ಕಿ ಕಾಣಿಯೀ ಬರಂವ್ಕ್ ನಾ, ತಾಚೆರ್ ಕುಸ್ಕುಟಾಚೊ ನಿಯಾಳ್‍ಯೀ ಕರುಂಕ್ ನಾ (ಆಪ್ಣೆಂ 25 ಪಾವ್ಟಿಂ ಬರವ್ನ್ 25 ಪಾವ್ಟಿಂ ಉಡಯ್ಲ್ಯಾ ಮ್ಹಣ್ ತಾಣೆಂಚ್ ಸಾಂಗ್ಲಾಂ!) ಮ್ಹಳ್ಳೆಂ, ಹೆಂ ಲಾಟ್ಟುಸ್ ಫಿಲ್ಮ್ ಉಚಾರ್ನ್ ಸಾಂಗ್ತಾ. ಪಯ್ಲ್ಯಾನ್ ಪಯ್ಲೆಂ ಬಾಪಾಯ್ಕ್ ಪುತಾಚೆರ್ ತಿರಸ್ಕಾರ್ ನಾತ್‍ಲ್ಲೊಚ್; ಬಗಾರ್ ಹುಸ್ಕೊ ಜರೂರ್ ಆಸ್‍ಲ್ಲೊ. ಬಾಯ್ಲ್ ಮೆಲ್ಯಾರ್ ದುಸ್ರೆಂ ಕಾಜಾರ್ ಜಾಂವ್ಚೆಂ ಮಹಾಪ್ರಾಧ್ ನ್ಹಯ್. ಮೌಶೆನ್ (ಬಾಪಾಯ್ಚ್ಯಾ ದುಸ್ರ್ಯಾ ಪತಿಣೆನ್) ಭುರ್ಗ್ಯಾಕ್ ಕಾಂಠಾಳ್ಚೆಂ ಸಹಜ್, ಪುಣ್ ತೆಂ ಚಡಾವತ್ ಆಪ್ಣಾಕ್ ಭುರ್ಗಿಂ ಜಾಲ್ಯಾ ಉಪ್ರಾಂತ್. ಹಾಂಗಾ ತಶೆಂ ನಾ. ತಿಣೆಂ ಸಾಂಗ್ಲೆಂ ಮ್ಹಣ್ ಚೆರ್ಕ್ಯಾಕ್ ಹೊಸ್ಟೆಲಾಂತ್ ಸೊಡ್ತಾ ಬಾಪಯ್. ಪುಣ್ ತೊ ಪುತಾಕ್ ಪುರ್ತೊ ವಿಸ್ರತಾ ಕಿತ್ಯಾಕ್? ಕಸಲೆಂಚ್ ಸಕಾರಣ್ ನಾ.

ಆನಿಕೀ ವರ್ತೊ ಮಿಸ್ತೆರ್ ಮ್ಹಳ್ಯಾರ್, ತ್ಯಾ ಘೊವಾಕ್, ಮ್ಹಣ್ಜೆ ನಾಯಕಾಚ್ಯಾ ಬಾಪಾಯ್ಕ್, ತಿ ನವಿ ಪತಿಣ್ ಕಿತ್ಯಾಕ್ ಸಾಂಡ್ತಾ? ಪಾತ್ರಾಂನಿ ಅಸಲೆ ಭಿರಾಂಕುಳ್ ಅವ್ತಾರ್, ಮ್ಹಣ್ಜೆ ಅಸಹಜ್ ಟ್ವಿಸ್ಟ್, ಸಕ್ಡಾಂಕ್ ಧೊಸ್ತಾತ್. ಡಯಾನಾಚ್ಯಾ ಪಾತ್ರಾಚ್ಯಾ ಪುತಾಚಿ ಬಾಯ್ಲ್, ಮ್ಹಣ್ಜೆ ಮೆಲ್ವಿನ್ ಕಲಾಕುಲ್ ಪಾತ್ರಾಚಿ ಹೊಕಲ್, ಕಿತ್ಯಾಕ್ ತಿತ್ಲಿ ಕಠಿಣ್? ತೆಂ ತಗಡ್‍ಬೆಚ್ಚ ಮ್ಹಳ್ಳೆಂ ಪಯ್ಲೆಂಚ್ ಪ್ರೇಮಿಕ್ ಕಳಿತ್ ನಾತ್‍ಲ್ಲೆಂಗೀ? ರಾಜಾಂವ್ ನಾ. ತಾಚೊ ಮಾಂವ್ ಅನಾಥ್ ಜಾತಾ… ಜಾಲೆಂ, ಪುಣ್ ನಿಮಾಣೆಂ ತಾಚೊ ಪೂತ್ (ಮೆಲ್ವಿನಾಚೊ ಪಾತ್ರ್) ಸಯ್ತ್ ವಾಟೆರ್ ಪಡ್ತಾ. ಬಾಯ್ಲೆನ್ ತಾಕಾ ಕಿತ್ಯಾಕ್ ಸಾಂಡ್ಲೆಂ? ಕಿತ್ಯಾಕ್ ಸಕ್ಕಡ್ ಪಾತ್ರ್ ಇತ್ಲೆಯೀ ಡಿಫೆಕ್ಟಿವ್?! ಬಾಯ್ಲೊ ಪೂರಾ ಅನ್ನಾಡಿಚ್‍ಗೀ? ಆನಿಕೀ ಅದ್ಭುತ್ ಮ್ಹಳ್ಯಾರ್ ಸಕ್ಕಡೀ ಎಕಾಚ್ ಆಸ್ರ್ಯಾಂತ್ ಯೇವ್ನ್ ಪಡ್ತಾತ್!!

ಸಾರ್ಕೆಂ ಪಳೆಲ್ಯಾರ್ ಫಿಲ್ಮಾಂತ್ಲೆ ಚಡಾವತ್ ಪಾತ್ರ್ ವಿಲನ್‍ಂಚ್. ಕಿತ್ಯಾಕ್ ಹೆ Rogue ಪಾತ್ರ್?! ವಿಲನ್ ಜಾವ್ನಾಸ್ಲೆಲ್ಯಾನ್ Rogue ಆಸ್ಚೆಂ ಸಹಜ್.

ನಿಜಾಯ್ಕೀ ಹಿಚ್ ಕಾಣಿ ಆಪುರ್ಬಾಯೆನ್ ವಾಡವ್ಯೆತಿ. ಚೆರ್ಕ್ಯಾಕ್, ಅವ್ಗಡಾಂತ್ ಮರಣ್ ಪಾವ್ಲೆಲ್ಯಾ ಆವಯ್ಚೆರ್ ವಿಪ್ರೀತ್ ಮೋಗ್ ಆಸ್ತಾ. ತೆಂ ರುಜು ಕರುಂಕ್‍ಚ್, ಹೊಸ್ಟೆಲಾಕ್ ಧಾಡ್ಚ್ಯಾ ಸಂದರ್ಭಾರ್ ತಾಕಾ ಕಾರಾಂತ್ಲೆಂ ದೆಂವವ್ನ್ ಪರತ್ ಘರಾ ಧಾಡುನ್ ಆವಯ್ಚಿ ತಸ್ವೀರ್ ತೊ ಉಕಲ್ನ್ ಹಾಡ್ತಾ. ಆವಯ್ಚೊ ರೋಲ್ ತಿತ್ಲ್ಯಾರ್ ಕಾಬಾರ್! ಉಪ್ರಾಂತ್ ತಿಚೊ ಉಡಾಸ್ ಕಾಣಿಯೆಗಾರಾಕೀ, ನಿರ್ದೇಶಕಾಕೀ, ನಟ್-ನಟಿಂಕೀ ಯೇಂವ್ಕ್ ನಾ ಮ್ಹಳ್ಳೆಂ ಮಿಸ್ತೆರ್‌ಚ್ ಸಯ್.

ಆವಯ್ನ್ ಅವ್ಗಡಾಂತ್ ಮೊರ್ಚೆಂ ದೃಶ್ಯ್ ದಾಕವ್ನ್ ಆನಿ ತಿಚೊ ಫೊಟೊ ಪುತಾನ್ ವೆಂಗ್ಚೆಂ ಭಾವನಾತ್ಮಕ್ ಸನ್ನಿವೇಶ್ ವಿಣುನ್‍ಯೀ, ಉಪ್ರಾಂತ್ ತಿಕಾ ಅಪ್ರಸ್ತುತ್‍ಚ್ ಕರ್ನ್ ಸೊಡ್ಲೆಂ. ತ್ಯಾ ತಿತ್ಲ್ಯಾ ರೋಗ್ ಪಾತ್ರಾಂಕ್ ರಚ್ಚ್ಯಾ ಪ್ರಾಸ್ ನಾಯಕಾಚ್ಯಾ ಆವಯ್ಕ್ (ತಿ ಮೆಲ್ಯಾ ಉಪ್ರಾಂತ್ ತರೀ) ಆಪುರ್ಬಾಯೆನ್ ವಾಪಾರ್ಯೆತೆಂ. ತಿಕಾ ವಿಸ್ರಲ್ಲೆಂ ವಿಚಿತ್ರ್‌ಚ್ ಸಯ್.

ಮಾರ್ಕುನ್ ಆವಯ್ಚಿ ಫೊಟೊ ಜಗವ್ನ್ ದವರಿಜೆ ಆಸ್‍ಲ್ಲಿ. ತಿ, ನವ್ಯಾನ್ ಪ್ರಿಂಟ್ ಕರುನ್, ಆಪ್ಲ್ಯಾ ಬಂಗ್ಲ್ಯಾಂತ್ ಘಾಲಿಜೆ ಆಸ್‍ಲ್ಲಿ. ಆನಿ ಕೆದ್ನಾಂ ತಾಚೊ ಬಾಪಯ್, ಅಪರಿಚಿತ್ ಜಾವ್ನ್, ತ್ಯಾ ಘರಾಂತ್ ರಿಗ್ತಾ, ತೆದ್ನಾಂ ತಾಣೆಂ ಆಪ್ಲ್ಯಾ ಪತಿಣೆಚಿ ತಸ್ವೀರ್ ಪಳೆಲ್ಲೆಂ ದೃಶ್ಯ್ ವಿಣ್‍ಲ್ಲೆಂ ತರ್ (ಲಿಂಕ್ ಕನೆಕ್ಷನ್) ಹ್ಯಾ ಕಾಣಿಯೆಕ್ ಬರೊ ಅರ್ಥ್, ರಾಜಾಂವ್ ಆನಿ ರಿಚ್‍ನೆಸ್ ದಿತೆಂ ಆಸ್‍ಲ್ಲೆಂ. ತೆದ್ನಾಂ ತಾಕಾ ‘ಆಪುಣ್ ಆಪ್ಲ್ಯಾ ಪುತಾಗೆರ್ ಪಾವ್ಲಾಂ’ ಮ್ಹಣ್ ಖಚಿತ್ ಜಾವ್ನ್, ಉಪ್ರಾಂತ್ ಕಿತೆಂಯೀ ಸಸ್ಪೆನ್ಸ್ ಉರವ್ನ್ ಕಾಣಿ ಮುಂದರ್ಸಿಲ್ಲಿ ತರ್ ಹೆಂ ಫಿಲ್ಮ್ ಕಾಂಯ್ ಪುಣೀ ಸೊಭ್ತೆಂ.

ಪುಣ್, ಕಾಣಿ ಕಿತ್ಲಿ ಉತಳ್, ಅಸ್ವಾಭಾವಿಕ್ ಆನಿ ಕೇರ್‌ಲೆಸ್ ಮನೋಭಾವಾನ್ ರಚ್ಲ್ಯಾ ಮ್ಹಳ್ಳೆಂ ಹಾಂತುಂ ಉಟೊನ್ ದಿಸ್ತಾ.

ಹಾಂ, ತುಮ್ಕಾಂ ವಾಚ್ಪ್ಯಾಂನೊ ಇಲ್ಲೊಸೊ ಗೊಂದೊಳ್ ಉಟತ್. ತಿದ್ವಿಲ್ಲ್ಯಾ ಫಿಲ್ಮಾಂತ್ ಹ್ಯಾ ಥೊಡ್ಯಾ ಸಂಗ್ತಿಂಕ್ ಇಲ್ಲೆಶೆಂ ಸುಧ್ರಾಂವ್ಕ್ ಪಳೆಲಾಂ. ಪುಣ್ ಮೂಳ್ ಕಾಣಿಂಚ್ ತಾಳ್‍ಮೂಳ್ ಆನಿ ಗಾಂಡ್‍ತೋಂಡ್ ನಾತ್‍ಲ್ಲಿ ಜಾಲ್ಲ್ಯಾನ್, ಕುಂಬು ಬಾಗ್ಲಾಕ್ ಕಸಲೊ ರಂಗ್ ವೊಡ್ಲ್ಯಾರೀ ತೆಂ ಘರಾಕ್ ರಾಕೊಂಕ್ ಸಕನಾ ಮ್ಹಳ್ಳೆಪರಿಂ ಜಾಲ್ಯಾ ಹ್ಯಾ ಫಿಲ್ಮಾಚಿ ಗತ್. ಹ್ಯಾ ಗತ್ ಆನಿ ಮತ್ ನಾತ್‍ಲ್ಲ್ಯಾ ಕಾಣಿಯೆಕ್ ಆಸ್ರ್ಯಾಂತ್ಲ್ಯಾ ನಿವಾಸಿಂಚೆ ಸಂಕಷ್ಟ್ ದಾಕಂವ್ಕ್ ಪೆಚಾಡ್‍ಲ್ಲೆಂ ವ್ಯರ್ಥ್. ಫಿಲ್ಮಾ ಬದ್ಲಾಕ್ ಏಕ್ ಡೊಕ್ಯುಮೆಂಟರಿ ಕಾಡ್ಯೆತೆಂ!

ಪಾತ್ರಾಂನಿ ಟ್ವಿಸ್ಟ್ ವಾ ಬರವ್ಪ್ಯಾಚೆಂ ಅಸಹಾಯಕ್‍ಪಣ್?

ಫಿಲ್ಮಾನ್, ಪ್ರೇಕ್ಷಕಾಂಕ್ ಕಿತ್ಲೆಂ ಕೀಳ್ ಕರ್ನ್ ಘೆತ್ಲಾಂ ಮ್ಹಳ್ಳ್ಯಾರ್ ಮೆಲ್ಲುಚೊ ಪಾತ್ರ್ ಸಾಕ್ಸ್ ದಿತಾ. ಸಾವ್ಕಾರಾಚೊ ರೈಟ್‍ಹ್ಯಾಂಡ್ ಜಶೆಂ ವಾವುರ್ಚ್ಯಾ ತಾಣೆಂ ಮರ್ಡರ್ ಕೆಲಾಂ ಮ್ಹಳ್ಳೆಪರಿಂಚ್ ಪರಾಡ್ಡುಂಚೆಂ ಖಂಚ್ಯಾ ಕರ್ಮಾಕ್? ಖರೆಪಣಿಂ ತಾಣೆಂ ಜಾಂವ್ ಮಾರ್ಕುನ್ ಕಿತೆಂಚ್ ಕರುಂಕ್ ನಾ (ದುಸ್ರ್ಯಾ ಫಿಲ್ಮಾಂತ್ ಡೈಲಾಗ್ ಬದ್ಲುನ್, ತಾಣಿಂಚ್ ತಾಂಕಾಂ ಭಾಯ್ರ್ ಧಾಡ್‍ಲ್ಲೆಂ ಮ್ಹಣಯ್ಲಾಂ. ಪಯ್ಲ್ಯಾಂತ್, ತೆ ಗೆಲ್ಲ್ಯಾಚೆಂ ಕಾರಣ್‍ಂಚ್ ನಾ!). ತರ್, ಚೊರಾಂಪರಿಂ ವರ್ತನ್ ಕರ್ಚೆಂ, ಸುರಿ ಹಾಡ್ಚಿ, ಸಿಸಿಟಿವಿ ಫೂಟೇಜ್ ನಾಸ್ ಕರ್ಚೆಂ ಸರ್ಕಸ್ ಸರ್ವ್ ಕಿತ್ಯಾಕ್?

ಆನಿ ತ್ಯಾ ದೋಗ್ ಮ್ಹಾತಾರ್‍ಯಾಂಚಿ ಗಜಾಲ್ ನಿಗೂಢ್! ವಳಕ್ ನಾತ್ಲೆಲ್ಯಾಂಚ್ಯಾ ಘರಾ, ಆಸ್ರೊ ಸೊಡುನ್ ಕೊಣೀ ವೆತಾತ್‍ಗೀ ವಾ ಆಸ್ರ್ಯಾಚಿಂ ತಶೆಂ ಧಾಡ್ತಾತ್‍ಗೀ? ತಶೆಂ ಕರುಂಕ್ ಕಾನೂನಾಂತ್ ಅವ್ಕಾಸ್ ನಾ ಮ್ಹಣ್ ಫಿಲ್ಮಾಂತ್‍ಚ್ ಸಾಂಗ್ಲಾಂ. ಜುಬ್ಲೆವಾ ದಿಸಾ ಜಾಲ್ಲೊ ಅಕ್ಮಾನ್ ವಿಸ್ರೊನ್ ತೆ ಕಶೆಂ ಪರತ್ ತ್ಯಾಚ್ ಮನ್ಶ್ಯಾಚ್ಯಾ ಘರಾ ಆಯ್ಲೆ? ಖಂಚ್ಯಾ ಧಯ್ರಾನ್? ವಿಚಿತ್ರ್!

ಇತ್ಲ್ಯಾಕೀ, ಮೆಲ್ಲುಚ್ಯಾ ಪಾತ್ರಾಕ್ ತ್ಯಾ ದೊಗಾಂಚಿ ಗಜಾಲ್ ಪಯ್ಲೆಂಚ್ ಕಳಿತ್ ಆಸ್ತಾ. ತೊಚ್ ನ್ಹಯ್ವೇ ಪಯ್ಲ್ಯಾ ದೃಶ್ಯಾಂತ್‍ಚ್ ಹ್ಯಾ ಆಬಾಂಕ್ ರಾಕೊನ್ ಆಸ್ತಾ?! ಮ್ಹಳ್ಯಾರ್, ತಾಕಾ ತಾಂಚ್ಯಾ ಯೆಣ್ಯಾಚಿ, ಧುವೆಚ್ಯಾ ಮಾಂಡಾವಳೆಚಿ ಖಬರ್ ಆಸ್ತಾ. ತರ್ ಕಿತ್ಯಾಕ್ ಉಪ್ರಾಂತ್ಲ್ಯಾ ದೃಶ್ಯಾಂನಿ ತೊ ಉಳ್ಟೆಂಚ್, ಕಾಂಯ್ಚ್ ಕಳಿತ್ ನಾತ್‍ಲ್ಲೆಪರಿಂ ಬಿಹೇವ್ ಕರ್ತಾ? ಏಕ್ ದೋನ್ ಪಾತ್ರ್ ಮ್ಹಣ್ ನ್ಹಯ್, ಹ್ಯಾ ಫಿಲ್ಮಾಂತ್ಲ್ಯಾ ಚಡಾವತ್ ಪಾತ್ರಾಂಕ್ ಥಿರಾಸಣ್‍ಂಚ್ ನಾ! ಅಶೆಂಯೀ ಏಕ್ ಕಾಣಿ, ಸಿನೆಮ್ ರಚ್ತಾತ್‍ಗೀ? ಇತ್ಲೊ ಬುದ್ವಂತ್ ಕವಿ, ವಿಮರ್ಶಕ್ ಅಸಲೆಂ ಬಕ್ವಾಸ್ ರಚ್ತಾ ಮ್ಹಣ್ ಸಪ್ಣಾಂತೀ ಚಿಂತುಂಕ್ ನಾತ್‍ಲ್ಲೆಂ ಹಾಂವೆಂ.

ಜಶೆಂ ನಾಯಕಿ, ಮೆಲ್ಲು ಆನಿ ಹೆರ್ ಪಾತ್ರಾಂನಿ ರಾಜಾಂವ್/ಕಾರಣ್ ನಾತ್‍ಲ್ಲೆಂ ಬದ್ಲಾವಣ್ ಸಾಂಗ್ಲೆಂ ನೆ, ತಸಲ್ಯೊ ವಿಚಿತ್ರ್ ಸಂಗ್ತಿ ಜಾಯ್ತ್ಯೊ ಆಸಾತ್. ಮೆಲ್ವಿನ್ ಕಲಾಕುಲಾಚ್ಯಾ ಪಾತ್ರಾಚೊ ಆನ್ಯೇಕ್ ಗೊಂದೊಳ್. ತಾಚಿ ನವಿಚ್ ಬಾಯ್ಲ್ ಸಯ್ತಾನ್‍ಂಚ್ ಜಾತಾ. ಆನಿ ನಿಮಾಣೆಂ ಘೊವಾಕೀ ತೆಂ ಅನಾಥ್ ಕರ್ತಾ. (ಜಶೆಂ ಮಾರ್ಕುಚ್ಯಾ ಬಾಪಾಯ್ಚಿ ಬಾಯ್ಲ್ ಕರ್ತಾ ತಶೆಂ – ದೊನಾಕೀ ಕಾರಣ್ ನಾ). ಗಮ್ಮತ್ ಮ್ಹಳ್ಯಾರ್, ಮೆಲ್ವಿನಾಚೊ ಪಾತ್ರ್ ಆಸ್ರ್ಯಾಕ್ ಯೇವ್ನ್ ಪಾವ್‍ಲ್ಲೆಂಚ್ ಕಿತೆಂಯೀ ಉಲೊಣೆಂ ಜಾಂವ್ಚ್ಯಾ ಫುಡೆಂಚ್ ಸಿಸ್ಟೆರಾಂಕ್ ತೊ ಡಯಾನಾಚ್ಯಾ ಪಾತ್ರಾಚೊಚ್ ಪೂತ್ ಮ್ಹಣ್ ಕಶೆಂ ಕಳಿತ್ ಜಾತಾ? ಆನಿ ಮೆಲ್ವಿನಾಚ್ಯಾ ಪಾತ್ರಾಕ್ ತರೀ, ಆಪ್ಲೊ ಬಾಪಯ್ ತ್ಯಾಚ್ ಆಸ್ರ್ಯಾಂತ್ ಆಸಾ (ಆಸ್‍ಲ್ಲೊ, ಆತಾಂ ನಾ ಮ್ಹಳ್ಳೆಂಯೀ ಕಳಿತ್ ಆಸ್ತಾ?) ಮ್ಹಣ್ ಕೊಣಾ ವರ್ವಿಂ ಕಳಿತ್ ಜಾಲ್ಲೆಂ?

ಹೆಂ ಸರ್ವ್ ಎಕಾ ಕಲಾತ್ಮಕ್ ವಾ Abstract ಫಿಲ್ಮಾಂನಿ ಕಾಂಯ್ ಚಲತ್. ಪುಣ್ ಹೆಂ ತಸಲ್ಯಾ ವರ್ಗಾಚೆಂಯೀ ನ್ಹಯ್. ಹೆಂ ಫಕತ್ Absurd ಸಿನೆಮ್.

ಸರ್ವ್ ಅಪಹಾಸ್ಯಾಂ ಪಯ್ಕಿ ವರ್ತೆಂ ಅಪಹಾಸ್ಯ್ – ಮಾರ್ಕು ಆನಿ ಧುವೆನ್ ದೊಗಾಂ ಮ್ಹಾತಾರ್‍ಯಾಂಕ್ ಆಸ್ರ್ಯಾಕ್ ಪಾಟಿಂ ಹಾಡ್ನ್ ಯೆತಾನಾ, ಆಪ್ಲೊ ಪೂತ್ ತ್ಯಾಚ್ ಆಸ್ರ್ಯಾಕ್ ಯೇವ್ನ್ ಪಾವ್ಲಾ ಮ್ಹಣ್ ಡಯಾನಾಚ್ಯಾ ಪಾತ್ರಾಕ್ ಕಳಿತ್ ಜಾಲ್ಲೆಂ ತರೀ ಕಶೆಂ? (ತಾಕಾ ಸಪಣ್ ಪಡ್ಲಾಂ ಮ್ಹಣ್ ದಾಕಂವ್ಕ್ ನಾ). ಅಸಲಿಂ ಹಾಸ್ಯಾಸ್ಪದ್ ದೃಶ್ಯಾಂ ಆನಿ ಖೆಳ್ಕುಳಾಂ ಪಳೆತಾನಾ ಹೆಂ ಫಿಲ್ಮ್ ನ್ಹಯ್ ಬಗಾರ್ ಪ್ರೇಕ್ಷಕಾಂಚಿ ಸೊಸ್ಣಿಕಾಯ್ ಪರೀಕ್ಷಾ ಕರ್ಚೆಂ ಯಜ್ಞ್, ತಾಂಕಾಂ ಅಣ್ಕುಂಚೆಂ ಪ್ರಯತನ್ ಮ್ಹಣ್ ಜರೂರ್ ಸಾಂಗ್ಯೆತ್.

ಕಾಣಿ ಸ್ವತಃ ರಚ್ಲೆಲ್ಯಾ ನಿರ್ದೇಶಕಾನ್ (ವೆವೆಗ್ಳ್ಯಾ ಸಂದರ್ಶನ್ ಆನಿ ಹೆರ್ ಉಚಾರ್ಣೆಂ ಮುಖಾಂತ್ರ್) ಸಾಂಗ್‍ಲ್ಲೆಪರಿಂ, ಹೆಂ ತಾಣೆಂ ಆನಿ ಪಂಗ್ಡಾನ್ ಭೋವ್ ಅದ್ಭುತ್ ರಿತಿನ್ ಕಾಡುಂಕ್ ಭಿರಾಂಕುಳ್ ರಿತಿನ್ ಪೆಚಾಡುನ್ ರಚ್‍ಲ್ಲೆಂ ಅದ್ಭುತ್ ಸಿನೆಮ್!!? ಪುಣ್ ಪ್ರೊಡಕ್ಟ್ ಮಾತ್ರ್ ಇತ್ಲೆಂ ಬಕ್ವಾಸ್‍ಗೀ ಲ್ಹಾನ್ ಭುರ್ಗ್ಯಾಂಕ್ ಸಯ್ತ್ ಹಾಂತ್ಲೆಂ ನಾನ್‍ಸೆನ್ಸ್ ಕಳಿತ್ ಜಾತಾ (ಪಳೆಲ್ಲ್ಯಾಂ ಲಾಗಿಂ ವಿಚಾರ್ಯೆತ್). ವಿಷಯ್ ನಿಜಾಯ್ಕೀ ಬರೊಚ್ ವಿಂಚ್ಲಾ, ಪುಣ್ ಏಕ್ ಅಪಕ್ವ್ ಕಾಣಿ ಘೆವ್ನ್ ಕೆಲ್ಲೆಂ ಹೆಂ ಫಿಲ್ಮ್ ವೀದ್‍ವಾವ್ಳಿ ಆನಿ ಹಾಸ್ಯಾಸ್ಪದ್ ಸಂಗ್ತಿಂಚೆಂ ಸಮ್ಮಿಲನ್.

ದುಸ್ರ್ಯಾ ದೃಶ್ಯಾಂತ್ ಬಾಪಯ್ ಧುವೆ ಲಾಗಿಂ ಉಲಯ್ತಾ ನೆ, ತೆಂ ಸಂಭಾಷಣ್ ಖಂಚ್ಯಾ ಭೊಜ್ಯಾಕ್? ಧುವೆಚೊ 25 ವರ್ಸಾಂಚೊ ಜಲ್ಮಾ ದೀಸ್ ತ್ಯಾಚ್ ಹಫ್ತ್ಯಾಂತ್ ಆಸ್‍ಲ್ಲೊ ತರ್ ದೊನೀ ಜುಬ್ಲೆವ್ ಸಾಂಗಾತಾ ಸಂಭ್ರಮ್ಯೆತೆಂ. ಕಿತ್ಲ್ಯಾಗೀ ಜಣಾಂನಿ ಹೆಂ ಅಪದ್ಧ್ ಉಜ್ವಾಡಾಕ್ ಹಾಡ್ಲ್ಯಾ ಉಪ್ರಾಂತ್ ಕೆಲ್ಲಿ ಬದ್ಲಾವಣ್ ಮ್ಹಳ್ಯಾರ್ 25 ಆಸ್‍ಲ್ಲೆಂ 24 ಕೆಲೆಂ. ಪುಣ್ ಕಿತೆಂ ಫಾಯ್ದೊ? ತ್ಯಾ ಡೈಲಾಗಾಕ್ ಆನಿ ಕಾಣಿಯೆಕ್ ಕಸಲೊಚ್ ಸಂಬಂಧ್ ವಾ ಲಿಂಕ್ ನಾ. ಒಟ್ರಾಶಿ ಏಕ್ ಪಿಸಾಂಟ್ ಡೈಲಾಗ್ ಬರಯ್ಲ್ಯಾರ್ ಆಪುಣ್ ಏಕ್ ಬುದ್ವಂತ್ ಸಾಹಿತಿ, ಆನಿ ತೆಂ ದೊದೋನ್ ರಿತಿನ್ ಚಿತ್ರೀಕರಣ್ ಕೆಲ್ಯಾರ್ ಅದ್ಭುತ್ ನಿರ್ದೇಶಕ್ ಜಾಲೊಂ ಮ್ಹಣ್ ಚಿಂತ್ಲಾಂಗೀ? ವಿಚಿತ್ರ್.

ಆನಿ ಡಯಾನಾಚ್ಯಾ ಪಾತ್ರಾನ್ ತಶೆಂಯೀ ಲಾಡು ಭೊಖಾಂವ್ಚೆಂ ದೃಶ್ಯ್ ಕಿತ್ಯಾಕ್? ದೆವಾಕೀ ಅರ್ಥ್ ಕರುಂಕ್ ಜಾಂವ್ಚೆಂ ನಾ! ಇತ್ಲೊ ಹೆಳ್‍ಲ್ಲೊ ಬರವ್ಪಿ ಸ್ಟ್ಯಾನಿ ಅಸಲೆಂ ಅಪದ್ಧ್ ಕಶೆಂ ರಚುಂಕ್ ಪಾವ್ಲೊ, ಆನಿ ದೆವಾಕ್ ಆಪ್ಣೆಂ ಸಂಸಾರ್ ರಚುನ್ ಜಾತಚ್, ಆಪ್ಲ್ಯಾ ರಚ್ನೆ ಥಂಯ್ ಸಂತೊಸ್ ಭೊಗ್‍ಲ್ಲೆಪರಿಂ, ಇತ್ಲೆಂ ಬಕ್ವಾಸ್ ಫಿಲ್ಮ್ ಕಾಡ್ನ್ ಸ್ಟ್ಯಾನಿ ಆಪ್ಣೆಂ ಅತ್ಯದ್ಭುತ್ ನಿರ್ಮಿಲಾಂ ಮ್ಹಳ್ಳೆಪರಿಂ ಉಲಯ್ತಾ ಮ್ಹಳ್ಯಾರ್ ಮ್ಹಾಕಾ ಪಾತ್ಯೆಂವ್ಕ್ ಜಾಯ್ನಾ.

ಮಾರ್ಕು ಏಕ್ ವ್ಹಡ್ ಸಾವ್ಕಾರ್. ಪಲಿಮಾರ್ಚ್ಯಾ ಬೊಂಗ್ಲ್ಯಾಂತ್ ಶೂಟಿಂಗ್ ಕೆಲಾಂ ಶಿವಾಯ್, ಪಾತ್ರಾಕ್ ತೆಕಿದ್ ಗಿರೇಸ್ತ್‌ಕಾಯೆಚಿಂ ಲಕ್ಷಣಾಂ ದಾಕಂವ್ಕ್ ನಾಂತ್! ತೆದೊ ವ್ಹಡ್ ಸಾವ್ಕಾರ್ ಪೆಟ್ಯಾಚ್ಯಾ ಘುಡಾಕ್, ತ್ಯಾ ದೀಸ್ ತೆದೆಂ ವ್ಹಡ್ ಟೆನ್ಶನ್ ಆಸ್ಚ್ಯಾ ಸಂದರ್ಭಾರ್ ಸಯ್ತ್, ಪೈಂಟ್ ಕಾಡುಂಕ್ ವೆತಾ. ತೆಂಯೀ ತಾಚಿ ಬಾಯ್ಲ್ ಸಯ್ತ್ ತಾಕಾ ಸಾಂಗಾತ್ ದಿತಾ… ಕಸಲಿ ಜೊಡಿ!? ಧನಿಯಾ ಕಡೆನ್ ಚಾಕ್ರಾನ್ ಸಿಗ್ರೆಟ್ ವಿಚಾರ್ಚೆಂ ವಾಜ್ಭಿ, ಪುಣ್ ಹಾಂಗಾ ಧನಿಚ್ ಸಹಾಯಕಾ ಕಡೆನ್ ಸಿಗ್ರೆಟಿಚಿ ಭಿಕ್ ಮಾಗ್ತಾ. ಹೆಂ ಪೂರಾ ಪಾತ್ರೀಕರಣಾಂತ್ಲಿ ವೈಫಲ್ಯತಾ.

ಪ್ರಾಮಾಣಿಕ್ ಪ್ರಯತ್ನ್ ವಾ ಕಪಟ್ ಸೂತ್ರ್?!

ಪ್ರಾರಂಭರ್‌ಚ್ ಸಾಂಗ್‍ಲ್ಲೆಪರಿಂ ಹ್ಯಾ ಫಿಲ್ಮಾಂತ್ ‘ವಂಚನ್’ ಬರಾಬರ್ ಚಲ್ಲಾಂ. ಕೊಣೆಂ ಕೆಲಾಂ ತೆಂ ಹಾಂವ್ ಸಾಂಗೊಂಕ್ ಸಕನಾ. ಪುಣ್ ಪ್ರೇಕ್ಷಕಾಂಕ್, ನಿರ್ಮಾಪಕಾಕ್ ಮಾತ್ರ್ ನ್ಹಯ್ ಆಮ್ಚ್ಯಾ ಭಾಶೆಕ್ ಆನಿ ಸಮಾಜೆಕ್‍ಯೀ ಹ್ಯಾ ವರ್ವಿಂ ದಖೊ ದಿಲಾ, ಲುಕ್ಸಾಣ್ ಆನಿ ಅಕ್ಮಾನ್ ಜಾಯ್ ಪುರ್ತೆಂ ಕೆಲಾಂ. ತೆಂ ಕಶೆಂ ಮ್ಹಣ್ ಸಾಂಗ್ತಾಂ.

ಪಯ್ಲ್ಯಾನ್ ಪಯ್ಲೆಂ ಹೆಂ ಫಿಲ್ಮ್ ಅವ್ವಲ್ ದಾನಿ, ಉದ್ಯಮಿ ಮೈಕಲ್ ಸೊಜಾನ್ ದಿಲ್ಲ್ಯಾ ಉದಾರಿ ದುಡ್ವಾ ಮಜತೆನ್ ಕಾಡ್‍ಲ್ಲೆಂ ಸಿನೆಮ್. ಪುರ್ತೊ ಖರ್ಚ್ ತಾಣೆಂಚ್ ದಿಲಾ, ಆನಿ ತೊ ಕಂಪ್ಲೀಟ್ಲಿ ಫುಂಕ್ಯಾಕ್ ಲಾಭಯ್ಲಾ. ಏಕ್ ರುಪಯ್ ಪಾಟಿಂ ದೀಂವ್ಕ್ ನಾ. ಅಸಲೆಂ ಭಾಗ್ ಮೆಳ್ಚೆಂಚ್ ಸುಯೋಗ್. ಪುಣ್ ಹಾಚೊ ಉಪಯೋಗ್ ಜಾಲಾ ವಾ ದುರುಪಯೋಗ್ ಜಾಲಾ? ತರ್ಕ್ ಜರೂರ್ ಗರ್ಜ್ ಆಸಾ.

ಫಿಲ್ಮ್ ಪಳೆಲ್ಲೆ ಹರ್ಯೆಕ್ಲೆ (ಮ್ಹಜೆ ಲಾಗಿಂ ಖಾಸ್ಗೆನ್ ಜಾಯ್ತೆ ಉಲಯ್ಲ್ಯಾತ್) ಅಶೆಂ ಯೆಟ್ತಾತ್‍ಗೀ, ಸಗ್ಳ್ಯಾ ಫಿಲ್ಮಾಂತ್ ಠಕ್ಕಿಪಣ್‍ಂಚ್ ಉಟೊನ್ ದಿಸ್ತಾ ಮ್ಹಣ್ ಸಕ್ಡಾಂಚೊ ಆರೋಪ್. ಎಕ್ಲೊ ಎನ್.ಆರ್.ಐ. ಉದ್ಯಮಿ ಮ್ಹಣ್ತಾ: “ಹಾಂತುಂ 18 ಲಾಖಾಂ ಶಿವಾಯ್ ಚಡ್ತಿಕ್ ಏಕ್ ರುಪ್ಯಾಚೆಂ ದಿಸನಾ.” ಸಕ್ಡಾಂನಿ ಸಾಂಗ್ಚ್ಯಾ ಪರ್ಮಾಣೆಂ, ಹ್ಯಾ ಫಿಲ್ಮಾಕ್ 15 ಥಾವ್ನ್ ಚಡ್ ಮ್ಹಳ್ಯಾರ್ 20 ಲಾಖ್ ಖರ್ಚಲ್ಯಾತ್.

ಬಿಪಿಎನ್ ಫಿಲ್ಮ್ ಕಾಡ್‍ಲ್ಲೊ ಸಗ್ಳೊ ಪಂಗಡ್ ಫಿಲ್ಮ್ ಮೇಕಿಂಗಾಂತ್ ಹೆಳ್‍ಲ್ಲೊಚ್. ಕ್ಯಾಮೆರಾ ಭಾಯ್ಲೊ ಹಾಡಯ್ಲಾ ಆಸ್ಯೆತ್, ಸೊಡ್ಲ್ಯಾರ್ ಚಡಾವತ್ ಜಣ್ ಆನಿ ವ್ಯವಸ್ಥಾ ಇನ್‍ಹೌಸ್. ತ್ಯಾ ವರ್ವಿಂಚ್ ನ್ಹಯ್ವೇ, ಪ್ರೀಮಿಯರ್ ಶೋ ಜಾತಚ್ ಸಕ್ಡಾಂನಿ ಯೆಟ್‍ಲ್ಲ್ಯಾನ್ ದೋನ್ ದಿಸಾಂ ಭಿತರ್ ತಿತ್ಲ್ಯಾ ದೃಶ್ಯಾಂಚೆಂ ರೀರೈಟಿಂಗ್ ಆನಿ ರೀರೆಕಾರ್ಡಿಂಗ್ ಕರುಂಕ್ ಸಾಧ್ಯ್ ಜಾಲ್ಲೆಂ!? ಹೆರಾಂಕ್ ತಶೆಂ ಕರುಂಕ್ ಬರೊಚ್ ಖರ್ಚ್ ಪಡ್ತೊ. ಆಸೊಂ, ತೆಂ ಏಕ್ ಎಡ್ವಾಂಟೇಜ್. ಬರೆಂಚ್.

ದೊದೋನ್ ಪಾವ್ಟಿಂ ಪಳೆವ್ನ್ ಸಯ್ತ್ ಕೊಣಾಯ್ಕೀ ತಿತ್ಲ್ಯೊ ಗಲೀಜ್ ಚುಕಿ ದಿಸೊಂಕ್ ನಾಂತ್ ಮ್ಹಣ್ಚೆಂ ಏಕ್ ಅಚರ್ಯೆಂ, ಆನಿ ಲೊಕಾನ್ ಪಳೆವ್ನ್ ದುರ್ಸತಚ್ ಖಿಣಾನ್ ತಿದ್ವಿಲ್ಲೆಂ ಆನ್ಯೇಕ್ ಮಿಸ್ತೆರ್..!

ವಿಮರ್ಸೊ ಕರುಂಕ್ ಪ್ರಚೋದನ್…

ಆತಾಂ ಹ್ಯೊ ಗಜಾಲಿ ಸಾಂಗ್ಚ್ಯಾ ಪಯ್ಲೆಂ ಥೊಡೆಂ ಬ್ಯಾಕ್‍ಗ್ರೌಂಡ್ ತುಮಿ ಸಮ್ಜಜೆ. ಜರ್ ‘ಅಸ್ಮಿತಾಯೆಚ್ಯಾ’ ತಾಂಡೆಲ್ಯಾನ್ ಎಕಾ ಸಂದರ್ಶನಾಂತ್ ಆಪ್ಲಿ ವ್ಹಡ್ವಿಕಾಯ್ ಉಲಂವ್ಚ್ಯಾ ಸವೆಂ ಹೆರಾಂಕ್ ಚಿಲ್ಲುನ್ ಆನಿ ಗೆಲ್ಲೆ ಗೆಲ್ಲೆ ಕಡೆನ್ ಹೆರಾಂಕ್ ಹಲ್ಕ್ ಕರುನ್ ಕೀಳ್‍ಪಣಿಂ ಉಲಂವ್ಕ್ ನಾತ್‍ಲ್ಲೆಂ, ಹಾಂವೆಂ (ತಶೆಂ ಆನ್ಯೇಕ್ಲ್ಯಾನ್) ತಿತ್ಲೊ ಲಾಂಬ್, ನಿಷ್ಠುರ್ ವಿಮರ್ಸೊ ಬರಂವ್ಕ್ ಆಸ್ಪದ್ ಜಾತೆಂಚ್ ನಾ. ವಿಪರ್ಯಾಸ್ ತಶೆಂ ಬೆಜಾರಾಯೆಚಿ ಗಜಾಲ್ ಮ್ಹಳ್ಯಾರ್, ಸ್ಟ್ಯಾನಿ ಬೇಳಾನ್‍ಯೀ ತಶೆಂಚ್ ಕೆಲಾಂ! ‘ರಿವ್ಯೂ ಬರಯ್’ – ತಾಣೆಂಚ್ ಮ್ಹಾಕಾ ಉಲೊ ದಿಲ್ಲೊ. ಪುಣ್ ಹ್ಯಾ ಫಿಲ್ಮಾಂತ್ ವ್ಹಡ್ಪಣ್ ಕಾಂಯ್ ನಾ ದೆಕುನ್ ಬರಂವ್ಚೆಂಚ್ ನಾಕಾ ಮ್ಹಣ್ ಬಸ್‍ಲ್ಲೊಂ. ಪುಣ್ ಎಕೇಕ್‍ಚ್ ಗಜಾಲಿ ಉಗ್ತ್ಯೊ ಜಾತಚ್ ಲಿಖ್ಣಿ ಪಾಜಿಜೆಚ್ ಪಡ್ಲೆಂ.

ಸ್ಟ್ಯಾನಿನ್ ಫಿಲ್ಮ್ ರಿಲೀಸ್ ಜಾಂವ್ಚ್ಯಾ ಪಯ್ಲೆಂ ದಿಲ್ಲಿಂ ವೀಡಿಯೊ ಸಂದರ್ಶನಾಂ ಪಳೆಲಿಂ. ಶಿವಾಯ್ ಹೆರ್ ಉತ್ರಾಂ-ಬರ್ಪಾಂ ಆನಿ ಸಂಬಂಧಿತ್ ಹೆರಾಂಚಿಂ ಉತ್ರಾಂಯೀ ಪಾರ್ಕಿಲಿಂ. (ಖಾಸ್ಗೆನ್ ಸಾಂಗ್‍ಲ್ಲೆಂ ತೆಂ ಫಕತ್ ಗುಮಾನಾಕ್ ಧರ್ತಾಂ, ತಾಚಿ ರುಜ್ವಾತ್ ದೀಂವ್ಕ್ ಜಾಯ್ನಾ). ಸ್ಟ್ಯಾನಿನ್‍ಯೀ, ಫಕತ್ ಆಪ್ಲಿ ವ್ಹಡ್ವಿಕಾಯ್ ಉಲಯಿಲ್ಲೆಂ ಮಾತ್ರ್ ಜಾಲ್ಯಾರ್, ಇತ್ಲೆಂ ಬರಯ್ತೊಂ ನಾ. ಪುಣ್ ತಾಚಿಂ ಓಪನ್ ಸ್ಟೇಟ್‍ಮೆಂಟಾಂಚ್, ತಾಣೆಂ ಆಪ್ಣಾಕ್‍ಚ್ ಲೊಕಾ ಮುಖಾರ್ ಜಾಹೀರ್ ಕರುಂಕ್ ಕಾರಣ್ ಜಾಲ್ಯಾಂತ್. ಜರ್ ತಾಣೆಂ ಹೆರಾಂಕ್ ಕ್ಷುಲ್ಲಕ್ ಕರುಂಕ್ ನಾತ್‍ಲ್ಲೆಂ ತರ್ ಹೊ ವಿಮರ್ಸೊ ಬಿಲ್ಕುಲ್ ಉದೆತೊ ನಾ.

1. ಕೊಂಕ್ಣೆಂತ್ಲಿಂ ಫಕತ್ ದೋನ್ ಫಿಲ್ಮಾಂ ಬರಿಂ?

ಧಾ ವರ್ಸಾಂ ಥಾವ್ನ್ ನಿರಂತರ್ ಶೂಟಿಂಗ್ ವ್ಯವಹಾರಾಂನಿ ವ್ಯಸ್ತ್ ಆಸ್ಚೊ, ಏಕ್ ನಾಂವಾಡ್ದಿಕ್ ಬರವ್ಪಿ ತಶೆಂ ವಿಮರ್ಶಕ್ ಜಾವ್ನಾಸ್ಚೊ ಎಸ್.ಬಿ. (ಸ್ಟ್ಯಾನಿ ಬೇಳಾ) ಸಂದರ್ಶನಾಂತ್ ಸಾಂಗ್ತಾ: “ಕೊಂಕ್ಣೆಂತ್ ದೋನ್ ಫಿಲ್ಮಾಂ (ತಾಂತುಂ ವಿಲ್ಫಿ ರೆಬಿಂಬಸಾಚೆಂ ‘ಮೋಗ್ ಆನಿ ಮಯ್ಪಾಸ್’ ಏಕ್) ಮಾತ್ರ್ ಫಿಲ್ಮಾಂಪರಿಂ ಆಸ್ಚಿಂ, ಹೆರ್ ಸರ್ವ್ ಕ್ಯಾಮೆರಾ ಮುಖಾರ್ ನಾಟಕ್…” ಹೆಂ ಅಧಿಕಪ್ರಸಂಗ್ ಗರ್ಜ್‍ಚ್ ನಾತ್‍ಲ್ಲೆಂ. (‘ಕಂತಾರ್’ ಫಿಲ್ಮಾಚಿಂ ಕರ್ತೃ ಮಂಗ್ಳುರಿ ಸೊಡ್ಲ್ಯಾರ್ ತೆಂ ಫಿಲ್ಮ್ ಪುರ್ತೆಂ ಗೊಂಯ್ಚೆಂ. ತಾಣೆಂ ಫಕತ್ ವಳ್ಕಿನ್ ತೆಂ ಕನ್ಸಿಡರ್ ಕೆಲಾಂ ಮ್ಹಣ್ಯೆತ್. ನಾತ್ಲ್ಯಾರ್ ತಾಣೆಂ ಗೊಂಯಾಂತ್ಲಿಂ ಸರ್ವ್ ಕೊಂಕ್ಣಿ ಫಿಲ್ಮಾಂಯೀ ಬುರೂಸ್ ಮ್ಹಣ್ ಲೆಕ್ಲಾಂ ಮ್ಹಣ್ ಘೆಜೆ ಪಡ್ತಾ. ‘ನಾಚೊಂಯಾಂ ಕುಂಪಾಸರ್’ ಎಸ್.ಬಿ.ನ್ ಪಳೆಂವ್ಕ್ ನಾ ಆಸ್ತೆಲೆಂ).

ಹೆರ್ ಸಕ್ಕಡ್ ಸಿನೆಮಾಂ ‘ನಾಟಕ್’ ಮ್ಹಣ್ ಸಾಂಗ್ತಾಸ್ತಾನಾ, ಆಪ್ಣೆಂಚ್ ಸಹ ನಿರ್ದೇಶನ್ ದಿಲ್ಲ್ಯಾ ‘ಏಕ್ ಆಸ್ಲ್ಯಾರ್ ಏಕ್ ನಾ’ ಫಿಲ್ಮಾಚಿ ವಿಸರ್ ಪಡ್‍ಲ್ಲಿಗೀ ಎಸ್.ಬಿ.ಕ್? ನಾ, ತಾಣೆಂ ಸಂದರ್ಶನಾಂನಿ ತ್ಯಾ ಫಿಲ್ಮಾಚೆಂ ಉಲ್ಲೇಖ್ ಕೆಲಾಂ. ತರ್ ತಾಚಿಂ ಉತ್ರಾಂಚ್ ಪಾತ್ಯೆಂವ್ಚೆಂ ತರ್ ‘ಏಕ್ ಆಸ್ಲ್ಯಾರ್ ಏಕ್ ನಾ’ ಏಕ್ ಫಿಲ್ಮ್ ನ್ಹಯ್ ಬಗಾರ್ ಕ್ಯಾಮೆರಾ ಮುಖಾರ್ ಕೆಲ್ಲೆಂ ಪ್ರಹಸನ್ ಮ್ಹಣ್ ಜಾಲೆಂ. ಆನಿ ಹೊ ‘ನಾಟಕ್’ ಕರುಂಕ್ ಖರ್ಚಿಲ್ಲೊ ದುಡು ತರೀ ಕಿತ್ಲೊ? (ತೆಂ ವೆಗ್ಳ್ಯಾನ್ ಸಾಂಗ್ಲಾಂ).

ಆನಿ, ಎಸ್.ಬಿ.ನ್. ಆಪ್ಣೆಂ ಹಾಲಿವುಡ್ ಸ್ಟೈಲಿರ್ ಕಾಡ್ಲಾಂ ತಸಲೆಂ ಫಿಲ್ಮ್ ತರೀ ಕಸಲೆಂ? ಆಖ್ಖ್ಯಾ ಫಿಲ್ಮಾಂತ್ ಔಟ್‍ಡೋರ್ ದೃಶ್ಯಾಂ ಥೊಡಿಂಚ್. ಶೂಟಿಂಗಾಂತ್ ವ್ಹಾವ್ ಮ್ಹಣ್ಚೆ ತಸಲೆಂ ಕಿತೆಂ ಆಸಾ? ಹೈಸ್ಕೂಲಾಚ್ಯಾ ಭುರ್ಗ್ಯಾಂಕ್ ಮೊಬೈಲ್ ದೀವ್ನ್ ಏಕ್ ಶಾರ್ಟ್ ಫಿಲ್ಮ್ ಕಾಡಾ ಮ್ಹಳ್ಯಾರ್ ಕಿತ್ಲ್ಯಾ ಕ್ರಿಯೇಟಿವ್ ರಿತಿನ್ ಕಾಡ್ತಾತ್. ತರ್ ಫುಂಕ್ಯಾಚಿ ಬಜೆಟ್ ಆಸೊನ್, ಅದ್ಭುತ್ ವ್ಯಕ್ತಿಂನಿ ದೀಸ್ ರಾತ್ ಘೊಳೊನ್ ಕಾಡ್‍ಲ್ಲ್ಯಾ ಬಿ.ಪಿ.ಎನ್. ಫಿಲ್ಮಾಂತ್ ಕಿತೆಂ ವ್ಹಡ್ಪಣ್ ಆಸಾ? ಸ್ಟ್ಯಾನಿನ್, ಆನಿ, ತೆಂ ಪಳೆವ್ನ್ ಹಿಸ್ಟೀರಿಯಾಕ್ ಒಳಗ್ ಜಾಲ್ಲೆಪರಿಂ ಹೊಗ್ಳಿಕ್ ಉಚಾರ್ಲೆಲ್ಯಾಂನಿ ಸಾಂಗಜೆ.

ಕುಂಬು ಕಾಣಿ, ಗತ್ತಿಗಟಾಚೆ ಪಾತ್ರ್, ತಾಳ್‍ಮೂಳ್ ನಾತ್‍ಲ್ಲಿಂ ದೃಶ್ಯಾಂ ವಿಣುನ್ ಆಪುಣ್ ಹಾಲಿವುಡಾಚೊ ಜೇಮ್ಸ್ ಕ್ಯಾಮರಾನ್ ವಾ ಸ್ಟೀವನ್ ಸ್ಪೀಲ್‍ಬರ್ಗ್ ವಾ ತೆಲುಗುಚ್ಯಾ ರಾಜ್‍ಮೌಳಿಚ್ಯಾ ಲೆವೆಲಾಚೊ ನಿರ್ದೇಶಕ್ ಮ್ಹಣ್ ಪೊಕ್ಳೆ ಉಲವ್ನ್ ಕೆಲ್ಲೆಂ ಸಾಧನ್ ಕಿತೆಂ? ಸಚಿನ್ ತೆಂಡೂಲ್ಕರಾನ್ ವಾ ವಿರಾಟ್ ಕೊಹ್ಲಿನ್, “ಆಪ್ಣಾ ಮುಖಾರ್ ಸಂಸಾರಾಚೊ ಖಂಚೊಯೀ ಬೌಲರ್ ಪುಸ್ಕ್” ಮ್ಹಣ್ ಉಚಾರ್ಲ್ಯಾರ್ ತಾಕಾ ಮರ್ಯಾದ್ ಆಸಾ. ಕಿತ್ಯಾಕ್ ಮ್ಹಳ್ಯಾರ್ ತಾಣಿಂ ತೆಂ ಸಾಧನ್ ಖಂಡಿತ್ ಕೆಲಾಂ. ಪುಣ್ ದೋನ್ ತಾಲೂಕ್ ಮಟ್ಟಾಚ್ಯಾ ಮ್ಯಾಚಾಂನಿ ಖೆಳೊನ್ ತೀನ್ ರನ್ನಾಂ ಮಾರ್ಲೆಲ್ಯಾನ್ ತಶೆಂ ಉಲಯ್ಲ್ಯಾರ್ ಕೋಣ್ ಪಾತ್ಯೆತಾ ವಾ ಒಪ್ತಾ?

2. ಸ್ಕ್ರಿಪ್ಟ್ ಸೂಪರ್‌ವೈಸರ್ ಕುಡ್ಡೊ ವಾ ಕೆಪ್ಪೊ?

ಹಿ ಆನ್ಯೇಕ್ ಭಿರಾಂಕುಳ್ ಗಜಾಲ್! ಟೈಟಲ್ ಕಾರ್ಡಾಂತ್ ‘ಸ್ಕ್ರಿಪ್ಟ್ ಸೂಪರ್‌ವೈಸರ್’ ಮ್ಹಣೊನ್ ಎಕ್ಲ್ಯಾಕ್ ವ್ಹಡ್ಲ್ಯಾನ್ ಕ್ರೆಡಿಟ್ ದಿಲಾಂ. ತೊ ತರೀ ಕೊಡ್ಯಾಳ್ಚ್ಯಾ ಸಿನೆ ವರ್ತುಲಾಂತ್ ಪರಿಚಿತ್ ಆನಿ ಹೆಳ್‍ಲ್ಲೊ, ದೆಕುನ್ ಹ್ಯಾ ಫಿಲ್ಮಾಚಿ ಸ್ಕ್ರಿಪ್ಟ್ ಭಾರೀ ಊಂಚಿ ಆಸ್ತೆಲಿ ಮ್ಹಣ್ ಹಾಂವೆಂ ಚಿಂತ್ಲೆಂ. ಪುಣ್ ಎಕೇಕ್ ದೃಶ್ಯ್ ಪಳೆತಾನಾ ತಾಣೆಂ ಕಿತೆಂ ಆನಿ ಕಸಲೆಂ ಸೂಪರ್‌ವೈಸ್ ಕೆಲಾಂ ಮ್ಹಣ್ ವಿಜ್ಮಿತ್ಲೊಂ. 25ವ್ಯಾ ಜಲ್ಮಾ ದಿಸಾಚೊ ಆಭಾಸ್ ಧರುನ್ ಸಗ್ಳ್ಯಾ ಫಿಲ್ಮಾಂತ್ ತಿತ್ಲ್ಯೊ ಹಾಸ್ಯಾಸ್ಪದ್ ಚುಕಿ, ಪ್ರಮಾದ್, ಬ್ಲಂಡರ್ಸ್ ಆಸಾತ್. ತರ್ ಹ್ಯಾ ಮನ್ಶ್ಯಾನ್ ಕೆಲ್ಲೆಂ ತರೀ ಕಿತೆಂ? – ಕಿತ್ಲೆಂ ಚಿಂತ್ಲ್ಯಾರೀ ಮ್ಹಾಕಾ ಸಮ್ಜನಾ. ಎಕ್‍ಚ್ ತಾಣೆಂ ಸ್ಕ್ರಿಪ್ಟ್ ವಾಚುಂಕೀ ನಾ, ತಿದ್ವುಂಕೀ ನಾ, ವಾ ಭೆಷ್ಟೆಂಚ್ ತಾಚೆಂ ನಾಂವ್ ಘಾಲಾಂ ಆಸ್ತೆಲೆಂ. ನ್ಹಯ್ ತರ್, ತಾಣೆಂ ರಾತ್ ದೀಸ್ ಭೊಂಗ್ ಯೇವ್ನ್ ತಿದ್ವುನ್, ಸುಧ್ರಾವ್ನ್ ಕೆಲ್ಲ್ಯಾ ಫಿಲ್ಮಾಂತ್ ಇತ್ಲ್ಯೊ ಚುಕಿ ಉರ್ಲ್ಯಾತ್ ತರ್, ಒರಿಜಿನಲ್ ಬರ್ಪಾಂತ್ ಕಿತೆಂ ಆಸ್‍ಲ್ಲೆಂ ಜಾವ್ಯೆತ್..? ಸಾಯ್ಬಾ ಭೊಗೊಸ್! (ಎಸ್.ಬಿ.ಚ್ ಸಾಂಗ್ತಾ, ತಾಣೆಂ ಬರಯಿಲ್ಲೆಂ 25 ಪಾವ್ಟಿಂ ಕಾಡ್ನ್ ಉಡಯ್ಲೆಂ ಮ್ಹಣ್. ತರ್ ತೊ ತಿತ್ಲೊಯೀ ಅಸ್ಕತ್ ಕಾಣಿ ಬರವ್ಪಿಗೀ?! ಪಾತ್ಯೆಂವ್ಕ್ ಜಾಯ್ನಾ).

3. ನಿರ್ಮಾಣ್ ಸಂಸ್ಥ್ಯಾಕ್ ಜವಾಬ್ದಾರ್ ನಾ?

ಹೆಂ ಆನ್ಯೇಕ್ ಬ್ಲಂಡರ್. ಶೋ ಜಾವ್ನ್ ವೆದಿ ಕಾರ್ಯೆಂ ಚಲ್ತಾನಾ, ನಿರ್ಮಾಣ್ ಸಂಸ್ಥ್ಯಾಚೊ ಮುಖೆಲಿ – ವಾಲ್ಟಿ – ಸದಾಂಚೆಪರಿಂ, ಜೋಕ್ಸ್ ಮ್ಹಣೊನ್ ಗಪ್ಳಾಸ್ ಉಲಯ್ಲೊ! “ಹಾಂವೆಂ ಆತ್ತಾಂಚ್ ಫಿಲ್ಮ್ ಪಳೆಲ್ಲೆಂ, ಪಯ್ಲೆಂ ಪಳೆಂವ್ಕ್‌ಚ್ ನಾ” ಮ್ಹಣಾಲೊ ತೊ! ಅಶೆಂಯೀ ಘಡ್ತಾಗೀ? ಹೆಂ ಲೂಸ್-ಟಾಕ್ ನ್ಹಯ್ ತರ್ ಆನಿ ಕಿತೆಂ?

ವಾ, ಆಪ್ಣೆಂ ಕಾಡ್‍ಲ್ಲೆಂ ಫಿಲ್ಮ್ ಇತ್ಲೆಂಯೀ ಬುರ್ನಾಸ್ ಜಾಲಾಂ ಕೀ, ತ್ಯಾ ವಿಶಿಂ ವ್ಹಡ್ಪಣ್ ಉಲಂವ್ಕ್ ಬಿಲ್ಕುಲ್ ಸಾಧ್ಯ್ ನಾ, ದೆಕುನ್ ಪಳೆವ್ನಾ ಮ್ಹಳ್ಯಾರ್ ಆಪುಣ್ ಸೇಫ್ ಮ್ಹಣ್ ಚಿಂತುನ್ ತಾಣೆಂ ಅಶೆಂ ಸಾಂಗ್ಲೆಂ ಆಸ್ಯೆತ್. ದುಸ್ರೆಂ ರಾಜಾಂವ್ ಬಿಲ್ಕುಲ್ ದಿಸನಾ.

ನ್ಹಯ್ ಸಾಯ್ಬಾ, ಆಪ್ಲ್ಯಾಚ್ ಸಂಸ್ಥ್ಯಾನ್ ಕಾಡ್ಚೆಂ ಪಯ್ಲೆಂ ಸಿನೆಮ್ ಆನಿ ತೆಂಯೀ ಸ್ವತಃ ಆಪ್ಣೆಂಚ್ Protagonist ಜಾವ್ನ್ ನಟನ್ ಕೆಲ್ಲೆಂ ಫಿಲ್ಮ್ ಪಳೆಂವ್ಕ್ ನಾ, ಗೊತ್ತುಚ್ ನಾ ಮ್ಹಣ್ ಸಾಂಗ್ಲ್ಯಾರ್ ಕಿತೆಂ ಅರ್ಥ್? ಹಾಂತ್ಲ್ಯೊ ತ್ಯೊ ಮೂರ್ಖ್ ಚುಕಿ ಶೂಟಿಂಗಾ ವೆಳಾರ್‌ಚ್ ಕಳಜೆ ಆಸ್‍ಲ್ಲೆಂ. ಡಬ್ಬಿಂಗಾ ವೆಳಾರೀ ಕಳೊಂಕ್ ನಾ ತೆಂ ಅಜ್ಯಾಪ್‍ಚ್. ಉಪ್ರಾಂತ್ ಸೌಂಡ್, ಮ್ಯೂಸಿಕ್, ಎಡಿಟಿಂಗ್ – ಹ್ಯಾ ಸರ್ವ್ ಪ್ರೊಸೆಸಾಂ ಸಂದರ್ಭಾರ್, ಕೊಣಾ ಎಕ್ಲ್ಯಾಕೀ ಹ್ಯೊ ಹಾಸ್ಯಾಸ್ಪದ್ ಸಂಗ್ತಿ ದಿಸೊಂಕ್-ಕಳೊಂಕ್ ನಾಂತ್ ಮ್ಹಳ್ಯಾರ್ ಹೆ ಸರ್ವ್ ಕಿತೆಂ ದೊಳೆ ಧಾಂಪುನ್ ಆನಿ ಕಾನಾಂಕ್ ಗುಡ್ದಿ ಚೆಪುನ್ ವಾವುರ್ಲೆಗೀ? ವಾಲ್ಟಿ ಸ್ವತಃ ಏಕ್ ಬರವ್ಪಿ, ತಾಕಾ ಆಪ್ಣೆಂ ಉಚಾರ್ಚ್ಯಾ ಸಂಭಾಷಣಾಂಕ್ ಗಾಂಡ್‍ತೋಂಡ್ ನಾ ಮ್ಹಣ್ ಭೊಗುಂಕ್‍ಚ್ ನಾ ಕಿತ್ಯಾಕ್? (ವಾ ಸಬ್‍ಸ್ಟ್ಯಾಂಡರ್ಡ್ ದಿಲ್ಯಾರ್‌ಚ್ ಲೊಕಾಕ್ ರುಚ್ತಾ ಮ್ಹಳ್ಳೆಂ ಧೋರಣ್?).

ನಿರ್ದೇಶಕಾನ್‍ಂಚ್ ಸಾಂಗ್ಲಾಂ, ಸಗ್ಳ್ಯಾ ಟೀಮಾನ್ ದೊದೋನ್ ಪಾವ್ಟಿಂ ಫಿಲ್ಮ್ ಪರಿಶೀಲನ್ ಕೆಲಾಂ ಮ್ಹಣ್. ತರ್ ತಾಂಚ್ಯಾ ಮುಖೆಲ್ಯಾಕ್‍ಚ್ ತಾಣಿಂ ಭಾಯ್ರ್ ಘಾಲ್ಲೆಂಗೀ?! ಉಲೊಣ್ಯಾಕ್ ಕುಸ್ಕುಟಾಚೆಂ ಪುಣೀ ಮೋಲ್ ನಾಕಾಗೀ?

ತರ್ ಆಪ್ಣೆಂ ‘ಪಳೆಂವ್ಕ್ ನಾ’ ಮ್ಹಣ್ ಕಶೆಂ ಸ್ಟೇಟ್‍ಮೆಂಟ್ ದಿಲೆಂ? ಕಸಲೆ ಪೊಕ್ಳೆ ಸಾಂಗ್ಲ್ಯಾರೀ ಲೊಕಾಕ್ ಮೆಚ್ವತಾ ಮ್ಹಳ್ಳಿ ಅಖಂಡ್ ಪಾತ್ಯೆಣಿಗೀ? ಗಂಭೀರ್ ಸಂಗ್ತಿಂನಿಯೀ ಕಸಂಟ್ ಜೋಕ್ಸ್/ಕೊಮೆಡಿ ಉಲವ್ನ್ ಸವಯೆರ್ ಪಡ್ಲಾಂ?

ತ್ಯಾ ಭಾಯ್ರ್, ಪಿಲಾತಾನ್ ಹಾತ್ ಧುಲ್ಲೆಪರಿಂ ಸ್ಟೇಟ್‍ಮೆಂಟ್ ದಿಲ್ಯಾರ್ ಜಾಲೆಂಗೀ? ನಿರ್ಮಾಣ್ ಸಂಸ್ಥ್ಯಾಚೊ ಮುಖೆಲಿ ಜಾಲ್ಲ್ಯಾಕ್ ಇತ್ಲಿಯೀ ಬೇಜವಾಬ್ದಾರ್ ಆನಿ ‘ಉಡಾಫೆ’ ಮನೋಭಾವ್ ಆಸೊಂಕ್ ನಜೊ. ಆಪ್ಣೆಂ ಕಿತೆಂ ದಿಲ್ಯಾರೀ, ತೆಂ ಬೆಳ್ಶೆಲ್ಲೆಂ, ಫುಂರ್ಗೆಲ್ಲೆಂ ವಾ ಕುಸ್‍ಲ್ಲೆಂಚ್ ತರೀ, ಲೋಕ್ ಸ್ವೀಕಾರ್ ಕರ್ತಾ, ಕೊಣೀ ವಿಚಾರಿನಾ, ಕಶೆಂಯೀ ಚಲ್ತಾ ಮ್ಹಳ್ಳೊ ಮನೋಭಾವ್‍ಚ್ ಹ್ಯಾ ಪಾಟ್ಲ್ಯಾನ್ ಆಸ್ಚೊ ದಿಸನಾಂಗೀ?

ಮ್ಹಾಕಾ ಏಕ್ ಸಮ್ಜನಾ ಕಿತೆಂ ಮ್ಹಳ್ಯಾರ್, ಹೆ ಸರ್ವ್ ಇತ್ಲೆಂ ಲೋ ಗ್ರೇಡ್ ಪ್ರೊಡಕ್ಟ್ ದೀವ್ನ್ ಸಯ್ತ್, ಆಪ್ಣೆಂ ಟೈಟಾನಿಕ್, ಅವತಾರ್, ಬಾಹುಬಲಿಚ್ಯಾಕೀ ಮಿಕ್ವಲ್ಲೆಂ ಫಿಲ್ಮ್ ಕಾಡ್ಲಾಂ ಮ್ಹಣ್ ಪೊಕ್ಳೆ ಸೊಡ್ಚೆಂ, ಬಂಡಲಾಂ ಮಾರ್ಚೆಂ ಪಳೆತಾನಾ, ಹ್ಯಾ ಮನ್ಶ್ಯಾಂಚಿ ಮನಸ್ಥಿತಿ ಕಸಲಿ ಮ್ಹಣ್‍ಂಚ್ ಕಳನಾ.

4. ಬಜೆಟ್ ಕಿತ್ಲಿ? ಪೈಶ್ಯಾಂಕ್ ಮೋಲ್ ನಾ?!

ಹಿ ಏಕ್ ಸೂಕ್ಷ್ಮ್ ಗಜಾಲ್. ಲೊಕಾ ಮುಖಾರ್ ಉಚಾರ್ಲೆಲ್ಯಾ ಪರ್ಮಾಣೆಂ ಬಿಪಿಎನ್ around 40 ಲಾಕ್ ಖರ್ಚುನ್ ಕಾಡ್‍ಲ್ಲೆಂ ಫಿಲ್ಮ್! ಸಿನೆಮಾ ಪ್ರೇಕ್ಷಕಾಕ್ ಸಯ್ತ್ ಕಳ್ಳಾಂ, ತಾಂತುಂ ತಸಲೆಂ ವ್ಹಡ್ಲೆಂ ಕಿತೆಂಯೀ ನಾ ಮ್ಹಣೊನ್… ಎಸ್.ಬಿ. ಮ್ಹಣ್ತಾ, “ಎಕಾ ದೃಶ್ಯಾ ಖಾತಿರ್ – ಡಯಾನಾನ್ ರಾತಿಂ ಚಲ್ಚೆಂ, ಥೊಡ್ಯಾಚ್ ಸೆಕುಂಡಾಚೆಂ – 80 ಹಜಾರ್ ಖರ್ಚಿಲ್ಯಾತ್!” ಹೆಂ ನಿಜಾಯ್ಕೀ ಅಚರ್ಯೆಂಚ್ ಸಯ್. ಅಶೆಂ ಉಚಾರ್ಚೊ ವ್ಯಕ್ತಿ ನಿಜಾಯ್ಕೀ ನೆಣ್ತೊ ಆಸ್ಯೆತ್ ಮ್ಹಣ್ ಭೊಗ್ಲೆಂ ಮ್ಹಾಕಾ.

ತ್ಯಾ ದೃಶ್ಯಾಂತ್ ಚಲೊನ್ ಚಲೊನ್ ಪಾಯ್ (ಏಕ್ ಮಾತ್ರ್!) ಜಖಂ ಜಾವ್ನಾಸ್ತಾ. ತೆಂ ಮೇಕಪ್ ಕರ್ನ್ ಪರಿಣಾಮ್‍ಕಾರಿ ರಿತಿನ್ ದಾಕಯ್ಲಾಂ. ಪುಣ್ 80 ಹಜಾರಾಂಚೆಂ ಕಿತೆಂ ಆಸಾ ತಾಂತುಂ? ಕಿತೆಂ ಮೇಕಪ್‍ವಾಲ್ಯಾಕ್ ಜರ್ಮನಿ ಥಾವ್ನ್ ಹಾಡಯಿಲ್ಲೆಂಗೀ? ವಾ ಚೆನ್ನೈಚೆಂ 12 ಜಣಾಂಚೆಂ ಟೀಮ್ ಆಯಿಲ್ಲೆಂಗೀ? ಜರ್ ಸ್ಟ್ಯಾನಿನ್ ಸಾಂಗ್ಚೆಂ ಸ್ಟೇಟ್‍ಮೆಂಟ್ ಮುಗ್ಧ್ ವ್ಹಯ್ ತರ್, ಹೆರ್ ಕೊಣೆಂಗೀ ‘ಗೋಲ್‍ಮಾಲ್’ ಕೆಲಾ, ಆನಿ ನಿರ್ಮಾಣ್ ಸಂಸ್ಥ್ಯಾಕ್ ಲುಟ್ಲಾಂ ಮ್ಹಣ್ ಅರ್ಥ್ ಕರ್ಯೆತ್‍ಗೀ?

ಸ್ಟ್ಯಾನಿನ್‍ಂಚ್ ನಾಪಾಸ್ ಮ್ಹಣ್ ಫೈಸಲ್ ದಿಲ್ಲ್ಯಾ ‘ಏಕ್ ಆಸ್ಲ್ಯಾರ್ ಏಕ್ ನಾ’ ಫಿಲ್ಮಾಚಿ ಕಾಣಿ ಆನಿಕೀ ರೋಚಕ್. ತೆಂ ರಿಲೀಸ್ ಜಾತಾಸ್ತಾನಾ, ‘50 ಲಾಖ್ ಬಜೆಟಿಚೆಂ ಫಿಲ್ಮ್’ ಮ್ಹಣ್ ಖಬರ್ ಜಾಲ್ಲಿ. ಉಪ್ರಾಂತ್ ನಿರ್ಮಾಪಕ್ ಫ್ರ್ಯಾಂಕ್ ಫೆರ್ನಾಂಡಿಸಾನ್ ಎಕಾ ವೀಡಿಯೊ ಸಂದರ್ಶನಾಂತ್, “ಏಕ್ ಕೊರೊಡ್ ಖರ್ಚಿಲ್ಯಾತ್” ಮ್ಹಣ್ ಗವಾಯ್ ದಿಲಿ! ಆನಿ ಆಬ್ಳೆ ಎಸ್.ಬಿ. ದೋನ್ ಸಂದರ್ಶನಾಂನಿ ದೋನ್ ಐವಜ್ ಉಚಾರ್ತಾ – ಎಕಾಂತ್ 60 ಲಾಖ್, ಆನ್ಯೇಕಾಂತ್ 70 ಲಾಖ್!!!

ಮ್ಹಳ್ಯಾರ್, ಹಾಂತುಂ ಕಳ್ತಾ ಕಿತೆಂಗೀ ಮ್ಹಳ್ಯಾರ್ ದುಡ್ವಾ ವಿಶಿಂ ಸಯ್ತ್ ಕಿತ್ಲೊ ಬೆಪಾರ್ವೊ!! ಸಾಯ್ಬಾ ಭೊಗೊಸ್! ಹಾಂತುಂ ಕೊಣಾಚೆಂ ಸತ್, ಕೊಣಾಚೆಂ ಅಸತ್ – ತೆಂ ತಾಂಕಾಂಚ್ ಕಳಿತ್. ಪುಣ್ ಆಪ್ಣೆಂ ಇನ್ವಾಲ್ವ್ ಜಾಲ್ಲ್ಯಾ ಎಕಾ ಫಿಲ್ಮಾಚ್ಯಾ ದುಡ್ವಾ ಥಂಯ್ ಬೇಫಿಕಿರ್ ಮನೋಭಾವ್ ಹಾಂತುಂ ಉಟೊನ್ ದಿಸ್ತಾ. (10 ವರ್ಸಾಂ ಆದಿಂ ತಿತ್ಲ್ಯಾ ಬಜೆಟಿಚೆಂ ಔಟ್‍ಪುಟ್ ಕಸಲೆಂ ಮ್ಹಳ್ಳಿ ಗಜಾಲ್ ದುಸ್ರಿ).

ಮೈಕಲ್ ಸೊಜಾನ್, ಸದಾಂಚೆಪರಿಂ, ಪಾತ್ಯೆಣೆನ್ ಆನಿ ವಿಶ್ವಾಸಾನ್ ದುಡು ದಿಲಾ. ಪುಣ್ ತ್ಯಾ ದುಡ್ವಾಕ್ ನ್ಯಾಯ್ ಲಾಭ್ಲಾಗೀ? ಪ್ರೊಡಕ್ಟ್ ಪಳೆಲ್ಲ್ಯಾಂಕ್ ನ್ಯಾಯ್ ಜಾಲಾ ಮ್ಹಣ್ ಭೊಗನಾ. ಚಡ್ತಿಕ್ ಸಂಗ್ತಿ, ನಿರ್ಮಾಪಕಾನ್‍ಂಚ್ ತನ್ಖಿ ಕರವ್ನ್ ಜಾಣಾಂ ಜಾಯ್ಜೆ.

5. ಫೀಚರ್ ಫಿಲ್ಮ್ ವಾ ಶಾರ್ಟ್ ಫಿಲ್ಮ್?!

ಮುಖ್ಯ್ ಗಜಾಲ್ ಮ್ಹಳ್ಯಾರ್, ಹ್ಯಾ ಫಿಲ್ಮಾ ಪಾಟ್ಲೊ ಉದ್ದೇಶ್ ವೆಗ್ಳೊಚ್ ಆಸ್ಯೆತ್ ಮ್ಹಣ್ ದುಬಾವ್ ಕರುಂಕ್ ಇಡೆಂ ದಿಂವ್ಚೆಂ ತಾಚ್ಯಾ ಅವ್ಧೆನ್. ತಿತ್ಲಿ ವ್ಹಡ್ ಆನಿ ತಿಯೀ ಫುಂಕ್ಯಾಚಿ ಬಜೆಟ್ ಆಸೊನ್‍ಯೀ ಹಾಣಿಂ ಕಾಡ್‍ಲ್ಲೆಂ ಸಿನೆಮ್ ದೋನ್ ಘಂಟೆಯೀ ನಾ! ಫಕತ್ ಏಕ್ ಘಂಟೊ ಆನಿ 42 ಮಿನುಟಾಂ. ಟೈಟಲ್ ಕಾರ್ಡಾಂ ದಾಕಂವ್ಕ್ ತಿತ್ಲೊ ವೇಳ್ ಕಾಡ್ಲಾ ಮ್ಹಳೆಂ ನೆ, ತಾಚೊ ಘುಟ್ ಹೊಚ್. “100 ಮಿನುಟಾಂಚಿ ಕಡ್ಡಾಯ್ ರೂಲ್ ಪಾಳಿಜೆ ಮ್ಹಳ್ಳ್ಯಾ ಅನಿವಾರ್ಯತೆಕ್ ಲಾಗೊನ್ ಅಶೆಂ ಕೆಲಾಂ” ಮ್ಹಣ್ತಾತ್ ಸಿನೆಮಾಂನಿ ವಾವುರ್ತೆಲೆ.

ವರ್ಸಾ ಥಾವ್ನ್ ಬೊಬಾಟುನ್, ಹೈಪ್ ಕರ್ನ್ ಆನಿ ಥೊಡ್ಯಾಂನಿ ಅತ್ಯದ್ಭುತ್ ಮ್ಹಣ್ ಮತ್ ಪಿಸಾಂತುರ್ ಜಾಲ್ಲೆಲ್ಯಾಂಪರಿಂ ಹೊಗ್ಳಿಕ್ ಉಚಾರ್ಲೆಲೆಂ ಫಿಲ್ಮ್ ಪಾವ್ಣೆಂ ದೋನ್ ವೊರಾಂಯೀ ನಾ! ಏಕ್ ಸಿನೆಮ್ ಮ್ಹಳ್ಯಾರ್ ಸವಾಯ್ ದೋನ್ ವಾ ಅಡೇಜ್ ವೊರಾಂ ಆಸ್ತಾ. ಪುಣ್ ಹಾಂಗಾಸರ್ ತೆಂ ಪಡೊನ್‍ಂಚ್ ವಚೊಂಕ್ ನಾ ಮ್ಹಳ್ಳೆಂ ಉಟೊನ್ ದಿಸ್ತಾ. ಅರ್ಧಿ ಉಕ್ಡಿ ಕಾಣಿ ಆನಿ ಗತ್ತಿಗಟಾಚೆಂ ಸ್ಕ್ರಿಪ್ಟ್ ರಚುನ್, ‘ಏಕ್ ಫಿಲ್ಮ್ ಕಾಡ್ಲಾಂ’ ಮ್ಹಣ್ ದಾಕಂವ್ಚೊಚ್ ಇರಾದೊ ಆಸ್‍ಲ್ಲೊ ಮ್ಹಣ್ ಕೊಣೆಂಯೀ ನಿಚೆವಾಕ್ ಆಯ್ಲ್ಯಾರ್ ಚೂಕ್ ಜಾಂವ್ಚಿ ನಾ.

6. ಲೊಕಾಕ್ ಪಳೆಂವ್ಕ್ ಅವ್ಕಾಸ್ ನಾ?

ನಿಮಾಣೆಂ, ಏಕ್ ಫಿಲ್ಮ್ ಲೊಕಾನ್ ಪಳೆಂವ್ಕ್ ಆಸ್ಚೆಂ. ಪ್ರೀಮಿಯರ್ ಶೋ ಮ್ಹಣ್ ಸ್ಪೆಶಲ್ ದರಿಚ್ಯಾ ಟಿಕೆಟಿಂಚ್ಯಾ ವಿಶೇಸ್ ಪ್ರದರ್ಶನಾಂಚಿ ಗಜಾಲ್ ಗಾಜ್ಲಿ ಶಿವಾಯ್ ಲೊಕಾಕ್ ಪಳೆಂವ್ಕ್ ಸೊಡ್ಚ್ಯಾ ವಿಶಿಂ ಕಾಳ್ಜಿ ದಿಸೊಂಕ್ ನಾ! ನಿಮಾಣೆಂ, ಥೊಡೆಚ್ ದೀಸ್ ಟೊಕಿಸಾಂತ್ ಆಸ್‍ಲ್ಲೆಂ. ನಾಮ್‍ಕೇ ವಾಸ್ತೆ ಪಬ್ಲಿಸಿಟಿ ಸೊಡ್ಲ್ಯಾರ್ ಫಿಲ್ಮಾಕ್ ಲೋಕ್ ಯೇಂವ್ದಿ ವಾ ಶೋ ರದ್ದ್ ಜಾಂವ್ದಿ, ಆಪ್ಣಾಕ್ ಪಡೊನ್‍ಂಚ್ ವಚೊಂಕ್ ಮ್ಹಳ್ಳೆ ತಸಲೆಂ ಧೋರಣ್‍ಂಚ್ ದಿಸ್ತಾಲೆಂ. ತ್ಯಾ ತೆಕಿದ್ ಫಿಲ್ಮಾಕ್ ಲೋಕ್ ಯೇಂವ್ಕ್ ನಾ (ಹಾಂವ್ ಏಕ್ ದೀಸ್ ಗೆಲ್ಲೊಂ, ಏಕೀ ಟಿಕೆಟ್ ವಚೊಂಕ್ ನಾ, ದೆಕುನ್ ಶೋ ರದ್ದ್ ಮ್ಹಣಾಲೆ).

ಹೆರ್ ಫಿಲ್ಮ್ ಕಾಡ್ಲೆಲ್ಯಾಂನಿ, ತಾಂಚೆಂ ಫಿಲ್ಮ್ ಕಶೆಂಯೀ ಆಸೊಂದಿ, ಕನಿಷ್ಠ್ ಲೊಕಾಕ್ ಹಾಡಂವ್ಚ್ಯಾಕ್ ಕಾಡ್‍ಲ್ಲಿ ಮ್ಹಿನತ್ ಮೆಚ್ವಜೆ. ಪುಣ್ ಬಿಪಿಎನ್‍ಗಾರಾಂಕ್ ತೆಂ ಅನಾವಶ್ಯ್ ದಿಸ್ಲೆಂ! ಕಿತ್ಲೆ ದೀಸ್ ಆಸಾ, ಖಂಚ್ಯಾ ದಿಸಾ ಲಾಸ್ಟ್ ಮ್ಹಳ್ಳೆಂ ಘಾಲ್ಲೆಂ ದಿಸೊಂಕ್ ನಾ. ಹೆಂ ಸರ್ವ್ ನಿಯಾಳ್ಳ್ಯಾರ್ ಫಿಲ್ಮ್ ಕಾಡ್‍ಲ್ಲೊ ಉದ್ದೇಶ್‍ಚ್ ವೆಗ್ಳೊ ಮ್ಹಣ್ ಚಿಂತುಂಕ್ ಅವ್ಕಾಸ್ ಮೆಳ್ತಾ.

7. ಸಂದೇಶ್, ಹುಸ್ಕೊ ಆನಿ ಸಿನೆಮಾ…

ಸ್ಟ್ಯಾನಿನ್ ಘೆತ್‍ಲ್ಲಿ ಕಥಾ ವಸ್ತ್ ಪುಣೀ ಬರಿಚ್. ಪುಣ್ ತಿ ಸಾರ್ಕಿ ಚಿಂತುನ್, ಮತಿಂತ್ ಶಿಜವ್ನ್ ಬರಿ ಕರ್ನ್ ಬರವ್ನ್ ಕಾಡ್‍ಲ್ಲಿ ತರ್ ಏಕ್ ಬರೆಂ ಫಿಲ್ಮ್ ಜಾತೆಂ. ದೋನ್ ವರ್ಸಾಂ ಘೆತ್ಲ್ಯಾರೀ ತಶೆಂ ಜಾಂವ್ಕ್ ನಾ. ತಾಚೆ ವಯ್ರ್ ‘ಸಮಾಜೆಕ್ ಸಂದೇಶ್ ದೀಜೆ’ ಮ್ಹಳ್ಳಿ ಗಿರಾಂತ್ (ಥೊಡ್ಯಾಂಕ್).

ಬರವ್ಪ್ಯಾಂನಿ ವಾಸ್ತವಿಕತೆಕ್ ಚಡ್ ಗುಮಾನ್ ದೀಜೆ. ಸಮಾಜೆಂತ್ ತ್ಯಾ ತ್ಯಾ ಕಾಳಾಕ್ ಸರಿ ಜಾವ್ನ್ ವೆವೆಗ್ಳೆ ಸಮಸ್ಸೆ, ವಿಚಿತ್ರ್ ಸನ್ನಿವೇಶಾಂ ನಿರ್ಮಾಣ್ ಜಾತಾತ್. ಬಿಪಿಎನ್ ಸಿನೆಮ್ ಏಕ್ ಅಪರಿಪಕ್ವ್ ಸಿನೆಮ್. ಭುರ್ಗ್ಯಾಂಕ್ ಬೋರ್ಡಿಂಗಾಂತ್ ಘಾಲ್ಚೆಂ ಚೂಕ್ ವಾ ಅಪ್ರಾಧ್ ಮ್ಹಣ್ಚೆಂಚ್ ಪಿಶೆಂಪಣ್. (ಜೈಲಾಕ್‍ಚ್ ಘಾಲ್ಚೆಪರಿಂ ಕೆಲಾಂ). ಬ್ರಹ್ಮಾವರ್ಚೆಂ ಲಿಟಲ್ ರಾಕ್ ಏಕ್ ವಿಐಪಿ ಬೋರ್ಡಿಂಗ್ ಸ್ಕೂಲ್ ಮ್ಹಣ್ ಆದಿಂಚ್ ನಾಂವಾಡ್‍ಲ್ಲೆಂ. ಗರ್ಜ್ ವಾ ಅನಿವಾರ್ಯ್ ದೆಕುನ್ ಭುರ್ಗ್ಯಾಂಕ್ ಹೊಸ್ಟೆಲಾಂತ್ ರಾವಂವ್ಚೆಂ ಏಕ್ ಸಾಮಾಜಿಕ್ ಸಮಸ್ಸೊ ಕಶೆಂ ಜಾತಾ?

ಆನ್ಯೇಕ್, ದುಸ್ರ್ಯಾ ಕಾಜಾರಾಚೆಂ. ಘೊವ್ ವಾ ಬಾಯ್ಲ್ ಮರಣ್ ಪಾವ್ಲ್ಯಾರ್, ಭುರ್ಗಿಂ ಆಸ್ಲ್ಯಾರೀ ನಾತ್ಲ್ಯಾರೀ, ಪರತ್ ಕಾಜಾರ್ ಜಾಂವ್ಚೆಂಯೀ ವಾಯ್ಟ್ ಮ್ಹಣೊಂಕ್ ಜಾತಾಗೀ? ಮಾರ್ಕುಚ್ಯಾ ಬಾಪಾಯ್ನ್ ಪುತಾಕ್ ಕೊವೆಂತಾಂತ್ ದವರ್ಚೆಂ ಬಾಯ್ಲೆ ವರ್ವಿಂ, ಪುಣ್ ಪುತಾಚೆರ್ ಕಾಳ್ಜಿ ಆಸೊನೀ ತೊ ಪಯ್ಸ್ ಉರ್ಲೊ ಕಿತ್ಯಾಕ್? ಫಿಲ್ಮಾಂತ್ ಬಾಪಾಯ್ಕ್ ಪುತಾಚೆರ್ ಹೇಟ್ರೆಡ್ ಉಬ್ಜಲ್ಲೆಂ ದಾಕಂವ್ಕ್ ನಾ. ತರ್, ಕಾಣಿಯೆಗಾರಾಚ್ಯಾ ಅಪೇಕ್ಷೆ ಪ್ರಕಾರ್ ತೊ ರೂಪಾಂತರ್ ಜಾಲೊಗೀ?

ತಿಸ್ರೆಂ, ಪ್ರಾಯ್ವಂತಾಂಚೆ ಆಸ್ರೆ. ಆಮ್ಚ್ಯಾ ಲೊಕಾಕ್ ಸುಕೊ ಸೈಲಾಪ್ ಉಲಂವ್ಚೆಂ ಮ್ಹಳ್ಯಾರ್ ಭಾರೀ ಖುಷೆಚಿ ಸಂಗತ್. ಆಪ್ಲ್ಯಾ ಘರಾ ಕಿತೆಂ ಕರ್ತಾತ್, ಕಶೆಂ ಜಿಯೆತಾತ್ ತ್ಯಾ ವಿಶಿಂ ಸಾಂಗನಾಂತ್. ಸಂಸಾರಾಕ್ ಬೂದ್‍ಬಾಳ್ ಬರಿಚ್ ಉಚಾರ್ತಾತ್. ಹ್ಯಾ ವರ್ಸಾಂನಿ ಪ್ರಾಯ್ವಂತಾಂಚೆ ಆಸ್ರೆ ಏಕ್ ಅನಿವಾರ್ಯ್ ಸಂಗತ್. ದೀಸ್ ರಾತ್ ಚಾಕ್ರಿ ಕರುಂಕ್ ಅಸಾಧ್ಯ್ ಜಾಲ್ಲ್ಯಾ ಘರ್ಚ್ಯಾಂನಿ ಅಸಲಿ ವ್ಯವಸ್ಥಾ ವೆಂಗ್‍ಲ್ಲ್ಯಾಂತ್ ಚೂಕ್ ಕಿತೆಂ? ಘರಾಂತ್ ಜಿವಂತ್ ಮೊಡ್ಯಾಪರಿಂ ಎಕ್ಸುರೆಂ ಜಿಯೆಂವ್ಚ್ಯಾ ಪ್ರಾಸ್ ಜತ್ನೆಕ್ ಜಣ್ ಆನಿ ಸಾಂಗಾತಾಕ್ ಮನಿಸ್ ಆಸ್ಚ್ಯಾ ಭೊಂವಾರಾಂತ್ ಜಿಯೆಲ್ಯಾರ್ ದೈಹಿಕ್ ಆನಿ ಮಾನಸಿಕ್ ಭಲಾಯ್ಕೆಕ್ ಬರೆಂಚ್.

ಆನಿ ಭುರ್ಗಿಂ, ಕಾಜಾರ್ ಜಾವ್ನ್ ಘರಾ ಆಯ್ಲೆಲಿಂ (ಸುನ್ ವಾ ಜಾಂವಯ್) ವಾ ವ್ಹಡಿಲಾಂ ಚೂಕ್ ಕರ್ತಾತ್ ವಾ ಅನ್ಯಾಯ್ ಕರ್ತಾತ್ ಜಾಂವ್ಕ್ ಪುರೊ. ತೆಂ ಎಕೇಕ್ ಘರಾಂತ್ ಎಕೇಕ್ ರಿತಿನ್ ಆಸ್ತಾ. ಸಿನೆಮಾಕ್ ಏಕ್ ಕಾಣಿ ಜಾಯ್. ಖಂಚಿಯೀ ವಿಷಯ್ ಚಲ್ತಾ. ಪುಣ್ ತಿ ಆಕರ್ಷಕ್ ರಿತಿನ್ ವಿಣುನ್, ಸೊಭಿತ್ ರಿತಿನ್ ನಿರೂಪಣ್ ಕರಿಜೆ. ಸಿನೆಮಾಂತ್ ಚಡ್ ಚತ್ರಾಯ್ ಗರ್ಜ್. ಹ್ಯಾ ಸರ್ವ್ ಗಜಾಲಿಂನಿ ‘ಬಾಪಾಚೆ ಪುತಾಚೆ ನಾಂವಿಂ’ ಫಿಲ್ಮ್ ಪುರ್ತೆಂ Fail ಜಾಲಾಂ. ಅಟ್ಟರ್ disastrous ಪ್ರದರ್ಶನ್ ಹೆಂ. ತರೀ ಹ್ಯಾ ಮನ್ಶ್ಯಾಂನಿ ಫುಗಾರ್ಚೆಂ ಪಳೆತಾನಾ ‘ಹೆತ್ತವರಿಗೆ ಹೆಗ್ಗಣ ಮುದ್ದು’ಚ್ಯಾಕೀ ವಿಪ್ರೀತ್ ಭೊಗ್ತಾ!

8. ಜಸ್ಟಿಫಿಕೇಶನ್ ಮ್ಹಳ್ಳಿ ಗಜಾಲ್‍ಚ್ ಕಳಿತ್ ನಾ?

ಆನಿ ಹ್ಯಾ ಕಾಣಿಯೆಂತ್ ಖಂಚ್ಯಾಯೀ ವಾಡಾವಳಿಕೀ, ಘಡಿತಾಂಕೀ, ಉಲೊವ್ಣ್ಯಾಂಕೀ ಏಕ್ ರಾಜಾಂವ್, ಕಾರಣ್ ಆನಿ ಜಸ್ಟಿಫಿಕೇಶನ್ ಮ್ಹಳ್ಳೆಂ ನಾ. ಮರ್ಡರ್ ಸೀನ್ ಘಡೊಂಕ್‍ಚ್ ನಾ ತರೀ, ಮಾರ್ಕು, ಪತಿಣ್ ಆನಿ ಸಹಾಯಕಾಚೆಂ ಗಿಲ್ಟಿ ಫೀಲಿಂಗಾಚೆಂ ನಟನ್ ಕಿತ್ಯಾಕ್? ಆಮ್ಚೊ ಲೋಕ್ ಸಿನೆಮಾಂಚ್ ಪಳೆನಾ, ತಾಂಕಾಂ ಕಶೆಂಯೀ ಮಾಂಕೊಡ್ ಕರ್ಯೆತ್ ಮ್ಹಳ್ಳೆಂ ಧೋರಣ್‍ಂಚ್ ಹ್ಯಾ ಪಾಟ್ಲೆಂ ಕಾರಣ್ ನ್ಹಯ್ವೇ?! ಎಕೇಕ್ ಪಾತ್ರ್ ಬ್ಲಂಟ್ ರಿತಿನ್ ವರ್ತನ್ ಕರ್ತಾತ್. ವ್ಯಕ್ತಿತ್ವಾಂತ್ ವ್ಯತಿರಿಕ್ತ್ ಬದ್ಲಾವಣ್, ಚಂಚಲತಾ ಕಿತ್ಯಾಕ್? ಕಿತೆಂಯೀ ಬದ್ಲೊಂಕ್ ಸಾಧ್ಯ್ ಆಸಾ. ಪುಣ್ ಕಾಣಿ/ಸಿನೆಮಾಂತ್ ಸಕ್ಕಡ್ ಸಂಗ್ತಿಂಕ್ ಜಸ್ಟಿಫಿಕೇಶನ್ ದೀಜೆಚ್. ಬದ್ಲಾವಣೆಕ್ ಕಾರಣ್ ವಾ ಪ್ರೇರಣ್ ಆಸಜೆಚ್. ತೆಂ ಸೂಚ್ಯ್ ರಿತಿನ್ (ಹಿಂಟ್) ತರೀ ದಾಕಯ್ಜೆಚ್. ‘ಕವಿತಾ ಕಶೆಂಯೀ ಬರವ್ಯೆತ್’ ಮ್ಹಳ್ಳ್ಯಾ ಡಿಫೆಕ್ಟಿವ್ ಚಿಂತ್ನಾಂನಿ ಕಾಣಿಯೀ ತಶೆಂಚ್ ಬರಂವ್ಕ್ ಜಾಯ್ನಾ.

ಎಡಿಟ್ ಕೆಲ್ಲ್ಯಾ ಫಿಲ್ಮಾಂತ್ ಮ್ಹಾತಾರೆ ಸ್ವತಃ ವಚೊಂಕ್ ನಾಂತ್, ಬಗಾರ್ ಮಾರ್ಕುನ್ ಸಹಾಯಕಾ ಮುಖಾಂತ್ರ್ ತಾಂಕಾಂ ಭಾಯ್ರ್ ಧಾಡ್ಲೆಂ ಮ್ಹಣಯ್ಲಾಂ. ತಶೆಂ ಜಾಲ್ಲೆಂಚ್ ವ್ಹಯ್ ತರೀ, ದೊಗಾಂಯ್ನಿ ಚುಕಿದಾರ್ ಮ್ಹಳ್ಳೆಪರಿಂ ಬಿಹೇವ್ ಕರ್ಚ್ಯಾ ದೃಶ್ಯಾಂಕ್ ಅರ್ಥ್‍ಚ್ ನಾ. ಸುರ್ವಿಲ್ಯಾ ದೃಶ್ಯಾಂತ್, ಧುವೆನ್ ಮೊಗಾನ್ ವಾ ಅಭಿಮಾನಾನ್ ಕೊಣಾಕ್ ತರೀ ಪಬ್ಲಿಕ್ ಕಾರ್ಯಾಕ್ ಆಪವ್ನ್ ಹಾಡ್ಲಾಂ ತರ್, ಕೋಣ್ ಕಿತೆಂ ಮ್ಹಣ್ ಸಮ್ಜನಾಸ್ತಾನಾ, ಫಕತ್ ತಾಂಚೆಂ ಸುರ್ಪ್ ಪಳೆವ್ನ್ ಬಾಪಾಯ್ನ್ ಕ್ರೋಧಾನ್ ಭರ್ಚಿ ಗರ್ಜ್ ಕಸಲಿ? ಬುಕ್ಕೊ ಎಕ್ಲ್ಯಾಕ್‍ಚ್ ಜೊಕುನ್ ಉಡಯಿಲ್ಲೊಗೀ? ತೊಚ್ ಆಪ್ಲೊ ಬಾಪಯ್ ಮ್ಹಣ್ ತಾಕಾ ಕಳಿತ್ ಆಸ್‍ಲ್ಲೆಂಗೀ? ಕಶೆಂ ಕಳಿತ್ ಜಾಲೆಂ? ಜರ್ ಕಳಿತ್ ಆಸ್‍ಲ್ಲೆಂ, ತರ್, ಉಪ್ರಾಂತ್ಲೊ ‘ಡೊಂಬರಾಟ’ ಕಿತ್ಯಾಕ್? ದೊಗಾಂಕೀ ಎಕಾಮೆಕಾಚಿ ವಳಕ್ ಮೆಳ್ಳಿ ತರೀ ಖಂಚ್ಯಾ ಆಧಾರಾರ್?

ಫಿಲ್ಮಾಂತ್ ಪ್ರಸ್ತುತ್ ಕಾಳ್‍ಚ್ ದಾಕಯ್ಲಾ. ಮ್ಹಣ್ಜೆ ಸ್ಮಾರ್ಟ್‍ಫೊನಾಂ, ಸಿಸಿಟಿವಿ ಆಸಾ. ಏಕ್ ದೀಸ್ ಮಾರ್ಕುಚೆಂ ಧುವ್ ಘರಾಂತ್ ದಿಸನಾ. ತೆಂ ಖಂಯ್ ಗೆಲಾಂ ಕೊಣೀ ನೆಣಾಂತ್. ಪುಣ್ ತಾಚೆಂ ಮೊಬೈಲ್ ಮಾತ್ರ್ ಎಕಾ ಆಂಗ್ಡಿಂತ್ ರಿಂಗ್ ಜಾವ್ನ್ ಆಸ್ತಾ. ಉಪ್ರಾಂತ್ ತೆಂ ಆಸ್ರ್ಯಾ ಥಾವ್ನ್ ದೊಗಾ ಮ್ಹಾತಾರ್‍ಯಾಂಕ್ ಘರಾ ಆಪವ್ನ್ ಹಾಡ್ತಾ. ಪುಣ್ ತೆಂ ಮೊಬೈಲ್ ತ್ಯಾ ಆಂಗ್ಡಿಂತ್ ಕಿತ್ಯಾಕ್ ಸೊಡ್ನ್ ಗೆಲ್ಲೆಂ!? ತಾಂತುಂ ಕಾಣಿಯೆಕ್ ಪೂರಕ್ ವಾ ಟ್ವಿಸ್ಟ್ ದಿಂವ್ಚೆಂ ವಾ ವಿಜ್ಮಿತ್ ಕರ್ಚೆಂ ಕಾಂಯ್ ಪುಣೀ ಆಸಾಗೀ? ಮೊಬೈಲ್ ಥಂಯ್ ದವರ್ಲೆಲ್ಯಾನ್ ಕಿತೆಂ ಘುಂವ್ಡಿ ಆಯ್ಲಿ? ತಾಚೊ ಮಹತ್ವ್ ಕಿತೆಂ? ಪಾಟಿಂ ಘರಾ ಯೇಂವ್ಕ್ ಆಸಾಚ್ ಜಾಲ್ಲ್ಯಾನ್ ಮೊಬೈಲ್ ಸೊಡ್ನ್ ಗೆಲ್ಲ್ಯಾಂತ್ ಕಿತೆಂ ನಾಟಕೀಯತಾ ಲಾಭ್ಲಿ? ತಾಕಾ ಆಪ್ಲ್ಯೊ ವಸ್ತು ವಿಸ್ರೊನ್ ವೆಚಿ ಸವಯ್ ಆಸ್‍ಲ್ಲೆಪರಿಂ ಕಾಂಯ್ ದಾಕಂವ್ಕ್ ನಾ. ಮ್ಹಳ್ಯಾರ್, ಒಟ್ರಾಶಿ ಏಕ್ ಸೀನ್ ಕ್ರಿಯೇಟ್ ಕರಿಜೆ ಮ್ಹಳ್ಳ್ಯಾ ಗತ್ತಿಗಟಾಕ್ ಆನಿ ಅನಿವಾರ್ಯತೆಕ್ ಲಾಗೊನ್ ತಾಳ್‍ಮೂಳ್ ನಾತ್ಲೆಲಿಂ ದೃಶ್ಯಾಂ ಶೂಟ್ ಕೆಲ್ಯಾಂತ್.

ಹೆಂ ಸರ್ವ್ ‘ಕೊಂಕ್ಣಿ ಪ್ರೇಕ್ಷಕ್ ಮೂರ್ಖ್ ವರ್ಗಾಚೆ, ಭೆರೆ ಮ್ಹಣ್ ಚಿಂತುನ್‍ಂಚ್ ಕೆಲಾಂ’ ಮ್ಹಣೊಂಕ್ ಕಿತೆಂ ಹಾರ್ವರ್ಡ್ ಯುನಿವರ್ಸಿಟಿಚ್ಯಾಂನಿ ಯೇವ್ನ್ ಸಾಂಗಜೆಗೀ?

9. ಪಾತ್ಯೆಂವ್ಕ್ ಜಾಯ್ನಾತ್‍ಲ್ಲಿ ಮಾಯಾ!

ಸತ್‍ಚ್ ಸಾಂಗ್ತಾಂ, ಮ್ಹಾಕಾ ಆಜೂನ್ ಪಾತ್ಯೆಂವ್ಕ್ ಜಾಯ್ನಾ ಹೆಂ ಫಿಲ್ಮ್ ಇತ್ಲೆಂ ಉತಳ್ ಕಶೆಂ ಜಾಲೆಂ ಮ್ಹಣೊನ್. ಸ್ಟ್ಯಾನಿನ್ ದಿಲ್ಲೆಂ ಏಕ್ ಸಂದರ್ಶನ್ ಜಾಯ್ತೆ ಪಾವ್ಟಿಂ ಪಳೆಲೆಂ. ತಾಚ್ಯಾಚ್ ಉತ್ರಾಂ ಪರ್ಮಾಣೆಂ, ತಾಣೆಂ, “ಚಾರ್ ವರ್ಸಾಂ ಆದಿಂ ಕಾಣಿ ಕಿರ್ಲಲ್ಲಿ, ದೋನ್ ವರ್ಸಾಂ ಥಾವ್ನ್ ಸ್ಕ್ರಿಪ್ಟ್ ಬರಯ್ಲ್ಯಾ, ಸಗ್ಳ್ಯಾ ಟೀಮಾನ್ ದೊದೋನ್ ಪಾವ್ಟಿಂ ಫಿಲ್ಮ್ ಪಳೆಲಾಂ, ಸಕ್ಕಡೀ ಖುಷೆರ್ ಆಸಾತ್, 25 ಪಾವ್ಟಿಂ ತಿದ್ವುನ್, ಪ್ಯೂರಿಫಿಕೇಶನ್ ಜಾವ್ನ್ ಜಾವ್ನ್” ಇತ್ಲೆಂ ಬಕ್ವಾಸ್ ಆನಿ ಲಾಟ್ಟುಸ್ ಫಿಲ್ಮ್ ಕಾಡ್ಲಾಂ ಮ್ಹಳ್ಯಾರ್, ಜಟ್‍ಪಟ್ ಏಕ್ ಕಾಣಿ ಬರಯ್ಲ್ಯಾರ್ ವಾ ಫಿಲ್ಮ್ ಕಾಡ್ಲ್ಯಾರ್ ತಾಚಿ ಅವಸ್ಥಾ ಕಶಿ ಆಸತ್ ಮ್ಹಳ್ಳೆಂ ಚಿಂತುಂಕ್ ಮ್ಹಾಕಾ ಭಿರಾಂತ್ ದಿಸ್ತಾ. ‘ಆಪ್ಣಾಕ್ ಬರೆಂಚ್ ಸ್ಯಾಟಿಸ್‍ಫ್ಯಾಕ್ಷನ್ ಜಾಲಾಂ’ ಮ್ಹಣೀ ತೊ ಸಾಂಗ್ತಾ. ‘ಆಪ್ಣಾಕ್‍ಚ್ ರುಚನಾತ್‍ಲ್ಲೆಂ ಲೊಕಾಕ್ ಬಲಾತ್ಕಾರಾನ್ ಖಾವಂವ್ಕ್ ಆಪುಣ್ ಖುಷಿ ವ್ಹರಿನಾ’ ಮ್ಹಣ್‍ಯೀ ತೊಚ್ ಸಾಂಗ್ತಾ. ‘ಆಪ್ಣೆಂ ಎಂಜೊಯ್ ಕೆಲ್ಲೆಂ, ಪಯ್ಲೆಂ, ಯಾದ್‍ಗಾರ್ ಫಿಲ್ಮ್’ ಮ್ಹಣ್ ತೊ ಆಪ್ಣಾಕ್‍ಚ್ ಸರ್ಟಿಫಿಕೇಟ್ ದಿತಾ.

ಮ್ಹಾಕಾ ಏಕ್ ಸಮ್ಜನಾ, ಸ್ಟ್ಯಾನಿ ಹೆಂ ಸರ್ವ್ ಖಂಚ್ಯಾ ಮತಿಂತ್ ಸಾಂಗ್ತಾ?

ಪ್ರೀಮಿಯರ್ ಶೋಕ್ ಲಗ್ಬಗ್ 300 ಜಣಾಂಕ್ ಆಪಯಿಲ್ಲೆಂ. ತಾಂಕಾಂ ಅರ್ಧೆಂ ಉಕ್ಡೆಂಚ್ ಖಾವಯ್ಲೆಂಮೂ ತುಮಿ?! ತುಮ್ಕಾಂ ಇತ್ಲೆಂ ಖುಷಿ ದಿಲ್ಲೆಂ ಫಿಲ್ಮ್ ತಿತ್ಲ್ಯಾ ಗತ್ತಿಗಟಾಚೆಂ ಆಸ್‍ಲ್ಲೆಂ ನ್ಹಯ್ಗೀ? ಆನಿ ಜರ್ ತುಮ್ಕಾಂ ತುಮ್ಚೆಂ ಫಿಲ್ಮ್ ತಿತ್ಲೆಂ ಊಂಚಿ, ತುಮಿ ಸರ್ವಾಂನಿ ತಿತ್ಲಿ ವಾಂವ್ಟ್ ಕಾಡ್ನ್, ಪರಿಶ್ರಮಾನ್ ಕಾಡ್‍ಲ್ಲೆಂ ಫಿಲ್ಮ್ ವ್ಹಯ್ ತರ್, ಕಿತ್ಯಾಕ್ ತೆಂ ರಾತ್ ಉಜ್ವಾಡಜೆ ಜಾಲ್ಯಾರ್ ತಿದ್ವುನ್ ರಿಪೇರಿ ಕೆಲ್ಲೆಂ?

ಸಂಸಾರಾಂತ್ ಹೆಂ ಪಯ್ಲೆ ಪಾವ್ಟಿಂ ಆಸ್ತೆಲೆಂ, ಏಕ್ ಸಿನೆಮ್ ಪ್ರದರ್ಶನಾಕ್ ಘಾಲುನ್, ಥೊಡ್ಯಾಚ್ ದಿಸಾಂನಿ ತೆಂ ವೊಮ್ತೆಂ ಉದಾರೆಂ ಬದ್ಲುನ್ ಪುನರ್ ಪ್ರದರ್ಶನಾಕ್ ಘಾಲ್ಲೆಂ. ಆತಾಂ ತಿದ್ವಿಲಾಂ ಮ್ಹಳ್ಯಾರ್, ಪಯ್ಲೆಂ ದಿಲ್ಲ್ಯಾಂತ್ ಚೂಕ್, ಪ್ರಮಾದ್ ಆಸ್‍ಲ್ಲೆಂ ಮ್ಹಣ್ ಜಾಲೆಂ. ತರ್ ಲೊಕಾಕ್ ತಿತ್ಲೆಯೀ ಕೀಳ್ ಮ್ಹಣ್ ಪರಿಗಣನ್ ಕರ್ನ್‍ಂಚ್ ನ್ಹಯ್ವೇ ತಿತ್ಲೆಂ ಲೋ ಕ್ಲಾಸ್ ಫಿಲ್ಮ್ ತಯಾರ್ ಕೆಲ್ಲೆಂ?!

ಬರ್‍ಯೊ ಮ್ಹಳ್ಳ್ಯೊ ಗಜಾಲಿ ಥೊಡ್ಯೊಚ್

ಹ್ಯಾ ಫಿಲ್ಮಾಂತ್ ಮೆಚ್ವಜೆ ಜಾಲ್ಲ್ಯೊ ಸಂಗ್ತಿಯೀ ಆಸಾತ್. ಬಿಜಿಎಂ ದಿ ಬೆಸ್ಟ್. ನಟನ್ ವಿಭಾಗ್‍ಯೀ ಓಕೆ. ಕೊಂಕ್ಣೆಚ್ಯಾ ಮಟ್ಟಾಕ್ ಹೆಂ ನಟನ್ ಚಲ್ತಾ. ಮೇಕಿಂಗಾಂತ್ ಆನಿ ತಾಂತ್ರಿಕ್ ಗಜಾಲಿಂನಿ (ಕ್ಯಾಮೆರಾ, ಡಬ್ಬಿಂಗ್, ಎಡಿಟಿಂಗ್ ಇತ್ಯಾದಿ) ಬರೆಂ ಪ್ರತಿಫಳ್ ಉದೆಲಾಂ. ಪಿಕ್ಚರ್ ಕ್ವಾಲಿಟಿ ಬರಿ ಆಸಾ. ಪುಣ್ ಮಧೆಂ ಮಧೆಂ ಫ್ರೇಮ್/ಕ್ಯಾನ್ವಾಸ್ ಪಡ್ದ್ಯಾಚ್ಯಾ ಅರ್ಧ್ಯಾಕ್‍ಚ್ ಸೀಮಿತ್ ಜಾತಾ ಕಿತ್ಯಾಕ್? ಪದಾಂ ಬರಿಂ ಆಸೊನ್ ಆಯ್ಕೊಂಕ್ ಖುಷಿ ಜಾತಾ. ಟೈಟಲ್ ಸಾಂಗ್ ನಿಜಾಯ್ಕೀ ಥೀಮಾಕ್ ಫೀಲ್ ಕರಯ್ತಾ. ತ್ಯಾ ಚೆರ್ಕ್ಯಾ ಭುರ್ಗ್ಯಾಚೆಂ, ಎಕ್‍ಚ್ ಏಕ್ ಡೈಲಾಗ್ ನಾಸ್ತಾನಾ ಕೆಲ್ಲೆಂ ಅಭಿನಯನ್ ಮಾತ್ರ್ ಶ್ಲಾಘನೀಯ್. ತೊ ಪ್ರೇಕ್ಷಕಾಂಚಿಂ ಕಾಳ್ಜಾಂ ಜಿಕ್ತಾ, ಮನಾಂಕ್ ಭುಲಯ್ತಾ. ಸತ್ ಸಾಂಗ್ಚೆಂ ತರ್, ಹಾಂತುಂ ಪೋಸ್ಟ್ ಪ್ರೊಡಕ್ಷನ್ ವಾವ್ರ್ ಬರೊ ಚಲ್ಲಾ, ವಾಂವ್ಟ್ ಕಾಡ್ಲ್ಯಾ. ಪ್ರೊಡಕ್ಷನ್ ಆನಿ ಪ್ರಿ ಪ್ರೊಡಕ್ಷನ್ ಬಜೀ ಸುಮಾರ್.

ಮೈಕಲ್ ಸೊಜಾಕ್ ಏಕ್ ಉಗ್ತೊ ಉಲೊ

ಆಖೇರ್ ಕರ್ಚ್ಯಾ ಪಯ್ಲೆಂ ಮಾನೆಸ್ತ್ ಮೈಕಲ್ ಸೊಜಾಕ್ ಮ್ಹಜೊ ಏಕ್ ಉಲೊ ಆಸಾ. ಸರ್ವಾಂನಿ ಮಾಂದ್ಚೊ ಮಾನೆಸ್ತ್ ವ್ಯಕ್ತಿ ತೊ. ಆಪ್ಲೊ ಲೋಕ್, ಆಪ್ಲಿ ಮಾಂಯ್‍ಭಾಸ್ ಆನಿ ಲಗ್ತಿ ಸರ್ವ್ ಸಂಗ್ತಿ ಆನಿ ಮನ್ಶ್ಯಾಂಚೊ ಮನಃಪೂರ್ವಕಿಂ ಮೋಗ್ ಕರುನ್, ಸಕ್ಡಾಂಕ್ ಆಧಾರ್ ಜಾಂವ್ಚ್ಯಾ, ಮಜತ್ ದಿಂವ್ಚ್ಯಾ ತಾಚೆರ್ ಆಸ್‍ಲ್ಲ್ಯಾ ವಿಶ್ವಾಸಾಕ್ ಲಾಗೊನ್ ಹೆಂ ಹಾಂವೆಂ ಸಾಂಗ್ಚೆಂ. ಹಾಂಗಾಸರ್ ತಾಚ್ಯಾ ದುಡ್ವಾಕ್ ಮಾತ್ರ್ ನ್ಹಯ್ ವಿಶ್ವಾಸಾಕ್‍ಯೀ ಘಾತ್ ಜಾಲಾ. ಬಿಪಿಎನ್ ಫಿಲ್ಮಾ ಥಾವ್ನ್ ತಾಕಾ ಅನ್ಯಾಯ್ ಜಾಲಾ. ತೆಂ ಅಕ್ಷಮ್ಯ್. ಖರೆಂ ಸಾಂಗ್ಚೆಂ ತರ್ ಫಿಲ್ಮ್ ಪಂಗ್ಡಾನ್ ಮೈಕಲಾಚೆಂ ಮಾತ್ರ್ ನ್ಹಯ್ ಆಖ್ಖ್ಯಾ ಸಮಾಜೆ ಕಡೆನ್ ಭೊಗ್ಸಾಣೆಂ ಮಾಗಜೆ.

ದೆಕುನ್, ಮೈಕಲ್ ಸೊಜಾನ್ ಏಕ್ ಜಮಾತ್ ಆಪಯ್ಜೆ. ಹೆಂ ಸಿನೆಮ್ ಕಿತ್ಯಾಕ್ ಬರೆಂ ನಾ ಮ್ಹಣ್ ಹರ್ಯೆಕ್ಲೊಯೀ ಸಾಂಗ್ತಾ, ಪುಣ್ ಉಗ್ತ್ಯಾನ್ ಸಾಂಗ್ಚೆಂ ತೆಂ ಫಕತ್ ‘ಬುಡ್ಕುಲೊ’ನ್ ಮಾತ್ರ್. ಬೆಳ್ಶೆಲ್ಲೆಂ ದೀವ್ನ್ ತೆಂಚ್ ಊಂಚಿ ಮ್ಹಣ್ ಸಾಂಗ್ಲ್ಯಾರ್ ದೊಳೆ ಧಾಂಪುನ್ ಪಾತ್ಯೆಂವ್ಕ್ ಸಕ್ಕಡ್‍ಯೀ ಹಾಂಗಾ ಭೆರೆ ವಾ ನೆಣ್ತೆ ನ್ಹಯ್. ತಾಚೆ ವಯ್ರ್ ಹೆರಾಂಚೆಂ ಪೂರಾ ಲೋ ಕ್ಲಾಸ್ ಮ್ಹಣ್ ಹೆಡಾವ್ನ್ ಆಪ್ಣೆಂ ಸಕ್ಡಾಂ ಪ್ರಾಸ್ ಲೋವೆಸ್ಟ್ ಮ್ಹಣ್ ರುಜು ಕೆಲ್ಲೆಲ್ಯಾಂಕ್ ಜವಾಬ್ದಾರ್ ಬಾಂಧ್ತಾ.

ಇತ್ಲೆ ಜಣ್ ಆಸೊನ್‍ಯೀ, ತೆ ಸರ್ವ್ ಬುದ್ವಂತ್‍ಚ್, ಕಶೆಂ ಅಸಲೆಂ ಏಕ್ ಚಿಲ್ಲರ್ ಕಾಸ್ತಾಚೆಂ, ಲೋವೆಸ್ಟ್ ಗ್ರೇಡಿಚೆಂ ಫಿಲ್ಮ್ ತಯಾರ್ ಜಾಲೆಂ ಮ್ಹಣ್ ಲೊಕಾಕ್ ಕಳಜೆ. ಮೈಕಲ್ ಸೊಜಾನ್ ಸ್ವತಃ ಹೆಂ ವಿಚಾರಣ್ ಕರಿಜೆ. ಮ್ಹಜೆಂ ಪ್ರತಿಪಾದನ್ ಹಾಂವೆಂ ಸಾದರ್ ಕೆಲಾಂ. ಚಡ್ತಿಕ್‍ಯೀ ಸಾಂಗ್ಯೆತ್. ಮ್ಹಜ್ಯಾ ತರ್ಫೆನ್ ಹಾಂವ್ ಎಕ್ಲೊಚ್ ವಾದ್ ಮಾಂಡ್ತಾಂ. ಆನಿ ಫಿಲ್ಮ್ ಕಾಡ್ಲೆಲ್ಯಾಂನಿ ಆಪ್ಲೆಂ ಹೆಂ ಫಿಲ್ಮ್ ಬರೆಂ, ಸಾರ್ಕೆಂ ವಾ ಊಂಚಿ ಮ್ಹಣ್ ರುಜು ಕರಿಜೆ. ಹಿ ಏಕ್ ವಿಲೇವಾರಿ ಅವಶ್ಯಕ್ ಆನಿ ತಿ ಆಸಾ ಕರುಂಕ್ ಮೈಕಲ್ ಸೊಜಾಕ್ ಹಾಂವ್ ಉಲೊ ದಿತಾಂ.

ಗರ್ಜೆಕ್ ಥೊಡೆ ಯಾಜಕ್, ಪ್ರಮುಖ್ ವ್ಯಕ್ತಿ, ವೃತ್ತಿಪರ್ ಹ್ಯಾ ಜಮಾತೆಕ್ ಯೇಂವ್ದಿತ್. ಮೈಕಲ್ ಸೊಜಾಕ್ ಸಕ್ಕಡ್ ಮಾನ್ತಾತ್, ದೆಕುನ್, ತೊಚ್ ಮೀಟಿಗಾಚೆಂ ಫುಡಾರ್ಪಣ್ ಘೆಂವ್ದಿ. ಹೆಂ ಅವಶ್ಯ್ ಜಾಯ್ಜೆ.

ನಾ ತರ್, ಫಾಲ್ಯಾಂ ಕೊಣೆಂಯೀ ಏಕ್ ಬರೆಂ ವಾ ಊಂಚಿ ಕೊಂಕ್ಣಿ ಫಿಲ್ಮ್ ಕಾಡ್ಲೆಂ ತರೀ, ಲೋಕ್ ಥಿಯೇಟರಾಂಕ್ ಬಿಲ್ಕುಲ್ ಯೆಂವ್ಚೊ ನಾ. ಹ್ಯಾ ಫಿಲ್ಮಾಚ್ಯಾ ಆದಿಂ ಏಕ್ ಫಿಲ್ಮ್ ಆಯ್ಲೆಂ. ತೆಂಯೀ ತಶೆಂಚ್, ದಿಕ್ಕು ದೆಸೆ ನಾಸ್ತಾನಾ, ಸಜ್ಜಿಗೆ ಬಜಿಲ್ ಕರ್ನ್ ನಿಮಾಣೆಂ ಏಕ್ ಭಾವನಾತ್ಮಕ್ ಸನ್ನಿವೇಶ್ ಗುಂತುನ್ ಪ್ರೇಕ್ಷಕಾಂಕ್ ಮಾಂಕೊಡ್ ಕೆಲೆಂ. ತಾಚ್ಯಾ ನಿರ್ದೇಶಕಾಕ್ ಕಸಲೆಂ ಒಬ್ಶೆಶನ್ ಕಳಿತ್ ನಾ, ಆಂಗಾರ್ ಗೊಬೊರ್, ಕರಿ ಪುಸುನ್ ಭಿಕಾರಿ ಪಾತ್ರ್ ರಚುನ್ ವಿಚಿತ್ರ್ ಪ್ರದರ್ಶನ್ ದಿಲಾಂ. ತಾಚೆ ಥಾವ್ನ್ ಕಸಲಿಯೀ ನಿರೀಕ್ಷಾ ನಾತ್ಲೆಲ್ಯಾನ್ ತ್ಯಾ ಸಿನೆಮಾ ವಿಶಿಂ ಉಗ್ತ್ಯಾನ್ ಉಲಂವ್ಕ್ ವಚೊಂಕ್ ನಾ.

ಅಸಲ್ಯಾ ಮತ್ ಭಂಗ್‍ಲ್ಲ್ಯಾ ಫಿಲ್ಮಾಂ ವರ್ವಿಂ ಕೊಂಕ್ಣಿ ಸಿನೆಮಾ ಇಂಡಸ್ಟ್ರಿ ರುತಾ ಜಾತಾಗೀ? ಇತ್ಲ್ಯಾ ಗತ್ತಿಗಟಾಚಿಂ ಸಿನೆಮಾಂ ರಚುನ್ ಕೊಣಾಕ್ ಉದ್ಧಾರ್ ಕರ್ತಾತ್ ಹೆ? ಕೊಂಕ್ಣಿ ಭಾಶೆಚಿ ಮರ್ಯಾದ್‍ಚ್ ಚರಂಡೆಕ್ ವ್ಹಾಳಯ್ನಾಂತ್‍ಗೀ ಅಸಲಿಂ ಬುರ್ನಾಸ್ ಫಿಲ್ಮಾಂ?!

ಕೊಂಕ್ಣೆಂತ್ The Best ಮಾತ್ರ್ ನ್ಹಯ್ World Class ಉತ್ಪನ್ನ್ ಸಬಾರಾಂನಿ ರಚುನ್ ಭಾಷೆಕ್ ಗ್ರೇಸ್ತ್ ಆನಿ ಶ್ರೇಷ್ಠ್ ಕೆಲಾಂ. ವಿಜೆಪಿ ಸಲ್ಡಾನ್ಹಾ, ಎ.ಟಿ. ಲೋಬೊ ತಸಲ್ಯಾಂನಿ ಸಾಹಿತ್ಯಾಂತ್, ಪದಾಂನಿ ವಿಲ್ಫಿ ರೆಬಿಂಬಸಾನ್, ಆಪಾಪ್ಲ್ಯಾ ಶೆತಾಂನಿ ಸಬಾರಾಂನಿ ಆಮ್ಚ್ಯಾ ಭಾಷೆಕ್ ಆನಿ ಸಮುದಾಯಾಕ್ ಘನತಾ ಹಾಡ್ನ್ ದಿಲ್ಯಾ. ಪುಣ್ ಆಮ್ಚೆ ಆತಾಂಚೆ, ವ್ಹಡ್ ವ್ಹಡ್ ಉಲಂವ್ಚೆಚ್, ಇತ್ಲೆಂ ನಿಕೃಷ್ಟ್ ರಚ್ತಾತ್ ಮ್ಹಳ್ಳೆಂ ಪಳೆಂವ್ಕ್ ನಿರಾಸ್ ಜಾತಾ.

ಹಿ ಪಡ್ಣಿ ರಾವಂವ್ಕ್ ಮೈಕಲ್ ಸೊಜಾ ತಸಲ್ಯಾ ಸಮುದಾಯಾಚ್ಯಾ ಮುಖೆಲ್ಯಾಂನಿ ಮುಖಾರ್ ಸರಜೆ. ಕಿತ್ಯಾಕ್ ಮ್ಹಳ್ಯಾರ್ ತಾಚೆ ತಸಲ್ಯಾಂಕ್ ಹಿ ಅರ್ಹತಾ ಆಸಾ. ಕೊಂಕ್ಣೆಕ್ ಗ್ರೇಸ್ತ್ ಕರ್ಚ್ಯಾ ತಾಚ್ಯಾ ಉಮೆದಿಕ್ ಆನಿ ಮಿಸಾಂವಾಕ್‍ಚ್ ಪೊಕೊರ್ಚೆಂ ಪಳೆಂವ್ಕ್ ಜಾಯ್ನಾ.

ಕೊಂಕ್ಣಿ ವಾಚ್ಪಿ ತಶೆಂ ಪ್ರೇಕ್ಷಕ್, ಆನಿ, ಆಖ್ಖಿ ಸಮಾಜ್ ನಿಕೃಷ್ಟ್ ನ್ಹಯ್. ಹಾಂಗಾ ಊಂಚಿ ಪರಂಪರಾ ಆಸ್‍ಲ್ಲಿ. ತಿ ಸಬಾರಾಂನಿ ಸಕಯ್ಲ್ ಲೊಟುನ್ ಘಾಲ್ಯಾ. ತೆಂ ಸೊಸುಂಕ್, ಸದಾಂಕಾಳ್, ಸಾಧ್ಯ್ ನಾ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel