ಇಂಫೆರ್ನಾಚಿಂ ದಾರಾಂ – 15: ಸನ್ಮಾನಾಚಿ ಸಯ್ರಿ?

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 15
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 15: ಸನ್ಮಾನಾಚಿ ಸಯ್ರಿ?

ಮಾನಿನ್ ವೆರೊನಿಕಾ ಕುವೆಲಿಕ್ ಹಿಂ ಉತ್ರಾಂ ಆಯ್ಕೊನ್ ಪಾಯಾಂ ಥಳಾ ಭುಂಯ್ ಫುಟೊನ್ ಗಿಳುಂಕ್ ಆಯಿಲ್ಲೆಪರಿಂ ಜಾವ್ನ್, ಘಡ್ಯೆನ್ ದೊಳ್ಯಾಂಕ್ ಕಾಳೊಕ್ ಯೇವ್ನ್ ಪಾಶಾರ್ ಜಾಲೊ. ಜಾಲ್ಯಾರೀ ಧಯ್ರ್ ಆರಾವ್ನ್,

“ಕಿತ್ಯಾಕ್ ಪರಾರಿ? ಆನಿ ಕಿತ್ಯಾಕ್ ಹಿ, ಸ್ತ್ರೀಯೆಕ್ ಅಪಹರ್ಸುಂಚಿ ಬಹಾದುರಿ?” ವಿಚಾರ್ಲೆಂ ತಿಣೆಂ.

ಆಯ್ಕೊನ್ ಖಾಡ್ಯಾಳೊ ಏಕ್ ಪಾವ್ಟಿಂ ನಾಕಾಂತ್ಲ್ಯಾನ್ ಹುಂಕಾರ್ಲೊ. ಘಡ್ಯೆ ಆಪ್ಣಾಕ್ ತೊ ಕಾಂಯ್ ಥಾಪ್ಡಾಯ್ತಾ ಕೊಣ್ಣಾ ಮ್ಹಣ್ ತಿಕಾ ಭೊಗ್ಲೆಂ. ದುಸ್ರ್ಯಾ ಘಡ್ಯೆ ತೊ ಹಾಸ್ಲೊ:

“ಕಿತ್ಯಾಕ್ ಪರಾರಿ?” ಪಾಟಿಂ ವಿಚಾರ್ಲೆಂ ತಾಣೆಂ. “ತ್ಯಾ ಸೈತಾನ್ ನಸ್ರಾನಿ ಸರ್ದಾರಾನ್ ಫರ್ಮಾಣ್ ತಶೆಂ ದಿಲ್ಯಾ ಉಪ್ರಾಂತ್, ನಪಂಯ್ಚ್ ಜಾಲ್ಲ್ಯಾ ಕಿರಿಸ್ತಾನ್ ಕೈದ್ಯಾಂಕ್ ಪರ್ತ್ಯಾನ್ ಕುಡಾಯ್ಲ್ಯಾ ಶಿವಾಯ್ ಕುರಿಯೆಲಾಂತ್ ರಾವತ್ ಕೋಣ್? ಆನಿ ಕೈದಿ ಜಾವ್ನ್ ಪಟ್ಟಣಾಕ್ ತ್ಯಾ ಮೈಸೂರ್‍ಚ್ಯಾ ವಾಗಾ ಮುಖಾರ್ ವಚತ್ ಕೋಣ್? ದೆಕುನ್ ಹಾಂವ್ ಪರಾರಿ. ತುಜೆ ಕಡೆನ್ ಹ್ಯೊ ಗಜಾಲಿ ಸಾಂಗ್ಚಿ ಗರ್ಜ್ ನಾತ್‍ಲ್ಲಿ. ಪುಣ್ ಹ್ಯಾ ಉಪ್ರಾಂತ್ ತುಂ ಕೆದಿಂಚ್ ಪಾಟಿಂ ವಚನಾಂಯ್ ದೆಕುನ್…”

“ವಚನಾ? ಕಿತ್ಯಾಕ್?” ವಿಚಾರ್ಲೆಂ ತಿಣೆಂ.

ಪರ್ತ್ಯಾನ್ ತೊ ಹಾಸ್ಲೊ. ಖಾಡ್ ಪೊಶೆತ್ತ್ ಥೊಡೊ ವೇಳ್ ತಿಚೆರ್ ನದರ್ ಮಾರ್ನ್ ತೊ ರಾವ್ಲೊ.

“ಪಾಟಿಂ ವಚನಾಂಯ್” ಮ್ಹಣಾಲೊ ತೊ ಆಪ್ಣಾಯಿತ್ಲ್ಯಾಕ್. “ಕಿತ್ಯಾಕ್, ಭೋವ್ ತಕ್ಲಿ ಹಾಂವೆಂ ಖರ್ಚಿಲ್ಯಾ – ಲಾಂಬ್ ಯೋಜನ್ ಹಾಂವೆಂ ಚಿಂತ್ಲಾಂ. ಕಶೆಂ ಆನಿ ಕಿತೆಂ ಮ್ಹಳ್ಳೆಂ ವೆಗಿಂಚ್ ತುಕಾ ಸಮ್ಜತೆಲೆಂ. ತಶೆಂ ತುಕಾ ಸಮ್ಜತಾನಾ ತ್ಯಾ ಸೈತಾನ್ ಸರ್ದಾರ್ ಸಿಮಾಂವ್ಚೆರ್‌ಯೀ ಫಾರಿಕ್ಪಣ್ ಜಾರಿ ಜಾತೆಲೆಂ.”

ಇತ್ಲೆಂ ಮ್ಹಣೊನ್ ಥೊಡೊ ವೇಳ್ ತೊ ಮೌನ್ ಜಾಲೊ. ಮಾನಿನ್ ವೆರೊನಿಕಾ ಕುವೆಲಿಕ್ ಭಿರಾಂತೆಚೊ ಕುಲ್ಕುಲೊ ಲಾಗ್ಲೊ. ತರೀ, ಮನ್ ತಿಚೆಂ ರಾವ್ಲೆಂ ನಾ. ಜೀವ್ ಆಸ್ತಾನಾ ಆನಿ ಅವ್ಕಾಸ್ ಆಸ್ತಾನಾ, ಉಪ್ಕಾರಾಕ್ ಪಡ್ಚೊ ಕಸಲೊಯೀ ಪ್ರಸ್ತಾಪ್ ಸಮ್ಜೊನ್ ಘೆಂವ್ಚೊ ಬರೊ ಮ್ಹಣ್ ತಿ ಜಾಣಾಂಸ್‍ಲ್ಲಿ.

“ತಾಚೆರ್ ಕಿತ್ಯಾಕ್ ಫಾರಿಕ್ಪಣ್? ತೊ, ಆನಿ ತಾಚೆ ಖಾತಿರ್ ಬಾದಶಹಾ ಟಿಪ್ಪು ಸುಲ್ತಾನ್ ನೀತ್ ಜಾರಿ ಕೆಲ್ಯಾ ಶಿವಾಯ್ ರಾವಸೊನಾ” ಮ್ಹಣಾಲಿ ತಿ, ಭಾಯ್ಲ್ಯಾನ್ ಧಯ್ರ್ ದಾಕವ್ನ್.

“ತಾಚ್ಯಾ ಹಾತಾಂತ್ ಸಾಂಪಡ್ಲ್ಯಾರ್ ನಹಿಂವೇ ತಾಣೆಂ ನೀತ್ ಜಾರಿ ಕರ್ಚಿ? ದೆಕುನ್‍ಂಚ್ ಹಾಂವ್ ಪಯ್ಸ್ ಪಯ್ಣಾಕ್ ಭಾಯ್ರ್ ಸರ್ಲಾಂ. ಭದ್ರತೆ ಖಾತಿರ್ ತುಕಾಯೀ ಹಾಂವ್ ಸಾಂಗಾತಾ ವ್ಹರ್ತಾಂ…”

“ಹಾಂವ್, ಖಂಯೀ ವಚೊಂಕ್ ಕಬೂಲ್ ನಾ” ಮ್ಹಣಾಲಿ ತಿ.

“ತುಂ ಕಬೂಲ್ ನಾತ್ಲ್ಯಾರ್, ತುಜೆ ಹಾತ್ ಪಾಯ್ ಬಾಂಧುನ್ ವ್ಹರೊಂಕ್ ಕಷ್ಟ್ ಜಾಂವ್ಚೆ ನಾಂತ್” ಮ್ಹಣಾಲೊ ತೊ. “ತ್ಯಾ ಶಿವಾಯ್ ರುಪೇಸ್ತ್ ನಸ್ರಾನಿ ಬಾಯ್ಲೊ ಆಮ್ಚ್ಯಾ ಹಾತಾಂತ್ ಮೆಳ್‍ಲ್ಲ್ಯಾ ವೆಳಾರ್ ಆಮ್ಚಿ ಖುಶಿ ಕರುಂಕ್ ಇನ್ಕಾರ್ ಕರ್ತಿತ್ ಜಾಲ್ಯಾರ್, ತಾಂಕಾಂ ಕಶೆಂ ಮೋವ್ ಆನಿ ಶರಣ್ ಕರ್ಚೆಂ ಮ್ಹಳ್ಳೆಂಯೀ ಆಮ್ಕಾಂ ಕಳಿತ್ ಆಸಾ. ಹೆಂ – ತುಜ್ಯಾಚ್ ಬರ‍್ಯಾಕ್ – ಉಗ್ಡಾಸ್ ಆಸೊಂದಿ.”

ಹೆಂ ಆಯ್ಕೊನ್ ಮಾನಿನ್ ವೆರೊನಿಕಾಚೆಂ ಕಾಳಿಜ್ ಭಿಯಾನ್ ಚಿಂವಳ್ಳೆಂ. ಮನ್ ತಿಚೆಂ ಲಜೆನ್ ಹಿಂವಳ್ಳೆಂ. ಆಪ್ಲಿ ಭಿರಾಂಕುಳ್ ಆನಿ ಅಸಹಾಯಕ್ ಗತ್ ತಿಚ್ಯೆ ಮತಿಕ್ ಗೆಲಿ. ಕಾಳ್ಜಾ ಥಾವ್ನ್ ದೆವಾಕ್ ತಿಣೆಂ ಉಲೊ ದಿಲೊ:

‘ದೆವಾ, ಇತ್ಲೊ ಕಾಳ್ ಬಂದಡೆಚ್ಯಾ ಕಷ್ಟ್ ಅನ್ವಾರಾಂತ್ಲೆಂ ಆಮ್ಕಾಂ ರಾಕ್ಲೆಂಯ್. ಆಮ್ಚೆ ಪಯ್ಕಿ ಥೊಡ್ಯಾಂ ಥಂಯ್ ಅಜ್ಯಾಪಾಂಯೀ ತುವೆಂ ಕೆಲಿಂಯ್. ತರ್ ಆಜ್ ದೆವಾ, ಮ್ಹಾಕಾ ಕಿತ್ಯಾಕ್ ಸಾಂಡ್ಲೆಂಯ್… ತುಜಿ ಖುಶಿ ಜಾಂವ್… ಮ್ಹಜೆ ಕರ್ನಾಂ ತುಜಿಚ್ ಖುಶಿ ಕರಯ್… ಪುಣ್ ಮ್ಹಜೊ ಮಾನ್ ಆನಿ ನಿತಳಾಯ್ ತುಂಚ್ ಸಾಂಬಾಳ್…’

“ಹಾಂವೆಂ ಸಾಂಗ್‍ಲ್ಲೆಂ ಸಮ್ಜಲೆಂಮೂ?” ಖಾಡ್ಯಾಳ್ಯಾನ್ ವಿಚಾರ್ಲೆಂ.

ಥೊಡೊ ವೇಳ್ ತಿಣೆಂ ಚಿಂತ್ಲೆಂ. ತಿಕಾ ಧರುನ್ ಕಿತ್ಲ್ಯಾಗೀ ಪಯ್ಸ್ ತಾಣಿಂ ಹಾಡ್‍ಲ್ಲೆಂ ಜಾಲ್ಯಾರೀ, ತೆದೊಳ್ ಪರ್ಯಾಂತ್ ಕಸಲೆಚ್ ಕಷ್ಟ್ ತಿಕಾ ದೀಂವ್ಕ್ ನಾಂತ್, ವಾ ಜುಲುಮ್ ತಿಚೆರ್ ಚಲಂವ್ಕ್ ನಾ. ತರ್, ತಾಂಕಾಂ ಗರ್ಜೆ ಶಿವಾಯ್ ರಾಗ್ ಹಾಡಯ್ನಾತ್ಲ್ಯಾರ್ ಜಾತಾ ತಿತ್ಲೊ ವೇಳ್ ಮೆಳ್ತಲೊ ಮ್ಹಣ್ ತಿಣೆಂ ಚಿಂತ್ಲೆಂ.

“ಮ್ಹಜಿ ಮಾನ್ ಮರ್ಯಾದ್ ಸುರಕ್ಷಿತ್ ವ್ಹಯ್ ಜಾಲ್ಯಾರ್…” ಮ್ಹಳೆಂ ತಿಣೆಂ. “ತುಮ್ಚಿ ಖುಶಿ ಕಿತೆಂ ಮ್ಹಣ್ ತುಮಿ ಸಾಂಗ್ಯೆತ್.”

“ತಶೆಂ ಉಲಂವ್ಚೆಂ ಬರೆಂ” ಮ್ಹಣಾಲೊ ಖಾಡ್ಯಾಳೊ. “ಆಮಿ ಸಾಂಗ್‍ಲ್ಲೆಪರಿಂ ಖಾಲ್ತೆಪಣಾನ್ ತುಂ ಯೆಶಿ ಜಾಲ್ಯಾರ್, ಸದ್ದ್ಯಾಕ್ ತುಜಿ ಮಾನ್ ಮರ್ಯಾದ್ ಸುರಕ್ಷಿತ್.”

“ತ್ಯಾ ಉಪ್ರಾಂತ್?”

“ತ್ಯಾ ಉಪ್ರಾಂತ್ ತುಕಾಚ್ ಸಮ್ಜತೆಲೆಂ.”

“ತ್ಯಾ ಉಪ್ರಾಂತ್ ಮ್ಹಾಕಾ ಸ್ವತಂತ್ರ್ ಜಾಂವ್ಕ್…”

“ನಾ – ಪಾಟಿಂ ವಚೊಂಕ್ ತುಕಾ ಸ್ವಾತಂತ್ರ್ಯ್ ಮೆಳ್ಚೆಂ ನಾ. ಪುಣ್ ತುಕಾ ವಾಯ್ಟ್‌ಯೀ ಘಡ್ಚೆಂ ನಾ.”

“ಮ್ಹಾಕಾ ಹೆಂ ಏಕ್‍ಯೀ ಸಮ್ಜನಾ.”

“ತುಕಾ ಉಬ್ಗೊಣ್‍ಯೀ ಯೆಂವ್ಚಿ ನಾ – ತುಜಿ ಭಯ್ಣ್ ಆನಿ ಕಾವೂರ್ಚಿ ದೋಸ್ತಿಣ್ ವೆಗಿಂ ತುಕಾ ಭೆಟ್ತೆಲಿಂ.”

“ಖಂಯ್ಸರ್… ಕಶಿಂ?” ವೆರೊನಿಕಾ ಕಾವ್ಜೆಲಿ. ಖಾಡ್ಯಾಳೊ ಹಾಸ್ಲೊ.

“ತುಂ – ತುಕಾ ಹಾಡ್‍ಲ್ಲೆಪರಿಂಚ್, ತಾಂಕಾಂಯೀ ಹಾಡ್ತೆಲೆ. ತುಮಿ ಸಕ್ಡಾಂ ಸಾಂಗಾತಾ ಮೆಳ್ತೆಲ್ಯಾತ್ ಆನಿ ಸಂತೊಸಾನ್ ಆಸ್ತೆಲ್ಯಾತ್.”

“ಪುಣ್… ಪುಣ್…” ವೆರೊನಿಕಾಕ್ ಫುಡೆಂ ಉಲಂವ್ಕ್ ಉತ್ರಾಂ ಯೇಂವ್ಕ್ ನಾಂತ್. ಆಪ್ಣಾಪರಿಂಚ್, ಮೊನಿಕಾಕ್ ಆನಿ ಇಜಾಬೆಲ್ ತೆರೆಜಾಕ್ ದುಸ್ಮಾನಾಂನಿ ಅಪಹರ್ಸುಂಕ್ ಚಿಂತ್ಲಾಂ ಮ್ಹಣ್ ತಿಕಾ ಸಮ್ಜಲೆಂ. ಬಂದಡೆಂತ್ ತರೀ, ಬಂದಡೆ ಭಾಯ್ರ್ ಸಂಭಂವ್ಚಿ ಅಸಲಿ ಕಠೋರಾಯ್ ಚಿಂತುನ್ ತಿಚ್ಯಾ ಚಿಂತ್ನಾಂಕ್ ಆರ್ ಮಾರ್ಲಿ.

ಸಾಧ್ಯಾ ಬಂದಡೆಚ್ಯಾ ಕಾರಣಾನ್, ಆನಿ ಶೀದಾ ಬಂದಡೆಚ್ಯಾ ಫರ್ಮಾಣಾನ್, ಹಜಾರೊಂ ಕೆನರಾ ಕ್ರಿಸ್ತಾಂವಾಂಚೆರ್ ಆಯಿಲ್ಲೆಂ ಖರ‍್ಯಾ ಮಾಡ್ತಿರ್ಪಣಾಚೆಂ ಖರ್ಗ್ ತಿ ದೆಕೊನ್ ಆನಿ ಭೊಗುನ್ ಜಾಣಾಂಸ್‍ಲ್ಲಿ. ಪುಣ್ ತ್ಯಾ ಇಡ್ಯಾಂತ್, ತ್ಯಾಚ್ ಸಮಾಜಿಂತ್ಲ್ಯಾ ಹೆರ್ ಥೊಡ್ಯಾಂಚೆರ್ ಜಾಂವ್ಚೊ ಜೀವನ್ಮರಣಾಚೊ ಆನಿ ಮರ್ಯಾದವ್ಮರ್ಯಾದೆಚೊ ಅಪಾಲಿಪಾ ಖೆಳ್ ಚಿಂತುನ್ ತಿ ಮಾನಿನ್ ಥಕ್ಲಿ.

“ಆತಾಂ ಚಡಿತ್ ಉಲಂವ್ಚಿ ಗರ್ಜ್ ನಾ” ಮ್ಹಣಾಲೊ ಖಾಡ್ಯಾಳೊ. “ಥೊಡೊ ವಿಶೆವ್ ಘೆವ್ನ್, ಪಯ್ಲ್ಯಾ ಕೊಂಬ್ಯಾ ಸಾದಾಚೆರ್ ಪಯ್ಣ್ ಆಮಿ ಧರಿಜಾಯ್.”

“ಖಂಯ್ ವಚೊಂಕ್?”

“ಪಯ್ಸ್ – ಟಿಪ್ಪುಚ್ಯಾ ವಾ ತಾಚ್ಯಾ ಶಿಪಾಯಾಂಚ್ಯಾ ದಾವ್ಲ್ಯಾಂಕ್ ಹಾಂವೆಂ – ಆಮಿ – ಸಾಂಪ್ಡನಾ ಜಾಂವ್ಚ್ಯಾಕ್.”

“ಆನಿ, ತರ್…” ನರ್ಗಲಿ ತಿ. ತಿಚೊ ಭರ್ವಸೊ ನಿಂವ್‍ಲ್ಲೊ. ತಿಚೆಂ ಆತ್ಮೀಯ್ ತ್ರಾಣ್ ಥಕ್‍ಲ್ಲೆಂ, ತಿಚ್ಯೆ ಪಾತ್ಯೆಣೆಚೆರ್ ನಿರಾಶೆನ್ ದಾಂಖಣ್ ಘಾಲ್ಲೆಂ.

“ಆನಿ ತರ್ – ತೊ, ತೊ ಸರ್ದಾರ್ ಸಿಮಾಂವ್?”

“ತೊ – ತೊ ಮ್ಹಾಕಾ ಹ್ಯಾ ಉಪ್ರಾಂತ್ ಧೊಶಿತ್ ಮ್ಹಣ್ ಹಾಂವ್ ಚಿಂತಿನಾ. ಬಹುಶ್ಯ ತಾಚಿ ಜಿಣಿ – ಕಸಲಿಯೀ ತಿ ಜಾಂವ್ – ಇತ್ಲ್ಯಾ ಭಿತರ್ ಕಾಬಾರ್ ಜಾಲ್ಯಾ.”

“ಹಾಂ?” ಅಕ್ಲಾಸ್ಲಿ ತಿ.

“ವ್ಹಯ್. ತಿತ್ಲಿ ಬಂದೋಬಸ್ತ್ ಹಾಂವೆಂ ಕೆಲ್ಯಾ” ಮ್ಹಣಾಲೊ ಫಕೀರ್ ಮಹಮ್ಮದ್. (ತೆಂ ತ್ಯಾ ಪರಾರಿ ಖಿಲ್ಲೆದಾರ್ ಖಾಡ್ಯಾಳ್ಯಾಚೆಂ ನಾಂವ್). “ಕುರಿಯೆಲಾಂತ್ ಆಮ್ಚೆಂ ದರ್ಬಾರ್ ಆನಿ ಆಮ್ಚೆಂ ಸುಖ್ ಸಗ್ಳೆಂ ತ್ಯಾ ಮನ್ಶ್ಯಾ ವರ್ವಿಂ ನಾಸ್ ಜಾಲೆಂ. ಸರ್ವ್ ನಸ್ರಾನಿಂಕ್ ಭಂಗಂವ್ಚೆಂ ಆಮ್ಚೆಂ ಯತ್ನ್ ತಾಚೆ ವರ್ವಿಂ ಭಗ್ನ್ ಜಾಲೆಂ.”

ವೆರೊನಿಕಾ ಉಲಂವ್ಕ್ ನಾ.

“ಸರ್ಕಾರಾಚ್ಯಾ ನದ್ರೆಂತ್ ಚುಕೊನ್ ಪಡನಾತ್‍ಲ್ಲೆಪರಿಂ ಭೋವ್ ಚಲಾಕೆನ್ ತಾಣೆಂ ಬಹಾದುರಿ ಚಲಯ್ಲಿ.” ರಾಗಾನ್ ತೊ ಉಲಯ್ಲೊ. “ಮ್ಹಾಕಾ ದಿಸ್ತಾ – ಆಮ್ಚೆ ದಲಾಲಿ ಆನಿ ದೋಸ್ತ್ – ತೊಪಾಸಿ ಕಾಡ್ದೊಜ್, ಕುಞಿಕುಟ್ಟಿ, ಬೋಳೂರ್ ಜೈಲಾಚೊ ಅಧಿಕಾರಿ ಮಹಮ್ಮದಾಲಿ ಆನಿ ಹೆರ್ ಥೊಡೆ ಆಮ್ಚೆ ಜಣ್ ಮೊರೊಂಕ್ – ಕಾರಣ್ ತೊಚ್. ಮ್ಹಾಕಾ ದಿಸ್ತಾ – ಬೋಳೂರ್ ಬಂಧೆಂತ್, ತಾಣೆಂಚ್ ಮೊರ್ನಾಚಿ ಆನಿ ಹೆರ್ ಕ್ರೂರ್ ಶಿಕ್ಷಾ ಫರ್ಮಾಯಿಲ್ಲೆ ತೆ ನಸ್ರಾನಿ ಕೈದಿ ನಪಂಯ್ಚ್ ಜಾಂವ್ಕ್ – ಕಾರಣ್ ತೊಚ್.”

ವೆರೊನಿಕಾ ಉಲಂವ್ಕ್ ನಾ. ತಿಚಿ ಕೂಡ್ ಕಾಂಪೊಂಕ್ ಲಾಗ್ಲಿ.

“ಮ್ಹಾಕಾ ದಿಸ್ತಾ…” ಮುಂದರ್ಸಿಲೆಂ ಫಕೀರ್ ಮಹಮ್ಮದಾನ್. “ದುಸ್ರೆ ಪಾವ್ಟಿಂ ಅಸಾಧ್ಯ್ ಫರ್ಮಾಣ್ ದೀವ್ನ್ – ಪರಾರಿ ಕಿರಿಸ್ತಾನ್ ಕೈದ್ಯಾಂಕ್ ಲಿಪವ್ನ್ – ಮ್ಹಾಕಾ ಲಗಾಡ್ ಕಾಡುಂಕ್ ಚಲಯಿಲ್ಲ್ಯಾ ಫಿತೂರೆಕ್ ಕಾರಣ್ ತೊಚ್ – ತುಮಿಂಚ್!” ಧೆಂಕ್ಣೊ ಮಾರ್ಲೊ ತಾಣೆಂ, ವೆರೊನಿಕಾಚ್ಯಾ ನಾಕಾಚ್ಯಾ ಪೊಂತಾಕ್ ಬೋಟ್ ಜೊಕುನ್.

ವೆರೊನಿಕಾ ಉಲಂವ್ಕ್ ನಾ.

“ದೆಕುನ್” ಮ್ಹಣಾಲೊ ತೊ. “ಮ್ಹಜ್ಯಾ ನಿಮಾಣ್ಯಾ ಬಚಾವೆ ಖಾತಿರ್ ಹೆಂ ಯೋಜನ್ ಹಾಂವೆಂ ಚಿಂತಿಜಾಯ್, ಆನಿ ಹೆಂ ಕಾರ್ಯೆಂ ಹಾಂವೆಂ ಕರಿಜಾಯ್ ಪಡ್ಲಾಂ.”

“ಪುಣ್…” ಮ್ಹಳೆಂ ತಿಣೆಂ ಕಷ್ಟಾಂನಿ. “ಪುಣ್, ತಾಚಿ ಜಿಣಿ ಇತ್ಲ್ಯಾ ಭಿತರ್ ಕಾಬಾರ್ ಜಾಲ್ಯಾ – ಮ್ಹಳ್ಳೆಂಯ್ ತುವೆಂ.”

“ವ್ಹಯ್” ಮ್ಹಣಾಲೊ ತೊ ಖಾಡ್ ಚಾಬೊನ್. “ಅಲ್ಲಾಚ್ಯಾ ದಯೆನ್ ತಾಚಿ ಜಿಣಿ ಕಾಬಾರ್ ಜಾಲ್ಯಾ ಮ್ಹಣ್ ಹಾಂವ್ ಪಾತ್ಯೆತಾಂ. ತೊ ಎಕ್ಲೊ ನಹಿಂ ಜಾವ್ನ್, ಹೆರ್ ಕೋಣ್ ಆಯ್ಲ್ಯಾರೀ ಆಮ್ಚಿ ಲೋಂವ್ ಹಾಲಂವ್ಚೆಪರಿಂ ನಾ.”

“ಪುಣ್…” ಉಸ್ವಾಸ್ಲಿ ತಿ. “ತಾಚಿ ಜಿಣಿ ಕಶಿ ಕಾಬಾರ್ ಜಾಲ್ಯಾ ಜಾವ್ಯೆತ್?” ತಿಚೊ ಅತ್ಮೊಯೀ ರಡ್ತಾಸೊ ತಿಕಾ ಭೊಗ್ಲೆಂ.

“ತಾಕಾ ಶಿರಂಗಪಟ್ಟಣಾಂತ್ ನಿದ್‍ಲ್ಲೆ ಕಡೆನ್‍ಂಚ್ ಲಗಾಡ್ ಕಾಡುಂಕ್ ಆಮಿ ಜಣ್ ಸೊಡ್ಲಾ” ಘೊಂಕ್ಲೊ ತೊ. “ನೀಜ್ ಖಬರ್ ಆಮ್ಕಾಂ ಫುಡ್ಲ್ಯಾ ದೋನ್ ದಿಸಾಂ ಭಿತರ್ ಮೆಳ್ತೆಲಿ.”

ತಿ ಖಬರ್ – ಮೊರ್ನಾಚಿ ವಾ ಬಚಾವೆಚಿ – ಆಯ್ಕೊಂಚ್ಯಾ ಖಾತಿರ್ ಪುಣೀ ಹ್ಯಾ ಮನ್ಶ್ಯಾಂ ಸಾಂಗಾತಾ ಸಮಾಧಾನೆನ್ ಆಪ್ಣೆಂ ವೆಚೆಂ ಬರೆಂ ಮ್ಹಣ್ ತಿಣೆಂ ಚಿಂತ್ಲೆಂ.

“ಪುಣ್ ತೊ ಮೊರೊಂಕ್ ನಾ ಜಾಲ್ಯಾರ್” ಮ್ಹಣಾಲಿ ತಿ, ಭರ್ವಶ್ಯಾ ವಿರೋಧ್ ಭರ್ವಸೊ ಚಿಂತುನ್. “ತುಕಾ ಸೊಧುನ್ ಕಾಡ್ನ್, ತುಮ್ಕಾಂ ನಿತಿಕ್ ಉಬೆ ಕೆಲ್ಯಾ ಶಿವಾಯ್…”

“ದೆಕುನ್‍ಂಚ್…” ಮ್ಹಣಾಲೊ ಖಾಡ್ಯಾಳೊ, ಧರ್ಣಿಕ್ ಖೊಟ್ ಮಾರ್ನ್. “ದೆಕುನ್‍ಂಚ್ – ತುಕಾ ಹಾಂವ್ ಮ್ಹಜ್ಯಾ ಸಾಂಗಾತಾ ವ್ಹರ್ತಾಂ. ದೆಕುನ್‍ಚ್, ತುಜ್ಯಾ ಭಯ್ಣಿಕ್ ಆನಿ ದೋಸ್ತಿಣಿಕ್ ಧರ್ನ್ ಹಾಡುನ್ ತುಮ್ಕಾಂ ತೆಗಾಂಯ್ಕೀ ಸಾಂಗಾತಾ ದವರುಂಕ್ ಹಾಂವೆಂ ಚಿಂತ್ಲಾಂ.”

ತಿಚ್ಯಾನ್ ಚಿಂತ್ನಾಂ ಘುಂವ್ಡಾಂವ್ಕ್ ಜಾಲಿಂ ನಾಂತ್. ದೀಶ್ಟ್ ಭೊಂವ್ಡಾಂವ್ಕ್ ಜಾಲಿ ನಾ.

“ಪುಣ್… ಪುಣ್…” ಕಷ್ಟಲಿ ತಿ. ತಕ್ಲಿ ತಿಚಿ ಗಿರ್ಗಿರೊಂಕ್ ಲಾಗ್ಲಿ. ಸಂಯಮ್ ತಿಚೆಂ ಚುಕೊಂಕ್ ಲಾಗ್ಲೆಂ. ತಸಲ್ಯಾ ಪರಿಸ್ಥಿತೆಂತ್, ಖಾಡ್ಯಾಳೊ ಉಲವ್ನ್ ವೆಚೆಂ ತಿಣೆಂ ಆಯ್ಕಲೆಂ.

“ಜರ್ ತರ್, ತುಮ್ಚೊ ತೊ ಸರ್ದಾರ್ ಸಿಮಾಂವ್ ಬಚಾವ್ ಜಾವ್ನ್ ಉರ್ಲಾ, ಆನಿ ಜರ್ ತರ್ ಟಿಪ್ಪು ಸುಲ್ತಾನಾಚೊ ಪ್ರತಿನಿಧಿ ಜಾವ್ನ್ ಪರತ್ ಕುರಿಯೆಲಾಕ್ ತೊ ಯೆತಾ – ಯೇಂವ್ಕ್ ದೀ. ಪುಣ್…”

ಚಡ್ಪಡೊನ್‍ಸೊ, ಕುಡಾಂತ್ ಹೆವ್ಶಿನ್ ತೆವ್ಶಿನ್ ಚಿಕ್ಕೆ ಪಾಸಾಯೊ ಮಾರುಂಕ್ ತೊ ಲಾಗ್ಲೊ. ವೆರೊನಿಕಾಚಿ – ಸ್ತ್ರೀ ಸಹಜ್ – ಆತುರಾಯ್ ರಾವ್ಲಿ ನಾ.

“ಪುಣ್..?” ಉಗ್ಡಾಸ್ ಕೆಲೊ ತಿಣೆಂ.

“ಪುಣ್…” ಸಾಂಗ್ಲೆಂ ತಾಣೆಂ. “ಜರ್ ತೊ ಖಂಚ್ಯಾಯೀ ಥರಾನ್ ಬಚಾವ್ ಜಾವ್ನ್ ಯೇವ್ನ್, ಮ್ಹಾಕಾ ಸೊಧುಂಕ್ ಆನಿ ಧರುಂಕ್ ಪ್ರಯತ್ನ್ ಕರಿತ್, ತರ್, ತಾಚಿ ಥಡಾ ಬಾಂಧುಂಕ್ ತುಮಿ – ತಾಚಿಂ ಮೊಗಾಚಿಂ ಮನ್ಶ್ಯಾಂ – ಮ್ಹಾಕಾ ಉಪ್ಕಾರ್ತೆಲ್ಯಾತ್.

“ತುಂ ಉಲಯ್ತಾಯ್ ತೆಂ ಮ್ಹಾಕಾ ಸಮ್ಜನಾ” ಪಿಂರ್ಗಲಿ ತಿ.

“ಹಾಂವೆಂ ಸಾಂಗ್ಲೆಂ ಇತ್ಲೆಂಚ್” ಸಮ್ಜಯ್ಲೆಂ ತಾಣೆಂ. “ಖಂಚ್ಯಾಯೀ ಥರಾನ್ ಪಾಟಿಂ ಯೇವ್ನ್ ಮ್ಹಾಕಾ ಧರುಂಕ್ ಪ್ರಯತ್ನ್ ತೊ ಕರಿತ್, ತಾಣೆಂ ತಸಲೆಂ ಪ್ರಯತ್ನ್ ಸೊಡಿಜಾಯ್ ಮ್ಹಣ್ ಹಾಂವ್ ತಾಕಾ ಜಾಗ್ವಯ್ತಾಂ – ಆನಿ ತಸಲಿ ಜಾಗ್ವಣ್ ತಾಣೆಂ ಗುಮಾನ್ ಕರಿಜಾಯ್ ಮ್ಹಣ್ – ಸಂದರ್ಭಾ ಪರ್ಮಾಣೆಂ, ಖಳನಾಸ್ತಾನಾ – ನಿರ್ವೊಗ್ ನಾಸ್ತಾನಾ, ತುಜೆಂ ಎಕೇಕ್ ಬೋಟ್, ಉಪ್ರಾಂತ್ ಬಾವ್ಳೊ, ಉಪ್ರಾಂತ್ ಕಾನ್, ನಾಕ್ ಆನಿ ಉಪ್ರಾಂತ್ ಪಾಯ್ ಕಾತ್ರುನ್ ತಾಕಾ ಧಾಡ್ತಾಂ. ಆನಿ ಉಪ್ರಾಂತ್…”

“ಸಾಂತಾ ಖುರ್ಸಾ ಬಾಪಾ…” ಗುಂಡಾಯೆ ಥಾವ್ನ್ ತಿಣೆಂ ಏಕ್ ಶ್ವಾಸ್ ಸೊಡ್ಲೊ. ತಿಚೆಂ ಧಯ್ರ್ ಚುಕ್ಲೆಂ. ತಿಚೆಂ ಸಂಯಮ್ ಸಲ್ವಲೆಂ. ಮತ್ ಚುಕೊನ್ ತಿ ಪರ್ತಲಿ.

* * * * *

ತಿ ಪರ್ತ್ಯಾನ್ ಮತಿರ್ ಯೆತಾನಾ, ದಕ್ಷಿಣಾಕ್ ಪಯ್ಣ್ ಕರ್ಚ್ಯಾ ಬೊಯ್ಲಾಂಚ್ಯಾ ಗಾಡಿಯೆರ್ ತಿ ಆಸ್‍ಲ್ಲಿ.

“ಬಹೆನ್, ತುಕಾ ಜಾಗ್ ಜಾಲಿಮೂ?” ಮ್ಹಣಾಲೊ ಎಕಾ ಸ್ತ್ರೀಯೆಚೊ ಸ್ವರ್, ಜಿಚ್ಯಾ ಉಸ್ಕ್ಯಾಚೆರ್ ವೆರೊನಿಕಾಚಿ ತಕ್ಲಿ ಆಸ್‍ಲ್ಲಿ. “ಧರ್, ಥೊಡೊ ಲಿಂಬ್ಯಾಚೊ ರೋಸ್ ಪಿಯೆ.”

ಗಾಡಿ ರಾವ್ಲಿ. ಕಾಳೊಕ್ ಜಾಲ್ಯಾರೀ, ಗಾಡ್ಯೆ ಪಂದಾಕ್ ಲಾಂಟಾನ್ ಆಸ್‍ಲ್ಲೊ ಭಾಯ್ಲ್ಯಾನ್ ಚಾಂದ್ನೆಂಯೀ ಆಸ್‍ಲ್ಲೆಂ. ಗಾಡ್ಯೆಂತ್, ತ್ಯಾ ಸ್ತ್ರೀಯೆ ಶಿವಾಯ್ ಆನ್ಯೇಕ್ ದಾದ್ಲೊಯೀ ಆಸ್‍ಲ್ಲೊ ಮ್ಹಣ್ ವೆರೊನಿಕಾಕ್ ಸಮ್ಜಲೆಂ. ಕಾತ್ರಿಚೆರ್, ಗಾಡಿ ಆಂಬುಡ್ಚೊ ಗ್ರಾಯ್ಕ್ – ಆನ್ಯೇಕ್ಲೊ ದಾದ್ಲೊ ಆಸ್‍ಲ್ಲೊ.

“ಧರ್ ಬಹೆನ್, ಪಿಯೆ – ಹಾಂತುಂ ತುಕಾ ಬರೆಂಪಣ್ ಜಾತೆಲೆಂ.” ತ್ಯಾ ಸ್ವರಾಂತ್ ಕರುಣಾಯ್ ಆನಿ ಎಕಾ ಥರಾಚಿ ಭುಜಾವಣ್ ಆಸ್‍ಲ್ಲಿ.

ತೊಂಡಾಕ್ ತೆಂಕ್‍ಲ್ಲ್ಯಾ ಗಿಂಡ್ಯೆಂತ್ಲೊ ತೀನ್ ಚಾರ್ ಘೊಟ್ ಲಿಂಬ್ಯಾ ರೋಸ್ ವೆರೊನಿಕಾ ಪಿಯೆಲಿ.

“ಖಾಂವ್ಕ್ ಕಾಂಯ್ ದೀಂವ್, ಬಹೆನ್?”

ಉಲಂವ್ಕ್ ವೆರೊನಿಕಾಕ್ ತಾಂಕೊಂಕ್ ನಾ. ‘ನಾಕಾ’ ಮ್ಹಣ್ ತಕ್ಲಿ ಹಾಲಯಿಲ್ಲೆಪರಿಂಚ್, ಪರ್ತ್ಯಾನ್ ಜ್ಹೆಮ್ ಯೇವ್ನ್ ತಿಕಾ ನೀದ್ ಪಡ್ಲಿ.

ಗಾಡಿ ಪರ್ತ್ಯಾನ್ ಚಾಲು ಜಾಲಿ.

ಉಪ್ರಾಂತ್, ಪಯ್ಣಾಚಿಂ ಕಿತ್ಲಿಂ ವೊರಾಂ ವಾ ಕಿತ್ಲೆ ದೀಸ್ ಪಾಶಾರ್ ಜಾಲೆ ಮ್ಹಣ್ ತಿಕಾ ಕಳಿತ್ ಜಾಂವ್ಕ್ ನಾ.

ಮಧೆಂ ಖಂಯ್ಸರ್ ಏಕ್ ಕಡೆನ್ ರಾವೊನ್ – ದುಸ್ರ್ಯೆ ಪಾವ್ಟಿಂ – ಎಕಾ ಮುಸ್ಲಿಮ್ ಘರಾಂತ್ ಥೊಡ್ಯಾ ವೊರಾಂಚೊ ವಿಶೆವ್ ಘೆವ್ನ್ ತಾಣಿಂ ಪಯ್ಣ್ ಮುಂದರ್ಸಿಲ್ಲೆಂ. ಮಾನಿನ್ ವೆರೊನಿಕಾಕ್ ದೋನ್ ದೀಸ್ ಬರೊಚ್ ತಕ್ಲೆಚೊ ತಾಪ್ ಆಸ್‍ಲ್ಲ್ಯಾನ್ ಭ್ರಮಿದೆಚೆರ್‌ಚ್ ತಿ ಆಸ್‍ಲ್ಲಿ. ಪುಣ್ ತ್ಯಾ ವೆಳಾರ್, ಕೋಣ್‍ಗೀ ಎಕ್ಲಿ ಸ್ತ್ರೀ ಆಪ್ಣಾಚೊ ಸಾಂಗಾತ್ ಆನಿ ಚಾಕ್ರಿ ಕರ್ನ್ ಆಸಾ ಮ್ಹಣ್, ತಿಕಾ, ತಿಚ್ಯಾ ಭ್ರಮಿದೆಂತ್‍ಚ್ ಕಳಿತ್ ಆಸ್‍ಲ್ಲೆಂ.

ತಿ ಸ್ತ್ರೀ, ಫಕೀರ್ ಮಹಮ್ಮದಾಚಿ ಬಾಯ್ಲ್ ಜಾವ್ನಾಸ್‍ಲ್ಲಿ.

ದೋನ್ ದಿಸಾಂ ಉಪ್ರಾಂತ್, ಮಾನಿನ್ ವೆರೊನಿಕಾ ಕುವೆಲಿಕ್ ಸಾರ್ಕಿ ಜಾಗ್ ಜಾತಾನಾ, ತಿ, ಗ್ರೇಸ್ತ್‌ಕಾಯ್ ಆನಿ ದರ್ಬಾರ್ ಪಾಚಾರ್ಚ್ಯಾ ಎಕಾ ವಿಸ್ತಾರ್ ಕುಡಾಂತ್ಲ್ಯಾ ಎಕಾ ಗಂಧಾಚ್ಯಾ ಖಟ್ಲ್ಯಾಚೆರ್, ಎಕಾ ದಾಟ್ ಗಜ್ಡೆರ್, ರಶೀಮಾಚ್ಯಾ ಶೆಲ್ಯಾಂನಿ ಪಾಂಗ್ರೊನ್ ಆಸಾ ಮ್ಹಣ್ ತಿಕಾ ಸಮ್ಜಲೆಂ.

ಖಂಯ್, ಕಿತೆಂ – ಸಪಣ್ ವಾ ಜಾಗ್ವಣ್ ಮ್ಹಣ್ ತಿಕಾ ಅಜ್ಯಾಪ್ ಜಾಲೆಂ. ಥೊಡ್ಯಾ ವೆಳಾನ್, ಸಾರ್ಕಿ ಜಾಗ್ ಜಾತಚ್, ಆನಿ ಪಾಟ್ಲೊ ಥೊಡೊ ಉಗ್ಡಾಸ್ ಯೆತಚ್, ಪರ್ತ್ಯಾನ್ ತಿಚ್ಯಾ ಆಂಗಾಂತ್ ಹಿಂವ್ ಚರೊಂಕ್ ಲಾಗ್ಲೆಂ.

“ಜಾಗ್ ಜಾಲಿ ಬಹೆನ್? ಕಶೆಂ ಭೊಗ್ತಾ ಜಿವಾಂತ್?”

ತೆವ್ಶಿಲ್ಯಾ ದಾರಾಂತ್ಲ್ಯಾನ್, ಸವಾಲಾಂ ಸಮೇತ್ ಸ್ತ್ರೀ ಎಕ್ಲಿ ಭಿತರ್ ಆಯ್ಲಿ. ವೆರೊನಿಕಾಕ್, ತೆಂಯೀ ಏಕ್ ಸಪಣ್‍ಶೆಂ ದಿಸ್ಲೆಂ. ಕಾನ್ ದೊಳೆ ಮ್ಹಳ್ಳೆಪರಿಂ ಸೊಡುನ್, ತ್ಯಾ ಸ್ತ್ರೀಯೆಕ್ ತಿ ಪಳೆಂವ್ಕ್ ಲಾಗ್ಲಿ.

ತಿ ಸ್ತ್ರೀ ಲಾಗಿಂ ಯೇವ್ನ್, ಖಟ್ಲ್ಯಾ ಬಗ್ಲೆನ್ ರಾವ್ಲಿ. ಗಂಧಾಚೊ ಆನಿ ಗಲೊಬಾಚೊ ಪರ್ಮಳ್ ತಿಚ್ಯಾ ನಾಕಾಕ್ ಆದಳ್‍ಲ್ಲ್ಯಾ ಪ್ರಾಸ್, ಚಡ್ ಸ್ಪಷ್ಟ್ ಥರಾನ್, ತ್ಯಾ ಸ್ತ್ರೀಯೆಚಿ ಸೊಭಾಯ್ ಆನಿ ರಾಣ್ವಿಕ್ ಗಂಭೀರಾಯ್ ವೆರೊನಿಕಾಚ್ಯಾ ದೊಳ್ಯಾಂಕ್ ಆಪ್ಟಲಿ.

ವೆರೊನಿಕಾನ್ ಉಟೊಂಕ್ ಪ್ರಯತನ್ ಕೆಲೆಂ.

“ಉಟನಾಕಾ ಬಹೆನ್ – ತಶಿಚ್ ಆರಾಮ್ ಕರ್ನ್ ರಾವ್” ಮ್ಹಣತ್ತ್, ತ್ಯಾ ಸ್ತ್ರೀಯೆನ್ ಆಪ್ಲೆ ಕೋಮಲ್ ಹಾತ್ ವೆರೊನಿಕಾಚ್ಯಾ ಭುಜಾಂಚೆರ್ ದವರ್ಲೆ. ವೆರೊನಿಕಾಕ್ ಆನಿಕೀ ಚಡ್ ಅಜ್ಯಾಪ್ ಜಾಲೆಂ, ಆನಿ ಧಯ್ರ್ ಭೊಗ್ಲೆಂ.

“ಧರ್, ಥೊಡೆಂ ಪಿಯೆ” ಮ್ಹಣಾಲಿ ತಿ ಸ್ತ್ರೀ, ಬಗ್ಲೆನ್ ಆಸ್‍ಲ್ಲಿ ದುದಾಚಿ ಗಿಂಡಿ ಮುಖಾರ್ ದೀವ್ನ್. “ಪಿಯೆ – ತುವೆಂ ಭಿಯೆಂವ್ಚಿ ಕಾಂಯ್ ಗರ್ಜ್ ನಾ.”

ವೆರೊನಿಕಾ, ಬಾದ್ಮಾಂಚ್ಯಾ ಮೊಯಾಂಚೊ ಪಿಟೊ ಭರ್ಶಿಲ್ಲೆಂ ತೆಂ ಹುನ್ ದೂದ್, ಲ್ಹಾನ್ ಭುರ್ಗ್ಯಾಪರಿಂ ಪಿಯೆಲಿ. ತ್ಯಾ ದುದಾಚಿ ಊಬ್ ತಿಚ್ಯಾ ಆಂಗಾಂತ್ ಚರ್ತಾನಾ, ತಿಚ್ಯಾ ಹಾಡಾಂನಿ ರಿಗೊನ್ ರಾವ್‍ಲ್ಲಿ ಭಿರಾಂತ್ ಥೊಡಿ ನಿವೊಂಕ್ ಲಾಗ್ಲಿ. ಚಡುಣೆಂ ಪನ್ನಾಸ್ ವಾ ಪಾಂಚ್ ಚಡ್ ಮ್ಹಣ್ಯೆತ್, ತಿತ್ಲ್ಯಾ ಪ್ರಾಯೆಚ್ಯಾ ತ್ಯಾ ಸ್ತ್ರೀಯೆಚಿ ಸೊಭಾಯ್, ಗಂಭೀರಾಯ್ ಆನಿ ತಿಚ್ಯಾ ಆಂಗಾರ್ ಆಸ್‍ಲ್ಲ್ಯಾ ವಜ್ರಾಂ-ಮೊತಿಯಾಂಚ್ಯಾ ನಗಾಂಚಿ ಜಡಾಯ್…

“ಮಾಪ್ ಕರ್ ಭಯ್ಣಿ” ಮ್ಹಣಾಲಿ ವೆರೊನಿಕಾ, ದೂದ್ ಪಿಯೆವ್ನ್ ಜಾತಚ್. “ಹಾಂವ್ ಖಂಯ್ ಆಸಾಂ? ಆನಿ ತುಂ ಕೋಣ್ ಜಾವ್ಯೆತ್?”

“ಮಾಫಾಚಿ ಜರೂರಾಯ್ ನಾ” ಹಾಸ್ಲಿ ತಿ ಸ್ತ್ರೀ. “ತುಂ ಕಣ್ಣೂರ್ ಪ್ರಾಂತ್ಯಾಚ್ಯಾ ರಾವ್ಳೆರಾಂತ್ ಆಸಾಯ್. ಆನಿ ಹಾಂವ್ ವರ್ತವ್ತಾಂ ಹ್ಯಾ ಪ್ರದೇಶಾಚಿ ರಾಣಿ – ಜಹನಾರಾ ಫಾತಿಮಾ ಬೇಗಂ.”

“ಜಹನಾರಾ ಫಾತಿಮಾ ಬೇಗಂ!” ವೆರೊನಿಕಾ ಉಟೊನ್ ಬಸ್ಲಿ. ವಿಜ್ಮಿತ್ ಜಾವ್ನ್ ತಿಚೆ ದೊಳೆ ರುಂದಾಲೆ. ಕಣ್ಣೂರ್ಚ್ಯಾ ತ್ಯಾ ಬೇಗಮೆಚಿ ಖಬರ್, ತಿಯೀ ಆಯ್ಕೊನ್ ಜಾಣಾಂಸ್‍ಲ್ಲಿ.

“ತರ್… ತರ್ ಹಾಂವ್ ಹಾಂಗಾಸರ್ ಕಶಿಂ ಪಾವ್ಲಿಂ?” ವಿಚಾರ್ಲೆಂ ತಿಣೆಂ, ವಿಜ್ಮಿತ್ ಜಾವ್ನ್.

“ತಿ ಕಾಣಿ ಲಾಂಬ್ ಆಸಾ” ಬೇಗಮೆನ್ ಜಾಪ್ ದಿಲಿ. “ಮ್ಹಜ್ಯಾ ಥೊಡ್ಯಾ ಸಯ್ರ್ಯಾಂನಿ ತುಕಾ ಹಾಂಗಾಸರ್ ಹಾಡ್ಲ್ಯಾ. ತುವೆಂ ಫಿಕಿರ್ ಕರ್ಚಿ ಕಾಂಯ್ ಗರ್ಜ್ ನಾ. ಹಾಂಗಾ ತುಂ ಆಸಾಸರ್, ಹ್ಯಾ ರಾವ್ಳೆರಾಂತ್ ಸನ್ಮಾನಾಚಿ ಸಯ್ರಿ ಜಾವ್ನ್ ತುಂ ಆಸ್ತೆಲಿಯ್.”

“ಪುಣ್…”

“ಪುಣ್‍ಗಿಣ್ ಪರ್ವಾ ಕರಿನಾಕಾ. ಆಮ್ಚ್ಯಾಚ್ ಕುಟ್ಮಾಚಿ ಸದಸ್ಯ್ ಜಾವ್ನ್ ಉರ್ತೆಲಿಯ್ ಜಾಲ್ಲ್ಯಾನ್, ತುಕಾ ಕಾಂಯ್ ವಾಯ್ಟ್ ಘಡಶೆಂ ನಾ.”

“ತುಮ್ಚ್ಯಾ ಕುಟ್ಮಾಚಿ ಸದಸ್ಯ್ ಮ್ಹಳೆಂಯ್?”

“ವ್ಹಯ್.”

“ಮ್ಹಾಕಾ ಹೆಂ ಸಮ್ಜನಾ.”

“ಸಮ್ಜೊಂಕ್ ಕಷ್ಟ್ ಆಸ್ಚೆ ನಾಂತ್. ತುಕಾ ಹಾಂಗಾಸರ್ ಹಾಡ್ನ್ ಆಯಿಲ್ಲ್ಯಾಂಚೊ ಮುಖೆಲಿ ಮ್ಹಜೊ ಬಾಪುಲ್ ಭಾವ್. ತುಕಾ ಮಹಮ್ಮದೀಯ್ ದೀಕ್ಷಾ ದೀವ್ನ್ – ತುಜೆ ಕಡೆನ್, ಆಮ್ಚ್ಯಾ ದಸ್ತುರೆ ಪ್ರಕಾರ್ ಕಾಜಾರ್ ತೊ ಜಾತಲೊ.”

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel