ಇಂಫೆರ್ನಾಚಿಂ ದಾರಾಂ – 14: ಪರಾರಿ ಖಿಲ್ಲೆದಾರ್!

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 14
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 14: ಪರಾರಿ ಖಿಲ್ಲೆದಾರ್

“ನಾ, ತುಜೊ ಧನಿ ಜಿಕೊಂಕ್ ನಾ” ಮ್ಹಣಾಲೊ, ಕುಂಬ್ಳಾಚ್ಯಾ ಪಂಗ್ಡಾಚೊ ಮುಖೆಲಿ. “ಆಮ್ಚೊ ರಾಜಾ ಸಲ್ವಲಾ ಮ್ಹಣ್ ಕೊಣಾಕ್‍ಚ್ ಕಳಿತ್ ಜಾಂವ್ಚೆಂ ನಾ. ಕಿತ್ಯಾಕ್, ತುಮಿ ಹಾಂಗಾ ಥಾವ್ನ್ ಜಿವಾ ಸಮೇತ್ ಭಾಯ್ರ್ ವಚನಾಂತ್ – ತಶಿ ಜಾವ್ನಾಸಾ ರಿವಾಜ್.”

ಪರಿಸ್ಥಿತಿಚೊ ಅಪಾಯ್ ಸರ್ದಾರ್ ಸಿಮಾಂವ್ಕ್ ಪುರ್ತೊ ಸುಸ್ತಾಲೊ. ಥಂಯ್ ಆಸ್‍ಲ್ಲ್ಯಾಂ ಕಡೆನ್ ಝುಜೊನ್ ಶಿವಾಯ್, ಭಾಯ್ರ್ ವಚೊಂಕ್ ಸಾಧ್ಯ್ ನಾ ಮ್ಹಣ್ ತೊ ಜಾಣಾಂ ಜಾಲೊ. ಕಿತೆಂ ಕರಿಜಾಯ್ ಮ್ಹಳ್ಳೆಂ ಕ್ಷಣಾನ್ ತಾಣೆಂ ಜ್ಯಾರಿ ಕೆಲೆಂ.

“ಜಮೆದಾರ್ ಅಂತುಲೊ ಪಡ್ವಳ್ ಆನಿ ರಾಮಪ್ಪ್ ಸೊಡ್ನ್…” ಸರ್ದಾರ್ ಸಿಮಾಂವ್ನ್ ಬಾರ್ಕಾಯೆನ್ ತಾಕಿದ್ ದಿಲಿ. “ಹ್ಯಾ ಚೌಕೆಂತ್ ಆಸ್‍ಲ್ಲ್ಯಾ ಹರ್ಯೆಕ್ಲ್ಯಾನ್ ಆಪಾಪ್ಲಿಂ ಹಾತೆರಾಂ ಸಕಯ್ಲ್ ಉಡಯ್ಜಾಯ್!”

“ಉಡಯ್ನಾ ಜಾಲ್ಯಾರ್?” ಪಾಟ್ಲ್ಯಾ ಕುಶಿನ್ ಅಂತಃಪುರಾಚ್ಯಾ ದಾರ್ವಟ್ಯಾಚ್ಯಾ ಇಡ್ಯಾಂತ್ಲ್ಯಾನ್ ಆಯ್ಕಲೊ, ಸ್ತ್ರೀಯೆಚೊ – ಬಹುಶ್ಯ ರಾಣಿಯೆಚೊ – ಸ್ವರ್.

“ನಾ ಜಾಲ್ಯಾರ್ – ಹಾಂಗಾಸರ್ ಆಸ್‍ಲ್ಲೊ ಕೋಣ್ ಎಕ್ಲೊ ಪುಣೀ ಹಾಂವೆಂ ಸಾಂಗ್ಲ್ಯಾ ಶಿವಾಯ್ ಹಾಲತ್ ಜಾಲ್ಯಾರ್…” ಮ್ಹಣಾಲೊ ಸರ್ದಾರ್ ಸಿಮಾಂವ್, ಪಾಟಿಂ ಘುಂವನಾಸ್ತಾನಾ ವಾ ಆಸ್ಡಿ ಹಾಲಯ್ನಾಸ್ತಾನಾ. “ಆಬ್ಳೆ ಹಿ ತಲ್ವಾರ್ ಹಾಂಗಾ ಥಾವ್ನ್ ಧರ್ಣಿಕ್ ಪರ್ಯಾಂತ್ ರೊಂಬ್ತೆಲಿ!”

ರಾಜಾಚೆ ಮಾನಾಯ್ ಸಗ್ಳೆ ಆಕಾಂತ್ಲೆ – ಕಾಲುಬುಲೆ ಜಾಲೆ.

ಭಿತರ್ ಥಾವ್ನ್ ಆಯ್ಕಲ್ಲೊ ಸ್ತ್ರೀಯೆಚೊ ಸ್ವರ್ ಭಿಯಾನ್ ಇರೊನ್ ಗೆಲೊ.

ಸರ್ದಾರ್ ಸಿಮಾಂವ್ಚ್ಯಾ ತಲ್ವಾರಿಚೊ ಧೊಮೊಸ್, ಮತ್ ಚುಕೊನ್ ಪಡ್‍ಲ್ಲ್ಯಾ ರಾಜಾಚ್ಯಾ ಹರ್ದ್ಯಾರ್ ತೆಂಕೊನ್ ತಯಾರ್ ರಾವ್‍ಲ್ಲೊ.

“ಹೋಶ್ಯಾರ್!” ಮ್ಹಣಾಲೊ ಸರ್ದಾರ್ ಸಿಮಾಂವ್.

“ಉಡಯಾ – ಉಡಯಾ ಮಹಾರಾಯಾ ತುಮ್ಚಿಂ ಹಾತೆರಾಂ!” ತಾಕಿದ್ ದಿಲಿ ರಾಣಿಯೆನ್.

ಹಾತೆರಾಂ ಝಡ್ಲಿಂ.

“ರಾವ್‍ಲ್ಲೆ ಕಡ್ಚೆ ಹಾಲನಾಕಾತ್!” ಸರ್ದಾರ್ ಸಿಮಾಂವ್ನ್ ಪರ್ತ್ಯಾನ್ ತಾಕಿದ್ ದಿಲಿ. “ಅಂತುಲೊ ಪಡ್ವಳ್! ತಾಂಚೆ ಮುಂಡಾಸ್ ವಾ ಕಮರ್‌ಬಾಂಧ್ ಸುಟವ್ನ್, ಹರ್ಯೆಕ್ಲ್ಯಾಚೆ ಹಾತ್ ಪಾಟಿಂ ಬಾಂಧ್ಯಾ!”

ಅಂತುಲ್ಯಾನ್ ಆನಿ ರಾಮಪ್ಪಾನ್ ತೆಂ ಕಾಮ್, ಭೋವ್ ಸಂತೊಸಾನ್ ಆನಿ ಚುರುಕಾಯೆನ್ ಸುಶೆಗಾತ್ ಕೆಲೆಂ. ಉಪ್ರಾಂತ್ ಸರ್ದಾರ್ ಸಿಮಾಂವ್ನ್, ರಾಜಾಚ್ಯಾ ಹರ್ದ್ಯಾರ್ ತೆಂಕ್‍ಲ್ಲಿ ತಲ್ವಾರ್ ಪಾಟಿಂ ಕಾಡ್ಲಿ.

“ರಾವೊಂಕ್, ಆನಿ ತುಮ್ಚೊ ರಾಜಾ ಉಟ್ಲ್ಯಾ ಉಪ್ರಾಂತ್ ತಾಕಾ ಆದೇವ್ಸ್ ಮ್ಹಣೊಂಕ್ ಆಮ್ಕಾಂ ಪುರ್ಸತ್ ನಾ. ತಶೆಂ ಕರುಂಕ್ ಆಮಿ ಆನ್ಯೇಕ್ ಪಾವ್ಟಿಂ ಯೆತಾಂವ್. ತೆದೊಳ್ ಪರ್ಯಾಂತ್, ಹಾಂವೆಂ ಜಿಕ್‍ಲ್ಲ್ಯಾ ಘೊಡ್ಯಾಕ್ ಬರ‍್ಯಾ ಥರಾನ್ ಪೊಸುನ್ ದವರ್ಯಾ” ಹಾಸ್ಲೊ ತೊ. ಸಾಂಗಾತ್ಯಾಂಕ್ ತಾಣೆಂ ಹಾತ್ ಭಾಸ್ ಕೆಲಿ, ಆನಿ ತೆ ಭಾಯ್ರ್ ಸರ್ಲೆ. ಥಂಯ್ಸರ್ ಚಡ್ ವೇಳ್ ರಾವೊಂಕ್, ಕಾರಣ್ ಜಾಂವ್ ಮನ್ ತಾಂಕಾಂ ನಾತ್‍ಲ್ಲೆಂ.

ಹಳ್ತಾನ್ ಘೊಡ್ಯಾಂಕ್ ಧಾಂವ್ಡಾವ್ನ್ ತ್ಯಾಚ್ ರಾತಿಂ ಕಾಸರ್‌ಗೋಡ್ ಛತ್ರಾಕ್ ತೆ ಪಾವ್ಲೆ. ತ್ಯಾ ಉಪ್ರಾಂತ್ ಆಹಾರ್ ಆನಿ ವಿಶೆವ್ ಘೆಂವ್ಚ್ಯಾ ಖಾತಿರ್ ಥೊಡಿಂ ವೊರಾಂ ರಾವೊಂಕ್ ಸರ್ದಾರ್ ಸಿಮಾಂವ್ನ್ ಚಿಂತ್ಲೆಂ.

ವಿಶೆವ್ ಘೆಂವ್ಚ್ಯಾ ಖಾತಿರ್ ರಾವ್ಲ್ಯಾರೀ, ಸರ್ದಾರ್ ಸಿಮಾಂವ್ಚ್ಯಾ ಮತಿಂತ್ ಸಮಾಧಾನ್ ನಾತ್‍ಲ್ಲೆಂ. ಟಿಪ್ಪು ಸುಲ್ತಾನಾನ್ ತಾಕಾ ದಿಲ್ಲ್ಯಾ ಕಡಕ್ಕ್ ತಾಕಿದೆಚೊ ಉಗ್ಡಾಸ್ ಯೆತಾಂ ಯೆತಾಂ ಎಕಾ ಥರಾಚಿ ಕಾವ್ಜೆಣಿ ತಾಕಾ ಭೊಗ್ತಾಲಿ, ಆನಿ ಸಾಂಗಾತಾಚ್ ಪಾಟ್ಲ್ಯಾ ಥೊಡ್ಯಾಚ್ ದಿಸಾಂ ಭಿತರ್ ಘಡೊನ್ ಗೆಲ್ಲ್ಯಾ ವಿಷಯಾಂಚೊ ವಾ ಅವ್ಗಡಾಂಚೊ ಗೊಂದೊಳ್ ತಾಚ್ಯಾ ಮತಿಂತ್ ವಿರಾರಾಯೆಚೆಂ ವಾದಾಳ್ ಉಟಯ್ತಾಲೊ.

ಖಂಚೊಯೀ ಎಕ್‍ಚ್ ವಿಷಯ್ ಮತಿಂತ್ ಧರುನ್ ಆಟಂವ್ಕ್ ವಾ ತಜ್ವೀಜ್ ಕರುಂಕ್ ಸಾಧ್ಯ್ ನಾತ್‍ಲ್ಲೆಪರಿಂ ಸ್ಥಿತಿಗತ್ ಭಿಗಡ್ಲ್ಯಾ ಮ್ಹಣ್ ತಾಕಾ ಭೊಗ್ತಾಲೆಂ, ಜಾಲ್ಯಾರೀ, ಷೇರ್ ಖಾನ್ ನೀಜ್ ಜಾವ್ನ್ ಕುಂಬ್ಳಾ ಯೇವ್ನ್ ಪಾಶಾರ್ ಜಾಲಾ ಮ್ಹಳ್ಳೆಂ ಖಂಡಿತ್ ಮ್ಹಣ್ ತಾಕಾ ದಿಸ್ತಾಲೆಂ.

ನೀಜ್ ಕಾರಣಾಂ ಸಾಂಗೊಂಕ್ ಸಾಧ್ಯ್ ನಾತ್‍ಲ್ಲೆಂ ಖರೆಂ. ಪುಣ್ ಷೇರ್ ಖಾನ್ ಪರ್ತ್ಯಾನ್ ಝಳ್ಕೆಕ್ ಪಡತ್ ಜಾಲ್ಯಾರ್, ಪರಾರಿ ಖಿಲ್ಲೆದಾರಾಚೊ ಆನಿ ಮಾನಿನ್ ವೆರೊನಿಕಾ ಕುವೆಲಿಚೊ ಪತ್ತೊ ಧರುಂಕ್ ಸುಲಭ್ ಜಾತೆಲೆಂ ಮ್ಹಣ್ ತಾಣೆಂ ರಾಜಾಂವ್ ಕೆಲ್ಲ್ಯಾಂತ್ ಜಾಯ್ತೆಂ ಸತ್ ಆಸ್‍ಲ್ಲೆಂ.

ತಶೆಂ ಸಬಾರ್ ಚಿಂತುನ್, ಫಕತ್ ಭರ್ವಶ್ಯಾ ಬಗಾರ್ ಹೆರ್ ಕಸಲಿಯೀ ವಾಟ್ ತಾಕಾ ಝಳ್ಕನಾ ಜಾಲಿ. ಜಾಲ್ಯಾರೀ, ಫುಡ್ಲ್ಯಾ ದೋನ್ ವೊರಾಂ ಭಿತರ್ ಪರ್ತ್ಯಾನ್ ಪಯ್ಣ್ ಮುಖಾರ್ಸುಂಕ್ ತಾಣೆಂ ನಿಚೆವ್ ಕೆಲೊ.

ಕಾಸರಗೋಡ್ ಛತ್ರಾಕ್, ಆದ್ಲ್ಯಾ ರಾತಿಂ ಜಾಂವ್, ಪಾಟ್ಲ್ಯಾ ಹಫ್ತ್ಯಾಂತ್ ಜಾಂವ್, ಕೊಣೀ ಪಯ್ಣಾರಿ, ಘೊಡ್ಯಾರ್ ಸವಾರಿ ಕರ್ನ್ ಯೇಂವ್ಕ್ ನಾ ಮ್ಹಣ್ ತಾಣೆಂ ಖಬರ್ ಘೆತ್ಲಿ. ಪುಣ್, ತ್ಯಾ ಛತ್ರಾಚ್ಯಾ ಉದೆಂತಿಕ್, ಚಡುಣೆಂ ತೀನ್ ಮಯ್ಲಾಂ ಪಯ್ಶಿಲ್ಯಾನ್, ಕರಾವಳ್ ಸೊಡುನ್ ದಕ್ಷಿಣಾಕ್ ವೆಚಿ ಪಾಯ್ ವಾಟ್ ಆಸಾ ಮ್ಹಣ್ ಥಂಯ್ಚ್ಯಾ ಛತ್ರವಾಲ್ಯಾನ್ ತಾಕಾ ಸಾಂಗ್ಲೆಂ. ತ್ಯಾಚ್ ಪ್ರಕಾರ್, ಆದ್ಲ್ಯಾ ರಾತಿಂ, ಪದವ್ ಫಾಲ್ಕ್ಯಾಚ್ಯಾ ತ್ಯಾ ವಾಟೆನ್ ಎಕಾ ಘೊಡ್ಯಾಚಿಂ ಗೆಳಾಂ ಆಯ್ಕಲ್ಯಾಂತ್ ಮ್ಹಣ್, ಮಾಸ್ಳೆ ಖಾತಿರ್ ತಡಿಕ್ ಆಯಿಲ್ಲ್ಯಾ ಥೊಡ್ಯಾ ಆದಿನಿವಾಸಿಂನಿ ಖಬರ್ ಹಾಡ್ಲಿ.

ಇತ್ಲೆಂ ಆಯ್ಕೊನ್, ಸರ್ದಾರ್ ಸಿಮಾಂವ್ಚೊ ಭರ್ವಸೊ ಚಡಿತ್ ಜಿವೊ ಜಾಲೊ. ಪಯ್ಲೆಂ ಚಿಂತ್‍ಲ್ಲ್ಯಾ ಪ್ರಾಸ್ ಎಕಾ ವೊರಾ ಆದಿಂಚ್ ಭಾಯ್ರ್ ಸರೊಂಕ್ ಸಾಂಗಾತ್ಯಾಂಕ್ ತಾಣೆಂ ತಾಕಿದ್ ದಿಲಿ.

ತಶೆಂ, ಘೊಡ್ಯಾಂಚೆರ್ ಚಡೊನ್ ದಕ್ಷಿಣಾಕ್ ತೆ ಭಾಯ್ರ್ ಸರ್ತಾನಾ, ಪಾಟ್ಲ್ಯಾ – ಕುಂಬ್ಳಾ ಥಾವ್ನ್ ಯೆಂವ್ಚ್ಯಾ ವಾಟೆನ್ ಘೊಡೆ ಧಾಂವೊನ್ ಯೆಂವ್ಚೊ ಆವಾಜ್ ಆಯ್ಕೊನ್ ಸರ್ದಾರ್ ಸಿಮಾಂವ್ ಚುರುಕ್ ಜಾಲೊ.

ತೇಗ್ ಸವಾರ್, ತುರ್ತಾನ್ ಘೊಡೆ ಧಾಂವ್ಡಾವ್ನ್ ಲಾಗಿಂ ಪಾವ್ಲೆ.

“ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ಸರ್ದಾರಾಕ್ ಸಲಾಮ್” ಮ್ಹಣಾಲೊ ತಾಂಚೆ ಪಯ್ಕಿಲೊ, ಮುಖಾರ್ ಆಸ್‍ಲ್ಲೊ ಗ್ರಾಯ್ಕ್.

“ತುಮ್ಕಾಂಯೀ ಸಲಾಮ್” ಮ್ಹಣಾಲೊ ಸರ್ದಾರ್ ಸಿಮಾಂವ್ ಭರ್ಮಾನ್. ತ್ಯಾಚ್ ಘಡ್ಯೆ, ಆಯಿಲ್ಲ್ಯಾ ಸವಾರಾಂಚಿಂ ಸಮವಸ್ತ್ರಾಂ ತಾಣೆಂ ಪಾರ್ಕಿಲಿಂ. ತಾಂಚಿ ವಳಕ್ ತಾಣೆಂ ಧರ್ಲಿ; ಚಿಕ್ಕೆ ಕಾವ್ಜೆಣಿ ತಾಕಾ ಭೊಗ್ಲಿ.

ಸರ್ದಾರ್ ಯೂಸುಫ್ ಆಲಿಚ್ಯಾ ಕಂಪ್ಣೆಂತ್ಲೆ ಸವಾರ್ ತೆ ಜಾವ್ನಾಸ್‍ಲ್ಲೆ.

ಕಿತೆಂ ಗಜಾಲ್ ಜಾವ್ಯೆತ್? ತಾಚಿಂ ಚಿಂತ್ನಾಂ ಧಾಂವೊಂಕ್ ಲಾಗ್ಲಿಂ…

ತಾಣೆಂ ಧರ್‌ಲ್ಲೆಂ ಕಾಮ್ ಜಾರಿ ಜಾಂವ್ಚ್ಯಾ ಆದಿಂಚ್ ತಾಕಾ ಪಾಟಿಂ ವ್ಹರೊಂಕ್ ತೆ ಆಯ್ಲ್ಯಾತ್‍ಗಾಯ್? ಕಾಂಯ್ ಟಿಪ್ಪು ಸುಲ್ತಾನಾಚೊ ದುಬಾವ್ ಬಳ್ವಂತ್ ಜಾವ್ನ್ ಹುಕುಮ್ ಬದ್ಲುನ್ ವಾಯ್ದೊ ತಾಣೆಂ ಕಾತರ್ಲೊ ಜಾವ್ಯೆತ್?

“ಖಂಯ್ ಥಾವ್ನ್, ಆನಿ ಕಿತ್ಯಾ ಖಾತಿರ್ ತುಮಿ ಆಯ್ಲ್ಯಾತ್ ಜಾವ್ಯೆತ್?” ವಿಚಾರ್ಲೆಂ ತಾಣೆಂ, ಅಧಿಕಾರಾಚ್ಯಾ ಸ್ವರಾನ್. ಆಯಿಲ್ಲೆ ಗ್ರಾಯ್ಕ್ ಸಾಧೆ ಸವಾರ್ ಜಾವ್ನಾಸ್‍ಲ್ಲೆ. ತ್ಯಾ ಶಿವಾಯ್, ತಾಕಾ ಪಾಟಿಂ ವ್ಹರೊಂಕ್ ಜಾಲ್ಯಾರ್, ಖುದ್ದ್ ಯೂಸುಫ್ ಆಲಿಚ್, ಪಂಚ್ವೀಸ್ ಪುಣೀ ಸವಾರಾಂಕ್ ಘೆವ್ನ್ ಯೆತೊ ಆಸ್‍ಲ್ಲೊ ಮ್ಹಳ್ಳೆಂ ಚಿಂತುನ್ ತಾಕಾ ಧಯ್ರ್ ಮೆಳ್ಳೆಂ.

“ಆಮಿ ಕುರಿಯೆಲ್ ಥಾವ್ನ್ ಆಯ್ಲ್ಯಾಂವ್ ಹುಜೂರ್” ತಾಚ್ಯಾ ಸವಾಲಾಕ್ ಖಾಲ್ತಿ ಜಾಪ್ ಮೆಳ್ಳಿ.

“ಕುರಿಯೆಲ್ ಥಾವ್ನ್?” ಚಿಕ್ಕೆ ವಿಜ್ಮಿತ್ ಜಾವ್ನ್.

“ವ್ಹಯ್ ಹುಜೂರ್!”

“ತರ್ ಸರ್ದಾರ್ ಯೂಸುಫ್ ಆಲಿ?”

“ಕಾಲ್ ಕುರಿಯೆಲಾಕ್ ಪಾವ್ಲಾ. ತುಮಿ ಭಾಯ್ರ್ ಸರೊನ್ ಹೆವ್ಶಿನ್ ಆಯಿಲ್ಲ್ಯಾ ಥೊಡ್ಯಾಚ್ ವೆಳಾನ್ ಆಮಿ ಕುರಿಯೆಲಾಕ್ ಪಾವ್ಲ್ಯಾಂವ್. ಪುಣ್ ಸರ್ದಾರ್ ಯೂಸುಫ್ ಆಲಿಕ್ ಮಲೆನಾಡಾಚೊ (ಮಲೇರಿಯಾ) ಇಲ್ಲೊ ಜೋರ್ ಆಸ್‍ಲ್ಲ್ಯಾನ್, ತುಮ್ಚೊ ಪಾಟ್ಲಾವ್ ಕರ್ನ್ ಯೇಂವ್ಕ್ ತಾಕಾ ಸಾಧ್ಯ್ ಜಾಂವ್ಕ್ ನಾ. ದೆಕುನ್ ವರ್ದಿ ದಿಂವ್ಚ್ಯಾ ಖಾತಿರ್ ಆಮ್ಕಾಂ ತಾಣೆಂ ಧಾಡ್ಲ್ಯಾತ್.

“ಆಮ್ಚ್ಯಾ ಮಿತ್ರಾಕ್ ಜೋರ್ ಯೆತಾ ಮ್ಹಣ್ ಆಯ್ಕೊಂಕ್ ಆಮಿ ಬೆಜಾರ್ ಪಾವ್ತಾಂವ್. ತರೀ ವರ್ದಿ ಕಸಲಿ ಮ್ಹಳ್ಳೆಂ ಸಮ್ಜೊನ್ ಘೆವ್ಯಾಂ” ಮ್ಹಣಾಲೊ ಸರ್ದಾರ್ ಸಿಮಾಂವ್.

ಪರತ್ ತೆ ಧರ್ಣಿಕ್ ದೆಂವ್ಲೆ, ಆನಿ ಛತ್ರಾಕ್ ರಿಗೊಂಕ್ ಘುಂವ್ಲೆ.

ಭಿತರ್, ಯೂಸುಫ್ ಆಲಿಚ್ಯಾ ದೂತಾನ್, ಸರ್ದಾರ್ ಸಿಮಾಂವ್ಕ್ ಖಬರ್ ಸಾಂಗ್ಲಿ:

ಸರ್ದಾರ್ ಸಿಮಾಂವ್, ಅಂತುಲೊ ಪಡ್ವಳಾಕ್ ಆನಿ ರಾಮಪ್ಪಾಕ್ ಸಾಂಗಾತಾ ಘೆವ್ನ್ ಹೆವ್ಶಿನ್ ಭಾಯ್ರ್ ಸರ್‌ಲ್ಲ್ಯಾ ಥೊಡ್ಯಾಚ್ ವೆಳಾ ಉಪ್ರಾಂತ್, ಸರ್ದಾರ್ ಯೂಸುಫ್ ಆಲಿ ಆಪ್ಲ್ಯಾ ಸವಾರಾಂ ಸಾಂಗಾತಾ ಕುರಿಯೆಲಾಕ್ ಯೇವ್ನ್ ಪಾವ್‍ಲ್ಲೊ. ಸರ್ದಾರ್ ಸಿಮಾಂವ್ ದೋನ್‍ಂಚ್ ದಿಸಾಂ ಆದಿಂ ಕುರಿಯೆಲಾಕ್ ಪಾವೊನ್ ಘಡ್‍ಲ್ಲ್ಯೊ ಗಜಾಲಿ ಆನಿ ಪರಾರಿ ಜಾಲ್ಲ್ಯಾ ಆದ್ಲ್ಯಾ ಖಿಲ್ಲೆದಾರಾಕ್ ಸೊಧುನ್ ಕಾಡ್ಚ್ಯಾ ಖಾತಿರ್ ದಕ್ಷಿಣಾಕ್ ತೊ ಭಾಯ್ರ್ ಸರೊನ್ ಗೆಲ್ಲಿ ಖಬರ್ ಸಗ್ಳಿ, ಯೂಸುಫ್ ಆಲಿಕ್ ಪಯ್ಲೆಂ ಇಸ್ಮಾಯಿಲ್ ಬಾಬಾನ್ ಆನಿ ಉಪ್ರಾಂತ್ ವೀರಪ್ಪ ನಾಯ್ಕಾನ್ ವಿವರಿಂ ದಿಲಿ.

ಸರ್ದಾರ್ ಸಿಮಾಂವ್ಕ್ ಭೆಟಜಾಯ್ ಮ್ಹಣ್ ಯೂಸುಫ್ ಆಲಿಕ್ ಆತುರಾಯ್ ಆಸ್‍ಲ್ಲಿ. ಪುಣ್ ತಾಕಾ ಇಲ್ಲೊ ತಾಪ್ ಯೆತಾಲೊ ಜಾಲ್ಲ್ಯಾನ್, ತಕ್ಷಣ್ ಘೊಡ್ಯಾ ಸವಾರೆಚೆಂ ಪಯ್ಣ್ ಚಾಲು ಕರುಂಕ್ ತಾಕಾ ಸಾಧ್ಯ್ ನಾತ್‍ಲ್ಲೆಂ. ಪುಣ್ ಪಾಟಾಪಾಟ್ ಸರ್ದಾರ್ ಸಿಮಾಂವ್ಚಿ ಮಂಜಿ ದಕ್ಷಿಣಾಕ್ ಭಾಯ್ರ್ ಸರ್ತಾ ಮ್ಹಳ್ಳೆಂ ಆಯ್ಕೊನ್ ಆಪುಣ್‍ಯೀ ಆಪ್ಲ್ಯಾ ಸವಾರಾಂ ಸಾಂಗಾತಾ ಮಂಜೆಂತ್ ಪಯ್ಣ್ ಕರುಂಕ್ ತಾಣೆಂ ಚಿಂತ್ಲೆಂ. ಉಪ್ರಾಂತ್, ಘೊಡ್ಯಾಂಕ್ ಆನಿ ಸವಾರಾಂಕ್ ಕುರಿಯೆಲಾಂತ್ ಪಾಟಿಂ ಸೊಡುನ್, ಆಪ್ಣೆಂ ಎಕ್ಲ್ಯಾನ್‍ಂಚ್ ಮಂಜೆಂತ್ ಪಯ್ಣ್ ಕರುಂಕ್ ತಾಣೆಂ ನಿಚೆವ್ ಕೆಲೊ, ಆನಿ ಹ್ಯಾ ತೆಗಾಂ ಸವಾರಾಂಕ್ ಪಾಯ್ ವಾಟೆನ್ ಮುಖಾರ್ ಧಾಡ್ಲೆ.

ತೆ ತೆಗೀ ಸವಾರ್, ಸರ್ದಾರ್ ಸಿಮಾಂವ್ನ್ ಪಯ್ಣ್ ಕೆಲ್ಲಿ ವಾಟ್ ವಿಚಾರಿತ್ತ್, ಘಳಾಯ್ ಕರಿನಾಸ್ತಾನಾ ಮ್ಹಳ್ಳೆಪರಿಂ, ರಾತಿಂಚ್ ಯೇವ್ನ್ ಕುಂಬ್ಳಾ ಪಾವ್‍ಲ್ಲೆ.

ಕುಂಬ್ಳಾ ರಾವ್ಳೆರಾಚ್ಯಾ ವಠಾರಾಕ್ ಭಿತರ್ ಸರ್ಚ್ಯಾ ಆದಿಂ ತಾಣಿಂ ಆಲೋಚನ್ ಕರ್ನ್ ಘೊಡ್ಯಾಂಕ್ ಭಾಯ್ರ್ ರಾವಯ್ಲೆ. ತಾಂಕಾಂ ಉದಾಕ್ ದಿಲೆಂ ಆನಿ ಖಬರ್ ಘೆತ್ಲಿ. ಸರ್ದಾರ್ ಸಿಮಾಂವ್ ಆನಿ ತಾಚೆ ದೋಗ್ ಸಾಂಗಾತಿ ಸಾಂಜೆರ್ ಆಯಿಲ್ಲೆ, ಪುಣ್ ರಾತ್ ಥಂಯ್ಸರ್ ಪಾಶಾರ್ ಕರುಂಕ್ ಪಯ್ಲೆಂ ತಾಣಿಂ ಚಿಂತ್‍ಲ್ಲೆಂ, ಪುಣ್ ಉಪ್ರಾಂತ್ ಆಲೋಚನ್ ಬದ್ಲುನ್ ರಾತಿಂಚ್ ಭಾಯ್ರ್ ಸರೊನ್ ತೆ ಗೆಲ್ಯಾತ್ ಮ್ಹಣ್, ಘೊಡ್ಯಾಂಕ್ ಉದಾಕ್ ದಿಲ್ಲ್ಯಾ ಚೆಡ್ಯಾನ್ ತಾಂಕಾಂ ಸಾಂಗ್ಲೆಂ.

ತಶೆಂ ಮ್ಹಳ್ಯಾರ್, ಸರ್ದಾರ್ ಯೂಸುಫ್ ಆಲಿಚೆ ಸವಾರ್ ಕುಂಬ್ಳಾ ಯೇವ್ನ್ ಪಾಂವ್ಚ್ಯಾ ಚಡುಣೆಂ ದೋನ್‍ಂಚ್ ವೊರಾಂ ಆದಿಂ ಸರ್ದಾರ್ ಸಿಮಾಂವ್ ಆನಿ ತಾಚೆ ಸಾಂಗಾತಿ ಥಂಯ್ ಥಾವ್ನ್ ಭಾಯ್ರ್ ಸರೊನ್ ಪಾಶಾರ್ ಜಾಲ್ಲೆ.

ಕಿತೆಂ ತರೀ ಗರ್ಜೆಚೆಂ ಕಾರಣ್ ಆಸ್ತೆಲೆಂ ಮ್ಹಣ್ ಚಿಂತುನ್, ಆನಿ ವಾಟೆರ್ ಥೊಡೊಚ್ ವಿಶೆವ್ ಘೆವ್ನ್, ಸರ್ದಾರ್ ಯೂಸುಫ್ ಆಲಿಚೆ ಸವಾರ್, ತಶೆ, ಕಾಸರ್‌ಗೋಡಾಕ್ ಪಾವ್‍ಲ್ಲೆ. ಇತ್ಲೆಂ ಆಯ್ಕತಚ್,

“ಪುಣ್ ತುಮಿ ಇತ್ಲ್ಯಾ ತುರ್ತಾನ್ ಆಮ್ಚೊ ಪಾಟ್ಲಾವ್ ಕರ್ನ್ ಯೇಜಾಯ್ ಜಾಲ್ಯಾರ್, ಸರ್ದಾರ್ ಯೂಸುಫ್ ಆಲಿನ್ ಕಸಲಿ ಪುಣೀ ತುರ್ತಾಚಿ ವರ್ದಿ ತುಮ್ಚೆ ಕಡೆನ್ ದಿಲ್ಯಾ ಆಸ್ಯೆತ್, ನಹಿಂವೇ?” ವಿಚಾರ್ಲೆಂ ಸರ್ದಾರ್ ಸಿಮಾಂವ್ನ್.

“ಜೀ ಹುಜೂರ್” ತಾಕಾ ಜಾಪ್ ಮೆಳ್ಳಿ. “ಆಮ್ಚ್ಯಾ ಸರ್ದಾರಾನ್ ತುಮ್ಕಾಂ ಪಾವಿತ್ ಕರ್ಚ್ಯಾ ಖಾತಿರ್ ತೊಂಡ್ಪಾಶಿಂ ವರ್ದಿ ದಿಲ್ಯಾ. ಪರಾರಿ ಜಾಲ್ಲ್ಯಾ ಕೊಣಾಯ್ಕೀ ಧರ್ಚ್ಯಾ ಖಾತಿರ್, ಫಾವೊ ತಿತ್ಲೆ ರಕ್ಷಕ್ ಶಿಪಾಯ್ ನಾಸ್ತಾನಾ ತುಮಿ ಅಪಾಯ್ ಸೊಧುನ್ ವಚೊಂಕ್ ನಜೊ ಖಂಯ್. ಬಾದಶಹಾನ್‍ಂಚ್ ತಶಿ ಖುಶಿ ಉಚಾರ್ಲ್ಯಾ ಖಂಯ್. ದೆಕುನ್, ತುಮ್ಕಾಂ ಜಾಯ್ ತಿ ಕುಮಕ್ ಆನಿ ರಕ್ಷಣ್ ದಿಂವ್ಚ್ಯಾ ಖಾತಿರ್ ಆಮಿ ಕುರಿಯೆಲಾಕ್ ಆಯಿಲ್ಲ್ಯಾಂವ್. ತುಮ್ಕಾಂ ತುರ್ತಾನ್ ಸೊಧುನ್ ಕಾಡ್ನ್ ಹೆಂ ಸಾಂಗಜಾಯ್ ಮ್ಹಣ್ ಆಮ್ಚ್ಯಾ ಸರ್ದಾರಾನ್ ಆಮ್ಕಾಂ ಫರ್ಮಾಯ್ಲಾಂ.”

“ಸಮ್ಜಲೆಂ” ಮ್ಹಣಾಲೊ ಸರ್ದಾರ್ ಸಿಮಾಂವ್, ಭರ್ಮಾನ್.

ನಿಜಾಯ್ಕೀ ತಾಕಾ ಸಮ್ಜಲ್ಲೆಂ ದುಸ್ರೆಂಚ್. ಧರ್ಣಿರ್ ತಸೊ ದರ್ಯಾಂತ್, ಪಯ್ಸ್ ಪರ್ಯಾಂತ್ ತಾಚೊ ವಹಿವಾಟ್ ಆನಿ ವ್ಯವಹಾರ್ ಆಸ್‍ಲ್ಲೊ. ಮನ್ ನಾ ಜಾಲ್ಯಾರ್, ಟಿಪ್ಪು ಸುಲ್ತಾನಾಕ್ ಪರ್ತ್ಯಾನ್ ಮೆಳನಾತ್‍ಲ್ಲೆಪರಿಂ ಖಂಯೀ ತಾಕಾ ವಚ್ಯೆತೆಂ. (ಆದಿಂಯೀ ಏಕ್ ಪಾವ್ಟಿಂ ತಶೆಂ ತಾಣೆಂ ಕೆಲ್ಲೆಂ). ಹೆಂ ಟಿಪ್ಪುಯೀ ಜಾಣಾಂಸ್‍ಲ್ಲೊ. ದೆಕುನ್ ತಾಣೆಂ ಹ್ಯಾ ಪಾವ್ಟಿಂ ಚುಕಯ್ನಾತ್‍ಲ್ಲೆಪರಿಂ ಟಿಪ್ಪುನ್ ತುರ್ತಾನ್ ಮೇಟ್ ಕಾಡ್ಲಾಂ ಮ್ಹಣ್ ತಾಕಾ ಸಮ್ಜಲೆಂ. ನಾನಾಂತೆ ದುಬಾವ್ ತಾಕಾ ಖಾಂವ್ಕ್ ಲಾಗ್ಲೆ.

“ದುಸ್ರೆಂ ಕಾಂಯ್ ಆಸಾ?” ವಿಚಾರ್ಲೆಂ ತಾಣೆಂ.

“ವ್ಹಯ್” ಮ್ಹಣಾಲೊ ಸವಾರ್, ಆಪ್ಲ್ಯಾ ಖೊಮ್ಸಾ ಭಿತರ್ ಹಾತ್ ಘಾಲ್ನ್, ಪಾತಳ್ ಚಾಮ್ಡ್ಯಾಚಿ ಏಕ್ ಪಿಶ್ವಿ ಭಾಯ್ರ್ ಕಾಡ್ನ್. “ಹಾಂತುಂ ಆಮ್ಚ್ಯಾ ಸರ್ದಾರಾನ್ ತುಮ್ಕಾಂ ಕಸಲೊಗೀ ಖಾಸ್ಗಿ ಸಂದೇಶ್ ಧಾಡ್ಲಾ. ಸರ್ಕಾರಿ ನಹಿಂ, ಖಾಸ್ಗಿ ವರ್ದಿ ತಿ ಜಾಲ್ಲ್ಯಾನ್, ಸವ್ಕಾಸಾಯೆನ್ ವಾಚ್ಯೆತ್ ಮ್ಹಣ್ ಆಮ್ಚ್ಯಾ ಸರ್ದಾರಾನ್ ಸಾಂಗ್ಲಾಂ.”

“ಜಾವ್ಯೆತ್” ಮ್ಹಣಾಲೊ ಸರ್ದಾರ್ ಸಿಮಾಂವ್. ಪಿಶ್ವಿ ತಾಣೆಂ ಘೆತ್ಲಿ, ಆನಿ ಆಪ್ಲ್ಯಾ ದಗ್ಲ್ಯಾಚ್ಯಾ ಭಿತರ್ಲ್ಯಾ ಜೇಬಾಂತ್ ದವರ್ಲಿ. ನಿಜಾಯ್ಕೀ ತಿ ವರ್ದಿ ಕಸಲಿ ಜಾವ್ಯೆತ್ ಮ್ಹಣ್ ತಾಣೆಂ ಗುಮಾನ್ ಕರುಂಕ್ ನಾ. ಕಿತ್ಯಾಕ್, ತಾಚಿಂ ಚಿಂತ್ನಾಂ ತ್ಯಾ ವೆಳಾರ್ ಭರಾನ್ ದುಸ್ರ್ಯಾ ವಾಟೆನ್ ಧಾಂವ್ತಾಲಿಂ.

ಪರಾರಿ ಜಾಲ್ಲೊ ಖಿಲ್ಲೆದಾರ್ ಮೆಳನಾಸ್ತಾನಾ ತರೀ ಆಪ್ಣೆಂ ಟಿಪ್ಪು ಸುಲ್ತಾನಾ ಸರ್ಶಿನ್ ಪಾಟಿಂ ಗೆಲ್ಯಾರೀ ವ್ಹಡ್ ನಹಿಂ, ಪುಣ್ ಮಾನಿನ್ ವೆರೊನಿಕಾ ಕುವೆಲಿಚಿ ಖಬರ್ ಸಮ್ಜಲ್ಯಾ ಶಿವಾಯ್ ಆಪುಣ್ ಪಾಟಿಂ ವೆಚೊ ಸಂಭವ್ ನಾ ಮ್ಹಣ್ ತೊ ಪಾತ್ಯೆಲೊ.

“ಜಾಯ್ತ್ ತರ್” ಮ್ಹಣಾಲೊ ತೊ. “ಫುಡ್ಲಿ ತುಮ್ಚಿ ಆಲೋಚನ್?”

“ಆಮ್ಚಿ ಆಲೋಚನ್ ಕಾಂಯ್ ನಾ. ತುಮ್ಚಿ ಭೆಟ್ ಜಾಲ್ಯಾ ಉಪ್ರಾಂತ್ ಜಾಯ್ ಜಾಲ್ಯಾರ್ ತುಮ್ಚ್ಯಾ ಸಾಂಗಾತಾಚ್ ರಾವೊನ್, ತುಮ್ಚೆ ಥಾವ್ನ್ ಹುಕುಮ್ ಘೆಂವ್ಕ್ ಆಮ್ಕಾಂ ಸಾಂಗ್ಲಾಂ.”

“ಭೋವ್ ಬರೆಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಆಮಿ ದುಬಾವ್ ಚಿಂತುನ್, ಸೊಧುನ್ ಆಯಿಲ್ಲೊ ಅಪ್ರಾಧಿ, ಥೊಡ್ಯಾ ವೆಳಾ ಆದಿಂ ಹೆಣೆಂ ಪಾಶಾರ್ ಜಾವ್ನ್ ಗೆಲಾ. ತಾಚಿ ಪಾಟ್ ಧರ್ನ್ ಆಮಿ ವೆತಾಂವ್. ತ್ಯಾ ತೆಕಿದ್ ತುಮಿಂಯೀ ಥೊಡೆಂ ಕಾಮ್ ಕರಿಜಾಯ್.”

“ತುಮ್ಚಿ ಹುಕುಮ್.”

“ಇತ್ಲಿಚ್: ತುಮಿ ಪಾಟಿಂ ವಚೊನ್ ಕುಂಬ್ಳಾ ತಡಿರ್ ಗುಪಿತ್ ರಾವಜಾಯ್. ಮ್ಹಜಿ ಮಂಜಿ – ಆನಿ ಸರ್ದಾರ್ ಯೂಸುಫ್ ಆಲಿ – ಥಂಯ್ಸರ್ ಪಾವ್ತಚ್, ಆಮಿ ನೀಲೇಶ್ವರಾಕ್ ಗೆಲ್ಯಾಂವ್ – ಅಪ್ರಾಧ್ಯಾಂಕ್ ಥಂಯ್ಸರ್ ಕೈದ್ ಕರ್ಚೊ ಭರ್ವಸೊ ಆಸಾ, ದೆಕುನ್ ತಾಣಿಂ ಘಳಾಯ್ ಕರಿನಾಸ್ತಾಂ ನೀಲೇಶ್ವರಾಕ್ ಯೇಜಾಯ್ ಮ್ಹಣ್ ಆಮಿ ಅಪೇಕ್ಷಿಲಾಂ ಮ್ಹಳ್ಳಿ ವರ್ದಿ ದೀಜಾಯ್.”

“ಜೀ ಹುಜೂರ್” ಮ್ಹಣಾಲೊ ಸವಾರ್.

“ತರ್, ಆಮಿ ಘಳಾಯ್ ಕರಿನಾಂವ್ – ಸರ್ದಾರ್ ಯೂಸುಫ್ ಆಲಿಕ್ ಆಮ್ಚೊ ಸಲಾಮ್ ದಿಯಾ.”

ಚಡ್ತಾವ್ ವೇಳ್ ಕಾಡಿನಾಸ್ತಾಂ ಸರ್ದಾರ್ ಸಿಮಾಂವ್ ಭಾಯ್ರ್ ಆಯ್ಲೊ. ಆನಿ ಘೊಡ್ಯಾರ್ ಚಡೊನ್ ಆಪ್ಲ್ಯಾ ಸಾಂಗಾತ್ಯಾಂ ಸಾಂಗಾತಾ ಪಯ್ಣ್ ತಾಣೆಂ ಮುಂದರ್ಸಿಲೆಂ. ಸರ್ದಾರ್ ಯೂಸುಫ್ ಆಲಿ ಆನಿ ತಾಚೆ ಹೆರ್ ಸವಾರ್ ಮೆಳ್ಚ್ಯಾ ಆದಿಂಚ್ ಮಾನಿನ್ ವೆರೊನಿಕಾ ಕುವೆಲಿಚಿ ಖಬರ್ ಸಮ್ಜೊನ್, ತಿಕಾ ಮಜತ್ ದೀಜಾಯ್ ಮ್ಹಣ್ ತಾಚೆಂ ಮನ್ ಅತ್ರೆಗ್ತಾಲೆಂ.

ನಿಜಾಯ್ಕೀ ತ್ಯಾಚ್ ವೆಳಾರ್, ಮಾನಿನ್ ವೆರೊನಿಕಾ ಕುವೆಲಿಕ್ ಖರ‍್ಯಾ ವೀರ್ ಸರ್ದಾರಾಂಚ್ಯಾ ಮಜತೆಚಿ ಗರ್ಜ್ ಆಸ್‍ಲ್ಲಿ. ಪಾಟ್ಲ್ಯಾ ಥೊಡ್ಯಾಚ್ ದಿಸಾಂನಿ ತಿಚೆ ಥಂಯ್ ಘಡ್‍ಲ್ಲ್ಯಾ ವಿಷಯಾಂ ವರ್ವಿಂ, ಆನಿ ತಾಕಾ ವೆಡೊ ಘಾಲ್ನ್ ರಾವ್‍ಲ್ಲ್ಯಾ ಅಪಾಯಾಂ ವರ್ವಿಂ, ಆಪುಣ್ ಖರಿಚ್ ಹ್ಯಾ ಸಂಸಾರಾಂತ್ ಆಸಾಂ, ವಾ, ಕಸಲೆಂಗೀ ಭಿರಾಂಕುಳ್ ಸ್ವಪಣ್ ಸ್ವಪ್ಣೆತಾಂ ಮ್ಹಣ್ ತಿ ವೀರ್ ಸ್ತ್ರೀ ಬಾವ್ಡಿ ದುಬಾವ್ತಾಲಿ.

* * * * *

ಇಜಾಬೆಲ್ ತೆರೆಜಾಕ್ ಅಸ್ವಸ್ಥ್ ಮ್ಹಣ್ ಖಬರ್ ಮೆಳ್ತಚ್ ‘ವಚೊನ್ ಯೆತಾಂ’ ಮ್ಹಣ್ ದಯಾಳ್ ಚಿಂತ್ನಾಂನಿ ಮಾನಿನ್ ವೆರೊನಿಕಾ, ಬೊಕ್ಕಪಟ್ಣಾ ಥಾವ್ನ್ ಭಾಯ್ರ್ ಸರೊನ್ ಗೆಲ್ಲಿ. ಮುಸ್ಲಿಮ್ ಸ್ತ್ರೀಯೆಚ್ಯಾ ವೆಸಾನ್ ತಿ ಆಸ್‍ಲ್ಲಿ. ತಿಚ್ಯಾ ಸಾಂಗಾತಾ ಹೆರ್ ಕೊಣೀ ನಾತ್‍ಲ್ಲೆ.

ಅರ್ವಾಸ್ ವಾಟ್ ಸಾಗ್ಸತಾನಾ, ತಿಚೊ ಅರ್ಧೆಂ ಕೋಂತ್ ತೇರ್ಸ್ ಜಾಲ್ಲೊ. ಚಿಕ್ಕೆ ರಾನ್ವಟ್ ವಾಟ್ ತಿ. ಥಂಯ್ಸರ್ ಬೊಯ್ಲಾಂಚಿ ಏಕ್ ಗಾಡಿ ರಾವೊನ್ ಆಸ್‍ಲ್ಲಿ. ಸಾಂಜೆಚ್ಯಾ ವೊತಾಚೊ ಉಜ್ವಾಡ್ ಬರೊಚ್ ಆಸ್‍ಲ್ಲ್ಯಾನ್, ಮಾನಿನ್ ವೆರೊನಿಕಾಕ್ ಕಾವ್ಜೆಣಿ ಭೊಗುಂಕ್ ನಾ. ಪಾಶಾರ್ ಜಾಂವ್ಕ್ ಮ್ಹಣ್ ಮೆಟಾಂ ಕಾಡ್ನ್ ತಿ ಫುಡೆಂ ಸರ್ಲಿ.

ಗಾಡಿಯೆಕ್ ಲಾಗಿಂ ಪಾವ್ತಾನಾ, ಜಪ್ ಕರ್ನ್ ದೋಗ್ ದಾದ್ಲೆ ತಿಚ್ಯಾ ಸಾಮ್ಕಾರ್ ರಾವ್ಲೆ – ಪಯ್ಲೆಂ ಗಾಡ್ಯೆಚ್ಯಾ ಆಡೊಸಾಕ್ ತೆ ರಾವ್‍ಲ್ಲೆ. ತಿ ಕಾವ್ಜೆಲಿ. ಪಾಟಿಂ ತಿಣೆಂ ಪಳೆಲೆಂ. ತ್ಯಾ ವಾಟೆನ್‍ಯೀ ಗಪ್‍ಚಿಪ್ ದೋಗ್ ಜಣ್ ಉದೆಲೆ.

ಆತಾಂ ತಿ ಪುರ್ತಿ ಆಕಾಂತ್ಲಿ.

“ಬೋಬ್ ಮಾರಿನಾಕಾ – ಆವಾಜ್ ಕರಿನಾಕಾ!” ಮ್ಹಣಾಲೊ ಎಕ್ಲೊ.

“ಕಿ-ಕಿತೆಂ ತುಮ್ಕಾಂ ಜಾಯ್?” ಮ್ಹಣಾಲಿ ತಿ ಕಷ್ಟಾಂನಿ.

“ಆಮ್ಕಾಂ ಸದ್ದ್ಯಾಕ್ ತುಂಚ್ ಜಾಯ್! ಸಬ್ದ್ ಕಾಡಿನಾಕಾ. ಆವಾಜ್ ಕರಿನಾಕಾ – ತುಕಾ ಬರೆಂಚ್ ಜಾತೆಲೆಂ. ಕಾಂಯ್ ಉಪ್ರಾಟ್ಶಿ, ಕಾಂಯ್ ಆವಾಜ್ ಪುಣೀ ಕರ್ಶಿ, ತುಕಾ ಹಾಂಗಾಚ್ ತ್ಯಾ ಮುರ‍್ಯಾ-ಚಿರ‍್ಯಾಂಚ್ಯಾ ಖಂದ್ಕಾಂತ್ ವ್ಹರ್ನ್ ಆಮ್ಕಾಂ ಜಾಯ್ ತಶೆಂ ಕರ್ನ್, ಉಪ್ರಾಂತ್ ತುಜಿಂ, ತುಜೆಂ, ತುಜಿ ಗೊಮ್ಟಿ ಲುಂವೊನ್…”

“ಜೆಜು!” ಅಕ್ಲಾಸ್ಲಿ ತಿ. “ಜೆಜು!”

ಥೊಡ್ಯಾಚ್ ಹಫ್ತ್ಯಾಂ ಆದಿಂ, ಕಾಫ್ರಿಗುಡ್ಯಾಚ್ಯಾ ವಾಟೆರ್, ರಾತಿಂಚ್ಯಾ ವೆಳಾರ್ ಘಡ್‍ಲ್ಲಿ ಗಜಾಲ್ ತಿಚ್ಯಾ ಮತಿಂತ್ ಝಳ್ಕಲಿ. ಪುಣ್ ತ್ಯಾ ರಾತಿಂ, ತೊ ಸರ್ದಾರ್ ಕಾಳೊಕಾಂತ್ಲ್ಯಾನ್ ಉದೆವ್ನ್ ತಿಕಾ ಬಚಾವಿ ಹಾಡ್ನ್ ಆಯಿಲ್ಲೊ. ಪುಣ್ ಆಜ್… ತಸಲಿಂ ಅಜ್ಯಾಪಾಂ ಜಿಣ್ಯೆಂತ್ ದೊ-ದೋನ್ ಪಾವ್ಟಿಂ ಘಡನಾಂತ್.

ತ್ಯಾ ಮನ್ಶ್ಯಾಂನಿ ತಿಕಾ ಫುಡೆಂ ಚಿಂತುಂಕ್ ವಾ ಉಲಂವ್ಕ್ ಅವ್ಕಾಸ್ ದೀಂವ್ಕ್ ನಾ. ದೊಗಾಂನಿ ತಿಚೆ ಬಾವ್ಳೆ ವೊಳಾವ್ನ್‌ಶೆಂ ಧರ್ಲೆ. ಆನ್ಯೇಕ್ಲ್ಯಾನ್ ತಿಚ್ಯಾ ಮಾತ್ಯಾರ್ ಏಕ್ ಗೊಣಿಯೆಚೆಂ ಚೀಲ್ ಗಳಯ್ಲೆಂ, ಆನಿ ತಿಣೆಂ ಬೋಬ್ ಮಾರಿನಾತ್‍ಲ್ಲೆಪರಿಂ ರೆವ್ಡಾಯ್ಲೆಂ. ತಶೆಂಚ್ ತಿಕಾ ಉಕ್ಲುನ್ ಗಾಡ್ಯೆಂತ್ ಬಸಯ್ಲೆಂ. ತೆಯೀ ಗಾಡಿಯೆರ್ ಚಡ್ಲೆ. ಗಾಡಿ ಚಾಲು ಜಾಲಿ.

ಥೊಡಿಂ ವೊರಾಂ ಪಾಶಾರ್ ಜಾಲಿಂ. ಗಾಡ್ಯೆಂತ್ ಕೊಣೀ ಉಲಂವ್ಕ್ ನಾಂತ್. ಗಾಡಿ ಖಂಯ್ ವೆತಾ ಮ್ಹಣೊನ್ ಮಾನಿನ್ ವೆರೊನಿಕಾ ಕುವೆಲಿಕ್ ಕಳೊಂಕ್ ನಾ. ತಿಚ್ಯಾ ಮತಿಂತ್ ಚಿಂತ್ನಾಂಚೊ ಗೊಂದೊಳ್ ಜಾಲ್ಲೊ. ಹ್ಯಾ ಸಂಸಾರಾಂತ್ ದೆವಾನ್ ಆಪ್ಣಾಕ್ ನಿರ್ಮಿಲ್ಲೆಂ ಕಾಮ್ ಬಹುಶ್ಯ ಸಂಪ್ಲೆಂ, ಆನಿ ಹೆಂ ಆಪ್ಣೆಂ ನಿಮಾಣೆಂ ಪಯ್ಣ್ – ಜಾಂವ್ ದೆವಾಚಿ ಖುಶಿ ಮ್ಹಣೊನ್ ತಿಣೆಂ ಖಾಲ್ತಿಮಾನ್ ಘಾಲಿ.

ಚಡುಣೆಂ ರಾತಿಂಚ್ಯಾ ಧಾ ವೊರಾರ್ ಗಾಡಿ ರಾವ್ಲಿ. ವೆರೊನಿಕಾಚ್ಯಾ ಮಾತ್ಯಾ ತೊಂಡಾಕ್ ರೆವ್ಡಾಯಿಲ್ಲಿ ಗೊಣಿ ಸೊಡವ್ನ್ ತಿಕಾ ತಾಣಿಂ ಸಕಯ್ಲ್ ದೆಂವಯ್ಲೆಂ. ಥಂಯ್ ಥಾವ್ನ್ ಚಿಕ್ಕೆ ಪಯ್ಸ್ ಆಸ್ಚ್ಯಾ ಎಕಾ ಘರಾ ತಿಕಾ ತೆ ವ್ಹರ್ನ್ ಗೆಲೆ.

ಆಯಿಲ್ಲ್ಯಾ ಗ್ರಾಯ್ಕಾಂನಿ ಆವಾಜ್ ದಿತಚ್, ಥೊಡ್ಯಾ ವೆಳಾನ್ ತ್ಯಾ ಘರ್ಚೆಂ ಬಾಗಿಲ್ ಉಗ್ತೆಂ ಜಾವ್ನ್ ದಿವೊ ದಿಸ್ಲೊ.

ವೆರೊನಿಕಾಚ್ಯಾ ಬಾವ್ಳ್ಯಾಂಕ್ ಧರ್ನ್, ಆಯಿಲ್ಲೆ ಗ್ರಾಯ್ಕ್ ಭಿತರ್ ಸರ್ಲೆ. ಜೀವ್ ಆಸೊನ್‍ಯೀ ಮೆಲ್ಲೆಪರಿಂ ಜಾವ್ನ್, ಮಾನಿನ್ ವೆರೊನಿಕಾ ಕುವೆಲಿನ್ ದಿವ್ಯಾಚ್ಯಾ ಉಜ್ವಾಡಾಕ್ ತ್ಯಾ ಕುಡಾಂತ್ ದೀಶ್ಟ್ ಭೊಂವ್ಡಾಯ್ಲಿ. ತೆಂ ಏಕ್ ಮುಸ್ಲಿಮಾಂಚೆಂ ಘರ್ ಜಾವ್ನಾಸ್‍ಲ್ಲೆಂ ಮ್ಹಣ್ ತಿಕಾ ಸಮ್ಜೊಂಕ್ ವೇಳ್ ಗೆಲೊ ನಾ.

ತಿತ್ಲ್ಯಾರ್, ತೆವ್ಶಿಲ್ಯಾ ಕುಡಾ ಥಾವ್ನ್, ದರ್ಬಾರಾನ್ ನ್ಹೆಸೊನ್ ಆಸ್‍ಲ್ಲೊ ಎಕ್ಲೊ. ಖಾಡ್ಯಾಳೊ ಮುಸ್ಲಿಮ್ ಭಾಯ್ರ್ ಯೇವ್ನ್ ವೆರೊನಿಕಾಚ್ಯಾ ಮುಖಾರ್ ರಾವ್ಲೊ. ಎಕ್ಲಿ ಮುಸ್ಲಿಮ್ ಸ್ತ್ರೀ, ಕುಡಾಚ್ಯಾ ಬಾಗ್ಲಾರ್ ಪಾಟಿಂ ರಾವ್‍ಲ್ಲಿ ವೆರೊನಿಕಾಕ್ ದಿಸ್ಲಿ.

ಖಾಡ್ಯಾಳ್ಯಾನ್ ವೆರೊನಿಕಾಕ್ ಬಸೊಂಕ್ ಹಾತ್ ಭಾಸ್ ಕೆಲಿ. ತಿ ಬಸೊಂಕ್ ನಾ. ಬಗಾರ್:

“ಕೋಣ್ ತುಮಿ?” ವಿಚಾರ್ಲೆಂ ತಿಣೆಂ. ಕಾಳ್ಜಾಂತ್ಲೆ ಧಡ್ದಡೆ ಲಿಪವ್ನ್.

“ನಸ್ರಾನಿ ಬಾಯ್ಲಾಂಚೆಂ ಧಯ್ರ್ ಜಾಲ್ಯಾರೀ ಜಾವ್ಯೆತ್” ಮ್ಹಣಾಲೊ ಖಾಡ್ಯಾಳೊ. ಹಾತ್ ಉಬಾರ್ನ್, ವೆರೊನಿಕಾಚ್ಯಾ ಬುರ್ಕಾಚೆಂ ಮುಖಾವರಣ್ ತಾಣೆಂ ಪಾಟಿಂ ಪರ್ತಿಲೆಂ.

“ಧಯ್ರಾ ತೆಕಿದ್ ಸೊಭಾಯ್‍ಯೀ ಆಸಾ – ಬರೆಂಚ್ ಜಾಲೆಂ” ಮ್ಹಣಾಲೊ ಖಾಡ್ಯಾಳೊ. “ಪಯ್ಣ್ ಅವ್ಗಡಾವಿಣೆಂ ಬರೆಂಚ್ ಜಾಲೆಂ ಮ್ಹಣ್ ದಿಸ್ತಾ. ಧೊಸ್ ಪುಣೀ ಜಾಂವ್ಕ್ ನಾಮೂ?”

“ಜಾಂವ್ಕ್ ನಾ” ಎಕ್ಲ್ಯಾನ್ ಜಾಪ್ ದಿಲಿ.

“ಕೋಣ್ ತುಮಿ? ಕಿತ್ಯಾಕ್ ಅಸಲೊ ಅನ್ಯಾಯ್?” ವೆರೊನಿಕಾ ಕುವೆಲಿನ್ ಪರ್ತ್ಯಾನ್ ವಿಚಾರ್ಲೆಂ.

“ಆಮಿ ನಹಿಂ – ಹಾಂವ್ ಕೋಣ್ ಮ್ಹಣ್ ಸಾಂಗ್ತಾಂ” ಮ್ಹಣಾಲೊ ಖಾಡ್ಯಾಳೊ. “ಕಾಲ್ ಪರ್ಯಾಂತ್ ಹಾಂವ್ ಬೋಳೂರ್ ಠಾಣ್ಯಾಚೊ ಖಿಲ್ಲೆದಾರ್ ಜಾವ್ನಾಸ್‍ಲ್ಲೊಂ. ಆಜ್ ಹಾಂವ್ ಪರಾರಿ.”

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel