ಇಂಫೆರ್ನಾಚಿಂ ದಾರಾಂ – 10: ಬಚಾವ್ಲಿ ನಾರಿ – ಚುಕ್ಲಿ ಶಿಕಾರಿ!

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 10
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 10: ಬಚಾವ್ಲಿ ನಾರಿ – ಚುಕ್ಲಿ ಶಿಕಾರಿ!

ಸರ್ದಾರ್ ಸಿಮಾಂವ್ಕ್ ಆನಿ ತಾಚ್ಯಾ ಸವಾರಾಂಕ್, ಆದ್ಲ್ಯಾ ರಾತಿಂ ತಾಣಿಂ ಬಂಟ್ವಾಳ್ ಜೋಡುದಾರಿ ಠಾಣ್ಯಾ ಥಾವ್ನ್ ಭಾಯ್ರ್ ಸರೊನ್ ಆಯ್ಲ್ಯಾ ಉಪ್ರಾಂತ್ ಸಾರ್ಕೊ ವಿಶೆವ್ ನಾತ್‍ಲ್ಲೊ. ಜಾಲ್ಯಾರೀ, ಹಮೀದಾನ್ ಸಾಂಗ್‍ಲ್ಲೆಂ ಆಯ್ಕೊನ್ ಪಾಟಿಂ ರಾವ್ತಿತ್ ಕೋಣ್?

ತ್ಯಾಚ್ ರಾತಿಂಚ್ಯಾ ಇಕ್ರಾ ವೊರಾಂ ಭಿತರ್, ಘೊಡೆ ಧಾಂವ್ಡಾವ್ನ್, ಬೋಳೂರ್ ಠಾಣ್ಯಾಕ್ ತೆ ಪಾವ್ಲೆ. ಸರ್ದಾರ್ ಸಿಮಾಂವ್ನ್ ಅಂದಾಜ್ ಕೆಲ್ಲೆಪರಿಂಚ್ – ಕಾವೂರ್ ಥಾವ್ನ್, ಬೋಳೂರ್ ವೆಚ್ಯಾ ವಾಟೆರ್ ಜಾಂವ್, ಠಾಣ್ಯಾಂತ್ ಜಾಂವ್, ಷೇರ್ ಖಾನಾಚೊ ಆನಿ ತಾಚ್ಯಾ ಸಾಂಗಾತ್ಯಾಂಚೊ ಪತ್ತೊ ನಾತ್‍ಲ್ಲೊ.

ಠಾಣ್ಯಾಕ್ ಪಾವ್ತಚ್, ಘೊಡ್ಯಾಂಕ್ ತಾಣಿಂ ವಿಶೆವ್ ದಿಲೊ. ಹೆರ್ ಸವಾರಾಂನಿ ವಿಶೆವ್ ಘೆವ್ಯೆತ್, ಪುಣ್ ಗರ್ಜ್ ಮ್ಹಣ್ ದಿಸ್ಲ್ಯಾರ್, ಎಕಾ ಉಲ್ಯಾನ್ ಆಯ್ತೆ ಜಾಯ್ಜಯ್ ಮ್ಹಣ್ ತಾಕಿದ್ ದಿಲಿ. ಸೋಮಯ್ಯಾಕ್, ಅಂತುಲ್ಯಾಕ್ ಆನಿ ನವೊ ಖಿಲ್ಲೆದಾರ್ ಇಸ್ಮಾಯಿಲ್ ಬಾಬಾಕ್ ಆಪವ್ನ್ ಘೆವ್ನ್ ತೊ ಭಿತರ್ ಗೆಲೊ.

ಥೊಡೊ ವೇಳ್, ಗಂಭೀರ್ ಝುಂತ್ ಚಲವ್ನ್, ಖಿಲ್ಲೆದಾರಾಕ್ ವಿಶ್ವಾಸಾಂತ್ ಘೆವ್ನ್, ಅಶೆಂ ತಾಣೆಂ ಸಾಂಗ್ಲೆಂ:

“ಷೇರ್ ಖಾನ್, ಉರ್ವಾ ಮೊಳ್ಯಾಂತ್ಲಿ ದುಸ್ರಿ ವಾಟ್ ಧರ್ನ್ ನ್ಹಂಯ್ಚ್ಯಾ ತಡಿಕ್ ಧಾಂವ್ಲಾ ಮ್ಹಣ್ ಸ್ಪಷ್ಟ್ ಜಾತಾ. ಆಮ್ಚ್ಯಾ ಸರ್ಕಾರಾಚ್ಯಾ ಹ್ಯಾ ಬಂದ್ರಾರ್ – ಪಾಟ್ಲ್ಯಾ ದಿಸಾಂನಿ ಅಶಿಸ್ತ್ ಆಸ್‍ಲ್ಲ್ಯಾನ್ – ಪ್ರವೇಶ್ ಜಾಂವ್ಚ್ಯಾ ವಾ ಭಾಯ್ರ್ ವೆಚ್ಯಾ ಸರ್ವ್ ತಾರ್ವಿಣಿಂಚಿ, ಮಂಜೆಂಚಿ, ಪಾತ್ಮಾರಿಂಚಿ, ದೋಣಿಂಚಿ ಆನಿ ಹೊಡ್ಯಾಂಚಿ ತಪಾಸಣ್, ಸಡಿಳ್ ಜಾಲ್ಯಾ ಜಾವ್ಯೆತ್.”

“ತಶೆಂ ಜಾಂವ್ಕ್ ಸಾಧ್ಯ್ ಆಸಾ ಹುಜೂರ್!” ಒಪ್ವಲೊ ಖಿಲ್ಲೆದಾರ್.

“ದೆಕುನ್, ಹ್ಯಾಚ್ ಘಡ್ಯೆ…” ಸರ್ದಾರಾನ್ ಹುಕುಮ್ ದಿಲಿ. “ಪಾತ್ಯೆಣೆಚ್ಯಾ ದೂತಾಂಕ್ ಧಾಡುನ್, ತಾಂಡೇಲ್‍ಬೈಲ್ ಅಳ್ವ್ಯಾಚ್ಯಾ ಪ್ರವೇಶಾರ್, ಉಳ್ಳಾಲ್‍ಚ್ಯಾ ಸಂಧಾ ಥಾವ್ನ್ ಆನಿ ಕೂಳೂರ್ ಪರ್ಯಾಂತ್ ಪಹರಜ್ ಅರ್ನುನ್, ಸರ್ಕಾರಿ ತಪಾಸಣ್ ಆನಿ ಪರ್ವಣ್ಗಿ ನಾತ್‍ಲ್ಲ್ಯಾ ಶಿವಾಯ್ ಸರ್ವ್ ಜಲ್‍ವಾಹನಾಂಚೆಂ ಯೆಣೆಂ-ವೆಣೆಂ ಆಡ್ವಾರ್ಲಾಂ ಮ್ಹಣ್ ಪಾಚಾರಿಜಾಯ್. ಹೆಂ ಚಡ್ ಗರ್ಜೆಚೆಂ ಆನಿ ತುರ್ತಾಚೆಂ ಕಾಮ್!”

“ಜರೂರ್ ಹುಜೂರ್!”

“ಆನಿ, ಆಮ್ಚ್ಯಾ ಬಂದ್ರಾರ್ ನಾಂಗೊರ್ ದೆಂವವ್ನ್ ವಾ ಲಂಗರ್ ಮಾರ್ನ್ ಆಸ್‍ಲ್ಲ್ಯಾ ಸರ್ವ್ ವಾಹನಾಂಚೆಂ ಮ್ಹಾಲಕ್ಪಣ್ ಥಾರಾಯ್ಲ್ಯಾರ್ ಬರೆಂ. ಆಮ್ಚ್ಯೊ ದೋನ್ ಖಾಸ್ಗಿ ಮಂಜ್ಯೊ ‘ರೆಜೀನಾ’ ಆನಿ ‘ಸ್ತೆಲ್ಲಾ’ ಹಾಂಗಾಸರ್ ಆಸಾತ್. ಆಜ್‍ಚ್ ಆಮಿ ‘ರೆಜೀನಾ’ಕ್ ವಚೊನ್, ಥಂಯ್ಸರ್ ವಿಶೆವ್ ಘೆತಾಂವ್. ಕಾಂಯ್ ವಿಶೇಸ್ ಆಸ್ಲ್ಯಾರ್, ಆಮ್ಕಾಂ ಥಂಯ್ಸರ್ ಖಬರ್ ಧಾಡಿಜಾಯ್.”

“ಜೀ ಹುಜೂರ್!” ಮ್ಹಣೊನ್, ಇಸ್ಮಾಯಿಲ್ ಬಾಬಾ, ಹುಕುಮ್ ಪಾಳ್ಚ್ಯಾ ಖಾತಿರ್ ಕಾರ್ಯಾಕ್ ದೆಂವ್ಲೊ. ಪರಾರಿ ಜಾಲ್ಲ್ಯಾ ಖಿಲ್ಲೆದಾರಾಕ್ ಆನಿ ಷೇರ್ ಖಾನಾಕ್ ಧರುಂಕ್, ಆನಿ ತ್ಯಾ ವರ್ವಿಂ ಆಪ್ಣಾಕ್ ನವೊಚ್ ಮೆಳ್‍ಲ್ಲೊ ಹುದ್ದೊ ಸಾಂಬಾಳುಂಕ್, ಇಸ್ಮಾಯಿಲ್ ಬಾಬಾಕ್ ಸಹಜ್ ಆತುರಾಯ್ ಆಸ್‍ಲ್ಲಿ.

ತೊ ಗೆಲ್ಲ್ಯಾ ಪಾಟಾಪಾಟ್, ಸರ್ದಾರ್ ಸಿಮಾಂವ್‍ಯೀ ಭಾಯ್ರ್ ಆಯ್ಲೊ. ರಾತಿಂಚ್, ಕಸಲೆಂ ಪುಣೀ ಸಾಹಸಾಚೆಂ ಕಾರ್ಯೆಂ ವಾ ಶಿಕಾರಿ ಜಾಂವ್ಕ್ ಆಸಾ ಮ್ಹಣ್ ತಾಚೆ ಸವಾರ್ ಚತುರ್ ಜಾಲ್ಲೆ. ತಾಂಚೆ ಪಯ್ಕಿಲ್ಯಾ ಚಡಿತ್ ಚವ್ಗಾಂಕ್ ಸರ್ದಾರಾನ್ ಸಾಂಗಾತಾ ಆಪಯ್ಲೆಂ. ಉರ್‌ಲ್ಲ್ಯಾಂನಿ, ಘೊಡ್ಯಾಂಚಿ ಚತ್ರಾಯ್ ಘೆವ್ನ್, ಫುಡ್ಲ್ಯಾ ಹುಕ್ಮೆಕ್ ರಾಕೊನ್ ರಾವಜಾಯ್ ಮ್ಹಣ್ ತಾಣೆಂ ಜಾಗಯ್ಲೆಂ.

ಉಪ್ರಾಂತ್ ಕಡ್ವಾ ಲಾಗಿಂ ವಚೊನ್, ಹೊಡ್ಯಾರ್ ಚಡೊನ್, ಅರ್ಧ್ಯಾ ವೊರಾ ಭಿತರ್ ‘ರೆಜೀನಾ’ ಮಂಜೆಂತ್ ತೆ ಪಾವ್ಲೆ. ಥಂಯ್ಚ್ಯಾ ಕಲಾಸ್ಯಾಂನಿ ಆನಿ ಕಾಮೆಲ್ಯಾಂನಿ ಸರ್ದಾರಾಕ್ ಸಂತೊಸಾನ್ ಸ್ವಾಗತ್ ಕೆಲೊ. ಚಡುಣೆಂ ಬಾರಾ ವೊರಾಂ ಆದಿಂ, ತೊ ಠಾಣ್ಯಾಕ್ ಆಯ್ಲಾ ಮ್ಹಳ್ಳಿ ಖಬರ್ ತಾಂಕಾಂ ಪಾವ್‍ಲ್ಲಿ. ಮಂಜ್ಯಾಂಕ್ ತೊ ಭೆಟ್ ದಿತಲೊ ಮ್ಹಳ್ಳೆಂಯೀ ತಾಂಕಾಂ ಕಳಿತ್ ಆಸ್‍ಲ್ಲೆಂ. ಪುಣ್ ಹ್ಯಾ ಮಧ್ಯಾನೆರ್ ತೊ ಯೇತ್ ಮ್ಹಣ್ ತಾಣಿಂ ಚಿಂತುಂಕ್ ನಾತ್‍ಲ್ಲೆಂ ಜಾಲ್ಯಾರೀ, ದಸ್ತುರೆ ಪ್ರಕಾರ್ – ವಿಶೆವಾಕ್ ಜಾಂವ್ ತಕ್ಷಣ್ ಪಯ್ಣಾಕ್ ಆಯ್ತೆ ಜಾವ್ನ್ ತೆ ರಾವ್‍ಲ್ಲೆ.

ಸರ್ವ್, ಸಾರ್ಕೆಂ ಆನಿ ಸಜ್ಜ್ ಆಸ್‍ಲ್ಲೆಂ ಘಡ್ಯೆನ್ ತಾಕಾ ಸಮ್ಜಲೆಂ.

“ಆಮ್ಚಿ ‘ಸ್ತೆಲ್ಲಾ’ ಕಿತ್ಲಿ ಪಯ್ಸ್ ಆಸಾ?” ವಿಚಾರ್ಲೆಂ ತಾಣೆಂ.

“ದಕ್ಷಿಣಾಕ್ – ಹೊಡ್ಯಾರ್ ಪಾವ್ ವೊರಾಚಿ ವಾಟ್ ಜಾಯ್ತ್.”

“ಹೊಡ್ಯಾರ್, ಹಾಂಗಾಚೆ ಕಲಾಸಿ ದೋಗ್ ಜಣ್ ವಚೊಂದಿತ್. ತಿಚೆ ದಿವೆ ಪಾಲ್ವವ್ನ್, ಚತ್ರಾಯೆನ್ ತಿಕಾ ಚಲವ್ನ್, ಅಳ್ವ್ಯಾಚ್ಯಾ ಬಾಗ್ಲಾರ್ ರಾವಂವ್ಕ್ ಸಾಂಗಜಾಯ್. ಆಮಿ ವೆಗ್ಳಿ ತಾಕಿದ್ ದಿಲ್ಯಾ ಬಗಾರ್, ಆಯ್ಚ್ಯಾ ರಾತಿಂ, ಜಾಂವ್ ಫಾಲ್ಯಾಂ ಖಂಯ್ಚೆಂಚ್ ಜಲ್‍ವಾಹನ್ ಭಾಯ್ರ್ ದರ್ಯಾಕ್ ವಚನಾಶೆಂ ತಿಣೆಂ ಆಡಾಯ್ಜಾಯ್.”

ತ್ಯಾ ಪ್ರಕಾರ್, ದೋಗ್ ಕಲಾಸಿ ದೆಂವೊನ್ ಗೆಲೆ.

“ಜಮೆದಾರ್ ಅಂತುಲೊ ಪಡ್ವಳ್…”

“ಓ ಧನಿಯಾ…”

“ಆಮಿ ಆಹಾರ್ ಘೆವ್ನ್ ಥೊಡೊ ವಿಶೆವ್ ಘೆವ್ಯಾಂ. ಪುಣ್ ತ್ಯಾ ಆದಿಂ, ಸಕ್ಡಾಂನಿ ದೊಣ್ಕಾರಾಂಪರಿಂ ವೇಸ್ ಬದ್ಲಿಜಾಯ್ – ಗರ್ಜ್ ಪಡಾಶಿ ನಾ ಮ್ಹಣೊಂಕ್ ಜಾಯ್ನಾ.

ಅಂತುಲೊ ಪಡ್ವಳ್ ಆನಿ ಸವಾರ್, ಸಂತೊಸಾನ್ ವೇಸ್ ಬದ್ಲುಂಕ್ ಲಾಗ್ಲೆ. ಸರ್ದಾರ್ ಸಿಮಾಂವ್ನ್ ಹೆರ್ ಚವ್ಗಾಂ ಶಿಪಾಯಾಂಕ್ – ಜೆ, ಗರ್ಜೆ ತೆಕಿದ್ ಮಂಜೆಂತ್ ನಾವಿಕ್ ಜಾವ್ನ್ ಆಸ್‍ಲ್ಲೆ – ಆಪವ್ನ್, ತಾಣಿಂ ಜಾತಾ ತಿತ್ಲೆ ಗಪ್‍ಚಿಪ್ ಜಾವ್ನ್, ಬಂದರ್ ವಠಾರಾಂತ್ಲ್ಯಾ ಉದ್ಕಾಚೆರ್ ಭೊಂವಜಾಯ್, ಆನಿ ಪಾಟ್ಲ್ಯಾ ಚಡುಣೆಂ ದೋನ್ ಘಂಟ್ಯಾಂ ಭಿತರ್, ಖಂಯ್ಚಿಯೀ ದೋಣ್ ಜಾಂವ್ ಪಾತ್ಮಾರ್ ಪಯ್ಣಾರ್ ಭಾಯ್ರ್ ಸರೊನ್ ಗೆಲ್ಯಾ ಜಾಲ್ಯಾರ್ ಸಮ್ಜಜಾಯ್, ವಾ, ಭಾಯ್ರ್ ಸರೊಂಕ್ ಚೊರ‍್ಯೆಂ ಕಾಂಯ್ ತಯಾರ್ ಜಾತಾ ಜಾಲ್ಯಾರ್ ಸಮ್ಜಜಾಯ್. ಕಸಲಿಯೀ ಖಬರ್ ಆಸ್ಲ್ಯಾರ್, ಭೋವ್ ತುರ್ತಾನ್ ಹಾಂಗಾ ಪಾವಜಾಯ್” ಮ್ಹಣ್ ಫರ್ಮಾವ್ನ್ ಧಾಡ್ಲೆಂ. ಉಪ್ರಾಂತ್ ತೊಯೀ ಆಪ್ಣಾಚೊ ವೇಸ್ ಬದ್ಲುಂಕ್ ಲಾಗ್ಲೊ.

ಎಕಾ ಮಹಿನ್ಯಾ ಆದಿಂಯೀ ಚಡುಣೆಂ ಅಸಲಿಚ್ ಪರಿಸ್ಥಿತಿ ಆಯಿಲ್ಲಿ. ಅಂತುಲೊ ಆನಿ ಸಾಂಗಾತಿಯೀ ತೆಂಚ್ ಚಿಂತಾಲೆ. ತವಳ್ಚ್ಯಾ ರಾತಿಂ, ಮೊರ್ನಾಚ್ಯಾ ಫರ್ಮಾಣಾಕ್ ಉಂಡಿ ಜಾಲ್ಲ್ಯಾ ಕ್ರಿಸ್ತಾಂವ್ ಕೈದ್ಯಾಂಕ್, ವಿಚಿತ್ರ್ ಥರಾನ್ ಸುಟ್ಕಾ ಲಾಭಂವ್ಚ್ಯಾ ಕಾಮಾ ಥಾವ್ನ್ ಧರ್‌ಲ್ಲೆಂ, ಉಪ್ರಾಂತ್ ಉಪ್ಯೆವ್ನ್ ‘ಸಂತಾ ಕಾತರೀನಾ’ ಮಂಜೆಕ್ ವಚೊನ್ ಇಜಾಬೆಲ್ ತೆರೆಜಾಕ್ ಬಚಾವ್ ಕರ್ಚ್ಯಾ ವಾವ್ರಾ ಪರ್ಯಾಂತ್, ಸಗ್ಳೆಂ ಯೋಜನ್ ಪಯ್ಲೆಂಚ್ ತಾಚ್ಯಾ ಮತಿಂತ್ ಖಂಚೊನ್ ಆಸ್‍ಲ್ಲೆಂ.

ಆಜ್, ಯೋಜನ್ ಮಾಂಡುಂಕ್ ಅವ್ಕಾಸ್ ನಾತ್‍ಲ್ಲೊ. ಕಿತ್ಯಾಕ್, ತಾಣೆಂ ಆಯ್ಕೊನ್ ಆನಿ ಪಾರ್ಕುನ್ ಅಂದಾಜ್ ಕೆಲ್ಲ್ಯಾ ಥೊಡ್ಯಾ ದುಬಾವಿ ಸಾಧ್ಯತೆಂ ಭಾಯ್ರ್, ಹೆರ್ ಕಾಂಯ್ ತಾಕಾ ಕಳಿತ್ ನಾತ್‍ಲ್ಲೆಂ.

ಪುಣ್ ತಾಚೊ ಅಂದಾಜ್ ಆನಿ ದುಬಾವ್ ಸತಾ ಥಾವ್ನ್ ಚಡ್ ಪಯ್ಸ್ ನಾತ್‍ಲ್ಲೊ. ಬಂದಡೆಚ್ಯಾ ದವಡ್ಯಾಂನಿ, ಅನ್ವಾರಾಂಚ್ಯಾ ಖೊಡೆ ಸಾಂಕ್ಳಿಂಕ್ ಸಾಂಪಡ್ಲೆಲ್ಯಾ ಕ್ರಿಸ್ತಾಂವಾಂಚ್ಯಾ ಥೊಡ್ಯಾ ಪುನ್ಯಾನ್, ಪುರ್ವಜಾಂಚ್ಯಾ ಭಾವಾರ್ಥಾಚ್ಯಾ ಬಚಾವೆ ಖಾತಿರ್, ಕ್ರಿಸ್ತಾಚ್ಯಾ ಸರ್ದಾರಾಂನಿ ಆನಿಕೀ ಝುಜೊಂಕ್ ಬಾಕಿ ಆಸ್‍ಲ್ಲೆಂ… ದೆಕುನ್, ಹ್ಯಾ ವೆಳಾರ್, ಉಗ್ತಿಂ ಜಾವ್ನ್ ಮ್ಹಳ್ಳೆಪರಿಂ ರಾವ್‍ಲ್ಲ್ಯಾ ಇಂಫೆರ್ನಾಚ್ಯಾ ದಾರಾಂ ಆಡ್ ಏಕ್ ಮಾರ್ ಚಡ್ ದೀಂವ್ಕ್ ಅತ್ರೆಗ್ತಾಲೊ ತೊ.

ತಸಲ್ಯಾ ಧೀರತ್ವಾಚಿ ಆನಿ ಸಾಹಸಾಚಿ, ತ್ಯಾ ವೆಳಾರ್ ಪ್ರತ್ಯೇಕ್ ಜಾವ್ನ್, ಮಾನಿನ್ ಮೋನಿಕಾ ಕುವೆಲ್ ತೆಲ್ಲಿಸಾಕ್ ಗರ್ಜ್ ಆಸ್‍ಲ್ಲಿ. ಮೊರ್ನಾಕ್ ತಿ ಆಶೆತಾಲಿ ಜಾಲ್ಯಾರೀ, ಸಂಸಾರಾನ್ ಆನಿ ಸರ್ಗಾನ್ ಲೆಗುನ್ ಆಪ್ಣಾಕ್ ಸಾಂಡ್ಲಾಂ ಮ್ಹಣ್, ಕಂಗಾಲ್ ತಿ ಜಾಲ್ಲಿ.

* * * * *

ಷೇರ್ ಖಾನ್ ಆನಿ ತಾಚೆ ಸಾಂಗಾತಿ, ಮೋನಿಕಾಕ್, ಉರ್ವಾಚ್ಯಾ ಮೊಳ್ಯಾಂ ಆಪವ್ನ್ ಘೆವ್ನ್, ವೋಡ್ನ್ ಆನಿ ಆಂಬುಡ್ನ್ ಮ್ಹಳ್ಳೆಪರಿಂ ವ್ಹರ್ನ್, ಥಂಯ್ ಥಾವ್ನ್ ಚಡುಣೆಂ ಏಕ್ ಮಯ್ಲ್ ಪಯ್ಸ್, ಪಲ್ಗುಣಿಚ್ಯಾ ತಡಿಕ್ ಪಾವ್ಲೆ. ಥೊಡ್ಯಾಚ್ ವೆಳಾನ್ ಥಂಯ್ಸರ್ ಏಕ್ ಹೊಡೆಂ ತಾಣಿಂ ಹಾಡಯ್ಲೆಂ. ರಾತಿಚೆಂ ಉದಾಕ್ ಪಳೆವ್ನ್ ತಕ್ಲಿ ಘುಂವ್‍ಲ್ಲ್ಯಾ ತಿಕಾ ತಾಣಿಂ, ಬಿರ್ಮತ್, ದಾಕ್ಷೆಣ್ ವಾ ಲಜ್ ನಾತ್‍ಲ್ಲೆಪರಿಂ ಉಕ್ಲುನ್ ಹೊಡ್ಯಾಂತ್ ಉಡಯ್ಲೆಂ. ತೆಯೀ ಹೊಡ್ಯಾಂತ್ ಬಸ್ಲೆ. ಮೋನಿಕಾಕ್ ಪುರ್ತಿ ಮತ್ ಚುಕೊಂಕ್ ನಾತ್‍ಲ್ಲಿ ಜಾಲ್ಯಾರೀ, ಹಾತ್ ಪಾಯ್ ಹಾಲಂವ್ಕ್ ವಾ ಉಲಂವ್ಕ್ ತ್ರಾಣ್ ನಾಸ್ತಾಂ, ಫಕತ್ ಪ್ರಾಣ್ ಮಾತ್ರ್ ಧರುನ್ ಮ್ಹಳ್ಳೆಪರಿಂ ಆಸ್‍ಲ್ಲಿ.

ಷೇರ್ ಖಾನ್ ಆನಿ ಸಾಂಗಾತಿ, ಕಸಲ್ಯಾಗೀ ತುರ್ತಾಚ್ಯಾ ಚಿಂತ್ನಾಂನಿ ತಲ್ಲೀನ್ ಜಾವ್ನ್ ಆಸ್‍ಲ್ಲೆ. ನಹಿಂ ಜಾಲ್ಯಾರ್ ಮೋನಿಕಾಚಿ ಗತ್, ಕಾಳೊಕಿ ತ್ಯಾ ಹೊಡ್ಯಾಂತ್, ಭೋವ್ ಚಡ್ ಬಿರ್ಮತೆಚಿ ಆನಿ ಆಕಾಂತಾಚಿ ಜಾವ್ಯೆತಿ.

ಥೊಡ್ಯಾ ವೆಳಾನ್, ಕಷ್ಟಾಂನಿ ಆನಿ ಚಡ್ ಹಾತಾಂಚ್ಯಾ ಆಧಾರಾನ್ ಮೋನಿಕಾಕ್ ತಾಣಿಂ ಎಕಾ ಮಂಜೆ ಭಿತರ್ ವ್ಹಾವಯ್ಲೆಂ, ಆನಿ ಸಕಯ್ಲ್ಯಾ ಆವರಾಂತ್ ವ್ಹರ್ನ್, ಲಿಂಬ್ಯಾಚೊ ರೋಸ್ ಆನಿ ಉದಾಕ್ ದೀವ್ನ್ ಸನಿನ್ ಕರ್ನ್, ಬಸಯ್ಲೆಂ.

ಮೋನಿಕಾ, ಆತಾಂ ಸಾರ್ಕಿ ಸನಿನ್ ಜಾಲ್ಲೆ ವರ್ವಿಂ, ಆಪುಣ್ ಎಕಾ ಮಂಜೆ ಭಿತರ್ ಕೈದಿ ಜಾವ್ನ್ ಆಸಾಂ ಮ್ಹಣ್ ತಿಕಾ ಸಮ್ಜಲೆಂ. ಭಾಯ್ಲ್ಯಾನ್ ಆನಿ ವಯ್ಲ್ಯಾನ್ ಆಯ್ಕೊಂಚ್ಯಾ ಕುಡ್ಕೆ ಕುಡ್ಕೆ ಉಲವ್ಣ್ಯಾ ವರ್ವಿಂ, ಮಂಜೆಂತ್ ಚಡುಣೆಂ ಧಾ ಜಣ್ ಆಸಾತ್ ಮ್ಹಣ್ ತಿಕಾ ಕಳಿತ್ ಜಾಲೆಂ. ಆದ್ಲ್ಯಾಚ್ ಮಹಿನ್ಯಾಂತ್, ಇಜಾಬೆಲ್ ತೆರೆಜ್, ಅಸಲ್ಯಾ ಗತಿಂತ್ ಯೇವ್ನ್, ಸರ್ದಾರ್ ಸಿಮಾಂವ್ ವರ್ವಿಂ ಬಚಾವ್ ಜಾಲ್ಲಿ ಕಥಾ ತಿಣೆಂ ಆಯ್ಕಲ್ಲೊ ಉಗ್ಡಾಸ್ ತಿಕಾ ಆಯ್ಲೊ.

ಆನಿ ಆಜ್..? ಬಂದಡೆ ಆದಿಂಚ್, ಥೊಡ್ಯಾ ರಾಜಕೀಯ್ ಈಳಿಂ-ಸುಳಿಯಾಂನಿ ಮೆಳೊನ್, ಭಾವ್ (ಸಾವ್ಕಾರ್ ಮಾರ್ಸೆಲ್ ಕುವೆಲ್) ದೊಳ್ಯಾಂ ಭಾಯ್ರ್ ಜಾಲ್ಲೊ… ತ್ಯಾಚ್ ಕಾರಣಾನ್, ತಿಚೊ ಭರ್ತಾರ್ (ಗ್ರೆಗೊರ್ ತೆಲ್ಲಿಸ್) ಅಪಾಲಿಪಾ ಜಾಲ್ಲೊ. ಕಷ್ಟಾಂಚ್ಯಾ ಕಾಳಾರ್, ಲಿಪೊನ್ ತರೀ, ಸರ್ವ್ ರಾಟಾವಳಿಂಚೆಂ ಮುಖೇಲ್ಪಣ್ ಧಯ್ರಾನ್ ವಹಿಸುನ್ ಆಸ್‍ಲ್ಲಿ ಫುಡ್ಲಿ ಭಯ್ಣ್ (ವೆರೊನಿಕಾ) ನಪಂಯ್ಚ್ ಜಾಲ್ಲಿ… ಆನಿ ಆತಾಂ… ದೆವಾ!

ಮಾಜ್ವ್ಯಾ ತ್ಯಾ ಲಾಂಟಾನಾಚ್ಯಾ ಉಜ್ವಾಡಾಂತ್, ತಿಚೆ ಹುಜ್ರಿಂ ರಾವೊನ್, ಷೇರ್ ಖಾನ್ ತಿಕಾ ಪಳೆತಾಲೊ. ಶ್ವಾಸ್ ತಿಣೆಂ ಧರ್ಲೊ.

“ಹ್ಹೆ-ಹ್ಹೆ!” ಹಾಸ್ಲೊ ತೊ. “ವ್ಹಡಾಂಚ್ಯಾ ವೊಡ್ಯಾಂತ್ ಭರ್ಸಲ್ಯಾರ್ ಅಶೆಂಚ್ ಜಾಂವ್ಚೆಂ. ತುಜೆ ಕಡೆನ್ ಜಾಯ್ ತಶೆಂ ಕರ್ನ್, ತುಕಾ ಹಾಂಗಾಚ್ ನ್ಹಂಯ್ತ್ ಉಡವ್ನ್ ಚಲ್ತೊಂ ಹಾಂವ್. ಪುಣ್ ವ್ಹಡಾಂಚಿ ತಾಕಿದ್ ಆಸಾ. ಸಾಂಗ್‍ಲ್ಲ್ಯಾ ಪ್ರಕಾರ್ ತುಕಾ ಎಕಾ ಜಾಗ್ಯಾರ್ ಪಾವಂವ್ಕ್ ಆಸಾ. ಮ್ಹಜೆಂ ರುಸುಮ್ ಘೆಂವ್ಕ್ ಆಸಾ… ಹ್ಹೆ-ಹ್ಹೇ..! ಹಾಂಗಾಚ್ ಮ್ಹಜೆಂ ರುಸುಮ್ ಥೊಡೆಂ ಘೆಂವ್ಕ್ ಮ್ಹಣ್ ಕಾವೂರ್ ಗೆಲ್ಲೊಂ ಹಾಂವ್… ತೊ ಯೇವ್ನ್ ಪಾವ್ಲೊ… ಬೋಸು…”

“ಕಿತೆಂ ತುಂ ಉಲಯ್ತಾಯ್?” ಪಿಂರ್ಗಲಿ ಮೋನಿಕಾ, ಭರ್ವಶ್ಯಾನ್. “ಕೋಣ್ ಯೇವ್ನ್ ಪಾವ್ಲೊ?” ಷೇರ್ ಖಾನ್ ಭಿಯೆಲಾ ಮಾತ್ರ್ ನಹಿಂ, ಧಯ್ರಾಕ್ ಜಾಯ್ ತೆಂ ಪಿಯೆಲಾ ಮ್ಹಣೊನ್‍ಯೀ ತಿಕಾ ಸಮ್ಜಲೆಂ.

“ಯೇಂವ್ದಿ ತೊ – ಸೈತಾನ್ ಕೀ…” ಖಿಳ್ಣೆಲೊ ಷೇರ್ ಖಾನ್. “ತೊ ಫಾಲ್ಯಾಂ ಕಸಲಿಯೀ ಹುಕುಮ್ ಜಾರಿ ಕರ್ಚ್ಯಾ ಆದಿಂ ಆಮಿ ಪಯ್ಸ್ ಪಾವ್ತೆಲ್ಯಾಂವ್. ಸೊಡ್, ನಸ್ರಾನಿ ಬಾಯ್ಲೆ… ತುಜೆ ಕಡೆನ್ ಸುಖ್ ದುಖ್ ಉಲಂವ್ಕ್ ಯೇಂವ್ಕ್ ನಾ ಹಾಂವ್!” ಗರಮ್ ಜಾಲೊ ತೊ. “ಆಮ್ಕಾಂ ಚಡ್ ವೇಳ್ ನಾ…”

“ಹೋಶ್ಯಾರ್!”

ಷೇರ್ ಖಾನ್ ತಶೆಂ ಉಲಯ್ತಾನಾ, ಆನಿ ಮೋನಿಕಾ ತಶಿ ಆಕಾಂತೊನ್ ಥರ್ಥರ್ತಾನಾ, ವಯ್ರ್ ಥಾವ್ನ್ ಪರ್ತ್ಯಾನ್ ಆವಾಜ್ ಆಯ್ಕಲೊ – “ಹೋಶ್ಯಾರ್!” ಷೇರ್ ಖಾನ್, ದೋನ್‍ಂಚ್ ಕದಮಾಂನಿ, ಆವರಾಂತ್ಲೊ ಭಾಯ್ರ್ ಆನಿ ವಯ್ರ್ ಪಾವ್ಲೊ. ಚಿಕ್ಕೆ ಪಯ್ಸ್ ಥಾವ್ನ್, ಅಧಿಕಾರಾನ್ ಉಲಯಿಲ್ಲೊ, ಆನಿ ಮಂಜೆರ್, ವಯ್ರ್ ಥಾವ್ನ್ ಶಿಣೊನ್ ಜವಾಬ್ ದಿಲ್ಲೊ ಆವಾಜ್ ತಿಕಾ ಆಯ್ಕಲೊ. ದಿಂಬಿಯಾಂನಿ ವೊಮ್ತಿ ಪಡೊನ್, “ದೆವಾ, ಮ್ಹಾಕಾ ಬಚಾವ್ ಕರ್ – ನಾ ಜಾಲ್ಯಾರ್ ತುಜೆ ಸರ್ಶಿನ್ ವ್ಹರ್…” ರುದಾನ್ ಕೆಲೆಂ ತಿಣೆಂ.

ಪರ್ತ್ಯಾನ್ ತಿಣೆಂ ಕಾನ್ ಫುಲಯ್ಲೆ. ಭಾಯ್ಲೆಂ ಆನಿ ವಯ್ಲೆಂ ಉಲವ್ಣೆಂ ತಿಕಾ ಆಯ್ಕತಾಲೆಂ. ಆವರಾಚೆಂ ದಾರ್ ತಿಣೆಂ ಬಂದ್ ಕೆಲೆಂ.

“ಸರ್ವ್ ವಾಹನಾಂಚೆಂ ತಪಾಸಣ್ ಕರುಂಕ್ ಆಮ್ಕಾಂ ಅಧಿಕಾರ್ ಆಸಾ…” ತೊ ಸ್ವರ್ ಭಾಯ್ಲೊ.

“ಶರಮ್! ಅಕ್ಮಾನ್!” ವಯ್ಲೊ, ಮಂಜೆಚ್ಯಾ ತಾಂಡೇಲ್ ಮುಖೆಲ್ಯಾಚಿ ಜವಾಬ್. “ಆಮಿ ಚೋರ್ ನಹಿಂ. ಟಿಪ್ಪು ಸುಲ್ತಾನಾ ಕಡೆನ್ ಆಮ್ಚ್ಯಾ ರಾಯಾಕ್ ಒಪ್ಪಂದ್ ಆಸಾ. ತ್ಯಾ ಶಿವಾಯ್, ಆಮ್ಚ್ಯಾ ಮಂಜೆಂತ್ ಸ್ತ್ರೀಯೊ ಆಸಾತ್ – ತುಮ್ಕಾಂ ಕೊಣಾಯ್ಕಿ ಯೇವ್ನ್, ಅಕ್ಮಾನ್ ಆನಿ ಅಕ್ರಮ್ ಕರುಂಕ್ ಆಮ್ಚೊ ಜೀವ್ ಗೆಲ್ಯಾರೀ ಆಮಿ ಸೊಡ್ಚೆಪರಿಂ ನಾ! ಆಮಿ ಥೊಡ್ಯಾಚ್ ವೆಳಾನ್, ಭರ್ತಿ ಯೆತಚ್, ಪಯ್ಣ್ ಧರ್ತಾಂವ್. ಬಂದ್ರಾಚ್ಯಾ ಅಧಿಕಾರಿಚಿ ಆಮಿ ಪಯ್ಲಿಚ್ ಪರ್ವಣ್ಗಿ ಘೆತ್ಲ್ಯಾ…”

“ಜಾಯ್ಶೆಂ ನಾ. ತುಮಿ ಪರ್ತ್ಯಾನ್ ಪರ್ವಣ್ಗಿ ಘೆತ್ಲ್ಯಾ ಬಗಾರ್, ಪಯ್ಣ್ ಕರುಂಕ್ ತುಮ್ಕಾಂ ಸ್ವಾತಂತ್ರ್ಯ್ ನಾ.”

“ಭೆಷ್ಟಾಯ್ನಾಕಾತ್!” ಮಂಜೆಂತ್ಲೊ ಸ್ವರ್, ಚಿಕ್ಕೆ ಕಾಂಪ್ಲೊ. “ಆಪ್ಲ್ಯಾ ಮಂಜೆ ಥಂಯ್, ಟಿಪ್ಪು ಸುಲ್ತಾನಾಚ್ಯಾ ನವ್ಕರಾಂನಿ ಅವ್ಮರ್ಯಾದೆನ್ ಜುಲುಮ್ ಚಲಯಿಲ್ಲ್ಯಾ ಖಾತಿರ್ – ನೀಲೇಶ್ವರ್‌ಚೊ ರಾಜಾ ಥಂಡ್ ರಾಂವ್ಚೊ ನಾ!”

“ತೊ ಥಂಡ್ ಜಾಂವ್ದಿ, ವಾ ಗರಮ್ ಉದ್ಕಾಂತ್ ಬುಡೊನ್ ಮೊರೊಂದಿ – ಆಮ್ಕಾಂ ಪಡೊನ್ ವಚೊಂಕ್ ನಾ. ಜಾಗ್ವಣ್ ತುಮ್ಕಾಂ ದಿಲ್ಯಾ. ಉಜ್ವಾಡ್ತಾನಾ ಹ್ಯಾ ಮಂಜೆಂತ್ ಆಮಿ ರಿಗ್ತೆಲ್ಯಾಂವ್. ಹೋಶ್ಯಾರ್!”

ನಿಶ್ಶಬ್ದ್. ಥೊಡೊ ವೇಳ್ ಕಸಲೊಯೀ ಆವಾಜ್ ನಾ. ಉಪ್ರಾಂತ್, ಷೇರ್ ಖಾನ್ ಆನಿ ತಾಚೆ ದಲಾಲಿ – ವಯ್ರ್ ಥೊಡೊ ಝುಂತ್ ಚಲವ್ನ್ – ಪಾಂಚ್ ಮೆಟಾಂಚಿ ಶಿಡಿ ದೆಂವೊನ್, ಸಕಯ್ಲ್ ಯೇವ್ನ್, ಮೋನಿಕಾ ಆಸ್‍ಲ್ಲ್ಯಾ ಆವರಾಚೆಂ ದಾರ್ ಖೊಟಾವ್ನ್, ಭಿತರ್ ಸರ್ಲೆ.

“ಜೆಜೂ..!” ಅಕ್ಲಾಸ್ಲಿ ತಿ. ಉಪ್ರಾಂತ್ ತಿಣೆಂ ಅರ್ಧಿಖುರಿ ಕಿಂಕ್ರಾಟ್ ದಿಲಿ!

* * * * *

ಸರ್ದಾರ್ ಸಿಮಾಂವ್ ಆನಿ ತಾಚೆ ಸಾಂಗಾತಿ, ದೊಣ್ಕಾರ್ ಮಾಪ್ಳ್ಯಾಂಪರಿ ವೇಸ್ ಬದ್ಲುನ್, ಆನಿ ಥೊಡೊ ಆಹಾರ್ ಘೆವ್ನ್ ವಿಶ್ರಾಂತ್ ಭೊಗ್ತಾಲೆ.

ಅರ್ಧ್ಯಾ ವೊರಾ ಭಿತರ್, ತಾಣೆಂ ಧಾಡ್‍ಲ್ಲ್ಯಾ ಚವ್ಗಾಂ ನಾವಿಕಾಂ ಪಯ್ಕಿಂತ್ಲೊ ಎಕ್ಲೊ, ತುರ್ತಾನ್ ‘ರೆಜೀನಾ’ ಮಂಜೆಕ್ ಯೇವ್ನ್ ಪಾವ್ಲೊ. ಖರ್ಶೆವ್ನ್ ಖರ್ಶೆವ್ನ್ ತಾಣೆಂ ದಿಲ್ಲ್ಯಾ ವಿವರಾ ತಸಲ್ಯಾಚ್ ವರ್ದೆಕ್ ಸರ್ದಾರ್ ಸಿಮಾಂವ್ ರಾಕ್ತಾಲೊ.

ನಾವಿಕಾನ್ ಸಾಂಗ್‍ಲ್ಲ್ಯಾ ಪರ್ಮಾಣೆಂ: ‘ರೆಜೀನಾ’ ಮಂಜಿ ಆಸ್‍ಲ್ಲೆ ಕಡೆನ್ ಥಾವ್ನ್ ಚಡುಣೆಂ ಪಾಂಯ್ಶಿಂ ವಾಂವಾಂ ತಿತ್ಲ್ಯಾಚ್ ಪಯ್ಸ್ ‘ಜಲಬಾಲೆ’ ನಾಂವಾಚಿ ಏಕ್ ಮಂಜಿ ಆಸ್‍ಲ್ಲಿ. ತಾಂತುಂ – ಉಜ್ವಾಡ್ ಜಾತಾ ತಿತ್ಲೊ ಉಣೊ ಆಸೊನ್ – ಚಡುಣೆಂ ಧಾ ಪಂದ್ರಾ ಜಣ್, ಅಮ್ಸೊರಾನ್ ವಾವುರ್ತಾಲೆ… ಮಂಜಿ, ಸಕಾಳಿಂಚ್ಯಾ ಭರ್ತೆ ವೆಳಾರ್ ಭಾಯ್ರ್ ಸರೊಂಕ್ ತಯಾರಾಯ್ ಕರ್ತಾ ಮ್ಹಳ್ಳಿಂ ಖುಣಾಂ ಸ್ಪಷ್ಟ್ ಆಸ್‍ಲ್ಲಿಂ.

“ಬರೆಂ ಜಾಲೆಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಹೆರ್ ಕಾಂಯ್?”

“ಹಾಂವ್, ಮಂಜೆಕ್ ತೆಂಕೊನ್‍ಂಚ್, ಕಾಳೊಕಾಂತ್ ಪೊಂಗಾಯ್ ರಾವವ್ನ್ ಆಸ್‍ಲ್ಲೊಂ. ತಿತ್ಲ್ಯಾರ್, ಫುಡ್ಲ್ಯಾ ವಾಟೆನ್, ‘ಹೋಶ್ಯಾರ್!’ ಮ್ಹಳ್ಳೊ ಆವಾಜ್ ಜಾಲೊ.”

“ಕಿತ್ಯಾಕ್ ಜಾವ್ಯೆತ್?” ಸರ್ದಾರಾಚ್ಯಾ ಸವಾಲಾಂತ್ ಆತುರಾಯ್ ದಿಸ್ಲಿ.

“ಸರ್ಕಾರಿ ಹೊಡೆಂ ಯೇವ್ನ್, ಸರ್ವ್ ಮಂಜ್ಯೊ, ತಾರ್ವಿಣಿ ಆನಿ ತಸಲ್ಯಾ ವಾಹನಾಂಕ್ ತಪಾಸುನ್ ಪರ್ತ್ಯಾನ್ ಪರ್ವಣ್ಗಿ ದಿಲ್ಯಾ ಶಿವಾಯ್ ತಾಣಿಂ ಭಾಯ್ರ್ ವಚೊಂಕ್ ಆಡ್ವಾರ್ಲಾಂ ಮ್ಹಣ್ ಆವಾಜ್ ದಿಲೊ.”

“ಪರಿಣಾಮ್?”

“ಮಂಜೆಂತ್ಲೆ ಮಾನಾಯ್ ತಾಪ್ಲೆ…” ಮ್ಹಣೊನ್ ನಾವಿಕಾನ್ ಆಯ್ಕಲ್ಲಿ ಗಜಾಲ್ ಸಾಂಗ್ಲಿ. “ಸರ್ಕಾರಿ ಜಣ್, ಖಡಾ ತಾಕಿದ್ ದೀವ್ನ್, ವೆಗಿಂ ತಡಿಕ್ ಪಾಟಿಂ ಗೆಲ್ಯಾತ್” ಮ್ಹಣೊನ್ ತಾಣೆಂ ವರ್ದಿ ಆಖೇರ್ ಕೆಲಿ.

“ತುವೆಂ ಬರೆಂ ಕೆಲೆಂಯ್” ಮ್ಹಣಾಲೊ ಸರ್ದಾರ್. ಪುಣ್ ತೊ ಚಿಂತುಂಕ್ ಲಾಗ್ಲೊ, ಆನಿ ಥೊಡ್ಯಾ ವೆಳಾನ್ ಆಪ್ಲಿಂ ಚಿಂತ್ನಾಂ ಹೆರಾಂಕ್ ಆಯ್ಕಾ ಸಾರ್ಕಿಂ ತಾಣೆಂ ಉಚಾರ್ಲಿಂ:

“ನವ್ಯಾ ಖಿಲ್ಲೆದಾರಾಚ್ಯಾ ಜಣಾಂನಿ ಕಾಮ್ ಜಟ್ಪಟ್ ಕೆಲಾಂ. ಪುಣ್, ಮ್ಹಜೆಂ ಯೋಜನ್ ತಾಂತುಂ ಥೊಡೆಂ ಶಿರ್ಕಲಾಂ. ದೆಕುನ್, ಸರ್ಕಾರಿ ಹುದ್ದೆದಾರಾಂನಿ ತಾರ್ವಟಿ ಶಿಪಾಯಾಂಕ್ ಘೆವ್ನ್, ತ್ಯಾ ಮಂಜೆಕ್ ದಾಡ್ ಘಾಲ್ಚ್ಯಾ ಆದಿಂ – ಆಮಿ ಥಂಯ್ ವಚೊನ್, ಪಾಟಿಂ ಯೇವ್ನ್ ಪಾವಜಾಯ್!”

ಹಾಂಗಾಸರ್ ಜಾಲ್ಯಾರೀ ತಾಣೆಂ, ಅಂದಾಜಾನ್, ಧುಂವ್ರಾಂತ್ ಫಾರ್ ಸೊಡ್‍ಲ್ಲೊ. ಎಕಾದಾವೆಳಾ, ತ್ಯಾ ಮಂಜೆಕ್ ಸರ್ಕಾರಿ ಮನಿಸ್ ದಾಡ್ ಘಾಲ್ತಿತ್, ಆನಿ ಜರ್, ಷೇರ್ ಖಾನ್ ಆನಿ ಮಾನಿನ್ ಮೋನಿಕಾ ಥಂಯ್ಸರ್ ಸಾಂಪಡ್ತಿತ್, ತರ್ ಮೋನಿಕಾಯೀ ಝಡ್ತೆಕ್ ಉಬಿ ಜಾವ್ನ್, ಹೆರ್ ಥೊಡ್ಯಾ ಸಮಸ್ಯಾಂಕ್, ನಾಲಿಸಾಯೆಕ್ ಆನಿ ಕಷ್ಟಾಂಕ್ ಇಡೆಂ ಜಾಯ್ತ್ ಮ್ಹಣ್ ಮತಿಂತ್ ತಾಣೆಂ ತರ್ಕ್ ಕೆಲೆಂ. ತ್ಯಾ ಶಿವಾಯ್ ಷೇರ್ ಖಾನಾ ವರ್ವಿಂಚ್, ಪರಾರಿ ಖಿಲ್ಲೆದಾರಾಚೊ ಆನಿ ವೆರೊನಿಕಾಚೊ ಪತ್ತೊ ಧರುಂಕ್ ವಾಟ್ ಉಗ್ತಿ ಜಾವ್ಯೆತ್ ಮ್ಹಣ್ ತಾಚೆಂ ಅಂತಸ್ಕರ್ನ್ ಉಲಯ್ತಾಲೆಂ.

ನಿಜಾಯ್ಕೀ, ಸರ್ಕಾರಿ ಶಿಪಾಯಾಂನಿ ದಾಡ್ ಘಾಲಿಜಾಯ್ ಜಾಲ್ಯಾರ್, ರಾತ್ ಉತ್ರಾಜಾಯ್ ಮ್ಹಣ್ ಸರ್ದಾರ್ ಸಿಮಾಂವ್ಕ್ ಕಳಿತ್ ಆಸ್‍ಲ್ಲೆಂ. ದೆಕುನ್ ತುರ್ತಾನ್ ತೊ ಕಾರ್ಯಾಕ್ ದೆಂವ್ಲೊ.

ಆಪ್ಲ್ಯಾ ಸವಾರಾಂ ಸಾಂಗಾತಾ, ಮಂಜೆಂತ್ಲ್ಯಾಂಕ್‍ಯೀ ಮೆಳವ್ನ್, ಪಂದ್ರಾ ಜಣಾಂ ಮಾನಾಯಾಂಕ್ ಮಟ್ವ್ಯೊ ಭಾಲಿಯೊ ಆನಿ ಲಾಠಿಂಚಿಂ ಹಾತೆರಾಂ ದೀವ್ನ್, ತಾಂಕಾಂ ತೀನ್ ಹೊಡ್ಯಾಂನಿ ಘೆವ್ನ್ ಸರ್ದಾರ್ ಸಿಮಾಂವ್, ಭಾಯ್ರ್ ಸರ್ಲೊ. ತಾಣೆಂ ಮಾತ್ರ್ ಆಪ್ಲಿ ತಲ್ವಾರಿಚಿ ಕೋಶಿ, ಆನಿ ಇಲೂದೆಚ್ಯಾ ವಸ್ತ್ರಾಂತ್ ರೆವ್ಡಾವ್ನ್ ಏಕ್ ಪೆಟುಲ್ ಬಗ್ಲೆಕ್ ಘೆತ್‍ಲ್ಲೆಂ.

ಕಸಲೊಚ್ ಉಜ್ವಾಡ್ ನಾಸ್ತಾಂ ಆನಿ ಆವಾಜ್ ಕರಿನಾಸ್ತಾನಾ ‘ಜಲಬಾಲೆ’ ಮಂಜೆಚ್ಯಾ ಸಾವ್ಳೆಂತ್ ತೆ ಪಾವ್ಲೆ. ಕಿತೆಂ ಆನಿ ಕಶೆಂ ಕರಿಜಾಯ್ ಮ್ಹಣ್ ತಾಣೆಂ ತಾಂಕಾಂ ಪಯ್ಲೆಂಚ್ ಸಾಂಗೊನ್ ದಿಲ್ಲೆಂ.

ದೋನ್ ಹೊಡಿಂ, ದೋನ್ ಪೊಂತಾರ್ ಕಾಳೊಕಾಂತ್ ರಾವ್ಲಿಂ. ಸರ್ದಾರ್ ಸಿಮಾಂವ್ ಆಸ್‍ಲ್ಲೆಂ ಹೊಡೆಂ ಮಧೆಂ ಶಿಡಿ ದೆಂವಂವ್ಚೆ ಕಡೆನ್ ಆಯ್ಲೆಂ.

“ಹೋಯ್!” ಮ್ಹಣಾಲೊ ತೊ ಹಳ್ತಾನ್. ಜವಾಬ್ ನಾ. ಮಂಜೆ ಭಿತರ್ಲೊಯೀ ಆವಾಜ್ ಬಂದ್ ಜಾಲೊ. ಥೊಡ್ಯಾ ವೆಳಾನ್, ಸರ್ದಾರಾನ್ ಪರ್ತ್ಯಾನ್ ಆವಾಜ್ ಕೆಲೊ. ಜವಾಬ್ ನಾ. ತಿಸ್ರೆ ಪಾವ್ಟಿಂ ತಾಣೆಂ ಉಲೊ ದಿಲೊ. ಜವಾಬ್ ಮ್ಹಳ್ಳೆಪರಿಂ, ಭಿತರ್ ಥಾವ್ನ್ ಸ್ತ್ರೀಯೆಚಿ ಏಕ್ ಕಿಂಕ್ರಾಟ್ ಆನಿ ಥಾಪ್ಡಾಚೊ ಆವಾಜ್ ಆಯ್ಕಲೊ.

ಸರ್ದಾರ್ ಸಿಮಾಂವ್ನ್, ಕಾಳೊಕಾಂತ್ ದಾಂತ್ ಚಾಬ್ಲೆ.

ಮಂಜೆಚ್ಯಾ ಮಾಳ್ಯಾರ್ ಉಜ್ವಾಡ್ ದಿಸ್ಲೊ.

“ಹೋಯ್!”

“ಕೋಣ್ – ಕಿತೆಂ ಜಾಯ್?” ಮಂಜೆಂತ್ ಥಾವ್ನ್ ಸವಾಲ್ ಆಯ್ಲೆಂ.

“ಮಂಜೆಂತ್ ಕೊಣೀ ಕ್ರಿಸ್ತಾಂವ್ ಸ್ತ್ರೀ ಪುಣೀ ಕೈದಿ ಆಸ್ಲ್ಯಾರ್, ತಿಕಾ ಸೊಡಂವ್ಕ್ ಮುಕ್ತೆ ಧನ್ ಹಾಡ್ಲಾಂ.”

“ಕೊಣೆಂ ಧಾಡ್ಲಾಂ?”

“ತಿಚ್ಯಾ ಮಿತ್ರಾಂನಿ.”

“ಕಿತ್ಲೆಂ?”

“ಶೆಂಬೊರ್ ಹೂನ್ ಆನಿ ಭಾಂಗಾರ್.”

“ಹೊಡ್ಯಾಂತ್ ಕಿತ್ಲೆ ಜಣ್ ಆಸಾತ್?”

“ಪಾಂಚ್ ಜಣ್.”

“ದಿರ್ವೆಂ ಘೆವ್ನ್ ದೊಗಾಂನಿ ವಯ್ರ್ ಯೆವ್ಯೆತ್.”

ನಿಮಾಣ್ಯಾ ಕಾಳಾಕ್ ಜಾಲ್ಯಾರೀ, ನಾಣ್ಯಾಚಿ ಅಬ್ಳಾಯ್ ಸುಟನಾತ್‍ಲ್ಲ್ಯಾ ಸಂಯ್ಬಾಚ್ಯಾ ಮನ್ಶ್ಯಾಂಕ್ ಸರ್ದಾರ್ ಸಿಮಾಂವ್ ಬರೊ ವಳ್ಕತಾಲೊ.

“ಪುಣ್” ಮ್ಹಣಾಲೊ ತೊ. “ದಿರ್ವೆಂ ತುಮ್ಚ್ಯಾ ಹಾತಾಕ್ ಮೆಳ್ಳ್ಯಾ ಉಪ್ರಾಂತ್, ತುಮ್ಚಿ ಭಾಸ್…”

“ಜಾಯ್ ಜಾಲ್ಯಾರ್ ಪಾತ್ಯೆಯಾ…” ಮಂಜೆಂತ್ಲಿ ಜವಾಬ್. “ದಿರ್ವೆಂ ಆಮ್ಚ್ಯಾ ಹಾತಾಂತ್ ದೀವ್ನ್ – ತುಮ್ಚ್ಯಾ ಮನ್ಶ್ಯಾಕ್ ವ್ಹರ್ಚಿ ಜವಾಬ್ದಾರಿ ತುಮ್ಚಿ!”

“ಜಾಯ್ಶೆಂ ನಾ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಮುಕ್ತೆ ಧನ್ ದಿಂವ್ಚ್ಯಾ ಆನಿ ಘೆಂವ್ಚ್ಯಾ ಕಾಯ್ದ್ಯಾಂ ಪ್ರಕಾರ್‌ಚ್ ಚಲಜಾಯ್. ತುಮ್ಚೆ ಪಾಂಚ್ ಜಣ್ ಸಕಯ್ಲ್ ಯೇಂವ್ದಿತ್ ಆನಿ ದಿರ್ವೆಂ ಮೆಜುನ್, ಪಳೆವ್ನ್ ಹಾಂಗಾ ರಾವೊಂದಿತ್. ತ್ಯಾ ವೆಳಾರ್ ಆಮ್ಚೆ ದೋಗ್ ಜಣ್ ಮಂಜೆಂತ್ ಯೇವ್ನ್…”

“ನಸ್ರಾನಿ ರಾಜ್‍ದ್ರೋಹಿಂಕ್ ಜಾಲ್ಯಾರೀ ಕಾಯ್ದೆ ಬರೇ ಕಳಿತ್ ಆಸಾತ್. ಜಾಂವ್. ಪಯ್ಲೆಂ ತುಮ್ಚೆ ಜಣ್ ವಯ್ರ್ ಯೇಂವ್ದಿತ್.”

“ಉಜ್ವಾಡ್?”

“ಸಾಧ್ಯ್ ನಾ. ರಾಜ್ವಾಂಚಿ ಶಿಡಿ ದೆಂವಯ್ತಾಂವ್.”

“ತಶೆಂ ಜಾಂವ್.”

ರಾಜ್ವಾಂಚಿ ಶಿಡಿ ಸಕಯ್ಲ್ ಪಾವ್ಲಿ. ತಿತ್ಲ್ಯಾ ವೆಳಾನ್, ಬಗ್ಲೆನ್ ಆಸ್‍ಲ್ಲಿಂ ಹೊಡಿಂಯೀ ಲಾಗಿಂ ಪಾವ್ಲಿಂ. ಉಪ್ರಾಂತ್ಲಿ ಗಜಾಲ್ ವಿದ್ಯುದ್ವೇಗಾನ್‍ಶೆಂ ಘಡೊನ್ ಗೆಲಿ. ಶಿಡಿಯೆಚ್ಯಾ ರಾಜ್ವಾಂಕ್ ಪಾಕ್ಯಾಂಪರಿಂ ಉಮ್ಕಳೊನ್ ಸರ್ದಾರ್ ಸಿಮಾಂವ್ಚೆ ಮಾನಾಯ್ ಮಂಜೆಂತ್ ಪಾವ್ಲೆ. ತೀನ್‍ಯೀ ಹೊಡಿಂ ಎಕಾ ರಾಜ್ವಾನ್ ಗುಂತುನ್ ಘೆವ್ನ್ ತೇಗ್ ಜಣ್ ಸಕಯ್ಲ್ ಚಿಕ್ಕೆ ಪಯ್ಸ್ ರಾವ್ಲೆ. ಮಂಜೆಂತ್ ವ್ಹಡ್ ಏಕ್ ಗೊಂದೊಳ್‍ಚ್ ಜಾಲೊ. ಮಂಜೆಂತ್ ಉಬೆ ಆಸ್‍ಲ್ಲೆ ಕಲಾಸಿ, ಲಾಠಿಂಚ್ಯಾ ಮಾರಾಂನಿ ಪರ್ತಲೆ. ಥೊಡೆ ಆಡ್ ಪಡ್ಲೆ, ಥೊಡೆ ಭಿಯಾನ್ ಭಾಯ್ರ್ ಉಡ್ಲೆ, ಆನಿ ಹೆರ್ ಥೊಡ್ಯಾಂಕ್ ಬಾಂಧುನ್ ಘಾಲೆಂ.

ಸರ್ದಾರ್ ಸಿಮಾಂವ್, ತುರ್ತಾನ್, ಮಂಜೆಚ್ಯಾ ಗರ್ಭಾಂತ್ಲ್ಯಾ ಆವರಾಕ್ ಗೆಲೊ. ಥಂಯ್ಸರ್ ಲಾಂಟಾನಾಚ್ಯಾ ಉಜ್ವಾಡಾಂತ್ ದೋಗ್ ಜಣ್ ತಲ್ವಾರಿ ಝಳ್ಕಾವ್ನ್ ತಾಕಾ ಮುಖಾರ್ ಆಯ್ಲೆ. ಸರ್ದಾರ್ ಸಿಮಾಂವ್ಚ್ಯಾ ತಲ್ವಾರಿನ್ ಆಪ್ಲೆಂ ಕಾಮ್ ಝಗ್ಲಾಣ್ಯಾಪರಿಂ ಜಾರಿ ಕೆಲೆಂ. ತಿಚೊ ಧೊಮೊಸ್, ಎಕ್ಲ್ಯಾಚೆಂ ಆದಾಂವ್ಚೆಂ ಫಳ್ ಚೀರ್ನ್ ಪಾಟಿಂ ಆಯಿಲ್ಲೆಪರಿಂಚ್, ಆನ್ಯೇಕ್ಲ್ಯಾಚ್ಯಾ ಭುಜಾಂತ್ ರಿಗ್ಲೊ. ಪಯ್ಲೆಂಚೊ ಗ್ರಾಯ್ಕ್ ಆಪ್ಲ್ಯಾಚ್ ರಗ್ತಾಂತ್ ಫುಗಾರ್ ಜಾವ್ನ್ ಪರ್ತತಾನಾ, ದುಸ್ರೊ, ತಲ್ವಾರ್ ಝಡೊನ್, ಏಕ್ ಚೀತ್ಕಾರ್ ದೀವ್ನ್ ಭಾಯ್ರ್ ಧಾಂವ್ಲೊ – ಷೇರ್ ಖಾನ್!

“ಧರಾ ತಾಕಾ!” ಸರ್ದಾರ್ ಸಿಮಾಂವ್ಚಿ ಹುಕುಮ್ ತಾಚ್ಯಾ ಮಾನಾಯಾಂಕ್ ಆಯ್ಕೊಂಚ್ಯಾ ಆದಿಂ, ಷೇರ್ ಖಾನ್, ನ್ಹಂಯ್ತ್ ಉಡೊನ್ ಕಾಳೊಕಾಂತ್ ಲಿಪ್ಲೊ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

ಆಮಿ ಫಾಯ್ಸ್ ಕೆಲ್ಲ್ಯೊ ಆದ್ಲ್ಯೊ ಕಾದಂಬರಿ