ಇಂಫೆರ್ನಾಚಿಂ ದಾರಾಂ – 35: ಮೊರ್ನಾ ತಣಿರ್ – ಭಯ್ಣಿಚಿ ಭೆಟ್

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 35
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 35: ಮೊರ್ನಾ ತಣಿರ್ – ಭಯ್ಣಿಚಿ ಭೆಟ್

ಸರ್ವ್ ವಾಟೆಂನಿ ತಾಣಿಂ ಚಿಂತ್‍ಲ್ಲೆಪರಿಂಚ್ ಜಾತೆಲೆಂ ಮ್ಹಣ್ ಆನಿ ಆಖ್ರೇಕ್ ಜಯ್ತ್‌ಯೀ ತಾಂಚೆಂಚ್ ಜಾತೆಲೆಂ ಮ್ಹಣ್ ಪಾತ್ಯೆವ್ನ್ ಆಯಿಲ್ಲ್ಯಾ ತ್ಯಾ ತೆಗಾಂ ಮಾನಾಯಾಂನಿ ಚಿಂತ್‍ಲ್ಲೊ ಪಾಸ್, ಅಸೊ ತಾಂಚೆರ್‌ಚ್ ಉಲ್ಟೊ ಅರ್ನಾಲ್ಲೊ, ಆನಿ ತೆ ಕೈದಿ ಜಾಲ್ಲೆ.

ಸರ್ದಾರ್ ಸಿಮಾಂವ್ನ್ ಸಾಂಗ್‍ಲ್ಲಿ ಫುಡ್ಲಿ ಮಾಂಡಾವಳ್ ಆಯ್ಕೊನ್ ತೆ ಬಾವ್ಡೆ ಆನಿಕ್‍ಯೀ ಚಡ್ ಥರ್ಥರ್ಲೆ ಆನಿ ನಿರಾಶಿ ಜಾಲೆ. ಪುಣ್ ಚಡಿತ್ ಕಾಂಯ್ ಉಲಂವ್ಕ್ ಅವ್ಕಾಸ್ ನಾಸ್ತಾನಾ, ಸರ್ದಾರಾಚ್ಯಾ ಹರ್ಯೆಕಾ ಹಿಶ್ಯಾಕ್ ಆನಿ ಅಪೇಕ್ಷೆಕ್ ತಾಣಿಂ ಕಬೂಲ್ ಜಾಯ್ಜಯ್ ಪಡ್ಲೆಂ.

ಫುಡ್ಲ್ಯಾ ಥೊಡ್ಯಾ ವೊರಾಂ ಭಿತರ್, ಕಣ್ಣಾನೂರ್‍ಚಿ ಕಾಣಿ ಆಖೇಯ್ರ್ ಜಾತೆಲಿ, ಆನಿ ಜಹನಾರಾ ಬೇಗಮ್‍ಯೀ ವಾಟೆರ್ ಪಡ್ತೆಲಿ ಮ್ಹಣ್ ತಾಣಿಂ ಚಿಂತ್ಲೆಂ. ತಿಕಾ ಕಶಿ ಪುಣೀ ಖಬರ್ ಪಾವಯ್ಜಾಯ್ ಮ್ಹಣ್ ತಾಂಚೆಂ ಮನ್ ಅತ್ರೆಗ್ತಾಲೆಂ, ಪುಣ್ ತಶೆಂ ಕರುಂಕ್ ಕಸಲಿಚ್ ವಾಟ್ ನಾತ್‍ಲ್ಲಿ.

ಜಾಲ್ಯಾರೀ – ಸರ್ದಾರ್ ಸಿಮಾಂವ್ನ್ ತ್ಯಾ ತೆಗಾಂಯ್ಕೀ ಥಂಯ್ಚ್ ಫಾಶಿ ದೀಂವ್ಕ್ ನಾ. ಬಗಾರ್ ತಾಂಕಾಂಯೀ ಕಣ್ಣಾನೂರಾಕ್ ಪಾಟಿಂ ವ್ಹರೊಂಕ್ ಚಿಂತ್ಲಾಂ ಮ್ಹಳ್ಳೆಂ ಆಯ್ಕೊನ್ ತಾಣಿಂ ಥೊಡೆಂ ಧಯ್ರ್ ಘೆತ್ಲೆಂ ಆನಿ ಭರ್ವಶ್ಯಾಚಿಂ ಚಿಂತ್ನಾಂ ಆಟಯ್ಲಿಂ. ಸಾಧ್ಯ್ ಜಾಲ್ಯಾರ್, ಕಣ್ಣಾನೂರಾಂತ್ ಪುಣೀ ಝುಜೊನ್ ಹೆವ್ಶಿಲ್ಯಾಂಚೊ ಪಾಡಾವ್ ಕರ್ಯೆತ್ ಆನಿ ಬಚಾವ್ ಜಾವ್ಯೆತ್ ಮ್ಹಳ್ಳಿಯೀ ಆಶಾ ತಾಂಚ್ಯಾ ಮತಿಂತ್ ಘುಂವೊಂಕ್ ಲಾಗ್ಲಿ.

ಪುಣ್ ಸರ್ದಾರ್ ಸಿಮಾಂವ್ಚೆಂ ಯೋಜನ್ ದುಸ್ರೆಂಚ್ ಆಸ್‍ಲ್ಲೆಂ.

“ಆಮಿ ವ್ಹಡ್ ಸಂಭ್ರಮಾನ್ ಕಣ್ಣಾನೂರ್‍ಚ್ಯಾ ಬೇಗಮೆಕ್ ಭೆಟ್ ಕರುಂಕ್ ವೆತಾಂವ್” ಮ್ಹಣಾಲೊ ತೊ. “ಪುಣ್ ತ್ಯಾ ವೆಳಾರ್ – ಆಮಿ ಶಾಬೀತಾಯೆನ್ ಪಾಟಿಂ ಹಾಂಗಾ ಪಾವಾಸರ್, ರಾಯ್ ಕುಂವರ್ ರಹೀಮಾನ್ ಹಾಂಗಾಸರ್ ರಾವಜಾಯ್. ಆಮ್ಚ್ಯಾ ಥೊಡ್ಯಾ ಶಿಪಾಯಾಂನಿ, ವ್ಹಡಾ ಚತ್ರಾಯೆನ್ ತಾಚಿ ಜತನ್ ಘೆಜಾಯ್ ಆನಿ ತಾಚೆಂ ಸಂರಕ್ಷಣ್ ಕರಿಜಾಯ್.”

ತ್ಯಾ ಖಾತಿರ್ ಸರ್ದಾರ್ ಸಿಮಾಂವ್ಚ್ಯಾ ಪಾಂಚ್ ಆನಿ ಸರ್ದಾರ್ ಯೂಸುಫ್ ಆಲಿಚ್ಯಾ ಪಾಂಚ್ ಜಣಾಂ ಶಿಪಾಯಾಂಕ್, ಠಾಣೆದಾರಾ ಸಾಂಗಾತಾ ಪಾಟಿಂ ದವರುಂಕ್ ತಾಣಿಂ ನಿರ್ಧಾರ್ ಕೆಲೊ.

ಮಂಜೆಂತ್ಲೆ ಹೆರ್ ಶಿಪಾಯ್, ಟಿಪ್ಪು ಸುಲ್ತಾನಾಚ್ಯಾ ಸೈನಾಕ್ ಸಹಜ್‍ಲ್ಲ್ಯಾ ಸಮವಸ್ತ್ರಾಂನಿ ನೆಟೊನ್ ಆನಿ ಶಸ್ತ್ರಾಸ್ತ್ರಾಂನಿ ಸಜ್ಜ್ ಜಾವ್ನ್, ಠಾಣ್ಯಾ ಲಾಗಿಂ ಪಾವ್ತಚ್ ಫುಡ್ಲ್ಯಾ ಪಯ್ಣಾಕ್ ತೆ ಆಯ್ತೆ ಜಾಲೆ.

“ಕಣ್ಣಾನೂರಾಕ್ ಆಮಿ ದಾಡ್ ಘಾಲುಂಕ್ ವಾ ಥಂಯ್ ಲಡಾಯ್ ಕರುಂಕ್ ವಚನಾಂವ್ – ಆಮ್ಕಾಂ ದೊನ್‍ಯೀ ನಾಕಾ” ಮ್ಹಣಾಲೊ ಸರ್ದಾರ್ ಸಿಮಾಂವ್, ಸರ್ದಾರ್ ಯೂಸುಫಾ ಲಾಗಿಂ.

“ತರ್ ಆಮಿ ಥಂಯ್ಸರ್ ವೆಚೊ ಉದ್ದೇಶ್ ಕಿತೆಂ? ಸರ್ದಾರ್ ಯೂಸುಫ್ ಆಲಿನ್ ಸವಾಲ್ ಕೆಲೆಂ, ಆನಿ ಸಾಂಗ್ಲೆಂ: “ನಿತಿಕ್ ಉಬೆ ಕರ್ಚ್ಯಾ ಖಾತಿರ್ ಆಮ್ಕಾಂ ಜಾಯ್ ಜಾಲ್ಲೆ ಅಪ್ರಾದಿ ಆಮ್ಚ್ಯಾ ಹಾತಾಂತ್ ಸಾಂಪಡ್ಲ್ಯಾತ್.”

“ತುವೆಂ ಸಾಂಗ್ಚೆಂ ವಾಜ್ಭಿ.”

“ತರ್ ಆಮಿ ಕಣ್ಣಾನೂರಾಕ್ ವಚೊನ್, ಲಡಾಯೆಚೊ ಅವ್ಕಾಸ್ ಆನಿ ಆಮ್ಚ್ಯಾ ತಶೆಂಚ್ ಆಮ್ಚ್ಯಾ ಶಿಪಾಯಾಂಚ್ಯಾ ಜಿವಾಕ್ ಅಪಾಯ್ ಉಗ್ತೊ ದವರ್ತಾಂವ್ ನಹಿಂವೇ?”

“ನಾ” ಮ್ಹಣಾಲೊ ಸರ್ದಾರ್ ಸಿಮಾಂವ್, ಯೂಸುಫ್ ಆಲಿಕ್ ಚಿಕ್ಕೆ ವೊರೆ ವಿಂಗಡ್ ಆಪವ್ನ್. “ಕಣ್ಣಾನೂರಾಂತ್ ಲಡಾಯೆಚೊ ಸಂಭವ್ ನಾ.” ಹಾಸ್ಲೊ ತೊ. “ಸುಫೆದಾರ್ ಭು-ಭೂ ಎಕ್ಲ್ಯಾ ಕಡೆಚ್ ಝುಜೊನ್, ಗೆಲೆ ತ್ಯಾ ರಾತಿಂ ಲಡಾಯೆಚಿ ತಾಂಚಿ ತಾನ್ ಭಾಗ್ಲ್ಯಾ.”

“ತರ್?”

“ತರ್, ಕಣ್ಣಾನೂರ್‍ಚ್ಯಾ ಬೇಗಮೆನ್, ಕುಂಬ್ಳಾ, ನೀಲೇಶ್ವರ್ ಆನಿ ವಿಟ್ಲಾಚ್ಯಾ ರಾಯಾಂ ಕಡೆನ್ ಕಸಲೊಚ್ ಸೊಲ್ಲೊ ಕರಿನಾಯೆ ಆನಿ ಬಾದಶಹಾ ಟಿಪ್ಪು ಸುಲ್ತಾನಾಚೆರ್ ವಿರೋಧ್ ವಚನಾಯೆ ಮ್ಹಣ್ ಸಾಂಗೊಂಕ್ ಆಮಿ ವೆತಾಂವ್.”

“ತಿ ಆಯ್ಕನಾತ್ಲ್ಯಾರ್?”

“ತಿ ಆಯ್ಕತೆಲಿಚ್. ತಿಣೆಂ ಆಯ್ಕಶೆಂ ಕರುಂಕ್ ಆನಿ ಆಮ್ಚೆರ್ ಕಸಲಿಯೀ ಜಬರ್ದಸ್ತಿ ಚಲಯ್ನಾ ಜಾಂವ್ಕ್, ತಿಚ್ಯಾ ಫುಡಾರಾಚೆಂ ಸ್ವಪಣ್, ಆಸ್ರೊ ಆನಿ ದಿವೊ ಜಾವ್ನಾಸ್ಚ್ಯಾ ಕುಂವರ್ ರಹೀಮಾಕ್ ಆಮಿ ಹಾಂಗಾಸರ್ ಭದ್ರತೆಕ್ ದವರ್ತಾಂವ್.”

ಸರ್ದಾರ್ ಯೂಸುಫ್ ಆಲಿನ್ ತಕ್ಲಿ ಹಾಲಯ್ಲಿ – ಸಮ್ಜಲೆಂ ಮ್ಹಳ್ಳ್ಯಾ ಅರ್ಥಾರ್ ಜಾವ್ಯೆತ್, ವಾ, ಸರ್ದಾರ್ ಸಿಮಾಂವ್ಚಿಂ ತಂತ್ರಾಂ ಆನಿ ರಾಜಕೀಯ್ ಚಲಾಕಿ ಆಪ್ಣಾಕ್ ಸಮ್ಜನಾಂತ್ ಮ್ಹಳ್ಳ್ಯಾ ಅರ್ಥಾರ್‌ಯೀ ಜಾವ್ಯೆತ್.

“ತರ್ ಆಮಿ ಭಾಯ್ರ್ ಸರ್ಯಾಂ” ಮ್ಹಣೊನ್ ತೆ ಹೆವ್ಶಿನ್ ಆಯ್ಲೆ. ಕಣ್ಣಾನೂರಾಕ್ ವೆಚ್ಯಾ ಹ್ಯಾ ಆಯೋಗಾಚೆಂ ಮುಖೇಲ್ಪಣ್ ಸರ್ದಾರ್ ಯೂಸುಫಾಕ್ ಸರ್ದಾರ್ ಸಿಮಾಂವ್ನ್ ಒಪ್ಸುನ್ ದಿಲೆಂ.

“ಹೋಶ್ಯಾರ್!” ಸರ್ದಾರಾನ್ ಆವಾಜ್ ದಿಲೊ, ಹೆರ್ ಸಗ್ಳಿ ತಯಾರಾಯ್ ಜಾಲ್ಯಾ ಉಪ್ರಾಂತ್. “ಆಮಿ ಹಾಂಗಾಸರ್ ಪಾಟಿಂ ಸೊಡುನ್ ವೆಚೆ ಶಿಪಾಯ್ ಜಾಗ್ರುತ್ ಆಸೊಂದಿತ್. ಆಮಿ ಪರ್ತ್ಯಾನ್ ಹಾಂಗಾ ಯೇವ್ನ್ ಪಾವಾಸರ್ ತ್ಯಾ ಯುವಕಾನ್ ಸುರಕ್ಷಿತ್ ಆಸಜಾಯ್.”

“ಕಾಂಯ್ ಉಪಾದ್ರ್ ಪುಣೀ ಆಸ್ಲ್ಯಾರ್?” ಜಮೆದಾರ್ ರಾಮಪ್ಪಾನ್ ವ್ಹಳೂ ವಿಚಾರ್ಲೆಂ.

“ಕಾಂಯ್ ಉಪಾದ್ರ್ ಪುಣೀ ಆಸ್ಲ್ಯಾರ್, ವಾ, ಭಾಯ್ರ್ ಥಾವ್ನ್ ಕೊಣ್‍ಯೀ ಯೇವ್ನ್ ತಾಕಾ ಸೊಡಂವ್ಚೆಂ ಪ್ರಯತ್ನ್ ಕರ್ತಿತ್ ಜಾಲ್ಯಾರ್, ವಾ, ಆಮ್ಕಾಂ ಗೆಲ್ಲೆ ಕಡೆನ್ – ಕಣ್ಣಾನೂರಾಂತ್ – ಕಾಂಯ್ ಪುಣೀ ಉಪಾದ್ರ್ ಜಾಲ್ಯಾತ್ ಮ್ಹಳ್ಳೊ ಹಿಸೊ ತುಮ್ಕಾಂ ಮೆಳತ್ ಜಾಲ್ಯಾರ್, ಕಸಲಿಚ್ ದಾಕ್ಷೆಣ್ ನಾಸ್ತಾನಾ ತಾಕಾ ತುಮಿ ಫಾಶಿ ದಿವ್ಯೆತ್.”

“ನಾ, ನಾ!” ಪಿಂರ್ಗಲೊ ರಹೀಮ್. “ಮ್ಹಜೆ ವರ್ವಿಂ ತುಮ್ಕಾಂ ಕಸಲೆಚ್ ತ್ರಾಸ್ ಜಾಂವ್ಚೆ ನಾಂತ್.” ಕಸೊ ಪುಣೀ ಜೀವ್ ಉರ್ಲ್ಯಾರ್ ಪುರೊ ಮ್ಹಳ್ಳಿಂ ತಾಚಿಂ ಚಿಂತ್ನಾಂ ಜಾವ್ನಾಸ್‍ಲ್ಲಿಂ. “ಜಾಯ್ ಜಾಲ್ಯಾರ್…” ಮ್ಹಣಾಲೊ ತೊ ಆತುರಾಯೆನ್, ಪುಣ್ ಕೈದಿ ಜಾವ್ನಾಸ್‍ಲ್ಲ್ಯಾ ಫಕೀರ್ ಮಹಮ್ಮದಾಚೆಂ ಆನಿ ತೊಪಾಸಿ ದಾಲ್ಮೇದಾಚೆಂ ತೋಂಡ್ ಪಳೆವ್ನ್ ಚಿಕ್ಕೆ ತೊ ಕಾವ್ಜೆಲೊ.

“ಜಾಯ್ ಜಾಲ್ಯಾರ್?” ವಿಚಾರ್ಲೆಂ ಸರ್ದಾರ್ ಸಿಮಾಂವ್ನ್.

“ಜಾಯ್ ಜಾಲ್ಯಾರ್” ಮ್ಹಣಾಲೊ ರಹೀಮ್, ಚಿಕ್ಕೆ ಧಯ್ರ್ ಘೆವ್ನ್. “ಹಾ-ಹಾಂವ್ ಬರೊ ಆಸಾಂ, ಆನಿ, ತುಮ್ಕಾಂ ಜಾಯ್ ತಶೆಂ ಚಲಜಾಯ್ ಆನಿ ಸರ್ವ್ ಸವ್ಲತ್ಯೊ ತುಮ್ಕಾಂ ದೀಜಾಯ್ ಮ್ಹಣ್, ಬೇಗಮ್ ಸಾಹೀಬಾಕ್ ಹಾಂವ್ ಸಂದೇಶ್ ಧಾಡುಂಕ್ ತಯಾರ್ ಆಸಾಂ!”

“ಕೊಣಾ ಕಡೆನ್ ಧಾಡುಂಕ್ ತಯಾರ್ ಆಸಾಯ್?”

“ತುಮ್ಚೆ ಕಡೆನ್‍ಂಚ್!”

“ತೆಂಯೀ ಬರೆಂಚ್!” ಮ್ಹಣೊನ್, ಸರ್ದಾರಾಂನಿ, ತ್ಯಾ ಯುವಕಾ ಕಡ್ಚೊ ಉರ್ದು, ಉರ್ದು ಭಾಷೆನ್ ಲಿಖ್‍ಲ್ಲೊ ಸಂದೇಶ್ ಘೆತ್ಲೊ.

ಉಪ್ರಾಂತ್ ಕಣ್ಣಾನೂರಾಕ್ ತೆ ಭಾಯ್ರ್ ಸರ್ಲೆ.

ಸರ್ದಾರ್ ಸಿಮಾಂವ್ಕ್ ಆನಿ ಸರ್ದಾರ್ ಯೂಸುಫ್ ಆಲಿಕ್ ಸೊಡ್ಲ್ಯಾರ್, ದೋಗ್ ಜಣ್ ಕೈದಿ ಮೆಳೊನ್, ಚಾಳೀಚ್ ಜಣಾಂಚಿ ಠೊಲಿ ತಿ ಜಾಂವ್ಕ್ ಪಾವ್ಲಿ. ತ್ಯಾ ಪಯ್ಕಿಂ ಸರ್ದಾರಾಂಕ್ ಆನಿ ಸುಫೆದಾರಾಂಕ್ ಮ್ಹಣೊನ್, ಸಾತ್ ಘೊಡೆ ಆಸೊನ್, ಉರ್ಲೆಲ್ಯಾ ಗ್ರಾಯ್ಕಾಂನಿ ಪದಾತಿಪರಿಂ ಸಂಚಲನ್ ಕೆಲೆಂ.

ರಾವ್ಳೆರಾಚ್ಯಾ ವಠಾರಾಕ್ ಪಾವ್ತಾ ಪರ್ಯಾಂತ್ ಸುರಕ್ಷಿತಾಯೆ ಖಾತಿರ್ ಫಕೀರ್ ಮಹಮ್ಮದಾಚ್ಯಾ ಆನಿ ತೊಪಾಸಿಚ್ಯಾ ಹಾತಾಂಕ್ ದೊರಿ ಬಾಂಧ್ಲಿ.

ರಾವ್ಳೆರಾ ಲಾಗಿಂ ಪಾವ್ತಚ್ ಕಶೆಂ ಚಲಜಾಯ್ ಆನಿ ಕಿತೆಂ ಕರಿಜಾಯ್ ಮ್ಹಳ್ಳೊ ವಿವರ್ ಆನಿ ಹುಕುಮ್, ಸಮೇಸ್ತಾಂಕ್, ಸರ್ದಾರ್ ಸಿಮಾಂವ್ನ್ ಪಯ್ಲೆಂಚ್ ದೀವ್ನ್ ಆಯ್ತೆ ಕೆಲ್ಲೆ.

ಪಯ್ಯನೂರ್ ಥಾವ್ನ್ ಕಣ್ಣಾನೂರಾಕ್ ಪಯ್ಣ್ ಕರ್ನ್ ವೆಚ್ಯಾ ಹ್ಯಾ ಮಾನಾಯಾಂಚ್ಯಾ ಮೆರ್ವಣ್ಗೆಕ್ ಪಳೆಲ್ಯಾರ್, ತಿ ಠೊಲಿ ವೆತಾ – ಖಂಯ್ಸರ್‌ಗೀ ಲಡಾಯೆಕ್, ವಾ ಕಾಜಾರಾಕ್ ಮ್ಹಣ್ಯೆತೆಂ.

ತೆ ಕಾಜಾರಾಕ್ ವೆತಾತ್ ಜಾವ್ಯೆತ್ ಮ್ಹಳ್ಳಿ ಅಭಿಪ್ರಾಯ್ ಉಚಾರುಂಕ್ ಕಾರಣ್ ಆಸ್‍ಲ್ಲೆಂ. ಕಿತ್ಯಾಕ್, ತಾಂಚೆ ಪಯ್ಕಿಲೆ ದೋಗ್ ಮಾನಾಯ್ ಏಕ್ ಪಾಲ್ಕಿ ವ್ಹಾವವ್ನ್ ವ್ಹರ್ತಾಲೆ.

ಅಶೆಂ, ಚಮ್ಕೊನ್ ಆನಿ ಹಳ್ತಾಚ್ಯಾ ವೆಗಾನ್, ವಾಟ್ ಮಟ್ವಿ ಜಾವ್ನ್ ಆಯ್ಲಿ.

ಭಾಯ್ರ್ ಘಡ್‍ಲ್ಲಿ ಗಜಾಲ್, ವಾ ಅಸಲಿ ಮೆರ್ವಣ್ಗಿ ಲಾಗಿಂ ಯೆತಾ ಮ್ಹಳ್ಳಿ ಖಬರ್, ಕಣ್ಣಾನೂರ್‍ಚ್ಯಾ ರಾವ್ಳೆರಾಂತ್ ಕಳಿತ್ ನಾತ್‍ಲ್ಲಿ.

ಕೆನರಾ ಕ್ರಿಸ್ತಾಂವ್ – ಪ್ರತ್ಯೇಕ್ ಜಾವ್ನ್ ಕೆನರೀನ್ ಕ್ರಿಸ್ತಾಂವ್ – ಸಮಾಜಿಚೆರ್ ಉಗ್ತಿಂ ಜಾಲ್ಲಿಂ ಇಂಫೆರ್ನಾಚಿಂ ದಾರಾಂ ಸದ್ದ್ಯಾಕ್ ಬಂದ್ ಜಾಂವ್ಚಿ ನಾಂತ್, ತಿಚೆರ್ ಆಯಿಲ್ಲಿ ಮೋಡ್ತ್ ಆನಿ ಉಬಿಂ ಜಾಲ್ಲಿಂ ಭಿರಾಂಕುಳ್ ಅನ್ವಾರಾಂ, ಆನಿಕ್‍ಯೀ ಥೊಡೊ ಕಾಳ್ ಥಾಂಬ್ಚಿಂ ನಾಂತ್ ಮ್ಹಣಾ ಸಾರ್ಕ್ಯೊ ಗಜಾಲಿ, ಕಣ್ಣಾನೂರ್‍ಚ್ಯಾ ರಾವ್ಳೆರಾಂತ್ ಘಡ್ತಾಲ್ಯೊ.

ಸಿನೊಲೆಚ್ಯಾ ಅರ್ಲುಕೆಚೆಂ ಅರ್ಧ್, ಆಗ್ನೆಸ್ ಸಿಸಿಲಿಯಾ ಕುಂವರ್ನಿಚ್ಯಾ ತಾಬೆನ್ ಒಪ್ಸುನ್ ದೀವ್ನ್ ಜಾಲ್ಯಾ ಉಪ್ರಾಂತ್, ವೆರೊನಿಕಾ ಕುಂವರ್ನಿಚಿ ಪರ್ತ್ಯಾನ್ ಮತ್ ಚುಕ್‍ಲ್ಲಿ. ತ್ಯಾಚ್ ಅರ್ಧ್ಯಾ ಪ್ರಜ್ಞಾವಸ್ಥೆಂತ್ ತಿಕಾ ನೀದ್ ಆಯಿಲ್ಲಿ.

ದುಖಾಂ, ಆನಿ ಮಣಿಯಾಂ ಬದ್ಲೆಕ್ ಬೊಟಾಂ ಮೆಜುನ್, ತಿಚ್ಯಾ ಹಾಂತುಳ್ಣಾಚ್ಯಾ ಪಾಸ್ಳೆರ್, ಆಗ್ನೆಸ್ ಸಿಸಿಲಿಯಾ ಕುಂವರ್ನಿನ್ ತಿ ದುಖಾಭರಿತ್ ಆನಿ ಸಮಸ್ಯಾಭರಿತ್ ರಾತ್ ಪಾಶಾರ್ ಕೆಲ್ಲಿ.

ಫಾಂತೆಂ ಜಾತಾನಾ, ಹರ್ಶೆಂಚ್ಯಾಕ್‍ಯೀ ಚಿಕ್ಕೆ ಆದಿಂಚ್ ಉಟೊನ್, ಜಹನಾರಾ ಬೇಗಮ್ ತ್ಯಾ ಕುಡಾಕ್ ಆಯ್ಲಿ.

“ಕಾಂಯ್ ಬರೆಂಪಣ್ ನಾಂಗೀ?” ತಿಣೆಂ ಆಗ್ನೆಸಾ ಲಾಗಿಂ ವಿಚಾರ್ಲೆಂ.

“ಹಾಂವ್ ಸಾಂಗೊಂಕ್ ಸಕನಾ” ಮ್ಹಣಾಲಿ ಆಗ್ನೆಸ್ ಕುಂವರ್ನ್. “ಥೊಡ್ಯಾ ವೊರಾಂ ಆದಿಂ, ಥೊಡೊ ವೇಳ್ ಮತಿರ್ ತಿ ಆಯಿಲ್ಲಿ. ಉಪ್ರಾಂತ್ ಪರ್ತ್ಯಾನ್, ಹ್ಯಾಚ್ ಸ್ಥಿತಿರ್ ತಿ ಆಸಾ.”

“ಹಿ ಏಕ್ – ಆಮಿ ಪಯ್ಲೆಂ ಚಿಂತಿನಾತ್‍ಲ್ಲಿ ಕಿಸ್ಮತೆಚಿ ಗಜಾಲ್” ಮ್ಹಣಾಲಿ ಬೇಗಮ್. “ತುಂ ಪರ್ವಾ ಕರಿನಾಕಾ. ಹಾಂವ್ ಹಕೀಮಾಕ್ ಆಪಯ್ತಾಂ.”

ಭಾಯ್ರ್ ವಚೊನ್ ತಿಣೆಂ, ರಾವ್ಳೆರಾಚ್ಯಾ ಹಕೀಮಾಕ್ ಆಪಂವ್ಕ್ ಧಾಡ್ಲೊ.

ಥೊಡ್ಯಾ ವೆಳಾನ್ ಹಕೀಮ್ ಆಯ್ಲೊ. ಬೇಗಮೆನ್ ತಾಕಾ ಫಾವೊ ತಿ, ತುರ್ತಾಚಿ ತಾಕಿದ್ ದಿಲಿ.

ಹಕೀಮಾನ್, ವೆರೊನಿಕಾ ಕುವೆಲಿಚ್ಯಾ ಘಾಯಾಚೆಂ ತಪಾಸಣ್ ಕೆಲೆಂ; ತಿಚಿ ನಾಡ್ ಪಾರ್ಕಿಲಿ, ಆನಿ ತಾಪ್ ಪಳೆಲೊ.

ತಾಚೆಂ ಮುಖಮಳ್ ಗಂಭೀರ್ ಜಾಲೆಂ.

“ಕಿತೆಂ – ತಿ ಮೊರತ್ ಪುಣೀ?” ಬೇಗಮೆನ್ ಸವಾಲ್ ಕೆಲೆಂ. ಹೆಂ ಸವಾಲ್ ಆಯ್ಕೊನ್, ಆಗ್ನೆಸ್ ಕುಂವರ್ನಿಕ್ ದುಖಾಂ ತಡ್ವುನ್ ಧರುಂಕ್ ಕಷ್ಟ್ ಮಾರ್ಲೆ.

“ಮ್ಹಜ್ಯಾನ್ ಸ್ಪಷ್ಟ್ ಸಾಂಗೊಂಕ್ ಜಾಯ್ನಾ” ಮ್ಹಣಾಲೊ ಹಕೀಮ್. “ತಿಚ್ಯಾ ಪಾಟಿರ್ ಭುಜಾ ಸಂಧಾಕ್ ಜಾಲ್ಲ್ಯಾ ತ್ಯಾ ಗೂಂಡ್ ಘಾಯಾ ವರ್ವಿಂ, ತಿಚ್ಯಾ ಪಾಟಿಚ್ಯಾ ಕಣ್ಯಾರ್ ದುಷ್ಪರಿಣಾಮ್ ಜಾಲಾ…”

“ಮ್ಹಣ್ಜೇ?” ಬೇಗಮೆನ್ ವಿಚಾರ್ಲೆಂ. ತೆಂಚ್ ಸವಾಲ್ ವರ್ತ್ಯಾ ಅಕ್ಲಾಸಾನ್ ಆಗ್ನೆಸ್ ಕುಂವರ್ನಿಚ್ಯಾ ಹೃದಯಾಂತ್ ಧ್ವನಿತ್ ಜಾಲೆಂ.

“ಮ್ಹಣ್ಜೇ…” ಮ್ಹಣಾಲೊ ಹಕೀಮ್, ಆಪ್ಲೆಂ ಖಾಡ್ ಪುಸುನ್ ಆನಿ ದೊಳೆ ಧಾಂಪುನ್. “ಮ್ಹಣ್ಜೇ, ತಿ ಆಜ್ ವಾ ಫಾಲ್ಯಾಂ ಭಿತರ್ ಮೊರನಾ ಜಾವ್ಯೆತ್. ಪುಣ್ ತಿಚೆಂ ತ್ರಾಣ್ ಜಿರೊಂಕ್ ಲಾಗ್ಲಾಂ; ತಿಚೆಂ ಆವ್ಕ್ ಮೊರೊಂಕ್ ಲಾಗ್ಲಾಂ. ತಿಕಾ ಮನ್ ಆಸ್ಲ್ಯಾರ್ ಥೊಡೆ ಮಹಿನೆ ತಿ ವಾಂಚತ್. ನಹಿಂ ಜಾಲ್ಯಾರ್, ಫುಡ್ಲ್ಯಾ ದೋನ್ ಚಂದ್ರಾಂ ಭಿತರ್…”

“ಕಿತೆಂ!” ಅಕ್ಲಾಸ್ಲಿ ಆಗ್ನೆಸ್.

“ವ್ಹಯ್” ಮ್ಹಣಾಲೊ ಹಕೀಮ್. “ಹಾಂವೆಂ ಸಾಂಗ್ಲೆಂ ಮ್ಹಣ್ ಬೆಜಾರ್ ಕರಿನಾಕಾತ್.”

ಉಪ್ರಾಂತ್, ಮಾನಿನ್ ವೆರೊನಿಕಾಚ್ಯಾ ಚಾಕ್ರೆ ಖಾತಿರ್ ಥೊಡೆ ಹಿಶೆ ದೀವ್ನ್ ಜಾತಚ್, ಹಕೀಮಾಕ್ ಬೇಗಮೆನ್ ಧಾಡ್ಲೊ.

ಆಗ್ನೆಸ್ ಸಿಸಿಲಿಯಾ, ರಡೊನ್‍ಂಚ್ ರಾವ್ಲಿ. ಬೇಗಮೆಚೆಂ ಮನ್ ಚಿಕ್ಕೆ ಮೊವಾಳ್ಳೆಂ.

“ತುಜೆ ಚುರ್ಚುರೆ ಆನಿ ತ್ರಾಸ್ ಮ್ಹಾಕಾ ಸಮ್ಜತಾತ್” ಮ್ಹಣಾಲಿ ತಿ. “ಪುಣ್ ಅಶೆಂ ಜಾಯ್ತ್ ಮ್ಹಣ್ ಹಾಂವೆಂ ಚಿಂತುಂಕ್ ನಾ. ಅಶೆಂ ಜಾಯ್ಜಯ್ ಮ್ಹಣ್ ಹಾಂವೆಂ ಅಪೇಕ್ಷಾ ಕರುಂಕ್ ನಾ. ಜಾಲ್ಯಾರೀ, ತಿ ಎಕ್ಲಿ ಭೋವ್ ವೀರ್ ಸ್ತ್ರೀ ಮ್ಹಣ್ ಸಾಂಗೊಂಕ್ ಮ್ಹಾಕಾ ಲಜ್ ದಿಸನಾ. ಉಗ್ಡಾಸ್ ದವರ್ – ತುಮ್ಚ್ಯಾ ತ್ಯಾ ಸರ್ದಾರ್ ಸಿಮಾಂವ್ಕ್ ವಾಂಚಂವ್ಚ್ಯಾ ಇರಾದ್ಯಾನ್ ತಿಣೆಂ ತಿಚೊ ಜೀವ್ ಸಮರ್ಪಿಲೊ…”

ಆಗ್ನೆಸ್ ಸಿಸಿಲಿಯಾ, ರಡೊನ್‍ಂಚ್ ರಾವ್ಲಿ.

“ಪುಣ್…” ಮ್ಹಣಾಲಿ ಬೇಗಮ್. “ತಿಣೆಂ ಜೀವ್ ಸಮರ್ಪುನ್‍ಯೀ ಫಾಯ್ದೊ ಜಾಂವ್ಕ್ ನಾ. ಆಮ್ಕಾಂ ಕೊಣಾಯ್ಕೀ ಪ್ರಯೋಜನ್ ಜಾಂವ್ಕ್ ನಾ ಮ್ಹಳ್ಳೆಚ್ ಆಮ್ಕಾಂ ವ್ಹಡ್ ಚುರ್ಚುರೆ…”

“ತರ್, ತರ್…” ಮ್ಹಣಾಲಿ ಆಗ್ನೆಸ್ ಕುಂವರ್ನ್, ಥೊಡ್ಯಾ ವೆಳಾ ಉಪ್ರಾಂತ್, ಭೋವ್ ಹಾಳ್ವಾಯೆನ್.

“ವ್ಹಯ್” ಮ್ಹಣಾಲಿ ಬೇಗಮ್, ಚಿಂತುನ್‍ಶಿ. “ತುಮ್ಚೊ ತೊ ಸರ್ದಾರ್ ಸಿಮಾಂವ್, ಘಡಾ ಭಾಯ್ಲ್ಯಾ ಖಂದ್ಕಾಂತ್ ಬುಡೊನ್ ಮೆಲಾ ಮ್ಹಳ್ಳೆಂ ಸ್ಪಷ್ಟ್ ಜಾಲಾಂ. ತ್ಯಾ ಸಂಬಂಧಿಂ ಆಮಿ ಚಡಿತ್ ಉಲಂವ್ಚೆಂ ಗರ್ಜ್ ಪಡಶೆಂ ನಾ. ಮೆಲ್ಲ್ಯಾಂ ಸಾಂಗಾತಾ ಆಮ್ಕಾಂ ಮೊರೊಂಕ್ ಸಾಧ್ಯ್ ನಾ…”

“ಹಾಯ್!” ಸುಸ್ಕಾರ್ಲಿ ಆಗ್ನೆಸ್. “ತಾಚ್ಯಾ ಸಾಂಗಾತಾ ಆಮಿಂಯೀ – ಹಾಂವೆಂಯೀ ಮೆಲ್ಯಾರ್ ಕಿತ್ಲೆಂ ಬರೆಂ ಆಸ್‍ಲ್ಲೆಂ…”

“ತೆಂ ಆತಾಂ ಉಲವ್ನ್ ಪ್ರಯೋಜನ್ ನಾ.” ಪುರ್ಪುರ್ಲಿ ಬೇಗಮ್. “ಮ್ಹಾಕಾಯೀ ಮ್ಹಜಿಂ ಚಿಂತ್ನಾಂ ಆನಿ ಚುರ್ಚುರೆ ಆಸಾತ್. ಆಮಿ ಸಕ್ಡಾಂನಿ ಜಿಯೆಂವ್ಕ್ ಆಸಾ. ಆಮಿ ಆಮ್ಚೊ ಫುಡಾರ್, ಹ್ಯಾ ಗೊಂದೊಳಾಚ್ಯಾ ಕಾಳಾರ್ ಸಾಂಬಾಳುಂಕ್ ಆಸಾ. ದೆಕುನ್, ಆತಾಂ ಚಿಂತುನ್ ಬಸೊನ್ ಫಾಯ್ದೊ ನಾ. ಹಾಂವ್ ಮ್ಹಜಿಂ ಕಾಮಾಂ ಜಾರಿ ಕರ್ತಾಂ…”

ಆಗ್ನೆಸ್ ಕುಂವರ್ನ್ ಆಯ್ಕೊಂಕ್ ಪಡ್ಲಿ.

“ಹಕೀಮಾನ್ ಥೊಡ್ಯಾಚ್ ವೆಳಾ ಆದಿಂ ಸಾಂಗ್‍ಲ್ಲೆಂ ತುವೆಂ ಆಯ್ಕಲೆಂಯ್” ಮ್ಹಣಾಲಿ ಬೇಗಮ್.

“ವ್ಹಯ್” ಪಿಂರ್ಗಲಿ ಆಗ್ನೆಸ್.

“ತ್ಯಾ ಪ್ರಕಾರ್…” ಮ್ಹಣಾಲಿ ಬೇಗಮ್. “ಹಾಂವ್ ತಿಕಾ, ತಿಚ್ಯಾಚ್ ಮನ್ಶ್ಯಾಂಚ್ಯಾ ಹಾತಾಂತ್ ಒಪ್ಸುನ್ ದಿತಾಂ…”

“ತಿಚ್ಯಾಚ್ ಮನ್ಶ್ಯಾಂಚ್ಯಾ?” ಅಜ್ಯಾಪ್ಲಿ ಆಗ್ನೆಸ್.

“ಬರಾಬರ್!” ತಿಕಾ ಜಾಪ್ ಮೆಳ್ಳಿ. “ತುಂ ನೆಣಾಂಯ್ – ತಿಚೊ ಭಾವ್, ಕುರಿಯೆಲಾಂತ್ಲೊ ನಾಂವಾಡ್ದಿಕ್ ಸಾವ್ಕಾರ್ ಜಾವ್ನಾಸೊನ್ ತಡೀಪಾರ್ ಜಾಲ್ಲೊ ಮಾನೆಸ್ತ್ ಮಾರ್ಸೆಲ್ ಕುವೆಲ್, ಆನಿ ತಿಚ್ಯಾ ಭಯ್ಣಿಚೊ ಘರ್ಕಾರ್ ಮಾನೆಸ್ತ್ ಗ್ರೆಗೊರ್ ತೆಲ್ಲಿಸ್…”

“ವ್ಹಯ್ – ತೆ ಜಿವಂತ್ ಪುಣೀ ಆಸ್‍ಲ್ಲೆ ಜಾಲ್ಯಾರ್…”

“ತೆ ಜಿವಂತ್ ಆಸಾತ್” ಮ್ಹಣಾಲಿ ಬೇಗಮ್, ಮಧೆಂಚ್. “ನಾಕಾ ಜಾಲ್ಲ್ಯಾ ಆನಿ ನಾನಾಂತ್ಯಾ ಘೊಟಾಳ್ಯಾಂನಿ ಸಾಂಪ್ಡೊನ್, ವಿಚಿತ್ರ್ ಥರಾನ್ ಜೀವ್ ವಾಂಚವ್ನ್, ಮಾತೆಂ ಲಿಪವ್ನ್, ಕಣ್ಣಾನೂರಾಂತ್ ಆಬ್ಳೆ – ದೋನ್ ದಿಸಾಂ ಆದಿಂ – ಯೇವ್ನ್ ತೆ ಪಾವ್ಲ್ಯಾತ್!”

“ಕಿತೆಂ!” ಮ್ಹಣಾಲಿ ಆಗ್ನೆಸ್ ಕುಂವರ್ನ್ – ಸ್ವಪ್ಣಾಂತ್ ಉಲಯಿಲ್ಲೆಪರಿಂ. ಬೇಗಮೆಚಿಂ ಉತ್ರಾಂ ಪಾತ್ಯೆಂವ್ಕ್ ತಿಕಾ ಕಷ್ಟ್ ಮಾರ್ಲೆ. ತರೀ, “ತೆ ಜಿವಂತ್ ಆಸಾತ್! ಹಾಂಗಾಸರ್ ಯೇವ್ನ್ ತೆ ಪಾವ್ಲ್ಯಾತ್!” ಮ್ಹಣಾಲಿ ತಿ. “ಖಂಯ್ಸರ್ ತೆ ಆಸ್‍ಲ್ಲೆ ಜಾವ್ಯೆತ್?” ವಿಚಾರ್ಲೆಂ ತಿಣೆಂ.

“ತೊ ಸರ್ವ್ ವಿವರ್ ಹಾಂವ್ ನೆಣಾಂ” ಸಾಂಗ್ಲೆಂ ಬೇಗಮೆನ್. “ಪುಣ್, ತೆ ದೊಗೀ ಜಣ್, ಹೆರ್ ಥೊಡ್ಯಾ – ತಡೀಪಾರ್ ಜಾಲ್ಲ್ಯಾ – ಕಿರಿಸ್ತಾನಾಂ ಸಾಂಗಾತಾ ತಲ್ಚೇರಾಂತ್ ಮಾತೆಂ ಲಿಪವ್ನ್ ಆಸ್‍ಲ್ಲೆ ಮ್ಹಣ್ ಹಾಂವ್ ಜಾಣಾಂ. ಆತಾಂ ತುಮ್ಚ್ಯಾ ಕುರಿಯೆಲಾಂತ್ ಬಂದಡೆಚೊ ತಾಪ್ ಚಿಕ್ಕೆ ಉಣೊ ಜಾಲಾ ಮ್ಹಣ್ ಸಮ್ಜತಚ್ ಪಾಟಿಂ ವೆಚ್ಯಾ ವಾಟೆರ್ ಹಾಂಗಾ ತೆ ಪಾವ್ಲ್ಯಾತ್…”

“ತರ್…” ಮ್ಹಣಾಲಿ ಆಗ್ನೆಸ್ ಕುಂವರ್ನ್, ಉದ್ವೇಗ್ ದಾಮುನ್ ಧರುಂಕ್ ಜಾಯ್ನಾತ್‍ಲ್ಲ್ಯಾ ಜಿನ್ಸಾರ್. “ತಾಂಚಿ ಭಯ್ಣ್ ಹಾಂಗಾಸರ್ ಆಸಾ ಮ್ಹಣ್…”

“ಹಾಂವೆಂ ತಾಂಕಾಂ ಕಳಂವ್ಕ್ ಲಾಯ್ಲಾಂ…”

“ಆನಿ ತಿ ಹ್ಯಾ ಜಿನ್ಸಾರ್ – ಮೊರ್ನಾಚ್ಯಾ ತಣಿರ್…”

“ಆಸಾ ಮ್ಹಣೊನ್‍ಯೀ ಹಾಂವೆಂ ತಾಂಕಾಂ ಖಬರ್ ಮೆಳಶೆಂ ಕೆಲಾಂ.”

“ಮ್ಹಜ್ಯಾ ತಕ್ಲೆಂತ್ ಹೆಂ ಏಕ್‍ಯೀ ರಿಗನಾ” ಉಸ್ವಾಸ್ಲಿ ಆಗ್ನೆಸ್ ಸಿಸಿಲಿಯಾ. “ಅಸಲ್ಯಾ ವೆಳಾರ್, ಹಿ ಮಾನಿನ್ ವೆರೊನಿಕಾ ಕುವೆಲ್ ಪುಣೀ ಬರ್‍ಯಾ ಭಲಾಯ್ಕೆಂತ್ ಆನಿ ಶಾಬಿತ್ ಆಸ್‍ಲ್ಲಿ ಜಾಲ್ಯಾರ್…” ತಿಚಿಂ ಉತ್ರಾಂ ಆಪ್ಶಿಂಚ್ ಥಾಂಬ್ಲಿಂ ಆನಿ, “ಮಿನಿನ್ ಜೆಜು! ಅಸಲ್ಯಾ ವೆಳಾರ್ ತೊ ಮ್ಹಜೊ ಸರ್ದಾರ್… ಜಿವಂತ್ ಆಸ್‍ಲ್ಲೊ ಜಾಲ್ಯಾರ್ – ಧಯ್ರಾನ್ ಮ್ಹಣ್ಯೆತೆಂ – ಇಂಫೆರ್ನಾಚಿಂ ದಾರಾಂ ಆನಿಕ್ ತರೀ ಜಯ್ತ್ ವ್ಹರಶಿಂನಾಂತ್… ಪುಣ್, ದೆವಾಚಿ ಮಾಂಡಾವಳ್ ವೆಗ್ಳಿಚ್..!”

ವ್ಹಯ್, ದೆವಾಚಿ ಮಾಂಡಾವಳ್ ಇತ್ಲಿ ವೆಗ್ಳಿಗೀ, ತಿ ಮನ್ಶ್ಯಾ ದೃಷ್ಟೆಚ್ಯಾ ಮಾಪಾನ್ ಮೆಜುಂಕ್ ಸಾಧ್ಯ್ ನಾ ಮ್ಹಣ್ ಆಗ್ನೆಸ್ ಕುಂವರ್ನಿಕ್ ಸಮ್ಜೊಂಕ್ ಆನಿಕ್‍ಯೀ ಥೊಡೊ ಕಾಳ್ ಪಾಟಿಂ ಆಸ್‍ಲ್ಲೊ…

ಇಂಫೆರ್ನಾಚಿಂ ದಾರಾಂ, ಪುರ್ವಜಾಂಚ್ಯಾ ಭಾವಾರ್ಥಾಚೆರ್ ಜಯ್ತ್ ವ್ಹರಶಿಂ ನಾಂತ್ ಖರಿಂ, ತರೀ, ಆನಿಕೀ ಥೊಡೊ ಕಾಳ್ ಉಗ್ತಿಂಚ್ ತಿಂ ಆಸೊನ್, ಆಮ್ಚ್ಯಾ ಸಮಾಜೆಚೆಂ ಸಾಂಸ್ಕøತಿಕ್, ಸಾಮಾಜಿಕ್ ಆನಿ ಆತ್ಮಿಕ್ ದಾಯ್ಜ್ ಗಿಳುಂಕ್ ಪ್ರಯತ್ನ್ ಕರ್ತೆಲಿಂ ಮ್ಹಣ್ ತಿಕಾ ಕಳಿತ್ ನಾತ್‍ಲ್ಲೆಂ. ಆನಿ ತ್ಯಾಚ್ ವೆಳಾರ್ ತ್ಯಾ ಇಂಫೆರ್ನಾಚ್ಯಾ ದಾರಾಂಚ್ಯಾ ಸಲ್ವಣೆಂತ್, ಕಸಲೊ ಪ್ರಮುಖ್ ಪಾತ್ರ್ ಖೆಳ್ಚೆಂ ಋಣ್ ತಿಕಾ ಆಸ್‍ಲ್ಲೆಂ ಮ್ಹಣ್ ತಿ ನೆಣಾಂಸ್‍ಲ್ಲಿ.

ಪುಣ್, ಹ್ಯಾ ಘಡ್ಯೆ, ಖಂತಿಚಿಂ ಆನಿ ನಿರಾಶೆಚಿಂ ಚಿಂತ್ನಾಂ ಆಟವ್ನ್ ತಿ ಆಸ್ತಾನಾ…

“ತೊ ಜಿವಂತ್ ಆಸಾ! ಆನಂದ್ ದೆವಾಕ್..!” ಮ್ಹಳ್ಳಿಂ ಕ್ಷೀಣ್ ಉತ್ರಾಂ ಆಗ್ನೆಸ್ ಕುಂವರ್ನಿಕ್, ಬಗ್ಲೆನ್‍ಂಚ್ ಆಯ್ಕಲಿಂ. ತಿಣೆಂ ಆಂಗ್ ಕಾಡ್ಲೆಂ ಆನಿ ಪಾಟಿಂ ಪಳೆಲೆಂ…

ಅರ್ಧಿ ನಿಶ್ಚೇಷ್ಟಿತ್, ಆನಿ ಅರ್ಧಿ ನಿದ್ರಾವಸ್ಥೆಂತ್ – ಮೊರ್ನಾಚ್ಯಾ ಹಾಂತುಳ್ಣಾರ್ ಥಾವ್ನ್ ಮ್ಹಳ್ಳೆಪರಿಂ, ವೆರೊನಿಕಾ ಕುವೆಲ್ ಉಲಯ್ತಾಲಿ. ತಿಚೊ ಸ್ವರ್ ಭೋವ್ ಕ್ಷೀಣ್ ಆಸ್‍ಲ್ಲ್ಯಾನ್, ತಿಚಿಂ ಉತ್ರಾಂ ಆಯ್ಕೊಂಚ್ಯಾ ಇರಾದ್ಯಾನ್, ಆಗ್ನೆಸ್ ಕುಂವರ್ನಿನ್, ಹಾಂತುಳ್ನಾ ಬಗ್ಲೆನ್ ದಿಂಬಿ ಮಾರ್ಲಿ, ಆನಿ ಮಾನ್ ಬಾಗಾವ್ನ್ ಆಪ್ಲೊ ಕಾನ್ ತಿಣೆಂ ವೆರೊನಿಕಾಚ್ಯಾ ವೊಂಟಾಂ ಸರ್ಶಿನ್ ವ್ಹೆಲೊ.

“ತೊ ಜಿವಂತ್ ಆಸಾ! ಆನಂದ್ ದೆವಾಕ್..!” ಮ್ಹಣಾಲಿ ವೆರೊನಿಕಾ, ಪರ್ತ್ಯಾನ್.

“ಕೋಣ್ ಜಿವಂತ್ ಆಸಾ ಭಯ್ಣೀ?” ವಿಚಾರ್ಲೆಂ ಆಗ್ನೆಸಾನ್. ತಿಚೆಂ ಕಾಳಿಜ್, ತೊಂಡಾಂತ್ ಆಯಿಲ್ಲೆಂ. ವೆರೊನಿಕಾ ಕುವೆಲ್ ಸಯ್ರ್-ಭಯ್ರ್ ಜಾವ್ನ್ ಉಲಯ್ತಾಲಿ ಜಾಲ್ಯಾರೀ, ತಿಚ್ಯಾ ಉತ್ರಾಂನಿ ಸತ್ ಆಸೊಂದಿ ಮ್ಹಣ್ ಆಗ್ನೆಸಾಚೊ ಅತ್ಮೊ ಅತ್ರೆಗ್ಲೊ.

ಥೊಡ್ಯಾ ವೆಳಾ ಉಪ್ರಾಂತ್, ಪಯ್ಶಿಲ್ಯಾ ಸಂಸಾರಾಂತ್ ಥಾವ್ನ್ ಮ್ಹಳ್ಳೆಪರಿಂ ವೆರೊನಿಕಾಚೆ ವೋಂಟ್ ಹಾಲ್ಲೆ, ಆನಿ – ಉತ್ರಾಂ ಆಯ್ಕಲಿಂ:

“ಇಂಫೆರ್ನಾಚಿಂ ದಾರಾಂ ಆನಿಕ್‍ಯೀ ಥೊಡೊ ಕಾಳ್ ಉಗ್ತಿಂ ಆಸ್ತೆಲಿಂ, ಪುಣ್, ತಿಂ ಆಮ್ಕಾಂ ಗಿಳುಂಕ್ ಸಕಶಿಂ ನಾಂತ್… ಶೆಕಿಂ ತರೀ, ಆಮ್ಚ್ಯಾ ಘರಾಂದೇರಾಂನಿ ಸರ್ದಾರಾಂಚಿ ಸಿನೊಲ್ ಜಯ್ತೆವಂತ್ ಜಾತೆಲಿ..!”

ತಿತ್ಲೆಂ ಮ್ಹಣೊನ್, ಮಾನಿನ್ ವೆರೊನಿಕಾ ಕುವೆಲ್, ಪರ್ತ್ಯಾನ್ ಥಂಡ್ ಜಾಲಿ. ಆಗ್ನೆಸ್ ಕುಂವರ್ನಿಕ್ ಕಿತೆಂ ಕರ್ಚೆಂ ಮ್ಹಣ್ ಕಳೊಂಕ್ ನಾ – ವೆರೊನಿಕಾ ಕುವೆಲಿಚ್ಯಾ, ಮೊಡ್ಯಾ ಸಾರ್ಕ್ಯಾ ಹೃದಯಾಚೆರ್ ಮುಖಮಳ್ ದವರ್ನ್, ದುಳ್ದುಳ್ಯಾಂ ತಿ ರಡ್ಲಿ.

ಜಾವ್ಯೆತ್‍ಗೀ ದೆವಾ, ಹಿ ಕಾಂಯ್ – ಸಯ್ರ್-ಭಯ್ರ್ ಉಲೊಣ್ಯಾಚಿ ಗತ್?

ತಿಣೆಂ ಮ್ಹಳೆಂ – ತೊ ಜಿವಂತ್ ಆಸಾ!

‘ಜಿವಂತ್ ಆಸಾ’ ಮ್ಹಳ್ಳೊ ಗ್ರಾಯ್ಕ್ ಕಾಂಯ್…

ಕೋಣ್ ತೊ ಜಾವ್ಯೆತ್ – ಆಸ್ಯೆತ್‍ಗೀ ದೆವಾ ತಾಂತುಂ ಸತ್?

ನಿಜಾಯ್ಕೀ, ಮಾನಿನ್ ಆಗ್ನೆಸ್ ಸಿಸಿಲಿಯಾಚೆಂ ತನ್ ಮನ್ ಹಾಂಗಾಸರ್ ತಳ್ಮಳ್ಳೆಂ ಆನಿ ಚಡ್ಪಡ್ಲೆಂ. ಗಳ್ಯಾಂತ್ಲೆಂ ಅರ್ಲುಕೆಚೆಂ ಅರ್ಧ್ ತಿಣೆಂ ಘಟ್ ಧರ್ಲೆಂ.

ತಿ ತಸಲ್ಯಾ ತಳ್ಮಳ್ಯಾಂನಿ ಆಸ್ತಾನಾ, ಘಡಿಭರ್ ಬೇಗಮ್ ಜಹನಾರಾ, ಭಾಯ್ರ್ ವಚೊನ್ ಭಿತರ್ ಆಯಿಲ್ಲಿ. ತಿಚ್ಯಾ ಪಾಟ್ಲ್ಯಾನ್ ದೋಗ್ ದಾದ್ಲೆಯೀ ಭಿತರ್ ಆಯಿಲ್ಲೆ.

“ಬಹೆನ್, ಊಟ್!” ಆಗ್ನೆಸಾಚ್ಯಾ ಭುಜಾಕ್ ಧರುನ್, ಬೇಗಮೆನ್ ತಿಕಾ ಉಟಯ್ಲೆಂ.

ತಿ ಉಟ್ಲಿ, ಆನಿ ತಿಣೆಂ ಮುಖ್ ಘುಂವ್ಡಾವ್ನ್ ಪಳೆಲೆಂ – ತಾಂಚಿ ತಿಕಾ ವಳಕ್ ಮೆಳ್ಳಿ: ವೇಸ್ ಚಿಕ್ಕೆ ಬದಲ್ ಜಾಲ್ಲೊ ತರೀ, ದೇಡ್ ದೋನ್ ವರ್ಸಾಂ ಆದಿಂ, ಬಂಟ್ವಾಳಾಂತ್ ಪಳೆವ್ನ್ ಜಾಣಾಂ ಜಾಲ್ಲ್ಯಾ ತ್ಯಾ ವ್ಯಕ್ತಿಂಕ್ ತಿ ವಳ್ಕಲಿ.

ಸಾವ್ಕಾರ್ ಮಾರ್ಸೆಲ್ ಕುವೆಲ್, ಆನಿ ತಾಚೊ ಮಿವ್ಣೊ ಮಾನೆಸ್ತ್ ಗ್ರೆಗೊರ್ ತೆಲ್ಲಿಸ್, ಥಂಯ್ಸರ್ ಉಬೆ ಆಸ್‍ಲ್ಲೆ. ವಿಜ್ಮಿತ್ ಜಾಲ್ಲ್ಯಾ ಪ್ರಾಸ್ ಆನಿ ಸಂತೊಸ್ ಪಾವ್‍ಲ್ಲ್ಯಾ ಪ್ರಾಸ್ ಚಡ್ ಖಂತಿನ್ ಆಗ್ನೆಸ್ ಕುಂವರ್ನ್ ಮೊನಿ ಜಾಲಿ. ತಿಚ್ಯಾ ಮತಿಂತ್ ಉಗ್ಡಾಸಾಚಿಂ ಕಿಟಾಳಾಂ ಉಬ್ಲಿಂ ಆನಿ ಪಶ್ಚಾತ್ತಾಪಾಚೆ ಕಾಜುಲೆ ಧಾಂವ್ಲೆ.

ಸಮಸ್ಯಾ ಪರಿಹಾರ್ ಕರುಂಕ್ ಮ್ಹಳ್ಳ್ಯಾ ಜಿನ್ಸಾರ್, ಹಾಂತುಳ್ಣಾರ್ ಆಸ್‍ಲ್ಲ್ಯಾ ವೆರೊನಿಕಾ ಕುವೆಲಿನ್ ದೊಳೆ ಉಗ್ತೆ ಕೆಲೆ.

“ಭಯ್ಣೀ, ವೆರೊನಿಕಾ!” ಅಕ್ಲಾಸ್ಲೊ ಸಾವ್ಕಾರ್ ಮಾರ್ಸೆಲ್ ಕುವೆಲ್. ತಾಚಿಂ ದುಖಾಂ ತಾಚ್ಯಾ ತೊವ್ಶ್ಯಾ ಸಾರ್ಕ್ಯಾ ಪೊಲ್ಯಾಂಚೆರ್ ಗಳೊನ್ ಕೆಂಚಿ ಖಾಡ್ ಮಿಶ್ಯಾಂತ್ ಪಾಜಾರ್ಲಿಂ.

“ಬಾಯೇ” ಉದ್ಗಾರ್ಲೊ ಮಾನೆಸ್ತ್ ಗ್ರೆಗೊರ್ ತೆಲ್ಲಿಸ್. ತೊಯೀ ಲಜೆಚಿ ಪರ್ವಾ ನಾಸ್ತಾನಾ ರಡ್ತಾಲೊ.

ತಾಣಿಂ ದೊಗಾಂಯ್ನೀ, ಹಾಂತುಳ್ಣಾಚ್ಯಾ ದೋನ್ ಬಗ್ಲೆಂನಿ ದಿಂಬಿ ಮಾರ್‌ಲ್ಲಿ.

ಪಯ್ಸ್ ಘಡಾಚ್ಯಾ ಮಹಾದ್ವಾರಾ ಲಾಗಿಂ ಆವಾಜ್ ಆಯ್ಕಲೊ. ಥೊಡ್ಯಾ ಘಡಿಯಾಂ ಭಿತರ್, ಭಾಯ್ಲ್ಯಾ ಭಿತರ್ಲ್ಯಾ ಸಂವಾದಾನ್ ಜಬ್ಬೊರ್ ತೊ ಜಾಲೊ.

ಜಹನಾರಾ ಬೇಗಮ್ ಆತುರಾಯೆನ್ ಭಾಯ್ರ್ ಗೆಲಿ.

ಥೊಡ್ಯಾ ವೆಳಾನ್, ಚಡ್ ಆತುರಾಯೆನ್ ಭಿತರ್ ತಿ ಆಯ್ಲಿ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel