ಚಿಕಾಗೊ: ಎಂಕೆಸಿಎ ಸಂಘಟನಾಕ್ ನವೆ ಹುದ್ದೆದಾರ್
Posted on : September 13, 2023 at 1:18 PM
ಚಿಕಾಗೊ: ಹಾಂಗಾಚ್ಯಾ ಇಲಿನಾಯ್ಸ್, ಸೈಂಟ್ ಹ್ಯೂಬರ್ಟ್ ಇಗರ್ಜೆಚ್ಯಾ ಸಭಾಸಾಲಾಂತ್ ಚಲ್‍ಲ್ಲ್ಯಾ ಜಮಾತೆಂತ್ ಮ್ಯಾಂಗಲೋರ್ ಕೊಂಕಣ್ ಕ್ರಿಶ್ಚಿಯನ್ ಎಸೋಸಿಯೇಶನಾಕ್ 2024-26ವ್ಯಾ ವರ್ಸಾಂಕ್ ನವ್ಯಾ ಹುದ್ದೆದಾರಾಂಚಿ ವಿಂಚವ್ಣ್ ಜಾಲ್ಯಾ.
ನವೊ ಅಧ್ಯಕ್ಷ್ ಜಾವ್ನ್ ಪ್ರಗತಿ ಪಿಂಟೊ, ಉಪಾಧ್ಯಕ್ಷ್ ಜಾವ್ನ್ ಲಿಯೊನಾರ್ಡ್ ಲೋಬೊ ಶೆಣೈ, ಕಾರ್ಯದರ್ಶಿ ಜಾವ್ನ್ ಸ್ಯಾವಿಯೊ ಪಾಯ್ಸ್, ಸಹ ಕಾರ್ಯದರ್ಶಿ ಜಾವ್ನ್ ಲೂನಾ ಡಿಅಬ್ರೇವೊ ಆನಿ ಖಜಾಂಚಿ ಜಾವ್ನ್ ಜೇಮ್ಸ್ ಸಲ್ಡಾನ್ಹಾ ನೇಮಕ್ ಜಾಲ್ಯಾತ್. ಹಾಂಚಿ ಅವ್ಧಿ ದೋನ್ ವರ್ಸಾಂಚಿ ಆಸ್ತೆಲಿ.
21ವ್ಯಾ ವರ್ಸಾಚೆಂ ಮೊಂತಿ ಫೆಸ್ತ್ ಸಂಭ್ರಮುಂಕ್ ಎಂಕೆಸಿಎನ್ ಆಯೋಜನ್ ಕೆಲ್ಲ್ಯಾ ಕಾರ್ಯಾಂತ್ ನವ್ಯಾ ಹುದ್ದೆದಾರಾಂಚಿ ವಿಂಚವ್ಣ್ ಚಲ್ಲಿ. ಹ್ಯಾ ಸಂದರ್ಭಾರ್ ಫಾ. ಹೆನ್ರಿ ಸಿಕ್ವೇರಾಚ್ಯಾ ಫುಡಾರ್ಪಣಾ ಖಾಲ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ನವೆಂ ಬೆಂಜಾರ್ ಕರ್ನ್ ಮೊಂತಿ ಫೆಸ್ತಾಚೆಂ ಆಚರಣ್ ಕೆಲೆಂ.
ಸ್ಥಾಪಕ್ ಅಧ್ಯಕ್ಷ್ ಡೊ. ಆಸ್ಟಿನ್ ಡಿಸೋಜ ಪ್ರಭುನ್ ಸ್ವಾಗತ್ ಕರ್ನ್, ಆಮ್ಚ್ಯಾ ಸಂಸ್ಕೃತೆಚೊ ಮಹತ್ವ್ ಆನಿ ತೊ ಜಗವ್ನ್ ದವರ್ಚಿ ಗರ್ಜ್ ವಿವರಿಲಿ. ಎಂಕೆಸಿಎನ್ ಎದೊಳ್ ಪರ್ಯಾಂತ್ ಕೆಲ್ಲ್ಯಾ ವಾವ್ರಾ ವಿಶಿಂ ತಾಣೆಂ ಮಾಹೆತ್ ದಿಲಿ. ಉಪ್ರಾಂತ್ ತಾಣೆಂ ಪ್ರಸ್ತುತ್ ಸಮಿತಿಚಿ ವಳಕ್ ಕರ್ನ್ ದಿಲಿ.
ತ್ಯಾ ಉಪ್ರಾಂತ್ ನವ್ಯಾ ಹುದ್ದೆದಾರಾಂಚಿ ವಿಂಚವ್ಣ್ ಚಲ್ಲಿ. ಆದ್ಲೊ ಅಧ್ಯಕ್ಷ್ ಸ್ಟೀವನ್ ಡಿಸೋಜಾನ್ ಕಾರ್ಯೆಂ ಚಲವ್ನ್ ನವ್ಯಾ ಹುದ್ದೆದಾರಾಂಚಿ ವಳಕ್ ಕರ್ನ್ ದಿಲಿ. ಸಾಂಸ್ಕೃತಿಕ್ ಆನಿ ಮನರಂಜನಾ ಉಪ್ರಾಂತ್ ಮೊಂತಿ ಫೆಸ್ತಾಚೆಂ ಸಹ ಭೋಜನ್ ಸೆವ್ಲೆಂ.
ಬುಡ್ಕುಲೊ ಕೊಂಕ್ಣಿ ವಾಟ್ಸಪ್ ಗ್ರೂಪಾಕ್ ಭರ್ತಿ ಜಾಂವ್ಕ್ ಲಿಂಕ್ https://chat.whatsapp.com/GVbz61zjpZa8PN1wE7YSSL
Send your Feedback to: budkuloepaper@gmail.com
