ಇಂಫೆರ್ನಾಚಿಂ ದಾರಾಂ – 27: ಆಂಯ್ಡೆ ಆನಿ ಗೊಂಯ್ಡೆ

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 27
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 27: ಆಂಯ್ಡೆ ಆನಿ ಗೊಂಯ್ಡೆ

ಸರ್ದಾರ್, ಒಮ್ಜೂರ್ಚೊ ಸಿಮಾಂವ್ ಪೆದ್ರು ಪ್ರಭು!

ನಿಜಾಯ್ಕೀ, ಸರ್ದಾರ್ ಸಿಮಾಂವ್, ಮತಿ ಭಿತರ್ ಗರಮ್ ಜಾಲ್ಲೊ.

‘ಗರ್ಜೆ ಶಿವಾಯ್, ಸ್ತ್ರೀಯಾಂಚ್ಯಾ ವ್ಯವಹಾರಾಂತ್ ಸಾಂಪಡ್ಲ್ಯಾರ್, ಕಸಲೊಯೀ ದಾದ್ಲೊ, ಘಡ್ಯೆ ಪುಣೀ ಪಿಸೊ ಜಾಂವ್ಕ್ ಪಾವ್ತಾ’ ಮ್ಹಳ್ಳಿ ಮ್ಹಣ್ಣಿ, ತಾಕಾಯೀ ಕಳಿತ್ ಆಸ್‍ಲ್ಲಿ.

ಪಾಟ್ಲ್ಯಾ ಥೊಡ್ಯಾ ಮಹಿನ್ಯಾಂ ಥಾವ್ನ್ – ತಾಚ್ಯಾ ಜಿಣ್ಯೆಂತ್ – ತೀನ್ ಚಡುಣೆಂ ದುಸ್ಸಾಧ್ಯ್ ಮ್ಹಣ್ಯೆತ್ ತಸಲಿಂ ಸಮಸ್ಯಾಂ ಉಬಿಂ ಜಾಲ್ಲಿಂ.

ಪಯ್ಲೆಂ: ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ಸರ್ಕಾರಾಂತ್ ಬಳಾಧಿಕ್ ಹುದ್ದೆದಾರ್ ಜಾವ್ನ್ ಆಸೊನ್ – ತ್ಯಾ ಪರ್ಮಾಣೆಂ ಚಲ್ಚೆಂ.

ದುಸ್ರೆಂ: ಭೋವ್ ಮರ್ಯಾದಿಚ್ಯಾ ಕುಟ್ಮಾಂತ್ ಜಲ್ಮೊನ್, ಭೋವ್ ಮಾನೆಸ್ತ್ ಆನಿ ವಿಶ್ವಾಸಾಂತ್ ಘನೇಸ್ತ್ ಜಾವ್ನಾಸ್‍ಲ್ಲ್ಯಾ – ಕೆನರೀನ್ ಕ್ರಿಸ್ತಾಂವಾಂಚ್ಯಾ – ಸಮಾಜೆಂತ್ ತೊ ಜಲ್ಮಲ್ಲೊ, ಆನಿ, ತ್ಯಾಚ್ ಸಮಾಜೆಂತ್, ಭರ್ಮಾನ್ ಆನಿ ದರ್ಬಾರಾನ್ ವ್ಹಡ್ ಜಾಲ್ಲೊ. ತ್ಯಾ ಸಮಾಜೆಚೆರ್, ಅನಿರೀಕ್ಷಿತ್, ಅಸಹ್ಯ್ ಆನಿ ಎಕಾ ಥರಾಚ್ಯಾ ಅನ್ಯಾಯಾನ್ ಮ್ಹಳ್ಳೆಪರಿಂ – ಕಥೊಲಿಕ್ ಪವಿತ್ರ್ ಸಭೆಚ್ಯಾ ನೀಜ್ ಚರಿತ್ರೆಂತ್ – ಖರೆಂ ಆನಿ ಭೋವ್ ಭಿರಾಂಕುಳ್ ಖರ್ಗ್ ಬಂದಡೆಚ್ಯಾ ರುಪಾನ್ ದೆಂವ್‍ಲ್ಲೆಂ. ತಸಲ್ಯಾ ವೆಳಾರ್, ತಾಚ್ಯಾ ಜಲ್ಮಾಕ್, ಮಾನಾಕ್ ಆನಿ ಸ್ಥಾನಾಕ್ ಸಹಜ್ ಜಾವ್ನ್, ಭಾವಾರ್ಥಾ ಖಾತಿರ್, ಭಾವ್-ಬಂಧ್ವಾಂ ಖಾತಿರ್ ಆನಿ ತಾಚ್ಯಾಚ್ – ಕೆನರಾ ಕ್ರಿಸ್ತಾಂವ್ – ಸಮಾಜೆ ಖಾತಿರ್, ತಾಣೆಂ, ಧ್ಯಾನಾನ್, ದಾನಾನ್ ಆನಿ ಸಾಹಸಾನ್, ಫುಲ್ ನಹಿಂ ಪಾಕ್ಳೆಚೆಂ ಪುಣೀ ವರ್ಗಣೆಂ (ಮದತ್) ಫಾರಿಕ್ ಕರುಂಕ್ ಆಸ್‍ಲ್ಲೆಂ. ತ್ಯಾ ವಾಟೆನ್ – ಜೀವ್ ಆನಿ ಸ್ಥಾನ್ ತರೀ ರಿಸ್ಕೆರ್ ಘಾಲುನ್ – ಎದೊಳ್ ಪರ್ಯಾಂತ್ ತೊ ಜಯ್ತೆವಂತ್ ಜಾಲ್ಲೊ.

ಆನಿ ತಿಸ್ರೆಂ: ಹ್ಯಾಚ್ ಅನುಚಿತ್ ಆನಿ ಅನಾಹುತಾಚ್ಯಾ ಕಾಳಾರ್, ಮೋಗ್ ಮ್ಹಳ್ಳ್ಯಾ ಸರ್ವ್ ವ್ಯಾಪಕ್ ಅನಿ ಸರ್ವ್ ಬಳಾಧಿಕ್ ಸವಾಲಾನ್ ತಾಕಾ ವೆಡ್ಕೊಳ್ ಘಾಲುನ್, ತಾಚ್ಯಾ ಅಕ್ಕಲಾಕ್ ಧಖೊ ದಿಲ್ಲೊ.

ನಿಜಾಯ್ಕೀ, ಕಷ್ಟ್ ಕಾಳ್! ನಿಜಾಯ್ಕೀ, ಜೀವನ್ಮರಣಾಚೆಂ ಪ್ರಸಂಗ್! ನಿಜಾಯ್ಕೀ, ಜಿಣ್ಯೆಚ್ಯಾ ಸಲ್ವಣೆಚೆಂ, ವಾ, ಸಂಪೂರ್ಣ್‍ಕಾಯೆಚೆಂ ಸವಾಲ್!

ಹಿಂ ತೀನ್ ಪ್ರಮುಖ್ ಸಮಸ್ಯಾಂ, ಹರ್ದ್ಯಾಚೆರ್ ಮುಸ್ಳಾಚೆ ಫಾರ್ ಮಾರ್ತಾತ್ ಮ್ಹಳ್ಳ್ಯಾ ಜಿನ್ಸಾಚೆ ಭೊಗ್ಣಾರ್ ಸೊಸುನ್, ಸರ್ದಾರ್ ಸಿಮಾಂವ್ ಪಾಟಿಂ ಘುಂವ್ಲೊ.

ಮಾನಿನ್ ವೆರೊನಿಕಾ ಕುವೆಲಿನ್ ಉಚಾರ್‌ಲ್ಲಿ ಕಸಲಿಯೀ ಅಪೇಕ್ಷಾ ಜಾರಿ ಕರುಂಕ್ – ತ್ಯಾ ವರ್ವಿಂ ಸುರಕ್ಷಿತಾಯೆಕ್ ಆನಿ ಜಿವಾಕ್ ಕಸಲೆಂ ಬಾಧಕ್ ಆಸ್ಯೆತೆಂ ಜಾಲ್ಯಾರೀ – ನಾ, ವಾ ನಾಕಾ ಮ್ಹಣೊಂಕ್ ತಾಕಾ ಮನ್ ಯೇಂವ್ಕ್ ನಾ.

ಕಿತ್ಯಾಕ್ ಜಾವ್ಯೆತ್?

ತೆಂಚ್ ಸವಾಲ್ – ಅಸಲ್ಯಾ ಗೊಂದೊಳಾಂತ್ ತರೀ – ತಾಚ್ಯಾ ಮತಿಂತ್ ಉದೆಲೆಂ.

ಕಿತೆಂ ಹೆಂ, ಕಾಂಯ್ ಮೋಗ್ ಪುಣೀ ಜಾವ್ಯೆತ್?

ಸಾಯ್ಬಾ ಭೊಗೊಸ್!

ಮೋಗ್ ಮ್ಹಳ್ಳ್ಯಾ ತ್ಯಾ ವಿಚಿತ್ರ್ ಆನಿ ವಿಶೇಸ್ ವಿಷಯಾಕ್, ತಾಣೆಂ, ಲಾಗಿಂ ದೋನ್ ವರ್ಸಾಂ ಆದಿಂ ಆದೇವ್ಸ್ ಮಾಗ್‍ಲ್ಲೊ. ಸ್ತ್ರೀಯಾಂಚೊ ತ್ಯಾ ಅರ್ಥಾನ್ ಸಹವಾಸ್ ನಾಕಾ, ಆನಿ ಮೋಗ್ ಮ್ಹಳ್ಳ್ಯಾ ಸಾಮಗ್ರೆಚೊ ಸಹವಾಸ್ ನಾಕಾ ಮ್ಹಣ್ ತಾಣೆಂ ಮತಿಂತ್ ಸೊಪುತ್ ಘೆತ್‍ಲ್ಲೊ.

ತರೀ, ಪಾಟ್ಲ್ಯಾ ಥೊಡ್ಯಾ ಮಹಿನ್ಯಾಂನಿ, ಕುರಿಯೆಲಾಂತ್ – ಸರ್ದಾರಾಂಚ್ಯಾ ಸಿನೊಲೆಚ್ಯಾ ಮಹಿಮೆ ವೆಳಾರ್ – ಮಾನಿನ್ ವೆರೊನಿಕಾ ಕುವೆಲಿಚಿ ತಾಕಾ ವಳಕ್ ಜಾಲ್ಲಿ, ಆನಿ ಸ್ತ್ರೀಯಾಂ ಥಂಯ್ ತಾಚೊ ಅಭಿಮಾನ್ ಪರತ್ ಜಾಗೊ ಜಾಲ್ಲೊ. ಖುಶೆನ್ ವಾ ಅಜ್ಞಾತಿಂ, ಮೋಗ್ ಮ್ಹಳ್ಳೆಂ ಉತಾರ್ ತಾಚ್ಯಾ ಚಿಂತ್ನಾಂನಿ ಆನಿ ಉತ್ರಾಂನಿ ಮಿಸಾಳೊನ್ ಆಯಿಲ್ಲೆಂ.

ತಶೆಂ ತರೀ, ಹ್ಯಾ ಆಯಿನ್ನ್ ವೆಳಾರ್, ಸರ್ದಾರ್ ಸಿಮಾಂವ್ಚ್ಯಾ ಗೂಂಡ್ ಆನಿ ಆಂತರಿಕ್ ಚಿಂತ್ನಾಂನಿ ಗೊಂದೊಳ್ ಜಾಲೊ. ಕಿತೆಂಯೀ ಜಾಂವ್, ಜೀವ್ ಆನಿ ಜೀವನಾಂ ಆಸ್ ಆನಿ ವಿನಾಶೆಚ್ಯಾ ಧಾರೆರ್ ಖೆಳೊನ್ ಆಸ್ತಾನಾ, ಸಮಾಜೆಂತ್ಲ್ಯಾ ಭಾಂವ್ಡಾಂಕ್ ಮಜತ್ ದಿಂವ್ಚೆಂ ಸವಾಲ್ ಮಾತ್ರ್ ಚಡ್ ಗರ್ಜೆಚೆಂ ಮ್ಹಣ್ ತಾಣೆಂ ಚಿಂತ್ಲೆಂ. ಆನಿ ಕಸಲೆ ಅಪಾಯ್ ಆಯ್ಲ್ಯಾರೀ, ತೋಂಡ್ ದೀವ್ನ್, ಬ್ರೇಸ್ತಾರಾಚ್ಯಾ ರಾತಿಂ ಥಂಯ್ ಥಾವ್ನ್, ಏಕ್ ಪಾವ್ಟಿಂಚ್ಯಾಕ್ ಭಾಯ್ರ್ ಪಡಜಾಯ್ ಮ್ಹಣ್ ತಾಣೆಂ ನಿಚೆವ್ ಕೆಲೊ.

ತರೀ, ತಾಚ್ಯಾ ಮತಿಕ್ ಸಮಾಧಾನ್ ಜಾಂವ್ಕ್ ನಾ.

ಆಪ್ಲ್ಯಾ ಜಿವಾಕ್ ತರೀ, ಅಪಾಯ್ ಸೊಸುನ್, ವೆರೊನಿಕಾ ಕುವೆಲಿನ್ ಆಪ್ಣೆಂ ಭಾಯ್ರ್ ವೆಚೆಂ ವ್ಹಯ್ ಜಾಲ್ಯಾರ್, ಸಾಂಗಾತಾ ತ್ಯಾ ಮುಸ್ಲಿಮ್ ಚಾಕರ್ನಿಕ್‍ಯೀ ಸಾಂಗಾತಾ ವ್ಹರಿಜಾಯ್ ಮ್ಹಣ್ ಸಳ್ ಧರ್‌ಲ್ಲೊ ಮತ್ಲಬ್ ಕಸಲೊ? ಪಾವನಾತ್‍ಲ್ಲ್ಯಾಕ್, ಆತಾಂ ನಿಮಾಣ್ಯಾ ಘಡಿಯೆ, ತ್ಯಾ ಚಾಕರ್ನಿಚ್ಯಾ ಮ್ಹಾತಾರ್‍ಯಾ ಬಾಪಾಯ್ಕೀ ಭಾಯ್ರ್ ವ್ಹರಿಜಾಯ್ ಮ್ಹಣ್ ವಿನಂತೆಚೆಂ ಹಟ್ ಧರ್‌ಲ್ಲೊ ಅರ್ಥ್ ಕಸಲೊ ಜಾವ್ಯೆತ್?

ತಾಕಾ ತೆಂ ಸಮ್ಜೊಂಕ್ ನಾ. ದೆಕುನ್, ತಿಂ ಚಿಂತ್ನಾಂ ತಾಣೆಂ ಮತಿಂತ್ಲಿಂ ಭಾಯ್ರ್ ಘಾಲಿಂ, ಆನಿ ಫುಡ್ಲ್ಯಾ ಕಾರ್ಯಾಕ್ ತೊ ದೆಂವ್ಲೊ.

ಆನಿ ತಸಲ್ಯಾ ವೆಳಾರ್, ಹಠಾನ್ ಆನಿ ಅಪೇಕ್ಷಿನಾತ್‍ಲ್ಲೆಪರಿಂ, ಪಾಟ್ಲ್ಯಾ ಜಿಣಿಯೆಂತ್ ಭೆಟೊನ್ ಸಾಂಡ್‍ಲ್ಲ್ಯಾ ಬಂಟ್ವಾಳ್ಚ್ಯಾ ಆಗ್ನೆಸ್ ಸಿಸಿಲಿಯಾ ಕುಂವರ್ನಿಚೊ ತಾಕಾ ಉಗ್ಡಾಸ್ ಆಯ್ಲೊ. ಪರ್ತ್ಯಾನ್!

ಖಂಯ್ ತಿ ಆಸಾ ಜಾವ್ಯೆತ್? ಕಿತೆಂ ತಿ ಕರ್ತಾ ಜಾವ್ಯೆತ್?

ದೇವ್‍ಚ್ ಜಾಣಾಂ! ಹಾತಿಂತ್ ಧರ್‌ಲ್ಲೆಂ ಕಾಮ್ ಏಕ್ ಪಾವ್ಟಿಂಚ್ಯಾಕ್ ಜಾಂವ್ದಿ ಮ್ಹಣ್ ಜೆಜು ಮರಿ ಜುಜೆ ಕಡೆನ್ ತಾಣೆಂ ಮಾಗ್ಲೆಂ.

ಅಶೆಂ ತಶೆಂ ಮ್ಹಣ್ತಾನಾ ಆನಿ ಚಿಂತಾನಾ, ತ್ಯಾ ಮಹಾನ್ ಬ್ರೇಸ್ತಾರಾಚೊ ದೊನ್ಪಾರ್ ಉತ್ರೊನ್, ಸಾಂಜೆಚ್ಯೊ ಸಾವ್ಳ್ಯೊ ಲಾಂಬ್ ಜಾಂವ್ಕ್ ಲಾಗ್ಲ್ಯೊ.

ತ್ಯಾ ಮಧೆಂ, ದೋನ್ ತೀನ್ ಪಾವ್ಟಿಂ, ಜಹನಾರಾ ಬೇಗಮ್, ಮಾನಿನ್ ವೆರೊನಿಕಾ ಕುವೆಲಿಕ್ ಭೆಟ್ ದೀವ್ನ್ ಗೆಲ್ಲಿ. ವೆರೊನಿಕಾಕ್, ಭ್ಯೆಂ, ರಾಗ್, ಉದ್ವೇಗ್ ಆನಿ ಕಾಂಟಾಳೊ ಯೆತಾ ಪರ್ಯಾಂತ್ ತಿಣೆಂ ಭೆಷ್ಟಾಯಿಲ್ಲೆಂ, ಪುಸ್ಲಾಯಿಲ್ಲೆಂ ಆನಿ ಆಶಾ ದಾಕಯಿಲ್ಲಿ. ಆಖ್ರೇಕ್ – ವೆರೊನಿಕಾ ಎಕಾಯ್ಕೀ ಕಬೂಲ್ ಜಾಯ್ನಾ ಮ್ಹಳ್ಳೆಂ ಸಮ್ಜತಚ್ – ಶಿಮ್ಟಿ ಗುಡ್ಡಾಯಿಲ್ಲ್ಯಾ ವಾಗಿಣಿಪರಿಂ ನಾಕಾ ಬುಡಾಂ ಫುಲವ್ನ್, ಪುಸ್ಪುಸೊನ್ ಆನಿ ಕಾನ್ ದೊಳೆ ತಾಂಬ್ಡೆ ಕರ್ನ್ ತಿಣೆಂ ಮ್ಹಳ್ಳೆಂ:

“ಹಾಂವ್ ಕಾಂಯ್ ನಸ್ರಾನಿಂಕ್ ವಿರೋಧ್ ನಹಿಂ. ಪುಣ್ ಎದೊಳ್ ತುಮ್ಚ್ಯಾ ಪಿಳ್ಗೆಕ್ ಆಸ್ರೊ ದೀವ್ನ್ ಕುಮಕ್ ಕೆಲ್ಲ್ಯಾ ಖಾತಿರ್ – ಆತಾಂ ಮ್ಹಜ್ಯಾಚ್ ರಾಜ್ವಟಾಚೆರ್ ವಿಘ್ನ್ ಯೆಂವ್ಚೆಂ ಜಾತಾನಾ, ಆನಿ ಮ್ಹಜ್ಯಾ ಖಾಸ್ಗಿ ಆಶೆಚೆಂ ಸಪಣ್‍ಯೀ ಭಗ್ನ್ ಜಾಂವ್ಚೆಂ ದಿಸ್ತಾನಾ – ತುಜ್ಯೆ ತಸಲ್ಯಾ ಎಕಾ ನಸ್ರಾನಿ ಸ್ತ್ರೀಯೆಚೆಂ ಹಟ್ ಆನಿ ಆಂದ್ಳೆಪಣ್ ಮ್ಹಾಕಾ ಆಡ್ ರಾಂವ್ಚೆಂ ನಾ!”

ವೆರೊನಿಕಾ ಉಲಂವ್ಕ್ ನಾ.

ಬೇಗಮ್ ಹಾಸ್ಲಿ. “ತುವೆಂ ಉಲಂವ್ಚಿ ಗರ್ಜ್ ನಾ” ಮ್ಹಣಾಲಿ ತಿ. “ತುಜ್ಯಾಚ್ ಬರೆಪಣಾಕ್, ಆಖ್ರೇಚೆ ಪಾವ್ಟಿಂ ಹಾಂವ್‍ಂಚ್ ಉಲಯ್ತಾಂ. ಕಿತೆಂ?”

“ಉಲಯ್” ವೆರೊನಿಕಾನ್, ಕಷ್ಟಾಂನಿ ತೊ ಸಬ್ದ್ ಉಚಾರ್ಲೊ.

“ಆಯ್ಕ್” ಮ್ಹಣಾಲಿ ಬೇಗಮ್. “ಮ್ಹಜ್ಯಾ ಬಾಪುಲ್ ಭಾವಾನ್ ಆನಿ ಹೆರ್ ಥೊಡ್ಯಾ ಸಯ್ರ್ಯಾಂನಿ ಯೋಜನ್ ಮಾಂಡುನ್ ತುಕಾ ಹಾಡ್‍ಲ್ಲೆಂ ಖರೆಂ. ತುಜೆರ್ ಆನಿ ಹೆರಾಂಚೆರ್ ಅನ್ವಾರ್ ಆಯಿಲ್ಲೆಂ ಚಿಂತುನ್ ಆನಿ ಫುಡ್ಲೊ ಚಡಿತ್ ಅಪಾಯ್ ಆಡಾಂವ್ಚ್ಯಾ ಖಾತಿರ್, ಆಮ್ಚ್ಯಾ ಖುಶೆಕ್ ತುಂ ಕಬೂಲ್ ಜಾಶಿ ಮ್ಹಣ್ ಚಿಂತುನ್, ತುಜೆರ್ ಬಲಾತ್ಕಾರ್ ಆನಿ ಜುಲುಮ್ ಚಲಂವ್ಚೆಂ ನಾಕಾ ಮ್ಹಣ್ ಫರ್ಮಾವ್ನ್, ತುಕಾ ಮ್ಹಜ್ಯಾ ತಾಬೆನ್ ಹಾಂವೆಂ ದವರ್‌ಲ್ಲೆಂ ಸತ್ ತುಂ ಜಾಣಾಂಯ್.”

“ವ್ಹಯ್.”

“ತ್ಯಾ ಇಡ್ಯಾಂತ್, ತುಮ್ಚೊ ತೊ ಸರ್ದಾರ್ ಸಿಮಾಂವ್‍ಯೀ ಹಾಂಗಾಸರ್ ಯೇಂವ್ಕ್ ಪುರೊ – ಯೇಂವ್ಕ್ ಜಾಯ್ – ಮ್ಹಳ್ಳೆಂ ಆಶೆವ್ನ್, ತವಳ್ ತವಳ್ ತಿಂ ಕಾರಣಾಂ ದೀವ್ನ್ ತುಜೆಂ ಸಂರಕ್ಷಣ್ ಹಾಂವೆಂ ಕೆಲೆಂ.”

“ಜಾವ್ಯೆತ್…”

“ಆತಾಂ ಮ್ಹಜ್ಯಾ ಬಾಪುಲ್ ಭಾವಾಚೆಂ, ಆನಿ ಮ್ಹಜೆಂಯೀ ಸೈರಣ್ ಚುಕ್ಲಾಂ. ‘ಜೆಂ ಕಿತೆಂ ಸಮಾಧಾನೆನ್ ಜಾಯ್ನಾ, ತೆಂ ಬಲಾತ್ಕಾರಾನ್ ಘೆತ್ಲ್ಯಾ ಶಿವಾಯ್ ನಿರ್ವೊಗ್ ನಾ’ ಮ್ಹಳ್ಳೆಂ ವರ್ತವ್ತಾ ಆಮ್ಚೆಂ ಧೋರಣ್ – ಕಿತೆಂ ಮ್ಹಣ್ತಾಯ್?”

“ಹಾಂವೆಂ ಮ್ಹಣ್ಚೆಂ ಕಾಂಯ್ ನಾ.”

“ಬರಾಬರ್!” ಬೇಗಮ್ ಲಾಗಿಂ ಆಯ್ಲಿ. ಭಾಂಗಾರಾಚ್ಯಾ ಆನಿ ಆರ್ಶ್ಯಾಚ್ಯಾ ಕಾಂಕ್ಣಾಂನಿ ತಶೆಂ ಸಬಾರ್ ಮುದಿಯಾಂನಿ ಜಡ್ ಆಸ್‍ಲ್ಲೊ ಆಪ್ಲೊ ಹಾತ್ ತಿಣೆಂ ಉಬ್ರಾಯ್ಲೊ.

“ಹಾಯ್!” ಮ್ಹಣಾಲಿ ವೆರೊನಿಕಾ. ಬೇಗಮೆನ್ ತಿಚ್ಯಾ ದಾವ್ಯಾ ಪೊಲ್ಯಾಚೆರ್ ಥಾಪಡ್ ಮಾರ್ನ್ ಜಾಲ್ಲೆಂ. ಹಾಯ್! ವೆರೊನಿಕಾಚ್ಯಾ ಜಿಣ್ಯೆಂತ್, ತೆಂಚ್ ಥಾಪಡ್ ಪಯ್ಲೆಂ ಜಾವ್ನಾಸ್‍ಲ್ಲೆಂ. (ಫುಡ್ಲ್ಯಾ ಘಡಿತಾಂ ವರ್ವಿಂ, ತೆಂಚ್ ಪಯ್ಲೆಂ ಆನಿ ತೆಂಚ್ ನಿಮಾಣೆಂ ಥಾಪಡ್ ಜಾಂವ್ಕ್ ಪಾವ್ಲೆಂ). ಬೇಗಮ್, ಸುಂಯ್ಪುನ್ ಫುಡೆಂ ಅಶೆಂ ಉಲಯ್ಲಿ:

“ಹೆಂ, ತುಕಾ ಯೇಂವ್ಕ್ ಆಸ್ಚ್ಯಾ ಆಮ್ಚ್ಯಾ ಸಂತೊಸಾಚೆಂ ಪಯ್ಲೆಂ ಖುಣ್! ಆನಿ ಥೊಡ್ಯಾ ಘಾಂಟ್ಯಾಂನಿ ಆಯ್ಚೊ ದೀಸ್ ಆಖೇರ್ ಜಾತಾ…” ಥೊಡೊ ವೇಳ್ ಮುಖಾರ್ ಪಾಟಿಂ ಪಾಸಾಯೊ ತಿಣೆಂ ಮಾರ್ಲ್ಯೊ. ಉಪ್ರಾಂತ್, ಚಾರ್ ಬೊಟಾಂಚಿ ತಾಂಬ್ಸಾಣ್ ಪೊಲ್ಯಾಚೆರ್ ಉದೆವ್ನ್ ತರೀ, ಥಟಕ್ ರಾವ್‍ಲ್ಲ್ಯಾ ವೆರೊನಿಕಾ ಹುಜ್ರಿಂ ರಾವೊನ್ ತಿ ಮ್ಹಣಾಲಿ:

“ಆಯ್ಚೊ ದೀಸ್ ಆಖೇರ್ ಜಾತಾ – ಆನಿ ಫಾಲ್ಯಾಂಚೊ ಏಕ್ ದೀಸ್ ಉರ್ಲಾ – ನಿಮಾಣೊ…”

ಆವಾಜ್ ದೀನಾಸ್ತಾಂ ವೆರೊನಿಕಾ ಸುಸ್ಕಾರ್ಲಿ. ಪುಣ್ ತಿ ಉಲಂವ್ಕ್ ನಾ.

“ವ್ಹಯ್, ಫಾಲ್ಯಾಂಚೊ ದೀಸ್, ತುಜ್ಯಾ ಹ್ಯಾ ಸುಖಾಚೊ ನಿಮಾಣೊ” ಮ್ಹಣಾಲಿ ಬೇಗಮ್. “ಆಮಿ ಎದೊಳ್ ಉಚಾರ್‌ಲ್ಲ್ಯಾ ಅಪೇಕ್ಷೆ ಪರ್ಮಾಣೆಂ, ಜರ್ ಫಾಲ್ಯಾಂ ಸಾಂಜೆ ಭಿತರ್ ಚಲೊಂಕ್ ತುಂ ಕಬೂಲ್ ಜಾಯ್ನಾಂಯ್ – ತರ್, ತರ್ ಆಯ್ಕ್!”

“ಆಯ್ಕತಾಂ” ಮ್ಹಣಾಲಿ ವೆರೊನಿಕಾ – ಥಂಯ್ ಥಾವ್ನ್‌ಯೀ!

“ತರ್ ಆಯ್ಕ್ ಬಹೆನ್ – ತುಂ ಪಿಶ್ಯಾಂ ನಸ್ರಾನಿಂಚ್ಯಾ ಕುಳಿಯೆಚ್ಯಾ ಸ್ತ್ರೀಯೆ!” ಮ್ಹಣಾಲಿ ಬೇಗಮ್. “ಜರ್ ಆಮ್ಚ್ಯಾ ಅಪೇಕ್ಷೆ ಪರ್ಮಾಣೆಂ ಚಲೊಂಕ್ ಫಾಲ್ಯಾಂ ಸಾಂಜೆ ಭಿತರ್ ತುಂ ಕಬೂಲ್ ಜಾಯ್ನಾಂಯ್, ತರ್, ಫಾಲ್ಯಾಂ ಸಾಂಜೆರ್, ಮ್ಹಜ್ಯಾ ಬಾಪುಲ್ ಭಾವಾಚ್ಯಾ ಹಾತಾಂತ್ ಹಾಂವ್ ತುಕಾ ಒಪ್ಸುನ್ ದಿತಾಂ.”

ವೆರೊನಿಕಾ ಪರ್ತ್ಯಾನ್ ಚಿಕ್ಕೆ ಸುಸ್ಕಾರ್ಲಿ. ಜರ್ ಸರ್ದಾರ್ ಸಿಮಾಂವ್ಚೆಂ – ತ್ಯೆಚ್ ರಾತಿಕ್ ಥಾರಾಯಿಲ್ಲೆಂ – ಯೋಜನ್ ಫಳಾಧಿಕ್ ಜಾಯ್ತ್, ತರ್, ಬೇಗಮೆನ್ ಭೆಷ್ಟಾಯಿಲ್ಲಿ ಆನಿ ಭಾಸಾಯಿಲ್ಲಿ ತಿ ಸುಕ್ರಾರಾಚಿ ರಾತ್ ತಿಕಾ ಫಾವೊ ಜಾಂವ್ಚಿ ನಾ ಮ್ಹಳ್ಳಿಂ ಚಿಂತ್ನಾಂ ತಿಚ್ಯಾ ಮತಿಂತ್ ಪಾಶಾರ್ ಜಾಲಿಂ.

“ತ್ಯಾ ಉಪ್ರಾಂತ್” ಮ್ಹಣಾಲಿ ಬೇಗಮ್. “ಮ್ಹಜೊ ಬಾಪುಲ್ ಭಾವ್ ಆನಿ ತಾಚೆ ಸಾಂಗಾತಿ, ತುಜೆ ಥಂಯ್ ತಾಂಕಾಂ ಜಾಯ್ ತಶೆಂ ಕರುಂಕ್ ಸಂಪೂರ್ಣ್ ಥರಾನ್ ಸ್ವತಂತ್ರ್ ಜಾವ್ನ್ ಆಸ್ತೆಲೆ. ಜರ್ ತುಂ ತಾಂಚ್ಯಾ ಖುಶೆಕ್ ಖುಶೆನ್ ಕಬೂಲ್ ಜಾಯ್ನಾಂಯ್, ನಹಿಂಚ್ ತುಕಾ ತೆ ಥಾಪ್ಡಾಯ್ತೆಲೆ ಆನಿ ಖೊಟಾಯ್ತೆಲೆ, ಬಗಾರ್, ಉಪ್ರಾಂತ್ ಆಯ್ಲೆಲ್ಯಾ ಕೊಣಾಯ್ಕೀ, ತುವೆಂ ಮತ್ ಬದ್ಲಿಲಾಂ ಮ್ಹಳ್ಳಿ ರುಜ್ವಾತ್ ದಿಂವ್ಚ್ಯಾ ಖಾತಿರ್, ತುಜ್ಯಾ ಕಾನಾಂಕ್, ತಾಪಯಿಲ್ಲ್ಯಾ ಲೊಂಕ್ಡಾ ಕಾಡ್ಯೆನ್ ಸಾತ್ ಸಾತ್ ಬುರಾಕ್ ಕರ್ತೆಲೆ…

“ಆನಿ ಉಪ್ರಾಂತ್ಲಿ ಗಜಾಲ್ – ತುವೆಂಚ್ ಚಿಂತುನ್ ಪಳೆವ್ಯೆತ್” ಮ್ಹಣೊನ್ ತಿ ಸ್ತ್ರೀ ಹಾಸ್ಲಿ.

ಪುಣ್ ಹೆಂ ಆಯ್ಕೊನ್, ಮಾನಿನ್ ವೆರೊನಿಕಾ ಕುವೆಲ್ ಚಡ್ ಘಡ್ಬಡೊಂಕ್ ನಾ – ಕಾರಣ್, ತಿಣೆಂ ಪಯ್ಲೆಂ ಚಿಂತ್‍ಲ್ಲೆಂಚ್ ಜಾವ್ನಾಸ್‍ಲ್ಲೆಂ. ಜಾಲ್ಯಾರೀ, ದುಸ್ಮಾನಾಂಚ್ಯಾ ಹಾತಾಂತ್ – ಪ್ರತ್ಯೇಕ್ ಜಾವ್ನ್ ತ್ಯಾ ಬಂದಡೆಚ್ಯಾ ವೆಳಾರ್ – ಸಾಂಪಡ್ಲೆಲ್ಯಾ ಕ್ರಿಸ್ತಾಂವಾಂಚಿ, ಆನಿ ಪ್ರತ್ಯೇಕ್ ಜಾವ್ನ್ ತಾಂಚ್ಯಾ ಸ್ತ್ರೀಯಾಂಚಿ ಗತ್ ಕಸಲಿ ಜಾತಾ ಮ್ಹಳ್ಳೆಂ ಪರತ್ ಮತಿಂತ್ ಯೇವ್ನ್ ತಿಣೆಂ ಏಕ್ ಶ್ವಾಸ್ ಸೊಡ್ಲೊ, ಆನಿ ತಸಲ್ಯಾ ನಿರಾಧಾರಿ ನಿರ್ಗತಿಕಾಂ ಖಾತಿರ್, ಮತಿ ಭಿತರ್‌ಚ್ ಮಾಗ್ಣೆಂ ಕೆಲೆಂ.

“ದುಸ್ರೊ ಏಕ್ ವಿಷಯ್ ಆಸಾ” ಮ್ಹಣಾಲಿ ಬೇಗಮ್. “ತುಕಾ ಹ್ಯಾ ಥೊಡ್ಯಾ ಪಾಟ್ಲ್ಯಾ ದಿಸಾಂನಿ, ರಾವ್ಳೆರಾಂತ್ಲಿ ಎಕ್ಲಿ ಚಾಕರ್ನ್ ಆಹಾರ್ ಹಾಡ್ನ್ ಯೆತಾಲಿ.”

“ವ್ಹಯ್…” ಮ್ಹಣಾಲಿ ವೆರೊನಿಕಾ, ಆತುರಾಯೆನ್.

“ತಿಯೀ ತುಜೆಪರಿಂಚ್ ಕಿರಿಸ್ತಾನ್ ಮ್ಹಳ್ಳೆಂ ತುಂ ಜಾಣಾಂಯ್?”

“ವ್ಹಯ್.”

“ಬರಾಬರ್. ತುವೆಂ ಆಮ್ಚ್ಯಾ ಅಪೇಕ್ಷೆ ಪರ್ಮಾಣೆಂ ಚಲಜಾಯ್ ಮ್ಹಣ್ ತುಜೆಂ ಮನ್ ಪುಸ್ಲಾಂವ್ಕ್ ತಿಕಾ ಹಾಂವೆಂ ಫರ್ಮಾಯಿಲ್ಲೆಂ – ತುಂ ಜಾಣಾಂಯ್‍ಮೂ?”

“ವ್ಹಯ್, ಹಾಂವ್ ಜಾಣಾಂ” ಮ್ಹಣಾಲಿ ವೆರೊನಿಕಾ, ಲ್ಹಾನ್ ಸ್ವರಾನ್.

“ತಿ, ತಿಚ್ಯಾ ಫರ್ಮಾಯಿಲ್ಲ್ಯಾ ಕಾಮಾಂತ್ ಸಲ್ವಲ್ಯಾ ಮ್ಹಳ್ಳೆಂಯೀ ಮ್ಹಾಕಾ ಕಳಿತ್ ಜಾಲಾಂ” ಮ್ಹಣಾಲಿ ಬೇಗಮ್. “ದೆಕುನ್, ಆಜ್ ರಾತಿಂ ಆನಿ ಫಾಲ್ಯಾಂ ತಿ ತುಕಾ ಆಹಾರ್ ಹಾಡುನ್ ಯೆಂವ್ಚಿ ನಾ… ಆನಿ…”

“ಆನಿ?”

“ಆನಿ, ತಿ ಆಹಾರ್ ಹಾಡುನ್ ಯೆಂವ್ಚಿ ನಾ ಮಾತ್ರ್ ನಹಿಂ – ಹೆರ್ ಕೊಣ್‍ಯೀ ತುಕಾ ಆಹಾರ್ ಹಾಡುನ್ ಯೆಂವ್ಚಿಂ ನಾಂತ್. ತಶಿ ಹಾಂವೆಂ ತಾಕಿದ್ ದಿಲ್ಯಾ.”

ವೆರೊನಿಕಾಕ್ ಭಿತರ್ಲ್ಯಾ ಭಿತರ್ ಭಿರಾಂತ್ ದಿಸ್ಲಿ. ಪುಣ್ ತಿ ಉಲಂವ್ಕ್ ನಾ. ಪಿಶ್ಯಾಂಚ್ಯಾ ಬುದಿಕ್ ಸಹಜ್ ಜಾವ್ನ್, ಕಾಂಯ್, ಆಗ್ನೆಸ್ ಸಿಸಿಲಿಯಾಕ್‍ಯೀ ಬಂದೆಚಿ ಶಿಕ್ಷಾ ಪುಣೀ ಫಾವೊ ಕೆಲ್ಯಾಗೀ ಮ್ಹಣ್ ತಿಕಾ ಬಿರಾಂತ್ ದಿಸ್ಲಿ. ಪುಣ್ ತ್ಯಾ ಸಂಬಂಧಿಂ ಸವಾಲ್ ಕರುಂಕ್ ತಿಕಾ ವಾಟ್ ನಾತ್‍ಲ್ಲಿ.

ಥೊಡ್ಯಾ ವೆಳಾನ್, ಬೇಗಮ್ ಪರ್ತ್ಯಾನ್ ಉಲಯ್ಲಿ:

“ಮ್ಹಜೆ ಸರ್ಶಿನ್ ಆಸ್ರೊ ಸೊಧುನ್ ಆಯಿಲ್ಲ್ಯಾ ಕೊಣಾಯ್ಕೀ – ಪ್ರತ್ಯೇಕ್ ಜಾವ್ನ್ ಕಿರಿಸ್ತಾನಾಂಕ್ – ಹಾಂವೆಂ ನಿರಾಸ್ ಕರುಂಕ್ ನಾ. ಪುಣ್…”

“ಪುಣ್ ಹಾಂವ್ ತುಜೆ ಲಾಗಿಂ ಆಸ್ರೊ ಸೊಧುನ್ ಯೇಂವ್ಕ್ ನಾ” ಮ್ಹಣಾಲಿ ವೆರೊನಿಕಾ, ಧೈರ್ ಘೆವ್ನ್. “ತರೀ ಮ್ಹಜೆ ಥಂಯ್ ತುಂ ಹ್ಯಾ ಥರಾನ್ ಧಾರುಣ್ ಜಾಶಿ ಮ್ಹಣ್ ಹಾಂವೆಂ ಚಿಂತುಂಕ್ ನಾ.”

“ತುಜಿ ಗಜಾಲ್ ವೆಗ್ಳಿಚ್, ಆನಿ ತೊ ಸರ್ವ್ ವಿವರ್ ತುಕಾ ಹಾಂವೆಂ ದಿಂವ್ಚಿ ಆತಾಂ ಗರ್ಜ್ ನಾ” ಮ್ಹಣಾಲಿ ಬೇಗಮ್, ಆಂಗ್ ಫಾಪುಡ್ನ್. “ಸದ್ದ್ಯಾಕ್ ಹಾಂವೆಂ ಸಾಂಗ್‍ಲ್ಲೆಂ ಉಗ್ಡಾಸ್ ದವರ್. ಫಾಲ್ಯಾಂಚಿ ಸಾಂಜ್ ಜಾತಾ ಮ್ಹಣಾಸರ್ ತುಕಾ ಪುರ್ಸತ್ ಆಸಾ. ತ್ಯಾ ವಾಯ್ದ್ಯಾ ಭಿತರ್ ತುಕಾ – ಆನಿ ಹೆರಾಂಕ್‍ಯೀ – ಜಾಯ್ತೆಂ ಬರೆಂಪುಣ್ ತುವೆಂ ಕರ್ಯೆತ್ – ನಾ ಜಾಲ್ಯಾರ್, ತುಜ್ಯಾ ಹಟಾಕ್ ಫಾವೊ ಜಾಲ್ಲೆಪರಿಂ ತುವೆಂ ಉರ್‍ಯೆತ್ ವಾ ಮರ್‍ಯೆತ್!”

ಇತ್ಲೆಂ ಉಲವ್ನ್, ಬೇಗಮ್ ಥಂಯ್ ಥಾವ್ನ್ ಭಾಯ್ರ್ ಗೆಲಿ.

ಭಾಯ್ಲೆಂ ದಾರ್ ಬಂದ್ ಜಾಲೆಂ. ಥಂಯ್ಚ್ ಆಸ್‍ಲ್ಲ್ಯಾ ರಾಕ್ವಲ್ಯಾಕ್ ‘ಹೋಶ್ಯಾರ್!’ ಮ್ಹಳ್ಳಿ ಜಾಗ್ವಣ್ ದೀವ್ನ್, ಬೇಗಮ್ ದೆಂವೊನ್ ಸಕಯ್ಲ್ ಗೆಲಿ.

ನಿಜಾಯ್ಕೀ, ಬೇಗಮೆನ್ ವೆರೊನಿಕಾ ಕುವೆಲಿ ಕಡೆನ್ ತಿತ್ಲೆಂ ಉಲಯ್ತಾನಾ, ಸರ್ದಾರ್ ಸಿಮಾಂವ್, ಭಾಯ್ಲ್ಯಾನ್‍ಂಚ್ ರಾವೊನ್ – ನಿರ್ವೊಗ್ ನಾಸ್ತಾನಾ, ಪುಣ್ ತಿತ್ಲ್ಯಾಚ್ ಆತುರಾಯೆನ್ – ಆಯ್ಕತಾಲೊ. ಬೇಗಮೆಚಿಂ ಉತ್ರಾಂ ಆಯ್ಕೊನ್ ತಾಚೆಂ ಆಂಗ್ ಶಿಜ್ತಾಲೆಂ ಆನಿ ತಾಚೆ ಹಾತ್ ಖೊರ್ಜುತಾಲೆ. ಜಾಲ್ಯಾರೀ, ತ್ಯಾಚ್ ರಾತಿಂ ತಾಣಿಂ ಥಂಯ್ ಥಾವ್ನ್ ಭಾಯ್ರ್ ವೆಚಿ ತಯಾರಾಯ್ ಕೆಲ್ಯಾ ಮ್ಹಳ್ಳೊ ಉಗ್ಡಾಸ್ ಯೇವ್ನ್ ತಾಣೆಂ ಸಮಾಧಾನ್ ಘೆತ್‍ಲ್ಲೆಂ. ನಹಿಂ ಜಾಲ್ಯಾರ್, ವೆರೊನಿಕಾಕ್ ಥಾಪಡ್ ಮಾರ್‌ಲ್ಲೊ ಆವಾಜ್ – ಪರ್ತ್ಯಾನ್ ಪುಣೀ ಆಯ್ಕಲ್ಲೊ ಜಾಲ್ಯಾರ್ – ತಾಚೆಂ ಸೈರಾಣ್ ಚುಕಯ್ತೊ, ತೊ ಭಿತರ್ ವೆತೊ, ಫರಾಮಸ್ ಜಾತಿ.

ಬೇಗಮ್ ಗೆಲ್ಲ್ಯಾ ಥೊಡ್ಯಾ ವೆಳಾನ್ ತಾಣೆಂ ಹೆವ್ಶಿನ್ ತೆವ್ಶಿನ್ ಪಳೆಲೆಂ. ಸಕಯ್ಲ್ ಥಾವ್ನ್ ಹೆರ್ ಕೊಣೀ ವಯ್ರ್ ಯೆಂವ್ಚೊ ಆವಾಜ್ ವಾ ಸೊವ್ ನಾತ್‍ಲ್ಲೊ ಪಾರ್ಕುನ್, ವೆರೊನಿಕಾ ಕುವೆಲ್ ಆಸ್‍ಲ್ಲ್ಯಾ ಕುಡಾಚೆಂ ದಾರ್, ತಾಣೆಂ ಹಾಳ್ವಾಯೆನ್ ಥಾಪುಡ್ಲೆಂ.

“ಕೊ-ಕೋಣ್?” ಭಿತರ್ ಥಾವ್ನ್.

“ಭು-ಭೂ-ಭು!”

ವೆರೊನಿಕಾನ್, ಹಾಳ್ವಾಯೆನ್ ಬಾಗಿಲ್ ಕಾಡ್ಲೆಂ. ತ್ಯಾ ವೆಳಾರ್, ದುಖಾಂ ಗಳವ್ನ್ ಆನಿ ಮಾಗ್ಣೆಂ ಕರುನ್ ತಿ ಆಸ್‍ಲ್ಲಿ.

“ಭಯ್ಣೀ, ತಿಣೆಂ ಯೇವ್ನ್, ಹಾಂಗಾಸರ್ ಉಲಯಿಲ್ಲೆಂ ಹಾಂವೆಂ ಆಯ್ಕಲೆಂ. ಪುಣ್ ಆಮ್ಚ್ಯಾ ಯೋಜನಾ ವರ್ವಿಂ ಕಾರ್ಯಾಕ್ ದೆಂವೊಂಕ್ ಥೊಡಿಂಚ್ ವೊರಾಂ ಉರ್ಲ್ಯಾಂತ್ ಮ್ಹಳ್ಳ್ಯಾ ಉಗ್ಡಾಸಾನ್…”

“ತ್ಯಾಚ್ ಉಗ್ಡಾಸಾನ್ ಮ್ಹಾಕಾಯೀ ಧಯ್ರ್ ದಿಲೆಂ” ಮ್ಹಣಾಲಿ ತಿ.

“ಹಾಂವ್ ಜಾಣಾಂ” ಮ್ಹಣಾಲೊ ತೊ. “ಆನಿ – ಆಜ್ ರಾತಿಂ ತುಕಾ ಜೆವಣ್ ಹಾಡ್ನ್ ತಿ ಚಾಕರ್ನ್ ಯೆಂವ್ಚಿ ನಾ ಮ್ಹಣ್ ಫಿಕಿರ್ ಕರಿನಾಕಾ.”

“ಜೆವಣ್ ಯೆಂವ್ಚೆಂ ನಾ ಮ್ಹಣ್ ಹಾಂವ್ ಫಿಕಿರ್ ಕರಿನಾ. ಪುಣ್ ಮ್ಹಜ್ಯಾ ರಾಗಾನ್, ಹ್ಯಾ ಪಿರ್ಕಿ ಬೇಗಮೆನ್, ತ್ಯಾ ಚಾಕರ್ನಿಚೆರ್ ಪುಣೀ ಕಾಂಯ್ ಬಂದೋಬಸ್ತ್ ಅರ್ನಿಲ್ಯಾ ಜಾಲ್ಯಾರ್, ಕಷ್ಟ್ ಜಾಲೆ ಮ್ಹಣ್ ಹಾಂವ್ ಚಿಂತಾಲಿಂ. ಕಿತ್ಯಾಕ್…”

“ಕಿತ್ಯಾಕ್?”

“ಕಿತ್ಯಾಕ್ – ಜರ್ ತಿ ಆಜ್ ರಾತಿಂ ಮಧ್ಯಾನೆರ್ ಆಮ್ಚ್ಯಾ ಬರಾಬರ್ ಹಾಂಗಾ ಥಾವ್ನ್ ಭಾಯ್ರ್ ಯೆಂವ್ಚಿ ನಾ ವಾ ಯೇಂವ್ಕ್ ಸಕ್ಚಿ ನಾ ತರ್…”

“ನಿಮಾಣ್ಯಾ ಘಡ್ಯೆ ತಸಲಿಂ ಚಿಂತ್ನಾಂ ಆಟವ್ನ್ ನಿರಾಶಿ ಜಾಯ್ನಾಕಾ” ಭುಜಯ್ಲೆಂ ತಾಣೆಂ. “ತಿಣೆಂ ಆನಿ – ತುವೆಂ ಮ್ಹಾಕಾ ಸಾಂಗ್‍ಲ್ಲೆಪರಿಂ – ತಿಚ್ಯಾ ಬಾಪಾಯ್ನ್ ಹಾಂಗಾ ಥಾವ್ನ್ ಭಾಯ್ರ್ ಯೇಂವ್ಕ್ ನಿಚೆವ್ ಕೆಲಾ ಜಾಲ್ಯಾರ್, ಮಧ್ಯಾನೆ ಆದಿಂಚ್, ಮಹಾದ್ವಾರಾ ಲಾಗಿಂ ವೊಡ್ತಾಚ್ಯಾ ಬಗ್ಲೆನ್ ತಿಂ ಆಯ್ತಿಂ ಆಸ್ತೆಲಿಂ.”

“ತಶೆಂಚ್ ಜಾಂವ್ ಮ್ಹಣ್ ಹಾಂವ್ ಮಾಗ್ತಾಂ.”

“ತಶೆಂಚ್ ಜಾತೆಲೆಂ. ತುಂ ಆತಾಂ ಥೊಡೊ ವಿಶೆವ್ ಘೆ” ಮ್ಹಣಾಲೊ ತೊ. “ಥೊಡ್ಯಾ ವೆಳಾನ್, ಹಾಂವ್ ಮ್ಹಜ್ಯಾ ಜೆವ್ಣಾಕ್ ಗೆಲ್ಲ್ಯಾ ವೆಳಾರ್, ತುಕಾ ಏಕ್ ಚಪಾತಿ ಪುಣೀ ಲಿಪವ್ನ್ ಹಾಡ್ತಾಂ.”

“ತುಕಾ ದೇವ್ ಬರೆಂ ಕರುಂ” ಮ್ಹಣಾಲಿ ತಿ. “ಪುಣ್ ಆಜ್ ಮ್ಹಾಕಾ ಭುಕ್ ನಾ. ಕಿತ್ಯಾಕ್, ಆಮ್ಚ್ಯಾ ಸರ್ವ್ ಸಾಂತಾಂ ಭಕ್ತಾಂಚ್ಯಾ ಮಜತಿನ್, ಆಯ್ಚ್ಯಾ ಮಧ್ಯಾನೆರ್, ಹ್ಯಾ ಇಂಫೆರ್ನಾಚ್ಯಾ ದಾರಾಂ ಥಾವ್ನ್ ಮೇಟ್ ಪಯ್ಸ್ ಆಮಿ ಕಾಡ್ತೆಲ್ಯಾಂವ್ ಮ್ಹಳ್ಳೆಂ ಧಯ್ರ್ ಮ್ಹಾಕಾ ಆಸಾ.”

“ತುಜೆಂ ಧಯ್ರ್ ನೀಜ್ ಜಾಂವ್” ಮ್ಹಣಾಲೊ ಸರ್ದಾರ್ ಸಿಮಾಂವ್. ಪುಣ್ ಕಸಲ್ಯಾಗೀ ಎಕಾ ಥರಾಚ್ಯಾ ಗೂಢ್ ಕಾತ್ರೆನ್ ತಾಕಾ ಚಿಮ್ಟೆ ಕಾಡ್‍ಲ್ಲೆಪರಿಂ, ತಾಣೆಂ ಅಪೇಕ್ಷಿನಾತ್‍ಲ್ಲೆಂ ಏಕ್ ಭಿಂಯಾಳ್ ಆನಿ ಹಿಂವಾಳ್ ಲ್ಹಾರ್‌ಶೆಂ ತಾಚ್ಯಾ ಮತಿಂತ್ ತಶೆಂ ಜಿವಾಂತ್ ಪಾಶಾರ್ ಜಾಲೆಂ.

ತಶೆಂ, ಥೊಡೊ ವೇಳ್ ತಿ ರಾವ್ಲಿಂ.

ಉಪ್ರಾಂತ್, ವೆರೊನಿಕಾ ಕುವೆಲಿಕ್, ದಾರ್ ಬಂದ್ ಕರ್ನ್, ಪುಣ್ ಜಾಗಿಚ್ ರಾವೊಂಕ್ ಸರ್ದಾರ್ ಸಿಮಾಂವ್ನ್ ಫರ್ಮಾಯ್ಲೆಂ:

“ಆಜ್ ರಾತಿಂ – ಮಧ್ಯಾನೆ ಉಪ್ರಾಂತ್ – ಸರ್ವ್ ಮನಿಸ್ ಆನಿ ಮೊನ್ಜಾತ್ ಸ್ವಸ್ಥ್ ಜಾಲ್ಯಾ ಉಪ್ರಾಂತ್…” ಮ್ಹಣಾಲೊ ತೊ. “ಸರ್ವ್ ಆಂಯ್ಡೆ ಥಾಂಬವ್ನ್ ಆನಿ ಗೊಂಯ್ಡೆ ಉಗಡುನ್, ಹಾಂವ್ ಹಾಂಗಾಸರ್ ಯೇವ್ನ್, ತುಜೆಂ ದಾರ್ ಖೊರ್ಪಿತಾಂ. ಪಯ್ಣಾಕ್ ಆಯ್ತಿ ಜಾವ್ನ್ ರಾವ್.”

“ಜರೂರ್ ಹಾಂವ್ ರಾವ್ತೆಲಿಂ.”

ತಶೆಂ ತಿಂ ವಿಂಗಡ್ ಜಾಲಿಂ.

ಮಾನಿನ್ ವೆರೊನಿಕಾ ಕುವೆಲ್, ತ್ಯಾ ಉರ್ಲೆಲ್ಯಾ ಥೊಡ್ಯಾ ವೊರಾಂನಿ, ನೀದ್ ಕಾಡುಂಕ್ ಸಾಧ್ಯ್ ನಾ ಮ್ಹಳ್ಳೆಂ ಜಾಣಾಂ ಜಾವ್ನ್, ಆಸ್‍ಲ್ಲ್ಯಾ ನ್ಹೆಸ್ಣಾನ್‍ಂಚ್, ಆಶಾ ನಿಶೆವ್ನ್ ಆನಿ ಮಾಗ್ಣೆಂ ಕರುನ್ ರಾವ್ಲಿ.

ರಾಕ್ವಲಿ – ಸರ್ದಾರ್ ಸಿಮಾಂವ್ – ಚುರುಕ್ ಜಾವ್ನ್ ಭಾಯ್ಲ್ಯಾನ್ ತ್ಯಾ ದಾಡ್ಡ್ಯಾ ಕದೆಲಾಚೆರ್ ಬಸೊನ್ ಉರ್ಲೊ.

ತ್ಯೊ ಘಡಿಯೊ, ಆನಿ ತಿಂ ವೊರಾಂ ಭೋವ್ ಆತುರಾಯೆಚಿಂ.

ಕಿತ್ಲೊ ವೀರ್ ಆನಿ ಶೂರ್ ಜಾಲ್ಯಾರೀ, ತ್ಯಾ ವೆಳಾರ್ ಸರ್ದಾರ್ ಸಿಮಾಂವ್ಕ್ ಎಕಾ ಥರಾಚಿ ಅಪೂರ್ವ್ ಆತುರಾಯ್ ಭೊಗ್ತಾಲಿ.

ಫುಡ್ಲ್ಯಾ ಥೊಡ್ಯಾಚ್ ವೊರಾಂನಿ, ಥಂಯ್ ಥಾವ್ನ್ ಸ್ವತಂತ್ರ್ ಜಾವ್ನ್ ಭಾಯ್ರ್ ವಚೊಂಕ್ ಆಸಾ ಮ್ಹಣ್, ಮಾನಿನ್ ವೆರೊನಿಕಾ ಕುವೆಲಿಕ್ ಕಳಿತ್ ಆಸ್‍ಲ್ಲೆಂ, ಜಾಲ್ಯಾರೀ, ತ್ಯಾ ವೊರಾಂಚಿ ಆವ್ಧಿ ಆಖೇರ್ ಜಾಂವ್ಚ್ಯಾ ಭಿತರ್, ಹೆರ್ ಕಸಲೆಂಯೀ ಅನಾಹುತ್ ವಾ ವಿಶೇಸ್ ಘಡ್ಯೆತ್ – ಘಡ್ತಿತ್ ಕೊಣ್ಣಾ – ಮ್ಹಳ್ಳಿಂ ಚಿಂತ್ನಾಂ ಜಬರ್ದಸ್ತಿಂ ತಿಕಾ ಧೊಸ್ತಾಲಿಂ.

ತೆವ್ಶಿಲ್ಯಾನ್, ಮ್ಹಾಲಿ ಮೊಯ್ದಿನೆ ಆತುರಾಯೆನ್ ಆನಿ ಆಶೆವ್ನ್ ಆಸ್‍ಲ್ಲೊ, ಆನಿ ವೊರಾಂ ಪಾಶಾರ್ ಜಾಂವ್ಕ್ ರಾಕ್ತಾಲೊ.

ರಾವ್ಳೆರಾ ಭಿತರ್ಲ್ಯಾನ್, ಚಾಕರ್ನಿಂಚ್ಯಾ ಪಂಗ್ಡಾಂತ್ ತರೀ, ಆಗ್ನೆಸ್ ಸಿಸಿಲಿಯಾ ಸ್ವತಂತ್ರ್ ಆಸ್‍ಲ್ಲಿ. ರಾತಿಂ, ರಾವ್ಳೆರಾಂತ್ ಸಕ್ಡಾಂಚೊ ವಿಹಾರ್ ಆನಿ ಆಹಾರ್ ಆಖೇರ್ ಜಾಲ್ಯಾ ಉಪ್ರಾಂತ್ – ಮಾನಿನ್ ವೆರೊನಿಕಾನ್ ತಾಕಿದ್ ದಿಲ್ಲೆಪರಿಂ – ಭಾಯ್ರ್ ನಿಕ್ಳೊನ್, ಆನಿ ಆಪ್ಲ್ಯಾ ಬಾಪಾಯ್ಕ್ (ಮಾನೆಸ್ತ್ ರಫಾಯೆಲ್ ಮಿಂಗೆಲ್ ಕಾಮ್ತಿಕ್) ಸಾಂಗಾತಾ ಘೆವ್ನ್, ವೊಡ್ತಾಂತ್ಲ್ಯಾ ಸಾವ್ಳೆಂನಿ ಝರೊನ್, ಮಹಾದ್ವಾರಾ ಕಡೆನ್ ರಾಕೊನ್ ರಾವೊಂಕ್ ಆಸಾ – ತಶೆಂ ಕರಿಜಾಯ್ – ಮ್ಹಳ್ಳಿಂ ಚಿಂತ್ನಾಂ ತಿ ಆಟಯ್ತಾಲಿ. ಪುಣ್…

ತಾಂಕಾಂ ಥಂಯ್ ಥಾವ್ನ್ ಭಾಯ್ರ್ ವ್ಹರ್ಚೊ ವೀರ್ ಕೋಣ್ ಮ್ಹಣ್ ತಿಕಾ ಕಳಿತ್ ನಾತ್‍ಲ್ಲೆಂ. ವೆರೊನಿಕಾನ್‍ಯೀ ಸಾಂಗೊಂಕ್ ನಾತ್‍ಲ್ಲೆಂ ಜಾಲ್ಲ್ಯಾನ್, ತಿಚ್ಯಾ ಮತಿಂತ್‍ಯೀ ಚಡ್ ಧಯ್ರ್‌ಶೆಂ ಭೊಗನಾತ್‍ಲ್ಲೆಂ.

ತಿಕಾಯೀ, ಹಟಾನ್ – ತ್ಯಾ (ಆದ್ಲ್ಯಾ) ಮಹಾನ್ ವೀರ್ ಸರ್ದಾರ್ ಸಿಮಾಂವ್ ಪೆದ್ರು ಪ್ರಭುಚೊ ಉಗ್ಡಾಸ್ ಯೆತಾಲೊ – ಕಾಳಿಜ್ ಫುಮಾರ್ತಾಲೆಂ. ತಕ್ಲಿ ಹುನ್ ಜಾತಾಲಿ, ಆನಿ ದೊಳೆ ಹುಲ್ಪತಾಲೆ. ಫಕತ್, ವೆರೊನಿಕಾನ್ ಸಾಂಗ್‍ಲ್ಲ್ಯಾ ಖಾತಿರ್ ಮಾತ್ರ್ – ತಶೆಂ ರಾತಿಂ ಥಂಯ್ ಥಾವ್ನ್ ಪಾಶಾರ್ ಜಾಂವ್ಚ್ಯಾ ಯೋಜನಾಕ್ – ತಿಣೆಂ ಸಹಿ ದಿಲ್ಲಿ. ಪುಣ್, ನಿಜಾಯ್ಕೀ, ಸರ್ದಾರ್ ಸಿಮಾಂವ್ ಕಣ್ಣಾನೂರಾಕ್ ಯೆಂವ್ಚೊ ಆಸಾ ವ್ಹಯ್ ಜಾಲ್ಯಾರ್ – ತಸಲ್ಯಾ ವಿಚಿತ್ರ್ ವೆಳಾರ್ – ಆಪ್ಣಾಚಿ ಕೂಡ್, ಅತ್ಮೊ ಆನಿ ಅಸ್ತಿತ್ವ್‌ಯೀ ಥಂಯ್ಚ್ ಉರಂವ್ಕ್ ತಿಚೆಂ ಧ್ಯಾನ್, ಮನ್ ಆನಿ ಅಂತಸ್ಕರ್ನ್ ಅತ್ರೆಗ್ತಾಲೆಂ.

ತ್ಯಾ ಘಡಿಯೆಂನಿ, ಫುಡ್ಲಿಂ ಥೊಡಿಂ ವೊರಾಂ ರಾಕೊನ್, ತಿಯೀ ವೀರ್ ಕುಂವರ್ನ್, ಭಿತರ್ಲ್ಯಾ ಭಿತರ್ ಆತುರಾಯೆನ್ ಚಡ್ಪಡ್ತಾಲಿ.

ರಾತಿಂಚೊ ಪಯ್ಲೊ ಜಾವ್ ಆಖೇರ್ ಜಾಲೊ.

ತ್ಯಾ ರಾತಿಂ, ಥಂಯ್ ಥಾವ್ನ್ ಸ್ವತಂತ್ರ್ ಜಾಂವ್ಕ್, ವಾ, ಪೊಳಾಪಳ್ ಘೆಂವ್ಕ್ ಬಾಧ್ಯ್ ಆಸ್‍ಲ್ಲ್ಯಾ ಕೊಣಾಯ್ಕೀ – ಸರ್ದಾರ್ ಸಿಮಾಂವ್ಕ್, ಮ್ಹಾಲಿ ಮೊಯ್ದಿನೆಕ್, ಮಹಾದ್ವಾರಾಚೊ ರಾಕ್ವಲಿ ತಾಚೊ ಮಿತ್ರ್ ಹುಸ್ಸೇನಾಕ್, ಹೆಣೆಂ ಮಾನಿನ್ ವೆರೊನಿಕಾ ಕುವೆಲಿಕ್, ‘ಚಾಕರ್ನ್’ ಆಗ್ನೆಸ್ ಸಿಸಿಲಿಯಾಕ್ – ದೆಕುನ್ ತಿಯಾ ಬಾಪಾಯ್ಕ್ – ಹಾಂಕಾಂ ನೀದ್ ನಾತ್‍ಲ್ಲಿ.

ಕಶೆಂ ಆಸ್ಲ್ಯಾರೀ, ಸರ್ವಾಂ ಪ್ರಾಸ್ ಸಹಜ್ ಆನಿ ಯಥೇಷ್ಟ್ ಥರಾನ್, ನೀದ್ ಯೇನಾಸ್ತಾಂ, ಚಿಂತ್ನಾಂಚ್ಯಾ ಗೊಂದೊಳಾಂತ್ ಆನಿ ಫುಡ್ಲ್ಯಾ ಕಾಮಾಂಚ್ಯಾ ಆತುರಾಯೆನ್ ಸುಡ್ಸುಡಿತ್ ಆನಿ ಚೂಡಿತ್ ಜಾವ್ನಾಸ್‍ಲ್ಲೊ – ರಾಕ್ವಲಿ ಸುಫೆದಾರ್ ಭು-ಭೂ, ಯಾನೆ, ಫತಹ್ ಫತಹ್ ಪೈಗಂಬರ್ ಬಾದಶಹಾ ಟಿಪ್ಪು ಸುಲ್ತಾನ್ ಮನ್ಸೂರ್ ಆಲಿ ಖಾನಾಚೊ ಖಾಸ್ಗಿ ಮಿತ್ರ್ ಆನಿ ಪ್ರತಿನಿಧಿ – ಸರ್ದಾರ್ ಸಿಮಾಂವ್.

ರಾತಿಂಚ್ಯಾ ಧಾ ವೊರಾಂಚಿ ಥಾಲ್ ವ್ಹಾಜ್ಲಿ. ತ್ಯಾ ತೆಕಿತ್, ಘಡಾಚ್ಯಾ ಪಾಗೊರಾಚೆರ್, ಚಾರ್ ದಿಕ್ಕಾಂನಿ ಆಸ್‍ಲ್ಲ್ಯಾ ರಾಕ್ವಲ್ಯಾಂಚ್ಯಾ ಜಾಗ್ವಣೆಚಿ ಪ್ರತಿಧ್ವನಿಯೀ ಆಯ್ಕಲಿ.

ತ್ಯಾ ಇಡ್ಯಾಂತ್…

ಪಯ್ಸ್ ಥಾವ್ನ್ ಘೊಡೊ ಧಾಂವೊನ್ ಯೆಂವ್ಚೊ ಆವಾಜ್, ಸರ್ದಾರ್ ಸಿಮಾಂವ್ಚ್ಯಾ ಸೂಕ್ಷ್ಮ್ ಕಾನಾಂಕ್ ಆಯ್ಕಲೊ.

ತಸೊ, ತೊ ಆವಾಜ್, ಚಡ್ ಬಳಾಧಿಕ್ ಜಾವ್ನ್, ಘಡಾಚ್ಯಾ ಮಹಾದ್ವಾರಾ ಲಾಗಿಂ ಆಯ್ಲೊ… ರಾಕ್ವಲ್ಯಾನ್ ಆವಾಜ್ ದಿಲೊ… ಪ್ರತಿ ಜಾಪ್ ಮೆಳ್ಳಿ… ಸಾಂಕ್ಳಿಂಚೊ, ಗಾಂಚಾಂಚೊ ಆನಿ ರಾಟ್ಯಾಚೊ ಆವಾಜ್ ಜಾಲೊ… ದೆಂವಯಿಲ್ಲೊ ಸೇತ್ವೊ ಉತ್ರಲ್ಲಿಂ ಆನಿ ಭಿತರ್ ಆಯಿಲ್ಲಿಂ ಗೆಳಾಂ ಆಯ್ಕಲಿಂ!

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel