ಇಂಫೆರ್ನಾಚಿಂ ದಾರಾಂ – 36: ಉಗ್ತಿಂ ಉರ್ಲಿಂ, ಇಂಫೆರ್ನಾಚಿಂ ದಾರಾಂ

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 36
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 36: ಉಗ್ತಿಂ ಉರ್ಲಿಂ, ಇಂಫೆರ್ನಾಚಿಂ ದಾರಾಂ

ಸಾವ್ಕಾರ್ ಮಾರ್ಸೆಲ್ ಕುವೆಲಿನ್, ಮಾನೆಸ್ತ್ ಗ್ರೆಗೊರ್ ತೆಲ್ಲಿಸಾನ್ ಆನಿ ಆಗ್ನೆಸ್ ಕುಂವರ್ನಿನ್ ಬೇಗಮೆಚೆರ್ ಆತುರಾಯೆಚಿ ದೀಷ್ಟ್ ಘಾಲಿ.

“ಗಜಾಲ್ ಅಶಿ ಜಾಲ್ಯಾಕೀ” ಮ್ಹಣಾಲಿ ಬೇಗಮ್. “ತುಮ್ಚೆ ಕಡೆನ್ ಆತಾಂ ಚಡ್ ಉಲಂವ್ಕ್ ಮ್ಹಾಕಾ ಸಾಧ್ಯ್ ನಾ. ಟಿಪ್ಪುಚಿ ಫೌಜ್ ಆಯ್ಲ್ಯಾಶಿ ದಿಸ್ತಾ. ತುಮಿ – ಕ್ರಿಸ್ತಾಂವಾಂನಿ ಹಾಂಗಾ ಥಾವ್ನ್ ಪೊಳಾಜಾಯ್. ತುಮ್ಕಾಂ ಹಾಂವೆಂ ಆಸ್ರೊ ದಿಲಾ ಮ್ಹಣ್ ತಾಂಕಾಂ ಕಳಿತ್ ಜಾಯ್ನಾಯೆ!”

“ಜಾವ್ಯೆತ್” ಮ್ಹಣಾಲೊ ಸಾವ್ಕಾರ್ ಮಾರ್ಸೆಲ್ ಕುವೆಲ್, ಜಾಚೊ ಸ್ವರ್ ಕಾಂಪ್ತಾಲೊ. “ಪುಣ್ ಅಸಲ್ಯಾ ಸ್ಥಿತೆರ್ ಮ್ಹಜ್ಯಾ ಭಯ್ಣಿಕ್ ಸಾಂಡುನ್…”

ಮ್ಹಣ್ತಾನಾ, ಸರ್ವಾಂಚೆ ದೊಳೆ, ಹಾಂತುಳ್ಣಾರ್ ಆಸ್‍ಲ್ಲ್ಯಾ ಮಾನಿನ್ ವೆರೊನಿಕಾ ಕುವೆಲಿ ತೆವ್ಶಿನ್ ಘುಂವ್ಲೆ.

ದೆಖ್ತೆಲ್ಯಾಂಚಿ ಸಮಸ್ಯಾ, ತಾಣಿಂಚ್ ಪರಿಹಾರ್ ಕರಿಜಾಯ್ ಮ್ಹಳ್ಳ್ಯಾ ಜಿನ್ಸಾರ್, ವೆರೊನಿಕಾ ಕುವೆಲ್, ಸಂಪೂರ್ಣ್ ನಿಶ್ಚೇಷ್ಟಿತ್ ಜಾಲ್ಲಿ.

ಆಗ್ನೆಸ್ ಕುಂವರ್ನ್ ಸುಸ್ಕಾರ್ಲಿ.

“ಘಡ್ಬಡ್ನಾಕಾತ್, ಹಾಂವ್ ಸಾಂಗ್ತಾಂ ತೆಂ ಆಯ್ಕಾತ್” ಮ್ಹಣಾಲಿ ಜಹನಾರಾ ಬೇಗಮ್. “ಹಿ ಮಾನಿನ್ (ವೆರೊನಿಕಾ) ಅಶಿಚ್ ಹಾಂಗಾಸರ್ ಆಸೊಂದಿ. ತುಮಿ – ತಿಚೊ ಭಾವ್ ಆನಿ ಭಾವೊಜಿ – ಆಮ್ಚ್ಯಾ ಅಂತಃಪುರಾಂತ್ ಸರೊನ್, ಜಾತಾ ತಿತ್ಲ್ಯಾ ವೆಗಿಂ, ಜಾತಾ ತ್ಯಾ ಪರಿಂ, ತುಮಿ ಆಮ್ಚೆಚ್ – ಆಮ್ಚ್ಯಾ ರಾವ್ಳೆರಾಚೆ – ಸೆವಕ್ ಮ್ಹಣಾ ಸಾರ್ಕ್ಯಾ ಜಿನ್ಸಾರ್, ವೇಸ್ ಪಾಂಗ್ರುನ್ ರಾವ್ಯಾತ್…”

“ಪುಣ್…” ಅಮ್ಸೊರಾನ್ ಸುಸ್ಕಾರ್ಲಿ ಆಗ್ನೆಸ್ ಕುಂವರ್ನ್. “ಹಾಂವ್, ಮ್ಹಜೊ ಆನ್, ಆನಿ…”

“ಆತಾಂ ವೇಳ್ ಉಣೊ ಆನಿ ಘಡ್ಬಡೆಚೊ ಜಾಲಾ” ಮ್ಹಣಾಲಿ ತಿ ಮುಸ್ಲಿಮ್ ರಾಯ್ ಕುಳ್ಯೆಚಿ ಸ್ತ್ರೀ. “ತುವೆಂ, ಆನಿ ತುಮ್ಚ್ಯಾ ಮನ್ಶ್ಯಾಂನಿ, ಆತಾಂಚ್ಯಾ ಆತಾಂಚ್ ಆಮ್ಚ್ಯಾ ವೊಡ್ತಾ ಬಗ್ಲೆಚ್ಯಾ ಖೊಮ್ಟಾಕ್ ವಚಜಾಯ್. ಮುಖ್ಯ್ ಪ್ರವೇಶ್ ದ್ವಾರಾ ಶಿವಾಯ್ – ವಿಶೇಸ್ ಅಪಾಯಾಚ್ಯಾ ಪರಿಸ್ಥಿತೆಂತ್ – ಹ್ಯಾ ಘಡಾ ಥಾವ್ನ್ ಭಾಯ್ರ್ ವಚೊಂಕ್, ಥಂಯ್ಸರ್ ಏಕ್ ವಾಟ್ ಆಸಾ – ತಿ ವಾಟ್ ಪ್ರಯೋಗ್ ಕರುಂಕ್ ಹಾಂವ್ ತುಮ್ಕಾಂ ಸ್ವತಂತ್ರತಾಯ್ ದಿತಾಂ. ಚಲಾ ತರ್ – ವೇಳ್ ಕಾಡಿನಾಕಾತ್. ತುಮಿ ಹಾಂಗಾಸರ್ ಉರೊನ್, ತ್ಯಾ ಟಿಪ್ಪುಚ್ಯಾ ಪ್ರತಿನಿಧಿಂಚ್ಯಾ ಝಳ್ಕೆಕ್ ಪಡ್ಲ್ಯಾರ್, ನಹಿಂಚ್, ತುಮ್ಕಾಂ ಬಚಾವ್ ಜಾಂವ್ಚಿ ದಿಶಾ ಆಸ್ಚಿ ನಾ, ಬಗಾರ್, ಹಾಂವೆಂ ಹಾಂಗಾಸರ್ ಬರೆಪಣಾನ್ ರಾಂವ್ಚಿ ಆಶಾಯೀ ಉರ್ಚಿ ನಾ.”

“ತರ್…”

“ತರ್, ಆತಾಂ ವಚ್!” ಬೇಗಮೆನ್ ಧೆಂಕ್ಣೊ ಮಾರ್ಲೊ. “ತುಮಿ ಹಾಂಗಾಸರ್ ಘಳಾಯ್ ಕೆಲ್ಲೆ ತಿತ್ಲೊಚ್ ತುಮ್ಕಾಂ ಆನಿ ಆಮ್ಕಾಂ ಅಪಾಯ್ ಚಡ್ ಜಾತಾ!”

ತರ್ಕಾಕ್ ವಾಟ್ ನಾಸ್ತಾಂ ಆಗ್ನೆಸ್ ಕುಂವರ್ನಿನ್ ಥಂಯ್ ಥಾವ್ನ್ ಭಾಯ್ರ್ ವಚಜಾಯ್ ಪಡ್ಲೆಂ. ವೆರೊನಿಕಾಚ್ಯಾ ಹಾಂತುಳ್ಣಾ ಬಗ್ಲೆನ್ ತಿಣೆಂ ದಿಂಬಿ ಮಾರ್ಲಿ. ಆನಿ ಮೊಗಾನ್ ತಿಚ್ಯಾ ಕಪಾಲಾಚೊ ಆನಿ ಪೊಲ್ಯಾಂಚೊ ತಿಣೆಂ ಉಮೊ ಘೆತ್ಲೊ. ತಿಚಿಂ ದೋನ್ ದುಖಾಂ ಗಳೊನ್ ವೆರೊನಿಕಾಚ್ಯಾ ಮುಖಮಳಾರ್ ಪಡ್ಲಿಂ.

“ಭಯ್ಣೀ…” ಮ್ಹಳೆಂ ತಿಣೆಂ ಹಾಳ್ವಾಯೆನ್, ಜಿಂ ಉತ್ರಾಂ ವೆರೊನಿಕಾಕ್ ಆಯ್ಕನಾತ್‍ಲ್ಲಿಂ ತರೀ. “ತುಕಾ ಅಶಿ ಸೊಡ್ನ್ ವಚೊಂಕ್ ಮ್ಹಾಕಾ ಮನ್ ನಾ. ಪುಣ್ ದೆವಾಚಿ ಖುಷಿ. ಆಮ್ಚ್ಯಾ ಬಚಾವೆ ಖಾತಿರ್ ನಹಿಂ ಜಾಲ್ಯಾರೀ, ತುವೆಂ ಮ್ಹಜ್ಯಾ ತಾಬೆನ್ ದಿಲ್ಲ್ಯಾ ಸಿನೊಲೆಚ್ಯಾ ಸಂರಕ್ಷಣಾ ಖಾತಿರ್ ಹಾಂವ್ ವೆತಾಂ… ಆದೇವ್ಸ್ ತುಕಾ!”

ಉಪ್ರಾಂತ್, ಪಾಟಿಂ ಪಳೆನಾಸ್ತಾಂ ತಿ ಭಾಯ್ರ್ ಗೆಲಿ.

ಪಯ್ಸ್, ಘಡಾಚ್ಯಾ ಮಹಾದ್ವಾರಾ ಲಾಗಿಂ, ಭಾಯ್ಲ್ಯಾನ್ ಆವಾಜ್ ಚಡ್ ಆನಿ ಚಡ್ ಆಯ್ಕೊಂಕ್ ಲಾಗ್ಲೊ.

“ಸೇತ್ವೊ ದೆಂವಯಾ – ಸರ್ದಾರ್ ಯೂಸುಫ್ ಆಲಿ ಲಡಾಯೆಕ್ ವಾ ದುಸ್ಮಾನ್ ಜಾವ್ನ್ ಯೇಂವ್ಕ್ ನಾ” ಮ್ಹಣಾಲೊ ಫಕೀರ್ ಮಹಮ್ಮದ್. “ಫಕತ್, ಬೇಗಮೆಕ್ ಭೆಟ್ ದೀವ್ನ್ ವಚೊಂಕ್ ತೊ ಆಯ್ಲಾ.”

“ಜಾವ್ಯೆತ್, ಪುಣ್ ಸೇತ್ವೊ ದೆಂವಂವ್ಕ್ ಆನಿ ದ್ವಾರ್ ಉಗ್ತೆಂ ಕರುಂಕ್ ಆಮ್ಕಾಂ ಬೇಗಮೆಚಿ ಹುಕುಮ್ ಜಾಯ್” ಮ್ಹಣಾಲೊ ಮಹಾದ್ವಾರಾ ಕಡ್ಚೊ ರಾಕ್ವಲಿ. ತಾಚ್ಯಾ ಬಗ್ಲೆನ್, ರಾವ್ಳೆರಾಚೆ ಥೊಡೆ ಶಿಪಾಯ್ ಯೇವ್ನ್ ರಾವ್‍ಲ್ಲೆ.

“ತರ್ ಘಳಾಯ್ ಕರಿನಾಕಾತ್!” ಮ್ಹಣಾಲೊ ತೊಪಾಸಿ ದಾಲ್ಮೇದಾ. “ವೆಗಿಂ ವಚೊನ್ ಬೇಗಮೆಚಿ ಹುಕುಮ್ ಹಾಡುನ್ ಯೆಯಾತ್!”

“ಹುಕುಮ್ ಹಾಡುಂಕ್ ದೂತ್ ಗೆಲಾ.”

“ತಾಣೆಂ ವೆಗಿಂ ಯೆಂವ್ಚೆಂ ಬರೆಂ. ನಾ ಜಾಲ್ಯಾರ್ ಆಮ್ಕಾಂ ಕೊಣಾಯ್ಕೀ ಬರೆಂ ಜಾಂವ್ಚೆಂ ನಾ” ಮ್ಹಣಾಲೊ ದಾಲ್ಮೇದಾ.

ಫಕೀರ್ ಮಹಮ್ಮದಾಚ್ಯಾ ಆನಿ ತೊಪಾಸಿ ದಾಲ್ಮೇದಾಚ್ಯಾ ಹಾತಾಂ-ಪಾಯಾಂಕ್ ಸುಟ್ಕಾ ದೀವ್ನ್, ತಾಂಚ್ಯಾ ಘೊಡ್ಯಾಂ ಸಮೇತ್ ಮುಖಾರ್ ತಾಂಕಾಂ ರಾವಯಿಲ್ಲೆಂ. ಪುಣ್ ಯೂಸುಫಾಚೆ ಶಿಪಾಯ್ ತಾಂಚೆರ್ ಚತ್ರಾಯೆನ್ ನದರ್ ದವರ್ನ್, ಆನಿ ತಾಣಿಂ ಕಶೆಂ ಉಲಯ್ಜಾಯ್ ಮ್ಹಣ್ ಸೂಚನ್ ದೀವ್ನ್ ಆಸ್‍ಲ್ಲೆ.

ತಸೊ ಥೊಡೊ ವೇಳ್ ಗೆಲೊ.

ತ್ಯಾ ವೆಳಾರ್, ಆಗ್ನೆಸ್ ಕುಂವರ್ನಿಕ್, ರಫಾಯೆಲ್ ಮಿಂಗೆಲ್ ಕಾಮ್ತಿಕ್ ಆನಿ ಮುಸ್ಲಿಮಾಂಚ್ಯಾ ವೆಸಾರ್ ಆಸ್‍ಲ್ಲ್ಯಾ ಹೆರಾಂ ಚವ್ಗಾಂಕ್ ಕಾಣ್ಗೆವ್ನ್ ಖುದ್ದ್ ಬೇಗಮ್ ಜಹನಾರಾಚ್, ರಾವ್ಳೆರಾಚ್ಯಾ ವೊಡ್ತಾ ಬಗ್ಲೆನ್ ಆಸ್‍ಲ್ಲ್ಯಾ ಖೊಮ್ಟಾಕ್ ಗೆಲಿ. ತ್ಯಾ ಖೊಮ್ಟಾಂತ್ಲ್ಯಾನ್ ಪಾಶಾರ್ ಜಾವ್ನ್ ವೆಚ್ಯಾ ಗುಪಿತ್ ವಾಟೆಚೊ ಘುಟ್ ತಿಕಾ ಎಕ್ಲ್ಯಾಕ್ ಮಾತ್ರ್ ಕಳಿತ್ ಆಸ್‍ಲ್ಲೊ.

ಖೊಮ್ಟಾಚ್ಯಾ ಕಾಳ್ಕ್ಯಾ ಕುಡಾಂತ್, ಕೊನ್ಶ್ಯಾಕ್ ಏಕ್ ದಾಡ್ಡೊ ಮಾಂಚೊ ಆಸ್‍ಲ್ಲೊ. ತೊ ಹೆವ್ಶಿನ್ ವೊಡ್ತಚ್, ಧರ್ಣಿಚ್ಯಾ ಫಾತ್ರಾಂ ಪಯ್ಕಿ, ಹಾತಿಭರ್ ಚವ್ಕಾಚಿ ಏಕ್ ಫೊಳಿ ದಿಷ್ಟಿಕ್ ಪಡ್ಲಿ. ಬೇಗಮೆನ್ ತಿ ವಾಂಕ್ಡಿ ಕರ್ತಚ್ ಥಂಯ್ಸರ್ ಏಕ್ ಬೊಗ್ಧೆಂ ದಿಷ್ಟಿಕ್ ಪಡ್ಲೆಂ. ಲಾಂಟಾನಾಚ್ಯಾ ಉಜ್ವಾಡಾಕ್, ತಾಂತ್ಲ್ಯಾನ್ ಪಾವ್ಟಿಕ್ ಎಕೆಕ್ಲ್ಯಾನ್ ದೆಂವೊನ್ ವಚಾ ಸಾರ್ಕಿಂ ಮೆಟಾಂ ದಿಸ್ಲಿಂ.

“ಆನಿ ವೇಳ್ ಕಾಡಿನಾಕಾತ್” ತಿಣೆಂ ಸಾಂಗ್ಲೆಂ. “ಹಿಂ ಮೆಟಾಂ ದೆಂವ್ತಚ್, ಘಡಾ ಪಂದ್ಲ್ಯಾನ್ ಖಂದಕ್ ಉತ್ರೊನ್ ವೆಚಿ, ಚಡುಣೆಂ ಕಾಲ್ದೆಂ ಮಯ್ಲ್ ಜಾಯ್ತ್ ತಿತ್ಲ್ಯಾ ಲಾಂಬಾಯೆಚಿ ವಾಟ್ ಆಸಾ. ತೆವ್ಶಿಲ್ಯಾ ಲ್ಹಾನ್ ಏಕ್ ದೊಂಗ್ರಿಯೆ ಬಗ್ಲೆನ್ ತಿ ಉಗ್ತಿ ಜಾತಾ. ತ್ಯಾ ಪೊಂತಾರ್ ಆಸ್ಚೊ ಫಾತೊರ್ ಲೊಳವ್ನ್ ಭಾಯ್ರ್ ವಚೊಂಕ್ ತುಮ್ಕಾಂ ಕಷ್ಟ್ ಜಾಂವ್ಚೆ ನಾಂತ್. ಉಪ್ರಾಂತ್ ಉತ್ತರಾಚಿ ವಾಟ್ ಧರ್ಲ್ಯಾರ್, ಕಾಸರಗೋಡಾಕ್ ಪಾವೊಂಕ್ ತುಮ್ಕಾಂ ಕಾಂಯ್ ಕಷ್ಟ್ ಜಾಂವ್ಚೆ ನಾಂತ್.”

“ಪುಣ್ ವಾಟೆರ್..?” ರಫಾಯೆಲ್ ಮಿಂಗೆಲ್ ಕಾಮ್ತಿನ್ ವಿಚಾರ್ಲೆಂ.

“ವಾಟೆರ್ ಮೆಳ್ಚ್ಯಾ ಛತ್ರಾಂನಿ ತುಮ್ಕಾಂ ಜಾಯ್ ತಿ ಸಹಾಯ್ ಮೆಳ್ತೆಲಿ. ತಾಂಕಾಂ ಹಿ ಮುದಿ ದಾಕವ್ನ್, ತುಮಿ ಹಾಂಗಾ ಥಾವ್ನ್ ಆಯ್ಲ್ಯಾತ್ ಮ್ಹಣ್ ಸಾಂಗ್ಯಾ” ತಿತ್ಲೆಂ ಮ್ಹಣೊನ್ ಬೇಗಮೆನ್, ಆಪ್ಲಿ ಮ್ಹೊರ್ ಆಸ್‍ಲ್ಲಿ ಏಕ್ ಮುದಿ, ಆಗ್ನೆಸ್ ಕುಂವರ್ನಿಚ್ಯಾ ಹಾತಾಂತ್ ದಿಲಿ.

“ಪುಣ್” ಮ್ಹಣಾಲೊ ಕಾಮತ್, ನರ್ಗೊನ್, “ಆಮಿ ಹಾಂಗಾ ರಾವ್ಲ್ಯಾರ್ ಜಾತೆಂ ಮ್ಹಣ್ ದಿಸ್ತಾ. ತುಮ್ಚ್ಯಾ ಆಸ್ಥಾನಾ ಭಿತರ್ ಆಸ್ಚ್ಯಾ ಆನಿ ಆಸ್ರೊ ಸೊಧುನ್ ಆಯಿಲ್ಲ್ಯಾಂಕ್, ಧೊಶಿನಾಯೆ ಮ್ಹಣ್…”

“ಸುಲ್ತಾನಾಚಿ ಹುಕುಮ್ ಆಸ್‍ಲ್ಲಿ. ಪುಣ್ ಆತಾಂ ಪರಿಸ್ಥಿತಿ ವೆಗ್ಳಿ ಜಾಲ್ಯಾ. ತಾಚೆ ಚಡ್ ಶಿಪಾಯ್ ಆಯ್ಲ್ಯಾತ್. ಕಾಂಯ್ ಚಡುಣೆಂ ಜಾಲ್ಯಾರ್, ವೋಲ್ಯಾ ಸಾಂಗಾತಾ ಜಿವೆಂಯೀ ಪೆಟತ್. ತಶೆಂ ಜಾಂವ್ಚೆಂ ನಾಕಾ ಮ್ಹಣ್ ತುಮ್ಕಾಂ ಹಾಂವ್ ವಚೊಂಕ್ ಸೊಡ್ತಾಂ – ವೆಚ್ಯಾಂತ್ ತುಮ್ಚಿ ಸುರಕ್ಷಿತಾಯ್ ಆಸಾ.”

“ತುಮ್ಚೊ ಉಪ್ಕಾರ್.”

“ಆಸೊಂದಿ. ತರ್ ಆತಾಂ ವಚಾ. ಆಮ್ಚೆರ್ ಚಡ್ ಅನ್ವಾರಾಂ ಯೆಂವ್ಚಿಂ ನಾಕಾ ಮ್ಹಣ್ ತುಮ್ಚ್ಯಾ ದೆವಾ ಲಾಗಿಂ ಮಾಗ್ಯಾತ್” ಮ್ಹಣಾಲಿ ಬೇಗಮ್.

ಪಯ್ಸ್ ಥಾವ್ನ್ – ಮಹಾದ್ವಾರಾ ಲಾಗಿಂ – ಚಡ್ ಆವಾಜ್ ಆಯ್ಕಲೊ.

ಕ್ರಿಸ್ತಾಂವಾಂಚೊ ತೊ ಲ್ಹಾನ್ ಪಂಗಡ್, ತಸೊ ಥಂಯ್ ಥಾವ್ನ್ ತ್ಯಾ ಬೊಗ್ಧ್ಯಾಂತ್ಲ್ಯಾನ್ ದೆಂವೊನ್, ಲಾಂಟಾನ್ ಘೆವ್ನ್ ಪಾಶಾರ್ ಜಾಲೊ. ತಿಂ ಥಂಯ್ ಥಾವ್ನ್ ದೆಂವೊನ್ ವೆತಚ್, ಬೇಗಮೆನ್, ಫೊಳಿ ಪಯ್ಲೆಂಚೆಪರಿಂ ಧಾಂಪ್ಲಿ. ಆನಿ ಆದಿಂ ಆಸ್‍ಲ್ಲೆಪರಿಂಚ್ ಖಾಟ್ ಕೊನ್ಶ್ಯಾಕ್ ಸಾರ್ಕಿ ದವರ್ನ್ ಭಾಯ್ರ್ ತಿ ಆಯ್ಲಿ, ಆನಿ ರಾವ್ಳೆರಾಕ್ ಗೆಲಿ.

ಕಾರಣ್ ಕಸಲೆಂ ಮ್ಹಣ್ ಕಳಿತ್ ನಾತ್ಲೆಂ ಜಾಲ್ಯಾರೀ, ತ್ಯಾ ಕ್ರಿಸ್ತಾಂವಾಂಕ್ ಬಚಾವೆಚ್ಯಾ ವಾಟೆನ್ ಧಾಡ್‍ಲ್ಲೆಂ ಸಮಾಧಾನ್, ಬೇಗಮೆಕ್ ಭೊಗ್ಲೆಂ. ಆನಿ ತಶೆಂ ತೆಂ ಘಡೊಂಕ್ ಆಸ್‍ಲ್ಲೆಂ ಮ್ಹಣ್ ದಿಸ್ತಾ. ನಹಿಂ ತರ್, ಬಂದಡೆಚ್ಯಾ ಕಾಳಾಚಿ ಹಿ ಕಥಾ, ಮಟ್ವ್ಯಾನ್ ಸಂಪ್ತಿ.

ರಾವ್ಳೆರಾಕ್ ಪಾಟಿಂ ಯೆತಚ್, ಸೇತ್ವೊ ದೆಂವವ್ನ್, ಮಹಾದ್ವಾರ್ ಉಗ್ತೆಂ ಕರುಂಕ್ ಬೇಗಮೆನ್ ಹುಕುಮ್ ದಿಲಿ.

ಟಿಪ್ಪುಚೆ ಶಿಪಾಯ್, ಪಾಲ್ಕಿ ಘೆವ್ನ್, ಕಾಂಪಾನ್ ಫುಡೆಂ ಯೆತಾನಾ, ಬೇಗಮ್ ಜಹನಾರಾ, ರಾವ್ಳೆರಾ ಮುಖ್ಲ್ಯಾ ಸಭಾಂಗಣಾಚ್ಯಾ ಮೆಟಾಂಚೆರ್ ರಾವ್‍ಲ್ಲಿ. ಬಗ್ಲೆನ್ ತಿಚೆ ದೋಗ್ ಹುದ್ದೆದಾರ್, ಆನಿ ಚಿಕ್ಕೆ ಪಾಟ್ಲ್ಯಾನ್ ದೋಗ್ ರಾಕ್ವಲಿ ಶಿಪಾಯ್ ರಾವ್‍ಲ್ಲೆ.

ಯೆಂವ್ಚಿ ಮೆರ್ವಣಿಗ್, ಬೇಗಮೆನ್ ಚತ್ರಾಯೆನ್ ದೆಖ್ಲಿ.

ಫಕೀರ್ ಮಹಮ್ಮದ್ ಆಸ್‍ಲ್ಲೊ.

ತೊಪಾಸಿ ದಾಲ್ಮೇದಾ ಆಸ್‍ಲ್ಲೊ.

ಪುಣ್ ರಹೀಮ್? ಬೇಗಮೆಚಿ ಆತುರಾಯ್ ಆಕಾಂತಾನ್ ಚಡೊಂಕ್ ಲಾಗ್ಲಿ.

ಘೊಡ್ಯಾಂಕ್ ಪಾಟಿಂ ಸೊಡುನ್ ‘ಪುರ್ಶ್ಯಾಂವ್’ ಫುಡೆಂ ಆಯ್ಲೊ. ಸಕ್ಕಡ್ ಯೇವ್ನ್ ಆಂಗ್ಣಾಂತ್ ಪಾವ್ತಚ್, ಶಿಪಾಯ್ ಭೊಂವ್ತಣಿಂ ರಾವ್ಲೆ. ಪಾಲ್ಕಿ, ಮಧೆಂ ದವರ್ಲಿ, ಆನಿ ಸರ್ದಾರ್ ಯೂಸುಫ್ ಆಲಿ ಫುಡೆಂ ಮಧೆಂ ಆಯ್ಲೊ.

ಬೇಗಮೆಚೊ ಭರ್ಮ್, ಜಾಂವ್ ಮಾನ್ ರಾವೊಂಕ್ ನಾ:

“ಕಸಲಿ ಗಜಾಲ್ ಜಾವ್ಯೆತ್ – ಪಾಲ್ಕೆಂತ್ ಕಿತೆಂ ಹಾಡ್ಲಾಂ ತುಮಿ?” ವಿಚಾರ್ಲೆಂ ತಿಣೆಂ. ಪಾಲ್ಕೆಂತ್ ಕಾಂಯ್ ತಿಚ್ಯಾ ಪುತಾಚೆಂ ಮೊಡೆಂ ಪುಣೀ… ಚಿಂತ್ನಾಂ ತಿಚ್ಯಾ ಮತಿಂತ್ ಪಾಶಾರ್ ಜಾವ್ನ್, ತಿಚೆಂ ಕಾಳಿಜ್ ಧಡ್ದಡೊಂಕ್ ಲಾಗ್ಲೆಂ.

ತಿಚ್ಯಾ ಸವಾಲಾಂಕ್ ಕೊಣೆಂಯೀ ಜಾಪ್ ದೀಂವ್ಕ್ ನಾ.

ಸಕ್ಕಡ್‍ಯೀ ಥೊಡೊ ವೇಳ್ ಸ್ತಬ್ದ್ ಆನಿ ಗಂಭೀರ್ ರಾವ್ಲೆ.

“ಕಿತ್ಯಾಕ್ ಕೊಣೀ ಉಲಯ್ನಾಂತ್?” ವಿಚಾರ್ಲೆಂ ತಿಣೆಂ.

ಆತಾಂ ಯೂಸುಫ್ ಆಲಿ ಉಲಯ್ಲೊ:

“ಕಣ್ಣಾನೂರ್ ಸಂಸ್ಥಾನಾಚ್ಯಾ ಬೇಗಮೆಕ್, ಬಾದಶಹಾ ಟಿಪ್ಪು ಸುಲ್ತಾನಾಚೊ ಪ್ರತಿನಿಧಿ, ಸರ್ದಾರ್ ಯೂಸುಫ್ ಆಲಿ ಭೆಟೊಂಕ್ ಸಂತೊಸ್ ಪಾವ್ತಾ ಆನಿ ಸಲಾಮ್ ದಿತಾ” ಮ್ಹಣಾಲೊ ತೊ.

“ಆ-ಆಲೆಕೂ ಸಲಾಮ್” ಬೇಗಮೆಚಿ ಜೀಬ್ ಕಷ್ಟಾಂನಿ ಸುಟ್ಲಿ. ಉಗ್ಡಾಸ್ ತಿಕಾ ಆಯ್ಲೊ! “ಸರ್ದಾರ್ ಯೂಸುಫ್ ಆಲಿ!” ಆಕಾಂತ್ಲಿ ತಿ.

“ವ್ಹಯ್..!”

“ಹಾ! ತರ್…”

“ತರ್?”

“ತರ್ ಆಮ್ಚೊ ರಹೀಮ್, ತುಮ್ಚ್ಯಾ ಸೈನಾಂತ್ಲೊ ಫರಾರಿ ಜಾಲ್ಲ್ಯಾ ಖಾತಿರ್ – ಯಾ’ಲ್ಲಾ!” ಹಾಕ್ ದಿಲಿ ತಿಣೆಂ.

“ತಶೆಂ ಪುಣೀ ಕಾಂಯ್ ನಾ” ಮ್ಹಣಾಲೊ ಯೂಸುಫ್ ಆಲಿ. “ಪುಣ್ ಫುಡ್ಲೆಂ ಕಾಂಯ್ ಉಲಂವ್ಚ್ಯಾ ಆದಿಂ…” ತಾಣೆಂ ಭೊಂವಾರಿಂ ದೀಷ್ಟ್ ಭೊಂವ್ಡಾಯ್ಲಿ. “ತುಜ್ಯಾ ಹಾಂಗಾಸರ್ ಆಸ್ಚ್ಯಾ ಸರ್ವ್ ಶಿಪಾಯಾಂಕ್ ಮಧೆಂ ಆಪಯ್, ಆನಿ ತಾಂಚಿಂ ಹಾತೆರಾಂ ಭುಂಯ್ ದವರುಂಕ್ ಫರ್ಮಾಯ್.”

“ಮ್ಹಾಕಾ ಫರ್ಮಾಂವ್ಕ್…”

“ತುಕಾ ಫರ್ಮಾಂವ್ಕ್ ಆಮ್ಚೊ ಇರಾದೊ ನಹಿಂ…”

“ತರ್…”

“ತರ್ ಆಮಿ ತುಕಾ ಸಾಂಗ್ತಾಂವ್ ಮಾತ್ರ್. ಆನಿ ಜರ್ ತುಂ ಆಮಿ ಸಾಂಗ್ಚೆಂ ಆಯ್ಕೊಂಕ್ ಕಬೂಲ್ ನಾಂಯ್ ತರ್…”

“ತರ್?” ಬೇಗಮ್ ಕಾಲುಬುಲಿ ಜಾಲಿ.

“ತರ್, ಗೆಲೆ ತ್ಯಾ ರಾತಿಂ, ಸುಫೆದಾರ್ ಭು-ಭೂನ್ ಆರಂಭ್ ಕೆಲ್ಲೆಂ ಕಾಮ್ – ತೊಚ್ ಆಖೇರ್ ಕರ್ತಲೊ.”

“ಸುಫೆದಾರ್ ಭು-ಭೂ!” ಅಕ್ಲಾಸ್ಲಿ ಬೇಗಮ್… “ತೊ ವೇಸ್ ಘಾಲ್ನ್ ಆಯಿಲ್ಲೊ ಮನಿಸ್ ಮೊರೊನ್ ಕಾಬಾರ್ ಜಾಲಾ!”

“ತಶೆಂ ಆಮಿ ಆಯ್ಕಲಾಂ” ಹಾಸ್ಲೊ ಯೂಸುಫ್. “ಪುಣ್ ಸತ್ ಗಜಾಲ್ ತುವೆಂಚ್ ಪಾರ್ಕಿಯೆತ್.”

ಪಾಲ್ಕೆಚೆಂ ಧಾಂಖ್ಣೆಂ ವಾಂಕ್ಡೆಂ ಜಾಲೆಂ. ಪಡ್ದೊ ಬಗ್ಲೆಕ್ ಸರ್ಲೊ.

ಸರ್ದಾರ್ ಸಿಮಾಂವ್ ಉಟೊನ್ ಭಾಯ್ರ್ ರಾವ್ಲೊ.

“ಬೇಗಮೆಕ್ ಪರ್ತ್ಯಾನ್ ಅಶೆಂ ಭೆಟೊಂಕ್ ಆಮಿ ಖುಷಿ ಪಾವ್ತಾಂವ್” ಮ್ಹಣಾಲೊ ತೊ, ಅಮ್ರುಕೊ ಹಾಸೊನ್.

“ಸ-ಸರ್ದಾರ್ ಸಿಮಾಂವ್!”

“ವ್ಹಯ್, ಹಾಂವ್” ಮ್ಹಣಾಲೊ ಸರ್ದಾರ್ ಸಿಮಾಂವ್. ನಾಟಕ್ ಲಾಂಬಂವ್ಕ್ ತಾಕಾ ಖುಷಿ ನಾತ್‍ಲ್ಲಿ. “ಪಯ್ಲೆಂ, ಸರ್ದಾರ್ ಯೂಸುಫ್ ಆಲಿನ್ ಸಾಂಗ್‍ಲ್ಲೆಪರಿಂ ತುಮ್ಚೆ ಸರ್ವ್ ಶಿಪಾಯ್ ಮಧೆಂ ಯೇಂವ್ದಿತ್ ಆನಿ ಹಾತೆರಾಂ ಥಂಯ್ ದವರುಂದಿತ್!”

ಬೇಗಮೆನ್ ಭೊಂವಾರಿಂ ಪಳೆಲೆಂ.

ಫಕೀರ್ ಮಹಮ್ಮದ್ ಆನಿ ತೊಪಾಸಿ ದಾಲ್ಮೇದಾ, ಕಾತ್ರಿಂತ್ ಸಾಂಪಡ್ಲೆಲ್ಯಾ ಉಂದ್ರಾಂಪರಿಂ ದೊಳೆ ವಾಟಾರ್ತಾಲೆ.

ಸರ್ದಾರ್ ಸಿಮಾಂವ್ನ್ ಸಾಂಗ್‍ಲ್ಲೆಪರಿಂ ಕರುಂಕ್ ಬೇಗಮೆನ್ ಹಾತ್ ಭಾಸ್ ಕೆಲಿ. ಆಶೆಚೆಂ ತಿಚೆಂ ಸ್ವಪಣ್ ಕೊಸ್ಳೊನ್ ಪಡ್ಲೆಂ.

“ಕಿತೆಂ ತುಮ್ಕಾಂ ಜಾಯ್?” ಮ್ಹಳೆಂ ತಿಣೆಂ ಲ್ಹಾನ್ ಸ್ವರಾನ್. “ತುಮ್ಕಾಂ ಜಾಯ್ ತೆಂ ಕರ್ಯಾ, ಪುಣ್, ಮ್ಹಜ್ಯಾ ರಹೀಮಾಕ್ ಪಾಟಿಂ ದಿಯಾ…” ರಡೊಂಕ್‍ಶಿ ತಿ ತಯಾರ್ ಜಾಲಿ. ಝುಜ್ಚಿ ಜಾಂವ್, ಬಚಾವ್ ಜಾಂವ್ಚಿ ಕಸಲಿಚ್ ವಾಟ್ ನಾ ಮ್ಹಣ್ ತಿಕಾ ಸ್ಪಷ್ಟ್ ಜಾಲೆಂ.

“ತುಜೊ ರಹೀಮ್ ಸುರಕ್ಷಿತ್ ಆಸಾ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಪುಣ್ ಬರ್‍ಯಾನ್ ಆನಿ ಶಾಬಿತಾಯೆನ್ ತಾಣೆಂ ತುಕಾ ಪಾಟಿಂ ಮೆಳಜಾಯ್ ಜಾಲ್ಯಾರ್, ತುವೆಂ ದೋನ್ ಶರ್ತಾಂ ಪಾಳಿಜಾಯ್.”

“ಕಸಲಿಂ ತಿಂ ಶರ್ತಾಂ ಜಾವ್ಯೆತ್?”

“ತುಜ್ಯಾಚ್ ಖುಶೆನ್, ಆನಿ ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ಖುಶೆಕ್ ತುಂ ಖಾಲ್ ಮ್ಹಳ್ಳೆಂ ಸಮ್ಜವ್ನ್ ಹ್ಯಾ ದೊಗಾಂಕ್ – ಫಕೀರ್ ಮಹಮ್ಮದಾಕ್ ಆನಿ ತೊಪಾಸಿ ದಾಲ್ಮೇದಾಕ್ – ಆಮ್ಚ್ಯಾ ತಾಬೆನ್ ತುವೆಂ ಸೊಡ್ನ್ ದೀಜಾಯ್.”

“ಹಾಂವ್ ಕಬೂಲ್” ಮ್ಹಣಾಲಿ ಬೇಗಮ್.

“ಅನ್ಯಾಯ್! ಕುಟ್ಮಾ ಭಿತರ್ ವಿದ್ರೋಹ್!” ಹಾಂಕ್ರೆಲೊ ಫಕೀರ್ ಮಹಮ್ಮದ್.

“ಘಾತ್! ಪಾತ್ಯೆಣೆನ್ ಸೆವಾ ಕೆಲ್ಲ್ಯಾಂಕ್ ವಿಕ್ರಿತ್!” ಕಿಂಕ್ರಾಟ್ಲೊ ಬಾವ್ಡೊ ತೊಪಾಸಿ ದಾಲ್ಮೇದಾ.

“ತೆಂ ಸರ್ವ್, ತುಮ್ಚಿ ಝಡ್ತಿ ಜಾತಾನಾ ಸಾಂಗ್ಯೆತ್!” ಮ್ಹಣಾಲೊ ಸರ್ದಾರ್ ಸಿಮಾಂವ್. ತಾಣೆಂ ಆಪ್ಲ್ಯಾ ಶಿಪಾಯಾಂಕ್ ಹಾತ್-ಭಾಸ್ ಕೆಲಿ.

ಫಕೀರ್ ಮಹಮ್ಮದಾಚ್ಯಾ ಆನಿ ತೊಪಾಸಿಚ್ಯಾ ಹಾತಾಂಕ್ ಖೊಡೊ ಪಡ್ಲೊ.

“ಆನಿ ದುಸ್ರೆಂ ಶರ್ತ್?” ಬೇಗಮೆನ್ ವಿಚಾರ್ಲೆಂ.

“ತೆಂ ಆಮಿ ಬಸೊನ್ ಉಲಯಾಂ” ಮ್ಹಣೊನ್ ಸರ್ದಾರ್ ಸಿಮಾಂವ್ ಆನಿ ಸರ್ದಾರ್ ಯೂಸುಫ್ ಆಲಿ, ಬೇಗಮ್ ಆನಿ ತಿಚ್ಯಾ ಹುದ್ದೆದಾರಾಂ ಸಾಂಗಾತಾ ಭಿತರ್ ಆಯ್ಲೆ.

ಥೊಡೊ ವೇಳ್ ತೆ ಉಲಯ್ಲೆ.

ಕಣ್ಣಾನೂರ್ಚಿ ಬೇಗಮ್, ಕೆದಾಳಾಯೀ ಮೈಸೂರ್ಚೊ ಬಾದಶಹಾ ಜಾವ್ನಾಸ್ಚ್ಯಾ ಪೈಗಂಬರ್ ಟಿಪ್ಪು ಸುಲ್ತಾನ್ ಬಹಾದುರಾಕ್ ಖಾಲ್ ಜಾವ್ನ್ ಆಸ್ತೆಲಿ, ಶಿವಾಯ್, ತಾಚ್ಯಾ ವಿರೋಧ್ ಕುಂಬ್ಳಾ, ನೀಲೇಶ್ವರ್ ಆನಿ ವಿಟ್ಲಾಚ್ಯಾ ರಾಯಾಂ ಕಡೆನ್ ಜಾಂವ್, ಹೆರಾಂ ಕಡೆನ್ ಜಾಂವ್ ಸೊಲ್ಲೊ ಕರ್ಚಿ ನಾ ಮ್ಹಣ್ ಲಿಖ್‍ಲ್ಲ್ಯಾ ಖರಾರಾಕ್ ಬೇಗಮೆನ್ ಆನಿ ಸಾಕ್ಷಿದಾರಾಂನಿ ಸಹಿ ಘಾಲ್ನ್ ಮ್ಹೊರ್ ದಾಂಬ್ಲಿ.

ಉಪ್ರಾಂತ್ ಥೊಡೊ ವೇಳ್ ವಿಶೆವ್ ಘೆಂವ್ಚೊ ಮ್ಹಣ್, ಆನಿ ಫಳ್ಹಾರ್-ಆಹಾರ್ ಘೆವ್ನ್ ಪಾಟಿಂ ಭಾಯ್ರ್ ಸರ್ಚೆಂ ಮ್ಹಣ್ ತಾಣಿಂ ನಿಚೆವ್ ಕೆಲೊ.

ಸರ್ದಾರ್ ಸಿಮಾಂವ್ಕ್ ಆನಿ ಸರ್ದಾರ್ ಯೂಸುಫ್ ಆಲಿಕ್ ಥೊಡೊ ವೇಳ್ ವಿಶೆವ್ ಘೆಂವ್ಚ್ಯಾ ಖಾತಿರ್ ವೆವೆಗ್ಳಿಂ ಕುಡಾಂ ದಿಲಿಂ.

ತಶೆಂ ಚಿಕ್ಕೆ ವಿಶೆವ್ ಘೆವ್ನ್ ವೆಗ್ಳೆ ತೆ ಆಸ್‍ಲ್ಲ್ಯಾ ವೆಳಾರ್ – ಬೇಗಮೆನ್ ಪಯ್ಲೆಂಚ್ ಚಿಂತುನ್ – ಸರ್ದಾರ್ ಸಿಮಾಂವ್ಕ್ ಮಾಳಿಯೆ ವಯ್ಲೆಂ ಕೂಡ್ ಥರಾಯಿಲ್ಲೆ ವರ್ವಿಂ – ಸರ್ದಾರ್ ಸಿಮಾಂವ್ಚಿ ಆನಿ ಮಾನಿನ್ ವೆರೊನಿಕಾ ಕುವೆಲಿಚಿ, ನಿಮಾಣಿ ಭೆಟ್ ಜಾಲಿ.

ವೆರೊನಿಕಾ ಕುವೆಲ್ ಸನಿನ್ ಜಾವ್ನ್ ಆಸ್‍ಲ್ಲಿ.

ತಾಪಾನ್ ವಾ ಹೆರ್ ಕಾರಣಾನ್ ತಿಚೆ ದೊಳೆ ಪ್ರಜಳ್ತಾಲೆ, ಆನಿ ತಿಚೆ ವೋಂಟ್ ಅಮ್ರುಕೆ ಹಾಸ್ತಾಲೆ.

ಸರ್ದಾರ್ ಸಿಮಾಂವ್, ತಿಚ್ಯಾ ಬಗ್ಲೆನ್, ತಿಚೊ ಹಾತ್ ಧರ್ನ್ ರಾವ್‍ಲ್ಲೊ.

“ಭಯ್ಣೀ” ಮ್ಹಣಾಲೊ ತೊ ಕರುಣಾಯೆನ್. “ಕಿತೆಂ ಮ್ಹಣ್ಚೆಂ ಮ್ಹಣ್ ಮ್ಹಾಕಾ ಸಮ್ಜನಾ. ತರೀ, ಮ್ಹಜೊ ಜೀವ್ ಮ್ಹಾಕಾ ದಾನ್ ದಿಂವ್ಚ್ಯಾ ಖಾತಿರ್ ತುಜೊಚ್ ಜೀವ್ ತುವೆಂ ವಾಟಾಯ್ಲೊಯ್ ಮ್ಹಣ್ ಹಾಂವ್ ಜಾಣಾಂ.”

“ತಶೆಂ ಕರುಂಕ್ ಮ್ಹಾಕಾ ಫಾವೊ ಜಾಲ್ಲೆಂ ಮ್ಹಜೆಂ ಭಾಗ್” ಮ್ಹಣಾಲಿ ತಿ. “ದೆವಾಕ್ ಅರ್ಗಾಂ!”

“ತುಂ ಸ್ವಸ್ಥ್ ಜಾವ್ನ್…”

“ನಾ. ಹಾಂವ್ ಆನಿ ಚಡ್ ತೇಂಪ್ ವಾಂಚಶಿಂ ನಾ ಮ್ಹಳ್ಳೆಂ ಹಾಂವ್ ಜಾಣಾಂ.”

“ಕಿತೆಂ ಉಲಯ್ತಾಯ್ ತುಂ?”

“ವ್ಹಯ್, ಹಾಂವ್ ಜಾಣಾಂ. ಆನಿ ಅಸಲ್ಯಾಚ್ ವೆಳಾರ್ – ತುಜಿ ಮ್ಹಾಕಾ ಅಶಿ ಭೆಟ್ ಲಾಭೊನ್ ಆಸ್ತಾಂ – ಮ್ಹಜೊ ಭಾವ್ ಆನಿ ಭಾವೊಜಿಯೀ ಹಾಂಗಾಸರ್ ಆಸಾತ್. ಮ್ಹಾಕಾ ತೆ ಆಮ್ಚ್ಯಾ ಮ್ಹಾಲ್ಗಡ್ಯಾ ಘರಾಕ್ ವ್ಹರ್ತೆಲೆ…”

“ತರ್, ತುಜೆಂ – ತುಮ್ಚೆಂ – ಪಯ್ಣ್ ಅಪಾಯಾ ವಿಣೆಂ ಆನಿ ಭಿಯಾ ವಿಣೆಂ ಜಾಯ್ಶಿ ಮಾಂಡಾವಳ್ ಹಾಂವ್ ಕರ್ತಾಂ. ಆಮ್ಚ್ಯೊ ಮಂಜ್ಯೊ ಆಯಿಲ್ಲ್ಯೊ ತಡಿರ್ ಆಸಾತ್… ಪಾಲ್ಕಿಯೀ ಆಸಾ. ಹಾಂವ್ ಆನಿ ಸರ್ದಾರ್ ಯೂಸುಫ್ ಆಲಿ, ಧರ್ಣಿಚ್ಯಾ ವಾಟೆನ್, ಘೊಡ್ಯಾಂಚೆರ್ ಪಯ್ಣ್ ಕರ್ತಾಂವ್.”

“ತುಕಾ ದೇವ್ ಬರೆಂ ಕರುಂ… ಆನ್ಯೇಕ್ ವಿಷಯ್ ಮ್ಹಾಕಾ ಚಿಕ್ಕೆ ಕಾಂತಯ್ತಾ…”

“ಕಸಲೊ ವಿಷಯ್?”

“ಮೊನಿಕಾಕ್ ಆನಿ ಇಜಾಬೆಲ್ ತೆರೆಜಾಕ್‍ಯೀ ಧರುನ್ ಹೆವ್ಶಿನ್ ಹಾಡ್ತಾತ್ ಮ್ಹಣ್ ಖಬರ್ ಆಸ್‍ಲ್ಲಿ. ಹಾಂವ್ ಥಂಯ್ಸರ್ ಪಾವ್ತಾನಾ…”

“ತ್ಯಾ ವಿಷಯಿಂ ಚಿಂತಾ ಕರಿನಾಕಾ” ಭುಜಾವಣೆಚೆಂ ಧಯ್ರ್ ದಿಲೆಂ ಸರ್ದಾರ್ ಸಿಮಾಂವ್ನ್. “ತೆಂ ಅನ್ವಾರ್ ನಿವಾರ್ಲಾಂ. ತಿಂ ಸುರಕ್ಷಿತ್ ಆಸಾತ್ ಮ್ಹಳ್ಳೆಂ ಸ್ಪಷ್ಟ್ ಜಾಲ್ಯಾ ಉಪ್ರಾಂತ್ ಹಾಂವ್ ಆಯಿಲ್ಲೊಂ…”

“ಉಪ್ಕಾರ್ ತುಜೊ! ದೆವಾಕ್ ಅರ್ಗಾಂ! ತುಕಾ ಏಕ್ ನಿಮಾಣಿ ಪುಣ್ ಬರಿ ಖಬರ್ ದೀಂವ್ಕ್ ಆಸಾ – ಸಿನೊಲೆಚ್ಯಾ ಅರ್ಲುಕೆಚಿ… ತಿಂ ಅರ್ಧಾಂ ಶೆಕಿಂ ಸಾಂಗಾತಾ ಮೆಳ್ತೆಲಿಂ ಮ್ಹಳ್ಳೆಂಯ್ ತುಂವೆಂ…”

“ವ್ಹಯ್, ಮ್ಹಳ್ಳೆಂ” ಮ್ಹಣಾಲೊ ತೊ ಚುರ್ಚುರ್ಯಾಂನಿ.

“ತೆಂ ಉತಾರ್ ಫುಡೆಂ ತರೀ ವಾಜ್ಭಿ ಜಾತೆಲೆಂ… ಅರ್ಲುಕೆಚೆಂ ಅರ್ಧ್, ಬರ್‍ಯಾ, ಖರ್‍ಯಾ ಆನಿ ಹಕ್ಕಾಭರಿತ್ ಜವಾಬ್ದಾರೆಚ್ಯಾ ಹಾತಾಂತ್ ಹಾಂವೆಂ ದಿಲ್ಯಾ – ದೆವಾನ್ ಥಂಯ್ಸರ್ ತಾಚಿ ಅಪರಿಮಿತ್ ಮಾಂಡಾವಳ್ ಥಾರಾಯ್ಲ್ಯಾ.”

“ಕಿತೆಂ?” ದುಬಾವ್ಲೊ ತೊ. “ಕೊಣಾಚ್ಯಾ ಹಾತಾಂತ್ ತುವೆಂ ದಿಲ್ಯಾಯ್?”

“…..ಆಗ್ನೆಸ್ ಸಿಸಿಲಿಯಾಚ್ಯಾ…..”

ಸರ್ದಾರ್ ಸಿಮಾಂವ್ಚ್ಯಾ ಮತಿಂತ್ ಆಶ್ಚರ್ಯಾಚೆಂ, ಕುತೂಹಲಾಚೆಂ ಆನಿ ಭರ್ಶಿಕ್ ಸಂತೊಸಾಚ್ಯಾ ಸಾಧ್ಯತೆಚೆಂ ತುಫಾನ್ ಉಟ್ಲೆಂ.

“ಆಗ್ನೆಸ್ ಸಿಸಿಲಿಯಾ..?” ಉಸ್ವಾಸ್ಲೊ ತೊ. ತಾಕಾ ಸಮ್ಜೊಂಕ್ ಲಾಗ್ಲೆಂ.

“ಹಾಂಗಾಸರ್ ಚಾಕರ್ನಿಚ್ಯಾ ರುಪಾರ್ ತಿ ಆಸ್‍ಲ್ಲಿ…”

“ಸಮ್ಜಲೆಂ… ಪುಣ್ ಆತಾಂ…”

“ಪುಣ್ ಆತಾಂ ತಿ ಹಾಂಗಾಸರ್ ನಾ. ಟಿಪ್ಪುಚೆ ಸಬಾರ್ ಶಿಪಾಯ್ ಯೆತಾತ್ ಮ್ಹಳ್ಳೆಂ ಆಯ್ಕೊನ್, ತಿಕಾ ಆನಿ ಥೊಡ್ಯಾ ಕ್ರಿಸ್ತಾಂವಾಂಕ್, ಗುಪಿತ್ ಸುರಂಗಾಚ್ಯಾ ವಾಟೆನ್ ಬೇಗಮೆನ್ ಭಾಯ್ರ್ ಧಾಡ್ಲೆಂ… ನಿಜಾಯ್ಕೀ ದೆವಾಚ್ಯೊ ವಾಟೊ ವಿಚಿತ್ರ್…”

“ತುವೆಂ ಮ್ಹಣ್ಚೆಂ ಸಾರ್ಕೆಂ” ಮ್ಹಣಾಲೊ ಸರ್ದಾರ್ ಸಿಮಾಂವ್, ಚುರ್ಚುರೊನ್.

“ವ್ಹಯ್… ಆಮ್ಚ್ಯಾ ಸಮಾಜೆಚೆರ್ ಇಂಫೆರ್ನಾಚಿಂ ದಾರಾಂ ಉಗ್ತಿಂ ಜಾಲ್ಯಾಂತ್. ತಿಂ ಧಾಂಪೊಂಕ್ ವಾ ತಾಂಚೆರ್ ಆಮ್ಚ್ಯಾ ಸಮಾಜಿನ್ ಜಯ್ತ್ ವ್ಹರೊಂಕ್ ಆನಿಕ್‍ಯೀ ಥೊಡೊ ಕಾಳ್ ವೆತಲೊ… ಪುಣ್ ತ್ಯಾ ಆದಿಂ, ಮೊಗಾಚಿಂ ಮಹಿಮಾ ತುಜೆ ಥಂಯ್ ಸಂಪದತೆಲಿಂ…”

ಸರ್ದಾರ್ ಸಿಮಾಂವ್ ಉಲಂವ್ಕ್ ನಾ. ಚಿಂತುಂಕ್‍ಚ್ ತೊ ಪಡ್ಲೊ.

ತಿತ್ಲ್ಯಾರ್, ಬೇಗಮೆಚ್ಯಾ ಅಪೇಕ್ಷೆ ಪ್ರಕಾರ್, ಸಾವ್ಕಾರ್ ಮಾರ್ಸೆಲ್ ಕುವೆಲ್ ಆನಿ ಗ್ರೆಗೊರ್ ತೆಲ್ಲಿಸ್ ಥಂಯ್ಸರ್ ಆಯ್ಲೆ. ಎಕಾಮೆಕಾಕ್ ತೆ ವಳ್ಕಲೆ. ತಶೆಂ ಜಾವ್ನ್ ಸರ್ದಾರ್ ಸಿಮಾಂವ್ಕ್ ಆನಿ ವೆರೊನಿಕಾ ಕುವೆಲಿಕ್ ಚಡ್ ಉಲಂವ್ಕ್ ಅವ್ಕಾಸ್ ಜಾಲೊ ನಾ.

ಖಂತಿರ್ ತರೀ, ಜೆರಾಲ್ ಥರಾನ್ ತಾಣಿಂ ಎಕಾಮೆಕಾಕ್ ಆದೇವ್ಸ್ ಮಾಗ್ಲೊ. ಆನಿ ವೆವೆಗ್ಳ್ಯಾ ಥರಾನ್, ತಾಂಚ್ಯಾ ಪಯ್ಣಾಚಿ ತಯಾರಾಯ್ ತಾಣಿಂ ಕೆಲಿ.

* * * * *

ತ್ಯಾಚ್ ದಿಸಾ ಸಾಂಜೆರ್, ಸರ್ದಾರ್ ಸಿಮಾಂವ್ ಆನಿ ಸರ್ದಾರ್ ಯೂಸುಫ್ ಆಲಿ, ತಾಂಚ್ಯಾ ಶಿಪಾಯಾಂ ಸಾಂಗಾತಾ ಆನಿ ಕೈದ್ಯಾಂಕ್ ಘೆವ್ನ್ ಪಯ್ಯನೂರಾಕ್ ಆಯ್ಲೆ. ಬೇಗಮೆಕ್ ಭಾಸ್ ದಿಲ್ಲೆಪರಿಂ ರಹೀಮಾಕ್ ತಾಣಿಂ ಸುಟ್ಕಾ ದಿಲಿ.

ತ್ಯಾಚ್ ರಾತಿಂ, ಸರ್ದಾರ್ ಯೂಸುಫ್ ಆಲಿಚೆ ಶಿಪಾಯ್ ತಾಂಚ್ಯಾ ಮಂಜೆಂತ್ ಚಡೊನ್, ಪಯ್ಣಾಚಿ ತಯಾರಾಯ್ ಕರ್ನ್ ಆಸ್ತಾನಾ, ಕಣ್ಣಾನೂರ್ ಥಾವ್ನ್ ಸಾವ್ಕಾರ್ ಮಾರ್ಸೆಲ್ ಕುವೆಲ್, ಮಾನೆಸ್ತ್ ಗ್ರೆಗೊರ್ ತೆಲ್ಲಿಸ್, ಪಾತ್ಯೆಣೆಚ್ಯಾ ಥೊಡ್ಯಾ ಮನ್ಶ್ಯಾಂಕ್ ಸಾಂಗಾತಾ ಘೆವ್ನ್, ಆನಿ ವೆರೊನಿಕಾ ಕುವೆಲಿಕ್ ಪಾಲ್ಕೆಂತ್ ಭೋವ್ ಚತ್ರಾಯೆನ್ ವ್ಹಾವವ್ನ್ ಘೆವ್ನ್ ಪಯ್ಯನೂರಾಕ್ ಯೇವ್ನ್ ಪಾವ್ಲೆ.

ತಾಂಕಾಂ ಭೋವ್ ಘುಟಾನ್, ಪಾಟ್ಲ್ಯಾ ಮಂಜೆಂತ್ ಘೆವ್ನ್, ಬೋಳಾರ್ ತಾಂಕಾಂ ತಡಿರ್ ದೆಂವಯ್ ಸಾರ್ಕಿ ವ್ಯವಸ್ಥಾ ಕರವ್ನ್ ಸರ್ದಾರ್ ಸಿಮಾಂವ್ನ್ ಹುಕುಮ್ ದಿಲಿ.

ತೊಪಾಸಿ ದಾಲ್ಮೇದಾಕ್ ವ್ಹರ್ನ್, ಬೋಳೂರ್ ಠಾಣ್ಯಾಂತ್ಲ್ಯಾ ಜಯ್ಲಾಂತ್ ದವರ್ಚ್ಯಾ ಖಾತಿರ್ ಶಿಪಾಯಾಂಚ್ಯಾ ತಾಬೆನ್ ದಿಲೊ.

ದುಸ್ರ್ಯಾ ದಿಸಾ, ಸರ್ದಾರ್ ಸಿಮಾಂವ್, ಯೂಸುಫ್ ಆಲಿ ಆನಿ ಪಾತ್ಯೆಣೆಚೆ ಧಾ ಜಣ್ ಶಿಪಾಯ್, ಫಕೀರ್ ಮಹಮ್ಮದಾಕ್ ಘೆವ್ನ್, ಘೊಡ್ಯಾಂಚೆರ್, ಬಡ್ಗಾ-ಉದೆಂತಿಚಿ ವಾಟ್ ಧರ್ನ್ ಪಟ್ಟಣಾಕ್ ಭಾಯ್ರ್ ಸರ್ಲೆ.

ಟಿಪ್ಪು ಸುಲ್ತಾನಾಚೆಂ ಶರ್ತ್ ಆನಿ ದಿಲ್ಲೊ ವಾಯ್ದೊ ಸರ್ದಾರ್ ಸಿಮಾಂವ್ನ್ ತಸೊ ಪಾಳ್ಳೊ.

ಪುಣ್ ಇಂಫೆರ್ನಾಚಿಂ ದಾರಾಂ ಉಗ್ತಿಂ ಉರ್ಲಿಂ. ಫುಡೆಂ ಜಾಯ್ತಿಂ ವಿಚಿತ್ರಾಂ ಘಡೊಂಕ್, ಆನಿ ಮೊಗಾಚಿಂ ಮಹಿಮಾಂ ಜಾರಿ ಜಾಂವ್ಕ್ ಆಸ್‍ಲ್ಲಿಂ.

-: ಸಮಾಪ್ತ್ :-

‘ದೆವಾಚ್ಯೆ ಕುರ್ಪೆನ್’ ಶಿಂಕ್ಳೆಚಿ ಚವ್ತಿ ಕಾದಂಬರಿ ‘ಇಂಫೆರ್ನಾಚಿಂ ದಾರಾಂ’ ಹಾಂಗಾಸರ್ ಸಂಪ್ಲಿ. ಮುಖ್ಲಿ ಕಾದಂಬರಿ ‘ಸರ್ದಾರಾಚೆಂ ಸನ್ನಿಧಾನ್’. ತ್ಯಾ ಉಪ್ರಾಂತ್ ‘ಬಂದಡೆಂತ್ ಬಲಿದಾನ್’ ಆನಿ ನಿಮಾಣಿ, ಸಾತ್ವಿ ‘ಮೊಗಾಚಿಂ ಮಹಿಮಾ’.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel