ಇಂಫೆರ್ನಾಚಿಂ ದಾರಾಂ – 16: ಮ್ಹಜಿ ಗರಿ, ಮ್ಹಜಿ ಅತಿಥಿ

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 16
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 16: ಮ್ಹಜಿ ಗರಿ, ಮ್ಹಜಿ ಅತಿಥಿ

ತಿಕಾ ಹಾಂಗಾಸರ್ ಆಪವ್ನ್ ಹಾಡ್‍ಲ್ಲ್ಯಾಂಚೊ ಮುಖೆಲಿ – ಪರಾರಿ ಖಿಲ್ಲೆದಾರ್ ಫಕೀರ್ ಮಹಮ್ಮದ್ – ಜಹನಾರಾ ಫಾತಿಮಾ ಬೇಗಮೆಚೊ ಬಾಪುಲ್ ಭಾವ್, ಆಪ್ಣಾಕ್ ಮಹಮ್ಮದೀಯ್ ದೀಕ್ಷಾ ದೀವ್ನ್, ಮುಸ್ಲಿಮ್ ದಸ್ತುರೆ ಪ್ರಕಾರ್ – ಹೆರ್ ಕಿತ್ಲ್ಯೊ ಬಾಯ್ಲೊ ಆಸ್ಲ್ಯಾರೀ ಕಾಜಾರ್ ತೊ ಜಾತಲೊ!

ಸಾಯ್ಬಾ ಭೊಗೊಸ್!

ಬೇಗಮೆನ್ ಸಾಂಗ್‍ಲ್ಲೆಪರಿಂ ಹೆಂ ಸಮ್ಜೊಂಕ್ ತಿಕಾ ನಿಜಾಯ್ಕೀ ಕಷ್ಟ್ ಜಾಲೆ ನಾಂತ್. ಬಗಾರ್, ಕೊಡಿಯಾಲ್‍ಬೈಲ್‍ಚ್ಯಾ ಮಹಂತಣಿ ಘರಾಣ್ಯಾಂತ್ಲ್ಯಾ ಸಾವ್ಕಾರ್ ಮಾರ್ಸೆಲ್ ಕುವೆಲಿಚ್ಯಾ ತ್ಯಾ ಅಂಕ್ವಾರ್ ಭಯ್ಣಿಕ್, ಕುರಿಯೆಲಾಂತ್ ಚುಕವ್ನ್ ಆನಿ ಲಿಪೊನ್ ಉರ್‌ಲ್ಲ್ಯಾ ಕ್ರಿಸ್ತಾಂವಾಂಕ್ ಆಧಾರ್, ಆಸ್ರೊ ಆನಿ ಅಭಿಮಾನ್ ಜಾವ್ನಾಸ್‍ಲ್ಲ್ಯಾ ತ್ಯಾ ವೀರ್ ಕುಂವರ್ನಿಕ್, ವಯ್ಲೆಂ ಉತ್ರಾನ್ ಉತಾರ್, ತಲ್ವಾರಿಚ್ಯಾ ಧೊಮೊಸಾಪರಿಂ ಕಾಳ್ಜಾಂತ್ ರಿಗ್ಲೆಂ.

ತಿಚ್ಯಾ ಜಿಣಿಯೆಂತ್, ನವ್ಯಾಚ್ ಜಿನ್ಸಾಚ್ಯಾ ಮಾಡ್ತಿರ್ಪಣಾಚೆಂ ಹೆಂ ಖುಣ್ ತಿಕಾ ಥರ್ಥರಾಂವ್ಕ್ ಲಾಗ್ಲೆಂ.

“ಕಿತ್ಯಾಕ್ ವೊಗಿಚ್ ರಾವ್ಲಿಯ್?” ವಿಚಾರಿಲಾಗ್ಲಿ ಜಹನಾರಾ ಫಾತಿಮಾ ಬೇಗಮ್, ಜೊ ಸ್ವರ್ ಪಯ್ಸ್ ಸಪ್ಣಾಂತ್ ಮ್ಹಳ್ಳೆಪರಿಂ ವೆರೊನಿಕಾ ಕುಂವರ್ನಿಕ್ ಆಯ್ಕಲೊ. “ರಾಜ್ ಕುಳಿಯೆಚ್ಯಾ ಎಕಾ ಮಾನೆಸ್ತಾಚಿ ಏಕ್ ಪ್ರಮುಖ್ ಸ್ತ್ರೀ ಜಾಂವ್ಚೆಂ ತುಜೆಂ ಭಾಗ್‍ಚ್ ಮ್ಹಣಜಾಯ್.”

ಸಂತೊಸಾನ್ ನಹಿಂ ತರೀ ವೆರೊನಿಕಾಕ್ ಹಾಸೊಂಕ್ ಆಯ್ಲೆಂ. ತಸಲ್ಯಾ ರಾಜ್ ಕುಳಿಯೆಚ್ಯಾ ‘ಮಾನೆಸ್ತಾಂಕ್’ ಎಕ್‍ಚ್ ನಹಿಂ, ಬಗಾರ್, ಸಬಾರ್ ಸ್ತ್ರೀಯೊ ಆಸ್ಯೆತ್ ಮ್ಹಣ್ ತಿ ಜಾಣಾಂಸ್‍ಲ್ಲಿ.

“ವ್ಹಯ್” ಮ್ಹಳೆಂ ತಿಣೆಂ. “ತಸಲೆಂ ಭಾಗ್ ಕೊಣಾಯ್ಕೀ ಫಾವೊ ಜಾಂವ್ಚೆಂ ನಾಕಾ.”

“ಕಿತ್ಯಾಕ್ ತಶೆಂ ಮ್ಹಳೆಂಯ್?” ಬೇಗಮೆನ್ ತೆಲ್ತೆಂ ಸವಾಲ್ ಕೆಲೆಂ.

“ತುಂಯೀ ಮ್ಹಜೆಪರಿಂಚ್ ಎಕ್ಲಿ ಸ್ತ್ರೀ” ವೆರೊನಿಕಾನ್ ಜಾಪ್ ದಿಲಿ. “ಆತಾಂ ಹಾಂವ್ ಆಸ್‍ಲ್ಲ್ಯಾ ಪರಿಸ್ಥಿತಿಂತ್ ಜರ್ ತುಂ ಆಸ್‍ಲ್ಲಿಯ್ – ತುಕಾ ಸಮ್ಜಯೆತೆಂ.”

“ಮ್ಹಳ್ಯಾರ್?” ಬೇಗಮ್ ಚಿಕ್ಕೆ ಭಿಗಡ್ಲಿ. “ಆಮ್ಚ್ಯಾ ಖುಶೆಕ್ ತುಂ ಖುಶೆನ್ ಕಬೂಲ್ ಜಾಯ್ನಾಂಯ್‍ಶಿ ದಿಸ್ತಾ!”

“ತುಕಾ ತಶೆಂ ದಿಸ್‍ಲ್ಲೆಂ ಸಾರ್ಕೆಂ.”

“ಪಳೆಯಾಂ ತರ್” ಮ್ಹಣಾಲಿ ಬೇಗಮ್, ಚಿಕ್ಕೆ ಗರಮ್ ಜಾವ್ನ್. “ತುಂ ಹಾಂಗಾ ಪಾವ್ಲ್ಯಾಯ್. ಹಾಂಗಾ ಪಾವ್ಲ್ಯಾ ಉಪ್ರಾಂತ್ ತುವೆಂ, ಆಮ್ಚಿ ಶಿವಾಯ್ ತುಜಿ ವಾ ಹೆರಾಂಚಿ ಖುಶಿ ಕರುಂಕ್ ಸಾಧ್ಯ್ ನಾ.”

“ಕಿತ್ಯಾಕ್ ಬಹೆನ್?” ವೆರೊನಿಕಾನ್ ವಿಚಾರ್ಲೆಂ. “ತುಮ್ಕಾಂ ಕಿತೆಂ ವಾಯ್ಟ್ ಹಾಂವೆಂ ಕೆಲಾಂ?”

“ತುವೆಂ ಆಮ್ಕಾಂ ವಾಯ್ಟ್ ಕರುಂಕ್ ನಾ ಜಾವ್ಯೆತ್” ತಿಕಾ ಜಾಪ್ ಮೆಳ್ಳಿ. “ಪುಣ್ ತುಂ ಮ್ಹಜ್ಯಾ ಬಾಪುಲ್ ಭಾವಾಚಿ ಸ್ತ್ರೀ ಜಾವ್ನ್ ಆಮ್ಚ್ಯಾ ಕುಟ್ಮಾಂತ್ ರಾವನಾ ತರ್ ಜಾಶಿ, ಮ್ಹಜ್ಯಾ ಬಾಪುಲ್ ಭಾವಾಕ್ ಚಡ್ ವಾಯ್ಟ್ ಘಡ್ತೆಲೆಂ. ದೆಕುನ್ ಖುಶೆನ್ ಜಾಂವ್ ನಾ ಖುಶೆನ್ – ತುವೆಂ ಆಮ್ಚಿಚ್ ಖುಶಿ ಜಾರಿ ಕರಿಜಾಯ್.”

“ಹೆಂ ರಾಜಾಂವ್ ಆನಿ ಹಿ ಜಬರ್ದಸ್ತೆಚಿ ನೀತ್ ಮ್ಹಾಕಾ ಸಮ್ಜನಾ” ಮ್ಹಣಾಲಿ ವೆರೊನಿಕಾ.

“ಸಮ್ಜೊಂಕ್ ಮನ್ ಕೆಲ್ಯಾರ್, ಸಮ್ಜೊಂಕ್ ಕಷ್ಟ್ ನಾಂತ್” ಮ್ಹಣಾಲಿ ಬೇಗಮ್ ವಿರಾರ್ ಜಾವ್ನ್.

“ಮ್ಹಣ್ಜೇ?”

“ಮ್ಹಣ್ಜೆ… ಟಿಪ್ಪು ಸುಲ್ತಾನಾ ಕಡೆನ್ ಆಮ್ಕಾಂ ದುಸ್ಮಾನ್ಕಾಯ್ ನಾ. ಪುಣ್ ತಾಚೊ ಸರ್ದಾರ್ ಜಾವ್ನಾಸ್ಚ್ಯಾ ಸರ್ದಾರ್ ಸಿಮಾಂವ್ಚಿ ಆಮ್ಕಾಂ ಭಿರಾಂತ್ ಆಸಾ. ಫಕೀರ್ ಮಹಮ್ಮದ್ ಪರಾರಿ ಜಾಲಾ ಮ್ಹಳ್ಳಿ ಖಬರ್ ತಾಕಾ ಮೆಳತ್ ಜಾಲ್ಯಾರ್ – ಆನಿ ಜೀವ್ ತೊ ಸರ್ದಾರ್ ಆಸತ್ ಜಾಲ್ಯಾರ್ – ಫಕೀರ್ ಮಹಮ್ಮದಾಚ್ಯಾ ಸೊಧ್ನೆಕ್ ಲಾಗೊನ್, ನೀತ್ ಜಾರಿ ಕೆಲ್ಯಾ ಶಿವಾಯ್ ತೊ ರಾವಸೊ ನಾ ಮ್ಹಳ್ಳೆಂಯೀ ಆಮಿ ಜಾಣಾಂವ್. ತ್ಯಾ ಅಪಾಯಾಚಿ ಖರಿ ಬಂದೋಬಸ್ತ್ ಕರ್ಚ್ಯಾ ಖಾತಿರ್ ಅಸಲೆಂ ಮೇಟ್ ಆಮಿ ಚಿಂತ್ಲಾಂ.”

“ತರೀ” ಮ್ಹಣಾಲಿ ವೆರೊನಿಕಾ ಚಿಂತುನ್. “ಹಾಂವ್ ಅಪಾಯಾಂತ್ ಆಸಾಂ ಮ್ಹಣ್, ಆನಿ ಅಶೆಂ ಜಾಂವ್ಕ್ ಕೋಣ್ ಕಾರಣ್ ಮ್ಹಣ್ ತಾಕಾ ಕಳತ್ ಜಾಲ್ಯಾರ್…”

ಫುಡೆಂ ಉಲಂವ್ಕ್ ತಿಚೆಂ ಮನ್ ಕಬೂಲ್ ಜಾಲೆಂ ನಾ. ‘ಆನಿ ಜೀವ್ ತೊ ಸರ್ದಾರ್ ಆಸತ್ ಜಾಲ್ಯಾರ್’ ಮ್ಹಳ್ಳಿಂ ಉತ್ರಾಂ ತಿಕಾ ಪರ್ತ್ಯಾನ್ ಉಗ್ಡಾಸ್ ಯೇವ್ನ್ ಭಿರಾಂತ್ ದೀಂವ್ಕ್ ಲಾಗ್ಲಿಂ. ಸರ್ದಾರ್ ಸಿಮಾಂವ್ಕ್‌ಯೀ ಲಗಾಡ್ ಕಾಡುಂಕ್ ಹ್ಯಾ ವಾಯ್ಟ್ ಮನ್ಶ್ಯಾಂನಿ ಫಿತೂರಿ ಚಲಯ್ಲ್ಯಾ ಮ್ಹಣ್ ತಿಕಾ ದುಬಾವ್ ಮಾರ್ಲೊ. ಆನಿ ತೆಂ ಚಿಂತುನ್ ತಿಕಾ ಆಪುಣ್ ಆಸ್‍ಲ್ಲ್ಯಾ ಅಪಾಯಾಚಿ ವಿಸರ್ ಪಡ್ಲಿ. ‘ಆಪ್ಣಾಕ್ ಜಾಲ್ಯಾರೀ ದೇವ್ ಜಾಯ್ ತಶೆಂ ಕರುಂದಿ, ಪುಣ್ ಕ್ರಿಸ್ತಾಂವ್ ಸಮಾಜೆ ಖಾತಿರ್ ತೊ ಸರ್ದಾರ್ ಸುರಕ್ಷಿತ್ ಉರೊಂದಿ’ ಮ್ಹಣ್ ತಿ ಮತಿಂತ್ ಮಾಗೊಂಕ್ ಲಾಗ್ಲಿ.

“ತುಕಾ ಹಾಂವ್ ಸೊಡವ್ನ್ ಸಾಂಗ್ತಾಂ” ಮ್ಹಣಾಲಿ ಜಹನಾರಾ, ಚಿಕ್ಕೆ ಮೋವ್ ಜಾವ್ನ್. “ತುಂ ಅಪಾಯಾಂತ್ ಆಸಾಯ್ ಮ್ಹಣ್ ಜಾಂವ್, ವಾ, ಅಶೆಂ ಜಾಂವ್ಕ್ ತೊಚ್ ಕಾರಣ್ ಮ್ಹಳ್ಳೆಂ ಜಾಂವ್, ತಾಕಾ ಕಳಿತ್ ಜಾಂವ್ಚೊ ಭರ್ವಸೊ ನಾ. ಕಿತ್ಯಾಕ್, ತಾಕಾ ಸಿರಿರಂಗಪಟ್ಟಣಾಂತ್ ಮುಗ್ದುಂಚಿ ಮಾಂಡಾವಳ್ ಆಮಿ ಕೆಲ್ಯಾ. ಆನಿ ಜರ್ ತಿ ಮಾಂಡಾವಳ್ ಆಮ್ಚಿ ಫಳಾಧಿಕ್ ಜಾಯ್ನಾ, ತರ್ ತೊ ಕುರಿಯೆಲಾಕ್ ಯೆತಲೊ. ಪುಣ್ ಮ್ಹಜೊ ಬಾಪುಲ್ ಭಾವ್ ಥಂಯ್ಸರ್ ತಾಕಾ ಮಳಸೊ ನಾ. ತಶೆಂ ಜಾಂವ್ಕ್ ಆಬ್ಳೆ ತಾಣೆಂ ಅಶಿ ಚತ್ರಾಯ್ ಘೆತ್ಲ್ಯಾ.”

ಹೆಂ ಆಯ್ಕೊನ್ ವೆರೊನಿಕಾ ಉಲಂವ್ಕ್ ನಾ.

“ಆನಿ ಎಕಾದಾವೆಳಾ” ಬೇಗಮ್ ಮುಖಾರ್ ಉಲಯ್ಲಿ. “ತೊ ಜಿವಂತ್ ಉರೊನ್ ಫಕೀರ್ ಮಹಮ್ಮದಾಕ್ ಸೊಧುನ್ ಯೆತಾ ಮ್ಹಣ್ ಕಳತ್ ಜಾಲ್ಯಾರ್…”

“ಜಾಲ್ಯಾರ್?”

“ಜಾಲ್ಯಾರ್…” ಮ್ಹಣಾಲಿ ಬೇಗಮ್. “ತುಂ ಫಕೀರ್ ಮಹಮ್ಮದಾಚಿ ನಿತಿ ಪ್ರಕಾರ್ ಆನಿ ಧರ್ಮಾ ಪ್ರಕಾರ್ ಲಗ್ನ್ ಜಾಲ್ಲಿ ಪತಿಣ್ ಮ್ಹಣ್ ಆಮಿ ತಾಕಾ ಖಬರ್ ಧಾಡ್ತೆಲ್ಯಾಂವ್. ತಶೆಂ ಜಾಲ್ಯಾರ್, ತುಜ್ಯಾ ಆನಿ ತುಜ್ಯಾ ಭಯ್ಣಿಚ್ಯಾ ಸುಖಾ ಖಾತಿರ್ ಪುಣೀ, ಫಕೀರ್ ಮಹಮ್ಮದಾಕ್ ಕೈದ್ ಕರುಂಕ್ ತೊ ಪಾಟಿಂ ಸರ್ತಲೊ. ಆನಿ ಟಿಪ್ಪು ಸುಲ್ತಾನಾಚ್ಯಾ ನದ್ರೆಂತ್ ಹರ್ವತಲೊ. ತ್ಯಾ ಶಿವಾಯ್…”

“ತ್ಯಾ ಶಿವಾಯ್?”

“ತ್ಯಾ ಶಿವಾಯ್, ಮ್ಹಜ್ಯಾ ರಾಜ್ಯಾಚೆರ್ ಅಕ್ರಮ್ ಪ್ರವೇಶ್ ಕರಿನಾ ಮ್ಹಣ್, ಆನಿ ಹಾಂವೆಂ ಆಸ್ರೊ ದಿಲ್ಲ್ಯಾ ನಸ್ರಾನಿಂಚೆರ್ ಜಾಂವ್ ಅಪ್ರಾಧ್ಯಾಂಚೆರ್ ಖಂಯ್ಚೆಂಯೀ ಕ್ರಮ್ ಘೆಂವ್ಚೊ ನಾ ಮ್ಹಣ್ ಟಿಪ್ಪು ಸುಲ್ತಾನಾನ್ ಮ್ಹಜೆ ಕಡೆನ್ ಸೊಲ್ಲೊ ಕೆಲ್ಲೊ ಆಸಾ.

“ಹೆಂ ಸಕ್ಕಡ್ ಹಾಂವ್ ತುಕಾ ಕಿತ್ಯಾಕ್ ಸಾಂಗ್ತಾಂ ಮ್ಹಳ್ಳೆಂ ಚಿಂತುನ್ ಪಳೆ… ಪಾಟಿಂ ವಚೊಂಕ್ ತುಕಾ ಸಾಧ್ಯ್ ನಾ, ಆನಿ ಫಕೀರ್ ಮಹಮ್ಮದಾ ಕಡೆನ್ ಕಾಜಾರ್ ಜಾಲ್ಯಾ ಶಿವಾಯ್ ತುಕಾ ಬಚಾವಿ ನಾ.”

ವೆರೊನಿಕಾ ಉಲಂವ್ಕ್ ನಾ.

“ಕಿತ್ಯಾಕ್ ಜಾಪ್ ಕರಿನಾಂಯ್?” ಮ್ಹಣಾಲಿ ಬೇಗಮ್.

“ತುಂ ಮ್ಹಜೆಪರಿಂ ಕ್ರಿಸ್ತಾಂವ್ ನಹಿಂ ಜಾಲ್ಯಾರೀ, ಮ್ಹಜೆಪರಿಂ ಸ್ತ್ರೀ” ಮ್ಹಣಾಲಿ ವೆರೊನಿಕಾ. “ಧರ್ಮ್ ಬದ್ಲುಂಚ್ಯಾ ಆನಿ ಕಾಜಾರಾಚ್ಯಾ ಪ್ರಸ್ತಾಪಾಕ್ ಇತ್ಲ್ಯಾ ಸುಲಭಾಯೆನ್ ಅವ್ಮರ್ಯಾದ್…”

“ಹ್ಹ-ಹ್ಹಾ! ಉಲಯಿಲ್ಲೆಂ ನಿಜಾಯ್ಕೀ ಚಡ್ ಜಾಲೆಂ” ಮ್ಹಣತ್ತ್, ಆಡೊಸಾಕ್ ರಾವ್‍ಲ್ಲೊ ಫಕೀರ್ ಮಹಮ್ಮದ್ ಫುಡೆಂ ಆಯ್ಲೊ. ಲಾಗಿಂ ಯೇವ್ನ್ ವೆರೊನಿಕಾಕ್ ಪಳೆವ್ನ್ ತೊ ರಾವ್ಲೊ. “ಕುಂಕ್ಡಾ ಕಡೆನ್ ವಿಚಾರ್ನ್ ಆಳೆನ್ ಕೊಣೀ ಕಾಡಿನಾಂತ್.”

ವೆರೊನಿಕಾಚ್ಯಾ ಕುಡಿ ಭಿತರ್ ತಿಚೆಂ ಕಾಳಿಜ್ ಕಾಂಪೊಂಕ್ ಲಾಗ್ಲೆಂ.

“ಧರ್ಮ್ ಬದ್ಲುಂಚೊ ವಿಷಯ್ ಖಂಯ್!” ಮ್ಹಣಾಲೊ ತೊ. “ತುವೆಂ ಆಯ್ಕಲಾಂಯ್ ಜಾಂವ್ಕ್ ಪುರೊ – ಸಿರಿರಂಗಪಟ್ಟಣಾಕ್ ಧರ್ನ್ ವ್ಹೆಲ್ಲ್ಯಾ ನಸ್ರಾನಿಂಕ್ ತಶೆಂ ಹೆರ್ ಜಾತಿಚ್ಯಾಂಕ್ ಕಿತೆಂ ಜಾತಾ ತೆಂ. ಥಂಯ್ಸರ್ ಹಫ್ತ್ಯಾಕ್ ಏಕ್ ಪಾವ್ಟಿಂ ಅರ್ಧಿ ಕಂಪ್ಣಿ, ಪನ್ನಾಸ್, ದಾದ್ಲ್ಯಾಂಕ್ ಉಗ್ತ್ಯಾ ಮಯ್ದಾನಾರ್ ರಾವವ್ನ್ ಬಲಾತ್ಕಾರೆನ್ ಸುಂತಾ ಕರ್ತಾತ್ – ಮ್ಹಜ್ಯಾ ತೊಂಡಾಕ್ ಪಳೆ!” ಮ್ಹಣೊನ್ ಖಾಡ್ಕಿ ಧರ್ನ್ ತಿಚೆಂ ಮುಖಮಳ್ ತಾಣೆಂ ವಯ್ರ್ ಉಕಲ್ಲೆಂ.

ತಿಚೆಂ ಆಂಗ್ ಥರ್ಥರ್ಲೆಂ. ತಾಚೆಂ ಸೊಂಡ್ ಪಳೆಂವ್ಕ್ ನಾಕಾ ತಶೆಂ ಕಾಂಠಾಳೊನ್ ದೊಳೆ ತಿಣೆಂ ಧಾಂಪುನ್ ಧರ್ಲೆ.

“ತುಜೆ ಕಡೆನ್ ಕಾಜಾರ್ ಜಾಂವ್ಕ್ ಆಶೆಂವ್ಚ್ಯಾ ಅಮೀರ್ ಫಕೀರ್ ಮಹಮ್ಮದಾಚೆಂ ತೋಂಡ್ ಪಳೆ” ಮ್ಹಣಾಲೊ ತೊ, ಲಜ್ ನಾಸ್ತಾನಾ ತಿಚೆ ಪೊಲೆ ಪೊಶೆವ್ನ್.

“ಅಮ್ಸೊರ್ ಕರಿನಾಕಾ ಭಾಯೀ” ಮ್ಹಣಾಲಿ ಜಹನಾರಾ ಬೇಗಮ್, ಜಳ್ಚ್ಯಾ ಉದ್ಕಾಚೆರ್ ತೇಲ್ ವೊತುನ್ ಮ್ಹಳ್ಳೆಪರಿಂ. “ಕಿತೆಂ ಮ್ಹಳ್ಯಾರೀ ಆತಾಂ ತುಂ ತಿಕಾ ಪರ್ಕಿ ಜಾತ್. ತಿಣೆಂ ಲಜೆಂವ್ಚೆಂ ವಾಜ್ಭಿಚ್. ತಿಕಾ ಥೊಡಿ ಪುರ್ಸತ್ ದೀ.”

“ಚಡ್ ಪುರ್ಸತ್ ದೀಂವ್ಕ್ ಪುರ್ಸತ್ ನಾ” ಮ್ಹಣಾಲೊ ತೊ ಚಿಕ್ಕೆ ಪಾಟಿಂ ಸರೊನ್. “ಕಸೊಯೀ ಮ್ಹಜೊ ಕುರಿಯೆಲಾಂತ್ಲೊ ಹುದ್ದೊ ತರೀ ಹೊಗ್ಡಾವ್ನ್ ಸುಲ್ತಾನಾಚ್ಯಾ ನಿತಿಚ್ಯಾ ದಾವ್ಲೆಂತ್ಲೊ ವಿಮುಕ್ತ್ ಹಾಂವ್ ಜಾಲಾಂ. ತ್ಯಾ ತೆಕಿದ್ ಭಾಡೆಂ ವಸೂಲ್ ಜಾತೆಲೆಂಚ್…”

“ತಶೆಂ ಜಾಂವ್ಕ್ ಅಡ್ಕಳ್ ಕಸಲಿ? ತಿಕಾ ಥೊಡಿ ಪುರ್ಸತ್ ದೀ. ಖಂಚೆಂ ಬರೆಂ ಮ್ಹಣ್ ಸಮ್ಜತಚ್ ಖುಶೆನ್ ತಿ ಕಬೂಲ್ ಜಾತೆಲಿ” ಮ್ಹಣಾಲಿ ಬೇಗಮ್.

“ಹಾಂವ್ ಕಬೂಲ್ ನಾ” ಮ್ಹಣಾಲಿ ವೆರೊನಿಕಾ.

“ಹ್ಹ-ಹ್ಹಾ!” ಫಕೀರ್ ಮಹಮ್ಮದಾನ್ ದಾಂತ್ ಸೊಡ್ಲೆ. “ತುವೆಂ ಖುಶೆನ್ ಕಬೂಲ್ ಜಾಯ್ನಾತ್ಲ್ಯಾರ್, ಫುಡ್ಲ್ಯಾ ಸಾತ್ ದಿಸಾಂ ಭಿತರ್ – ತುಜ್ಯಾ ಕಾನಾಂಕ್ ಸಾತ್ ಸಾತ್ ಬುರಾಕ್ ಕರವ್ನ್…”

“ನಾಕಾ, ನಾಕಾ” ಮ್ಹಣಾಲಿ ಬೇಗಮ್. “ಬಲಾತ್ಕಾರಾನ್ ತಿಚೆಂ ಧರ್ಮ್ ಧರ್ಮ್ ಬದ್ಲುಂಚಿ ಗರ್ಜ್ ಪಡ್ಚಿ ನಾ.”

ದೋನ್ ಮಾಜ್ರಾಂ ಎಕಾ ಉಂದ್ರಾಕ್ ಖೆಳಂವ್ಚ್ಯಾ ಜಿನ್ಸಾರ್, ಫಕೀರ್ ಮಹಮ್ಮದಾಚ್ಯಾ ಆನಿ ಬೇಗಮೆಚ್ಯಾ ಉತ್ರಾಂ ಮಧೆಂ ಮಾನಿನ್ ವೆರೊನಿಕಾ ಕುವೆಲ್ ಕಳ್ವಳೊಂಕ್ ಲಾಗ್ಲಿ. ಪಯ್ಸ್ ಥಾವ್ನ್, ಸಪ್ಣಾಂತ್ ಮ್ಹಳ್ಳೆಪರಿಂ ತಾಂಚಿಂ ಉತ್ರಾಂ ತಿಕಾ ಆಯ್ಕಲಿಂ.

“ಮರ್ಯಾದಿನ್ ಮ್ಹಜಿ ಪತಿಣ್ ಜಾಂವ್ಕ್ ತಿಕಾ ಖುಶಿ ನಾತ್ಲ್ಯಾರ್…”

“ನಾ, ತಶೆಂ ಜಾಂವ್ಚೆಂ ನಾ” ಮ್ಹಣಾಲಿ ಬೇಗಮ್ ಪರ್ತ್ಯಾನ್ ಮಧೆಂ ಉಲವ್ನ್. “ಮರ್ಯಾದಿಚ್ಯಾ ಕುಟ್ಮಾಂತ್ಲಿ ಸ್ತ್ರೀ, ಮರ್ಯಾದ್ ಸಾಂಬಾಳ್ಚ್ಯಾ ಖಾತಿರ್ ತುಜೆ ತಸಲ್ಯಾ ಮಾನೆಸ್ತಾ ಕಡೆನ್ ಕಾಜಾರ್ ಜಾತೆಲಿಚ್. ಶಿವಾಯ್, ಧಾ ಜಣಾಂಚ್ಯಾ ಖೆಳಾಚಿ ವಸ್ತ್ ಜಾಂವ್ಚಿ ನಾ” ಮ್ಹಣೊನ್ ತಿ ಹಾಸ್ಲಿ.

ಮುಸ್ಲಿಮ್, ತ್ಯಾ ಭಾಯ್ರ್ ಸ್ತ್ರೀ, ತಸಲೊ ಪ್ರಸ್ತಾಪ್ ದಾದ್ಲ್ಯಾ ಕಡೆನ್ ಉಲಂವ್ಚಿ ಸಡಿಳಾಯ್ ಆನಿ ಸಳಾವಳ್ ಚಿಂತುನ್, ಮಾನಿನ್ ವೆರೊನಿಕಾ ಬಿತರ್ಲ್ಯಾ ಭಿತರ್ ಚಡ್ ಲಜೆಲಿ ಆನಿ ಚಡ್ ಆಕಾಂತ್ಲಿ.

“ಎಕ್‍ಚ್ ತಿಣೆಂ ಮ್ಹಜಿ ಸ್ತ್ರೀ ಜಾಯ್ಜಯ್, ನಾ ಜಾಲ್ಯಾರ್ ಗುಲಾಮ್ ತಶಿ ಮ್ಹಾಕಾ ಖುಶಾಲಾಯ್ ದಿಂವ್ಚಿ ಏಕ್ ಬಾವ್ಲಿ ಜಾಯ್ಜಯ್” ಮ್ಹಣಾಲೊ ತೊ. “ಖಂಚೆಂಯೀ ಮ್ಹಾಕಾ ಜಾತಾ ತಿತ್ಲ್ಯಾ ವೆಗಿಂ ಕಳಿತ್ ಜಾಲ್ಲೆಂ ಬರೆಂ” ಮ್ಹಣೊನ್, ಪರ್ತ್ಯಾನ್ ತಿಚ್ಯಾ ದೊಳ್ಯಾಂಕ್ ಕಾಳೊಕ್ ಯೆತಾಸೊ ಭೊಗ್ಲ್ಯಾರೀ, ಮನ್ ಘಟ್ ಧರುನ್ ಆನಿ ದಾಡಾಮಾಂ ದಾಂಬುನ್ ಜಾಗಿ ತಿ ರಾವ್ಲಿ.

“ಅಸಲ್ಯಾ ವಿಷಯಾಂನಿ, ಹಾಂವೆಂ ಮ್ಹಳೆಂ, ಅಮ್ಸೊರ್ ಕರಿನಾಯೆ” ಮ್ಹಣಾಲಿ ಜಹನಾರಾ, ಉತ್ರಾಚಿ ಧಾರ್ ಬದ್ಲುನ್. “ಉಗ್ಡಾಸ್ ದವರ್ ಭಾಯೀ, ಮ್ಹಜ್ಯಾ ರಾಜ್ಯಾಂತ್ ಜಾಂವ್ಚೆಂ ಕಿತೆಂಯೀ ನಿತಿ ಪ್ರಕಾರ್‌ಚ್ ಜಾಯ್ಜಯ್. ಮ್ಹಜೊಚ್ ಭಾವ್ ತುಂ ಜಾಲ್ಯಾರೀ, ಮ್ಹಜ್ಯಾ ರಾವ್ಳೆರಾಂತ್ ಸ್ತ್ರೀಯಾಂಚೆರ್ ಜಾಂವ್ ಜುಲುಮ್ ವಾ ಅತ್ಯಾಚಾರ್ ಚಲೊಂಕ್ ಸಾಧ್ಯ್ ನಾ.”

“ಕಿತೆಂ ಮ್ಹಣ್ತಾಯ್ ಬಹೆನ್ ತುಂ!” ಮ್ಹಣಾಲೊ ತೊ ಚಿಕ್ಕೆ ಅಜ್ಯಾಪ್ ಜಾವ್ನ್. “ಮ್ಹಾಕಾ, ಪುರ್ತೊ ಸಹಕಾರ್ ತುವೆಂ ಭಾಸಾಯ್ಲಾಯ್.”

“ವ್ಹಯ್, ಸಹಕಾರ್ ಹಾಂವೆಂ ಭಾಸಾಯ್ಲಾ. ತ್ಯಾ ಸರ್ದಾರಾಚ್ಯಾ ಫರ್ಮಾಣಾ ಪ್ರಕಾರ್ ತುಂ ಸಲ್ವೊನ್ ನಾಸ್ ಜಾಯ್ನಾತ್‍ಲ್ಲೆಪರಿಂ.”

“ಆನಿ ತರ್?”

“ಆನಿ ತರ್ – ತುಜಿ ಬಚಾವಿ ಭದ್ರ್ ಜಾಂವ್ಚ್ಯಾ ಖಾತಿರ್ ತುವೆಂ ಚಿಂತ್‍ಲ್ಲ್ಯಾ ಯೋಜನಾಂಕ್ – ಮ್ಹಜೊ ಸಹಕಾರ್ ಆಸ್ತಲೊಚ್. ತಶೆಂ ಆಸ್ಲ್ಯಾರೀ ಥೊಡೆ ವಿಷಯ್ ತುವೆಂ ಉಗ್ಡಾಸ್ ದವರುಂಕ್ ಜಾಯ್.”

“ಮ್ಹಣ್ಜೆ…”

“ಮ್ಹಣ್ಜೆ, ಹ್ಯಾ ಕನ್ನಾನೂರ್ ಸಂಸ್ಥಾನಾಚಿ ಹಾಂವ್ ರಾಣಿ. ಮ್ಹಾಕಾ ಆನಿ ಬಾದಶಹಾ ಟಿಪ್ಪು ಸುಲ್ತಾನಾಕ್ ಶಾಂತ್ ಸಂಬಂಧ್ ಆಸಾ. ತ್ಯಾ ಖಾತಿರ್, ತಾಣೆಂ ತಡೀಪಾರ್ ಕೆಲ್ಲ್ಯಾ ನಸ್ರಾನಿಂಕ್ ಹಾಂವೆಂ ಆಸ್ರೊ ದಿಲ್ಯಾರ್ ತೊ ಶಿಣ್ ಕರಿನಾ. ಪುಣ್ ನೀಜ್ ಅಪ್ರಾಧಿಂಕ್ – ಆತಾಂ ತಾಚ್ಯಾ ನಿತಿಚ್ಯಾ ದೃಶ್ಟೆಂತ್ ತುಂಯೀ ಪರಾರಿ ಅಪ್ರಾಧಿ – ಹಾಂವೆಂ ಲಿಪಯ್ಲ್ಯಾರ್ ತ್ಯಾ ವಾಗಾಚೊ ದುಬಾವ್ ಆನಿ ಕ್ರೋಧ್ ದೊನೀ ಜಾಗ್ ಜಾವ್ನ್, ಪ್ರಮಾದ್ ಘಡತ್. ತಶೆಂ ಜಾಂವ್ಚೆಂ ನಾಕಾ. ಮ್ಹಜ್ಯಾ ಆಡಳ್ತ್ಯಾಚೆಂ ಆನಿ ರಾಜ್ವಟ್ಕಾಯೆಚೆಂ ಧೋರಣ್ ತಶೆಂ ನಾ.”

“ತರ್ ತುವೆಂ, ಆತಾಂ ಸಾಂಗ್ಚೆಂ ಕಿತೆಂ?”

“ಹಾಂವೆಂ ಸಾಂಗ್ಚೆಂ ಇತ್ಲೆಂಚ್ – ತುಕಾ ಹಾಂವೆಂ ಸಾಂಗ್ಚೆಂ ಇತ್ಲೆಂಚ್…” ಮ್ಹಣಾಲಿ ತಿ, ನಿಜಾಯ್ಕೀ ಎಕಾ ರಾಣಿಯೆಪರಿಂ, ಮಧುರ್ ಗಂಭೀರ್ ಸ್ವರಾನ್. “ತುಕಾ ಹಾಂವೆಂ ಆಸ್ರೊ ದಿಲಾ. ಬಾಪುಲ್ ಭಾವ್ ದೆಕುನ್ ತುಕಾ ಹಾಂವೆಂ ಸಹಕಾರ್ ಭಾಸಾಯ್ಲಾ.”

“ವ್ಹಯ್…”

“ವ್ಹಯ್. ಕಿತ್ಲೊ ಕಾಳ್ ಜಾಯ್ ತಿತ್ಲೊ ಕಾಳ್ ಹಾಂಗಾ ಲಿಪೊನ್ ರಾವ್. ತುಜ್ಯಾ ಸುರಕ್ಷಿತಾಯೆ ಖಾತಿರ್ ಕಸಲಿಂಯೀ ಯೋಜನಾಂ ಮಾಂಡ್. ಪುಣ್, ಜೆಂ ಕಿತೆಂ ತುಂ ಕರುಂಕ್ ಚಿಂತಾಯ್, ತೆಂ ನಿತಿ ಪ್ರಕಾರ್‌ಚ್ ಜಾಯ್ಜಯ್!”

“ಮ್ಹಣ್ಜೆ…” ತೊ ನರ್ಗಲೊ.

“ಮ್ಹಣ್ಜೆ…” ತಿಣೆಂ ವಿವರ್ ದಿಲೊ. “ಹ್ಯಾ ಸ್ತ್ರೀಯೆ ಕಡೆನ್ ತುಂ ಕಾಜಾರ್ ಜಾಂವ್ಕ್ ಜರ್ ಚಿಂತಾಯ್ – ತಿಚೆಂ ಮನ್ ತುವೆಂ ವ್ಹಯ್ ಕರಿಜಾಯ್. ತಿಚಿ ಸ್ವಯಂ ಕಬ್ಲಾತ್ ತುವೆಂ ಜಿಕಜಾಯ್. ಶಿವಾಯ್, ಮ್ಹಜ್ಯಾ ಹೆಳ್ಕೆ ಭಿತರ್ ಜುಲುಮ್ ನಾ – ಅತ್ಯಾಚಾರ್ ನಾ. ಹಾಂವೆಂ ಅಶೆಂ ಮ್ಹಳೆಂ ಮ್ಹಣ್ ತುಂ ಘಾಬರ್ನಾಕಾ. ತಿಚೆಂ ಮನ್ ವ್ಹಯ್ ಕರುಂಕ್ ಹಾಂವ್ ಪ್ರಯತ್ನ್ ಕರ್ತಾಂ ಆನಿ ತುಕಾ ಮ್ಹಜೊ ಸಹಕಾರ್ ದಿತಾಂ.”

“ಮ್ಹಾಕಾ ಹೆಂ ಸಮ್ಜನಾ ಸಹನಾರಾ!” ಮ್ಹಣಾಲೊ ತೊ ಶಿಣೊನ್. “ತುಂ ಉಜೊ ಆನಿ ಉದಾಕ್ ಸಾಂಗಾತಾಚ್ ವೊಂಕ್ತಾಯ್.”

“ಜಾಂವ್ಕ್ ಪುರೊ” ಮ್ಹಣಾಲಿ ತಿ, ವೆರೊನಿಕಾ ಸರ್ಶಿನ್ ಯೇವ್ನ್. “ಹ್ಯಾ ಮಾನಿನಿಚೆಂ ಮನ್ ಪಾರ್ಕುಂಚ್ಯಾ ಖಾತಿರ್, ಹಾಂವೆಂ ಥೊಡಿಂ ಕಠಿಣ್ ಉತ್ರಾಂ ಉಚಾರ್ಲ್ಯಾಂತ್ – ಥೊಡೆ ಕ್ರೂರ್ ಹಿಶೆ ಉಡವ್ನ್ ಜಾಲ್ಯಾತ್. ಪುಣ್, ತಿಚ್ಯಾ ಖುಶೆ ವಿರೋಧ್ ತಿಚೆರ್ ಬಲಾತ್ಕಾರ್ ನಾಕಾ. ತಿಕಾ ಹಿಂಸಾ ನಾಕಾ. ತಿಚ್ಯಾಚ್ ಖುಶೆನ್ ಆನಿ ಕಬ್ಲಾತೆನ್ ತಿ ತುಕಾ ಸ್ವೀಕಾರ್ ಕರುಂದಿ. ತೆದೊಳ್ ಪರ್ಯಾಂತ್…”

“ತೆದೊಳ್ ಪರ್ಯಾಂತ್?”

“ತೆದೊಳ್ ಪರ್ಯಾಂತ್, ಹಾಂವ್ ತಿಚಿ ಜತನ್ ಘೆತಾಂ. ಹಾಂವ್ ತಿಚೆಂ ಮನ್ ಭುಲಯ್ತಾಂ.”

“ಪುಣ್…”

“ಪುಣ್‍ಗಿಣ್ ಕಾಂಯ್ ನಾ. ತಿ ಹಾಂಗಾಸರ್ ಯೇವ್ನ್ ಪಾವಸರ್, ತುಕಾ ಹಾಂವೆಂ, ಜಾಯ್ ತಶೆಂ ಕರ್ ಮ್ಹಳ್ಳೆಂ ವ್ಹಯ್. ಆತಾಂ ತಿ ಹಾಂಗಾಸರ್ ಪಾವ್ಲ್ಯಾ. ಹಾಂಗಾಸರ್ ತಿ ಆಸ್ತೆಲಿ. ತಿಚೆಂ ಘನ್ ಆನಿ ಮಾನ್ ಮ್ಹಾಕಾ ಮತಿಕ್ ಗೆಲ್ಯಾಂತ್. ತುಕಾ ಜಾಯ್ ತಶೆಂ ಕರುಂಕ್ ತಿ ಕಬೂಲ್ ನಾತ್ಲ್ಯಾರ್…”

“ನಾತ್ಲ್ಯಾರ್?” ಆಕಾಂತ್ಲೊ ಫಕೀರ್ ಮಹಮ್ಮದ್.

“ನಾತ್ಲ್ಯಾರ್ – ತಿಕಾ ಜಾಯ್ ತಶೆಂ ತುವೆಂ ಚಲ್ಯೆತ್.”

“ಮ್ಹಳ್ಯಾರ್…” ಘುಸ್ಪಡ್ಲೊ ತೊ.

“ಮ್ಹಳ್ಯಾರ್ – ಜರ್ ತಿ ತಿಚೊ ಧರ್ಮ್ ಸಾಂಡುಂಕ್ ತಯಾರ್ ನಾ, ತರ್ – ತುಕಾ ಮನ್ ಆಸಾ ತರ್ ಖರೆಂ – ತುವೆಂಚ್ ಕಿರಿಸ್ತಾನ್ ದೀಕ್ಷಾ ಘೆವ್ನ್ ತಿಚೆ ಕಡೆನ್ ಕಾಜಾರ್ ಜಾವ್ಯೆತ್.”

“ಜಹನಾರಾ, ತುಕಾ ಕಾಂಯ್ ಪಿಶೆಂ ಪುಣೀ…”

“ನಾ, ಪುರ್ತೆಂ ಲಾಗೊಂಕ್ ನಾ.”

ಫಕೀರ್ ಮಹಮ್ಮದ್, ಫುಡೆಂ ಕಿತೆಂ ಮ್ಹಣ್ಚೆಂ ಮ್ಹಣ್ ಸಮ್ಜನಾಸ್ತಾಂ, ಉಸ್ಮಡ್ಲೊ ಆನಿ ಹಾಸ್ಲೊ.

ಮಾನಿನ್ ವೆರೊನಿಕಾ ಕುವೆಲಿಕ್, ಬೇಗಮೆಚಿಂ ಉತ್ರಾಂ ಆಯ್ಕೊನ್ ಅಜ್ಯಾಪ್ ಆನಿ ಆಕಾಂತಾಚಿ ಝಿಂಟ್ ಮಾರ್ಲಿ. ಕನ್ನಾನೂರ್‌ಚಿ ಮುಸ್ಲಿಮ್ ಬೇಗಮ್, ಲ್ಹಾನ್ ಪ್ರಾಯೆರ್ ವಿಧವ್ ಜಾವ್ನ್ ಅರ್ಧಿ ಪಿಶಿ ಜಾಲ್ಯಾ ಮ್ಹಣ್ ತಿಣೆಂ ಆಯ್ಕಲ್ಲೆಂ. ಪಾಟ್ಲ್ಯಾ ಥೊಡ್ಯಾ ಘಡಿಯಾಂಚೆಂ ತಿಚೆಂ ಉಲವ್ಣೆಂ ಆಯ್ಕೊನ್, ವೆರೊನಿಕಾಚಿ ಅಭಿಪ್ರಾಯ್ ಘುಸ್ಪಡ್ಲಿ. ಬೇಗಮೆಚ್ಯಾ ಚಿಂತ್ನಾಂನಿ ಆಂಜ್ ಆನಿ ದೆಂವ್ಚಾರ್ ಅಪಾಲಿಪಾ ಖೆಳ್ತಾತ್ ಮ್ಹಣ್ ತಿಕಾ ಭೊಗ್ಲೆಂ. ಸಾಂಗಾತಾಚ್, ತ್ಯಾ ರಾಣಿಯೆಕ್ ಸಮಾಧನ್ ಜಾಯ್ಶೆಂ ಚಲ್ಲ್ಯಾರ್ – ಥೊಡೊ ಕಾಳ್ ಪುಣೀ – ಜೀವ್ ಆನಿ ಮಾನ್ ರಾಕೊನ್ ಜಿಯೆವ್ಯೆತ್ ಮ್ಹಳ್ಳ್ಯಾ ಚಿಂತ್ನಾಂನಿ ತಿಕಾ ಸಮಾಧಾನ್ ಭೊಗ್ಲೆಂ.

“ಬೇಗಮ್ ಸಾಹಿಬಾ…” ವ್ಹಳೂ ಪಿಂರ್ಗಲಿ ತಿ.

“ಕಿತೆಂ ಬಹೆನ್? ಹಾಂವ್ ಹಾಂಗಾಚ್ ಆಸಾಂ” ಮ್ಹಣೊನ್ ಜಹನಾರಾನ್ ತಿಚ್ಯಾ ಭುಜಾಚೆರ್ ಹಾತ್ ದವರ್ಲೊ.

“ಮ್ಹಾಕಾ, ತುಜೆ ಕಡೆನ್ ಥೊಡೆಂ ಖಾಸ್ಗಿ ಉಲಂವ್ಕ್ ಅವ್ಕಾಸ್ ಜಾಯ್.”

“ಜರೂರ್!” ಮ್ಹಣಾಲಿ ತಿ. “ಫಕೀರ್ ಭಾಯೀ, ಭಾಯ್ರ್ ವಚ್. ಮ್ಹಜೆ ಕಡೆನ್ ಕಿತೆಂಯೀ ಉಲಂವ್ಕ್ ಆಸ್ಲ್ಯಾರ್, ಉಪ್ರಾಂತ್ ಭಾಯ್ರ್ ಉಲಯಾಂ. ಆನಿ…”

“ಆನಿ…”

“ಆನಿ, ಮ್ಹಜ್ಯಾ ತಿಳುವಳ್ಕೆ ವಿಣೆಂ ಆನಿ ಕಬ್ಲಾತಿ ವಿಣೆಂ ಹ್ಯಾ ಕಮ್ರಾಂತ್ ಭಿತರ್ ಯೇನಾಕಾ – ಸಾಂಗ್ಲೆಂ ಮ್ಹಣ್ ಬೆಜಾರ್ ಕರಿನಾಕಾ.”

“ತಶೆಂ ಆಸೊಂದಿ” ಮ್ಹಣೊನ್ ಫಕೀರ್ ಮಹಮ್ಮದ್ ತಾಚ್ಯಾ ಬಾಪುಲ್ ಭಯ್ಣಿಚ್ಯಾ ‘ಪಿರ್ಕಿಪಣಾಕ್’ ದುರ್ಸೊನ್, ಭಾಯ್ರ್ ಗೆಲೊ.

ತೊ ಭಾಯ್ರ್ ಗೆಲ್ಯಾ ಉಪ್ರಾಂತ್, ಬೇಗಮ್, ವೆರೊನಿಕಾಕ್ ಲಾಗಿಂ ಯೇವ್ನ್ ಬಸ್ಲಿ.

“ಕಿತೆಂ ಖಾಸ್ಗಿ ಉಲಂವ್ಕ್ ಜಾಯ್ ಬಹೆನ್?” ವಿಚಾರ್ಲೆಂ ತಿಣೆಂ.

“ಬೇಗಮ್ ಸಾಹಿಬಾ” ಮ್ಹಣಾಲಿ ವೆರೊನಿಕಾ. “ಆತಾಂ ಹಾಂವೆಂ ಆಯ್ಕಲ್ಲ್ಯಾ ಪ್ರಕಾರ್ ತುಂ ಮ್ಹಾಕಾ ಸಾಂಬಾಳ್ತೆಲಿಯ್ ಮ್ಹಣ್ ಹಾಂವ್ ತುಜೊ ಉಪ್ಕಾರ್ ಮಾಂದ್ತಾಂ.”

“ಉಪ್ಕಾರ್ ಮಾಂದುಂಕ್ ಕಾಂಯ್ ನಾ. ಜೆಂ ಕಿತೆಂ ಹಾಂವ್ ಜಾಣಾಂಸೊನ್‍ಂಚ್ ಕರ್ತಾಂ, ತೆ ಮ್ಹಜ್ಯಾ ಫಾಯ್ದ್ಯಾ ಖಾತಿರ್‌ಯೀ ಕರ್ತಾಂ. ತುಂ ಹೆರ್ ಕಿತೆಂ ಸಾಂಗೊಂಕ್ ಅಪೇಕ್ಷಿತಾಯ್?”

“ತೊ ಪ್ರಸ್ತಾಪ್ – ಧರ್ಮ್ ಬದ್ಲುಂಚೊ ಆನಿ ಲಗ್ನಾಚೊ…”

“ತ್ಯಾ ವಿಷಯಿಂ, ಹಾಂವೆಂ ಪಯ್ಲೆಂ ತುಕಾ ಭೆಷ್ಟಾವ್ನ್ ಉಲಯಿಲ್ಲೆಂ ತೆಂ ವಿಸರ್. ತುಜೆ ತಸಲಿ ಸ್ತ್ರೀ ಖುಶೆನ್ ಜೀವ್ ಪುಣೀ ದೀತ್, ಪುಣ್ ಆಪ್ಲೊ ಭಾವಾರ್ಥ್ ಸಾಂಡ್ಚಿ ನಾ ಮ್ಹಣ್ ಮ್ಹಾಕಾ ಸ್ಪಷ್ಟ್ ಜಾಲೆಂ. ತ್ಯಾ ಶಿವಾಯ್ ಮ್ಹಾಕಾ ಕ್ರಿಸ್ತಾಂವಾಂಚೆರ್ ಪ್ರತ್ಯೇಕ್ ದಯಾಳಾಯ್ ಆಸಾ. ತುಂ ನೆಣಾಂಯ್ – ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ರಾಜ್ಯಾಂತ್ ಶಿಕ್ಷೆಕ್ ಬಾಧ್ಯ್ ಜಾವ್ನ್ ತಡೀಪಾರ್ ಜಾಲ್ಲಿಂ ಥೊಡಿಂ ಕುಟ್ಮಾಂ ಮ್ಹಜ್ಯಾ ರಾಜ್ಯಾಂತ್ ಆಸಾತ್.”

“ಧರ್ಮಾಚೆಂ ಸವಾಲ್ ಜಾಲೆಂ. ತುಕಾ ದೇವ್ ಬರೆಂ ಕರುಂ ಭಯ್ಣಿ. ಪುಣ್ ತುಜ್ಯಾ ತ್ಯಾ ಬಾಪುಲ್ ಭಾವಾ ಕಡೆನ್…”

“ಥಂಯ್ಸರೀ ತುಕಾ ಭಿರಾಂತ್ ನಾ” ಹಾಸ್ಲಿ ಬೇಗಮ್. “ಮ್ಹಜ್ಯಾ ಬಾಪುಲ್ ಭಾವಾನ್ ಕ್ರಿಸ್ತಾಂವ್ ಜಾಂವ್ಚೆಪರಿಂ ನಾ – ಅವ್ವಲ್ ಮುಸ್ಲಿಮ್ ತೊ!”

“ತೊ ಕ್ರಿಸ್ತಾಂವ್ ಜಾಲ್ಯಾರೀ…”

“ತುಂ ತಾಚೆ ಕಡೆನ್ ಲಗ್ನ್ ಜಾಂವ್ಚಿ ನಾಂಯ್ ಮ್ಹಳ್ಳೆಂಯೀ ಹಾಂವ್ ಜಾಣಾಂ.”

“ತರ್… ತರ್ ಹಾಂವ್ ಕಿತ್ಯಾಕ್ ಕೈದಿ?”

“ಕೈದಿ ನಹಿಂ – ಅತಿಥಿ ಜಾವ್ನ್ ಥೊಡೊ ಕಾಳ್ ತುವೆಂ ರಾವ್ಯೆತ್ – ರಾವಜಾಯ್.”

ವೆರೊನಿಕಾಚಿಂ ಚಿಂತ್ನಾಂ ಪರ್ತ್ಯಾನ್ ಘುಸ್ಪಡ್ಲಿಂ. ಕಿತೆಂ ಪಾತ್ಯೆಂವ್ಚೆಂ ಆನಿ ಕಿತೆಂ ಸೊಡ್ಚೆಂ ಮ್ಹಣ್ ತಿಕಾ ಸಮ್ಜಲೆಂ ನಾ. ಬೇಗಮ್ ಫುಡೆಂ…

“ತುವೆಂ ಚಡ್ ವಿಚಾರ್ ಕರ್ಚಿ ಗರ್ಜ್ ನಾ – ಆಯ್ಕ್” ಮ್ಹಣಾಲಿ. “ತುಕಾ ಧರ್ನ್ ಹಾಡ್ಚ್ಯಾ ಫುಡೆಂ ಫಕೀರಾಚ್ಯಾ ಯೋಜನಾಕ್ ಹಾಂವೆಂ ಕಬ್ಲಾತ್ ದಿಲ್ಲಿ ಖರಿ. ಪುಣ್, ತುಂ ಹಾಂಗಾ ಪಾವ್ಲ್ಯಾ ಉಪ್ರಾಂತ್, ತುಜೆಂ ವ್ಯಕ್ತಿತ್ವ್ ಮ್ಹಾಕಾ ಸಮ್ಜತಚ್, ಆನಿ ಸಿರಿರಂಗಪಟ್ಟಣಾ ಥಾವ್ನ್ ಖಬರ್ ಯೆತಚ್, ಹಾಂವೆಂ ಮ್ಹಜೆಂ ಧೋರಣ್ ಆನಿ ನಡ್ತ್ಯಾಚೆಂ ಕಾರಣ್ ತಬ್ದೀಲ್ ಕೆಲಾಂ… ತುಮ್ಚೊ ಸರ್ದಾರ್ ಸಿಮಾಂವ್ ಜೀವ್ ಆಸಾ, ಆನಿ ಕುರಿಯೆಲಾಕ್ ಭಾಯ್ರ್ ಸರ್ಲಾ ಮ್ಹಣ್ ಖಬರ್ ಆಯ್ಲ್ಯಾ. ತಾಕಾ ಪಳೆಜಾಯ್ ಆನಿ ತಾಚಿ ವಳಕ್ ಕರಿಜಾಯ್ ಮ್ಹಣ್ ಮ್ಹಾಕಾ ಮನ್ ಆನಿ ಆಶಾ – ದೆಕುನ್, ತೊ ಹಾಂಗಾಸರ್ ಯೆತಾ ಪರ್ಯಾಂತ್ – ತಾಣೆಂ ಯೆಂವ್ಚ್ಯಾ ಖಾತಿರ್… ತುಂ ಮ್ಹಜಿ ಗರಿ – ಮ್ಹಜಿ ಅತಿಥಿ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel