ಸಪ್ತೆಂಬರ್ 17ವೆರ್ ಬಸ್ರಿಕಟ್ಟೆಂತ್ ಕೊಂಕ್ಣಿ ರಾಕಣ್ ಸಂಚಾಲನ್ ಥಾವ್ನ್ ಮೊಂತಿ ಫೆಸ್ತ್ ಆನಿ ಕೊಂಕ್ಣಿ ಉತ್ಸವ್
Posted on : September 13, 2023 at 9:00 AM
ಮಂಗ್ಳುರ್: ಕೊಂಕ್ಣಿ ರಾಕಣ್ ಸಂಚಾಲನ್ (ರಿ.) ಚಿಕ್‍ಮಗ್ಳುರ್ ಆನಿ ಹಾಸನ್ ತರ್ಫೆನ್ ತಶೆಂ ಬಸ್ರಿಕಟ್ಟೆ ಘಟಕಾಚ್ಯಾ ಜೋಡ್ ಆಶ್ರಯಾ ಖಾಲ್ ಸಪ್ತೆಂಬರ್ 17ವೆರ್ ಆಯ್ತಾರಾ ಮೊಂತಿ ಫೆಸ್ತಾಚೆಂ ಆಚರಣ್ ಆನಿ ಕೊಂಕ್ಣಿ ಉತ್ಸವ್ ಮಾಂಡುನ್ ಹಾಡ್ಲಾ. ಬಸ್ರಿಕಟ್ಟೆ ಫಿರ್ಗಜೆಚ್ಯಾ ಬಿಲಾಲುಕೊಪ್ಪ ಹಿಮಗಿರಿ ಎಸ್ಟೇಟಿಚ್ಯಾ ಹೋಮ್ ಸ್ಟೇ ಆಂಗ್ಣಾಂತ್ ಹೊ ಸಂಭ್ರಮ್ ಚಲ್ತಲೊ.
ಸಕಾಳಿಂ 10 ವೊರಾರ್ ಮಿಸಾಚ್ಯಾ ಬಲಿದಾನಾ ಸವೆಂ ಕಾರ್ಯಾಚಿ ಸುರ್ವಾತ್ ಜಾತೆಲಿ. 11 ವೊರಾರ್ ವೆದಿ ಕಾರ್ಯೆಂ ಆರಂಭ್ ಜಾತೆಲೆಂ. ವೆವೆಗ್ಳ್ಯಾ ಫಿರ್ಗಜ್ ಘಟಕಾಂಚ್ಯಾ ಪಂಗ್ಡಾಂ ಥಾವ್ನ್ ಸಾಂಸ್ಕೃತಿಕ್ ಕಾರ್ಯಿಂ ಆನಿ ಪ್ರತಿಭಾ ಪ್ರದರ್ಶನ್ ಆಸ್ತೆಲೆಂ. ಉಪ್ರಾಂತ್ ಶೃಂಗೇರಿ ಕ್ಷೇತ್ರಾಚೊ ಶಾಸಕ್ ಮಾನೆಸ್ತ್ ರಾಜೇಗೌಡಾಕ್ ಸನ್ಮಾನ್ ಚಲ್ತಲೊ. ಕಾರ್ಯಾ ಉಪ್ರಾಂತ್ ಜೆವಣ್ ಆನಿ ಬೈಲಾ ನಾಚ್ ಆಸಾ ಕೆಲಾ ಮ್ಹಣ್ ಆಯೋಜಕಾಂನಿ ಕಳಯ್ಲಾಂ.
ಹ್ಯಾ ಕಾರ್ಯಾಕ್ ಹಾಜರ್ ಜಾಂವ್ಕ್ ಸಂಘಟಕಾಂ ತರ್ಫೆನ್ ಅಧ್ಯಕ್ಷ್ ಜೋಕಿಮ್ ಡಿಸೋಜ, ಮೂಡಿಗೆರೆ, ಕಾರ್ಯದರ್ಶಿ ವಿವಿಯನ್ ಡಿಸೋಜ, ಮೂಡಿಗೆರೆ, ಖಜಾನ್ದಾರ್ ಸಿಲ್ವೆಸ್ಟರ್ ಸಲ್ಡಾನ್ಹಾ, ಸಕ್ಲೇಶ್‍ಪುರ್ ತಶೆಂಚ್ ಹಿಮಗಿರಿ ಎಸ್ಟೇಟಾಚೊ ಗುರ್ಕಾರ್ ಪ್ರಮೋದ್ ಪಿಂಟೊನ್ ಸಮೇಸ್ತಾಂಕ್ ಆಪವ್ಣೆಂ ದಿಲಾಂ. ಬಸ್ರಿಕಟ್ಟೆ ಫಿರ್ಗಜೆಚ್ಯಾ ವಿಗಾರ್ ಆನಿ ಲೊಕಾನ್ ಕಾರ್ಯಾಕ್ ಸಹಕಾರ್ ದಿಲಾ.
ಪಾಟ್ಲ್ಯಾ 17 ವರ್ಸಾಂ ಥಾವ್ನ್ ಕೊಂಕ್ಣಿ ರಾಕಣ್ ಸಂಚಾಲನಾ ತರ್ಫೆನ್ ಹ್ಯಾಚ್ ಸುವಾತೆಂತ್ ಮೊಂತಿ ಫೆಸ್ತ್ ಆನಿ ಹೆರ್ ಕೊಂಕ್ಣಿ ಕಾರ್ಯಿಂ ಗದ್ದಾಳಾಯೆನ್ ಚಲೊನ್ ಆಯ್ಲ್ಯಾಂತ್. ಕೊಂಕ್ಣಿ ಸಂಗೀತ್ ಸಾಮ್ರಾಟ್ ಹೆನ್ರಿ ಡಿಸೋಜಾಚ್ಯಾ ಪದಾಂಚಿ ನೈಟ್ ಯೇ ಯೇ ಕಾತ್ರಿನಾ ಹಾಂಗಾಸರ್‌ಚ್ ಚಲ್‍ಲ್ಲಿ. ಪಶ್ಚಿಮ್ ಘಾಟಾಚೊ ವಾಂಟೊ ಜಾವ್ನಾಸೊನ್ ಅದ್ಭುತ್ ದೃಶ್ಯಾವಳಿ ಆಟಾಪ್ಚೊ ಮರ್ತಿ ಗುಡೊ ಹಿಮಗಿರಿ ಎಸ್ಟೇಟಾಚ್ಯಾ ಹೋಮ್ ಸ್ಟೇ ಸಾಮ್ಕಾರ್‌ಚ್ ಆಸೊನ್ ಪ್ರಕೃತಿ ರಸಿಕಾಂಕ್ ಸಂತೊಸಾಚ್ಯಾ ನಾದಾಂತ್ ಧಲಯ್ತಾ. ಪರಿಸರ್ ಪ್ರೇಮಿಂಕ್ ಸಾಂಗ್‍ಲ್ಲೊ ಜಾಗೊ ಹೊ.
ಮಾಂಡ್ ಸೊಭಾಣಾನ್ ನಿರ್ಮಿಲ್ಲ್ಯಾ ಅಸ್ಮಿತಾಯ್ ಸಿನೆಮಾಚಿಂ ಜಾಯ್ತಿಂ ದೃಶ್ಯಾಂ ಹ್ಯಾಚ್ ಎಸ್ಟೇಟಾಂತ್ ಚಿತ್ರೀಕರಣ್ ಕೆಲ್ಯಾಂತ್.
ಬುಡ್ಕುಲೊ ಕೊಂಕ್ಣಿ ವಾಟ್ಸಪ್ ಗ್ರೂಪಾಕ್ ಭರ್ತಿ ಜಾಂವ್ಕ್ ಲಿಂಕ್ https://chat.whatsapp.com/GVbz61zjpZa8PN1wE7YSSL
Send your Feedback to: budkuloepaper@gmail.com
