ಇಂಫೆರ್ನಾಚಿಂ ದಾರಾಂ – 22: ಸುಫೆದಾರ್ ಭು-ಭು!

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 22
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 22: ಸುಫೆದಾರ್ ಭು-ಭು!

ವ್ಹಯ್. ಮನಿಸ್‍ಯೀ ನಹಿಂ, ಮೊನ್ಜಾತ್‍ಯೀ ನಹಿಂ ಮ್ಹಳ್ಳ್ಯಾ ಜಿನ್ಸಾರ್ ದಿಸ್ಚ್ಯಾ ತ್ಯಾ ವ್ಯಕ್ತಿಕ್ ಪಳೆವ್ನ್, ಬೇಗಮೆನ್ ಪಿಶಿ ಜಾಂವ್ಕ್ ಕಾರಣಾಂ ಆಸ್‍ಲ್ಲಿಂ.

ತ್ಯಾಚ್ ದಿಸಾ, ಸಾಂಜೆರ್, ಬೇಗಮೆಚ್ಯಾ ರಜೆನ್, ಮಾನಿನ್ ವೆರೊನಿಕಾ ಕುವೆಲ್, ರಾವ್ಳೆರಾಚ್ಯಾ ವೊಡ್ತಾಂತ್ ಭೊಂವೊಂಕ್ ಗೆಲ್ಲಿ. ಥಂಯ್ಸರ್ ಥೊಡೊ ವೇಳ್ ಪಾಶಾರ್ ಜಾತಚ್, ವೊಡ್ತಾಕ್ ಉದಾಕ್ ಘಾಲ್ಚ್ಯಾ ಮ್ಹಾಲಿ ಕಡೆನ್ ಗಜಾಲಿ ತಿಣೆಂ ಪ್ರಾರಂಭ್ ಕೆಲ್ಲ್ಯೊ. ಹೆಂ ಪಯ್ಸ್ ಥಾವ್ನ್ ಕೊಣೆಂಗೀ ಪಳೆವ್ನ್ ಫಕೀರ್ ಮಹಮ್ಮದಾಕ್ ಖಬರ್ ದಿಲ್ಲಿ.

ಆಯ್ಕೊನ್ ಫಕೀರ್ ಮಹಮ್ಮದ್ ದುಬಾವ್ಲೊ. ಪಯ್ಸ್ ಆಡೊಸಾಕ್ ರಾವೊನ್ ತೊಯೀ ಪಳೆಂವ್ಕ್ ಪಡ್ಲೊ. ಥೊಡ್ಯಾ ವೆಳಾನ್, ಮಾನಿನ್ ವೆರೊನಿಕಾ ಕುವೆಲಿನ್ ಆಪ್ಲ್ಯಾ ಹಾತಾಚ್ಯಾ ಬೊಟಾಚಿ ಏಕ್ ಮುದಿ ಕಾಡ್ಲಿ, ಆನಿ ಪಾಟಿಂ ಫುಡೆಂ ಪಳೆವ್ನ್ ಮ್ಹಾಲ್ಯಾಕ್ ಪಾಶಾರ್ ಕೆಲಿ.

ಥೊಡ್ಯಾ ವೆಳಾನ್ ಮಾನಿನ್ ವೆರೊನಿಕಾ ಕುವೆಲ್ ರಾವ್ಳೆರಾಕ್ ಪಾಟಿಂ ಆಯ್ಲಿ, ಆನಿ ಆಪ್ಲ್ಯಾ ಕುಡಾಕ್ ವಚೊನ್, ಬಾಗಿಲ್ ಬಂದ್ ಕರ್ನ್ ಭಿತರ್ ರಾವ್ಲಿ.

ಖಬರ್ ಬೇಗಮೆಕ್ ಪಾವ್ಲಿ.

ಫುಡ್ಲ್ಯಾ ಥೊಡ್ಯಾ ಘಡಿಯಾಂ ಭಿತರ್ ಎಕಾ ಶಿಪಾಯಾನ್ ಮ್ಹಾಲ್ಯಾಕ್ ಬೇಗಮೆಚ್ಯಾ ಮುಖಾರ್ ಹಾಡ್ಲೊ. ಫಕೀರ್ ಮಹಮ್ಮದ್ ಆನಿ ಹೆರ್ ಥೊಡೆ ಜಣ್ ಹಾಜರ್ ಆಸೊನ್ ಮ್ಹಾಲ್ಯಾಚೊ ವಿಚಾರ್ ಜಾಲೊ.

ಏಕ್‍ಯೀ ನೆಣಾಂಸ್‍ಲ್ಲೆಪರಿಂ ಮ್ಹಾಲಿ ತೋಂಡ್ ಸೊಡಿನಾ ಜಾಲೊ.

ಪುಸ್ಲಾವ್ಣೆಂ ಆನಿ ಭೆಷ್ಟಾವ್ಣೆಂ ವ್ಯರ್ಥ್ ಜಾತಚ್, ಚಾಬ್ಕಾಂಚೆ ಮಾರ್ ಪಡೊನ್ ಮ್ಹಾಲ್ಯಾಚಿ ಪಾಟ್ ಫುಟ್ಲಿ. ಅರ್ಧೊ ಜೀವ್ ಜಾತಚ್ ತಾಣೆಂ ತೋಂಡ್ ಸೊಡ್ಲೆಂ. ತಾಚ್ಯಾ ಆಂಗಾರ್ ತಾಣೆಂ ಲಿಪಯಿಲ್ಲಿ, ವೆರೊನಿಕಾ ಕುವೆಲಿಚಿ ಮುದಿ ತಾಂಚ್ಯಾ ಝಳ್ಕೆಕ್ ಪಡೊನ್, ಚಡಿತ್ ರುಜ್ವಾತ್ ಮೆಳ್ಳಿ.

ತಾಚ್ಯಾ ಪಾಟಿರ್ ಚಾಬ್ಕಾಚೊ ಆನ್ಯೇಕ್ ಮಾರ್ ಪಡ್ಲೊ. ಕಿಂಕ್ರಾಟ್ ದೀವ್ನ್, ಉಬೊ ರಾವೊಂಕ್ ತ್ರಾಣ್ ನಾಸ್ತಾಂ, ಮ್ಹಾಲಿ ಧರ್ಣಿರ್ ವೊಮ್ತೊ ಪಡ್ಲೊ.

“ಆತಾಂ ಸಾಂಗ್!”

“ಬೇಗಮ್ ಸಾಹಿಬಾ, ಮಾಫ್ ಕರ್..!”

“ಸಾಂಗ್ ವೆಗಿಂ – ನಾ ಜಾಲ್ಯಾರ್, ತುಜ್ಯಾ ಆಂಗಾಂತ್ಲೆಂ ಹರ್ಯೆಕ್ ಹಾಡ್ ಪಿಟೊ ಕರುನ್ ತುಕಾ ಉಮ್ಕಳಾಂವ್ಕ್ ಫರ್ಮಾಯ್ತಾಂ!”

ಹ್ಯಾ ದೃಶ್ಯಾಕ್, ಮಾನಿನ್ ವೆರೊನಿಕಾ ಕುವೆಲ್‍ಯೀ ಸಾಕ್ಸ್ ಜಾವ್ನಾಸ್‍ಲ್ಲಿ. ಫುಡೆಂ ತಿಚ್ಯಾನ್ ಸೊಸುಂಕ್ ಜಾಲೆಂ ನಾ.

“ಬೇಗಮ್ ಸಾಹಿಬಾ” ಮ್ಹಣಾಲಿ ತಿ, ಬೇಗಮೆ ಕಡೆನ್ ಉಪ್ಕಾರ್ ಮಾಗೊನ್. “ತ್ಯಾ ಮನ್ಶ್ಯಾಚಿ ಕಾಂಯ್ ಚೂಕ್ ನಾ.”

“ಚೂಕ್ ನಾ? ಕಿತೆಂ ಆಮಿ ಆಯ್ಕತಾಂವ್?” ಮ್ಹಣಾಲಿ ಬೇಗಮ್, ಅಜ್ಯಾಪ್ ಪಾವ್‍ಲ್ಲೆಂ ಅಭಿನಯನ್ ದಾಕವ್ನ್.

“ವ್ಹಯ್ – ತ್ಯಾ ಮನ್ಶ್ಯಾಚಿ ಚೂಕ್ ನಾ.”

“ತರ್, ಚೂಕ್ ಕೊಣಾಚಿ?”

“ಚೂಕ್ ಮ್ಹಜಿ – ಹಾಂವೆಂ ತಾಕಾ ತಿ ಮುದಿ ದಿಲ್ಲಿ.”

ಹೆಂ ಆಯ್ಕೊನ್, ಫಕೀರ್ ಮಹಮ್ಮದ್ ಗರ್ಜೆ ಶಿವಾಯ್ ಹಾಸ್ಲೊ.

“ಹಾಂಗಾಸರ್ ತಾರಿಪ್ ಕಸಲಿ ಆಶಾ?” ಬೇಗಮೆನ್ ಆನಿಕೀ ಗರಮ್ ಜಾವ್ನ್ ವಿಚಾರ್ಲೆಂ.

“ತಾರಿಪ್ ಇತ್ಲಿಚ್” ಮ್ಹಣಾಲೊ ತೊ ಚೆಡಿಯಾಳೊ. “ಆಮಿ, ಮಹಂತನಿ ಮನಿಸ್, ಮರ್ಯಾದಿನ್ ಹ್ಯಾ ಸ್ತ್ರೀಯೆಕ್ ಲಗ್ನಾಚೊ ಅವ್ಕಾಸ್ ದಿತಾನಾ ತಿ ಪರ್ವಾ ಕರಿನಾ. ಪುಣ್, ಚೊರ‍್ಯೆಂ ತ್ಯಾ ಮ್ಹಾತಾರ‍್ಯಾ ಮ್ಹಾಲ್ಯಾಕ್ ಮುದಿ ತಿ ದಿತಾ! ಹ್ಹೆ-ಹ್ಹೆ!”

ಫಕೀರ್ ಮಹಮ್ಮದಾಚೊ ಅಶ್ಲೀಲ್ ಮನೋಭಾವ್ ಸಮ್ಜೊನ್ ಮಾನಿನ್ ವೆರೊನಿಕಾ ಕುವೆಲ್ ಲಜ್ಲಿ ಆನಿ ಥಂಡ್ ರಾವ್ಲಿ.

“ತರ್ ಆತಾಂ ತುಂ ಉಲಯ್!” ಮ್ಹಣಾಲಿ ಬೇಗಮ್, ವೆರೊನಿಕಾಕ್ ಪಳೆವ್ನ್. “ತುವೆಂ ಹ್ಯಾ ಸೂಅರಾಕ್ ಮುದಿ ದಿಲ್ಲೆಂ ಕಾರಣ್ ಕಸಲೆಂ ಜಾವ್ಯೆತ್?”

ವೆರೊನಿಕಾ ಉಲಂವ್ಕ್ ನಾ.

“ತರ್ ತುಜೆಂ ತೋಂಡ್ ಸೊಡಂವ್ಕ್…”

“ನಾಕಾ” ಮ್ಹಣಾಲೊ ಫಕೀರ್ ಮಹಮ್ಮದ್ ನಂಜ್ಯಾಳೆಂ ಹಾಸೊನ್. “ಸದ್ದ್ಯಾಕ್ ಪುಣೀ, ಚಾಬ್ಕಾಂಚ್ಯಾ ಮಾರಾಂನಿ ತಿಚೆಂ ಸೊನೆರಿ ಕೋಮಲಾಂಗ್ ವಿದ್ರೂಪ್ ಕರ್ಚೆಂ ನಾಕಾ.”

“ಹಾಂವ್ ಸಾಂಗ್ತಾಂ” ಮ್ಹಣಾಲಿ ವೆರೊನಿಕಾ ಕುವೆಲ್. “ಹ್ಯಾ ರಾವ್ಳೆರಾಚ್ಯಾ ಆನಿ ಖಿಲ್ಲೆಚ್ಯಾ ಬಂದೋಬಸ್ತೆ ಥಾವ್ನ್ ಭಾಯ್ರ್ ವಚೊಂಕ್ ಮ್ಹಾಕಾ ಕುಮಕ್ ಕರಿಜಾಯ್ ಮ್ಹಣ್ ಹ್ಯಾ ಬಿರ್ಮತ್ ಮನ್ಶ್ಯಾ ಕಡೆನ್ ಹಾಂವೆಂ ಉಪ್ಕಾರ್ ಮಾಗ್‍ಲ್ಲೊ.”

“ಆನಿ ತಸಲಿ ಕುಮಕ್ ಕರುಂಕ್ ತೊ ಕಬೂಲ್ ಜಾಲೊ ನಹಿಂ! ತರ್, ತಾಚಿ ತಕ್ಲಿ ಕಾಪುನ್ ತುಜ್ಯಾ ಹಾತಾಂತ್ ದಿವಯ್ತಾಂ.”

“ಮಾಫ್ ಕರ್ ಬೇಗಮ್ ಸಾಹಿಬಾ” ಮ್ಹಣಾಲಿ ವೆರೊನಿಕಾ. “ಮ್ಹಾಕಾ ಜಾಲ್ಯಾರ್ ಶಿಕ್ಷಾ ಲಾಯ್ – ತ್ಯಾ ಗರೀಬ್ ಮನ್ಶ್ಯಾಚೊ ಜೀವ್ ಪುಣೀ ವಾಂಚಯ್.”

“ತಾಕಾ ಫಾಶಿ ದೀಂವ್ಕ್ ಚಡ್ ಕಷ್ಟ್ ನಾಂತ್. ಪುಣ್ ಆಮ್ಕಾಂ ಹ್ಯಾ ದಿಸಾಂನಿ ಜಣ್ ಉಣೆಂ ಪಡ್ಲ್ಯಾತ್” ಮ್ಹಣಾಲಿ ಜಹನಾರಾ. “ವ್ಹರಾ ತಾಕಾ ತೆವ್ಶಿನ್, ಆನಿ ತೀನ್ ದೀಸ್ ತುರಂಗಾಂತ್ ದವರಾ. ಜೀವ್ ವಾಂಚಂವ್ಚ್ಯಾ ಖಾತಿರ್ ಉದಾಕ್ ಮಾತ್ರ್ ದಿಲ್ಯಾರ್ ಪುರೊ.”

ಅರ್ಧುಕುರೊ ಜಾಲ್ಲ್ಯಾ ಮ್ಹಾಲ್ಯಾಕ್, ದೋಗ್ ಶಿಪಾಯ್ ವ್ಹಾವವ್ನ್ ತೆವ್ಶಿನ್ ವ್ಹರ್ನ್ ಗೆಲೆ.

ತಾಕಾ ತೆವ್ಶಿನ್ ವ್ಹೆಲ್ಯಾ ಉಪ್ರಾಂತ್ ಥೊಡೊ ವೇಳ್, ಬೇಗಮ್ ಜಹನಾರಾ ವೆರೊನಿಕಾ ಕುವೆಲಿಕ್ ಪಳೆವ್ನ್ ರಾವ್ಲಿ.

“ಹಾಂವೆಂ ತುಜೆರ್ ದಯಾಳಾಯೆಚಿಂ ಚಿಂತ್ನಾಂ ವ್ಯರ್ಥ್ ಕೆಲಿಂ” ಮ್ಹಣಾಲಿ ತಿ ಉಪ್ರಾಂತ್. “ಉಪ್ಕಾರಾಕ್ ಪ್ರತ್ಯುಪ್ಕಾರ್ ದಾಕಂವ್ಚ್ಯಾ ಬದ್ಲಾಕ್, ಮ್ಹಜ್ಯಾಚ್ ಚಾಕ್ರಾಂಕ್ ಲೊಂಚ್ ದೀವ್ನ್, ಪರಾರಿ ಜಾಂವ್ಕ್ ತುವೆಂ ಚಿಂತ್ಲೆಂಯ್. ಆತಾಂ ಸಾಂಗ್ – ಕಿತೆಂ ತುಕಾ ಜಾಯ್?”

“ಮ್ಹಾಕಾ ಹ್ಯಾ ಇಂಫೆರ್ನಾ ಥಾವ್ನ್, ಜಾತಾ ತಿತ್ಲ್ಯಾ ವೆಗಿಂ ಪಾಟಿಂ ವಚೊಂಕ್ ಜಾಯ್.”

“ತರ್, ಆಮ್ಚ್ಯಾ ಖುಶೆಕ್ ಕಬೂಲ್ ಜಾಂವ್ಕ್ ತುಕಾ ಖುಶಿ ನಾ?”

“ಬಿಲ್ಕುಲ್ ನಾ” ಮ್ಹಣಾಲಿ ವೆರೊನಿಕಾ, ಭ್ಯೆಂ ಲಿಪವ್ನ್.

“ಆಮ್ಕಾಂ ಮನ್ ಜಾಲ್ಯಾರ್ ಕೊಣಾಯ್ಕೀ – ಪ್ರತ್ಯೇಕ್ ಜಾವ್ನ್ ಸ್ತ್ರೀಯಾಂಕ್ – ಆಮ್ಚ್ಯಾ ಖುಶೆಕ್ ಬಾಗಾವ್ನ್ ಗುಲಾಮ್ ಕರುಂಕ್ ಆಮ್ಕಾಂ ತಾಂಕ್ ಆಸಾ ಮ್ಹಣ್ ತುಂ ಪಾತ್ಯೆನಾಂಯ್ ಮ್ಹಣ್ ದಿಸ್ತಾ.”

ವೆರೊನಿಕಾನ್ ಜಾಪ್ ಕರುಂಕ್ ನಾ.

“ಭೆಷ್ಟೆಂಚ್ ಉಲವ್ನ್ ವೇಳ್ ಕಿತ್ಯಾಕ್ ಪಾಡ್ ಕರ್ಚೊ ಬಹೆನ್?” ಮ್ಹಣಾಲೊ ಫಕೀರ್ ಮಹಮ್ಮದ್. “ತಿಕಾ ಆತಾಂಚ್ ಮ್ಹಜ್ಯಾ ತಾಬೆನ್ ದೀ. ಖುಶೆನ್ ತಿ ಬಾಗ್ವನಾ ಜಾಲ್ಯಾರ್…”

“ಹಾಂವ್ ಜಾಣಾಂ” ಹಾಸ್ಲಿ ಜಹನಾರಾ. “ಖುಶೆನ್ ತಿ ಬಾಗ್ವನಾ ಜಾಲ್ಯಾರ್, ತಿಚ್ಯಾ ಕಾನಾಂಕ್ ಚವ್ದಾ ಬುರಾಕ್ ಕರ್ನ್, ಹಕ್ಕಾಚಿ ನಹಿಂ ಜಾಲ್ಯಾರೀ, ರಖೇಲಿ ಪತಿಣ್ ಕರ್ನ್ ದವರುಂಕ್ ತುಂ ಆಶೆತಾಯ್. ತುಜಿ ಆಶಾ ಜಾರಿ ಕರುಂಕ್ ಮ್ಹಜಿ ಚಡ್ ಅಡ್ಕಳ್ ನಾ. ಪುಣ್ ಟಿಪ್ಪುಚೆ ಶಿಪಾಯ್ ಯೆತಿತ್ ಜಾಲ್ಯಾರ್ – ಪ್ರತ್ಯೇಕ್ ಕರ್ನ್ ತೊ ಸರ್ದಾರ್ ಸಿಮಾಂವ್ ಯೇತ್ ಜಾಲ್ಯಾರ್ – ಮ್ಹಜೆಂ ಯೋಜನ್ ದುಸ್ರೆಂಚ್ ಆಸಾ.”

“ಕಸಲೆಂ ಯೋಜನ್?”

“ಶಿಪಾಯಾಂನಿ ಭಾಯ್ರ್ ರಾವ್ಲ್ಯಾರ್, ಸರ್ದಾರ್ ಸಿಮಾಂವ್ಕ್ ಹಾಂವ್ ರಾವ್ಳೆರಾಂತ್ ಪ್ರವೇಶ್ ದಿತಾಂ ಆನಿ ತಾಕಾ ಪಾರ್ಕಿತಾಂ. ಮ್ಹಜೊ ಮೋಗ್ ಆನಿ ಇಷ್ಟಾಗಾತ್ ಸ್ವೀಕಾರ್ ಕರ್ನ್ ಗಪ್‍ಚಿಪ್ ತೊ ರಾವತ್ ಜಾಲ್ಯಾರ್, ಹ್ಯಾ ಸ್ತ್ರೀಯೆಕ್ ಹಾಂವ್ ಸುಟ್ಕಾ ದಿತಾಂ. ತೆದಾಳಾ ತುವೆಂಯೀ ಬಚಾವ್ ಜಾವ್ಯೆತ್.”

“ತುಂ ಉಜ್ಯಾ ಕಡೆನ್ ಖೆಳೊಂಕ್ ಚಿಂತಾಯ್!” ಮ್ಹಣಾಲೊ ಫಕೀರ್ ಮಹಮ್ಮದ್. “ತ್ಯಾ ಸಯ್ತಾನ್ ಸಿಮಾಂವ್ಕ್ ತುಂ ವಳ್ಕನಾಂಯ್!”

“ಆಯ್ಕೊನ್ ವಳ್ಕತಾಂ – ಆತಾಂ ಖುದ್ ವಳ್ಕೊಂಕ್ ಅಪೇಕ್ಷಿತಾಂ. ಜರ್ ಹಾಂಗಾಸರ್ ಪರ್ಯಾಂತ್ ಯೇವ್ನ್ ಮ್ಹಜ್ಯಾ ಆಶೆಕ್ ಆನಿ ಖುಶೆಕ್ ತೊ ಉಂಡಿ ಜಾಯ್ನಾ, ತರ್, ಹಿ ಸ್ತ್ರೀ ಪುಣೀ ಪಾಟಿಂ ವಚತ್, ಪುಣ್ ತೊ, ಜೀವ್ ಘೆವ್ನ್ ಪಾಟಿಂ ವಚಚೊ ನಾ.”

ಹೆಂ ಆಯ್ಕೊನ್ ವೆರೊನಿಕಾಚೆಂ ಆಂಗ್ ಶಿರ್ಶಿರ್ಲೆಂ. ಆಪುಣ್ ಮೆಲ್ಯಾರ್ ಪುಣೀ ಪರ್ವಾ ನಾ – ಪುಣ್ ಸರ್ದಾರ್ ಸಿಮಾಂವ್ನ್ ಅಸಲ್ಯಾ ಇಂಫೆರ್ನಾಕ್ ಯೇವ್ನ್ ಸಾಂಪಡ್ಚೆಂ ಬರೆಂ ನಹಿಂ ಮ್ಹಣ್ ತಿಕಾ ಭೊಗ್ಲೆಂ.

“ತುಂ ಸಪ್ಣೆತಾಯ್ ಬಹೆನ್?” ಮ್ಹಣಾಲೊ ಫಕೀರ್ ಮಹಮ್ಮದ್, ಬೇಗಮೆ ಕಡೆನ್. “ಇತ್ಲೆಂ ಸರ್ವ್ ಘಡ್ಲ್ಯಾ ಉಪ್ರಾಂತ್ ಆನಿ ಇತ್ತುನ್ ಪಾವ್ಲ್ಯಾ ಉಪ್ರಾಂತ್, ಹ್ಯಾ ಸ್ತ್ರೀಯೆಕ್ ಸೊಡುಂಕ್ ಹಾಂವ್ ಬಿಲ್ಕುಲ್ ಕಬೂಲ್ ನಾ.”

“ತಿ ತುಜಿ ಮರ್ಜಿ – ತಾಂತಾಂಕಾಂ ತಾಂಚಿ ತಾಂಚಿ ಮರ್ಜಿ!”

“ಬರಾಬರ್. ಎಕಾದಾವೆಳಾ, ಸರ್ದಾರ್ ಸಿಮಾಂವ್ ಯೇನಾಸ್ತಾಂ ಹೆರ್‌ಚ್ ಕೊಣೀ ಯೆತಿತ್ ಜಾಲ್ಯಾರ್?”

“ತರ್, ತೆ ಖಂದಕ್ ಉತ್ರೊನ್ ಹ್ಯಾ ರಾವ್ಳೆರಾಚ್ಯಾ ವಠಾರಾಕ್ ಪ್ರವೇಶ್ ಜಾಂವ್ಚೆ ನಾಂತ್. ತ್ಯಾಚ್ ಭದ್ರತೆ ಖಾತಿರ್, ನವ್ಯಾ ಜಣಾಂಕ್ ಭರ್ತಿ ಕರುಂಕ್ ಆಮಿ ಹುಕುಮ್ ದಿಲ್ಯಾ.”

“ಆನಿ ತೆದಾಳಾ…”

“ಆನಿ ತೆದಾಳಾ, ಜಾಯ್ ತಶೆಂ ಕರುಂಕ್ ಹಿ ಸ್ತ್ರೀ ತುಜಿಚ್.”

“ಆತಾಂ ಜಾಲ್ಯಾರ್ ತುಂ ಮ್ಹಜಿಚ್ ಬಹೆನ್” ಫಕೀರಾನ್ ಮಿಟಿಯೊ ಮಾರ್ಲ್ಯೊ. “ತರ್ ಹಿಚಿ ಚಡ್ ಚತ್ರಾಯೆನ್ ಪಹರಜ್ ಕರಿಜಾಯ್.”

“ವ್ಹಯ್” ಒಪ್ಲಿ ಬೇಗಮ್. “ತಿಚ್ಯಾ ಕುಡಾ ಭಾಯ್ಲ್ಯಾನ್ ಬಂದೋಬಸ್ತೆಚೊ ಪಹರೊ ದವರುಂಕ್ ಜಾಯ್. ತಿಣೆಂ ಭಾಯ್ರ್ ವೊಡ್ತಾಂತ್ ಭೊಂವೊಂಕ್ ವೆತಾನಾಂಯೀ, ರಾಕ್ವಲ್ಯಾನ್ ಸಾಂಗಾತಾ – ಚಿಕ್ಕೆ ಪಾಟ್ಲ್ಯಾನ್ ರಾವೊನ್ ದೊಳೊ ದವರಿಜಾಯ್.”

“ಹಾಂವ್‍ಂಚ್ ಪಹರಜ್ ಕರ್ತಾಂ” ಮ್ಹಣಾಲೊ ಫಕೀರ್ ಮಹಮ್ಮದ್ ಆಶೆನ್ ಆತುರಾಯ್ ಉಚಾರ್ನ್.

“ತುಂ ನಾಕಾ” ಮ್ಹಣಾಲಿ ಬೇಗಮ್. “ತಿಚ್ಯಾ ಬಾಗ್ಲಾ ಭಾಯ್ಲ್ಯಾನ್ ದೀಸ್ ರಾತ್ ತುಂ ರಾವ್ಶಿ ಜಾಲ್ಯಾರ್, ತುಜೆಂ ಸಂಯಮ್ ಚುಕತ್ ಆನಿ ತುಜಿ ಲಾಲಸ್ ಜಿಕತ್. ವಾ ತಿಚ್ಯಾ ಸಾಂಗಾತಾ ಭಾಯ್ರ್ ತುಂ ಭೊಂವ್ಶಿ… ಕೋಣ್ ಜಾಣಾಂ – ಸುಟ್ಕಾ ಲಾಭಂವ್ಚಿ ಆಸ್ ದಾಕವ್ನ್ ತಿಕಾ ಉಕ್ಲುನ್ ತುಂ ಧಾಂವ್ಶಿ!”

“ತರ್ ಕೊಣಾಕ್ ರಾವಯ್ತಾಯ್?”

“ಪಳೆಯಾಂ – ರಾತ್ ಜಾಂವ್ಚ್ಯಾ ಆದಿಂ ನಿಶ್ಚಿತ್ ಕರ್ತಾಂ” ಮ್ಹಣಾಲಿ ತಿ. ಉಪ್ರಾಂತ್ ವೆರೊನಿಕಾಕ್ ಪಳೆವ್ನ್, “ತುಂ ಆತಾಂ ತುಜ್ಯಾ ಕಮ್ರಾಕ್ ಚಲ್. ಮ್ಹಜ್ಯಾ ಅನ್ಮತೆ ಶಿವಾಯ್, ಆನಿ ಪಹರೊ ನಾತ್ಲ್ಯಾ ಶಿವಾಯ್ ಭಾಯ್ರ್ ಯೇಂವ್ಕ್ ಮನ್ ಕರಿನಾಕಾ!”

ಹ್ಯಾ ಉಪ್ರಾಂತ್ ಆಪ್ಲೊ ಜೀವ್ ಘೆವ್ನ್ ಥಂಯ್ ಥಾವ್ನ್ ಸ್ವತಂತ್ರಾಯೆನ್ ಭಾಯ್ರ್ ವೆಚೆಂ ದುಸ್ಸಾಧ್ಯ್ ಮ್ಹಳ್ಳೆಂ ಸತ್ ಸಮ್ಜೊನ್, ಮಾನಿನ್ ವೆರೊನಿಕಾ ಕುವೆಲ್, ಜಡ್ ಮತಿನ್ ಜಡಾಯೆಚಿಂ ಮೆಟಾಂ ಕಾಡ್ನ್ ಆಪ್ಲ್ಯಾ ಕುಡಾಕ್ ಗೆಲಿ.

ಉಪ್ರಾಂತ್ ಥೊಡೊ ವೇಳ್, ಬೇಗಮ್ ಜಹನಾರಾ ಆನಿ ಫಕೀರ್ ಮಹಮ್ಮದ್ ಥೊಡೊ ವಿಚಾರ್ ವಿನಿಮಯ್ ಕರ್ನ್ ರಾವ್ಲಿಂ.

“ಆಮ್ಚೆಂ ಸರ್ವ್ ಕಾಮ್ ಬರ್ಯಾ ಥರಾನ್ ಜಾತೆಂ ಆಸ್‍ಲ್ಲೆಂ” ಪುರ್ಪುರ್ಲೊ ಫಕೀರ್ ಮಹಮ್ಮದ್. “ತುಜ್ಯಾ ಭಾಚ್ಯಾನ್, ಪಟ್ಟಣಾಂತ್ ತ್ಯಾ ಸರ್ದಾರ್ ಸಿಮಾಂವ್ಕ್ ಲಗಾಡ್ ಕಾಡಿನಾತ್‍ಲ್ಲ್ಯಾ ವರ್ವಿಂ…”

“ಪಿಶ್ಯಾಂಪರಿಂ ಉಲಯ್ನಾಕಾ” ಪುಸ್ಪುಸ್ಲಿ ಜಹನಾರಾ. “ತಿ, ತುವೆಂ ಆನಿ ತೊಪಾಸಿನ್ ಕೆಲ್ಲಿ ಪಿಶಿ ಆಲೋಚನ್. ತಿ ಫಳಾಧಿಕ್ ಜಾಂವ್ಕ್ ನಾತ್‍ಲ್ಲೆಂಯೀ ಬರೆಂಚ್ ಜಾಲೆಂ ಮ್ಹಣ್ಯೆತ್. ನಾ ಜಾಲ್ಯಾರ್…

“ನಾ ಜಾಲ್ಯಾರ್, ಸರ್ದಾರ್ ಸಿಮಾಂವ್ಚಿ ಖುನಿ ಜಾಲ್ಲೆಂ ಕಾರಣ್ ಸಮ್ಜೊನ್ ಘೆತ್ಲ್ಯಾ ಶಿವಾಯ್, ಆನಿ ಪುರ್ತೆಂ ಫಾರಿಕ್ಪಣ್ ಘೆತ್ಲ್ಯಾ ಶಿವಾಯ್ ಟಿಪ್ಪು ಸುಲ್ತಾನ್ ಪಾಟಿಂ ರಾವ್ತೊ ನಾ. ತಸಲ್ಯಾ ಸಂದರ್ಭಾರ್ ಮ್ಹಾಕಾ ಚಡ್ ಕಷ್ಟ್ ಮಾರ್ತೆ. ಆತಾಂ ಜಾಲ್ಯಾರ್ ವ್ಹಡ್ ನಹಿಂ. ಸರ್ದಾರ್ ಸಿಮಾಂವ್ಕ್ ಶಿರ್ಕಾವ್ನ್, ತಾಚೆಂ ತೋಂಡ್ ಧಾಂಪುಂಕ್ ಚಡ್ ಸುಲಭ್.”

“ಕಿತ್ಯಾಕ್?” ಅಜ್ಯಾಪ್ಲೊ ಫಕೀರ್ ಮಹಮ್ಮದ್. “ನಿಜಾಯ್ಕೀ, ಸರ್ದಾರ್ ಸಿಮಾಂವ್ಚಿ ಬುದ್ವಂತ್ಕಾಯ್ ಆನಿ ಬಹಾದುರಿ ತುಂ ನೆಣಾಂಯ್. ತಾಚಿ ಕಾಣಿ ಆಖೇರ್ ಕರ್ತಾಂ ಮ್ಹಣ್ ಸೊಪುತ್ ಘೆತ್‍ಲ್ಲೊ ತುಜೊ ತೊಪಾಸಿ ದಾಲ್ಮೇದಾ, ಕುರಿಯೆಲಾಂತ್ ಕಸೊ ಸಲ್ವಲೊ ಮ್ಹಳ್ಳಿ ಖಬರ್ ತುಕಾ ಆಸಾ.”

“ಆಸಾ. ತಶೆಂ ಜಾಲ್ಲೆಂಯೀ ಬರೆಂಚ್ ಜಾಲೆಂ. ತಶೆಂ ಜಾಲ್ಲ್ಯಾ ವರ್ವಿಂಚ್ ತ್ಯಾ ಸರ್ದಾರ್ ಸಿಮಾಂವ್ನ್, ಹಾಂಗಾಸರ್ ಯೆಂವ್ಚೆಂ ಸಂಭಾವನ್ ಉಗ್ತೆಂ ಆಸಾ”

“ತುಮಿ ಬಾಯ್ಲಾಂನಿ ಚಿಂತ್ಚಿ ಸರಣಿ ಮ್ಹಾಕಾ ಸಮ್ಜನಾ” ಶಿಣ್ಲೊ ಫಕೀರ್ ಮಹಮ್ಮದ್. “ಪಟ್ಟಣಾಂತ್ ತೊ ಬಚಾವ್ ಜಾವ್ನ್ – ತುಜ್ಯಾ ಭಾಚ್ಯಾಚೆಂ ಬೋಟ್ ಉಸ್ಳೊನ್ – ಜೀವ್ ಮಾತ್ರ್ ಉರ್ಲೊ. ಕುರಿಯೆಲಾಕ್ ತೊ ಪರ್ತ್ಯಾನ್ ಯೇವ್ನ್ ಪಾವ್‍ಲ್ಲ್ಯಾ ವರ್ವಿಂ, ಆಮ್ಚೆಂ ಸಗ್ಳೆಂ ಯೋಜನ್ ಕಶೆಂ ಉಲ್ಟೆಂ ರಾವ್ಲಾಂ ಮ್ಹಣ್ ತುಂ ಜಾಣಾಂಯ್. ಫುಡ್ಲೊ ಅಪಾಯ್ ತುಂ ಚಿಂತುನ್ ಪಳೆನಾಂಯ್.”

“ಮ್ಹಣ್ಜೇ?”

“ಮ್ಹಣ್ಜೆ, ಕಾವೂರ್ಚಿ ತಿ ನಸ್ರಾನಿ ಬಾಯ್ಲ್ (ಇಜಾಬೆಲಾ ತೆರೆಜ್) ಆನಿ ತಿಚೆಂ ದಿರ್ವೆಂ ಆಮ್ಕಾಂ ಚುಕ್ಲೆಂ. ಉಪ್ರಾಂತ್, ‘ಜಲಬಾಲೆಂತ್’ ಗಲಾಟೊ ಜಾವ್ನ್ ಹ್ಯಾ ಸ್ತ್ರೀಯೆಚಿ ಭಯ್ಣ್ ಆಮ್ಕಾಂ ಚುಕ್ಲಿ, ಆನಿ ತೊ ತೊಪಾಸಿ ದಾಲ್ಮೇದಾ ಕಸೊಯೀ ಜೀವ್ ಘೆವ್ನ್ ಉರ್ಲೊ – ಪುಣ್ ಬೋಳೂರ್ ಠಾಣ್ಯಾಂತ್ ತಾಚೊ ಹುದ್ದೊಯೀ ಚುಕ್ಲೊ!”

“ಬುದ್ವಂತ್ಕಾಯ್ ನಾತ್‍ಲ್ಲ್ಯಾ ದಾದ್ಲ್ಯಾಂಕ್ ತಶೆಂ ಜಾಂವ್ಚೆಂ ವಾಜ್ಭಿಚ್. ಪುಣ್, ಆಮ್ಚೊ ತೊಪಾಸಿಯೀ ದಕ್ಷಿಣಾಕ್ ಆಯ್ಲಾ, ಆನಿ ಸರ್ದಾರ್ ಸಿಮಾಂವ್ಕ್ ಲಗಾಡ್ ಕಾಡಿನಾತ್ಲ್ಯಾರ್, ಜಿವೊಚ್ ಧರುನ್ ಪುಣೀ ಹಾಡ್ತಾಂ ಮ್ಹಣ್, ನೀಲೇಶ್ವರ್ ಥಾವ್ನ್ ತಾಣೆಂ ಖಬರ್ ಧಾಡ್ಲ್ಯಾ.”

“ವ್ಹಯ್ – ಕುಂಬ್ಳ್ಯಾಂತ್ ಜಾಲ್ಲಿ ಕಿತಾಫತ್ ಆಮಿ ಆಯ್ಕಲ್ಯಾ. ಆತಾಂ ನೀಲೇಶ್ವರ್ ಕಿತೆಂ ಜಾಲಾಂ – ಕೋಣ್ ಜಾಣಾಂ?”

“ತ್ಯಾ ಖಬ್ರೆಕ್, ನಹಿಂ ಜಾಲ್ಯಾರ್ ಸರ್ದಾರ್ ಸಿಮಾಂವ್ಕ್‌ಚ್ ಆಮಿ ರಾಕ್ತಾಂವ್.”

“ತ್ಯಾ ಮನ್ಶ್ಯಾಚ್ಯಾ ಮುಖಾರ್ ಪಡೊಂಕ್ ಮ್ಹಾಕಾ ಧೈರ್ ನಾ.”

“ತುಂ ಪಾಟ್ಲ್ಯಾನ್ ರಾವ್. ತೊ ಹಾಂಗಾ ಆಯ್ಲ್ಯಾರ್ – ಹಾಂವ್‍ಂಚ್ ತಾಚ್ಯಾ ಮುಖಾರ್ ಪಡ್ತಾಂ” ಮ್ಹಣೊನ್ ಬೇಗಮ್ ಹಾಸ್ಲಿ. ಜಾಲ್ಯಾರೀ ಭಿರಾಂತ್ ತಿಕಾ ಆಸ್‍ಲ್ಲಿ.

ಅಶೆಂ ತಶೆಂ ಉಲವ್ನ್ ತಿಂ ಆಸ್ತಾನಾ, ಭಾಯ್ಲ್ಯಾನ್ ಆವಾಜ್ ಜಾಲೊ.

ಥೊಡ್ಯಾ ವೆಳಾನ್, ಸುಫೆದಾರ್ ಎಕ್ಲೊ ಬೇಗಮೆಚ್ಯಾ ಸದ್ರೆರ್ ಯೇವ್ನ್ ಪ್ರಣಾಮ್ ಕರಿಲಾಗ್ಲೊ. ತೊ ಎಕ್ಲೊ ಹಿಂದೂ ಜಾವ್ನಾಸ್‍ಲ್ಲೊ.

“ಕಾಂಯ್ ಖಬರ್?”

“ಆಸಾ, ಬೇಗಮ್ ಸಾಹಿಬಾ!”

“ಕಸಲಿ?”

“ದೀಸ್‍ಭರ್ ಖಬರ್ ಬರಿ ನಾತ್‍ಲ್ಲಿ ಬೇಗಮ್ ಸಾಹಿಬಾ.”

“ತೆಂ ಆಮಿ ಜಾಣಾಂವ್.”

“ಲಡಾಯೆಚಿ ಮೂರ್ ವಾರ‍್ಯಾರ್ ಆಸ್ತಾನಾ, ಚಾಕ್ರೆಕ್ ಯೇಂವ್ಕ್ ಕೊಣ್‍ಯೀ ಮನ್ ಕರಿನಾಂತ್.”

“ಜಾಣಾಂವ್. ಭೊಂವ್ಚ್ಯಾ ಥೊಡ್ಯಾ ಭಿಕಾರ‍್ಯಾಂಕ್ ಪುಣೀ ಧರುನ್ ಹಾಡ್ಯೆತೆಂ ನಹಿಂವೇ?”

“ಹಾತ್ ಪಾಯ್ ಸಾರ್ಕೆ ಆಸ್‍ಲ್ಲೆ ಭಿಕಾರಿ ಥೊಡೆ ಮೆಳ್ಳೆ. ಪುಣ್ ತೆಯೀ ಚಾಕ್ರೆಕ್ ಯೇಂವ್ಕ್ ಕಬೂಲ್ ಜಾಂವ್ಕ್ ನಾಂತ್. ತಾಂಕಾಂ ಧರುನ್ ಹಾಡ್ಚೆ ತಿತ್ಲಿ ಶಿಬಂದಿ ಮ್ಹಜ್ಯಾ ತಾಬೆನ್ ನಾತ್‍ಲ್ಲಿ.”

“ವ್ಹಯ್, ತಸಲೆ ಮನಿಸ್ ಚೊರುನ್ ವಾ ನಾಗವ್ನ್ ಪುಣೀ ದೀಸ್ ಕಾಡ್ತಿತ್, ಪುಣ್ ಚಾಕ್ರೆಕ್ ರಾವಶೆನಾಂತ್” ಮ್ಹಣಾಲೊ ಫಕೀರ್ ಮಹಮ್ಮದ್.

“ಶೆಕಿಂ, ದೀಸ್‍ಭರ್ ಪ್ರಯತ್ನ್ ಕರುನ್…

“ಆಖ್ರೇಕ್ ಥೊಡಿ ಬರಿ ಖಬರ್ ಆಸಾ, ಬೇಗಮ್ ಸಾಹಿಬಾ!”

“ಕಸಲಿ ಜಾವ್ಯೆತ್ – ಉಲಯ್!” ಬೇಗಮ್ ಚಿಕ್ಕೆ ಉತಾವಳಿತ್ ಜಾಲಿ.

“ಆಖ್ರೇಕ್ ಎಕ್ಲೊ ಪಯ್ಣಾರಿ ಮೆಳ್ಳೊ.”

“ಕಾಂಯ್, ತೊಯೀ ಎಕ್ಲೊ ಭಿಕಾರಿ?”

“ಭಿಕಾರಿ ಮ್ಹಣ್ಯೆತೊ – ಪುಣ್ ಶುದ್ಧ್ ನಹಿಂ ಜಾಲ್ಯಾರೀ, ಹಾತಾ ಪಾಯಾಂನಿ ಧಡಂಗ್ ತೊ ಆಸಾ. ಪಯ್ಶ್ಯಾಂಚಿ ಗರ್ಜ್ ನಾ, ಪೊಟಾಕ್ ಮೆಳ್ಳ್ಯಾರ್ ಪುರೊ ಮ್ಹಳ್ಳ್ಯಾ ಸಮ್ಜಣೆನ್ ತೊ ಯೇಂವ್ಕ್ ಕಬೂಲ್ ಜಾಲೊ.”

“ಜಾತ್ ಕಸಲಿ?”

“ಸಾಂಗೊಂಕ್ ಕಷ್ಟ್, ಬೇಗಮ್ ಸಾಹಿಬಾ!”

“ಮ್ಹಣ್ಜೇ?” ಬೇಗಮ್ ಗರಮ್ ಜಾಲಿ. “ಕಸಲಿ ತಾರೀಫ್ ಹಿ!”

“ತೊ ಉಲಯ್ನಾ – ಪೊಟ್ಟೊ – ಮೊನೊ ತೊ, ಬೇಗಮ್ ಸಾಹಿಬಾ!”

ಬೇಗಮ್, ಗರಮ್ ಜಾಲ್ಯಾರೀ ಅಮ್ರುಕಿ ಹಾಸ್ಲಿ.

“ತುಮಿ ಸಗ್ಳೆ ಬುದ್ದು!” ಮ್ಹಣಾಲಿ ತಿ. ತಾಕಾ ಉಲಂವ್ಕ್ ಯೇನಾತ್ಲ್ಯಾರ್, ತಾಕಾ ಪಳೆವ್ನ್ ತಾಚಿ ಜಾತ್ ಪಾರ್ಕುಂಕ್ ನಜೊವೇ?”

“ತೆಂ ಕಶೆಂ ಜಾತಾ?” ಫಕೀರ್ ಮಹಮ್ಮದಾನ್ ವಿಚಾರ್ಲೆಂ.

“ಕಿತ್ಯಾಕ್ ಜಾಯ್ನಾ? ತಕ್ಲಿ ಖರ್ಚಿಜಾಯ್!” ಹಾಸ್ಲಿ ಬೇಗಮ್. “ತಾಚ್ಯಾ ಆಂಗಾರ್ ಜಾನ್ವೆಂ ಪುಣೀ ಆಸ್ಲ್ಯಾರ್ ತೊ ಬ್ರಾಹ್ಮಣ್. ಹೆರ್, ವರ್ಗಾಚೊ ಹಿಂದೂ ತೊ ಜಾಲ್ಯಾರ್ ಬಾವ್ಳ್ಯಾಕ್ ವಾ ಗೊಮ್ಟ್ಯಾಕ್ ಕಾಂಯ್ ತಾಯಿತ್ ರೆವ್ಡಾವ್ನ್ ಆಸ್ಯೆತ್. ತಶೆಂಚ್ ಕಾಂಯ್ ಪದಕ್ (ಅರ್ಲುಕ್) ವಾ ಖುರ್ಸಾಚಿ ಮುದ್ರಾ ಪುಣೀ ಆಸ್ಲ್ಯಾರ್ ತೊ ನಸ್ರಾನಿ. ಆನಿ ಮುಸ್ಲಿಮ್ – ಕಸಲ್ಯಾಯೀ ವರ್ಗಾಚೊ ತೊ ಜಾಲ್ಯಾರ್, ತುಮಿ ಜಾಣಾಂತ್ ಸರ್ವ್ ದಾದ್ಲ್ಯಾಂಕ್…”

“ವ್ಹಯ್!” ಆತಾಂ ಹಾಸ್ಲೊ ಫಕೀರ್ ಮಹಮ್ಮದ್. “ತಿ ಚಿಹ್ನಾ ಆಸ್ಲ್ಯಾರ್ ತೊ ಯೆಹೂದಿಯೀ ಜಾವ್ಯೆತ್.”

“ಕಶೆಂಯೀ ಜಾಂವ್, ಬೇಗಮ್ ಸಾಹಿಬಾ” ಮ್ಹಣಾಲೊ ಸುಫೆದಾರ್. “ತಾಚಿ ಜಾತ್ ಮತ್ ಹಾಂವೆಂ ವಿಚಾರುಂಕ್ ನಾ. ಪಾರ್ಕುಂಕ್‍ಯೀ ಹಾಂವ್ ವಚೊಂಕ್ ನಾ – ಚಿಕ್ಕೆ ಕಷ್ಟ್ ಆಸಾತ್!”

“ಕಿತ್ಯಾಕ್ ತಶೆಂ?”

“ತಾಚೆಂ ಆಂಗ್ ಆಪಡುಂಕ್ ಚಡ್ ಕಷ್ಟ್ ಆಸಾತ್!”

“ಕಿತೆಂ ಉಲಯ್ತಾತ್, ತಕ್ಲಿ ವಿರಾರ್ ಜಾಲ್ಲೆಪರಿಂ!” ಧೆಂಕ್ಣೊ ಮಾರ್ಲೊ ಬೇಗಮೆನ್. “ವಚ್, ಪಳೆಯಾಂ ತ್ಯಾ ಮನ್ಶ್ಯಾಕ್!”

ಬೇಗಮೆಚ್ಯಾ ಹುಕ್ಮೆ ಪ್ರಕಾರ್, ಸುಫೆದಾರ್ ಭಾಯ್ರ್ ಗೆಲೊ. ಥೊಡ್ಯಾಚ್ ವೆಳಾನ್ ತೊ ಭಿತರ್ ಯೆತಾನಾ, ತಾಚ್ಯಾ ಪಾಟ್ಲ್ಯಾನ್ ಆನ್ಯೇಕ್ ಮನಿಸ್ ಆಸ್‍ಲ್ಲೊ…

ನಿಜಾಯ್ಕೀ, ತ್ಯಾ ವ್ಯಕ್ತಿಕ್ ಪಳೆವ್ನ್ ಬೇಗಮ್ ಘಡ್ಯೆ ಪಿಶಿ ಜಾಲಿ.

“ಕಿತೆಂ ಹಾಡ್ಲಾಂ ತುಮಿ?” ವಿಚಾರ್ಲೆಂ ತಿಣೆಂ. “ಮ್ಹಜ್ಯಾ ರಾವ್ಳೆರಾಂತ್, ಗರ್ಜ್ ಪಡ್ಲ್ಯಾರ್ ಝುಜೊಂಕ್ ಜಣ್ ಜಾಯ್ ಮ್ಹಳ್ಳೆಂ ಹಾಂವೆಂ. ದೀಸ್‍ಭರ್ ಪ್ರಯತ್ನ್ ಕರ್ನ್ ತುಮಿ ಆಖ್ರೇಕ್ ಹಾಡ್ಲಾಂ ಕಿತೆಂ?”

“ಮಾಫ್ ಕರಿಜಾಯ್ ಬೇಗಮ್ ಸಾಹಿಬಾ!” ಮ್ಹಣಾಲೊ ಸುಫೆದಾರ್. “ಹೊ ಮನಿಸ್ ಝುಜಾಚ್ಯಾ ವಿದ್ಯೆಂತ್ ತರ್ಬೆತ್ ಜಾವ್ನ್, ತಾಂತುಂ ಹೆಳ್ಳಾ ಮ್ಹಣ್, ತಾಕಾ ಪಳೆತಾನಾ ಸ್ಪಷ್ಟ್ ಜಾತಾ. ಆಂಗಾರ್ ಘಾಯ್ ಬಾಂಧ್‍ಲ್ಲ್ಯೊ ಪಟ್ಟ್ಯೊ ಆನಿ ಥೊಡ್ಯೊ ಮಾವೊ ಆಸ್ಯೆತ್; ಪುಣ್, ಜಿವಾಂತ್ ತೊ ಧಡಂಗ್ ಆಸಾ. ತ್ಯಾ ಶಿವಾಯ್, ತಾಚೆಂ ಪೋಟ್ ಭರ್ಲ್ಯಾರ್ ಮಾತ್ರ್ ಪುರೊ – ಪಯ್ಶೆ ತೊ ಮಾಗನಾ.”

ಬೇಗಮೆನ್ ತ್ಯಾ ಮನ್ಶ್ಯಾಕ್ ಪಳೆಲೆಂ.

ಫಕೀರ್ ಮಹಮ್ಮದ್‍ಯೀ ತಾಕಾಚ್ ಪಳೆವ್ನ್ ರಾವ್ಲೊ. ತ್ಯಾ ಮನ್ಶ್ಯಾಕ್ ಪಳೆವ್ನ್ ತಾಕಾ ಕಾಂಠಾಳೊ ಆಯ್ಲೊ ಮ್ಹಣ್ ದಿಸ್ತಾ. ಬೇಗಮೆನ್ ಉಲಂವ್ಚ್ಯಾ ಆದಿಂಚ್,

“ತುಜೆಂ ನಾಂವ್ ಕಿತೆಂ – ಹ್ಯಾ?” ವಿಚಾರ್ಲೆಂ ತಾಣೆಂ.

ನವ್ಯಾ ಮನ್ಶ್ಯಾನ್ ಬಾಗ್ವೊನ್ ಏಕ್ ಸಲಾಮ್ ಕೆಲೊ. ಉಪ್ರಾಂತ್,

“ಭು-ಹೂ! ಹೆ-ಹೆ-ಭೇ…” ಆವಾಜ್ ಕೆಲೊ ತಾಣೆಂ.

“ಕಿತೆಂ ಖಂಯ್?”

“ಹಾಂವೆಂ ಸಾಂಗ್ಲೆಂ ನಹಿಂವೇ – ತೊ ಮೊನೊ!” ಮ್ಹಣಾಲೊ ತೊ ಸುಫೆದಾರ್. “ಖಂಯ್ಚ್ಯಾಗೀ ಆದ್ಲ್ಯಾ ಎಕಾ ಝುಜಾಂತ್, ತಾಚ್ಯಾ ಜಿಬೆಚ್ಯಾ ಕಾಂದ್ಯಾಕ್ ಮಾರ್ ಜಾಲಾ ಮ್ಹಣ್ ದಿಸ್ತಾ.”

“ತರ್ ತಾಕಾ ಕಾನ್ ಆಯ್ಕತಾತ್?”

“ಭು-ಭೂ!” ಮ್ಹಣೊನ್, ನವ್ಯಾ ಮನ್ಶ್ಯಾನ್ ತಕ್ಲಿ ಹಾಲಯ್ಲಿ.

“ಬರೆಂಚ್!” ಮ್ಹಣಾಲಿ ಬೇಗಮ್.

“ಕಿತೆಂ ಬರೆಂಚ್?” ವಿಚಾರ್ಲೆಂ ಫಕೀರ್ ಮಹಮ್ಮದಾನ್ ಅಜ್ಯಾಪ್ ಜಾವ್ನ್.

“ತಾಕಾ ಉಲಂವ್ಕ್ ಯೇನಾತ್‍ಲ್ಲೆಂ. ಪುಣ್ ಕಾನ್ ಆಯ್ಕತಾತ್ ತೆಂ ಬರೆಂಚ್. ತಾಚೆಂ ರೂಪ್ ತಶೆಂ ಆಸಾ ತೆಂ ಬರೆಂಚ್!”

ನಿಜಾಯ್ಕೀ ತ್ಯಾ ಮನ್ಶ್ಯಾಚೆಂ ರೂಪ್ ವರ್ಣುಂಕ್ ಕಷ್ಟ್ ಆಸ್‍ಲ್ಲೆ.

ಮನಿಸ್ ಲಾಂಬ್‍ದೀಗ್ ತೊ ಜಾವ್ನಾಸ್‍ಲ್ಲೊ.

ಭೋವ್ ಮ್ಹೆಳೆಂ ಆನಿ ಪಿಂಜ್ಕರ್ ವಸ್ತುರ್ ತೊ ನ್ಹೆಸ್‍ಲ್ಲೊ. ತೆಂ ವಸ್ತುರ್ ಸಾರ್ಕೆಂ ಆಸ್‍ಲ್ಲೆಂ ಜಾಲ್ಯಾರ್, ಚಡುಣೆಂ ತ್ಯಾ ಕಾಳಾಚ್ಯಾ ಮರಾಠಿ ಶಿಪಾಯಾಂಚ್ಯಾ ಸಮವಸ್ತ್ರಾಪರಿಂ ದಿಸ್ತೆಂ ಜಾವ್ಯೆತ್.

ತಾಚ್ಯಾ ಮಾಂಡ್ಡ್ಯಾಕ್ ಏಕ್ ಪಿಂಜ್ಕರ್ ಪೇಟಾ ರೆವ್ಡಾಯಿಲ್ಲೊ. ತ್ಯಾ ಮ್ಹೆಳ್ಯಾ ರೆವೊಡಾಚ್ಯಾ ಇಡ್ಯಾಂತ್ಲ್ಯಾನ್ ಥೊಡಿಂ ಧವ್ಶ್ಯಾ ಕೆಸಾಂಚಿಂ ಜಾಂಟಾಂ ಭಾಯ್ರ್ ತಿಳ್ತಾಲಿಂ.

ಥೊಡ್ಯಾ ದಿಸಾಂಚೆಂ ಧವ್ಶೆಂ-ಕಾಳ್ಶೆಂ ಆನಿ ಚಿಕ್ಲಾನ್ ಖಾಡ್ ಮಿಶೆಚೆಂ ಬೊಲೆಂ ತಾಚ್ಯಾ ತೊಂಡಾರ್ ಆಸ್‍ಲ್ಲೆಂ.

ತೊ ಉಬೊ ರಾವ್‍ಲ್ಲ್ಯಾ ವೆಳಾರ್, ತಾಚೆ ಪಾಯ್ ಅಟ್ಟೆ ದಿಸ್ತಾಲೆ.

ತಾಚ್ಯಾ ಹಾತಾ ಪಾಯಾಂಚ್ಯಾ ಬೊಟಾಂಕ್ ಥೊಡ್ಯೊ ಚಿಂದ್ಯೊ ರೆವ್ಡಾಯಿಲ್ಲ್ಯೊ.

ಪಿಂಜ್ಕರ್ ಧೊಂಪ್ಳ್ಯಾಂನಿ ತಾಚೆಂ ಆಂಗ್ ದಿಸ್ಚೆ ಕಡೆನ್ ಕಾಳ್ಶಿಂ-ತಾಂಬ್ಶಿಂ ಚಾಕಾಂ ದಿಸ್ತಾಲಿಂ.

ಚಿಕ್ಕೆ ದಾಟ್‍ಶೆ ಆಸ್‍ಲ್ಲೆ ತಾಚೆ ವೋಂಟ್ ವಿದ್ರೂಪ್ ದಿಸ್ತಾಲೆ ಆನಿ ತಾಚೆ ದಾಂತ್ ಧವೆ ಉಣೆಂ ಆಸೊನ್, ಕಾಳೆ ಚಡ್ ದಿಸ್ತಾಲೆ.

ತಾಚ್ಯಾ ಪೆಂಕ್ಡಾಕ್ ಏಕ್ ಪರ್ನೆಂ ಚಾಮ್ಡೆಂ ರೆವ್ಡಾಯಿಲ್ಲೆಂ, ಆನಿ ಥಂಯ್ಸರ್ ಏಕ್ ಪರ್ನಿ ತಲ್ವಾರಿಚಿ ಕೋಶಿ ಉಮ್ಕಳ್ತಾಲಿ.

“ತುಂ ಹಾಂಗಾಸರ್ ಕಾಮ್ ಕರುಂಕ್ – ಪಾತ್ಯೆಣೆನ್ ಕಾಮ್ ಕರುಂಕ್ ಕಬೂಲ್ ಆಸಾಯ್‍ಮೂ?” ಬೇಗಮೆನ್ ವಿಚಾರ್ಲೆಂ.

“ಭು-ಹೂ! ಭು-ಭು!” ವ್ಹಯ್ ಮ್ಹಣ್ಚ್ಯಾ ಜಿನ್ಸಾರ್ ತಾಣೆಂ ತಕ್ಲಿ ಹಾಲಯ್ಲಿ.

“ತುಜೆಂ ನಾಂವ್ ಆಮ್ಕಾಂ ಕಳಿತ್ ನಾ ದೆಕುನ್, ತುಕಾ ಆಮಿ ಸುಫೆದಾರ್ ಭು-ಭು ಮ್ಹಣ್ ಆಪಯ್ತಾಂವ್. ಆಜ್ ಥಾವ್ನ್ ಹಾಂಗಾಸರ್ ತುಂ ಪ್ರತ್ಯೇಕ್ ರಾಕ್ವಲಿ” ಮ್ಹಣೊನ್ ಬೇಗಮೆನ್ ‘ಭು-ಭು’ಕ್ ವೆರೊನಿಕಾಚೆಂ ಕೂಡ್ ದಾಕಯ್ಲೆಂ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel