ದಾಂಡೇಲಿ: ಉದ್ಕಾಂತ್ಲೆಂ ಸಾಹಸ್ ರಿವರ್ ರ್ಯಾಫ್ಟಿಂಗ್ – ಏಕ್ ಅನುಭವ್
Posted on : May 15, 2025 at 3:27 PM
ಮನಿಸ್ ಏಕ್ ಅಪ್ರತಿಮ್ ಸಾಹಸಿ. ಸಾಹಸ್ ನಾತ್‍ಲ್ಲೆಂ ಜಿವಿತ್ ನಿರಾಶಾದಾಯಕ್. ಪಯ್ಣ್‌ಯೀ ಏಕ್ ಸಾಹಸ್‍ಚ್. ಪಯ್ಣಾಚ್ಯಾ ಆಖೇರಿಕ್ ಅದ್ಭುತ್ ಸಾಹಸ್ ಕೃತ್ಯಾಂನಿ ತನ್-ಮನ್ ಪ್ರಫುಲ್ಲ್ ಜಾಂವ್ಚೊ ಅನುಭವ್ ತುಮ್ಕಾಂ ಜಾಯ್ ತರ್ ತುಮಿ ದಾಂಡೇಲಿಕ್ ಭೆಟ್ ದೀಜೆ.
ವ್ಹಯ್. ‘ರಿವರ್ ರ್ಯಾಫ್ಟಿಂಗ್’ ತುಮಿ ಆಯ್ಕಲಾಂ ಆಸ್ತೆಲೆಂ ನ್ಹಯ್ವೇ? ಹ್ಯಾ ಅದ್ಭುತ್ ಸಾಹಸಾ ಖಾತಿರ್ ಸಂಸಾರಾಂತ್‍ಚ್ ನಾಂವಾಡ್‍ಲ್ಲೊ ಏಕ್ ಜಾಗೊ ಆಸಾ, ತೊಚ್ ದಾಂಡೇಲಿ. ದಾಂಡೇಲಿ ಮ್ಹಳ್ಯಾರ್ ರಿವರ್ ರ್ಯಾಫ್ಟಿಂಗ್ ಮ್ಹಣ್‍ಂಚ್ ಅರ್ಥ್. ಉದ್ಕಾಂತ್ಲ್ಯಾ ಅಮೋಘ್ ಸಾಹಸ್ ಖೆಳಾಂಕ್ ಹಿ ಸುವಾತ್ ಪ್ರಖ್ಯಾತ್.
ಉತ್ತರ ಕನ್ನಡ ಜಿಲ್ಲೊ ಸಮೃದ್ಧ್ ಪ್ರಾಕೃತಿಕ್ ಸಂಪನ್ಮೂಲಾಂನಿ ಭರ್‌ಲ್ಲೊ ಪ್ರದೇಶ್. ಪಶ್ಚಿಮ್ ಘಾಟಾಚಿ ಗ್ರೇಸ್ತ್‍ಕಾಯ್, ಗಣ್ಣ್ ರಾನ್, ನ್ಹಂಯೊ, ಮೊನ್ಜಾತಿ ಸಂಕುಲ್ ಇತ್ಯಾದಿ ಹಾಂಗಾ ಧಾರಾಳ್. ತುಮಿ ಜಾಣಾಂತ್ ಕೊಂಕ್ಣೆಂತ್ ಥೊಡೆ ಪಂಗಡ್, ಜೆ ರಾನಾಂನಿ ವಸ್ತಿ ಕರ್ತಾತ್, ತೆ ಹ್ಯಾ ಜಿಲ್ಲ್ಯಾಂತ್ ಜಿಯೆತಾತ್. ಉದಾ: ಸಿದ್ಧಿ, ಕುಣ್ಬಿ. ಅಪಾರ್ ಪ್ರಮಾಣಾರ್ ಪಾವ್ಸ್ ಹಾಂಗಾ ಪಡ್ತಾ.
ಪ್ರವಾಸೋದ್ಯಮಾಂತ್ ಉತ್ತರ ಕನ್ನಡಾಕ್ ಮಹತ್ವಾಚೆಂ ಸ್ಥಾನ್ ಆಸಾ. ಹಾಂಗಾ ವೈಲ್ಡ್‌ಲೈಫ್ ಟೂರಿಸಂ ಪ್ರಮುಖ್. ಗಣ್ಣ್ ರಾನಾಂ ಮಧೆಂ, ಉದ್ಕಾಚ್ಯಾ ಪ್ರಶಾಂತ್ ಸುವಾತೆಂನಿ ರಿಗೊನ್ ಸುಖ್ ಭೊಗುಂಕ್ ಲೋಕ್ ಹಾಂಗಾ ಸೊಧುನ್ ಯೆತಾ. ಆಜ್ ಆಮಿ ದಾಂಡೇಲಿಂತ್ ಉದ್ಕಾಂತ್ಲೆಂ ಸಾಹಸ್ ಕಸಲೆಂ, ತೆಂ ಕಿತ್ಯಾಕ್ ಮುಖ್ಯ್ ತೆಂ ಜಾಣಾಂ ಜಾವ್ಯಾಂ.
ಉದ್ಕಾಚ್ಯಾ ರಾಶಿಂತ್ ಖೆಳ್
ದಾಂಡೇಲಿಂತ್ ಆಸ್ಚೆಂ ರಿವರ್ ರ್ಯಾಫ್ಟಿಂಗ್ ಕೇಂದ್ರ್ ಏಕ್ ಅದ್ಭುತ್ ನೈಸರ್ಗಿಕ್ ತಾಣ್. ಹಾಂಗಾ ವ್ಹಾಳ್ಚ್ಯಾ ಕಾಳಿ ನ್ಹಂಯ್ತ್ ಹೊ ಜಾಗೊ ಆಸಾ. ದಾಟ್ ರಾನಾಂತ್ಲ್ಯಾ ಕಠಿಣ್ ರಸ್ತ್ಯಾಂನಿ ಹಾಂಗಾ ಪಾವಜೆ. ಬರೆಂಚ್ ಹಿಂವ್ ಆಸ್ತಾ. ತುಮ್ಚಿ ಭಲಾಯ್ಕಿ ಬರಿ ಆಸಾ ತರ್ ತುಮಿ ಹಾಂಗಾ ಸಂಸಾರ್ ವಿಸ್ರೊನ್, ಉದ್ಕಾಂತ್ ಅಭಿಷೇಕ್ ಜಾವ್ನ್ ಮಜಾ ಜೊಡ್ಯೆತ್.
ಹ್ಯಾ ಜಾಗ್ಯಾರ್ ಕಾಳಿ ನ್ಹಯ್ ಮೌನ್‍ಪಣಿಂ ವ್ಹಾಳ್ಚೊ ಲಾಂಬ್ ಜಾಗೊ ಆಸಾ. ಥಂಯ್ಸರ್ ಪಳೆಲ್ಯಾರ್ ಅಸಲ್ಯಾ ಪ್ರಶಾಂತ್ ಸುವಾತೆಂತ್ ಕಸಲೆಂ ಸಾಹಸ್ ಮ್ಹಣ್ ತುಮಿ ಏಕ್ ಘಡಿ ವಿಜ್ಮಿತ್ ಪಾವ್ತೆಲ್ಯಾತ್. ಪುಣ್ ತುಮ್ಕಾ ನೀಜ್ ಥ್ರಿಲ್ ಭೊಗ್ಚೆಂ ಉದ್ಕಾಕ್ ದೆಂವ್ಲ್ಯಾ ಉಪ್ರಾಂತ್‍ಚ್.
ಲ್ಹಾನ್ ಭುರ್ಗ್ಯಾಂಕ್, ಚಡ್ ಪ್ರಾಯೆಚ್ಯಾಂಕ್ ಆನಿ ಪಿಡೆಸ್ತಾಂಕ್ ಸೊಡ್ಲ್ಯಾರ್ ಸಕ್ಡಾಂನಿ ಉದ್ಕಾಕ್ ದೆಂವ್ಯೆತ್. ಮ್ಹಳ್ಯಾರ್ ರಬ್ಬರಾಚ್ಯಾ ದೋಣಿಂನಿ ಬಸಜೆ. ಪರಿಣತ್ ಬೋಟ್ ಚಲಯ್ತಾತ್ ಜಾಲ್ಲ್ಯಾನ್ ಹೆಂ ಸಾಹಸ್ ಸುರಕ್ಷಿತ್. ಫೊಟೊ, ವೀಡಿಯೊ ಶೂಟಿಂಗ್ ಕರಂವ್ಕ್ ಪ್ರತ್ಯೇಕ್ ಖರ್ಚ್ ಬಸ್ತಾ. ನಿಮಾಣೆಂ ಮೆಳ್ಚೆಂ ಥ್ರಿಲ್ ಆಸಾ ನೆ, ವ್ಹಾವ್, ವಂಡರ್‌ಫುಲ್ ಮ್ಹಣ್ ತುಮಿ ಉದ್ಗಾರ್ಚೆಂ ಭೋವ್ ಸ್ವಾಭಾವಿಕ್.
ಹಾಂಗಾಚೊ ಖರೊ ಖೆಳ್ ಕಿತೆಂ ಮ್ಹಳ್ಯಾರ್ ಆಮಿ ವೆಗಾನ್ ಧಾಂವ್ಚ್ಯಾ ಉದ್ಕಾಚ್ಯಾ ಲೊಟಾಂತ್ ಪಾಶಾರ್ ಜಾಂವ್ಚೆಂ. ಸಗ್ಳಿ ಬೋಟ್ ನಿಮಾಣೆಂ ಮೆಳ್ಚ್ಯಾ ಘುಂವ್ಡೆಂತ್, ಸುಳಿಯೆಂ ಮಧೆಂ, ಸಕಯ್ಲ್ ಪಡ್ಚ್ಯಾ ಉದ್ಕಾಂತ್ ಉಡ್ಕಿ ಮಾರ್ತಾ. ಎಕಾ ಘಡಿಯೆ ಕಾಳಿಜ್ ರಾವ್ತಾ ಕೊಣ್ಣಾ ಮ್ಹಣ್ ಆಕಾಂತ್ ಪಾಂವ್ಚಿ ಘಡಿ. ಪುಣ್ ಖಿಣಾಂ ಭಿತರ್ ಆಮಿ ಥಂಯ್ ಫಾತ್ರಾಂ ಮಧೆಂ ಉದ್ಕಾ ಶಿಂವೊರಾಂತ್ ಬುಡೊನ್ ಭಾಯ್ರ್ ಪಡ್ತಾಂವ್. ತಿ ಘಡಿ ಜೀಣ್‍ಭರ್ ಉಡಾಸಾಂತ್ ಉರ್ಚೆ ತಸಲಿ.
ದಾಂಡೇಲಿಚೆಂ ಪ್ರಧಾನ್ ಆಕರ್ಷಣ್ ಹೆಂಚ್. ತಶೆಂ ಮ್ಹಣ್ ತುಮಿ ಭಿಯೆಂವ್ಚಿ ಗರ್ಜ್ ನಾ. ಭೋವ್ ಸುರಕ್ಷಿತ್ ವಿಧಾನಾಂ ಹಾಂಗಾ ವಾಪರ್ತಾತ್ ಜಾಲ್ಲ್ಯಾನ್ ಅಪಾಯ್ ನಾ. ಪುಣ್ ಆಮಿ ಗರ್ಜೆ ಭಾಯ್ಲೆಂ ಕಿತೆಂಯೀ ಕೆಲ್ಯಾರ್ ಆಮಿಂಚ್ ಅಪಾಯಾಂತ್ ಪಡ್ಚೆ ಸಂಭವ್ ಖಚಿತ್. ದೆಕುನ್ ತಾಣಿಂ ಸಾಂಗ್‍ಲ್ಲೆಪರಿಂ ಮಾತ್ರ್ ಕೆಲ್ಯಾರ್ ಸಯ್.
ಹಾಂಗಾ ದಿಲ್ಲ್ಯಾ ಪಿಂತುರಾಂನಿ ಪಳೆಯಾ, ನಿಶ್ಚಲ್ ಸುವಾತ್ ಉತ್ರೊನ್ ಉದಾಕ್ ಸಕಯ್ಲ್ ಪಡ್ಚೊ ಜಾಗೊ ಫುಡ್ ಜಾತಾ. ಥಂಯ್ ಥಾವ್ನ್ ಮುಖಾರ್ ಖಡ್ಪಾಂ ಮಧ್ಲ್ಯಾನ್ ಬೋಟ್ ಪಾಶಾರ್ ಜಾತಾನಾ ಉದ್ಕಾಚ್ಯಾ ಶಿಂವೊರಾಂತ್ ತುಮಿ ಧಲ್ತೆಲ್ಯಾತ್. ಹ್ಯಾ ಗುಂಡಿಯೆಂತ್ ದೆಂವ್ಚ್ಯಾ ಪಯ್ಲೆಂ ಬೋಟ್ ಚಲಯ್ಣಾರ್ ತರ್ಬೆತ್ ಕರ್ತಾ. ತಾಣೆಂ ದಿಲ್ಲ್ಯಾ ಹಿಶಾರ‍್ಯಾಂ ಪರ್ಮಾಣೆಂಚ್ ಕೆಲ್ಯಾರ್ ಜಾಲೆಂ. ಲೈಫ್ ಜ್ಯಾಕೆಟ್ ಆನಿ ಹೆರ್ ಸುರಕ್ಷತೆಚಿಂ ಕ್ರಮಾಂ ಘೆತಾತ್. ಭಿರಾಂತಿಕ್ ಆಸ್ಪದ್ ನಾ.
ಕುಟ್ಮಾ ಸವೆಂ ತುಮಿ ಹಾಂಗಾ ವಚ್ಯೆತ್. ಹ್ಯಾ ಪ್ರಕ್ರಿಯೆಚೆಂ ಚಿತ್ರೀಕರಣ್‍ಯೀ ಚಲ್ತಾ. ದುಡು ದಿಲ್ಯಾರ್ ತುಮ್ಕಾಂ ಫೊಟೊ, ವೀಡಿಯೊ ತೆ ದಿತಾತ್. ಜಿಣ್ಯೆಂತ್ಲೊ ಏಕ್ ಅಪೂರ್ವ್ ಅನುಭವ್ ಹೊ. ದಾಂಡೇಲಿ ಏಕ್ ನೈಸರ್ಗಿಕ್ ಅಪ್ರತಿಮ್ ರ್ಯಾಫ್ಟಿಂಗ್ ಸೆಂಟರ್. ಉದಾಕ್ ಭೋವ್ ಥಂಡ್ ಆಸ್ತಾ ಆನಿ ಗೂಂಡ್ ಜಾಲ್ಲ್ಯಾನ್ ನ್ಹಂಯ್ತ್ ಉಪ್ಯೆಂವ್ಚೆಂ ಸುರಕ್ಷಿತ್ ನ್ಹಯ್.
ತುಮ್ಕಾಂ ಚಡ್ತಿಕ್ ಸಾಹಸ್ ಆಧಾರುಂಕ್ ಜಾಯ್ ತರ್ ತುಮಿ ತೆಂ ಕರ್ಯೆತ್. ಪುಣ್ ಫಿಟ್‍ನೆಸ್ ಆನಿ ಅನುಭವ್ ಆಸ್ಲೆಲ್ಯಾಂನಿ ಮಾತ್ರ್ ತೆಂ ವಿಂಚ್ಲ್ಯಾರ್ ಬರೆಂ. ನಾ ತರ್ ಫಾತ್ರಾಂಕ್ ಆಪ್ಟೊನ್ ಜಿವಾಕ್ ಅಪಾಯ್ ಜಾಯ್ತ್. ತರ್ನಾಟ್ಯಾಂಕ್, ಧಯ್ರಾಧಿಕ್ ವ್ಯಕ್ತಿಂಕ್ ಅಸಲೆ ಜಾಯ್ತೆ ಖೆಳ್ ಆಸಾತ್.
ದಾಂಡೇಲಿಚ್ಯಾ ವಾಟೆರ್
ದಾಂಡೇಲಿಕ್ ಆಪವ್ನ್ ವ್ಹರ್ಚೆ ಟ್ರಾವೆಲ್ ಸಂಸ್ಥೆ ಆಸಾತ್. ಮಂಗ್ಳುರ್ ಥಾವ್ನ್ ಟೆಂಟೊ ವೆತಾತ್. ಪಂಗ್ಡಾ ಸವೆಂ ಗೆಲ್ಯಾರ್ ಬರೆಂ. ಸಾಂಜೆರ್ ಸುಟ್ಲ್ಯಾರ್ ರಾತ್‍ಭರ್ ಪಯ್ಣ್ ಕರ್ನ್ ಉಜ್ವಾಡ್ತಾನಾ ರೆಸೊರ್ಟಾಕ್ ಪಾವಯ್ತಾತ್. ಥಂಯ್ ಫಳ್ಹಾರ್ ಜಾವ್ನ್ ರ್ಯಾಫ್ಟಿಂಗಾಕ್ ವೆಚೆಂ. ಲಾಗ್ಸರ್ ಏಕ್ ವಿಶಾಲ್ ಗಾರ್ಡನ್ ಮೆಳ್ತಾ. ವಾಟೆರ್ ಸೂಪಾ ಡ್ಯಾಮ್ ದಿಸ್ತಾ.
ಆಮಿ, ದುಸ್ರ್ಯಾ ದಿಸಾ, ಪಾಟಿಂ ಯೆತಾನಾ ಮಿರ್ಜಾನ್ ಫೋರ್ಟ್, ಅಪ್ಸರಕೊಂಡ ಫಾಲ್ಸ್ ಆನಿ ಹೆರ್ ಜಾಗೆ ಪಳೆವ್ನ್ ಆಯ್ಲ್ಯಾಂವ್. ಮಿರ್ಜಾನ್ ಏಕ್ ಸೊಭಿತ್ ಕೊಟೆಂ. ಥಂಯ್ ಏಕ್ ಇಗರ್ಜ್ ಆಸಾ. ತುಮ್ಚ್ಯಾ ಆಸಕ್ತೆ ಪರ್ಮಾಣೆಂ ಜಾಗೆ ವಿಂಚ್ಯೆತ್. ಬೀಚ್‍ಯೀ ಜಾಯ್ತೆ ಮೆಳ್ತಾತ್. ಸಾಂಜೆರ್ ಮುರುಡೇಶ್ವರ ವಚೊನ್ ಆಯ್ಲ್ಯಾಂವ್.
ಮಂಗ್ಳುರ್ ಥಾವ್ನ್ ದಾಂಡೇಲಿ 350 ಕಿ.ಮೀ. ಪಯ್ಸ್ ಆಸಾ. ಧಾರ್‌ವಾಡ್ ಥಾವ್ನ್ 58 ಕಿ.ಮೀ. ತರ್ ಕಾರ್‌ವಾರ್ ಥಾವ್ನ್ 104 ಕಿ.ಮೀ. ಟೂರಿಸ್ಟಾಂ ಮುಖಾಂತ್ರ್ ವೆತಾತ್ ತರ್ ಸರ್ವ್ ಸಂಗ್ತಿ ಪಯ್ಲೆಂಚ್ ಇತ್ಯರ್ಥ್ ಕರಾ. ಥಂಯ್ ಪಯ್ಸ್ ರಾನಾಂನಿ ರಾಂವ್ಚಿ ವ್ಯವಸ್ಥಾ ಕಷ್ಟಾಂಚಿ. ಪ್ರವಾಸಿಂಕ್ ಪಿಳ್ತಾತ್. ಶಿವಾಯ್ ನಿತಳಾಯೆಚ್ಯೊ ಧೊಶಿಯೀ ಆಸಾತ್. ದೆಕುನ್ ಮೋಲ್ ಆನಿ ವ್ಯವಸ್ಥೆ ವಿಶಿಂ ಖಚಿತ್ ಕರ್ನ್‍ಂಚ್ ಪಯ್ಣ್ ಧರಾ. ಖಾಸ್ಗಿ ವಾಹನಾಂನಿ ವೆತಾತ್ ತರ್ ಸರ್ವ್ ವ್ಯವಸ್ಥಾ ಆನಿ ಪಯ್ಣಾ ವಿಶಿಂ ಪಯ್ಲೆಂಚ್ ಸಾರ್ಕಿ ತಯಾರಿ ಕರ್ನ್ ವಚಾ.
ದಾಂಡೇಲಿ ಭೊಂವ್ತಿಂ…
ದಾಂಡೇಲಿ ಪ್ರವಾಸಾಂತ್ ತುಮ್ಕಾಂ ವೇಳ್ ಆನಿ ಆಸಕ್ತ್ ಆಸಾ ತರ್ ಪಳೆಂವ್ಕ್ ಜಾಯ್ತೆ ಜಾಗೆ ಆಸಾತ್. ಸಾತೊಡಿ ಫಾಲ್ಸ್, ಸಿಂಥೇರಿ ರಾಕ್ಸ್, ಮೌಲಂಗಿ ಈಕೊ ಪಾರ್ಕ್, ಮಿನಿ ಟಿಬೆಟ್, ಶಿರೋಳಿ ಪೀಕ್, ಕಾವಳ ಕೇವ್ಸ್, ಸೂಪಾ ಡ್ಯಾಮ್, ಶಿವಾಜಿ ಫೋರ್ಟ್, ವೈಲ್ಡ್‌ಲೈಫ್ ಸ್ಯಾಂಕ್ಚುವರಿ, ಮಾಗೋಡ್ ಆನಿ ಮೊಲಂಗಿ ಫಾಲ್ಸ್, ಕಾಳಿ ಟೈಗರ್ ರಿಸರ್ವ್ ಇತ್ಯಾದಿ ಭೆಟ್ ಕರ್ಯೆತ್.
ಉದ್ಕಾಂತ್ ಕಯಾಕಿಂಗ್ ಆನಿ ಹೆರ್ ಖೆಳಾಕ್ ಅವ್ಕಾಸ್ ಆಸಾ. ಮುರುಡೇಶ್ವರಾಂತ್ ಸ್ಕೂಬಾ ಡೈವಿಂಗ್ ಸಾಹಸ್ ಆಧಾರ್ಯೆತ್. ಹೆರ್ ಸರ್ವ್ ಸಂಗ್ತಿ, ಜಾಗೆ ಹೆರ್ ಕಡೆನ್‍ಯೀ ಮೆಳ್ತಾತ್, ಪುಣ್ ದಾಂಡೇಲಿಂತ್ಲೆಂ ರಿವರ್ ರ್ಯಾಫ್ಟಿಂಗ್ ಹೆರ್ ಕಡೆನ್ ಮೆಳನಾ. ಹೊ ಅದ್ಭುತ್ ಅನುಭವ್ ತುಮಿ ಜಿಣ್ಯೆಂತ್ ಏಕ್ ಪಾವ್ಟಿಂ ಪುಣೀ ಜೊಡಿಜೆಚ್.
ಸಪ್ತೆಂಬರ್ ಥಾವ್ನ್ ಜೂನ್ ಪರ್ಯಾಂತ್ ತುಮಿ ದಾಂಡೇಲಿ ವಚ್ಯೆತ್. ಪಾವ್ಶಿಲ್ಯಾ ದಿಸಾಂನಿ ಥಂಯ್ಸರ್ ಪ್ರವೇಶ್ ದೀನಾಂತ್. ಗಿಮಾಚ್ಯಾ ಕಠಿಣ್ ಧಗಿಂತ್ ತಾಪ್‍ಲ್ಲ್ಯಾಂನಿ ದಾಂಡೇಲಿ ವಚೊನ್ ಥಂಡಾಯ್ ಜೊಡುನ್ ಯೆವ್ಯೆತ್. ವೆಗಿಂಚ್ ವಚೊನ್ ತುಮ್ಚೊ ಅನುಭವ್ ಆಮ್ಚೆ ಸಂಗಿಂ ವಾಂಟುನ್ ದಿಯಾ. ಆಲ್ ದ ಬೆಸ್ಟ್.
ಹೆಂ ಲೇಖನ್ ರಾಕ್ಣೊ ಪತ್ರಾಚ್ಯಾ ಡಿಸೆಂಬರ್ 6-12, 2024 ಆಂಕ್ಯಾಂತ್ ಪ್ರಕಟ್ ಜಾಲಾಂ.
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
