ಆಧುನಿಕ್ ಮಾಸ್ಳೆ ಕೃಷಿ: ಉಣ್ಯಾ ಖರ್ಚಾರ್ ಭರ್ಪೂರ್ ಫಾಯ್ದೊ

ಜುಲಾಯ್ 10 ತಾರಿಕ್ ಭಾರತಾಂತ್ ‘ರಾಷ್ಟ್ರೀಯ್ ಮಾಸ್ಳಿ ಪೊಸ್ತೆಲ್ಯಾಂಚೊ ದೀಸ್’ (National Fish Farmers Day) ಆಚರ್ಸಿತಾತ್. ಮಾಸ್ಳಿ ಭೋವ್ ಪುರಾತನ್ ಆಹಾರ್. ದರ್ಯೊ ತಶೆಂ ನ್ಹಂಯ್ ಆನಿ ಹೆರ್ ಉದ್ಕಾ ಥಾವ್ನ್ ಸಾಂಪ್ರದಾಯಿಕ್ ಮಾಸ್ಳಿ ಪಾಗ್ಚೆಂ ಆಸ್‍ಲ್ಲೆಪರಿಂಚ್ ವೈಜ್ಞಾನಿಕ್ ಅವಿಷ್ಕಾರಾಂ ಮುಖಾಂತ್ರ್ ಮಾಸ್ಳೆಚೆಂ ಕೃತಕ್ ಗರ್ಭಧಾರಣ್ ಕರುನ್ ಮಾಸ್ಳಿ ಪೊಸ್ಚೆಂ ವಿಧಾನ್‍ಯೀ ಚಾಲ್ತೆರ್ ಆಸಾ. 1957 ಇಸ್ವೆಂತ್, ಮಾಸ್ಳಿ ಪೊಸ್ಚ್ಯಾ ಕೃಷೆಂತ್ ವಿಶೇಸ್ ಸಾಧನ್ ಕೆಲ್ಲೆ ವಿಜ್ಞಾನಿ ಜಾವ್ನಾಸ್ಚ್ಯಾ ಡಾ. ಕೆ.ಎಚ್. ಅಲಿಕುಞಿ ಆನಿ ಡಾ. ಎಚ್.ಎಲ್. ಚೌಧರಿಚ್ಯಾ ಗೌರವಾಕ್ ಜುಲಾಯ್ 10ವೆರ್ ಹೊ ದೀಸ್ ಆಚರಣ್ ಕರುಂಕ್ ಸುರ್ವಾತ್ಲೊ. ಪ್ರಸ್ತುತ್ ಹಾಂತುಂ ಜಾಯ್ತೊ ಸಂಶೋಧ್ ಚಲೊನ್, ಪಾಸ್ಳಿ ಪೊಸ್ಚಿ ಕೃಷಿ ಕರ್ತೆಲ್ಯಾಂಚೊ ಸಂಖೊ ಬರೊಚ್ ಚಡ್ಲಾ. ತ್ಯಾ ವಿಶಿಂ ಹೆಂ ಲೇಖನ್.

ಆಕ್ವಾಕಲ್ಚರ್, ಮ್ಹಣ್ಜೆ ಉದ್ಕಾ ಕೃಷಿ, ಮ್ಹಳ್ಯಾರ್ ವ್ಯಾಪಾರಿ ಉದ್ದೇಶಾನ್ ಟ್ಯಾಂಕ್ ವಾ ತಳೆಂ ನಿರ್ಮಾಣ್ ಕರುನ್ ಮಾಸ್ಳಿ ಪೊಸ್ಚೆಂ. ಜಾಗತಿಕ್ ಮಟ್ಟಾರ್ ಹಾಚಿ ವಾಡಾವಳ್ ಮಜ್ಭೂತ್ ಆಸೊನ್, ಹ್ಯಾ ವೃತ್ತೆಕ್ ಲಾಗ್ತೆಲ್ಯಾಂಚೊ ಸಂಖೊ ಚಡ್ಲಾ ಆನಿ ವಹಿವಾಟ್ ವಾಡ್ಲಾ. ಭಾರತಾಂತ್‍ಯೀ ಹಾಕಾ ಬರೊ ಖಾಯ್ಸ್ ಆಸಾ.

ಕರಾವಳಿ ಪ್ರದೇಶಾಂನಿ ದರ್ಯಾಚಿ ಮಾಸ್ಳಿ ವ್ಹಡ್ ಮಾಪಾನ್ ವಿಕ್ರಾಪ್ ಜಾತಾ. ನ್ಹಂಯೊ, ತಳಿಂ, ಬಾಂಯೊ ತಸಲ್ಯಾ ಉದ್ಕಾ ಆಸ್ರ್ಯಾಂನಿ ಸ್ವಾಭಾವಿಕ್‍ಪಣಿಂ ಜಾಂವ್ಚ್ಯೊ ಮಾಸ್ಳ್ಯೊ ಆಸಾತ್. ಪುಣ್ ಬದ್ಲೊನ್ ಯೆಂವ್ಚ್ಯಾ ತಾಪ್‍ಮಾನ್ ಆನಿ ಪರಿಸರ್ ಮಾಲಿನ್ಯಾ ವರ್ವಿಂ ನೈಸರ್ಗಿಕ್ ರಿತಿನ್ ಮೆಳ್ಚ್ಯೊ ಮಾಸ್ಳ್ಯೊ ಆನಿ ಹೆರ್ ಜೀವಿ (ಕುರ್ಲಿ, ಕೊಂಗೆ ಇತ್ಯಾದಿ) ವಿರಳ್ ವಾ ನಾಸ್ ಜಾವ್ನ್ ಆಸಾತ್. ಮಾಸ್ಳಿ ಖಾತೆಲ್ಯಾಂಚೊ ಸಂಖೊ ಭೋವ್ ವ್ಹಡ್ ಆಸಾ ಜಾಲ್ಲ್ಯಾನ್ ಮಾಸ್ಳೆಕ್ ಡಿಮಾಂಡ್ ಬರೊಚ್ ಆಸಾ.

ಮಂಗ್ಳುರ್ಚಿ ಫಿಶರೀಸ್ ಕೊಲೆಜ್

ಮಂಗ್ಳುರಾಂತ್ ಮಾಸ್ಳೆಚ್ಯಾ ವಿಜ್ಞಾನಾ ಖಾತಿರ್‌ಚ್ ಏಕ್ ವ್ಹಡ್ ಸಂಸ್ಥೊ ಆಸಾ. ಪಂಪ್‍ವೆಲ್ ಥಾವ್ನ್ ಮುಕ್ಕಾಲ್ ಕಿ.ಮೀ. ಪಯ್ಸ್ ತೊಕ್ಕೊಟ್ಟು ಹೈವೇಕ್ ಲಾಗೊನ್, ಉಜ್ವ್ಯಾಕ್, ಫಿಶರೀಸ್ ಕೊಲೆಜ್ ಆಸೊನ್, ಥಂಯ್ಚ್ಯಾ ಕೃಷಿ ವಿಜ್ಞಾನ್ ಕೇಂದ್ರಾಂತ್ ಮಾಸ್ಳೆಂಚೆರ್ ಅಧ್ಯಯನ್ ಆನಿ ಸಂಶೋಧನ್ ವಾವ್ರ್ ಚಲ್ತಾ. ಹಾಂಗಾಸರ್ ಮಾಸ್ಳಿ ಪೊಸ್ಚ್ಯಾ ಕೃಷೆ ವಿಶಿಂ ಜಾಯ್ ತಿ ಮಾಹೆತ್, ವಿವರ್ ಆನಿ ಮಾರ್ಗದರ್ಶನ್ ಜೊಡ್ಯೆತ್.

ಚಡಾವತ್ ಮಂಗ್ಳುರಿ ಲೊಕಾಕ್ ಜೆವ್ಣಾಕ್ ಮಾಸ್ಳಿ ಜಾಯ್ಜೆಚ್. ದರ್ಯಾಚಿ ಮಾಸ್ಳಿ ವರಸ್‍ಭರ್ ಲಭ್ಯ್ ಆಸ್ತಾ ತರೀ, ಜೂನ್ ಜುಲಾಯ್ ಮಹಿನ್ಯಾಂತ್ ದರ್ಯಾ ವ್ಯಾಪ್ತೆಕ್ ರಜಾ ಆನಿ ನಿರ್ಬಂಧ್ ಆಸ್ತಾ ಜಾಲ್ಲ್ಯಾನ್ ತಾಜಾ ಮಾಸ್ಳಿ ಮೆಳನಾ. ಶಿವಾಯ್ ಮಾಲಿನ್ಯ್ ಆನಿ ಜಾಗತಿಕ್ ತಾಪ್‍ಮಾನಾಂತ್ಲಿ ಬದ್ಲಾವಣ್ ದರ್ಯಾಂತ್ ಮಾಸ್ಳಿ ಉಣೆಂ ಜಾಂವ್ಕ್ ಕಾರಣ್ ಜಾಲ್ಯಾಂತ್. ಫ್ರೀಜರಾಂನಿ ದಾಸ್ತಾನ್ ಕೆಲ್ಲಿ ಮಾಸ್ಳಿ ಮ್ಹಾರಗ್ ಆನಿ ತಿತ್ಲಿ ರುಚಿಕ್ ಆಸನಾ. ಹ್ಯಾ ವರ್ವಿಂ ಮಾಸ್ಳಿ ಪೊಸ್ತೆಲ್ಯಾಂನಿ ಬರೊಚ್ ಮುನಾಫೊ ಜೊಡ್ಯೆತ್.

ವರ್ಸಾ ಭಿತರ್ ವ್ಯಾಪಾರ್

ಜೂನ್-ಜುಲಾಯ್ ಮಹಿನ್ಯಾಂನಿ ಮಾಸ್ಳೆಚಿಂ ತಾಂತಿಯಾಂ ವಾ ಪಿಲಾಂ ಮೆಳ್ತಾತ್. ತಿಂ ವ್ಹರ್ನ್ ಪೊಸ್ಲ್ಯಾರ್ ಎಕಾ ವರ್ಸಾನ್ ವ್ಹಡ್ ಜಾವ್ನ್ ವಿಕುಂಕ್ ಜಾತಾತ್. ಮ್ಹಣ್ಜೆ ದರ್ಯಾಂತ್ ಮಾಸ್ಳಿ ಮೆಳನಾತ್‍ಲ್ಲ್ಯಾ ವೆಳಾರ್‌ಚ್ ಹಿ ಮಾಸ್ಳಿ ಮಾರ್ಕೆಟಿಕ್ ಘಾಲುಂಕ್ ಸಾಧ್ಯ್ ಜಾತಾ.

ವೆವೆಗ್ಳ್ಯಾ ಜಾತಿಂಚ್ಯೊ ಮಾಸ್ಳ್ಯೊ ಮೆಳ್ತಾತ್. ಪ್ರಮುಖ್ ಥೊಡ್ಯೊ: ಸಾಲ್ಮನ್, ರೂಪ್‍ಚಂದ್, ಫಂಗೇಶಿಯಸ್, ಮುರೈಲ್ (ಮಡೆಂಜಿ), ತಿಗುರ್, ಕಾಟ್ಲಾ, ರೋಹು, ಗೌರಿ, ಕಾಮನ್ ಕರ್ಫ್, ತಿಲಪಿಯ ಇತ್ಯಾದಿ. ಹ್ಯೊ ಮಾಸ್ಳ್ಯೊ ಭಲಾಯ್ಕೆಕ್ ಬರ‍್ಯೊ ಮ್ಹಣ್ತಾತ್ ಸಂಶೋಧಕ್ ಆನಿ ಅನುಭವಿ ಕೃಷಿಕ್.

ಧಾಕ್ಟ್ಯಾ ಫೊಂಡಾಂತ್ ಸುರ್ವಾತ್

ಮಾಸ್ಳೆಚಿ ಕೃಷಿ ಕರುಂಕ್ ಆಸಕ್ತ್ ಆಸ್‍ಲ್ಲ್ಯಾಂನಿ ಸುರ್ವೆರ್ ಲ್ಹಾನ್ ಫೊಂಡಾಂತ್ ವಾ ಟಾಂಕಿಂತ್ ಪ್ರಯೋಗ್ ಕರ್ಯೆತ್. ಜಾಣಾರಿಂ ಥಾವ್ನ್ ಮಾರ್ಗದರ್ಶನ್ ಘೆವ್ನ್ ಕೃಷಿ ಕೆಲ್ಯಾರ್ ಉಪ್ರಾಂತ್ ವ್ಹಡ್ ಪ್ರಮಾಣಾರ್ ಆಧಾರ್ಯೆತ್. ಹಾಕಾ ವಾಂವ್ಟ್ ಭೋವ್ ಉಣಿ. ಗೊರ್ವಾಂ ಪೊಸುನ್ ದೂದ್ ಕಾಡ್ತೆಲ್ಯಾಂಚೆ ಕಷ್ಟ್ ತುಲನ್ ಕೆಲ್ಯಾರ್ ಮಾಸ್ಳಿ ಪೊಸ್ಚೆಂ ಭಾರಿಚ್ ಸುಲಭ್; ಸಮಸ್ಯೆ ಉಣೆ. ಖರ್ಚ್‍ಯೀ ಉಣೊ.

ದೋನ್ ರೀತ್ ದೋನ್ ಜಾತ್

ಮಾಸ್ಳಿ ಪೊಸ್ಚೆಂ ಸಾಮಾನ್ಯ್ ಜಾವ್ನ್ ದೋನ್ ರಿತಿಂಚೆಂ ಆಸಾ. ಏಕ್ ಗಾಂವ್ಚ್ಯಾ ಗೋಡ್ ಉದ್ಕಾಚೆಂ ತರ್, ದುಸ್ರೆಂ ದರ್ಯಾಚ್ಯಾ ಮಿಟಾ ಉದ್ಕಾಚೆಂ. ಮ್ಹಳ್ಯಾರ್ ದರ್ಯಾಂತ್ ಉತ್ಪನ್ನ್ ಜಾಂವ್ಚ್ಯೊ ಮಾಸ್ಳ್ಯೊ ಆನಿ ಸುಂಕ್ಟಾಂಚೆಂ ಬೆಳೆಂ ಕರುಂಕ್ ದರ್ಯಾಚೆಂ ಮಿಟಾ ಉದಾಕ್‍ಚ್ ಜಾಯ್. ದೆಕುನ್ ಹಿ ಕೃಷಿ ದರ್ಯಾ ಬಗ್ಲೆನ್ ಮಾತ್ರ್ ಜಾಂವ್ಚಿ. ಹೆರ್ ಮಾಸ್ಳಿ ಗಾಂವ್ಚ್ಯಾ ಗೋಡ್ ಉದ್ಕಾಂತ್ ಜಾತಾ.

ಮಾಸ್ಳೆಂನಿಯೀ ದೋನ್ ವರ್ಗ್ (ಜಾತ್) ಆಸಾತ್ – ವೆಜ್ ಆನಿ ನಾನ್‍ವೆಜ್. ಥೊಡ್ಯಾ ಮಾಸ್ಳೆಂಕ್ ಫಕತ್ ತಣ್, ಸೊಪ್ ತಸಲೆಂ ಖಾಣ್ ಪಾವ್ತಾ. ಹೆರ್ ಥೊಡ್ಯಾ ಜಾತಿಚ್ಯಾಂಕ್ ನಾನ್‍ವೆಜ್ ಖಾಣ್ ದೀಜೆ ಪಡ್ತಾ. ಜಾಯ್ ಜಾಲ್ಲೆಂ ಖಾಣ್‍ಯೀ ಮಾರ್ಕೆಟಿಂತ್ ಮೆಳ್ತಾ. ಮಾತ್ರ್ ನ್ಹಯ್, ಉದ್ಕಾಂತ್‍ಚ್ ತಯಾರ್ ಜಾಂವ್ಚ್ಯಾ ತಣ್ ಆನಿ ಹೆರ್ ಖಾಣಾಕ್ ಜೊಕ್ತಿಂ ವಿಧಾನಾಂ ಆಸಾತ್. ತಿಂ ಪ್ರಯೋಗ್ ಕೆಲ್ಯಾರ್ ಉಣ್ಯಾ ಖರ್ಚಾರ್ ಸುಧಾರ್ಸಿಯೆತ್.

ಪಂಥಾಹ್ವಾನ್ – ರೂಚ್ ಆನಿ ಮಾರ್ಕೆಟ್

ಕರಾವಳಿ ಲೊಕಾಕ್ ದರ್ಯಾಚಿ ಮಾಸ್ಳಿಚ್ ಚಡ್ ಪಸಂದ್. ಮಿಟಾ ಉದ್ಕಾಂತ್ ಜಾಂವ್ಚ್ಯಾ ಮಾಸ್ಳೆಂಕ್ ಚಡ್ ರುಚ್ ಆಸ್ತಾ. ಹಾಕಾ ತುಲನ್ ಕೆಲ್ಯಾರ್ ಗೋಡ್ ಉದ್ಕಾಂತ್ ಜಾಂವ್ಚ್ಯಾ ಕಾಟ್ಲಾ ತಸಲ್ಯಾ ಮಾಸ್ಳೆಂಕ್, ಜ್ಯೊ ಗಾತ್ರಾನ್ ವ್ಹಡ್, ರೂಚ್ ಉಣಿಂ ವಾ ಚಾಪ್ಪೆ. ಪುಣ್ ಏಕ್ ದೋನ್ ಪಾವ್ಟಿಂ ಸೆವ್ಲ್ಯಾರ್ ಹಿ ಮಾಸ್ಳಿ ಖಂಡಿತ್ ಪಸಂದ್ ಜಾತಾ.

ಗಾಂವಾಂತ್ ವ್ಹಡ್ ಮಾಪಾನ್ ಮಾಸ್ಳಿ ಪೊಸ್ತೆಲ್ಯಾಂಕ್ ಏಕ್ ಪಂಥಾಹ್ವಾನ್ ಮ್ಹಳ್ಯಾರ್ ಮಾರ್ಕೆಟ್. ಸ್ಥಳೀಯ್ ಮಾರ್ಕೆಟ್ ತಿತ್ಲಿ ಆಶಾದಾಯಕ್ ನಾ. ಲೊಕಾಕೀ ಹಾಚಿ ಖಬರ್ ಉಣಿಂ. ಘಾಟಾ ವಯ್ರ್ ಹ್ಯಾ ಮಾಸ್ಳೆಂಕ್ ಬರೊ ಡಿಮಾಂಡ್ ಆಸಾ. ದೆಕುನ್ ಸಂಚಾರ್ ವ್ಯವಸ್ಥಾ ಆಪ್ಣಾಯ್ಜೆ ಪಡ್ತಾ. ಸ್ಥಳೀಯ್ ಲೊಕಾಕ್ ಹ್ಯಾ ಮಾಸ್ಳೆಚಿ ರೂಚ್ ಮೆಳ್ಳ್ಯಾರ್ ಮಾರ್ಕೆಟ್ ವಿಸ್ತಾರುಂಕ್ ಸಾಧ್ಯ್ ಮ್ಹಣ್ತಾತ್ ತಜ್ಞ್.

ಮಾಸ್ಳಿ ಪೊಸ್ಚೆ ಕ್ರಿಸ್ತಾಂವ್

ಕುಂದಾಪುರ್ ತಾಲೂಕಾಂತ್ ಪಯ್ಣ್ ಕೆಲ್ಯಾರ್ ಸುಂಕ್ಟಾಂ ಆನಿ ಹೆರ್ ಮಾಸ್ಳಿ ಪೊಸ್ಚೆಂ ಸಗ್ಳ್ಯಾಂನಿ ಪಳೆಂವ್ಕ್ ಮೆಳ್ತಾ. ತೆಣೆಂ ದರ್ಯಾಂತ್, ನ್ಹಂಯ್ತ್ ಮಾಸ್ಳಿ ಪಾಗ್ಚೆ ಕ್ರಿಸ್ತಾಂವ್ ಜಾಯ್ತೆ ಆಸಾತ್. ಸವೆಂ, ಸುಂಕ್ಟಾಂ ಆನಿ ದುಸ್ರಿ ಮಾಸ್ಳಿ ಪೊಸ್ತೆಲೆಯೀ ಆಸಾತ್.

ಕುಂದಾಪುರ್ಚೊ ಜೆರಾಲ್ಡ್ ಕ್ರಾಸ್ತಾ 30 ವರ್ಸಾಂ ಥಾವ್ನ್ ಸುಂಕ್ಟಾಂಚಿ ಕೃಷಿ ಕರ್ತಾ. ಸುಂಕ್ಟಾಂ 90 ಥಾವ್ನ್ 120 ದಿಸಾಂನಿ ವಾಡ್ತಾತ್ ಮ್ಹಣ್ತಾ ತೊ. ಬಂಟ್ವಳ್ ಮೊಡಂಕಾಪ್‍ಚೊ ಜೆರಾಲ್ಡ್ ಮೊಂತೇರೊ ಏಕ್ ಪ್ರಗತಿಪರ್ ಕೃಷಿಕ್. ‘ರಚನಾ’ ಪ್ರಶಸ್ತಿ ಜೊಡ್‍ಲ್ಲ್ಯಾ ತಾಣೆಂ 8 ವರ್ಸಾಂ 40 ಸೆಂಟ್ಸ್ ಜಾಗ್ಯಾರ್ ದೋನ್ ತಳ್ಯಾಂನಿ ಮಾಸ್ಳಿ ಪೊಸ್ಲ್ಯಾ.

ನೀರ್ಮಾರ್ಗ ಲಾಗ್ಶಿಲ್ಯಾ ಪೊಯ್ಯೆಬೈಲಾಚೊ ಸನ್ನಿ ಜೆ. ಡಿಸೋಜ ಕೇರಳಾಚ್ಯಾ ತಲ್ಚೇರಿಂತ್ 30 ವರ್ಸಾಂ ಥಾವ್ನ್ ದರ್ಯಾಚಿ ಮಾಸ್ಳಿ ಮುಕ್ಕಾಲ್ ಎಕ್ರೆ ಜಾಗ್ಯಾರ್ ವಾಡಯ್ತಾ. ‘ಹೊ ಏಕ್ ವಾಡೊನ್ ಯೆಂವ್ಚೊ ವ್ಯವಹಾರ್, ಫುಡಾರ್ ಬರೊ ಆಸಾ’ ಮ್ಹಣ್ತಾ ತೊ.

ಮಾಸ್ಳೆ ಕೃಷಿ ವಿಶಿಂ ಮಾಹೆತ್, ಜಾಣ್ವಾಯ್ ಜಾಯ್ ಆಸ್‍ಲ್ಲ್ಯಾಂನಿ ಫಿಶರೀಸ್ ಕೊಲೆಜಿಚೊ ಆಕ್ವಾಕಲ್ಚರ್ ವಿಭಾಗಾಚೊ ಅಸಿಸ್ಟೆಂಟ್ ಪ್ರೊಫೆಸರ್ ಡಾ. ರವೀಂದ್ರ ಗೌಡ ಪಾಟೀಲಾಕ್ (7829708591) ಸಂಪರ್ಕ್ ಕರ್ಯೆತ್. ಜೊಕ್ತೆಂ ಮಾರ್ಗದರ್ಶನ್ ತೊ ದಿತಾ. ಮಾಸ್ಳಿ ಪೊಸ್ತೆಲ್ಯಾಂನಿ ಎಕ್ವಟಿತ್ ಜಾವ್ನ್ ವಾವುರ್ಲ್ಯಾರ್ ಮಾರ್ಕೆಟ್ ವಿಸ್ತರಣ್ ಕರುನ್ ಮುನಾಫೊ ಚಡ್ ಜೊಡ್ಯೆತ್ ಮ್ಹಣ್ತಾ ತೊ. ಸರ್ಕಾರಾ ಥಾವ್ನ್ ಸಬ್ಸಿಡಿಯೀ ಮೆಳ್ತಾ.

ಆಮ್ಚೆ ಕೆನರಾ ಕಥೊಲಿಕ್ ಕೃಷೆಂತ್ ಹೆಳ್ಳ್ಯಾತ್. ಸಾಧ್ಯ್ ಆಸ್‍ಲ್ಲ್ಯಾಂನಿ ಆಪಾಪ್ಲ್ಯಾ ಜಾಗ್ಯಾರ್ ಲ್ಹಾನ್ ವಾ ವ್ಹಡ್ ಮಟ್ಟಾರ್ ಮಾಸ್ಳೆ ಕೃಷಿ ಕೆಲ್ಯಾರ್ ಸ್ವಂತ್ ಉಪಯೋಗಾಕ್ ತಶೆಂ ವಿಕುನ್ ಆದಾಯ್ ಜೊಡುಂಕ್ ಹ್ಯಾ ವರ್ವಿಂ ಸಾಧ್ಯ್ ಜಾತಾ. ಆಸಕ್ತಾಂನಿ ಉಮೆದ್ ದಾಕಯ್ಲ್ಯಾರ್ ಫಾಯ್ದೊ ಜೊಡ್ಯೆತ್.

ಬಿದ್ರ್ಯಾಂ ಪಣಪಿಲಾಂತ್ ಮಾಸ್ಳೆ ಫೆಸ್ತ್

ಮೂಡುಬಿದ್ರೆಚ್ಯಾ ಪಣಪಿಲಾಂತ್ ರಾಜೇಶ್ ಕೋಟ್ಯಾನ್ ವ್ಹಡ್ ಮಟ್ಟಾರ್ ಮಾಸ್ಳೆ ಕೃಷಿ ಕರ್ನ್ ನಾಂವಾಡ್ಲಾ. ಪಾಂಚ್ ವರ್ಸಾಂ ಥಾವ್ನ್ ಕೊಡ್ಯಾಳ್ಚ್ಯಾ ಕೃಷಿ ವಿಜ್ಞಾನ್ ಕೇಂದ್ರಾ ಥಾವ್ನ್ ಮಾರ್ಗದರ್ಶನ್ ಘೆವ್ನ್ 7 ಜಾತಿಚ್ಯೊ ಮಾಸ್ಳ್ಯೊ ಪೊಸ್ತಾ ತೊ. ಶಿವಾಯ್ ಮಾಸ್ಳೆಚಿಂ ಪಿಲಾಂ ಕೊಲ್ಕೊತ್ತಾ ಆನಿ ಚೆನ್ನೈ ಥಾವ್ನ್ ಹಾಡಯ್ತಾ. ಕೊಣಾಕ್‍ಯೀ ಪಿಲಾಂ ಜಾಯ್ ತರ್ ತಾಕಾ ಸಂಪರ್ಕ್ ಕರ್ಯೆತ್.

ಏಕ್ ಕೆ.ಜಿ. ಥಾವ್ನ್ 5-6 ಕೆ.ಜಿ. ಪರ್ಯಾಂತ್ ಜಾಂವ್ಚ್ಯೊ ಮಾಸ್ಳ್ಯೊ ಆಸಾತ್. ಶ್ರಮ್ ಆನಿ ಖರ್ಚ್ ಉಣೊ ಮ್ಹಣ್ತಾ ರಾಜೇಶ್. ದ.ಕ. ಆನಿ ಉಡುಪಿ ಜಿಲ್ಲ್ಯಾಂನಿ ಲಗ್ಬಗ್ 150 ಜಣ್ ಪ್ರಸ್ತುತ್ ಮಾಸ್ಳೆಚಿ ಕೃಷಿ ಕರ್ತಾತ್ ಮ್ಹಣ್ತಾ ತೊ.

ಜುಲೈ 12 ಆನಿ 13ವೆರ್, ಸನ್ವಾರಾ ಆನಿ ಆಯ್ತಾರಾ, ರಾಜೇಶ್ ಕೋಟ್ಯಾನಾಚ್ಯಾ ಜಾಗ್ಯಾಂತ್ ಮೀನುಗಾರಿಕೆ ಇಲಾಖೆ ಆನಿ ಫಿಶರೀಸ್ ಕೊಲೆಜಿನ್ ಆಯೋಜನ್ ಕೆಲ್ಲೊ ‘ಮತ್ಸ್ಯ ಮೇಳ’ ಚಲ್ತಾ. ತಜ್ಞ್ ಹಾಜರ್ ಆಸ್ತೆಲೆ. ತರ್ಬೆತಿ ಶಿಬಿರ್ ಆಸೊನ್, ಮಾಸ್ಳ್ಯೊ ಆನಿ ಪಿಲಾಂಯೀ ಮೆಳ್ತಾತ್. ಆಸಕ್ತ್ ಆಸ್‍ಲ್ಲ್ಯಾಂನಿ ಭಾಗ್ ಘೆವ್ನ್ ಮಾಸ್ಳಿ ಕೃಷೆ ವಿಶಿಂ ಜಾಣ್ವಾಯ್ ಜೊಡ್ಯೆತ್ ಆನಿ ತರ್ಬೆತಿ ಘೆವ್ಯೆತ್. ರಾಜೇಶಾಕ್ ಸಂಪರ್ಕ್ ಕರುಂಕ್ 8722692863 ನಂಬ್ರಾಕ್ ಫೋನ್ ಕರ್ಯೆತ್.

ಹೆಂ ಲೇಖನ್ ರಾಕ್ಣೊ ಪತ್ರಾಚ್ಯಾ ಜುಲಾಯ್ 04-10, 2025 ಆಂಕ್ಯಾಂತ್ ಪ್ರಕಟ್ ಜಾಲಾಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel