ವಿಶ್ವ ಕೊಂಕ್ಣಿ ಕೇಂದ್ರಾಂತ್ ಚಲ್ಲೆಂ ತೀನ್ ದಿಸಾಂಚೆಂ ‘ಪ್ರಗತಿ 2024’ ಕಾರ್ಯಾಗಾರ್
ಮಂಗ್ಳುರ್: ವಿಶ್ವ ಕೊಂಕಣಿ ಕೇಂದ್ರಾಂತ್ ‘ಪ್ರಗತಿ – 2024’ ವ್ಯಕ್ತಿತ್ವ್ ವಿಕಸನ್ ಆನಿ ಕೌಶಲ್ಯ್ ಅಭಿವೃದ್ಧಿ ಕಾರ್ಯಾಗಾರ್ ಅಗೋಸ್ತ್ 2, 3 ಆನಿ 4ವೆರ್ ಚಲ್ಲೆಂ.
ಶಕ್ತಿನಗರಾಚ್ಯಾ ವಿಶ್ವ ಕೊಂಕಣಿ ಕೇಂದ್ರಾಂತ್ ಶ್ರೀ ಪೂರ್ಣಾನಂದ ಸೇವಾ ಪ್ರತಿಷ್ಠಾನ ಆನಿ ದಕ್ಷಿಣ ಕನ್ನಡ ಜಿಲ್ಲಾ ಕುಡಾಳ್ ದೇಶಸ್ಥ ಆದ್ಯ್ ಗೌಡ್ ಬ್ರಾಹ್ಮಣ ಸಂಘ ಹಾಂಚ್ಯಾ ಜೋಡ್ ಆಶ್ರಯಾರ್, ಕುಡಾಳ್ ದೇಶಕರ್ ಸಮುದಾಯಾÁ್ಚ್ಯ ಪಿಯುಸಿ ಆನಿ ತತ್ಸಮಾನ್ ವಿದ್ಯಾರ್ಥಿಂಕ್ ವಸ್ತೆ ಸಂಗಿಂ ತೀನ್ ದಿಸಾಂಚಿ ಚಟುವಟಿಕ್ಯೊ ಆಧಾರಿತ್ ‘ಪ್ರಗತಿ -2024’ ವ್ಯಕ್ತಿತ್ವ್ ವಿಕಸನ್ ಆನಿ ಕೌಶಲ್ಯ್ ಅಭಿವೃದ್ಧಿ ಕಾರ್ಯಾಗಾರ್ ಆಯೋಜನ್ ಕೆಲ್ಲೆಂ.
ಅಗೋಸ್ತ್ 2ವೆರ್ ವಿಶ್ವ ಕೊಂಕಣಿ ಕೇಂದ್ರಾಚೊ ಅಧ್ಯಕ್ಷ್ ಸಿಎ ನಂದ ಗೋಪಾಲ್ ಶೆಣೈನ್ ದಿವೊ ಪೆಟವ್ನ್ ಉಗ್ತಾವಣ್ ಕೆಲೆಂ. ವಿದ್ಯಾರ್ಥಿಂಕ್ ಉದ್ದೇಸುನ್ ಉಲಯಿಲ್ಲ್ಯಾ ತಾಣೆಂ, “ಹೆಂ ಕಾರ್ಯಗಾರ್ ತಾಂಚ್ಯಾ ವ್ಯಕ್ತಿತ್ವಾಕ್, ಕೌಶಲ್ಯ್ ಆನಿ ಜೀವನಾಚಿಂ ಸವಾಲಾಂ ಫುಡ್ ಕರುಂಕ್ ಸಾಮರ್ಥಿ ಆನಿ ಸಂಸ್ಕಾರ್‍ಯುತ್ ಮೌಲ್ಯಾಂಕ್ ಗೌರವ್ ದಿಂವ್ಚ್ಯಾ, ಉರಂವ್ಚ್ಯಾ ಆನಿ ಉದ್ಧಾರ್ ಕರ್ಚ್ಯಾಕ್ ತರ್ಬೆತಿ ದಿತಾ” ಮ್ಹಣ್ ಸಾಂಗ್ಲೆಂ. ಕೊಂಕಣಿ ಸಮಾಜೆಕ್ ಹರ್ ಎಕ್ಲ್ಯಾನ್ ಸೆವಾ ದೀಜೆ, ತಾಚೆ ನಿಮ್ತಿಂ ಸಮಾಜ್ ಅಭಿವೃದ್ಧಿ ಜಾತಾ ಮ್ಹಳೆಂ.
ವಿಶ್ವ ಕೊಂಕಣಿ ಕೇಂದ್ರಾಚೊ ಟ್ರಸ್ಟಿ ಡಿ. ರಮೇಶ್ ನಾಯಕ್ ಮೈರಾ, ಪೂರ್ಣಾನಂದ ಸೇವಾ ಪ್ರತಿಷ್ಠಾನಾಚೊ ಅಧ್ಯಕ್ಷ್ ವಿಜಯ ಶೆಣೈ ಕೊಡಂಗೆ, ಕಾರ್ಯದರ್ಶಿ ಮುರಳಿಧರ್ ಪ್ರಭು ವಗ್ಗ, ಕುಡಾಳ್ ದೇಶಸ್ಥ ಆದ್ಯ್ ಗೌಡ್ ಬ್ರಾಹ್ಮಣ ಸಂಘಾಚೊ ಅಧ್ಯಕ್ಷ್ ಶ್ರೀನಿವಾಸ ಶೆಣೈ ಕೂಡಿಬೈಲು, ಕಾರ್ಯದರ್ಶಿ ದಯಾನಂದ ನಾಯಕ್ ಪುಂಜಾಲ್‍ಕಟ್ಟೆ ಆನಿ ಸುಧೀರ್ ನಾಯಕ್ ಅಮ್ಮೆಂಬಳ, ಸಂಜೀವ್ ಸಾವಂತ್ ಮರೋಳಿ, ಅನಂತ ಪ್ರಭು ಮರೋಳಿ, ಸುಜಾತ ರಮೇಶ್ ಸಾಮಂತ್, ಸುಚಿತ್ರ ರಮೇಶ್ ನಾಯಕ್ ಉಪಸ್ಥಿತ್ ಆಸ್‍ಲ್ಲಿಂ.
ವಿಶ್ವ ಕೊಂಕಣಿ ಕೇಂದ್ರ್ ಕಾರ್ಯ ನಿರ್ವಹಣಾಧಿಕಾರಿ ಡಾ. ಬಿ. ದೇವದಾಸ್ ಪೈನ್ ಶಿಬಿರಾರ್ಥಿಂಕ್ ಬರೆಂ ಮಾಗ್ಲೆಂ. ಸಂಪನ್ಮೂಲ್ ವ್ಯಕ್ತಿ ಕುಡ್ಪಿ ವಿದ್ಯಾ ಶೆಣೈ ಉಪಸ್ಥಿತ್ ಆಸ್‍ಲ್ಲಿ. ಡಾ. ವಿಜಯಲಕ್ಷ್ಮಿ ನಾಯಕಾನ್ ಸ್ವಾಗತ್ ಪ್ರಾಸ್ತಾವಿಕ್ ಉತ್ರಾಂ ಉಲಯ್ಲಿ.
Send your Feedback to: budkuloepaper@gmail.com
